2 WASESALONIKE

¹ Paulo, Siliwano na Timoseyo, Kudikanisa dyuwile Sesalonike mwi Mulungu Baba ne Mundewa wetu Yesu Kilisito: ² Mboto yuwe ukwenu ne idigoya kulawa kwe Mulungu Baba ne Mundewa wetu Yesu Kilisito. ³ Chikulumba Mulungu majuwa gose kosoko yenu, wandugu setu kosoko dihuwi dyenu dikukula lugano na fina wendo we chila munhu ne miyagwe ukugendelela. ⁴ Hambiya aseye chiwecho chikiyona kosoko yenu mumakanisa ge Mulungu kosko yo ludole lwo mwinawo na dihuwi mumagesa na magayo gose gomukulokela. ⁵ Ago gose gakonesa fina ulamulaji we Mulungu wa chawelu uleke mutaliligwe fina mukwingila muundewa we Mulungu uwo womukwidasika nawo. ⁶ Muchawelu yakwe Mulungu kowaliha magayo awaya awakumugolosani nyeye mugaye, ⁷ na kuwaliha nyeye mukwidasika chinyemi hamwedu na seye, nomo yakwijayagubuligwa Mundewa Yesu kulawa kulanga na malaika wakwe wene uludole ⁸ ne dililimba dye umoto kuwatosa awaya wamulemile Mulungu na awaya awasikwenda kuhulika imbuli swanu ye Mundewa wetu Yesu. ⁹ Nawo wakwija wagaya muuliganiso wa magayo ge minyaka na minyaka, kubaguliwa mumeso ge Mundewa na muditunyo dyakwe dikulu, ¹⁰ mudijuwa didyo dyoyakwija yatunyigwa na wasunhile wakwe na majumo ge dijuwa didyo muwanhu wakwe wamuhuwile kosoko uhomelesi wetu ukwenu hauhuwilika. ¹¹ Hambiya chikutasa majuwa gose kosoko yenu uleke Mulungu wetu yawataleni fina mukufaha mu lwinango lwakwe yawamemeleseni chila chiswanu ne umulimo we dihuwi, ¹² uleke disina dye Mundewa wetu Yesu Kilisito ditunyigwe.

¹ Hambiya imbuli yo kwija kwakwe Mundewa wetu Yesu Kilisito na kitang’anyila kwetu ne mwene ² chikuwatasani wandugu setu ingawagumeni lutwitwi mumadoga genu ama kuwenghani itisi ninga dya muhe ama mbuli kahi baluwa kulawa ukwetu konesa kifana dijuwa dye Mundewa difulisa kwija. ³ Na ninga munhu wowose yanghawadanhilise mudyodyose; kosoko dijuwa diya disikwija mpaka yalawanise imwihi iyalugutisigwe kumoto, imwana wo ubani ⁴ iyakulema na kiinula imwenyecho muchanhya mwa chila chikwinangwa mulungu ama ichikufugamiligwa, uleke yekale mwigoda dye dihekalu dye Mulungu, na kigamba imwene noMulungu imwecho. ⁵ Musikugelegela fina haniwatamilani simbuli sino kunyuma yakwe fonowile na nyeye? ⁶ Na hambiya mumanya ichikulemesa yanghalawanise, kolawanisa nomo chigele chwakwe chifikile. ⁷ Kosoko wihi hambiya ufulusa kukonga milimo yakwe, ninga mpaka iyakulemesa nomoyalegusigwe. ⁸ Na nomo imwihi yakulawanisa yuyo yekwija yabanigwa ne Mundewa Yesu kwa muye kulawa mumulomo wakwe na kumubulaga fibi kwa ugubulo wo kwija kwakwe. ⁹ Inija yakwe imwihi yo ni kifana nija ya Shetani mutogomi milimo na majumo makulu na fitangilo fyo udasi ¹⁰ na chila wihi kuwanhu waya awakwagilila, kosoko hawalema kuhonyigwa. ¹¹ Kosoko iyo iMulungu yakuwatumila ludole lwa lwa wihi kuwalongosa kuhuwila go udasi, ¹² Uleke waliganiswe wose awasihuwile ichawelu ninga hawandamila gehile. ¹³ Ninga chikumulumba Mulungu majuwa gose kosoko yenu nyeye wandugu setu wendigwa ne Mundewa kosoko Mulungu hakawasagulani nyeye muwe mamudyo ge nghonga muuhonyi kulokela kusunhigwa na Muhe na kuhuwila ichawelu. ¹⁴ Kosoko iyo hakawenangani kulokela mahubili ge imbuli swanu uleke mupate ditunyo dye Mundewa wetu Yesu Kilisito. ¹⁵ Hambiya wandugu setu imeni ngwingwingwi na kukolelesa mafuso gomukifusile ukwetu gowe ga mbuli mulomo ama baluwa. ¹⁶ Na Mundewa wetu Yesu imwenyecho ne Mulungu iBaba yachendile na kulokela mboto yakwe kachingha umi uholile na ihuwi iswanu, ¹⁷ yaigume ludole mimoyo yenu na kihuwisa muchila mulimo muswanu na mbuli.

¹ Wandugu sangu nikumalagisa kwa kugamba taseni kosoko yetu uleke imbuli ye Mundewa igendelele lugano mugati yenu, ² kamei nase chinghogwile mumikono ya wanhu wehile kosoko siyo wose wene dihuwi. ³ Ninga Mulungu muchawelu kowenghani ludole na kuwadimani na wihi. ⁴ Ninga china ihuwi mwiMundewa fina mukugolosa na mogolosa gochimusigilileni, ⁵ kahi Mundewa kowalongosa mimoyo yenu kuuwendo we Mulungu na muunyima ya Kilisito. ⁶ Hambiya chikuwalagisani wendigwa wetu mudisina dye Mundewa wetu Yesu Kilisito fina mulafeni mugati yenu imundugu wowose imudoba kosoko siyo malagiso kulawa ukwetu hata. ⁷ Kosoko anyeye muwecho mumanya fomukuhanangikwa kulondela ukwetu aseye fochowile na nyeye sichowile wadoba hata. ⁸ Sichidiile ndiya ya munhu na kuleka kuliha, ninga kwa ifuke misi ne chilo hachitogoma milimo uleke chinghamukache munhu wowose ikanda. ⁹ Ninga siyo kosoko sichagiligwe kuduya ila ni kosoko chuwe mbasi ya kwandamila wamonga. ¹⁰ Kahi hata fochowile na nyeye hachilagisa fina munhu wowose inghakutogoma mulimo indiya nayo yanghadiye. ¹¹ Kosoko chikuhulika ukwenu wamonga wasikwenda kutogoma milimo ninga wadiyage ichikutogomigwa na wayawo muhala. ¹² Hambiya wanhu kifana wo chikuwatasa na kuwalagisa mwisina dye Mundewa Yesu Kilisito watogome milimo kwa ludole uleke wapate chakudiya. ¹³ Wandugu munghasoke kugolosa maswanu. ¹⁴ Halika munhu yakulema kukola gatulumwe mubaluwa ino basi mughahangane naye uleke yapuwe. ¹⁵ Munghawone kifana wanghondo ninga wajameni kifana wandugu. ¹⁶ Hambiya Mundewa we dihewa yawengheni ihewa chigele chose na mugose. Mundewa yowe nanye mose. ¹⁷ Aniye Paulo, nikuwandika baluwa ino kwa mukono wangu nimwecho.Awuno no muwandiko wangu muchila baluwa yangu; nofonikoniandika. ¹⁸ Imboto ye Mundewa wetu Yesu Kilisito yuwe nanye mose.