2 PETULO

¹ Simoni Petulo imutumwa na Mutumigwa wa Yesu Kilisito, kuwose wena dihuwi fina idyetu duwile muchawelu ye Mulungu wetu ne Mundewa wetu Yesu Kilisito: ² Imboto ne dihewa dyongeseke ukwenu muumanyi we Mulungu ne we Mundewa wetu Yesu. ³ Uludole lwe ulungu lwakwe uwetu uchingha finhu fyose muumi, na mwe chimulungu kulokela umanyi wakwe yachinangile mwitunyo dyakwe imwecho na uswanu wose. ⁴ Kwakuchingha iliho ikulu na ihuwiso ikulu, fina kulokela gano chidahe kinega uwihi wuwile muchilunga kosoko ya usulumisi, uleke muwe wahangi we iyasili ye chilungu. ⁵ Kosoko iyo goloseni chigosi kwima mwihuwi kwa nyikala swanu na nyikala swanu muumanyi, ⁶ na muumanyi hamwedu ne chiasi, ne chiasi hamwedu na ufinyilisi, na muufinyilisi umo ulungu, ⁷ na muulungu umo uwendo we chindugu, na uwendo we chindugu hamwedu na uwendo. ⁸ Kosoko finhu fino finghowa ukwenu na kumema, fikuwagolosa munghowe wadoba na awasikweleka mamudyo go umanyi we Mundewa wetu Yesu Kilisito. ⁹ Kosoko wowose iyakuhungukiligwa finhu fino ni mudula hakudaha kona finhu fuwile kutali kahi kasimilwa kusunhigwa kwa wihi wakwe uya wa katali. ¹⁰ Hambiya wandugu sangu, konyeni kumanya lwinango lwenu na kusaguligwa kwenu kosoko munghagolosa nheifo musikudaha kutoa nghwalo.. ¹¹ Kosoko kwa njila yiyo, mokwinghigwa luneka lwa kwingila muundewa we Mundewa wetu, Mwihula Yesu Kilisito. ¹² Hambiya nowagelegesa simbuli asi, hata inghowa mufulusa kusimanya na kwenesigwa ne ichawelu ijile ukwenu. ¹³ Nani nikona fiswanu, muchigele nuwile mumutufi uno kuwagelegesa, ¹⁴ kulawa fonamanya fina kufa kwangu kumala kwija kifana Mundewa wetu Yesu Kilisito foyanyonese fiswanu. ¹⁵ Na nogolosa chila ludole uleke kukuleguka kwangu anyeye mudahe kugelegela mambo gano. ¹⁶ Kosoko sichandamile mbasi situngigwe kwa ubala ugele fowumanyike ukwenu uludole na kwija kwe Mundewa wetu Yesu Kilisito, ninga chigaluka wahomeleswi wonile kwa meso ukulu wakwe. ¹⁷ Kosoko hakahokela chogoho na itunyo kulawa kwe Mulungu Baba chigele dijwi kulawa mwitunyo dikulu fodyalonga kugamba, “Ayuno no Mwanangu, Mwendigwa wangu wonyendesigwe naye lugano.” ¹⁸ Aseye chiwecho hachidihulika dijwi dijo kulawa kulanga, ugele wochowile naye mwitunda disunhile. ¹⁹ Hambiya china mbuli ye ugonesi uwecho ukangale. Kahi yokuwa fiswanu inghowa motega sighutwi mudidino kifana taa ikwaka mwichisa, mpaka dijuwa dilawe, na inyelesi ya kumugingu kumulika mumimoyo yenu. ²⁰ Bosi ya gose mumanye dino, fina kwichaka ugonesi wa Mawandiko ulawile muutapita wa munhu imwenyecho, ²¹ kosoko hechaka ugonesi wowose winjile kwa nyenda ya munhu, ninga wanhu hawalonga kwa kulongoswa na Muhe Musunhile kulawa kwe Mulungu.

¹ Ninga walimu wo udasi hawalawanisa mugati ya wanhu, kifana ukwenu fokukwanga nako kuwe na walimu wa udasi, awakwigisa kwa ubala madoga gakubana. Wakumulema mpaka Mundewa yawagulile na kiigalila awecho kwangamila kwa habehi. ² Na matewa wokwandamila njila ya wihi, na kosoko ya walimu wano wo udasi injila ye chawelu yoligigwa. ³ Na mumelo wawo uwo wopata chinhu ukwenu kwa mbuli sa udasi. Uliganiso wawo ufuluka kulongigwa kulawa katali, siyo ya chaka na kwangamila kwawo hakukuleka. ⁴ Hambiya inghowa Mulungu hawalekile amalaika waya wagolose wihi, ninga hakawaguma kumoto na kuwoha muchifungo kusi ye dichisa mpaka uliganiso wije; ⁵ na inghowa hachilekile ichilunga chiya cha katali, hakamuhonya Nuhu, imuchawelu, hamwedu na wamonga mufungate chigele choyegale mafaluko muchilunga che wihi; ⁶ na kwa kubidula sikaya sa Sodoma na Gomola kuwa ifu hakawaliganisa uleke yuwe mbasi kuwanhu awesimumanyile Mulungu, ⁷ hakamuhonya Lutu, imuchawelu yendekwidasigwa ne wihi na awakubana. ⁸ ( kosoko ayuya imuchawelu yekale nawo ijuwa mpaka ijuwa hakakiidasa muuchawelu wakwe muchidoga kosoko ya nhenda sawo fina hakona na kuhulika), ⁹ kahi Mundewa kamanya kuwahonya wanhu wakwe kulawa mumagesa, na kuweka wechaka Mulungu mumagayo mpaka dijuwa dye uliganiso ¹⁰ lugano awaya wakwandamila usulumisi ne wihi wo umutufi na kubesa udaha. Wanhu wene ludole na kwenda, wasikogoha kuliga imutunyigwa ¹¹ ninga malaika, wakulu na udaha na ludole, hawakuwasongesela kuliganiso we Mundewa. ¹² Wanhu wano wakifana manyama ga kumbago gechaka, misungu gelekwa na kukoligwa na kukomigwa. Wakuliga gowasimanyile, na wakwija wakwagilila kifana makewe ga kumbago, ¹³ kugaya kokuwa kwawo kosoko ya kugolosa gehile. Wakutala kulewa kwawo nhemisi ni chinhu chiswanu. Wagaluka matonhe na wihi, na chinyala mufyakudiya fyenu fyo uwendo nomowakudiya nanyeye. ¹⁴ wena meso gamemile chilanga, wasikuleka kugolosa wihi. Wakwagilisa fidoga ifichaka ludole. Wene mimoyo ifusigwe ukobo. Wana waligitisigwe! ¹⁵ Waleka injila igoloke na wagilila, wakwandamila njila ya Balaamu mwana wa Basoli, yendile maliho ge wihi, ¹⁶ ninga hakagombeligwa kosoko ya nhenda sakwe sihile, dipunda isidikudaha kulonga hadilonga kwa ijwi dye chimunhu na kulemesa ugonesi uya. ¹⁷ Awano ni nhyoko sichaka meji na mafunde gakwandamila mheho; wene wekiligwa dichisa ikulu. ¹⁸ Kosoko wakulonga nonga ghulu so kitapa, kwa usulumisi we chimutufi na wihi, wakuwadanhilisa wanhu wakongile kuwatija waya wakugenda mudasi. ¹⁹ Wakuwahuwisa undekelelwa, ninga awene awecho ni watumwa wa wihi; kosoko wanhu ni watumwa kwa yuya yakuwagendesa. ²⁰ Kosoko inghowa, fowakumala kinega na wihi we chilunga kulokela umanyi we Mundewa wetu Yesu Kilisito, kamei wakoligwe keli na kusumwa basi inyuwa yawo ya ndumo ikuwa iha kusuma ye nghonga. ²¹ Kosoko hayuwa fiswanu ukwawo woile wasiimanyile njila ye chawelu kusuma kuimanya kamei kuleka dilagiso disunhile dijile ukwawo. ²² Ikuwa ni kifana imbasi ye chawelu ikugamba, “Dibwa dyuwila madeka gakwe,” na, “Nguluwe ikiyogile yuya kahi mumatope.”

¹ Aino hambiya, no baluwa ya keli yonimwandikilileni wendigwa, na musose simbili nikwinusa misungu yenu kwa kuwagelegesa; ² uleke mugelegele sinonga salongigwe na wagonesi wasunhile ne dilagiso dye Mundewa na dye Mwihula kulokela watumigwa wenu. ³ Iyilongelele sose mukuhanangigwa mumanyi nhafi, ku majuwa gwe ndumo wokwija wanhu wo lubeso no lubeso lwawo awekuwandamila usulumisi wawo awecho ⁴ na kugamba “dyuwahe dihuwiso dyo kwija kwakwe? Kosoko kukongela awaBaba setu wakagone, ifinhufyose figendelela nheifo fofyowile kulawa kunghonga yo kumba.” ⁵ Wakufinya meso gawo wanghone inonga ino fina kwa mbulu ya Mulungu ulanga hawuwa uko kulawa katali ne chilungu hachumbigwa kulawa mumeji, ⁶ ku gago ichilunga che chigele chiya hachagilila kwa meji. ⁷ Ninga kwa mbuli yiyo, ulanga ne chilunga cha hambiya chikigwa sigafu kwa moto, fikigwe mpaka dijuwa dyo uliganiso na kubanigwa kwa wanhu wasimumanyile Mulungu. ⁸ Ninga wendingwa munghaibese imbulu yino, kososo kwe Mundewa dijuwa dimwedu dikifana minyaka chigulu chimwedu, kahi minyaka chigulu chimwedu ikifana ijuwa dimwedu. ⁹ iMundewa nghakusululuka kwigala dihuwiso dyakwe, fina wamonga fowakudoka kusululuka, ninga yakuwagojelani kosoko nghakwenda munhu wowose yagilile ninga wose walambe. ¹⁰ Ninga dijuwa dye Mundewa dikwija fina muhiji, kamei ulanga woloka kwa sindo nghulu na finhu fyose folakasigwa kwa moto, na iisi na fyose fimemile umo fokwagilila. ¹¹ Hambiya kosoko finhu fino fyose fikwija fibanigwa kwa nheifo, anyeye mukuhanangigwa muwe wanhu wa migendele ya usunhile na ya chimulungu, ¹² mukugojela na kutegelesela inija ye dijuwa diya dye Mulungu, kosoko ulanga ukwija umoligwa na kosomigwa kahi finhu fikulakasigwa. ¹³ Ninga, kosoko ya dihuwiso dyakwe chikugojela ulanga musha na chilunga chisha, hanhu hokwikala wanhu wene nhenda swanu. ¹⁴ Hambiya wendigwa wangu kosoko mukugojela mbuli siso, konyeni monekane ne imwene fina muwa mudiigoya, mwichaka wihi; ¹⁵ na utaleni ufinyilisi we Mundewa wetu kuwa ni uhonya. Kamei kahi mundugu setu Paulo hakawandikilani kwa ubala woyenghigwe, ¹⁶ yakulonga sisino simbuli musibaluwa sakwe sose. Mwina mbuli simonga nghugutu kusimanya, mbuli so wanhu wechaka awasisomile na awasimile fiswanu wakwagilila awecho, fina fowakugolosa kumatulumo gamonga. ¹⁷ Hambiya nyeye, wendigwa, kulawa fomwajanjalusigwa langisiseni munghalondigwe ne ubani na kwagilisa kwima kwenu. ¹⁸ Ninga kulileni mwihewa na umanyi we Mundewa wetu ne Muhonya Yesu Kilisito. Ukwakwe kuwe itunyo hambiya na majuwa gose. Hano.