2 WAKOLINTO

¹ Paulo Mutumigwa wa Kilisito Yesu kwa nyenda ya Mulungu na Timoseyo imundugu setu, ku dikanisa dye Mulungu dyuwile Kolinto, hamwedu ne wanhu wose we Mulungu wowile Akaya. ² Dihewa dyuwe ukwenu na digoya kulawa kwe Mulungu iBaba yetu ne iMundewa Yesu Kilisito. ³ Yatunyigwe Imulungu ne iBaba we Mundewa wetu Yesu Kilisito; iBaba wo ubasi ne dihoso dyose, ⁴ imwene yakuchihosa mumagayo getu gose, kosokona seye chidahe kuwahosa awowilemwigayo dyodyose, na dihoso idyene dyochinghigwe ne Mulungu. ⁵ Kosoko fina amagayo ga Kilisito fogekongeseka; no nhaifo chikuhosigwa lugano ne imwene. ⁶ Ugele chinghapata magayo, ni kosoko yo kuhosigwa kwenu na uhonya wenu, na chinghahosigwa ni kosoko ye dihoso dyenu dyomupatile ugele womugendelele kufinyilisa amagayo agene gochigayile nago. ⁷ Dihuwi dyetu ukwenu disikusingisika; kosoko chimanya fina fomuhamwedu mumagayo, mokuwa kahi hamwedu mudihoso dyetu. ⁸ Kosoko chikuhananga anyeye wandugu setu munghamanye amagayo gochipatile akuya Asiya; amakanda gowile umwetu hagowa masitosi na hasowile na njila ya kugugumila. ⁹ Hachuwa fina wanhu wafuluse kulamuligwa wafe; ninga aiya hayuwa kuchigolosa seye chinghakihuwile chiwecho amba chimuhuwile Mulungu iyakwinula awafile; ¹⁰ imwene hakachihonya kulawa muhatali inghulu ye difa, na kuchihonya, mwi mwene chika dihuwi dyetu fina kochihonya keli. ¹¹ Anye nanye mukuhanangigwa muchitase kwe inhasa yenu; kahi matewa wolafa malumbo kosoko yetu ne dihewa Imulungu dyoyolafa ukwetu kubidula inhasa nyingi. ¹² Hambiya aseye chikiyona kosoko yo uhomelesi we madoga getu maswanu fina chikala fiswanu muchilunga, kahi lugano ukwenu anyeye, hamwedu na uholo na uchawelu wochinghigwe siyo na ubala wo muchilunga ninga dihewa dye Mulungu. ¹³ Kosoko chisikuwandikila chochose ninga chomukudaha kusoma na kumanya, nikuhuwila fina momanya fiswanu, ¹⁴ hata inghowa hambiya mukumanya chidodogi, nikuhuwila fina kumwande momanya, na modaha kiyona kosoko yetu na seye kosoko yetu na seye kosoko yenu mwijuwa dye Mundewa. ¹⁵ Kosoko hanyuwa na ihuwi adi, hanihananga kwija ukwenu kunghonga, kosoko mudahe kumotesigwa mikangha mili. ¹⁶ Hanihananga kwija ukwenu munduta yangu Makedoniya kahi muugele wo kuya kwangu, nanye hamuwa mukuningha mhamba kosoko ye inhambo yangu ya Uyahudi. ¹⁷ Togoleni fonahanange kugolosa nhaifo hanyuwa munhu wa chibidubidu Mukudoga fina fonahanange nhaifo hanyuwa munhu we chilunga, yakudaha kugamba heye na hata ugele umwedu ¹⁸ Fina Imulungu fonimuchawelu, simbuli setu ukwenu sisowile heye na ka. ¹⁹ Kosoko imwana we Mulungu, Yesu Kilisito, wochamuhubili ukwenu hamwedu na Silivani na Timoseyo, nghowile heye na ka amba umwakwe chila ugele ni heye. ²⁰ Kosoko amalagano gose ge Mulungu, gagalukaheye nochonghone chikugamba Hano kupulutila imwene kosoko Imulungu yatunyigwe ²¹ Ninga ni Mulungu imwenecho yakuchiguma ludole mu Kilisito, na noyakuchika hayo. ²² Keka ulubonoto lwakwe ukwetu na kuchingha umuhe wakwe mufidoga fyetu fina samana ²³ Nikumwinanga Mulungu, no muhomelesi wangu, imwene kaumanya umoyo wangu, hanilema kwija Kolinto kosoko ninghawabulagise. ²⁴ Chikumutamilani chomukuhanangigwa muhuwile, cha watogomi wayenu munyemo yenu anye mwima ngwingwingwi mwihuwi dyenu

¹ Kosoko hanilamula mumadoga gangu kuleka kwija ukwenu keli kuwaguma usungu. ² kosoko nghona ninghawaguma usungu, nani yowile uko wo kunigolosa nyonele, ninga awawaya woniwabulage. ³ Nochonghone nikwandika ibaluwa ayi, ugele wonikwija ninghadahe kupata lwidasokulawa kwa waya wagiligwe kunigolosa ninyemuke, kosoko hanyuwa na nghinyo ukwenu mose, fina inyemo yangu hayuwa nyemo yenu mose. ⁴ Ugele wonawandikile kunghonga hanyuwa na magayo na usungu mumoyo, na masosi mengi, isowile kosoko ya kuwaguma usungu, amba kosoko ya kuwalolesa fina nikuwenda. ⁵ Nghona hena munhu yamugumile usungu miyagwe, nghanigumile niye usungu ninga kawaguma usungu anyeye mose na sikuhananga kuwa mukalisi. ⁶ Iditoso dyoyafuluse kupata kulawa ku matewa mugati yenu imutosha. ⁷ Iisigale ibeka mumulekelele na kumuhosa, chakachaka kopata usungu na kosuhuka ichidoga. ⁸ Kosoko yo nikumutasani mumonese fina mukumwenda. ⁹ Hanyandika ibaluwa iya kosoko nidahe kumugesani na kumanya nghona muwaholo mu chila chinhu. ¹⁰ Chila munhu womukumulekelela nani nikumulekelela, kosoko nghona nikulekelela, nghona chawelu ninacho cho kulekelela, nikulekelela kosoko yenu ya Kilisito, ¹¹ chinghamwinghe iShetani luneka lwa kuchidanhilisa, kosoko chimanya fiswanu ukochelesi wakwe. Gamahweso ga Pauli akuya Tulowa ¹² Ugele wonejile Tulowa kuhubuli mbuli swanu ya Kilisito, umulango haukumhuligwa umwangu mwe Mundewa. ¹³ Ninga hanikidasika lugano kosoko samwagane kuya imundugu setu Tito. Nochonghone nawelage wose na kuluta Makedoniya. ¹⁴ Ninga malumbo kwe Mulungu, iyakuchilongosa majuwa gose ku nhambo yo usumi wa Kilisito, na kupulutila ukwetu yakwenesa uchawelu wa Kilisito fina mhungile swanuchila hanhu. ¹⁵ Kosoko aseye cha kifana mhungile swanu ya Kilisito mugati ya waya wekwagilila, ¹⁶ kwa waya awakwagilila imhungile yo ni difa na kwa waya wakuhonyigwa imhungile yo ni ugima. Ninga ni nani yakwidaha kwiguma mu mulimo wa namuna yo ¹⁷ Kosoko aseye chisikifane wambasaji we imbuli ye Mulungu, ninga fina wanhu we chawelu, fina wanhu watumigwe ne Mulungu, kumwande ye Mulungu chikulonga mu. Kilisito

¹ Afo chikukonga kahi kitogola? Ama chikuhananga fina awanhu wamonga sibaluwa sa kiyonesa ukwenu ama kulawa ukwenu? ² Anyeye muweecho mwa baluwa yetu yakiyonesa yandikigwe mumimoyo yenu imanyike na wanhu wose ³ na mukiyonesa fina mwa baluwa kulawa kwa Kilisito igaligwe na seye, iyandikigwe siyo na wino ninga na Muhe we Mulungu inghakufa, na siyo mufipande fya mawe amba mufipande fya mimoyo ya wanhu. ⁴ chikudaha kulonga nhafo kosoko ye ing’inyo yo chinayo kwe Mulungu kupulutila Kilisito. ⁵ Siyo fina china udaha chiweecho wa kugolosa chochose, ninga udaha wetu ukulawa kwe Mulungu ⁶ iyachinghile udaha wo kuwa watumigwa we dilagano dishasiyo mbuli sandikigwe amba simbuli se chimuhe, kosoko simbuli sandikwe sikigala difa, ninga se chimuhe sikulafa ugima. ⁷ Hambiya nghona indekeligwa ye difa, itulumigwe mu fipande fya mawe ija ne ditunyo ikulu namuna ayo awanhu wa Isilaeli wasikumukumhulila meso kosoko yo kwakaika kwakwe, hata inghowa ditunyo dyakwedyowile dya chipisi chiguhi, ⁸ kahi imilimo ye Muhe we Mulungu yokuwa na itunyo ikulu kusuma dye malagiso? Aino si chawelu? ⁹ Kosoko ghona kowile na itunyo mu kulekeleligwa kwe indamulwa; kukulekeleligwa kwa uchawelu kukuhanangigwa kuwa na itunyo kusuma didyo. ¹⁰ Chawelu mu nonga ayi achiya chowile na itunyo chigaluka chichaka itunyo ka! Kosoko ye ditunyo dichipulute. ¹¹ Kosoko nghona kowile na itunyo kwa chiya chikale chidodogi, kokuwa na itunyo ikulusi kwa chiya ichikwikala majuwa gose. ¹² Kosoko china ihuwi dinhaifo, nochonghonechikulonga bila kogoha, ¹³ aseye chisikugolosa fina Musa, yegubike mutandilo muchihanga chakwe kosoko awanhu Isilaeli wanghadahe kona indumo ye ditunyo ¹⁴ Ninga ifidoga fyawo hafigolosigwa fikugutu, mpaka diyelo ugele wo wakusoma dilagano dye katali, umutandilo uuya usigubuligwe kosoko ni kupulutila Kilisito du ukuleusigwa. ¹⁵ Heye mpaka diyelo ihanhu hohose ichitabu cha Musa hochikusomigwa imimoyo yawo ikuwa igubikigwa. ¹⁶ Amba imunhu yanghamubidukila iMundewa umutandilo ukuleusigwa. ¹⁷ Hambiya iMundewa no Muhe na ihena umuhe we Mundewa, hena kulekeleligwa. ¹⁸ Niinga aseye wose, china ifihanga fisigubikigwe awanhu wamonga wakudaha kona kupulutila aseye, iditunyo dye Mulungu, chikubiduligwa chikifane imwene na ditunyo dyetu dikuwa ikulusi, aino ikulawa kwe Muhe we Mundewa.

¹ Ninga iMulungu kwa ubasi wakwe kachingha umulimo awu, na kosoko yo chisikusuhuka chidoga. ² Aseye kwa ulwandi lwetu chilema simbuli sose se chinyala ne chifiso, chilema kudanha ama kwaganisa imbuli ye Mulungu, ninga kwa konesa chalinse uchawelu chodaha kwitogola chiweechokwa chila udaha wo kutagusa kumwande ye Mulungu. ³ Hata inghowa imbuli yetu swamu ifisigwe, ifisigwa du kwa waya iwagilile. ⁴ Awene wasikuhuwila kosoko iMulungu we chilunga achi kagaguma chisa amahala gawo wanghadahe kona chalinse ujelu we Imbuli swanu ye ditunyo dya Kilisito, iyakifane Mulungu. ⁵ Kosoko chisikuhubili chiweecho ninga Yesu Kilisito fina Mundewa wa wanhu wose, hamwedu na seye fina watumwa wenu kosoko ya Kilisito ⁶ Kosoko ni Mulungu yagambile, “Ujelu wake muchisa.” Imwene no yakuleka mimoyo yetu ikwaka na kuchingha ujelu wa umanyi we ditunyo dye Mulungu ukwakaika muchihanga cha Kilisito. ⁷ Ning chinawo ugoli awu mufiya fya ulongo, konesa fina udaha ukulu uwa kws Mulungu. ⁸ Chikubulagika ugele umonga, ninga chisikukanhamiswa, ugele umonga chikuwa na manhonge amba chisikusuhula chidoga; ⁹ Chikusambasika, ninga chisikulekigwa chiimwene, chikutowigwa ninga chisikubulagika. ¹⁰ Chila fonikugenda nikukomigwa chimutufi fina Yesu foyakomigwe, kosoko yo ugima wa Yesu udahe nawo kiyonesa mumitufi yetu. ¹¹ Kosoko aseye chiwomi majuwa gose chikulafigwa chufe kosoko ya Yesu, kosoko ugima wa Yesu nawo ukiyonese mumitufi yetu iikufa. ¹² Nonghamba, idifa dikugolosa milimo mugati yetu, amba mugati yenu mwina uumi milimo. ¹³ Kosoko china muhe yumwedu we dihuwi fina foitulumigwe, “Hanihuwila, na kosoko yo hanilonga,” na seye chikuhuwila na kosoko yo chikulonga, ¹⁴ chimanya ayuya yamwinule Mundewa Yesu kochinula seye nase kosoko cha hamwedu na Yesu na kochika kumwande yakwe hamwedu na nyeye. ¹⁵ Aga gose ni kosoko yo uwendowenu, kosoko fina dihewa fodikongeseka kuwanhu matewa kwa matewa, amalumbo nago gongeseke ku ditunyo dye Mulungu. ¹⁶ Kosoko yo chisikusuhuka chidoga, na hata inghowa mitufi ye chimunhumunhu ikubanika, imitufi yetu ye chimuhe ikubiduligwa chila ijuwa. ¹⁷ Kosoko amagayo gochikupata ni madodogi kahi ge chipisi chiguhi, ninga gochingha itunyo dikujumha maliganiso gose. ¹⁸ Kosoko chisikulanga kufinhu ifikoneka ninga kufinhu fisikoneka, kosoko ifinhu ifikoneka ni fya kuloka amba ifinhu fisikoneka ni fya majuwa gose.

¹ Kosoko chimanya fina imitufi yetu ahano hachilunga ni kifana nyumba sa munyasi. Na inghofa, Mulungu kochingha nyumba ahanhu hakwe, iisigolosigwe na wanhu, amba igolosigwe ne Mulungu imwenecho na yokwikala majuwa gose. ² Hambiya munamuna ayi chikugula akuno chikulangilila kwa nghwina kufasigwa inyikala yetu yuwile kulanga. ³ Chikuhanangigwa kufasigwa nhaifo kosoko chinghadahe koneka mwasi ⁴ Imitufi yetu ye chimunhumunhu iisikwikala majuwa gose. Chikulila kosoko ye magayo goikuhanangigwa ipate. Siyo chawelu fina chikuhananga chufe, ninga chikuhananga Mulungu yachibidule na kuchingha mutufimusha uukwikala majuwa gose. Nonghamba chikuhananga imitufi yetu ye chimunhumunhu ibiduligwe na kuwa umwedu uusikufa. ⁵ Iyachigolosele imbiduka ayi ni Mulungu iyachinghile iMuhe fina samana yetu. ⁶ China ng’inyo majuwa gose, na chimanya fina ugele wochikwikala mumutufi awu, chuwa kutali ne Mundewa, ⁷ kosoko chikwikala kwe dihuwi na siyo kwa kona. ⁸ China ng’inyo nghulu, na chikwendesigwa chiusame umutufi na kusamila kwe Mundewa. ⁹ Ninga kujumha chinhu chochose chiya, chikuhananga chimwendese imwene yuwe ch ikwikala ahano muchilunga ama uko. ¹⁰ Kosoko wose chikuhanangigwa choneke kwigoda dye ulamusi dya Kilisito, soko ya chila munhu yadahe kuhokela maswamu ama gehile gakumwendesa kosoko ye sinhenda sakwe mumutufi. ¹¹ Ninga chimanya kumwogoha Mundewa, chikuwakwega wamonga, Mulungu kachimanya manyisi na nikuhuwila finamumimoyo yenu munimanya nheifiya. ¹² Chisikitogola chiweecho ukwenu keli amba chotoko cha kitogola kosoko yetu, kosoko mudahe kuwabidula awaya wakiyona iweecho kosoko ye inyuwa yawo ya kunje kujumha fowali mumimoyo yawo. ¹³ Kosoko nghona choneka fina wabwalasi, ni kosoko ye Mulungu, na nghona china mahala ni kosoko yenu. ¹⁴ Uwendo wa Kilisito ukuchilongosa, na kosoko chimanya fina yumwedu kafa kosoko ya wanhu wose, nonghamba wose wakushiliki idifa dyakwe. ¹⁵ Hakofa kosoko ya wose, kahi awaya iwomi wanghekale kahi kosoko yawo, ninga kosoko ye imwene du yafile na kwinuligwa kosoko yawo. ¹⁶ Kulawa hambiya na kugendelela chisikumona munhu wowose kahi kwa inyona ye chimutufi, hata inghowa ugele umonga chamonile Kilisito nhaifo chisikumona nhaifo kahi. ¹⁷ Kosoko yo nghona yumonga yowile mu Kilisito, ni chumbigwe kasha, gakatali gapuluta langa! Amasha geja. ¹⁸ Aga gose gagoloseka ne Mulungu, imwene kupulutila Kilisito kachibidula seye kulawa wanghondo na kuwa wambwiya sakwe na kuchingha umulimo wa kuwagolosa awamonga nawo wowe wambwiya sakwe. ¹⁹ Nonghamba iMulungu hakawagolosa awanhu wose kupulutila Kilisito wambwiya sakwe; Mulungu nghatalile uwihi wawo, na kuchingha imbuli iikuchitamila yakuwagolosa nhani awamwiya sakwe. ²⁰ Ninga seye cha watumigwa wa Kilisito.ne Mulungu imwenecho yakuchitumiya seye kumwidedelani anyeye, chikumutasani ahanhu ha Kilisito mwifumilise ne Mulungu. ²¹ Kilisito nghowile na wihi, ninga kosoko yetu Mulungu kamugolosa yahange uwihi wetu, na kosoko yo chidahe hamwedu naye kuhanga uchawelu we Mulungu.

¹ Mumilimo yetu hamwedu ne Mulungu chikumwidedelani munghafumile kudyagilisa chaka dihewa dye Mulungu. ² Kosoko hakagamba, “Muchigele chikufumilika haniwahulikisa, na kuwatasa mudijuwa dya uhonya.” Langa! Ugele ufumilike nowu, awu no ugele wo uhonya. ³ Chisikwika chikwakwaliso chochose munjila ya munhu wowose, kosoko idowa dyodyose dinghoneke mumilimo yetu. ⁴ ninga fina watumigwa we Mulungu chikitogola chiweecho kwa chila chinhu: Kwa kufinyilisa mu magayo gose. ⁵ Chitowigwa, chohigwa chihomigwa, chigolosa mulimo ya kusokesa, chisigonile na chisidiile ⁶ kwa usunhile we chidoga, umanyi, kufinyilisa na uchawelu, hamwedu na mamudyo ge Muhe Musunhile na uwendo we chawelu. ⁷ munonga ye chawelu na udaha kulawa kwe Mulungu, na uchawelu fina filama fyetu, fyo ulwandi wo kulume no kumoso ⁸ mu chogoho na kubesigwa ugele umonga wanhu wakuchitunya ugele umonga wakuchibesa. Wanhu wakuchilamula fina cha wadasi, ninga ugele wose chikulonga chawelu, ⁹ fina wanhu wasimanyike, hata nhaifo chimanyika fiswanu fina wanhu wakufa, langa cha wagima gimasi, wachisambasa amba lo wasichikomile; ¹⁰ fina wanhu wa usungu, amba chikubwedelelamajuwa gose, fina wakiwa amba chikugolosa wanhu matewa wagoli, fina wanhu wechaka chinhu amba china chila chinhu. ¹¹ Chisiwafisile chochose mu wanhu Wakolinto chikumwendani kwa mimoyo yetu yose ¹² Silo seye chisigubule mimoyo yetu ukwenu amba no nyeye musigubule mimoyo yenu ukwetu. ¹³ Na ahanhu hakwe, nikulonga na nyeye fina wana wadodogi, “Monese ukwetu uwendo fina uya wo chinawo ukwenu.” ¹⁴ Munghakihanangise na wasikuhuwila. Kosoko hena uhangi waki mugati ya uchawelu na uwihi? Ama chilo na misi fodaha kuwa hamwedu? ¹⁵ iKilisitone Luhoma fokifumilisa nhani? Ama imunhu inghakuhuwila kokuwa na choni cha hamwedu na iyakuhuwila? ¹⁶ Dihekalu dye Mulungu dina uhamwedu waki ne Milungu yo udasi? Kosoko aseye cha dihekalu dye Mulungu imumi, “Fina iMulungu foyagambile nokwikala na kuwa hamwedu nawo, na nokuwa Mulungu wawo na wene wokuwa wanhu wangu. ¹⁷ Kosoko yo muleguke ukwawo na mukitemanule nawo, yakulonga iMundewa, na munghakwafe chochose china uwihi, baho nomuhokelani; ¹⁸ na nokuwa Baba ukwenu na mokuwa wanangu we chigosi ne wachike, yakulonga iMundewa Mulungu.”

¹ Kosoko chinaso siyahadi asi wendigwa wangu, lekeni chikisunhe chiweecho na chila uwihi we chimutufi ne chiloho na kuugolosa usunhile umemelekele na kwikala kwa kumogoha Mulungu. ² Mukumhule imimoyo yenu ukwetu, chisimubanile munhu chinhu chochose, chisimubulage munhu wowose, chisimubanile munhu wowose chisimudanhilise munhu wowose. ³ Sikulonga nhafo kuwalamula nyeye kwa wihi, kosoko hanilonga kunghonga fina muwa mumimoyo yetu, chisitemanuligwa chuwe chufa ama womi. ⁴ Nina ng’inyo nghulu ukwenu, nikiyona kosoko yenu, mumagayo getu chihokela ihoso ikulu na ninyemuka lugano. ⁵ Hata fochafuluse kufika Makedoniya, chisapatile luneka lwa kubwihila, hachikidasika na gose, magomvi kuwamonga na ikeng’enha mufidoga fyetu. ⁶ Ninga iMulungu iyakuwahosa wasuhuke chidoga hakachihosa kwa kwija kwakwe Tito, ⁷ na siyo du kwa kwija kwakwe Tito, ninga kahi kosoko ye umoyo wowumwinghile anyeye, fina foyachitamile fomukuhananga kunyona, fomwina usungu, fomukuhananga kunimilisa kosoko yo nina nyemo lugano. ⁸ Kosoko hata inghowa ibaluwa iya yonyandike iwabulaga mufidoga aniye sikukalala (hata inghowa nakalale) kosoko nikona fina ibaluwa iwaguma usungu anyeye, hata inghowa kwa chipisi chiguhi. ⁹ Ninga hambiya nikubwedelela siyo kosoko hamudeseka ninga kosoko indeseka yenu iwagolosa mulambe, kosoko mukihulika usungu we chilungulungu, na soko yo musagilile kosoko yetu. ¹⁰ Kosoko usungu we Mulungu ukweleka kulamba kukulongosa kuuhonya, na kwichaka soko yo kujuta, amba usungu we chimunhumunhu ukweleka difa. ¹¹ Hambiya mukudaha kona isoko yo kona usungu fina foyakuhananga Mulungu, langeni fomukiyonela ubasi, mukutinhuka na kogoha, mwikala hega kona ichawelu ikugoloseka, anyeye kwa chila njila mukiyonesa fina mwichaka dyomubanile. ¹² Kosoko yo hata inghowa nyandike ukwenu, isowile kosoko ye imunhu yagolose uwihi kahikosoko ye imunhu yagoloseligwe uwihi ninga kosoko ikiyonese chalinse fina fomowile ne inghonya ukwetu kumwande ye Mulungu. ¹³ Nochonghone seye chagumigwe moyo lugano. Na kuleka ingumigwa yetu moyo chiweecho chikubwedelela lugano munyonela ya Tito, kosoko ichidoga chakwe chisindamala. ¹⁴ Aniye hanikiyona lugano kosoko yenu na sagumigwe chinyala, ninga fina chila chinhu chochawatamile fochowile chawelu, nonhaifo inyiyona yetu kwa Tito foni chawelu muhala. ¹⁵ Tito yakumwendani lugano anyeye mose, fina foyakugelegela ichogoho chenu mose, fomwamuhokele kwa chogoho na kuchichima. ¹⁶ Nikubwedelela kosoko nina ng’inyo iyecho ukwenu.

¹ Chikuhananga mumanye Wakilisito weyetu, idihewa dye Mulungu dyonesigwe na makanisa ga Makedoniya, ² hawagesigwa na magayo makulu, munyemuko yawo na ukiwa mukulu, hawowa wandewa kupulutisa. ³ kosoko hawalafa lugano fina fowadahile, hata kujumha fowadahile. Kwa kwenda kwawo aweecho. ⁴ Hawakidedela lugano wenghigwe luneka lwo kuwatasa awanhu we Mulungu. ⁵ Chisadogile fina wodaha kulafa nhaifo, hawakilafa aweecho kwa iMundewana seyekwa uwendo we Mulungu. ⁶ kosoko yo hachimutasa Tito fina fou yaukongesa umulimo awu, yakuhanangigwa yaumalagise umulimo awu we dihewa. ⁷ Mwina ugoli wa chila chinhu, mu dihuwi, udaha wo kulinga, umanyi, inghonya yose yakugolosa amaswanu, na uwendo wenu ukwetu kosoko mudihewa adi mudahe kupulutisa nheifiya. ⁸ Sikulongo dino fina ilagiso, ninga nikulonga du kuwonesa fina awamonga fowena inghanya yo kutasa, nidahe kumanya fina uwendo wenu foni wa chawehu. ⁹ Kosoko mumanya dihewa dye Mundewa wetu Yesu Kilisito, mugoli fina foyowile, kosoko yenu hakegolosa mukiwa, kosoko yawagolose wagoli kwa ukiwa wakwe. ¹⁰ Kosoko ye imbuli ayi nikuwenghan Maloleso: Ni fiswanu kwa nyeye hambiya kumalagisa chomukingile umwaka wa ulokile, hamukonga siyo kugolosa du amba chomusulumile. ¹¹ Ninga hambiya mumalagise umulimo awo, na fina fomowile na ngwina mghulu yo kutasa, kahi konyeni nhaifo kuimalagisa kwa chiya chomwinacho. ¹² Nghona chawelu mukuhananga klafa, iMulungu kohokela chila chomukudaha kulafa, nghakuhananga kujumha chomwinacho. ¹³ Nichaka mana fina awamonga wahungusiligwe na nyeye mukanhamisigwe, ¹⁴ niya ayo ni kosoko yo usawa, kosoko nyeye mwinafo fingi mugele awu ni fiswanu kuwatasa awaya wakuhananga. Kahi wanghowa nafyo fingi nanye muichaka, womutasani. Munamuna ayi wose mukuwa sawa. ¹⁵ Fina foitulumigwe “Iyakunjagise fingi nghowile nafyo kujumha foyahanange, na yakunjagise chidodogi nghahungukiligwe” ¹⁶ Malumbo kwe Mulungu yawagumile nghwina imwedu yo kutasa kosoko yenu mumoyo wa Tito. ¹⁷ Kosoko siyo du kafumila achiya chochimutasile kugolosa, ninga hakowa na ngwina lugano ya kutasa na kwa nyenda yakwe hakalamula kwija ukwenu. ¹⁸ Hamwedu naye chikumwigala imundugu setu iyasoweleke mumakanisa gose kosoko yo kuhubili mbuli swamu, ¹⁹ na siyo iyo du, amba kasaguligwa na makanisa kwilongosa na seye mumilomo ayi ye dihewa yochikugolosa, kosoko ye ditunyo dye Mundewa na konesa inyenda yetu swamu. ²⁰ Chikuhananga kinega munhu wowose yangheje yechilaumu kosoko ye wimilisi wi isao ai. ²¹ Kosoko iniya yetu ikugolosa achiya ichiswamu siyo kwa Mulungu du, amba kwa wanhu nheifiya. ²² Na hamwedu na wanhu awo weli, chikumwigala imundugu setu wochimugesile mikangha itewa na kumona fina ugele wose ni munhu yena ngwina yo kutasa, ninga hambiya kena ngwina kusuma ugele wowose kosoko kena ng’inyo nghulu ukwenu. ²³ Na kosoko ya Tito ni miyangu, mutogomi miyangu, chikugolosa milimo kosoko yenu, na kosoko ye wandugu wamonga awejile hamwedu naye, awo ni watumigwa we Makanisa, ditunyo dya Kilisito. ²⁴ Ninga woneseni umemeleki wo uwendo wenu, na makanisa gose gone chawelu fina inyiyona yangu iikwenu siyo ya chaka.

¹ Hechaka soko yo kwandika ukwenu kosoko ye filafwa ku Wakilisito wa Yelusalemu. ² Kosoko nimanya fo mwina moyo wo kutasa, na hanikiyona kosoko yo ku wanhu wa Makedoniya, sikugamba Akaya hayuwa tayali kulawa mwaka ulokile ne unghwina yenu iwasonga matewa. ³ Ninga nikuwatuma awaKilisito weyetu kosoko inyitogola yetu kosoko inghowa ya chaka munonga ayi, kosoko muwe tayali, fina fonilongile mokuwa; ⁴ Ingheje ikuwa wanhu wa Makedoniya fowokawokwija na seye wafike musiwalafaji, chokuwa na chinyala chinhani, kuleka kulonga ichinyala chenu kosoko yo kuwa na ng’inyo. ⁵ Kosoko yo nyona fiswanu kuwatasa awaKilisito weyetu wachilongolele ukwenu, wadahe kwika tayali ifilafwa fyenu fomugambile molafa, nayo yonese fina chaweli ni mhongesi ilafigwe kwenda kahi siyo kwa kudindilisigwa. ⁶ Chonikulonga nochi; “Iyakuhanda chidodogi yakugola chidodogi na iyakuhanda chingi yakugola chingi”. ⁷ Chila muhu ikuhanangigwa yagolose fina foyalamule mumoyo wakwe, siyo kwa usungu ama kwa kudindilisigwa, kosoko iMulungu yakumwinda yakulafa kwa konela. ⁸ Na iMulungu yakudaha kuwingha nyeye chila mboto kwa wingi, kosoko mudase kuwa na chila chinhu chimemelekele majuwa gose, na mudahe kuwatasa wose wakuhananga. ⁹ Fina foitulumigwe, “Imwene yakulafa ku wakiwa, uchawelu wakwe ukwikala majuwa gose”. ¹⁰ Na iMulungu iyakulafa mbeyu kwe Muhandi ne chakudiya ku wanhu, kolafa nheifiya na kongesa kukugola kwenu kosoko muwatase awaya wakuhananga. ¹¹ Momotesigwa kwa chila chinhu, kosoko wanhu wadahe kumulumba Mungu kwe simhongesi sowohokela kulawa ukwetu. ¹² Kosoko fomukulafa utogomi awu musikulafa du kukuhananga kwa wanhu we Mulungu wa Yelusalemu, amba nheifiya haigolosa wanhu matewa wamulumbe Mulungu. ¹³ Na kosoko yo ulomelesi awu, momutunya Mulungu kwa kuihuwila mbuli swamu yaKilisito kahi kosoko yo undewa wo mukuwengha wanhu wa Yelusalemu na wanhu wamonga. ¹⁴ Kosoko yo kwa uwendo mukulu wowatasila nyeye kosoko ye dihewa dipulutise iMulungu dyoyonese ukwenu. ¹⁵ Chikumulumba Mulungu kosoko ye mhongesi yakwe iisikutagusika.

¹ Aniye Paulo nimwenyecho hanyoneka, munhu wa ubasi na musindamafu wa Kilisito, hambiya aniye inimuholo ninghowa hamwedu na nyeye, namukali ninghowa kutali nanye. ² Nikumutasani munghanigolose kuwa mukali ugele wonikuwa hamwedu na nyeye, hamwedu na nginyo fina fonitalile kwa kuwonesa awaya wadogage chikugolosa fina wanhu we chilunga. ³ Hata inghowa chikwikala muchilunga, ninga chisikitowa fina wanhu we chilunga. ⁴ Kosoko ifilama fochikutumiya siyo fya chimunhumunhu, ninga fina udaha we Mulungu uukubana singome(amakiga) sose ⁵ na kung’ola chila chikwakwaliso che kiyona ichikigwe kuilema umanyi we Mulungu, chikuteka chila madoga gaduha kumogoha Kilisito. ⁶ Munghafulusa kuwa mumemelekela muchogoho, aseye cha tayali kubana chila namuna ya kuleka kuwa na chogoho. ⁷ Mulange kuchuwile kumwande yenu. Nghona munhu wowose yena ng’inyo fina ni munhu wa Kilisito, imunhu ayo yakuhanangigwa yagelegele fina aseye nase cha Wakilisito fina imwene foyali. ⁸ Hata inghowa nipulutise mukiyona kwangu kosoko yo udaha uya woyachinghile iMundewa siyo wa kudimola dihuwi dyenu ninga kudijenga, sigumigwa chinyala kosoko yakwe. ⁹ Sikuhananga mone fina nikuwengha chogoho nyeye, kwe sibaluwa sangu. ¹⁰ Kosoko wakugamba, “Sibaluwa sa Paulo ni nghali na sina mbuli nsito, ninga imwecho yanghowa hamwedu na seye ni munhu muholo, na hata ugele woyakulonga simbuli sakwe kifana si chinhu.” ¹¹ Leka munhu yo yamanye fina chochikulonga musibaluwa no gochigolosa ugele wochikuwa hamwedu na nyeye. ¹² Kwa fyofyose chisikudaha kwiika ama kwiliganisa na waja wakitunya aweecho; Awanhu wakwigolosa wene kuwa chipimo cha kwipimila, na wanhu wakwiliganisa aweecho kwa eweecho ni wabwalasi. ¹³ Ninga chisikiyona na kupulutisa, amba kukiyona ko kosigala mumihaka ye imilimo yochinghigwe na Mulungu, aino ni hamwedu na imilimo yetu ukwenu. ¹⁴ Kosoko chisikujumha imihaka yochekiligwa ugele wochejile ukwenu; hachuwa we nghonga kwija ukwenu, chikumegalila imbuli swanu ya Kilisito. ¹⁵ Chisikiyona na kupulutisa kosoko ye milimo ya wanhu wengi, ninga dihuwi dyetu nodi, fina dihuwi dyenu fodikongeseka, imilimo yetu ukwenu yokongeseka lugano, ¹⁶ Baho chodaha kuhubili imbuli swanu muisi sa kutali na nyeye, na chisikiyona kosoko ye imilimo ifuluse kugolosigwa ni wanhu wengi. ¹⁷ Leka iyakiyona yakiyone kosoko ye Mundewa Kilisito. ¹⁸ Kosoko iyakuhoniligwa si si munhu iyakitunya imwenecho, amba imunhu yakutunyigwa ne Mulungu.

¹ Nikona monifinyilisa chidodogi muubwalasi wangu. Dededeni munifinyilise! ² Nikumonelani finju amba ni finju ya Mulungu, kosoko nimutumisani nyeye kwa Kilisito na nikumonani nyeye fina mwanamuke nghamanyile mugosi kwe mugosi wakwe yumwedu. ³ Ninga nikogoha fina dijoka fodimudanhilise Hawa kwa usugu wakwe, amadoga genu gobanigwa na kutowangisigwa na kuleka kuhuwilika kwenu kwa chawelu kwa Kilisito. ⁴ Kosoko yumwedu yangheja na kumuhubili Yesu yungi kusuma ayuya wochimuhubili, ama nghona muhokele muhe yungi kusuma yuya womuhokele, ama nghona muhokele mbuli swanu ingi kusuma aiya yomuhokele, ayo ifulusa kutosha kwiika hasi yakwe. ⁵ Sikudoga fina niye namudodogi kusuma awo watumigwa wo udasi. ⁶ Hata inghowa nikugugumila munonga, siyo muumanyi, kw njila yoyose chigagolosa gano chalinse ukwenu mufinhu fyose. ⁷ Togoleni! Hanigolosa wihi kwa kiidulisa nimwenecho kosoko anyeye mwinuligwe, kosoko hanihubili mbuli swanu ye Mulungu bila maliho. ⁸ Ugele wonagolo sage milimo ukwenu, nenda nilihigwa na makanisa gengi, chigambe nenda niwahijila kosoko ya kuwatasa nyenye. ⁹ Na ugele wongowile na nyenye na nakuhananga, samwighile musigo wowote kosoko ihananga yangu hailafingwa na wandugu wa Kilisito kulawa Makedonia. Hanikinegi nanokinega kuwa musigo kwa munhu wowote. ¹⁰ Fina uchawelu wa Kilisito fouwile mugati yangu, inyiyona yangu isinyamasisigwa mumukowa wa Akaya. ¹¹ Na nhani? Kosoko sikumwendani? Imuhungu kamanya fina nikumwendani! ¹² Na nogendelela kugolosa fina fonikugolosa, kosoko nighawenghe luneka awaya wakuhananga luneka lwa kiyona fina wakugolosa Milimo fina seye. ¹³ Kosoko awo ni watumigwa wo udasi, wotogomi we milimo wadasi, Wakiigolosa iweecho fina watumigwa wa Kilisito. ¹⁴ Na siyo ijimo kosoko hata Ihuhoma Yakiigolosa imwenecho fina malaika wo ujelu. ¹⁵ Kosoko yo siyo chinhu chigeni nghona awatumwa wakwe nawo wakiigolosa awecho fina watumwa wa uchawehu. Indumo yawo yoliganila ne iigolosa yawo. ¹⁶ Nifuhusa kuilonga, munhu wowose yanghadoge fina na mubwalasi, ninga hata mwonghadoga nhaifo, munihokele fina na mubwalasi, na kosoko yo aniya nani nikiyone chidodogi. ¹⁷ (Ichonikulonga sikulonga kwa udaha we Mundewa ninga fina mubwalasi, mung’inyo ino yenyitologa; ¹⁸ Kosoko wanhu matewa wakiyana kosoko ye finhu fye chilunga, aniye nani nokiyona.) ¹⁹ Kosoko mukuwafinyilisa kwa chinyemi iwabwalasi, anyeye mukiyona muwecho fina wanhu wa mahala. ²⁰ Kosoko mukufinyilisa munhu yakuwongha, oma yakuwakanhamisa, ama yakuwabesa, ama yakuwatowa muchihanga. ²¹ Kwa chinyala nikugamba hachuwa ku finhu afo! Ninga nghonaga munhu wowose yakugesa kiyona kosoko ye chinhu chochose, nikulonga fina mubwalasi, na niye nikiyona. ²² Togoleni, awene ni Waibulania? Aniye nani nheifiya.Awene ni Waislaeli? Aniye nani nheifya. Awene ni welekwa wa Ibulahimu? Aniye nani nheifiya. ²³ Awene ni watumigwa wa Kilisito? Aniye nikumutogomela Kilisito fiswanusi fina muchilahu aniye nitogoma milimo mikulusi nikala kwigelesa mikangha mingisi, nitowigwa mikangha mingisi na hanuwa habehi na kufa mikangha mingi. ²⁴ Mikagha mishano hanitowigwa ne iya Mikotya makumi madatu na ikenda. ²⁵ Mikangha midatu awaloma lawanitowa ne Mikotya, hanitowigwa na mawa kamwedu, mikangha midatu lanyuwa muhinhumbwi, Ugele wayabenekage mubahali. Kmwedu hanikala mumeji ijia dimwedu chilonemisi. ²⁶ Musinhambo sangu sa chila ugele hangu wa muhatali ya mafahuko ya meji, mu hahatali ya wahiji, hatali hatali kulawa ku wamembwe, hatali mumakaya, hatali ya wandugu wo udasi. ²⁷ Hanigolosa milimo mikugutu na kusoka, hamonga hanigona meso; hanyuwa na njala na nghilu, hanyuwa na mayeyo kosoko yo kuleka kuwa na suke simemelekele. ²⁸ Na kuleka gago gose chila ijuwa nina manhonge kosoko ye makanisa gase. ²⁹ Ugele yumwedu yechaka ludole nani nikihulika fina nechaka (yakulogosigwa) mu uwihi, nikumemigwa na usugu. ³⁰ Nghona ninghanga kiyona, nokiyana kosoko ye finhu fikonesa fina nechaka ludole. ³¹ Imulungu ne Baba we Mundewa Yesu imwene yamotesigwe magiwa gose kamanya fina sikudanha. ³² Aa kuya Damasiki, imukulu wo mukowa yowile lasi ye Mundewa Aletasi hakeka wanhu kwimilisa ikaya kosoko wanikole. ³³ Ninga hanihumulusigwa muchisage kupululila mwihengele dyowile mwikigo na kumuhija.

¹ Nikuhanangigwa nikiyone, hechaka chinhu chonikwambulila kosoko yo, ninga nogendelela kusinjosi ne magubulo kulawa kwe Mundewa. ² Nimumanya munhu yumwendu Mukilisto minyaka ikumi na mine yenuligwe kulanga, sikutanga nghona imunhu yo yowile ne mutufi wakwe ugele uwo, amba iMulungu chewelu kamaya. ³ Na nimanya fina imunhu ayu hakenuligwa kulanga, sikutanga ghona imunhu yo yowile ne mutufi wakwe egele uno, Mulungu kamanya. ⁴ na kuhulika finhu fe chifiso ifene fisikudaha kulongeka. ⁵ Mu hanhu he imunhu ayu, nokiyona, ninga sikiyona kosoko yangu, kulewa kiyona mukuleka kuwa na ludole. ⁶ Kosoko mhali nikuhananga kiyona sowile nikuwa mubwalasi hata chidodogi, kosoko hanyuwa nikulonga chawehu mahala ninga nikulema kugendelela kiyona, kosoko munhu wowose yangheje yedoga kusuma gaya goyakona na kuhulika kulawa ukwangu. ⁷ Na kunileusa kulawa kukiyona na kupulutisa kosoko ye simbuli asi singhulm se magubulo, kaninghigwa imuwa mumutufi wangu, mutumigwa wa huhoma, yakunitowa yakunileusa kulawa kunyiyonaya kupulutisa. ⁸ Hanikutasa Mundewa mikangha midatu kosoko ichinhu achi chinilawe; ⁹ ninga hakanigamba, “Imboto yangu ikutosha, kosoko uludole lwangu lukumemelekela mukuleka kuwa na ludole.” Nokuwa na nyemo nakiyona kosoko yo kuleka kwangu kuwa na ludole kosoko uludole lwa Kilisito lwikale muchanhya yangu. ¹⁰ Kosoko ya Kilisito nikwendesigwa na kuleka kuwa na ludole, maligo magayo; kosoko fonikuwa nichaka lodole no fonikuwa na ludole. ¹¹ Ninga fina mubwalasi amba nyeye nomunidindilise kuwa nheifo, anye nomowile wanhu wokunitunya, kosoko hata inghowa aniye si chinhu simudodogi ng’o kuwawo “watumigwa wenu” ¹² Ifitangilo fya Mutumigwa we chawelu hanigoloseka ukwenu kwa kufinyilisa, kwa majumo makulu. ¹³ Kosoko musahungukiligwe chinhu kusuma amakanisa gamonga, ila aniye nimwenyecho siwatwikile misigo, munilekelele kosoko haniwagoloselani fibi. ¹⁴ Langa hambiya lwa kadatu nifulusa kwija ukwenu. Na sikua musigo kosoko sikukongha fomuwile nafyo, ninga anyeye muwecho, kosoko awana wasikuhananga kuwekila aweweleke sigafu, ninga awaweleke nowakuhanangigwa wawekile sigafu. ¹⁵ Nokuwa na nyemo kutumiya fyose fyoninafyo kosoko yenu. Nghona nikuwenda nyeye lugano anyeye monyenda chidodogi. ¹⁶ Ninga mokifumilisa fina sowile musigo ukwenu amba yumwedu yakudaha kulonga kosoko Paulo ni musugu kawakochelesa! ¹⁷ Togoleni haniwongha kupulutila mutumigwa wowose wonimwigale ukwenu? ¹⁸ Hnimwinanga Tito na kumutuma, na hanimwigala imundu setu hamwedu naye Tito hakawongha nyeye? Sichigose na kulongoswa na chidoga chimwedu, chisigendile hamwedu. ¹⁹ Kowage mukudoga ugele wose mpaka hambiya, chendaga chikimilise chiwecho kumwande yenu, chikulonga chawelu kumwande ye Mulungu mu Kilisito, na gose gochikugolosa wendigwa wangu ni kosoko ya kuwajenga. ²⁰ Kosoko nikogoha fina nikudaha kwija na kuwafika nyeye munyuwa yosikonela na kosoko yo mukudaha kunyona fina fomusikuhananga, kukudaha kuwa na kulemana, finju, nyono, nyiendesa, udasi, kulonga uwihi wa wanhu, kwanjasa udasi kuwanhu, na kuleka kuwa na dihewa mugati yenu. ²¹ Nikogoha kowage ugele wonikwija iMulungu kodaha kunigolosa nuwe na chinyala kumwande yenu, nani nohongesa kosoko ya wanhu wagolose wihi ugele ulokile na wasilambile kosoko yo wihi wawo.

¹ Aluno ni lwa kadatu nikwija ukwenu. Chila mbuli ikulahigwa kwa uhomelesi lwa wanhu weli ama wadatu fina amatulumo fogakulonga. ² Haniwajama awaya awagolose wihi ugele ulokile na wose wamonga nikuwajama hambiya ugele wonihechaka, fina fonagolose ugele wonowile bah one nija yangu ya keli, ugele wonikwija sikuwa na ubasi. ³ Kosoko mukuhananga mokiyonela muwecho fina Kilisito yakulonga kupulutila niye. Ukwenu Kilisito nghakuswela ludole ninga uludole lwakwe ukugolosa milimo mugati yenu. ⁴ Kosoko awanhu hawamukoma kwa kumutungika mumusalaba kosoko yo kuleka kuwa na ludole, ninga hambiya yakwikala kwe ludole lwe Mulungu. Kosoko nichaka ludole kwi mwene, amba ukenu nogendelela kuwa hamwedu naye kwa udaha we Mulungu. ⁵ Mukilangisise muwecho nghona mukwikala mwihuwi. Musikona fina Yesu Kilisito yakwikala mugati yenu? Nghona si nheifo basi nyeye muduga. ⁶ Nikuhuwila fina momanya fina sichidugile. ⁷ Chikumutasa Mulungu munghadahe kugolosa wihi, siyo kosoko choneka fina chifulusa kusuma, ninga mugolose maswanu hata inghowa aseye chikoneka fina chisumwa. ⁸ Kosoko chisikudaha kugolosa chochose kukana ichawelu, udaha wochinawo ni kugendelesa ichawelu. ⁹ Chikonela ugele wochichaka ludole anyeye mwina ludole. Chochikuwatasila mugaluke wanhu wamemelekele. ¹⁰ Nikwandika ibaluwa ino ugele ninghali kutali, kosoko ugele wonikwija ninghadindilisigwe kuwa mukali ukwenu kwa kutumiya auya udaha woninghigwe na Mundewa kosoko ya kujenga na sio kumola. ¹¹ Hambiya lekeni nimalagise ibaluwa yangu kwa kumulagani. Goloseni sinjila senu, muhulikise amaloleso gangu, mukifumilise munhu ne miyagwe, ne iMulungu wo wendo ne digoya kukuwa hamwedu na nyeye. ¹² Mukilamuse chila munhu e miyagwe kwa nyilamusa ye chiKilisito. Awanhu wose we Mulungu kuno wakuwalamusani. ¹³ Dihewa dye Mundewa Yesu Kilisito ne wendo we Mulungu na uhamwendu we Muhe Musunhile uwe hamwedu na nyeye mose.