1 TIMOSEYO

¹ Paulo, mutumigwa wa Kilisito Yesu ku dilagiso dye Mulungu Mwihula wetu na wa Kilisito dihuwi dyetu, ² Ku Timoseyo gomwanangu we chawelu mwi huwi: Dihewa, ubasi ne digoya kulawa kwe Mulungu iBaba na Kilisito Yesu iMundewa wetu fyuwe nagwe. ³ Ifene fonakulagise gweye usigale Efeso ichigele chonalutage Makedoniya, uleke uwalemese awanhu wamonga wanghafuse mafuso gengi, ⁴ kahi wanghakiingise musisimo isichaka chinhu kahi musimbuli sinhali sa wagono isikwigala ulukani kusuma amafuso ge chimulungu mwi huwi; ⁵ ninga isoko ye dilagiso dyetu ni uwendo uwukulawa mu moyo mujelu ne chidoga chiswanu ne dihuwi idichaka chimwefe. ⁶ Awanhu wamonga kwa kuswela gano wabidukila simbuli sibwalate. ⁷ Wenda inyuwa wafusaji wa malagiso, akuno wasimanyile chowekulonga kahi simbuli sowekudindilisa. ⁸ Hambiya chifulusa kumanya fina dilagiso dikugaluka iswanu kwe munhu iyekuditogomela munjila ye chawelu, ⁹ yanghaimanya imbuli ino, fina dilagiso sidikiligwe awachawelu ninga awabanaji kahi awechaka chogoho, kosoko ya awechaka Mulungu kahi we sisambi, kosoko ya awechaka usunhile kahi awehi, kosoko ya wakomaji wa waBaba sawo na wakomaji wa wanghina sawo, kosoko ya wakomaji, ¹⁰ kahi awedihabwa, kahi awekuduwa na wanhu munjila ye cholo chikulu, awahijaji wa wanhu, kahi awadasi, kahi awekilaha kwa udasi, kahi na mbuli yoyose iisikifumilisa na na mafuso go uwumi, ¹¹ ifene foilongingwe mu Mbuli Iswanu ye ditunyo ye Mulungu we imboto yonyikiligwe. ¹² Nikumulumba Kilisito Yesu Mundewa wetu, iyanigumile ludole, kosoko hakanyona namuchawelu hakanisagula mumulimo wakwe. ¹³ Hamwedu katali hanimutofulaga na kumudumangisa na kumudesa imwene; ninga hanihokela ubasi kosoko hangolosaga gago kwa kuleka kumanya na kuswela dihuwi, ¹⁴ kahi dihewa dye Mundewa wetu hadyongeseka lugano ukwangu hamwedu na dihuwi na uwendo ifyuwile mu Kilisito Yesu. ¹⁵ Ni mbuli ya chawelu kahi yagila kuhuwiligwa lugano, ing’amba Kilisito Yesu yeja muchilunga kuwehula awena sisambi. Aniye no we nghonga wa awena sisambi; ¹⁶ ninga hanipata ubasi kosoko ino, uleke mu niye we inghonga, Yesu Kilisito yonese umemelesi wo ufinyilisi wakwe, uwe ifuso ku wose awakawomuhuwila imwene kosoko yo uwumi wa majuwa gose. ¹⁷ Kwe Mundewa wa majuwa gose, inghekufa, inghekoneka, iMulungu ye iwene, chogoho na ditunyo fyuwe naye majuwa gose. Hano. ¹⁸ Dilagiso dino nikukwingha gweye, Timoseyo, gomwangu, ifene simbuli sa wagonesi fosalongile mchanha yako, uleke musiso uilewe inghondo iya fiswamu, ¹⁹ uwe na dihuwi na chidoga chiswamu. Kwa kuleka ichidoga chiswamu, awanhu wamonga wogwa na kwagilisa dihuwi, ²⁰ mugati yawo waumo cha Himenayo na Isikanda, wonimulekele Shetani uleke yawafuse wanghamutofule Mulungu.

¹ Iyilongolele sose, nikuhananga inhasa, kutasa, utasaji na malumbo figoloseke kosoko ya wanhu wose, ² kosoko ya wandewa na wose awena udaha, uleke chikale mikalile ye toyoyo ye chimulungu ne migendele miswanu ³ Imbuli ni swanu, kahi ifumilwa ne Mulungu Mwihula wetu, ⁴ iyekuhananga awanhu wose wehuligwe kahi wamanye ichawelu. ⁵ Kosoko kwina Mulungu yumwedu, kahi kwina mulamusi yumwedu hagati ya Mulungu na wanhu, imunhu Kilisito Yesu, ⁶ iyakilafile imwenyecho yowe mwihula wa wose, uhomelesi uwejile kwa ichigele chakwe. ⁷ Kosoko ino hanisaguligwa nyuwe muhubili kahi mutumigwa (Nikulonga chawelu, Aniye sikudanha), na mwalimu wa Wamembe mwihuwi ne chawelu. ⁸ Nikuhananga awagosi watase chila hanhu, wenule imikono misunhile chaka nyono hegu kugomba. ⁹ Nheigo kahi awanawake wakihambe suke sa usindamafu, hamwedu na chogoho kahi moyo wichaka makulu, si kwa kushuka njili hegu kwa sahabu na mawe gakwakaika hegu kwa suke sa maliho makulu, ¹⁰ ninga kwa sinhenda siswanu, ifene foiwagile awanawake awekumufuga Mulungu. ¹¹ Imwanamuke yefuse muusindamafu na kwa chogoho chose. ¹² Sikumwingha mwanamuke luneka lwa kufusa hegu kuwalongosa wagosi; yekuhanangigwa yanyamale twi. ¹³ Kosoko Adamu noyakonga kumbigwa, kamei Hawa; ¹⁴ kahi Adamu siyadanhiliswa, ninga imwanamuke noyadanhiliswa na kugwila muwihi. ¹⁵ Ninga imwanamuke kodaha kwihuligwa kugendela icheleko chakwe, yanghagendelela mwihuwi na uwendo na usunhile hamwedu na usindamafu.

¹ Ilongwa chawelu: Imunhu iyekuhananga yowe asikofu, yekwenda mulimo muswanu. ² Ninga yagila asikofu yowe munhu inghekutofuligwa, mulume wa muke yumwedu, musindamafu kahi kena mahala, munhu wa digoya, munhu wa chise, iyadahile kufusa, ³ si mulewaji wo ugimbi, si mutowaji wa wanhu, ninga muholo, si mubuni kahi yanghowe mwenda mapesa. ⁴ Yowe iyekwimila inyumba yakwe fiswanu, iyamanyile kuwajama awanagwe wowe wasindamafu na chogoho mumikalile yose; ⁵ kosoko imunhu inghamanyile kwimila inyumba yakwe digoya, kodaha nhani kulongosa dikanisa dye Mulungu? ⁶ Kahi yanghowe munhu yamuhokele Yesu majuwa makefu, yangheje yakiyona na kugwila muuliganiso wa Shetani; ⁷ kahi yagila yowe yakuhomelelwa masanu na wanhu wose awowile kunje, uleke yanghogwile mumatofulo na mumuheto wa Shetani. ⁸ Nheifo kahi, yagila awatogomi wowe wasindamafu, si wa malimi meli, si walewaji wo ugimbi, siwasulumilaji wa mapesa; ⁹ wakolelese isili ye dihuwi ne chidoga chiswanu. ¹⁰ Kahi yagila wamule kugesigwa; kamei wanghoneka wanjelu wagolose umulimo wo utogomi. ¹¹ Awake sawo nawo, wowe wasindamafu, si wasigilaji, wanhu we digoya, wahuwiligwe musimbuli sose. ¹² Imutogomi yowe mulume wa muke yumwedu, kahi iyekwimila awanagwe digoya mukaya yakwe. ¹³ Kosoko awekugolosa digoya umulimo wo utogomi wekupata itunyo iswanu awenyecho kahi wechaka woga mwihuwi idyuwile mu Kilisito Yesu. ¹⁴ Nikukwandikila sino mhuwile kwija ukwako chimwande, ¹⁵ ninga ninghasulukuka, udahe kumanya ifene foiwanogele awanhu kuwa munyumba ye Mulungu, nadyo no dikanisa dye Mulungu imumi, isumbi ne inghindiso ye chawelu. ¹⁶ Hechaka manhonge, isili ye ifuga igaluka nghulu: Hakoneswa mumutufi, na kumanyika mu Muhe, hakonigwa na wamalaika hakahubiliigwa muwamembe hakahuwiligwa muchilunga na kwinuligwa kuchanhya mwitunyo.

¹ Hambiya iMuhe yakulonga bila chifiso nhafi ifigele fye indumo awamonga wokitemanula ne dihuwi na kuhulikisa imimuhe yo udasi na mafuso ga magini, ² kwa udasi wa wanhu awekulonga udasi, akuno ifidoga fyawo fikwaka moto, ³ wakuwalemesa awanhu wanghakitole na kuwagamba wenege ne fyakudiya ifyumbigwe ne Mulungu fihokeligwe kwe ilumbo, na wose awena dihuwi kahi awamanyile ichawelu. ⁴ Kosoko chila chinhu chumbigwe ne Mulungu chigaluka chiswanu, kahi hechaka ichilemigwa chinghahokeligwa kwe ilumbo; ⁵ kosoko chihojojolwa ne imbulu ye Mulungu na kutasa. ⁶ Unghawengha amafuso gano awandugu, kokuwa mutogomi muswamu wa Kilisito Yesu, akuno ukugendelela musimbuli se dihuwi na mumafuso maswanu gowandamile. ⁷ Unghandamile sisimo se chibwalasi sa katali isichaka ulungu. Kifuse gomwenyecho imikalile ye chimulungu; ⁸ kosoko inghowa inyifusa amafuso ge chimutufi inoga, ninga inyifusa amafuso ge chimulungu inoga lugano musimbuli sose, kosoko ina ilagano dyo uwumi wa hambiya na uya we chigele chikwija. ⁹ Inonga ino ya chawelu kahi yagila kufumiligwa. ¹⁰ Kosoko mpaka kundumiliso ino chikiidasa na kupiligala, kosoko china ihuwi mwi Mulungu imumi, Mwihula wa wanhu wose, lugano awahuwile. ¹¹ Lagisa kahi fusa simbuli sino. ¹² Imunhu wowose yanghaubese ujelelo wako, ninga uwe chinhu cha kifusila kuwahuwile mu nonga na mumigendele na muwendo na mwihuwi na mumikalile miswanu. ¹³ Mpaka fonikwihja, piligala mu soma na kujama na kufusa. ¹⁴ unghaleke kuchitogomela ichise che Mulungu chuwile mugati yako, choninghigwe kwa ugonesi na kwa kwikiligwa mikono na wasehe. ¹⁵ Wandamila gano, wikale mugago, uleke wanhu wose wone ifene foukugendelela. ¹⁶ Kituse ne chidoga chako, na mafuso gako; gakolelese kosoko kwa kugolosa nheifo kodaha kihonya agweye gomwenyecho na wekukuhulikisa.

¹ Unghamugombele imusehe, ninga mulolese kefana Babako; wagolosele awajelelo kefana wanduguso, ² awadala kifana wang’inasako, awanawake wadodo kifana welumbuso muuya wose. ³ Uwe na chogoho ku wanawake wegane, awegane chawelu chawelu. ⁴ Imwanamuke mwigane yanghowa na wana ama wajukulu, leka wende kifusa simbuli se ifuga ukaya ukwawo kamei kamei wawagolosele digoya awaBaba sawo na wang’ina sawo; kosoko imbuli yo ifumiligwa ne Mulungu. ⁵ Ninga imwene imwigane chawelu chawelu, kalekigwa yemwene, yuyo keka dihuwi dyakwe mwi Mulungu, naye kogendelela mu kutasa na inhasa chilo ne misi; ⁶ ninga imwanamuke inghodaha kisisa imwenyecho kafulusa kufa hata yanghowa yekali mumi. ⁷ Uwenghe amalagiso gano, uleke wanghowe na ilema. ⁸ Imunhu wowose inghekuwatasa awanhu wo ukwakwe, nong’amba awanhu we inyumba yakwe kafulusa kulema dihuwi dyakwe kahi kagaluka mwihi kusuma imunhu inghahuwile. ⁹ Imwigane yanghawandikigwe mpaka yafike minyaka makumi mutandatu, naye hakowa muke wa mulume yumwedu; ¹⁰ naye yowe kahomelelwa sinhenda siswanu, yanghowa kakusa wanagwe fiswanu, iyawagolosele ihewa wageni, yanghowa kawanasha wasunhile migulu, yanghowa kawatasa awekudumangiswa, kahi iyakilafile kugolosa sinhenda siswanu. ¹¹ Ninga lema kuwawandika awegane wa disika didido; kosoko wanghakolwa no usulumisi we chimutufi fonghekwenda Kilisito wohanga kutoligwa, ¹² nawo wagila uliganiso kosoko wabena ichipingo chawo cha bosi. ¹³ Kahi hamwedu nag ago, wakifusa kuwa wadoba, kwa kusunguluta nyumba kwa nyumba, kahi si udoba du, ninga wagaluka wahehaji kahi wasakusaku, wakulonga simbuli isisiwagile kulonga. ¹⁴ Hambiya nikuhananga awegane we disika didodo watoligwe, walele wana, walongose sinyumba sawo, uleke wanghamwinghe imunghondo luneka lwa kuchitofula seye. ¹⁵ Kosoko awamonga wafulus kubiduka na kumwandamila Shetani. ¹⁶ Inghowa hena mwanamuke dikanisa dinghowe na musigo, uleke diwatase wamonga, awegane chawelu chawelu. ¹⁷ Awasehe awekulongosa fiswanu yagila wenghigwe maliho keli, nawo no waya awekutogoma umulimo wo kuhubili na kufusa. ¹⁸ Kosoko diwandiko dikugamba “Unghayowe mulomo ing’ombe youkutogomela umilimo wo kutowa uhemba mu chuga inghadiye simhule”, kahi “imutogomi yagila yahokele maliho gakwe.” ¹⁹ Unghafumile usongesi ku imusehe, ninga imbuli iyo ihomelelwe na wahomelesi weli hegu wadatu. ²⁰ Awaya awekugendelela mu sambi, uwagombele mumeso ga wose, uleke wamonga wogohe. ²¹ Nikukulagisa mumeso ge Mulungu na Kilisito Yesu na wamalaika wasagulwe, ugolose gano bila kuliganisa chimwande hegu kwa konela. ²² Unghamwikile munhu mikono chimwande, kahi unghakigume musisambi wa wanu wamonga; ikala mikalile ye uuya. ²³ Unghonywe meji muhala, ninga gimbi chidodogi kosoko ya sinda sako, ne sinhamu isikukwidasa chila chigele. ²⁴ Sisambi sa wanhu wamonga sa hajelu, silongola ku uliganiso, ninga sisambi sa wamonga sikuwandamila ichigele chikwija. ²⁵ Nheifo kahi sinhenda siswanu sa hajelu; kahi asiya isikoneka sisidaha kifisa.

¹ Wose wowile hasi yo utumwa wawenghe chogoho awakulu wawo, uleke disina dye Mulungu dinghatofuligwe na mafuso getu. ² Awaya awena wakulu awahuwile wanghawabese kosoko wagaluka ndugu; yagila wawatogomele muuswanu lugano wose, kosoko wose awekupata nyongesa kosoko yo mulima wawo wagaluka ndugu kahi wendigwa. Fusa kahi jama simbuli sino. ³ Imunhu wowose yanghafusa mafuso gengi kahi nghekufumila amafuso ge chawelu ge Mundewa wetu Yesu Kilisito, hegu mafuso ge ifuga yetu, ⁴ kamema nyiyona kahi nghamanyile mbuli yoyose; ninga muchilalu wa kudoga simbuli so kuwanga, isina mugati yakwe gele, lefi, usongesi, ubalalilaji, ⁵ na kugomba na wanhu wabanike mahala gawo, awaswelile ichawelu, awekudoga fina imikalile ye chimulungu ni luneka lwa kupatila ugoli. ⁶ Imikalile ye chimulungu ina ugoli mukulu kwa kumugolosa imunhu yegusigwe ne ifinhu foyenafyo; ⁷ kosoko sicheja na chinhu muchilunga kahi sichidaha kuleuka na chinhu kulawa muchilunga; ⁸ ninga chinghowa na chakudiya na suke chodaha kwigusigwa ne finhu fifyo. ⁹ Ninga wose awekwenda kuwa wagoli wakugwila mumagesa, na kugwila mumutego na usulumisi we chibwalasi kahi uukukoma, uukuwatubugisa awanhu mu uwagilisi na ubani. ¹⁰ Kosoko kwenda mapesa no musisi wo wihi wose; awanhu wamonga kwa kwenda lugano mapesa, waleka dihuwi dyawo na kihoma mumimoyo yawo kwa usungu mwingi lugano. ¹¹ Ninga agweye, munhu wa Mulungu kinege na mabuli gano kongha ichawelu, mikalile ya chimulungu, dihuwi, uwendo, kugojela na upolo. ¹² Lewa imilewo miswanu ye dihuwi; kolelesa uwumi wa maiwa gose wowenangiligwe ichigele fowalambile hamwande ya wahomelesi wengi. ¹³ Hamwande ye Mulungu iyekufingha ifinhu fyose uwumi, na hamwande ya Kilisito Yesu iyaihomelele na kuifumila ichawelu hamwande ya Pondiyo Pilato, ¹⁴ nikukulagisa ukolelese dilagiso dino bila ya ibando hegu ilema mpaka koneka kwakwe kwe Mundewa wetu Yesu Kilisito; ¹⁵ Kahi adino dikadikoneka bila ya chifiso muchigele chifumiligwe, ne imwene iyalugutisigwe kahi iyena ludole yemwene, Mundewa wa wandewa kahi Mukulu wa wakulu. ¹⁶ Yuyo ye imwene inghekufa, kahi iyekwikala muujelu uusikudaha kusegelelwa, inghenati yonigwe na munhu wowose hegu iyedaha kumona. Imwene yenghigwe chogoho na udaha majuwa gose. Hano. ¹⁷ Awagoli muchilunga chino, wagambe waleke kiyona, hegu wangheke ugoli uwichaka ichawelu, ninga wamuhuwile Mulungu iyekuchingha ifinhu fyose fingi uleke chifidiye kwa kubwedelela. ¹⁸ Wagolosele maswanu, uleke wowe wagoli wa kugolosa sinhenda siswanu, undewa na chise, ¹⁹ akuno wakiikile sigafu yuwe nghindiso swanu kosoko ye chigele ichikwija, uleke wapate uwumi we chawelu. ²⁰ Agweye Timoseyo, kolelesa simbuli sose sowinghigwe. Kinege ne simbuli isichaka ulungu isichaka chuinhu na inyisuma ya misungu iikwinangigwa yo udasi, ²¹ kwa kuihomelela iyo awamonga waswela dihuwi. Dihewa dyuwe hamwedu nanye.