1 WASESALONIKE

¹ Paulo, Siliwano na Timoteyo Kudikanisa dya Wasesalonike dye Mulungu Baba ne Mundewa Yesu Kilisito: Mboto ne dihewa dyuwe na nyeye. ² Chikumulumba Mulungu majuwa gose kosoko ya nyeye mose, ninga hachikuleka kuwatajani nomo chikutasa. ³ Ninga chikugelegela dihuwi ne milimo yenu ye uwendo kamei na kufinyilisa kwenu ne dihuwilo dyenu mwiMundewa wetu Yesu Kilisito. ⁴ Kosoko chimanya wandugu setu wendigwa we Mulungu fina Mulungu yawasagula nyeye. ⁵ Kosoko imbuli yetu swanu haimwijilani nyeye si kwa nonga muhala ninga kwa ludole na Muhe Musunhile hamwedu na umanyi mukulu, kahi mumanya hachuwa wanhu wa aina yaki ukwenu, ⁶ nanye hamuwa wandamisi wetu na wandamilaji wa Mundewa kosoko ye imbuli iya yomuhokele kwa lwidaso mukulu, ninga kwa chinyemi chigumigwe na Muhe Musunhile; ⁷ Kamei homukuwa mufano muswanu ku Wakilisito wose woile Makedoniya na Akaya. ⁸ Ninga siyo kugamba imbuli ye Mulungu ikuhulikika ako ukwenu Makedoniya na Akaya du muhala ninga dihuwi dyenu mwi Mulungu dimanyike kose uleke seye chuwe chichaka dyokulonga ⁹ Kosoko awene awecho wakusimulila muchanhya yetu ifene fomwachihokele kamei fomwamubidukile Mulungu na kuleka kufuga fisikimunhu na kumutogomela Mulungu ye mumi ne wechawelu, ¹⁰ na kumugojela imwanagwe yakulawa kulanga imwene woyamulafile kulawa muchilalo, naye yuyo no Yesu iyakuchihonya seye na inyono inghulu ikwija.

¹ Kosoko nyeye muwecho wandugu setu mumanya kwingila kwetu ukwenu fina kusowile chaka ² ninga kwa kudumangisigwa na kugoloseligwa gehile kifana ako Filipi ni kosoko ye Mulungu du no ilekile chihubili imbuli swanu kwa njila ya magayo makulu. ³ Kosoko majamo getu gasilawile kwa makosa ama kwa wihi, na finju ihile, ⁴ ninga ni kosoko chipata luhusa kwe Mulungu na kuhuwilika ne inonga ye imbuli swanu hata nheifo chikulonga siyo kwa kwendesa wanhu ninga kwa kumwendesa Mulungu iyakugesa mimoyo yetu. ⁵ Fina fomumanyile ne Mulungu muhomelesi wetu hachejile kwa nonga sa kiyona ama ga uchoyo; ⁶ togoleni nong’amba hachija kiyonesa na kukongha kutogoligwa na wanhu, nikuwatamilani ninga si ukwenu kahi kuwamonga, ⁷ uleke chuwe watumigwa wa Kilisito. Na ninga hachuwa waholo mugati yenu kifana mwanamuke foyakulela chali chakwe imwecho. ⁸ Kwanheifo ase nase chikuwalelani nyeye na kuhangila siyo imbuli swanu du ye Mulungu ninga na fidoga fyetu nafyo, kosoko mugaluka wandugu lugano ukwetu. ⁹ Kosoko mukugelegela magayo getu na difuke wandugu setu hachitogoma milimo chilo na misi uleke chinghamutwike munhu wowose ikanda mugati yenu nomochikutamilisa imbuli swanu ye Mulungu. ¹⁰ Anyeye mwawahomelesi hamwedu ne Mulungu inyuwa yochowile nayo mugati yenu ya uswanu na moyo mujelu wichaka nonga ihile munghenda yetu ukwenu Wakilisito. ¹¹ Fina fomumanyile hachimujama chila munhu mugati yenu kifana Baba yakulonga na wanagwe, ¹² Hachiwagumo nghinyo na kuwatasani mwikale mikalile ikumwendesa Mulungu iyawenangileni muundewa wakwe imwecho we ditunyo. ¹³ Ase nase majuwa gose chikumulumba Mulungu kosoko yaiyo kosoko kulawa fomwaihokele imbuli ye Mulungu yomuhulike kulawa ukwetu hamuihokela siyo kifana mbuli ya munhu ninga ye ichawelu ye Mulungu iikutogoma milimo mugati yenu. ¹⁴ Hambiya nyeye wandugu sangu liganeni na muwe kifana makainisa ge Mulungu muKilisito Yesu gowile Yudea, kosoko nanye hamutabika mumagayo gagaya kuwanhu we ditaifa dyenu muwecho fina fowagoloswe wamonga na Wayahudi ¹⁵ fina fowamukomile Mundewa Yesu hamwedu na wagonesi, na kuchitaga seye kunje; hawamudesa Mulungu na kumulema chila munhu ¹⁶ kwa njila ya kuchihindila seye chinghawahubiliye wamembe uhonyi uleke wagolose nhenda sawo so wihi majuwa gose. Ninga inyono ye Mulungu iwejila kundumo. ¹⁷ Ninga kwa seye wandugu setu hata inghowa hachikiyonile kwa chipisi ni kwa chimutufi ninga kwa fidoga hachihananga lugano kuwonani meso kwa meso. ¹⁸ Kosoko hachihananga kwija ukwenu lumwedu hadodo Aniye Paulo kwija ninga Shetani hakachihindila njila. ¹⁹ Kosoko ihuwi dyetu, chiyemi chetu na nghofiya yetu ya undewa yoni halika sinyeye kumwande ye Mundewa wetu Yesu chigele cho kwija kwakwe ²⁰ Kosoko nyeye no ditunyo dyetu na chinyemi chetu!

¹ Kamei hambiya fochasumwa kugojela lugano hachona ni fiswanu chilekigwe ako Asene. ² Kamei hachimutuma Timoseyo, mundugu setu mutogomi milimo miyetu kwe Mulungu mukuhubili imbuli swanu ya Kilisito uleke yawagume ludole mwihuwi dyenu na kuwagumani moyo. ³ Na fina munhu wowose yanghaganiswe na magayo gano kosoko nyey muwecho mumanya fina agano nogo chinangiligwe. ⁴ Kosoko fochowile hamwedu na nyeye, hachiwatamilani kumwande fina chotabika na kugaya kifana fomonile. ⁵ Ayo noilekile nimutuma Timoseyo kosoko ya kusumwa kugojela uleke kumanya dihuwi dyenu; Hanuwa na itisi fina nhegela mugesa kwagesani na mulimo wetu ugaluka wachaka chakasi ukwenu. ⁶ Ninga hambiya Timoseyo koya kulawa uko ukwenu na kuchitamilani mbuli swanu muchanhya ye dihuwi dyenu na wendo wenu. Kachitamila fina mukuchigelegela chila ijuwa na kuhananga kuchona kifana seye fochikwanga kumonani nyeye. ⁷ Hambiya wandugu setu chigumigwa ludole lugano kulawa mumagayo na gose gochilokele kosoko ye dihuwi dyenu. ⁸ Kosoko hambiya chikwikala halika nyeye mokwima ngwingwi MwiMundewa ⁹ Chomulumba Mulungu ilumbo dyaki ikulu halika nyeye mukwima gwi kosoko ye chinyemi chochinacho kwe Mulungu wetu. ¹⁰ Chilo na misi chikutasa kwa ludole fina chodaha kiyona meso kwa meso na kongesela gaya gahunghuke mwihuwi dyenu. ¹¹ Hambiya Mulungu Baba yetu imwecho na Mundewa wetu Yesu Kilisito yachilongose njila ya ukwenu. ¹² Mundewa yawongese na kuwamemelesa uwendo wakwe nyenye kwa nyenye na kwa wose, kifana seye fochimemile wendo ukwenu. ¹³ yaigolose mimoyo yenu ime ngwi muusunhi uleke muwe wanhu wechaka wihi kumwande ye Mulungu na Baba chigele cho kwija Mundewa wetu Yesu hamwedu na wasunhile wakwe wose.

¹ Hambiya ichisigale wandugu sangu chikuwatasani dedede mwisina dye Mundewa Yesu kifana fomukifusile kulawa ukwetu fina mukonye kwikala imikalile iyo ikumubwedesa Mulungu. ² Kosoko mumanya amasigilisi go chamwinghileni kulawa kwe Mundewa Yesu. ³ Nago nogo yakwenda iMulungu fina nyeye musunhingwe mulekane na dihabwa; ⁴ Fina chila munhu mugati yenu yamanye kwikala no Mutufi wakwe muusunhi na fiswanu. ⁵ Inghowe kwa usulumisi wihile kifana wanhu wasimumanyile Mulungu. ⁶ Hanghowe na munhu yamugolosele miyagwe wihi kosoko Mulungu noyakuliha wihi kwa wihi fina fochiwatamileni kunyuma na kuwajamani lugano. ⁷ Kosoko Mulungu hachinangile muuwihi ninga muusunhi. ⁸ Hambaya nong’amba imunhu iyakuuilema imbuli yakuwa nghalemile mbuli ya munhu ninga ya Mulungu yakumwinghani Muhe wakwe Musunhile. ⁹ Hambiya muchanhya ya uwendo chila munhu na miyagwe ichaka haja munhu yawaandikile, kosoko nyeye muwecho mufusigwa ne Mulungu kiyenda nyenye kwa nyenye; ¹⁰ kosoko mukugolosa kuwandugu wose woile Makedoniya ninga chikuwatasa mugendelele kwa ludole. ¹¹ Kahi mukitulise na kugolosa milimo yenu kwa mikono yenu muwecho kifana fochiwalagise, ¹² uleke muwe wanhu waswanu kuwanhu woile kunje na uleke munghamwegamile munhu wowose. ¹³ Ninga wandugu sangu hachikwenda munghamanye chochose muchanya ya wanhu wafile uleke munghowe na lutwitwi kifana wanhu wechaka ihuwi. ¹⁴ Kosoko inghowa chikuhuwila fina Yesu hakofa na hakenuka muchilalo basi kulokela iyo na waya wafile mwa Yesu Mulungu yakwija yawalafa muchilalo. ¹⁵ Hambiya chikuwatamilani gano kwa mbuli ya Mundewa, fina aseye chiwomi na awakusigala mpaka chigele cho kwija Mundewa chawelu hachikwija chiwalongolela waya wafile. ¹⁶ Kosoko Mundewa imwenyecho na lwinango hamwedu na malaika wakwe mukulu ne dijwi dye digunda dye Mulungu fodulika kulawa kulanga, kamei wafile muKilisito nowakukonga kwinuligwa. ¹⁷ Kamei aseye chiwomi, chisigale chodakigwa muchanhya mumafunde na chokuwa ne Mundewa minyaka na minyaka. ¹⁸ Kigumeni nghinyo nyenye kwa nyenye kwa mbuli sino.

¹ Hambiya wendigwa wangu kwa mbuli ya fipisi na figele ichaka haja niwaandikile, ² kosoko nyeye muwecho mumanya fiswanu fina dijuwa dye Mundewa dikwija kifana muhiji nhechilo. ³ Nomowakugamba, “kwina digoya na kusalama,” wihi noho ukuwejila kwa kusinhukisa kifa mwanamuke nomo yakwijiligwa na usungu wo kwelekwa na kwichaka kinega! ⁴ Ninga nyeye, wendigwa hamuwile mwichisa, mpaka dijuwa diya diwejile kifana muhiji bila kumanya; ⁵ Kosoko nyeye mose mwa wana wa ujelu na wana wa nhemisi aseye siyo wana wa nhechilo ama wa ichisa. ⁶ Hambiya chinghagone kifana wamonga fowakugona, ninga chuwe meso na kulanga. ⁷ Kosoko awakugona wakugona nhechilo na awakulewa wakulewa nhechilo. ⁸ Ninga kulawa chuwe muujelu, basi chuwe meso, na kufala ngulo ye chuma ye dihuwi na wendo, na kofiya ye dihuwi dye uhonyi ukulawa mwe Mundewa wetu Yesu Kilisito, ⁹ kosoko Mulungu hachikile kwa nyono ninga chipate uhonyi mwiMundewa wetu Yesu Kilisito, ¹⁰ iyafile kosoko yetu, uleke inghowa chameso ama chigona chuwe womi hamwedu naye. ¹¹ Kahi kiingheni moyo nyenye kwa nyenye na kijenga kifana fomukugolosa. ¹² Ninga wandugu chikuhananga muwamanye waya wakugaya kosoko yenu na kuwemilani mwiMundewa na kuwajamani. ¹³ Wagoloseleni fiswanu muuwendo, kosoko ya milimo yawo. Muwe na dihewa mugati yenu muwenyecho. ¹⁴ Na chikuwatasani wandugu, wajameni awekale fibi, wagumeni moyo wofile fidoga, wataseni wasokile, muwe wafinyilisi na gose. ¹⁵ Hanghowe mugati yenu na munhu yakumuliha miyagwe dihile kwa dihile, ninga majuwa gose konheni kigolosela maswanu munhu na miyagwe na wose. ¹⁶ Muwe na chinyemi majuwa gose. ¹⁷ Taseni bila kuleka. ¹⁸ Lumbeni kwa chila mbuli; kosoko nhafo nofoyakwenda Mulungu mwa Kilisito Yesu ukwenu. ¹⁹ Munghamulemese Muhe. ²⁰ Munghaubese ugonesi we Mulungu. ²¹ Ninga geseni chila chinhu koleni amaswanu; ²² kaleni kutali na chila dihile. ²³ Mulungu we digoya imwecho yawasunhe lugano fidoga na mimoyo yenu na mitufi muwe waswanu chigele cho kwija kwakwe Mundewa wetu Yesu Kilisito. ²⁴ Iyawenangileni yakuhuwilika na kogolosa gano. ²⁵ Wandugu chitasileni. ²⁶ Walamuseni wose wandugu kwa mulamuso usunhile. ²⁷ Nikuwalagisa kwa ludole fina wandungu wose wasomeligwe ibaluwa ino. ²⁸ Mboto ya Mundewa wetu Yesu Kilisito yuwe hamwedu nanye.