1 PETULO

¹ iPetulo mutumigwa wa Yesu Kilisito kuwanhu wasaguligwe, wekale hayohayo musiisi so ugeni ako Ponto, Galatiya, Kapadokiya, na Asiya na Bisiniya, ² awasaguligwe na kumanyigwa na Mulungu Baba na kusunhigwa na Muhe uleke wamuhulike Yesu Kilisito na kutwekeseligwa sakame yakwe: Mboto ne dihewa dimemelekele nanye. ³ Yatunyigwe Mulungu Baba we Mundewa wetu Yesu Kilisito! Iyacheleke lwa keli kwa kuchonela ubasi lugano uleke chuwe na ihuwi dine uumi wo kulawa kwakwe Yesu Kilisito muchilalo, ⁴ Chipate na ubasi uusikubanika wichaka wihi uusikunyala uwikigwe kulanga kosoko yenu. ⁵ Anyeye mukidimigwa kwa ludole lwe Mulungu kulokela mwihuwi, uleke mupate uhonyi ufuluse kugubuligwa muchigele che ndumo ⁶ Mokuwa na chinyemi lugano chigele chicho, ingawa hambiya kwa chipisi chidodogi soko ni lasima muwe mwichaka chinyemi kosoko ya magesa ge hayohayo. ⁷ Kosoko kugesigwa kwa dihuwi dyenu kwina maliho makulu kusuma sahabu ikwagilila ingawa ikugesigwa kwa moto, uleke konekane fina kwina ilumbo na itunyo na chogoho mukugubuligwa kwakwe Yesu Kilisito. ⁸ Ninga mukumwenda ingawa musimonile, hambiya mumuhuwila na kubweda kwa chinyemi chikulu chine lutunyo, ⁹ fina fomuhokele uhonyi we fidoga fyenu kulokela dihuwi dyenu. ¹⁰ Awagonesi awagonese imboto yenu hawaikongha na kuyusilisa na kuihananga imbuli yo kwihuligwa; ¹¹ Wamanye no chigele chihoki choneswe ne Muhe we Kilisito mugati yawo, kugonesa magayo goyakwija yapata Kilisito ne ditunyo dyokwandamila. ¹² Howagubulilwa fina sikosoko ya milimo yawo awecho, ninga kosoko ya nyeye mumbuli sino sikuhubiliigwa hambiya kulokela waya wawegalile imbuli swanu kwa Muhe Musunhile yalawile kulanga (mbuli sikwendigwa kulangigwa hata na Wasungula)! ¹³ Hambiya kiyoheni mumisungu yenu mufulise na kwika dihuwi dyenu mudihewa dyo mukwija mukwinangigwa ugele Yesu Kilisito foyakwija yagubuligwa. ¹⁴ Kahi kifana wana mukuhulika munghakiliganise na umelo wenu wakatali na ubwalasi. ¹⁵ Ninga kifana iyawenangeni fonimusunhi nanye yuweni wasunhile, mumikalile yose. ¹⁶ Kosoko itulumigwa kugamba “Mokuwa wasunhile kosoko niye namusunhile”. ¹⁷ Halika mukumwinanga Baba yuyo iyakulamula wanhu bila konelela basi gendeni kwa chogoho muchigele chenu kifana si wakaya. ¹⁸ Manyeni fina hamwihuligwa musinhenda sihile sa wababa senu si kwa finhu fikubanika kifana fesa na sahabu, ¹⁹ ninga kulokela sakame ya iliho ikulu ya Kilisito, kifana ye mwana we ngholo iyechaka chilema kahi ikofu, ²⁰ imwene hakamanyika kulawa kunghali kumbigwa nghindisi se chilunga, kahi hakagubuligwa kundumo kosoko yenu nyeye. ²¹ Kulokela imwene mukihuwisa mwi Mulungu iyamwinuleni kulawa muchilalo na kumwinagha itunyo, uleke dihuwi dyenu ne nyihuwisa yenu fuwe mwi Mulungu. ²² Hambiya musunhigwa fidoga fyenu kwa njila ya kuhulika kwenu ichawelu kwa wendo mujelu we chindugu, kiyendeni nyenye kwa nyenye kwa moyo mujelu. ²³ Kokoso mwelekwa lwa keli si mbeyu ikubanika ninga iisikubanika hata kwa kulokela mbuli nyumi imile mwi Mulungu. ²⁴ Kosoko, “Mutufi wose ukifana manyasi na dituyo dyakwe dyose dikifana iluwa dya inyagala, manyagala gakubota maluwa kamei gakulagala. ²⁵ Ninga imbuli ye Mundewa ikwima minyaka na minyaka.” Na imbuli yo noiya ihubiliigwe ukwenu.

¹ Ninga tageni kutali wihi wose na hila, chimwefe, gele, na kisongesela, na maligo gose. ² Kahi kifana wana wadodogi melemeleni mele amaswanu ge chimuhe, kosoko kulokela gago mokulila uhonyi wenu. ³ Kosoko chinomola uswanu we Mundewa. ⁴ Mulutileni imwene idiwe dimumi dilemigwe na wanhu, ninga kwe Mulungu disaguligwa kahi dya iliho ikulu. ⁵ Nanye kifana mawe ge mumi mujengigwa muwe nyumba ya Muhe ukuhani usunhile, mulafe sadaka sa Muhe sikwendigwa ne Mulungu kulokela Yesu Kilisito. ⁶ Kosoko itulumwa mumaandiko kugamba, “Langa nikwika Sayuni diwe dya munghanda disaguligwe dye diliho dikulu na chila iyakumuhuwila nghakupata chinyala.” ⁷ Ukwenu nyeye muhuwile kagaluka wa iliho ikulu ninga kwa wasikuhuwila, “Idiwe diya diya dilemigwe na wajensi digaluka iwe ikulu dya munghanda,” ⁸ Na kahi mawandiko gamonga nago gagamba: “Mudiwe umo wotowa nghwal, iwe dya ikangalawe” idikuwakinya kosoko wasendile kuhulika imbuli yowahanagwe kugolosa. ⁹ Ninga nyeye musaguligwa, lukolo lwe Undewa we chikuhani, ditaifa disunhile, mwa wanhu we Mulungu uleke mutamilise nhenda singhulu isakwe imwene yawenangileni kulawa mulwisa kwija kumwanga wakwe mukulu. ¹⁰ Ktali hamuwa siyo wanhu ninga hambiya wanhu we Mulungu, hamuwa mwichaka ubasi ninga hambiya muhokela ubasi. ¹¹ Wandugu sangu nikuwatasani nyeye muwageni na wagendaji mwikale kutali ne sinhenda so umelo wo mutufi isikulemana na chidoga. ¹² Muwe na igendele miswanu mugati ya wamembe uleke inghowa wakulonga gehile muchanhya yenu, fowakona sinhenda senu siswanu wamutunye Mulungu mwijuwa dyo kwija kwakwe Mundewa. ¹³ Hulikiseni wene ludole ne wasilikal; ikosoko ye Mundewa. ¹⁴ Ama awakutawala kosoko watumigwa ne Mulungu kuwatosa igelo awakugolosa nhenda sihile, na wawatunye wakugolosa maswanu. ¹⁵ Kosoko nofoyakwenda iMulungu fina kwa kugolosa maswanu mudahe kuulegusa uwihi na ubwalasi wa wanhu. ¹⁶ Ikaleni mundekeleligwa kifana wanhu walekeleligwe, ninga munghagolose wihi kosoko muwa mundekeleligwa, ninga kifana watumigwa we Mulungu. ¹⁷ Wahulikeni wanhu wose na wendeni wayenu wo mwinawo mwi kanisa, mogoheni Mulungu, hulikiseni wakulu, yandamileni magayo ga Kilisito ¹⁸ Anyeye watumwa wahulikiseni wakulu wenu kwa chogoho chose siyo du kwa waya waholo na waswanu ninga hata waya awakali. ¹⁹ Kosoko ni fiswanu munhu kufinyilisa magayo kosoko ye Mulungu nomo ukugaya wichaka dikosa. ²⁰ Kosoko kwina iliho dyaki nomo ukufinyilisa magayo kosoko ya nhenda sako sihile? Ninga halika ukufinyilisa magayo kosoko ye Mulungu basi Mulungu imwecho kokumotesa. ²¹ Umo nomo mwinangiligwe kosoko Kilisito imwecho hakalokela umo mumagayo kosoko yenu, kawalekelani mbasi mwandamile. ²² “Ghagolose sambi kahi wihi usoneke mumulomo wakwe.” ²³ Foyaligigwe nghowise iligo, foyasambasigwe nghatowile munhu. Ninga hakamuhuwila Mulungu imulamusi yechaka konelela. ²⁴ Imwene imwecho hakenula sisambi setu mumutufi wakwe mumusalaba, uleke chufe musisambi na chuwe womi munhenda swanu. Kwa kutoigwa kwakwe anye muhona. ²⁵ Kosoko hamuwa kifana ngholo sagilile, ninga hambiya muya kwe mudimi na mulangisisi we fidoga fyenu.

¹ Anye nanye muwanawake wahulikeni wagosi wenu uleke halika wauko awasikwandamila imbuli wayandamile kwa kulanga nhenda swanu sa wanawake wawo, ² nomoo wakona uswanu na chogoho mumikalile yenu. ³ Kahi kihamba kwenu kunghowe kunje yo mutufi kwa njwili sa sahabu na kufala fiswanu, ⁴ ninga uswanu wo kihamba kwenu uwe kulawa kusi ye fidoga fye mimoyo imiswanu ikwendesa hamwande ye Mulungu. ⁵ Nhafi nofo yowile kuwanawake awasunhile wene dihuwi kwe Mulungu wakihambage awecho na kuwahulika wagosi wawo, ⁶ kifana Sala foyamuhulika mugosi wakwe Ibulahimu na kumwinanga mundewa. Na hambiya nyeye mugaluka wanagwe munghagolosa maswanu bila itisi dyodyose. ⁷ Nheifo anye nanye muwagosi ikaleni fiswanu na wanawake senu na kumwingha mwanamuke chogoho kifana chinhu chichaka ludole kifana wahasi we imboto yo uumi, uleke kutasa kwenu kunghakindisigwe. ⁸ Kwa kumalagisa mose muwe na lugota wa chimuhe, ubasi, wendo munhu na miyagwe, moyo muswanu na uholo. ⁹ Munghakigolosele gehile kwa gehile ninga badala ya wihi kigoloseleni maswanu na kimotesa kosoko nogomwinangiligwe kumboto. ¹⁰ Kosoko iyakwenda uumi na kuwa na majuwa maswanu yakinege dilimi dyakwe dinghalonge gehile na milomo yakwe inghalonge wihi, ¹¹ yabiduke kuuleka uwihi na kugolosa uswanu; yakonghe dihewa na kudyandamila. ¹² Kosoko meso ge Mundewa gowa kuwena sinhenda siswanu na nghutwi sakwe sigubuka kutegelesa mataso gawo, ninga chihanga che Mundewa chuwa kwa waya wakugolosa wihi. ¹³ Nonani yakwanga yawabulage halika mukugolosa maswanu? ¹⁴ Ninga hata munghowa mukugaya kwa kugolosa maswanu momotesigwa, munghogohe gowakogoha. ¹⁵ Ninga mumimoyo yenu mwingheni Kilisito chogoho kifana Mundewa, majuwa gose yuweni meso mudahe kumutamila chila munhu dihuwi dyomwinadyo, kahi goloseni kwa uswanu na ujelu. ¹⁶ Yuweni wanhu waswanu na wakuhuwilika uleke nomowakumulongani fibi fowakona nhenda senu swanu sa Kilisito wapate chinyala. ¹⁷ Kosoko ni fiswanu kutabika soko ya maswanu mana ayo noyo yakwenda Mulungu kuliko kutabika kwa kugolosa wihi. ¹⁸ Soko Kilisito naye hakofa lumwedu du soko ya sambi, iyechaka wihi kosoko ya wene wihi uleke yachigale kwe Mulung, hakofa chimutufi ninga mumi chimuhe. ¹⁹ Hoyoluta kuhubiliya fidoga fuwile muchifungo. ²⁰ Fidoga fifyo ifisendile kumuhulika Mulungu muchigele foyawagojele kulamba mumajuwa ga Nowa, kulawa kujengigwa disafina dingiligwe na wanhu wakefu, nawo ni munana muhala, awahonyigwe kulokela meji. ²¹ Aino ni mbasi ya ubatiso ukuwahonyani nyeye majuwa gano, siyo kulegusa wihi wa mutufi du, ninga uswanu we fidoga kulokela kulawa kwa Yesu Kilisito muchilalo, ²² iyalutile kulanga na kowa mukono wo kumoso we Mulungu hamwedu na malaika, uludole na udaha wose ukumuhulika imwene.

¹ Hambiya kosoko Kilisito hakagaya mumutufi nanye kiyoheni muwecho mwidoga didyo, kosoko iyakugaya kalekana na sambi, ² kosoko kulawa hambiya munghekale kahi munghenda se umelo se chimutufi ninga fina foyakwenda Mulungu. ³ chigele chomwikale munhenda senu sihile se chilunga sidumila hambiya, kosoko hamugenda muwihi, umelo wihi, ulefi, ukobo na kufuga masikimunhu. ⁴ Wakujuma kosoko wakona anyeye musikwandamila mbuli sawo sihile na kosoko iyo wakuwaligani. ⁵ Ninga wakwija walafa nghala ya chila mbuli kwe imwene Imulamusi we fyose fimumi na fufile. ⁶ Kosoko iyo nochileka imbuli swanu ihubiligwe mpaka kuwofile, uleke waliganiswe chimutufi kifana wanhu fowakuliganisigwa uleke wowe womi chimuhe kifana Mulungu fonimumi. ⁷ Ninga indumo ye chila mbuli yahabehi, basi mwikale meso na fiswanu na mumawombi genu muwecho. ⁸ Kwa kongesa mwikale muwendo kiyendeni nyeye kwa nyenye, kosoko uwendo ukugubika masambi mengi. ⁹ Kihokeleni musikaya senu nyenye kwa nyenye bila kukalala. ¹⁰ Yuweni wanhu waswanu mukitogomele chila munhu na miyagwe fina finafoyahokele chipawa kwe Mulungu. ¹¹ Iyakulonga yalonge kifana yakulonga mbuli ya Mulungu, na iyakutogoma yatogome kwa ludole lwo yenghigwe ne Mulungu, uleke Mulungu yatunyigwe mugose kulokela Yesu Kilisito. Mwiimwene mwina itunyo na udaha wa majuwa gose. Hano. ¹² Wandugu sangu munghone ijumo magayo gowile mugati yenu gakuwapata kuwagesani, kifana chinhu chisha. ¹³ Ninga sekeleleni kosoko mukuhangila magayo goyapata Kilisito uleke mwije muwe na chinyemi na kubwedelela mwitunyo dyo kugubuligwa kwakwe. ¹⁴ Inghowa mukuligigwa soko ye disina dya Kilisito, mwina ibeka, kosoko iMuhe we ditunyo imwene we Mulungu yakwikala muchanhya yenu. Ukwawo wene keha, ninga ukwenu, kena itunyo. ¹⁵ Ninga munghaleke munhu wa ukwenu yagaye kifana kakoma munhu, ama muhiji, au yagolose mbuli ihile, hegu kifana munhu yendeyogolosa mbuli sa wamonga. ¹⁶ Ninga inghowa yakutabika kosoko ni muKilisito basi yanghone chinyala, mutunye Mulungu kosoko nokwinula disina dyakwe uko. ¹⁷ Kosoko chigele chifika cho uliganiso we Mulungu kukongela munyumba yakwe, hambiya halika ukukongela ukwetu togoleni yokuwa nhani kuwanhu awasikwenda kuhulika imbuli swanu ye Mulungu? ¹⁸ Na, “Imuchawelu yanghahonyigwa kwa tabu togola yokuwanhani kwa yuya inghamumanyile Mulungu ne yene sisambi?” ¹⁹ Kosoko iyo basi waya awakugaya kusoko ye Mulungu wamwikile Mumbi imuchawelu dihuwi, nomowakugolosa maswanu.

¹ Hambiya fina niye nani fonimusehe na muhomelesi wa magayo ga Kilisito, nheifiya kwa kuhangila ditunyo digubuligwe, nikuwatasa dedede wasehe woile ukwenu ² kudima singholo se Mulungu suwile ukwenu, siyo kwa kudindilisigwa ninga kifana Mulungu foyakwenda mugolose ³ munghowe fitunghati kwa waya womukuwadima, ninga muwe ifuso kusingholo so mukudima ⁴ na mudimi mukulu foyakwijayasololekela mokwija mufasigwa nghofiya ye ditunyo iisikunyala. ⁵ Nheifo anye nanye muwajelelo mugahokele malamusi ga filongosi, mose kiyoheni uholosi uleke mukitase munhu na miyagwe, “Kosoko Mulungu yakulemana na awekiyona ninga yakuwengha mboto awaholo.” ⁶ Yugwileni hasi yo mukono mukulu we Mulungu uleke yawenuleni muchigele chakwe. ⁷ Mutwikeni imwene manghonge genu gose kosoko noyakuwalangilila. ⁸ Gendeni fiswanu na kuwa meso kosoko imulhi wenu luhoma kakifana simba yakugendagenda kumukongha munhu yamumese. ⁹ Mlemeni, imeni ngwi mwihuwi dyenu kosoko mumanye fina magayo gakumemelekela kuwandugu senu woile muchilunga. ¹⁰ Na fomukumala kutabika kwa chigele chidodogi Mulungu we imboto yose iyamwinangeni kuditunyo dyakwe dya minyaka na minyaka duwile muKilisito, yuyo imwecho kowoisilani, kowatasani, kowagumani ludole na kuwemisani. ¹¹ Kwe imwene kwina ludole minyaka na minyaka. Hano Mulamuso wo kumalagisa ¹² Kulokela Silowano wonikudoga fina ni munhu muchawelu, niwandika baluwa ino ndodogi kuwagumani ludole na kulonga fina ayino no mboto ye chawelu ye Mulungu imeni ngwi mu iyo. ¹³ Dikanisa duwile hano Babeli dikuwalamusani na mwanangu Maluko. ¹⁴ Kilamuseni munu na miyagwe kwa mulamuso wa wendo. Dihewa dyuwe nanye mose muwile mugati ya Kilisito.