1 YOHANA

¹ Chikumutamilani anyeye aiya yowile kulawa kunghonga, yochihuluke, yochonile na meso getu, yochilangile na kuikwafa kwe mikono yetu, muchanhya ya imbuli yo uwumi ² uwumi auno hawonesigwa, na chiwona kahi chiuhomelela, na chikumutamilani ukwenu uwumi wa majuwa gose, uwowile na iBaba ninga hawonesigwa chimesomeso ukwetu ³ Chikumutamilani anyeye wochihulike na kona uleke nanye muwe na umwedu na seye; na umwedu wetu ni hamwedu na Baba na hamwedu na Imwanagwe Yesu Kilisito. ⁴ Chiwandika simbuli sino uleke ichinyemi chetu chimemelekele. ⁵ Ayino no mbuli yochihulike kulawa ukwakwe na kutamilisa ukwenu fina iMulungu ni ujelu na umwakwe mwachaka chisa chochose. ⁶ Chinghagamba china umwedu naye ugele chikugenda muchisa chikudanha kahi chisikugolosa ichawelu; ⁷ ninga chinghagenda mu ujelu fina imwene foyowile mu ujeleu, china umwedu chila yumwedu na miyagwe, kahi isakame ya Yesu iMwanagwe ikuchisunha kulawa mu uwihi wose. ⁸ Chinghagamba chichaka wihi, chikidanhilisa chiwecho, na ichawelu isuwile umwetu. ⁹ Chinghalamba uwihi wetu, imwene ni wakuhuwilika na chawelu yakwenda yachinenele uwihi wetu na kusunha na kubana kwetu kose. ¹⁰ Chinghagamba chisigolose wihi, chikumugolosa imwene fina mudasi, na imbuli yakwe umwetu yamwichaka.

¹ Wanangu wadodogi, nikumwandikilani sino uleke munghagolose uwihi; imunhu wosose yanghagolosa wihi chenaye iyakuchitasila kwa Baba, Yesu Kilisito imuchawelu; ² imwene no nhambiko yo uwihi wetu, si uwihi uwetu du muhala ninga kosoko ye wihi we chilunga chose. ³ Kwa njila ino chikuwa fina chawelu chimumanya, nghona chikolile amalagiso gakwe. ⁴ Ayuya iyekugamba, “Nimumanya,” ninga nghekogoha amalagiso gakwe, ni mudasi, kahi mwi mumhu yefane yo kechaka ichawelu, ⁵ ninga iyekogoha imbuli yakwe, chawelu mwi munhu yuno uwendo we Mungu umemelekela. Kwa nheifo chikumanya chawelu fina chuwa umwakwe. ⁶ Ayuya iyakugamba yakwikala umwakwe inogela yaligane lugano fina imwene foyowile iYesu. ⁷ Wendigwa, sikumwandikilani ilagiso disha, ninga ilagiso dya katali no imbuli yomwahulike. ⁸ Kahi nikumwandikilani ilagiso disha, dye chawelu umwakwe na umwenu, kosoko ichisa chikuleuka na ujelu we chawelu ukonga kumulika. ⁹ Ayuya iyakugamba fina kowa mu ujelu akuno yakumusuhila imunduguse yekali muchisa. ¹⁰ Ayuya iyakumwenda imunduguse yakwikala mu ujelu na kwachaka soko yoyose yakumukwakalisa. ¹¹ Ninga yuya yakumusula imunduguse kowa muchisa na yakugenda muchisa, na nghamanyile koyakuluta kosoko ichisa chimutula meso. ¹² Nikumwandikilani anyeye, wana wadodogi, kosoko uwihi wenu ulekeleligwa kosoko yakwe. ¹³ Nikumwandikilani anyeye, cha baba, kosoko mumumanya imwene yowile kulawa kung’onga. Nikumwandikilani anyeye, wajelelo, kosoko mumusuma ayuya yehile. Nikumwandikilani anyeye, wana wadodogi kosoko mumumanya iBaba. ¹⁴ Nikumwandikilani anyeye, cha baba, kosoko mumumanya imwene wa kulawa kunghonga. Nimwandikilani anyeye, wajelelo, kosoko mwina ludole, na imbuli ye Mulungu yuwa mugati yenu, na mumusuma iyehile. ¹⁵ Munghachende ichilunga hegu ifinhu fya muchilunga. Imunhu wowose iyakwenda ichilunga, uwendo wa Baba usimugati yakwe. ¹⁶ Kosoko gose gowile muchilunga, kukusulumila kwa umutufi na kusulumila kwa meso na kiyona kwo mutufi, si fya Baba ninga ni fye chilunga. ¹⁷ Ne chilunga chikuloka, na usulumisi wakwe; ninga ayuya iyakugolosa foyakwenda iMulungu yekwikala majuwa gose. ¹⁸ Mowana, Awuno no ugele we indumo; fina fomuhulike fina imunghondo wa Kilisito yakwija, hambiya wanghondo wa Kilisito wengi wafulusa kwija, kosoko iyo chimanya no ugele we indumo wahabehi kwija. ¹⁹ Hawaleuka wachileka seye, kosoko wasowile wayetu, kosoko nhanga wowile wayetu hawowa wakugendelela hamwedu nase, ninga hawaleuka uleke imanyike fina si wose wowile hamwedu nase. ²⁰ Ninga anyeye mubakigwa mafuta ne Musunhile, nanye mose mumanya. ²¹ Nikumwandikilani, si kosoko musimanyile ichawelu, ninga muimanyile, na kumanya fina kwechaka udasi ukulawa muchawelu. ²² No nani imudasi ninga ayuya iyakukana fina Yesu si Kilisito? Ayuya no Munghondo wa Kilisito, imunhu iyekumukana iBaba na iMwana. ²³ Wowose iyekumukana iBaba nghenaye iMwana. Iyakumufumila iMwana kenaye iBaba naye. ²⁴ Aiya yomwahulike kulawa kunghonga ikale mugati yenu. Nghona yomuhulike kulawa kunghonga ikala mugati yenu, mokwikala mwi Mwana na mwi Baba ²⁵ Ayino no mbuli yoyachilalaganise aseye Uwumi wa majuwa gose. ²⁶ Nikumwandikilani sino kosoko ya waya wakuhananga kumudanhilisani. ²⁷ Ninga kwa nyeye, amafuta gaya gomubakigwe kulawa ukwakwe gekala kugati yenu, kahi mwechaka soko ya munhu wowose kumufusani. Kosoko amafuta gaya gakuwafusa finhu fyose, kahi ni chawelu, ninga si udasi, fina fogamufusileni, ikaleni kugati yakwe. ²⁸ Na hambiya mowana wadodogi, ikaleni mugati yakwe, uleke nghona yakwija yolawanisa chuwe na ng’inyo na si kumutija kosoko ya chinyala cho kwija kwakwe. ²⁹ Nghona mumanyile fina imwene ni muchawelu mukumanya fina chila iyakugolosa maswanu kelekigwa naye.

¹ Langeni, uwendo wochinghigwe na Baba, kachigolosa chinangigwe wana wa Mulungu, na nofo chuwile. Ichanghone ichilunga chisikuchimanya seye sichamumanyile imwene. ² Wendigwa, chawana wa Mulungu hambiya; isikumanyika fochikwendigwa chuwe, ninga chimanya foyakasololoka chikachikuwa fina imwene, kosoko chikachimona foyowile. ³ Na wose awena dihuwi dino umwakwe wakisunha awenyecho, fina imwene fonimusunhile. ⁴ Chila munhu yakugolosa wihi yakubana amalagiso ge Mulungu; uwihi ni kuleka kwandamila amalagiso. ⁵ Mumanya fina hakeja uleke yaleuse uwihi, na umwakwe mwichaka wihi. ⁶ Hechaka wowose iyakwikala umwakwe yakugolosa wihi; kwichaka munhu iyakugolosa uwihi iyamonile hegu kumumanya. ⁷ Wana wadodogi, imunhu yanghamudanhiliseni. Imunhu iyakugolosa uswanu ni muswanu, fina imwene fonimuswamu. ⁸ Iyekugolosa uwihi ni mwana wa Luhoma, kosoko iLuhoma kagolosaga wihi kulawa kunghonga. iMwana we Mulungu hakeja kosoko iino, kubana imilimo ya Luhoma. ⁹ Hechaka iyelekigwe ne Mulungu yakugolosa wihi; kosoko inyuwa ye Mulungu yuwa uwakwe, kahi nghadaha kugolosa wihi kosoko kelekigwa na Mulungu. ¹⁰ Kwa nheifo ikudaha koneka, awana we Mulungu no wehoki na wana wa Luhoma no wehoki. Inghekugolosa maswanu si wa Mulungu, na yuya inghakumwenda imunduguse. ¹¹ Kosoko ayino no mbuli yomwahulike kulawa kunghonga, fina chikiyende, ¹² chinghowe fina Kaini iyowile wa yuya yehile iyakomile imunduguse. Hakamukoma kosoki yaki? Kosoko sinhenda sakwe imwenyecho hasuwa sihile, ninga se munduguse hasuwa swanu. ¹³ Wandugusangu munghajume, fina ichilunga chikumulemani. ¹⁴ Chimanya fina aseye chiloka kulawa mudifa na kwingila mu uwumi, kosoko chikuwenda awandugu. Ayuya iyechaka wendo kowa mudifa ¹⁵ Chila munhu inghakwenda munduguse ni mukomaji, na mumanya fina kwechaka imukomaji, yena uwumi wa majuwa gose umwakwe. ¹⁶ Kwa njila ino chimanya uwendo, kosoko hakalafa uwumi wakwe kosoko yetu; ichagula ase nase chilafe uwumi wetu kosoko ya wandugu. ¹⁷ Ninga imunhu wowose yangowa na finhu fyose fye chilunga chino na yakumona imunduguse kechaka chinhu, yanghagolosa ichidoga chakwe chuwe chikugutu yaleke kumwingha, uwendo we Mulungu ukwikala nhani umwakwe? ¹⁸ Wana wadodogi, chinghende kwa kulonga kwa mulomo du, ninaga kwa nhenda na kwa chawelu. ¹⁹ Kwa njila iyo chomanya fina aseye cha wachawelu, na kuwa chaka manhonge mufidoga fyetu kumwande yakwe ²⁰ ugele wowose ifidoga fyetu nghona fikuchonesa wihi, kosoko iMulungu ni mukulu kusuma ifidoga fyetu na kumanya chila chinhu. ²¹ Wendigwa, nghona ifidoga fyetu fichikuchonesa china wihi, chikuwa chaka chinyala hamwande ye Mulungu; ²² na chikuhokela kulawa ukwakwe chochose chochikutasa, kosoko chikwandamila malagiso gakwe na kugolosa ifyene foyakwenda. ²³ Na dino no dilagiso dyakwe, chidihuwile disina dye Mwanagwe Yesu Kilisito, na chikiyende fina foyachilagise. ²⁴ Wose awakwandamila malagiso gakwe, wakwikala mugati yakwe, na imwene naye mugati yawo. Kwa njila iyo chimanya fina yakwikala mugati yetu, kwa njila ya Muhe woyachinghile.

¹ Wendigwa, munghamuhuwile chila muhe, ninga igeseni imimuhe, kona nghona ni ya Mulungu; kosoko wagonesi wengi wo udasi wenela muchilunga. ² Kwa njila ino mumanya Umuhe we Mulungu: Chila muhe uukufumila fina Yesu Kilisito keja mumutufi ni Muhe we Mulungu, ³ na chila muhe uukulema kufumila Yesu si wa Mulungu. Ayuno no Muhe iyakumulema Kilisito, womwahulike fina yakayokwija, na hambiya kafulusa kuwa muchilunga. ⁴ Wana wadodogi, anyeye mwa wa Mulungu, na muwasuma, kosoko ayuya iyowile kugati yenu ni mukulu kusuma yuya iyowile muchilunga. ⁵ Awene ni wanhu wa chilunga kosoko iyo sowakulonga ni sa chilunga na ichilunga chikuwategelesa. ⁶ Aseye cha wa Mulungu, wowose yamumanyile Mulungu yakuchitegelesa, ayuya isi wa Mulungu nghakuchitegelesa. Kwa njila iyo chikumanya muhe wa chawelu na muhe wo udasi. ⁷ Wendigwa, chikiyende; kosoko uwendo ni wa Mulungu. ⁸ Ayuya iyakwenda nhamumanyile Mulungu; kosoko Mulungu ni wendo. ⁹ Mu dino uwendo wa Mulungu wikigwa chalinje ukwetu, iMulungu kamwigala iMwanagwe we iwene, uleke chuwe womi mwi mwene. ¹⁰ Mu wendo uno, si fina hachimwenda Mulungu, ninga hakachenda seye na kumutuma iMwanagwe yowe no nhambiko yo uwihi wetu. ¹¹ Wendigwa, iMulungu nghona yachendile nheifo; ase nase ikuchagila chikiyende. ¹² Kwichaka munhu yamonile Mulungu; chinghakiyenda, iMulungu yakwikala kugati yetu na uwendo wakwe ukumemelekela umwetu. ¹³ Kwa njila ino chikumanya fina chikwikala kugati yakwe na imwene kugati yetu, kosoko kachingha umuhe wakwe imwecho. ¹⁴ Na chona kahi chikuhomelela fina iBaba kamwigala iMwanagwe kuwa muhonya we chilunga. ¹⁵ Wowose yakufumila fina iYesu ni Mwana wa Mulungu, iMulungu yakwikala mugati yakwe, na imwene mugati ya Mulungu. ¹⁶ Hambiya chimanya na kuhuwila uwendo woyenawo iMulungu ukwetu. Mulungu ni wendo, na yuya iyakwikala mu wendo yakwikala mwi Mulungu na iMulungu yakwikala mugati yakwe. ¹⁷ Mu dino uwendo wa Mulungu ukumemelesigwa ukwetu, uleke chuwe na usindamafu dijuwa dya ulamusi, kosoko fina foyowile nofochuwile aseye muchilunga. ¹⁸ Mu uwendo mwechaka woga, ninga uwendo umemelekele ukutanga kunje uwoga. Kosoko uwoga wina kuliganiswa, na wowose iyakogoha nghakangale mu wendo. ¹⁹ Chikwenda kosoko imwene hakakonga kuchenda seye. ²⁰ Imunhu yanghagamba, “Nikumwenda Mulungu,” akuno yakumusula imunduguse imwene woyakumona, nghodaha kumwenda Mulungu wonghenati yamone. ²¹ Na dilagiso dino chenadyo kulawa ukwakwe, ayuya yekumwenda Mulungu yamwende ne munduguse naye.

¹ Chila munhu iyakuhuwila fina Yesu no Kilisito ni mwana we Mulungu, na chila munhu iyakumwenda imweleka mwana, yakumwenda na imwana. ² Kwa njila iyo chikumanya fina chikwenda wana we Mulungu, nghona chikumwenda Mulungu na kwandamila malagiso gakwe. ³ Kosoko auno no uwendo we Mulungu, nhafi chikwandamila amalagiso gakwe. Na malagiso si makugutu. ⁴ Kosoko chila yelekigwe ne Mulungu yakusuma ichilunga; na kuno nokusuma ichilunga, dihuwi dyetu. ⁵ No nani iyakusuma ichilunga ninga ayuya iyakuhuwila fina iYesu no Mwana wa Mulungu? ⁶ Ayuno no yuya iyejile kwa meji na kwa sakame, Yesu Kilisito si kwa meji muhala ninga ni kwa meji na kwa sakame. ⁷ Na Muhe no muhomelesi, kosoko Muhe no chawelu. ⁸ Kwina wahomelesi wadatu, u Muhe, ameji na kwa sakame; na wano wadatu wakifumilisa. ⁹ Nghona chikuhokela uhomelesi wa wanhu, uhomelesi we Mulungu ni Mukulu kusuma wose; auno no uhomelesi wa Mulungu woyahomelele muchanhya ye Mwanagwe. ¹⁰ Ayuya iyakuhuwila mwi mwana wa Mulungu kenawo uhomelesi uno umwakwe. Ayuya inghakumuhuwila Mulungu, kamugolosa Mulungu fina Mudasi kosoko nghauhuwile uhomelesi we Mulungu muchanhya ye Mwanagwe. ¹¹ Na uno no uhomelesi, fina Mulungu kachingha uwumi wa majuwa gose, na uwumu uno wuwa mwi Mwanagwe. ¹² Ayuya iyenaye iMwana kenawo uwumi; ayuya iyechaka iMwana we Mulungu kechaka uwumi. ¹³ Nikumwandililani sino anyeye mukuhuwila mudisina dye Mwana we Mulungu fina mwina wumi wa Majuwa gose, ¹⁴ Ayino no ng’inyo yochinayo umwakwe, fina chinghatasa chinhu chochose ifene foyakwenda imwene yakuchihulika. ¹⁵ Chinghamanya fina yakuchihulika mu gogose gochikumutasa, chimanya fina chihokela agaya gochimutasile. ¹⁶ Imunhu yanghamona imunduguse yakugolosa wihi iisikumwigala kudifa, kotasa, na Mulungu komwingha wumi kwa waya wakugolosa uwihi si we difa. Kwina wihi wa ifa; sikugamba fina imunhu yakudaha kutasa kosoko yo wihi wo. ¹⁷ Sinhenda sihile sose ni wihi, ninga kwina wihi uwene si wa ifa. ¹⁸ Chimanya fina chila munhu yelekigwe na Mulungu nghakugolosa wihi, ayuya yelekigwe na Mulungu yakumutasa, na yuya wo wihi nghakudaha kumukwafa. ¹⁹ Chimanya fina aseye cha wa Mulungu, na chilunga chose chuwa mu udaha wa yuya yehile. ²⁰ Na chimanya fina iMwana we Mulungu keja na kachingha misungu, kumumanya ayuya we chawelu, iMwanagwe Yesu Kilisito. Imwene no Mulungu we chawelu na uwumi wa majuwa gose. ²¹ Wana wadodogi, munghandamile imilungu yo udasi.