1 WAKOLINTO

¹ Paulo kunangigwa na uwendo we Mulungu kuwa Mutumigwa wa Mubakigwa Yesu, na imundugu setu sositene, ² Ku wanhu we Mulungu wowile Kolinto, ku waya wasunhigwe mu Mubakigwa Yesu, wenangigwe kuwa wasunhile hamwedu na wose waya wowile chila hanhu howekitang’anyila kumutasa Mundewa Yesu Kilisito: Yekuchilanga aseye na wene. ³ Ibeka ukwenu na dihewa kulawa kwe Mulungu Baba iwetu na iMundewa wetu Yesu Kilisito. ⁴ Nikumwingha Mulungu malumbo chila ugele kosoko yenu, kosoko ya Ibeka ye Mulungu yoyawenghile kwe njila ya Mubakigwa Yesu. ⁵ Kosoko ku chila chinhu hamumotesigwa ukwakwe, mu nonga yose na ubala wose; ⁶ Imbuli ya Yesu ika misisi yakwe bila kusingisika munyikala yenu. ⁷ Kahi musikosole ibeka yoyose ikulawa kwe Muhe Musunhile fina fomukugojela kukugubuligwa kwa Mundewa wetu Yesu Kilisito. ⁸ Imwene kowaguma ludole mwijuwa dyoyekuja. ⁹ Mulungu yakuhuwilika imwene kawenanga muwe hamwedu ne imwanagwe. Yesu Kilisito Mundewa wetu. ¹⁰ Dededeni wandugu sangu nikumutasani mwisina dya Mundewa wetu Yesu Kilisito, mwifumilise kwa gaya gomukulonga na kunghowe na matemanuko mugati yenu, ninga wandugu sangu. ¹¹ Kosoko wanhu kulawa munyumba ya Kiloe wanhamila fina kwina lukani mugati yenu wandugu sangu. ¹² Ninga nikulonga nhafi, chila munhu wa ukwenu yakugamba, “Aniye na wa Paulo,” ama “Aniye na wa Apolo” ama “Aniye na wa Kefa” ama “Aniye na wa Kilisito.” ¹³ iKilisito kakigawa? iPaulo hakofa mumusalaba kosoko yenu? Ama hamubatisigwa kudisina dya Paulo? ¹⁴ Nikumulumba Mulungu kosoko sibatise yoyose ila Kilisipo na Gayo. ¹⁵ Munhu yangheje yegamba fina hakabatisigwe kwe disina dyangu. ( ¹⁶ Kahi haniwabatisa wanhu wa munyumba ya Sitefano, muchanhy ya wawo sikutanga nghona Babatise yungi). ¹⁷ Kosoko Kilisito nghanitumile soko nibatise ninga kuhubili mbuli swamu, kahi si kwa ubala wa nonga, umusalaba wa Kilisito ungheje uleusiligwa uludole lwakwe. ¹⁸ Kosoko imbuli yo umusalaba kwa wekwagilila ni ubwalasi, amba ukwetu chikuhonyigwa na ludole lwa Mulungu. ¹⁹ Yandikigwa, Nombana ubala wawo awena ubala, na mahala gawo awena mahala nogalema ²⁰ Iyena ubala kowahe? Kowahe iMutulumi? Kowahe imulukani we chigele chino? Langa! iMulungu nghaugolose ubala we chilunga chino kuwa ubwalasi? ²¹ Kosoko mu ubala we Mulungu, hayuwa fikugutu kuwanhu kumumanya imwene kwa kuhuwila ubala wawo awecho. Haimwendesa Mulungu kuwahonya wanhu wahuwile kupulutila auya ukoneka fina ni ubwalasi wo chikuhubili. ²² Wayahudi wakuhananga majumo na Wayunani wakuhananga ubala, ²³ amba seye chikumuhubili Kilisito yasambasigwe; kwa Wayahudi ni chikwakwaliso, na kwa Wayunani ni ubwalasi; ²⁴ amba kwa waya wekwinangigwa Wayahudi kwa Wayunani, Kilisito ni lwe Mulungu na ubala we Mulungu. ²⁵ Ichikoneka fina ubwalasi we Mulungu china ubala kusuma wanhu, na uhololi we Mulungu wina ludole kusuma wanhu. ²⁶ Mulange hamuwa wanhu wa namuna yaki ugele wo mwenangigwe, si wengi wowile na ubala kwe fipimo fye chimunhumunhu, si wengi wowile na ludole, kahiwelekigwe mulukolo lwe chindewa. ²⁷ Ninga Mulungu hakasagula ifinhu fikoneka fya chibwalasi muchilunga, kuwaguma chinyala awena ubala, na hakasagula ifinhu fikoneka fyechaka ludole kuwanhu kuwaguma chinyala awanhu wena ludole. ²⁸ Kahi Mulungu hakafisagula ifinhu fibwalasike muchilunga, Langa! Ifinhu fihechaka, soko afileuse afiya fikoneka. ²⁹ Imunhu yoyose yena mutufi yangheje yekiyona kumwande ye Mulungu. ³⁰ Mulungu kenda ugima wetu uwe hamwedu na Kilisito Yesu, na kupulutila Yesu hachingha ubala wakwe. Imulungu kachisunha, na kwa njila ya Kilisito chigaluka wanhu wakwe wasaguligwe na kachileusa wihi. ³¹ Fina foitulumigwe Iyakiyona, yakiyone muchanhya ye Mundewa

¹ Ninga wandugu sangu fonejile ukwenu, sejile niwahubili ichifiso chawelu che Mulungu kwa inonga swamu kahikwa ubala. ² Kahi hanihananga ninghamanye mbuli yoyose ukwenu amba Yesu Kilisito naye kasambasigwa. ³ Fonejile ukwenu hanyuwa nichaka ludole na hanyijiligwa na chogoho, ⁴ amafuso ne imbuli fisalafigwe kwa ubala amba kwa konesa uludole lwa Muhe we Mulungu. ⁵ Ninga si ubala we chimunhumunhu ulekile nyeye mumuhuwila Kilisito, amba uludole lwe Mulungu. ⁶ Kahi hena ubala wochikulonga mugati ya waya wakangala, amba lo ubala we chilunga achi, ama wa waya wakuchidima ichilunga, awena indumo; ⁷ amba chikulonga ubala we Mulungu muchifiso, auya ubala ufisigwe, aiya imilungu yoyalamule kulawa kunghonga kosoko ye ditinyo dyetu, ⁸ hechaka Mundewa wa ugele uno yaumanyile, kosoko mhali waumanyile wasowile wakumusambasa iMundewa we ditunyo. ⁹ Ninga fina foitulumigwe; Simbuli sisoneke na meso, ama kuhulika, ama umoyo wa munhu usisidogile, simbuli sekigwe ne Mulungu kwa waya awakumwenda. ¹⁰ Imulungu kachigubulila seye kwe Muhe. Kosoko iMuhe yakusakula chila chinhu hata amafumbo ge Mulungu. ¹¹ No nani muwanhu iyakumanya amadoga ga wanhu nghona si uunhu uwile umwakwe? No nheifo hechaka iyakugamanya togi amadoga ge Mulungu ila Muhe we Mulungu. ¹² Kahi chisihokele iMuhe we chilunga amba iMuhe iyakulawa kwe Mulungu, kosoko chimanya kutanga fyose fyochinghigwe ne iMulungu. ¹³ Kahi chikulonga kwa simbuli sisifudigwe kwa umanyi wa munhu ninga sifusigwe ne Muhe, chikusitapita simbuli sa kumoyo kwa mbuli sa kumoyo. ¹⁴ Imunhu we kawayida nghakuhokela simhongesi se Muhe we Mulungu, kosoko ni sa chibwalasi ukwakwe, ne nghakudaha kusimanya kosoko sikoneka chiloho. ¹⁵ Imunhu muswan yakulamula finhu fyose, ninga imwene nghakulamulwa na yoyose. ¹⁶ Kosoko no yehoki yagamanyile amadoga ge Mundewa mpaka yamulolese? Amba seye chinago madoga ga Kilisito.

¹ Kahi aniye wandugu sangu silongile na nyeye fina wanhu we chiloho, ninga fina wanhu we chilunga, fina wana wadodogi mumaisha ge chiloho. ² Hanimwinghani mele munywe na siyo chakudiya chikugutu kosoko musadahile kumesa na hata hambiya munghati mudahe. ³ Kosoko nyeye munghali wanhu we chilunga. Nghona munghali wanhu wa finju na magomvi gekali mugati yenu ifinhu afyo fikonesa fina nyeye munghali wanhu we chiduniya, mukwikala fina wanhu we chilunga. ⁴ Yumwedu wenu yanghagamba, “Aniye ne mwifusa wa Paulo,” na yumonga, “Aniye na mwifusa wa Apolo” Musikugolosa fina wanhu we chilunga? ⁵ Apolo no nani? Na Paulo no nani? Aseye cha watumigwa du we Mulungu, Chiwegalileni dihuwi fina iMulungu foyachigawile chila yumwedu wetu. ⁶ Hanihanda simbeyu, iApolo hakadonhesa na meji, ninga iMulungu noyasitendile sikule. ⁷ Iyahandile si chinhu ama iyadonhese si chinhu ila iMulungu iyasitendie sikula. ⁸ Iyahandile imbeyu, na ayuya yaidonhese wose waliganila. Ne Mulungu komwingha mhongesi chila munhu kosoko ye imilimo yakwe. ⁹ Kosoko aseyecha watogomi we milimo hamwedu ne Mulungu, anyeye ni mugunda we Mulungu. Kahi anyeye ni nyumba ya Mulungu. ¹⁰ Kosoko ya udaha we Mulungu woninghigwe nidaha fina mujengaji mumanyi mkatila sumbi ya hagati, na munhu yungi yakujenga muchanhya yakwe. Leka chila munhu yowe mulangisisi fina foyakujenga muchanhy yakwe. ¹¹ Hechaka munhu yakudaha kwika sumbi ingi kusuma aiya ikigwe, nonghamba Yesu Kilisito. ¹² Mukwika sumbi ya hagati wamonga wakwika mabiki gakangale, na wamonga gasikangale; awamonga wojengela sahabu ama shaba ama mawe maswanu mumusingi; na wamonga wojengela mbawo ama manyagala ama mabelege. ¹³ Uswanu we milimo ya chila munhu wokoneka na kiyonesa mwijuwa dya Kilisito, kosoko mwijuwa didyo umoto wokonesa milimo ya chila munhu, umoto wogesa na konesa uswanu wa chila mulimo. ¹⁴ Nghona chiya chijengigwe mumusingi chikufinyilisa umoto uwo, imujengaji kohokela maliho. ¹⁵ Ninga imilimo yako inghalakala, koyagilisa; amba agweye gomwenecho kohonyigwa kifana munhu yakwegigwe kulawa mumoto. ¹⁶ Musimanyile fina nyeye mwa dihekalu dye Mulungu kahi Muhe we Mulungu yakwikala ukwenu? ¹⁷ Mulungu komubana chila munhu iyakubana dihekalu dye Mulungu. Kosoko dihekalu dye Mulungu ni disunhile, ne dihekalu dyo nonyeye. ¹⁸ Munghakidanhilise. Nghona yumwedu mugati yenu yakudoga fina ni mubala muugele uno, leka yowe mubwalasi uleke yapate ubala we chawelu. ¹⁹ Kosoko ichikoneka ni ubala muchilunga ni ubwalasi mumeso ge Mulungu. Kosoko itulumigwa, Yakuwagwesa awena ubala mu mahala gawo; ²⁰ kahi Mundewa kamanya fina amadoga ga wanhu wena ubala gasikufaya. ²¹ Langa! Munhu yanghakiyone kosoko ya wanhu. Kosoko chila chinhu ni chenu. ²² Inghowa Paulo ama Petili ama Apolo ama ichilunga ama ugima ama difa ama ugele uno ama ugele ukwija, fyose ni fyako: ²³ na nyeye mwa Wakilisito na Kilisito ni wa Mulungu.

¹ Munhu yachone seye fina cha watogomi wa Kilisito na wemilisi wa ififiso fye Mulungu. ² Ichikuhanangigwa ku wemilisi ni kuwa wanhu wakufumilika. ³ Ninga ukwangu niye sichinhu kulamuligwa na nyeye ama na ibalasa dya wanhu, kahisikilamula nimwenecho. ⁴ Sikutanga chochose chibanike ukwangu, ninga kosoko iyo sikutaliligwa haki, amba iMundewa noyakulilamula. ⁵ Amba nyeye munghalamule mbuli ugele usinati wije, mpaka yeje iMundewa, imwene kogamulika gafisigwe muchisa, na kogubula uwendo wa umoyo. Na chila munhu kohokela igeleko yakwe kwe Mulungu. ⁶ Nitumia agano gose ukwangu na kwa Apolo kosoko ye fayida yenu wandugu sangu, mukifuse kulawa ukwetu fina munghalute kusuma agaya agatulumigwe, kahi mugati yenu munghowe na yumonga yakiyona na kubesa wayagwe. ⁷ Kosoko no nani yakuwabagula niye; kwina choni chomwinacho chonghuhokele? Ninga nghona uhokele nhani ukiyona kifana nghuhokele? ⁸ Mufulusa kwiguta, kahi mwawagoli, mulongosa bila seye, mhali mwadimile soko nase chidime hamwedu na nyeye. ⁹ Nikudoga fina iMulungu kachilafa aseye chiwatumigwa kundumo, kifana wanhu walamuligwe kufa kumwande ya wanhu kosoko chigaluka museigo muchilunga cha Malaika na wanhu. ¹⁰ Ase cha wabwalasi kosoko ya Kilisito, ninga anyeye mwina mahala mu Kilisito. Aseye chasina ludole, anyeye mwina ludole! Aseye chibwalasika ninga nyeye mwinuligwa. ¹¹ Mpaka diyelo china njala na nghilu; chisakasa, chikutowigwa na chikusamasama; ¹² na chikutogoma milimo kwa mikono yetu chiwecho. Chinghaligigwa chikumotesa, chinghasambasigwa chikufinyilisa. ¹³ Kahi chinghaligigwa chikubidula fiswamu, chigaluka ikusisi dye chilunga, aseye cha makombo ge iisi muchigele achi. ¹⁴ Sikuwandikila gano soko ya kuwaguma chinyala, amba ni soko ya kuwafunda fina wanangu wendigwa wangu. ¹⁵ Hata nghona mwina wasindikisi (walimu) matewa mu Kilisito Yesu, mwichaka waBaba wengi. Kosoko nigaluka Baba yenu mu Kilisito Yesu kupulutila mbuli swanu. ¹⁶ Ninga nikumutasani mwandamile inhenda yangu. ¹⁷ Kosoko iyo nikumutuma Timoteo imwanangu mwendigwa na muhuwilika mu Kilisito Yesu, kuwagelegwesa amalagiso gonifusile gowile mu Kilisito Yesu fina fonikufusa chila hanhu mumakanisa. ¹⁸ Awamonga wetogola kosoko wamanya fina sikwija ukwenu. ¹⁹ Mulungu yanghenda nokwija kuwatemelela chimwande, nani nolangisa siyo inonga yawo du aweyoni amba na uludole lwawo. ²⁰ Kosoko undewa we Mulungu usuwile munonga ila muugolosaji. ²¹ Mukuhananga nhani? Nije ukwenu na mukotya ama nije na wendo na loho ya uholo?

¹ Awanhu wanitamila fina kwina ihabwa ukwenu ambadyo disikudaha koneka hata kuwamembe; yumwedu wenu yakugenda ne muke mudodo we Babakwe. ² Mukudahaje kwiyona? Hayuwa muhongese! Muleke ayo yagolose didyo yalegusigwe ukwenu. ³ Na niye hata nghona nihechaka chimutufi nikifana nabaho kwa madoga, na nifulusa kumulamula; ⁴ mwisina dye Mundewa wetu Yesu kwe Munhu yabanile umwiko awo. Ugele womukwitang’anyila, na hamwedu nanyeye kwa madoga, hamwedu ne ludole lwa Mundewa Yesu. ⁵ Mumulafe imunhu ayo kwe luhoma kosoko yo kutenyangigwa umutufi wakwe, ne ichidoga chakwe chihonyigwe mwijuwa dyo kwija Mundewa. ⁶ Inyiyona yenu siyo swanu! Musikumanya fina nungo ndodogi ikusasisa sage mwingi? ⁷ Mwihojojole mukatage inungo ya katali soko muwe igonge disha disilungigwe fina fomukuhanangigwa muwe, kosoko Kilisito ipasa yetu kufulusa kulafigwa. ⁸ Lekeni ninga chigolose sikukuu siyo kwe nungo ya katali, inungo ya gehile ninga kwe imikate isilungigwe ye usunhile na chawelu. ⁹ Haniwandikila mubaluwa yangu munghakihanangise ne wanhu we dihabwe; ¹⁰ Ichawelu nochi, sowile na mana ya wanhu wose we dihabwa, we ifuhi; awahiji, ama wekufuga ifisiki munhu wowile muchilunga, kosoko kuwenega wo hayuwa musame muchilunga. ¹¹ Chonyandike nochi, munghakihanangise na munhu yoyose yamanyikane ni dihabwa, ama we ifuhi, ama yakufuga fisiki munhu, chamaligo, mulefi ama muhiji. Munhu wa namuna yo hata kukudiya munghadiye naye. ¹² Kahi si kasi yangu niye kulamula awanhu wowile kunje ye dikanisa. Awo Mulungu kowalamula. Ninga nyeye musikwendeka muwalamula awowile na nyeye? ¹³ Fina foitulumigwe mu maandiko: Muleguseni imunhu yehile mugati yenu.

¹ Nghona yumwedu wenu yena nonga ne muKilisito miyagwe, nhani yalute kuwanhu we chilunga na kuleka kuluta kuwanhu we Mulungu soko walamule? ² Musikumanya fina awanhu we Mulungu wolamula ichilunga? Na nghona ichilunga chikulamulwa nanyeye nhani mudikudaha kulamula fibuli fidodogi? ³ Musikumanya fina chowalamula Malaika? Bila kutala finhu fidodogi fya chila ijuwa. ⁴ Ninga munghowa na fibuli fidodogi, nhani mukuwenanga kulaha awanhu wasimanyike ne dikanisa? ⁵ Chinyala ukwenu! Nong’amba hechaka munhu ukwenu yena ubala wo kulamula mugati ya Wakilisito. ⁶ Ninga, muKilisito yakumusongesa miyagwe kwibalasa, na yakulamuligwa ne wanhu wasikuhuwila. ⁷ Chawelu kosoko mwina nonga mugati yenu ikonesa fina musumwa kwikala fina foikwendeka ku Wakilisito. Hayuwa fiswanu ukwenu kuleka wanhu wa wapujile. Na hayuwa fiswanu ukwenu kuleka wanhu walonde ifinhu fyenu. ⁸ Ninga anyeye muwecho mukupujila na kulonda ifinhu fya wanhu, hata fya Wakilisito wayenu. ⁹ Musamanyile fina awabanaji wasiuhala undewa wa Mulungu? Munghadanhilisigwe; awanhu we dihabwa, awakufuga si sanamu, awekusulumila walume weyawo na kugenda nawo ¹⁰ wahiji, wakobo, walefi, waligaji, ama wahokaji wasiuhala undewa we Mulungu. ¹¹ Na muwamonga hamuwa nheifo. Ninga musunhigwa, mugaluka wanhu we Mulungu, mulekeleligwa mwisina dye Mundewa Yesu Kilisito na mumuhe we Mulungu wetu wochikumutogomela. ¹² Munhu yakudaha kugamba, “Ifinhu fyose nechaka mwiko nafyo. Heye! Amba si finhu fyose ni fiswanu ukwako. Finhu fyose fichaka mwiko ukwangu nichaka chonisilile,” ninga aniye sikulongoswa na chochose. ¹³ Ukudaha kugamba, “Ichakudiya ni kosoko yo kunda na kunda kosoko ye chakudiya.” Ninga Imulungu kofibana fyose. Umutufi we munhu si kosoko ye dihabwa ninga kosoko ye Mundewa; ne Mundewa ni kosoko yo umutufi. ¹⁴ Ninga Imulungu yamwinule iMundewa, kochinula na seye kwa ludole lwakwe. ¹⁵ Musikumanya fina imitufi yenu ni filungo fya umutufi wa Kilisito? Afo nilonde ichilungo cha Kilisito na kuchigolosa chuwe kilungo che iwe dihabwa? Sikudaha! ¹⁶ Mumanye fina iyakugenda ne wadihabwa yakuwa mutufi umwedu naye, kosoko fina foitulumwe Aweli wakuwa mutufi umwedu. ¹⁷ Amba iyakihanangise ne Mundewa yakuwa hamwedu naye chiloho. ¹⁸ Mukitemanule na dihabwa. Uwihi wose awanhu wowakugolosa ni kunje ye imitufi yawo, amba iwadihabwa yakugolosa wihi mumutufi wakwe imwenecho. ¹⁹ Musimanyile fina imitufi yenu ni dihekalu dya Muhe Musunhile mugati yenu, womwinghigwe ne Mulungu? Kahi anyeye si sawo yenu muweecho, ²⁰ hamuguligwa kwa beyi nghulu, kosoko yo tumiyeni mitufi yenu kumutunya Imulungu.

¹ Hambiya kosoko ye simbuli somwandike ni fiswanu ngohona munhu nghakutola. ² Ninga kosoko yo usulumisi we dihabwa chila mugosi yowe na muke wakwe mwenecho na chila mwanamuke yowe na mugosi wakwe. ³ Imugosi yagolose fina foikuhanangigwa kwe imuke ne imuke yagolose fina foikuhanangigwa kwe imugosi wakwe ⁴ Imwanamuke kechaka udaha muchanhya yo umutufi wakwe ninga imwanamuke wakwe kenawo. ⁵ Munghaleke kwikala hamwedu labuda muwe mwifumilisa kugolosa nhaifo kwa chipisi chidodogi kosoko yo kutasa. Kahi mukiyuwile chimwande kosoko iluhoma yangheje yewagesa kosoko musikudaha kugendelela kuleka kwikala hamwedu. ⁶ Gonikumutamilani hambiya ni maloleso na siyo malagiso. ⁷ Hanyendaga wanhu wose wowe fina niye fonuwile. Ninga chila munhu kene chipawa chakwe kulawa kwe mulungu, ayuno chipawa achi na ayuya achiya. ⁸ Hambiya, nikuwalolesa awagosi wasinati watole na awanawake iwegane fina ni fiswanu kugendelela kuwa fina niye. ⁹ Hata nheifo nghona munhu nghakudaha kufinyilisa na yalote, kosoko ni ihufu kutola kusuma kuwa no usulumisi we dihabwa. ¹⁰ Ku watolile na kutoligwa ninadyo ilagiso, siyo dyangu ninga dye iMundewa, imuke yanghakileka na imugosi wakwe; ¹¹ ninga yanghakileka naye uleke yekale mwigane ama yakifumilese ne mugosi wakwe na imugosi yanghamuleke imuke wakwe. ¹² Ku wasigale nikugamba (Aniye nimwenecho siyo Mundewa:) Nghona mugosi muKilisito yena muke inghakuhuwila na yakufumila kwikala naye, yanghamuleke. ¹³ Na nghona mwanamuke muKilisito yena mugosi inghakuhuwila na yakufumila kugendelela kwikala naye yanghamuleke. ¹⁴ Kosoko imugosi nghakuhuwila yakuhokeligwa kwe Mulungu kupulutila imukagwe, na imwanamuke nghakuhuwila yakuhokeligwa kwe Mulungu kupulutila imugosi wakwe. Nghona isowile nheifo awana wawo hawowa wakuwa wana wa wanhu wasimanyile Mulungu we chawelu, ninga fina foyuwile wafumilika kwe Mulungu. ¹⁵ Ninga nghona yuya nghakuhuwila yakuhananga kumuleka imiyagwe imuKilisito na yamuleke. Mu mbuli yo imuKilisito we chike ama we chilume kena udaha wa kulamula. Kosoko Mulungu kawenanga mwikale kwa dihewa. ¹⁶ Agwe go muke muKilisito kumanya nhani fina nghukudaha kumuhonya imugosi wako? Nagwe go mugosi muKilisito kumanya nhani fina nghukudaha kumuhonya imwanamuke wako? ¹⁷ Chile yumwedu yagendelele kwikala fina iMundewa Yesu foyamwinghile na fina fowenangwe ne Mulungu. Adino no dilagiso dyangu ku makanisa gose. ¹⁸ Wamonga wenu hawowa wafinigwe ugele wowenangigwe ne Mulungu wanghakane fina wafinigwa. Na nghona nghwafinigwe ugele wowenangigwe unghafinigwe. ¹⁹ Kosoko kufinigwa ama kuleka kufinigwa si chinhu, ichinhu che mana ni kukola amalagiso ge Mulungu. ²⁰ Chila munhu yasigale fina foyowile ugele woyenangigwe. ²¹ Hakuna mutumwa ugele wowenangigwe? Unghatonge. Ninga unghadaha kupata luneka lwa kulekeleligwa lutumiye. ²² Kosoko imwene yenangigwe ne Mundewa fina mutumwa kadoholeligwa ne Mundewa. Kahi nheifiya ayuya yowile hulu ugele wo yenangigwe na Kilisito kagaluka mutumwa wakwe. ²³ Hamuguligwa kwa bei, kahi munghowe watumwa wa wanhu. ²⁴ Wakilisito wayangu chila munhu yasigale ne Mulungu fina foyowile ugele wo Iwinago. ²⁵ Kosoko ye imbuli ya kutola na kuleka kutoligwa nechaka ilagiso kulawa kwe Mulungu amba nikulafa maloleso gangu, aniye nikuhuwila kwa ubasi we Mundewa. ²⁶ Nikudoga nhafi, kosoko ye lwidaso lwa hambiya ni fiswanu kwe imunhu kuwa fina foyali. ²⁷ Togola! Nghona utolile unghahanange kuwa mwigane. Kwichaka mwanamuke unghahanange kutola. ²⁸ Ninga unghatola nghukugolosa wihi, na mwanamuke nghatoligwe yanghatoligwa nghakugolosa wihi ka! Kahi awo awekitola wapatigwa na lwidaso lwe chilunga achi, amba niyehanyendaga ago ganghawapate nyeye. ²⁹ Chonikulonga nochino wambwiya sangu; ichigele chisigale siyo chitali; kulawa hambiya na kugendelela lekeni awaya watolile wowe kifana wasitolile. ³⁰ na wayo wakulongesa kifana wasikulonges, na waya wakubweda fina wasikubwedelela, na waya wakugula fina ifinhu fyo siyo fyawo. ³¹ nawo wen imilimo ne chilunga achi wowe kifana wechaka milimo nacho lugano kosoko ichilunga achi chikuloka. ³² Aniye hanyendaga munghowe na manhonge. Imunhu nghatolile yakiidasika ne imbuli ye Mulungu, fina foyemwendesa Mulungu. ³³ Ninga imunhu yatolile yakiidasika na finhu fye chilunga fina foyemwendesa imuke, ³⁴ Kahi kagawanyika. Imwanamuke nghatoligwe ama bikila yakiidasika ne simbuli se Mundewa, yakuwaje musunhile mumutufi ne chimuhe, ninga imwanamuke yatoligwe yakidasika ne mbuli se chilunga, kosoko yakuhananga yamwendese imugosi wakwe. ³⁵ Nikuwatamileni agano kosoko ye fayida yenu na siyo kwa kuwekilani mugwato. Ninga nikuhananga nyeye mugolose fiswanu na digoya, mumutogomele Mulungu bila kulemesigwa kwa njila yoyose. ³⁶ Nghona munhu yakona nghakugolosa fiswanu kumwande ye mutumisigwa wakwe yanghaleka kumutola na usulumisi wina ludolesi, yagolose fina foyakuhananga yamutole, hechaka uwihi. ³⁷ Amba imugosi yanghalamula imwenecho mumoyo wakwe kuleka kumutola, na nghona yakudaha kuudima usulumisi na kufulusa kulamula kugendelela kumwika fina bikila yakugolosa fiswanusi yanghaleka kumutola ayo ibikila. ³⁸ Iyakutola yakugolosa fiswanu, na iyakuleka kutola yakugolosa fiswanusi. ³⁹ Imwanamuke yatoligwe kohigwa ne mugosi wakwe ugele wose woyakuwa mumi. Ninga imulume yanghofa (yanghatajika) yakudaha kutoligwa na munhu yoyose muladi yowe Mukulisito. ⁴⁰ Ninga fonikona niye hayuwa ikuwa ibeka lugano mhali yasigale foyowile. Ago ni maloleso gangu, na nikudoga fina aniye nani ninaye Muhe we Mulungu.

¹ Hambiya kosoko ye fyakudiya fye sinhambiko, chimanya fina wose china umanyi, umanyi ukuwagolosa wanhu wakiyone ninga uwendo ukukangala. ² Nhona yumwedu yakudoga fina kamanya chinhu, chawelu nghamanyile fina foikuhanangigwa. ³ Ninga imunhu iyakumwenda Mulungu kamanyigwa ne imwene. ⁴ Kahi hambiya nikuhananga nilonge soko ye ifyakudiya filafigwe kufisiki munhu, chimanya fina ikisiki munhu kikwima ahanhu he chinhu chihechaka; chimanya fina Mulungu ni yumwedu du. ⁵ Hata inghowa kwina finhu fikinangigwa filungu muchilunga ama kulanga, na hata inghowa kwina Filungu na Findewa, ⁶ hata nheifo ukwetu aseye kwina Mulungu yumwedu, Ibana yombile fyose na uumi wetu ukumuhuwila mwene. Kahi hena Mundewa yumwedu Yesu Kilisito, kwa njila yake finhu fyose hafyumbigwa, na seye kwa njila yakwe chikwikala. ⁷ Ninga si chila munhu kena umanyi uno. Wanhu wamonga wasowela sisanamu, wanhu ambawo mpaka ugele awu fowakudiya ifyakudiya wakufyona kifana fyakudiya fitambikiligwe sisanamu. Na kosoko fidoga fyawo fisaifu wakugumigwa uwihi. ⁸ Ichakudiya kisikudaha kuchigala habehi ne Mulungu. Chinghaleka kudiya chisikuhangukiligwa na chinhu, chinghadiya chisikongeseligwa chinhu. ⁹ Amba lo mukilangisisa udaha wenu unghawagolose awena dihuwi ikefu wakwakwalike. ¹⁰ Kosoko munhu wowose yanghakona gweye munhu wo umanyi ukudiya fyakudiya fyo mwihekalu dye sisanamu, togola! Yanghowa na chidoga chisaifu nghegumigwa moyo kudiya fyakudiya fitambikiligwe sisanamu? ¹¹ Kosoko yako ayu munhu musaifu yakwagilila, imundugu muKiilisito iKilisito hakofa kosoko yakwe. ¹² Munghawagolosela wandugu senu nhaifo na kufibulaga ifidoga fyawo fisaifu, mokuwa mugolosa mbuli ihile kwa Kilisito. ¹³ Kosoko yo, inghowa chakudiya kikumugolosa mundugu sangu miyangu yagwe, sidiya keli nyama ningheje nimugolosa mundugu sangu yengile mu wihi:

¹ Aniye sohigwe, aniye namutumigwa, nimonile Yesu Mundewa wetu, nanyeye ni chotoko che milimo yangu kosoko ye Mundewa. ² Hata inghowa kuwamonga aniye si mutumigwa amba ukwenu aniye namutumigwa. Anyeye no uhomelesi wa utumigwa wangu kosoko ya nyeye kuwa hamwedu ne Mundewa. ³ Auno no utetesi wangu kwa waya awakunilangisisa. ⁴ Afo, chichaka haki yo kudiya na kunywa? ⁵ Chisikufumisigwa kulonda mwanamuke muKilisito musinhambo setu fina fowakugolosa awatumigwa wamonga wanduguse we Mundewa, na Petili nheifiya? ⁶ Ama no niye du na Balinaba chikuhanangigwa kwikimilisa? ⁷ Hena musilikali yakulihila utumishi wakwe kwijeshi? Nani yakuhanda mugunda wa misabibu bila kudiya mamudyo gakwe? Nani yakudima bila kunywa mele musaeo yakwe? ⁸ Afo nikulonga simbuli asi chimunhumunhu du? Togola! Amalagiso gasikulonga nhaifo? ⁹ Kosoko itulumwa mumalagiso ga Musa Uleke kudyoha dikambaku kumulomo ugele wo dikukutasa kutowa uhemba Hambiya nonghamba Imulungu yakiidasikisa ne dikambaku? ¹⁰ Togola! Nghachidogage seye foyalongage nheifo? Chawelu agano hagatulumigwa kosoko yetu, kosoko ayuya iyakulima na yuya iyekugola, wose foni weli wena haki yo kupata ichipisi che masao. ¹¹ Nghona seye chihandile mbeyu ye chiloho mugati yenu, togoleni ni chihufu chinghabawa ukwenu ifayida ye chidunia? ¹² Nghona wamonga wena ihaki yo kugojelesa go kulawa ukwenu, afo seye chichaka haki kusuma wo? Awene ninga seye chisigolose ichelu yo, ahanhu hakwe chigendelela kufinyilisa kosoko chinghakiikile chikwakwaliso chochose imbuli swanu ya Kilisito. ¹³ Nonghamba musimanyile fina awakugolosa milimo mwihekalu wakudiya mwihakalu? Kahi awakulafa ifilafwa hefugilo wakwinghigwa ulwandi lwe ichilafwa? ¹⁴ Nheifiya iMundewa kalagisa fina awakuhubili imbuli swanu wakikimilise awecho kulawa umulimo uwo. ¹⁵ Amba niye situmiye hata imwedu si haki so, ukwangu niye inyendesa kufa kusuma kumugolosa yumwedu yone fina nikiyona chaka. ¹⁶ Nghona nikuihubili mbuli swamu adyo siyo dya kunigolosa nikiyone, awo ni mulimo wangu woninghigwe, ikuwa ihile ukwangu ninghaleka kuihubili. ¹⁷ Kosoko mhali nausagule umulimo awu kwa nyenda yangu, hanyuwa nikugojela maliho; ninga kosoko nikuigolosa fina mulimo wangu, ayo ina mana fina ni mulimo woninghigwe niugolose. ¹⁸ Nikulihigwa choni? Maliho gangu ni chipisi cha kuihubili mbuli swamu bwete, bila kutasa haki sikwendekana kwa kuihubili. ¹⁹ Hata nghona niye si mutumwa wa munhu wowose, hanikigolosa mutumwa wa chila munhu soko nimuhaningile Kilisito wanhu matewa foikudahika. ²⁰ Ku Wayahudi hanyuwa fina Muyahudi kosoko niwagwise Wayahudi; hata inghowa niye sikukoligwa na maloleso gawo, hanikigolosa fina nikukoligwa nago kosoko niwapata awene wowile musheliya. ²¹ Na kwa waya ambawo si Wayahudi nikala fina awene bila kukola a malagiso ge Chiyahudi kosoko niwapate wawo wa si Wayahusi. Siyo fina niye sikogoha malagiso ge Mulungu kosoko aniye nikoligwa ne malagiso ga Kilisito. ²² Ku wanhu we dihuwi ikefu hanikigolosa nhaifo kosoko niwapate awo we dihuwi ikefu. Hanikigolosa chila chinhu kwa wose kosoko nidahe kuwahonya awamonga wawo kwa chila njila. ²³ Nikugolosa aga gose kosoko ye imbuli swamu nidahe kuhanga mu mboto yakwe. ²⁴ Chawelu mumanya fina mukwisuma lumangho wose wakubilima, amba yumwedu yakuhokela mhongesi. Mukuhanangigwa mubilime kuihokela. ²⁵ Wabilimaji wakiingha mafuso na nisamu nghali, wakugolosa nheifo wapate digelo ni kubanika, amba seye chikugolosa nheifo chipate digelo dya majuwa gose, (didikubanika). ²⁶ Sikubilima chaka, nofonikitowa siyo fina mwitowaji iyakutowa ihewa. ²⁷ Nikuwingha mutufi wangu mafuso makugutu na kuuguma munisamu iyeecho, aniye nimwenecho ningheje nilemigwa ninghafulusa kuwahubiliya wayangu.

¹ Wandugu sangu nikuhananga mumanye finhu awakulu setu wose hawowa muulangisisi we difunde diya na fina wose hawaloka fiswanu mu bahali indunghu. ² Na wose hawabatisigwa mu hihango na Musa mwifunde diya na mubahali iya. ³ Na wose hawadiya chakudiya chichiya che chiloho. ⁴ Kahi hawonywa ichingwela chichiya che chiloho, kosoko howonywa kulawa mwibambalawe dye chiloho diwandamile, na dibambalawe dyo hadyuwa Yesu imwenecho. ⁵ Hamwedu na gago gose matewa mugati yawo wasamwendese Mulungu na amaiti gawo hagatagigwa munyika. ⁶ Hambiya simbuli so ni maloleso ukwetu kosoko chinghasulumile kugolosa wihi. ⁷ Munghowe wafuga sisanamu fina wamonga fowowile, fina fitulumigwe, Awanhu hawekala kudiya na kunywa na hawema na kunyemuka. ⁸ Chinghakigume mwihabwa fina awamonga fowagolose na wanhu figulu makumi meli na ndatu hawofa ijuwa dimwedu. ⁹ Kahi chinghamugume Mundewa mumagesa fina awamonga mugati yawo fowamugesile na kosoko yo hakakomigwa (lumigwa) na majoka. ¹⁰ Kahi munghang’ung’ulike fina awamonga fowang’ung’ulike na kosoko yo hawabanangiswa ne mubanangisi. ¹¹ Ninga simbuli aso siwapatile ni chitangilo kuwanhu wo na hasitulumigwa kuchilolesa aseye achikwikala muugele uwile habehi ne ndumo. ¹² Kosoko yo iyakiyona fina kagangamala yelangisise yanghagwe. ¹³ Amagesa gomufuluse kupata ni ga kawaida kuwanhu. Mulungu ni muhuwiliki, naye nghefumisa nyeye mugesigwe kusuma uludole wenu, amba hamwedu na magesa imwene komwinghani ludole lwa kufinyilisa na njila ya kulawa umo digoya. ¹⁴ Kosoko yo Wakilisito wendigwa wangu tijeni imbuli yo kufuga fisiki munhu. ¹⁵ Nikulonga na nyeye fina wanhu wena ubala, mulamule muweecho gonikulonga. ¹⁶ Fochikumulumba Mulungu kwe chikombe achiya chi imboto, afo chisikuhanga isakame ya Kilisito? Na fochikubendula umukate, fochikuudiya afo chisikuhanga mu mutufi wa Kilisito. ¹⁷ Kosoko umukate wo ni umwedu, aseye hata inghowa chi itewa cha mutufi umwedu kosoko wose chikuhanga umukate uwo. ¹⁸ Mulange sinhenda sa Chiyahudi, awaya wakudiya ifilafwa wasikuwa hamwedu ne masabahu? ¹⁹ Nikugamba nhafi, ifyakudiya fitambikiligwe sisanamu si chinhu, kahi isanamu si chinhu. ²⁰ Hata! Chinikulonga nochi, ichikulafigwa mumasabahu ga chipagani chikulafigwa kumashetani, nani sikuhananga nyeye muwe na uhangi na mashetani. ²¹ Musikudaha kunywila ichikombe che Mundewa ne chikombe che luhoma. Musikudaha kunywa mumeso ye Mundewa na mumeso ya luhoma. ²² Chikudoga fina china ludole lwa kumusuma iMundewa kuwa na finju? ²³ Ifinhu fyose fisikulemesigwa, ninga si finhu fyose fikufaya. Ifinhu fyose fisikulemesigwa, ninga si finhu fyose fikujenga. ²⁴ Munhu yanghalangise uwendo wakwe imwenecho, ninga uwendo wa miyagwe. ²⁵ Mudiye chochose chikuguligwa mumabucha bila kusagisa kosoko ye fidoga fyenu. ²⁶ Kosoko Ichilunga chose ni che Mundewa, na finhu fyose fiumo. ²⁷ Nghona yumwedu wa waya wasikuhuwila kawagoneka nyeye kuchakudiya cha hegulo, na mufumila, diyeni fyose fikigwe kumwande yenu bila kusagisa, kosoko ye fidoga fyenu. ²⁸ Ninga yumonga yanghagamba, “Ichakudiya achi chitumika kunhambiko, kosoko ye imunhu ayo yawatamileni na kosoko ye fidoga fyenu munghadiye.” ²⁹ Nikulonga kosoko ye chidoga che imunhu yawatamile na siyo ifidoga fyenu. Kosoko nhani uhulu wangu ulamuligwe na chidoga che imunhu yungi? ³⁰ Nghona nikushiliki kwa malumbo; nhani munhu yanilaumu kosoko ye chakudiya chonikulafa malumbo? ³¹ Kahi nghona mukudiya ama mukunywa, ama chochose chomukugolosa, goloseni fyose kuditunyo dye Mulungu. ³² Munghabane ku Wayahudi ama Wayunani ama kwikanisa dye Mulungu. ³³ Fina fonagesile kuwendesa awanhu wose mu finhu fyose, silangise uwendo wangu nimwecho ninga wa wose kosoko wahonyigwe.

¹ Nyandamileni niye fina fonikumwandamila Kilisito. ² Nikumutunyani anyeye kosoko mukunigelegela mu chila chinhu na kukolelela gamahokelo fina fonegegale ukwenu. ³ Ninga nikuhananga nyeye mumanye fina ditwi dya chila munhu ni Kilisito, ditwi dya mwanamuke ni mugosi wakwe, na ditwi dya Kilisito ni Mulungu. ⁴ Munhu wowose yakutasa ama kuhubili Imbuli swamu akuno nghagubike iditwi dyakwe yakwigala chinyala kwe mugosi wakwe. Ni kifana itwi dyakwe digetigwa. ⁵ Kahe mwanamuke wowose yakutasa ama kuhubili Imbuli swamu akuno nghagubike iditwi dyakwe yakwigala chinyala kwe mugosi wakwe. Ni kifana itwi dyakwe digetigwa. ⁶ Ninga imwanamuke yanghaleka kugubika ditwi dyakwe yakuhanangigwa yagete sinjwili sakwe, ama inghowa ni chinyala kwe mwanamuke kugetigwa, uleke yagubike ditwi dyakwe. ⁷ Kosoko imugosi nghakuhanangigwa kugubika ditwi dyakwe, kosoko imwene no mufano ne ditunyo dye Mulungu; amba imwanamuke ni ditunyo dye mugosi; ⁸ kosoko imugosi nghambigwe kulawa kwa mwanamuke, ninga mwanamuke kombigwa kulawa kwe mugosi. ⁹ Wala imugosi nghombigwe kosoko ye mwanamuke, ninga mwanamuke kosoko ye mugosi. ¹⁰ Kosoko yo imwanamuke yakuhanangigwa yegubike iditwi dyakwe kosoko ya malaika. ¹¹ Hata nheifo, mwe Mundewa imwanamuke nghakikamila imwenecho kahiimugosi nghakikamila imwenecho. ¹² Kosoko fina imwanamuke foyombigwe kulawa kwe mugosi, kahi imugosi hambiya yekwelekigwa ne mwanamuke. Na finhu fyose fikulawa kwe Mulungu. ¹³ Lamuleni muweecho ni fiswanu kwe imwanamuke kutasa kwe Mulungu na itwi dyakwe bila kugubikigwa? ¹⁴ Hata amaumbile agecho gakumufusani fina kwe mugosi kuwa na njwili nghulu ni chinyala ukwakwe, ¹⁵ ninga imwanamuke yanghowa na njwili nghulu ni heshima ukwakwe. Kosoko kenghigwa si njwili simugubike. ¹⁶ Ninga munhu wowose yanghahananga kwigala lukani kosoko ye imbuli ayi, nikugamba, kahi aseye ama makanisa ge Mulungu gena ijadi ingi yo kufuga. ¹⁷ Ninga mumaloleso gekwandamila sikumutogolani, kosoko nomoo mukitang’anyila hamwedu si kosoko ya uswanu ninga uwihi. ¹⁸ Kunghonga nikuhulika fina kwina matemanuko ukwenu ugele womukwitang’anyila kuguga, na niye nikuhuwila chidodogi. ¹⁹ Kosoko ikuhangigwa kuwe na matemanuko mugati yenu kosoko awaya iwachawelu mugati yenu watangike. ²⁰ Na fomukutang’ana, chomukudiya siyo chakudiya che Mundewa. ²¹ Kosoko fomukudiya chila munhu yakubilimila kudiya ichakudiya chakwe, kahi wamonga wekuwa na njala, na wamonga wekuwa walewa. ²² Togoleni! Mwichaka nyumba so kudiila na kunywila? Ama mukudibwalasa dikanisa dye Mulungu na kuwaguma chinyala awechaka chinhu? Nilonge nhani? Niwatogole? Kosoko isikuwatogola putu! ²³ Kosoko hanihokela kulawa kwe Mundewa agaya gonegale ukwenu nheifiya, fina iMundewa Yesu muchilo choyasongesigwe hakalonda mukate, ²⁴ na foyalafile malumbo hakaubendula, na kugamba, “Auno no umutufi wangu ulafigwe kosoko yenu. Goloseni nheifino kwa kunigelegela.” ²⁵ Nheifiya kahi yakafulusa kudiya, hakalonda chikombe yakugamba, “Ichikombe achi ni ilagano disha musakame yangu. Chila ugele womukunywila, goloseni nhaifo kwa kunigelegela.” ²⁶ Kosoko chila fomukudiya umukate awu na kunywila ichikombe achi, mukutagusa idifa dye Mundewa mpaka foyakuya. ²⁷ Kosoko yo wowose yakudiya umukate kuchunywila ichikombe bila kunogeligwa yakuwa kabana kwa kutofula umutufi ne sakame ye Mundewa. ²⁸ Uleke chila munhu yakipime imwenecho noho leka yadiye umukate na kunywila ichikombe. ²⁹ Kosoko munhu wowose yakudiya umukate na kunywila ichikombe bila kunogeligwa kudiya umutufi na kunywila ichikombe yakiligita imwenecho. ³⁰ Nochonghone matewa mugati yenu wasoka na kodoka, na wamonga wofa. ³¹ Ninga inghowa chikilamule chiweecho kunghonga, chisowile chikulamulwa ne Mulungu. ³² Ninga ugele wo chikulamulwa ne Mundewa, chikufusigwa kosoko chinghadahe kuligitiswa hamwedu ne chilunga. ³³ Kosoko yo Wakilisito wayangu, mungheja kudiya hamwedu mukigojele munhu na miyagwe. ³⁴ Munhu wowose yena njalasi yadiye ukaya kunghonga, ungheje ukwija hamwedu kosoko yo kuligitiswa. Amba kosoko ye simbuli simonga nomwinghani maloleso ugele wonikwija ukwenu.

¹ Hambiya kosoko ye mamudyo ge Muhe Musunhile, Wakilisito wayangu nikuhananga mumanye ichawelu chawo. ² Mumanya fomowile wapagani hamwaganisigwa ne sisanamu sichaka ugima, hata nheifo yoneka fina mulongosigwa. ³ Kahi nikuhananga mumanye fina hechaka munhu yakulonga kwa Muhe Musunhile yakudaha kulonga, Yesu yaligitwe, na hechaka munhu yakugamba, “Yesu ni Mundewa,” nghona nghakulongoswa na Muhe Musunhile. ⁴ Hambiya, kwina mamudyo ga namuna nyingi amba iMuhe ni yumwedu; ⁵ na kwina namuna nyingi sa kutogoma ninga iMundewa ni yuyuya yumwedu. ⁶ Na kwina namuna nyingi sa milimo ninga iMulungu ni yumwedu yakudahisa sose mu chila munhu. ⁷ Chila munhu yakwinghigwa ujelu wa Muhe kosoko yo uswanu wa wanhu wose. ⁸ Yumwedu yakwinghigwa kupulutila Muhe ulongaji wa ubala, na kwa yungi ulongaji wa umanyi foyakuhananga iMuhe yumwedu. ⁹ Yumwedu na Muhe yuyuya yakulafa udaha dihuwi dya chawelu na kwa yumonga udaha wa kuhonya. ¹⁰ Yakumwingha yumwedu udaha wa kugolosa majumo, yumonga udaha wo kutagusa mbuli ya Mulungu, yumonga udaha wa kubagula na kutanga amamudyo gekulawa kwe Muhe na gasikulawa kwe Muhe. Yakumwingha yumwedu udaha we inonga ye chimembe, na kwa yumonga udaha wa kutagusa silongigwe. ¹¹ Aga gose gekwinghigwa ne Muhe yumwedu; yakumugawila chila munhu fina foyakuhananga. ¹² Kosoko fina umutufi foni umwedu na wina filungo fingi, ne ifilungo fyose fyo umwili hata nghona ni fingi ni mutufi umwedu, no nheifo foyuwile kwa Kilisito. ¹³ Kosoko kwa Muhe yumwedu wose hachibatisigwa mu mutufi umwedu, chuwe Wayahudi ama Wayunani, watumwa ama walekeleligwe, na wose hachigoloseka chung’we mu Muhe yumwedu. ¹⁴ Kosoko umutufi usigolosigwe na chilungo chimwedu, ninga filungo fingi. ¹⁵ Umugulu unghagamba, “Kosoko niye si mukono, aniye si wa mutufi, togola wogaluka si wa mutufi?” ¹⁶ Na inghutwi inghagamba, “Kosoko ni si igiso, aniye si wamutufi,” togola dyogaluka si dya mutufi? ¹⁷ Woile umutufi wose uwe igiso, kukuhulika hakuwa kukuwa hoki? Na woile umutufi wose uwe nghutwi hakuwa kukuwa hoki kukunusa? ¹⁸ Ninga ichawelu chochino, Imulungu kafiliganisa ifilungo fyo umutufi, chila chimwedu fina foyasagule. ¹⁹ Mhali umutufi wose wowile chilungo chimwedu, umutufi hawuwa ukuwa hoki? ²⁰ Ichawelu nochino, kwna filungo fingi amba umutufi ni umwedu. ²¹ Digiso disidaha kuugamba umukono, Sikukuhananga! Kahi iditwi ku migulu, Sikukuhananga! ²² Na kuchibidu, afiya ifilungo fikoneka fisoka no fikuhanangigwa lugano; ²³ ne filungo afiya fyo umutufi fochikudoga fina itunyo ikefu chikufingha itunyo ikulu, ²⁴ ambadyo ifilungo fyetu ifikoneka fiswanu fisikuhananga. Ninga iMulungu kauumbagisa umutufi, na kuchingha ditunyo ichilungo chibesigwe. ²⁵ Kosoko kunghowe na utemanuko mumutufi amba ifilungo fyose fidahe kwikala kosoko ya uswanu wa chila chimwedu. ²⁶ Inghowa chilungo chimwedu chikubulagika, ifilungo fiyagwe fyose fikubulagika, ichilungo chimwedu chinghatunyigwa ifilungo fiyagwe fyose fikonela hamwedu nacho. ²⁷ Hambiya mwamutufi wa Kilisito na chila yumwedu ni chilungo che umutufi. ²⁸ Na Imulungu kasagula Mudikanisa kunghonga watumigwa, lwakeli wagonesi, lwa kadatu wafusaji, kahi watogomi wa majumo, kahi wahonyaji, wamonga watasaji, walongosaji, na walongaji wa siluga se chigeni. ²⁹ Siyo chila munhu ni Mutumigwa, ama Mugonesi ama mufusaji. Siyo chila munhy yakugolosa majumo, ³⁰ siyo wose ni wahonyaji, na siyo wose wakulonga kwa nonga ye chigeni, na siyo wose wakutagula isilongigwe. ³¹ Ninga muwe na nyenda ya kuhananga finhu fiswanusi. Nani nomonesani injila iswanu kujumha sose.

¹ Hata ninghalonga kwe sinonga sa wanhu na samalaika, nghona nichaka uwendo, nigaluka fina dijwi dya idebe dichaka chinhu ama kengele. ² Kahi hata ninghowa na udaha wa ugonesi, na kumanya amajumo gose, kahi ninghowa na dihuwi dyose hata dya kudaha kugasanya amatongo, amba nghona nichaka uwendo aniye si chinhu. ³ Hata ninghalafa fyose fyoninafyo, na kulafa umutufi wangu usomigwe moto (ulakasigwe) nghona nichaka wendo, ayo isikunitasa chinhu. ⁴ Uwendo ukufinyilisa, muswamu, uwendo wichaka finju ama usikwiyona; ⁵ usikuhananga makulu ama chiyunguyungu; uwendo usikuhananga faida yakwe, usikudeseka ama kutala agehile; ⁶ usikubwedelela ku gehile amba ukubwedelela kwa ge chawelu. ⁷ Uwendo ukuchigolosa seye chifinyilise gose, kahi chisikuleka kuhuwila, (uwendo ufinyilisa gose na ukuhuwila gose.) ⁸ Uwendo wichaka ndumo, fina udaha wo kutagusa imbuli ye Mulungu ijuwa dimwedu ukulawa, no udaha wo kutagusa nonga se chigeni wopuluta, hata umanyi nawo wopuluta. ⁹ Kosoko umanyi wetu usimemeleke na inhagusa yetu ye imbuli ya Mulungu isimemelekele; ¹⁰ Ninga ugele woikwija imemelekele, isimemelekele ikuleuka. ¹¹ Fonowile mwanike hanilonga fina mwanike, hanidoga fina mwanike, kahi fonigaluke mukulu nileka sinhenda se chiwanawana. ¹² Kosoko hambiya chikona fina inyefu muchilole, ninga hanyuma chokona meso kwa meso. Hambiya nimanya chidodogi, amba hanyuma nomumanya fina foyali, kahi fina niye fonimanyike wose ukwakwe. ¹³ Ninga dihuwi, inghojela, uwendo; gakusigala: Amba idikulusi ni uwendo.

¹ Mukuhanangigwa kukonga kulangisa uwendo na mamudyo ge chiloho hasa udaha wo kutagusa Imbuli swamu ye Mulungu; ² Kosoko imunhu yakulonga kwe nonga ye chigeni ghakulonga na wanhu, ninga ne Mulungu; kosoko hechaka munhu yakumuhulika, yakutumiya udaha we Muhe kulonga mafiso ge chawelu. ³ Kwa ulwandi umonga, ayuya yakuitagusa Imbuli ye Mulungu yakulonga na wanhu kosoko ya kuwajenga, kuwahosa na kuwaguma moyo. ⁴ Iyakulonga kwe inonga ye chigeni yakwilolesa imwenecho, amba iyakutagusa Imbuli ye Mulungu yakulolesa dikanisa. ⁵ Hambiya aniye nyenda anyeye wose mulonge kwe inonga ye chigeni, kahi nyendesa anyeye muhubili Imbuli kulawa kwe Mulungu. Ayuya yakuhubili ni wa mana lugano kusuma ayuya yakulonga kwe nonga ye chigeni, labuda howe na mutapita, kosoko dikanisa didahe kuloleswa. ⁶ Hambiya, Wakilisito wayangu ningheja ukwenu akuno nikulonga kwe nonga ye chigeni, nowongesela choni? Labuda niwegalile nyeye magubulo ama umanyi, ama Imbuli kulawa kwe Mulungu ama mafuso. ⁷ Nofo yuwile kufyombo fichaka ugima kifana filimbi ama chinanda, fighaleka kutowigwa hayohayo imutegelesaji komanyaje ichikutowigwa? ⁸ Umwano unghatowigwa fibi, nani yakiandaa kosoko ye nghondo? ⁹ Anyeye nheifiya nghona dilimi dyenu disikulonga mbuli sikumanyika, nani yemanya gomukulonga? Kosoko mokuwa mukulonga chaka. ¹⁰ Muchilunga mwina luga (nonga) nyingi na hechaka yoyose ichaka mana, ¹¹ ninga nghona simanyile imana ye inonga, nikuwa mugeni wa iyakulonga na imulongaji mugeni ukwangu. ¹² Nheifiya nanyeye, kosoko mwina ngwina ya kupata amamudyo ge Muhe, mukonye kugolosa fiswanu mukujenga dikanisa. ¹³ Kosoko yo iyakulonga kwe inonga ye chigeni, yakuhanangigwa yatase, kosoko yo udaha wa kutapita. ¹⁴ Kosoko ninghatasa munonga ye chigeni, u Muhe wangu ukutasa amba amahala gangu gasikuhokela chochose. ¹⁵ Nghona no nheifo nigolose choni? Nosali (notasa) kwa Muhe, kahi kwa mahala gangu, nokwimba kwa muhe, kahi nokwimba kwa mahala gangu nheifiya. ¹⁶ Nghona ukulafa malumbo kwe Mulungu ne Muhe wimwene, imunhu yechaka udaha wo kutapita kokwidikilaje Hano mumalumbo gako ukati nghamanyile choukulonga? ¹⁷ Kosoko ukudaha kulafa malumbo fiswanu, amba imunhu yumonga nghakuloleswa. ¹⁸ Nikumulumba Mulungu kosoko nikulonga kwa nonga ye chigeni kujumha nyeye mose. ¹⁹ Hata nheifo, munyitanghanyila ye chiKilisito nodaha kulonga mbuli shano kwa mahala gangu, kosoko niwalolese wamonga kujumha mbuli figulu ikumi mu nonga ye chigeni. ²⁰ Wakilisito wayangu, munghowe wanike mumadoga genu, muwe wana ku uwihi, amba mumadoga mukule. ²¹ Itulumigwa mumalagiso: Kwa njila ya wanhu wakulonga nonga ngeni na kwa njila milomo ye wageni nolonga na wanhu awa, na hata nhaifo wasinihulika niye, yakulonga iMundewa. ²² Nafo inonga ye chigeni ni chitangilo siyo kosoko ye wakuhuwila ninga kosoko ya wakuhuwila, amba ichipaji cho kuhubili Imbuli ye Mulungu siyo kosoko ya wasikuhuwila ninga kosoko ya wakuhuwila. ²³ Kahi ditewa dyose dya Wakilisito wanghatang’ana na wose kukonga kulonga kwa nonga ye chigeni, na wanhu wa kunje ama wasihuwila, wanghengila, wasigamba anyeye mwina magini? ²⁴ Amba wose wanghowa wakuhubili mbuli ye Mulungu na munhu nghakuhuwila ama munhu wa kunje yanghengila, yakwilamula imweecho kwa uwihi wakwe, ifinhu fyose foyakuhulika fomulamula. ²⁵ Ifinhu fifisigwe mumoyo wakwe fogubuligwa, naye kofunama na kumufugamila Mulungu yakugamba Chawelu Imulungu kahamwedu na nyeye. ²⁶ Choni kahi Wakilisito wayangu? Munghakitanghanyila hamwedu, yumwedu yakwimba, yumwedu yakufusa, yumwedu kena chinhu cha kugubula kulawa kwe Mulungu, yumwedu yakulonga mbuli ye Mulungu kwe inonga iye chigeni, na yumonga yakudaha kulagusa agekulongigwa. Mugolose gose kosoko ya kudijenga dikanisa. ²⁷ Nghona munhu yakulonga kwe inonga ya chigeni, walonge weli ama wadatu du, kahi yumwedumwedu, na yumonga yatapite agakulongigwa. ²⁸ Ninga inghowa hechaka munhu wa kutapita, iyakulonga kwe inonga ye chigeni uleke yanyamale mumukutano, yalonge na chidoga chakwe ne Mulungu. ²⁹ Ne wagonesi walonge weli ama wadatu, na uleke awaKilisito wamonga walamule. ³⁰ Nghona mbuli ye Mulungu imwijila munhu yungi yekale habehi, uleke we nghonga yanyamale. ³¹ Kosoko wose mukudaha kuhubili mbuli ye Mulungu, yumwedu yumwedu, uleke wose wadaha kifusa na wose wahuwisigwe, ³² na imulongaji yakuhubili mbuli ye Mulungu yakuhanangigwa yadime udaha wakwe. ³³ Kosoko iMulungu si Mulungu wa lwidaso, ninga dihewa. Fina foyuwile mumakanisa gose ga wasunhile. ³⁴ Awanawake wanyamale munyitanghanyila, kosoko wasifumisigwe kulonga, ninga wakuhanangigwa wowe filongosi fina dilagiso fodikulonga. ³⁵ Nghona wena chinhu chowakulanga kumanya, wawuse walume sawo ukaya, kosoko ni chinyala kwe mwanamuke kulonga munyitanghanyila. ³⁶ Imbuli ye Mulungu ilawa ukwenu? Ama iwejila anyeye mwiwene? ³⁷ Nghona munhu wowose yakudoga fina ni mugonesi ama munhu we chiloho, yakuhanangigwa yafumile mumadoga gakwe fina aino gonikwandika ni ilagiso kulawa kwe Mundewa. ³⁸ Nghona munhu wose wose nghakudimanya dilagiso dino, naye nghakumanyika. ³⁹ Kahi Wakilisito wayangu mukuhanangigwa muwe na nghwina ya kuhubili Imbuli ye Mulungu, na munghawalemese awakulonga kwe nonga ye chigeni. ⁴⁰ Chila chinhu chikuhanangigwa chigolosigwe digoya na fiswanu.

¹ Hambiya, nikuhananga nimugelegeseni Wakilisito wayangu aiya imbuli swanu yoniwahubilieni, aiya yomuhokele nayo noimise dihuwi dyenu. ² Kosoko yakwe mukuhonyigwa munghaikolelela ngwingwingwi na inghowa musahuwile chaka. ³ Kosoko haniilafa ukwenu fina chinhu cha samani nghulu lugano, fina niye foniihokele, fina Kilisito hakofa kosoko ye wihi wetu fina foitulumigwe mumafulumo; ⁴ fina hakasikigwa, fina hakenuligwa mwijuwa dya kadatu kamemelesa gamatulumo; ⁵ na fina hakoneka na Petili, kahi ku waya ikumi na weli. ⁶ Kahi hakalawanisa (hakakiyonesa) ku Wakilisito kujumha magana mashano mu chigele chimwedu, amatewa mugati yawo wekali womi, ninga wamonga wagona (wofa) ⁷ Kahi hakakiyonesa kwa Yakobo, kahi ku watumigwa wose. ⁸ Kundumo ya wose hakeyonesa ukwangu na niye fina mwana yelekigwe si kwa chigele chakwe. ⁹ Kosoko aniye namudodogi kuwatumigwa wose, sinogeligwe kwinangigwa mutumigwa, kosoko hanidisambasa dikanisa dye Mulungu. ¹⁰ Ninga kosoko ye dihewa dye Mulungu nigaluka fina fonili, na dihewa dyakwe ukwangu disowile dya chaka. Kuchibidu chakwe nigolosa milimo mikulu kusuma wose, hata inghowa siyo niye ila dihewa dye Mulungu dyuwile mugati yangu. ¹¹ Inghowa gonihubili aniye ama awatumigwa wamonga gowahubili, aino no mbuli yo chikugendelela kuhubili, nayo no yomuhuwile. ¹² Hambiya inghowa ikuhubiliigwa fina Kilisito kenuligwa kulwa awafile, nhani wamonga mugati yenu wakugamba kwichaka kwinuligwa awafile? ¹³ Ninga nghona kwichaka kwinuligwa awafile, ikiyonesa fina Kilisito nghenuligwe; ¹⁴ inghowa Kilisito nghenuligwe, amahubili getu ni ga chaka, na dihuwi dyenu ni dya chaka. ¹⁵ Hamwedu na gago, aseye choneka fina chidanha kumuhusu Mulungu, kosoko hachilonga fina Imulungu hakamwinula Yesu, ambaye nghamwinule nghona awafile wasikwinuligwa. ¹⁶ Kosoko nghona awafile wasikwinuligwa, ninga iYesu naye nghenuligwe. ¹⁷ Inghowa Kilisito nghenuligwe, dihuwi dyenu ni dya chaka, na mukali mu wihi wenu. ¹⁸ Kahi awaya nawo wofile mu Kilisito wagilila. ¹⁹ Nghona kukuhuwila kwetu mu Kilisito ni kosoko ye nyikala ya hambiya du, aseye ni wanhu wakoneligwa ubasi kujumha wanhu wose muchilunga. ²⁰ Ninga chawelu Kilisito kenuligwa kulawa awafile, chotoko chawo awafile. ²¹ Kosoko fina idifa fodikigaligwe muchilunga na munhu yumwedu, nheifiya kukwinuligwa kulawa kuwofile kwigaligwa na munhu yungi. ²² Kosoko fina awanhu fowakufa kupulutila Adamu, nheifiya mu Kilisito wanhu wose wogaluka womi. ²³ Ninga chila munhu kwa mupango wakwe kokwinuligwa: Kilisito di mudyo dye nghonga; kahi mujija yakwe awaya wasunhile we Mulungu. ²⁴ Kahi ikwija indumo ye chilunga, ugele woyamukabisi iMulungu Babakwe, yanghamala kubana chila undewa, na chila ukulu na chila ludole. ²⁵ Kosoko Kilisito yakuhanangigwa yadime mpaka foyakuweka wanghondo wakwe kusi ye fisinyagilo. ²⁶ Imunghondo we ndumo yakubanigwa ni difa. ²⁷ Amatulumo gakugamba, “Mulungu keka ifinhu fyose hasi ye migulu yakwe.” Ninga nghona ikulonga, “Ifinhu fyose fikigwa hasi ye migulu yakwe.” Ni chalinse fina iMulungu ngheumo kosoko imwene noyafikile ifinhu fyose hasi ya Kilisito. ²⁸ Ugele ifinhu fyose fofikwija fikikigwa mwidimo fye Kilisito, kahi imwana naye imweecho yakwiika mwidimo dye Mulungu yekile ifinhu fyose hasi yakwe, na Imulungu kofidima fyose. ²⁹ Hambiya, awanhu wakumaanisha choni nomoo wakubatisigwa ahanhu ha awafile? Nghona awafile wasikwinuligwa ng’o! Nhani awanhu wakubatisigwa ahanhu hawo? ³⁰ Nhani nyuwile muhatali chila ugele? ³¹ Wakililito wayangu, nikudikabili difa chila ijuwa! Inyiyona yoninayo ukwenu, munyikala yetu hamwedu na Kilisito Yesu Mundewa wetu, ikunigolosa niye nhyanjase imbuli ayi. ³² Nikupata choni? Nghona kwa nonga ye chimunhumunhu nikitowa na makewe akuya Efeso? Nghona awafile wasikwinuligwa, Leka chunywe na kudiya kosoko housiku chikufa; fina foikulongigwa. ³³ Munghadanhilisigwe. Umbwiya wihileukubana itabiya. ³⁴ Muye mumahala genu amaswanu, na munghagolose uwihi kahi. Kosoko wamonga wenu wasimumanyile Mulungu. Wakuhanangigwa wone chinyala. ³⁵ Ninga, mutufi wo kwinuka munhu yumwedu yakudaha kufa, Awofile wakwinuligwa nhani? Wakuwa na mitufi ya namuna yaki? ³⁶ Anye muwabwalasi! Munghahanda mbeyu isikota mpaka kunghonga yufe. ³⁷ Na choukuhanda ni mbeyu du ikudaha kuwa ya hemba ama mbeyu ingi, na siyo mumeya wose ukota hanyuma. ³⁸ Ninga iMulungu yakwingha imbeyu mutufi fina foyakuhananga, yakwingha chila mbegu mutufi wakwe. ³⁹ Kosoko siyo nyama yose ya sawa, ninga kwina nyama ya wanhu, imonga ya malimu, imonga ya madege, na imonga ya somba. ⁴⁰ Kwina mitufi ya kulanga na mitufi ya chiduniya, uswanu we mitufi ya kulanga na mitufi ye chiduniya usikifane. ⁴¹ Kwinauswanu we dijuwa na umonga wo umwesi, na umonga uswanu we sinyelesi, kahi sinyelesi naso sisikifane kwa uswanu. ⁴² Nofoyuwile munyinuka ya wofile, ichikusikigwa ni chakubanika, amba ichikwinuligwa chisikubanika. ⁴³ Umutufi foukusikigwa ukuwa mu hali ye chavu (chinyala,) ukwinuligwa muditunyo. Ukusikigwa usokile na kwinuligwa mu ludole. ⁴⁴ Foukusikigwa ni mutufi wa kumbigwa, foukwinuligwa ni mutufi wa chiloho. Kosoko kwina mutufi wa nyumbigwa, kwina mutufi we chiloho nheifiya. ⁴⁵ Itulumigwa Imunhu we nghonga Adamu kagalula munhu mumi; Adamu we ndumo kagaluka Muhe yakuwengha wanhu ugima. ⁴⁶ Ninga ichikulongola siyo mutufi wa chiloho, amba umutufi wo kumbigwa hanyuma we chiloho. ⁴⁷ Imunhu we nghonga hakalawa muisi, munhu we dinghundi, imunhu wa keli ni kulawa kulanga. ⁴⁸ Fina foyali imunhu wa ulongo, nofowowile awanhu wa ulongo, na foyowile imunhu wa kulanga, nofowowile awanhu wa kulanga. ⁴⁹ Na fina fochiihalile ifuta ya imunhu wa ulongo, nheifiya chohala ifuta yakwe imunhu wa kulanga. ⁵⁰ Chonikulonga nochi Wakilisito wayangu, inyama ne isakame fisikudaha kuhala undewa we Mulungu, ama ichikubanika kihale ichisikubanika. ⁵¹ Langa, nikumugubulilani chifiso, aseye wose chisikufa, amba wose chohiluka, ⁵² ninga ugele italumbeta (digunda) dodikwija dilapa (dilila) gafula wose chikwija chibiduka fina inghonghonya ya meso. Kosoko idigunda fodikulila iMulungu kowenula awafile na wasikufa keli, na seye chohiluka. ⁵³ Kosoko ihali yo kubanika ikuhanangigwa ifale ihali isikubanika, na ihali yo kufa ikuhanangigwa ifale ihali isikufa. ⁵⁴ Ugele ihali yo kubanika foikufala ihali isikubanika, na yo kufa foikufala ihali isikufa, kahi amatulumo gakuwa chawelu: Difa dyangamila na ushindi umemelekela! ⁵⁵ Go difa usumi wako uwa koki? Go difa isumu yako yuwa hoki? ⁵⁶ Isumu ye difa ni uwihi, na uludole lwa uwihi ni malagiso. ⁵⁷ Ninga, chikumulumba Mulungu, iyakuchingha usumi kupulutila iMundewa wetu Yesu Kilisito! ⁵⁸ Kosoko yo Wakilisito wendigwa wangu, mwime nghwingwingwi na munghasingisike, mugendelele kukonya mu mulimo we Mundewa, mumanye fina mwe Mundewa, imilimo yenu siyo ya chaka.

¹ Hambiya nikuhananga kulonga kosoko yo umuchango we Wakilisito weyetu fina fonigalanise amakanisa ga Galilaya. ² Chila dijuwa dye inghonga dye dijuma, chila munhu yeke chochose, (senti,) hanghanda mu mhata yakwe na kuchika, kosoko kunghowe na ngwina yo kukonghosa ugele wonikwija. ³ Na ugele wonikwija ukwenu, nowengha baluwa ya maloleso awaya womusagule na kuwatuma kwigala simhongesi senu. ⁴ Inghonekana fina ni fiswanu nani kuluta nheifiya, wonisindikisa. ⁵ Nokwija ukwenu inghafulusa kupulutila Makedoniya, kosoko nikuhananga kupulutila Makedoniya. ⁶ Na nhagela nokwikala nanyeye ama hata kuwa nanyeye ugele we chipupwe, kosoko munitase munhamo yangu kokose konikuluta. ⁷ Kosoko sikwenda kupuluta ukwenu nyimanyima, nikuhuwila fina nokwikala na nyeye kwa chipisi chitali, iMundewa yanghanifumisa. ⁸ Ninga nokwikala Efeso mpaka mwijuwa dye Pendekosite. ⁹ Hena luneka lwakugolosa milimo mikulu na ya mana, hata nghona hena wanhu we chinyume changu. ¹⁰ Timoseyo yangheja ukwenu, mulangisise hanghowe na chochose cha kogoha, kosoko yakumutogomela Mundewa fina aniye fonikumutogomela Mundewa. ¹¹ Kosoko yo munhu wowose yanghamubese, musapuseni yogendelele fiswanu ne inhamno yakwe, na yoye ukwangu kosoko aniye nikumugojela yoye hamwedu na Wakilisito weyetu. ¹² Hambiya kosoko ye mundugu setu Apolo, nimugongelesa lugano yeje hamwedu ne wandugu wamonga, ninga nghendile kwija hambiya amba kokwija yanghapata luneka. ¹³ Muwe meso, mwime ngwingwingwi mu dihuwi dyenu, muwe fitung’ati na wena ludole. ¹⁴ Chila dyomukugolosa mudigolose kwa uwendo. ¹⁵ Hambiya, Wakilisito wayangu mwimanya ikaya ya Sitefana, noyowile amamudyo ge nghonga ku Achaiya, na wakilafa kuwatogomela awanhu we Mulungu. ¹⁶ Nikumugongelesani, muwandamile ulongosi wa wanhu fina wo na ulongosi we chila munhu yakutogoma mulimo wa kutumikiya hamwedu nawo. ¹⁷ Nikonela kosoko yo kwija kwa Sitefana, na Fotunatusi na Akaiko, kosoko wajasilisa uluneka wowile baha kwa kuwa mwahechaka ¹⁸ kosoko wahosa chidoga changu ne ichenu. Wanhu fina wo wakuhangigwa kutegelesigwa. ¹⁹ Makanisa gose ge mukowa wa Asiya gekumulamusani; Akwila na Pilisika, hamwedu ne wanhu wose we Mulungu awowile musikaya sawo wakuwalamusa lugano mwe Mundewa. ²⁰ Awakilisito wayenu wose wakuwalamusa. Nanye ilamuseni kwa wendo we Mulungu. ²¹ Aniye Paulo nyandika sisalamu sino kwa mukono wangu. ²² Nghona wowose nghakumwenda Mulungu, lekeni yaligitwe! Mundewa wetu, nyagula! ²³ Dihewa dye Mundewa Yesu dyuwe nanye. ²⁴ Uwendo wangu uwe nanyeye wose mu Kilisito Yesu. Hano.