Титке

Павелнің Титке пічии

Тимофейге пастағы пічиинӧк чіли, пу пічікті Павел Римдегі пиктегдең позаанында, 65 чылда пасхан полар.

Тит Павелнің чағын полысчызы полған. Павелні Коринфтегі христиан тигірибінең чарастырарында аның ӱлӱзі улуғ. Павел Титті Крит олтырыхта христианнарның наа тигірибінде устағҷаа халғыс салған. Пічікте ӱс ӧӧн сағыс: 1) христиан тигірибінің устағҷызы хайдағ поларға кирегінеңер; 2) тигірибнің аймах пӧліктерінің араласчылары хайди тудынарға кирегінеңер; 3) Иисус Христостың сын ӱгредиинің тӧстеглерінеңер.

Алғас

¹ Павел – Худай хулы, Иисус Христостың илҷізі#. Мин Худай таллааннарға киртініс читірерге, оларны сынға паза Худайның кӧңніне чарапчатхан чуртасха ӱгредерге ызылғам. ² Минің ӱгредиим мӧгі чуртасха# ізеніс пирче. Пу чуртасты чойны пілбес Худай тустар пасталғалаххаох молҷаан. ³ Че Позы таллаан туста сӧсті чарлааны хоостыра аны асхан. Аны чарлиры мағаа Худай Арачылағҷыбыстың чахии хоостыра пирілген.

⁴ Титке, пір киртіністе сын оолғыма – Худай Пабабыстаң паза Арачылағҷыбыс Хан-пиг# Христос Иисустаң паарсас, айағ паза амыр хоных сағаа.

Титтің Крит олтырыхтағы тоғызы

⁵ Мин сині Крит олтырыхта читіре иділбеен тоғысты тоос саларға паза прай саарларда мин чахаанни тигіриб# ах сағалларын# турғыс саларға халғыс салғам. ⁶ Олар пырозы чох, ипчізіне киртістіг+ 1:6 Грек тілінде пу сӧстерні ӱс пасхали оңарарға чарир: 1) ипчізіне киртістіг, 2) ипчізінең хаҷан даа чарылбаан, 3) пір ле ипчінің ирі. , сайбах алай тообас тіп тітірбинчеткен, киртіністіг палалығ кізілер ползыннар. ⁷ Тигірибнің устағҷызы, Худай ибінің пӱдірігҷізі полчатханнаңар, пырозы чох поларға кирек. Хазыр нимес, табырах ӧкпеліг нимес, ізеечі нимес, кізее хол теертпес, чабды нимес, ⁸ че аалҷы кӧреечі, чахсы ниме идерге кӱстенеечі, пазымнығ, арығ чӱректіг, арығ хылыхтығ ползын, посты тудын пілзін. ⁹ Ол Худай сӧзінең чарасчатхан ізестіг ӱгредіг хоостыра тудынарға кирек. Андада ол пасхаларын орта ӱгредіге кӧстир, тоғырланғаннарның алҷаастарын, тізең, іле сығарар.

¹⁰ Тообастар, тик чоохтығлар паза чойлар кӧп нооза улам иудейлер# аразында. ¹¹ Андағларның аастарын чабарға кирек: арығ нимес парыс алар ӱчӱн чарабас нимее ӱгредіп, олар пӱкӱл иблерні сайбап салчалар. ¹² Оларныңох аразынаң пір кибелҷі чоохтабады ба за: «криттегілер чир чойлар, аң сині чабаллар, арғаастар паза тоспас харыннар». ¹³ Пу сын киречілес.

Аннаңар оларны хатығлап, киректерін ілезіне сығар тур: киртіністері пик ползын, кізілерні сын ӱгредігдең хыйа апарчатхан иудей кип-чоохтарына паза кізілернің чозахтарына хайығ салбазыннар. Олар тіпчелер: ¹⁵ «Арығларға прай ниме арығ, кірліглерге паза киртініс чохтарға пір дее арығ ниме чоғыл». Че оларның постарының сағыстары кірліг, чахсы-чабалны оңарары даа сайбалча. ¹⁶ Олар Худайны пілчебіс тидірлер, че киректері пастыра чабал, тообас паза пір дее чахсы кирек ит полбас пол парғаннаңар, Худайдаң хыйа турчалар.

Хайди тудынардаңар устағлар

¹ Син орта ӱгредіге килісчеткен нимелерні чоохтап одыр: ² апсахтар сах сағыстығ, улуғлатчатхан, пазымнығ ползыннар, киртіністе, хыныста, тыстаныста пик тудынзыннар. ³ Инейлер ідӧк, ах-арығларның оңдайынҷа тудынарға киректер, хоп чайбасха, іскее сабылбасха, чахсаа ӱгредерге. ⁴ Олар чиит ипчілерні ирлеріне, палаларына хынарға, ⁵ пазымнығ, ах-арығ# поларға, иб-чуртха салынарға, чағбан чӱректіг поларға, ирлерінің чооғын истерге ӱгретсіннер. Андада Худай сӧзі хомайлалбас. ⁶ Постаң оолларны пазымнығ поларға алда. ⁷ Позың прай нимеде, чахсы киректерде кӧзідім пол. Ӱгретчетсең, прай чӱрееңні салып, сын оңдайлығ паза арығ пол. ⁸ Синің сӧзің пір саба ниме чох, орта ползын. Ыырҷы, пістеңер хомай ниме тирін таппин, уйатха кірзін. ⁹ Хуллар, ээлеріне тоғырланмин, оларның чоохтарын истіп, кӧңнілерінҷе ползыннар, ¹⁰ оғырлабазыннар. Че ноо даа нимеде постарын киртістіг паза чахсы кӧзітсіннер. Андада олар Арачылағҷы Худайыбыстың ӱгредиин постарынаң чазирлар.

¹¹ Прай кізілерні арачылап полар Худайның паарсазы чит килді нооза. ¹² Ол паарсас пісті, Худайы чох хоныхты паза чуртас хынығыстарын тасти, пазымнығ, сынҷых, Худайны улуғлап, пу ах-чарыхта чуртирға ӱгретче. Піс, анзына ӱгреніп, ізенчеткен часкалығ кӱнібісті сағып чуртирға кирекпіс. Андада илбек Худайыбыс паза Арачылағҷыбыс Иисус Христостың сабланызы азылар. ¹⁴ Ол, пісті хайдағ даа чабал киректең ал халар паза ах-арығ чон ит салар ӱчӱн, Позының тынын пир салған. Амды піс Аның чоныбыс паза чахсы киректер идерге салынчабыс.

¹⁵ Анзын сағаа пирілген ӱлгӱңнең чоохта, алда, ілезіне сығар. Сині пірдеезі нимее салбин полбазын.

Орта киректер итчет

¹ Кізілерге, пастыхтарның паза ӱлгӱлернің оңдайынҷа полып, оларның чоохтарын истерге, ноо даа чахсы кирекке тимде поларға, ² ачығ тілге салынмасха, перінмеске, амыр тудынарға, прай кізее чахсы хылынарға чоохтапчат. ³ Хаҷан-да піс тее, ырах сағынмин, сӧс испин, астых чӧрген полғабыс. Хыҷаланыстарға, чуртас хыниина салынған хуллар полғабыс, чабалласта, істі чохтаныста, удур-тӧдір хырт кӧрізіп чуртаабыс. ⁴ Хаҷан, тізең, Худай Арачылағҷыбыстаң паарсас паза кізее хыныс тӱскенде, ⁵ Ол пісті арачылап халған. Піс позыбыс иткен сын киректерібіс ӱчӱн нимес, че пісті айааны ӱчӱн. Ол пісті чуупчатхан Худай Худынаң пастыра арачылаан. Пу Хуттың чуғаны піске наа тын кирче, наа чуртас пирче. ⁶ Піс, Иисус Христостың паарсазынаң ахтанып алып, мӧгі чуртасха ізеніс аларыбыс ӱчӱн, Худай піске Иисус Христос Арачылағҷыбыстың пастыра Худай Худын айағ чох урған. ⁸ Пу сын сӧс.

Худайға киртінчеткеннер чахсы киректер идерге кӱстенер ӱчӱн, сині пу сӧстерге оларны ӱгретсін тіп сағынчам: анзы кізілерге чахсы паза тузалығ. ⁹ Тик марығлардаң, ӧбекелер санастырарынаң, таластардаң паза Моисей Чахиинаңар# тартыстардаң оортах пол, олар тузазы чохтар, тиктер. ¹⁰ Тигіриб чарчатхан кізідең, пір-ікі хати оңарылдырған соонаң, хыйа парыбысчат. ¹¹ Олар ардаан кізілер полчатханын піл: оларның чазыхтары# оларның пырозын киречілепче.

Кізілерге чахығлар паза чолабиттер

¹² Хаҷан Артеманы алай Тихикті синзер ыссам, син минзер, Никополь саарзар, кил парарға кӱстенібіс – мин анда хыстирға пӧгінчем. ¹³ Ӱлгӱ пілігҷізі Зинаны паза Аполлосты чолға чахсылаан тимнеп сал: пір дее нимедең хызылбазыннар. ¹⁴ Пістіңнер дее, тик чӧрбес ӱчӱн, сығысхан кирексіністерін толдырар ӱчӱн, чахсы киректер идерге ӱгрензіннер. ¹⁵ Миннең хадалары прайзы сағаа чолабит ысчалар. Піске киртінізібісте хынчатханнарны прайзын алға. Сірерге прайзыңарға Худай паарсазы ползын. Аминь#.