Римдегілерге

Павелнің римдегілерге пічии

Пу паза Наа Молҷаға кірген пічіктернің илеедезінің авторы Павел полча. Тіріл килген Христос Позы ағаа кӧрінгеннең сығара Павел, иудей ученайы, фарисей, Христос киртінізіне айлан парыбысхан.

Римдегі Христос тигірибі Павел ағаа пічік пасханнаң илееде алнынҷа тӧстелген. Ол пічиин пасчатхан туста Римде полғалах полған, че андағы тигірибнің хай-пірее араласчыларынаң таныс полған. Павел пічиин Римзер наа эраның 50 чылларында – Грецияда полғанында, неке, – Христос киртіністіг Фива тіп ипчінең ызыбысхан.

Пу пічіктің пастағы чардығының (1–11 пастағлар) ӧӧн сағызы – Худай кізілерні чазыхтарының ӱчӱн хатығладарынаң арачылапчатхан Чахсы Хабарның кӱзінеңер. Кізі Иисус Христостаңар Хабарға киртінчетсе, Худай аны ахтап, анынаң чаразып, аны пала идінче паза ағаа Позының Худын пирче. Христосха киртінгені ле ноо даа кізіні Худайның алнында ах-арығ итче.

Пічіктің ікінҷі чардығында (12:1–15:13) Павел хығырығҷыларға Христос киртіністіг кізілерге хайди чуртирға кирегін хатабох чоохтапча. Олар хынызып, ӱлгӱнің холынаң сыхпин, улуғлазып чуртирға киректер. Тӱгенҷізінде (15:14–16:27) Павел Римзер тӱрчедең чидерге сағынчатханынаңар пасча паза Христос тигірибінің араласчыларына изенін читірче.

Алғыстығ алданыс

¹ Мин, Христос Иисустың хулы Павел, Аның илҷізі# поларға хығыртылғам. Ол мині Худайның Чахсы Хабарын чарлирға таллаан. ² Ол Чахсы Хабарны Худай ухаанҷылары# пастыра Ызых Пічіктерінде молҷаан. ³ Ол Чахсы Хабар Худайның Оолғынаңар. Иді-ханы хоостыра Ол Давидтің# тӧлінең сыххан кізі полған. ⁴ Худай Худы# хоостыра кӱстіг полып, ӧлімнең тіріліп, Ол Худайның Оолғы тіп чарлалған. Ол Чахсы Хабар Хан-пигібіс# Иисус Христостаңар полча. ⁵ Иисус Христос мағаа паарсазын читіріп, пісті илҷі поларға турғысхан. Ол анзын прай чоннар, Аның чооғын истіп, Ағаа киртінерлері ӱчӱн иткен. ⁶ Сірер дее, Иисус Христостың хығыртхан кізілері, ол чоннарның санындазар.

⁷ Сірерге прайларыңа Худайның Римде чуртапчатхан хынған кізілеріне, ах-арығ# поларға хығыртылған чонына пасчам. Худай Пабабыстаң паза Хан-пигібіс Иисус Христостаң паарсас паза амыр хоных сірерге ползын. ⁸ Иң пурнада Иисус Христостаң пастыра прайзыңарның ӱчӱн Худайымны алғыстапчам. Сірернің киртінізіңер тиксі-тилекейге чарлалча нооза. ⁹ Худай Оолғынаңар Чахсы Хабарны чарлап, прай кӧңнімні салып, Ағаа пазырчам. Худай мағаа киречі: мин Худайға пазырчатсам, сыбыра сірерні адапчам паза Худайның кӧңні хоостыра сірерзер чидерімнеңер сурынчам. ¹¹ Минің сірерні кӧрерім тың килче. Минің Худай Худының сыйыхтарынаң ӱлезерім килче: сірернің кӧңнілеріңні пик идерге, ¹² пасха чоохтаза, удур-тӧдір киртінізібіснең кӧңнілерібісті кӧдірізіп аларға.

¹³ Харындастар, сірерні пілбин халбазыннар тіп сағынчам: мин сірерзер кӧп хати килерге иткем, че амға теере харығ ниме табыл ла турған. Сірернің араларыңда даа, пасха чоннардағыох чіли, кізілерні Худайға айландырарға сағынчам. ¹⁴ Мин прайзының алнында алымнығбын: гректернің дее, сас чонның даа, хыйғаларның даа, сағыс чохтарның даа. ¹⁵ Аннаңар, миннеңер чоохтаза, мин сірерге дее, римдегілерге, Чахсы Хабарны чарлирға тимдебін. ¹⁶ Мин Христостаңар Чахсы Хабарны чарлапчатханымнаң уйатпинчам. Ол Хабарның киртінчеткеннерні хайзын даа, иң пурнада иудейні#, анаң иудей ниместі арачылаҷаң Худай кӱзі пар, нооза. ¹⁷ Чахсы Хабар Худайның киртіністің ӱчӱн кізіні ахтапчатханын кӧзітче. Іди пазылых: арығ чӱректіг# киртіністің сылтаанда чуртир.

Худайның алнында прайзы пыролығлар

¹⁸ Худайны улуғлабинчатхан паза чабал итчеткен кізілерге тигірдең Худайның ӧкпезі тӱзер. Олар чабал киректерінең сынны типсепчелер. ¹⁹ Худайдаңар пілер ниме оларға азых полған. Худай Позы оларға анзын ас пирген нооза. ²⁰ Тилекей пӱткеннең ала Худайның итчеткен киректері, Аның мӧгі кӱзі паза Позының илбегі харахха кӧрінмезелер дее, че Аның иткен нимелерінең пастыра кӧрінчелер. Кізілерге анзын, сизініп, оңарып аларға оңдай пар. Аннаңар олар ахтан полбастар. ²¹ Олар, Худайны піліп алған даа ползалар, Аны Худайны чіли саблабааннар, алғыстабааннар. Аның орнына тик чоохтарға салынғаннар. Оларның алығ чӱректерін харасхы пас парған. ²² Олар хыйғаларын кӧзіткеннер, сынында алығ полғаннар. ²³ Олар ӧлім пілбес сабланыстығ Худайға пазырбиныбысханнар. Аның орнына олар ӧлер кізілерні, аң-хустарны паза сойлаастарны сомнапчатхан омаларға пазырчалар. ²⁴ Оларның чӱректерінің хыҷыхтаныстары тохтабааннар. Аннаңар Худай оларны постарының чазыхтарына# артыс салған. Олар постарыох ит-ханнарын уйатха сухханнар. ²⁵ Олар Худайның сынын чойға орназыбысханнар. Чайаачының орнына чайалған нимее пазырғаннар. Чайаачы хаҷан даа алғастығ#. Аминь#.

²⁶ Аннаңар Худай оларны чиркестіг хынығыстарға пир салған: ипчілері чир-салылғанни ирлерінең хонмин, сан-тискер хыныс сыхханнар. ²⁷ Иреннер ідӧк, чир-салылғаны хоостыра ипчілерінең хонмин, удур-тӧдір хынызып, хыҷаларын тохсындырғаннар. Иреннер иреннернең чиркестіг хынысханнарынаң пос постарын хатығлааннар. Ол алҷаастарының ӱчӱн тӱсчең хатығлас полған. ²⁸ Худайны пілерге сағыс тутпааннарынаңар, Худай оларны ардап парған сағыстарына пир салған – тӱӱлістіг нимелер идерге. ²⁹ Олар сын нимес нимее, оралысха, кӧйтіктеніске, чаптанысха, чабалланысха, істі чохтанысха, ӧдіріске, тартысха, чойланысха, чабал хылыхха, пат парғаннар. ³⁰ Олар чабал тілліглер, хопчылар, Худайны хырт кӧрчелер, кізі хыйыхтаачылар, кӧкеесімнер, махтанҷыхтар, чабал нимее чапчаңнар, паба-іҷенің чооғынаң сых парғаннар. ³¹ Олар сағыс чох, киртіске турыспас, тас чӱректіг, айабас кізілер. ³² Іди тудынчатхан кізілер Худайның орта чарғызы чидерін пілчелер. Олар постарын ӧлімге турыстығларын пілзелер дее, постары даа ол оңдайларын тастабинчалар, андағ кізілерні дее махтапчалар.

Худайның чарғызы прайзына пір

¹ Ол оңдайнаң син, пасхазын чарғылапчатхан ноо даа кізі, ахтан полбассың. Син пасхазын чарғылапчатхан чарғынаң позыңны чарғылапчазың. Пасха кізіні чарғылап, позың, тізең, ідӧк итчезің. ² Че піс андағ киректерні итчеткен кізілерні Худай сыннаң хоостыра чарғылирын пілчебіс, нооза. ³ Алай син, кізі, андағ нимені итчеткен кізіні чарғылап, позың даа ідӧк итчедіп, Худайның чарғызынаң озарға сағынчазың ма? ⁴ Алай син, Худайның пай паарсазын, Аның пазымнығ, тыстаныстығ полчатханын нимее салбинчазың ма? Худай паарсазының пастыра Позынзар айланарына чоллапчатханын оңарбинчазың ма? ⁵ Че ӧчес хылииң, аасхынмас чӱреең ӱчӱн, Худайның ӧкпезі чидер паза Аның орта чарғызы іле кӧзіділер кӱніне позың позыңа ол ӧкпені чыынып одырчазың.

⁶ Худай полғанына ла иткен киректері хоостыра читірер. ⁷ Чахсы киректерінең сабланысты, аарласты, ӧлім пілбес чуртасты сыбыра тілепчеткен кізілерге Худай мӧгі чуртас# пирер. ⁸ Постарын кӧдірчеткен паза сынның ӱлгӱзіне кірбинчеткен, че постарын чойға салынчатхан кізілерге Худайның хазырланызы паза ӧкпезі чидер. ⁹ Чабал ниме итчеткен ноо даа кізінің кӧңні, пурнада иудейни, анаң иудей нимес кізіни, чобағны кӧрер, істі тарланысха пастырар. ¹⁰ Че чахсы ниме итчеткен ноо даа кізее, пурнада иудейге, анаң иудей нимес кізее, сабланыс, аарлас паза амыр хоных полар.

¹¹ Худай чонны талластырбинча нооза. ¹² Чахығ чох чуртапчатхан кізілер чазых итчетселер, олар, чахығның оңдайынҷа чарғылатпин, ӧл парарлар. Че, чахығны пілчеткен кізілер чазых итчетселер, олар чахығ хоостырох чарғыладарлар. ¹³ Худай чахығны исчеткен кізілерні орта чоллығ кізілер тіп санабинча, че чахығны толдырчатхан кізілерні ахтапча. ¹⁴ Пасха чоннарның чахығлары чоғыл, че чир-тӧрееннең чахығ хоостыра орта итчеткеннерінеңер, чахығлары чох таа полза, олар пос постарына чахығ полчалар. ¹⁵ Олар чахығ ниме киректепчеткенін чӱректерінең пілчеткенін кӧзітчелер. Аннаңар чӱректері чоохтапча. Сағыстары оларны чахсы-чабалны талластырарға чоллапча: пірде пыролапча, пірде ахтапча. ¹⁶ Ідӧк Худай кізілернің чазыт киректерін Иисус Христостың пастыра чарғылир кӱнде полар. Анзынаңар мин чарлаан Чахсы Хабарда чоохталча.

¹⁷ Мына син позыңны иудей тіп аданчазың, Чахыға ізенчезің паза Худайнаң махтанчазың. ¹⁸ Син Аның кӧңнін пілчезің, Чахыға тӧстеніп, ниме артых полчатханын оңнапчазың. ¹⁹ Син позыңны харах чохтарның чоллаачызы, харасхыда чӧрчеткеннернің чарытхызы полчазың тіп санапчазың. ²⁰ Син піліс чохтарға устағҷы, час палаларға ӱгретчі полчазың. Чахығдаң пастыра синің толдыра пілістің паза сынның кӧзідімі пар. ²¹ Син, пасхаларын ӱгредіп, позыңны ӱгретпинчезің. ²² Оғырлабасха ӱгредіп, позың оғырлапчазың. «Оралыспасха» тіп ала, позың оралыс чӧрчезің. Тайма худайлардаң чиркеніп, храмнарын тонапчазың. ²³ Чахығнаң махтанып, Чахығны сайбааныңнаң Худайның адын аарлабинчазың. ²⁴ Пазылых нооза: сірернің сылтаанда пасха чоннарда Худайның ады сӧклетче.

²⁵ Сынап Чахығны толдырчатсаң на, сӱннет# иткені тузалығ полча. Чахығны сайбапчатсаң, тізең, синің сӱннет иттіргенің иттіртпеенге килісче. ²⁶ Ол оңдайнаң, сӱннет иттірбеен кізі Чахығ хоостыра чуртапчатса, аның сӱннет иттірбеені иттірткенге киліспес пе? ²⁷ Андада ол, тӧреені хоостыра сӱннет иттіртпеҷең кізі, чахығны толдырчатса, сині, Чахығның сайбағҷызын, тӧреені хоостыра сӱннет иттірткен паза Худай Пічии# пар кізіні, пыролабас па? ²⁸ Тастындағы кӧрімінең не иудей кізі сын иудей нимес паза идінде сӱннет иткені сын сӱннет нимес. ²⁹ Істінең иудей полза, ол сын иудей. Сын сӱннет кізінің идін кискені нимес, че чӱректің алысханы. Андағ сӱннет Чахығ хоостыра нимес, Худай Худының пастыра иділче. Андағ иудейлерге кізілердең нимес, че Худайдаң махтас полар.

Худайның киртінізі

¹ Андағда иудей полғанның нимезі артыхтыр паза сӱннет иттірткеннің ноо тузазы? ² Прай даа саринаң кӧр килзе, кӧп нимезі артых. Иң пурнада – иудейлерге Худайның сӧзі пиріл парғаны. ³ Оларның кӧбізі Худайға киртістіг полбаан. Оларның киртістіг полбааннары Худайның киртістіг полчатханын чох итче бе? ⁴ Чох, андағ нимес. Ноо даа кізі чой поладыр, Худай, тізең, киртістіг. Аннаңар піди пазыл парған: «Сӧстеріңде сын полчатханың кӧрінзін, Синің чарғыңда Син чиңерзің».

⁵ Че пістің орта хылынмааныбыс Худайның орта итчеткенін іле сығарчатханда, анзы Худайның орта нимес ӧкпеленгенін таныхтапча ба? (Мин мыны кізі сағызынаң тіпчем.) ⁶ Чох, андағ нимес. Андағ полған полза, Худай тилекейні хайди чарғылирҷых? ⁷ Минің чойым пастыра Худайның сыны кӧптеліп, Ағаа сабланыс ағылчатханда, ноға мин чазыхтығ кізі чіли чарғылатчам? ⁸ Пірее кізілер, мині сӧклеп, миннеңер піди тіпчелер: «Ол, чахсы ниме полар ӱчӱн, чабал ниме идерге кирек тіп ӱгретче». Іди чоохтап чӧрчеткен кізілернің чарғылатырғаннары орта полар.

Чазых чох кізі чоғыл

⁹ Ниме зе? Пасхаларының хыринда пістің, иудейлернің, артығыбыс пар ба? Пір дее чоғыл. Иудейлер дее, иудей ниместер дее – прайзы чазыхта чӧрчеткеннерін піс сынынҷа кӧзіт пиргебіс. ¹⁰ Пазылых нооза: «Орта чоллығ пір дее кізі чоғыл». ¹¹ Сынны оңарчатхан пір дее кізі чоғыл, пірдеезі Худайны тілебинче. ¹² Прайзы чолдаң хыйыс парыбысханнар, тузалары чох кізілер пол парғаннар. Чахсы иткен пір кізі дее чоғыл. ¹³ Оларның аастары, азых хомдылар осхас, тіллері чой чоохты ла пілчелер. Оларның иріннерінде чылан оозы. ¹⁴ Ахсылары харғирға паза чабаллирға ла пілчелер. ¹⁵ Олар хан тӧгерге чапчаңнар. ¹⁶ Оларның сооларында сайбағ паза чобағ хал парча. ¹⁷ Амыр чуртас чолларын олар пілбинчелер. ¹⁸ Худайдаң хорыхханы харахтарында кӧрінминче.

¹⁹ Піс пілчебіс, Худай Чахии чахығ хоостыра чуртапчатханнарға тееліп, пірдеезін удур чоохтандырбинча. Іди тилекей чоны Худайның алнында пыролығ пол парча. ²⁰ Чахығ киректері хоостыра Аның алнында пірдеезі ахтан полбас. Чахығ піске чазых ниме полчатханын пілерін не пирче.

Киртіністің ахтапчатханы

²¹ Амды, тізең, Худайның ахтазы чахығдаң алынҷа азыл парған. Анзынаңар чахығ паза ухаанҷылар киречілепчелер. ²² Худай киртінчеткен кізілерге прайзына, талластырбин, Иисус Христосха киртіністің пастыра ахтас пирче. ²³ Прайзы чазых иткен, прайзы Худайның сабланызы# чох халған нооза. ²⁴ Худай прайзын Позының паарсазынаң тикке ахтапча, Иисус Христостың ӱчӱн оларны пос итче. ²⁵ Худай Иисусты чарастырҷаң толығ ит салған. Иисустың ханы сылтаанда киртінчеткеннернің чазыхтары позыдылча. Худай кізілернің алында иткен чазыхтарын тастаан паза ахтапчатханын кӧзіткен. ²⁶ Сағамғы туста Худай, тыстанып, Позының ахтапчатханын кӧзітче. Іди ол Позы даа сынынҷа итче паза Иисусха киртінчеткеннерні ахтапча.

²⁷ Амды нименең махтанҷаң? Пір дее нименең. Арса, чахығны толдырчатханнаң махтанҷаң ма? Чох, чарабас. Киртініснең не махтанарға чарир. ²⁸ Піс тіпчебіс, кізі чахығны толдырғанынаң алай толдырбаанынаң нимес, че киртіністің пастыра ахтанып алча. ²⁹ Худай иудейлернің не Худайы ба? Пасха чоннарның даа Худайы нимес пе ол? Оларни дее. ³⁰ Худай пір ле. Ол киртіністері хоостыра сӱннет иттіргеннерні дее, иттірбеен, че киртінчеткеннерні дее ахтапчатхан Худай полча. ³¹ Ол оңдайнаң піс киртінізібіснең чахығны чох итчебіс пе? Андағ нимес. Піс чахығны пик турғызарға полысчабыс.

Авраамның кӧзідімі

¹ Авраам# ӧбекебісті алза, пос кӱзінең нимее читкен ол? ² Ол киректері хоостыра ахталған полза, аның, Худайға нимес, кізілерге махтатчаң нимезі поларҷых. ³ Худай Пічии нимедеңер чоохтапча? «Авраам Худайға киртін парғаннаңар, Худай аны ахтаан». ⁴ Кізі иткен киректерінің ӱчӱн сый алча, анзы, паарсас нимес, тӧлег полча. ⁵ Че кізі, иткені хоостыра нимес, киртінізі пастыра ахтатча. Чазыхтығ кізіні ахтапчатхан Худайға киртінчеткен кізіні Худай ахталған тіп санапча.

⁶ Давид тее ідӧк чоохтапча: «Худай кізіні киректерінің ӱчӱн нимес ахтаза, ол кізі часкалығ. ⁷ Сайбағ иткен ӱчӱн пыролары тасталған, чазыхтары ундудылған кізілер часкалығлар. ⁸ Хан Худай# кізінің чазыхтарын санға албаза, ол кізі часкалығ полар». ⁹ Андағ часка сӱннет иттіргеннерге алай иттірбееннерге дее теелче бе? Піс Авраам киртінізінің пастыра ахталған тіпчебіс. ¹⁰ Хаҷан анзы санал сыххан? Сӱннет иттірткенде алай итірткелекте бе? Соонаң нимес, иттірткелекте полған ол. ¹¹ Авраамның сӱннет иттірткелектӧк полған киртінізі ӱчӱн, Худай аны ахталған кізее санаан. Сӱннет тании ағаа соонаң ахтас таңмазы чіли салылған. Ол оңдайнаң, киртінчеткен кізілер, сӱннет иттіртпеен дее ползалар, ахтадарлары ӱчӱн Авраам оларның прайларының пабазы полыбысхан. ¹² Ол ідӧк сӱннет иттірткеннернің пабазы полча. Олар, сӱннет иттірткеннең пасха, Авраам пабабыстың киртініс чолынҷа парчалар. Авраамның ол киртінізі сӱннет иттірткелегіндӧк полған.

Худайның молҷағлары киртіністең пастыра алылчалар

¹³ Авраам паза аның тӧлі тиксі-тилекейні холға кирерлерінеңер молҷағ алғаннар. Ол молҷағ Чахығны толдырчатханнаңар нимес, че ахтапчатхан киртіністің хоостыра пирілген. ¹⁴ Пу молҷағ чахығны толдырчатханнарға ла теелчеткен полза, киртініс тик ниме поларҷых, молҷағның даа тузазы чох поларҷых. ¹⁵ Чахығдаң хатығлас килче. Чахығ чох полза, аны сайбааны даа чох полча нооза.

¹⁶ Аннаңар прай ниме киртіністең полча паза паарсасха тӧстенче. Аннаңар пу молҷағ Авраамның прай тӧліне, чахығ хоостыра чуртапчатханнарға ла нимес, че Авраам чіли киртінчеткен прай кізілерге пик ізеніс пирче. Авраам пістің прайзыбыстың пабазы полча. ¹⁷ Худай Пічиинде ідӧк пазылых: «Мин сині кӧп чоннарның адазы ит салғам». Авраам ӧліглерні тірілдірчеткен паза чох нимені пар итчеткен Худайға киртін парғаннаңар, Худайның кӧрізінде пістің пабабыс полыбысхан. ¹⁸ Пір дее ізеніс халбаанда даа, Авраам ізеніп ала киртінген. Аннаңар ол кӧп чоннарның пабазы полыбысхан. «Синің тӧлің анҷа кӧп пол парар» ағаа теені хоостыра ол кӧп чоннарның пабазы полыбысхан. ¹⁹ Ағаа чӱс часха чағдабысханнаңар иді-ханының кӱзі сыхчатханын пілінзе дее, Сарра, тізең, тың киріп, пала кӧрерінең ирт парған даа полза, Авраам тың киртінген нооза. ²⁰ Худайның молҷаа толарын сала даа ікінҷілебин, ол киртінізінде улам пик турып, Худайны саблаан. ²¹ Молҷағны толдырарға Худайның кӱзі парына Авраам тың киртінген. ²² Аннаңар Худай аны ахтатхан кізее санаан.

²³ «Аны ахтатхан кізее санаан» теені Авраамға ла нимес, ²⁴ че піске дее теелче. Піс Хан-пигібіс Иисус Христосты ӧліглердең тірілдірібіскен Худайға киртінчебіс. Ол пісті дее орта чоллығ кізілерге санир. ²⁵ Христос пістің чазыхтарыбыстың ӱчӱн ӧлімге ызылған паза пістің ахтадарбыстың ӱчӱн тіріл парған нооза.

Аның Ханынаң ахтанғаны

¹ Піс киртінізібіс пастыра ахтанып алғаныбыста, Хан-пигібіс Иисус Христостаң пастыра Худайнаң ынағ пол парғабыс. ² Иисус Христостаң пастыра, киртінізібістің сылтаанда ам піске пирілген паарсасха читтібіс паза Худайыбыстың сабланызын ӱлезерге ізеніп, тың ӧрінчебіс. ³ Анзына ла нимес, чобағларыбысха даа ӧрінчебіс. Чобағлар тыстанарға ӱгретчеткеннерін пілчебіс нооза. ⁴ Тыстанып, піс сынағ иртчебіс. Сынағдаң, тізең, ізеніс тӧріпче. ⁵ Ізеніс пісті уйатха кирбес. Худай, піске Худай Худын пиріп, чӱректерібіске Позының хынызын ур пирген нооза.

⁶ Піс кӱс-сағ чох полғаныбыста, Христос пістің ӱчӱн ӧл парған. Тузы читкенде, Ол Худайны улуғлабинчатхан кізілернің ӱчӱн ӧл парған. ⁷ Арығ чӱректіг кізінің дее ӱчӱн піреезінің ӧлері ікінҷілестіг. Итсе, чахсы кізінің ӱчӱн тынын пирерге иткен піреезі табыл таа парар. ⁸ Худай піске Позының хынызын кӧзіт пирген. Христос, піс чазыхтығ чӧрген тустох, пістің ӱчӱн ӧл парған нооза. ⁹ Амды піс Христостың ӧлімінең ахтанып алып, Худайның чарғызынаң Аның пастыра улам озып аларбыс. ¹⁰ Піс Худайнаң ыырласхан туста Ол піснең Позының Оолғының ӧлімінең пастыра чарас салған. Ам, тізең, чарас салғаныбыста, Аның чуртазы пастыра улам арачылан поларбыс. ¹¹ Піс анзына ла махтанминчабыс. Хан-пигібіс Иисус Христостың пастыра Худайни полчатханыбысха махтанчабыс. Аның сылтаанда піс Худайнаң чарас салғабыс.

Адам паза Христос

¹² Ол оңдайнаң пір кізінең пастыра тилекейге чазых кірген. Чазыхнаң хада, тізең, ӧлім килген. Іди ӧлім прай кізілерге килген. Прайзы чазых ит салған нооза. ¹³ Чазых тилекейде Чахығ салылғалахтох полған. Че Чахығ турғызылғалахта, чазых ӱчӱн пыролиры кирілгелек полған. ¹⁴ Ӧлім, тізең, Адамның# тузынаң пасти, Моисейге# теере ӱлгӱ салған. Ол Адам иткен чазыхха тӧӧй сайбағны итпеен кізілерге дее ӱлгӱ тутхан. Адам килер кізінің омазы полған.

¹⁵ Че Худайның сыйии сайбағ осхас нимес. Пір кізі ит салған чазых ӱчӱн кӧп кізі ӧл парған. Худайның паарсазы, Аның паарсастығ сыйии хай-хай кӧп пирілче. Ол паарсас пір кізінің, Иисус Христостың сылтаанда кӧп кізее азыра даа пирілче. ¹⁶ Худайның сыйиин Адамның чазығынаң тиңнирге чарабас. Пір чазыхтың ӱчӱн чарғы полҷаң, пыролатчаңнар. Паарсас сыйии, тізең, кӧп сайбағлардаң ахтанарға пирілче. ¹⁷ Пір сайбағ иткен пір кізінің ӱчӱн ӧлім ӱлгӱні холға кирген. Худайның пай паарсазын паза ахтаныстың сыйиин алчатхан кізілер пір Кізідең, Иисус Христостың пастыра чуртаста улам ӱлгӱ тударлар.

¹⁸ Ол оңдайнаң пір кізінің сайбағ иткені прай кізілерні чарғылапча. Сах ідӧк пір кізінің сын иткені прай кізілерні Худайның алнында ахтап, оларға чуртас пирер. ¹⁹ Пір кізінің чоох испеені ӱчӱн кӧп кізі чазыхтығ пол парған. Сах ідӧк пір кізі чоох искенінің ӱчӱн кӧп кізі ахтанып алар.

²⁰ Аның соонаң Чахығ пирілген. Іди чазыхтың кӧбі кӧзіділ парған. Чазых кӧптел парғанда, паарсас улам ас сыххан. ²¹ Чазых, ӧлімге ағылып, ӱлгӱ тутхан. Ідӧк паарсас ахтаныстың пастыра ӱлгӱ тудып, пісті Хан-пигібіс Иисус Христостың пастыра мӧгі чуртасха ағылча.

Чазыхха ӧліглер, Христоснаң хада тіріглер

¹ Ниме піс тирбіс? Худайның паарсазы піске хозылып одырар ӱчӱн, чазыхта чӧрерге кирекпіс пе? ² Чох, андағ нимес. Піс чазыхха ӧл парғабыс, чазыхтығ чуртап поларбыс па? ³ Піс кіреске тӱскенде#, Иисус Христостың чардығы полыбызып, Аның ӧлімін дее ӱлескенібісті пілбинчезер бе? ⁴ Іди піс, кіреске тӱзіп, Анынаң хада ӧл парғабыс. Пісті Аннаң хада чыып салғаннар. Христос Пабазының илбек кӱзінең тірілдіріл парған. Ідӧк піс тее нааҷылал парып чуртирбыс.

⁵ Піс, Аннаң хада пірік парып, Ол чіли ӧл парғаныбыста, Аннаң хадох тіріл парарбыс. ⁶ Алындағы позыбыс Иисуснаң хада кіреске# хазат салғанын піс пілчебіс. Анзы пістің чазыхтығ ит-ханыбыс піске ӱлгӱ салбазын тіп, піс чазыхтың хуллары полбас ӱчӱн, іди иділген. ⁷ Кем ӧл парча, ол чазыхтаң позып парча нооза. ⁸ Піс Христоснаң хада ӧл парғаныбыста, Аннаңох хада чуртирыбысха киртінчебіс. ⁹ Ӧліглердең тірілдірткен Христос паза ӧлбезін пілчебіс нооза. Ӧлім Ағаа ӱлгӱзін тут полбас. ¹⁰ Ол ӧлгенде, чазыхха саңайға ӧл парған. Чуртап, тізең, Худайға чуртапча. ¹¹ Сірерге дее постарыңны, чазыхха ӧлігзер, Худайға пістің Хан-пигібіс Иисус Христоста чуртапчазар тіп, санирға чарир. ¹² Аннаңар ӧлҷең иді-ханыңарда чазых ӱлгӱ тутпазын, аның хынығыстарынҷа полбаңар. ¹³ Идіңернің чардыхтарын пірдеезін чазыхтың ӱлгӱзіне пирбеңер, чабалның тириине айландырбаңар. Ӧліглердең тіріл парған постарыңны, сынның тирии идіп, Худайның ӱлгӱзіне пир салыңар. ¹⁴ Чазых сірерге ӱлгӱзін паза салбас. Сірер амды паза чахығның холында нимессер, Худайның паарсазында чӧрчезер нооза.

¹⁵ Нимедір зе, чахығның холында ниместе, Худайның паарсазында чӧрчеткенібісте, чазых идерге кирекпіс пе? Чох, андағ нимес. ¹⁶ Пілбинчезер бе, посты піреезіне хул поларға пирін салза, чооғын искен кізінің хулы поларзар. Чазыхтың хулы полыбыссар, анзы ӧлімге ағылар. Худайға хул полып, Аның чооғын иссер, анзы сірерні ахтанысха ағылар. ¹⁷ Сірер чазых хуллары полғазар. Че, Худайнаң, прай чӱректеріңнең сірерге пирілген ӱгредіге тудынарға чарат салғазар. ¹⁸ Чазыхтаң позып алып, сірер орта чуртасха хул полыбысхазар.

¹⁹ Сірер кӱс-сағ чохтарыңнаңар, мин мыны кізі синҷе чоохтапчам. Алында сірер ит-ханыңарны сайбахха, чабал киректерге хул иткезер. Олох оңдайнаң амды аны ахтаныстың хулы идібізіңер. Андада сірер ах-арығ полыбызарзар. ²⁰ Сірер чазыхтың хуллары полғаннарыңда, орта чоллығ кізілер полбаазар. ²¹ Андада хайдағ парыс алдыңар? Ол туста иткен нимелердең пӱӱн сірерге уйадыстығ. Ол киректер ӧлімнең тоозылчалар. ²² Амды, тізең, сірер, чазыхха хул поларынаң позып алып, Худайның хуллары пол парғазар. Сірер ах-арығ кізілер пол парғаннаң парыстанып алғазар. Аның салтары мӧгі чуртас полча. ²³ Чазыхтың тӧлее ӧлім, нооза. Худайның сыйии, тізең, Хан-пигібіс Иисус Христоста мӧгі чуртас.

Чахыға ӧліглер

¹ Харындастар, мин мыны сірерге, чахығны пілчеткен кізілерге, чоохтапчам. Кізі тірігде ле чахығның холында чӧрче. Анзын пілче полбассар ба? ² Ирі изен чӧргенҷе ле, Чахығ ипчізін аннаң палғалыстырча. Ирі ӱреп парза, ол ипчі ирінең палғалыстыр салған чахығдаң позып парча. ³ Аннаңар ирі изенде, пасха ирнең чӧрібіскен ипчі чӧреес ипчі тіп адалар. Че ирі ӱреп парза, ол чахығның ӱлгӱзінең сых парар: пасха ирнең чуртап сыхса даа, чӧреес ипчее саналбас.

⁴ Сірер дее, харындастарым, Христоснаң хада ӧліп, чахыға ӧл парғазар. Пасха, ӧліглердең тіріл парған кізіни пол парғазар. Худайға парыс ағылар ӱчӱн чуртааңар.

⁵ Піс ит-ханның оңдайынҷа чуртааныбыста, чахығ чазыхтығ хыҷыхтарыбысты ілее сығарған. Ол хыҷыхтарыбыс идібіснең устап, пісті ӧлімнең парыстандырҷаңнар. ⁶ Амды, тізең, пісті тузахтапчатхан чахыға ӧл парғаныбыста, піс аннаң позып парғабыс. Алында пазылған чахығдаң хоостыра нимес, Худай Худының пастыра нааҷылалып, Худайның нымызында чӧрербіс.

Чахығ паза чазых

⁷ Ниме піс тирбіс? Чахығ чазыхтығ полча ба? Чох, андағ нимес. Чахығдаң пастыра ла мин чазых ниме полчатханын піліп алғам. Чахығ «Хыҷыхтанма» тібеен полза, мин хыҷых ниме полчатханын пілбестееҷікпін. ⁸ Че чазых, тізең, чахығнаң тузаланып, минде аймах хыҷыхтаныстар сығар килген. Чахығ чох полза, тізең, чазых таа чоғылох. ⁹ Мин хаҷан-да чахығ пілбин чуртаан полғам. Че хаҷан чахығ килгенінде, чазых тіріл парған. ¹⁰ Мин, тізең, ӧл парғам. Іди чуртас пирҷең чахығ сӧзі мағаа ӧлім ағылған. ¹¹ Чазых, чахығнаң тузаланып, мині алаахтыр салып, ӧлімге ағыл салған. ¹² Чахығ ызых# ниме, чахығ сӧзі дее ызых, орта паза чахсы ниме полча. ¹³ Андағ полза, чахсы ниме мині ӧлімге ағылча ба? Чох, андағ нимес. Сынында чазых, чахсы нименең тузаланып, мині ӧлімге ағылған. Ол оңдайнаң чахығның сылтаанда чазыхтың улам чабал полчатханы азылған.

Хуттың паза ит-ханның кӱрескені

¹⁴ Чахығ Хуттаң пирілчеткенін піс пілчебіс. Мин, тізең, ит-ханнығбын, чазыхха садыл парғам. ¹⁵ Ниме итчеткенімні оңарбинчам нооза. Идерге хынған нимені итпинчем, позым хырт кӧрінчеткен нимені, тізең, итчем. ¹⁶ Хынминчатхан нимені итчетсем, чахығ чахсы тіп, чӧпке кірчем. ¹⁷ Ол оңдайнаң мин нимес, минде чуртапчатхан чазых анзын итче. ¹⁸ Минде, иді-ханымда, чахсы ниме чоғын пілчем: чахсы ниме идерім килче, че ит полбинчам. ¹⁹ Чахсы ниме идерге хынып, мин аны итпинчем, чабал ниме идерге хынмазам даа, итчем нооза. ²⁰ Хынмаан нимені итчеткенде, андағда мин нимес, минде чуртапчатхан чазых аны итче.

²¹ Піди сизінгенімде, оңдайым мындағ: чахсы идерге сағынзам, мин позымның чабалымны кӧрчем. ²² Істімде мин Худай Чахиина чӧпсінчем. ²³ Че ит-ханымның чардыхтарында пасха чахығ кӧрчем. Ол, минің сағызымның чахиина тоғырланып, ит-ханымдағы чазыхтың чахиинаң тузахтап салча. ²⁴ Хайран кізібін! Пу ӧлімніг ит-ханымнаң кем мині позыдыбысчаң полҷаң? ²⁵ Алғас ползын Худайға, Ол анзын Иисус Христостың, Хан-пигібістің пастыра ит салған. Ол оңдайнаң мин сағызымнаң Худай Чахиина нымысчы полчам, ит-ханымнаң, тізең, чазыхтың чахиина нымысчы полчам.

Худай Худында чуртааны

¹ Ол оңдайнаң пӱӱн Христос Иисуснаң ит-ханның оңдайынҷа нимес, Хуттың хоостыра чуртапчатханнар чарғылатпастар. ² Христос Иисустың пастыра чуртасты пирчеткен Худай Худының чахии мині чазыхтың паза ӧлімнің ӱлгӱзінең позытхан. ³ Моисей Чахии# анзын ит полбаан. Ит-ханыбыс аның кӱзін сығарыбысхан. Аннаңар Худай Позының Оолғын, чазыхтығ ит-ханнығ кізее омалап салып, ысхан. Худай Аны чазыхтың ӱчӱн толығ ит салған. Іди Худай ит-ханның оңдайынҷа иткен чазыхты чарғылап салған. ⁴ Худай анзын пісте, ит-ханның оңдайынҷа нимес, Хуттың хоостыра чуртапчатханнарда, чахығ киректепчеткен ниме толзын тіп, іди иткен. ⁵ Ит-ханның оңдайынҷа полчатханнарның сағыстары ит-ханның хынығыстарын толдырарына айлан парча. Худай Худы хоостыра полчатханнар, тізең, Худай Худының кӧңнінҷе чуртирға сағынчалар нооза. ⁶ Пос кӧңнінҷе полғаны кізіні ӧлімге ағылча. Худай Худы хоостыра полғаны, тізең, чуртасха паза амыр хоныхха ағылча. ⁷ Кізінің пос кӧңнінҷе полғаны Худайға тоғыр. Аның ӱчӱн кізі Худай Чахииның ӱлгӱзіне кірбинче, сынында кір полбиндаача. ⁸ Ит-ханның оңдайынҷа чуртапчатхан кізілер Худайның кӧңніне кір полбастар.

⁹ Худай Худы сыннаң сірерде чуртапчатса, сірер, ит-ханның оңдайынҷа нимес, Худай Худының хоостыра чуртапчазар. Кемде Христостың Худы чоғыл, тізең, ол Христости нимес. ¹⁰ Сірерде Христос пар полза, ит-ханыңар чазыхтығдаңар ӧліг дее полза, че Хут ахтаныстың сылтаанда тіріг. ¹¹ Иисусты ӧліглердең Тірілдірібіскеннің Худы сірерде чуртапча. Андағ полза, Христосты ӧліглердең Тірілдірібіскені сірерде чуртапчатхан Позының Худынаң ӧлҷең иді-ханыңарны тірілдірібӧгізер.

¹² Аннаңар, харындастар, піс ит-ханға алымнығ нимеспіс. Ит-ханның оңдайынҷа чуртирға кирек чохпыс. ¹³ Сірер ит-ханның оңдайынҷа полчатсар, ӧл парарзар. Ит-ханның хынығыстарын Худай Худынаң пазынып алзар, чуртирзар. ¹⁴ Худай Худынаң устанчатхан кізілер прайлары Худайның палалары полчалар. ¹⁵ Хул итчеткен паза хорығып ала чуртатчатхан хутты сірер албаазар. Сірерні Худай палалары итчеткен Худай Худын алғазар. Пу Хуттың пастыра піс хығырчабыс: Авва+ 8:15 Арамей тілінең «Авва» теені Пабам полча. Пабам! ¹⁶ Худай Худы пістің худыбыснаң хада піс Худайның палалары полчатханыбысты киречілепче. ¹⁷ Худайның палалары полчатханыбыста, Христоснаң тиңе Аннаң ӱлӱсті алҷаң кізілер полчабыс. Христостың ирееленістерін ӱлескенібісте, сабланызын даа ӱлезербіс.

Чағдапчатхан сабланыс

¹⁸ Пістің пӱӱнгі ирееленістерібіс піске килер сабланыстың хыринда пір дее нимее турбинчалар тіп санапчам. ¹⁹ Прай чайалған ниме Худай палалары кем полчатханын азыларын чидікпин сағыпча нооза. ²⁰ Прай чайалған ниме, позының нимес, Худайның кӧңнінҷе тик чуртастың ӱлгӱзінде чӧрче. Чайалған нименің, чызирдаң позып алып, Худайның палаларының пос чуртазын паза сабланызын аларларына ізеніс пар. ²² Піс пілчебіс, прай чайалған нимелер пу тусха теере, ӧстезіп ала, чобалчалар. ²³ Олар ла нимес, піс тее, Хуттаң тун-сый алған кізілер, пос алынҷа чобал чӧрчебіс. Худайның палалары поларыбысты паза ит-ханыбыс чазыхтаң позирын сахтапчабыс. ²⁴ Хаҷан піс ізенчебіс, піс арачыланып алчабыс нооза. Харахха кӧрінчеткен нимее ізенчетсең, ол ізеніс нимес. Кӧрчетсең, ноға ізенерге кирек. ²⁵ Кӧрінминчеткен нимее ізенчетсебіс, андада тыстанып ала сағыпчабыс.

²⁶ Олох оңдайнаң чазығ позыбысха Хут полысча. Піс хайди пазырарын паза хайди сурынарға кирегін пілбинчебіс нооза. Хут, чоохтанмин даа, улуғ тынғанынаң на пістің ӱчӱн сурынча. ²⁷ Чӱректерні сынапчатхан Худай, тізең, Хуттың сағызын пілче: Хут Худайның кӧңні хоостыра ах-арығларның ӱчӱн сурынча нооза. ²⁸ Піс, тізең, пілчебіс, Худайға хынчатханнарға паза Аның кӧңні хоостыра хығыртылғаннарға прай ниме чахсаа иділче. ²⁹ Худай пурун піл салған кізілерге, Позының Оолғы кӧп харындастарының аразында тун палазы ползын тіп, Позының Оолғына тӧӧй поларға турғыс салған. ³⁰ Кемні турғыс салған, тізең, оларныох хығыртхан. Кемні хығыртхан, оларныох ахтаан. Кемні ахтаан, тізең, оларныох саблаан.

Худайның хынызы Иисус Христоста

³¹ Мыннаң хоостыра паза ниме тир? Худай пістің ӱчӱн полчатханда, кем пістең тоғыр полар? ³² Ол Позының Оолғына айабаан, пістің прайзыбыстың ӱчӱн пир салған. Аннаң хада піске прай нимені сыйлап пирбес пе? ³³ Худай таллааннарны кем пыролир? Худай оларны ахтапча. ³⁴ Кем чарғылир? Пірдеезі. Христос Иисус ӧл парған, че тіріл парған. Ол Худайның оң саринда одырча паза пістің алныбысты алча. ³⁵ Кем пісті Худайның хынызынаң чар полар: ирееленістер алай сидіксіністер, алай сӱрдіртчеткенібіс, алай ӧзӧгіс, алай чох чуртас, алай хорғыс, алай хылыс па? ³⁶ Піди пазылых: Синнең ӱчӱн піс кӱннің сай ӧлім кӧрчебіс, пісті тайыға# салҷаң хойларға санапчалар.

³⁷ Прай пу нимені піске хынчатхан Худайның сылтаанда чиңіп алчабыс. ³⁸ Ікінҷілебинчем, ӧлім дее, чуртас таа, ангеллер# дее, пастыхтар даа, амғызы даа, соңархызы даа, хайдағ даа кӱстер, ³⁹ пӧзии, тирии пісті Худайның хынызынаң чар полбастар. Пір дее чайалған ниме Иисус Христос Хан-пигібістің пастыра пирілчеткен Худайның хынызынаң пісті чар полбас.

Худай паза Аның чоны

¹ Христоснаң пір полып, мин сынны чоохтапчам, чойланминчам. Мағаа Худай Худы чарытхан чӱреем киречілепче. ² Улуғ чобағ паза тохтабинчатхан ағырығ минің чӱреемде. ³ Харындастарымның ӱчӱн позым даа Христостаң хыйа итірерге тимдебін. Олар минің туғаннарым, пір чон тӧлі, ⁴ Израиль чоны полчалар. Оларны Худай Позына пала идінер ӱчӱн таллап алған, оларға Позының сабланызын асхан. Худай оларнаң молҷас салған, оларға Чахығ пирген, оларға Худайға пазырарын пирген паза оларға сӧс пирген. ⁵ Илбек ӧбекелер оларның пабалары полчалар. Иді-ханы хоостыра Христос таа оларның тӧлі полып тӧреен. Ол хаҷанға даа прай нименің алғыстығ Худайы полча. Аминь.

⁶ Че мин Худайның пирген сӧзі кӱзін чідір салған тібинчем. Израильдең сыхханнары прайзы ла израиль чоны ниместер нооза. ⁷ Ідӧк Авраамнаң тӧрееннері дее прайзы аның тӧлі нимезӧк. Че піди чоохталча: Исаактаң тӧреені синің тӧлің адалар. ⁸ Пасха сӧстернең чоохтаза, кізідең тӧрееннері нимес, молҷағ сӧзі хоостыра тӧрееннері Авраамның тӧлі тіп саналчалар. ⁹ Молҷағ сӧзі мындағ: пазағы чылда пуох туста килербін – Сарраның оол пала полар.

¹⁰ Анзы ла полбаан. Ревекканаң даа ідӧк полған. Ол пабабыс Исаактаң ікі палазынаң аар чӧрчеткен. ¹¹ Палалар тӧреелекке дее, чахсы даа, чабал даа ниме иткелектерінде, ағаа чоохталған: «Улии кічиинің хулы полар». Іди Худай Позының пӧгіні Позы таллаанынаң толдырылчатханын кӧзіткен. Ол кізінің киректеріне кӧрбин, Позы хығыртхан кізіні таллидыр. ¹³ Піди пазылых: Иаковха# мин хын парғам, Исавха, тізең, хырт кӧр сыххам. ¹⁴ Ол оңдайнаң ниме тирбіс? Худай саба итче бе? Чох, андағ нимес. ¹⁵ Ол Моисейге піди тіпче нооза: Ӧлҷей пирерге итсем, ӧлҷей пирербін. Айирға итсем, айирбын. ¹⁶ Ол оңдайнаң прай ниме кізінің кӧңнінең нимес, аның кӱстенгенінең нимес, че ӧлҷей пирчеткен Худайның кӧңнінең полча. ¹⁷ Худай Позының Пічиинде фараонға тіпче нооза: Мин сағаа Позымның кӱзімні кӧзідерімнің паза Минің Адым прай чир ӱстӱне сабланарының ӱчӱн сині турғыс салғам. ¹⁸ Ол оңдайнаң Худай, хынза, кізее ӧлҷей пирче, хынмаза, тізең, аны ӧчес ит салча.

Худайның ӧкпезі паза Худайның паарсазы

¹⁹ Син, хынза, мағаа тирзің: «Нименің ӱчӱн Ол пыролапча? Кем Аның кӧңніне тоғырлан полар?» ²⁰ Кемзің син, кізі, Худайға удурлазарға? Устың холы иткен ниме «Ноға син мині мындағ иткезің?» тіп полар ба? ²¹ Той-палғас ус кізінің холында нимес пе? Ус кізі аалҷыларға даа, иб аразында даа тудынҷаң ідістерні пір тойдаң ит полча нимес пе?

²² Худай Позының ӧкпезін читірерге паза Позының кӱзін кӧзідерге хынған. Аның ӧкпезін туттырған паза ӧлімге турыстығ кізілерні айап, Ол ӱр сыдасхан. ²³ Олох туста Худай ӧлҷей пирген кізілеріне Позының пай сабланызын кӧзідерге хынған. Худай оларны сабланысха тимнеп салған полған. ²⁴ Ол хығыртхан кізілер піспіс: Иудейлер ле нимес, пасха даа чоннар. ²⁵ Анзынаңар Ол ідӧк Осий ухаанҷының киндезінде чоохтапча: «Минің чоным нимес чонны Минің чоным тіп адап саларбын. Хынғаным полбаанын хынғаным тіп адап саларбын». ²⁶ Пірсінде оларға «Сірер минің чоным нимессер» тіп чоохталған. Сах олох орында олар «Тіріг Худайның ооллары» адал парарлар. ²⁷ Исаий, тізең, Израильдеңер чарлапча: Израиль ооллары талайдағы хум осхас кӧп ползалар даа, артхан-халғаны ла арачыланып алар. ²⁸ Хан Худай чир-чалбахта Позының сӧзін тідімніг паза табырах толдыр салар нооза. ²⁹ Исаий дее Израильдеңер ідӧк чарлаан: Прайзынаң кӱстіг Хан Худай артхан-халған чонын халдырбаан полза, піснең, Содом саарнаң полған чіли, Гоморра саарнаң полғанға тӧӧй пол парарҷых.

³⁰ Ол оңдайнаң ниме тирбіс? Ахтаныс тілебеен Худайы чох кізілер киртіністің пастыра ахтаныс алып алғаннар. ³¹ Ахтапчатхан чахыға харасхан Израиль чоны, тізең, ол чахыға чит полбаан. ³² Ноға? Киртіністе нимес, чахығның киректерінде аны тілееннерінеңер. Олар харылҷаң тасха харыл парғаннар. ³³ Пазылғаны хоостыра: мына Сионда харылҷаң тас паза аңдарылҷаң тас салчам. Че киртінчеткен кізі Аннаң ӱчӱн уйатха кірбес.

Павелнің Израильнің ӱчӱн пазырғаны

¹ Харындастар! Мин, Израиль чоны арачыланып алзын тіп, тың хынчам паза анзынаңар Худайға алданчам. ² Мин оларға киречілепчем: олар Худайның кӧңніне кірерге тың кӱстенчелер, че хайди аны идерін пілбинчелер. ³ Худайның хайди ахтапчатханын пілбин, олар постары ахтанып аларға харасчалар. Аның ӱчӱн олар постарын ахтапчатхан Худайның холына пирбееннер. ⁴ Христос, тізең, Чахығның толдырылғаны полча. Ағаа киртінчеткен полған на кізіні Худай ахтапча.

Полғаны ла арачылан полар

⁵ Моисей Чахығ пастыра ахтапчатханынаңар пасча: Чахығны толдырчатхан кізі тіріг чӧрер. ⁶ Киртіністің хоостыра ахтааны, тізең, піди тіпче: Христосты тӱзіріп аларға иткен чіли «Кем тигірзер ӧӧрлир?» тібе. ⁷ Христосты ӧліглердең кӧдіріп аларға иткен чіли «Тӱбі чох чирзер кем тӱзер?» дее тібе. ⁸ Ниме тіпче Худай Пічии? «Сӧс сағаа чағын, ол синің аазыңда, синің чӱрееңде». Пу піс ӱгретчеткен киртіністеңер сӧс полча. ⁹ Син аазыңнаң Иисус Хан-пиг полчатханын чарлапчатсаң, чӱрееңнең Худай Аны ӧлігдең тірілдірібіскенге киртінчетсең, арачыланып аларзың. ¹⁰ Чӱрекнең киртінгені ахтаныс пирче, аастаң чарлааны арачыланыс пирче. ¹¹ Худай Пічии киртінчеткен кізі Аннаң ӱчӱн уйатха кірбес тіп чоохтапча нооза. ¹² Иудей бе, иудей нимес пе, пасхазы чоғыл. Хан Худай прайзының пір. Аны хығырчатханнарға прайзына Ол Позының пайын пирче. ¹³ Хан Худайның адын хығыртхан ноо даа кізі арачыланып алар.

¹⁴ Ағаа киртінмееннерінде, Аны хайди хығырарлар? Аннаңар испееннерінде, Ағаа хайди киртінерлер? Ӱгретчеткен кізі чох хайдаң истіп аларлар? ¹⁵ Ӱгредерге ызылбаан кізі хайди ӱгредіп алар? Піди пазылых: Чахсы Хабарны чарлапчатханнарның килгені хайдағ маңаттыр. ¹⁶ Че Чахсы Хабарны прайзы ла тыңнабаан. Исаий тіпче: Хан Худай! Пістең искен нимее кем киртінді? ¹⁷ Ол оңдайнаң киртініс Чахсы Хабарны искеннең килче. Чахсы Хабар, тізең, Худайдаң сӧстең пастыра искірілче. ¹⁸ Че мин сурчам: олар испееннер бе? Чох, искеннер. Прай чир-чалбахха хабар истілген, тилекейнің хыри-пазына сӧстер тарааннар. ¹⁹ Пазох сурчам: Израиль пілбеен ме? Чох, пілген. Алындох Худай сӧстерінең Моисей теен: пасха чонның пастыра чӱректеріңе кӱннес кирербін, оңарбас чонның пастыра сірерні хыпчыхтандырарбын. ²⁰ Исаий, тізең, тідімніг чоохтапча: «Мині тілебееннері мині тапханнар. Миннеңер сурбааннарға азыл пардым». ²¹ Израильдеңер, тізең, тіпче: кӱн тооза мин чоох испес паза ӧчес чонзар хуҷаам асхам.

Израильге Худайның паарсазы

¹ Ол оңдайнаң мин сурчам: нӧӧс Худай Позының чонын хыйа идібіскен? Чох, андағ нимес. Мин дее Израиль чонынаңмын, Авраамның тӧлінеңмін, Вениаминнің уйазынаңмын. ² Худай Позының азынада пілген чонын хыйа сӱрбеен. Алай Худай Пічиинде Илия ухаанҷыдаңар ниме пазыл парғанын пілбинчезер бе? Илия Израиль чонын Худайға піди хоптаан: ³ «Хан Худай! Ухаанҷыларыңны ӧдір салғаннар, тайығ салҷаң орыннарыңны сайбап салғаннар. Чалғыс мин не халдым, минің тынымны аларға мині тілепчелер». ⁴ Худайның нандырии ағаа ниме чоохтапча? «Мин Позыма Ваалның алнында тізекке тӱспеен читі муң кізіні халғызып алғам». ⁵ Сағамғы туста даа Худайның паарсазы хоостыра таллалған чоны арт халған. ⁶ Худайның паарсазы хоостыра таллалған ползалар, іди таллааны киректер хоостыра таллааны полбас. Киректер хоостыра таллаза, анзы паарсас полбас.

⁷ Андағда нимедір зе? Израиль тілепчеткен нимезіне чит полбаан. Таллалғаннары ла анзына чидіп алғаннар. Пасхаларының, тізең, чӱректері хатхлап парғаннар. ⁸ Піди пазылых: Худай оларны уйғаа пастыр салған, пу кӱнге теере харахтарын кӧрбес, хулахтарын испес ит салған. ⁹ Давид тее тіпче: оларны тосхырчатхан ниме постарына тузах ползын, хахпан ползын, оларны харылдырзын, иткеннерінеңӧк нандырзын. ¹⁰ Харахтарына кӧрбес иде харасхы тӱс парзын, арғалары хаҷан даа пӱгӱр чӧрзіннер.

¹¹ Ол оңдайнаң мин сурчам: олар саңай аңдарыл парыбызарға тіп, харыл парды полҷаңнар ба? Чох, андағ нимес. Че олар аңдарыл парғаннарында, арачыланыс пасха чонға килген. Анзы Израильні кӱннеттіртер ӱчӱн иділген. ¹² Оларның аңдарылғаны тилекейні пайыт салған, уттырғаны пасха чоннарны пайыт салған. Андағ полза, прай Израиль Худайға айланза, улам артых полар.

Пасха чоннарның арачыланызы

¹³ Сірерге, Худайы чох кізілерге, тізең, чоохтапчам: мин, пасха чоннарзар ызылған илҷі, позымның тоғызымны саблапчам. ¹⁴ Арса, пір сӧӧк кізілерімнің чӱректерін кӱннеттіртіп, піреезін іди арачылап алҷаңмын ма? ¹⁵ Худайның олардаң хыйа айланыбысханы Аның пасха чонға чарастырығ пиргені полған нооза. Худай иудейлерні Позынзар хатап алза, тізең, ниме полар? Анзы ӧліглерні тірілдіргені паза чуртас пиргені полар. ¹⁶ Халастың пастағы кизегі Худайға чарыдылчатса, прай даа халас ах-арығ пол парча. Ағастың чилегезі ах-арығ полза, салаалары даа ызых полчатпастар ба.

¹⁷ Олива ағастың пірее салаалары сынғлап парып, оларның орнына синің, чазы оливазының салаазы ӧскіріл парза, пір тамырлығ пол парчазар. Ол чахсы ағастаң кӱс тартынчазың. ¹⁸ Салааларының алнында махтанма. Махтанҷаң нимең пар ба? Син тамырларны тутпинчазың. Олар сині тутчалар.

¹⁹ Син, арса, тирзің: «Мині ӧскір салар ӱчӱн, пу салаалар сындырыл парғаннар». ²⁰ Чахсы. Олар киртіністері чох полғаннаңар сындырылғаннар. Син, тізең, киртінчеткеніңнің ӱчӱн ӧсчезің. Син кӧкеесімненме, хорығып одыр. ²¹ Худай ағастың позының салааларын айабаанда, сині дее айабазох.

²² Худайның паарсах таа, хатығ даа хылынчатханын сизініп одыр: Позынаң хыйа полыбысханнарға хатығ хылынча, Худайның паарсазында чӧрерге кӱстенчетсең, паарсах полар. Андағ полбаза, син дее кизіл парарзың. ²³ Тігілер дее, киртініс чох чуртабазалар, хатап чапсыра ӧскіріл парарлар. Худайның хатап чапсыра ӧскір салар кӱзі пар нооза. ²⁴ Син, чазы олива ағазынаң кизіл парып, чир салылған оңдайына тоғыр полып, чахсы олива ағазына чапсыра ӧскіріл парғазың. Чахсы ағастың кизілген салаалары, тізең, постарының ағастарына улам артых чапсыра ӧс парчатпастар ба.

Худайның прай кізілерге паарсапчатханы

²⁵ Сірерге, харындастар, пір чазытты ас пирерге сағынчам. Постарыңнаңар улуғ сағынмаңар. Израиль чонының хай піреелері ӧчес оңдайларына пастыр салғаннар. Анзы саңайға нимес, че пасха чонның толдыра саны Худайға килер тусха ла теере. ²⁶ Іди прай Израиль арачыланып алар. Піди пазылых: «Сионнаң Осхырығҷы киліп, Иаковтың Худайны улуғлабинчатханын хыйа тастир». ²⁷ «Пу Минің оларнаң Молҷаам полар. Мин оларны чазыхтарынаң позыдыбызарбын». ²⁸ Чахсы Хабар сірерзер килер ӱчӱн, олар Чахсы Хабарға ыырҷылар чіли хайчалар. Итсе, иудейлер Худайның таллаан чоны полчалар, паза ӧбекелерінің ӱчӱн Худай оларға хынча. ²⁹ Худай сыйыхтарын нандыра албинча паза таллаанынаң тӧдірленминче. ³⁰ Сірер дее тузында Худайның чооғын испеен полғазар. Амды, тізең, оларның чоох испееннерінің ӱчӱн, Худай сірерні айап пирген. ³¹ Худай сірерні айир ӱчӱн, олар амды чоох испес пол парғаннар. Арса, оларға даа Худай ӧлҷей пирер. ³² Худай айиры ӱчӱн, прайзын чоох испес ит салған.

Худайны саблааны

³³ Худайның хыйғазы паза пілізі хайдағ илбектір! Аның пӧгіннерін пілҷее чоғыл, Аның чолын чолласчаа чоғыл. ³⁴ Худайның сағызын кем піліп алған? Кем Ағаа чӧп пирген? ³⁵ Алай піреезі Худайға, алымны айландырзын тіп, алымға пірее ниме пирген ме? ³⁶ Прай ниме Аннаң полча, прай ниме Аннаң пастыра паза Ағаа полча. Ағаа хаҷанға даа сабланыс ползын. Аминь.

¹ Аннаңар, харындастар, Худай сірерні айаанның ӱчӱн, сірерге алданчам, постарыңны Худайға пир салыңар. Худайның кӧңніне чарас тіріг, ах-арығ тайығ иткені ползын ол. Анзы Худайға орта пазырғаны полар. ² Пу тилекейнің оңдайынҷа чуртабаңар, че сағыс-кӧгістеріңні нааҷылап, постарыңны алыстырыңар. Андада сірер Худайның кӧңні хайдағ полчатханын сынап аларзар: ниме Ағаа чахсы, чаразых паза кӧңніне толдыра.

³ Мағаа Худайдаң пирілген паарсазының хоостыра сірерге прайларыңа чоохтапчам: улуғсырхабаңар, постарыңнаңар синінең азыра улуғ сағынмаңар. Пазымнығ, Худай синеп пирген киртіністеріңнің хоостыра сағыныңар. ⁴ Пістің иді-ханыбыс кӧп сӧӧк-чӱлліг, че олар прайзы пір тӧӧй тоғынминчалар. ⁵ Піс тее кӧппіс, че Христоста пір ит-ханнығбыс. Полғанын на пос алынҷа алза, тізең, ол пасхаларына ит-ханның пір чардығы ла осхас. ⁶ Худайның пирген паарсазы сылтаанда піс полғаныбыс ла Аннаң аймах сыйыхтар алғабыс. Ухаанҷылиры пирілген полза, киртінізіңнің хоостыра ухаанҷыла. ⁷ Пасхаларының нымызына чӧрері пирілген полза, аны толдыр. Ӱгретчі полары пирілген полза, ӱгрет. ⁸ Часхарары пирілген полза, часхар. Ӱлезері пирілген полза, азых кӧңніңнең ӱлес. Устиры пирілген полза, анзын харазып ит. Чахсы идері пирілген полза, чалахай кӧңніліг итчет.

⁹ Хыныс чойырхос полбазын. Чабалны хырт кӧріңер. Чахсы нимее тартылыңар. ¹⁰ Удур-тӧдір паарсазып, харындастар чіли, хынызыңар. Улуғлазарында пірсі пірсінең пуруннирға кӱстеніңер. ¹¹ Піди харазып, пос салынмаңар. Кӧңніңер чалбыразын, Хан-пигнің нымызын толдырчадыңар. ¹² Ізеніс парда, ӧріністіг полыңар, чобағда тыстаныстығ полыңар, сыбыра пазырчадыңар. ¹³ Ах-арығларның піреезі хызылчатса, оларнаң ӱлесчедіңер, аалҷы кӧреечі полыңар.

¹⁴ Сірерні сӱрчеткен кізілерні алғаңар. Харғабаңар, че алғапчадыңар. ¹⁵ Ӧрінчеткеннернең хада ӧрініңер. Ылғапчатханнарнаң хада ылғаңар. ¹⁶ Удур-тӧдір пір тиң сағыссыразыңар. Улуғсырхабаңар, пазымнығларның чолынҷа пазыңар. Постарыңнаңар ла сағынмаңар.

¹⁷ Чабалға чабалнаң нандырбаңар. Прай кізілернің аразында чахсы идерге кӱстеніңер. ¹⁸ Оңдайларың пар полза, прай кізілернең амыр чуртирға кӱстеніңер. ¹⁹ Хынғаннарым, постарыңның ӱчӱн ӧс албаңар. Худайның ӧкпеленізі анзын итсін. Пазылых нооза: Мин ӧс аларбын, Мин тӧлирбін, – тіпче Хан Худай. ²⁰ Ол оңдайнаң, ыырҷың астапчатхан полза, азырап сал аны, сухсапчатхан полза, суғар сал аны: іди идіп, син аның пазына кӧйчеткен кӧстерні чыып пирерзің. ²¹ Чабалға пастыртпа, чабалны чахсынаң чиңіп алчат.

Ӱлгӱ холында чӧрердеңер

¹ Ноо даа кізі позын ӧӧркі ӱлгӱлерге пазындыртча. Худайдаң пирілген ӱлгӱдең пасха ӱлгӱ чоғыл нооза. Нинҷе пар прай ӱлгӱні Худай турғыс салған. ² Аннаңар ӱлгее тоғырланчатхан кізі Худай турғысхан нимее тоғырланча. Тоғырланчатхан кізі, тізең, позы позын чарғаа тартча. ³ Чахсы киректер нимес, хомай киректер итчеткен кізілер устағҷылардаң хорыхчалар. Ӱлгӱдең хорыхпасха хынчазың ма? Чахсы ниме ит, ӱлгее махтадарзың. ⁴ Пастых, Худайның нымысчызы полып, сағаа чахсы идерге турғызылған. Чабал ниме итчетсең, хорых, ол хылысты тик чирдең ал чӧрбинче. Ол, Худайның нымысчызы полып, чабал ниме итчеткен кізілерні хатығлап, Худайның ӧкпеленізін читірче. ⁵ Аннаңар, Худайның ӧкпеленгенінең хорыхчатханнаңар нимес, че ах сағыстығ кізілер полып, пастыхтың чооғын истерге кирексер.

⁶ Аннаңар сірер албан-чаға тӧлепчезер. Устағҷылар, Худайның нымысчылары полып, постарының тоғыстарын сыбыра толдырчалар нооза. ⁷ Полған на кізее ағаа пирҷеен пир салчадыңар: хайзына албанны, хайзына албан-чағаны; хайзыларынаң хорығыңар, хайзын улуғлаңар.

Хыныс Чахығны толдырғаны полча

⁸ Удур-тӧдір хынысханнаң пасха паза пірдеезіне пір дее пасха алым чох ползын. Пасха кізее хынчатхан кізі чахығны толдыр салған нооза. ⁹ «Оралыс чӧрбе», «ӧдірбе», «оғырлаба», «чой киречілебе», «пасха кізінин хараспа» теені паза пасха даа чахығлар пір ле нимені таныхтапчалар: «чағыныңа позыңа чіли хын». ¹⁰ Чағыныңа хынчатсаң, ағаа чабал ниме итпессің. Аннаңар кізее хынғаны чахығны толдырғаны полча.

¹¹ Іди чуртаңар. Амғы тусты пілчезер нооза: усхунар тус чит килді. Піс киртініп пастаан тустың хыринда пӱӱн пістің арачыланызыбыс улам тың чағыннап килді. ¹² Хараазы ирт парды, кӱнӧрткізі чағдап килді. Че, харасхының киректерін суур тастабызыңар, чарыхтың тиріглерін позыбысха кизіп алааңар. ¹³ Кӱн чариинда чіли иптіг чуртаалар: кӱлет саппин, араға іспин, хыҷыхха, сайбахха салынмин, тартыспин, істі чохтаныспин. ¹⁴ Хан-пигібіс Иисус Христос Позы сірерге хуйах ползын. Иді-ханыңардаңар сағыссырасты хыҷыхтаныстарға айландырбаңар.

Харындазыңны чарғылаба

¹ Киртіністе пик нимес кізілерні постарыңа хозыңар. Че оларның сағыстары хоостыра таласпаңар. ² Піреезі, прай нимені чирге чарир тіп, киртінче. Киртін полбинчатханы, тізең, чир-тамаан на чіпче. ³ Прай ниме чіпчеткен кізі чібинчеткенні нимее салбин полбазын. Чібинчеткені, тізең, прай ниме чіпчеткен кізіні хомайлабазын: Худай аны Позына алған нооза. ⁴ Пасха кізінің хулын хомайлирға кем пол партырзың син? Позының Хан-пигі алнында ол, турза, турар, аңдарылза, аңдарылар. Че кӧдіріл парар. Худай аны кӧдір полар.

⁵ Пірее кізі ноо-да кӱнні пасхазынаң улуға санапча. Пасха кізі, тізең, прай кӱннер пір тиңнер тіп санапча. Полғаны ла позының сағызы хоостыра итсін. ⁶ Кӱннернің улиин-кічиин талластырчатхан кізі анзын Хан-пигні улуғлап итче. Прай кӱннер пір тиң тіп санапчатхан кізі дее анзын Хан-пигеӧк итче. Чіпчеткен кізі Хан-пигні улуғлап чіпче, Худайны алғыстапча. Чібинчеткені дее Хан-пигні улуғлап чібинче паза Худайны алғыстапча. ⁷ Пірдеезі посха чуртабинча, посха ӧлбинче нооза. ⁸ Піс чуртапчатхан ползабыс, Хан-пиге чуртапчабыс, ӧл парчатсабыс, Хан-пиге ӧл парчабыс. Ол оңдайнаң чуртапчатсабыс таа, ӧл парчатсабыс таа, піс Хан-пигнибіс. ⁹ Христос ӧліглернің паза тіріглернің Хан-пигі поларға тіп ӧлген паза тірілген нооза.

¹⁰ Син, тізең, ноға харындазыңны хомайлапчазың? Алай ноға харындазыңны нимее салбинчазың? Піс прайзыбыс Христостың чарғызында турарбыс нооза. ¹¹ Пазылых: Мин чуртапчам, тіпче Хан Худай, Минің алнымда ноо даа тізек ээлер, ноо даа тіл Худайны саблир. ¹² Ол оңдайнаң полғаныбыс ла Худайның алнында нандырығ тударбыс.

Харындазыңны харылдырба

¹³ Аннаңар удур-тӧдір хомайласпаңар. Улам харындастың чолына харылҷаң ниме салбастаңар, аны сӱрнӱктірбестеңер сағыныңар. ¹⁴ Мин пілчем, пір дее ниме пос позы кірліг полбинча нооза. Хан-пигібіс Иисус мині анзына киртіндір салған. Піреезі ноо-да нимені арығ нимеске санапчатса, ол ағаа арығ нимес. ¹⁵ Синің чіпчеткен чиизіңе харындазыңның кӧңні ардапчатса, син хыныс хоостыра итпинчезің. Чиистің ӱчӱн харындазыңны чох итпе. Христос ол кізінің ӱчӱн ӧл парған. ¹⁶ Сірер чахсаа санапчатхан ниме хомайлалбазын. ¹⁷ Худайның хан-ӱлгӱзі# ас-суғ нимес нооза. Че ол ах сағыс, амыр чуртас паза Худай Худынаң пирілген ӧрініс. ¹⁸ Іди чуртапчатхан Христостың нымысчызын Худай кӧңніне кирче, ол чонға махтатча.

¹⁹ Ол оңдайнаң амыр чуртирыбыс ӱчӱн прай ниме идееңер паза удур-тӧдір полызызарға харазааңар. ²⁰ Чиистің ӱчӱн Худайның киректерін сайбаба. Прай ниме арығ. Че ікі сағыстанып чіпчеткен кізее хомай. ²¹ Ит чібеені, араға іспеені паза харындазыңны харылдырчатхан, алай изі чохтандырчатхан, алай чазығ итчеткен нимені итпеені артых полар. ²² Синің киртінізің пар ба? Худайның алнында ол позыңда пар ползын. Сынында орта тіп санапчатхан нименің ӱчӱн позын пыролабинчатхан кізі часкалығ. ²³ Ікінҷілеп ала чіпчетсе, киртініс хоостыра итпинчеткенінеңер, аны Худай чарғылапча. Киртініс хоостыра иділбинчеткен ноо даа ниме чазых полча. ²⁴ Худайға сабланыс ползын! Мин сірерге чарлаан Чахсы Хабарның пастыра Ол киртіністеріңні пик ит салар. Пу Иисус Христостаңар ӱгредіг. Аны піске Худай ас пирген. Ол чӱзерлеп чыллар азылбаан чазыт полған. ²⁵ Амды, тізең, ухаанҷыларның пічіктерінде пу чазыт азыл парған. Прай чоннар, Худайға киртініп, Аның холына кірерлері ӱчӱн, Мӧгі Худай Чахсы Хабарны оларға чарлирға чахаан. ²⁶ Чалғыс паза Хыйға Худайыбысха Иисус Христостың пастыра хаҷанға даа сабланыс ползын.

Христостың оңдайынҷа полааңар

¹ Піс, кӱстіглер, пос кӧңнінҷе полбин, чазығ кізілернің аарсаанын артынарға кирекпіс. ² Полғаныбыс ла чағыныбыстың кӧңнінҷе поларға кирекпіс. Киртіністерің пик полар ӱчӱн, ағаа чахсы идерге кирекпіс. ³ Христос таа позының кӧңнін чӧпсіндірбеен. Пазылых нооза: Сині сӧклепчеткеннернің сӧклестері мағаа тӱстілер. ⁴ Алында пазылған ниме пісті ӱгреде пазылған. Худай Пічии пирчеткен тыстаныс паза часхарыс пастыра ізеніс аларыбыс ӱчӱн пазылған анзы. ⁵ Тыстаныс паза часхарыс пирчеткен Худай, тізең, сірерге Христос Иисустың оңдайынҷа пір сағыстығ поларын пирзін. ⁶ Анзы сірер прайларың пір ӱнге Худайны паза Хан-пигібіс Иисус Христостың Пабазын саблирларың ӱчӱн ползын. ⁷ Худайның сабланызын аларларыңның ӱчӱн, Христос сірерні Позына хосхан. Аннаңар сірер дее удур-тӧдір ідӧк чағынназыңар.

⁸ Мин мына ниме чоохтапчам. Иисус Христос сӱннет итірткеннерге нымысчы полыбысхан. Ол анзын Худайның сынын кӧзідерге тіп паза ӧбекелерге пирген молҷағның толары ӱчӱн иткен. ⁹ Ол ідӧк пасха чоннарға нымысчы полыбысхан. Ол, Худай ӧлҷей пиргеннеңер, чоннар Худайны сабландырзыннар тіп, анзын иткен. Піди пазылых: Мының ӱчӱн Сині пасха чоннарның аразында саблирбын паза Синің адың арнап ырлирбын. ¹⁰ Ағаа хоза піди пазылых: Худайы чох кізілер Аның чонынаң хада ӧрінзіннер. ¹¹ Паза хоза: прай чоннар, Хан Худайны махтаңар, прай тӧллер, Аны саблаңар! ¹² Ағаа хоза Исаий тіпче: чоннарнаң устир ӱчӱн Иессейнің тамыры, ӧтіп, кӧдіріл килер. Ағаа Худайы чох кізілер ізенерлер. ¹³ Ізеніс пирчеткен Худай, тізең, сірерні киртіністеріңнің пастыра пар-чох ӧрініснең паза амырнаң толдыр салзын. Худай Худының кӱзінең ізеністерің кӧптеліп одырзын.

Павел илҷінің тоғызы

¹⁴ Харындастарым! Мин сірернің чахсы нименең тол парғаннарыңны, сірерде ноо даа піліс парын паза удур-тӧдір ӱгредіс полчатханнарыңны пір дее ікінҷілебинчем. ¹⁵ Мин аны сірерге, харындастар, сағысха кирзіннер ле тіп, кӧмес пас салғам. Мин анзын Худайдаң пирілген паарсас хоостыра тідімніг пасхам. ¹⁶ Мағаа Худайы чохтарның аразында Христос Иисустың нымысчызы поларға Худайның паарсазы пирілген полған. Абыс# тоғызын толдырып, мин Чахсы Хабарны чарлапчам. Мин анзын, Худай Худы чарыт салған чоннар Худайға чарас толығ ползыннар тіп иткем. ¹⁷ Аннаңар мин Худайға Христос Иисустың пастыра иткен киректерімнең махтан поларбын. ¹⁸ Христос минің пастыра иткен нимедеңер ле тідімніг чоохтап поларбын. Ол пасха чоннарны сӧстің паза киректің пастыра Худайның чооғын истеріне ағылған. ¹⁹ Ол анзын танығларнаң паза хайхастарнаң#, Худай Худының кӱзінең иткен. Аннаңар мин Христостың Чахсы Хабарына Иерусалимнең Иллирикке читкенҷе ӱгрет парғам. ²⁰ Мин Христостың ады чарлалбаан чирде Чахсы Хабарға ӱгредерін орта кирекке санаам. Пасха кізі салған тӧстегде пӱдірерге хынмаам. ²¹ Піди пазылған: Аннаңар хабар албаан кізілер кӧрерлер, испеен кізілер оңнирлар.

Павел Римзер парарға пӧгінче

²² Мин сірерзер килерге иткем, че пу киректерімнің ӱчӱн кӧп хати тудыл парчатхам. ²³ Амды пу хан-чирлерде мин Христостаңар чарлабаан орын халбады. Мин, тізең, илееде чыллар сірерге чидерге сағынғам. ²⁴ Испан чирінзер чол сыхсам, сірерзер чидерге тіп сағынған полғам. Андар парирып, сірернең кӧрізіп, чоохтазып алғаныма кӧңнімні кӧмес тее тосхырған соонда, сірер мағаа чолымны аннаң андар узарадарға полыс пирерзер тіп ізенчем. ²⁵ Сағам, тізең, Иерусалимзер ах-арығларның нымызына чӧрерге парирбын. ²⁶ Македон паза Ахай чирлеріндегі Худай кізілері Иерусалимдегі ах-арығларның чох чуртапчатханнарына полызығ пирерге кӧңнілерін читіргеннер. ²⁷ Олар анзын пос кӧңнінең иткеннер. Итсе, идерге кирек полғаннар. Ол чон иудейлернең хада Худай Худының пайында араласханнарында, оларға постарының ис-сибінең ӱлес пирерге кирегӧктер. ²⁸ Ол оңдайнаң, мин пу тоғызымны идібіссем, паза оларға чыып пирген нимені холға прай киріп алғаннарын пос хараамнаң кӧріп алзам, Испан чирінзер сығыбызып, сірерзер чолами кірербін. ²⁹ Мин сірерзер килзем, Христостың Чахсы Хабарның алғазын толдыра синінең ағыларымны пілчем нооза.

³⁰ Харындастар! Хан-пигібіс Иисус Христостың паза Худай Худының хынызы ӱчӱн алданчам, минің кӱрезииме хозылыңар. Миннеңер Худайға пазырыңар: ³¹ Мині Иудей чирінде# киртінминчеткеннердең озып алзын паза Иерусалимде ах-арығларның нымызына чӧргенім килістіре ползын тіп, пазырыңар. ³² Худайның кӧңні хоостыра минің сірерзер ӧрініп ала килерім паза сірернең хада тынанып аларым ӱчӱн пазырыңар. ³³ Амырны пирчеткен Худай, тізең, сірернең прайзыңарнаң хада ползын. Аминь.

Алғыстастар

¹ Фива пиҷебіснең, Кенхрей саардағы тигірибнің# полысчызынаң, сірерні таныстырчам. ² Аны ах-арығларға турыстыра удурлаңар. Анзын Хан-пиге идіңер. Сірерде пірее ниме кирексінчетсе, хабас пиріңер. Ол даа кӧп кізее, мағаа позыма даа хабасчаң нооза.

³ Прискилланаң Акилаа изен читіріңер. Олар Христос Иисустың ӱчӱн миннең хада тоғынғаннар. ⁴ Олар, минің тынымны ал халар ӱчӱн, чуртастарына даа айабааннар. Оларға мин не нимес, пасха чоннарның прай тигіриблері алғыс читірчелер. ⁵ Оларның ибдегі тигірибіне ідӧк изен читіріңер. Минің хынған Епенедіме, Ахай чирінде Христосха пурун киртін сыххан кізіме, изен читіріңер. ⁶ Піске кӧп тоғынған Мариамға изен читір пиріңер. ⁷ Миннең хада харибде одырған туғаннарыма Андроникнең Юнийге изен читір пиріңер. Олар Христосха миннең пурун киртін парғаннар. Илҷілернің аразында оларны улуғлапчалар.

⁸ Хан-пигні ӱчӱн мин тың хын парған Амплийге изен читіріңер. ⁹ Христосха піснең хада тоғынчатхан Урбанға паза минің аарлығ Стахийіме изен читіріңер. ¹⁰ Христостың сын кізізі Апеллеске, Аристовулның прай ибдегілеріне изен читіріңер ¹¹ Минің туғаныма Иродионға изен читірчем. Наркисстің ибіндегі Хан-пигнің чонына изен ползын.

¹² Трифенге паза Трифосха, Хан-пиге прай кӱстерін салып, тоғынчатхан ипчілерге изен. Хан-пиге матап тоғынчатхан хынғаныма, Персидаа, изен читіріңерӧк. ¹³ Худай таллаан Руфха паза мағаа даа іҷе полған аның іҷезіне изен ысчам. ¹⁴ Асинкритке, Флегонтха, Ермийге, Патровха, Ермаға паза оларнаң хада полчатхан харындастарына изен ысчам. ¹⁵ Филологха, Юлийе, Нирейге паза аның пиҷезіне изен, Олимпанға паза аннаң хада полчатхан прай ах-арығларға изен. ¹⁶ Удур-тӧдір, ах-арығ хынызып, изеннесчедіңер. Прай тигіриблер сірерге изен читірчелер.

¹⁷ Харындастар! Тигіриблерні чарчатхан паза сірер ӱгренген ӱгредігдең чара тартчатхан кізілердең китеніңер, олардаң хыйа полыңар тіп алданчам. ¹⁸ Андағ кізілер, Хан-пигібіс Иисус Христостың нимес, хурсахтарының нымызында чӧрчелер. Олар киртінҷек кізілерні ирке, чойырхос сӧстернең алаахтыр салчалар. ¹⁹ Сірернің чоох исчеткеннеріңні прайзы пілче. Мин сірернің ӱчӱн ӧрінчем. Сірерні, чахсы кирекке хыйға, чабал ниме итпес ах-арығ ползыннар тіп сағынчам. ²⁰ Андада амырны пирчеткен Худай тӱрче поларынаң сайтанны#, сірернің азааңар алтына тастап, чох ит салар. Хан-пигібіс Иисус Христостың паарсазы сірернең хада ползын.

²¹ Сірерге миннең хада тоғынчатханым Тимофей, ідӧк Луцийнең Иасон паза Сосипатр туғаннарым изен читірчелер. ²² Мин паза пу пічікті пасчатхан Тертий, сірерге ідӧк Хан-пигде изен читірчебіс. ²³ Мағаа паза прай тигірибге ибінде орын пирген Гаий ідӧк сірерге изен читірче. Ераст, саарның ахчазын тутчатхан кізі, паза Кварт харындас изен читірчелер.

²⁴ Сірерге прайзыңарға Хан-пигібіс Иисус Христостың паарсазы читсін. Аминь.