Филипптегілерге

Павелнің филипптегілерге пічии

Филипп саар Рим чиріндегі Македон аймағының кӧп саарларының пірсі полған. Пу саарда полып, Павел Европада Чахсы Хабарға пастағызын на ӱгредіп, мында христиан тигірибін тӧстеп салған.

Пу пічікті ол ідӧк Римдегі харибде одырғанында пасхан. Пасхаларының хыринда пу пічікте Павел хығырығҷыларға позының кӧңнін артых арах ас пирче. Мында пасха пічіктернің хыринда аны піріктірчеткен пір сағыс чоғыл. Мына илҷінің пу пічікке кирген хай пірее сағыстары:

– Павелнің чаптырғаны сылтаанда Чахсы Хабар кӧп кізілерге тарадылча;

– хайдағ даа сидік урунза, Павел ӧрінче паза хығырығҷыларны анзында позына кӧӧгерге ӱгретче;

– христианнар ирееленістерінде Иисустың пазымнығ кӧзідіміне кӧӧгерге киректер;

– христианнарның тигіриб араласчыларын пірге тудынарға ӱгреткені;

– Моисей Чахиина ізеністің хыринда Христосха киртінгені арачыланысха артых полчатханы;

– филипптегілернің киртістіг тудынчатханнары паза позына пай сыйыхтар ысханнары ӱчӱн Павелнің алғызы.

Павелнің Филипптегілернің ӱчӱн пазырғаны

¹ Піс, Павелнең Тимофей, Иисус Христостың хуллары, Филипп саардағы тигіриб# устағҷыларынаң паза хабасчыларынаң хада Христос Иисусха киртінчеткен прай ах-арығларға пасчабыс. ² Худай Пабабыстаң паза Хан-пигібіс# Иисус Христостаң паарсас паза амыр хоных сірерге ползын.

³ Сірердеңер сурынған сай Худайымны алғыстапчам. ⁴ Чахсы Хабарда пастағы кӱннең пу тусха теере араласчатханнарыңнаңар, сірернің прайзыңарның ӱчӱн сурынған сай, мин сыбыра ӧрініснең пазырадырбын. ⁶ Чахсы киректі сірерде пастаан Худай анзын Христос Иисустың килер кӱніне читіре ит салар тіп киртінчем. ⁷ Сірердеңер іди сағын чӧрчеткенім орта: сірер минің чӱреемдезер, минің пиктеемдезер нооза. Чахсы Хабарға турысчатсам алай аның сынын іле кӧзітчетсем, сірер дее Худайның мағаа пирген паарсазын алынчазар. ⁸ Мин сірерге Иисус Христостың хынызынаң хынчам, Худай анзына киречі. ⁹ Сын піліс алып, прай нимені орта сизінген пастыра хынызыңар улам ӧссін тіп пазырчам. ¹⁰ Андада сірер, постарыңа иң артыхты таллап, Христос килер кӱнде арығ паза пір пыро чох поларзар. ¹¹ Худайның сабланызы, махтазы ӱчӱн Иисус Христостың пастыра чахсы киректерге пай поларзар.

Чуртас – Христос

¹² Харындастар! Сірерні миннең полған ниме Чахсы Хабарны тарадарына полысханын пілзіннер тіп сағынчам. ¹³ Ол оңдайнаң Христостың ӱчӱн кинҷеліг полчатханым ӧргедегілерге дее прайзына паза пасхаларына даа тарап парды. ¹⁴ Мин пиктедібіскенімңеңер Хан-пигібісте полчатхан харындастарыбыстың кӧбізі Худай сӧзін тарадарында хорыхпин, китенмин тудын пастабысты.

¹⁵ Піреелері, итсе, істі чохтанып, мині азарға полып, Христостаңар сӧсті таратчалар, пасхалары, тізең, аны арығ кӧңніліг чарлапчалар. ¹⁶ Олар аны мағаа хынып итчелер. Худай мині Чахсы Хабарға турызарға турғысханын пілчелер нооза. ¹⁷ Пасхалары, тізең, азарға идіп, минің кинҷемні улам аар идерге полып, Христостаңар сӧсті арығ нимес кӧңніліг чарлапчалар. ¹⁸ Че, ниме зе? Хайди дее полза, посты кӧзідіп пе алай сын кӧңнінең ме, Христостаңар чарлапчалар, мин анзына ӧрінчем. Ӧрін не турам. ¹⁹ Пілчем нооза ниме дее миннең пол парза, сірернің пазырғаныңар паза Иисус Христос пирген Хут полысханы мағаа арачыланыс полар. ²⁰ Мин пір дее нимеде уйатха кірбеспін тіп сағынчам паза ізенчем. Че азых чӱректіг, чалтанмас поларбын. Сағам даа, сыбыра даа – тіріг чӧрзем ме алай ӧл тее парзам ма – ит-ханымда Христос илбек пол парар. ²¹ Мағаа чуртас – Христос нооза. Ӧлім дее мағаа – парыс. ²² Че мин ах-чарыхта халзам, анзы киреем тузазына полар. Хайзын таллап алҷаан даа пілбинчем. ²³ Анзы даа, мынзы даа кӧңнімні тартча. Минің, пу ах-чарыхтаң парыбызып, Христоснаң хада поларым килче: анзы хай-хай артых нооза. ²⁴ Пу позым чӧрчетсем, тізең, сірерге артых. ²⁵ Сірернің киртіністе маңнанысха паза ӧрініске чидерлерің ӱчӱн сірернең прайзыңарнаң хада халарымны ізестіг пілчем. ²⁶ Хаҷан мин сірерзер хатап килзем, мин сірерге Христос Иисуснаң улам махтанарға сылтағ пирем.

²⁷ Итсе, Христостың Чахсы Хабарына турыстыра чуртаңар. Мин, киліп, сірерні кӧрзем, алай саңай даа килбезем, сірер пір сағыстығ, пір кӧңніліг полчатханнарыңны, Чахсы Хабардаң килчеткен киртіністің ӱчӱн хада-пірге кӱресчеткеннеріңні истерім килче. ²⁸ Ыырҷылардаң пір дее чалтанмаңар. Сірернің киртінізіңер оларға ӧлімні таныхтир, сірерге, тізең, арачыланысты. Анзы Худайдаң пирілче. ²⁹ Сірерге Худайның паарсазы пастыра Христосха киртінері ле нимес, че Аның ӱчӱн ирееленері дее пирілген нооза. ³⁰ Сірер минӧк чіли кӱрес парчазар. Минің кӱрескенімні кӧргезер нооза. Сағам даа анзын миннеңер истедірзер.

Христостың чолы

¹ Сынап, Христосха киртінчеткеніңерге кӧңніңер кӧдірілчетсе, Аның хынызына чӱрееңер часхарылчатса, Худай Худы# пастыра пілісчетсеңер, сірернің чӱрееңерде ачыныс паза айағ пар полза, ² ӧрінізімні хос пиріңер: пір сағыстығ, пір хыныстығ, пір кӧңніліг, пір кӧстегліг полыңар. ³ Тартызып, кӧкеесімненіп, пір дее ниме итпеңер, че пазымнығ полып, пасхаларын постарыңнаң пӧзік санаңар. ⁴ Полғаныңар постаңар ла нимес, че пасхаларынаңар даа сағыссыраңар. ⁵ Сірернің пілінізіңер Иисус Христости осхас поларға кирек: ⁶ Ол Худай омазы полған, че Худай чіли тудынмаан, ⁷ Позын пазынҷыхтап, хул омазын алынып, кізілерге тӧӧй, кӧрімінең кізі осхас пол парған. ⁸ Иисус Позын пазынҷыхтаан, ӧлімге, кіресте# ӧлімге дее читіре, сӧс истеечі полған. ⁹ Аннаңар Худай даа Аны кӧдірген паза Ағаа ноо даа аттаң пӧзік ат пирген. ¹⁰ Иисустың ады адалған сай тигірде, чир-чалбахта, тӧбінкі чирде прайзы тізекке тӱссін. ¹¹ Ноо даа тіл Иисус Христостың Хан-пигібіс полчатханын чарлазын. Андада Худай Пабабыс сабланар.

Чарытхы полып чӧрчезер

¹² Сірер дее, хынғаннарым, чоох истеечі поларға кирексер. Итсе, хада полғанымда, чоох исчең полғазар. Че сағам даа, мин сірернең хада ниместе, уламох чоох истеечі полыңар, хорығып, халтырап ала, арачыланысха чидіңер. ¹³ Худай сірерні Позының чахсы пӧгіннеріне килістіре хынарға паза идерге кӧстепче. ¹⁴ Ноо даа нимені кібіренмин паза ікінҷілебин ит турыңар. ¹⁵ Пу чоох испес, сайбах тӧлнің аразында пыро чох, арығ кӧңніліг Худай палалары полыңар. Сірер оларның аразында чарытхы полып чӧрчезер нооза. ¹⁶ Сірерге чуртас пирчеткен сӧске тудыныңар. Андада Христос килер кӱнде махтадарым, минің кӱрескенім паза аар тоғынғаным тик полбас. ¹⁷ Сірер, Худайға чӧрініп, киртініс пастыра Ағаа толығ полчазар. Мин, тізең, ол толыға наанылған чіли, сірерге хозыл парчатсам, андада ӧрінчем, сірернең хада ӧрінчем. ¹⁸ Сірер дее, пу нимее ӧрініп, миннең хада ӧрініңер.

Тимофейнің паза Епафродиттің киртістіг тудынғаны

¹⁹ Мин дее, сірернің киректеріңнеңер истіп алып, кӧңнімні кӧдіріп алар ӱчӱн, Тимофейні тӱрчедең сірерзер ызыбызарыма Хан-пигібіс Иисусха ізенчем. ²⁰ Тимофей чіли, сірердеңер пар-чох кӧңнінең сағыссырапчатхан андағ кӱстенҷік кізі дее паза чоғыл. ²¹ Тоозалары даа Иисус Христостине нимес, че постарының на киректеріне сағыссырапчалар нооза. ²² Аның киртістіг тудынғанын, тізең, сірер пілчезер. Ол Чахсы Хабарны тарадарында, оолғы пабазына чіли, мағаа матап хабасхан. ²³ Ам миннең ниме поларын піліп алдох, аны сірерзер ызыбызарға ізенчем. ²⁴ Тӱрчедең позым даа сірерзер кил поларым тіп Хан-пигібісте ікінҷілебинчем.

²⁵ Епафродит, ағыриинаңар сағба сірерге чит парғаннаңар тың чобалып, сірерні прайзыңарны кӧрері уғаа кил парған. Аннаңар мин аны, хада тоғынчатхан, хада чааласчатхан минің харындазымны, сірернің, тізең, илҷіңерні#, кирексіністеріме чӧрінчеткен кізіңерні, сірерзер нандыра ызыбызарға чараттым. ²⁷ Ол ӧлер пазында чатхан нооза. Че Худай ағаа айаан. Итсе, ағаа ла нимес, че мағаа даа, чобаама чобағ хоспас ӱчӱн, айап пирді. ²⁸ Аннаңар аны табыраанҷа сірерзер ызыбыстым. Епафродитті хатап кӧр салып, сірерні ӧрінзіннер тіп, минің чобаам, тізең, хызырылар. ²⁹ Аны пар-чох ӧрініснең, Худай кізізін чіли, удурлаңар, паза ол осхастарны улуғлапчадыңар. ³⁰ Ол Христостың кирее ӱчӱн, сірер чохта, сірернің орныңарға миннең хада полып, ӧлімнің хыринҷа чӧрген, сала тынын пир салбаан.

Сын паза орта хылынғаны

¹ Ол оңдайнаң, харындастарым, Хан-пигібістің ӧрінізіне ӧрініңер. Мағаа аны пазары аар нимес, сірерні, тізең, анзы хайраллир.

² Адай осхастардаң китеніңер, чабал итчеткеннердең китеніңер, сӱннет# идерінең китеніңер. ³ Сӱннет идері піс полчабыс нооза. Худай Худы хоостыра Худайға тоғынчатханнар, Христос Иисусха кееркепчеткеннер паза кізі позыбысха ізенминчеткеннер. ⁴ Итсе-де, мағаа, кізі позыма, ізенерге чарирҷых. Пасхаларының хыринда ит-ханға ізенҷең кізі мин артых ла полам: ⁵ сигізінҷі кӱнінде сӱннет иткен, Израиль тӧлі полчатхан, Вениаминнің уйазынаң сыххан, еврейлернің еврейі, ӱгредиимҷе фарисей#, ⁶ прай кӱзім салынып, Худай тигірибін сӱргем. Моисей Чахиин# толдырғаным хоостыра орта кізібін ме тіп ӱзӱрзе, тізең, пір пырозы чох кізі полғам. ⁷ Че Христостың сылтаанда мині кӧдірчеткен ол нимені тик нимее санаам. ⁸ Христос Иисусты, Хан-пигімні, пілері артых полар тіп санап, прай пасха нимені тик тіп паалапчам. Христосты алынып алар ӱчӱн паза Моисей Чахиин толдырғаным хоостыра нимес, че Христосха киртініс пастыра килчеткен паза Худайдаң киртініс хоостыра пирілчеткен ахтаныс алар ӱчӱн, тооза нимені хыйа иткем паза прай нимені похсахха санапчам. ¹⁰ Ана іди Иисусты паза Аны тірілдірген кӱсті пілерім. Аның ирееленістерінде хада аралазып, Олох чіли ӧл парарым. ¹¹ Христос чіли, ӧлімнең тірілерім.

Пӧгінген чирзер чӱгӱргені

¹² Мин анзына читкенімнеңер алай толдыра кізі пол парғанымнаңар іди тібинчем. Че мин дее, арса, Христос Иисус мағаа читкен чіли, Ағаа чидерімӧк. ¹³ Харындастар, мин анзына читтім тіп санабинчам. Че соондағызын халғызып, мин алнынзар ла сіренчем. ¹⁴ Мин сыйых аларға кӱстенчем. Ол сыйыхха Худай пісті Христос Иисустың пастыра хығыртхан. ¹⁵ Ол оңдайнаң, пістің арабыста теен парған кізі ідӧк сағынзын. Че сірер пасха сағынчатсаңар, Худай анзын даа сірерге ас пирер. ¹⁶ Итсе-де, нимее піс чидіп алғабыс, олох оңдайнаң сағынарға, ідӧк чуртирға кирекпіс.

¹⁷ Мағаа кӧӧгіңер, харындастар, паза пістің оңдайыбысча тудынчатхан кізілерге кӧріңер. ¹⁸ Мин чоохтаан кізілернің илеедезі, ам харах чазым ағызып чоохтапчам аны, Христос кірезінің ыырҷылары чіли хылынчалар. ¹⁹ Оларның тӱгенҷізі – ӧлім, оларның худайлары – хурсахтары, сабланыстары – уйат пілбесте. Олар пу чирде чуртапчатхан кізілер чіли сағынчалар.

²⁰ Піс, тізең, хан тигірде чирлігбіс. Аннаң піс Арачылағҷыбысты, Хан-пигібіс Иисус Христосты сағыпчабыс. ²¹ Ол пістің пазындыртхан иді-ханыбысты Позының сабланыстығ иді-ханына тӧӧй ит салар. Ол, Позының кӱзінең аны идіп, прай нимені холға кирче нооза.

¹ Аннаңар, минің хынған харындастарым, мин прай кӧңнімнең сірерні кӧрерім килче, сірер минің ӧрінізімзер паза чидиимзер. Хан-пигібіснең пір полып, пик турыңар, хынғаннарым.

Чахсы паза махтағлығ ла нимедеңер сағыныңар

² Еводийге алданчам паза Синтихийге алданчам, Хан-пигібісте пір сағыстығ полыңар. ³ Синнең дее, сын хабасчымнаң+ 4:3 Хабасчы – грек тілінең «сунзуг» полар. Ол сӧс ідӧк кізінің адын таныхтапча. , сурынчам, полыс пир оларға. Олар миннең, Климентнең паза аттары чуртас киндезіне киріл парған пасха даа тоғынҷыларнаң хада Чахсы Хабарны тарадарында араласханнар. ⁴ Хан-пигібісте хаҷан даа ӧрініңер, пазох хатап чоохтапчам сірерге – ӧрініңер. ⁵ Сірернің амыр хылыхтарыңнаңар прай чон пілзін. Хан-пигібіс чағын килді. ⁶ Пір дее нимее сағыссырабаңар. Че пазырчатсаңар, сурынчатсаңар, кӧңніңерні алғыстаснаң Худайға ас пир турыңар. ⁷ Андада кізі сағызы чит полбас Худайның амыры сірернің чӱрееңерні паза сағыстарыңны Христос Иисустың пастыра хайраллир.

⁸ Тӱгенҷізінде, харындастар, сын, ах сағыстығ, орта, арығ, хыныстығ, турыстығ чахсы паза махтағлығ ла нимедеңер сағыныңар. ⁹ Нимее сірер ӱгреніп алғазар, миннең ниме постарыңа алынып алғазар, миннең ниме искезер, кӧргезер, аны толдырыңар – андада амыр пирчеткен Худай сірернең хада полар.

Павел сыйыхтарның ӱчӱн алғыстапча

¹⁰ Сірер миннеңер пазох сағыссырапчатханнарыңа мин Хан-пигіме тың ӧрін парыбысхам. Сірер алында даа сағыссыраазар, че оңдай киліспин турған. ¹¹ Мин анзын хызылчатханымнаңар тібинчем: пар нимее чӧпсінерге ӱгрен парғам. ¹² Хызылып таа, чырғап таа чуртирға піледірбін – прай ниме кӧргем, ноо даа нимее тимдебін: тох таа, астап таа чӧрерге, чырғалда даа, хызығыста даа чуртирға. ¹³ Иисус Христос мині пик итчеткенде, прай нимее кӱзім чидер. ¹⁴ Че сірер, минің чобаамда аралазып, чахсы иттіңер.

¹⁵ Пілчезер бе, филипптегілер, Македон чирінең сығып, Чахсы Хабарны наа ла таратчатханда, сірердең пасха пір дее тигірибнің чоны минің кирексіністерімде араласпаан. ¹⁶ Фессалоник саарда даа полғанымда, сірер пір-ікі хати минің кирексеенім хоостыра мағаа ыс турғазар. ¹⁷ Мин пирерін кирексеенімнеңер нимес, че киректерің сірерге туза ағылзын тіп сағынғанымнаңар. ¹⁸ Мин прай нимеңер алдым, чырғап турбын. Сірер Епафродитнең ысхан нимені алғаныма чӧпсінчем. Сірернің сыйииңар тадылығ чыстығ алас, Худайға салылған чахсы тайығ# осхас. ¹⁹ Худайым минің, тізең, Позының илбек пайынаң Христос Иисустың пастыра сірернің ноо даа кирексіністеріңні толдыр пирер. ²⁰ Худай Пабабысха хаҷан даа сабланыс ползын. Аминь#.

Харындастарыбыс сірерге изен читірчелер

²¹ Христос Иисусха киртінчеткен полған на ах-арығ# кізее изен читіріңер. Миннең хада полчатхан прай харындастарыбыс сірерге чолабит ысчалар. ²² Прай ах-арығлар, улам хағанның чуртындағылар сірерге изен читірчелер. ²³ Хан-пигібіс Иисус Христостың паарсазы сірернең хада ползын. Аминь.