Иаковтың

Иаковтың пічии

Наа Молҷағда адалчатхан Иаков аттығ кізілернің аразынаң Иисустың харындазы, Иерусалимдегі Христос тигірибінің устағҷызы, пу пічікті пасханына артых киртінілче. Хай-пірее істезігҷілер Наа кинденің прай пічіктерінең паза кинделерінең иң пурнада пу пічік пазылған полар тіп санапчалар

Иаков позының пічиин киртініс оңдайларын чуртасха кирерінде ниигін кӧрбеен христианнарға пасча. Иаков оларға олаңай чуртаста хайди тудын чӧрердеңер сағыстарынаң ӱлесче, кӱлӱк сағыстаңар, пайдаңар паза чохтаңар, хоп чоохтаңар паза сайғахтаңар, тыстаныстаңар паза сӱзӱріктеңер сурығларны ӱзӱрче. Иаковтың ӧӧн сағызы мындағ: Худайға киртіністі киректернең киречілебезе, андағ киртініс арачыланысха ағылбас.

Автор хығырығҷаа, Худайға сыннаң киртінчеткен кізі хайди даа Худайға чарас ниме идер тіп, сағыс пирче.

Алғас

¹ Иаков, Худайның паза Хан-пигібіс# Иисус Христостың хулы, сірерге, тарадыл парып чӧрген он ікі сӧӧкке+ 1:1 Иаков «он ікі сӧӧктеңер» пазып, прай Худай чонынаңар чоохтапча. , пасчам. Изен-хазых полыңар!+ 1:1 Грек тілінде «изен-хазых» тир орнына «ӧрініңер» тіҷеңнер.

Худай чолын пазып, ікінҷілебе

² Піліңер, сірернің киртіністеріңні сынааны тыстанысты тӧрітче. Аннаңар, харындастарым, аймах сынағларға кір парчатсаңар, анзын улуғ ӧрініске санаңар. ⁴ Сірер сағыс кір парған, толдыра, читпестер чох кізілер пол парар ӱчӱн, тыстаныс позының тоғызын ит саларға кирек. ⁵ Сірернің пірееңернің Худайдаң пирілген хыйғазы читпинчетсе, Аннаң сурынзын, ағаа пирілер. Худай прайзына, харанмин, уйаттырбин, пиредір нооза. ⁶ Че кӧмес тее ікінҷілебин, киртініп, сурынарға кирек. Ікінҷілеен кізі чилге сабылған талай салғағы осхас. ⁷ Андағ кізі Хан-пигібістең ниме аларына ізенмезін. ⁸ Ікі сағыстанған кізі ноо даа чолында пик турбас.

Кӧдірілгені паза пазынҷыхтатханы

⁹ Пазындыртчатхан харындас анзына кееркезін – Худай аны іди кӧдірче. ¹⁰ Пай, тізең, Худай аны пазынҷыхтапчатханына кееркезін. Ис-пай, чазы чахайағы чіли, салых парар, нооза. ¹¹ Кӱн сыхса, ізіг пол килче, кӱн ізиине от хурупча, чахайах салыхча, сілиин чідірче. Ідӧк пай кізі дее позының чолында салых парыбысча.

Сынааны паза хыҷаландыртханы

¹² Сынағ иртчеткен кізі часкалығ. Ол сынағларны турыстығ иртіп алза, Худай Позына хынғаннарға сыйиин – молҷаан чуртасты пирер. ¹³ Сынағларда пірдеезі «Худай мині хыҷаландырча» тібезін. Худай чабалға сабыла чоғыл, аннаңар Позы даа пірдеезін хыҷаландыртпинча. ¹⁴ Че позының хынығыстарына салынған кізі позын хыҷаландыртча. ¹⁵ Хыҷаланыс, тізең, чазых# пазап салып, аны тӧрітче. Чазых, тізең, кӱзіне кір парза, ӧлімні тӧрітче.

Прай чахсы ниме Худайдаң

¹⁶ Хынған харындастарым, постарыңны алаахтырынмаңар. ¹⁷ Чахсы, толдыра ниме ӧӧртін, тигірдегі чарытхыларны чайаан Худайдаң килче. Ол Позы хаҷан даа алыспинча, алызар кӧлекті дее тастабинча. ¹⁸ Пісті Аның таллама чайаачызы ползыннар тіп сағынып, Ол пісті сынның сӧзінең тӧріт салған.

Худай сӧзін искені алай аны толдырғаны

¹⁹ Піліңер зе, хынған харындастарым, ноо даа кізі истерге чапчаң ползын. Чоохтанарға, ӧкпеленерге маңзырабас ползын. ²⁰ Кізі ӧкпезінең Худайның сыны тӧрир чоғыл нооза. ²¹ Аннаңар нинҷе пар чуртас похсағын, тооза чабалланысты хыйа идіп, сірерге пирілген сӧсті пазымнығ чӱрекнең алыныңар. Ол сірернің худыңарны арачылап полар.

²² Посты алаахтырып, сӧсті истееҷік полбаңар, че аны толдырчатхан кізі полыңар. ²³ Сӧсті истіп ле, че аны толдырбинчатхан кізі позын кӧріндестең кӧрінчеткен кізее тӧӧй: ²⁴ кӧрініп алып, хыйа пастырыбыстох ла, позы хайдағ полчатханын андох ундудыбысча. ²⁵ Сірерні пос итчеткен Худайның чахсы чахиин тирең ӱгреніңер, аны толдырчатсаңар паза искен нимені ундубинчатсаңар, Худай сірернің прай киректеріңні алғап пирер.

²⁶ Худайға орта пазырчам тіп сағынып ала, олох туста тіліңе сыданминчатсаң, син позың позыңны алаахтырчазың паза синің пазырғаның пір дее нимее турбинча. ²⁷ Худай Пабабысха арығ, пырозы чох пазырғаны – ол ӧкістердеңер паза чалғыс чарым халған ипчілердеңер сағыссырааны паза посты пу чуртастың хынығыстарынаң хайраллааны.

Кізілерні талластырбаңар

¹ Харындастарым! Хайди сірер, сабланыс Хан-пигіне Иисус Христосха киртініп ала, олох туста кізілерні талластырадырзар? ² Пістің чыылыға алтын пурбалығ, пай тонанған кізі килзе алай уйан кип-азахтығ чох-чоос кірзе, ³ сірер, пай тонанғанына кӧріп, «тӧрзер иртіп одырыңар», чох-чоозына, тізең, «син тігде тур сал» алай «мында, азаам хыринда одыр» тіп салзаңар, ⁴ постарыңа артых алынып, хомай сағыстығ чарғыҷылар пол парбинчазар ба? ⁵ Истіңер зе, хынған харындастарым! Худай тилекейде чохтарны киртініске пай поларға паза Аның хан-чирін# ээленерге таллаан нимес пе? Худай ол хан-чирін Позына хынчатханнарға молҷаан нооза. ⁶ Сірер, тізең, чохты нимее салбин полдар. Пайлар сірерні хыйыхтапча ниместер бе? Сірерні чарғаа тартчатханнар олар ниместер бе? ⁷ Сірер постарыңны аданчатхан Иисус Христостың аарлығ адын сӧклепчеткен кізілер пайлар ниместер бе?

Хыныс чахиинаңар

⁸ Сірер Хан чахиин (Пічікте «чағыныңа позыңа чіли хын» теенін) толдырчатсаңар, чахсы итчезер. ⁹ Че сірер, кізілерні талластырчатсаңар, чазых итчезер, чахығ сайбағҷылары пол парчазар. ¹⁰ Прай чахығларны толдырып, піреезін не сайбаан кізі пірдеезін толдырбаанға тиңнелче. ¹¹ Кем «оралыс чӧрбе» теен, олох «ӧдірбе» теен. Че чӧрбиндеечетсең, кізіні, тізең, ӧдір салзаң, син чахығ сайбағҷызызың. ¹² Аннаңар кізіні пос итчеткен чахығнаң амоғох чарғыладар кізі чіли чоохтанчат паза хылынчат. ¹³ Син айап пілзең, чарғы тузында сині айирохтар. Ӧлҷей чарғыдаң пӧзік ниме.

Киртініс паза киректер

¹⁴ Харындастарым! Піреезі «иткен киректерім чоғыл, че киртінізім пар» тізе, ноо тузадыр. Андағ киртініс арачылап полар ба?

¹⁵ Харындас алай пиҷе кисчең кибі чох чӧрчетсе, пір кӱннің чиизі дее чох полза, ¹⁶ пірееңер, тізең, «пар, сағыссыраба: чылынарзың, тох поларзың» тізеңер, че кирексеенні пирбезеңер, ноо тузадыр. ¹⁷ Ідӧк киртініс тее, сынап иткен киректері чох полза, пос позы ла полза, ӧліг.

¹⁸ Піреезі, тізең, «синің киртінізің пар, минің, тізең, киректерім: киректерің чох киртінізіңні кӧзіт пир, мин киректерімнең салылған киртінізімні кӧзіт пирербін» тир. ¹⁹ Син Худай чалғыс ла тіп киртінчезің? Чахсы итчезің! Айна-чиктер# дее киртінчелер паза халтырапчалар. ²⁰ Син, алығ кізі, чахсы киректері чох киртіністің тузазы чоғын хаҷан оңарып аларзың? ²¹ Адабыс Авраам#, Исаак оолғын тайыға# саларға тимнеп, іди киртінізін кӧзіткен. Худайның алнында киректернең ахтанған нимес пе?+ 2:21 Аннаңар кӧр: Пурунғы Молҷағдағы «Пастағлар» (Бытие) кинде 22:1-18. ²² Аның киректері киртінізінең пір полғаннарын паза киректерінең киртінізі тол парыбысханын кӧредірзің ме? ²³ Пічікте «Авраам Худайға киртінгеннеңер, Ол аны ахталған тіп санаан паза Худайның арғызына адаан» тіп пазылғаны толдырылған. ²⁴ Кӧрчезер бе, кізі киртініснең не нимес, че киректерінең дее ахтанчатханын. ²⁵ Ідӧк чӧреес Раав, китегҷілерні удурлап, оларны хорғыс чох чолға кирібіскенінең ахтанып албаан ма за?+ 2:25 Аннаңар кӧр: Пурунғы Молҷағдағы «Навинің оолғы Иисус» (Иисус Навин) кинде 2:1-16. ²⁶ Тыны чох ит-сӧӧк ӧліг ниме. Киректері чох киртініс тее ідӧк ӧліг.

Сӧс кӱзі

¹ Харындастарым! Піс чарғаа артых тартыларын пілчеткенде, кӧбізіңер ӱгретчі поларға кӱстенмеңер. ² Прайзыбыс таа кӧп чазых идедірбіс нооза. Кем сӧсте чазых итпинче, ол толдыра кізі, позының прай даа иді-сӧӧгіне сыдан полар. ³ Мына піс аттың ахсына, чоох иссін тіп, суғлух суғыбысчабыс паза аның ит-сӧӧгінең устап парчабыс. ⁴ Ідӧк керіптер дее: ханҷа даа улуғ ползыннар, хайдағ даа кӱстіг чиллер сӱр чӧрзіннер оларны, чоллапчатхан ээзі улуғ нимес ле тиріг пастыра хынғанни апарча оларны. ⁵ Тіл дее ідӧк. Улуғ нимес ле чардығыбыс ол, че кӧпті ит салча. Кӧріңердек, кічіг от-чалын даа хайдағ кӧп ниме ӧртеп саладыр.

⁶ Тіл – ол от-чалын. Ол чуртазыңны чох ит полар чабал нимее толынча. Тіл кӧйчеткен кӧлдең тамылчатханнаңар, аның прай нимені хырчатхан от-чалынға чуртазыңны ағыл полар кӱзі пар. ⁷ Аң-хустар, чылысхылар, талай малы – прай тіріг-тыннығ ниме кізі кӱзіне пазындырт салған, пастырча. ⁸ Тілні, тізең, пірдеезі пазын полбинча. Ол тудығ пілбес хыйал. Анда ӧлім ағылчатхан оо. ⁹ Анынаң піс Худайны паза Пабабысты алғапчабыс, анынаңох Худайны сомнап чайалған кізілерні харғапчабыс. ¹⁰ Пір аастаң алғас# паза харғас сыхча. Іди поларға чарабас, харындастарым. ¹¹ Пір орыннаң сыххан хара суғ тадылығ, олох туста ачығ ағадыр ба? ¹² Харындастарым! Смоковница ағазында маслиналар ӧзер чоғыл, виноград хырчынында смоквалар ӧспинӧкче. Ідӧк хара суғ пір саңай тадылығ паза тустығ суғны сығара саппинча.

Ӧӧртін тӱзірілчеткен хыйға

¹³ Сірер хыйға ползаңар паза Худай ниме киректепчеткенін пілчетсеңер, чахсы киректер ле идіп чуртаңар. Чахсы киректеріңе махтанминчатсар, андада сірер сыннаң даа хыйғазар. ¹⁴ Че чӱрееңерде ачығ істі чохтанысты, тімелісті тутчатсар, хыйғазар тіп махтанмаңар, сыннаң тоғыр чойланмаңар. ¹⁵ Хайда істі чохтаныс паза тімеліс, анда оңдай чоғыл, анда прай ниме чабал. Ол ӧӧртін тӱсчеткен хыйға нимес, че пу чирдең, кӧңніңердең, айнадаң. ¹⁷ Кізінің ӧӧртін килген хыйғазы – иң пурнада, арығ, анаң амыр, тың тапсабас, сӧс истеечі, паарсасха паза чахсы киректерге толдыра, кізілерні талластырбас паза чойырхабас ниме. ¹⁸ Амырға хынчатханнар амырның ӱренін таарыпчалар. Аның нимізі, тізең, – арығ чӱрек.

Худайның холына пирініңер

¹ Сірернің араңарда ыырлас паза тоғырланыс хайдаң сыхча? Мыннаң нимес пе: иді-ханыңарда чааласчатхан хынығыстардаң нимес пе? ² Хыҷыхтанған нимелерің сірерде чоғыл. Ӧдірчезер паза істі чохтанчазар – че чидін полбинчазар. Тартысчазар паза ыырласчазар – чоғылох. Сурынминчазар нооза. ³ Сурынза даа, ал полбинчазар – постың хынығыстарын толдырарға хынчатханнаңар саба сурынчазар. ⁴ Чӧреестер, пілбинчезер бе, пу Худайы чох чуртаснаң ынағласханы, Худайнаң ыырласханы полча. Кем андағ чуртаснаң ынағласча, ол Худайның ыырҷызы пол парар. ⁵ Алай сірер Худай Пічиинде# «пісте чуртапчатхан хут кӱннеенҷе хынча» теенін тик нимее санапчазар ба? ⁶ Че ол аннаң даа улуғ паарсасты пирче. Аннаңар чоохталча нооза: «Худай улуғзырхостарны тоғыр кӧрче, пазымнығларға, тізең, паарсазын чайча».

⁷ Аннаңар, Худайның холына кіріңер. Сайтанға# тоғыр полыбызыңар, ол сірердең андада тизіп ойлир. ⁸ Худайға чағдаңар – сірерге Ол чағдирох. Чазыхтығлар, холларың арығлабызыңар, ікі сағыстанғаннар, чӱректерің тӱзедібізіңер. ⁹ Чобалыңар, ылғаңар, сыхтаңар. Хатхы сыытха, ӧрініс чобаға айлан парзын. ¹⁰ Худайның алнында чамараңар, ол сірерні ӧӧрледібізер.

Кізі соона тӱспеңер

¹¹ Харындастар, удур-тӧдір хоп сығарыспаңар. Харындазының соона тӱсчеткен алай аны ӱзӱрчеткен кізі чахығны хоптапча. Чахығны ӱзӱрчетсең, син аны толдырбинчазың, че чарғылапчазың. ¹² Арачылап полар алай чох ит салар Чахығ ээзі паза Чарғыҷы чалғыс ла. Син чи, пасхаларын ӱзӱрчеткен, кемзің?

Улуғ чоохтанмаңар

¹³ Ам сірер, «Пӱӱн алай таңда андағ-да саарға парып, пір чылҷа чуртап, садығнаң айғазып, парыс аларбыс» тіпчеткеннер, истіңер зе. ¹⁴ Сірер, таңда ниме поларын паза чуртазыңар хайдағ поларын пілбинчеткеннер! Нимедір сірернің хысха чуртазыңар? Тӱрчеге килген паза мындох чох пол парған оор ол. ¹⁵ «Худай пирзе, тіріг чӧрзебіс, анзын алай мынзын идербіс» тир орнына, ¹⁶ сірер кӧдірілҷектеріңнеңер кӧкеесімненчезер. Ол кӧкеесімненіс – чабал ниме. ¹⁷ Чахсыны ит полар кізі аны итпинчетсе, ағаа ол чазыхха саналар.

Пайларға сизіндіріг

¹ Истіңер зе, сірер, пайлар. Сірерге килиген чобағларыңа ылғаңар паза сыхтаңар. ² Пайыңар чызып парған, кибіңерні кӧӧ чіп салған. ³ Алтын-кӱмӱстерің таттап парған. Сірер ізенген пайыңар, чалын чіли, иді-ханыңарны чіп салар. Сірер чыынған пайыңар чарғы кӱнінде сірердең тоғыр киречілир. ⁴ Мына хыраларыңда ас тоғынғаннардаң хыза саап алған чал ахчазы аахтапча, ас саапчатханнарның даа аахтааны прайзынаң кӱстіг Хан Худайның# хулаана читті. ⁵ Сірер чир ӱстӱнде чырғап-мӧтеп чуртаазар, чӱрек хынғанни полчатчаңзар. Чӱректерің толыға салар симіс мал сині пол парған. ⁶ Сірер ах-арығ# кізіні, чарғылап, ӧдір салғазар. Ол сірерге тоғырланмаан.

Иреелесте тыстаныңар

⁷ Че, харындастар, Хан-пиг килерін тыстаныснаң сағыңар. Мына хыраҷы чирдең аарлығ ниміс сахтапча. Аны алар ӱчӱн, ол наңмыр чаарын часхы-кӱскӱзін тыстанып сағыпча. ⁸ Сірер дее іди тыстаныңар: Хан-пигнің килері чағдапчатханнаңар, чӱрееңерні пик тудыныңар. ⁹ Харындастар! Чарғаа хабылбас ӱчӱн, удур-тӧдір хоптаныспаңар, – мына Чарғыҷы ізік алнында тур. ¹⁰ Харындастар! Чобағны тобыр парарында паза ӱр тыстанарында кӧзідімге Хан Худайның адынаң чоохтап чӧрген ухаанҷыларны# алып алыңар. ¹¹ Тыстаныста пик тудынғаннарны піс часкалығ тіп санапчабыс. Сірер Иовтың хайди тыстанғанын паза Хан Худай анзын хайди тоосханын пілчезер. Хан Худай айаачы паза нымзах паарлығ нооза.

¹² Харындастарым! Иң пурнада, тигірні дее, чирні дее, пасхазын даа киречее тартып, пірдеезіне молҷағ пирбеңер. Че, сірер чарғаа тартылбас ӱчӱн, «йа» теені «йа» ползын, «чох» – «чох» ползын.

Пазырыстың кӱзі

¹³ Сидікке урунзаң – пазыр. Хайзылары кӧгліглер бе? Худайға алғастар сарназыннар. ¹⁴ Пірееңер ағырчатса, тигіриб# ах сағалларын# хығыртыңар – Худайның адынаң чыстығ хайах сӱртіп, пазырзыннар. ¹⁵ Олар киртініп пазырзалар, Худай ағырығ кізіні, чазылдырыбызып, азахха турғыс салар. Ол кізінің иткен чазыхтары, тізең, позыдылар. ¹⁶ Чазыхтарыңны удур-тӧдір сығарынызыңар. Чазыл парар ӱчӱн, пірсі пірсінің ӱчӱн пазырыңар. Арығ чӱректіг кізінің# пазырғаны улуғ кӱстіг ниме. ¹⁷ Илия піс осхас кізі полған. Наңмыр чағбазын тіп пазырғанында, чирге наңмыр ӱс чыл алты ай тӱспеен. ¹⁸ Пазох пазырғанда, тигір наңмыр пирген. Чир, тізең, ниміс сығарған.

¹⁹ Харындастарым! Пірееңер сыннаң хыйыс парза, аны саба чолдаң осхырған кізі ²⁰ пілзін: чазыхтығ кізіні саба чолдаң хыйыстырып, аның худын ӧлімнең арачылап халар паза кӧп чазыхтарын чабызар.