Еврейлерге

Еврейлерге пічік

Иң пурунғы тустардаң пасти Христос ӱгредиин істесчеткеннер, пу пічіктің авторы позын адабааннаңар, аның кем полғанынаңар сурығда пір чӧпке килбееннер.

Піреезі авторға Павел илҷіні санапчалар. Че пазылғанынаң паза сағыс оңдайынаң пу пічік Павелнің пасха пічіктеріне тӧӧй нимес. Пасха істезігҷілер аның авторына Павелнің хабасчыларының, Варнаванаң Аполлостың, піреезі полған полар тіп, санапчалар, хайзылары пасха кізілерні адабохчалар. Пурунғыдох Христос ӱгредиинің пір ӱгретчізі теен полған: «Тигіриб „Мин аны пасхам“ тіп поларҷых».

Пічіктің адалғаны паза киречілес оңдайы аның еврей христианнарға пазылғанын кӧзітче. Оларның тигіриблері хайда орныхханы пілдізі чоғыл – Римде, Иерусалимде, Александр-саарда алай пірее пасха орында ба. Пічік наа эраның 60–70 чылларында пазылған полар.

Авторның ӧӧн пӧгіні – Христос киртінізі, иудейлернинең тиңнестіре, артых полчатханын кӧзідері. Ол оңдайнаң автор, пічиин адапчатхан кізілерні Христосха киртіністе пик ползыннар паза аар тустар килібіссе, иудаизмге айлан парбазыннар тіп, тимнеп саларға харасча. Пурунғы тустарда ухаанҷылар паза ангеллер кізілерге Худай хабарын чарлааннар. Амды, тізең, Худай Оолғы Христостың, сын-чахсы Абыстың паза олох туста сын-чахсы Толығның тузы читті.

Христостың Позын тайыға салғаны киртінчеткеннерні саңайға чазыхтаң ахтабысхан.

Христоснаң хада поларына кізі Ағаа киртінгенінең пастыра читче. Пурунғы Молҷағдағы кӧп кізі, постарының ізеністерінің толғанын кӧргелекке дее, ідӧк христианнар, киртіністері ӱчӱн сӱрдірзелер дее, Худайға киртінген чіли, Христосха киртінерге киректер.

Худай Оолғының пастыра чоохтапча

¹ Худай пурунғыдаң ала ӧң-пазы оңдайларнаң ӧбекелерібіске ухаанҷылар# пастыра кӧп хати чоохтанған. ² Пу халғанҷы кӱннерде, тізең, Ол піске Оолғының пастыра чоохтаан. Худай Оолғын прай нименің ээзі полар тіп чарат салған паза Аның пастыра тилекейні чайап салған. ³ Оолғы – Пабазының сабланызының чарии полып, Аның сын Позының омазы полча. Ол Позының кӱстіг сӧзінең тиксі-тилекейні орнында тутча. Ол, пісті чазыхтарыбыстаң# ахтабызып, тигірде илбек Худайның оң саринда одыр салған.

Худай Оолғының илбегі

⁴ Худай Ағаа ангеллердең# хай син пӧзік ат пирген, олох син Ол Позы даа ангеллердең пӧзік. ⁵ Худай ангеллерге пірдеезіне хаҷан даа тібеен: «Син минің Оолғымзың. Пӱӱн Мин Сині тӧріттім». Піди дее тібеен: «Мин ағаа Паба поларбын. Ол, тізең, Минің Оолғым полар». ⁶ Хаҷан Худай Позының тун Оолғын ах-чарыхсар ысханда, теен: «Прай Худай ангеллері Ағаа пазырзыннар». ⁷ Ангеллердеңер, тізең, Худай теен: «Худай ангеллерні чиллер осхас итче, нымысчыларны чалын осхас итче». ⁸ Позының Оолғынаңар, тізең, Худай теен: «Худай, Синің хан-ӱлгӱң# тӱгенмес. Кізілернең орта устирзың. ⁹ Син орта нимее хынчазың, чабал нимені, тізең, хырт кӧрчезің. Аннаңар Худай, синің Худайың, сині таллаан паза сағаа арғыстарыңнаң пӧзік ӧріністі сыйлаан». ¹⁰ Худай паза піди теен: «Хан-пиг#, син пастап чирні тӧстеп салғазың, анаң Позыңның холыңнаң тигірні чайап салғазың. ¹¹ Чир-чалбах таа, тигір дее чох пол парар, Син, тізең, хаҷан даа поларзың. Олар, иргі кип-азах чіли, изел парарлар. ¹² Син оларны, чорғанны чіли, пӱктебізерзің, олар даа, кип-азах алыстырылғанни, алыстырыл парарлар. Че Син алыспинчазың, Синің кӱннерің дее тӱгенминче». ¹³ Худай ангеллернің пірдеезіне хаҷан даа тібеен: «Синің ыырҷыларыңны азааң алтына сал пирбеенімҷе, Минің оң саримда одыр». ¹⁴ Ангеллер Худайның нымысчылары ла. Олар арачылан халар кізілернің нымызына чӧрерге турғызыл парғаннар.

Пістің илбек арачыланызыбыс

¹ Аннаңар піс, саба чолға кірібіспес ӱчӱн, пісті ӱгреткен нимее ӧнетін хайығ саларға кирекпіс. ² Пістің ӧбекелерібіске ангеллернің пастыра пирілген ӱгредігнің Сӧзі сын полтыр. Аны сайбааны паза испеені сыбыра орта хатығлатхан. ³ Аннаңар андағ илбек арачыланысты хыйа идіп, хатығластаң хайди осчаң поларбыс. Пу арачыланыстаңар пастап Хан-пиг Позы чарлаан полған. Аны искен кізілер, тізең, піске пу ӱгредігнің сын полчатханын кӧзіткеннер. ⁴ Ағаа хоза Худай, хайхастарны#, танығларны паза аймах-пасха таңнастығ киректерні киречілес идіп, Худай Худының# сыйыхтарын Позының кӧңнінҷе ӱлестірген.

Пісті арачыланысха ағылчатхан Иисус

⁵ Худай ангеллерні килер наа чуртас оңдайынаң устирға турғыспаан. Піс аннаңар чоохтапчабыс. ⁶ Худай Пічиинде# хайда-да аннаңар піди чоохталча: «Худай! Кемдір ол, кізі, Син аннаңар сағынарға? Алай кемдір ол, Кізі Оолғы#, Син Аннаңар сағыссырирға? ⁷ Син аны ангеллердең тӧбін тӱрчеге ле турғысхазың. Син, аны сабланысха паза аарласха чазап салып, Синің холың чайаан прай нимені Аның ӱлгӱзіне кир салғазың. ⁸ Син прай нимені Аның азаа алтына тастаазың». Мында «прай нимені Аның азаа алтына» тіп чоохталча. Анзы Аның холына кірбеен ниме халбаанын таныхтапча. Че сағам піс прай ниме Аның ӱлгӱзінде полчатханын кӧрбинчебіс. ⁹ Че піс Иисусты кӧрчебіс. Худай, кізілерге паарсап, Иисусты оларның прайзының ӱчӱн ӧлерге ысхан. Аннаңар Аны ангеллердең тӧбін ӱр нимеске ле турғысхан. Иисус ирееленісте ӱрееннеңер, тізең, Худай Аны сабланысха паза аарласха чазап салған.

¹⁰ Чуртасты чайап салған паза прай нимее тын кирген Худай орта иткен. Ол, Иисусты ирееленістері пастыра сынап, Аның толдыра киртістіг полчатханын кӧрген. Иисус кізілерні сабланыстығ арачыланысха ағылча нооза. ¹¹ Чазыхтаң арығлапчатхан Иисус кізі полча, чазыхтаң арығланчатханнары даа – кізілерӧк+ 2:11 Пу стихты піди дее оңарарға чарир: «Чазыхтаң арығлапчатхан Иисусты паза чазыхтаң арығланчатхан кізілерні хайзын даа пір Паба чайап салған». . Аннаңар оларны харындастар тіп адирға Ағаа уйадыстығ нимес. ¹² Ол Худайға тіпче: «Харындастарыма Синің адың чарлабызарбын. Оларның чыылығларында Сині сарыннаң сабландырарбын». ¹³ Ол ідӧк тіпче: «Худайға ізенербін» паза «Мин мынабын, мағаа Худай пирген палалар даа мына». ¹⁴ Пу палалар ит-ханнығ кізілер полчатханнаңар, Иисус таа оларох осхас: кізі ит-ханында килген. Ол анзын кізілерні ӧлімге ағылҷаң кӱзі пар сайтанны# Позының ӧлімінең чиңіп алар ӱчӱн иткен. ¹⁵ Ол оңдайнаң ӧлерінең хорыхчатханнаңар чуртастары тооза хулда чӧрген кізілерні пос иткен. ¹⁶ Пілдістіг нооза Иисус ангеллерге нимес, че Авраамның# тӧліне полысча. ¹⁷ Аннаңар Иисусха, Худайның алнында сын паза чағбан чӱректіг иң улуғ абыс# полар ӱчӱн, Авраам тӧлі осхас поларға кирек. Прай ол ниме Худайдаң кізілернің чазыхтарын тастабызардаңар сурынып алар ӱчӱн полған. ¹⁸ Иисус, Позы даа сынатырған паза ирееленген ӱчӱн, амды сынатырчатхан кізілерге полыс полар.

Иисус Моисейдең улуғ

¹ Ах-арығ# харындастар, пісті дее Худай тигірзер хығыртхан! Худай пістің киртінізібістің иң улуғ Абызы поларға тіп ысхан Иисустаңар сағынчадыңар. ² Моисей# Худайның туразындағы тоғысха киртістіг полған чіли, Иисус таа Аны ысханға киртістіг полған. ³ Тураны пӱдірген кізі пӱдір салған туразынаң артых сабланысха турысча. Иисус таа ідӧк Моисейнің сабланызынаң артых сабланысха турысча. ⁴ Ноо даа тураны кем-де пӱдір салған. Худай, тізең, прай нимені пӱдір салған. ⁵ Моисей, Худайның чонына полызып, киртістіг нымысчы полған. Аның пастыра Худай соонаң полар нимедеңер чарлаан. ⁶ Христос, тізең, Худайның Оолғы полып, Худайның туразынаң устирға турғызыл парған. Піс – Аның туразыбыс, сынап, тӱгеде махачы тудынчатсабыс паза Худайға ізенізібіснең махтанзабыс.

Худай пирчеткен тынанҷаң орын

⁷ Аннаңар Худай Худы піди тіпче: «Пӱӱн Худайның ӱнін исчетсеңер, ⁸ тас чӱректіг полбаңар. Ӧбекелерің, хуу чазыда сынатхан туста Мағаа удурласханда, андағ полғаннар. ⁹ Олар хырых чыл изере мин иткен киректерні кӧргеннер. Андағ даа полза, Мині сыныхтааннар паза Минің тыстанызымны сынааннар. ¹⁰ Аннаңар Мин, пу тӧлге тарынып, теем: „Чӱректері Миннең ырап ла одырча, Минің чолларымны олар пілбинчелер“. ¹¹ Пу тӧлге ӧкпем кӧдіріл парып, сӧс пиргем: „Мин пирчеткен тынанҷаң орынға олар хаҷан даа кірбестер“».

¹² Харындастар! Чӱректерің чабал, сын нимес полбазын, тіріг Худайыбыстаң хыйа парбазын тіп, сизініңер. ¹³ Чазых сірерні чолдаң хыйыстырыбызып, ӧчес пол парбастарың ӱчӱн, кӱннің сай удур-тӧдір кӧңнілерің кӧдірізіңер. Іди Худай Пічиинде «пӱӱн» тіпчеткен тус иртіскенҷе итчедіңер. ¹⁴ Піс Христоснаң хада тоғынчабыс. Сынап пастабох алған чуртасты ікінҷілес чох читіре хайраллап халзабыс, іди ле пол турар. ¹⁵ Худай Пічиинде чоохталча нооза: «Пӱӱн Худайның ӱнін исчетсеңер, тас чӱректіг полбаңар. Ӧбекелерің, хуу чазыда сынатхан туста Мағаа удурласханда, андағ полғаннар».

¹⁶ Худайның ӱнін истіп, Ағаа удурласхан кізілер кемнер полғаннар? Моисей Египеттең сығарған кізілернің прайзы полған нимес пе зе? ¹⁷ Кем Худайны хырых чыл ӧкпелендірген? Чазых ит салып, сӧӧктері хуу чазыда чат халған кізілер полбаан ма ол? ¹⁸ Кемні Худай «Мин пирчеткен тынанҷаң орынға олар хаҷан даа кірбестер» тіп харғап салған? Ағаа удурласханнарны нимес пе зе? ¹⁹ Ам піс кӧрчебіс: олар Худай молҷаан орынға киртініс чохтарынаңар кір полбааннар.

¹ Худай піске тынағ пирерін молҷаан. Аннаңар, піреелерің аны ал полбин халбас ӱчӱн, сизіктіг полыңар. ² Піске дее, Моисейнең хада парғаннарға чіли, Чахсы Хабар читірілген. Че олар искен нимені посха албааннар, киртінмееннер. Аннаңар оларға ол хабар туза полбаан. ³ Піс, киртінчеткеннер, Худай молҷаан тынағны алчабыс. Худай, тилекей чайалғанда, прай тоғызын ит салған даа полза, піди теен: «Пу тӧлге ӧкпем кӧдіріл парып, сӧс пиргем: „Мин пирчеткен тынанҷаң орынға олар хаҷан даа кірбестер“». ⁴ Худай Пічиинде хайда-да чоохтал парған нооза: «Читінҷі кӱнінде Худай, прай Позының тоғызын ит салып, тынанған». ⁵ Че олох туста піди чоохталча: «Мин пирчеткен тынанҷаң орынға олар хаҷан даа кірбестер». ⁶ Пу Чахсы Хабарны пурнада искен кізілер, Худайның чооғын испееннеңер, пу тынаға чит полбастар. Аннаңар пасха кізілерге тынағ ал полҷаң оңдай пар. ⁷ Худай, наа кӱн чарлап, аны «Пӱӱн» тіп адап салған. Кӧп тус ирткен соонаң Худай анзын Давид# ханның пастыра чарлаан. Алында чоохталған полған: «Пӱӱн Худайның ӱнін истіпчетсеңер, тас чӱректіг полбаңар».

⁸ Иисус Навин оларға Худай молҷаан тынағ пирген полза, аның соонда пасха кӱннеңер чоохталбасчых. ⁹ Аннаңар Худайның чонына Худай тынанған осхас тынағ пирілер. ¹⁰ Худай молҷаан тынағны алған кізілер, Худай Позының тоғызынаң тынанған чіли, постарының тоғыстарынаң тынанып алғаннар. ¹¹ Пу тынағ орнына кірер ӱчӱн, прай ниме идерге кӱстенееңер. Моисейнең хада чӧргеннер чіли, чоох испес полбааңар.

¹² Худайның сӧзі тіріг паза позының тоғызын ит парча. Ол ікі сари чітіділген хылыстаң даа чітіг. Ол, тирең ӧтіп, кізінің тынын худынаң, сӧӧктерін, тізең, чіліңнерінең чар полар. Ол туйух сағыстарны даа, чӱректің чазыт хынығыстарын даа чарғылапча. ¹³ Худайдаң пір дее ниме чазыр полбассың. Прай чайалған ниме Аның хараа алнында паза Ағаа азых. Аның алнында піс иткен киректерібіс ӱчӱн нандырығ тударбыс.

Иисус пістің иң улуғ абызыбыс

¹⁴ Пістің Иң улуғ абыс Худай Оолғы Иисус пар. Аның тигірдегі Худайның алнында даа турыбызар оңдайы пар. Аннаңар пістің киртінізібіске пик тудыныңар. ¹⁵ Читпестерібіске чӱрексібес иң улуғ абыс нимес ол. Пістің прайзыбызох чіли, Ол сынатхан, че чазыхха кірбеен. ¹⁶ Аннаңар піске паарсазы толдыра Худайның алнына тідімніг килерге чарир. Анда хызылчатхан тузыбыста піске полыс пирер ӱчӱн, Худай піске ӧлҷей паза паарсас пирер.

¹ Кізілернің санынаң табылған ноо даа иң улуғ абыс оларның ӱчӱн Худайның нымызына чӧрерге турғызыл парған. Ол, Худайға сыйыхтар салып, кізі чазыхтары ӱчӱн тайығ# итче. ² Ол иң улуғ абыстың читпестері пар. Аннаңар ол, пілістері читпинчеткен паза алҷаастар итчеткен кізілерге айап, ӧкпезін читірбинче. ³ Позының читпестері пардаңар, тізең, ағаа пасхаларының на чазыхтары нимес, че позының даа чазыхтары ӱчӱн тайығ идерге кирек. ⁴ Пос кӧңнінҷе пірдеезі иң улуғ абыс пол полбас. Ааронны таллаан чіли, иң улуғ абысты Худай таллир.

⁵ Ол оңдайнаң Христос таа иң улуғ абыстың сабланызын паза адын Позы албаан. Че Худай Ағаа теен: «Син Минің Оолғымзың. Пӱӱн Мин Сині тӧріттім». ⁶ Худай Пічиинің паза пір орнында Худай тіпче: «Син хаҷан даа Мелхиседек осхас абыс поларзың». ⁷ Иисус чир ӱстӱнде чӧргенде, пазырып ала, харах чазын тӧгіп, оорлап, Худайны алдаан. Аның Иисусты ӧлімнең ал халар оңдай полған нооза. Иисус, Худайны улуғлап, Аның чооғын искен, аннаңар Худай Аның алданызын ис салған. ⁸ Че Иисус Худайның Оолғы полза даа, Ол ирееленістің пастыра чоох истерге ӱгреніп алған. ⁹ Хаҷан Ол кирек тиміне чит парғанда, Аның чооғын исчеткен кізілерге мӧгі арачыланыс пирҷең оңдай полған. ¹⁰ Худай, тізең, Аның, Мелхиседек осхас, иң улуғ абыс полыбысханын чарлаан.

Киртіністі тастабаңар

¹¹ Анзынаңар мин сірерге кӧп чоохтап поларҷыхпын. Сірер истерге арғаастанчатханнаңар, анзын сірерге оңарылдыра чоохтирға сидік. ¹² Сірерге постарыңа ӱгретчі полыбызарға тус читкіҷе полған. Че Худай сӧзі чоохтапчатхан олаңай нимелерге сірерні ам даа ӱгредерге кирек. Пасха оңдайнаң чоохтаза, улуғ кізі чіпчеткен чиистің орнына сірер ам даа сӱтнең не азыранчазар. ¹³ Сӱтнең азыранчатханы ыңааҷах полча. Андағ кізі чахсынаң чабалны талластыр полар ба за. ¹⁴ Хатығ чиис улуғ кізілерге пиріледір. Олар кӧпті кӧргеннеңер, чахсыны чабалдаң талластыр пілчелер.

¹ Христостаңар ӱгредігнің пастағларын ӱзӱрбин, пик киртіністіг кізілерге килістіре чоохха кірееңер. Аннаңар, киртіністің тӧстеен хатап салбин, Худайға кирек чох киректерні тастирдаңар паза киртінеріне айланардаңар ӱгретпееңер. ² Кіреске тӱзерінеңер#, кізілернің пастарына хол салардаңар, ӧліглер тірілерінеңер паза тӱгенҷі кӱннің# чарғызынаңар чоохтаспааңар. ³ Итсе, Худай пирзе, анзын даа чоохтазарбыстар. ⁴ Пірее кізілер киртіністерінең хыйа парчалар. Олар Худайның чариинаң чарыдыл парған полғаннар. Олар тигірдең тӱскен сыйыхты сынааннар, оларның істілерінде Худай Худы полған. ⁵ Олар Худай сӧзі чахсы полчатханын чуртастарында постары кӧргеннер, Худай ӱлгӱзінің кӱзін сизінгеннер. ⁶ Че олар киртіністерін тастабысханнар. Андағ кізілерні Худайға хатап айландырҷаң оңдай чоғыл. Олар, Худайның Оолғын хатап кіреске хазап, Аны уйатха сухчалар нооза. ⁷ Наңмыр кӧп хати суғлаан чир, анда тоғынчатхан кізілерге тузалығ ӧзімнер ӧскіріп, Худайның алғызын алча. ⁸ Че пуртах отнаң хазалҷыхтар сығарчатхан чир пір дее нимее чарабинча. Андағ чирні Худай харғапча. Ол ӧртке чох иділер.

⁹ Хынғаннарым! Піс піди тіпчеткен дее ползабыс, сірерні андағ ниместер тіп ізенчебіс. Піс сірернің арачыланысха тудынчатханнарыңны пілчебіс. ¹⁰ Худай саба идер чоғыл. Ол сірернің хайди тоғынғаннарыңны паза Позына хайди хынғаннарыңны ундутпас. Сірер Худайға хынчатханнаңар, пасха ах-арығ кізілерге полысхазар паза полысчазар нооза. ¹¹ Мындағ кӱстеністі сірернің полғаны ла тӱгенҷізіне теере кӧзітсін тіп сағынчабыс. Андада прай ізенчеткен нимелерің толар. ¹² Піс, сірерні арғаастанмазыннар, че киртінчеткен паза прай нимее тыстанчатхан кізілерге кӧӧксіннер тіп, сағынчабыс. Андағ кізілер Худай молҷаан нимені аладырлар.

Худайның ізестіг сӧс пиргені

¹³ Худай Авраамға сӧс пирчеткенде, киречее Позы Позын турғысхан. Позынаң улуғ пірдеезі чох полған нооза. ¹⁴ Худай теен: «Мин сині алғирбын паза кӧп тӧл сағаа пирербін». ¹⁵ Авраам, тыстанаачызы ӱчӱн, Худай молҷаан нимее читкен. ¹⁶ Кізілер молҷапчатсалар, постарынаң улуғны киречее хығыртчалар. Ноо даа таласты молҷағнаң тоозадырлар. ¹⁷ Худай кізілерге молҷағ пирген. Ол даа Аның молҷаа хайди даа толарын кізілерні пілзіннер тіп сағынған. Аннаңар Ол пу молҷағларның киречізіне Позы Позын турғысхан. ¹⁸ Худайның киречілезі паза молҷаа алызар чоғыллар. Оларны пиріп, Худай чойлан полбас. Аннаңар піс, пу ізеніске килген чон, аның толарына кӧмес тее ікінҷілебинчебіс. ¹⁹ Пу ізеніс піске пик паза ізестіг керіп кӧспезі осхас полча. Ол ізеніс пісті Худай храмының кӧзеңезі кистіндегі иң ызых# орынзар апарча. ²⁰ Иисус, піске чол азып, андар кірген. Ол, Мелхиседек осхас, тӱгенмес тустарға иң улуғ абыс полыбысхан.

Мелхиседек Авраамнаң улуғ

¹ Мелхиседек+ 7:1 Мелхиседек – кӧр: Пурунғы Молҷағның «Пастағлар» (Бытие) киндезі. Салим саарның ханы паза Ӧӧркі Худайның абызы полған. Авраам, кӧп ханнарны чиңіп, айланчатханда, Мелхиседек аны, удурлап, алғаан. ² Авраам ағаа чаада утып алған аниинаң онынҷы чардығын пирген. Мелхиседек ат «арығ чӱректіг кізілернің# ханы» паза «амыр хоныхтың ханы» теенін таныхтапча. «Салим» – ол «амыр хоных» теені нооза. ³ Мелхиседектің паба-іҷезі, ӧбекелері кем полғаны пілдізі чоғыл. Аның тӧреенінеңер дее, ӱреенінеңер дее пір дее ниме пілбинчебіс. Ол, Худай Оолғыох чіли, саңайға абыс полып халған.

⁴ Кӧріңер, Мелхиседек хайдағ илбек кізі полған. Авраам даа, израиль чонының илбек пабазы, позының чаа аниинаң онынҷы чардығын ағаа пир салған. ⁵ Прай чон Авраамның тӧлінең сыххан полза даа, че Левийнің абыс полчатхан оолларына Моисей Чахии# хоостыра чонның парызынаң онынҷы чардығын аларға чарадылча. ⁶ Мелхиседек, Левийнің тӧлі полбинчатса даа, Авраамның чаа аниинаң онынҷы чардығын алған. Іди идібізіп, ол Худайның молҷаан алған Авраамны алғабысхан. ⁷ Улии кічиин алғидыр. Анзында ікінҷілес чоғыл. ⁸ Парыстың онынҷы чардығын чыыпчатхан еврей абыстары ӧлерӧк кізілер. Онынҷы чардығын чыыпчатхан Мелхиседек, тізең, олардаң улуғ – аннаңар тӱгенмес хоныхтығ тіп чоохталча нооза. ⁹ Аннаңар чонның парызының онынҷы чардығын алчатхан Левийнің ооллары постарының Авраам ӧбекелерінің пастыра Мелхиседекке онынҷы чардығын пиргеннер тирге чарир. ¹⁰ Мелхиседек Авраамға тоғасхан туста Левий тӧреелек тее полған. Че ол Авраамның ӱрен-тӧлінде полған.

Иисус абыс Левийнің тӧлінең сыххан абыстардаң улуғ

¹¹ Моисей Чахии абыстарны Левийнің тӧлінең турғысхан. Ол абыстар Худайның пӧгінін толдыр полған ползалар, Худайға Ааронның оолларының+ 7:11 Аарон Левийнің тӧлінең полған. Иң улуғ абыстарны Ааронның на сӧбірезінең табарға чарадылҷаң. орнына Мелхиседек осхас абысты турғызары нимее киректелерҷік? ¹² Абыстарны алыстырғанда, Моисей Чахиин даа алыстырарға кирек. ¹³ Абыс тіпчеткен Хан-пигібіс Левийнің сӧӧгінең полбаан. Аның сӧӧгінең сыххан кізілернің пірдеезі тайыҷаң орында хайынмаан. ¹⁴ Хан-пигібіс Иуданың# тӧлінең сыхханын піс пілчебіс. Моисей, абыстардаңар чоохтап, Иуданың сӧӧгін адабаан. ¹⁵ Абыстарны табардаңар чахығ алыс парғаны, Мелхиседек осхас, пасха абыс сыхханы хоостыра улам чахсы кӧрінче. ¹⁶ Хан-пиг, кізі чахығлары хоостыра нимес, че мӧгі чуртас# пирчеткен кӱске тӧстеніп, абыс полыбысхан. ¹⁷ Худай Пічиинде аннаңар киречілес пар: «Син хаҷанға даа Мелхиседек осхас абыс поларзың». ¹⁸ Абыстардаңар пурунғы чахығ, кӱзі паза тузазы чохтаңар, хыйа иділген. ¹⁹ Моисей Чахии пісті Худайға кӧні ағылбаан. Че амды пісті Худайға чағдатчатхан артых ізеніс пирілген. Аннаң пастыра піс Худайға чағдапчабыс.

²⁰ Худай, Хан-пиг хаҷан даа абыс полар тіп, молҷаан. ²¹ Андағ молҷағ пасха абыстарға пірдеезіне пирілбеен. Иисусха, тізең, Ол піди тіп молҷаан: «Хан Худай# молҷаан паза пирген сӧсті сайбабас: „Син хаҷан даа Мелхиседек осхас абыс поларзың“». ²² Худай сӧс пирген. Аннаңар иң артых молҷағ сынында тоғынарына Иисус киртістіг киречі полча. ²³ Абыстар, тустары чидіп, ӧл парҷаңнар, оларның орныларына пасхалары турғызылҷаңнар. Аннаңар турғызылған абыстар кӧп полған. ²⁴ Че Иисус саңайға абысха турғызыл парған. Аның абыс полары тӱгенмес. ²⁵ Аннаңар Ол Худайға Позының пастыра килчеткеннерні хаҷан даа арачылап полар. Иисус, олардаңар Худайдаң сурынары ӱчӱн, тӱгенмес хоныхтығ полар. ²⁶ Иисус піске иң килістіре улуғ абыс полча: ах-арығ, чабалы чох, пырозы чох. Ол чазыхтығлардаң арон турча паза Ағаа тигірдең пӧзік орын пиріл парған. ²⁷ Иисусха, пасха абыстарға чіли, кӱннің сай тайығ идерге кирек чоғыл. Олар аны пастап постарының, анаң кізілернің чазыхтары ӱчӱн итчедедірлер. Ол, тізең, прайзының ӱчӱн пір хати паза хаҷанға даа Позын тайыға пир салған. ²⁸ Моисей Чахии абыстарға олаңай, читпестері пар кізілерні турғысчаң. Че Моисей Чахииның соонда пирілген молҷағ хаҷан даа прай чахсы нименің толымы полчатхан Оолғын турғыс салған.

Иисус пістің иң улуғ абызыбыс

¹ Піс чоохтапчатхан нименің ӧӧні мындағ: тигірде Илбек Худайның оң саринда одырчатхан иң улуғ абызыбыс пар. ² Ол иң ызых орындағы иң улуғ абыс полча. Ол орын, тізең, кізі холы нимес, Хан Худай пӱдірген сын ызых отах полча.

³ Полған на иң улуғ абыс Худайға сыйыхтар ағыладыр, тайығ идедір. Аннаңар пістің дее иң улуғ абызыбыстың ағылҷаң нимезі поларға кирек. ⁴ Мында, чир ӱстӱнде, Моисей Чахиинда чоохталчатхан тайығларны итчеткен абыстар парлар. Аннаңар пістің иң улуғ абызыбыс чир ӱстӱнде чуртаан полза, ол абыс пол полбасчых. ⁵ Че хаҷан Моисей ызых отах пӱдірерге итчеткенде, Худай ағаа теен: «Прай нимені, мин сағаа тағда кӧзіткен оңдайҷа иділзін тіп, сыныхтабыс тур». Аннаңар чирдегі абыстар, тигірдегізіне кӧӧгіп, хобырғаннарына ла килісче. ⁶ Амды Худай Иисусты чирдегі абыстарның тоғыстарынаң артых тоғысха таллап алған. Моисейге Худай пирген Молҷағның# хыринда Иисус пирген Молҷағ кізілерге артых нимелерге ізеніс пирче нооза.

⁷ Пастағы Молҷағның читпестері полбаан полза, ікінҷізі киректелбесчік. ⁸ Че Худай, Позының чонында читпес сарин кӧріп, теен: «Израильнең Иуданың чонына Наа Молҷағ пирер кӱннер чидіп одырлар, – тіпче Хан Худай. ⁹ Пу Молҷағ алындағызынаң, Мин ӧбекелеріңні Египеттең чидектеп сығарған тустағызынаң, пасха. Олар андағы Молҷағны толдырбааннаңар, Мин оларны позымнаң хыйа иткем. ¹⁰ Хан Худай ідӧк тіпче: Килер кӱннерде Израиль чонына пирҷең Молҷаам мындағ полар: Минің чахығларымны оларның сағыстарына сиир саларбын, чӱректерінде пас саларбын. Мин оларның Худайы поларбын, олар, тізең, Минің чоным поларлар. ¹¹ Андада оларның прайлары, иң кічиинең иң улиина теере, Мині пілерлер. Аннаңар кізі кізее алай харындас харындазына „Худайны пілеріне чол ас пирим“ тирге кирек чох полар. ¹² Мин оларның пыроларын тастирбын, оларның чазыхтарын паза чабал киректерін ундут саларбын». ¹³ Мыны Худай «Наа Молҷағдаңар» теен. Анзы алындағы Молҷағ иргілен парғанын киречілепче. Иргілен парған ниме, тізең, табыраанҷа чох иділ парча.

Чирде паза тигірде пазырары

¹ Пастағы Молҷағда Худайға хайди пазырардаңар чоохталған. Аның хоостыра ызых отах турғызылған. ² Анда «ызых орын» полған. Ол орында чарытхылар полған паза Худайға салылған халастығ стол турған. ³ Кӧзеңе кистінде «иң ызых орын» тіп адалчатхан пӧлік полған. ⁴ Анда тадылығ чыстығ отты ӧртеҷең алтын чайындылығ орын полған паза алтын тастылығ сундух турған. Сундухта манналығ алтын ідіс, Ааронның хаҷан-да пӱрленібіскен тайағы паза Молҷағ пазылған чалбах тастар чатханнар. ⁵ Сундухтың ӱстӱнде ханаттығ ікі ангел иділ парған. Оларның аразында Худай позының сабланызында кӧрін парҷаң. Ангеллернің ханаттары Худай чонның чазыхтарын тастаҷаң орынны кӧлеҷеңнер. Че сағам анзын изерістіре чоохтиры кирек чоғыл.

⁶ Ызых отахта прай ниме піди иділік полған. Абыстар кӱннің сай, постарының тоғызын идерге тіп, пастағы улуғ отахха кірҷеңнер. ⁷ Ікінҷі отахха, тізең, пір чылда пір хати иң улуғ абыс ла кірҷең. Ол андар соххан малның ханын кир салҷаң. Ол хан, позын паза оңнабин халып, сайбағ иткен ӱчӱн, чазыхха кір парған кізілерні арығлаҷаң. ⁸ Пу кибірлер пастыра Худай Худы, пастағы ызых отах турғанҷа, иң ызых орынзар чол азылбазын піске кӧзітче. ⁹ Ол ызых отах пістің тустың омазы полча. Пу туста ағылған сыйыхтар паза иділген тайығлар оларны итчеткен кізіні арығ чӱректіг итпинчелер. ¹⁰ Моисей Чахииның чарадығлары чиилчеткен, ізілчеткен нимелердеңер, аймах чууныстардаңар чоохтапчалар. Олар ідӧк кізінің істін алыстырбинчатхан чахығлардаңар чоохтапчалар. Олар Худай прай нимені наа оңдайнаң идібізер тусха теере пиріл парғаннар. ¹¹ Че Христос, киліп, піске сооңар полар чахсы нимелернің иң улуғ абызы полыбысхан. Позының тоғызын итчеткен ол ызых отах кізі холынаң пӱдірілген ызых отахтаң хай-хай артых. Ол пу чирде турбинча нооза. ¹² Христос иң ызых орынға кіргенде, ӧскілернің алай пызоларның ханын хада албаан. Че Позының ханынаң пір хати андар кіріп, пісті хулдаң саңайға позытхан. ¹³ Ӧртеен хазыраның ойбазынаң поралалған ӧскілернең пуғаларның ханы, Чахығ хоостыра Худайның алнында чазыхтығ кізілерге чачырадылып, оларны арығлапчатхан полза, ¹⁴ андада Христостың ханы хай син артых арығлап полар. Ол Позы пір пыро чох полчадып, Худай Худының пастыра Позын тайыға Худайға пирінген. Амды Ол пісті, ӧлімге ағылчатхан киректердең арығлап, тіріг, сын Худайның нымысчылары поларға ӱгрет салар.

¹⁵ Аннаңар піске Наа Молҷағны пирген кізі Христос полча. Ол кізілернің пастағы Молҷағның тузында иткен сайбағлары ӱчӱн ӧл парған. Аның сылтаанда Худай мӧгі чуртас аларға хығыртхан кізілерге молҷаан нимені пирче. ¹⁶ Кізінің хумартхы сӧзі+ 9:16 Грек тілінде «хумартхы сӧс» паза «молҷағ» теенін пір сӧс таныхтапча. толдырылар ӱчӱн, ол кізі ӧл парарға кирек. ¹⁷ Кізі тірігде, аның хумартхы сӧзі кӱзіне кірбеен полча. ¹⁸ Аннаңар, пастағы Молҷағ алылчатханда, хан киректелген. ¹⁹ Моисей пастап Чахииның чарадығларын чонға чарлаан. Анаң пызоларның паза ӧскілернің ханын алып, суғнаң порабысхан. Аның соонда хызыл ӧңе сырлалған тӱкті паза иссоп ағастың салаазын алып, ханнығ суға ӧллеп, чонға паза Чахығ киндезіне чачыратхан. ²⁰ Анзын идіп ала, ол теен: «Пу хан Худай сірерні толдырзыннар тіп чахаан Молҷағның киречізі полча». ²¹ Пуох ханнаң ызых отахха паза анда тузаланылчатхан ідістерге чачырадыбысхан. ²² Моисей Чахии хоостыра прай даа ниме ханнаң арығлалча. Чазых таа, хан тӧгілзе ле, позыдылча.

Христостың тайии чазыхтаң арығлапча

²³ Тигірдегіні сомнапчатхан нимелер малның ханынаң арығлаларға кирек полғаннар. Че тигірдегізі сын позы аннаң артых тайығ киректепче. ²⁴ Христос, тигірдегізін сомнапчатхан, кізі холы иткен иң ызых отахха кірбеен. Ол, амды пістің ӱчӱн Худайның алнында турызарға тіп, тигірге кірген. ²⁵ Кізілернің абызы позының ханын нимес иң ызых орынзар пір чылда пір хати кирҷең. Че Христосха Позын тайыға хати-хати саларға кирек чоғыл. ²⁶ Іди киректелген полза, Ағаа, чир пӱткеннең ала, кӧп хати ирееленерге килізерҷік. Ағаа, тізең, чазыхты чох идер ӱчӱн, Позын тайыға пиріп, тӱгенҷі кӱннерде пір ле хати килерге киректелген. ²⁷ Полған на кізее, пір хати ӧліп, Худайның чарғызында турарға киліс парча. ²⁸ Христос таа ідӧк, кӧп чонны чазыхтаң арығлабызар ӱчӱн, Позын пір хати тайыға салған. Ікінҷізін ол, чазыхтаң арығлабызарға тіп нимес, че Аны сағыпчатханнарны арачылир ӱчӱн килер.

¹ Моисей Чахии сын нименің киртістіг омазы даа полбаан. Ол килер чахсы нименің кӧлегі ле полған. Чахығ хоостыра кізілер чылдаң чылға пір тӧӧй тайығлар итчеңнер. Че анзы тайығ итчеткен кізілерні артых итпинче. ² Тайығ иткені кізілерні чазыхтарынаң пір хати сынап арығлабысчатхан полза, олар андада, постарын пыро чох тіп санап, тайығларны паза итпесчіктер. ³ Сынында, тізең, чылның сай иділчеткен тайығлар кізілерні чазыхтарынаңар сағындырғаннар. ⁴ Пуғаларның паза ӧскілернің ханы кізілерні чазыхтарынаң арығлап полбас нооза. ⁵ Аннаңар Иисус, тилекейзер парчатханда, Худайға теен: «Син сыйыхтарны паза тайығларны киректебинчезің. Че син мині кізі ит-ханнығ поларға тимнеп салғазың. ⁶ Син кізілернің, чазыхтаң арығланарға идіп, тайығ орнында малны ӧртепчеткеннерін дее, тайығ итчеткеннерін дее кӧңніңе албинчазың. ⁷ Андада Мин теем: „Мин мынабын. Миннеңер Моисей Чахиинда пазылғаны хоостыра, Худай, Мин Синің кӧңніңні толдырарға парирбын“». ⁸ Иисус пастап теен: «Син кізілернің чазыхтардаң арығланар ӱчӱн малны ӧртепчеткеннерін паза тайығ итчеткеннерін кӧңніңе албинчазың». Прай пу тайығлар Моисей Чахии хоостыра иділчелер. Андағ даа полза, Ол іди теен. ⁹ Анаң Иисус теен: «Мин мынабын, Худай, синің кӧңніңні толдырарға парирбын». Анзы Моисей Чахии хоостыра иділчеткен тайығларны чох итчеткенін, оларның орнына Христостың тайиин турғысчатханын таныхтапча. ¹⁰ Иисус Христос Худай Аннаң киректеен нимені иткен. Аннаңар Иисус Христостың иді-ханы пір хатап тайыға салылғанынаң піс прайзыбыс чазыхтаң арығланчабыс.

¹¹ Полған на абыс, кӱннің-таңда храмда# тоғынып ала, кӧп хати олох ла тайығларны идедір. Че ол тайығлар кізілерні чазыхтаң арығлап полбинчалар. ¹² Христос, тізең, чазыхтар ӱчӱн пір ле тайығ иткен. Аның салған тайии саңайға даа читче. Анзын ит салғанда, Ол Худайның оң саринда одыр салған+ 10:12 Пу стихты ідӧк піди оңарарға чарир: «Христос, тізең, чазыхтар ӱчӱн пір ле тайығ иткен. Анзын ит салғанда, Ол Худайның оң саринда саңайға одыр салған». . ¹³ Анда одыра, Иисус Позының ыырҷыларын Худай Аның азаа алтына сал пирерін сағыпча. ¹⁴ Пір ле тайығ идіп, Христос чазыхтаң арығланчатханнарны саңайға сулу толдыра кізілер ит салған. ¹⁵ Худай Худы анзын киречілепче. Ол піди тіпче: ¹⁶ «Хан Худай теен: Килер кӱннерде оларға пирҷең Молҷаам мындағ полар: „Минің чахығларымны оларның чӱректерінде пас саларбын, оларның сағыстарына сиир саларбын. ¹⁷ Оларның чазыхтарын паза чабал киректерін, тізең, паза сағыста тутпаспын“». ¹⁸ Чазыхтар позыдылчатсалар, тайығ идері паза киректелбинче.

Худайға чағын полыңар

¹⁹ Харындастар! Иисус Христостың тӧгілген ханы піске иң ызых орынзар тідімніг кірерге чаратча. Ол піске наа чол, чуртас пирчеткен чол ас пирген. ²⁰ Пу чол кӧзеңе кистінзер, иң ызых орынзар апарча. Ол чолны Иисус Христос Позының иді-ханын тайыға салғанынаң асхан. ²¹ Амды Худайның прай ибінең устапчатхан пістің илбек Абызыбыс пар. ²² Худайға азых чӱректіг, пик киртіністіг килееңер. Чӱреебісті кірліг сағыстардаң арығлап, идібісті арығ суғнаң чууп алып, Ағаа чағдааңар. ²³ Пістің чоохтапчатхан ізенізібіске пик тудынааңар. Сӧс пирген Худайға піске киртінерге чарир нооза. ²⁴ Удур-тӧдір полызызааңар, хынарға паза чахсы киректер идерге кӧӧктірізееңер. ²⁵ Хай піреелері итчеткен чіли, чыылығларыбысты тастабааңар. Хан-пигібістің килер кӱні чағдапчатханын пілчеткенібісте, кӧңнілерібісті уламох кӧдірізееңер.

²⁶ Сынны піле-тура, чазыхта чуртирға хынчатсабыс, пісті чазыхтаң арығлап алҷаң тайығ чоғыл. ²⁷ Андада піске Чарғы кӱнін паза Худайға тоғырланчатханнарны чох итчеткен чалынны, хорығып ала, сахтиры ла халча. ²⁸ Моисей Чахиин сайбаан кізідеңер ікі-ӱс киречі чоохтаза, ол кізіні айағ чох ӧдірібісчеңнер. ²⁹ Андағ полза, Худайның Оолғын нимее салбинчатхан кізілернең ниме полар? Олар молҷағны таңмалапчатхан паза чазыхтардаң арығлаан ханның тӧгілгенін аарлабинчалар. Олар паарсах Худай Худын сӧклепчелер. ³⁰ Піс піди теен Худайны пілчебіс: «Мин ӧс аларбын. Мин оларға нандыр пирербін, тіпче Хан Худай». Ол паза піди теен: «Хан Худай позының чонын чарғылир». ³¹ Тіріг Худайның холына кір парары хорғыстығ. ³² Алындағы тусты сағысха киріңер. Худай чарии сірерге урыл парғанда, сірер, ирее кӧп тее кӧрген ползар, уттырбаазар. ³³ Сірерге кізілернің кӧзіне кӱлгеннер, хыйыхтааннар, пірееде ідӧк хыйыхтатчатхан кізілерге чӧлег поларға киліскен. ³⁴ Сірер мағаа, пиктегде полғанымда, полысхазар паза ис-пайыңар пыластырғаннарыңда, ӧрінгезер: сірернің тигірде аннаң артых, хаҷан даа тоозылбас пайыңар парын пілгезер нооза. ³⁵ Сірернің тідімніг тудынызыңар илбек сыйыхха турызар. Андағох ла полыңар. ³⁶ Худайның кӧңнін толдырар паза Ол сірерге молҷаан нимені алар ӱчӱн, тыстаныс кирек. ³⁷ Худай Пічиинде чоохталча нооза: «Тӱрче поларынаң килҷең Худай килібізер. Ол орайлатпас. ³⁸ Арығ чӱректіг кізі киртіністің сылтаанда чуртир. Че ол Миннең хыйа полыбысса, Мин ағаа чӧпсінмеспін». ³⁹ Піс хыйа айланыбысчатханнар паза ӧлім алчатханнар санынаң нимеспіс. Піс, худыбысты арачылап алар ӱчӱн, пик киртінчебіс.

Киртініс ниме полчатханнаңар

¹ Киртініс – ол ізенген нименің хайди даа толарын ікінҷілебинчеткені паза кӧрінмес нимелернің сынында поларын чахсы пілчеткені полча. ² Пістің ӧбекелерібіс киртіністері ӱчӱн Худайның кӧңніне кіргеннер. ³ Тиксі-тилекей Худайның сӧзі хоостыра пӱт парған. Анзын піс киртінізібіс пастыра ізестіг пілчебіс. Піс кӧрчеткен ниме харахха кӧрінмес нимедең пӱт парған. ⁴ Авель Худайға киртінген. Аннаңар аның тайии Каиннинең артых полған. Авельнің киртінізін кӧріп, Худай аның арығ чӱректіг полчатханын киречілеен. Аннаңар Худай аның тайиин алған. Авель ӧл тее парған полза, аның киртінізі пӱӱнгі кӱнге теере піске кӧзідім полча.

⁵ Енох Худайға киртінген. Ол, ӧлім кӧрбин, пу чирдең чіт чӧрібіскен. Пірдеезі аны таап полбаан. Аны Худай Позынзар ал парыбысхан. Че Худай Пічиинің киречілезі хоостыра, Худай аны Позынзар алғалахтох, Енох Худайның кӧңніне кірген полған. ⁶ Киртінізі чох кізілернің пірдеезі Худайның кӧңніне кірбес. Худайзар килчеткен кізілер Аның парына паза Худайны тілепчеткеннер Ағаа сыйыхтадарларына ізенерге киректер.

⁷ Ной Худайға киртінген. Худай хайдағ ниме поларын сизіндіргенде, Ной анзын пос хараанаң кӧргелек тее полза, Худайның чооғын истіп, керіп пӱдір салған. Ол керіпте позын паза сӧбірезін ал халған. Пу оңдайнаң Ной тилекейні чарғылаан. Ол, киртінгеннеңер, ахтатхан.

⁸ Авраам Худайға киртінген. Аннаңар Худай ағаа, позының чирін тастап, молҷаан чирзер парарға теенде, Худайның чооғын искен. Ол, хайдар даа парчатханын пілбин, чӧрібіскен. ⁹ Худай молҷаан чирге киліп, ол анда пасха хан-чирінің кізізі чіли чуртаан. Че андағ даа полза, ол киртінген. Ол анда отахта чуртаан. Исаакнаң Иаков# таа ідӧк чуртааннар. Оларға прайзына Худай молҷаа пирілген полған нооза. ¹⁰ Авраам Худайның сағызы хоостыра паза Аның кӱзінең пӱткен пик тӧстегліг саар поларын сағаан.

¹¹ Сарра Худайға киртінген. Аннаңар ол, тӧл кӧрбес тее полған полза, позында пол парып, частығда пала таап алған. Ол Худай молҷаана киртінерге чарир тіп пілген. ¹² Аннаңар пала кӧрбес частығ Авраамнаң кӧп тӧл тараан. Аның тӧлі, тигірдегі чылтыстар, талай хазындағы хум осхас, кӧп саннығ полған. ¹³ Піс чоохтапчатхан пу кізілер, Худайға киртініп ала, ӧл парғаннар. Олар Худай молҷаан нимені сахтап полбааннар. Молҷаан нимелерні ырахтын на кӧріп, ӧрінгеннер. Олар постарын пу чирге килген пасха чонмыс тіп санааннар. ¹⁴ Іди сананчатхан кізілер чир-суғларын тілепчеткеннерін киречілепчелер. ¹⁵ Тастап парыбызарға киліскен чирлерінеңер ле сағынған ползалар, олар андар айланарҷыхтар. ¹⁶ Че олар артых, тигірдегі, чирні тілееннер. Аннаңар Худайға, олар Аны постарының Худайы тіп адапчатсалар, уйадыстығ нимес. Худай оларға саар тимнеп пирген нооза.

¹⁷ Авраам Худайға киртінген. Худай, аны сыныхтап, Исаак оолғын тайыға салдыртханда, Авраам Аның чооғын толдырарға тимде полған. Худай Авраамға кӧп тӧл молҷаан, Авраам, тізең, чалғыс оолғын даа тайыға саларға тимде полған. ¹⁸ Худай, тізең, ағаа піди теен полған: «Мин молҷаан тӧлің Исаактаң тарир». ¹⁹ Авраам, Худайға киректелзе, Исаакты ӧліглердең тірілдір полар тіп сағынған. Аннаңар, пасхали чоохтаза, Исаак ағаа ӧліглердең нандыра пиріл парған.

²⁰ Исаак Худайға киртінген. Аннаңар ол, Иаковнаң Исавты алғап, килер тустарда кӧп ниме поларын молҷаан.

²¹ Иаков Худайға киртінген. Аннаңар ӱрир алнында ол Иосифтің оолларының полғанын на алғабысхан. Ол, тайағына тіреніп, Худайға пазырған.

²² Иосиф Худайға киртінген. Аннаңар ӱрир алнында, Израиль чоны Египеттең парыбызарын чоохтап, позының сӧӧгін хада апарыбызарға сурынған.

²³ Моисейнің іҷе-пабазы Худайға киртінгеннер. Аннаңар аны тӧрееннең ӱс айға читіре чазырғаннар. Олар, аның пасхаҷыл пала полғанын кӧріп, ханның час палаларны ӧдірерге пирген чахиинаң хорыхпааннар. ²⁴ Моисей Худайға киртінген. Аннаңар ол, ӧс парғанда, позын фараон хызының палазы аданарға хынминыбысхан. ²⁵ Ол иртісчеткен чазыхтың тадиин алғанҷа, Худай чонынаң хада иреені кӧрерін таллап алған. ²⁶ Ол Христости осхас ирееленістерні Египеттің прай пайынаң артых тіп санаан. Ол Худайның пирер сыйиин кӧрген нооза. ²⁷ Моисей, ханның хазырланарынаң хорыхпин, киртінгені хоостыра Египеттең сығыбысхан. Кӧрінмес Худайны кӧрген чіли, нандыра айланмасха пик пӧгін салған. ²⁸ Киртінізі хоостыра Па’сха тіп адалчатхан кибір идіп, ізіктерні ханнаң таңмалап салған. Ӧлім ағылчатхан Ангел, ханны кӧр салып, Израильнің тун оол палаларын ӧдірбеен. ²⁹ Киртінізі хоостыра чонынаң хада, Хызыл талайның тӱбі азыл парғанда, хуруғ чирҷе кис парыбысхан. Сӱріс килген Египет чааҷылары, ідӧк кизерге идіп, талайда пат парғаннар.

³⁰ Израиль чоны Худайға киртінген. Аннаңар Иерихон саарның ханаларын читі хати ибірібізіп, оларның иңзеріл парғанын кӧр салған. ³¹ Чӧреечі Раав Худайға киртін парған. Аннаңар ол китеге чӧрчеткен Израиль кізілерін амырнаң удурлаан паза аның соонаң киртінерге хынмаан кізілернең хада ӧдірт салбаан.

³² Хоза пірее ниме чоохтирға кирек пе? Гедеоннаңар, Варактаңар, Самсоннаңар, Иеффайдаңар, Давидтеңер, Самуилдеңер паза ухаанҷылардаңар чоохтирға тус чоғыл. ³³ Олар Худайға киртінгеннер. Аннаңар хан-чирлерні чиңеннер, Худайның кӧңніне кірчеткен нимелер иткеннер паза Худай оларға молҷаан нимені алғаннар. Олар ала парыстарның аастарын чаба тутханнар, ³⁴ хазыр кӧйчеткен оттарны ӱзӱрібісчеңнер, хылыстаң ӧлерінең арачыланып алҷаңнар. Оларның кӱс чоғы кӱске айлан парҷаң. Олар кӱстіг полып, чаалазығларда пасха хан-чирлерінің сиріглерін утып алҷаңнар. ³⁵ Ипчілер Худайға киртін парып, ӧл парған туған-чағыннарын тіріг айландырып алҷаңнар. Пасхалары, постарын харибдең позыдарынаң тоғыр саап, ирееледіп, тоозылғаннар. Олар, артых чуртасха тірілдірерлеріне ізеніп, іди иткеннер. ³⁶ Паза пасхаларын, иреелеп, соғып, палғап, харибге одыртчаңнар. ³⁷ Оларны тастарнаң чоо чаалаҷаңнар, игееснең чара игеҷеңнер, иреелеҷеңнер, хылыснаң ӧдірҷеңнер. Олар истебеен хой, ӧскі теерізін кис чӧрҷеңнер, хызылҷаңнар, оларны сӱрҷеңнер, хыйыхтаҷаңнар. ³⁸ Пу тилекей андағ кізілерге турыстығ нимес. Олар хуу чазыларзар, тағларзар тизіп, кӧңдей хайаларда, оймахтарда чазынып чуртап чӧргеннер. ³⁹ Олар киртіністерін ізестіг киречілееннер. Че Худай молҷаан нимені оларға пирбеен. ⁴⁰ Худай піске хайдағ-да артых ниме пӧгін салған. Худай оларны, піс чох иң артығына чидіп албазыннар тіп, іди иткен.

Худай хынчатхан кізіні хатығлапча

¹ Прай пу киречі полчатхан, толдыра киртіністіг кізілер пістің ибіре кӧп. Аннаңар, харығ полчатхан нимені хыйа тастап, пісті тутчатхан чазыхтаң позааңар, чарысчатхан чолыбысты ізестіг иртібізееңер. ² Иисусха кӧрееңер. Ол пістің киртінізібісті пастабызып, аны толдыра итче. Аны сағыпчатхан ӧріністі Иисус пілген. Че пастап, Ол уйаттаң хорыхпин, кіресте ирее кӧрген. Амды, тізең, Ол Худайның оң саринда одырча. ³ Ағаа нимені иртерге киліскенін сағысха алыңар. Чазыхтығ чонға хыйыхтадып, хайди ирееленген. Анзы сірерге, кӧңніңерні тӱзірбин, махачы тудынарға полыссын.

⁴ Сірерге хан тӧгілгенҷе чазыхнаң кӱрезерге киліскелек. ⁵ Алай Худай сірерні, Позының оолларын чіли, часхарғанын ундут салғазар ба? «Оолғым, Хан Худайның тӱзеткеніне хайбин полба, Ол сині хатығлапчатса, кӧңніңні тӱзірбе. ⁶ Худай хынчатхан кізіні тӱзетче паза „оолғым“ теен кізіні сохча». ⁷ Хан Худайның тӱзеткеніне сыдапчатсаңар, піліңер, ол сірерні, Позының оолларын чіли, іди тӱзетче. Пабазы тӱзетпеен пала пар ба? ⁸ Ноо даа паба-іҷе палаларын тӱзедедір. Аннаңар, Худай сірерні тӱзетпинчетсе, сірер Аның ооллары нимессер, сурас палаларзар. ⁹ Паба-іҷебіс пісті тӱзеткеннерінде, піс оларны улуғлаабыс. Улам тигірдегі Пабабыстың чооғын истерге паза ол оңдайнаң чуртас аларға кирекпіс. ¹⁰ Пістің паба-іҷебіс пос хынғанни ӱр нимеске ле тӱзет салҷаңнар. Худай, тізең, піске туза идіп, Позы осхас ах-арығ поларыбыс ӱчӱн, пісті тӱзетче. ¹¹ Пісті тӱзетчетселер, піс ӧрінминчебіс, че хомзынчабыс. Соонаң, тізең, тӱзетірген кізі, арығ чӱректіг пол парза, ол сыйыхха амыр хоныхты алар. ¹² Аннаңар тӱс парған холларыңны кӧдірібізіңер, пос пол парған чӱллеріңні хатырыбызыңар. ¹³ Кӧні чолларҷа чӧрінер: ахсапчатхан кізі частыхпазын, че айдас пол парзын.

Худайның кӧңніне кірер ӱчӱн хайди чуртирға

¹⁴ Прайзынаң хада ынағ чуртирға, ах-арығ поларға кӱстеніңер. Іди полбаза, Хан Худайны пірдеезі кӧрбес. ¹⁵ Кӧріңер, Худайның паарсазынаң сірернің пірдеезі хал парбазын. Сірернің араңарда ачығ тамырлар ӧс парбазын. Олар ӧсчеткен чирлерде кӧп кізі ооларына оох парча. ¹⁶ Араңарда чӧреечі алай Худайны улуғлабинчатхан кізі пол парбазын. Исав осхас кізілер пір азырал ӱчӱн улуғ оолның ӱлӱзін орнастырыбызарға тимделер. ¹⁷ Сірер пілчезер, соонаң ол пабазының алғазын аларға сағынған. Че иділ парған нимені тӱзет полбаан. Харах чазын тӧгіп ала пабазына алданған даа полза, хыйа тасталған.

Пурунғы паза Наа Молҷағ.

¹⁸ Сірер чалыннап кӧйчеткен Синай# тағзар, чыплама харасхызар, пӱрӱңкізер, хазыр чилге чағдабаазар. ¹⁹ Пырғы табызына, хазыр ӱнге дее килбеезер. Израиль чоны, ол ӱнні ис салғанда, аны паза испеске тіп алданған. ²⁰ Олар «Мал даа пу таға чағдаза, тастарнаң чааладарға кирек» тіп чоохталчатхан чахығдаң хорыхханнар. ²¹ Прай пу нименің хорғыстығ кӧріміне сыдаспин, Моисей теен: «Хорығып, халтырапчам». ²² Сірер, тізең, Сион тағзар, Тіріг Худайның саарынзар чит килгезер. Сірер кӧп ангеллер полчатхан тигірдегі Иерусалимзер килгезер. ²³ Худайның тун палаларының тигірибінзер# килгезер. Оларның аттары тигірде пазыл парғаннар. Сірер прай кізілернің Чарғыҷызы полчатхан Худайзар паза толдыра чахсы, арығ чӱректіг кізілерінзер килгезер. ²⁴ Сірер Наа Молҷағны пирген Иисуссар паза ханының чачырадызына килгезер. Аның ханы Худайдаң пыро тастирдаңар сурынча. Ол хан Авельнің ӧс алардаңар сурынчатхан ханынаң тың хысхырча. ²⁵ Кӧріңер зе, сірерзер айланчатхан Худайдаң тӧдір полбаңар. Худайның пу чирдегі чахығларын чоохтапчатхан Моисейні истерге хынмаан кізілер хатығлас чох халбааннар. Піс тее, тигірдең чоохтапчатхан Худайны испезебіс, улам хызааннадарбыс. ²⁶ Ол туста Аның ӱні чирні сілігібіскен. Ам, тізең, Ол сӧс пирген: «Чирні ле нимес, тигірні дее ам даа хатап сілігібізербін». ²⁷ «Ам даа хатап» теені прай чайаан нименің сілігіліп, чох иділерінеңер ізестіг киречілепче. Андада сілік полбас ла ниме чат халар. ²⁸ Піс изелбес хан-чирін алчабыс. Аннаңар алғыстап пілееңер. Алғыстап ала, Худайның кӧңніне килістіре Аның нымызына чӧрееңер. Пістің Худайыбыс прай нимені чох итчеткен чалын осхас. Аннаңар Аны улуғлааңар паза Аннаң хорығааңар.

Тӱгенҷі ӱгредіг чоох

¹ Удур-тӧдір, харындастар чіли, хынызыңар. ² Иб-чуртыңарға чол чӧрчеткен кізілерні кирчедіңер. Піреелері, іди идіп, постары даа пілінмин халып, ангеллерні аалҷы иттірлер. ³ Харибдегі кізілердеңер сағыныңар. Постарың пиктегде полған чіли, оларға сағыссыраңар. Ирееленчеткен кізілердеңер сағыныңар. Оларға, постарың ідӧк ирееленген чіли, айаңар. ⁴ Ирепчі палғалызын аарлаңар. Ирлері дее, ипчілері дее киртістіг поларға киректер. Оралысха паза чӧрееске сабылғаннарны Худай позы чарғылапча. ⁵ Ахчаа сабылбаңар, пар нимее чӧпсініңер. Худай Позы теен, хайза: «Сині халғыспаспын, сині тастабаспын». ⁶ Аннаңар піске тідімніг чоохтанарға чарир: «Худай мағаа полысча. Мағаа пір дее нимедең хорығарға кирек чоғыл. Ыырҷы мағаа хайдағ чабал ниме ит полар?» ⁷ Устағҷыларыңнаңар сағыныңар. Олар сірерні Худайның сӧзіне ӱгреткеннер. Олар хайди чуртаанын паза ӱреенін сағынып, олар киртінген чіли киртініңер. ⁸ Иисус алыспинча: киҷее хайдағ полған, пӱӱн дее, хаҷан даа андағох. ⁹ Ӧң-пасха паза пасхаҷыл ӱгредіглерге сірерні сын чолдаң апарыбызарға пирбеңер. Ниме чирге алай чібеске тіп чоохтапчатхан ӱгредіглер нимес, Худай паарсазы чӱректеріңні пик итсін. Андағ ӱгредіглернең айғасчатхан кізілер олардаң пір дее туза албинчалар. ¹⁰ Иерусалимдегі храмның абыстарына пістің тайиибыстаң алған малның идін чирге чарабас. ¹¹ Кізілернің чазыхтарының ӱчӱн иң улуғ абыс тайыға салылған малның ханын иң ызых орынзар апарҷаң. Малның иді, тізең, аал тастында ӧртелҷең. ¹² Аннаңар Иисус таа саар тастында ӧлген. Іди Ол Позының ханынаң кізілерні ахтаан. ¹³ Саар тастынзар сығааңар паза Ағаа кӧрерге киліскен уйатты хада ӱлезееңер. ¹⁴ Мында, чир ӱстӱнде, піске сыбыра чуртаҷаң саар чоғыл. Піс пӱдірілер саарны тілепчебіс. ¹⁵ Иисустың пастыра Худайны сыбыра сабландырааңар. Піс Худайның адын саблирбыс. Анзы аастаң сыххан пістің тайиибыс полар. ¹⁶ Кізілерге чахсы идерге ундубаңар. Удур-тӧдір полызызыңар. Іди иткені Худайның кӧңніне кірчеткен тайығ полча нооза. ¹⁷ Устағҷының чооғын истіңер, ол теен нимені идіңер. Оларға сірернің ӱчӱн Худайның алнында нандырығ тударға кирек. Аннаңар олар сірернің арачыланызыңардаңар сыбыра сағынчалар. Оларның чооғын иссеңер, олар тоғыстарын ӧрініп ала итчедерлер. Чоох испезеңер, тоғыстарын мӧңіссіреп ала идерлер. Анзы сірернің тузаңарға полбас.

Сурыныстар паза алғастар

¹⁸ Пістің ӱчӱн пазырыңар. Піс хаҷан даа орта идерге кӱстенчебіс. Аннаңар пістің сағыстарыбыс пісті чарғылабинчалар. ¹⁹ Худай мині сірерзер табырах нандыра ыссын тіп, улам тың пазырыңар. ²⁰ Иисус Худайның мӧгі Молҷаан Позының ханынаң таңмалабысхан. Ол оңдайнаң Ол Позының хойларының Илбек хадарҷызы полыбысхан. Амыр пирчеткен паза Иисусты тірілдірібіскен Худай сірерні ноо даа чахсы кирекке пик итсін. Чахсы киректер идіп, сірер Аның кӧңнін толдырчазар. Ол, тізең, Иисус Христостың пастыра сірерде тоғыс апарып, Позының кӧңніне кірер иде сірерні алыстырча. Иисусха хаҷан даа сабланыс ползын! Аминь#.

Тӱгенҷі сӧстер

²² Харындастар, мин сірерге пасхан сӧстерні чӱректеріңе алыңар тіп сурынчам. Пу пічиим тың узун нимес нооза. ²³ Піліңер, Тимофей харындазыбыс харибдең сыхты. Ол пу чағында минзер килзе, мин, сірернең тоғазарға парчатсам, аны хада алып аларбын. ²⁴ Сірернің устағҷыларыңа паза прай ах-арығ кізілерге изен читіріңер. Италий чиріндегі харындастар сірерге изен читірчелер. ²⁵ Сірерге прайзыңарға Худай паарсазы ползын. Аминь.