Галат чиріндегілерге

Павелнің Галат чиріндегілерге пічии

Тастых турған Галат чиріндегі (сағамғы Тӱрк чирінің ӧӧн чардығы) христиан тигірибін Павел наа эраның 40 чылларында пастағы миссионер чорығында тӧстеп салған.

Павел Галат чирінең парыбысхан соонда, тӱрче итпинең, киртініске наа ла айланған кізілерзер пасха ӱгретчілер килібіскеннер. Олар, Худайдаң арачыланыс алар ӱчӱн, Моисей Чахиин толдырарға паза сӱннет кистірерге кирек полчатханнаңар ӱгреткеннер. Олар ідӧк Павелнің, Христостаңар Чахсы Хабарны чарыда чоохтап, ӱгредері ӱчӱн, сынында пілізі читкіҷе нимес тіп, чоохтааннар. Павел анзынаңар піл салып, тың хомзын парған паза, пу чой ӱгредігдең тоғыр кӱрезер ӱчӱн, Галаттағы наа тигіриблерге пічік пазыбысхан.

Ол пічік нинҷе-нинҷе чардыхтығ пол парған: 1) Павел позының Христостың илҷізі хайди полыбысханынаңар чоохтааны (1–2 пастағлар); 2) Худай кізілерге Моисей Чахиин толдырчатханнаңар нимес, че Иисус Христосха киртіністің сылтаанда пирчеткенін киречілеені (3:1–5:12); 3) Чахсы Хабарның сылтаанда Худай Худы паза хыныс устапчатхан чуртастаңар пасханы (5:13–6:10); 4) тоозылғаны (6:11-18).

Алғас

¹ Кізілердең нимес, кізінің дее пастыра нимес, че Иисус Христостың паза Аны ӧліглердең тірілдірген Худай Пабаның пастыра илҷі# полыбысхан Павел Галат чиріндегі тигірибге# пасчам. Ідӧк миннең хада полчатхан прай харындастар сірерге изен читірчелер. ³ Худай Пабабыстаң паза Хан-пигібіс# Иисус Христостаң паарсас паза амыр хоных сірерге ползын. ⁴ Худай Пабабыстың кӧңні хоостыра Иисус Христос, пісті пу чабал тустардаң осхырарға тіп, пістің чазыхтарыбыс# ӱчӱн Позының чуртазын пир салған нооза. ⁵ Ағаа хаҷан даа сабланыс ползын. Аминь#.

Чалғыс сын Чахсы Хабар

⁶ Мин сірерге хайхапчам! Худай сірерні Христостың паарсазынаң хығыртхан. Сірер, тізең, пасха Чахсы Хабарға піди табырах сабылчазар. ⁷ Сынында пасха Чахсы Хабар чоғыл. Че сірерні алҷаахтырчатхан паза Христостың Чахсы Хабарын тискер чоохтапчатхан кізілер ле пар. ⁸ Піс позыбыс таа алай тигірдегі ангел# дее піс чарлабаан Чахсы Хабарны чарлап сыхса, анзына харғас тӱссін. ⁹ Сірер постарыңа алынған Чахсы Хабардаң пасхазын чарлапчатханнарға харғас тӱссін тіп, алында даа чоохтаан полғабыс, сағам даа мин чоохтапчам.

¹⁰ Ам мин кізілернің ме, Худайның ма чахсы хылынғанын тілепчем? Кізілернің кӧңнінҷе поларға кӱстенчем ме? Мин пу тузыма читіре кізілернің кӧңнінҷе пол чӧрерге харасхан ползам, Христостың хулы полбасчыхпын.

Павел хайди илҷі пол парған

¹¹ Харындастар, мин чарлаан Чахсы Хабар кізідең полбинчатханын сірерні пілзіннер тіп сағынчам. ¹² Мин аны кізідең алып ӱгренмеем, аны мағаа Иисус Христос асхан.

¹³ Мин иудей# чозахтарынҷа чуртап, Худай тигірибін чабал сӱргем паза аны чох идерге кӱстенгем. ¹⁴ Пістің сӧӧктегі пір кіримнерімнің аразында иудей чозахтарын мин прайзынаң артых толдырғам, ағаларыбыстың чахығларын кӧмес тее хыйыстырбасха кӱстенгем. ¹⁵ Ах-чарыхха тӧреенімдӧк, Худай Позының паарсазы пастыра мині таллап, мағаа чахсы кӧңнің кӧзідіп, ¹⁶ минде Позының Оолғын асхан. Ол анзын Худайы чохтарның аразында мин Иисус Христостаңар ӱгредерім ӱчӱн иткен. Мин кізілернең чӧптеспеем. ¹⁷ Миннең пурун илҷі полыбысханнарға даа тоғазарға Иерусалимзер парбин, Арав чирінзер чӧрібіскем. Анаң пазох Дамаск саарзар айланғам. ¹⁸ Ӱс чыл ирткен соонда, мин, Пётрнаң+ 1:18 Грек тілінде «Кифа» пазылған. «Кифа» Пётрның еврей ады. Кӧр ідӧк 2:11, 14. танызып аларға тіп, Иерусалимзер парғам. Анда он пис кӱн полғам. ¹⁹ Иаковтаң, Хан-пигнің харындазынаң, пасха илҷі кӧрбеем. ²⁰ Худай мағаа киречі, мин сірерге пір дее чой ниме паспинчам. ²¹ Аның соонда мин Сирий паза Киликий чирлерінзер парғам. ²² Христостың Иудей чиріндегі# тигіриблері, тізең, ол туста мині сырайға таныбааннар. ²³ Че ол кізілер миннеңер мыны искен полғаннар: «Пісті хаҷан-да сӱрген кізі позыох чох иткен киртіністі таратча». ²⁴ Аны истіп, олар минің ӱчӱн Худайны саблааннар.

Илҷілер Павелнең чӧпке кірчелер

¹ Аның соонда, он тӧрт чыл пазынаң, мин, Варнаванаң Титті хада алып, пазох Иерусалимзер парғам. ² Худайдаң азылғаны хоостыра чол сыххам. Мин Худайы чохтарның аразында чарлаан Чахсы Хабардаңар мындағы тигірибге искіріг иткем. Тигірибнің улуғларына, тізең, ӧнетін искіріг иткем. Алында даа, сағам даа кӱзім тик салбинчам ма тіп пілерім килген. ³ Че олар миннең хада полған Титті, грек тее полза, сӱннет# идерге кӱстебееннер. ⁴ Анзын харындастарыбыс пол чӧрген кізілер хысханнар. Олар, Иисус Христостың пастыра алған пос чуртазыбысты китирге сыынып алып, пісті пазох хулларға айландыр саларға пӧгінгеннер. ⁵ Піс, Чахсы Хабарның сынын сірерге хайраллап халарға кӱстеніп, оларның оңдайынҷа кӧмес тее полбаабыс. ⁶ Тигірибнің улуғларынаңар чоохтаза, мин кізілерні талластырбинчам. Худай даа талластырбинча. Олар, тізең, улуғлар, Чахсы Хабарға ӱгреткеніме хоза ниме хыспааннар. ⁷ Че улам олар мыны сизінгеннер: Пётрға иудейлернің аразында чіли, мағаа пасха чоннарның аразында Чахсы Хабарны чарлиры пирілген. ⁸ Худай Пётрны иудейлернің аразында илҷі поларға турғысхан. Олох мині пасха чоннарның аразында илҷі поларға турғысхан. ⁹ Тигірибнің орха-сӧӧгіне саналчатхан Иаков, Кифа паза Иоанн, мағаа пирілген паарсастаңар піл салып, хада полчатханыбысты киречілеп, мағаа паза Варнаваа холларын пиргеннер. Олар пістің пасха чоннарзар, постары, тізең, иудейлерзер парарларынаң чарас салғаннар. ¹⁰ Че пір нимедеңер сурынғаннар: чох-чоостарны ундубаңар. Мин анзын, пір дее хыйыстырбин, толдырарға кӱстенгем.

Пётрны іле сығарғаны

¹¹ Пётр Антиох саарзар килгенде, мин аның саба иткенін ағаа кӧні чоохтаам. ¹² Иаковнаң хайзы кізілер килгелекте, ол иудей нимес харындастарнаң хада чіҷең. Иудейлер килгеннерінде, тізең, олардаң хорығып, иудей нимес харындастардаң хыйа полып, алынҷа тудын сыххан. ¹³ Аны кӧріп, пасха даа иудейлер чойырхап чӧргеннер. Варнава даа оларның чойырхааннарына сабыл парыбысхан. ¹⁴ Че мин оларның Чахсы Хабарның сыны хоостыра тудынминчатханнарын кӧр салғанымда, андада Пётрға прайзының кӧзіне теем: «Син, иудей полчадып, иудей нимес пасха чон чіли чуртапчазың. Андағда ноға пасха чон иудейлер чіли чуртазын тіп кӱстепчезің?

¹⁵ Піс тӧрееннең иудейлербіс, піс Худайы чохтар осхас чазыхтығ нимеспіс. ¹⁶ Моисей Чахиин# толдырғаннаң нимес, че Иисус Христосха ла киртініс пастыра кізінің ахтанчатханын піліп алып, піс тее Христос Иисусха киртін сыххабыс. Піс Моисей Чахиин толдырғаннаң нимес, че Христосха киртінгеннең ахтанып алар ӱчӱн киртін сыххабыс. Моисей Чахиин толдырғанынаң пірдеезі ахтан полбас нооза. ¹⁷ Христоста ахтанып аларын тілепчетсебіс, позыбыс таа чазыхтығ пол парчатсабыс, андада Христос чазыхха тоғынчатхан полча ба? Чох, андағ нимес». ¹⁸ Мин позым сайбаан нимені хатап пӱдірчетсем, мин позым позымны сайбағҷы итчем нооза. ¹⁹ Моисей Чахии мині ӧліг ит салған. Мин, Худайға чуртир ӱчӱн, Моисей Чахиина ӧл парғам. Мин Христоснаң хада кіреске# хазаттырт салғам. ²⁰ Амды мин позым чуртабинчам, минде Христос чуртапча. Сағам пу позым чуртапчатханым, тізең, Худайның Оолғына киртініснең чуртапчатханым полча. Ол мағаа хынча паза минің ӱчӱн Позын ӧлімге пир салған. ²¹ Худайның паарсазын хыйа итпинчем. Че ахтанғаны Моисей Чахииның пастыра иділчетсе, Иисус тикке ле ӧл парғанға килісче.

Моисей Чахии алай киртініс

¹ Йо, сағыс чох галаттар. Сынның сӧзін испеске кем сірерні аптап алған? Мин сірерге Чахсы Хабарны чарлаанымда, сірерге Иисус Христостың кіреске хазаттыртханы іле кӧрінмеен ме? ² Сірердең пір ле ниме пілерім килче: сірер, Моисей Чахиин толдырып, Худай Худын# алғазар ба? Алай Чахсы Хабарны истіп, киртініс пастыра аны алғазар ба? ³ Сірер андағ сағызы чохсар ба? Сірер, Худай Худының устаанынаң чуртас пастап алып, амды пос кӱзіне ізен сыхтаар. ⁴ Анҷа кӧп сыдас парғаннарың тузазы чох полды ба? Йо, ол сыннаң даа тузазы чох полған ма? ⁵ Худай сірерге Худай Худын пирче паза сірернің араңарда хайхастар# итче. Ол аны Моисей Чахиин толдырчатханнарыңнаңар итче бе? Алай Чахсы Хабарны истіп, ағаа киртінчеткеннеріңнеңер итче бе? ⁶ Авраам# Худайға киртін парған. Аннаңар Худай аны ахталғанға санаан.

⁷ Киртіністіг кізілер сынында Авраамның ооллары полчатханнарын піліңер зе. ⁸ Худай киртініс пастыра пасха чоннарны ахтап салар тіп, Худай Пічиинде# азынадох чоохталған полған. Авраамға даа Чахсы Хабарның пастыра азынада чарлалған: синнең прай чоннар алғас# аларлар. ⁹ Аннаңар киртістіг Авраамнаң хада киртіністіглер алғас аларлар. ¹⁰ Моисей Чахиина тӧстенчеткеннер, тізең, харғадарлар. Пазылых нооза: чахығлар киндезінде прай пазыл парған нимені сыбыра толдырбинчатхан кізі харғадар. ¹¹ Моисей Чахиин толдырып, Худайның алнында ахтан полбазы іле кӧрінче. Арығ чӱректіг# киртіністің сылтаанда чуртир. ¹² Моисей Чахии, тізең, киртініске пір дее хайди теелбинче. Че чахығны толдырған сылтаанда чуртир. ¹³ Христос пісті Моисей Чахиинда пазылых харғастаң ал халған. Позы, тізең, пістің орныбысха харғатхан. Ағаста палғат салғаны харғатхан тіп пазылых нооза. ¹⁴ Авраамның алғазы Худайы чохтарға Христос Иисустың пастыра чидер ӱчӱн, Христос іди иткен. Аның сылтаанда піс тее Худайның молҷаан Худын киртініс пастыра аларбыс.

Моисей Чахии паза Худайның молҷаа

¹⁵ Харындастар! Олаңай кізі чіли чоохтапчам: кізінің дее хумартхы сӧзін пірдеезі сайбап полбас, ағаа пір дее ниме хос полбас. ¹⁶ Авраамға, тізең, паза аның ӱреніне молҷағлар пирілген полған. «Ӱреніңе» теені кӧп кізідеңер нимес, че пір кізідеңер чоохтапча. «Синің ӱренің» теені Христосты таныхтапча. ¹⁷ Мин мына ниме чоохтапчам: Христостаңар Молҷағны Худай алындох пирген. Тӧрт чӱс отыс чыл аның соонаң турғызылған Моисейнің Чахии Худайның Молҷаан сайбабинча паза аны чох итпинче. ¹⁸ Ӱлескен ӱлӱзін Моисей Чахиинаң пастыра ла алчатса, Худайның молҷаа хоостыра аны ал полбас. Итсе Худай паарсазын Авраамға молҷағ хоостыра читірген.

¹⁹ Моисей Чахии нимее киректір? Ол сайбағ ниме полчатханын кӧзідер ӱчӱн турғызылған. Моисей Чахии Худай молҷаан ӱрен килер тузына теере турғызыл парған. Ол чахығ ангеллернің пастыра чарастырығҷының холынаң пирілген. ²⁰ Пір кізее чарастырығҷы кирек чоғыл. Худай, тізең, пір.

Моисей Чахииның пӧгіні

²¹ Ол оңдайнаң Моисей Чахии Худайның молҷаана тоғыр ба? Чох! Тын пирчеткен чахығ полған полза, ол чахығ сыннаң ахтирҷых. ²² Че Худай Пічии прайзын чазыхтығ тіп чарлаан. Аннаңар Худай молҷаа Иисус Христосха киртініс пастыра киртінчеткеннерге пирілче. ²³ Киртініс килгелекте, тізең, пісті прайзыбысты чахығ хадарған. Піс пиктегде киртініс килер тусха теере полғабыс. ²⁴ Ол оңдайнаң, киртініс пастыра ахтадып алар ӱчӱн, чахығ піске Христоссар ағылған ӱгретчібіс полған. ²⁵ Киртініс килгенде, тізең, піс ӱгретчінің холындағы палалар полбиныбысхабыс. ²⁶ Сірер прайзыңар Христос Иисусха киртіністерің хоостыра Худайның оолларызар нооза. ²⁷ Сірер, Христоснаң пір полар ӱчӱн, кіреске тӱзіп#, Христос осхас полыбысхазар. ²⁸ Амды иудей дее, грек тее чоғыллар, хул даа, пос кізі дее, ирен дее, ипчі дее чоғыллар. Сірер прайзыңар Христос Иисуснаң пір пол парғазар. ²⁹ Христости полчатсаңар, тізең, сірер Авраамның ӱрені полчазар. Іди Худай молҷаа хоостыра ӱлеен ӱлӱсті ээленчезер.

¹ Паза мындағ ниме чоохтирым: ӱлескен ӱлӱзін ээленчеткен кізі прай нименің ээзі полчатса даа, пала тузында хулдаң пір дее пасхалалбинча. ² Ол пабазы таныхтаан тусха теере аны кӧрчеткен, ибінең устапчатхан кізінің холында чӧрче. ³ Піс тее ідӧк, олған тузыбыста, пу тилекейні пӱдірчеткен кӱстернің ӱлгӱзінде полғабыс. ⁴ Че таныхтаан тузы чит килгенде, Худай Позының чалғыс Оолғын ысхан. Ол ипчідең тӧреен, чахығның холында полған. ⁵ Анзы чахығның холында чӧрген кізілер ахтанып алар ӱчӱн, піс, тізең, палалары полыбызар ӱчӱн иділген. ⁶ Сірер Аның палалары полчазар. Худай сірернің чӱректеріңе Позының Оолғының Худын ысхан. Ол Хут «Авва+ 4:6 Арамей тілінең «Авва» теені Пабам полча. , Пабам» тіп хығырча. ⁷ Аннаңар син хул нимессің, оолғызың. Оолғы полчатханыңда, Иисустың пастыра Худайның ӱлеен ӱлӱзін ээленчеткен кізізі полчазың.

Павелнің галаттардаңар сағыссырааны

⁸ Че ол туста сірер, Худайны пілбин, пасха худайларға пазырғазар. Олар сынында худай ниместер. ⁹ Амды Худайны піліп алғазар, алай аннаң артых чоохтаза, Худай сірерні піліп алғанда, ноға хатап пу тилекейнің чазығ, уйан кӱстеріне айланчазар паза постарыңны ағаа хул идін саларға сағынчазар. ¹⁰ Кӱннерні, ай-чыл пайрамнарын паза пасха даа тустарны ӱлӱкӱннепчезер. ¹¹ Арса, сірернің ӱчӱн тикке ле тоғынғам тіп, сірердеңер сағыссырапчам.

¹² Харындастар, мин сірер осхаспын, сірер дее мин осхас полыңар тіп сурынчам. Сірер мині пір дее нименең хомзындырбаазар. ¹³ Мин пастап, сірерге Чахсы Хабарны таратхан туста, ағырығ полғам. ¹⁴ Минің ағыриим сірерге сынағ полған. Сірер, тізең, мағаа чіксінмеезер, че мині, Худай ангелін, Христос Иисусты чіли, удурлаазар. ¹⁵ Хайдағ часкалығ полғазар сірер! Сірердеңер киречілепчем: оңдай полған полза, сірер мағаа харахтарыңны даа, сығарып, пирібізер кӧңніліг кӧрінгезер. ¹⁶ Андағ полза, сынны чоохтапчатханым ӱчӱн, нӧӧс, мин сірерге ыырҷы пол пардым? ¹⁷ Чахсы Хабарны тискер чоохтапчатхан кізілер сірерге арығ сағыснаң хайбинчалар. Постарына хайзыннар тіп, сірерні пістең чарып аларға сіренчелер. ¹⁸ Чахсы киректерге хайғаны чахсы. Аны мин килген туста ла нимес, че сыбыра итчетсе, чахсы полар. ¹⁹ Палаларым, сірерде Христостың омазы іле кӧрін парбаанҷа, сірернің ӱчӱн мин, тӧрітчеткен чіли, пазох ирееленчем. ²⁰ Минің амды, сірерде полып, пасха чоохтазарым килче. Мин сірерде ниме полчатханын оңар полбинчам нооза.

Піс пос ипчінің палаларыбыс

²¹ Сірер, чахығның холында чӧрерге хынчатханнар, чоохтап пиріңердек мағаа: чахығ ниме чоохтапчатханын испинчезер бе? ²² Пазылых нооза: Авраамның ікі оол полған. Пірсі хул ипчідең тӧреен, пірсі пос ипчідең тӧреен. ²³ Хулның тӧлі – ол кізідең тӧреені. Пос ипчінің тӧлі – ол молҷағ хоостыра тӧреені. ²⁴ Пу кип-чоох. Пу ікі ипчі ікі молҷағны# таныхтапча. Пірсі, Синай# тағда алылғаны, Агарь полча. Аның палалары хул поларға тӧріпчелер. ²⁵ Агарь Арав чиріндегі Синай тағны таныхтапча. Сағамғы Иерусалим Агарьға тӧӧй. Ол позының палаларынаң хада хулда чӧрче нооза. ²⁶ Тигірдегі Иерусалим, тізең, пос. Ол піске прайзыбысха инебіс полча. ²⁷ Пазылых нооза:

«Тӧлі чох, пала кӧрбеен ипчі, ӧрін!

Пала таап, ирееленмеені, ӧрініп, хысхыр!

Чалғыс ипчінің палалары уғаа кӧп.

Ирліг ипчінинең хай-хай кӧп!»+ 4:27 Кӧр: Пурунғы Молҷағдағы «Исаийнің ухаан чоохтары» (Исаий) кинде 54:1.

²⁸ Піс, харындастар, Исаак чіли, Худай молҷаан хоостыра тӧреебіс. ²⁹ Че алында даа кізідең тӧреені Хуттаң тӧреенін сӱрген. Сағам даа ідӧк сӱрче. ³⁰ Худай Пічии ниме чоохтапча? Хул ипчіні паза оолғын сӱрібіс. Хул ипчінің оолғы пос ипчінің оолғынаң хада ӱлӱзін ээленмес нооза+ 4:30 Кӧр: Пурунғы Молҷағдағы «Пастағлар» (Бытие) кинде 21:9-10. . ³¹ Ол оңдайнаң, харындастар, піс хулның нимес, пос ипчінің палаларыбыс.

¹ Христос пирген пос чуртасха пик тудыныңар. Хул чуртазына пазох хатап пазындырбаңар.

Пос хоныхтығ полыңар

² Мына мин, Павел, сірерге чоохтапчам: сірер сӱннет итчетсеңер, Христостаң сірерге пір дее туза полбас. ³ Паза сӱннет итчеткен ноо даа кізее ол чахығны прай толдырарға кирек тіп киречілепчем. ⁴ Сірер, постарыңны чахығнаң ахтанчатханнар, Христос чох халдыңар, паарсастаң чат халдыңар. ⁵ Піс, тізең, Худай пісті киртініс пастыра ахтир тіп сахтапчабыс. Ол ізеністі піске Хут пирче. ⁶ Христос Иисуснаң хада полчатсабыс, сӱннет иттіргеннің дее, иттірбееннің дее пасхазы чоғыл. Хыныс киректерінең позын кӧзітчеткен киртініс ле кирек. ⁷ Сірер алнынзар чахсы парчатхазар. Кем, сірернің чолыңарны туйухтап, сынны испеске кӱстеен полҷаң? ⁸ Іди сағынғаны сірерні Хығыртхан Худайдаң полбас. ⁹ «Асхынах таа ачытхы прай унны ачыдыбызадыр»+ 5:9 Кӧр: Павелнің коринфтегілерге 1-ғы пічии 5:6. . ¹⁰ Сірерні пасха сағынмастар тіп, мин Хан-пигнің сылтаанда ізестіг пілчем. Сірерні ікі сағыстығ итчеткен кізі, кем дее ол ползын, чарғыладар ла.

¹¹ Харындастар! Мин сағам сӱннет иттірерінеңер ӱгретчеткен ползам, ноға мині сӱрерге кирек? Андада кірестеңер ӱгредіг харығ полбасчых нооза. ¹² Йо, сірернің кӧңніңерні ардатчатханнар хыйа иділген ползалар.

¹³ Харындастар, сірер пос хоныхха хығыртыл парғазар. Че, сірернің пос хонииңар кізі хынығыстарына пос салыныбызарға сылтағ пол парбазын. Удур-тӧдір хынызып полызызыңар. ¹⁴ Прай Моисей Чахии пір чахыға киріл парча нооза: «Чағыныңа позыңа чіли хын». ¹⁵ Кӧріңер, удур-тӧдір киміріспеңер, чииспеңер, пос постарыңны чох ит салҷаң полбаңар.

Худай Худының паза кізілернің киректері

¹⁶ Мин тіпчем: Худай Худы хоостыра итчедіңер, андада постарыңның хыҷыхтарыңа салынмассар. ¹⁷ Посха хынғаны Худай Худына тоғырланча. Худай Худы посха хынғанға тоғырланча. Олар удур-тӧдір тоғыр турчалар. Аның сылтаанда сірер идерге хынған нимені итпинчезер. ¹⁸ Сірерні Худай Худы устапчатса, андада сірер Моисей Чахииның холында нимессер. ¹⁹ Кізінің позының кӧңнінҷе итчеткен киректерін прайзы пілче. Олар мындағлар: чӧреес хылых, ойнас, арығ нимес киректер, уйат пілбеені, ²⁰ пасха худайларға пазырғаны, аптағ, ыырлас, хырыс-табыс, кӱннес, хазырланыс, тыртыстаныс, кӧкеесімненіс, тартыс, чара полғаны, ²¹ хыртыстаныс, іскі, кӱлет паза андағох пасха нимелер. Анда даа сизіндіргемӧк, ам даа сизіндірчем: пу оңдайларнаң полчатханнар Худай хан-чирінде# ӱлӱс албастар. ²² Худай Худы пирчеткен ниме, тізең, мындағ: хыныс, ӧрініс, амыр хоных, тыстаныс, паарсас, айас, киртініс, ²³ тоғырланмааны, посты тудын пілгені. Пу нимелерге чахығ хадылбас. ²⁴ Че Христостың кізілері пос постарын, хынығыстарын паза хыҷыхтарын, кіреске хазап салғаннар. ²⁵ Піс Худай Худы хоостыра чуртапчатханыбыста, Худай Худы хоостырох идерге кирекпіс. ²⁶ Кӧдірілҷек полбаалар, істі тарланыспаалар, удур-тӧдір атархаспаалар.

Аар-чӱкті хада артынызыңар

¹ Харындастар! Кізі пірее чазыхтың холына кір парза, сірер, Худай Худынаң устанчатхан кізілер, постарыңны пазынып, аны тӱзетчедіңер. Пос постарыңны, пірее хынығысха тартыл парыбыспасха тіп, сизініп одырыңар. ² Кізінің аар-чӱгін посха артыныңар. Іди сірер Христостың чахиин толдырарзар. ³ Пір дее нимее чарабинчадып, позын кӧдірчеткен кізі позы позын алаахтырча. ⁴ Полған на кізі позының киреен сыназын, андада пасхазын нимес, позын махтаттырар. ⁵ Полғаны ла позының аар-чӱгін артын парар нооза. ⁶ Хыйға сӧстең ӱгренчеткен кізі ӱгретчізінең пар-чох чахсы нименең ӱлесчетсін. ⁷ Алаахтырынмаңар: Худайға пірдеезі кӱл полбас. Кізі позы таарыпчатхан нимені чыып алча. ⁸ Кізі хынығыстарының хыразына таарыпчатхан кізі ӱрепчеткен нимені алар. Худай Худының хыразына таарыпчатханы, тізең, Худай Худынаң мӧгі чуртас# алар. ⁹ Чахсы ниме итчетсеңер, кӧңніңер тӱспезін, тузы читсе, кӱзі-саабыс сых парбаза, чыыр нимені чыып аларбыс. ¹⁰ Ол оңдайнаң, тузыбыс ханҷа пар, анҷох прайларына чахсы ниме итчедербіс. Уламох пір киртіністегілерібіске.

Тӱгенҷі сизіндіріглер паза алғастар

¹¹ Пу улуғ підірлерні кӧрчезер бе? Мин оларны позымның холымнаң пас салғам.

¹² Постарынаң махтанарға хынчатхан кізілер сірерні сӱннет иттірерге кӱстепчелер. Олар Христостың кірезі ӱчӱн сӱрдірерге хынминчалар. ¹³ Че сӱннет иттірчеткеннер постары даа Моисей Чахиин толдырбинчалар нооза. Сірернең махтанарға полып, сірерні сӱннет иттіртчелер. ¹⁴ Мин, тізең, пір дее нименең махтанарға хынминчам. Хан-пигібіс Иисус Христостың кірезінең не махтанарбын. Мағаа пу тилекей кіресте хазал парған, мин дее пу тилекейге кіреске хазаттырт салғам. ¹⁵ Христос Иисуснаң хада полза, сӱннетті иттіргеннің алай иттірбееннің пасхазы чоғыл, ӧӧні – наа кізі чайалғаны. ¹⁶ Пу оңдайнаң тудынчатханнарға амыр хоных паза ӧлҷей алғапчам, оларға паза Худай Израильіне. ¹⁷ Че паза пірдеезі мині чобалдырбазын. Мин позым даа Хан-пигібіс Иисустың палығларынаң таңмалалат салғам нооза. ¹⁸ Сірернің худыңарға Хан-пигібіс Иисус Христостың паарсазы тӱссін, харындастар. Аминь.