Ефестегілерге

Павелнің ефестегілерге пічии

Павел илҷі пу пічікті наа эраның 60 чыллары пасталчатханда, римдегі харибде пастағызын одырғанында, филипптегілерге, колосстағыларға паза Филимонға пічіктернең пір туста пасханға тӧӧй.

Ефес Асий тіп (сағамғы Тӱрк чирінде, талайның кидеркі саринда) Рим аймағының кін саары полған. Павел Чахсы Хабарға ӱгредіп ала паза Христос киртінізінің наа тигірибін тӧстеп, мында ікі чыл артиинаң пол салған.

Пічікті ікі ӧӧн чардыхха чарыбызарға чарир. Пастағызында (1–3 пастағлар) Павел хығырығҷыларға Худайның Чахсы Хабарның сылтаанда тол парған хаҷанғы даа чазыт пӧгінінеңер – Христос тигірибінеңер ӱгредіп чоохтапча. Иисус Христосха киртініс кізілерні прайзын – еврейлерні дее, пасха даа чоннарны – арачылапча паза піріктірче. Ікінҷі чардығында (4–6 пастағлар) Павел, Худайның пу пӧгіні чарлалар ӱчӱн, киртінчеткеннерні, пірге тудынып, хынызып, арығ кӧңніліг чуртирға ӱгретче.

Пу пічіктегі сағыстарның паза сӧстернің кӧп сабазы колосстағыларға пасхан пічииндегізіне тӧӧйлер. Че мында Павел Христостаңар орта ӱгредігні саба кӧзітчеткен кізілернең таласпинча.

Алғас

¹ Мин, Павел, Худайның кӧңні хоостыра Иисус Христостың илҷізі#, Ефес саарда чуртапчатхан, Иисус Христосха киртінчеткен ах-арығларға чолабит ысчам. ² Худай Пабабыстаң паза Хан-пигібіс# Иисус Христостаң паарсас паза амыр хоных сірерге ползын.

³ Худай, Хан-пигібіс Иисус Христостың Пабазы, сабланзын. Ол, Христосты чир ӱстӱне ызып, кізі кӧңнін чарытчатхан тигірдегі аймах-пасха алғастарнаң# пісті алғаан. ⁴ Тилекейні чайап салар алнындох, Ол пісті, Христостағыларны, хыныста чуртап, Позының алнында ах-арығ, пырозы чох ползыннар тіп таллап алған. ⁵ Ол хаҷанох Позының кӧңнінҷе паза Иисус Христостың пастыра пісті Позының палалары идерге пӧгін салған. ⁶ Мынзын Худай Позының илбек паарсазын сабландырар ӱчӱн иткен. Ол, хынчатхан Оолғын чир ӱстӱнзер ызып, пу паарсасты піске пирген. ⁷ Худай паарсасха пай, аннаңар Ол, Христостың пастыра, Аның ханынаң пісті пос ит салған паза чазыхтарыбысты# позытхан. ⁸ Худайның паарсазы піске прай хыйға сағыстарда паза пілісте сині чох кӧп пирілген. ⁹ Айабин пиріп, пастабох Христостың пастыра толдырарға сағын салған чазыт пӧгінін піске асхан. Ол аны Позының паарсах кӧңнінең иткен. ¹⁰ Киректелчеткен тус тол парза, Худай чир ӱстӱндегі паза тигірдегі прай нимелерні Христостың ӱлгӱзінде піріктір салар. ¹¹ Прай нимені Позының кӧңні-сағызынҷа итчеткен Худайның пӧгіні хоостыра піс, Христостағылар, Худайның палалары поларға таллалғабыс. ¹² Худай Позының сабланызын кӧзітсіннер тіп, пісті, Христосха пурнада ізенгеннерні, таллап алған. ¹³ Сірер дее, Христостағылар, сын сӧсті – арачыланыстаңар Чахсы Хабарны истіп, Христосха киртінгезер, аннаңар молҷалған Худай Худынаң# сірер дее таңмалалғазар. ¹⁴ Худайның молҷағларының толдырыл парарларына Худайның Худы ізестіг танығ полча. Аннаңар піс Худайның Позының кізілерін чазыхтарынаң позыдарын ікінҷілебинчебіс. Худай, тізең, кізілерін позыдып, Позының сабланызын іле кӧзідер.

Павелнің Худайдаң сурынғаны

¹⁵ Аннаңар мин дее, Иисус Христосха киртінчеткеннеріңні паза прай ах-арығларға хынчатханнарыңны истіп, ¹⁶ пазырыстарымда сірерні сағысха киріп, Худайны сірернің ӱчӱн полған на сай алғыстапчам. ¹⁷ Хан-пигібіс Иисус Христостың Худайы, сабланыстығ Пабазы, сірерге хыйға сағысты пирчеткен паза Худайдаңар ӱгретчеткен Хутты пирзін тіп сурынчам. Аны пирзе, сірер Худайны чахсы піліп аларзар. ¹⁸ Худай сірернің чӱректеріңні чарыт пирзін тіп сурынчам. Чарыт пирзе, сірерге Худай пирген ізеністі піліп аларҷыхсар. Ах-арығ# кізілеріне пирер хайхастығ молҷағларының хайдағ полчатханын паза ¹⁹ пісте, Ағаа киртінчеткеннерде, Худай кӱзінің хайдағ сині чох илбек полчатханын кӧрерҷіксер. Худай, олох илбек кӱзінең Христосты ӧлімнең тірілдіріп, тигірде Позының оң саринда одырт салған. ²¹ Худай Аны прай ӱлгӱлердең паза прай пастыхтардаң пӧзік кӧдірген, амғы туста ла нимес, че килер тустарда даа Аның адын прайзынаң пӧзік иткен. ²² Худай, прай нимені Христостың ӱлгӱзіне пиріп, Аны, прай нименің ээзі идіп, тигірибнің# пазы ит салған. ²³ Тигіриб, тізең, Христостың ит-сӧӧгі полча, прай чирде прай нимее толчатхан Христос пӱкӱле анда полча.

Христоста тірігбіс

¹ Алында, сірер Худай сӧзін испееннеңер паза чазыхтарың ӱчӱн, істіңер ӧліг полған. ² Хаҷан-да сірер, пу чир ӱстӱндегілернің чабал чолларынҷа парып, чир ӱстӱнде ӱлгӱ тутчатхан кнестің кӧңнінҷе полғазар. Ол ам даа Худайның чооғын испинчеткен кізілерні толғап парча. ³ Алында піс тее оларның санында полғабыс, піс тее прайзыбыс, аймах-пасха чабал нимелерге тартылып, ит-сӧӧгібістің паза кӧңні-сағызыбыстың хынчатхан нимелерін не идіп, пасхалары чіли чуртаабыс. Оларох чіли, тӧрееннең Худайның чабалланғанын кӧрерге салылғабыс. ⁴ Че чағбан чӱректіг Худай, Позының улуғ хынызынаң піске хынып, ⁵ пісті, сайбағларыбыс ӱчӱн ӧліглерні, Христоснаң хада тірілдірген. Аның паарсазы сірерні арачылап халған. ⁶ Худай пісті, Иисус Христоснаң хада тірілдіріп, тигірде Аннаң хости одырт салған. ⁷ Худай, піске Иисус Христостың пастыра пирген илбек паарсазын паза чахсызын прай килер тустарға кӧзідер ӱчӱн, іди иткен. ⁸ Аның паарсазы сірерні киртініс пастыра арачылаан нооза. Кӱстенгеннерің ӱчӱн нимес, че Худай сірерге пиргеннеңер арачыланып алғазар. ⁹ Иткен киректерің ӱчӱн нимес – аннаңар пірдеезі махтанмазын. ¹⁰ Піс Худайның чайап салған кізілерібіс. Чахсы киректер идерге Иисус Христос пастыра чайалғабыс. Ол киректерні Худай піске, толдырыңар тіп, хас-хаҷанох азынада тимнеп пирген.

Христосха киртінчеткеннер пір чон полча

¹¹ Мынзын ундутпаңар! Постарын «Худай чоны» тіп аданчатхан иудейлер# сірерні, тӧрееннең иудей ниместерні, «Худайы чох чон» тіп адаҷаңнар. Олар идіңерде таңма иділбееннеңер сірерні іди адааннар. ¹² Ол туста сірер Христос чох чуртаазар, Израиль чонына хозылбаазар, Худай пирген молҷағлар сірерни полбааннар, сірер чир ӱстӱнде ізеніс чох полғазар, Худайы даа чох полғазар. ¹³ Амды, тізең, сірер, хаҷан-да ыраххы чон, Христос Иисуснаң хада полып, Аның ханының сылтаанда чағыннас парғазар. ¹⁴ Иисус Христос позы пісті чарастыр салған. Ол, иудейлерні паза пасха чоннарны піріктіріп, пір чон ит салып, оларны чарчатхан ыырлас ханаларын иңзерген. ¹⁵ Ікі кізідең Позында пір наа кізіні чайап салар ӱчӱн, Моисей Чахиин#, чозахтарын, кибірлерін чох идіп, чоннарны чарастыр салған. ¹⁶ Кіресте# ӧлім алып, ыырласты чох иткен. Іди ол ікӧлеңні пір ит-ханда Худайнаң чарастыр салған. ¹⁷ Піди Ол, киліп, сірерге, Худайдаң ырах чоннарға паза Худайға чағын иудейлерге чарастаңар Чахсы Хабарны искірген. ¹⁸ Аннаңар Христостың пастыра прайзыбыс, иудейлер дее, пасха даа чоннар, пір Хуттығ полып, Пабабысха чағын кір поларбыс.

¹⁹ Іди сірер Худай кізілеріне пасха, килген чон нимессер, че ах-арығ кізілернең тиңзер паза Худайның чағыннарызар. ²⁰ Илҷілернең ухаанҷыларның# ӱгредии сірерге тӧстег полча. Ол тӧстегнің иң ӧӧн тазы – Иисус Христос. ²¹ Ол Позынаң прай тураны пик тутча, аны кӧдіріп, Хан Худайдағы# ызых# храмына айландырча. ²² Христоснаң пірігіп, сірер дее пӱтчезер, анаң Худай Худы пастыра Худайның чуртына айлан парчазар.

Павел чоннарның ӱгретчізі

¹ Мына піди мин, Павел, сірердеңер, иудей нимес кізілердеңер, сағынып, Иисус Христостың нымысчызы полчатханымнаңар, харибде одырчам. ² Худай Позының паарсазын сірерге читірер тоғысты мағаа пиргеннеңер искен поларзар. ³ Худай Позы, чазыдын ас пиріп, аны мағаа пілдістіг иткен. Алында мин аннаңар хысхаҷахти пасхан полғам. ⁴ Аны хығырып, Христостың чазыдын хайди оңнапчатханымны піліп аларзар. ⁵ Мының алнындағы кізілерге ол тоғыстың чазыдынаңар чоохталбаан полған, амды, тізең, Худай Худы аны Худайның илҷілеріне паза ухаанҷыларына ас пирген. ⁶ Мына ол чазыт: Чахсы Хабарны алып, пасха чоннар даа, иудейлерӧк чіли, Худай чоны пол парғаннар, иудейлернең хада пір кізінің ит-сӧӧгі осхас пол парғаннар, Иисус Христоснаң хада полып, Худайның молҷаан алып алғаннар. ⁷ Мин пу Чахсы Хабарның нымысчызыбын. Чахсы Хабарның нымысчызы пол тіп, Худай мағаа сыйых пирген – Позының кӱзін. ⁸ Мин ах-арығ кізілерінің аразында иң алтындағызыбын, че чоннарға Христостағы сині чох пайдаңар чоохтаҷаң ӱлӱс мағаа пирілген. ⁹ Аннаңар мин Худайның чоннарны арачылирдаңар чазыт сағызын прай кізілерге ас пирерге кирекпін. Иисус Христостың пастыра прай нимені чайаан Худай пу чазыт сағысты пурунғыдаң сығара чазырған. ¹⁰ Че амды Ол тигірдегі пастыхтарға паза ӱлгӱдегілерге Позының аллығ, кӱлӱк сағызын тигіриб пастыра ас пирер. ¹¹ Худай Позының хас-хаҷаннаң ал чӧрген сағызын пістің Хан-пигібіс Иисус Христос пастыра толдырған. ¹² Аннаң хада полып, Ағаа киртініп, піс, хорыхпин, тідімніг Худайға чағын кіріп алчабыс. ¹³ Аннаңар, сірердеңер сағынып, ирееленчеткеніме кӧңніңер тӱспезін тіп, сурынчам. Пу ирееленістер сірернің сабланызыңар ӱчӱн полча.

Христостың хынызын пілердеңер

¹⁴ Пу сылтағнаң мин пістің Хан-пигібіс Иисус Христостың Пабазының алнында тізекке тӱсчем. ¹⁵ Тигірдегі паза чирдегі прай чоннарның пабалары ат-соланы Аннаң аладырлар. ¹⁶ Істіңердегі хылииңар пик полар ӱчӱн, Худай Позының нинҷе пар сабланызынаң сірерге Позының Худының кӱзін пирзін тіп, Худайдаң сурынчам. ¹⁷ Христос чӱрееңерде киртіністерің пастыра ползын тіп, алданчам. ¹⁸ Хыныс сірерге чилегелерің паза тӧстеглерің ползын. Андада прай ах-арығ кізілерінең хада Христостың тооза піліп алҷаа чох хынызының чалбаан паза узунын, тириин паза пӧзиин піліп аларзар. Піліп алып, Худайнаң ӧӧн позынаң прай тол парарзар.

²⁰ Пістегі кӱзінең сурынчатханыбыстаң алай сағынчатханыбыстаң хай-хай кӧп ниме ит полчатхан Худайға сабланыс. ²¹ Ағаа тигірибде, Иисус Христосха киртінчеткеннерде, прай тӧллерде нинҷе-нинҷе чӱс чыл сабланыс ползын. Аминь#.

Пір кізі осхас полыңар

¹ Амды мин, Хан-пигібіс ӱчӱн харибде одырчатхан кізі, сірердең «Худай кізілері полып, Худай хығырған нимее турыстығ полыңар» тіп, алданчам. ² Постарыңны пазымнығ паза нымзах тудыныңар, тоозылбас тыстаныстығ полыңар. Удур-тӧдір, хыртыстаныспин, хыныс турыңар. ³ Худай Худы сірерні піріктір салған, аннаңар ыырласпин чуртаңар. ⁴ Пар пір ит-хан паза пір Хут, сах ідӧк Худай сірерні хығырған пір ізеніс, ⁵ пір Хан-пиг, пір киртініс, пір кіреске тӱзіс#, ⁶ пір Худай паза прайзының Пабазы. Ол прайзынаң пӧзік, прайзынҷа иртче паза прайзыбыста пар.

⁷ Пістің полғаныбысха ла Христос айабин ӧнетін сыйых пирген. ⁸ Аннаңар Худайның пічиинде чоохталча: «Христос иң пӧзік ӧӧрлеп парыбысхан, ыырҷыларын, тудып, апара халған, кізілерге, тізең, сыйыхтар пирген». ⁹ «Ӧӧрлеп парыбысхан» теені чи нимені таныхтапча? Аның алында чир тӱбінзер# тӱзіп, сыхханын таныхтапча нимес пе зе? ¹⁰ Кем тӱскен, Олох, прай тилекейні Позынаң толдырыбызар ӱчӱн, тигірдең хай-хай пӧзік ӧӧрлеп парыбысхан. ¹¹ Кем «кізілерге сыйыхтар пирген», Олох піреелерін илҷілер, піреелерін ухаанҷылар, піреелерін Чахсы Хабарның тарадығҷылары, піреелерін киртінчеткеннернің хадарҷылары, піреелерін ӱгретчілер ит салған. ¹² Христостың ит-сӧӧгі (тигіриб чоны) ӧзер ӱчӱн, ах-арығ кізілерін Худай киреенің нымысчылары ит салар ӱчӱн іди иткен Ол. ¹³ Пу оңдайнаң, Худай Оолғына киртінерінде паза Аны піліп аларында піс прайзыбыс хада пір сағысха чидіп аларға кирекпіс. Андада, Христостың поғда тузына чидіп, тигіриб улуғ кізі синіне чит парар. ¹⁴ Мыннаң мындар піс хайдағ ла полза ӱгредіг чиліне хаптыр парыбысчатхан алай алаахтырарға кӧнік парған кӧйтіктернің холларына кір парчатхан час палалар чіли полбасха кирекпіс. ¹⁵ Че Сыннаңар киречілеп, удур-тӧдір хынызып, піс ит-ханның пазы полчатхан Христостың синіне прай саринаң чидіп аларға кирекпіс. ¹⁶ Ол пу ит-ханның ал-алынҷа чардыхтарын прай піріктір салча. Аның чардыхтары, пик палғалыс парып, полған на чардых позының тоғызын толдырчатса, прай ит-хан даа, ӧзіп, хыныста тиліпче.

Христос пирген наа чуртас

¹⁷ Аннаңар, Хан-пигібістің адынаң алданып, Худайы чох чоннар чіли, пос оңдайынҷа хылынмаңар тіпчем сірерге. ¹⁸ Оларның сағыстары пӱлестел парған. Олар, хыйғалары читпинчеткеннеңер, чӱректері, тізең, хатығдаңар, Худай пирчеткен чуртастаң тастых чуртапчалар. ¹⁹ Олар, нимені нимее салбас пол парып, аймах-пасха чабал нимелер идіп тее, хыҷыхтарын хандыр полбин, оралызып чуртапчалар. ²⁰ Че пу – сірернің Христостаңар ӱгренген пілістерің нимес. ²¹ Сірер Аннаңар искезер, Аннаң хада полып, Аныңдағы сынны ӱгреніп алғазар. ²² Алындағы чуртаста оралысхах полып сірер постарыңны ардатхазар. Аннаңар, иргі чуртас кибірлерін хыйа тастап, ²³ постарыңның сағыстарыңны паза чӱректеріңні нааҷылабызыңар. ²⁴ Сыннаң орта паза ах-арығ чуртаста Худайның омазы хоостыра чайалған наа кізее айлан парыңар.

²⁵ Піс прайзыбыс пір ит-ханның чардыхтарыбыс, аннаңар сірернің полғаны ла позының чағынына, чойланмин, сынны чоохтап турзын. ²⁶ Тарынзаңар даа, чазых итпеңер: ӧкпеңер кӱн хонғанҷа тӱс парчатсын. ²⁷ Сайтанны# постарыңа чағын кирбеңер. ²⁸ Алында оғыр иткен кізі, паза оғырлабин, хызылчатхан кізілерге пирҷең ниме пар ползын тіп, позының холларынаң тоғынзын. ²⁹ Ахсыңардаң пір дее хомай сӧс сыхпазын. Сірерні исчеткен кізілерге чахсы ползын тіп, киртініске ӱгредерге полысчатхан сӧстерні ле чоохтап турыңар. ³⁰ Худай Худын хомзындырбаңар. Позып алар кӱннің ӱчӱн сірер ол Хутнаң таныхтал парғазар. ³¹ Полған на ыдырғахтаныс алай ӧкпеленіс, тарыныс алай аахтас, чабалланып чоохтанған хомай сӧс сірерде чох ползын. ³² Хайди Худай, Иисус Христосха киртінгеннерің ӱчӱн, сірернің чазыхтарыңны позытхан, сірер дее ідӧк удур-тӧдір паарсазыңар, айазыңар паза пыроларыңны тастас турыңар.

Чарыхтың палалары

¹ Сірер Худайның хынчатхан палалары полчазар, аннаңар Ағаа тӧӧй поларға кӱстеніңер. ² Хайди Христос, піске хынып, Позының тынын тайыға# салып, Худайның кӧңніне кірчеткен тадылығ чыс пол парған, сірер дее ідӧк хыныста чуртаңар.

³ Сірер ах-арығ кізілер полчазар, аннаңар чӧреес хылыхтар, арығ нимес киректер паза чабдыланыс сірернің чоохтарыңда даа чох поларға кирек. ⁴ Хырызынарға даа, тілге пызып, кізее кӱлген чіли чоохтанарға даа сірерге киліспинче. Іди идер орнына, Худайны алғыстап турыңар. ⁵ Мынзын піліңер: оралысхахтарға, кізі уйадыстығ хылынчатханнарға алай харам кізілерге Христостың паза Худайның хан-чирінде# орын чоғыл. Харам кізілер пасха худайларға пазырчатхан кізілердең пір дее пасха ниместер нооза. ⁶ Сірерні пірдеезі тик-хуруғ сӧстернең алаахтырбазын. Андағ нимелер ӱчӱн чоох испестерге Худайның тарынғаны чидер. ⁷ Андағ кізілернең хостаныс чӧрбеңер.

⁸ Сірер хаҷан-да харасхы полғазар, амды, тізең, Хан-пигібіснең хадада, сірер – чарыхсар. Аннаңар чарыхтың палалары чіли чуртаңар. ⁹ Худай Худы пирчеткен нимелері – полған на паарсас, орта ниме паза сын нооза. ¹⁰ Худайның нимее чӧпсінчеткенін піліп аларға кӱстеніңер. ¹¹ Харасхының тузазы чох киректеріне араласпин, оларны ілезіне сығар турыңар. ¹² Харасхыдағы кізілернің харанға итчеткен киректерінеңер чоохтирға даа уйадыстығ. ¹³ Чарыхха сығарылчатхан прай киректер іле кӧрінедірлер. Прай кӧріндіре иділчеткен ниме – чарых. ¹⁴ Аннаңар тидірлер: «Тур, узупчатхан кізі, ӧлімнең тіріл кил, сині Христос чарыдыбызар».

¹⁵ Аннаңар постарыңның хайди тудынчатханнарыңны сизініңер. Алығ кізі чіли полбин, хыйға кізі чіли чӧріңер. ¹⁶ Кӱннер чабалдаңар, пар тусты тузалығ иртіріңер. ¹⁷ Ниик сағыстығ полбаңар. Худай сірердең ниме идерлеріңні сағыпчатханын піліп аларға кӱстеніңер. ¹⁸ Араға иртіре іспеңер, анзы кізіні ардатча. Че Худай Худынаң постарыңны толдырыңар. ¹⁹ Худайны саблапчатхан ырларның паза сарыннарның сӧстерін тузаланып чоохтас турыңар. Прай чӱрееңернең Хан-пигібісті сабландырып, сарнаңар. ²⁰ Прай ниме ӱчӱн Худай Пабаны Хан-пигібіс Иисус Христостың адынаң хаҷан даа алғыстап турыңар.

Ипчілер паза иреннер

²¹ Худайны улуғлап, удур-тӧдір чоох истіс турыңар.

²² Христос тигірибнің, ит-сӧӧгінің Арачылағҷызы. Ол тигірибнің пазы, сах ідӧк ир кізі ипчізінің пазы полча. Аннаңар ипчілер, ирлеріңнің чооғын, Хан-пигнің чооғын чіли, ис турыңар. ²⁴ Хайди тигіриб чоны Христостың чооғын исче, ипчілер дее ідӧк прай нимеде ирлерінің чоохтарын истерге киректер. ²⁵ Иреннер, ипчілеріңе хыныңар. Христос таа, тигірибге хынып, Позының тынын аның ӱчӱн пирген. ²⁶ Ол, Чахсы Хабарны чир ӱстӱне читіріп, тигірибні Худайға чарыдар ӱчӱн, аны, суғнаң чуубызып, арығлап салған. ²⁷ Іди Христос Позының сабланыстығ тигірибінің, пір дее кірліг тамҷых чох, тырысхах чох, пасха даа читпестері чох, Позының алнында прай сілиинең, ах-арығ паза пырозы чох турыбызары ӱчӱн кӱстенген. ²⁸ Иреннер ипчілеріне постарына хынчатхан чіли хынарға киректер. Ипчізіне хынчатхан ирен позына даа хынадыр. ²⁹ Хаҷан даа пір дее кізі позының ит-сӧӧгін хырт кӧре чоғыл, че позын, азырап, хайраллидыр. Хан-пиг дее ідӧк тигірибні азырапча паза хайраллапча. ³⁰ Піс, тізең, Христостың ит-сӧӧгінің чардыхтары полчабыс, Аның иді-ханынаңмыс, Аның сӧӧктерінеңміс нооза. ³¹ Худайның пічиинде піди пазыл парған: «Аннаңар ир кізі, позының паба-іҷезінең чарылып, ипчізіннең пірік парар; олар ікӧлең пір кізі осхас пол парарлар». ³² Пу чазыт илбек, че мин мыны Христостаңар паза тигірибдеңер сағынып чоохтадым. ³³ Мына піди сірернің полғаны ла, позына хынған чіли, ипчізіне хын турзын. Ипчізі, тізең, ирін улуғлазын.

Олғаннар паза паба-іҷелер

¹ Палалар, Хан-пигібістің чолынҷа парып, паба-іҷелеріңнің чооғын ис турыңар. Пу орта кирек. ² Мына молҷағ пирчеткен пастағы чахығ: «Паба-іҷеңні улуғла. ³ Андада син чахсыны кӧрерзің паза чир ӱстӱнде ӱр чуртирзың». ⁴ Пабалар, палаларыңны хыпчыхтандырбаңар, че Хан-пигібістің чахығларына паза ӱгредиине тӧстеніп ӧскіріңер.

Хуллар паза ээлер

⁵ Хуллар, пу чирдегі ээлеріңнің чооғын арығ чӱрееңернең, Христостың чооғын искен чіли, хорығып паза чалтанып ис турыңар. ⁶ Оларның чахығларын, чойырхостар чіли, кізі кӧзіне ле нимес, че Христостың хуллары Худайның кӧңнін толдырчатхан чіли, пар-чох кӧңніңер салып, толдыр турыңар. ⁷ Кізілерге ле нимес, че Хан-пигібістің хуллары чіли прай кӧңніңернең ӧрініп, тоғын турыңар. ⁸ Піліңер, Хан-пигібіс полған на чахсы кирек ӱчӱн сыйых пирер, кем дее итсін аны, хул даа, пос тоғынчатхан кізі дее. ⁹ Сірер дее, ээлер, хулларыңа ідӧк хылыныңар, иртіре хатығлабаңар оларны. Піліңер, оларның даа, сірернің дее тигірде пір Хан-пигіңер пар, ол прайзына пір тиң хайча.

Худайның тирии

¹⁰ Халғанҷызында. Харындастарым, Хан-пигнең хада полып, Аның илбек кӱзінең кӱстеріңні тыыдыңар. ¹¹ Сайтанның хара киректеріне тоғырлан полар ӱчӱн, Худайның хуйағын кизіп алыңар. ¹² Піс олаңай кізілердең тоғыр чааласпинчабыс, анзын піліңер. Піс тигірдең тӱскен пастыхтардаң, ӱлгӱдегілердең, пу чир ӱстӱндегі харасхы кӱстернің устағҷыларынаң, чабал хуттардаң тоғыр чааласчабыс. ¹³ Аннаңар, харасхы кӱнде оларға тоғырланарға кӱстерің чидер ӱчӱн, прай нимее сыдазып тур халар ӱчӱн, Худайның хуйахтарын кизіп алыңар. ¹⁴ Піди, Сыннаң хурчанып алып, орта чуртас хуйағын кис салып, пик турыңар. ¹⁵ Худайның паза кізілернің аразындағы чарастаңар Чахсы Хабарны искір чӧрерге тимде полчатханнарың сірерге маймахтарың ползын. ¹⁶ Ағаа хоза, сайтанның прай кӧйчеткен соғаннарын ӱзӱр полар киртіністің хусхуйағын алып алыңар. ¹⁷ Арачыланыс полчатхан тимір тулағаны даа, Худайның сӧзі полчатхан Хуттың хылызын даа алып алыңар. ¹⁸ Аймах-пасха алданыстарнаң паза сурыныстарнаң полған на сай Худай Худы устаан оңдайынҷа пазыр турыңар. Прай ах-арығларның ӱчӱн Худайзар сурыныснаң сыбыра айланып, сиргек тудыныңар. ¹⁹ Чахсы Хабарның чазыттарын хорыхпин ас пирерім ӱчӱн, чоохтанған сай, Худай мағаа кирек сӧстерні пирзін тіп, минің ӱчӱн дее пазырыңар. ²⁰ Харибде дее мин Чахсы Хабарның илҷізібін. Чахсы Хабардаңар хорыхпин паза чазынмин, кирек иде искір поларым ӱчӱн, пазырыңар.

²¹ Хайди чуртапчатханымнаңар паза ниме итчеткенімнеңер хынған харындазым паза Хан-пигнің сын нымысчызы Тихик сірерге прай чоохтап пирер. ²² Мин аны сірерзер, пістеңер чоохтап пирзін паза кӧңнілеріңні кӧдір пирерге тіп, ысчам. ²³ Амыр хоных ползын сірерге, харындастар. Худай-Пабабыстаң паза Хан-пигібіс Иисус Христостаң хыныс паза киртініс ползын сірерге. ²⁴ Сірерде прайзыңарда, Хан-пигібіс Иисус Христосха тоозылбас хыныснаң хынчатханнарда, Худайның паарсазы ползын. Аминь.