Колоссадағыларға

Павелнің колосстағыларға пічии

Пу пічікті Павел ідӧк римдегі харибдең пасхан. Павел позы Колосстағы христианнарны таныбаан, пу тигірибні Чахсы Хабарның пасха ӱгретчізі тӧстеен. Пу пічік Ефестегілерге Пічікке сағызынаң уғаа чағын.

Колосс саар (Ефестең 200 километр іскер) ӧң-пазы киртіністер тараан аймахта турған. Аның сылтаанда орындағы Христос тигірибіне Христос киртінізінең чараспас чой ӱгредіглер кіргеннер. Оларның хай піреелері, арачыланып алар ӱчӱн, хыйғазы артых кізі поларға, ас чон на пілчеткен ӧнетін пілістіг поларға кирек тіп, ӱгреткеннер. Олар, истиин тартынчатхан ит-сӧӧктің оңдайынҷа полбин, ис-сиптің чазыхтығ кӱзінең позирға кирек тіп, ӱгреткеннер. Ӱгредіглерінде ідӧк, Худайның кӧңніне кірер ӱчӱн, андағ-мындағ чозахтар толдырарға кирегінеңер чоохталған.

Павел пу чой ӱгредігдеңер піліп алғанында, колосстағыларны Иисус Христостың сын киртінізінде пик турғызар ӱчӱн, пічік пазыбысхан. Павел андағ сын киртініс кізілерні Худайнаң чарастырчатхан Христостаңар Чахсы Хабар полчатханын кӧзітче. Христос иң ӧӧркі Кӱс полча, Ол ла кізілернің пазырарына турыстығ. Христостың ӧлімі пастыра Худайнаң чарас салғаннаңар, христианнар чозахтарны хоғар сағыссырастарынаң позыпчалар. Оларның сағыстары сыннаң чахсы поларына, удур-тӧдір пыро тастазарына, Худайны саблирына паза кӧс-сӧбіреде чахсы хылынызарына айлан парған нооза.

Алғыстап пазырғаны

¹ Павел, Худай кӧңні хоостыра Иисус Христостың илҷізі#, паза Тимофей харындас ² Колосс саарда чуртапчатхан ах-арығларға паза Христос Иисусха киртінчеткен харындастарыбысха чолабит ысчабыс. ³ Худай Пабабыстаң паза Иисус Христос Хан-пигібістең паарсас паза амыр хоных сірерге ползын. Сірердеңер пазырған сай, Худайны паза Хан-пигібіс# Иисус Христостың Пабазын сыбыра алғыстапчабыс.

⁴ Піс сірернің Христос Иисусха киртінчеткеннеріңні паза прай ах-арығларға хынчатханнарыңны искебіс. ⁵ Сірерге тигірде тимнел парған нимее ізенчезер нооза. Сірер анзынаңар Чахсы Хабарның сын сӧзінде искезер. ⁶ Ол сӧс сірернің араңарда паза тиксі-тилекейде чӧрче. Ол, ӧзіп, ниміс пирче. Ідӧк сірер Худайның сын паарсазын піліп алған кӱннең пасти сірерде дее ол сӧс ниміс пирче. ⁷ Сірер, тізең, Худайның паарсазынаңар пістің хынған хабасчыбыс Епафрастаң, Христостың сірерге киртістіг нымысчызынаң, искезер. ⁸ Худай Худынаң# пирілген хынызыңардаңар ол піске искір пирген нооза.

⁹ Аннаңар піс тее, мыны ис салған кӱннең сығара, сірердеңер тохтағ чох пазырчабыс. Худай Позының пӧгіннерінеңер сірерге толдыра піліс пирзін тіп, Аннаң сурынчабыс. Іди сірер хайдағ даа нимеде хыйға тудынарзар паза Худай Худынаң пирілчеткенні оңар пілерзер. ¹⁰ Сірерні Худайға турыстығ ползыннар тіп сағынчабыс. Прай нимеде Аның кӧңнінҷе хылынзыннар, ноо даа нимеде чахсы киректернең нимістіг полып, Худайны пілерін алғытсыннар тіп сурынчабыс. ¹¹ Ноо даа нимеде сыдамах паза тыстаныстығ поларларың ӱчӱн, Худай Позының саблығ кӱзінең сірерні прай нимеде пик ит салзын. ¹² Пісті чарыхта ах-арығларның ӱлӱзін аларға хығырған Худайны паза Пабаны алғап турыңар. ¹³ Ол пісті харасхы ӱлгӱзінең ал халған паза Позының хынған Оолғының хан-ӱлгӱзіне# кир салған. ¹⁴ Оолғының ханы пастыра Худай пісті пос ит салған паза чазыхтарыбысты# позытхан.

Христостың кем полчатханы паза Аның иткен кирее

¹⁵ Ол кӧрінмес Худайның омазы полча. Ол ноо даа чайаахтаң пурун тӧреен тун Оолғы. ¹⁶ Тигірдегізі паза чирдегізі, кӧрінчеткені паза кӧрінмезі – прай ниме Аның пастыра пӱткен: ӱлгӱ сіреелерінде одырчатханнар ба, хан-пиг полчатханнар ба, пастыхтар ба, ӱлгӱлер бе – прай ол Аның пастыра паза Ағаа пӱдірілген. ¹⁷ Ол ноо даа нимедең пурун полған, прай ниме Аның пастыра турча. ¹⁸ Тигіриб# Аның ит-сӧӧгі полча. Ол Позы, тізең, тигірибнің пазы. Ол – прай нименің пасталғаны. Ол ӧліглернің аразынаң тірілген тун Оолғы полча. Ол ноо даа киректе пастағызы ползын. ¹⁹ Худай Христоста Худайның толдыразы ползын тіп хынған нооза. ²⁰ Аның кіресте# тӧгілген ханынаң чирдегізін дее, тигірдегізін дее амырат салып, Аның пастыра Худай Позынаң прай нимені чарастыр салған. ²¹ Сірерні дее ідӧк чарастыр салған. Алында сірер Худайдаң оортах турғазар, Аның ыырҷызы полғазар. Сірернің сағыстарың чабал киректерге айлан парған полған. ²² Амды, тізең, Христостың пу чирдегі иді-сӧӧгі пастыра Худай сірерні Позынаң чарастыр салған. Ол Позының алнында сірерні ах-арығ, пыро чох, пір чігі чох кӧзідерге тіп, Христостың ӧлімінең анзын иткен. ²³ Итсе, сірер киртіністе пик паза ікінҷілебес полыңар. Сірер искен Чахсы Хабарның ізенізінең хыйа полбаңар. Ол Чахсы Хабар тигір алтында прай чайалған нимее чарлалған. Мин, тізең, Павел, ол хабарның нымысчызы пол парғам.

Павелнің тигірибдегі тоғызы

²⁴ Амды сірернің ӱчӱн ирееленчеткеніме ӧрінчем. Позым илеп, мин Христос кӧрген чобағның чидіспинчеткенін толдырчам. Тигіриб полчатхан Аның Иді-сӧӧгі ӱчӱн ирееленчем. ²⁵ Худайның устааны хоостыра мин ол тигірибнің нымысчызы полчам. Худай Позының сӧзін сірерге толдыразынаң чарлирға мағаа чахаан. ²⁶ Ол сӧс пурунғыдаң ала кӧп тӧллердең чабылған чазыт полған. Амды, тізең, ол Аның ах-арығларына азыл парған. ²⁷ Оларға Худай пу чазыттың прай чоннарға пар пайын паза сабланызын ас пирерге иткен. Ол чазыт – сірерде чуртапчатхан паза сабланысха ізеніс пирчеткен Христос. ²⁸ Ол Христосты піс чарлапчабыс, полған на кізіні, ӱгредіп, хыйғазын кирдірчебіс. Піс аны, полған на кізі, Иисус Христоснаң пірге полыбызып, теен парары ӱчӱн, итчебіс. ²⁹ Аның ӱчӱн мин пар-чох кӱзімні салынып істенчем. Мағаа Христос пирчеткен илбек кӱснең кӱрес парчам.

¹ Сірернің паза Лаодик саардағыларның, ідӧк мині сын позымны кӧрбеен прайзының ӱчӱн хайдағ кӱрезіг апарчатханымны сірерні пілзіннер тіп сағынчам. ² Мин, оларның кӧңнілері кӧдірілзін, удур-тӧдір хынызып, пірге тудынзыннар тіп сағынчам нооза. Іди олар, сағыс пайына чидіп, Худай Пабаның Христос полчатхан чазыдын піліп аларлар. ³ Анда хыйғаның паза пілістің пар-чох пайы чазырылых. ⁴ Мин піреезі чойырхос чоохтарнаң сірерні аптап албазын тіп анзын чоохтапчам. ⁵ Мин пу позым сірернең хада полбазам даа, худым сірернең хада. Сірер орта тудынчатханыңарны паза Христосха пик киртінчеткеніңерні кӧріп, ӧрінчем.

Христос сын чуртас пирче

⁶ Ол оңдайнаң сірер Христос Иисусты Хан-пигні чіли постарыңа алғазар. Аннаңар Анынаң хада пір полып чуртаңар. ⁷ Христоста тамырларыңны салыңар, Анда постарыңны пӱдіріңер. Киртіністе, сірерні ӱгреткен хоостырох, пик турыңар. Чӱректерің алғыстасха толынзын. ⁸ Кӧріңер зе, харындастарым, піреезі сірерні хыйға чоохтарынаң, алаахтырыстың тик сӧстерінең, кізілер кибірінең, тилекейні пӱдірчеткен кӱстерінең аптап албазын. Анзы Христостаң нимес. ⁹ Худайның толдыразы Христоста чуртап, кізі омалығ пол парча. ¹⁰ Сірерде дее Христостың пастыра Худайның толдыразы пар. Христос ноо даа пастыхтың паза ӱлгӱнің пазы полча. ¹¹ Сірерге сӱннетті# кізі холынаң иттірбееннер. Христос сірерге позының сӱннедін итіріп, кізі постарыңнаң пос ит салған. ¹² Хаҷан сірер кіреске тӱскеннеріңде#, Анынаң хада чығдырт салғазар. Анынаң хадох тіріл парғазар. Сірер, Аны тірілдірген Худайның кӱзіне киртініп, тіріл парғазар. ¹³ Сірер чазыхтарда чуртааннарыңда, Молҷағны# пілбинчеткен, Худайы чох, істіңер ӧліг кізілер полғазар. Худай, тізең, сірерні Христоснаң хада тірілдірібіскен. Піске прай чазыхтарыбысты позыдып, ¹⁴ пістең тоғыр пазылған алымнар пічиин чох иткен. Ол аны, сірердең хыйа алып, кіреске хазап салған. ¹⁵ Пастыхтарның паза ӱлгӱлернің кӱзін пылазып, оларны прай чоннарның алнында іле сығарып, Позының чиңізін пайрам чорығынаң таныхтаан. ¹⁶ Аннаңар сірер чеен-іскен нименің ӱчӱн, сірер ӱлӱкӱннерні, наа ай пайрамын, суббота# кӱнін таныхтаан-таныхтабааннарың ӱчӱн пірдеезі сірерні пыролабазын. ¹⁷ Анзы килер тустың кӧлеткізі ле, ит-хан, тізең, Христости. ¹⁸ Посты пазынарға, ангеллерге# пазырарға хынчатханнарның пірдеезі сірерні аптап албазын. Постары кӧрбеен нимедеңер чоохтап, кізілер постарының хыйғаларынаң махтанысчалар. ¹⁹ Олар Христоснаң палғалыс тутпинчалар. Христос, тізең, ит-ханның пазы полча. Ол ит-ханны, чӱллернең паза сиирлернең піріктіріп, тыытча. Анзы Худай ӧскіргені хоостыра ӧсче.

Христоснаң хада ӧлім паза Худайда чуртас

²⁰ Аннаңар сірер, Христоснаң хада ӧл парып, тилекейнің кӱстерінең позып парғазар. Андағда ноға сірер, пу чарыхта чуртапчатханнар чіли, ӱгредіглерге тудынчазар: ²¹ «мыны итпе», «чібе», «теңме» – ²² пу чахығларнаң тузаланчатса, олар чох идеріне ағылчалар. (Пу тузаланған хоостыра чох пол парыбысчатхан нимелер). Олар кізі чахығларына паза ӱгредиине тӧстенчелер нооза. ²³ Пу нименің кӧрімі ле хыйға: пос кӧңнінҷе Худайға пазырғаны, посты пазынғаны, ит-ханны илеткені. Че олар кізі хынығыстарын чох идерінде тузазы чохтар.

¹ Сірер Христоснаң хада тіріл парған ползар, ӧӧре харазыңар. Анда Христос Худайның оң саринда одырча. ² Чирдегі нимес, ӧӧркідегі нимелердеңер сағынчадыңар. ³ Сірер ӧл парғазар нооза, сірернің чуртазыңар, тізең, Христоснаң хада Худайда чазырыл парған. ⁴ Сірернің чуртазыңар полчатхан Христос азылза, сірер дее Анынаң хада сабланыстығ азыларзар.

Иргі паза наа чуртас

⁵ Аның ӱчӱн постарыңның пу чирдегі ит-ханыңарны ӧлдірібізіңер: чӧреес хылыхтарны, арығ нимес киректерні, хыҷыхты, чабал хынығыстарны, чабдыланысты. Чабдыланыс ол чой худайларға пазырынғаны полча. ⁶ Ол нимелернің ӱчӱн тообас кізілерге Худай ӧкпезі чидер. ⁷ Сірер дее ол чонның аразында чуртаан туста олар осхас полғазар. ⁸ Амды прай пу нимені хыйа идіңер: ӧкпеленісті, хазырланысты, чабалланысты, хырызынысты, ээн-аастанысты. ⁹ Чойланыспаңар. Алындағы чуртасты паза иргі чуртас кибірлерін хыйа ал тастабысхазар. ¹⁰ Сірер наа кізі пол парғазар. Пу наа кізі, Худайны пілгені пастыра нааҷыланып, позының Чайаачызының омазына тӧӧй полып одырча. ¹¹ Андада – грексің ме алай иудейзің#, сӱннет итіргезің ме алай итірбеезің, ырахтын килген кізізің ме алай скифсің+ 3:11 Скифтер – кӧс чӧрҷең чон. , хулзың ма алай пос тӧреен кізізің – пасхазы чоғыл. Че прай ниме паза прай нимеде – Христос. ¹² Аннаңар, Худайның таллаан чоны чіли, ах-арығлар паза хыныстығлар чіли, килістіре тонаныбызыңар: кізее айаачы, чағбан хылыхтығ, пазымнығ, нымзах, тоозылбас тыстаныстығ пол парыңар. ¹³ Пірее кізінің піреезіне хоп полза, удур-тӧдір тыстанызыңар. Христос сірерге хайди пыро тастаан, сірер дее ідӧк идіңер. ¹⁴ Че прай нименің тастына хыныс кибін кизібізіңер – ол чахсының иң артығын піріктірче. ¹⁵ Худайның пирчеткен амыры сірернің чӱрееңерні устазын. Ағаа сірер, пір ит-ханнығ пол парып, хығыртылғазар. Алғыстығ полыңар. ¹⁶ Христостың сӧзі толдыразынаң сірерде чӧрзін. Удур-тӧдір пар-чох хыйғаңарнаң ӱгредізіңер паза сағыс алындырызыңар. Худайны саблапчатхан ырлар паза сарыннар ырлап, чӱрееңерде Хан-пигні алғыстап, Ағаа сарнаңар. ¹⁷ Ниме дее итчетсеңер, чоохтапчатсаңар, Хан-пигібіс Иисус Христостың адынаң итчедіңер. Аның пастыра Худай Пабабысты алғаңар.

Наа чуртаста удур-тӧдір хылынысханы

¹⁸ Ипчілер, иріңернің чооғын истіңер. Хан-пиге киртінчеткен кізее іди иткені орта полар. ¹⁹ Ирлер, ипчілеріңе хыныңар, оларға хазырланмаңар. ²⁰ Палалар, ноо даа нимеде паба-іҷеңернің чооғын истіңер. Анзы Хан-пигібістің кӧңніне чарас. ²¹ Пабалар, палаларыңның кӧңнілері тӱспес ӱчӱн, оларны хыпчыхтандырбаңар. ²² Хуллар, сірернің пу чирдегі ээлеріңнің чооғын истіңер. Чойырхостар чіли, харах кӧзіне ле нимес, че Худайны сағынып, арығ чӱрекнең чӧрініңер. ²³ Ноо даа ниме итчетсеңер, пар-чох кӧңніңер салынып, кізілерге нимес, Хан-пигібіске иткенни идіңер. ²⁴ Аның ӱчӱн сірерге Хан-пигнің пайынаң сыйых пирілерін пілчезер. Сірер Хан-пигібіс Христосха хул полчазар нооза. ²⁵ Кем сынынҷа итпезе, ағаа сын нимеснең нандырылар. Худай прайзына пір тиң хайча.

¹ Ээлер, сірернің дее тигірде Хан-пигіңер парын піле, хулларға орта паза сынынҷа хылыныңар.

Ӱгреде чоохтааны

² Сыбыра пазырчадыңар, пазырчатса, сиргек полыңар паза алғыстаңар. ³ Пістеңер дее ідӧк пазырчадыңар. Худай піске Христостың чазыдынаңар сӧсті чарлирға чол ас пирзін. Пу чазыттың ӱчӱн мин кинҷедебін нооза. ⁴ Аны ас полар иде чоохтирға кирекпін.

⁵ Тоғырхыларнаң хыйға тудыныңар, пар тусты тузалығ иртіріңер. ⁶ Сурған кізее хайди нандырарын піліңер: сӧстерің паарсастығ паза ӧтіг ползын.

Алғастар

⁷ Тихик, хынған харындазыбыс, Хан-пигнің сын нымысчызы паза хабасчыбыс, миннеңер прай чоохтағлап пирер. ⁸ Мин аны сірерзер, пістің киректерібістеңер чоохтап, кӧңнілеріңні кӧдір пирерге ысхам. ⁹ Аннаң хада сірердең килген Онисимні, киртістіг паза хынған харындазыбысты, ыстым. Олар мында ниме полчатханын сірерге чоохтағлап пирерлер. ¹⁰ Миннең хада чабығда одырчатхан Аристарх сірерге изен читірче. Ідӧк Марк, Варнаваның чеені, изен читірче. (Марктаңар сірер чахығ алғазар: сірерзер килзе, удурлаңар аны.) ¹¹ Ідӧк Иуст тіп солалығ Иисус изен читірче. Иудейлердең олар ла, Худай хан-ӱлгӱзі килер ӱчӱн миннең хада тоғыс идіп, минің кӧңнім кӧдірчелер. ¹² Сірердең килген Епафрас, Иисус Христостың хулы, изен читірче. Сірерні, тееніп, Худайның кӧңнін сыбыра пик сағыснаң толдырзыннар тіп сірернің ӱчӱн пазырып, парчан кӱзін салып кӱрес парча. ¹³ Сірернің, ідӧк Лаодик паза Иерополь саарлардағыларның ӱчӱн аның матап кӱстен парчатханын паза сағыссырапчатханын киречілепчем. ¹⁴ Хынған пістің имҷібіс Лука паза Димас сірерге изен читірчелер. ¹⁵ Лаодиктегі харындастарыбысха, ідӧк Нимфаа паза аның ибдегі тигірибіне изен читіріңер. ¹⁶ Пу пічік сірерде хығырыл парза, Лаодиктегі тигірибде хығырылзынох тіп чахып салыңар. Тігізін, тізең, Лаодиктегізін, сірер хығырбоғызыңар. ¹⁷ Архипке піди чоохтап салыңар: кӧр, Хан-пигібісте алынған чӧрінізіңні толдыр сал.

¹⁸ Мин, Павел, алғасты позымның холымнаң пастым. Минің кинҷелерімні сағын чӧріңер. Прайзыңарға паарсас тӱссін. Аминь#.