2 Тимофейге

Павелнің Тимофейге ікінҷі пічии

Тимофейге ікінҷі пічии Павелнің прай пасхан пічіктерінің халғанҷызы полча полар.

Пу пічиинде илҷі позының киртістіг полысчызы Тимофейге айланча. Аар ӱлӱс кӧрзе дее, Павел позының чуртазы тооза кӧңнін кӧдірген Худайны саблапча. Павел ӧлімнең хорыхпинча, позын Христоснаң хада мӧгі чуртас сағыпчатханын ікінҷілебинче. Че олох туста ол христиан тигірибінеңер сағыссырапча. Олар даа, Иисусха киртінчеткеннері ӱчӱн, сӱрдірерлерін пілчелер нооза. Аннаңар ол Тимофейні (анынаң хада прай христианнарны) Иисус Христостың Арачылағҷы паза Хан-пиг полчатханын сағыста тудып, ирееленістер сағыпчатханын піле дее, Христосха киртіністе пик турарға ӱгреде чоохтапча.

Алғас

¹ Павел, Христос Иисуста Худай молҷаан чуртасты чарлирға табылған кізі, Худай кӧңнінҷе Христос Иисустың илҷізі#. ² Тимофейге, хынған оолғына: Худай Пабадаң паза Хан-пигібіс# Христос Иисустаң паарсас, ӧлҷей паза амыр хоных сағаа.

Чахсы Хабарға киртініс

³ Хараа-кӱнӧрте, пазырған сай синнеңер сыбыра сағынчам. Пурунғыларымнаң пасти, мин арығ кӧңнімнең салынчатхан Худайыма алғызым читірчем. ⁴ Синің харах чазың сағысха киріп, ӧрініске чидіп алар ӱчӱн, сағаа тоғазарым килче. ⁵ Лоида ууҷаңда даа, Евника іҷеңде дее полған киртіністі сағысха кирчеткенімнеңер, синде дее ол сын киртініс пар тіп, пір дее ікінҷілебинчем. ⁶ Аннаңар минің сағаа хол салғаным пастыра пирілген Худай сыйиин улам ӧделендірерге сині хатап сизіндірчем. ⁷ Худай піске хорығыс худын нимес, че кӱс, хыныс паза арығ сағыс худын пирген. ⁸ Аннаңар син Хан-пигібістеңер киречілестердең дее, миннең дее, Аның чабығдағы кізізінең, уйатпа. Че миннең хада, Худай пирген кӱзіңе тӧмене, Чахсы Хабарның ӱчӱн иреелестерні алын.

⁹ Худай пісті арачылаан нооза. Ол пістің киректерібіс хоостыра нимес, че Позының кӧңнінең пісті ах-арығ# поларға хығыртхан. Ол аны Христос Иисустаң пастыра тус пасталар алнындох пирілген паарсазынаң иткен. ¹⁰ Ол паарсазы Арачылағҷыбыс Христос Иисус килгенінең киречілелче. Ол ӧлімні чох иткен паза Чахсы Хабар пастыра мӧгі чуртас# чарлаан. ¹¹ Чахсы Хабарны тарадар ӱчӱн, мин аның илҷізіне, паза чоннар ӱгретчізіне турғызылғам. ¹² Аның сылтаанда мин пу иреені кӧрчем, че анзынаң уйатпинчам. Пілче ноомза, Кемге киртінчеткенімні паза тӱгенҷі кӱнге# теере мағаа пиргенні+ 1:12 «Мағаа пиргенні» теенін грек тілінде «мин Ағаа пиргенні» тіп оңнирға чарир. Аның хайраллир кӱзі парын. ¹³ Миннең искен пу сын ӱгредиимнең устан, Христос Иисуста пар киртініснең паза хыныснаң чурта. ¹⁴ Пісте чуртапчатхан Худай Худы# пастыра піске пирілген чахсы нимені хайралла.

¹⁵ Син пілчезің, асийдегілер# миннең хыйа полыбысханнар, ол санда Фигелл паза Ермоген. ¹⁶ Онисифор кӧп хати минің кӧңнім часхарған ӱчӱн, аның ибіне Худай ӧлҷей пирзін. Минің чабыға кіргенімнең ол уйатпаан. Римде полғанда, тізең, ол мині, матап тілеп, тапхан. ¹⁸ Тӱгенҷі кӱнінде Хан-пигібіс ағаа Хан Худайның# ӧлҷейіне турыстығ поларға пирзін. Ефес саарда ол мағаа хайди полысханын син позың даа пілчезің.

Иисус Христостың чахсы чааҷызы

¹ Син, тізең, оолғым, Христос Иисустаң пирілген паарсас кӧңнің тыыдып одыр. ² Пасхаларын ӱгрет полар ізестіг кізілерге киречілер кӧзіне миннең искен нимені читтір. ³ Ана іди, Христос Иисустың сын чааҷызы чіли, ирееленістерні позыңа алын. ⁴ Ноо даа чааҷы, пастығының кӧңніне кірерге полып, чурт-хоных сурығларына салынмас. ⁵ Марығларда араласчатханнар, оңдай сайбабинчатсалар ла, сыйыхха турысчалар. ⁶ Істенчеткен хыраҷы нимісті пурун амзирға кирек. ⁷ Мин чоохтапчатханны сизініп одыр. Хан-пигібіс сағаа прай нимені оңар поларға полыссын.

⁸ Иисус Христос Давидтің# тӧлінең сыхханын паза ӧлімнең тірілдірткенін хаҷан даа сағыста ал чӧр. Мин чарлапчатхан Чахсы Хабар андағ. ⁹ Ол Чахсы Хабарның ӱчӱн мин, тонағҷы чіли, кинҷедең ала ирее кӧрчем. Че Худай сӧзі кинҷедең пос. ¹⁰ Аннаңар, талламалары Христос Иисуста арачыланыс табарлары паза мӧгі сабланысха кірерлері ӱчӱн, мин прай сидіктерні сыдас турбын. ¹¹ Ол сын сӧс:

піс Анынаң хада ӧлчетсебіс, андада Аннаңох хада чуртирбыс.

¹² Ирееленістерні сыдас парыбыссабыс, Аннаңох хада ӱлгӱ тударбыс.

Тӧдір пассабыс, Ол даа пістең тӧдірленер.

¹³ Піс Ағаа киртістіг полбазабыс таа, Ол киртістіг халар –

Позынаң тӧдір пазын полбинча нооза.

Сынаан полысчы

¹⁴ Пу чооғымны прайзының сағыстарына кирчет. Сӧстердеңер таласпазыннар тіп, Хан-пигнің адынаң алдан: ол тик таластар оларны исчеткен кізілерні ардатчалар. ¹⁵ Худайның алнында уйадар нимезі чох, сынның сӧзіне орта ӱгретчеткен турыстығ полысчы полар ӱчӱн, прай кӱзің салын. ¹⁶ Алығ, тик чоохтардаң оортах чӧр. Ол чоохтарда араласчатханнар Худайдаң ырахтаң ырах ла полып одырарлар. ¹⁷ Оларның сӧзі, чабал ағырығ чіли, алғым тарир. Именей паза Филит ағаа кӧзідім полчалар. ¹⁸ Олар, кізілернің ӧлімнең тірілгені пол парды тіп чоохтап, іди сын ӱгредігдең тӧдір пазып, хайзыларының киртіністерін сайбапчалар.

¹⁹ Че тӧзінде салылған Худай тазында мындағ таңма: «Хан Худай Позының чонын пілче» паза «Хан Худайның адын алынған кізінің полғаны ла чой киректең тӧдір пассын». ²⁰ Улуғ иб-чуртта, алтын паза кӱмӱс ідіс-хамыстаң пасха, ағас-тойдаң даа иткені пар: пірсілері аарластығ, пасхалары кірліге тудынылчалар. ²¹ Пу кірдең позын арығлап полар кізі аарластығ ызых# ідіс полар, ээзіне дее кирек, ноо даа чахсы нимее тузалығ. ²² Постаң тустың хынығыстарына сабылба. Хан-пигібісті арығ чӱрекнең хығырынчатхан кізілернең хада сынға, киртініске, хынысха, амырға чағын тудынарға кӱстен. ²³ Хыйғазы, тузазы чох тартыстардаң, ыырлас сығарчатханын піле, хыйа пол. ²⁴ Худай хулы тартыспасха кирек, че прайзынаң чалахай тудынып, тыыдымнығ чахсы ӱгретчі поларға кирек. ²⁵ Тоғырланчатханнарны амыр ӱгрет. Арса, сайтан# позының ӱлгӱзіне киріп алған сӧзірбезінең позып аларлары ӱчӱн, Худай оларға, пыросынарға оңдай пиріп, сынны пілерге чол ас пирер.

Кізілер тӱгенҷі тустарда

¹ Тӱгенҷі кӱннерде сидік тустар полыбызарын піл. ² Кізілер улуғ кӧӧліг, ахчаа сабылған, улуғсырхаас, кӧкеесім, чабал тілліг, іҷе-пабаның чооғын испес, алғыстирын пілбес, Худайны улуғлабас, ынағ нимес, ³ чарас пілбес, хоп чоохтығ, позын тудын пілбес, чабал чӱректіг, чахсаа хынмас, ⁴ садынҷах, хабылаачы, хоғдайаачы, Худайға сабылар орнына чуртас хыниина тартылар пол парарлар, ⁵ Худайға тудынаачыхтанарлар, че Аның кӱзін хыйа тастирлар. Андағлардаң оортах пол. ⁶ Андағлар, иб-чуртха сыынып алып, тоғырланмас, кӧп чазыхтығ#, хыҷаланыстарына пос салынған ипчілерге ӱлгӱ салчалар. ⁷ Андағ ипчілер сыбыра ӱгренчелер, че сын піліске хаҷан даа чит полбинчалар. ⁸ Ианний паза Иамврий Моисейге# тоғырланған чіли, пудурғы кізілер сын піліске тоғырланчалар. Оларның сағыстары ардап парған паза олар киртіністең чат халғаннар. ⁹ Че олар кӧп маңнанмастар, Ианнийнең, Иамврийнең хайди полған, пуларының даа сағыс чоғы прайзының алнында іле сығыс парар.

Тимофейге халғанҷы чахығлары

¹⁰ Че син пілчезің минің ӱгредиимні, хайди чуртапчатханымны паза чуртазымның пӧгінін. Син минің киртінізімні, ханҷа мин ирееленгенімні пілчезің. Минің хынызымны паза ӱр тыстанғанымны даа пілчезің. ¹¹ Син пілчезің сӱрдіргенімні паза иреені ханҷа сыдас парғанымны. Антиох, Икон, Листр саарларында мині хайди сӱргеннерін син прай пілчезің, че Хан-пиг прай пу нимедең мині арачылап халған. ¹² Прайзы даа, Христос Иисуста Худайның кӧңнінҷе чуртирға хынғаннары, сӱрдірер. ¹³ Чабаллар, чойлар, тізең, алаахтырып, алаахтыртып, чабалның тӱбіне тӱзерлер. ¹⁴ Син, тізең, кем сині ӱгреткенін піле, нимее син ӱгреніп алғаныңнаң, нимее син киртінчеткеніңнең чурта. ¹⁵ Син Худайның Пічиин кічігдең пілчезің нооза. Ол Христос Иисусха киртініс пастыра арачыланарға сағыс пирче. ¹⁶ Прай Ызых Пічиине Худай тын кирче, Ол ӱгредіге, чӧп пиреріне, читпестерні іле сығарарына, орта чуртирына ӱгретче. ¹⁷ Іди полза, Худай кізізі толдыра паза ноо даа чахсы кирекке тимде полар.

¹ Хан-пигібіс Иисус Христос тіріглерні паза ӧліглерні чарғылирға паза Позының хан-чирін# турғызарға килер. Аннаңар Худайның паза Хан-пигібіс Иисус Христостың алнында синнең алданчам: ² тузы читсін-читпезін, Худайның сӧзіне ӱгрет, ілезіне сығар, чоохтаныбыс тур, тыстаныснаң паза тӱптестіріп алда. ³ Орта сӧсті алынмас тус полар нооза, андада постары хынған, истерге истіг ӱгретчілерні тапхлирлар, ⁴ сын пілістең хыйызып, кип-чоохтарға сабыларлар. ⁵ Че син хаҷан даа сиргек пол, иреелестерге сыдас, Чахсы Хабар тарадығҷызының киреен идіп, тоғызың толдыр. ⁶ Минің толығ поларым чидіп одыр, минің ӧлер тузым чағдап килді. ⁷ Хандыра кӱрестім мин. Чолым ирттім, киртіністі хайраллап халдым. ⁸ Амды мағаа, орта чуртааным ӱчӱн, пу кӱнде Хан-пигібіс, сын Чарғыҷы, пирер сый тимнелче, мағаа ла нимес, че Аның килеріне хынчатханнарға прайзына даа.

Тимофейге позы толдырар чахығлар

⁹ Минзер табырах килерге кӱстен. ¹⁰ Димас, пу чуртасха хынығып, мині тастап, Фессалоник саарзар парыбысты, Крискент – Галат чирінзер, Тит – Далмат чирінзер, чалғыс Лука ла миннең хада. ¹¹ Маркты позыңнаң хада алып, ағыл килерзің – ол мағаа нымзанарға кирек. ¹² Тихикті мин Ефес саарзар ызыбысхам. ¹³ Килизең, мин Троадада Карпта халғыс салған таарым паза кинделерім, улам тууптаң иткеннерін, ағыл килерзің. ¹⁴ Хазан итчең Александр мағаа кӧп чабал ниме иткен. Худай ағаа иткені хоостыра нандыр пирзін! ¹⁵ Син дее аннаң китен – пістің сӧстерібіске ол тың тоғырланған.

¹⁶ Пастап мин нандырыға тартылғанымда, пірдеезі чох полған, прайзы мині тастабысхан. Тоғыр полбазын оларға анзы! ¹⁷ Хан-пиг, тізең, алным алып, минің пастыра Чахсы Хабар толдыра таразын паза аны пасха худайлығлар# парчазы иссін тіп тыытты. Іди мин ала парыстың тістерінең ос халғам. ¹⁸ Прай даа чабал киректең Хан-пигібіс ал халар мині паза Позының тигірдегі хан-чиріне апарар. Хаҷан даа сабланыс Ағаа. Аминь#.

Халғанҷы алғағлар

¹⁹ Прискилланы паза Акиланы паза Онисифорның ибін алғап сал тур. ²⁰ Ераст Коринф саарда халған. Трофимні, тізең, ағырығда, мин Милит саарда халғыс салғам. ²¹ Хысхы читкенҷе килерге кӱстен. Еввул даа, Пуд таа, Лин дее, Клавдий дее, прай даа харындастар сағаа чолабит ысчалар. ²² Хан-пиг Иисус Христос синнең хада ползын. Паарсазы читсін сірерге. Аминь.