2 Фессалониктегілерге

Павелнің фессалониктегілерге ікінҷі пічии

Пу пічікті Павел фессалониктегілерге пастағы пічиинің соонаң пасхан поларға айабас.

Фессалониктегі христиан тигірибінің хай пірее араласчылары Христостың ікінҷізін килерінеңер Павелнің ӱгредиин саба піліп алғаннар. Оларны Павел пасхан тіп итчеткен пічік путхабысхан поларға айабас. Олар, Иисусты сағамох пу чирге килібізер тіп санап, ах-чарыхтың тӱгенҷізінеңер улам сағыссырап сыхханнар. Павел оларға нандырып, Христостың пу чирге килерінің алнында полар харахха кӧріндіре хай пірее киречілестер парынаңар чарыда чоохтапча. Аннаңар христианнарға тыстанарға паза, ноо даа тоғысты идері тузазы чох ниме теен чіли, пос пастыр чӧрбеске кирек.

Алғас

¹ Павел, Силуан паза Тимофей Худай Пабабысха, Хан-пигібіс# Иисус Христосха киртінчеткен Фессалоник саардағы тигірибіне# чолабит ысчабыс. ² Худай Пабабыстаң паза Хан-пигібіс Иисус Христостаң паарсас паза амыр хоных сірерге ползын.

Христос айлан килзе, Худай чарғылиры

³ Сірернің киртіністерің ӧсчеткеннеңер паза прайзыңарның пос аразында даа, удур-тӧдір дее улам хынызып чуртапчатханынаңар, харындастар, піс Худайны сірернің ӱчӱн сыбыра алғирға кирекпіс – анзы орта. ⁴ Аннаңар піс позыбыс сірернің тыстанызыңарға, хайди даа сӱрдіріп, хыйыхтадып, киртісті тастабинчатханыңарға Худай тигіриблерінде махтанадырбыс. ⁵ Анзы Худайның сын чарғызы килерінеңер киречілепче. Ол чарғыда сірер Худай хан-чиріне# турыстығ саналарзар. Ол Худай хан-чирі ӱчӱн сірер сағам ирее кӧрче нооңзар. ⁶ Сірерні хыйыхтааннарға Худай чобағнаң айландыр пирзе, хыйыхтатханнарны, тізең, Хан-пигібіс Иисус, тигірдең киліп, піснең хада часхар салар. Анзы орта полар. Ол, Позының кӱстіг ангеллерінең# хада чалыннығ отта киліп, Худай пілбееннердең паза Хан-пигібіс Иисус Христостың Чахсы Хабарын алынмааннардаң ӧс алар. ⁹ Оларны тоозылбас ӧлімге чарғылирлар паза Хан-пигінең Позынаң, Аның илбек сабланызынаң хыйа идерлер. ¹⁰ Анзы ах-арығлары Аны сабландырар ӱчӱн, паза прай киртіністіглері Ағаа хайхир ӱчӱн, Ол килер туста полар. Ол кӱн сірер дее, пістің киречілеенібіске киртін парғаннаңар, оларның аразында поларзар.

Павелнің пазырызы

¹¹ Аннаңар піс сірердеңер сыбыра пазырчабыс. Піс сірерні кӧстеен чуртасха турыстығ поларға, сірерге ноо даа чахсы нимені паза киртістің киректерін идеріне Худайдаң кӱс пирерге сурынчабыс. ¹² Хан-пигібіс Иисус Христостың ады сірерде сабланзын. Сірер дее, Худайыбыс паза Хан-пигібіс Иисус Христостың паарсазы+ 1:12 Грек тілінде пу орынны «Худайыбыстың паза Хан-пигібіс Иисус Христостың паарсазы» алай «Худай Хан-пигібіс Иисус Христостың паарсазы» тіп оңнирға чарир. хоостыра, Анда сабланыңар!

Чазых оолғынаңар

¹ Амды, харындастар, Хан-пигібіс Иисус Христостың килерінеңер паза піс аныңзар чыылызарынаңар чоохтап пирерім килче. ² Пик сағыстығ полыңар. Христостың кӱні чит килді тіп чарлапчатхан хут таа, сӧс тее, піс ысхан тіп итчеткен пічік тее сірерні чалтандырбазын. ³ Пірдеезі сірерні пір дее оңдайнаң аптап полбазын: Худайдаң кӧп кізі хыйа полбаанда паза чазых# оолғы – ӧлімге салылар кізі – килгелекте, ол кӱн чағдабас. ⁴ Ол, Худайға тоғырланып, кізілер пазырчатхан прай нимедең пӧзік ӧӧрлир. Худай храмында# ол, позын худай аданып, одыр салар. ⁵ Мин сірернің араңарда полғанымдох, аны сірерге чоохтаанымны сағысха кирбинчезер бе? ⁶ Сағам даа сірер пілчезер, ниме ағаа, ӧлім оолғына, тузы читкелекте, килерге харығ полча. ⁷ Худай ӱлгӱзіне тоғырланчатхан кӱс тоғын пастабысты. Че ағаа харығ полғаны чолынаң хыйа парыбыспаанда, ол кӱс толдыра хайын полбас. ⁸ Ол арада Худай ӱлгӱзіне тоғырланған кізі сығыс килер, аны Хан-пигібіс Иисус тынызынаң на ӧдір салар, Позы килгенінең не чох ит салар. ⁹ Ӱлгӱ сайбағҷызы, сайтанның# кӱзінең тузаланып, аймах кӱстер, танығлар, чой хайхастар# идіп килер. ¹⁰ Арачыланыс пирчеткен сын сӧстерге хынмааннаңар паза алынмааннаңар, ӧлімге парчатхан кізілерні алаахтырып алар ӱчӱн, ол аймах чабал оңдайларнаң тузаланар. ¹¹ Аның ӱчӱн Худай, олар чойға киртін парзыннар тіп, алаахтырысха чол ас пирер. ¹² Андада сынға киртінмееннері, че чазыхха хынғаннары прайзы чарғыладар.

Арачыланысха таллалғаннары

¹³ Хан-пигібіс хынған харындастар! Піс, Худай сірерні арачыланысха пурнада таллап алған ӱчӱн, Аны сыбыра алғыстирға кирекпіс. Сірер Худай Худынаң# арығланып паза сынға киртініп арачыланарзар. ¹⁴ Ол, Хан-пигібіс Иисус Христосты сабланызына кирер ӱчӱн, пістің Чахсы Хабарға ӱгреткенібіс пастыра сірерні арачыланысха хығыртхан. ¹⁵ Аннаңар, харындастар, сӧстең алай пічіктерібіс пастыра піс пирген ӱгредиибісте пик турыңар паза ағаа тудыныңар. ¹⁶ Позы Хан-пигібіс Иисус Христос, тізең, паза піске хынчатхан, паарсасха толынчатхан, хаҷанға даа пісті ӱтеерт салған, ізеніс пирчеткен Худай Пабабыс ¹⁷ чӱреебісті часхар салзын, ноо даа сӧсте паза чахсы киректе пик турғыс салзын.

Пістің ӱчӱн пазырыңар

¹ Ол оңдайнаң пістің ӱчӱн пазырыңар, харындастар. Худай сӧзі, сірердӧк чіли тарир паза сабланар ӱчӱн, ² піс, тізең, чабал, чой кізілердең озар ӱчӱн, пазырыңар. Прайзында ла киртініс чоғыл нооза. ³ Хан-пигібіс, тізең, киртістіг. Ол сірерні киртіністе пик турғызар паза сайтаннаң арачылир. ⁴ Піс чахаанны сірер толдырчатханыңарға паза толдырарларыңа Худайыбыс пісті ікінҷілес чох киртіндірче. ⁵ Хан-пигібіс, тізең, чӱрееңерні Худайның хынызынзар паза Христостың тыстанызынзар айландырзын.

Ниме итпин, тик чӧрерінең китеніңер

⁶ Хан-пигібіс Иисус Христостың адынаң чахыпчабыс: арғаас, піс пирген кибір хоостыра чуртабинчатхан харындастаң хыйа парыңар. ⁷ Сірер пістің хоостыра поларға кирек тіп пілчезер. Піс, сірернің араңарда полғанда, арғаастанмаабыс нооза. ⁸ Піс пірдеезінің халазын тик чібеебіс, пірдееңерге аар-чӱк полбасха тіп, хараа-кӱнӧрте майыхханҷа тоғынғабыс. ⁹ Ӱлгӱбіс чохтаңар нимес, че позыбыс сірерге кӧзідім поларға сағынып, іди тудынғабыс. ¹⁰ Піс сірернең хада полғаныбыста іди чахаабыс, хайза: тоғынминчатхан кізі чібеске кирек. ¹¹ Че піс ис халчабыс, сірернің хай піреелері арғаастанчалар, пір дее ниме итпинчелер, прай нимее кірісчелер. ¹² Андағларға піс Хан-пигібіс Иисус Христостың адынаң айланчабыс паза чахыпчабыс: артых суулабин, тоғынып, халастарын чізіннер. ¹³ Сірернің, тізең, харындастар, чахсы киректерні итчетсеңер, кӧңніңер тӱспезін. ¹⁴ Пу пічиибістегі сӧзібіске тообаан кізіні, тізең, хайыға алып, аны уйаттырар ӱчӱн, аннаң хыйа полыңар. ¹⁵ Че аны ыырҷаа санабаңар, харындасты чіли, ӱгредіп одырыңар.

Алғааны

¹⁶ Амыр пирчеткен Хан-пиг Позы, тізең, прай киректерде хаҷан даа амыр кӧңніліг поларға пирзін сірерге. Хан-пигібіс прайзыңарнаң хада! ¹⁷ Минің, Павелнің, пічиимнің тании+ 3:17 Ол туста пічікті кізее пастырҷаң полғаннар. Пу сӧстері Павелнің позының холынаң пазыл парғаннар. – позым холымнаң пасхан алғыстас. Мин піди пасчам: ¹⁸ Хан-пигібіс Иисус Христостың паарсазы сірернең прайзыңарнаң хада. Аминь#.