2 Петрның

Пётр илҷінің ікінҷі пічии

Ікінҷі пічиин Петр пастағызынаң ікіҷе чыл соонаң, ӱрир алнында пас салған.

Христианнар ӧмелерінің аразында пу чылларда хайдағ-да чой ӱгретчілер сығысхлап килгеннер. Олар Христосха киртінчеткеннерні чазыхтығ хынығыстарын хандырарға кӧӧктіріп одырғаннар. Оларның сӧстері паза чуртастары Иисустың ӱгредиине кӧлек тастааннар. Олар Хан-пигнің тӱрче итпинең чир ӱстӱне айланарынаңар молҷаан нимее салбааннар. Петр христианнарны киртіністі сайбапчатхан ікінҷілестерге салынмасха хығырча. Христосха киртінчеткен кізілерге мының соонаң даа Худайға чарас чуртирға паза прай нимеде Хан-пиге ізенерге кирек.

Пу пічік кӧбізінде Иуданың пічиине тӧӧй. Сағамғы істезігҷілернің илеедезі, пу авторлар, постарының сағыстарын читірері ӱчӱн, пірсі пірсінің пічиинең алай ба ікізі дее ӱзінҷі пічікнең тузаланғаннар тіп, санапчалар.

Христос киртінізін ӱгренген пурунғы тархынҷыларның искіріглері хоостыра Петр илҷі, киртінізі ӱчӱн, Павел илҷінең пір арада, Нерон хағанның тузында (наа эраның 66 чылында) ӧдірт салған.

Алғас

¹ Сірерге, пісти осхас аарлығ киртіністері пар кізілерге, Иисус Христостың нымысчызы паза илҷізі# мин, Симон Пётр, пасчам. Орта нимее хынчатхан Худайыбыс паза Арачылағҷыбыс Иисус Христос пу киртіністі сірерге пирген. ² Худайның паарсазы паза амыры сірерде кӧптелзін. Худайны паза Хан-пигібіс# Иисус Христосты улам чахсы піліп одырзар, анзы толар.

Худайны піліңер

³ Худай Позының илбек кӱзінең піске чуртасха паза Аны улуғлирына прай ниме пирді. Ол нимені піс, Худайны ханҷа артых пілзебіс, анҷох кӧп алчабыс. Ол пісті Позының сабланызын паза чахсызын ӱлезіп аларға хығыртхан нооза. ⁴ Ол оңдайнаң Худай піске илбек паза аарлығ молҷағлар пирген. Пу молҷағларның сылтаанда піс Худайға тӧӧй поларға оңдай алчабыс. Че піске тилекейнең устапчатхан, кізіні ардатчатхан хынығыстардаң хыйа парарға кирек. ⁵ Аннаңар киртіністеріңе чахсыларыңны хозар ӱчӱн прай кӱзіңерні салыңар. Чахсыларыңа піліс хозыңар. ⁶ Піліске посха ээлен поларын, посха ээлен поларына тыстан пілерін, тыстан пілеріне, тізең, Худайны улуғлирын хозыңар. ⁷ Худайны улуғлирына киртіністіг кізілерге хынарын хозыңар. Киртіністіг кізілерге хынарына прай кізілерге хынарын хозыңар. ⁸ Прай пу ниме сірерде пар полза, ол кӧптеліп одырза, сірер Хан-пигібіс Иисус Христосты пілерінде тӱзімніг паза маңнаныстығ поларзар. ⁹ Че сірер піди хылынминчатсар, харахтаң кинек кізі осхас поларзар. Постарыңның алнында пір дее ниме кӧрбинчезер паза алындағы чазыхтарыңнаң# арығланардаңар ундут салғазар. ¹⁰ Аннаңар, харындастар, Худай сірерні хығыртхан паза таллаан кізілер полчатханнарыңны чуртастарыңда ізестіг киречілирге кӱстеніңер. Іди итчетсеңер, киртіністеріңнең хаҷан даа хыйа парыбыспассар. ¹¹ Андада сірерге Хан-пигібіс паза Арачылағҷыбыс Иисус Христостың тӱгенмес хан-чирінзер# хаалха азыл парар.

¹² Сірер анзын пілчеткен дее ползар паза сын ӱгредіге пик киртінчетсер дее, іди ле ползын тіп, мин мыны сыбыра сағыстарыңа кирчедербін. ¹³ Мин парда, прай пу нимені сағыстарыңа сиирте чоохтапчатханым орта полар тіп, сағынчам. ¹⁴ Итсе, тӱрче полза, мин сын чирзер парыбызарымны пілчем. Анзын мағаа Хан-пигібіс Иисус Христос азых чоохтаан. ¹⁵ Хаҷан даа, мин ӧл парған соонда даа, ӱгредиимні сағыстарыңда ал чӧрерлерің ӱчӱн прай ниме идерге кӱстенербін.

Пётрның паза ухаанҷыларның киречілестері

¹⁶ Піс, сірерге Хан-пигібіс Иисус Христостың кӱзінеңер паза Аның килерінеңер чоохтааныбыста, позыбыс сағын тапхан нимее тӧстенмеебіс. Піс Аның илбек кӱзін позыбыстың хараанаң кӧргебіс. ¹⁷ Хаҷан Ол илбек аарласты паза сабланысты Худай-Пабазынаң алғанында, піс анда полғабыс. Андада илбек сабланыс пулудынаң ӱн истілген: «Пу Минің хынчатхан Оолғым, Ол Минің кӧңніме тың кірче». ¹⁸ Піс анда, ызых# тағда, Иисуснаң хада полып, ол ӱннің тигірдең тапсаанын искебіс. ¹⁹ Пісте ідӧк ухаанҷыларның# сын киречілезі пар. Сірер, ол сӧсті хығырып, чӱрекке алчатсаңар, чахсы итчезер. Кӱн чарии сустал киліп, чӱректеріңде иртенгі чылтыс ӧӧрлебіспеенҷе, ол сӧс сірерге харасхыдағы чарытхы осхас полар. ²⁰ Че піліңер, Худай Пічиинің# хайдағ даа ухаанҷылазын кізі позы чарыт полҷаң ниме нимес. ²¹ Ухаанҷыластар кізінің кӧңні хоостыра хаҷан даа пирілбееннер. Ухаанҷыластар Худай Худының# устаанынаң Худайның ах-арығ# кізілерінең пастыра чарлалчалар.

Чой ӱгретчілер паза оларның ӧлімі

¹ Че израиль чонының аразында чой ухаанҷылар полғаннар. Сағам даа сірернің араңарда чой ӱгретчілер сығызарохтар. Олар кізілерге ӧлім ағылчатхан ӱгредіглер чарлирлар паза оларны ӧлімінең садып алған Хан-пигнің ӱлгӱзіне тоғырланарлар. Анынаң постарын ӧлімге табырах ағыларлар. ² Оларның сооларынҷа кӧп кізі парып, оралысха салынарлар. Чон, тізең, анзын кӧріп, сын киртіністі харғир. ³ Хыҷыхтарын хандырар ӱчӱн, ол чой ӱгретчілер сірердең парыстанып, постары сағын тапхан чой ниме чоохтирлар. Оларға чарғы сығарыл парған. Оларның ӧлерлері чағын.

⁴ Худай чазыхха тӱскен ангеллерні# чир тӱбінің# харасхызына айағ чох тастаан. Анда олар кинҷеліг Чарғы кӱнін сағыпчалар. ⁵ Худай ідӧк пурунғы тилекейні айабаан, хомай кізілерге чайыхты ысхан. Андада Худай сигіс ле кізіні арачылап алған. Ол Нойның сӧбірезі полған. Ной, тізең, Худайны улуғлап чуртирға ӱгреткен кізі полған. ⁶ Худай ідӧк Содомнаң Гоморра саарларны чох иткен: оларны ойба-кӱлге айландыр салған. Ол оңдайнаң Худай Позын улуғлабинчатхан чонны ниме сағыпчатханын кӧзіткен. ⁷ Ол саарларның пірсінде чуртаан арығ чӱректіг# Лот тіп кізі чонның сайбахтығ чуртазына кӧре ле майыхчаң. Аннаңар Худай аны арачылап халған. ⁸ Арығ чӱректіг кізі Лот, ол чонның аразында чуртап, оларның полчатханнарын кӱннің кӧріп паза истіп, тың ирееленген. ⁹ Пу кирек Худайны улуғлапчатхан кізілерні Хан Худай# хыҷыхтаныстаң арачылирға пілчеткенін кӧзітче. Ол, хомай кізілерні хатығлап, чарғы кӱніне хайди ағыларын даа пілче. ¹⁰ Пу чарғы кӱні улам ит-ханның кірліг хыҷыхтаныстарына салынчатхан паза Худай ӱлгӱзінең хыйа полчатхан кізілерні сағыпча.

Андағ чой ӱгретчілер иртінчелер, ниме хынза, аны итчелер. Олар сабланыстығ ангеллерні дее, нимее салбин, сӧклепчелер. ¹¹ Че кізідең хай-хай кӱстіг, арбын ангеллер Хан Худайның алнында чой ӱгретчілерні хырыспинчалар, олардаң тоғыр киречілебинчелер. ¹² Чой ӱгретчілер, тізең, сас аңнар ла чіли, пір дее ниме сағынминчалар, ит-ханнары тартхан хоостыра пол чӧрчелер. Олар постары оңарбинчатхан нимені хырысчалар. Сас аңнар, тізең, кізее туттырып, ӧлерге тӧріпчелер. Пу кізілер дее ідӧк чох иділерлер. ¹³ Олар постары иткен сайбағларының ӱчӱн хатығладарлар. Кӱн хараанаң чалтанмин, постарының хыҷыхтаныстарына салынчалар, кӧңнілерін тосхырчалар. Олар сірерні уйатха сухчалар паза, сірернең хада азыранып, сірернӧк кірнең порап салчалар. Олох туста сірерні алаахтырып алғаннарына ӧрінчелер. ¹⁴ Чой ӱгретчілер чӧреечі ипчілерзер ле кӧрчелер, чазыхха тартыларға хаҷан даа тооспастар. Олар нымзах хылыхтығ кізілерні постарына тартып алчалар. Чой ӱгретчілернің чӱректері чабы поларға ӱгрен парғаннар. Че Худай оларны харғап салған. ¹⁵ Олар орта чолдаң хыйызып, астых чӧрчелер. Восорның оолғы Валаамның чолынҷа парчалар. Валаам ахчаа чалланып, чабал киректі идерге тимде полған. ¹⁶ Че Валаамның чойын тізі эштек ілезіне сығарған. Тілі чох мал кізі тілінең чоохтан сыххан, ухаанҷының алиин тохтатхан.

¹⁷ Ол чой ӱгретчілер хуруп парған хара-суғ осхастар. Олар хазыр чил сӱр чӧрчеткен пулуттар, тубан осхастар. Худай оларға харасхының тӱбінде хаҷанға даа орын тимнеп салған. ¹⁸ Чой ӱгретчілернің чоохтары кӧкеесім, сӧстері, тізең, тик. Олар астых чӧрген кізілердең наа ла азырылып, сын чолға сыхчатхан кізілерні, ит-хан хыҷыхтаныстарына салынарға кӧӧктіріп, посха тартып алчалар. ¹⁹ Ол чой ӱгретчілер кізілерге пос чуртас молҷапчалар. Сынында олар постары хыҷыхтаныстарының хуллары. Пірее ниме кізіні ээлензе, ол кізі аның хулы пол парча нооза. ²⁰ Кізілер, Арачылағҷыбыс паза Хан-пигібіс Иисус Христосты піліп алып, пу чирнің кірінең озып алчалар. Че пу чирнің кірі оларны, пазох тудып алып, пазынып алза, олар позаалахтағызынаң хай-хай чабал пол парчалар. ²¹ Арығ чӱректіг кізілернің чолын піліп алған соонда олар постарына пирілген ах-арығ чахығлардаң аар айланыбыссалар, андағда оларға ол чолны пілбеені артых поларҷых. ²² Оларның хылынғаннары «Адай хусхағына айланадыр» паза «Сосханы чууп таа салза, олох ла палғасха кір парар» теені сын полчатханын киречілепче.

Иисустың айланарын молҷааны

¹ Хынғаннарым! Пу минің сірерге пасчатхан ікінҷі пічиим. Пу сын ӱгредігдеңер хатап пазып, сірерні орта сағынзыннар тіп хынчам. ² Алында ах-арығ ухаанҷылар чоохтаан сӧстерні паза илҷілеріңнең пастыра Хан-пигібіс паза Арачылағҷыбыс пирген чахиин ундубазыннар тіп сағынчам. ³ Иң пурнада мыны пілерге кирек. Тӱгенҷі кӱннерде# сірерзер чабал хынығыстарына тартылчатхан кізілер килерлер. Олар, сірерні нимее салбин, сірерні сӧклеп, ⁴ піди тирлер: «Килерім теені хайдадыр? Ӧбекелер ӧл парғаннар, че тилекей ідӧк ле турча паза чир чайалған тустаң ала алысханы чоғыл». ⁵ Ол кізілер тигірнең чир Худайның сӧзінҷе чайалғанын санға аларға хынминчалар. Чир суғдаң пӱткен, суғдаң сыххан. ⁶ Аннаңар пурунғыдағы тилекей чайых суунаң чох иділ парған. ⁷ Хан Худайның чахии хоостыра пӱӱнгі тигірнең чир от-чалыннаң чох иділер ӱчӱн хайраллалча. Ол чарғы кӱнінде, Хан Худайны улуғлабинчатхан кізілерні чох итчең кӱнде, полар.

⁸ Хынғаннарым! Хан Худайға пір кӱн пір муң чыл осхас полчатханын ундубаңар. Муң чыл, тізең, Ағаа пір кӱн осхас. ⁹ Піреелері, Хан Худай молҷаан нимені соона салдырча тіп сағынчатханнары, алҷаастанчалар. Хан Худай, тыстанып ала, сағыпча. Ол пірдеезін ӧлзін тіп сағынминча. Худай прайзын, чазыхтарын тастап, Позынзар айланарға маңнан халзыннар тіп хынча. ¹⁰ Хан-пигнің чарғы кӱні, оғыр хараазын кинетін кірібіскен чіли, чиде салар. Ол кӱнде суулабинаң тигір чох пола халар. Анда прай ниме, кӧйіп, чох иділ парар. Чир, тізең, паза чирдегі прай ниме чох пол парар. ¹¹ Іди прай ниме иділер полза, сірерге хайдағ кізі поларға кирек? Сірер ах-арығ чуртирға паза Худайны улуғлирға кирексер. ¹² Худайның чарғы кӱнін сағып ала, іди чуртаңар паза ол кӱн табырах килер ӱчӱн прай ниме идіңер. Ол, тигір кӧйіп, чох иділер, тигірдегі прай ниме ізіге хайылар кӱн полар. ¹³ Піс, тізең, Хан Худай молҷаан наа тигірні паза наа чирні сағыпчабыс. Анда прай кізілер Худайның оңдайынҷа чуртирлар.

¹⁴ Хынғаннарым! Ол кӱнні сағып, Худайның алнында арығ кӧңніліг, чазых чох поларға кӱстеніңер. Анынаң чаразып чуртаңар. ¹⁵ Хан-пигнің тыстанып ала сағаанын арачыланысха оңдай пирчеткеніне санаңар. Худай пирген хыйғазы хоостыра хынған харындазыбыс Павел піске аннаңар пасхан полған. ¹⁶ Аннаңар ол позының прай пічіктерінде пасча. Аның пічіктерінде пілерге сидік пірее нимелер парлар. Анзын ӱгредіг чох паза киртіністері пик нимес кізілер саба чарытчалар. Олар Худай Пічиинің пасха даа орыннарын іди ит салчалар. Ол оңдайлары оларны постарын ӧлімге ағылчалар.

¹⁷ Хынғаннарым! Мыны пілчеткеннеріңде, сизініп одырыңар. Андағда сірер Худай ӱлгӱзіне чарадынминчатхан кізілернің алҷаастарына тартыл парыбыспассар паза пик пілістеріңнең хыйыспассар. ¹⁸ Хан-пигібіс паза Арачылағҷыбыс полчатхан Иисус Христостың паарсазы паза Аны пілері сірерге хозылзын. Ағаа сағам даа паза хаҷан даа сабланыс ползын. Аминь#.