2 Коринфтегілерге

Павелнің коринфтегілерге ікінҷі пічии

Павелнің алындағы пічиинде Коринфтегі Христос тигірибін алдап, ӱгредіп пасханы салтарлар пирген. Чазых иткен кізілернің илеедезі пыросынып, Павелнең чаразар оңдай тілееннер. Че ол тигірибде кизек чон Павелні улуғлапчатханнаң тоғырланарын тохтаатпинчатхан. Аннаңар Павел Македон чирінде полчатхан туста, Коринфсер пазох чол сығарға тимненчеткенінде, оларға пазох пір пічиин ысхан.

Ол пічік пасхаларының хыринда іди ле иптіг, изерістіре пазылбаан. Хынза, анзына сылтағ Павелнің, пічік пасчатханда, тың ӧкпеленгенінде полған. Пірее істезігҷілер, коринфтегілерге пазылған пу пічік, ікі алай ӱс тее алынҷа пічікнең піріктіріліп, соонаң пазылған полар тіп, санапчалар.

Хайзы даа саринаң кӧрзе, аны ӱс чардыхха ӱлестірібізерге чарир: 1) Павелнің Коринфтегі тигірибнең чарасханына ӧрінгені паза илҷінің Христосха тоғынғанынаңар пасханы (1-7 пастағлар); 2) Иерусалимдегі чох чуртапчатхан христианнарға пос кӱзінең пар-чоғынаң полызардаңар коринфтегілерні ӱгредіп чоохтааны (8-9 пастағлар); 3) позына туза аларға идіп, Чахсы Хабарға ӱгретче тіп, Павелні пыролапчатхан чой ӱгретчілернің чооғын исчеткеннері ӱчӱн, коринфтегілерге хомзынызын читірче.

Алғас

¹ Худайның кӧңнінҷе Христос Иисустың илҷізі# полчатхан Павел паза Тимофей харындас Коринфтегі Худай тигірибіне# паза тиксі Ахай чирінде чуртапчатхан ах-арығ# кізілерге чолабит ысчабыс. ² Худай Пабабыстаң паза Хан-пигібіс# Иисус Христостаң паарсас паза амыр хоных сірерге ползын.

Павел Худайны алғыстапча

³ Худай, Хан-пигібіс Иисус Христостың Пабазы, сабланзын. Ол хайдағ даа айағның Пабазы паза ноо даа часхарыстың Худайы полча. ⁴ Ол пісті ноо даа сидіксіністерде часхарча. Аннаңар піс тее сидікке урунған кізілерні часхар полчабыс. Піс оларны, Худай пісті часхарчатхан чіли, часхарчабыс. ⁵ Христостың чобағларында ханҷа кӧп араласчабыс, анҷох кӧп Христостың пастыра часхарыс алчабыс. ⁶ Піс чобалчатсабыс, тізең, сірерні часхарынзыннар паза арачыланзыннар тіп чобалчабыс. Ол арачыланыс піс тее кӧрчеткен ирееленістерні сыдас парары хоостыра пирілче. Сірернің прай нимені сыдас парыбызарларыңа тың ізенчебіс. Піс часхарынчатсабыс, сірерні дее часхарынзыннар паза арачыланзыннар тіп часхарынчабыс. Чобағларыбыста даа, часхарыныстарыбыста даа сірер араласчатханнарыңны пілчебіс нооза.

⁸ Ана аннаңар, харындастар, Асий чирінде# піске урунған ирееленістерібістеңер сірерні пілбин халбазыннар тіп сағынчабыс. Ол сині чох аар, сыдас полбас ирееленістер полғаннаңар, піс тіріг дее халарыбысха ізенминчеткебіс. ⁹ Посха нимес, че ӧлімнең тірілдірчеткен Худайға ла ізенер ӱчӱн, піс позыбысты ӧлімге чарғылат салған кізілер тіп сағынғабыс. ¹⁰ Худай пісті хырибыста чӧрген ӧлімнең ал халған, ал халча, соонаң даа ал халчадар тіп ізенчебіс. ¹¹ Сірер, пазырып, піске матап полысчазар нооза. Худай, кӧп кізінің пістің ӱчӱн пазырғанын истіп, пісті ал халған. Аның ӱчӱн кӧп кізі Худайны алғыстаан.

Павелнің пӧгіннері алысчалар

¹² Мына нимее поғдархапчабыс паза арығ сағыснаң киречілепчебіс: чон аразында, улам сірернің араңарда, полған туста, прай киректерде кӧні паза азых кӧңніліг тудынғабыс. Піс, кізі хыйғазынаң устанмин, Худайның паарсазына ізенгебіс. ¹³ Сірерге хығырып піл полар ла нимені пасчабыс. Мыны читіре піл поларларыңа ізенчем. ¹⁴ Амды сірер ханҷа-да оңарчазар: Хан-пигібіс Иисус Христос килер кӱнде піс сірернің махтааңар поларбыс, сірер, тізең, – пістің. ¹⁵ Анзын ікінҷілебин, сірерге ікі хати кӧп туза идерім ӱчӱн, сірерзер хати килерге иткем. ¹⁶ Македон чирінзер парирып, сірерзер кірерге пӧгінчеткем. Анаң, Македон чирінең сығып, пазох сірерзер парарға итчеткем. Сірер, тізең, мині Иудей чирінзер# ӱдезібізерҷіксер. ¹⁷ Іди пӧгінгенде, мин ниик сағыстығ полбаам нооза. Кізі сағызы хоостыра даа идер чоғылбын. Пірде «йа, йа», анаң «чох, чох» тіп чӧрбинӧкчем. ¹⁸ Худай мағаа киречі: сірерге чоохтаан чооғыбыста пірде «йа», пірде «чох» полбаабыс. ¹⁹ Миннең, Силуаннаң паза Тимофейдең сірерде чарлалған Худай Оолғы Иисус Христос пір саңайға «йа» паза «чох» полбаан. Анда «йа» ла полған. ²⁰ Худайның прай молҷағлары, Христоста толдырыл парып, «йа» паза «аминь#» пол парғаннар. Анзы Худай пістің пастыра саблан парар ӱчӱн полған. ²¹ Худай сірернең пістің Христосха киртінізібісті тыытча. Ол пісті, Позының Худын пиріп, таңмалапча. ²² Іди Ол, пісті таныхтап, Позының Худын чӱректерібіске пиріп, полар тусха ізеніс пирген.

²³ Худай Позы киречі, Ол чӱреемдегізін пілче. Мин, сірерге айап, пу тусха теере Коринфсер килбеем нооза. ²⁴ Анзы киртінізіңернең устапчатханыбысты таныхтабинча. Чох, сірерні ӧрінзіннер тіп, сірернең хада тоғынчабыс. Киртіністерің пик нооза.

¹ Ол оңдайнаң, мин сірерні пазох хомзындырарға тіп килерге сағынминчам. ² Сірер мині ӧріндірерге кирексер. Аннаңар, мин сірерні хомзындырчатсам, мині ӧріндірҷең кізі халар ба? Мин хомзындыр салған кізілер ле халар нооза. ³ Мин мыны ноғадаңар пасчам? Сірерзер читсем, мині ӧріндірерге кирек кізілернің ӱчӱн хомзынарым килбинче. Минің ӧрінізім сірерге дее ӧрініс полчатханын пір дее ікінҷілебинчем нооза. ⁴ Улуғ чобаға пастырып, чӱреем ағыриина хыстырып, харах чазым тӧгіп ала, сірерге пасханымда, сірерні хомзындырарға итпеем. Сірерге синінең артых хынызымны сірерні пілзіннер тіп сағынғам.

Пыросынғанның пырозын тастирдаңар

⁵ Сірернің піреелерің мині хомзындырчатса, мині ле нимес, сірерні прайзыңарны даа хомзындырча. Пу хоза чоох нимес. ⁶ Сірернің кӧбізі аны хатығлааны ағаа читкіҷе пол парды нимес пе? ⁷ Амды сірер, аның пырозын тастап, часхар салзар, чахсы полар. Пичелге уғаа тың пастыр салып, саңай сағыныбыспазын. ⁸ Аннаңар ағаа хынызыңарны читір пиріңер тіп сурынчам. ⁹ Мин тігі пічиимні, прай нимеде чооғымны исчезер бе тіп піліп алар ӱчӱн, сыныхтап пасхам нооза. ¹⁰ Сірер пырозын тастаан кізее мин дее пырозын тастапчам. Мин дее пырозын тастапчатсам, сірернің ӱчӱн Христостың адынаң аны итчем. ¹¹ Сайтан# пісті алаахтырып албас ӱчӱн, іди иткем. Піс аның хара сағыстарын пілчебіс нооза.

Павелнің Троадада сағысха тӱскені

¹² Мин, Христостаңар Чахсы Хабарға ӱгредерге Троадазар килгенімде, Хан-пигнің чол ас пиргенін кӧр салғам. ¹³ Че Тит харындазымны анда таппин, сағыссырап сыххам. Аннаңар, андағы кізілернең анымҷохтазыбызып, Македон чирінзер парыбысхам.

Христоста пайрамнааны

¹⁴ Че Худайға алғыс! Піс Христоснаң хада полчатсабыс, Худай піске хаҷан даа чиңіс пайрамнирын пирче. Ол Христостаңар пілісті, тадылығ чысты чіли, пістің пастыра прай чирде таратча. ¹⁵ Піс ыстапчатхан тайығның тадылығ чызы осхаспыс. Ол тайығны# Христос Худайға салча нооза. Ол тайығның чызы арачыланчатханнарға даа, ӧлімнің чолынҷа парчатханнарға даа сабылча. ¹⁶ Ӧлімнің чолынҷа парчатханнарға ол ӧдірчеткен чабал чыс полча. Арачыланыс чолынҷа парчатханнарға ол чуртас пирчеткен тадылығ чыс. Кем анзын ит полар? ¹⁷ Илееде кізі Худайның сӧзін парыс алар ӱчӱн таратча. Піс олар чіли итпинчебіс. Худайның алнында кӧйтіктенмин тудынып, чоохтапчабыс. Піс Христостың нымысчыларыбыс нооза.

Наа молҷағның тоғынҷыларынаңар

¹ Нӧӧс піс сірернең хатап танызарға кирекпіс? Нӧӧс, піреелеріне чіли, піске сірерзер алай сірердең киречілестіг пічік кирек? ² Сірер пістің чӱреебісте пазылған, прайзы пілчеткен паза хығырчатхан пічиибіссер нооза. ³ Сірер постарың Христостың пічии полчатханнарыңны кӧзітчезер. Піс сірернің араңарда тоғынғанда пу пічікті пас салғабыс. Ол черниланаң нимес, че тіріг Худайның Худынаң, таста нимес, че сабылчатхан чӱреебісте пазыл парған.

⁴ Піс Христосха киртін парғабыс. Аннаңар Худайның алнында сірердеңер іди чоохтанарға тідінчебіс. ⁵ Піс позыбыстың кӱзібіснең пірее ниме ит поларыбыстаңар чоохтабинчабыс. Пістің прай кӱзібіс Худайдаң полча. ⁶ Ол піске Наа Молҷағның# нымысчылары поларға оңдай пирген. Піс холнаң пазылған чахыға нимес, че Худайның Худына# нымысчы полчабыс. Холнаң пасхан чахығлар ӧлімге ағылчалар, Худай Худы, тізең, тірілдірче.

⁷ Моисей Чахии# таста киртілген полған. Ол пирілчеткенде, Худайның сабланызы# азыл парған. Моисейнің# сырайы тың чараан. Аннаңар Израиль чоны ағаа удур кӧр полбаан. Че ол иртісчеткен чарых полған. Ӧлімге ағылчатхан Чахығның чарыпчатхан сабланызы андағ полчатса, ⁸ Худай Худының тоғынғаны, тізең, аннаңох артых сабланыс полбас па? ⁹ Чарғылаттырарына ағылчатхан чахығ андағ сабланыснаң чарыпчатса, ахтаныс пирчеткен тоғыс хай син артых сабланыснаң чарир. ¹⁰ Піди чоохтирға чарир: артых сабланыс килгеннеңер, алында саблығ полғаны позының сабланызын чідір салған. ¹¹ Иртісчеткен молҷағ сабланыстығ полчатханда, иртіспинчеткен молҷағ улам сабланыстығ полбас па?

¹² Пістің андағ ізеніс парда, чалтанмас тідініснең тудынчабыс. ¹³ Піс Моисей чіли итпинчебіс. Израиль ооллары сабланыстығ чарииның иртісчеткенін кӧр салбазыннар тіп, Моисей сырайын иснең пӱргебіскен. ¹⁴ Оларның сағыстары ай парған полған. Пу тусха теере олар Пурунғы Молҷағны хығырчатсалар, оларның сағыстары олох иснең пӱргелік. Христос ла ол исті хыйа ал полар нооза. ¹⁵ Амға теере олар Моисей Чахиин хығырчатсалар, чӱректері иснең пӱргелік. ¹⁶ Че хаҷан олар Хан-пигзер айланчатсалар, андада ол ис хыйа алылча. ¹⁷ Піс чоохтапчатхан Хан-пиг Худай Худы полча. Худай Худы полчатхан чирде, тізең, кізілерге пос поларға оңдай пирілче. ¹⁸ Піс, тізең, Хан-пигнің сабланызын пӱргелбеен сырайыбыста, кӧріндесте чіли, кӧзітчебіс. Хан-пигнің Худы піске сабланыс пирче. Ол сабланыс пісті, Хан-пиге тӧӧй идіп, алыстырча паза улуғдаң улуғ сабланысха ағылча.

Той ідістердегі хайхастығ ис-пай

¹ Аннаңар Худай, піске айап, пу тоғысты пирген, піс, тізең, кӧңнібіс тӱзірбинчебіс. ² Че піс туйух, уйадыстығ киректерні хыйа итчебіс паза кӧйтікке салынминчабыс. Піс, Худай сӧстерін хыйыстырбин, сынны азып, постарыбысты Худайның алнында ноо даа кізінің чарғызына сығарчабыс. ³ Піс чарлапчатхан Хабар піреезіне иснең чабых осхас полза, ол ӧлім чолынҷа парчатханнарға чабых. ⁴ Ол кізілер киртінминчелер. Пу чабал тустың худайы полчатхан сайтан оларның сағыстарын харасхыда тутча. Ол Христостың сабланызынаңар чарлапчатхан Чахсы Хабарның чариин кӧрерге пирбинче. Че Христос Худайның омазы полча нооза. ⁵ Піс, тізең, позыбыстаңар нимес, Иисус Христос Хан-пигібіс полчатханнаңар ӱгретчебіс. Иисус піске иткен нименің ӱчӱн, піс сірерге хул полыбысхабыс. ⁶ «Харасхыда чарых ползын» тіп, Худай пістің чӱректерібісті чарыдыбысхан. Іди Ол Иисус Христостың сырайында чарыпчатхан Худайның сабланызын пілерге пирген.

⁷ Пістің иді-ханыбыс той ідіс осхас. Ол ідісте піс хайхастығ ис-пайны хайраллапчабыс. Анзы пу сабланыстығ кӱзібіс пістең полбинчатханын, че Худайдаң килчеткенін прайзына кӧріндірер ӱчӱн иділче. ⁸ Піс прай чирдең хыстырчабыс, че пастырбаабыс. Сидік оңдайға кір тее парған ползабыс, кӧңнібіс тӱспинче. ⁹ Піс сӱрдірчебіс, че Худай пісті тастабинча. Азахтаң тӱзіре саптырзабыс таа, чох иттірбеебіс. ¹⁰ Позыбыста Иисусти осхас тірілер кӱзібіс полар ӱчӱн, сыбыра ирееленіп, піс Иисус ӧлген чіли ӧлчебіс. ¹¹ Піс Иисустың ӱчӱн чуртазыбыста ӧлімге тоғасчабыс. Анзы пістің ӧлер ит-ханыбыста Иисустың чуртазы кӧрінері ӱчӱн полча. ¹² Аннаңар піс ӧлімнің, че сірер, тізең, чуртастың холындазар. ¹³ Худай Пічиинде# «мин киртін парғам, аннаңар теем+ 4:13 Кӧр: Пурунғы Молҷағдағы «Ырлар» (Псалтирь) кинде 116:10. » тіп пазылған. Пісте дее ол киртініс пар. Аннаңар піс тее киртінчебіс паза чоохтапчабыс. ¹⁴ Хан-пигібіс Иисусты тірілдірген Худай Иисустың пастыра пісті дее тірілдірерін пілчебіс. Андада Ол пісті сірернең хада Позының алнында турғыс салар. ¹⁵ Прай пу ниме сірерге туза. Худайның паарсазы кӧптең кӧп кізее читче. Худай сабланар ӱчӱн, олар Аны улам кӧп алғыстапчалар.

Чирдегі ӧлімніг чуртас паза сабланыстығ мӧгі чуртас

¹⁶ Аннаңар піс кӧңнібісті тӱзірбинчебіс. Пістің иді-ханыбыстың кӱзі хорапчатса даа, худыбыс, тізең, кӱннің сай нааҷылалча. ¹⁷ Піс кӧрінчеткен нимее кӧрбинчебіс, кӧрінминчеткенге кӧрчебіс. Аннаңар оой, иртісчең ирееленістерібіс илбек паза мӧгі сабланыс тӧрітчелер. Харахха кӧрінчеткен нименің тузы хысха, харахха кӧрінмес ниме, тізең, мӧгі нооза.

¹ Пу чирде чуртапчатхан пістің ит-ханыбыс отах осхас. Ол изел парза, Худай піске хол пӱдірбеен мӧгі иб-чурт пирер. Ол пістің тигірдегі ит-ханыбыс полар+ 5:1 «Ол пістің тигірдегі ит-ханыбыс полар» сӧстер грек пічіктерінде чоғыл, піс оларны пу стихтарның сағызын чарыдар ӱчӱн хосхабыс. . ² Аннаңар, тигірдегі иб-чуртыбысха кіріп аларға сағынып, чидікпинчебіс нооза. ³ Ол оңдайнаң тигірдегі ит-ханыбысха кіріп аларбыс, чалаас хут полып, хал парбаспыс. ⁴ Пу чирдегі отахта чуртап, піс ирееленіп паза позып аларға чидікпин чӧрчебіс. Анзы ӧлерге паза пу чирдегі ит-ханыбыс чох халарға нимес, че тигірдегі ит-ханыбысха кірерге хынғаны полча. Хаҷан ол ниме пол парза, чуртас ӧлімніг нимені чох ит салар. ⁵ Анзы полар ӱчӱн, Худай пісті чайап салған паза, молҷаан толдырарын киречілеп, Позының Худын піске пирген.

⁶ Ол оңдайнаң піс сыбыра ізестіг чӧрчебіс. Піс пілчебіс, пу иді-ханыбыста чуртап, Хан-пигдең ырахпыс. ⁷ Че піске харах кӧрчеткені нимес, киртініс ӧӧні полча нооза. ⁸ Анзын пілчеткенде, ізестіг чӧрчебіс паза, иді-ханыбыс полчатхан отахтаң сых парып, тигірдегі ибібісте Хан-пигнең хада орнығарыбыс килче. ⁹ Аннаңар, хайда даа ползабыс, пу чирдегі алай тигірдегі ит-ханыбыста пістің Хан-пигнің кӧңніне кірерібіс килче. ¹⁰ Піске прайзыбысха Христостың чарғызы алнында турарға килізер. Андада пу чирде ит-ханыбыста чуртаан туста иткен чахсы ба, хомай ба киректерібіс ӱчӱн полғаныбыс ла нандырығ тударбыс.

Христостың пастыра Худайнаң чарасханы

¹¹ Худайдаң хайди хорығарын піліп, піс анзына кізілерні ӱгрет парчабыс. Худай пістің сағыстарыбысты паза пӧгіннерібісті пілче. Сірер дее оларны пілібӧкчезер тіп ізенчем. ¹² Піс позыбысты махтирға итчебіс пе? Чох, че піснең поғдархирға сірерге сылтағ пирчебіс. Андада сірер чӱректегізінең нимес, че тастындағы кӧрімінең махтанысчатхан кізілерге нандырығ пир поларзар. ¹³ Піс пасхаҷыл полчатсабыс, анзын Худайға хынчатханыбыстаңар итчебіс. Пос сағызында чӧрчетсебіс, анзын сірернің ӱчӱн итчебіс. ¹⁴ Христостың хынызына хаптырт салған кізі піди сағынча: Христос прайзының ӱчӱн ӧл парғаннаңар, прайзы Аннаң хада ӧл парған. ¹⁵ Ол прайзының ӱчӱн ӧл парған. Аннаңар чуртапчатхан кізілер постарына нимес, че оларның ӱчӱн ӧліп, тірілген Христосха чуртирға киректер.

¹⁶ Піске кізілерні, кӧрчеткен нимее тӧстеніп, чарғылирға чарабас. Хаҷан-да Христостаңар, кізідеңер ле чіли, сағынған полғабыс. Ам, тізең, пасха сағынарға кирекпіс. ¹⁷ Ам, тізең, Христоснаң пір полыбысхан кізі наа кізі пол парған. Иргі чуртас ирт парған, прай ниме наа пол парған. ¹⁸ Прай ол нимені Худай иткен. Ол Иисус Христостың пастыра пісті Позынаң чарастыр салған паза піске пасхаларын чарастырарға пӧгін пирген. ¹⁹ Худай кізілерні чазыхтары# ӱчӱн пыролабаан. Ол Христостың пастыра тилекейні Позынаң чарастырыбысхан паза піске ол чарастаңар сӧсті тарадарға пир салған.

²⁰ Ол оңдайнаң піс Христостың адынаң чоохтапчабыс. Пістің пастыра Худай Позы чоохтанчатханға килісче. Аннаңар Христостың адынаң алданчабыс сірерге: Худайнаң чарас салыңар. ²¹ Чазығы чох Христосты Худай пістің чазыхтарыбыс ӱчӱн хатығлап салған. Аннаңар піс, Христосха киртінчетсебіс, Худайның алнында арығ кӧңніліг полчабыс.

¹ Піс, тізең, Худайнаң хада тоғынчатханнар, Ол пирген паарсасты сірерні тик ле алған полбазыннар тіп, сірерге алданчабыс. ² Чоохталған нооза: «паарсах поларға тус чит килгенде, Мин сині истіп салғам. Сині арачылир кӱн чит килгенде, Мин сағаа полыс пиргем». Мына Худайның паарсазын алҷаң тус, мына арачыланыс кӱні.

³ Тоғызыбысха чарадынмаан кізі чох ползын тіп сағынчабыс. Аннаңар пістеңер пірдеезі хомай тібезін тіп чуртирға кӱстенчебіс. ⁴ Прай нимеде тудынчатханыбыс хоостыра Худай нымысчылары полчатханыбысты кӧзітчебіс. Хыйаланыстарда, хызылыста, сидік оңдайларда піс илбек тыстаныс кӧзітчебіс. ⁵ Пісті сохханнар, пиктегде тутханнар, ӧмелееннер. Піс ӱзе тоғынғабыс, уйғу-чадын пілбин, чиис чох чуртаабыс. ⁶ Че піс хаҷан даа арығ чӱректіг полғабыс, хыйға тудынғабыс, тыстанғабыс паза аллығ кӧңніліг полғабыс. Піс хаҷан даа прай нимее сыннаң хынып, Худай Худы хоостыра иткебіс. ⁷ Піс сынның сӧзіне ӱгредіп паза Худай кӱзінең тузаланып чуртаабыс. Киртіністі арачылир паза тарадар киректе арығ чӱреебіс піске хуйах паза хылыс полған. ⁸ Піреелері пісті улуғлааннар, пасхалары нимее салбааннар. Пісті хыйыхтапчалар паза махтапчалар. Пісті чой тіп санапчалар, піс, тізең, сынны чоохтапчабыс. ⁹ Піреелері пісті нимее салбинчалар, че прайзы пістеңер пілче. Пісті ӧліге санапчалар, че піс мына, тірігбіс. Піс сохтырчабыс, че ӧлбинчебіс. ¹⁰ Пісті хомзындырчалар, че піс сыбыра ӧрчілігбіс, піс чохпыс, че кӧп кізіні пайытчабыс, пістің пір дее ниме чоғыл, че піс сынында прай нименің ээзі полчабыс.

¹¹ Коринфтегілер! Піс сірернең кӧні чоохтасхабыс. Піс сірерге чӱреебісті аллығ асхабыс. ¹² Сірерге пісте тар нимес, че сірернің чӱректерің тар. ¹³ Мин сірерге палаларыма чіли чоохтапчам: сірер дее чӱректеріңні азыңар.

Чарыхнаң харасхы пірік полбастар

¹⁴ Киртініс чохтарнаң пір кӧлігде чӧрбеңер. Арығ чӱректігні# паза чабал кізіні піріктірчеткен пірее ниме пар ба? Пір орында пір саңай чарых паза харасхы полча ба? ¹⁵ Христоснаң Велиар+ 6:15 Еврей кинделерінде Велиар сайтанның аттарының пірсі. піліс поларлар ба? Киртіністіг кізіні киртініс чохнаң пірее ниме піріктірче ни? ¹⁶ Худай храмында обаалар турғызар ба? Піс, тізең, тіріг Худайның храмы полчабыс. Худай піди теен нооза: «Мин оларның аразында Позыма тура пӱдіріп аларбын паза оларнаң хада чуртирбын. Оларның Худайы поларбын, олар, тізең, Минің чоным поларлар». ¹⁷ Аннаң андар Хан Худай# тіпче: «Олардаң чарылып, парыбызыңар. Кірліг нимее теңмеңер, андада Мин сірерні Позымзар аларбын. ¹⁸ Мин сірернің пабаларың полыбызарбын. Сірер Минің оолларым паза хыстарым полыбызарзар. Іди Прай нимедең кӱстіг Хан Худай тіпче».

¹ Ол оңдайнаң, хынғаннарым, андағ сӧс пиріл парғанда, ит-ханыбыста паза худыбыста пар чабал нимедең арығланып алааңар. Ол оңдайнаң, Худайдаң хорығып ала, пӱкӱле ах-арығ полыбызыңар.

Павелнің ӧрінізі

² Постарыңның чӱректеріңде піске орын пиріңер. Піс пірдеезін хомзындырбаабыс, пірдеезін сайбап салбаабыс, пірдеезіне чаптанмаабыс. ³ Мин мыны хомайлап тібинчем. Алында даа теен полғам: сірер пістің чӱреебістезер, сірернең хада ӧлерге дее, чуртирға даа тимдебіс. ⁴ Мин сірернең кӧні чоохтас поларыма ікінҷілебинчем. Сірернең тың махтанчам! Чобағларыбысха пастырзам даа, кӧңніме часхарыс толча, ӧрініс чӱреемнең асча.

⁵ Піс, Македон чирінзер читкенібісте, тынан полбаабыс. Прай саринаң хыстыр килгебіс: тоғыртын пісті таластарнаң ӧмелееннер, істібісте хорыхханыбыс полған. ⁶ Че пазымнығларны часхарчатхан Худай, Титті піссер ызыбызып, пісті часхар салған. ⁷ Піс Титтің сірердең килгеніне ле нимес, че сірер аның кӧңнін кӧдір пиргеннеріңнеңер чооғына ӧрін парғабыс. Тит мині кӧрерлерің тың килчеткенін, піс сірернең піліс полбаанға ачырғанчатханнарыңны паза мині арачылирға тимделеріңні чоохтап пирген. Анзына мин амды улам ӧрінчем. ⁸ Аннаңар пічиимнең сірерні хомзындыр салғаныма айабинчам. Итсе, айабысхан полғам: кӧрчем нооза пічиим сірернің кӧңнілеріңні тӱзір салған. Че анзы тӱрчеге ле полған. ⁹ Ам мин кӧңнілеріңні тӱзір салғаныма ӧрінминчем. Че кӧңнілерің тӱскені сірернің тудынғаннарыңны алыстыр салғанына ӧрінчем. Кӧңнілерің тӱскені, тізең, сірерні Худайзар айландыр салған. Аннаңар піс сірерге пір дее хомай ниме итпеебіс. ¹⁰ Кӧңні тӱскені Худайзар айландырчатса, кізі хайди даа тудынғанын алыстырар паза арачыланысха килер. Кізінің кӧңні пу чирдегілерни чіли тӱссе, анзы ӧлімге ағылча нооза. ¹¹ Кӧріңер, пу пичеллеріңнің пастыра Худай ниме ит салған: хайдағ кӱстенҷік ит салды сірерні. Хайдағ пыросыныс, пыролығ кізее тарығыс, хорығыс, сағыссырас, сіреніс, хатығлас ол сірердең сығарыбысты. Пу киректе сірер постарыңны прай саринаң арығ кӧзіт салдыңар. ¹² Ол оңдайнаң мин сірерге чазыхтығ кізіні пыролирға алай хыйыхтатхан кізінің кӧңнін кӧдірерге тіп паспаам. Худай киречі, мин мыны піс сірердеңер матап сағыссырапчатханнарыбысты сірерні пілзіннер тіп пасхам. ¹³ Аннаңар пістің кӧңнібіс кӧдіріл парған.

Че сірернің тудынчатханнарыңны кӧріп, Тит чӱреен амырадып алған, ӧрін парған. Піс, тізең, аның ӧрінізіне улам тың ӧрінгебіс. ¹⁴ Мин ағаа сірерні махтааным ӱчӱн, мағаа уйадарға киліспеен. Сірерге чоохтаан ниме дее, Титке сірерні махтааныбыс таа, прай сынға айлан парды. ¹⁵ Ол, сірернің чоох искенін, аны, улуғлап, хорығып ала удурлаанын сағысха киріп, сірерні чӱрекке чағын алча. ¹⁶ Аннаңар сірер минің киртізіме турысханнарыңа ӧрінчем.

Пос кӧңнінең сыйых пиргені

¹ Сірерге, харындастар, Македон чиріндегі тигіриблерге Худайдаң пирілген паарсастаңар искірчебіс. ² Олар, кӧп чобағ кӧріп, хатығ сынағ ирткен дее ползалар, уғаа ӧріністіглер. Постары тың хызылчатсалар даа, сыйыхты пар-чох чӱректерінең пирчелер. ³ Мин киречібін, олар пос кӧңнінең ханҷа полғанҷа, поларларынаң артых таа, пирчелер. ⁴ Иудей чиріндегі ах-арығларға хабазарға полып, пісті постарының сыйыхтарын алып аларға матап сурынғаннар. ⁵ Олар піс ізенген нимені ле пирбееннер, че постарын пурнада Хан-пиге, анаң, Худайның кӧңні хоостыра, піске пир салғаннар. ⁶ Аннаңар піс Титті, пу чахсы киректі, хайди сірерде пастаан, ідӧк тоос салзын тіп сурынғабыс. ⁷ Сірернің прай ниме синінең дее азыра пар: киртініс, иптіг сӧс, піліс, кӱстеніс, піске хыныс. Аннаңар пу даа чахсы кирекке пар-чох кӱстеріңні салыңар.

⁸ Мин сірерге чахығ пирбинчем, че македон кізілернің полызарға кӱстенчеткеннерінеңер чоохтап, сірернің сын хыныстарыңны сынапчам. ⁹ Хан-пигібіс Иисус Христостың паарсазын пілчезер нооза. Ол Позы, пай полчадып, сірернің ӱчӱн чох-чоос полыбысхан. Позы чох-чоос полыбысханынаң сірерні пай ит саларға хынған. ¹⁰ Мин сірерге мындағ чӧп пирчем. Піди итсеңер, чахсы полар: пылтыр сірер сыйых пирерінде ле алнында полбаазар, сірер аны пирер кӧңніңерні прайзынаң пурун кӧзіткезер. ¹¹ Амды, тізең, пу киректі идібізееңер. Хайди матап пӧгінгезер, ідӧк сіреніп идіңер. Ам хай син пир поларзар, анҷа пирібізіңер. ¹² Сірер полызарға кӱстенчетсер, пасхазы чоғыл нинҷе пир поларзар. Худай сірердең пир полбасты кирексібинче, нинҷе пир полза, анҷазын пирзіннер тіп хынча. ¹³ Анзы сірерге аар чуғып, пасхаларына, тізең, ниик ползын тіп нимес, че прайзына пір тиң полары ӱчӱн иділче. ¹⁴ Сағам сірер пайзар, оларға полыс поларзар. Соонаң олар, пай ползалар, сірерге полыс пирерлер. Андада прайзыни тиң пол парар. ¹⁵ Худай Пічиинде пазылғаны хоостыра полар: «кӧп чыып алған кізінің артых ниме полбаан, асхынах чыып алған кізінің читпес полбаан».

Тит паза аннаң хада тоғынчатханнар

¹⁶ Тит сірердеңер, мин чіли, тың сағыссырапчатханы ӱчӱн, Худайыбысха алғыс ползын. ¹⁷ Мин аннаң сурынған полғамох, че, итсе-де, ол, кӱстенҷіктеңер, сірерзер позының кӧңнінең парған. ¹⁸ Аннаң хада піс, Чахсы Хабарны таратхан ӱчӱн, прай тигіриблерде махтатчатхан харындазыбысты ысхабыс. ¹⁹ Аны тигіриблер, сыйыхтарыңны піснең хада апарзын тіп, таллааннар. Іди піс, Худайны саблап, сірернің полызар кӧңніңерні киречілеп, тоғынчабыс. ²⁰ Пу пай сыйыхтарны хайдар идерібістеңер пір дее кізінің чіг сағыс сыхпазын тіп, сизінербіс. ²¹ Піс, Худайның на нимес, чонның даа алнында орта тудынарға кӱстенчебіс нооза. ²² Оларнаң хада харындазыбысты ызыбысхабыс. Аның полызарға тимдезі хайдағ даа киректе кӧп хати сыналған. Ол сірерге ізенерге чарирын пілче, аннаңар амды артых таа полызарға тимде. ²³ Титтеңер чоохтаза, ол сірерге туза идіп тоғынчатхан минің арғызым полча. Пасха харындастардаңар чоохтаза, олар тигіриблернің илҷілері полчалар паза Христосха сабланыс ағылчалар. ²⁴ Оларға постарыңның хынызыңарны кӧзіт пиріңер. Прай тигіриблер аны кӧрзіннер, піс сірерге тиктең махтанмичатханыбысты пілзіннер.

Ах-арығ харындастарға сыйых пирердеңер

¹ Сірерні ах-арығ харындастарға полыссыннар тіп, мағаа пазарға даа кирек чоғыл. ² Мин сірернің полызарға кӱстенҷіктеріңні пілчем паза анынаң македон кізілерге махтанчам. Мин оларға Ахай чиріндегілер сыйыхты пылтырох тимнеп салған полғаннар тіп чоохтаам. Сынында сірернің полызарға тимделерің кӧп кізіні полызарға кӧӧктірген. ³ Минің сірерні махтааным тик чоох пол парбазын тіп, харындастарны ысчам. Мин чоохтаан полғам: сыйыхтарны тимнеп салыңар. ⁴ Македон кізілер миннең хада килібісселер, сірер тимде полбин парзар, мин не нимес, сірер дее уйатха кірерзер. Андада піс тик ле махтан салған поларбыс. ⁵ Аннаңар харындастарыбысты, сірерзер азынада парып, пирерге молҷап салған сыйыхтарны азынадох тимнеп салзыннар тіп сурынғам. Андада ол тимнеен ниме хыза пасханға саналбас, сынынаң сыйых полар.

⁶ Ағаа хоза чоохтапчам: асхынах таараан кізі ідӧк алар, кӧп таарааны кӧбӧк алар. ⁷ Полған на кізі чӱрее хоостыра пирзін. Кӧңні чарабин, ирік чохтаң пирбезін. Худай пар-чох кӧңнінең пирчеткеннерге хынча нооза. ⁸ Худайның прай кирексіністеріңні толдыр полар кӱзі пар. Аннаңар сірернің прай ниме читкіҷе дее, кирексееннең кӧп тее полар. Ол оңдайнаң сірер, ӱлезіп ала, чахсы киректер идерзер. ⁹ «Прай нимезін ӱлеен, чохтарға пир салған. Аның кӧӧлбек кӧңнін чон хаҷан даа пілер» тіп пазылых нооза. ¹⁰ Таарыпчатхан кізее Худай ӱрен дее, чиир халазын даа пирче. Олох оңдайнаң, Ол сірерге ӱлесчең ниме пирер паза аны кӧптелдірер. Андада пирерге тимделеріңнің тузазы пай полар. ¹¹ Піс харанмин сыйыхтир ӱчӱн, Худай пісті хаҷан даа пайыдар. Аның сылтаанда, кӧп кізі пістең алған сыйыхтары ӱчӱн Аны алғыстир. ¹² Пу полызығ пирҷең тоғыс ах-арығларның кирексіністерін не толдырбинча, че кӧп кізіде Худайға илбек алғыс тӧрітче. ¹³ Итчеткен тоғыстарыңны кӧріп, сірер ӱгретчеткен Христостың Чахсы Хабарының сӧзінҷе полчатханнарың паза оларға даа, пасхаларына даа пар-чох кӧңнілеріңнең пирчеткеннерің ӱчӱн, олар Худайны саблапчалар. ¹⁴ Олар, прай чӱректерінең сірерзер тартылып, сірердегі сині чох Худайның паарсазы ӱчӱн алғыстап, пазырчалар. ¹⁵ Худайның чоохтап таа полбас сыйыхтарының ӱчӱн Ағаа алғыс ползын.

Павел позының тоғызына турысча

¹ Мин, Павел, сірернің араңарда полғанда, тідінмес, ырахтаң, тізең, сірерні хатығлаачы тіп тітірчеткен кізі, сірердең сурынчам. Христос чіли, амырнаң паза чахсынаң сірерге алданчам: ² сірерзер килзем, мині хатығландыртпаңар. Мин хатығланысты пу чирдегілернің оңдайынҷа чуртапчазар тіпчеткен кізілердең тоғыр айландырарға сағынчам. ³ Піс, пу чирде чӧріп, пу чирдегілернің оңдайынҷа кӱреспинчебіс нооза. ⁴ Пістің кӱресчең тиріглерібіс пу чирдегілерни осхас нимес. Че сівеелерні изепчеткен Худайның тирии пісте пар. Анынаң чабал сағыстарны, ⁵ Худайны пілерге тоғыр полчатхан ноо даа кӧкеесімненісті аңдарчабыс. Ноо даа сағысты, кӱснең алып алып, Христостың ӱлгӱзіне кирчебіс. ⁶ Хаҷан сірер сӧс истерге ӱгреніп алзаңар, андада піс сӧс испесті хатығлирға тимде турарбыс.

⁷ Кізілерге кӧрчезер бе? Піреезі, позы Христостың кізізі полчатханын ікінҷілебинчетсе, піс тее Христостың кізілері поларында аннаң халбинчатханыбысты сағысха алзын! ⁸ Мағаа Хан-пиг пирген ӱлгӱнең мин артых таа махтаныбысхан ползам, мағаа анзынаң уйадарға кирек чоғыл. Че ол ӱлгӱ сірернің киртіністеріңні сайбирына нимес, пиктиріне пирілген. ⁹ Сірерні пічіктерімнең хорыхтырарға итчеткен кізі чіли кӧрінерім килбинче. ¹⁰ Кем-де мині пічіктерімде хазыр паза кӱстіг, позы килзе, тізең, чазығ, тик чоохтығ тіпче. ¹¹ Ол кізі пілзін: піс пічіктерібісте, сӧстерібісте хайдағбыс, сын киректе дее андағохпыс.

¹² Постарынаңар улуғлап чоохтапчатхан кізілер чіли, мин позымнаңар, чахсы кізібін тіп, сірерге чоохтанарға тідінмеспін. Олар, тізең, постарын постарынаң на тиңнестірчелер, постарының синінең не синепчелер. Іди иткені алығ ниме! ¹³ Піс Худай пирген нимедең пасха пір дее нименең махтанмаспыс. Худай пирген не ӱлӱснең махтанарбыс. Ол ӱлӱстің чардығы сірернің араңарда итчеткен пістің тоғызыбыс полча. ¹⁴ Сірернің араңарда тоғынарын піске Худай пиргеннеңер, Христостаңар Чахсы Хабарнаң сірерзер киліп, піс пирілгеннең артых ниме итпедібіс. ¹⁵ Піс синінең артых махтанмаспыс. Піс кізі тоғызына даа махтанмаспыс. Че сірернің киртінізіңер ӧс парыбысса, пістің тоғыста кирексіністерің дее ӧс парыбызар тіп ізенчебіс. ¹⁶ Андада піс пасха чирлерзер Чахсы Хабарны чарлирға парарбыс паза пасхалары Худай пирген чирлерінде итчеткен тоғыстарға махтанмаспыс.

¹⁷ Худай Пічиинде «Махтанчатхан кізі Худай иткен нименең махтанзын» тіп пазыл парған. ¹⁸ Позын махтапчатхан кізі нимес, Худай махтапчатхан кізі турыстығ нооза.

Павел паза сын нимес илҷілер

¹ Мин тискінчеткен ползам, сірер кӧмес тее мағаа айирҷыхсар. Итсе, айабохчазар чи. ² Мин сірерні Худайның кӱннезінең кӱннепчем. Мин сірерні пір ирге сӧлеп салғам. Ам арығ чӱректіг хысты Христосха пирібізерге итчем. ³ Че Еваны чылан кӧйтігінең алҷаахтырып алған чіли, сірернің дее сағыстарыңны піреезі сайбап салҷаң полбазын тіп хорыхчам. Христосха постарыңны ачых-чарых паза арығ кӧңніліг чарыдарынаң хыйыс парҷаң полбаңар. ⁴ Сірерзер піреезі киліп, піс ӱгретпеен Иисустаңар ӱгретчетселер, пістең албаан хутты ағылчатсалар алай пірее пасха «чахсы хабарнаң» килчетселер, сірер оларны кӧңнілеріңе алчазар. ⁵ Мин, тізең, иң артых илҷілер тіп саналчатхан ол кізілердең пір дее кинек нимеспін тіп сағынчам. ⁶ Тілге чітіг полбазам даа, че пілізім читпинче тіп полбассым. Сірер анзын постарың даа чахсы пілчезер.

⁷ Мин, Худайның Чахсы Хабарын чарлапчатханда, сірердең пір дее ниме албаам. Мин, сірерні кӧдірер ӱчӱн, позымны пазынҷыхтаам. Анда минің пірее пыром пар ба? ⁸ Сірернең тоғынар ӱчӱн, мин пасха тигіриблердең полызығ алғам. Сірерде полғанда, тізең, хызыхханда даа, сірердең пір дее ниме сурбаам. ⁹ Кирексеен нимені мағаа Македон чирінең килген харындастар пиргеннер. Мин сірернің мойныңарда одырбаам, хаҷан даа одырбаспын. ¹⁰ Христос киречі: мин сынны чоохтапчам! Ахай чирінде пу махтанызымны пілбеен кізі халбас. ¹¹ Мин ноға іди итчем? Сірерге хынминчатханнаңар ба? Худай анзын пілче нооза!

¹² Мин ам итчеткен чіли итчедербін. Андада пу «илҷілернің», піс итчеткен чіли итчелер тіп, махтанарға оңдай чох полар. ¹³ Андағ сын нимес илҷілер чой тоғынҷылар, Христостың илҷілері полаачыхтанчалар. ¹⁴ Мында пасхаҷыл ниме чоғыл: сайтан позы даа Чарыхтың ангелінің# омазын алып алча. ¹⁵ Аннаңар аның нымысчылары даа сынның нымысчыларына хубулчатханнарында пасхаҷыл ниме чоғыл. Че соонаң оларға иткен киректері хоостыра пирілер.

Павелнің ирееленістері

¹⁶ Пазох хатап сірерге чоохтапчам, мині алыға санабаңар. Итсе, іди санапчатхан ползар, мағаа, алығ кізее, кӧмес махтаныбызарға чарадыңар ¹⁷ Мин чоохтир ниме Хан-пигнің кӧңніне кірбесчік, че махтанчатсам, алығ кізі чіли чоохтанчам. ¹⁸ Пу чирде махтанар кибір парда, мин дее махтаныбоғызим. ¹⁹ Хыйғазар, нооза. Аннаңар алығ кізіні сыдазарға сидік полбас. ²⁰ Сірерні пазынчатханнарға, сірерні тонапчатханнарға, сірерге ӱлгӱ салчатханнарға, сірерге улуғзырхапчатханнарға, наахтапчатханнарға тыстанчазар нооза. ²¹ Олар чіли поларға кӧңнім читпинчеткеннеңер, уйат мағаа. Че, піреезі махтанарға тідінчетсе, мин дее, алығ кізі, махтан поларҷыхпын. ²² Олар еврейлер бе? Мин дее еврейбін. Израильдеңнер бе? Мин дее аннаңохпын. Авраамның# тӧлі полчалар ба? Мин дее оларох осхаспын. ²³ Олар Христостың нымысчылары полчалар ба? Мин тискінчеткен дее полим, че Христостың нымызын олардаң артых ла толдырчам тирҷікпін. Мин олардаң кӧп тоғынғам, кӧп палығлатхам, харибде одырғам, кӧп хати ӧлер пазы полғам. ²⁴ Иудейлер# мині пис хати отыс тоғызар сабысха чарғылааннар. ²⁵ Ӱс хати сымыхнаң сохтыртханнар, пір хати тастарнаң чаалатханнар. Мин ӱс хати керіптіг саайға кіргем, пір кӱн, пір хараа тирең талайнаң кӱрескем. ²⁶ Мағаа чорыхтарымда хазыр суғлардаң, тонағҷылардаң, минің чоным иудейлердең, пасха даа чоннардаң кӧп хорғыс полған. Саарларда даа, сӧл чазыларда даа, талайларда даа, чой харындастардаң даа кӧп ирее кӧргем. ²⁷ Мин ӱзе тоғынҷаңмын, узубин даа, астап-сухсап таа чӧрҷеңмін, ораза# тутчаңмын, соохха тооп, кисчең кибім чох ирееленҷеңмін. ²⁸ Ағаа хоза, кӱннің-таңда пӧкчең сурығлардаң пасха, мин прай тигіриблердеңер сағыссырапчам нооза. ²⁹ Кӱс хабын полбинчатхан кізілердеңер чӱреем сыстапча, чазыхха кіргеннердеңер чобалчам. ³⁰ Махтанарға кирек полза, читпес саримнаң махтанарбын. ³¹ Хаҷанға даа саблығ Худай, Хан-пигібіс Иисустың Пабазы, минің тайма ниме чоохтабинчатханымны пілче. ³² Дамаск саарында полғанымда, андағы Арета ханның пір устағҷызы, мині тудып аларға тіп, кізілерін саарның хаалхазын хадартхан. Че мині, саарның ханазындағы кӧзенегінең торастығ тӱзірібізіп, аның холынаң осхырғаннар.

Павелнің кӧспек кӧргені паза азых чооғы

¹ Сағам мағаа, тузазы чох таа полза, махтанарға кирек. Аннаңар Хан-пигдең пирілген кӧспектерімнеңер паза азых чоохтарымнаңар# искір пирим. ² Мин Христосха киртінчеткен пір кізіні пілчем. Ол он тӧртче чыл мының алнында (таң сын позы, таң хутта полып – анзын Худай ла пілер) тигірнің иң ӧӧркі, ӱзінҷі тамына сығарылған. ³ Ол кізідеңер паза пір ниме пілчем. Ол (Худай пілер, таң сын позы алай худы ба) ⁴ Худай садынзар кӧдірілген. Анда ол кізі чоохтап таа полбас паза чоохтирға чарабас сӧстерні искен. ⁵ Андағ кізінең мин махтанарбын. Позымның нимеме махтанарбын? Читпестеріме ле. ⁶ Мин махтанарға иткен ползам, анзы алығ иткенім полбасчых. Сынны чоохтирҷыхпын нооза. Че піреелері миннең позымнаң кӧргеннерінең алай искеннерінең артых сағынмазыннар тіп, махтанмаспын. ⁷ Худай мағаа кӧп ниме азых чоохтаан. Анзына иртіре махтанмас ӱчӱн, Худай мағаа, идіме чымҷылға хазаан чіли, мині иреелезін тіп, сайтанның нымысчызын ысхан. ⁸ Аны хыйа идерге Хан-пигдең ӱс хатап сурынғам. ⁹ Че Ол мағаа теен: «Сағаа Минің паарсазым читкіҷе пирілче: кӱс-сағ чох кізіде Минің кӱзім пары артых кӧрінче нооза». Аннаңар, мағаа Христостың кӱзі артых кірзін тіп, кӱс-саам чоғына хынып махтанам. ¹⁰ Мин читпестеріме, сӧклеттіртчеткеніме, сидіксіністеріме, сӱрдірчеткеніме, Христостың ӱчӱн хыйыхтатчатханыма чӧпсінчем. Кӱс-сағ чох чӧрчетсем, андада мин кӱстігбін, нооза.

Павелнің коринфтегілердеңер сағыссырааны

¹¹ Мин махтанып, изім сыхча. Че мині сірер іди полдырғазар. Мин, нимее чарабаан даа ползам, сірернің улуғ илҷілеріңнең пір дее хомай нимеспін. ¹² Минің илҷі полчатханымның киречілестерін – минің тыстанызымны, кӧп хайхастарны#, танығларны, таңнастығ киректерні – сірер кӧргезер. Мин оларны сірернің аразында тыстанып иткем. ¹³ Пасха тигіриблерде пар нименің піреезі дее сірерде чох полған ма? Сірерге аар-чӱк полып артылғаным сірерге читпин парған, арса? Мағаа пу пыроны тастирға сурынчам. ¹⁴ Ам ӱзінҷізін сірерзер парарға итчем. Кізі мойнына артылбаспын. Мин сірердең пір дее ниме аларға итпинчем, сірерні постарыңны кирексіпчем. Палалары нимес, паба-іҷе палаларына анығ чыынарға киректер. ¹⁵ Сірер арачылан халар ӱчӱн, мин сірерге позымны даа тӱгеде пир саларға тимдебін. Мин сірерге іди тың хынчатханымда, сірер ноға мағаа асхынах хынчатхан поларзар? ¹⁶ Хайдағ даа полза, мин сірерге, аар-чӱк полып, артылбаам. Сірер, хынза, мині, кӧйтікке санап, постарыңны алаахтырып, ахча алғам тирзер. ¹⁷ Мин сірерзер ысхан кізілернің пастыра пірее ниме сірердең алғам ма? ¹⁸ Мин Титті, алдап алып, пір харындаснаң хада сірерзер ызыбысхам. Ол, сірердең пірее ниме алып, тузаланды ба? Піс анынаң пір кӧңніліг полбаабыс па? Пір чоллығ полбаабыс па?

¹⁹ Арса, піс сірернің алныңарда ахтанарға итчебіс тіп сағынчазар. Чох, Худай киречі, піс Христостың кӧңні хоостыра чоохтапчабыс. Хынғаннарым! Прай пу нимені піс сірернің киртіністеріңні пиктир ӱчӱн чоохтапчабыс. ²⁰ Мин нимедең хорыхчам? Сірерзер килзем, минің кӧңніме кірбес кізілер пол парарларыңнаң хорыхчам. Минің дее тудынғаным сірернің кӧңнілеріңе кірбин парҷаң полбазын. Мин сірерге тоғассам, тартыстарны, істі чохтанысты, ӧкпеленісті, посха ла хынғанын, сӧклесчеткенін, чой чоохтар таратханын, кӧкеесімненісті, ай-пораан полчатханын кӧрерім килбинче. ²¹ Мин хатап килзем, Худайым, сірернің хайди полчатханнарыңны кӧзідіп, мині уйатха сухчаң полбазын. Алында чазых иткен паза арығ нимес хылынған, чӧреес, уйат пілбин тудынғаннарына Худайның алнында пыросынминчатхан кізілердеңер ылғирға киліс парҷаң полбазын.

Ӱгреде чоохтааны паза алғыстастар

¹ Мин сірерзер ам ӱзінҷізін килербін. Худай Пічиинде чоохталча: ноо даа сӧске ікі-ӱс киречі табылза, ол сӧс сынға саналча. ² Мин сірерде ікінҷізін полғанымда, чазых итчеткеннерге паза прай пасхаларына даа чоохтаан полғам, ам, сірернең хада ниместе, хатабох чоохтапчам: пазох килзем, сірерге айабаспын. ³ Сірер Христос минің пастыра чоохтапчатханға киречілес киректепчезер бе? Христос сірерде тоғынчатса, Ол кӱзі чох нимес тіп, піліңер. Че Аның кӱзі сірернің араңарда кӧзіділер. ⁴ Ол, кӱс чох полып, кіреске# хазатырт салған. Ам, тізең, Ол Худайның кӱзінең тіріг. Піс тее, Христос кӱс чох полған чіли, кӱс чохпыс. Че ам піс Аннаң хада чуртапчатханыбыста, позыбыста Худайның кӱзі пар пол парды. Пу кӱснең піс сірернің араңарда тузаланарбыс.

⁵ Киртіністігзер бе тіп, постарыңны сынаңар. Постарыңны сыныхтаңар. Христос сірернің полғаныңарда чуртапча тіп чоохтап полбинчатсаңар, сірер сынағны ирт полбаанға килісче. ⁶ Пістің пу сынаға турысханыбысты піліп аларзар тіп ізенчем. ⁷ Сірерні пір дее чабал ниме итпезіннер тіп, Худайға пазырчабыс. Анзы сірернең махтанарға тіп нимес. Піс сірердеңер саңай даа саба сағынчатхан ползабыс, піс сірерні чахсы итсіннер тіп хынчабыс. ⁸ Піс сынға тоғыр пір дее ниме ит полбинчабыс. Піс итчеткен прай ниме сынның ӱчӱн иділче. ⁹ Сірер кӱстігзер піс, тізең, чазығбыс. Піс анзына ӧрінчебіс. Піс, киртінізіңер толдыра ползын тіп, Худайға пазырчабыс. ¹⁰ Мин ырахтаң мыны нимее сірерге пасчам? Сірерзер килзем, мағаа хатығланарға киліс парбазын тіп пасчам. Хан-пиг мағаа ӱлгӱні киртінізіңерні сайбирға тіп нимес, че пиктирге пирген.

Павелнің анымҷохтасханы

¹¹ Че, харындастар, ӧрініңер, хыйғаларың хозыңар, часхарыныңар, пір сағыстығ, амыр чуртаңар. Андада хыныс паза амыр пирчеткен Худай сірернең хада полар. ¹² Удур-тӧдір арығ чӱректіг охсанызып, изеннезіңер. Сірерге ах-арығлар прайзы изен читірчелер. ¹³ Хан-пигібіс Иисустың паарсазы, Худай Пабаның хынызы паза Худай Худынаң пірлескені сірернең хада ползын. Аминь.