1 Тимофейге

Павелнің Тимофейге пастағы пічии

Тимофей еврей іҷенің паза грек пабаның оолғы полған. Ол Павелнің иң киртістіг хабасчызы полыбызып, анынаң хада, Чахсы Хабарға ӱгредер ӱчӱн, илееде чыл хада чорыхтарында чӧріскен. Пічиинде Павел позының чиит хабасчызының кӧңнін кӧдіріп, христианнар тигірибінеңер хайди артых сағыссырирына ӱгретче.

Пу пічікті ікі чарыбызарға чарир. Пастағы чардығында (1–3 пастағлар) Павел, чой ӱгредіглерге тоғырланарға кирек тіп, сизіндірче. Аның соонда ол христиан тигірибінде чуртасты хайди орта пӱдірердеңер чоохтапча. Ол Худайға пазырарына ӧнетін хайығ айландырча. Ол ідӧк тигірибнің устағҷылары паза оларның полысчылары хайдағ поларынаңар чоохтапча. Ікінҷі чардығында (4–6 пастағлар) Павел Христосха киртіністе Тимофейге кӧзідім поларға киректеңер паза тигірибнің араласчыларын орта ӱгредер тоғысха позын чарыдарға киректеңер чоохтапча. Ол ідӧк Тимофейге аймах чоннаң (улуғларнаң, чииттернең, тул-ипчілернең, хулларнаң) хайди тоғынарынҷа чӧптер пирче.

Алғас

¹ Мин, Павел, Худай Арачылағҷыбыстың паза ізенізібіс Христос Иисус Хан-пигібістің# чахааны хоостыра Христос Иисустың илҷізіне# турғызылғам. ² Тимофейге, киртінізібісте сын оолғыма, пасчам. Пабабыс Худайдаң паза Хан-пигібіс Христос Иисустаң паарсас, ӧлҷей паза амыр хоных сағаа.

Чой ӱгредігдең сизіндіргені

³ Македон чирінзер парирып, мин сағаа, Ефес саарда халып, андағыларның хай піреелерін пасха ӱгредіглерні тараттыртпазыннар, кип-чоохтарнаң айғаспазыннар паза ӧбекелерні тохтағ чох санастырбазыннар тіп хызааннирға чахаан полғам. Андағ кізілер, киртіністе Худай пӧгіннерін толдырар орнына, тик тартыстар ла сығарчалар. ⁵ Минің чахығларымның пӧгіні, тізең, – Худайға киртінчеткеннерні арығ чӱректең, чахсы кӧңнінең паза чойырхабас киртіністең тӧріпчеткен хыныснаң толдырарға. ⁶ Хайзылары, пу хыныстаң хыйыс парып, тик чоохтарға сабылчалар. ⁷ Олар, ниме чоохтапчатханнарын даа пілбин, нимее ӱгретчеткеннерін дее оңарбин, Худай чахығларының ӱгретчілері поларға сіренчелер. ⁸ Піс, тізең, Худай чахығларынаң орта тузаланчатханнарға чахсы полчатханын пілчебіс. ⁹ Чахығ арығ чӱректіг кізілерге# нимес, че чахығны толдырбинчатханнарға, ағаа тообастарға, Худайны нимее салбинчатханнарға, чазыхтығларға#, Худайы чохтарға, Худайнин кірнең порапчатханнарға, паба-іҷезін чох иткеннерге, кізі ӧдірчеткеннерге, ¹⁰ суғдыр хылыхтығларға, ирнең ир хоныхтығларға, хул садызынаң айғасчатханнарға, чойларға, сӧс сайбапчатханнарға – орта сағыстығ ӱгредіге ноо даа тоғыр турғаннарға кирек. ¹¹ Анзын мин сабланыстығ Худайыбыстың мағаа пирілген Чахсы Хабарына тӧстеніп чоохтапчам.

Паарсас паза арачылас ӱчӱн алғағ

¹² Мағаа кӱс пирген Хан-пигібіс Христос Иисусты киртінгені паза кирекке турғысханы ӱчӱн алғыстапчам. ¹³ Мин алында Худайны чабаллаам, Ағаа киртінчеткеннерні сӱргем, хыйыхтаам. Че мин аны, пілінмин, киртінізім чох полып, іди иткенімнеңер, Ол, мағаа айап, пыром тастаан. ¹⁴ Христос Иисусха чағын пол парғанымда, киртініснең паза хыныснаң хада Хан-пигібістің паарсазы кӧп урылған мағаа! ¹⁵ Христос Иисус тилекейге чазыхтығларны арачылирға килгеннеңер сӧс сын паза посха алынарға турыстығ. Ол чазыхтығларның пазы минмін. ¹⁶ Худайға киртінер паза ол оңдайнаң мӧгі чуртас# алар кізілерге мині кӧзідім иткен: минің пастыра Христос Иисустың илбек тыстанызын киречілир ӱчӱн, иң пурнада мин арачылалғам. ¹⁷ Прай чылларның Ханына, ӧлім пілбес, кӧрінмес, чалғыс, прайзынаң хыйға Худайға хаҷан даа сабланыс паза аарлас ползын, аминь#.

¹⁸ Тимофей оолғым, пу чахиимны мин, алында синнеңер полған ухаанҷыластар хоостыра, оларға тӧстене, чӱрееңде пик киртіністіг, арығ кӧңніліг сын чааҷы чіли сині кӱрессін тіп, сағаа ысчам. Хайзылары, андағ хылыныстаң хыйызып, пос киртінізінің керіптерін саайға кир салғаннар. ²⁰ Оларның санындалар Именей паза Александр – мин оларны, Худайны чабаллабазыннар тіп, сайтан# холына пирібіскем.

Пазырыстаңар

¹ Ам сурынчам сірердең иң пурнада прай кізілернің ӱчӱн алданарға, пазырарға, чӧрінерге паза алғирға. ² Худайны саблап, Аның кӧңнінҷе чуртир ӱчӱн, піске амыр, истіг хоных пирзіннер тіп, ідӧк Ханнардаңар паза прай устағ-пастағлардаңар пазырыңар. ³ Анзы пістің Арачылағҷыбыс Худайның кӧңніне чахсы паза чарас: ⁴ ол прай кізілерні арачыланзыннар паза сынны пілеріне читсіннер тіп сағынча. ⁵ Худайыбыс чалғыс. Кізілерні Худайнаң піріктірчеткен кізі, Позын, прайзының ӱчӱн толығ идіп, пирінген Христос Иисус чалғызох. Іди идіп, Ол кирек туста Худайның кӧңнін киречілеен. ⁷ Пу киречілестің чарлағҷызы паза илҷізі поларға мин турғызылғам. Христосха киртініп, сынны чоохтапчам, чойланминчам: чоннарны сынға паза киртініске ӱгретчем.

⁸ Ана іди ноо даа чирде иреннер, холларын арығ чӱректіг ӧӧр кӧдіріп, ӧкпе-тартыс чох пазырзыннар тіп сағынчам. ⁹ Ипчілері дее, ипти-оңдайли килістіре тонан салып, арығ чӱректіг полып, састарын кеен ӱргеннең нимес, алтыннаң-нинҷінең паза аарлығ кип-азахнаң нимес, ¹⁰ че Худайны улуғлап тудынчатхан ипчілерге килістіре киректернең постарын чазазыннар.

¹¹ Ипчі кізі ӱгреністе чоохха араласпас, пазымнығ ползын. ¹² Ипчілерге, ирлерін ӱгредіп, ӱлгӱ тударға чаратпинчам, тапсабин одырзыннар, ¹³ Пурун Адам# чайалған нооза анаң Ева. ¹⁴ Адам нимес, че Ева, алаахтырт салып, чазыхха кірген. ¹⁵ Итсе, ипчі кізі киртіністе, хыныста паза ах-арығ# сағыста чуртаза, пала тапханы пастыра арачыланар.

Кем тигірибнең устап полар

¹ Пу сын сӧс+ 3:1 Грек тілінде пу сӧстер алнында чоохталғаннаң палғалыстығ поларлар даа. : тигірибнің# устағҷызы поларына кӱстенгені чахсы тоғысха сабылғанын таныхтапча. ² Че тигіриб устағҷызы арығ, ипчізіне киртістіг+ 3:2 Грек тілінде пу сӧстерні ӱс пасхали оңарарға чарир: 1) ипчізіне киртістіг, 2) чалғыс ипчізінің ирі, 3) пір ле ипчінің ирі. , сах сағыстығ, пазымнығ, аарласха турыстығ, аалҷы кӧреечі, чахсы ӱгрет пілчеткен, ³ ізеечі нимес, холын пос салбас, тімелбес, чаптанмас, че амыр, тартыспас, ахчаа чабдыланмас поларға кирек. ⁴ Ол иб-чуртына пик ээзі ползын. Палалары чоох истеечі, кізілерні улуғлаачы ползыннар. ⁵ Пос ибінең устап полбинчатхан кізі, Худай тигірибінің чонын чахсы тут полар ба за? ⁶ Ол киртініске наа ла кіргеннердең дее полбазынох – улуғ кӧӧлінібізіп, Худайның чарғызына сайтаннаң пірге тартыл парбазын. ⁷ Киртіністі алынмааннарның даа аразында чахсы адал чӧрзін – тілге кір парып, сайтан сӧзірбезіне хаптыр салбазын.

Кем полысчы пол полар

⁸ Полысчы+ 3:8 Тигіриб тоғыстарында хайынчатхан кізілер, кӧр: «Худай илҷілерінің чуртастары» 6:1-6. даа аарлатчатхан, сын чоохтығ, арағаа сабылбас, чаптанмас, ⁹ киртініс чазыдын арығ чӱректе тут полар кізілер поларға киректер. ¹⁰ Андағларны, пу тоғысха чарапчатса, нинҷе-де тус сыныхтирға, анаң на, чахсы тудынзалар, аларға кирек. ¹¹ Ипчілері+ 3:11 Грек тілінде ідӧк «полысчы ипчілер» тіп оңнирға чарир. дее аарласта ползыннар, хоп чайдырбас, сах сағыстығ, ноо даа нимеде киртістіг тудынзыннар. ¹² Полысчы ипчізіне киртістіг+ 3:12 Кӧр: Тимофейге 1-ғы пічии 3:2. поларға, палаларын даа, ибін дее чахсы устап парарға кирек. ¹³ Киректі чахсы апарғаннары чонның улуғ аарлазынаң тузаланарлар паза оларның Христос Иисусха киртіністері тыыдылар.

Пістің киртінізібістің чазыды

¹⁴ Мыны, тӱрчедең килеріме ізеніп, че сынап, тудыл парзам, тізең, сірерні Худай ибінде хайди тудынарын пілзіннер тіп пасчам. Ол иб – сын тіріг Худайның тигірибі. Ол тигіриб сын ӱгредігнің чӧлее паза тӧстее полча. ¹⁶ Ікінҷілес чох, пістің киртінізібістің илбек чазыды мындағ: Худай кізі ит-сӧӧгінде килген, Худай Худы# Аны пір пырозы чох чарлаан. Ангеллер# Аны кӧргеннер, Аннаңар чоннарға чоохталған. Тиксі-тилекейде Ағаа киртінгеннер. Худай сабланыснаң Аны ӧӧрлеткен.

Киртіністең тӧдірленгеннеңер

¹ Тӱгенҷі тустарда хайзылары, чой чоохтығ хуттарға, айна# ӱгредіглеріне сабылып, киртіністең хыйа парарлар тіп, Худай Худы чарых чоохтапча. ² Пу ӱгредіглер ікі чӱстіг чойлар пастыра тарадыларлар. Оларның уйаттары, отта кӧйгендег, ӧліг. ³ Олар хоных хонарға паза хайзы тамахты чирге чаратпинчалар. Итсе Худай прай ас-тамахты киртіністіглер – сынны пілчеткеннер – алғап чізіннер тіп чайап салған. ⁴ Худай чайаан прай ниме чахсы, піс пір дее нимені хыйа итпеске кирекпіс. Чӱреебісте алғыс полза, піске прай ниме алынарға чарир. ⁵ Ол прай ниме Худай сӧзінең паза пазырыснаң арығлалча нооза.

Иисус Христостың чахсы тоғынҷызы

⁶ Мыны харындастарға читіріп, Иисус Христостың чахсы тоғынҷызы поларзың. Андағ тоғынҷы киртініс сӧстерінең, позына алынған чахсы ӱгредігдең кӱс алынча. ⁷ Чарабас, тик чоохтардаң оортах тудын, Худайның кӧңнін толдырарға паза Аны саблирға позыңны кӧніктіріп одыр. ⁸ Ит-сӧӧкті пиктееннің тузазы ас. Худайның кӧңнін толдырғаны, тізең, прай нимее туза. Ол сағамғы паза полар чуртасты молҷапча. ⁹ Пу сын сӧс паза аны посха алынарға ол турыстығ. ¹⁰ Худайның кӧңнін толдырар ӱчӱн піс тоғын парчабыс паза хыртыстаныстарға тыстанчабыс. Піс аны сын тіріг Худайға, прай кізілернің, улам киртіністіглернің, Арачылағҷызына ізенчеткеннеңер итчебіс. ¹¹ Мыны чонда тарат чӧр, ӱгрет. ¹² Синің чиит чазыңнаң санаспин полбазыннар, син, тізең, киртіністіглерге чооғыңда, хылынғаныңда, хынызыңда, кӧңніңде, киртіністе паза ах-арығ тудынғаныңда кӧзідім пол. ¹³ Мин килгенҷе, Худай Пічиин# тигірибде хығыр, кӧсте, ӱгрет. ¹⁴ Ухааннас хоостыра тигірибнің ах сағаллары# сағаа холларын салғаны пастыра Худай Худы пирген сыйиин нимее салбин полба. ¹⁵ Маңнанызың синің прайзының хараана іле кӧрінер ӱчӱн, мин сағам пасхан нимедеңер сағынып, ағаа тудын. ¹⁶ Позыңны паза ӱгредииңні сына. Мин чоохтаан нимені сыбыра итчет. Іди итсең, позыңны даа, сині исчеткеннерні дее арачылап халарзың.

Кізілернең хайди хылынары

¹ Апсахты, пабаңны чіли, хатығлабин, иптіг чоохнаң ӱгрет. Иреннерні, харындастарны чіли, ² инейлерні, іҷелерні чіли, ипчілерні, пиҷелерні чіли, арығ сағыста тудып, кӧстеп одыр.

Ӧкіс ипчілердеңер

³ Ӧкіс ипчілерні, сынында чалғыс хал парғаннарны, улуғла. ⁴ Че ӧкіс халған ипчінің палалары алай пархалары пар полза, олар пурнада постарының сӧбірелерін аарлирға паза іҷе-пабаларына алғыс читтірерге пілзіннер. Анзы Худайның кӧңніне чарас нооза. ⁵ Сын ӧкіс халған, чалғыс чӧрген ипчі Худайға ізенедір, хараа-кӱнӧрте пазырыстарда паза сурыныстарда иртіредір. ⁶ Чуртас хынығыстарына тартылған чалғыс ипчі, тізең, изен дее чӧрзе, ӧлігдең пасха нимес. ⁷ Оларны пірдеезі хомайлабас ӱчӱн, мин чоохтаан пу нимее ӱгредіп одыр. ⁸ Че хайзылары туғаннарынаңар, улам ибдегілерінеңер, сағыссырабазалар, олар киртіністең хыйа турыбысчалар. Андағлар киртініс чохтардаң даа хомайлар. ⁹ Чалғыс-чарым ипчее 60 час ас парған, иріне киртістіг тудынған, чахсы киректернең сабланған, палаларын иптіг ӧскір салған, чол чӧргеннерні сыйлап турған, ах-арығ кізілернің алнына амыр кӧңніліг чӧрген+ 5:9-10 Грек тілінде пу сӧстер піди пазыл парғаннар: «ах-арығ кізілернің азахтарын чууп пир турған». , чобағдағыларға полыс пирчеткен, чахсы киректерге кӱс ипчее саналарға чарир. ¹¹ Чиитке чалғыс халған ипчілерні ӧкіс халғанға санаба. Олар, хоных хыниина тартылып, Христосха чӧрінерге хынғаннарын ундудып, ирге парарға идібізерлер. ¹² Андада олар Худайға пирген сӧске турыспааннары ӱчӱн пыроладарлар. ¹³ Олар ідӧк, пір дее ниме итпин, иблеп чӧрерге ӱгрен парыбысчалар, ниме итпес, хуруғ тіл, прай нимее кірізеечі, суртлаа пол парыбысчалар. ¹⁴ Мин зе піди чӧптепчем: чиитке чалғыс-чарым халған ипчілер, ирге парып, пала тапсыннар, иб тутсыннар паза піске тоғыр кӧрген чонның тіліне кірбезіннер. ¹⁵ Ол ипчілернің хайзылары, сайтанны хооп, Худайдаң хыйыс парыбысханнар. ¹⁶ Киртінчеткен пірее ипчілернің алай иреннернің туғаннары аразында ӧкіс ипчі пар полза, аны тигіриб чонына артпин, постары кӧрзіннер. Андада тигіриб сын ӧкіс ипчілерге полыс полар.

Тигіриб пастыхтарынаңар

¹⁷ Чахсы пастых полчатхан тигіриб ах сағалларына, улам, Худай сӧзін чарыда чоохтап, ӱгретчеткеннерге, ікі анҷа аарлас ползын+ 5:17 Грек тілінде пу сӧстерні піди оңнирға кирек: «турыстыра чал ахчаа турыстығ». . ¹⁸ Пічікте чоохталча нооза «ас саапчатхан пуғаның ахсын чаппа» паза «тоғынчатхан кізі чалына турысча». ¹⁹ Тигіриб ах сағалын ікі-ӱс киречі пыролабаза, испе. ²⁰ Ол чазыхтаң сыхпин турза, аны чон алнында пырола, пасхалары даа чалтанзыннар.

Тимофейге чӧптер

²¹ Худайнаң паза Хан-пигібіс Иисус Христоснаң паза аның таллаан Ангеллерінең алданчам: пірдеезінің сарин албин, пос кӧңніне ле салынмин, пу чахығларымны толдырчат. ²² Тигіриб пастыхтарын турғысчатсаң, маңзытта оларға холыңны салба. Іди пасхаларының чазыхтарына кірбе. Позыңны ах-арығ сағыстығ хайраллап хал. ²³ Хурсағың удаа ағырыбысчатханда, суғ ла іспе, кӧмес хызыл араға даа алыбыс тур.

²⁴ Хайзы кізілернің чазыхтары іле – олар кізілерні чарғыласха кӧні апарадырлар. Піреезіни, тізең, – соонаң на азылча. ²⁵ Чахсы киректер дее ідӧк іле кӧрінедірлер. Че хайзы чахсы киректер соонаң на сығысчалар.

Хуллардаңар

¹ Пазығдағы хуллар Худай Адын паза ӱгредиин харғабас ӱчӱн, ээлерін улуғласха турыстығлар тіп санирға киректер. ² Ээлері пір киртіністіг харындастар даа ползалар, хуллар оларны нимее салбин хылынмасха киректер. Че ээлері оларнаң пір киртіністе паза хыныстығ полчатханнарынаңар паза хулларға чахсы итчеткеннерінеңер, хуллар алны-кистілеріне улам чӧрінерге киректер. Анзына ӱгрет паза чӧпте.

Чой ӱгредіг паза сын ис-пай

³ Кем пасха нимее ӱгретче паза Хан-пигібіс Иисус Христостың сын сӧстерінең, Худайның кӧңнін толдырардаңар ӱгредігнең чараспинча, ⁴ ол кізі улуғзырхос паза пір дее ниме пілбинче. Ол атархас, ыырлас, сӧклес, чігленіс тӧрітчеткен тик таласха паза тартыстарға салынча. ⁵ Тик тартыстар сағыстаң кинем, сын ӱгредігдең оортах турған кізілердең тӧріпчелер. Олар Худайға салынғаны парыс аларына кирек тіп сағынчалар. Андағлардаң оортах тудын. ⁶ Прай нимее чӧпсінгені паза Худайға салынғаны – ол илбек парыс. ⁷ Тӧреели, піс ах-чарыхха пір дее ниме ағылбаабыс, мыннаң пір дее ниме апар полбазыбыс таа іле. ⁸ Азырал, кип-азах полза, анзына чӧпсін. ⁹ Пайирға кӱстенчеткен кізі хыҷаланысха пирінче. Ол чабал, тузазы чох, ӱреге кирчеткен хынығыстар хахпанына хаптырча. ¹⁰ Тооза чабал нименің ӧзені ахчаа сабылғаны полча. Ағаа салынғаннарның хайзылары киртіністең хыйа парыбысханнар паза постарын кӧп чобағларға кир салғаннар

Киртіністің чахсы кӱрезии

¹¹ Син зе, Худай кізізі, аннаң ос. Сын тудынып, Худайны аарлап, киртіністіг, хыныстығ, тыстаныстығ, пазымнығ хылыныста маңнаныстарға чит тур. ¹² Киртініс ӱчӱн прай кӱзің салын. Мӧгі чуртасха тудын. Син ағаа хығыртылғазың паза аның ӱчӱн кӧп чонның алнында чахсы киречілеезің. ¹³ Прай нимее тын пирчеткен Худайның паза Понтий Пилатха чахсы киречілес пирген Христос Иисустың алнында сағаа минің чахиим: ¹⁴ Хан-пигібіс Иисус Христос килгенҷе, чахығларны орта паза хыйыс чох толдыр. ¹⁵ Тузы чит килзе, сабланысха турыстығ паза иң кӱстіг Худай, Ханнарның чалғыс Ханы, пиглернің Пигі, Христос килгенін кӧзідер. ¹⁶ Чалғыс Худай ла ӧлім пілбинче, чағдап полбас чарыхта орныхча, Аны кізі кӧрбеен паза кӧр полбас. Ағаа аарлас паза ӱзілбес ӱлгӱ. Аминь.

Тӱгенҷі ӱгредістер

¹⁷ Пайларны пу тустарда ӱгрет пар: постарын пӧзікке санабазыннар, ізес чох ис-пайларына тың на ізенмезіннер, че піске ӧрінерге прай нимені толдыразынаң пирчеткен сын-тіріг Худайға ізензіннер. ¹⁸ Оларны чахсы идерге, чахсы киректерге пай поларға, харанмас, сыйлаачы поларға ӱгрет. ¹⁹ Іди итселер, олар килер тустарның пайын чыынып аларлар паза мӧгі чуртасха чидінерлер.

²⁰ Че, Тимофей! Сағаа пирілгенні хайраллап хал. «Піліс» теен нименең айғасчатхан паза сағаа тоғырланчатхан кізілернең Худайдаң тоғыр тик таластардаң хыйа пол. ²¹ Хайзы кізілер, анзына сабылып, киртіністең хыйыс чӧрібіскеннер. Худай паарсазы сағаа тӱссін. Аминь.