1 Фессалониктегілерге

Павелнің фессалониктегілерге пастағы пічии

Македон аймағының кіні Фессалоник саар полған. Павел пу саарда Чахсы Хабарға 50 чылда ӱгреткен. Ыырҷылары хысхан сылтаанда Павелге пу саардаң парыбызарға киліскенде, илҷі, Христосха наа ла айланған кізілері киртіністең хыйа полыбыспазыннар тіп, сағыссыраан. Аннаңар ол Коринфтегі полысчызы Тимофейні Фессалониктегі христиан тигірибінің киректерін піліп аларға ызыбысхан. Тимофей чахсы тылаастар ағыл килген. Ол саарда христианнарны сӱрзелер дее, олар Христосха киртіністе пик паза махачы тудынғаннар.

Андағ даа полза, Павел киртіністерін пик идерге тіп, позы оларға пічік пас пирген. Пу пічік ӱс ӧӧн погіннең пазылған: 1) тигірибнің кізілері Павелнің постарына чахсы хылынчатханын ікінҷілебестері ӱчӱн; 2) киртініске наа айланған кізілерге алында иткен чазыхтарынаң позирға полызар ӱчӱн; 3) ӧлімнеңер паза Христостың пу чирге соңархы туста айланарынаңар сағыстарының орта-сабазын пілері ӱчӱн.

Алғас

¹ Піс, Павел, Силуан паза Тимофей, сірерге, Худай Пабабыстың паза Хан-пигібіс# Иисус Христостың Фессалоник саардағы тигірибіне# чолабит ысчабыс: Худай Пабабыстаң паза Иисус Христос Хан-пигібістең паарсас паза амыр хоных сірерге ползын.

Фессалониктегілернің ӱчӱн Худайны алғыстааны

² Пазырчатсабыс, сірерні сағынып, прайзыңарның ӱчӱн Худай Пабабысты сыбыра алғыстидырбыс. ³ Піс Худай Пабабыс алнында пазырып турчатсабыс, киртініс паза хыныс киреенде сірернің кӧп істенгеннеріңні паза Хан-пигібіс Иисус Христосха пик ізеністеріңні сағыста тудадырбыс. ⁴ Худайыбыстың хынған харындастары! Худай сірерні таллаанын піледірбіс: ⁵ Чахсы Хабарны сӧсте ле нимес, че сын кӱзін кӧзідіп, Худай Худынаң# паза кӧп киречілестернең ағылдыбыс нооза. Сірернің араңарда полғаныбыста, пістің хайди чуртааныбысты пілче нооңзар – анзына сірерге киречілес полған.

Фессалониктегілер прайзына кӧзідім

⁶ Сірер зе, Иисус Христостаңар сӧсті алынып, кӧп ирее кӧргезер. Андағ даа полза, Худай Худынаң пирілчеткен ӧрініснең піске паза Хан-пигібіске кӧӧгіп пастаазар. ⁷ Іди сірер Македон паза Ахай чирлерінде киртінчеткеннерге прайзына кӧзідім полыбысхазар. ⁸ Сірердең сығара Худай сӧзі Македон паза Ахай чирінҷе ле нимес, че тиксі чирлерҷе тараан, сірернің Худайға киртіністерің сабланған – піске аннаңар ниме дее чоохтирға кирек чоғыл. ⁹ Кізілер постары чоохтапчалар, хайди сірер пісті удурлаазар паза хайди чой худайлардаң аар айланып, сын, тіріг Худайның нымысчылары поларға килгезер. ¹⁰ Олар ідӧк чоохтааннар, хайди сірер Худай Оолғының Иисус Христостың тигірдең килерін сағыпчазар. Аны Худай ӧлімнең тірілдірген. Ол, тізең, пісті полар чарғының хорғызынаң арачылаан.

Павелнің Фессалониктегі тоғызы

¹ Постарың даа, харындастар, сірерзер килгенібістің тик полбаанын пілчезер. ² Че, сірер пілчезер, пастап Филипп саарда хыйал кӧріп, сӧклеттіріп, кӧп тоғырланыстарға хайбин, Худайның піске пирген илбек махачыланызынаң Худайның Чахсы Хабарын сірерге читірерге тідінібіскебіс. ³ Пістің ӱгредиибісте алҷаастаныс таа, хара сағыстар даа, кӧйтіктеніс тее чоғыл нооза. ⁴ Че Худай пісті Чахсы Хабар тарадарға турғысханда, піс, кізі кӧңніне кірерге нимес, че чӱреебісті сынапчатхан Худайның кӧңніне кірерге полып, чоохтапчабыс. ⁵ Пілче нооңзар, сірернің алныңарда чойырхос сӧстерін хаҷан даа чайбаабыс, кӧйтіктенмеебіс: Худай киречі! ⁶ Сірер дее, пасхалары даа пісті махтазыннар тіп сағынминчабыс. ⁷ Піс, Христос илҷілері# полчадып, улуғ кӧӧліг чиде тӱзер полғабыс. Че піс, сірернің араңарда полғаныбыста, сірерге, іҷе палаларына чіли, сағыссыраабыс. ⁸ Піс сірерге хынчатханнаңар, сірерге Худайның Чахсы Хабарын на нимес, че чуртазыбысты даа пирерге тимде полғабыс. Іди сірер піске аарлығ пол пардыңар! ⁹ Сірер, харындастар, пістің ӱзе тоғынғаныбысты ундубаан поларзар: пірдеезіне аар-чӱк поларға хынмин, хараа-кӱнӧрте тоғынғабыс. Олох туста піс Худайның Чахсы Хабарын сірернің араңарда таратхабыс. ¹⁰ Сірернің, Худайға киртінчеткеннернің, алнында піс ах сағыстығ, арығ чӱректіг, кӧйтіктенмин тудынғанға сірер дее, Худай даа киречі. ¹¹ Пілче нооңзар, хайди піс полғаныңардаң, паба палаларынаң чіли, сурынғабыс, ӱгреткебіс паза алданғабыс: сірерні Позының хан-чиріне# паза сабланызына хығыртхан Худайыбысха турыстыра тудыныңар тіп.

Павел сӧсті алынғаннарға ӧрінче

¹³ Аннаңар, сірер пістең искен Худай сӧзін, кізі сӧзін чіли нимес, че Худай сӧзін чіли алынғаннарың ӱчӱн, Худайыбысты сыбыра алғыстапчабыс. Ол сынынаң Худай сӧзі паза сірерге, киртінчеткеннерге, тееліп, сірерні алыстырча. ¹⁴ Сірер, тізең, харындастар, Иудей чиріндегі# Иисус Христосха киртінчеткен Худай тигіриблерінің чолынҷа пар сыхтыңар: олар иудейлерге# хыйыхтатханни, сірер дее пос чонынаң ирее кӧрдіңер. ¹⁵ Ол иудейлер Хан-пигібіс Иисус Христосты паза Аның ухаанҷыларын# ӧдір салғаннар. Пісті дее сығара сӱрібіскеннер. Худайның кӧңнін толдырбин, прай даа кізілерге тоғырланчалар. ¹⁶ Олар піске Худайның Чахсы Хабарын чоннарға, арачыланзыннар тіп, тарадарға пирбинчелер. Іди полып, олар постарының чазыхтарының# санын хосчалар. Че мына Худайның чарғызы оларға чидібӧк одыр.

Павелнің Фессалоник саарда хатап полып аларға сағынғаны

¹⁷ Харындастар! Піс сірердең ӱр нимеске ӧкіс хала парғаныбыста – итсе, чӱреебісте піс сірернең хаҷан даа чарылыспаабыс – сірерні кӧрерібіс уғаа тың килчеткеннеңер, сірерзер айланарға кӱстенгебіс. ¹⁸ Аннаңар піс, улам мин, Павел, сірерзер килерге пір ле хати сағынмаабыс, че піске сайтан# харығ пол парған. ¹⁹ Сірернің ӱчӱн нимес пе, пістің ізеніс, ӧрініс пар паза Иисус Христос килген туста, Аның алнында Чахсы Хабарның чиңізінең махтанар оңдай пар? ²⁰ Сірер пістің сабланызыбыс паза ӧрінізібіс полчазар нооза.

Тимофейнің Фессалоник саарзар ызылғаны

¹ Паза сахтап полбин, піс Афин саарда мині чалғызан халғызарға чарат салғабыс. ² Аннаңар Тимофей харындастарыңны, Худай нымысчызын паза Христостың Чахсы Хабарын тарадарында хада хабасчатхан тоғынҷыбысты, ысчабыс: сірерні киртінізіңерде пик итсін паза часхарзын. ³ Ана андада пу ирееленістерде пірдеезі киртіністең тӧдірленмес: постарың пілче нооңзар, пу ирееленістерде сыдас парары пістің ӱлӱзібіс полча. ⁴ Ундубаазар ба? Піс сірерде полғаныбыста, сірернің ирееледерлеріңні чоохтаабыс, хайза. Іди пол парғанын постарың даа пілчезер. ⁵ Аннаңар, паза сағба чохта, мин дее, сыдаспин, киртіністерің пик пе тіп, пілерге ыстым. Пик полбаза, сайтан сірерні хыҷаландыр салза, пістің иткен тоғызыбыс тик парар.

⁶ Сағам за, Тимофей сірердең айлан килгенде паза сірернің киртіністеріңнеңер, хыныстарыңнаңар чахсы хабарны ағыл килгенде, пісті сағысха чахсы кирчеткеннеріңні паза сірер дее пісті, піс сірерні чіли, кӧрерлерің килчеткенін читір пиргенде, ⁷ сидіктерібісте, ирееленістерібісте, сірер, харындастар, киртіністіг полғаннарыңа пістің дее кӧңнібіс ӧрінді. ⁸ Амды Хан-пигібіске киртіністе пик тудынчатханыңарны пілчеткенібісте, піске дее чуртирға ниик полыбысты.

Павел ӧрінче паза фессалониктегілерні алғапча

⁹ Сірернің ӱчӱн, Худайыбыс алнында сірер пирчеткен ӧрінізібіс ӱчӱн піс Худайны хайди алғаҷаң поларбыс? ¹⁰ Киртіністеріңе читпинчеткенін толдырар ӱчӱн Худайдаң сірернең тоғазып аларға сурынып, хараа-кӱнӧрте тохтабин пазырчабыс. ¹¹ Худай Пабабыс Позы паза Хан-пигібіс Иисус Христос сірерзер пістің чолыбысты ас пирзін. ¹² Піс сірерге хайди хынчабыс, андағох хыныснаң Хан-пигібіс сірерні толдырзын паза азындырзын – удур-тӧдір дее, прайзына даа. ¹³ Іди чӱрееңнерні пик идіп, сірер, Хан-пигібіс Иисус Христос Худай кізілерінең хада килген туста, Худайыбыс паза Пабабыс алнында ах-арығ# паза чазых чох турыбызарзар. Аминь#.

Худайның кӧңніне кірчеткен чуртас

¹ Мының соонаң, харындастар, Христос Иисустың адынаң алданчабыс сірердең, хайди поларынаңар паза Худайның кӧңнінҷе ниме идерінеңер пістең кӧзідім алып, пу киректе маңнанысха чит турыңар. ² Пілче нооңзар, Хан-пигібіс Иисустаң хайдағ чахығларны сірерге читіргенібісті. ³ Худай кӧңні андағ: ах-арығ чуртас чуртирға, чӧреес хылыхха пастырбасха. ⁴ Полғаны ла позының ирепчі хонығында ах-арығ кӧңніліг ползын, удур-тӧдір аарлазып хылыныссыннар+ 4:4 Грек тілінде пу стих мындағ сӧстернең пазыл парған: «Полғаны ла позының ідізін ах-арығ паза аарлап тудынзын». . ⁵ Худай пілбинчеткен чоннар чіли, сайбах сағыстарға салынмаңар. ⁶ Харындастарыңның хонығына чойнаң сыынып алып, аны сайбабаңар: Хан-пиг – піс анзын сірерге чоохтаан паза сизіндірген полғабыс – андағ нименің ӱчӱн хатығлир. ⁷ Худай сірерні кір-похсахха пастырбасха, ах-арығ чуртирға хығырған. ⁸ Пу ӱгредіге тоғырланчатханнар кізее нимес, че Худайға тоғырланчалар. Ол, тізең, сірерге Позының ах-арығ Худын пирче нооза.

⁹ Харындастар чіли хынызардаңар сірерге пазары даа кирек чоғыл, сірерні постарыңны даа Худай удур-тӧдір хынарға ӱгрет салған. ¹⁰ Сірер тиксі Македон чирінде дее харындастарыңа ідӧк хылынча нооңзар. Алданчабыс сірердең, харындастарыбыс, улам кӱстенерге: ¹¹ киртінізі чохтар алнында иптіг тудынар ӱчӱн паза пір дее нимедең хызылбас ӱчӱн, піс чоохтаанни, амыр чуртап, пос киреен идіп одырарға паза пос холынаң тоғынарға матап сіреніңер.

Хан-пигібістің ікінҷізін килері

¹³ Харындастар! Сірер, ізеніс чох кізілер чіли, чобалбас ӱчӱн, киртіністе ӱреен кізілернең ниме поларын пілзіннер тіп сағынчам. ¹⁴ Піс Иисус, ӧліп, тірілгеніне киртінчетсебіс, піс, Ол хатап айланза, Худай Анынаң хада Иисусха киртініп ӱрееннерні ағыларына ідӧк киртінерге кирекпіс. ¹⁵ Піс Худай ӱгредии хоостыра чоохтапчабыс нооза: піс, Хан-пигібіс килер тусха тіріг чӧрер кізілер, алында ӱреен кізілердең пурун Ағаа тоғаспаспыс. ¹⁶ Архангел ӱні истіл парза паза Худайның пырғызы тапсабысса, Хан-пигібіс Позы даа тигірдең тӱс килер, Христосха киртініп ӱрееннер пурун тіріл килерлер, ¹⁷ анаң піс, тіріг халғаннары, оларнаң хада-пірге пулуттарда чыыл парып, Хан-пигінең ӧӧре тоғас парарбыс. Соонаң Хан-пигінең сыбыра хада поларбыс. ¹⁸ Ана іди пу сӧстернең удур-тӧдір часхарызыңар.

Иисус ікінҷізін килер тустаңар

¹ Хан-пигібістің килер тузы-тимінеңер, харындастар, сірерге пазарға кирек чоғыл. ² Постарың даа пілче нооңзар, Худай кӱні, хараа оғыр кіргендег, ус-санабас чиде салар. ³ Хаҷан «Ізестіг амыр паза хорығыс чох тус» тіпчетселер, пала таапчатхан ипчінің толғахтары пасталғанни, кинетін сайбағлар тузы чиде тӱзер – аннаң пірдеезі ос полбас.

⁴ Че сірер, харындастар, харасхыда нимессер, аннаңар пу кӱн сірерге, оғыр чіли, кинетін чағдабыспас. ⁵ Прайзыңар сірер чарыхтың паза кӱннің палаларызар – піс тӱн харааның даа, харасхының даа палалары нимеспіс нооза. ⁶ Аннаңар піс, киртінізі чохтар чіли, узуғлабааңар, че тимніг, сах чӧрееңер. ⁷ Узупчатханнар хараазын узупчалар, ісчеткеннер хараазын ізініп алчалар. ⁸ Піс, тізең, кӱн-чарыхтың оолларыбыс. Аннаңар піс, киртініс паза хыныс хуйағынаң чабынып, арачыланысха ізеністің пӧриин кизіп алып, сах чӧрееңер. ⁹ Худай пісті ӧкпезін читірерге тіп салбаан нооза, че Хан-пигібіс Христос Иисустың пастыра арачыланыс аларына салған. ¹⁰ Ол пісті уйғуда ба, тимніг чӧрзебіс пе, Анынаң хада чуртазыннар тіп, пістің ӱчӱн тынын пир салған нооза. ¹¹ Аннаңар сағам сірер хайди итчезер, ідӧк удур-тӧдір часхарызыңар паза ӱгредізіңер.

Тигірибде хайди тудынардаңар

¹² Харындастар, сірернің араңарда тоғынчатханнарны, сірернең устапчатханнарны, киртіністе чуртирға ӱгретчеткеннерні улуғлирға алданчабыс. ¹³ Тоғыстары ӱчӱн хынып, аарлааңар оларны. Пос аразында ынағ полыңар. ¹⁴ Харындастар, сах ідӧк арғаастарны сизіндіріңер, туртухчатханнарны кӧдіре алыңар, полынмастарға полыс турыңар, прайзынаң тыстанып тудыныңар. ¹⁵ Кӧріңер, пірдеезі чабалға чабалнаң нандырбазын, пос посха даа, пасхаларына даа чахсы итчедіңер, ¹⁶ сыбыра ӧріністіг полыңар, ¹⁷ сыбыра пазырыңар, ¹⁸ прай нименің ӱчӱн алғаңар: Христос Иисусха киртінчеткен ползаңар, Худайның сірерге андағ кӧңні. ¹⁹ Худай Худын ӱзірбеңер, ²⁰ ухаанҷыласты нимее салбин полбаңар. ²¹ Прай нимені сынаңар, чахсаа тудыныңар, ²² ноо даа чабал нимедең озыңар. ²³ Амыр пирчеткен Худайыбыс Позы сірерні тооза ах-арығ ит салзын. Хан-пигібіс Иисус Христостың килеріне сірернің худыңар, кӧңніңер, идіңер пырозы чох хайраллал халзыннар. ²⁴ Сірерні хығыртхан Худай киртініске турыстығдаңар аны ит полар.

Анымҷохтасханы

²⁵ Харындастар, пістеңер пазырыңар, ²⁶ прай харындастарны ах-арығ кӧңніңернең, охсанызап, алғаңар. ²⁷ Хан-пигібістің адынаң пу пічиимні прай ах-арығ харындастарыбысха хығыр пирерге алданчам. ²⁸ Иисус Христостың паарсазы сірернең хада. Аминь.