1 Петрның

Пётр илҷінің пастағы пічии

Позының пастағы пічиин Петр илҷі Римде наа эраның 63 алай 64 чылларында пасхан полар. Пічікті пазарға ағаа илҷі Павелнең хада тоғынчатхан Сила тіп кізі полысхан. Пічік Кічіг Азияның (сағамғы Тӱрк чирінің) алтынзархызында орныхчатхан, Павел илҷінің ӱгредии сылтаанда тӧстел парған христиан ӧмелеріне адалып пазыл парған.

Ол туста христианнарға чон аразында чуртирға сидіктең сидік ле пол турған: киртіністері ӱчӱн оларны хыйыхтааннар паза оларға кӱлгеннер. Христианнарға киртіністең хыйа полыбызып, чуртас оңдайларына тартыл парыбызарынаң постарынаң кӱрезерге килісчең. Петр оларға киртіністері ӱчӱн, Иисус чіли, ирееленерге тимде полардаңар паза ах-арығ чуртирдаңар хатабох чоохтапча. Хан-пиг хатап пу чирге айлан килзе, Позына киртістіг полғаннары ӱчӱн, оларны сыйыхтир. Пу ізеніс киртінчеткеннерге чуртастарында урунчатхан прай сидіксіністерін сыдас парыбызарға кӱс пирер.

Тіріг ізеніс

¹ Мин, Иисус Христостың илҷізі# Пётр, сірерге, иблерінең ырах – Понт, Галат, Каппадок, Асий паза Вифиний чирлерінҷе – тарасхлап парып чӧрчеткен, Худайның таллаан кізілеріне, пасчам+ 1:1 Понт, Галат, Каппадок, Асий паза Вифиний чирлері сағамғы Тӱрк чирінің аймахтары. . ² Нимені азынада пӧгінчеткен Худай Паба сірерні, таллап, Худай Худы# пастыра ах-арығ# иткен. Іди Иисус Христостың сӧзі хоостыра полып, сірер Аның ханынаң арығлаларға таллалғазар. Худайның паарсазы паза амыры сірерде кӧптелзін.

³ Худай, Хан-пигібіс# Иисус Христостың Пабазы, сабланзын. Аның илбек ӧлҷей пары хоостыра Ол пісті нааҷыли тӧріткен. Иисус Христосты ӧліглердең тірілдіріп, Ол піске тіріг ізеністі паза ⁴ тигірде хайраллалчатхан изелбес, арығ, уурабас ӱлӱзібісті пирген. ⁵ Киртініп ала, сірер Худайның кӱзінең арачылалчазар. Худай сірерні тӱгенҷі тустарда азылар арачыланысха тимнепче.

⁶ Сірер анзына ӧрініңер. Сағамғы туста, аймах-пасха сынағлар иртіп, чобаларға килісчеткен дее полза, ӧрініңер. ⁷ Анзы киртіністеріңні сынир ӱчӱн кирек. Андада киртіністерің уурап парчатхан алтыннаң аарлығ полар. Алтынны даа сынға от-чалыннаң сыныхтидырлар. Сірернің киртіністерің сынға сынағны ирт парза, Христос килер туста сірерге махтас, сабланыс паза аарлас полар. ⁸ Сірер Аны хаҷан даа кӧрбеен дее ползар, Ағаа хынчазар. Сағам даа, Аны кӧрбинчеткен дее ползар, Ағаа киртінчезер паза чоохтап таа полбас ӧрініс сірерні толдырча. ⁹ Киртіністерің сірерні арачыланысха ағылча нооза.

¹⁰ Ухаанҷылар#, сірерге пирілген паарсастаңар ухааннап, ол арачыланыс хайди поларын матап істескеннер паза сурастырғлааннар. ¹¹ Ухаанҷы кізілерде полған Христостың Худы Христостың ирееленістерінеңер паза Аның соондағы сабланызынаңар оларға азынада чоохтаан. Олар анзын хаҷан паза хайди поларын істескеннер. ¹² Ухаанҷылар, постарының нимес, сірернің ӱчӱн анзын итчеткенін Худай оларға ас пирген. Амды, тізең, ол ниме сірерге Чахсы Хабардаңар чоохтаан кізілердең пастыра чарлал парды. Ухаанҷылар тигірдең ызылған Худай Худының хоостыра анзын сірерге чарлааннар. Ангеллер# дее пу хабарның ниме полчатханын оңарып аларға хынчалар.

Ах-арығ чуртас чуртаңар

¹³ Аннаңар сағыстарыңны суғлухтабызыңар, сизіктіг тудынып, Иисус Христостың килгені хоостыра сірерге пирілер паарсасха пар-чох ізеніс тудыңар. ¹⁴ Чоох истеечі палалар осхас полыңар. Ит-хан ойнастарына тартылбаңар. Сірер Иисустаңар Чахсы Хабарны пілбееннеңер анзына сабыл турғазар. ¹⁵ Сірерні хығыртхан Худай ах-арығ полчатханнаңар, сірер дее прай киректеріңде ах-арығ полыңар. ¹⁶ Аннаңар піди пазылых: Ах-арығ полыңар, Мин дее ах-арығбын нооза.

¹⁷ Худай сірернің Пабаңар полча тіпчезер бе? Че Ол чарғылапчатса, кізілерні талластырар чоғыл, иткен киректері хоостыра чарғылапчадыр. Пу ах-чарыхта чӧрчеткен тустарыңны Худайны улуғлап иртіріңер. ¹⁸ Ӧбекелердең алған тик чуртастаң позыдыл парғаннарыңны пілчезер: сірернің ӱчӱн уурап парчатхан алтын-кӱмӱснең тӧлелбеен нооза. ¹⁹ Че сірернің ӱчӱн Христостың ханынаң тӧлелді. Ол, пір чазых# чох арығ хураған чіли, ²⁰ тилекей пӱткелектӧк пу толыға салыларынаңар азынада пӧгіл парған полған. Че сірернің ӱчӱн тӱгенҷі туста килібіскен. ²¹ Аннаң пастыра сірер Худайға киртін парғазар. Худайға киртініс паза ізеніс аларларың ӱчӱн, Худай, Аны тірілдіріп, Ағаа сабланыс пирген.

²² Удур-тӧдір Христостың кізілері чіли сын чӱрекнең хынызар ӱчӱн, сірер сынның оңдайынҷа полып, Худай Худының пастыра сағыстарыңны арығлабысхазар. Худай Худының пастыра сағыстарыңны арығлабызыңар. Удур-тӧдір арығ чӱрекнең хынызыңар. ²³ Сірерге чызып парчатхан ӱрен нимес, мӧгі ӱрен чуртасты пирген. Ол ӱрен Худайның тӱгенмес тіріг сӧзі полча. ²⁴ Ноо даа кізі ӧсчеткен от осхас. Аның хайдағ даа сабланызы от пазындағы чахайах осхас: от хуруп парча – чахайах салых парча. ²⁵ Че Худайның сӧзі хаҷан даа чітпес. Ол сірерге Чахсы Хабарда чоохталған сӧс.

Тіріг тасха киліңер

¹ Ол оңдайнаң хайдағ даа чабал нимені, хайдағ даа алаахтырысты, чой хылынысты, чой чоохты постарыңнаң хыйа идіңер. ² Сірер, наа тӧреен палалар чіли, сӧстің арығ сӱдін кирексіңер. Аның сылтаанда, ӧзіп, арачыланысха чидерзер. ³ Сірер Хан-пигнің чахсызын сынап алдыңар. ⁴ Хан-пигзер киліңер. Ол кізілернің хыйа иткен, Худайның, тізең, таллап алған аарлығ тіріг тазы полча. ⁵ Сірер постарыңны даа, тіріг тастарны чіли, Хут чуртир тураның пӱдіриине салыңар. Ах-арығ абыстар# полыбызыңар, андада сірер Хут таллаан тайығлар# идерзер. Иисус Христостың сылтаанда ол тайығлар Худайға килістірелер. ⁶ Худай Пічиинде# піди пазыл парған нооза: Мына Мин Сион тағның пазында тура тӧзін тутчатхан тасты салчам. Ол таллаан аарлығ тас. Ағаа киртінчеткен кізі уйатха кірбес.

⁷ Сірерге, киртінчеткен кізілерге, ол аарлығ ниме полча. Киртінминчеткеннерге, тізең, ол пӱдірігҷілер хыйа ал тастаан тас. Че ол ӧӧн тас пол парды. Киртінминчеткен кізілерге ол харылҷаң ниме, кізі аңдарылҷаң хайа тас. ⁸ Худай сӧзін истерге хынмин, олар пу тасха харылчалар. Худай оларға іди салған.

⁹ Сірер, тізең, таллап алған тӧлзер, Хан-пигнің абыстары, ах-арығ чоны полчазар. Сірер Худайның кізілерізер. Сірерні харасхыдаң Позының хайхастығ чариинзар хығыртхан Худай, Аның сабланызын тарадарларың ӱчӱн, сірерні андағ чон ит салған. ¹⁰ Алында сірер Аның чоны полбаазар. Амды, тізең, Худай чонызар. Алында сірерге пірдеезі айабаҷаң, амды сірерге Худай айапча.

Худайның нымысчылары полып чуртаңар

¹¹ Хынғаннарым, сірер пу чирде килген чон осхассар. Мин сірердең сурынчам, кізі чӱреен ардатчатхан ит-ханның хыҷыхтаныстарынаң хыйа полыңар. ¹² Пасха чонның аразында сірерні чабал кізілер тіп чоохтапчатсалар даа, чахсы ла чӧріңер. Худай оларзар килген туста, тізең, олар, чахсы киректеріңні кӧріп, Худайны саблирлар.

¹³ Хан-пигнің ӱчӱн кізі турғысхан ноо даа ӱлгӱнің холында чӧріңер. Прайзының ӱстӱндегі хан даа ползын, ¹⁴ сайбағҷыларны хатығлирға, чахсы кізілерні махтирға турғызылған устағҷылар даа ползыннар – чоох истіңер. ¹⁵ Худайның кӧңні андағ нооза: піс позыбыс чахсы киректерібіснең сағыс таа, піліс тее чох кізілерні тығырарға кирекпіс. ¹⁶ Сірер пос кізізер. Че сірер Худайның хулларызар. Пос кізілер полчатханнарыңнаң чабал киректеріңні ахтабаңар. ¹⁷ Прайзын аарлаңар, харындастарыңа хыныңар, Худайдаң хорығыңар, ханны улуғлаңар.

¹⁸ Нымысчылар, ээлеріңнең хорығып, оларның чооғың истіңер. Амыр, чахсы ээлернің не нимес, че хазыр даа хылыхтығ ээлернің чооғын исчедіңер. ¹⁹ Чобағларында паза тиктең хатығлатханында Худайны сағынчатхан кізіні Худай Позының кӧңніне алча. ²⁰ Пыролан парған ӱчӱн сохтырғанға тыстанчатсаңар, махтатчаң сылтағларың пар ба? Че чахсы итчеткен ӱчӱн ирее кӧрчетсеңер, Худай сірерні кӧңніне алча. ²¹ Худай сірерні іди поларға хығыртхан. Христос сірернің ӱчӱн ирее кӧріп, Позы сірерге кӧзідім полған нооза. Сірер дее Аның чолынҷа парыңар. ²² Ол пір дее чазых итпеен. Аның ахсынаң чой чоох сыхпаан. ²³ Аны сӧклееннер, ол, тізең, удур тапсабаан. Ол ирееленген, че пірдеезіне хыҷанмаан. Орта Чарғыҷының холына ол прай нимезін пирібіскен. ²⁴ Пістің чазыхтарыбысты Ол Позының иді-ханынаң ӧӧре кӧдірібіскен паза кіреске# хазатырт салған. Ол анзын пістің чазыхха ӧл парарыбыстың, орта чуртасха, тізең, айлан парарыбыстың ӱчӱн иткен. Аның палығлары сірерні чазылдыр салғаннар. ²⁵ Сірер астых чӧрчеткен хойлар осхас полғазар. Амды, тізең, сірернің чуртастарыңны хайраллапчатхан Хадарҷызар айлан килгезер.

Ипчілер паза ирлер

¹ Сірер, ипчілер, ідӧк ирлеріңнің сӧзінең сыхпаңар. Андада Худай сӧзін испинчеткен хай пірее ирлер, ипчілерінің чуртастары пастыра ла, артых чоохтаспин, Худайға хозыл парарлар. Сірернің арығ сағыстығ, Худайдаң хорығып чуртапчатханнарыңны кӧрзелер, оларға пір дее ниме чоохтирға кирек чох полар. ³ Сірерні састы сіліг ӱрінгені, алтын чазағларны алай кеен кип-азахты кискені нимес, ⁴ че чӱректең тӧріпчеткен нымзах, амыр кӧңніңернің уурабас сілии чазазын. Худай анзын аарлапча. ⁵ Хаҷан-да Худайға ізенчеткен ах-арығ ипчілер дее, ирлерінің сӧзінең сыхпин, постарын іди чазаҷаңнар. ⁶ Іди Сарра, Авраамны# хан-пиг адап, аның чооғын исчең. Сірер чахсы ниме итчеткен ползар, паза пір дее нимедең хорыхпинчатсар, Сарраның палалары полчазар.

⁷ Сірер дее, ирлер, ипчілеріңнең чуртап, піліңер: олар порт ідіс осхастар. Оларны улуғлаңар: ипчілер чуртас сыйиин ирлерінең хада аларлар. Андада, пазырчатса, сірерге пір дее ниме харығ полбас.

Чахсы киректернің ӱчӱн ирееледерінеңер

⁸ Ол оңдайнаң сірер прайларың пір сағыстығ, кізее ачынаачы, харындас-пиҷее хынаачы, паарсах, чалахай, пазымнығ поларға кирексер. ⁹ Чабалға чабалнаң, хырызынысха хырызыныснаң нандырбаңар, че алғас# аларға хығыртылғаннарыңны піліп, кізілерні улам алғапчадыңар. ¹⁰ Кем чуртасха хынча паза чахсы кӱннерні кӧрері килче, ол кізі ахсын чабал сӧстердең, тілін чой чоохтардаң тудынып одырзын. ¹¹ Чабал нимедең хыйа полып, чахсы ниме итчет. Амырға тартылчат, ағаа харас. ¹² Худайның харахтары ах сағыстығ кізілерзер кӧрчелер. Аның хулахтары пазырчатханнарны тыңнапчалар. Че чабал ниме итчеткен кізілерні, чир-чарыхтаң чох идібізерге тіп, Худай оларға тоғыр кӧрче.

¹³ Чахсы нимее кӱстенчетсер, сірерге пірее кізі хомай идер бе? ¹⁴ Че сын нименің ӱчӱн ирее кӧрчетсеңер, сірер часкалығзар. Олар хорыхчатхан нимедең хорыхпаңар паза сағыссырабаңар.

¹⁵ Хан Худайны# чӱректеріңде ах-арығ ал чӧріңер. Сірернің нимее ізенчеткеннеріңні сурчатхан ноо даа кізее нандырығ пирерге хаҷан даа тимде полыңар. Пазымнығ кізілерні, улуғлап ала, нандырчадыңар, ¹⁶ арығ сағыстығ полыңар. Андада сірерні чабал тіпчеткен, Христоста иптіг чуртапчатханнарыңны сӧклепчеткен кізілер постары уйатха кірерлер. ¹⁷ Чабал киректернің ӱчӱн ирее кӧргенҷе, Худайның кӧңнінҷе чахсы киректернің ӱчӱн иреелензе артых полар.

¹⁸ Христос пір хати пістің ӱчӱн иреелен парған. Орта чуртапчатхан Позы сайбағҷыларның ӱчӱн ирееленген. Ол анзын пісті Худайзар ағыларға тіп иткен. Христос кізі чіли ӧдірт салған, че Худынаң тіріл парған. ¹⁹ Ол пиктегдегі хуттарзар Хуттаң пастыра тӱзіп, ӱгреткен. ²⁰ Ол Худайның чооғын испинчеткен кізілер полған. Ной керіп пӱдірчеткен тустардох Худай оларға ӱр тыстанған. Ол керіпте кӧп нимес, сигіс кізі суғдаң арачыланып алған. ²¹ Амды піс тее суғ пастырох кіреске тӱсчебіс#. Че анзы кізінің идінің кірін арығланғаны нимес. Ол Худайзар арығ чӱректіг# айланғанын таныхтапча. Іди кіреске тӱскені Иисус Христостың тірілгені пастыра сірерні арачылапча. ²² Иисус Христос Худайның оң холында одырча. Хаҷан Ол тигірзер ӧӧрлебіскеніңде, Аның чооғын ангеллер паза ӱлгӱлер паза кӱстер ис сыхханнар.

Худайның кӧңнінҷе чуртирға

¹ Христос пістің ӱчӱн иді-ханын иреелеткен. Сірер дее олох пӧгіннең тирін салыңар. Иді-ханын иреелетчеткен кізі чазых идерін тохтатча нооза. ² Ол оңдайнаң кізі пу чирде чуртирға хала парған тусты, хыҷаланыстарына сабылбин, Худайның кӧңнінҷе чуртапча. ³ Ирткен туста сірер илееде ӱр Худайы чох кізілернің оңдайынҷа полғазар нооза. Сайбах хылынғазар, оралысха, іскее салынғазар. Сірер, кӱлет саап, араға іс чӧргезер паза, чахығдаң тоғыр хылынып, худай омалап иткен нимелерні улуғлаазар. ⁴ Амды сайбахха паза кӱлетке хада салынминчатханнарыңа хахап, олар сірерні сӧклеп чӧрчелер. ⁵ Че олар Худайның алнында нандырығ тударлар. Ол ӧліглерні паза тіріглерні чарғылирға тимнен салған. ⁶ Аның ӱчӱн ӧліглерге дее Чахсы Хабар чарлалған. Олар кізілер чіли ит-хан хоостыра иткен киректерінің ӱчӱн чарғылатханнар. Анзы Худайның оңдайынҷа хут пастыра чуртирлары ӱчӱн иділген.

⁷ Че прай ниме тоозыларына чағдап одыр. Аннаңар чахсы, орта сағынып ал турыңар, пазырчатсаңар, сизіктіг полыңар. ⁸ Иң пастағызында удур-тӧдір матап хынызыңар. Хыныс кӧп чазыхты чаап парыбысча нооза. ⁹ Кібіренмин, удур-тӧдір аалласчадыңар. ¹⁰ Сірер полғаныңар Худайдаң сыйых алғазар. Чахсы устағҷы полып, Худайның пу ӧң-пазы паарсазынаң иптіг тузаланыңар паза удур-тӧдір полызызыңар. ¹¹ Чоохтанарға салылған кізі Худай сӧстерінең чоохтанзын. Полызарға салылған кізі Худай пирчеткен кӱснең тузаланзын. Худай Иисус Христостаң пастыра сабланзын. Худайға хаҷан даа сабланыс паза кӱс ползын! Аминь#.

Христос чіли ирееленерге уйатпаңар

¹² Хынғаннарым! Отнаң ӧртетчеткен чіли сынаттыртханнарыңа ӱрӱкпеңер. Ол сынағларны пасхаҷыл нимее санабаңар. ¹³ Христостың ирееленістерінде араласчатханнарыңа ӧрініңер. Ол Позының сабланызында килзе, сірер ӧрінерзер, сірернің чӱрееңер ӧрлир. ¹⁴ Сірерні Христостың адының ӱчӱн сӧклепчетселер, сірер часкалығзар: сабланыстың Худы, Худайның Худы сірерге тӱскен нооза. Тігілер аны хырысчалар, сірер, тізең, саблапчазар. ¹⁵ Сірер ирееленчетсер, тізең, ол ниме ӧдірістің, оғырластың, чабал иткеннің, пасха кізінің киректеріне кірісчеткеннің ӱчӱн полбазын. ¹⁶ Христостың кізізі чіли ирееленчеткеннің ӱчӱн уйатпа, андағ ӱлӱс ӱчӱн Худайны сабла.

¹⁷ Амды чарғы тузы чит килді нооза. Ол Худайның ибінең пасталыбызар. Чарғы пістең пасталар полза, андағда Худайның Чахсы Хабарының сӧзін испинчеткен кізілернең ниме полар? ¹⁸ Ахтатхан кізі чадап арачыланчатханда, андағда Худайны улуғлабинчатхан, чазыхтығ кізінең ниме полар? ¹⁹ Аннаңар Худайның кӧңнінҷе ирее кӧрчеткен кізілер, киртістіг Чайаачаа тыннарын пир салып, чахсы ниме итчетсіннер.

Улуғ-кічіге ӱгреде чоохтааны

¹ Мин сірернің тигіриблеріңнің# ах сағалларына айланчам. Мин дее ідӧк ах сағалбын#, Христостың ирееленістерінің киречізібін, тӱрче поларынаң азыл парар Аның сабланызының араласчызыбын. ² Худайның ӧӧрін хадарыңар. Олардаңар, ирік чохтаң на нимес, пос кӧңнінҷе Худай хынар иде сағыссыраңар. Анзын, посха хараспин, хынып идіңер. ³ Худайның ӱлӱзін ээленмеңер. Постың ӧӧріне кӧзідім полыңар. ⁴ Ӧӧн хадағҷы килзе, сірерге тӱгенмес сабланыстың сыйии пирілер.

⁵ Сірер дее, чииттер, улуғларның чооғын исчедіңер. Удур-тӧдір пазымнығ хайызыңар. Худай кӧкеесімнердең тоғыр кӱресче, пазымнығларға, тізең, паарсазын читірче. ⁶ Ана іди, тузы читсе, Худай сірерні кӧдірібіссін тіп, Аның кӱстіг ӱлгӱзіне кіріңер. ⁷ Худай сірердеңер сағынча. Аннаңар прай сағыссырастарыңны Ағаа салдырыбызыңар.

⁸ Китеніңер, сизіктіг полыңар. Ыырҷыңар, сайтан#, ыыран чӧрчеткен ала парыс чіли, кемні чібізерін тілеп чӧрче. ⁹ Пик киртіністеріңнең ағаа тоғырланыңар. Тилекейдегі пасха даа харындастарыңа андағох ирееленістер кӧрерге килісчеткенін пілчезер нооза. ¹⁰ Сірерге ӧң-пазы паарсазын пирчеткен Худай Христостың пастыра сірерні тӱгенмес сабланысха хығыртхан. Сірер ирееленісті тӱрче ле кӧрерзер, че Худай Позы сірерні пик ит салар, кӱстеріңні хатап киріп, сірерні сыдамах ит салар. ¹¹ Аның хаҷан даа сабланыс паза ӱлгӱ ползын. Аминь.

¹² Мин мыны Силуаннаң пастыра хысхаҷахти пас салдым. Мин аны киртістіг харындазыбысха санапчам. Сірернің кӧңніңерні кӧдір пирерге паза прай пу ниме Худайның сын паарсазы полчатханын киречілирге сағынчам. Пу паарсаста сыбыра полчадыңар.

¹³ Сірернең хада таллалған Вавилондағы Худай чоны сірерге изен читірче. Ідӧк оолғым Марк сірерге изен читірче. ¹⁴ Арығ чӱрекнең охсанызып+ 5:14 Еврей кибірі хоостыра иреннер охсанызып изенесчеңнер. , удур-тӧдір изеннесчедіңер. Христоснаң хада полчатханнарға прайзына амыр хоных ползын. Аминь.