1 Коринфтегілерге

Павелнің коринфтегілерге пастағы пічии

Пурунғы Грек чирінде Коринф саар ӧӧн садығ кіннерінің пірсі полған. Павел иң пастап наа эраның 50 чыллары тузында анда Чахсы Хабардаңар чоохтап, ӱгреткен. Павел, Коринфтең парыбысхан соонда, Христос киртіністіг тигірибнең пічік алыс сыххан. Пу Коринфсер ысхан пічіктернің ікінҷізі (пастағызы Наа Молҷаға кірбеен). Павел аны 50 чылларның ортызында Ефес саардаң ысхан.

Коринфтегі тигірибнің кӧп сидік сурығлар сығыс килген: Павел Коринфтең парыбысханда, андағы тигірибнің араласчыларының илеедезі христиан кізее турыстығ нимес чуртап сыхханнар. Ағаа хоза оларның піреелері Павелнің ӱгредии сын нимес, ол позы, тізең, аарласнаң тузаланминча тіп сыхханнар.

Пічіктің пастағы чардығында (1–6 пастағлар) Павел хығырығҷыларны Христос киртінізіне тудынып, иптіг чуртирға ӱгретче. Пічиинің соонзар (7:1–16:4) коринфтегілернің алынҷа чуртас сурығларына нандырығ пирче: иреннернің паза ипчілернің аразындағы хылыныстардаңар, тӧс-худайларға салған тамахтаңар, Худайға пазырарында тудынчатхан оңдайларның изерезінеңер, Хут пирчеткен сыйыхтардаңар, ит-сӧӧктің хатап тірілерінеңер, Иерусалимдегі киртінчеткен чонға полызып, сыйыхтар ызарынаңар. Тӱгенҷізінде (16:4-24) Павел позының пӧгіннерінеңер пасча паза изен читірче.

Алғас

¹ Павел, Худайның кӧңнінҷе Иисус Христостың хығыртылған илҷізі#, паза Сосфен харындас. ² Коринфтегі Худай тигірибіне#. Христос Иисусха киртін парып, Худай кізілері пол парғаннарға, ах-арығ# чуртасха хығыртылғаннарға, прайзына, пістің паза оларның ноо даа чирінде Хан-пигібіске# Иисус Христосха пазырчатханнарға: ³ Худай Пабабыстаң паза Хан-пигібіс Иисус Христостаң паарсас паза амыр хоных сірерге ползын.

Христоста пирілген паарсас

⁴ Сірерге Христос Иисуста Худайның паарсазы пирілгеннеңер мин Худайны сірернің ӱчӱн сыбыра алғыстапчам. ⁵ Сірер Анда прай нимее – хайдағ даа сӧске, хайдағ даа піліске – пайып парғазар нооза. ⁶ Ідӧк Христостың киречілезі сірерде пик орных парған. ⁷ Аннаңар сірерде Худай Худының# прай сыйыхтары пар паза Хан-пигібіс Иисус Христос килерін сағыпчатханна, оларның пірдеезінде сірернің кирексініс чоғыл. ⁸ Хан-пигібіс Иисус Христостың кӱнінде сірер пыро чох полар ӱчӱн, Ол сірерні тӱгенҷізіне теере пик турғыс салар. ⁹ Позының Оолғынаң Хан-пигібіс Иисус Христоснаң пірге поларға хығыртхан Худайыбыс киртістіг.

Тигірибде чара полчатханнаңар

¹⁰ Хан-пигібіс Иисус Христостың адынаң алданчам, харындастар, сірерні прайзын пір чоохтығ ползыннар тіп. Араңарда чарылыстар полбазыннар, че прайзы пір кӧңніліг, пір сағыстығ полыңар. ¹¹ Хлойның ибдегілерінең, харындастарым, сірернің араңарда таластар пол парчатханын истіп алдым. ¹² Мин сизінгенде, сірернің аразында «мин Павелнибін», «мин Аполлостибын», «мин Кифанибын», «мин Христостибін» тіпчеткені пар. ¹³ Алай Христос пӧліл парды ба? Алай Павел сірернің ӱчӱн кіреске# хазаттыр салған ма? Арса, сірер Павелнің адынаң кіреске тӱскезер# бе? ¹⁴ Мин, Крисптең паза Гаийдең пасхазын, сірерні пірдеезін кіреске тӱзірбеенім ӱчӱн Худайны алғыстапчам. ¹⁵ Пір дее кізі мині, позының адынаң кіреске тӱзірген тіп, чоохтанмас ӱчӱн мин аны іди иткем. ¹⁶ Стефанның туразын мин кіреске тӱзіргемӧк. Че паза піреезін кіреске тӱзіргем ме, пілбинчем. ¹⁷ Христос мині кіреске тӱзірерге нимес, че Чахсы Хабарны тарадарға ысхан. Мин аны тарадарында, Христостың кірезі кӱзін чідір салбас ӱчӱн, хыйға сӧстернең тузаланминчам.

Христос – Худайның кӱзі паза Худайның хыйғазы

¹⁸ Ӧлімге парчатханнарға кірестеңер сӧс тик ниме, піске, арачылалчатханнарға, ол Худайның кӱзі полчатпас па за. ¹⁹ «Хыйғаларның хыйғазын ӱредем, сағыстығларның сағызын хыйа идем» тіп, Худай Пічиинде# пазыл парған нооза. ²⁰ Хайда хыйғалары, Моисей Чахии# пілігҷілері хайда, пу тустың ӱзӱрігҷілері хайда? Тилекейнің хыйғазын Худай алҷаағысха айландыр салбады ба? ²¹ Тилекей позының хыйғазынаң Худайны Аның хыйғазында піліп албааннаңар, Худай киртістіглерні «нимее чарабаан» ӱгредігдең арачылап халарға иткен нооза. ²² Иудейлер# дее хайхастарны# хысчалар. Гректер дее хыйғаны тілепчелер. ²³ Піс, тізең, кіреске хазаттырған Христостаңар ӱгретчебіс. Иудейлерге анзы хомзыныс, гректерге – алығ ниме. ²⁴ Че Худай арачыланысха хығыртылғаннарға – иудейлерге паза гректерге – пістің ӱгредиибіс Христос полча, Ол Худайның кӱзі паза хыйғазы. ²⁵ Худайның алии кізі хыйғазынаң хыйға, Худайның кӱс чоғы кізілердең кӱстіг нооза. ²⁶ Кӧріңер, харындастар, кемзер сірер, хығыртылғаннар. Кізі паалаанынаң хыйғалар кӧп ле нимес, кӱстіглер дее асхынах, хасха сӧӧк тӧлі дее кӧп нимезӧк. ²⁷ Че Худай тилекейнің хыйға ниместерін, хыйғаларны уйаттырар ӱчӱн, чазығларын, кӱстіглерні уйаттырар ӱчӱн, таллап алған. ²⁸ Худай тилекейнің саблығ ниместерін, пазындыртханнарын паза нимее чарабас иттірчеткеннерін, улуғлаттырчатханнарны уйаттырар ӱчӱн, таллаан. ²⁹ Пір дее тыннығ-тіріг ниме Худайның алнында махтанмазын тіп іди иткен. ³⁰ Сірер Христос Иисуста полчатханын Худай иткен. Иисус Христос, тізең, сірерге Худайдаң пирілген хыйғазы, орта тудынғаны, ах-арығ полғаны паза толығ толдырғаны полча. ³¹ Анзы «Махтанғаны Хан Худайнаң# махтанзын» тіп пазылғаны хоостыра полар ӱчӱн иділген.

Хазатыртхан Христостаңар киречілес

¹ Мин сірерзер килгенімде, харындастар, сірерге Худайдаңар киречілесті артых сӧзім алай хыйғам кӧзідіп чарлирға килбеем. ² Сірернің араңарда Иисус Христостың, ағаа хоза хазатыртхан Иисус Христостың пасхазын ундудыбызарға чарат салғам нооза. ³ Сірерде кӱзі-саам сых парып, хорығып, чоо халтырап ала чӧргем. ⁴ Сірернің киртінізіңер кізі хыйғазына нимес, че Худай кӱзіне тӧстенер ӱчӱн, минің сӧзім, ӱгредиим кізі хыйғазының киртіндірчеткен сӧстерінде нимес, че Худай Худының кӱзінің киречілепчеткенінде полған.

Худайның хыйғазы

⁶ Хыйға сағыстардаңар ӱгредігні піс киртіністе тиміне читкен кізілернің аразында таратчабыс. Че ол хыйға пу тусти нимес, пу тустардағы ӱлгӱлерни нимезӧк. ⁷ Піс чазыт, пу тустарға теере азылбаан Худайның хыйғазына ӱгретчебіс. Аны тустар пасталғалахтох, Худай пістің сабланызыбысха тимнеп салған. ⁸ Пу хыйға сағысты амдығы тустарның ӱлгӱлері піліп албааннар. Пілген ползалар, тізең, сабланыс Хан-пигін кіреске хазабасчыхтар. ⁹ Пазылых нооза: «Худай Позына хынчатханнарға ниме тимнеп салған, аны кізі хараа кӧрбеен, хулаа испеен, кізі чӱрее дее пілбеен». ¹⁰ Че піске аны Худай Позының Худы пастыра асхан. Хут прай нимені ӧтіре ӱтче, Худайның тириин дее пілче. ¹¹ Кізіде чуртапчатхан кізі худынаң пасха кізіде ниме парын кем пілче ни? Ідӧк Худайнин дее Худай Худынаң пасхазы пілбинче. ¹² Че піс пу чирдегі хутты албаабыс, че Худайдаң піске сыйыхталғанын пілер ӱчӱн, Аннаң Хутты алғабыс. ¹³ Аннаңар піс кізі хыйғазы пирген сӧстерні нимес, че Хут пирген сӧстерні ӱгретчебіс: піс Худай Худы пар кізілерні Худайлығ чуртирға ӱгретчебіс. ¹⁴ Тыннығ-сағыстығ кізі Худай Худынаң пирілчеткенні посха алынарға хынминча. Ол анзын алаахханға санапча. Аны Хут пастыра ла оңарарға чарирдаңар, оңар таа полбинча. ¹⁵ Че Худай Худы пар кізі прай нимені ӱзӱр полар. Аны за пірдеезі ӱзӱр полбас. ¹⁶ Хан-пигні ӱгредерге Аның сағызын кем піліп алтыр? Пістің сағызыбыс, тізең, Христости.

Тигірибдегі таластардаңар

¹ Мин сірернең, харындастар, Худай Худы пар кізілернең чіли, чоохтас полбаам. Че пос кӧңніңҷе чуртапчатханнарнаң, Христоста час палаларнаң чіли, чоохтасхам. ² Сірер ам даа кӱс алынғалахтаңар, мин сірерні хатығ чииснең нимес, сӱтнең азыраам. Сағам даа сірер кӱс алынғалахсар, ³ сірер пос кӧңнінҷе чуртапчазар нооза. Сірернің араңарда істі чохтаныс, таластар пол парчатханда, піліс полбинчатханнарыңда, пу чирдегілер нимессер бе сірер? Кізі чозахтарынҷа полчатхан нимессер бе? ⁴ Пірсі «Мин Павелнибін», пасхазы «Мин Аполлостибын» тіпчетсе, пу чирдең нимессер бе сірер?

⁵ Кемдір Павел, Кем Аполлос? Олар Худайға чӧрінчеткен кізілер ле. Оларның пастыра сірер киртініске айлан парғазар, ағаа хоза, полғаныңар ла Хан-пиг сірерге кемні турғысханы хоостыра. ⁶ Мин одыртхам, Аполлос суғлаан, че Худай ӧскірген. ⁷ Аннаңар одыртханы даа, суғлааны даа – тик ниме. Иң ӧӧні – ӧскірчеткен Худай. ⁸ Одыртханы паза суғлааны, тізең, пір тоғыс итчелер. Че полғаны ла тоғынғаны хоостыра позының сыйиин алар. ⁹ Піс хада тоғынчатхан Худайның нымысчыларыбыс. Сірер, тізең, Худайның хыразы, Худайның пӱдірии полчазар.

Хайди пӱдірчеткеннеріңні кӧріңер

¹⁰ Худай мағаа пирген сыйыхты тузаланып, мин сағыстығ пӱдірігҷі полып, тура тӧзін салдым. Пасхазы анда тура пӱдірче. Че полғаны ла хайди пӱдірчеткенін кӧріп одыр. ¹¹ Чарадылчатхан тӧстегдең пасхазын пірдеезі сал полбас. Ол тӧстег Иисус Христос полча. ¹² Пу тӧстегде хай піреезі алтыннаң, кӱмӱстең, аарлығ тастардаң, ағастаң, оттаң, сызырдаң пӱдірче бе, ¹³ прай ниме ілезіне сығар. Чарғы кӱні кӧзідер, от-чалында сығызар, от-чалын полған на кізінің кирее сынында хайдағ полчатханын сынидыр. ¹⁴ Кемнің тоғызы отха сыдас парыбызар, анзы сыйых алар. ¹⁵ Кемнің тоғызы отта кӧй парза, анзы ӱреге кірер. Итсе, позы арачылан халар, че отта кӧйген осхас полар. ¹⁶ Сірер постарың Худайның храмы полчатханын паза сірерде Худай Худы чуртапчатханын пілбинчезер бе? ¹⁷ Кем Худай храмын иңзер салза, аны Худай иңзерер. Худай храмы ызых# нооза, ол храм, тізең, сірер полчазар.

¹⁸ Пос посты пірдеезі алаахтырбазын. Кем пу тустарда хыйға чӧрерге сағынчатхан полза, ол, хыйға полары ӱчӱн, сағызы чох ползын. ¹⁹ Пу чирнің хыйғазы Худайның алнында сағыс чохха килісче, пазылғаны хоостыра: «Худай хыйғаларны кӧйтіктеріне тудып алча». ²⁰ Паза піди пазылых: «Хан Худай хыйғаларның сағызы тик полчатханын пілче». ²¹ Ол оңдайнаң кізілернең пірдеелерің махтаныспаңар, прайзы сірерни нооза: ²² Павел бе, алай Аполлос, алай Кифа+ 3:22 Кифа ол Пётр илҷінің пасха ады. Кӧр: «Иоанның Чахсы Хабары» 1:42. , алай тилекей, алай чуртас, алай ӧлім, алай амдығызы, алай килер тус – прай ол сірерни. ²³ Сірер зе Христостизер, Христос, тізең, Худайни.

Христостың илҷілері

¹ Ол оңдайнаң ноо даа кізі пісті, Христосха чӧрінчеткеннерні, Худай чазыдын хайраллапчатханнарны чіли, пілерге кирек. ² Хайраллапчатхан кізілердең полғанынаң на киртістіг тудынары киректелче. ³ Минің киреем халбинча, сірер алай пірее пасха кізі чарғызы мині чарғылапча. Мин позым даа позымны чарғылабинчам. ⁴ Мағаа уйатчаң ниме чоғыл. Че анзы пыром чоғын киречілебинче. Мағаа чалғыс Хан-пиг ле чарғыҷы нооза. ⁵ Аннаңар, тузы читкелекке, Хан-пиг килгелекке, пір дее нимені ӱзӱрбеңер. Ол харасхыда чазырыл парғанны чарыдыбызар, чӱректегізін іле сығарыбызар. Андада полғанына ла Худайдаң махтас полар.

⁶ Ол оңдайнаң, харындастар, мин прай пу нимені, позымнаңар паза Аполлостаңар, сірерге туза идіп чоохтаам. Сірерні пу сӧспекке ӱгрензіннер тіп сағынчам: «Пазылғаннаң артых сағын таппаңар». Андада сірер удур-тӧдір кӧкеесімненмессер. ⁷ Синің пасхаларынаң нимең артыхтыр? Син албаан ниме пар ба? Алғанда, тізең, албаан чіли, нимее махтан чӧрзің.

⁸ Сірер ирік парғазар, пайып парғазар, піс чох Ханнар пол парғазар. Мин сірерні сыннаң даа Ханнар ползыннар тіп сағынчам, андада піс тее сірернең хада Ханнар поларҷыхпыс. ⁹ Мин сағынчам, Худай пісті, илҷілерні, прайзының – ангеллернің# паза кізілернің кӧзіне, тиксі-тилекейге кӧзіткен ойынында полып, ӧл парарға чарғылатхан кізілерні чіли, иң соона турғыс салған. ¹⁰ Піс Христостың ӱчӱн сағыс чохпыс. Сірер, тізең, Христостың ӱчӱн хыйғазар. Піс кӱс чохпыс, сірер пиксер. Сірер сабланыстазар, піс, тізең, пазынҷыхтатчабыс. ¹¹ Сағамға даа теере астаң астап, суғдаң сухсап, чалаас чӧрчебіс, сохтырчабыс, орын таппинчабыс, ¹² хол кӱзінең тоғынып, істенчебіс. Пісті сӧклепчелер, піс алғапчабыс, пісті сӱрчелер, піс сыдасчабыс. ¹³ Пісті хомайлапчалар, піс чахсынаң нандырчабыс. Пу чирдегі кізілерге піс похсах осхаспыс. Сағам даа піс – тастанды.

¹⁴ Мин сірерні уйаттырарға тіп аны паспинчам, че хынған палаларыма чіли, хыйғаларың кирчем. ¹⁵ Сірернің Христоста муңарлап ӱгретчіңер пар, че пабаларың асхынах нооза. Мин сірерні Христос Иисуста Чахсы Хабар пастыра тӧріткем. ¹⁶ Аннаңар сірерге алданчам: мин Христосха кӧӧккенни, сірер мағаа кӧӧгіңер. ¹⁷ Мының ӱчӱн минің хынған паза Хан-пигібісте киртістіг оолғымны Тимофейні сірерзер ыстым. Ол сірерге Христоста чолларымны, минің прай чирде, ноо даа тигірибде ӱгретчеткенімні сағыстарыңа кирер.

¹⁸ Мин сірерзер килбинчеткенімде, піреелерің кӧкеесімненібістір. ¹⁹ Че Хан-пиг пирзе, тӱрчедең сірерзер чидерім, кӧкеесімненгеннернің сӧстерін нимес, че кӱстерін сынирбын. ²⁰ Худайның ӱлгӱзі сӧсте нимес, кӱсте кӧрінче нооза. ²¹ Ниме кирек сірерге? Хамҷы тудынып алай хыныснаң, амырнаң килгені?

Чӧреес хылыхтығ кізінең хайди хылынардаңар

¹ Сірернің араңарда чӧреес хылых кірібіскеннеңер сын чоох пар. Ағаа хоза, Худайы чохтар аразында даа полбинчатхан нимені итче одырзар: кем-де ипчізі орнына пабазының ипчізінең полча одыр. ² Нимее кӧкеесімнен турзар? Сынында сірер ылғирға кирексер. Андағ ниме иткен кізі, тізең, сірернің араңардаң сығара сӱрдірерге кирек. ³ Мин сын позым араңарда полбазам даа, худым сірернең хада полып, мин сірернің араңарда чӧрген чіли, андағ киректі иткен кізіні піди чарғылап салдым: ⁴ Хаҷан сірер Хан-пигібіс Иисус Христостың адынаң хада чыылыссар, мин дее худымнаң сірернең хадабын паза Хан-пигібіс Иисус Христостың кӱзі сірернең хадох. ⁵ Ол чыылығда, ол кізінің худы Хан-пигібіс Иисус Христостың кӱнінде арачыланып алар ӱчӱн, аның иді-ханын ирееледерге сайтанның# холына пир салыңар. ⁶ Махтанҷаң нимелерің чоғыл. Ас таа ачытхы прай унны ачытчатханын пілбинчезер бе? ⁷ Наа, ачытхы чох хойытхы поларларың ӱчӱн, иргі ачытхыны арығлабызыңар. Па’сха ӱлӱкӱннің хурағаны полып, Христос тайыға# салыл парғаннаңар, сірер сынында андағ ачытпаан тесто полчазар нооза. ⁸ Аннаңар піс иргі ачытхының нимес, чабалның паза кӧйтіктің ачытхызынаң нимес, че ах-арығның паза сынның ачытпаан халазынаң ӱлӱкӱннирбіс.

⁹ Мин пічиимде сірерге сайбахтарнаң піліспеске тіп пасхан полғам. ¹⁰ Че, итсе пу чирдегі прай сайбахтарнаң алай азымахчыларнаң, алай тонағҷыларнаң, алай кізі холынаң иділгенге пазырчатханнарнаң піліспеске нимес, іди полза, сірерге пу чирдең парыбызарға кирек поларҷых. ¹¹ Че мин, харындас аданып, сайбах алай азымахчы, алай кізі холынаң иділгенге пазырчатхан, алай чабал чоохтығ, алай іскіҷі, алай тонағҷы кізілернең хада полбасха тіп пасхам. Андағларнаң хада чібеске дее кирек. ¹² Мин тоғырхыларны ноға чарғылирға кирекпін? Сірер пос аразындағы кізілерні чарғылирға кирек нимессер бе? ¹³ Тоғырхыларны, тізең, Худай чарғылидыр. Піске, тізең, оңдайлары ардааннарны пос аразынаң хыйа идерге кирек.

Пос аразында чарғылазардаңар

¹ Піреезі, пасха кізінең тартыс салып, ах-арығларда чарғыласпин, сын нимес кізілерде чарғылазарға хайди тідінче полҷаң? ² Ах-арығлар пу чирні чарғылирларын пілбинчезер бе? Пу чирні сірер чарғылирларыңда, оох-теек киректерні чарғылирға сағыстарың читпес пе? ³ Піс ангеллерні дее чарғылирыбыста, чуртаста пол парчатхан киректерні улам оой чарғылап поларыбысты пілбинчезер бе? ⁴ Сірер чуртаста пол парчатхан киректеріңҷе чарғыласчатсар, тигірибде нимее салылбинчатхан кізілерні ноға чарғыҷаа турғысчазар. ⁵ Сірерні уйаттырып, тіпчем: пос аразында харындастарны ӱзӱр полар пір хыйға кізі табылбады ба? ⁶ Че харындаснаң харындас чарғылас чӧрчезер, ағаа хоза, киртініс чохтарның алнында. ⁷ Пос аразында чарғыласчатханнарың даа улуғ уйат. Ӱреге кір парғаннарың сірерге артых полбасчых па? Пыластыр салғаны сірерге артых полбасчых па? ⁸ Че сірер постарыңох ӱреге кирчезер, пыласчазар, ағаа хоза, харындас кізілернин. ⁹ Алай киртініс чохтарға Худай хан-чирі# пирілбезін пілбинчезер бе? Пос посты алаахтырбаңар. Сайбахтарға даа, кізі холынаң иділгенге пазырчатханнарға даа, чӧреечі кізілерге дее, ир ирнең хонысчатханнарға даа, ¹⁰ оғырларға даа, азымахчыларға даа, іскіҷілерге дее, чабал чоохтығларға даа, кӱҷӱрлерге дее Худай хан-чирі пирілбес. ¹¹ Сірернің аразында андағлар полғаннар. Че арығланып алғаннар, ах-арығ пол парғаннар, Хан-пигібіс Иисус Христос паза Худайыбыс Худының пастыра ахтанып алғаннар.

Кізі иді-ханы Худай Худының храмы

¹² Прай ниме мағаа чарадылча. Че прай ла ниме мағаа тузалығ нимес. Прай ниме мағаа чарадылча, че прай ла ниме мағаа ээленмезін. ¹³ Чиис – хурсахха, хурсах таа – чииске. Че Худай анзын даа, мынзын даа чох ит салар. Кізі иді-ханы чӧреес хылыхха салылбаан, че Хан-пиге. Хан-пиг, тізең, кізі иді-ханынаңар сағыссырир. ¹⁴ Худай Хан-пигні тірілдір салған. Пісті дее позының кӱзінең тірілдір салар. ¹⁵ Сірернің иді-ханыңар Христостың чӱллері полчатханын пілбинчезер бе? Мин Христостың чӱллерін чӧреес ипчее пирібізербін ме? Чох, андағ ниме полбас! ¹⁶ Алай чӧреес ипчінең хонысчатхан кізі анынаң пір пол парчатханын пілбинчезер бе? Худай Пічиинде чоохтал парған нооза: ікі пір пол парарлар+ 6:16 Аннаңар кӧр: Пурунғы Молҷағның «Пастағлар» (Бытие) киндезі 2:24. . ¹⁷ Хан-пигнең піріккен кізі Хан-пигнең пір хуттығ пол парча. ¹⁸ Чӧреес хылыхтығ кізідең тис чӧріңер: кізі итчеткен ноо даа чазых# иді-ханына теңминче. Чӧреес хылыхтығ полғаны, тізең, кізінің позының иді-ханынаң тоғыр чазых иткені полча. ¹⁹ Алай иді-ханыңар пісте чуртапчатхан сірерге Худайдаң пирілген Худай Худының храмы полчатханын пілбинчезер бе? Аннаңар сірер постарыңни нимессер нооза. ²⁰ Сірер аарлығ паанаң алылғазар. Аннаңар Худайни полчатхан иді-ханыңарда даа, кӧңніңерде дее Худайны сабландырыңар.

Алызардаңар

¹ Сірер мағаа пасханнарың хоостыра, тізең, кізее, ипчі албаза, чахсы полар. ² Че чӧреес хылыхтығ полбас ӱчӱн, полғаны ла позының ипчізінең хонзын, полған на ипчі позының ирінең хонзын. ³ Ирі ипчізіне, ирі полып, пирерге кирегін пирзін. Ипчізі ідӧк иріне, ипчізі полып, пирерге кирегін пирзін. ⁴ Ипчі кізі позының идіне ээзі нимес, ирі аның ээзі. Ирі дее позының иді-ханына ээзі нимес, ипчізі ағаа ээзі. ⁵ Чара хонмаңар. Хада чоохтас салза ла, пазырарға алай ораза# тударға итчетсеңер, чара поларға чарир. Соонаң, сайтан сірерні пос салынарға кӧктірбес ӱчӱн, пазох хада хончадыңар. ⁶ Итсе, ол чахығ нимес, че піди идерге хынзаңар, пу минің чаратханым полча. ⁷ Прай кізілерні мин осхас ползыннар тіп сағынчам. Итсе, полғанының позының Худай салғаны пар: пірсіни мындағ, паза пірсіни пасхох.

⁸ Хоных хонмааннарға паза чалғыс-чарым халған ипчілерге мин чіли чӧргені чахсы полар тіп чоохтапчам. ⁹ Ханнарын пазын полбинчатсалар, хоных хонзыннар. Хоных хонғаны ханнарын ойнатханнаң оларға артых полар нооза. ¹⁰ Хоных хон салғаннарға, тізең, ипчізіне ирінең чарылыспасха чахыпчам, мин дее нимес, Хан-пиг чахығ пирче. ¹¹ Чарылыс парза, тізең, чалғыс-чарым чӧрчетсін алай ирінең чарас салзын. Иріне дее ипчізінең чарылыспасха. ¹² Пасхаларына, тізең, Хан-пиг нимес, мин чоохтапчам: пірее харындастың ипчізі киртініс чох полза паза ол ипчі харындазыбыснаң чуртирға хынчатхан полза, ол кізі аны халғыспасха кирек. ¹³ Киртініс чох ирліг ипчі дее, хонғаны аннаң хада чуртирға хынчатса, аны халғыспасха кирек. ¹⁴ Киртініс чох ир киртіністіг ипчізінің пастыра Худайға чағыннапча. Киртініс чох ипчі киртіністіг ирінің пастыра Худайға чағыннапча нооза. Іди полбаан полза, палалар арығ полбасчыхтар. Амды, тізең, олар ах-арығлар. ¹⁵ Киртініс чох кізі, чарылызарға идібіссе, чарылыссын. Харындас алай пиҷе андағ киректе палғалых ниместер: Хан-пиг ынағ поларға хығыртхан пісті. ¹⁶ Ипчі, иріңні арачылап поларыңны хайдаң пілчезің? Алай син дее, ир, ипчіңні арачылап поларыңны хайдаң пілчезің.

Худай сірерге хайди салған, іди чуртап одырыңар

¹⁷ Худай полғанына хайди салған, Хан-пиг хайди хығырған, іди пол. Мин іди прай тигіриблер чонына чахыпчам. ¹⁸ Сӱннет# кистіргені хығыртылған полза, чазынмазын, сӱннет кистірбеені хығыртылған полза, кистірбезін. ¹⁹ Кистірері дее пір тик ниме, кистірбезі дее андағох. Че иң ӧӧні – Худай чахығларын толдырары. ²⁰ Полғаны ла, кем полып хығыртылған, ідӧк халзын. ²¹ Хул даа полған ползаң, кирек халба, че пос пол полар ползаң, анзынаң тузаланып ал. ²² Хан-пигнең хада хығыртылған хул ол Хан-пигнің пос кізізі, че пос кізі полчадып, хығыртылғаны даа Христостың хулы полча нооза. ²³ Сірерні аарлығ пааға садызып алғаннарында, кізілернің хуллары полыбыспаңар. ²⁴ Харындастар, хығыртылғанда кем полғазар, Худайның алнында ідӧк ле халыңар.

Кізі теңмеен чӧрердеңер паза хоных хонардаңар

²⁵ Кізі теңмеен чӧрердеңер минде Хан-пигнің чахығлары чоғыл. Че Хан-пиге киртістіг поларға Аннаң ӧлҷей алған кізі чіли чӧп пирчем. ²⁶ Сидік тустар пасталыбыстылар. Аннаңар сағынчам: кем хайди чуртапча, ідӧк халзын. ²⁷ Ипчіңнең пірік парғазың ма? Чарылызарға кӱстенме. Ипчі чох хал пардың ма? Ипчі тілебе. ²⁸ Итсе, хоных хонзаң даа, чазых итпессің. Хыс таа ирге парза, чазых итпес. Че андағлар ит-ханнары пастыра чобағлығ пол парарлар. Мағаа, тізең, сірер айастығзар. ²⁹ Мин сірерге, харындастар, піди тирім: тус асхынах халча, аннаңар ипчіліглер ипчі чох осхас поларға киректер. ³⁰ Ылғапчатханнары ылғабинчатханнар чіли, ӧрінчеткеннері ӧрінминчеткеннер чіли, садызып алчатханнары албинчатханнар чіли, ³¹ пу ах чарыхтағы нимелерні тузаланчатхан кізілер тузаланминчатханнар чіли поларға киректер: піс пілген ах чарых иртісче нооза. ³² Мин, тізең, сірернің сағыссырастарың чох ползын тіп сағынчам. Ипчі албаан кізі Хан-пигнинеңер сағыссырапча, Хан-пигнің кӧңніне кірердеңер. ³³ Ипчіліг кізі, тізең, чуртастаңар сағыссырап, ипчізінің кӧңнінҷе пол пирерге кӱстенче. Ирліг ипчі дее хыстаң пасхалалча. ³⁴ Ир чоғы Хан-пигдеңер сағынча, Хан-пигнің кӧңніне кірердеңер. Иді-ханын даа, худын даа ах-арығ тудардаңар сағыссырапча. Ирліг ипчі, чуртастаңар сағыссырап, ирінің кӧңнінҷе пол пирерге кӱстенче. ³⁵ Сірергеӧк туза идерге тіп аны чоохтапчам. Сірерні хысти пазар ӱчӱн нимес, че Хан-пиге ойын пазы нимес, иптіг оңдайҷа, тохтадынмин чӧрінзіннер тіп чоохтапчам.

³⁶ Итсе, піреезі позының хызына, час чит парып хыс полып чӧрчеткеніне чарадынминчатса, хайди хынча, іди итсін, чазых ит салбас. Андағлар ирге парзыннар. ³⁷ Че кӱстетпин, пос кӧңнінең хоных хонмасха чарат салған кізі, пос хылиинаң аны итчетсе, ниме идерін чӱреенде пӧгін салза, сӧлескен хызынаң алыспазалар, чахсы идерлер. ³⁸ Аннаңар хызын ирге пирчеткен кізі орта итче, че ирге пирбинчеткені артых итче.

³⁹ Ипчі ирі изен чӧргенінҷе ӱлгӱ холынаң сыхпинча. Ирі ӱреп парза, тізең, кемге хынза, ағаа парарға чарапча, итсе, Хан-пигдегі кізее. ⁴⁰ Че минің чӧбімҷе ол ипчі чалғыс-чарым хал парза, часкалығ полар. Мин зе Худай Худы минде парох тіп сағынчам.

Обааларға тайып салған чиистердеңер

¹ Пістің прайзыбыстың пілізі пардаңар, піс обааларға тайып салған чиистердеңер пілчебіс. Че піліс кӧкеесімненедір, хыныс, тізең, ӱгредедір. ² Піреезі ниме-де пілчем тіп сағынчатса, ол кізі хайди пілерге кирек, іди пілбинче. ³ Че кем Худайға хынча, ағаа Аннаң піліс пирілче. ⁴ Ол оңдайнаң обааларға салған тамахты чииске тударынаңар чоохтаза, піс пілчебіс: пасха худайлар сынында чох нимені таныхтапчалар паза чалғыс Худайдаң пасха худай чоғыл. ⁵ Тигірде бе алай чирде бе худай тіп адалчатханнар пар даа ползалар, ол худайлар паза ээлер кӧп тее ползалар, пістің пір ле Худай пар – прай нимені чайаан Паба. Піс Ағаа чуртапчабыс. Пістің пір ле Хан-пиг пар. Аннаң пастыра прай ниме чайалған, Ол піске чуртас пирче. ⁷ Прайзы ла аны пілбинчелер. Олар чуртастары тооза обааларны сын худайлар тіп санааннар. Аннаңар обааларға салған тамах сын худайларға салылған тіп сағынчалар. Анзы оларның порт чӱректерін ардатча. ⁸ Чиис пісті Худайға чағдатпинча, чіп тее піс пір дее нимее чидінминчебіс, чібезе дее пір дее ниме чідірбинчебіс. ⁹ Че, сизініңер, сірер постарың пӧкчеткеннерің пик киртініс чохтарға чазыхха кір парарға сылтағ пол парбазын. ¹⁰ Піреезі сині, пілістіг полчадып, пасха худайлар ордазында одырчатханыңны кӧр салза, аның пик нимес чӱрее ағаа обааларға тайып салғанны чирге чарат салҷаң полбазын. ¹¹ Іди синің пілізің сылтаанда пик нимес сағыстығ харындазыбыс ӧл парар. Христос, тізең, аның ӱчӱн тынын салған нооза. ¹² Харындастардаң тоғыр андағ чазых идіп, порт чӱректерін ардадып, сірер Христостаң тоғыр чазых итчезер. ¹³ Аннаңар харындазымны чиис хыҷыхтандырчатса, харындазымны хыҷыхтандырбас ӱчӱн, итті хаҷан даа чібеспін.

Илҷінің тоғызы паза ӱлгӱзі

¹ Мин илҷі нимеспін ме? Мин пос кізі нимеспін ме? Хан-пигібіс Иисус Христосты кӧрбеем ме? Хан-пигібісте сірер минің тоғызымның салтары нимессер бе? ² Пасхаларына мин илҷі полбазам даа, сірерге мин илҷібін. Минің илҷі полчатханымның таңмазы – сірернің Хан-пигібісте полчатханыңар нооза. ³ Соома тӱсчеткеннердең тоғыр минің арачыланызым андағ: ⁴ пістің тоғызыбыс ӱчӱн чирге-ізерге ӱлгӱбіс чоғыл ба? ⁵ Пасха илҷілер, Хан-пигнің харындастары паза Кифа итчеткен чіли, позымнаң хада киртіністіг ипчімні чорыхха аларға минің ӱлгӱм чоғыл ба? ⁶ Алай чалғыс мин не паза Варнава ла тоғынмин чӧрер ӱлгӱ чохпыс па? ⁷ Хайдағ чааҷы чаалас чӧрер хорадығларны посха артча ни? Кем, виноградты одыртып алып, чистегін чібин чӧрер ни? Кем, мал хадарып, сӱдін іспин чӧрер ни? ⁸ Кізі сағызына ла тӧстене чоохтапчам мин мыны. Моисей Чахии ідӧк тіпче нимес пе? ⁹ Моисей Чахиинда ас саапчатхан тазынның ахсын чаба чаппа тіп пазылых нооза. Худайның тазыннарынаңар сағыссырааны полар ба ол? ¹⁰ Алай ол піске чоохталчатханы полған полбаҷаң ма? Піске пазылых полчатпас па: кем хыра тартча паза кем ас саапча, сағыпчатхан салтарын аларына ізенерге кирек. ¹¹ Піс сірернің чӱректеріңде Худайның сынын таарыпчатханыбыста, сірердең чиис паза тонанҷых сурзабыс, кӧп пе ол? ¹² Пасхаларына аны сірердең аларға чарадылчатханда, пістің алар ӱлгӱбіс аннаң артых полбас па? Піс, тізең, пу ӱлгӱбіснең тузаланмаабыс, че Христостың Чахсы Хабарын тарадарына харығ пол парбас ӱчӱн, прай нимені тыстан парчабыс. ¹³ Ызых тоғыстағылар ызыхтаңох нимістенчеткенін пілбинчезер бе? Тайығ итчеткеннер тайығдаңох ӱлӱс алчатханнарын пілбинӧкчезер бе? ¹⁴ Хан-пиг дее Чахсы Хабарны таратчатханнарға олох тоғыснаң чуртирға чахаан нооза. ¹⁵ Че мин андағ нименең пір дее тузаланмаам. Мин аны позыма андағ ниме киліссін тіп паспинчам. Мағаа махтатханымны піреезіне чох иттіргенҷе, ӧл парары артых полар. ¹⁶ Минің Чахсы Хабарны таратчатханыма махтанҷаң ниме чоғыл, анзы мин идерге кирек ниме. Хабар таратпазам, тізең, чобағ тӱссін мағаа. ¹⁷ Мин аны позымның кӧңнімҷе итчеткенімде, сыйых полар мағаа. Позымның кӧңнімҷе итпинчетсем, тізең, мағаа пирілген чӧрінізімні толдырчам нооза. ¹⁸ Андағда нименің ӱчӱн мағаа сыйых поларға кирек? Чахсы Хабарға ӱгредіп, Христостаңар тӧлег-парыс чох хабарны тарадып, пу киректе ӱлгӱмнең тузаланминчатханым ӱчӱн полар анзы.

¹⁹ Мин пос кізібін, хул нимеспін. Че оларны Худайға кӧбдин тартып алар ӱчӱн, мин позымны прайзына хул иттім. ²⁰ Иудейлерні тартып алар ӱчӱн, мин иудейлерге тӧӧй полғам. Моисей Чахиина тудынчатханнарны тартып алар ӱчӱн, мин Моисей Чахиин тутчатхан кізі полчам. Итсе, сынында мин Моисей Чахииның ӱлгӱзінде нимеспін. ²¹ Моисей Чахиин тутпинчатханнарны тартып алар ӱчӱн, мин Моисей Чахиин тутпинчатхан кізі чіли полчам. Анзы минің Худайның Чахиин толдырбинчатханым нимес, че мин Христостың Чахиин толдырчам. ²² Кӱс-сағ чохтарнаң хости, оларны позымзар тартып алар ӱчӱн, ідӧк кӱс-саам чоғох полғам. Хай-піреелерін дее арачылап халар ӱчӱн прайзына прай ниме пол пиргем. ²³ Мин аны Чахсы Хабарны оларға читірер ӱчӱн итчем, паза ол пирчеткен ӧріністі аларға сағынчам. ²⁴ Марғысчатхан орынзар, марғызарға тіп, прайзы чӱгӱрісче, че сыйыхты пір ле кізі алчатханын пілбинчезер бе? Аны аларға прайзыңар ойлазыңар! ²⁵ Марығда араласчатхан ноо даа кізі, пу чирдегі сыйыхты утып алар ӱчӱн, матап тимненче. Піс алар сыйых, тізең, мӧгі сыйых полча. ²⁶ Мин пӧгін чох чіли чӱгӱрбинчем, холларым тик пулахтатпин кӱресчем. ²⁷ Че пасхаларын ӱгредіп, позым турыспин парбас ӱчӱн, иді-ханымны, чабассырап, пазынчам.

Обаалардаң сизіндіргені

¹ Харындастар, сірерні пілбееннең халбазыннар тіп сағынчам: пістің пабаларыбысты прайзын пулут апарған паза прайзы талайны ӧтіре ирткен+ 10:1 Аннаңар кӧр: Пурунғы Молҷағдағы «Сығыс» (Исход) кинде 14; 40:36-37. . ² Прайзы олар, пулутта паза талайда кіреске тӱзіп, Моисейнің# ӱгренҷілері полыбысханнар. ³ Прайзы тигірдегі пір тамахтаң чеен. ⁴ Прайзы тигірдегі пір суғдаң іскен. Олар прайзы оларнаң хада парған тигірдегі хайаның суун іскеннер. Ол хайа, тізең, Христос полған. ⁵ Че оларның кӧбізі Худайның кӧңніне кір полбаан. Оларның сӧӧктері хуу чазыда чат халғаннар. ⁶ Анзы піске кӧзідім полып, олар чіли чабал сағынмасха сизіндірген. ⁷ Анзы піс, оларның піреелері чіли, обааларға пазырбас ӱчӱн полған. Худай Пічиинде піди пазыл парған: алтын пуғаа пазырып, чон чирге, ізерге одырған, турып, ойынға кірібіскен+ 10:7 Аннаңар кӧр: Пурунғы Молҷағдағы «Сығыс» (Исход) кинде 32. . ⁸ Оларның піреелері оралысхан чіли оралыспаңар. Олар, оралысханнаңар, пір кӱнде чибіргі ӱс муң хырыл парғаннар. ⁹ Оларның піреелері, Христосты сынап, чыланнардаң ӧлгеннер. Піс Христосты сынабааңар. ¹⁰ Перінмееңер. Оларның піреелері, перініп, Чох итчеткен ангелнің холынаң ӧлгеннер. ¹¹ Анзы оларға, піске кӧзідім полып, тӱскен. Піске, тізең, тӱгенҷі чылларға читкеннерге, сағыс алынарыбыс ӱчӱн пазыл парған. ¹² Аннаңар кем турчам тіп сағынча, аңдарыл парбим тіп, сизініп одырзын. ¹³ Сірерні сынапчатхан ноо даа хыҷыхтаныс ол олаңай ла, кізі хыҷыхтанызы полча. Худай, тізең, киртістіг, ол сірерге сыдап полбас хыҷыхтанысты ыспас. Хыҷыхтаныста сірерге аны сыдас парыбызар кӱс пирер. Іди Ол сірерге полыс полар.

¹⁴ Ол оңдайнаң, хынғаннарым, обааларға пазырарынаң тизіңер. ¹⁵ Мин сірерге сағыстығ кізілерге чіли чоохтапчам. Мин ниме чоохтапчатханымны постарың сағынып алыңар. ¹⁶ Піс алғапчатхан алғас# ідізі Христостың ханынаң пірікчеткенібісті таныхтапча нимес пе? Піс сындырчатхан халазыбыс Христостың иді-ханынаң пірікчеткенібісті таныхтапча полбас па? ¹⁷ Халас пір, піс тее, кӧп кізі, пір ит-ханмыс. Пір халаснаң піріктірілчебіс нооза. ¹⁸ Тӧрееннең Израиль чоны полчатханнарға кӧріңер: тайығ тамаан чіпчеткеннер тайығның араласчылары пол парча ниместер бе? ¹⁹ Ниме мин чоохтирға сағынчам? Пу тас обаалар сын тіріг худайлар полчалар тіпчем ме? Алай ағаа тайығ салғаны ниме-де таныхтапчатханнаңар чоохтапчам ма? ²⁰ Чох. Че пасха худайларға киртінчеткеннер, тайығ идіп, Худайға нимес, айна-чиктерге# тайыпчатханын чоохтапчам. Мин, тізең, сірерні айна-чиктернең пірге полбазыннар тіп сағынчам. ²¹ Хан-пигнің ідізін ізіп, айна-чиктин іс полбассар. Хан-пигнің тамаан чіпчетсе, айна-чиктин чіп полбассар. ²² Нӧӧс піс Хан-пигні тыртыстандырарға тідінербіс. Піс аннаң кӱстігбіс пе?

²³ Прай ниме мағаа чарадылча, че прай ла ниме мағаа тузалығ нимес. Прай ниме мағаа чарадылча, че прай ла ниме мині орта ӱгретпинче. ²⁴ Пірдеезі постин тілебезін, че пасхазына туза идерге кӧрглезін. ²⁵ Садығдағы хайдағ даа итті, тайыға салылған ма тіп, сурбин ал. Нандырығ чӱрееңні ардат салҷаң полбазын. ²⁶ Чир паза аны толдырчатхан прай ниме Хан-пигни нооза. ²⁷ Киртініс чохтардаң піреезі сірерні хығырза, парарларың килчетсе, парыңар. Ол сал пирген нимені сурбин чіңер. Нандырығ чӱрееңні ардат салҷаң полбазын. ²⁸ Че піреезі «пу обааға тайып салған чиис» тізе, ол чоохтаан кізінің ӱчӱн паза чӱрек арығ полар ӱчӱн, чібеңер аны. Тилекей паза аны толдырчатхан ниме Худайни нооза. ²⁹ Сірернің чӱрееңердеңер нимес, хығыртхан кізінің чӱреенеңер чоохтапчам. Андада пірее кізі тир: «Ноға мин пасха кізінің чӱреенең чарғыладарға кирекпін». ³⁰ «Мин тамахты алғыснаң чіпчетсем, алғыстааным ӱчӱн ноға пыролаттырарға кирекпін». ³¹ Мин піди чоохтирбын: чіпчетсер бе, ісчетсер бе алай пасха даа ниме итчетсер, Худайның сабланызына идіңер аны. ³² Иудейлерні дее, гректерні дее, Худай тигірибін дее хомзындырбин. ³³ Мин дее ідӧк итчем. Ноо даа ниме итчетсем, прайзының кӧңнін толдырарға кӱстенчем. Прайзы арачыланзын тіп, позымнаңар нимес, че олардаңар сағынчам.

¹ Мин Христосха кӧӧкчеткенни, мағаа кӧӧгіңер.

² Сірерні миннеңер сыбыра сағынчатханнарың ӱчӱн паза пирген ӱгредіге тудынчатханнарың ӱчӱн махтапчам. ³ Ідӧк сірерні мыны пілзіннер тіп сағынчам: Ноо даа ирге пазы Христос полча, ипчізіне – ирі, Христосха, тізең, – Худай. ⁴ Ноо даа ирен пазын чаап пазырчатса алай ухаанҷылапчатса, пазын уйатха сухча. ⁵ Ноо даа ипчі, тізең, пазын чаппин пазырчатса алай ухаанҷылапчатса, позының пазын уйатха сухча. Анзы ағаа пазын хырдыр салғаннаң пасха нимес нооза. ⁶ Ипчі пазын чабарға хынминчатса, андада хырынзын. Сазын кистір салған алай хырдыр салған чӧрерге уйатчатса, пазын чабынзын. ⁷ Ол оңдайнаң ир кізі пазын чаппасха кирек. Ол Худайның сомы паза сабланызы нооза. Ипчі кізі, тізең, ирінің сабланызы. ⁸ Ирі ипчізінің хабырғазынаң нимес нооза. Ипчізі ирінің хабырғазынаң иділген+ 11:8 Аннаңар кӧр: Пурунғы Молҷағдағы «Пастағлар» (Бытие) кинде 2:20-21. . ⁹ Ир кізі ипчізіне чайалбаан нооза, че ипчі кізі иріне чайалған. ¹⁰ Аннаңар, ангеллер пілер ӱчӱн, ипчі кізі ирінің холында полчатханын киречілир ӱчӱн, пазын чабарға кирек. ¹¹ Андада піс, Хан-пигнің холында чуртапчатханыбыста, иреннер паза ипчілер удур-тӧдір кирексінісчебіс. ¹² Хайди ипчізі ирінең иділген, ир кізі дее ипчідең тӧреен нооза, прайлары, тізең, Худайдаңнар. ¹³ Постарың даа сағын кӧріңер, ипчі кізее пазын чаппин Худайға пазырарға чаразых па? ¹⁴ Чир дее андағ нимес пе? Ир кізее сас ӧскірерге улуғ уйат. ¹⁵ Че ипчі сас ӧскірзе, ағаа аарлас, ағаа сазы чабынҷах орнына пирілче нооза. ¹⁶ Піреезі талазарға итсе – пістің андағ ниме кибірде дее, Худай тигірибінде дее чоғыл.

Хан-пигні сағынып азыранғаны

¹⁷ Че мыны чоохтап, сірерні, чахсаа нимес, хомайға чыылчатханнарың ӱчӱн махтабинчам. ¹⁸ Пастағызы. Мин сірерні, тигірибге чыылыс парзар, пос аразында чарылыс сыхчазар тіп исчем паза анзына арали киртінчем. ¹⁹ Сірернің араңарда пасха сағынчатханнар поларға кирек. Анзы сын сағынчатхан кізілерні іле сығарар нооза. ²⁰ Сірер чыылызып алып азыранчатсаңар, ол Хан-пигні сағынып азыранғаны нимес. ²¹ Сірернің хайзы даа позының чиизін пасхаларынаң пурун чибізерге маңзырапча одыр. Анаң піреезі астап халча, хайзы, тізең, ізін салча. ²² Иблерің чоғыл ба, чіп-ізіп аларға? Алай Худай тигірибін нимее салбин, чохтарны пазынҷыхтапчазар. Ниме чоохтирбын сірерге? Аның ӱчӱн махтим ма? Чох, махтабаспын.

²³ Мин сірерге пиргенні Хан-пигдең Позынаң алғам нооза: Хан-пигібіс Иисус сатыртхан хараада халас алып, ²⁴ алғыстабызып, аны сындыртхан паза теен: «Алыңар мыны, чіңер, пу сірернің ӱчӱн ӱзе тартылған Идім минің. Мині сағысха киріп, підӧк итчедіңер». ²⁵ Ідӧк иирдегізін азыранған соонда, ідіс алып, «пу минің ханымнаң таңмалалған Наа Молҷағ#. Мині сағысха кирген сай, мыны іскен сай підиӧк итчедіңер» теен. ²⁶ Сірер пу халасты чеен сай, пу ідісті іскен сай Хан-пигнің килгенінҷе, іди Аның ӧлімінеңер чарлапчатхан полчазар нооза. ²⁷ Кем пу халасты чіп, пу ідісті алып, Хан-пигнің адына турыстығ тудынмаза, Хан-пигнің идінең паза ханынаң тоғыр пыро ит салар. ²⁸ Кізі позы позын пастап сынап алзын, анаң пу халастаң чізін, пу ідістең іссін. ²⁹ Кем турыстығ нимес чіп, іссе, ол, Хан-пигнің Идінеңер сағынмин, позын пыроладарға чіпче паза ісче. ³⁰ Аннаңар даа сірернің кӧбізі кӱс-сағ чохсар, ағырығзар, сірернің илеедезі ӱреп парча. ³¹ Піс пос посты чарғылаҷаң ползабыс, чарғаа тартылбасчыхпыс. ³² Че піс, пу тилекей чарғылатхан чіли, чарғылатпас ӱчӱн, Хан-пиг пісті чарғылапча паза хатығлапча. ³³ Аннаңар, харындастарым, чирге чыылысчатсаңар, удур-тӧдір сағызып ал турыңар. ³⁴ Сірер чыылыссар, Худай сірерні хатығлабас ӱчӱн, астапчатхан кізі ибде азыранып алчатсын. Пасхазын позым килзем, чоохтағлап саларбын.

Худай Худының сыйыхтарынаңар

¹ Харындастар, Худай Худынаң пирілчеткен сыйыхтардаңар пілбин хала парҷаң полбазыннар тіп сағынчам. ² Пілчезер, нооза хаҷан пасха худайларға киртінгеннеріңде, табыс таа чох обаалар пу чабал чолҷа сірерні ал чӧргеннер. ³ Аннаңар Худай Худы пастыра чоохтанчатханнарның пірдеезі Иисусты харғабас. Пірдеезі, Худай Худы пастыра ла полбаза, Иисусты Хан-пиг тіп адап полбас. ⁴ Сыйыхтар пасха-пасха полча. Че оларны пирчеткені Худай Худы полча. ⁵ Худайға чӧрінері дее пасха-пасха полча. Че піс чӧрінчеткен Хан-пиг, тізең, пір ле. ⁶ Иткені дее пасха-пасха полча. Че олох ла Худай пісте тоғынча паза прай нимеде піске полысча. ⁷ Худай Худы пары аймах-пасха оңдайларнаң іле кӧзіділче. Прай ол оңдайлар прайзының тузазына пирілчелер. ⁸ Піреезіне Худай Худы пастыра хыйға сӧс пирілче. Пасхазына олох Хуттаң піліс сӧзі пирілче. ⁹ Хайзына-да олох Хуттаң киртініс, пасхазына олох Хут пастыра чазылдырары сыйыхха пирілче, ¹⁰ хайзына-да хайхастар идері, пасхазына ухаанҷылас, пасхазына хуттарны танып пілері, пасхазына аймах тіллер, пасхазына тіллерні чарыда чоохтиры пирілче. ¹¹ Прай пу нимені олох Хут итче. Ол аны Позының кӧңнінҷе, хайзына хайди ӱлирін ӧнетін кӧріп, итче.

Христостың Иді-ханы пӱкӱл полчатханнаңар

¹² Кізі иді-ханы пӱкӱл, че аның чӱллері кӧп полча нооза. Ол пір ит-ханның чӱллері кӧп тее ползалар, хада-пірге пір ит-хан полчалар. Ідӧк Христос. ¹³ Піс прайзыбыс пір Худай Худынаң пір ит-хан поларға кіреске тӱскебіс нооза: Иудейлер дее, Гректер дее, хуллар даа, пос хоныхтығлар даа – прайзыбыс пір Худай Худынаң суғарыл парғабыс. ¹⁴ Ит-хан пір чӱлдең нимес, кӧп чӱллердең пӱткен нооза. ¹⁵ Кізінің азағының пірсі «мин хол ниместе, ит-ханни нимеспін» тізе, ол андада ит-ханни полбиныбызар ба? ¹⁶ Хулах, тізең, «мин харах ниместе, пу ит-ханни нимеспін» тізе, ол аның сылтаанда ит-ханни полбиныбызар ба? ¹⁷ Прай ит-хан харах пол парза, истері андада хайда полар? Прай хулах пол парза, чыс чыстиры андада хайда полар? ¹⁸ Че Худай полған на чӱл-сӧӧкке ит-ханда Позы хынғанни орын пир салған. ¹⁹ Прайлары пір чӱл полған полза, ит-хан хайда поларҷых. ²⁰ Ам, тізең, чӱллер кӧп, че ит-хан пір. ²¹ Харах холға «син мағаа кирек чохсың» тіп полбас. Пас таа азахтарға «сірер мағаа кирек чохсар» тіп полбас. ²² Ит-ханның чазығ пілдірчеткен чӱл-сӧӧктері улам киректер. ²³ Піске тың турыстығ нимес пілдірчеткен чӱллерні турыстығ кип-азахха тонандырчабыс. ²⁴ Иптіг нимес кӧрімніг чӱллері ипти чабыл парчалар. Иптіг кӧрімніг чӱллеріне, тізең, анзы кирек чоғыл. Че Худай, тың турыстығ нимес пілдірчеткен чӱллеріне ӧнетін аарлас ползын тіп, ит-ханны хыйға пӱдір салған. ²⁵ Анзын Ол, прайзы удур-тӧдір сағыссырассыннар, ит-ханда чара полағлабазыннар тіп, іди иткен. ²⁶ Аннаңар ит-ханда пірее ле ниме ирееленчетсе, прай пасхазы хадох ирееленче. Пірсі сабланыста полза, пасхалары даа хада ӧрінчелер. ²⁷ Сірер прайзыңар Христостың иді-ханы полчазар. Чара, тізең, Аның чӱллерізер. ²⁸ Тигірибде Худай прайзын постарының орыннарына турғыс салған: пастағылары илҷілер, ікінҷілері ухаанҷылар#, ӱзінҷілері ӱгретчілер. Аннаң андар кӧрзе, піреелеріне Ол хайхастығ кӱс пир салған, ідӧк чазылдырарын, полыс поларын, устап пілерін паза пасха тіллерні пирген. ²⁹ Че прайлары илҷілер бе? Прайлары ухаанҷылар ба? Прайлары ӱгретчілер бе? Прайлары хайхастар итчелер бе? ³⁰ Прайлары имнеп полчалар ба? Пасха тіллернең чоохтан полчалар ба? Прайлары чарыда чоохтапчалар ба? ³¹ Мыннаң улуғ сыйыхтар аларға кӱстеніңер. Мин, тізең, сірерге аннаң артых чол кӧзіт пирем.

Хыныстаңар

¹ Мин кізілернің паза ангеллернің тілінең чоохтасчатсам, че хынызым чох полза, хоғдырапчатхан тӱӱрдең, сыңылапчатхан сыыластаң артых нимеспін. ² Ухааннирым пар полза паза прай чазыттарны пілчетсем, ноо даа піліс алчатхан ползам, тағларны орнынаң тибіредерге кӱс пирчеткен прай киртініс минде полза, че хынызым чох полза, тик-хуруғ кізібін. ³ Пар-чох пайым ӱлеп салзам, иді-ханымны ӧртедерге пир салзам, че хынызым чох полза, мағаа анзында пір дее тузазы чоғыл. ⁴ Хыныс тыстанча, хыныс айапча, хыныс істі-чохтанминча, кӧдірілбинче, кӧкеесімненминче, ⁵ иртінминче, посха ла тартынминча, тыртыстанминча, чабалны сағыста тутпинча, ⁶ чой нимее ӧрінминче, че сын нимее ӧрінче. ⁷ Ол ноо даа нимені сыдас парыбазар. Хыныста киртініс, ізеніс паза тыстаныс хаҷан даа иртіспес.

⁸ Хут пирген сыйыхтар – ухааннас, тіллер паза піліс – иртіс парар. Хыныс, тізең, хаҷан даа тоозылбинча. ⁹ Хайзын-да пілчебіс, хайзын-да ухааннапчабыс. ¹⁰ Толдыразының тузы чит килзе, чарым полчатханы чох пол парар. ¹¹ Мин пала полғанымда, пала чіли чоохтанғам, пала чіли сағынғам, пала чіли тӱптестіргем. Ам, ир пол парғанда, пала оңдайын тастабыстым. ¹² Сағам піс пӱлес сӱлейке ӧтіре кӧрчеткен осхаспыс, сизінчебіс. Андада, тізең, кӧстең кӧске кӧрербіс. Сағам мин ӱзікти кӧрчем, андада, тізең, мині хайди піліп алғаннар, мин ідӧк пілербін. ¹³ Сағам, тізең, піске ӱс ниме халча: киртініс, ізеніс, хыныс. Че хыныс оларның улии полча.

Худай Худының сыйыхтарынаңар

¹ Хынысха чидіңер. Хуттың сыйыхтирына чидердеңер сағыссыра. Улам – ухааннирдаңар. ² Кем таныс нимес тілнең чоохтанча, піреелері аны піл полбинчатханнаңар, ол чазыттарны Худай Худы пастыра асча. Ол кізілерге нимес, Худайға чоохтапча нооза. ³ Кем ухааннапча, тізең, ол кізілерге киртіністерін пиктиріне, ӱтеертеріне паза кӧңнілерін кӧдіреріне чоохтапча. ⁴ Кем таныс нимес тілнең чоохтанча, ол позының худын пиктепче, кем ухааннапча, тізең, ол тигіриб чонын пиктепче. ⁵ Сірерні прайзын тіллернең чоохтанзыннар тіп сағынчам. Че ухааннааны артых поларҷых. Ухааннапчатхан кізі тіллернең чоохтанчатханнаң артых нооза. Итсе, тіллерні тӱптестір пирчетсе, тигіриб улам пик поларҷых. ⁶ Ам, харындастар, мин, сірерзер киліп, таныс нимес тіллернең чоохтанзам, че ол сірерге тӱптестірілбезе паза азых чоох#, алай піліс, алай ухааннас, алай ӱгредіг полбаза, хайдағ туза сірерге полар? ⁷ Кӧзідімге табыс сығарчатхан тыны чох сыыласты алай чатханны алып алза, олар табыстарын кирек чолынҷа апарбазалар, хайдағ кӧг ойнапчатханнарын кем чоохтап полар? ⁸ Пырғы табызы пілдізі чох тапсапчатса, чааҷылар хабызыға хайди тимненерлер? ⁹ Сірернің дее тіллерің ідӧк пілдізі чох сӧстерні адапчатса, ниме тіпчеткеннеріңні хайди піліп аларлар. Сӧстеріңні чил хаап чӧрер. ¹⁰ Тилекейде аймах-пасха тіллер кӧп. Олар пілчеткеннерге прайзына пілдістіглер. ¹¹ Че мағаа олар пір дее ниме таныхтабинчалар. Ол тіллернің пірсінең чоохтанчатхан кізі мағаа чат кізізі, ол кізее дее мин чат чирінең килген кізібін. ¹² Худай Худы пирчеткен сыйыхтарны аларларың тың килчетсе, иң артыхтарын, тигірибні пик идерге полысчатхан сыйыхтарны сурыңар. ¹³ Аннаңар таныс нимес тілнең чоохтанчатхан кізі тӱптестіре чоохтап поларға сыйых алардаңар пазыр. ¹⁴ Мин таныс нимес тілнең пазырчатсам, худым пазырча. Сағызыма анзы туза пирбинче. ¹⁵ Ниме идерге кирек? Худымнаң даа пазырарбын, сағызымнаң даа пазырарбын. Худымнаң даа сарнирбын, сағызымнаң даа сарнирбын. ¹⁶ Син Хут пастыра алғапчатсаң, тоғыртын кірген кізі синің алғапчатханыңа, «аминь#» хайди тіп алзын. Син ниме чоохтанчатханыңны ол оңарбас нооза. ¹⁷ Син чахсы алғапчазың, че пасхазына анзынаң туза чоғыл. ¹⁸ Худайымны алғыстапчам: пасха тіллернең мин сірердең прайзыңардаң кӧп чоохтасчам. ¹⁹ Че тигірибде пасхаларын ӱгредіп, позымның тілімнең пис сӧс чоохтааны таныс нимес тілнең сӱрееліг сӧс чоохтаанымнаң артых полар.

²⁰ Харындастар, сағызыңар палани синінҷе полбазын: чабалға пала осхас полыңар, сағыстарың хоостыра, тізең, теен парған полыңар. ²¹ Чахиинда пазылых нооза: «пу чонға пасха тіллернең, пасха сӧстернең чоохтирбын, че андада даа олар Мині испестер, тіпче Хан Худай»+ 14:21 Кӧр: Пурунғы Молҷағдағы «Исаийнің ухаан чоохтары» (Исаий) кинде 28:11. . ²² Ол оңдайнаң тіллер киртіністіглерге нимес, киртініс чохтарға танығ полча. Ухааннастар, тізең, киртінізі чохтарға нимес, че киртіністіглерге танығ полча. ²³ Прай тигіриб чоны пірге чыыл парза паза прайзы таныс нимес тіллернең чоохтан сыхса, тоғырхылар паза киртініс чохтар сірерзер кірзелер, сірерні, алаах партырлар, тібестер бе? ²⁴ Че хаҷан прайзы ухааннап сыхса, киртініс чох алай тоғыртын кірген кізі оларны истіп салып, позының чазыхтарын пілінер, искен ниме, тізең, аны чарғылир. ²⁵ Ол оңдайнаң аның чӱреендегі чазыттары азыл парча. Ол, тӱңере тӱзіп, Худайға пазырар паза тир «Худай сыннаң даа сірернің аразында». ²⁶ Аннаңар, харындастар, ниме зе? Сірер чыылыс парзар, полғанының на Худайны саблапчатхан сарын, ӱгредіг, тіл азылғаны, тӱптестіріг пар полза – прай ол тигірибні пиктиріне полар. ²⁷ Піреезі таныс нимес тілнең чоохтанчатса, ікӧлең алай аннаң кӧп полза, ӱзӧлең чоохтазыңар, ағаа хоза алынҷа, пір кізі, тізең, тӱптестірзін. ²⁸ Тӱптестірҷең кізі чох полза, тізең, тигірибде сым пол, позыңа паза Худайға ла чоохтан. ²⁹ Ухаанҷылардаң даа ікі алай ӱс кізі чоохтанзын. Пасхалары, тізең, паалазыннар. ³⁰ Пірее пасха кізее, тізең, азылчатса, пастағызы тапсабазын. ³¹ Прайларың ӱгренерлерің паза кӧңнілерің кӧдірерлерің ӱчӱн сірерге хайзыңарға даа изерістіре ухааннирға чарир. ³² Худай оңдай чохтың Худайы нимес, амыр пирчеткен Худай полчатханнаңар, ухааннас хуттары даа ухаанҷыларның холындалар. Ол прай тигіриблерде ах-арығларда андағ. ³⁴ Ипчілер тигіриблерде сым ползыннар. Оларға чоохтанарға чарадылбинча. Моисей Чахиинда оларға холда поларға кирек тіп чоохталча нооза. ³⁵ Оларның пірее нимее ӱгренерлері килчетсе, тізең, аннаңар ибде, хонғаннарынаң сурып алчатсыннар. Тигірибде, тізең, ипчі кізее чоохтазарға килістіре нимес. ³⁶ Худай сӧзі сірердең сыхтыр ба? Алай сірерге ле читкен ме ол?

³⁷ Кем позын ухаанҷы алай Худай Худы тол парған кізібін тіп сананчатса, ол кізі пілзін: мин пасчатхан ниме – ол Худай чахығлары. ³⁸ Кем аны чағын алынминчатса, сірер дее аны чағын албаңар. ³⁹ Ол оңдайнаң, харындастарым, ухааннирға кӱстеніңер, че тіллернең чоохтанарға итчеткеннерге харығ полбаңарох. ⁴⁰ Че итсе дее, прай ниме ипти паза оңдайли поларға кирек.

Христостың тірілерінеңер

¹ Харындастар, мин сірерге чарлаан паза сірер, посха алынып, анда пик турыбысхан Чахсы Хабарны сағыстарыңа кирчем. ² Сірер минің ӱгреткенім хоостыра Чахсы Хабарны сағыстарыңда тутчатсаңар паза ағаа киртіністерің тик-хуруғ полбинчатса, Чахсы Хабарнаңох арачыланып аларзар. ³ Мин позым аны пастабох хайди алынғам, сірерні ағаа іди ӱгреткем нооза: Худай Пічии хоостыра Христос пістің чазыхтарыбыс ӱчӱн ӧл парған. ⁴ Худай Пічии хоостыра Ол, тыхтал парып, ӱзінҷі кӱнінде тіріл парған. ⁵ Соонаң Аны Кифа кӧр салған, анаң он ікі ӱгренҷізі. ⁶ Анаң пір туста пис чӱс артиинаң харындастарыбыс Аны кӧр салғаннар – оларның кӧбізі пу тусха теере изен, че хайзылары ӱреп парғаннар. ⁷ Анаң Иаков, ідӧк прай илҷілер Аны кӧр салғаннар. ⁸ Прайзының соонаң, тізең, тузында тӧрібеен кізі полып, мин Аны кӧргем. ⁹ Мин илҷілернің иң кічиибін, илҷі тіп адаларға даа турыстығ нимеспін. Мин Худай тигірибін сӱргем нооза. ¹⁰ Ам кем полчам, мин Худай паарсазы сылтаанда пол парғам. Худай паарсазы, тізең, тик полбаан. Мин пасха илҷілердең кӧп тоғынғам. Итсе, сынында пу минің тоғызым нимес, че миннең пастыра пирілчеткен Худай паарсазы. ¹¹ Ӧӧні мында: минің ӱгредиим пасха илҷілернің ӱгредиинең пір. Пу ӱгредіге сірер прайзыңар киртін парғазар.

Пістің тірілерібістеңер

¹² Христос ӧліглердең тіріл парған тіп ӱгреділчеткенде, ноға сірернің хай піреелерің ӧліглер тірілбинчелер тіпче полҷаңнар. ¹³ Ӧліглер тірілбинчетселер, Христос таа тірілбеенге килісче. ¹⁴ Христос тірілбеен полза, тізең, пістің ӱгредиибіс тик, киртіністерің дее сірернің тик. ¹⁵ Ағаа хоза, піс тее Худайдаңар чой киречі пол парчабыс. Піс Худай Христосты тірілдірібіскен тіп киречілепчебіс нооза. Ӧліглер тірілбинчеткенде чи зе, Худай Христосты тірілдірбеен пол парча. ¹⁶ Ӧліглер тірілбинчеткеннеңер, Христос таа тірілбеен пол парча. ¹⁷ Христос тірілбеен полза, киртіністерің тик ниме паза сірер алындағыох чазыхтарыңда чӧрчетчезер. ¹⁸ Христосха киртініп ӧлгеннері дее чох пол парғаннар. ¹⁹ Піс Христосха пу ла чуртаста ізенчетсебіс, кізілер пісті прайзынаң тың айирға киректер.

²⁰ Сынында Христос ӧліглердең тірілдіріл парған. Іди Ол соонаң тірілерлернің пастағызы пол парған. ²¹ Ӧлім пір кізінің сылтаанда килген, ӧліглердең тірілері дее пір кізініңӧк сылтаанда пирілген нооза. ²² Прайзы Адамның# тӧлі полчатханнаңар ӧл парча. Че Христостың тӧлі полчатханнары прайзы тіріл парар. ²³ Полғаны ла позының тузында. Пурнада прай нименің пазы полчатхан Христос, анаң, Ол хатабох килер туста, Христостың чоны. ²⁴ Андада прай нименің тоозылғаны полар. Христос прай пастыхтарны, ӱлгӱлерні, кӱстерні чиңіп алар паза Позының хан-ӱлгӱзін# Худай-Пабаа пир салар. ²⁵ Ағаа, прай ыырҷыларын Позының азаа алтына тастабысханынҷа, хан-ӱлгӱзін тударға кирек. ²⁶ Христос чиңен тӱгенҷі ыырҷызы ӧлім полар. ²⁷ Худай Пічиинде чоохталча нооза: «Прай нимені Христостың азаа алтына сал пирер». Че «прай нимені» теені Худайдаңар чоохтабинчатханы пілдістіг. Худай Позы прай нимені Христостың азаа алтына сал пирер нооза. ²⁸ Хаҷан прай ниме Христостың ӱлгӱзінде полза, андада, Оолғы Позын даа Худайның холына пирібізер. Худай андада прай нимее хан-ӱлгӱзін тудар.

²⁹ Ӧліглернің орнына кіреске тӱсчеткен кізілер нимее чидерге сағынча полҷаңнар? Ӧліглер тірілбинче тіпчеткеннері сын полза, нимее олар ӧліглернің орнына кіреске тӱсче полҷаңнар? ³⁰ Піс тее нименің ӱчӱн хыйалда сыбыра чӧрчеткен полҷаңмыс. ³¹ Мин кӱннің дее сай ӧлімнең тоғасчам. Анзы, сірернең хада Хан-пигібіс Христос Иисуста чуртапчатханыма кееркезім осхас, сын киречілезім. ³² Кізі сағызы хоостыра кӧрзе, мин Ефес саарда аңнарнаң кӱрескенімде, ноо туза полған ол мағаа? Ӧліглер тірілбинчеткен полза, чеелер, ізеелер, таңда олох ӧл парарбыстар нооза. ³³ Пос посты алаахтырынмаңар: «чабал кізілернең нанҷыласханы чахсы хылыхтарны ардатча». ³⁴ Пос сағызын алыныңар паза чазых итпеңер. Уйатха, сірернің піреелері Худай пілбинчелер.

Ӧліглернің тірілерінеңер

³⁵ Итсе, піреезі тир: ӧліглер хайди тірілҷең полҷаңнар? Хайдағ ит-ханда чиде саларлар? ³⁶ Сағыс чохтар! Таарылған ӱрен, ӧл парбаанда, тірілбинче. ³⁷ Таарыпчатсаң, полар ӧзімні таарыбинчазың, ӱренні ле, пуғдайнин алай пірее пасхазын таарыпчазың нооза. ³⁸ Че Худай ағаа хынғанни наа кӧрім пирче, полған на ӱренге позынин. ³⁹ Ит-хан пір нимес: кізіни пір, мални, хусти, палыхти пасхох. ⁴⁰ Тигірдегі ит-хан пар, пу чирдегізі парох. Че тигірдегінің паза пу чирдегінің сілии пасха полча. ⁴¹ Кӱннің сілии пасха, айни пасхох, чылтысти пасхох. Чылтыс чылтыстаң сілиинең пасхалалыбохча.

⁴² Ідӧк ӧліглер тірілгені андағох полар: ӧлерге таарылча, ӧлбеске кӧдірілче. ⁴³ Уйан полып таарылча, сабланысха кӧдірілче, кӱс-саа чох таарылча, кӱзінде кӧдіріл килче. ⁴⁴ Тыннығ ит-хан таарылча, хуттығ ит-хан кӧдіріл килче. Тыннығ ит-хан полза, Худай хуттығ ит-хан полыбохча. ⁴⁵ Худай Пічиинде пазылых: пастағы кізі Адам чуртапчатхан тын полған, тӱгенҷі Адам, тізең, тірілдірчеткен хут полча. ⁴⁶ Че Хуттығ ит-хан нимес, тыннығ ит-хан пурнада полча. Хуттығ – соонаң пол парча. ⁴⁷ Пастағы кізі чирдең пӱткен, холнаң чайалған, ікінҷі кізі тигірдең тӱскен Хан-пиг. ⁴⁸ Чирдең пӱткен кізі хайдағ, чирдегілері андағох. Тигірде кізі хайдағ – тигірдегілері андағохтар. ⁴⁹ Піс тее чирдегі кізілернің омазында чӧргебіс, тигірдегі кізінин ал чӧрерӧкпіс.

⁵⁰ Че, харындастарым, мыны чоохтап пирим сірерге: ит паза хан Худай хан-чирін ал полбастар паза тӱген парчатханы мӧгі чуртасха# чидін полбинча. ⁵¹ Мин сірерге чазыт ниме ас пирим: піс прайзыбыс ла ӧлбеспіс, че прайларыбыс алыс парарбыс. ⁵² Кинетін не, харах нууғанҷа, тӱгенҷі пырғы тапсабысса, ӧліглер мӧгі ит-ханнығ турыбызарлар, піс, тізең, алыс парарбыс. ⁵³ Ӧлімніг ит-хан мӧгі ит-ханға айлан парарға кирек. Ӧлер ит-хан ӧлбес ит-хан пол парарға кирек. ⁵⁴ Хаҷан ӧлімніг ит-хан мӧгі ит-ханға айланза паза ӧлер ит-хан ӧлбес ит-хан пол парза, андада Худай Пічиинде пазылғаны толар: «ӧлім чох иділ парған, чиңені полды». ⁵⁵ Ӧлім! Хайда синің чыдаң? Чир тӧбіні, хайда синің чиңізің? ⁵⁶ Ӧлімнің чыдазы, тізең, – чазых, чазыхтың кӱзі – Моисей Чахии. ⁵⁷ Че Хан-пигібіс Иисус Христостың пастыра чиңіс сыйлаан Худайға алғыс ползын. ⁵⁸ Аннаңар, хынған харындастарым, пик сағыстығ, тӧдір пазынмас полыңар. Хан-пигнің алнында сірер итчеткен кирееңер тик полбинчатханын пілчеткеннеріңде, Хан-пигнің киреенде маңнанысха чидіңер.

Сыйых пирерінеңер

¹ Ах-арығларға сыйых чыыпчатсаңар, мин Галат чиріндегі тигіриблерге чахаанни тудыныңар. ² Мин килзем, ахча чыып чӧрбес ӱчӱн, полғаны ла тоғынған ахчазынаң пир поларын позырах сай чыынып одырзын. ³ Мин килзем, тізең, сірер таллап алған кізілеріңні, сірер пиргенін Иерусалимзер апарзыннар тіп, пічіктіг ызыбызарбын. ⁴ Мағаа хада парарға килістіре полза, андада миннең хада парарлар.

Павелнің пӧгіннері

⁵ Мин Македон чирі тобыра парчам, аны иртсем, сірерзер килерім. ⁶ Сірер мині парған чирімзер ӱдес салар ӱчӱн, сірердӧк чуртап алам алай хыстап таа парыбызам. ⁷ Мин сірернең чол парирып ла тоғазып аларым килбинче нооза. Хан-пиг пирзе, сірернең анҷа-мынҷа хада полып аларға ізенчем. ⁸ Ефесте, тізең, мин Иліг кӱн пайрамына+ 16:8 Пу пайрам Па’сха ӱлӱкӱннің соонаң илігінҷі кӱнінде таныхталҷаң, ол арыс сапчаң туста иртчең. теере полып аларбын. ⁹ Минің мында тӱзімніг тоғынып алар оңдайым пар, че ыырҷыларым кӧп. ¹⁰ Сірерзер Тимофей килзе, Ол минӧк чіли, Хан-пигібістің киреен итчеткенінде, ағаа сірерде хорғыс чох ползын тіп, сизініп одырыңар. ¹¹ Аннаңар пірдеезі аны нимее салбин полбазын. Че ол минзер иптіг читсін тіп, амыр-хазых ӱдес салыңар. Мин харындастарымнаң аны сағыпчам нооза. ¹² Аполлос харындастаңар піди чоохтирым: мин аны харындастарынаң хада сірерзер парзын тіп сурынғам. Че ол сағам парарға пір дее ынабаан. Ағаа килістіре тус полза, чидер.

Чахығлар паза алғастар

¹³ Сизіктіг полыңар, киртіністе сыдамах тудыныңар, пик сындырлығ полыңар. ¹⁴ Ниме дее итсеңер, хынып итчедіңер. ¹⁵ Харындастар, мин сірердең сурынчам: Стефанның сӧбірезі Ахай чирінде пастағы киртіністіг кізілер полыбысханнарын паза постарын ах-арығларға чӧрінерге пирін салғаннарын пілче нооңзар. ¹⁶ Оларның чооғын истіңер. Ідӧк оларнаң хада тоғынчатхан паза чӧрінчеткен кізілернің оңдайынҷа полыңар. ¹⁷ Стефанның паза Фортунатнаң Ахаиктің килгеніне мин ӧрінчем. Олар сірернің миннең хада полбинчатханнарыңны толдыр пирділер. ¹⁸ Олар сірернің дее, минің дее кӧңнімні кӧдір салдылар нооза. Андағларны аарлаңар. ¹⁹ Асий чиріндегі# тигіриблер сірерге изен читірчелер. Акила паза Прискилла, ибдегі тигірибінең хада, сірерге Хан-пигде прай кӧңнілерінең изен читірчелер. ²⁰ Прай харындастар сірерге изен читірчелер. Удур-тӧдір охсанызып+ 16:20 Еврей кибірі хоостыра иреннер охсанызып изенесчеңнер. алғыстасчадыңар. ²¹ Минің позымның холымнаң пасчам мыны – Павелнің алғыстазын. ²² Кем Хан-пигібіс Иисус Христосха хынминча – ағаа харғас. Кил, Хан-пигібіс! ²³ Хан-пигібіс Иисус Христостың паарсазы сірернең ползын. ²⁴ Паза минің хынызым сірернең, Христос Иисусха киртінчеткеннернең, хада ползын. Аминь.