Hali Tito

ABEPISKOPI N’ABASASERDOTI.

¹ Paulo, omuhereza wa Mungu, n’entumwa ya Yezu Kristu yo kwolekerera abasozirwe ba Mungu mu kwikiriza na mu bumanyi bw’obukomereza, obukusiha kusoma kuzima, ² nibutuha kutegeza obulame, obwo Mungu atakubeha yatulaganisize kuruga emyaka mingi, ³ namanyisya mu mwanya gwe ekigambo che mu bwolekerezi, obwasigirwe ine, ha bw’ekilagiro cha Mungu omuchunguzi wetu: ⁴ hali Tito, omwana wange mwendwa mu kwikiriza okwo tukobere. Mungu Tata na Yezu Kristu Omuchunguzi wetu bakuhe enema n’omulebo.

⁵ Nkakusiga Krete osemezye ebyasagire kusemezibwa, kandi oteho abasaserdoti mu buli charo chona, nk’omwo nakulagirire: ⁶ nosora atali na ntambala, ayaswere omukazi omo wenka, ali n’abana besigwa, batali b’entungwa mbi hamo bagome. ⁷ Kuba omwepiskopiali no kuburwa ntambala, obw’ali mukuratizi wa Mungu; atabaga mwekuza, nali muzaza, nali musegi w’evini, nali mwangu wo kutera, nali mwegongi w’omugaso gw’ensoni, ⁸ nawe abe w’obwira, mufura, mulengerezi, muronge, mutakatifu, mwesagazi, ⁹ asimbagirire ha bikomereze byo kwikiriza, nk’okwo byayolekererwe, ahiche kuhana mu bwolekerezi buzima no kusinga abahakani.

KURWANA ABOLEKEREZI B’OBUBEHI.

¹⁰ Kuba banamwingi, munomuno mu Bayahudi, bali bagome, baromaromi, bazigi. ¹¹ Hakili obazibire, kuba bakunyarambula kimo amaka gandi, nibolekerera ebitengene, babone omugaso gw’ensoni. ¹² Omo muli bonene, omulagi wabo koto, akatenga nagira ati: Abakrete bali babehi bucha bucha, bali bikaka bibi ebikwenda kulya no kulengahara chonka. ¹³ Ekigambo echo ni cha kimo. Nicho obahanire mani, bekare mu kwikiriza kwa kimo, ¹⁴ bataruba engani z’ekiyahudi n’ebilagiro by’abantu abateg’omugongo obukomereza.

¹⁵ Byona bikwerera abayezire; kai tihaliho ekintu ekiyerera abarofuhere n’abatesigwa, nawe obwenge bwabo n’omutima gwabo zirofuhere. ¹⁶ Bati: tukumanya Mungu, nawe bamwanga mu bikorwa byabo, obwo bali bayaga na bagome, batakuhicha kukol’ekintu kizima n’ekimo.

EMYOLEKERERWE ZA BULI MUNTU.

¹ Nawe iwe, noyolekerere ebihikire obwolekerezi bwa kimo: ² abagurusi baleke kutamira no kusihana, babe betegereza, bagume mu kwikiriza na mu kwenda na mu bweguminsiriza; ³ nikwo n’abakekuru, nobolekerere obutekani, nibaleke kugeya no kunw’evini n’akasagirizo, nawe bahabule kuzima abandi, ⁴ bahiche kwolekerera abakazi abakili kwenda beba n’abana babo, ⁵ no kuba betegereza, bayezi, bezibizi mw’inwa, bachumi b’enzu yabo, bafura, bahulizi ba beba, niho ekigambo cha Mungu kitagaywa.

⁶ Nikwo n’abasigazi, obahanega batatamira. ⁷ Muli byona oyeyoleche iwe omwene nk’endolero y’ebikorwa bizima, mu bwolekerezi na mu mikolere mizima na mu bwesagazi; ⁸ ebigambo byawe bibe bikomereze, bitahicha kwangwa, niho abaturwana bakorw’ensoni, babuzirwe obubi bwo kutugambaho.

⁹ Ogambire abakozi b’emilimo bahulire besebugeni, babasemereze muli byona, batabahakanisya, ¹⁰ bataiba kintu, nawe babe besigwa muli byona, niho bakumure muli byona ebigambo bya Mungu omuchunguzi wetu.

¹¹ Kuba enema ya Mungu, omuchunguzi wetu, yabonekere abantu bona; ¹² netwolekerera kwanga obutasoma n’obwoyi bubi bw’ensi, tutungwe mu nsi munu n’obwesagazi n’obuhikire na kisomi, ¹³ nitulindirira obutegeza bw’omugisa no kwiza kw’ikuzo kwa Mungu mukuru n’okw’Omuchunguzi wetu Yezu Kristu, ¹⁴ ayayeherereze itwe omwene, atuchungule mu mabi gona, atuyeze, tube ihanga lye liyezire, lihikire kwanankurwa, nilitungwa kuzima. ¹⁵ Ogambe ebyo, kai ohane, ohabule n’obuhicha bwona. Leka batakugayaga n’omo.

¹ Obagambire kuhulira abakama n’abakuru mu kilagiro chona, betegekire kukola ebizima byona; ² batageya omuntu, beruke obuhakani, nawe babe batekani, nibafuhalira abantu bona. ³ Kuba itwe twena kara twaliga tuli basiru, bagome, bahabi, beru b’obwegongi bubi bwingi n’amasemererwa mengi, nitutura mu bubi na mw’ichubi, tuhikire kuhatwa, nituhatana.

YEZU KRISTU AKATUGIRA BAHUNGUZI BE. — KWIRUKA OBUHAKANI.

⁴ Nawe obufura bwa Mungu, omuchunguzi wetu, n’obwenzi bwe bw’abantu ka bwabonekere, ⁵ akatuchungula, kuber’ ebikorwa bizima ebyo twakuhikize kukola pai, nawe kuber’ekisa che, natunabya mu buzarwa bwa kabili mu buhimbozi bw’Omwoyo Mutakatifu, ⁶ ogwo yatusesere mwingi ha bwa Yezu Kristu Omuchunguzi wetu, ⁷ niho twamazire kutakatifuzibwa enema ye, tube bahunguzib’obulame obutahwaho, nk’okwo tukutegeza. ⁸ Ni kigambo kikomereze koto, kai nkwenda obagumye mu magambo ago, niho abakwikiriza Mungu batange abandi mu ntungwa nzima. Ebyo ni bigambo bizima, kai bikugasira abantu.

⁹ Nawe noiruke empaka z’ekisazi n’obutonzi bw’enganda, n’enkungana n’obuhakani bw’ekilagiro: obwiruke, kuba ni bwa busa chonka, kai tibugasa kintu. ¹⁰ Noihemo omuhakani, wamuhanire lumo na kabili, ¹¹ omanyire okw’omuntu nk’ogwo atyo ali mubi, nahena, asingirwe elamu ya wenene omwene.

¹² Ka ndamara kukutumira Artemasi hamo Tikiko, iza bwangu hal’ine Nikopoli; kuba okwo niyo netegekire kumara ekitiko. ¹³ Ochume kuzima olugendo lwa Zenasi, omubuya w’ebilagiro, n’olw’Apolo, bataburwa kintu.

¹⁴ Abetu bona bamanyega kwebembera abandi mu bikorwa bizima, ka bilagirwe, bataba nzira birabo. ¹⁵ Abali n’ene bona bakukubwacha. Obwachega abakutwenda mu kwikiriza. Enema ya Mungu ebe n’emwe mwena. Amina.