Ha Banaroma

OBUTUMWA BWA PAULO.

¹ Paulo, muhereza wa Yezu Kristu, akwetwa Ntumwa, ayasororerwe Evanjeli ya Mungu, ² eyo yaliga alagire mbele n’abalagi mu Nandiko Ntakatifu, ³ eby’ Omwana we, ayamuzalirwe mu luganda lwa Daudi, ha bw’engingo; ⁴ ayanyamirwe abe Mwana wa Mungu mu mani, ha bw’omwoyo gw’obutakatifu, kubera kuzoka kwe mu bafu, Yezu Kristu, Omukama wetu, ⁵ ayatuhere enema n’obutumwa, niho amahanga gona gahulire kwikiriza, mw’izina lye; ⁶ muli bonene imwe mwena mulimo, obwo mwayesirwe Yezu Kristu: ⁷ hali banu bona abali Roma, abendwa ba Mungu, abakwetwa batakatifu. Enema ebe n’emwe n’omulebo, ogukuruga hali Mungu, Tata wetu, n’Omukama Yezu Kristu.

OMWEGONGI BWE BWO KUZA ROMA.

⁸ Ka ntandike kusima Mungu wange, ha bwa Yezu Kristu, ha mwanya gwanu, obwo kwikiriza kwanu kukumanywa mu nsi zona. ⁹ Kuba Mungu, owe nkukolera mu mwoyo gwange mw’Evanjeli y’Omwana we, ni mbona yange y’okwo nkubezuka obutayosa ¹⁰ mu sala zange, ninsaba bucha bucha mbone omwanya, Mungu k’alayenda, gwo kubahikaho. ¹¹ Kuba nkwegonga kubabona, mbabonere enema y’omwoyo, mpiche kubagumisya; ¹² nikwo kugira nti: niho, tukaba hamo twena, kuhumuzanya mu kwikiriza kwetu, okwo tukobere. ¹³ Mbe, bana betu, tinkwenda mubule kumanya okwo netegekire kengi kubagendaho, ninzibirwa kuhika lero, mbone ebirabo na mul’imwe, nka mu mahanga gandi. ¹⁴ Nkutongwa Abagereki n’Abanamahanga, ab’obwenge n’abatakumanya kintu. ¹⁵ Hatyo, ha bwange, nkwegonga kubolekerera Evanjeli, imwe mwena abali Roma.

KWIKIRIZA MUNGU NA YEZU KRISTU.

¹⁶ Kuba ine tinkukorerw’ensoni Evanjeli: kuba niyo eli mani ga Mungu, agakuchungura abakwikiriza bona, kutandikira ha Bayahudi, kandi n’Abagereki. ¹⁷ Kuba ekusurura obuhikire bwa Mungu, obukuruga mu kwikiriza nibumalizibwa muli kwonene, nk’okwo chandikirwe kiti: Omuzima akutungwa kwikiriza. ¹⁸ Hatyo ebiniga bya Mungu bikuruga mw’igulu nibigwera obutekiriza n’obutahikire bw’abantu abakuyangira obumanyi bwa Mungu mu butahikire; ¹⁹ kuba ebya Mungu ebikumanywa byabatulirwa; Mungu wenene niwe yababimanyisize. ²⁰ Kuba ebitakubonwa muli wenene bikabonekera kurug’obuhangi bw’ensi mu bumanyi bw’ebihangwa; nikwo n’obuhicha bwe bw’era lyona na bumungu bwe: mbe hatyo tibali na nsonga, ²¹ obwo, bamanyire Mungu, bakabura kumuha ikuzo limuhikire, nibabura kumusima; nawe nibatumatuma mu bitekateko byabo, kai omutima gwabo nigusara nigwizura omwirima. ²² Nibegira betegereza, kunu basiruhere; ²³ nibahindura ikuzo lya Mungu atahinduka, kikaba kisusano ch’omuntu muhinduki, n’ech’enoni, n’ebintu by’amaguru ana, n’ech’enzoka. ²⁴ Nicho Mungu yabanagirire obwegongi bw’omutima gwabo n’obusihani, hatyo nibehemura abene ha ngingo zabo, ²⁵ kuba bakahindura obukomereza bwa Mungu kuba bubehi, nibahabudu nibakolera ekihangwa ha mwanya gw’Omuhangi, akukuzibwa mu myaka n’emyaka. Amina.

ENTUNGWA MBI Z’ABASENZI.

²⁶ Nicho Mungu yabasindikirire mu bwoyi bw’ensoni; kuba abakazi babo bakaleka kukola ebyo batura nibakola, bakole ebitakorwa. ²⁷ Nikwo batyo n’abaseza, bakaleka kukola n’omukazi nk’ebilagirwe, nibaligirana abene bonka, nibakola eby’ensoni, abaseza n’abaseza, nibahabwa batyo muli bonene omuhero oguhikire obuhabi bwabo. ²⁸ Mbe obwo babuzire kwoleka okwo bamanyire Mungu, Mungu nabasindika mu ntungwa z’obuyaga, nibakola ebitengene: ²⁹ bezwire obubi bwona, obuyaga, obusihani, obununu, obuhungu; bezwire ichubi, obwisi, enkungana, obuzigi, entungwa mbi; bali bachwelerezi, ³⁰ babehereza, bahate ba Mungu, b’olubwa, bekuza, b’echemo, bazumbuzi bw’obubi, bagome b’abazere, ³¹ basiru, batali na nsoni, nali bwenzi nali kisa. ³² Naho bamanyire obuhikire bwa Mungu, tibasombokerwe okw’abakukola ebyo bahikire kufwa, kai abakubikora bonka pai, nawe n’abakusima abakubikora.

ABATAKWIKIRIZA TIBALI NA NSONGA. — MUNGU TASORARA MUNTU.

¹ Nicho otali na nsonga, iwe muntu wena, akulamul’abandi; kuba okalamul’abandi, okwesinga iwe omwene, obw’okukola eby’okulamula. ² Kuba tukumanya okwo Mungu akulamula mu bikomereze abakukol’ebyo. ³ Si, iwe akulamula abakukol’ebyo bityo, kai iwe wena nobikola, okuchwa oti: okukira ha bulamuzi bwa Mungu? ⁴ Si okugaya obufura n’obwesagazi n’obusasizi bwe bwingi muno? Si obure kumanya okw’obufura bwa Mungu bukukusindika kutamwa? ⁵ Nawe obugume bwawe n’omutima gwawe ogutatamirwe bikukanisya ebiniga ebilikwizira ha lunaku olwo ebiniga bilikusokorerwa mu bulamuzi buhikire bwa Mungu, ⁶ alihera buli muntu wena ha bw’ebikorwa bye: ⁷ abakuguma mu bikorwa bizima nibahiga ikuzo n’isima n’obutafwa, alibaha obulame obutahwaho; ⁸ kai abali n’omwoyo gw’obuhakani, abakwanga kwikiriza obukomereza, nawe nibaruba obutahikire, alibehoza ebiniga n’obubihirirwa.

⁹ Obunale n’obuhahi bulizira buli muntu wena akukol’ amabi: wo kutandika, Omuyahudi, kandi Omugereki; ¹⁰ nawe ikuzo n’isima, n’omulebo bilizira buli muntu wena akukola kuzima: wo kutandika, Omuyahudi, kandi Omugereki. ¹¹ Kuba Mungu tasorora muntu.

¹² Hatyo bona abaliba bahenire batali n’Ekilagiro, balibura batali n’Ekilagiro; kai bona abaliba bahenire bali n’Ekilagiro, balilamurwa n’Ekilagiro. ¹³ Kuba abahikire h’ameso ga Mungu t’abo abahuliz’Ekilagiro, nawe abakuhich’Ekilagiro nibo bakuba bahikire. ¹⁴ Mbe abasenzi, abatali n’Ekilagiro, ka bakukola chonka ebilagirwe Ekilagiro, naho batali n’Ekilagiro, bali bonene kilagiro; ¹⁵ bakwoleka okw’omulimo gw’Ekilagiro gwandikirwe mu mitima zabo, obwo ilaka ly’emitima zabo likubamanyisya, n’obw’ebitekateko byabo lunaku bikubalega, lunaku bikubakingiriza: ¹⁶ ebyo bilimanyisibwa, ha bw’Evanjeli yange, olunaku olwo Mungu alilamura, ha bwa Yezu Kristu, ebiserekire by’abantu.

OBUBI BW’ABAYAHUDI.

¹⁷ Nawe, iwe akwetwa Muyahudi, akuhumulira mu Kilagiro, akwekuhya hali Mungu, ¹⁸ akumanya kwenda kwe, akuhicha kusorora ebisasire muno, obwo wayegesibwe Ekilagiro, ¹⁹ okwekuhya nogira oti: ndi muhabuzi w’abahume, lumuli lw’abali mu mwirima, ²⁰ mwolekerezi w’abatakumanya, musomesya wa banamuto, kandi ndi n’olulengo lw’obumanyi n’obukomereza mu Kilagiro. ²¹ Mbe iwe, akwolekerer’abandi, toyeyolekerera iwe omwene; okwolekerera oti: otaibaga, kai okwiba; ²² okugira oti: otasihanaga, kai okusihana; okusesemukwa ebimungu, kai okuzuma Mungu; ²³ okwekuhya mu Kilagiro, kai okugora Mungu n’obutambuki bw’ebilagiro. ²⁴ Kuba izina lya Mungu, kubera imwe, likuzumwa mu mahanga, nk’okwo chandikirwe.

KUSARA KWONKA TIKUHICHA KUCHUNGUL’ABAYAHUDI.

²⁵ Kusara kukugasa nikwo, raba nohich’ebilagiro; nawe raba notambuk’ebilagiro, okusana oti henda tosazirwe. ²⁶ Mbe raba omuntu atasazirwe akuhich’ebilagiro, si, naho atasazirwe, takubarwa nk’asazirwe? ²⁷ Kai atasazirwe, akahich’ebilagiro, talikusinga iwe ayaherwe ebigambo by’Ekilagiro no kusara, okatambuk’ebilagiro? ²⁸ Kuba Omuyahudi wa kimo ti wa ha bweru, kai kusara kwa kimo ti kwa ha bweru kwo mu ngingo: ²⁹ nawe Omuyahudi wa kimo ni wo mu nda, kandi kusara kwa kimo ni kw’omutima, okukorwa ha bw’omwoyo, nawe ha bw’ebigambo by’Ekilagiro pai; ogwo ikuzo lye tiliruga mu bantu, nawe hali Mungu.

OMUGASO GW’ABAYAHUDI.

¹ Mbe hatyo kuba Muyahudi kukugasa ki? kai omugaso gwo kusara? ² Omugaso ni mwingi, kai gw’enganda ningi: echo kutandika, kuba nibo bakubika ebigambo bya Mungu. ³ Nibihirwe raba abandi muli bonene batekirize! si obutekiriza bwabo bulimara obwesigwa bwa Mungu? Waza! pai. ⁴ Mungu ni mukomereza, kai buli muntu ni mubehi, nk’okwo chandikirwe kiti: Niho bamanye okw’oli mukomereza mu bigambo byawe, kai osinge, ka balakulamula chonka. ⁵ Nawe raba obubi bwetu bukwatura obuhikire bwa Mungu, kai tugambe ki? Si Mungu tali muronge, obw’akutunigahalira? ⁶ (Nkutenga kinamuntu). Kikabure! bikaba bityo, Mungu yakulamwire ata si ensi enu? ⁷ Nawe obubehi bwange bukayatura kukiraho obukomereza bwa Mungu, abone ikuzo lye, kai ine nkulamulirwa ki nk’omubehi? ⁸ Kandi kubaki tutakukozire amabi, niho amazima garugemo (nk’okwo abandi batubehereza kugamba tutyo)? Abo balisingwa kihikire.

ABANTU BONA BAHABIRE.

⁹ Ni ki? si tukubakira? Na kake; kuba twamazire kwolecha okwo bona, Abayahudi n’Abagereki, batwerw’ekiheno; ¹⁰ nk’okwo chandikirwe kiti: Taliho n’omo ahikire. ¹¹ Ow’obwenge taliho, akuhiga Mungu taliho. ¹² Bona bahabire, babere bona banantagasa; taliho akukola kuzima, taliho n’omo. ¹³ Omumiro gwabo ni kituro kitafundikire; bakuziga n’endimi zabo; obusungu bw’enzoka bul’ifwo y’eminwa zabo. ¹⁴ Omunwa gwabo gwizwire ebizumi n’obusalizi. ¹⁵ Amaguru gabo gakwanguha kuses’ensagama. ¹⁶ Obunale n’obunaku buli mu mihanda zabo, ¹⁷ kai tibakumanya omuhanda gw’omulebo. ¹⁸ Obutini bwa Mungu tibuli mu meso gabo. ¹⁹ Nawe tukumanya okwo byona ebilagirwe Ekilagiro bilagira abakugererwa Ekilagiro, niho buli munwa gubuze, kai buli muntu ahulire Mungu; ²⁰ kuba taliho muntu n’omo alitakatifuzibwa ebusyo ye ebikorwa by’Ekilagiro, obwo Ekilagiro nicho kikumanyisya ekiheno.

ABANTU BONA BAKUTAKATIFUZIBWA KWIKIRIZA MULI YEZU KRISTU.

²¹ Nawe hati, Ekilagiro kitaliho, obuhikire bwa Mungu, obwamanyisibwe Ekilagiro n’abalagi, bwayaturwa. ²² Mbe obuhikire obukuruga hali Mungu, ha bwo kwikiriza Yezu Kristu, bukwizira bona abamwikiriza. Kuba tibakirene: ²³ bona bakahena, kai babuzirwe ikuzo lya Mungu, ²⁴ nibatakatifuzibwa enema ye busa chonka, ha bw’obuchunguzi obuli muli Yezu Kristu, ²⁵ owe Mungu atereho abe bulihi, ha bwo kwikiriza mu nsagama ye, ayoleke obuhikire bwe nakiz’ebiheno bya kara, ²⁶ ebyo Mungu yayemere n’obweguminsiriza, ayoleke obuhikire bwe mu naku za hati, amanyisye okwo wenene ahikire n’okw’atakatifuza ali no kwikiriza muli Yezu Kristu. ²⁷ Mbe okwekuliza ki? Nangu. Mu kilagiro ki? Ech’ebikorwa? Pai; nawe mu kilagiro cho kwikiriza. ²⁸ Kuba tukuchwa tuti: Omuntu akutakatifuzibwa kwikiriza, nzira ebikorwa by’Ekilagiro. ²⁹ Si Mungu ni Mungu w’Abayahudi bonka? tali Mungu w’Abanamahanga bona? Yee, wena aba Mungu w’Abanamahanga bona. ³⁰ Kuba Mungu n’omo wenka, niwe akutakatifuza abasazirwe mu kwikiriza, n’abatasazirwe mu kwikiriza kwonene. ³¹ Mbe hatyo si tukumarayo Ekilagiro no kwikiriza? Kikabure! nawe tukugumy’Ekilagiro.

IBRAHIMU AKATAKATIFUZIBWA KWIKIRIZA KWE.

¹ Mbe hatyo tugambe tuta? tata Ibrahimu akabona ki, ha bw’engingo? ² Kuba Ibrahimu, akatakatifuzibwa ebikorwa, akuhicha kwesima, nawe ha bwa Mungu pai. ³ Enandiko zikugamba ki mbele? Ziti: Ibrahimu akekiriza Mungu, kai echo kikamubalirwa nk’ibanza. ⁴ Mbe akukol’omulimo, omuhero taguhabwa nk’obugeni, nawe nk’ibanza. ⁵ Kandi atakukola, nawe akekiriza omutakatifuza w’omuheni, kwikiriza kwe kukumubalirwa nk’ibanza, n’okwo omuku gw’enema ya Mungu guli. ⁶ Nikwo Daudi akutenga, k’akugamba omugisa gw’omuntu akusemerezya Mungu, nabalirwa obuhikire, atali n’ebikorwa, ⁷ nagira ati: Bali n’omugisa abakizibwe entambala zabo, n’abo ebiheno biswekirwe. ⁸ Ali n’omugisa owe Mungu atamubalire ekiheno.

IBRAHIMU N’ISE ABAKWIKIRIZA BONA.

⁹ Nawe si omugisa ogwo ni gw’abasazirwe bonka, nangu ni gw’abatasazirwe bona? Mbe twagamba tuti: kwikiriza kwa Ibrahimu kukamubalirwa nk’ibanza. ¹⁰ Hatyo kukamubalirwa kuta? Yasazirwe, nangu atasazirwe? Yasazirwe pai, nawe atakasazirwe. ¹¹ Hatyo akahabwa olunyamo lwo kusara nk’ekimanyisyo ch’obuhikire bwo kwikiriza, obwo yaliga ali nabwo atakasazirwe, abe ise abakwikiriza bona batasazirwe, niho kwikiriza kwabo kubabalirwe nk’ibanza; ¹² hona abe ise abasazirwe, abataherwe kusara chonka, nawe abakuruba omuhanda gwo kwikiriza, okwo tata Ibrahimu yaliga ali nakwo atakasazirwe.

¹³ Kuba omulago ogwo Ibrahimu yaherwe, hamo oluganda lwe, gwo kuhungul’ensi, tigwahikizibwe Ekilagiro, nawe obuhikire bwo kwikiriza. ¹⁴ Raba Ekilagiro nicho kikubagira bahunguzi, kwikiriza tikukigasa, n’omulago gwona tigukiliho. ¹⁵ Kuba Ekilagiro kikuleta ebiniga: ekilagiro kitaliho, tibakitambuka. ¹⁶ Mbe ekihungulo kikuruga mu kwikiriza, niho omulago gwizire busa chonka oluganda lwona, abaherwe Ekilagiro bonka pai, nawe hona abali no kwikiriza kwa Ibrahimu, tata wetu twena, ¹⁷ (nk’okwo chandikirwe kiti: Nkakugira ise amahanga mengi) ebusyo ya Mungu, owe yekirize, akuzor’ abafu, nayeta ebitaliho nk’ebiliho. ¹⁸ Ka yategeze, obutegeza butaliho, akekiriza kubera ise amahanga mengi, nk’owo chaliga kimugambirwe kiti: Obuzare bwawe buliba butyo. ¹⁹ Tiyanogire mu kwikiriza, tiyetegereze okw’engingo ze zaliga zyafwire, obwo yaliga ali n’emyaka kuti igana, n’okwo Sara yaliga atakihicha kuzara. ²⁰ Tiyatimatimize omulago gwa Mungu, akabula kugwikiriza, nawe akeguminsiriza mu kwikiriza, nakuza Mungu, ²¹ obwo yamanyaga okw’ali n’obuhicha bwo kukola ebyo yalagire. ²² Nich’echo chamubalirirwe nk’ibanza. ²³ Nawe tichandikirwe kubera wenene wenka, kiti: Kikamubalirwa nk’ibanza, ²⁴ nawe kubera itwe twena, abalibalirwa batyo, itwe abakwikiriza ogwo, ayazozile mu bafu Yezu Kristu, Omukama wetu, ²⁵ ayaherezibwe kuber’ebiheno byetu, nazoka, atutakatifuze.

TUKUTEGEZA KUBA MUNGU AKUTWENDA.

¹ Obwo twatakatifuzibwe kwikiriza, tube n’omulebo na Mungu, ha bw’Omukama wetu Yezu Kristu, ² ayatubonere, ha bwo kwikiriza, kuhika mu nema egyo, eyo tugumiramo, no kwesima mu butegeza bw’ikuzo bw’abana ba Mungu. ³ Echo chonka pai, nawe tukwesima na mu busasi, obwo tukumanya okw’obusasi bukuleta obweguminsiriza; ⁴ kai obweguminsiriza bukuleta obugume, kandi obugume bukuleta obutegeza. ⁵ Mbe obutegeza tibuzigaga, kuba obwenzi bwa Mungu bukaseserwa mu mitima zetu ha bw’Omwoyo Mutakatifu, ogwagabirwe itwe. ⁶ Mbe kubaki, aho twaliga tukinogire, Kristu yafwerere abaheni mu mwanya gwingene? ⁷ Omuntu akufwer’omuhikire raba; hamo omuntu yakuhikize kufwer’ omuzima. ⁸ Nawe Mungu akwolech’obwenzi bwe hal’itwe, obwo, mu mwanya gwingene, naho twaliga tukili baheni, ⁹ Kristu yatufwerere. Mbe munomuno hati, aho twatakatifuzibwe mu nsagama ye, alituchungura ha biniga. ¹⁰ Kuba, aho twaliga tuli bahate, raba nitugorozanya na Mungu ha bwo kufwa kw’Omwana we, munomuno tulichungurwa obulame bwe, twamazire kugorozanya. ¹¹ Kai echo chonka pai, nawe hona tukwesima hali Mungu ha bw’Omukama wetu Yezu Kristu, ayatubonere hati obugorozanya.

ADAMU NA KRISTU.

¹² Hatyo, nk’okwo kuber’omuntu omo ekiheno chatahira mu nsi, kai olufu lukaletwa ekiheno, nikwo olufu lukahikira abantu bona, kuber’omuntu ogwo, owe bona bahenere muli wenene. ¹³ Kuba kuhika ha Kilagiro ekiheno chaliga kili mu nsi, nawe ekiheno chaliga kitabalirwa, obwo Ekilagiro chaliga kitakabere. ¹⁴ Mbe nawe olufu lukatwara kuruga Adamu kuhika Musa, nilutwara n’abaliga batahenire ekiheno chezabo ech’Adamu, ali kisusano ch’aliza. ¹⁵ Nawe omugabo tiguli nk’ekiheno; kuba, raba bengi bakafwa kuber’ekiheno ch’omo wenka, kai kuta! enema n’engabirano za Mungu zikezula mu bengi kuber’enema y’omuntu omo wenka, niwe Yezu Kristu! ¹⁶ Kandi omugabo tiguli nk’ekiheno kinagumo; kuba elamu ekiheno kimo kikaba busingwa, nawe kai enema ekutakatifuza, naho ebiheno bikaba bingi. ¹⁷ Mbe raba olufu lukatwara ha bw’omo kuber’ekiheno ch’omo wenka, kai kuta abakuhabwa obwingi bw’enema n’engabirano n’obuhikire, abalitwara mu bulame ha bw’omo wenka, niwe Yezu Kristu. ¹⁸ Mbe hatyo, nk’okwo abantu bona bakusingwa kuber’ekiheno ch’omo wenka, nikwo hatyo abantu bona bakutakatifuzibwa nibahabwa obuzima, kuber’obuhikire bw’omo wenka. ¹⁹ Kuba, nk’okw’obutahulira bw’omuntu omo bwagizire bengi babe baheni, nikwo hatyo n’obuhulirizi bw’omo buligira bengi babe bahikire. ²⁰ Mbe ekilagiro kikeza, entambala ekane. Nawe aho entambala ekanire, nimwo enema ekanire kukiraho, ²¹ niho, nk’okwo ekiheno kitwele mu lufu, nikwo hatyo n’enema etwale mu buhikire, tubone obulame obutahwaho, ha bwa Yezu Kristu Omukama wetu.

OMUKRISTU AYEFWERERE MU KIHENO ALAGIRWE KUKOLERA MUNGU WENKA.

¹ Hatyo si aho tugambe tuta? Si twikare mu biheno, niho enema ekane? ² Kikabure! Kuba itwe abefwerere kimo mu kiheno, tukusuba kukizagiramo tuta? ³ Si timukumanya okw’itwe twena ababatizibwe muli Yezu Kristu, tukabatizibwa mu kufwa kwe? ⁴ Kuba tukazikwa nage mu batisimu, tufwe, niho, nka nikwo Kristu yazokire mu bafu ha bw’ikuzo lya Tata, nikwo hatyo n’etwe tulibatire mu bulame buhya. ⁵ Kuba, raba twabatikirwe muli wenene mu lufu lumo, nikwo tuliba tutyo na mu kuzoka hona; ⁶ tumanyire okw’omuntu wetu wa kara yalegirwe ha musalaba nage, niho engingo z’ekiheno zisingarike, tutasuba kuba beru b’ekiheno. ⁷ Kuba ayafwire, yehukire mu kiheno. ⁸ Mbe raba twafwire na Kristu, hona tukwikiriza okwo tulilama na Kristu, ⁹ nitumanya okwo Kristu ayazokire mu bafu takisuba kufwa n’okw’olufu tilukisuba kumutwala. ¹⁰ Kuba kufwer’ekiheno akafwa lugendo lumo lwonka; nawe kulora, akulora kubera Mungu. ¹¹ Nikwo n’emwe, mwesusanisye nk’abefwerere mu kiheno, nawe nimulore kubera Mungu muli Yezu Kristu Omukama wetu, ¹² engingo z’amafwerezi zinu zitatwarwa ekiheno, mukahulira kwoya kubi kwazo. ¹³ Kandi mutasindikira ekiheno engingo zanu, kikazigira bikwato by’obubi; nawe mwehereze hali Mungu, nk’abakulora abarugire mu lufu, nimuhere Mungu engingo zanu, azigire bikwato by’obuhikire. ¹⁴ Kuba ekiheno tikiliba n’amani hal’imwe, obwo mutakitwerw’Ekilagiro, nawe enema. ¹⁵ Mbe kuta? si tuhene, obwo tutakitwerw’Ekilagiro, nawe enema? Kikabule!

OMUGASO GWO KUKOLERA MUNGU.

¹⁶ Si timukumanya okwo, mukegira beru b’owe mukuhulira, muli beru b’owe mukuhulira, kamba b’ekiheno mubone olufu, kamba b’obuhulizi mubone obuhikire? ¹⁷ Nawe Mungu asimwe, obwo mwarugire mu bwiru bw’ekiheno n’obwo mwahulire mu mutima obwolekerezi obwo mwayolekererwe. ¹⁸ Mutyo mukachungurwa mu biheno, nimugirwa beru b’obuhikire. ¹⁹ Nkutenga kinamuntu, kuber’obunoge bw’engingo zanu. Kuba, nka nikwo mukahereza engingo zanu ha busihani na ha bubi nimuhena, nikwo hati nimuzihereze, mukore nazo obuhikire, niho muhiche kutakatifuzibwa. ²⁰ Kuba, aho mwaliga mukili beru b’ekiheno, mwaliga mutatwerwe obuhikire. ²¹ Mbe aho mukagasirwa ki ebyo mukukorw’ensoni hati? kuba obusubiro bwabyo nilw’olufu. ²² Nawe hati muchungwirwe mu kiheno, mugizirwe beru ba Mungu, mbe omugaso bwanu ni butakatifu, kai obusubiro bwanu, obulame obutahwaho. ²³ Kuba omuhero gw’ekiheno nilw’olufu; nawe omugabo gwa Mungu nibw’obulame obutahwaho, muli Yezu Kristu Omukama wetu.

ABAKRISTU TIBAKILAGIRWE EDINI Y’ABAYAHUDI.

¹ Si timukumanya, bana betu, (kuba nkutengera abakumanya Ekilagiro), okwo ekilagiro kili n’obuhicha ha muntu akilora chonka? ² Hali nk’omukazi aswerwe: asumikirwe ekilagiro, iba akiliho; nawe iba akafwa, akusurumurwa mu kilagiro ch’omuseza. ³ Hatyo, iba akiliho, akakola n’omuseza ondi, ni bukwate; nawe iba akaba afwire, asurumwirwe mu kilagiro, mbe ti bukwate, naho akakola n’omuseza ondi. ⁴ Nikwo n’emwe, bana betu, mwefwerere mu Kilagiro ha bw’engingo za Kristu, niho mube hali ondi ayazokire mu bafu, turabire Mungu ebirabo. ⁵ Kuba, aho twaliga tuli mu ngingo, obwoyi bw’entambala, obwaletwaga Ekilagiro, bwaliga niburabya mu ngingo zetu ebirabo by’olufu. ⁶ Nawe hati, obwo twasurumwirwe mu Kilagiro ch’olufu, nimwo twekazibwaga, tukukola mu buhya bw’omwoyo, kai mu bukokoro bw’enuguta pai.

EKILAGIRO KIKUMANYISYA EBIHENO.

⁷ Mbe hatyo tugambe ki? Si ekilagiro ni kiheno? Kikabule! Nawe tinamanyire ekiheno, hatali mu kilagiro; kuba tinakumanyire kuligira kw’engingo, ekilagiro kitaba kugamba kiti: Otaligiraga. ⁸ Nawe ekiheno chabwene omwanya mu kilagiro, nikinsindika mu kuligira kw’enganda ningi; kuba ekilagiro kikaba kitaliho, ekiheno chakufwire. ⁹ Mbe ine kara naliga nintula ntali na kilagiro; nawe ka chezire, ekiheno kikahimboka, ¹⁰ kai ine ninfwa; hatyo ekilagiro, echaliga kili no kumpa obuzima, chandetere olufu. ¹¹ Kuba ekiheno chabwene omwanya mu kilagiro, nikinkongya nikinita. ¹² Nikwo Ekilagiro ni kitakatifu, kai ebilagiro ni bitakatifu, bihikire, bizima. ¹³ Hatyo si ekizima chamberere lufu? Kikabule! Nawe ekiheno chandetere olufu ha bw’ekizima, kibonekane okwo kili, nikiba, ha bw’ekilagiro, oburugo bw’ebiheno bingi.

ENGINGO ZIKURWANA OMWOYO.

¹⁴ Mbe tukumanya okwo ekilagiro kili kinamwoyo; nawe ine ndi munangingo, nguzirwe wo kutwarw’ekiheno. ¹⁵ Kuba echo nkukola, tinkukimanya: ekizima echo nkwenda, tinkukikola; nawe ekibi echo nkuhata, nkukikola. ¹⁶ Mbe raba ninkola echo ntakwenda, nkukunda ekilagiro, nti: ni kizima. ¹⁷ Hatyo t’ine akukola echo, nawe ekiheno ekitula mul’ine. ¹⁸ Kuba nkumanya okw’obuzima butatura mul’ine, nikwo kugira nti: mu ngingo zange: kuba kwenda, nkuhicha; nawe kukola kuzima, tinkuhicha. ¹⁹ Kuba tinkukola ekizima echo nkwenda, nawe nkukola ekibi echo ntakwenda. ²⁰ Mbe raba ninkola echo ntakwenda, t’ine akukikola, nawe ekiheno ekitula mul’ine. ²¹ Ka nkwenda kukola kuzima, nkusanga mul’ine ekilagiro ekinzibira, kuba obubi butula mul’ine. ²² Kuba nkusemererwa ebilagiro bya Mungu, ha bw’omuntu wo mu nda; ²³ nawe nkusanga mu ngingo zange ekilagiro kindi, ekikurwana ekilagiro ch’omwoyo, nikinsumika mu kilagiro ch’ekiheno ekili mu ngingo zange. ²⁴ Ine muntu munale w’abandi! ni ga alinchungula mu ngingo zinu z’amafwerezi? ²⁵ Enema ya Mungu, ha bwa Yezu Kristu Omukama wetu. Mbe hatyo ine mu mwoyo nkuhulira ebilagiro bya Mungu; nawe mu ngingo nkuhulira ebilagiro by’ekiheno.

OMUKRISTU ALI NO KURUBA ENTUNGWA ZA YEZU KRISTU.

¹ Mbe hatyo tibalisingwa abali muli Yezu Kristu, abatatungwa kinangingo; ² kuba ekilagiro ch’omwoyo gw’obuzima muli Yezu Kristu chanchungwire mu kilagiro ch’ekiheno n’ech’olufu. ³ Kuba echaliga kitahikibwa Ekilagiro, obwo chanogibwaga engingo, Mungu akakihicha, natuma Omwana we mu ngingo zyezabo ez’ekiheno, nasinga ekiheno mu ngingo kuber’ekiheno, ⁴ niho obuhikire bw’ekilagiro buhikibwe mul’itwe, abatatungwa kinangingo, nawe kinamwoyo. ⁵ Kuba abakutungwa kinangingo bakunulirwa eby’engingo; nawe abakutungwa kinamwoyo bakunulirwa eby’omwoyo. ⁶ Mbe obwetegereza bw’engingo ni lufu; nawe obwetegereza bw’omwoyo ni buzima n’omulebo. ⁷ Kuba obwetegereza bw’engingo buhatene na Mungu, obwo butahulira ebilagiro bya Mungu, kai butakuhicha kubihulira. ⁸ Mbe abakutungwa kinangingo tibakuhicha kusemereza Mungu. ⁹ Nawe imwe timuli mu ngingo, nawe mu mwoyo, raba Omwoyo gwa Mungu nigwo gutura mul’imwe. Kuba omuntu akaba atali n’Omwoyo gwa Kristu, tali we. ¹⁰ Nawe raba Kristu natura mul’imwe, engingo hatyo zifwire ha bw’ekiheno, nawe omwoyo gukulora ha bw’obuhikire. ¹¹ Kandi raba Omwoyo gw’azozile Yezu mu bafu nigutura mul’imwe, ayazozile Yezu Kristu mu bafu aliha engingo zanu z’amafwerezi obuzima, ha bw’Omwoyo gwe ogutura mul’imwe. ¹² Mbe, bana betu, tituli n’ibanza ha ngingo, tukatungwa kinangingo. ¹³ Kuba mukatungwa kinangingo, mulifwa; nawe mukesy’omwoyo ebikorwa by’engingo, mulilama.

TULI BANA BA MUNGU.

¹⁴ Kuba bona abakuhaburwa Omwoyo gwa Mungu ni bana ba Mungu. ¹⁵ Kuba timwaherwe omwoyo gw’obwiru, mwikare mu butini; nawe mukahabwa Omwoyo, ogubagira bana, niho muhiche kugamba muti: Abba, Tata. ¹⁶ Omwoyo gwonene gukumanyisya omwoyo gwetu okwo tuli bana ba Mungu. ¹⁷ Mbe raba tuli bana, hona tuli bahunguzi: bahunguzi ba Mungu, tukobere obuhunguzi na Kristu, tukaba nitusaswa nage, niho tuhiche kukuzibwa hamo nage. ¹⁸ Kuba nkuchwa nti: Obusasi bwa hati tibukuhicha kulenganisibwa n’ikuzo elilibonekera mul’itwe mu naku z’obusyo. ¹⁹ Nicho ebihangwa byona bikulindiririra obuboneki bw’abana ba Mungu. ²⁰ Kuba ebihangwa bikatwarw’obubi bitakwenda, mu mani g’ayabitwere mu butegeza, ²¹ obwo ebihangwa byonene bilichunguka mu bwiru bw’obuzunde, bibone obweyagazi bw’ikuzo ly’abana ba Mungu.

OBUTEGEZA BW’ABANA BA MUNGU.

²² Kuba tukumanya okwo buli kihangwa chona kikugenera kuti henda kikurumw’obusungu, kuhika hati; ²³ kai chonene chonka pai, nawe n’etwe twena, abali n’emigaso zo kutandika z’Omwoyo, tukugenera itwe abene, nitulindirira kugirwa bana ba Mungu, nibw’obuchunguki bw’engingo zetu. ²⁴ Nimwo mu butegeza tukuchungukira. Nawe obutegeza obubonwa tibukili butegeza, kuba ech’obona, okitegeza ota? ²⁵ Mbe ka tutegeza echo tutabona, tukilindirira n’obweguminsiriza. ²⁶ Mbe nikwo hatyo Omwoyo gukuzuna obunoge bwetu: kuba titukumanya echo tuli no kusaba Mungu mu sala zetu; nawe Omwoyo gwonene gukutusabira n’obugenezi obutagambwa. ²⁷ Kandi akwetegereza emitima, niwe akumanya eby’Omwoyo gukwegonga, kuba akusabira abatakatifu ebyo Mungu akwenda. ²⁸ Mbe tukumanya okwo byona bikugasira abakwenda Mungu, abo yasozire babe batakatifu. ²⁹ Kuba abo yamanyire mu bumanyi bwe, akabasora basusane n’olulengo lw’Omwana we, niho wenene abe muzigezo w’abatabani babo bengi. ³⁰ Kandi abo yasozire, akabayeta; n’abo yayesire, akabatakatifuza; kai abo yatakatifwize, akabakuza. ³¹ Tugambe ki kandi? Mungu akatwemaho, akuturwana ni ga? ³² Wenene k’atasasire Omwana we wa kimo, nawe yamuhereze kubera itwe twena, akwanga ata kutuha byona nage?

³³ Ni ga alilega abasozirwe Mungu? Mungu wenene niwe akubatakatifuza. ³⁴ Alibalamura akabasinga ni ga si? Kristu Yezu ayatufwerere, kandi ayazokire naikara ha bulyo bwa Mungu, niwe akututwezera. ³⁵ Mbe ni kiha si ekilitutaganisya n’obwenzi bwa Kristu? Si hamo obusasi? hamo obunale? hamo enzala? hamo obuzuka? hawo ebitegezi? hamo obunaranaza? hamo embanda? ³⁶ (Nk’okwo chandikirwe kiti: Tukwitirwa iwe buli lunaku, bakutulenganisya nk’enabalega zo kubaga). ³⁷ Nawe ebyo byona tukubisinga, kubera ayatwenzire. ³⁸ Kuba nkumanya kimokimo okw’olufu, nali obulame, nali Bamalaika, nali Abanangoma, nali Ab’amani, nali ebya hati, nali ebiliza, nali obusiniriza, ³⁹ nali eby’oluguru, nali eby’ifwo, nali ekihangwa kindi chona, bitalihicha kututaganisya n’obwenzi bwa Mungu, obuli muli Kristu Yezu Omukama wetu.

ABAYAHUDI BALIBULA. — MUNGU TATAMBUKIRE ENDAGANO ZE.

¹ Nkutenga ebiliho obusyo ya Kristu; tinkubeha, ilaka ly’omutima gwange niyo embona yange mu Mwoyo Mutakatifu: ² mbe nkuzuba muno, kai ndi n’obusasi bwa buli katungu mu mutima gwange. ³ Kuba nakwenzire kutaganisibwa na Kristu kubera batabani betu, abali banaluganda betu mu ngingo, ⁴ abali Banaisraeli, abagizirwe bana, bakana ikuzo n’omulago, n’Ekilagiro, n’obukolezi bwa Mungu, n’endagano; ⁵ abazerwe batatenkuru, abazere, ha bw’engingo, Yezu, akizire byona, niwe Mungu abarikirwe mu myaka z’emyaka. Amina.

⁶ Nawe ekigambo cha Mungu tichabuzire kugasa. Kuba abakuruga mul’Israeli tibali bona Banaisraeli, ⁷ n’abali b’oluganda lwa Ibrahimu tabali bona bana be; nawe Mungu namugira ati: Izaki niwe alyetwa omwana wawe. ⁸ Nikwo kugira ati: Abana ba Mungu ti bana b’engingo, nawe abana b’omulago nibo bakubarwa nk’abana kimo. ⁹ Mbe mbibi ebigambo by’omulago, biti: Nka hati ndiza, kai ndisanga Sara ali n’omwana mwozo. ¹⁰ Nawe Sara wenka pai, Rebeka wena, ayazalire tata Izaki abana babili. ¹¹ Kuba, batakazerwe, hamo batakakozire kintu kizima hamo kibi, (niho omuku gwa Mungu gugume ha bw’obwetegeki bwe), ¹² kuber’ebikorwa byabo pai, nawe kuber’omweto, nagambirwa ati: Ow’obuzigezo alitwarwa omuto, ¹³ nk’okwo chandikirwe kiti: Yakobo nkamwenda, nimpata Ezau.

MUNGU AKUSORA ABO AKWENDA.

¹⁴ Mbe tugambe ki? si Mungu tarongire? Kikabule! ¹⁵ Akagambira Musa ati: Ndisasira owe nkusasira, kai nditirw’ekisa owe nkwitirw’ekisa. ¹⁶ Mbe ti mulimo gw’akwenda hamo gw’akwiruka, nawe gwa Mungu, akusasira. ¹⁷ Enandiko zikugambira Farao ziti: Nich’echo nakwimukirize, noleche mul’iwe obuhicha bwange, kai izina lyange likumuke mu nsi zona. ¹⁸ Mbe akusasira abo akwenda, nagumya abo akwenda. ¹⁹ Iwe oti: Achahiga ki? akwanga age ni ga? ²⁰ Muntu we, niwe ga, ohiche kuhakana na Mungu? Si ekibumbwa kikugambira omubumbi wacho kiti: Wambumbira ki ndi ntyo? ²¹ Si omubumbi takuhicha kubumbya ibumba limo ekitwalo ch’omulimo muzima n’ekindi ch’omulimo gw’obuyaga? ²² Tugambe tuta, raba Mungu, ka yayenzile kwolech’ebiniga bye no kumanyisya obuhicha bwe, akayemera n’obweguminsiriza bwingi ebitwaro by’ebiniga, byetegekire kubura, ²³ niho ayoleke obuhango bw’ikuzo lye mu bitwaro by’ekisa, ebyo yategekere ikuzo lye? ²⁴ Hatyo akatweta natwihamo, mu Bayahudi bonka pai, nawe na mu basenzi, ²⁵ nk’okwo akugamba muli Oze, ati: Ndiyeta ihanga lyange, elyaliga litali ihanga lyange; kai nganzi eyaliga etali nganzi; kandi owe nasasire, ayaliga atasasirwe. ²⁶ N’aho baliga babagambire bati: Timuli ihanga lyange, aho niho balyeterwa bana ba Mungu akulora. ²⁷ Izaiya wena akugamba ebya Israeli ati: Naho olubaro lw’abana ba Israeli lwakubere nk’omuseni gwa ha chambu, obusago bwonka bulichunguka. ²⁸ Mbe Omukama alihicha kimo, kai bwangu n’oburonge, ekigambo echo, yee, alikihicha bwangu mu nsi. ²⁹ Nich’echo Izaiya yaliga agambire mbele, ati: Omukama w’embaga ataba kutusigira abana, twakubere nka Sodoma, twakususene nka Gomora.

³⁰ Mbe tugambe tuta? Tuti: Abasenzi abatahigaga obuhikire, babubwene, nawe obuhikire obukuruga mu kwikiriza; ³¹ kandi Israeli, ayahigaga ekilagiro ch’obuhikire, tiyahikire mu kilagiro ch’obuhikire. ³² Kubaki? Kuba tibabuhigire mu kwikiriza, nawe kuti mu bikorwa, nibasitara h’ebale elikusitaza, ³³ nk’okwo chandikirwe kiti: Lora, nkutaho muli Sioni ibale elikusitaza n’ibale lyo kugwisya; kai buli muntu wena alimwikiriza talikorw’ensoni.

OBUTEKIRIZA BW’ABAYAHUDI.

¹ Bana betu, nkwegonga mu mutima gwange nindembereza Mungu, babone kuchunguka. ² Nkwikiriza okwo batereho omutima hali Mungu, nawe tibakusombokerwa; ³ kuba tibamanyire obuhikire bwa Mungu, kai bakiyenda kugumya obw’abo, tibahulire obuhikire bwa Mungu. ⁴ Mbe obusubiro bw’Ekilagiro niwe Kristu, akutakatifuza buli mwikiriza wena. ⁵ Nicho Musa yayandikire eby’obuhikire obukuruga mu Kilagiro, ati: Buli muntu alibuhicha, alibonamo obulame. ⁶ Nawe eby’obuhikire obukuruga mu kwikiriza akutenga ati: Otatengaga mu mutima gwawe oti: Ni ga alihanama mw’igulu? nikwo kutenga oti: alengetulemo Kristu; ⁷ hamo otatengaga oti: Ni ga alilengetuka mu lina? nikwo kutenga oti: azore Kristu mu bafu. ⁸ Nawe Enandiko zikutenga ki? Ziti: Ekigambo kili hehi n’ewe, mu kanwa kawe na mu mutima gwawe; nich’ekigambo cho kwikiriza, echo tukwolekerera. ⁹ Kuba okagamba n’omunwa gwawe oti: Yezu niwe Omukama, okekiriza okwo Mungu yamuzozire mu bafu, olichunguka. ¹⁰ Kuba omuntu k’akwikiriza mu mutima, akutakatifuzibwa, kandi k’akwatura kwikiriza kwe n’omunwa gwe, akuchunguka. ¹¹ Kuba Enandiko zikugamba ziti: Buli muntu wena akumwikiriza, talikorw’ensoni. ¹² Mbe Omuyahudi n’Omugereki tibakirene, obwo bona bali n’Omukama omo, akutunga abakumulembereza bona. ¹³ Kuba buli muntu wena akulembereza izina ly’Omukama, alichunguka.

KWIKIRIZA KUKURUGA MU BWOLEKEREZI

¹⁴ Nawe balilembereza bata owe batekirize? hamo balikiriza bata owe batagambirwe? kai baligambirwa bata, omwolekerezi ataliho? ¹⁵ Kandi balyolekerera bata, batatumirwe? nk’okwo chandikirwe kiti: Bisemere bita si ebigere by’abakumanyisya omulebo, by’abakwolekerera Evanjeli! ¹⁶ Nawe ti bona abakuhulira Evanjeli. Nicho Izaiya yagambirire ati: Mukama wange, ayekirize obwolekerezi bwetu ni ga? ¹⁷ Mbe kwikiriza kukuruga mu buhulizi, nawe twahulire, kuba ekigambo cha Kristu kikayolekererwa. ¹⁸ Nawe nkubuza nti: Si tibakahulizahoga? Nikwo, ilaka lyabo lyasuganisize ensi yona, n’ebigambo byabo bikahika ha mbibi z’ensi yona. ¹⁹ Mbe nkusuba kubuza nti: Si Israeli tiyamanyire? Owo kutandika Musa akagamba ati: Ndibachubya ihanga elitali lyange, ndibanigahaza ihanga elitali na bwenge. ²⁰ Kandi Izaiya takutina kutenga ati: Nkasangwa abatampigaga, nkemanyisya abatahigaga kummanya. ²¹ Nawe akugambira Israeli ati: Musana gwona nintegerer’engalo ihanga elitekiriza n’ihakani.

ABAYAHUDI TIBALIBULA BONA.

¹ Mbe nkubuza nti: Si Mungu akanagirana ihanga lye? Kikabule! Kuba ine nena ndi Mwisraeli, w’oluzaro lwa Ibrahimu, lw’oluganda lwa Benyamini. ² Mungu tiyanagirene ihanga lye elyo yamanyaga kuruga ira lyona. Si timukumanya echo Enandiko zikutenga ebya Eliya, okw’akulega Israeli hali Mungu? ³ Nagira ati: Rugaba, baketa abalagi bawe, bakagwisya ebitambiro byawe; kai ine nasaga nenka, nibantembanisya kunita. ⁴ Nawe Mungu akumusubiramo ati ki? Ati: Nkesagiz’abantu bihumbi musanzu, abatalitez’ebizwi obusyo ya Bali. ⁵ Nikwo na mu naku zinu: basagire abandi, abasozirwe enema ya Mungu. ⁶ Nawe ni mulimo gw’enema, gw’ebikorwa pai; bikaba bili bityo, enema tiyakubere enema. ⁷ Mbe hatyo ni kiha? Ebyo Israeli yahigaga, tiyabibwene; nawe abasozirwe babibwene, kai abandi bakahumibwa; ⁸ nk’okwo chandikirwe kiti: Mungu akabaha omwoyo gw’entiro, n’ameso agatabona, n’amatwi agatahulira, kai kuhika lero. ⁹ Kandi Daudi akugira ati: Emeza yabo ebe mutego gwo kubabasya no kubasitaza n’ekinaranazo chabo; ¹⁰ ameso gabo gahume, baleke kubona, kai omugongo gwabo gwikare gwinamire bucha bucha. ¹¹ Mbe nkubuza nti: Si bakasitara, bagwe chonka? Kikabule! nawe entambala yabo yaletere abasenzi kuchunguka, niho basingasingane.

ABASENZI, ABASOZIRWE HA MWANYA GW’ABAYAHUDI, BATAYEKUHYA.

¹² Raba entambala yabo netung’ensi, n’obugeruki bwabo netunga abasenzi, kai kuta ka balisuba kwizura! ¹³ Kuba, imwe banamahanga, nkubagambira nti: Ntakalekere kuba ntumwa y’abanamahanga, ndikumura omulimo gwange, ¹⁴ mpiche ntyo kuha ab’oluganda lwange kusingasingana no kuchungul’abandi muli bonene. ¹⁵ Kuba, raba obubulabuzi bwabo nibuba kugorozanya kw’ensi, kai kuta ka balisubayo! tikuliba kuzoka kw’abafu?

¹⁶ Ebyo kutandika bikaba bitakatifu, ebindi byona nikwo bili bityo; kai omuzi gukaba mutakatifu, amatabi gona nikwo gali gatyo. ¹⁷ Mbe amatabi gandi gakatanuka, kai iwe, okili omuzituni gwo mw’iswa, okayongwa hagati yago nokobera omuzi n’olwinzi lw’omuzituni, ¹⁸ otayekuhyaga obusyo y’amatabi. Okekuhya, omanye kinu: t’iwe akutegula omuzi, nawe omuzi nigwo gukutegula iwe. ¹⁹ Nawe iwe oti: Amatabi gakatanuka, ine nongwe. ²⁰ Nikwo, gakatanuka kuber’obutekiriza; kai iwe okuguma kubera kwikiriza. Otayekuhyaga, nawe notine. ²¹ Kuba Mungu akabula kusasira amatabi gonene, hamo iwe wena talikusasira. ²² Mbe noyetegereze obufura n’obugume bwa Mungu: obugume bwe hali banu abagwire, kai obufura bwe hal’iwe, okaguma mu bufura obwo; bitali bityo, iwe wena olihwaho. ²³ Bonene bona, ka baliruga mu butekiriza bwabo, baliyongwa: kuba Mungu ali n’obuhicha bwo kusuba kubayonga. ²⁴ Mbe iwe okaba notemwa mu muzituni gwo mw’iswa noyongwa ha muzituni muzima, butali buhangwa bwawe, munomuno kukiraho amatabi galyo galyongwa ha muzituni gwago gwonene.

ABAYAHUDI BALISUBA KUHINDUKA.

²⁵ Bana betu, tinkwenda mubule kumanya olufubo lunu, (mutegira betegereza), luti: abandi bo mu Banaisraeli bahumire, kuhika abasenzi basugane kutahamo, ²⁶ niho Abanaisraeli bona bachunguke, nk’okwo chandikirwe kiti: Omuchunguzi aliruga muli Sioni, kai alihamo obubi muli Yakobo; ²⁷ aho niho omulago gwange gulihika, ka ndikiza ebiheno byabo. ²⁸ Nikwo, ha bw’Evanjeli, ni bahate kubera imwe; nawe ha bw’obusozi, bakwendwa kubera batata. ²⁹ Kuba Mungu takwefuliza engabirano ze n’olweto lwe. ³⁰ Nk’okwo imwe mutekirize Mungu kara, kai hati nimusasirwa kuber’obutekiriza bwabo, ³¹ nikwo na bonene tibekiriza hati, kuber’ekisa echo mwabwene imwe, niho na bonene bona basasirwe. ³² Mbe Mungu akakingira bona mu butekiriza, ahiche kusasira bona.

³³ Obulehi bw’obuhango bw’obwetegereza n’obumanyi bwa Mungu ni buta si! elamu ze tizimanywa, n’emihanda ze zitamize zita si! ³⁴ Ni ga akumanya ebitekateko by’Omukama? hamo omuhabuzi we ni ga? ³⁵ Hamo ni ga ayatandikire kumuha, amurongore? ³⁶ Kuba byona biruga hali wenene, bili ha bwa wenene na muli wenene; akuzibwe mu myaka z’emyaka. Amina.

ABAKRISTU BAZIMA BONA BALI NGINGO ZIMO NA YEZU KRISTU.

¹ Mbe nkubalembereza, bana betu, mu kisa cha Mungu, muherez’engingo zanu nk’ekitambo ekilora, kai kitakatifu, ekisemereza Mungu: ebe nkora yanu y’omwoyo. ² Mutarubaga eby’ensi enu, nawe nimwehindule mube n’omutima muhya, niho mumanye kwenda kwa Mungu, okuli kuzima, okutusemereza, kuhikire. ³ Kuba nkubagambira mu nema eyo naherwe, imwe mwena, nti: Mutayesimaga kukira ebingene, nawe nimwekehye mu mitima zanu, buli muntu nk’okwo Mungu yamulengere kwikiriza. ⁴ Kuba, nk’okwo mu ngingo zimo tuli n’ebihinzu bingi, kai byona bitagene omulimo, ⁵ nikwo tuli bengi, nawe tuli ngingo zimo muli Kristu, kai buli muntu ni kihinzu ch’engingo z’owezabo. ⁶ Nawe engabirano zetu zikirene ha bw’enema eyo twaherwe: hamo engabirano y’obulagi yo kulaga ha bwo kwikiriza, ⁷ hamo obutumwa: ali nabwo, abugumyega; hamo obwolekerezi, ogwo atyo ayolekerere; ⁸ omuhani ahanega, omugabi agabega n’obutasoba, omugerezi agererega n’oburabirizi, akusasira, asasirega n’obusase.

OBWENDANI BWA KIMO.

⁹ Obwenzi butaba n’obuzigi; muhatega obubi, musimbagirirega ha buzima; ¹⁰ mwendane nk’ab’end’emo; muhanane isima; ¹¹ mutaba balenga mu bilagirwe; mwikare n’omwoyo gutagasire; mukolere Omukama; ¹² musemererwe mu butegeza; mweguminsirize mu naku; mugume kulembereza; ¹³ muhwere abatakatifuabakenire; mugire obwira n’omutima. ¹⁴ Muhe omugisa abakubanaza; muhe omugisa, kai mutabazumiriza. ¹⁵ Musemererwe n’abakusemererwa, mulire n’abakulira. ¹⁶ Mube n’omutima gumo; mutayegonga ikuzo, nawe nimwendega kwekehya. Mutayegira betegereza mu meso ganu. ¹⁷ Mutakolera kubi abakubakolera kubi; mukole kuzima, mu meso ga Mungu chonka pai, nawe mu meso g’abantu bona. ¹⁸ Raba nibihikibwa, ha bwanu mube n’omulebo n’abantu bona. ¹⁹ Mutamar’enzigu imwe abene, nganzi zange, nawe musindike ebiniga bya Mungu. Kuba chandikirwe kiti: Omukama akugamba ati: Enzigu ni zange, n’ine nkuzimara. ²⁰ Nawe omuhate wawe akarumw’enzala, nomuh’ebilyo; akaitw’ eliho, nomunwesye. Kuba, okagira otyo, okumukumira olukara lw’omuliro ha mutwe gwe. ²¹ Otaleka obubi kukusinga, nawe osinge obubi n’obuzima.

TUHULIREGA ABAKURU B’ENSI.

¹ Buli muntu wena ahulirega abakuru: kuba obukuru tibuliho butarugire hali Mungu, kai obuliho bukaletwa Mungu. ² Mbe hatyo akugomera obukuru, akugomera ebyo Mungu yachumire; kai abagome bakweleterera kulamurwa no kusingwa. ³ Kuba ebikuha kutin’abakuru ti ebikorwa bizima, nawe ebibi. Si okwenda kuleka kutin’abakuru? okore kuzima, kai balikusima. ⁴ Kuba omukuru niwe omunampara wa Mungu wo kukuhera ebikorwa bizima. Nawe okakol’amabi, notine, kuba takutwal’embanda busa chonka. Ali ntumwa ya Mungu, amare nzigu ze, anaranaze ayakozire amabi. ⁵ Mbe mukulagirwa kuhulira, ha bw’obutini bw’ekinaranazo chonka pai, nawe kuber’elaka ly’omutima hona. ⁶ Echo nicho mukusororeza omusoro; kuba abakama ni banampara ba Mungu, abakumukolera mul’ebyo. ⁷ Mbe nimuhe bona ebibahikire: omusoro h’abali n’obuhicha bwo kubatobesya; omuseku h’abakubasoroza; obutini h’abahikire kutinwa; ikuzo h’abahikire kulihabwa.

KWENDANA NIKWO KUHICH’EBILAGIRO BYONA.

⁸ Mutagira ibanza ha muntu n’omo, raba si ibanza lyo kwendana; kuba akwenda abezabo akuhich’ekilagiro chona. ⁹ Kuba ebilagiro binu: Otasihanaga, otaitaga, otaibaga, otabeherezaga, otayegongaga, n’ebilagiro bindi byona, bili n’ensonga enu: oyendega owezanu nk’ewe omwene. ¹⁰ Obwenzi bw’abantu bukuzibira kubakolera kubi. Mbe hatyo kwenda nikwo kuhich’ebilagiro byona. ¹¹ Tukore tutyo, nitumanya okw’enaku zikwanguha, kuba omwanya gwahikire gwo kusisimuka mu ntiro, obw’obuchunguki bwetu buli hehi kukira mu naku ezo twaherwe kwikiriza. ¹² Obwire bwakuzire, omusana guli hehi no kwaka. Mbe twange ebikorwa by’omwirima, twangatir’ebikwato by’omusana. ¹³ Tulibate mu muhanda muzima nka mu musana, mu busagiriza bw’ebilyo na mu butamizi pai, mu busihani na mu bululuhe pai, mu nkungana na mu lwango pai; ¹⁴ nawe nimuzware Omukama Yezu Kristu, kai mutatungisya kubi engingo zanu, mukaswa mukekiriza obwegongi bwazo.

MULEKE KULAMUL’ABANDI CHONKA. — MUNGU NIWE OMULAMUZI WA BONA.

¹ Nimwanankule anogire mu kwikiriza, nzira buhakani. ² Kuba omo akuchwa ati: Nkuhicha kulya byona; ondi, anogire, akuly’emikubi zyonka. ³ Akulya ogwo aleke kugaya atakulya, kai atakulya aleke kulamula chonka omulyi, obwo ali mukozi wa Mungu. ⁴ Kai iwe n’iwe ga akulamula omukozi w’abandi? Akaguma hamo akagwa, ni mulimo gw’isebugeni; mbe aliguma, obwo Mungu ali n’obuhicha bwo kumugumya.

⁵ Kandi omo akutaganisy’enaku; kai ondi nazisusanisya. Buli muntu wena agire eby’akwenda. ⁶ Akutaganisy’enaku, akuzitaganisiza Omukama; kai omulyi akulyira Omukama, kuba akusima Mungu; kandi atakulya, akuzirira Omukama, na wenene wena akusima Mungu. ⁷ Kuba mul’itwe taliho akwelamira, kai taliho akwefwera. ⁸ Nawe, naho tukalama, tukulamira Omukama; naho tukafwa, tukufwera Omukama. Mbe naho tukalama, naho tukafwa, tuli b’Omukama. ⁹ Nich’echo Kristu yafwerere no kuzoka, niho atwale abazima n’abalafwire.

¹⁰ Nawe iwe okulamulira ki mutabani wanu? hamo okugayira ki mutabani wanu? obwo tulyemerera twena mw’ilamuliro lya Kristu. ¹¹ Kuba chandikirwe kiti: Nkulama, engambo y’Omukama, kai buli kizwi chona kilinkubira, kandi buli lulimi lwona lulikuza Mungu. ¹² Hatyo buli muntu mul’itwe alyetondira Mungu ha bwe.

MUTASITAZA ABATALI N’AMANI.

¹³ Mbe tuleke kulamulana; nawe hakili mwetegereze mutayohereza hamo mutasitaza mutabani wanu. ¹⁴ Nkumanya, kai nkusombokerwa koto muli Mukama Yezu okwo hataliho ekintu ekirofuhere ha bwacho, nawe kirofuhalira onu wenka akuchwa ati: ni kilofu. ¹⁵ Nawe okabihiriza mutabani wanu kuber’ekilyo, tokitungwa chendani. Otaza kunaga n’ebilyo byawe omuntu owe Kristu yafwerere. ¹⁶ Mbe ekizima chetu kitaba kizumi cha Mungu. ¹⁷ Kuba obukama bwa Mungu tibuli mu kulya no kunwa, nawe mu buhikire n’omulebo n’obusemererwa mu Mwoyo Mutakatifu; ¹⁸ mbe akukolera Kristu atyo akusemereza Mungu, nasimw’abantu. ¹⁹ Mbe hatyo nituhige ebikuhicha kugumy’omulebo, nitukole ebikuhicha kugumyanya. ²⁰ Otaza, kuber’ekilyo, kunyamula omulimo gwa Mungu. Koto, byona bikwera; nawe omuntu akahenesy’abandi mw’ilya, akukola kubi. ²¹ Ni kuzima kuzir’enyama n’evini, na byona ebikuhicha kuhenesya hamo kusitaza hamo kunogya mutabani wanu. ²² Si oli no kwikiriza? Okugumye mul’iwe obusyo ya Mungu. Ali n’omugisa ogwo, atakwesinga omwene muli eby’ akusima! ²³ Nawe akulya, natimatimya, yasingwa, kuba takutungwa ha bwo kwikiriza. Mbe byona ebitakukorwa ha bwo kwikiriza ni kiheno.

KUSASIRANA NO KWENDANA.

¹ Mbe itwe abakizire abandi amani, tulagirwe kwemera obunoge bw’abatali n’amani, no kuleka kwesima itwe abene. ² Buli muntu mul’imwe asemereze owezabo mu bizima, amugumye; ³ kuba Kristu tiyayesimire omwene, nk’okwo chandikirwe kiti: Ebizumi by’abakuzuma bikagwera ine. ⁴ Mbe byona ebyandikirwe bikayandikwa kutwolekerera, niho tubone kutegeza mu bweguminsiriza n’obuhumuza bw’Enandiko.

⁵ Mbe Mungu w’obweguminsiriza n’obuhumuza abahe kwendana, ha bwa Yezu Kristu, ⁶ niho n’omutima gumo n’omunwa gumo mukuze Mungu, Ise Omukama wetu Yezu Kristu. ⁷ Hatyo mukolerane nk’okwo Kristu yabakolere, ha bw’ikuzo lya Mungu. ⁸ Kuba nkubagambira okwo Kristu Yezu yakolere abasazirwe, kuber’obwekomereza bwa Mungu, ahich’ endagano hali batatenkuru; ⁹ kandi niho abasenzi bakuze ekisa cha Mungu, nk’okwo chandikirwe kiti: Nicho, Mukama wange, nkwatulirira ikuzo lyawe mu mahanga, ninemberera izina lyawe. ¹⁰ Kandi kikayandikwa kiti: Imwe mahanga, musemererwe n’ihanga lye. ¹¹ Kai ekindi kiti: Mukuze Omukama, imwe mahanga gona; kai mumukumure, imwe embaga zona. ¹² Izaiya wena nagira ati: Aliboneka omutenga gwa Yese, alimuka kutwara amahanga; amahanga galitegeza muli wenene. ¹³ Mbe Mungu w’obutegeza abezuze obusemererwa bwona n’omulebo mu kwikiriza, niho mukanisibwe obutegeza n’amani g’Omwoyo Mutakatifu.

PAULO AKWEYOGA NASABA ESALA.

¹⁴ Mbe ha bwange, bana betu, nkumanya kimo okwo mwizwire obwenzi n’obumanyi, niho muhiche kuhanana. ¹⁵ Hatyo nabayandikira kihigi raba, ninenda kubezukiza ebyo mumanyire, ha bw’enema eyo Mungu yampere, ¹⁶ mbe ntumwa ya Kristu Yezu mu mahanga, nintambira Mungu Evanjeli, niho asemererwe kuherezibwa abasenzi, abatakatifuzibwe Mwoyo Mutakatifu. ¹⁷ Mbe hatyo ndi n’ensonga zo kwesimira emilimo za Mungu muli Yezu Kristu. ¹⁸ Kuba tinakuhikize kugamba ebyo Kristu atakolize ine, asindike abasenzi kuhulira, mu bigambo na mu bikorwa, ¹⁹ n’obuhicha bw’enyamo n’amahano mu mani g’Omwoyo Mutakatifu; hatyo kuruga Yeruzalemu n’ensi za ha luguyo kuhika Iliriko ninolekerera Evanjeli ya Kristu. ²⁰ Nawe tinayolekerere Evanjeli aho Kristu yaliga yamanyisibwe, ntaba kwombeka ha luhazu lw’abandi, nk’okwo chandikirwe kiti: ²¹ Abaliga batakamanyisibwe ebye balibona; n’abatahulize balisombokerwa.

²² Echo nicho chanzibire kengi kubazaho, kai nazibirwe kuhika lero. ²³ Nawe hati, obwo ntakili n’emilimo mu nsi zinu, n’obwo nkwegonga kuruga myaka mingi kubazaho, ²⁴ ka ndigenda Buhispaniya, nkutegeza kuraba owanu no kubabona, kai imwe n’imwe mulansagara okwo, namazire kusemererwa kake n’emwe. ²⁵ Nawe hati nkugenda Yeruzalemu kuhwera abatakatifu. ²⁶ Kuba aba Masedoniya n’ab’Akaiya baketegeka kukwat’empilya zo kuhwera abahabi bo mu batakatifu ba Yeruzalemu. ²⁷ Nibasemererwa kukola batyo, obwo bakusana kuti bali n’ibanza hali bonene. Obwo abanamahanga bakobere nabo ebizima by’omwoyo, ni kuzima bakobere n’ebizima by’engingo. ²⁸ Mbe ka ndamara omulimo ogwo, namazile no kubaha ebintu ebyo, ndiraba owanu ningenda Buhispaniya. ²⁹ Nkumanya okwo kubazaho, ndigenda n’omugisa mwingi gw’Evanjeli ya Kristu.

³⁰ Mbe, bana betu, nkubalembereza ha bw’Omukama wetu Yezu Kristu na ha bw’obwenzi bw’Omwoyo Mutakatifu, mumpwere n’esala zanu hali Mungu, ³¹ niho nkire mu batekiriza abali Yudeya, kai abatakatifu ba Yeruzalemu bayanankule kuzima omuherezo ogwo nkubaletera, ³² hatyo mpike owanu n’obusemererwa, raba nikwo kwenda kwa Mungu, mpumure n’emwe. ³³ Mungu w’omulebo abe n’emwe mwena! Amina.

PAULO AKUSABIRA FEBE HA BAKRISTU BE ROMA.

¹ Nkubasabira muhara wetu Febe, omudyakonikazi w’eklezia ya Kenkreya, ² mumwanankule mu Mukama nk’okwo bayanankula abatakatifu, mumuhwere muli byona ebyo alahicha kuzunwa imwe; kuba wenene akahwera bengi, kai ine nena akampwera.

PAULO AKUBWACHA ABAKRISTU BA ROMA.

³ Mumbwakize Priska na Akwila, abakobere n’ene omulimo gwa Kristu Yezu, ⁴ (abatereho emitwe zabo, bankilize mu lufu, kai t’ine nenka ali n’ibanza hali bonene, nawe n’eklezia zona z’abanamahanga); ⁵ hona mumbwakize n’eklezia eli mu ka yabo. Mumbwakize Epeneti, omwendwa wange, niwe owo kutandika wa Aziya muli Kristu. ⁶ Mumbwakize Maria, ayabakolere muno. ⁷ Mumbwakize Androniko na Yuniya, abetu n’abezasu b’ibohero, abakumukire mu ntumwa, kai bakanibembera muli Kristu. ⁸ Mumbwakize Ampliyati, enganzi yange mu Mukama. ⁹ Mumbwakize Urbani, owezasu muli Kristu Yezu, na Sitaku, owe nkwenda. ¹⁰ Mumbwakize Apele, omwesigwa muli Kristu. ¹¹ Mumbwakize abo mu ka ya Aristobuli. Mumbwakize Herodiyoni, omunaluganda wetu. Mumbwakize abo mu ka ya Narsisi, abali b’Omukama. ¹² Mumbwakize Trifena na Trifoza, abakukolera Omukama. Mumbwakize omwendwa muno Perside, ayakolere muno Omukama. ¹³ Mumbwakize Rufi, ayasozirwe Omukama, na nina, ali mawe nena. ¹⁴ Mumbwakize Asinkriti, Flegoni, Hermasi, Patroba, Hermesi, n’abatabani betu abali hamo nabo. ¹⁵ Mumbwakize Filologi na Yuli, Nerei na muhara wabo, na Olympiyadi, n’abatakatifu bona abali hamo nabo. ¹⁶ Mubwachanye n’omunwegero mutakatifu. Eklezia zona za Kristu zikubabwacha.

BAYEKENGE HA BATABANI BABO B’OBUZIGI.

¹⁷ Nkubasaba, bana betu, mwekenge h’abakwenda kubahabanisya no kubahenesya mu bigambo ebyo mwayolekererwe, muberuke. ¹⁸ Kuba abantu bezabo abo tibakolera Kristu Omukama wetu, nawe bakukolera enda yabo; kandi n’ebigambo by’obufura n’ebyo kukongya, bakuziga emitima z’abatasobire. ¹⁹ Obuhulizi bwanu bumanyikene honahona. Mbe nkusemererwa kubera imwe; nawe nkwenda mube betegereza mu bizima, kai mutasoba mu bibi. ²⁰ Mungu w’omulebo asanzabule bwangu Sitani ifwo y’ebigere byanu! Enema y’Omukama wetu Yezu Kristu ebe n’emwe!

ABALI NA PAULO BAKUBWACHA ABEZABO.

²¹ Timote, owezasu, akubabwacha, na Lusiyi na Yazoni na Sosipateri, abetu. ²² Ine Tersiyo, ayayandikire ebaruwa enu, nkubabwacha mu Mukama. ²³ Kayi, omugeni wange, n’eklezia yona, bakubabwacha. Erasto, omubiki w’empilya z’ekikale, akubabwacha, na Kwarti wena, omutabani wetu. ²⁴ Enema y’Omukama wetu Yezu Kristu ebe n’emwe. Amina.

EBYO KUMALIZA.

²⁵ Ikuzo libe hali onu, akuhicha kubagumya mw’Evanjeli yange na mu bwolekerezi bwa Yezu Kristu, ha bw’obusuruzi bw’olufubo, olwaliga luserekire kuruga ira lyona, ²⁶ (nawe olwamanyisibwe hati Enandiko z’abalagi, ha bw’omuku gwa Mungu w’ira lyona, bahulire kwikiriza), olwamanyikene hati mu mahanga gona, ²⁷ niwe Mungu, omwekomereza nagumo, ikuzo n’ikumucho libe hali Wenene, ha bwa Yezu Kristu, mu myaka z’emyaka. Amina.