Kusurura

YEZU NAFUMORERA YOHANA.

¹ Kusurura kwa Yezu Kristu, okwo Mungu, yamuhere, asurulire abahereza be ebili hehi no kuhika n’ebyo yamanyisize, ka yatumire mumalaika we ha muhereza we Yohana, ¹ ayamanyisize ekigambo cha Mungu, n’ebyo yabwene byona bya Yezu Kristu. ¹ Ali n’omugisa akusoma nahulira ebigambo by’omulago gunu, akagumya ebiyandikirwemo; kuba omwanya guli hehi.

¹ Yohana hali eklezia musanzu ezili Aziya. Enema n’omulebo zibagabirwe aliho, n’ayaliga aliho, n’aliza, n’emyoyo musanzu ezili ebusyo y’ekitega che, ¹ na Yezu Kristu, ali mwemerezi mwesigwa, muzigezo wo mu bafu n’omukuru w’abakama b’ensi, ayatwenzire, nanabya ebiheno byetu mu nsagama ye, ¹ natugira bukama bwe n’abasaserdoti ba Mungu Ise: hali wenene ikuzo libe n’obuhicha mu myaka z’emyaka. Amina. ¹ Ngugu, akwiza mu mere; kai buli liso lyona lilimubona, n’abamuchumisire bona, n’amahanga gona g’ensi galyetera ha kifuba kubera wenene. Nikwo bili, amina. ¹ Ndi alfa na omega, obutandikiro n’omuhero, engambo y’Omukama Mungu, aliho, n’ayaliga aliho, n’aliza, Omuhicha wa byona.

¹ Ine Yohana, mutabani wanu n’owezanu mu bunale, na mu bukama, na mu bweguminsiriza, muli Yezu Kristu, naliga ndi mw’izinga elikwetwa Patimosi, kuber’ekigambo cha Mungu n’obwemerezi bwa Yezu. ¹ Olunaku lw’Omukama omwoyo gwange gukasagarwa, nimpulira enuma yange ilaka ly’amani, kuti ekikuli, ¹ niligira liti: Eby’okubona, obyandike mu kitabo, nokitumire eklezia musanzu ezili Aziya: Efwezi, Simirina, Perigamo, Tyatira, Saridi, Filadelefya na Laodisya.

¹ Mbe aho ninekebuka kubona ilaka elyanfumoreraga; ka nekebukire, nimbona emitereko z’ezahabu musanzu, ¹ kai hagati y’emitereko z’ezahabu musanzu nimbona omuntu ayasusanaga n’Omwana w’omuntu, azwere enkanzu elehire, ayebohize ekifuba n’omwiko gw’ezahabu. ¹ Omutwe gwe n’isoke lye nizyera nk’obwoya bumwera bw’enabalega n’eseluji, kai ameso ge gali nk’olubezi lw’omuliro; ¹ kandi ameso ge gali nk’isaba limutuku elili mu luhiza lw’omuliro; mbe ilaka lye lili nk’omubaruko gw’amenzi mengi. ¹ Mu mukono gwe mulyo yaliga ali n’enenezi musanzu, kai embanda namogi abili nerugamoga mu kanwa ke; kandi obusyo bwe nibwaka nk’ezoba, ka likwaka mani. ¹ Ka namubwene, ningwa mu maguru ge, kuti nafwire; nantaho omukono gwe mulyo, nagira ati: Otatina; ine ndi wo kutandika n’owo kuhereruka, ¹ kai nkulora; naliga nafwire, nawe lora, nkulama mu myaka z’emyaka, kai ndi n’enkinguzo z’olufu n’eza kuzimu. ¹ Mbe yandika ebyo wabwene, n’ebiliho, n’ebiliza ebilabihererukira. ¹ Olufubo lw’enenezi musanzu ezo wabwene mu mukono gwange mulyo n’olw’emitereko z’ezahabu musanzu ni lunu: enenezi musanzu ni bamalaika b’eklezia musanzu, kai emitereko musanzu nizo eklezia musanzu.

ABEPISKOPI BA EFWEZI, SIMIRINA, PERIGAMO NA TYATIRA.

¹ Yandikira mumalaika w’eklezia ya Efwezi oti: Mbibi ebikugambwa akutwara enenezi musanzu mu mukono gwe mulyo, nalibata hagati y’emitereko z’ezahabu musanzu; ati: ² Nkumanya ebikorwa byawe, n’emilimo zawe, n’obweguminsiriza bwawe, n’okw’otakuhicha kwemera ababi, n’okwo warolize abakweyeta entumwa busa chonka, n’okwo wabasanga bali babehi; ³ n’okw’oli n’obweguminsiriza, n’okwo wanaranalire izina lyange, nzira kulemwa. ⁴ Nawe ndi n’ekigambo hal’iwe, ni kinu: wasigire obwenzi bwawe bwo kutandika. ⁵ Mbe noizuke aho warugire, otamwe, osube kukola ebya mbele. Okayanga, nkwiza hal’iwe ninkwihaho omutereko gwaweha mwanya gwagwo, otatamirwe. ⁶ Mbe nawe ekiliho, okuhata ebikorwa by’Abanikolaiti, ebyo nkuhata ine nena. ⁷ Ali n’amatwi, ahulire eby’Omwoyo gugambira eklezia, guti: Omusingi ndimuha kulya eby’eti ly’obulame, elili mu paradizoya Mungu wange.

⁸ Kandi yandikira mumalaika w’eklezia ya Simirina, oti: Mbibi ebigambo by’owo kutandika n’owo kuhereruka, ayaliga afwire, nawe akulora; ati: ⁹ Nkumanya obunale bwawe n’obuhabi bwawe, nawe oli muhango; nkumanya okw’okubeherezibwa abakugamba bati: Tuli Bayahudi, kunu batali Bayahudi, nawe bali bukobe bwa Sitani. ¹⁰ Otatina kintu muly’ebyo olisasibwa. Lora, isitani lilikingira mw’ibohero abandi mul’imwe, murozibwe, kai mulinaranara naku ikumi. Obe mwesigwa kuhika kufwa, kai ndikuha engata y’obulame. ¹¹ Ali n’amatwi, ahulire eby’Omwoyo gugambira eklezia, guti: Alisinga, ogwo talihutazibwa olufu lwa kabili.

¹² Yandikira n’omumalaika w’eklezia ya Perigamo oti: Mbibi ebigambo bya kana mbanda ehyozire namogi abili: ati: ¹³ Nkumanya ah’otwire, aho ekitega cha Sitani kili, n’okw’ogumya izina lyange, n’okw’otayeyogire kwikiriza kwange mu naku ezo Antipasi, omwemerezi wange mwesigwa, yesirwe owanu, aho Sitani litwire. ¹⁴ Nawe ndi n’akagambo hal’iwe, ni kanu: oli n’abantu abakuruba amagambo ga Balamu, ayaliga nayolekerera Balakikuhenesya abana ba Israeli, abasindike kulya no kusihana. ¹⁵ Kandi iwe wena oli n’abantu abakuruba amagambo g’Abanikolaiti. ¹⁶ Otamwe newe; k’olayanga, nkwiza bwangu kubarwana n’embanda yo mu kanwa kange. ¹⁷ Ali n’amatwi, ahulire eby’Omwoyo gugambira eklezia, guti: Omusingi ndimuha manueserekire, ndimuha n’akabale kamwera; ha kabale ako hayandikirweho izina ihya, elitamanywa muntu, atali ayakayanankula.

¹⁸ Yandikira n’omumalaika w’eklezia ya Tyatira, oti: Lora ebikugambwa Omwana wa Mungu, ali n’ameso nk’olubezi lw’omuliro n’amaguru nk’isaba limutuku; ati: ¹⁹ Nkumanya ebikorwa byawe, no kwikiriza kwawe, n’obwenzi bwawe, n’obweguminsiriza bwawe, n’omulimo gwawe n’ebikorwa byawe byo kuhereruka, ebikanire kukira ebya mbele. ²⁰ Nawe ndi n’akagambo hal’iwe, ni kanu: okufuha omukazi Yezabela, akwegira mulagikazi, kwolekerera no kukongya abahereza bange, akabagwisya mu busihani na mw’ilya ly’enyama y’ebitambo. ²¹ Nkamuha omwanya gwo kutamwa, nawe takwenda kutamwa obusihani bwe. ²² Lora, ndi hehi no kumumamya ha kitabo, kai abakuhena nage balinaranazibwa muno, bakaba batatamirwe entungwa zabo. ²³ Ndita abana be, kai eklezia zona zilimanya okwo n’ine akwetegereza ensigo n’emitima; kandi ndirongora buli muntu mul’imwe ebingene ha bikorwa bye. Nawe nkugambira imwe, ²⁴ n’abandi, abali Tyatira, abatarubire amagambo ago n’abatamanyire obulehi bwa Sitani, engambo yabo, nti: tinkubatwekereza omugugu gundi. ²⁵ Ekiliho, ebyo muli nabyo, mubigumye kuhika nize. ²⁶ Kandi alaba asingire, akagumya ebikorwa byange kuhika ha muhero, ndimuha obuhicha mu mahanga. ²⁷ Aligatwaza olusanzu lw’echoma, kai galichekenuka nk’ekitwaro ch’ibumba, ²⁸ nk’okwo ine naherwe Tata obuhicha; kandi ndimuha enenezi ya bwanencha. ²⁹ Ali n’amatwi, ahulire eby’Omwoyo gugambira eklezia.

ABEPISKOPI BA SARIDI, NA FILADELEFYA, NA LAODISYA.

¹ Kandi yandikira n’omumalaika w’eklezia ya Saridi, oti: Lora, kana myoyo musanzu za Mungu n’enenezi musanzu akutenga ati: Nkumanya ebikorwa byawe; bati: okulora, kai kunu ofwire. ² Noyekenge, kai nogumye obisagire n’ebili hehi no kufwa; kuba tinkusanga ebikorwa byawe bizwire obusyo ya Mungu wange. ³ Mbe noizuke emiherwe n’emihulire yawe, nokigumye, kai otamwe. Okabula kwekenga, ndiza hal’iwe nk’omusuma, otakumanya akatungu ako ndakwiziraho. ⁴ Kampaho Saridi oli n’amazina make agatarofuheze emyenda zabo; balilibata n’ene bazwere zimwera, kuba bahikire. ⁵ Omusingi alizwara atyo emyenda zimwera; kai tindilaza izina lye mu kitabo ch’obulame, nawe ndyatura izina lye obusyo ya Tata n’ey’abamalaika be. ⁶ Ali n’amatwi, ahulire eby’Omwoyo gugambira eklezia.

⁷ Yandikira n’omumalaika w’eklezia ya Filadelefya, oti: Mbibi ebigambo by’Omutakatifu n’Omukomereza, ali n’olukinguzo lwa Daudi, nakingula, atali n’omo wo kukinga, nakinga, atali n’omo wo kukingula; ati: ⁸ Nkumanya ebikorwa byawe; lora, nataho obusyo yawe omulyango gukingwire, ogutahicha kukingwa muntu, kuba amani gawe ni make, no kuba wagumize ekigambo change, nzira kweyoga izina lyange. ⁹ Lora, ndikuha abandi b’obukobe bwa Sitani, abakwetwa Bayahudi, kunu batali Bayahudi, nawe nibabeha; lora, ndigira beze kwinamira amaguru gawe; kai balimanya okwo nakwenzire. ¹⁰ Obwo wagumize obweguminsiriza bwange, ine nena ndikugumya ha katungu ko kurozibwa, okulaizira ensi yona kurozya abatuzi b’ensi. ¹¹ Lora, nkwiza bwangu; gumyaga eby’oli nabyo, batakwaka engata yawe. ¹² Alisinga, ndimugira enomyo mw’eklezia ya Mungu wange, talisuba kurugamo; kai ndimwandikaho izina lya Mungu wange n’ezina ly’ekikale cha Mungu wange, lya Yeruzalemu mpya, ekihanantuka nikiruga mw’igulu hali Mungu wange, n’ezina lyange ihya. ¹³ Ali n’amatwi, ahulire eby’Omwoyo gugambira eklezia.

¹⁴ Yandikira n’omumalaika w’eklezia ya Laodisya oti: Mbibi ebigambo by’Amina, omwemerezi mwesigwa na mukomereza, oburugo bw’obuhangi bwa Mungu; ati: ¹⁵ Nkumanya ebikorwa byawe. Tokunirira, tokutagata; hakili okanirira hamo okatagata! ¹⁶ Naw’obw’otihire, otanirire hamo otatagasire, ndi hehi no kukutanaka mu kanwa kange. ¹⁷ Kuba okugamba oti: Ndi muhango, ndi n’amabona, tinkenire kintu; iwe si tokumanya okw’oli munaku, munale, muhabi, muhume, muzuke. ¹⁸ Hakili ogule hal’ine ezahabu erozibwe mu muliro, obe muhango, obone emyenda zimwera zo kuzwara no kusweka obuzule bwawe bw’ensoni; kandi nosige ameso gawe n’omubazi, obone. ¹⁹ Abo nkwenda, nkubahana nimbanaranaza; mbe noyegire amani, otamwe. ²⁰ Lora, ndi ha mulyango ninkinguza: omuntu akaba nahulira ilaka lyange, akankingulira, nkutahamo owe, ndilagira nage, kai wenene n’ene. ²¹ Omusingi ndimwikaza n’ene ha kitega change, nk’okwo ine nena nasingire, ninikara na Tata ha kitega che. ²² Ali n’amatwi, ahulire eby’Omwoyo gugambira eklezia.

ABAGURUSI MAKUMI ABILI NA BANA N’ENAMENSWA INA.

¹ Kumara nimbona omulyango gukingwire mw’igulu, kai ilaka elyo naliga natandikire kuhulira nilinfumorera nk’ekikuli, nilingambira liti: Hanama hanu, nkwoleche ebilihererukira ebyo. ² Kachwi n’ako omwoyo gwange nigusagarwa; nimbona ekitega kitebweho mw’igulu, kai ha kitega echo haliho omwikazi. ³ Omwikazi ogwo yasusanaga nk’ebale lya yasepi na sardiyo; kai obuta bwa Kongwa bwazingiraga ekitega, nibususana nka meralidi. ⁴ Ekitega chazingirwaga ebitebe bindi, kai ha bitebe baliga bekere abagurusi makumi abili na bana, bazwere zimwera, bali n’engata z’ezahabu ha mitwe zabo. ⁵ Mu kitega harugamoga endabyo, n’amalaka, n’embaragazi; ebusyo y’ekitega etala musanzu zayakaga; niz’emyoyo musanzu za Mungu. ⁶ Hona ebusyo y’ekitega haliga haliho kuti enanza elorerene, nk’elore; kai hagati y’ekitega na ha mbazu zona z’ekitega haliga haliho enamenswa ina, zizwire ameso obusyo n’enuma.

⁷ Enamenswa yo kutandika yasusanaga n’entale, eya kabili yasusanaga enana, eya kasatu yaliga eli n’obusyo kuti nk’omuntu, kai eya kana yasusanaga n’isamba niliguruka. ⁸ Enamenswa ina ezo zaliga zisugene amababa mukaga, kai ha mbazu zona na mu nda zaliga zizwire ameso; kandi musana na mu kiro tizalekaga kugamba ziti: Mutakatifu, mutakatifu, mutakatifu, Omukama Mungu, Omuhicha wa byona, ayaliga aliho, n’aliho, n’aliza. ⁹ Enamenswa ezo ka zahaga ikuzo, n’ikumucho, n’isima, hali onu aikere ha kitega nalama mu myaka z’emyaka, ¹⁰ abagurusi makumi abili na bana benamiraga ayaliga aikere ha kitega, nibahabuduga akulama mu myaka z’emyaka, nibanagaga engata zabo ebusyo y’ekitega, nibagira bati: ¹¹ Oingene, Mukama Mungu wetu, kuhabwa ikuzo n’isima n’obuhicha, kuba n’iwe wayangire byona, kai bihangirwe nibibaho kubera kwenda kwawe.

EKITABO N’AKANABALEGA

¹ Kumara nimbona, mu mukono gw’obulyo gw’ayaliga aikere ha kitega, ekitabo chandikirwe mu nda na ha luguru, kigumibwe enkingizo musanzu. ² Nimbona mumalaika w’amani nahamuka n’ilaka ihango ati: Ni ga ahikire kufundula ekitabo no kwihaho enkingizo zacho? ³ Kai tihaliho n’omo, mw’igulu na mu nsi na kuzimu, ayahichaga kufundula ekitabo no kukilora. ⁴ Mbe ine nindira muno, kuba tihabwenweho n’omo ahikire kufundura ekitabo no kukilora. ⁵ Aho omo wo mu bagurusi nangambira ati: Otalira; ngigi entale y’oluganda lwa Yuda, omwizukuru wa Daudi, ali n’obuhicha bwo kufundura ekitabo no kwihaho enkingizo zacho musanzu. ⁶ Nindora, kai hagati y’ekitega n’enamenswa ina na hagati y’abagurusi, nkako Akanabalega, kemerere kuti kesirwe, kali n’amahembe musanzu n’ameso musanzu, niz’emyoyo musanzu za Mungu ezitumirwe honahona mu nsi.

⁷ Nikeza, nikatwara ekitabo mu mukono gw’obulyo gw’ayaliga aikere ha kitega. ⁸ Ka kafundwire ekitabo, enamenswa ina n’abagurusi makumi abili na bana nibenamira Akanabalega, basugene amatungu n’ebikompe by’ezahabu bizwire ebikununka kuzima, niz’esala z’abatakatifu. ⁹ Bayembaga olwembo luhya, bati: Mukama, ohikire kutwara ekitabo no kwihaho enkingizo zacho, kuba waisirwe, kai n’ensagama yawe watuchungulire Mungu, itwe ba buli luganda, buli lulimi, buli ihanga, buli bukama; ¹⁰ kandi watugirire Mungu wetu bakama na basaserdoti; tulitwar’engoma mu nsi. ¹¹ Nindora, nimpulira ilaka ly’abamalaika bengi ha mbazu zona z’ekitega n’enamenswa n’abagurusi; baliga bali bihumbi by’ebihumbi, ¹² nibahamukaga n’ilaka ihango bati: Akanabalega akesirwe kahikire kuhabwa obuhicha, na bumungu, n’obwetegereza, n’amasi, n’isima, n’ikuzo, n’omugisa. ¹³ Kai ebihangwa byona ebili mw’igulu na mu nsi na kuzimu na mu nanza, n’ebilimo byona, nimbihulira byona, nibigira biti: Omugisa gube hali onu aikere ha kitega na ha Kanabalega, hamo n’isima n’ikuzo n’obuhicha mu myaka z’emyaka. ¹⁴ Mbe enamenswa zagiraga ziti: Amina. Kai abagurusi makumi abili na bana nibenama nibahabudu akulama mu myaka z’emyaka.

ENKINGIZO ZO KUTANDIKA MUKAGA.

¹ Nimbona Akanabalega kehireho lumo lw’enkingizo musanzu; nimpulira emo yo mu namenswa ina negamba kuti n’elaka ly’embaragazi, eti: Iza, olore. ² Nindora, nimbona efarasi katale, kai agihanamire yaliga ali n’obukoma, nibamuha engata, mbe nagenda nk’omusingi, asinge. ³ Kandi ka kehireho olukingizo lwa kabili, nimpulira enamenswa ya kabili negira eti: Iza, olore. ⁴ Efarasi endi nerugaho, eli bihogo; agihanamire nibamuha obuhicha bwo kwihamo omulebo mu nsi, abantu betane; nahabwa embanda elehire. ⁵ Ka kehireho olukingizo lwa kasatu, nimpulira enamenswa lwa kasatu negira eti: Iza, olore. Ngigi efarasi sina; kai agihanamire ali n’olulengo mu mukono gwe. ⁶ Nimpulira kuti ilaka hagati y’enamenswa ina, niligira liti: Olulengo lw’engano ni denari emo, kai endengo isatu za shayiri ni denari emo; nawe mutanyamula evini n’amazuta.

⁷ Ka kehireho olukingizo lwa kana, nimpulira ilaka ly’enamenswa ya kana negira eti: Iza, olore. ⁸ Kai ngigi efarasi epesukire; agihanamire yayetwaga Lufu, kandi kuzimu yamurubaga; nahabwa obuhicha mu kihinzu cha kana ch’ensi bwo kwisya embanda, n’enzala, n’olufu, n’ebikaka. ⁹ Ka kehireho olukingizo lwa katanu, nimbona mu bitalahansi by’etambiro emyoyo z’abetirwe ekigambo cha Mungu n’obwemerezi bwabo. ¹⁰ Baliga nibahamuka n’ilaka ihango bati: Kuhika lihi, Mukama mutakatifu na mukomereza, olilangeza kulamula no kwehora ensagama yetu ha batuzi b’ensi? ¹¹ Nibasugana kuhabwa enkanzu mwera, nibagambirwa kuchulera kake, kuhika buhike obukumi bw’abezabo n’abatabani babo abaliga bali no kwitwa nka bonene.

¹² Nindora, ka kehireho olukingizo lwo mukaga, kai ngigi namutikima mpango, izoba niliragura nk’omufuko gw’obwose, okwezi kwona nikuba nk’ensagama; ¹³ enenezi zo mu lutumba nizilagara mu nsi, nk’omutini nigulagaza amatini mabisi gagwo, ka gutengesibwa omuyaga gw’amani. ¹⁴ Olutumba nilwefiligita nk’ekitabo echo bazingira; amabanga n’amazinga gona nigaruga mu mwanya gwago; ¹⁵ kai abakama b’ensi, n’abakuru, n’abagerezi b’obulemo, n’abahango, n’abelemi, n’aberu bona, n’abatali beru, nibesereka mu nanga na mu nkili z’amabanga; ¹⁶ nibagambira amabanga n’enkili bati: Mutugwere, mutusereke ha busyo bw’omwikazi w’ekitega na ha biniga by’Akanabalega; ¹⁷ kuba olunaku lukuru lw’ebiniga byabo lwahika, kai alyemerera ni ga?

ABALI N’OLUNYAMO LWA MUNGU.

¹ Kumara nimbona bamalaika bana, bali ha bisago bina by’ensi nibazibira emyaga ina z’ensi, zitahembera ensi n’enanza n’eti n’elimo. ² Nimbona mumalaika ondi nanegera mu buturuk’ezoba, ali n’olunyamo lwa Mungu asingire; nahamukira n’ilaka ihango bamalaika bana abaliga baherwe kunazya ensi n’enanza, ³ nagira ati: Mutanazyaga ensi n’enanza n’amati, kuhika tunyamize olunyamo obusyo bw’abakukolera Mungu wetu. ⁴ Nimpulira olubaro lw’abanyamirwe: bihumbi igana limo na makumi ana na bihumbi bina, b’enganda zona z’abana ba Israeli, baliga banyamirwe. ⁵ Bihumbi ikumi na bibili byaliga binyamirwe mu luganda lwa Yuda; bihumbi ikumi na bibili mu luganda lwa Rubeni; bihumbi ikumi na bibili mu luganda lwa Gadi; ⁶ bihumbi ikumi na bibili mu luganda lw’Aseri; bihumbi ikumi na bibili mu luganda lwa Nefitali; bihumbi ikumi na bibili mu luganda lwa Manase; ⁷ bihumbi ikumi na bibili mu luganda lwa Simeo; bihumbi ikumi na bibili mu luganda lwa Levi; bihumbi ikumi na bibili mu luganda lwa Izakari; ⁸ bihumbi ikumi na bibili mu luganda lwa Zabuloni; bihumbi ikumi na bibili mu luganda lwa Yozefu; bihumbi ikumi na bibili mu luganda lwa Benyamini.

⁹ Kumara nimbona embaga ningi, etakuhicha kubarwa muntu, y’engoma zona, y’enganda zona, y’amahanga gona, y’endimi zona; baliga bemerere ebusyo y’ekitega ha meso g’Akanabalega, bazwere enkanzu zimwera, bali n’amatabi g’enkinda mu ngaro zabo; ¹⁰ nibahamukaga n’ilaka ihango bati: Kuchunguka kukuruga hali Mungu wetu, aikere ha kitega, na ha Kanabalega. ¹¹ N’abamalaika bona baliga nibazingira ekitega n’abagurusi n’enamenswa ina; nibenamira ekitega mu busyo bwabo nibahabudu Mungu, ¹² nibagira bati: Amina. Omugisa, n’ikuzo, n’obwetegereza, n’obusimi, n’isima, n’obuhicha, n’amani bibe hali Mungu wetu mu myaka z’emyaka. Amina.

¹³ Aho omo wo mu bagurusi nantengera nagira ati: Abazwere enkanzu zimwera ni baha? barugire hai? ¹⁴ Nimmugambira nti: Mukama wange, niwe okumanya. Nangambira ati: Banu nibo abarugire mu kunaranara kuhango, n’abanabize n’abayelize enkanzu zabo mu nsagama y’Akanabalega. ¹⁵ Nich’echo bali obusyo y’ekitega cha Mungu, nibamuhereza musana na mu kiro mw’eklezia ye; kai aikere ha kitega alibavumama. ¹⁶ Tibalisuba kurumw’enzala no kwitw’eliho no kuzongorwa empita y’ezoba n’omusana; ¹⁷ kuba Akanabalega akali hagati y’ekitega kaliba mulisya wabo, kalibasagara ha maziba g’amenzi g’obulame, kai Mungu alikubura amaziga gona g’ameso gabo.

OLUKINGIZO LWO MUSANZU. — EBIKULI BINA BYO KUTANDIKA.

¹ Ka kehireho olukingizo lwo musanzu, mw’igulu hayesiza di kuti ihinzu ly’esaha. ² Nimbona bamalaika musanzu abali obusyo ya Mungu, nibahabwa ebikuli musanzu. ³ Mumalaika ondi naiza naimemera obusyo y’etambiro, ali n’ituntumuzyo ly’ezahabu; nagabirwa ebintu ebikununka kuzima bingi, abihereze hamo n’esala z’abatakatifu bona h’etambiro ly’ezahabu elili obusyo y’ekitega cha Mungu. ⁴ Omwika gw’ebikununka kuzima niguruga mu mukono gw’omumalaika obusyo ya Mungu nigunegera hamo n’esala z’abatakatifu. ⁵ Aho mumalaika natwara ituntumuzyo nalizuza omuliro gw’etambiro, nalinaga mu nsi; nibibaho embaragazi, n’amalaka, n’endabyo, na namutikima mpango. ⁶ Mbe bamalaika abaliga bali n’ebikuli musanzu nibetegeka kubitera.

⁷ Mumalaika wo kutandika nater’ekikuli; nihabaho amabale g’enzula n’omuliro gutobene n’ensagama, nibilagara mu nsi, nibyocha ekihinzu cha kasatu ch’ensi, nibyocha ekihinzu cha kasatu ch’amati, nibyocha bul’inansi ibisi. ⁸ Mumalaika wa kabili nater’ekikuli; kai kuti ibanga ihango ly’omuliro nilinagwa mu nanza: ekihinzu cha kasatu ch’enanza neba nsagama, ⁹ kai ekihinzu cha kasatu ch’ebihangwa ebikulora mu nanza nikifwa, n’ekihinzu cha kasatu ch’amato nikisingarika. ¹⁰ Mumalaika wa kasatu nater’ekikuli: enenezi mpango, neyaka nk’olumuli, neruga mw’igulu, negwera ekihinzu cha kasatu ch’emigera na mu nindo z’amenzi. ¹¹ Izina ly’enenezi egyo lyaliga lili Busalizi; kai ekihinzu cha kasatu ch’amenzi nikisalira, mbe abantu bengi nibetwa amenzi, kuba galiga gabere masalizi.

¹² Mumalaika wa kana nater’ekikuli: ekihinzu cha kasatu ch’ezoba nikiterwa, n’ekihinzu cha kasatu ch’okwezi, n’ekihinzu cha kasatu ch’enenezi, hatyo ekihinzu cha kasatu chabyo nikiragula, kai omusana niguburwa ekihinzu cha kasatu ch’obwaki bwagwo, nikwo n’ekiro. ¹³ Aho nimbona nimpulira ilaka ly’isamba niliguruka hagati y’egulu, niligira n’amani liti: Mabe! mabe! mabe! abantu b’ensi bakuletererwa ilaka ly’ebikuli by’abamalaika bandi basatu abatakatezir’ebikuli.

EKIKULI CHA KATANU N’ECHO MUKAGA.

¹ Mumalaika wa katanu nater’ekikuli; nimbona enenezi eyaliga erugire mw’igulu, elagere mu nsi; nahabwa olukinguzo lw’eziba ly’enombe. ² Nilufundula iziba ly’enombe: omwika niguhanama mw’iziba, kuti omwika gw’elyokezo ihango, nigwiraguza izoba n’olutumba. ³ Mu mwika gw’eziba niharugamo enzige nizisugana mu nsi, zili n’obuhicha nk’obw’ebimina byo mu nsi; ⁴ nizilagirwa kuleka kunazya ensi n’ebili bibisi byona, n’amati gona, nawe kunazya abantu bonka abatali n’olunyamo lwa Mungu ha busyo bwabo; ⁵ nizihabwa kubanazya mezi atanu, kubeta pai; kai obusasi bwazo bwaliga buli nk’obw’ekimina, ka kikurum’omuntu. ⁶ Mu naku ezo abantu balihiga olufu, kai tibalilubona; balyegonga kufwa, kai olufu luliberuka hara.

⁷ Enzige ezo zaliga zili nk’efarasi zyetegekire kurwana; ha mitwe zazo haliga haliho kuti engata nk’ez’ezahabu, kai obusyo bwazo bwasusanaga nk’obw’abantu. ⁸ Zaliga zili n’isoke nk’ely’abakazi, kai ameno gazo gali nk’ameno g’entale; ⁹ zaliga zili n’enkingangingo nk’ez’echoma, kai akarundumo k’amababa gazo kaliga kali nk’akarundumo k’amagali g’efarasi ningi ezikwiruka kurwana; ¹⁰ emikira zazo zaliga zili nk’ez’ ebimina, kai embuli zaliga zili mu mikira zazo; zaliga zili n’obuhicha bwo kunazy’abantu mezi atanu. ¹¹ Omukama wazo yaliga ali mumalaika w’enombe, ayetwaga mu kiyahudi bati: Abadoni, mu kigereki bati: Apolyoni, na mu kilatini bati: Omusingaricha. ¹² Obunale bwo kutandika bwahwereho; nawe lora, obundi bubili buchali obusyo.

¹³ Mumalaika wo mukaga nater’ekikuli; nimpulira ilaka niliruga mu mahembe ana g’etambiro ly’ezahabu, elili obusyo ya Mungu, ¹⁴ niligambira mumalaika wo mukaga ayaliga ali n’ekikuli, liti: Surumula bamalaika bana abasumikirwe ha mugera muhango Eufarati. ¹⁵ Aho bamalaika bana abaliga nibalindirira esaha, n’olunaku, n’okwezi, n’omwaka, nibasurumurwa, baite ekihinzu cha kasatu ch’abantu. ¹⁶ Olubaro lw’abantu abahanamire efarasi b’embaga egyo lwaliga luli lwa milyoni magana abili; kuba nahulire olubaro lwabo.

¹⁷ Nimbona efarasi zili ziti: abazihanamireho baliga bali n’enkingangingo zimutuku kinamuliro, na zibuluru n’ez’ekinakibiriti; emitwe z’efarasi zaliga zili nk’emitwe z’entale, kai mu kanwa kazo harugamoga omuliro n’omwika n’ekibiriti. ¹⁸ Emizibwe isatu ezo z’omuliro n’omwika n’ekibiriti ezarugamoga mu kanwa kazo nizita ekihinzu cha kasatu ch’abantu. ¹⁹ Kuba obuhicha bw’efarasi ezo bwaliga buli mu minwa na mu mikira zazo. Emikira zazo zasusanaga n’enzoka, nk’emitwe z’enzoka zo kuhutaza. ²⁰ Kai abantu bandi abaliga batesirwe emizibwe ezo nibabula kutamwa ebikorwa z’emikono zabo, bakaleka kuhabudu amasitani n’ebimungu by’ezahabu, by’efweza, by’isaba limutuku, by’amabale n’amati, ebitakuhicha kubona no kuhulira no kulibata; ²¹ nibabula kutamwa obwisi bwabo n’amalogo gabo n’obusihani bwabo n’obusuma bwabo.

EKITABO EKIKULIBWA.

¹ Kumara nimbona mumalaika ondi w’amani nahanantuka naruga mw’igulu, ayezongire elire, obukoma bwa Kongwa buli oluguru lw’omutwe gwe; obusyo bwe buli nk’ezoba, kai amaguru ge nk’enomyo z’omuliro; ² mu mukono gwe ali n’akatabo kafumbwire. Mbe akatimba ekigere che ch’obulyo ha nanza, kai ekigere che ch’obumoso ha nsi. ³ Nahamuka n’ilaka ihango, nk’entale nerunduma; ka yahamukire, embaragazi musanzu nizigamba. ⁴ Embaragazi musanzu ka zagambire, sanga ninenda kwandika, nawe nimpulira ilaka niliruga mw’igulu nilingambira liti: Fundikira ebyo embaragazi musanzu zigambire, otabyandika. ⁵ Mbe hatyo mumalaika owe sanga mbwene aimerere ha nanza na ha nsi nayeleza omukono gwe oluguru, ⁶ nalahirira omulame w’emyaka z’emyaka, ayahangire igulu n’ebilimo, ensi n’ebilimo, enanza n’ebilimo, okw’omwanya gulihwaho, ⁷ n’okwo, mu naku z’omumalaika wo musanzu, k’aliter’ekikuli, olufubo lwa Mungu lulihika, nk’okwo yalagire n’abahereza be abalagi.

⁸ Kai ilaka elyo sanga nahulire niliruga mw’igulu, nilisuba kuntengera niligira liti: Roko, twara akatabo kafumbwire, mu mukono gw’omumalaika aimerere ha nanza na ha nsi. ⁹ Ningenda ha mumalaika nimmugambira kumpa akatabo. Nangambira ati: Twara ekitabo, okimire; kilikusalirira mu nda, nawe mu kanwa kawe kilikunulira nk’obwoki. ¹⁰ Nintwara ekitabo mu mukono gw’omumalaika, ninkimira; kai mu kanwa kange chaliga nikinura nk’obwoki, nawe ka nakilire, nikinsalira mu nda. ¹¹ Aho nibangambira bati: Oli no kusuba kulaga obusyo y’enganda ningi, n’amahanga, n’endimi, n’abakama.

EKIKULI CHO MUSANZU. — ABAFU BAKULAMURWA.

¹ Kumara nibampa olubingo nilususana n’olusanzu, nibangambira bati: Imuka, olengere eklezia ya Mungu, n’etambiro, n’abakuhabudumo. ² Olubuga oluli hanza y’eklezia, oluleke, otalulengera, kuba lukasigirwa abasenzi, kai balilibatira ekikale kitakatifu mezi makumi ana n’abili. ³ Kai ndiha embona zange ibili omulimo gwo kulaga naku kihumbi kimo na magana abili na makumi mukaga, bazwere amagunira. ⁴ Niz’emizituni ibili n’emitereko ibili ezili obusyo y’Omukama w’ensi. ⁵ Omuntu akaba nayenda kubanazya, omuliro guliruga mu kanwa kabo, guyoche abahate babo; omuntu akaba nayenda kubahenera, ali no kusingarika atyo. ⁶ Bali n’obuhicha bwo kukinga igulu, enzula eleke kugwa mu naku ezo balalaga; bali n’obuhicha bwo kuhindula amenzi gakaba ensagama, n’obwo kuterera ensi emizibwe z’enganda n’enganda, buli lugendo olwo balayenda.

⁷ Kandi ka balimara omulimo gwabo gw’embona, ekikaka ekikunegera nikiruga mu nombe kilibarwana, kibasinge, kibete; ⁸ kai emitumbi zabo zilisigara ha maguliro g’ekikale kikuru, ekikwetwa kinamwoyo kiti: Sodoma na Misri, aho omukama wabo wena yalegirwe ha musalaba. ⁹ Mbe ab’enganda, n’ab’ amahanga, n’ab’endimi, n’ab’amakama, balibona emitumbi zabo naku isatu n’ihinzu, kai tibalifuha emitumbi zabo zizikwe mu bituro. ¹⁰ Abatuzi b’ensi balibasemererwa, balihirahirwa, balitumirana emiherezo, kuba abalagi babili abo baliba banalize abatuzi b’ensi. ¹¹ Nawe enaku isatu n’ihinzu ka zarabireho, omwoyo gw’obulame niguruga hali Mungu nigubatahamo. Mbe nibemuka ha maguru gabo: abababwene nibakanguka muno. ¹² Nibahulira ilaka ly’amani niliruga mw’igulu nilibagambira liti: Muhaname hanu. Nibahanama mw’igulu mu lire ha meso g’abahate babo. ¹³ Kachwi n’ako hakabaho namutikima mpango: ekihinzu ch’ekumi ch’ekikale nikigwa, kai abantu bihumbi musanzu nibetwa namutikima egyo; bandi nibachundw’olumazi, nibakuza Mungu wo mw’igulu. ¹⁴ Obunale bwa kabili bwahwereho, obwa kasatu buli hehi.

¹⁵ Mumalaika wo musanzu nater’ekikuli, kai amalaka g’amani nigahulirwa mw’igulu, gati: Obukama bw’ensi enu bwagabirwe Omukama wetu na Kristu we: alitwara mu myaka z’emyaka. Amina. ¹⁶ Aho abagurusi makumi abili na bana, abekere obusyo ya Mungu ha bitebe byabo, nibenama mu busyo bwabo nibahabudu Mungu, nibagira bati: ¹⁷ Tukukusima, Iwe Mukama Mungu Omuhicha wa byona, aliho, n’ayaliga aliho, n’aliza, obwo waherwe obuhicha bwawe bwingi n’engoma yawe. ¹⁸ Amahanga gakanigahara, kai ebiniga byawe nibiza hamo n’omwanya gwo kulamula abafu n’ogwo kuhera abahereza bawe abalagi, n’abatakatifu, n’abakutina izina lyawe, abakuru n’abato, n’ogwo kusingaricha abazundize ensi. ¹⁹ Aho eklezia ya Mungu nekinguka mw’igulu, kai tabernakulo y’omulago gwe nebonekera mw’eklezia ye, nihabaho endabyo, n’amalaka, na namutikima, n’amabale g’enzula mengi.

OMUKAZI N’ENZOKA. — OBULEMU MW’IGULU.

¹ Mbe aho olunyamo lukuru nilubonekera mw’igulu: omukazi, azwere izoba, ali n’okwezi ifwo y’ebigere bye, ha mutwe gwe ali n’engata y’enenezi ikumi n’ebili. ² Yaliga ali n’enda, nalira, arumirwe obusungu, nayenda kuzara. ³ Kandi olunyamo lundi nilubonekera mw’igulu: enzoka bihogo, eli n’emitwe musanzu n’amahembe ikumi, kai ha mitwe zayo eli n’engata z’ekikama musanzu. ⁴ Omukira gwayo gwakwesaga ekihinzu cha kasatu ch’enenezi, niguzinaga mu nsi. Kai enzoka neyemerera obusyo y’omukazi narumw’obusungu, elye omwana we, yamazire kuzara. ⁵ Nazara omwana mwozo, ayaliga ali no kutwara amahanga gona n’olusanzu lw’echoma; mbe omwana we nasagarwa hali Mungu na ha kitega che. ⁶ Nawe omukazi nairuka mw’iswa, aho Mungu yaliga amuchumire omwanya, bamulisye okwo naku kihumbi kimo na magana abili n’enaku makumi mukaga.

⁷ Obulemu buhango nibubaho mw’igulu: Mikaeli n’abamalaika be nibarwana enzoka, kai enzoka nerwana hamo n’abamalaika bayo. ⁸ Nawe bonene tibasingire: kurug’aho nibaburwa omwanya mw’igulu. ⁹ Mbe enzoka egyo mpango nekubitwa, enzoka egyo ya kara, ekwetwa dyaboli na Sitani, ekukongya ensi yona; nekubitwa mu nsi, kai abamalaika bayo nibakubitwa nayo. ¹⁰ Nimpulira mw’igulu ilaka ly’amani niligira liti: Hati obuchunguzi bwahika, hamo n’amani n’obukama bwa Mungu wetu, n’obuhicha bwa Kristu we, kuba omulegi w’abatabani betu, ayabalegaga obusyo ya Mungu musana na mu kiro, yakubitwa; ¹¹ kai bonene basingire kuber’ensagama y’Akanabalega n’ekigambo ch’obwemerezi bwabo, kandi tibayenzire kulama kuhika kwanga kufwa. ¹² Hatyo musemererwe, igulu n’emwe abalimo. Ensi n’enanza ziligabona, kuba sitani libahanantukire n’ebiniga bingi, limanyire okwo gwamusagaho mwanya muke gwonka.

¹³ Mbe enzoka ka yabwene okwo yakubitirwe mu nsi, netembanisya omukazi ayaliga azere omwana mwozo. ¹⁴ Nawe omukazi nahabwa amababa abili g’isamba ihango, ahiche kuguruka mw’irungu mu buturo bwe, aho akulisibwa omwanya n’emyanya n’ihinzu ly’omwanya, hara n’enzoka. ¹⁵ Aho enzoka nenagira omukazi amenzi nk’omugera, nigaruga mu kanwa kayo, asagarwe omugera. ¹⁶ Nawe ensi nezuna omukazi, neyasamya omunwa gwayo nemira omugera ogwo enzoka yaliga yanagire neruga mu kanwa kayo. ¹⁷ Mbe hatyo enzoka nenigahalira omukazi, negenda kurwana abana be bandi, abakuhich’ebilagiro bya Mungu n’abali n’ebigambo bya Yezu Kristu. ¹⁸ Nebaho ha museni gw’enanza.

ERIKAKA CH’EMITWE MUSANZU N’AMAHEMBE IKUMI.

¹ Kumara nimbona nikiruga mu nanza ekikaka kili n’emitwe musanzu n’amahembe ikumi, ha mahembe gacho haliho engata z’ekikama ikumi, na ha mitwe zacho amazina g’ebizumi bya Mungu. ² Ekikaka echo mbwene nikisusana n’endala, ebigere byacho bili nk’ebigere bya beri, kai omunwa gwacho nk’omunwa gw’entale; mbe enzoka nekiha amani gayo n’obuhicha bwingi. ³ Nimbona omutwe gumo gwacho kuti guhutere obuhuta bw’olufu; nawe obuhuta obwo bw’olufu nibukira, kai ensi yona nekuma neruba ekikaka. ⁴ Nibahabudu enzoka, eyaliga ehere ekikaka obuhicha; nibahabudu ekikaka nibagira bati: Akwingana n’ekikaka ni ga? alihicha kukirwana ni ga? ⁵ Nikihabwa omunwa nigufumora ebigambo byo kwekuza n’ebizumi bya Mungu; nikihabwa obuhicha bwo kukola mezi makumi ana n’abili. ⁶ Nichasamya omunwa gwacho kuzuma Mungu, kuzuma izina lye na tabernakulo ye n’abatura mw’igulu. ⁷ Nikihabwa n’obuhicha bwo kurwana abatakatifu no kubasinga; nikihabwa kutwara buli luganda lwona, na buli ihanga lyona, na buli lulimi lwona, na buli bukama bwona. ⁸ Mbe abatuzi bona bo mu nsi nibakihabudu, abo amazina gatayandikirwe, kurug’obuhangi bw’ensi, mu kitabo ch’obulame ch’Akanabalega akesirwe. ⁹ Ali n’amatwi, ahulire. ¹⁰ Aliba asagere mw’ibohero, aligenda mw’ibohero; aliba ayesiz’embanda, ali no kwisibw’embanda. Niho hanu obweguminsiriza no kwikiriza kw’abatakatifu.

EKIKAKA KINDI N’AMAHANO GACHO.

¹¹ Nimbona n’ekikaka kindi nikiruga mu nsi nikihanama, kili n’amahembe abili nk’ag’akanabalega; kai chaliga nikifumora nk’enzoka. ¹² Chagiraga obuhicha bwona bw’ekikaka cho kutandika obusyo yacho; nikigira ensi yona n’abatuzi bayo bahabudu ekikaka cho kutandika, echaliga kili n’obuhuta bw’olufu nibukira. ¹³ Nikikola amahano mahango, kuhika kuhanantula mu nsi omuliro gwo mw’igulu, ha meso g’abantu. ¹⁴ Nikikongya abatuzi bo mu nsi kuber’ebikumyo, ebyo chaliga nikihicha kukola obusyo y’ekikaka, nikigambira abatuzi bo mu nsi kukola ekisusano ch’ekikaka ekihutazibwe embanda, nikilora. ¹⁵ Nikihabwa obuhicha bwo kuloza ekisusano ch’ekikaka no kukifumoza no kwisya bona abalayanga kuhabudu ekisusano ch’ekikaka. ¹⁶ Hona kiligira bona, abato n’abakuru, abahango n’abahabi, abatali beru n’aberu, banyamwe ha mukono gwabo mulyo na ha busyo bwabo, ¹⁷ kai atali n’olunyamo, hamo izina ly’ekikaka, hamo olubaro lw’ezina lyacho, talihicha kugula no kuguza. ¹⁸ Niho hanu obwetegereza. Ali n’obwenge, abare olubaro lw’ekikaka; kuba ni lubaro lw’ekimuntu, kai olubaro lwacho ni magana mukaga na makumi mukaga na mukaga.

AKANABALEGA H’EBANGA. — IGESA.

¹ Nindora nimbona Akanabalega kemerere h’ebanga lya Syoni, hamo n’abantu bihumbi igana limo na makumi ana, abaliga bali n’ezina lyako n’ely’Ese lyandikirwe ha busyo bwabo. ² Nimpulira ilaka niliruga mw’igulu, nilisusana n’omubaruko gw’amenzi mengi n’ogw’embaragazi mpango; ilaka elyo nahulire nilisusana n’ely’abatezi b’amatungu nibater’amatungu gabo. ³ Baliga nibayemba olwembo luhya obusyo y’ekitega n’ey’enamenswa ina n’ey’abagurusi; kai hataliho n’omo ayahichaga kwemba olwembo olwo, raba si abantu bihumbi igana limo na makumi ana na bina, abachungwirwe mu nsi. ⁴ Abo nibo abatarofuhere n’abakazi, kuba bakobire. Nibo abakuruba Akanabalega honahona aho kakuza. Abo bakuchungurwa mu bantu, nka bakatanga abaherezibwe Mungu n’Akanabalega, ⁵ kai mu kanwa kabo tihasangirwemo obubehi, kuba tibali n’akabi obusyo y’ekitega cha Mungu.

⁶ Kumara nimbona mumalaika ondi naguruka hagati y’egulu, atwere evanjeli etahwaho, agimanyisize abakutura mu nsi, na buli ihanga, na buli luganda, na buli lulimi na buli bukama. ⁷ Yaliga nagamba n’ilaka ihango ati: Mutine Omukama, mumukuze, kuba akatungu k’elamu ye kezire; muhabudu ayakozire igulu n’ensi, enanza n’enindo z’amenzi. ⁸ Mumalaika ondi namuruba nagira ati: Yagwire, yagwire, Babiloni enu mpango, eyanwesize amahanga gona evini esazile y’obusihani bwayo. ⁹ Mumalaika wa kasatu nabaruba, nahamuka muno nagira ati: Omuntu akaba nahabudu ekikaka n’ekisusano chacho, akanyamwa olunyamo lwacho ha busyo bwe hamo mu mukono gwe, ¹⁰ wenene wena alinwa evini y’ebiniga bya Mungu, eyatebweho mu kikompe ch’ebiniga bye, kai alinaranazibwa mu muliro na mu kibiriti, ha meso g’abamalaika batakatifu n’Akanabalega; ¹¹ omwika gw’ebinaranazo byabo gulinegera mu myaka z’emyaka, kai abalaba bahabudu ekikaka n’ekisusano chacho no kunyamwa olunyamo lw’ezina lyacho tibalihumura musana na mu kiro. ¹² Niho hanu obweguminsiriza bw’abatakatifu, abagumya ebilagiro bya Mungu no kwikiriza kwa Yezu.

¹³ Aho nimpulira ilaka niliruga mw’igulu nilingambira liti: Yandika oti: Abakufwa bali n’Omukama, bali n’omugisa. Na hati, engambo y’Omwoyo, nibahumure mu milimo zabo, kuba ebikorwa byabo bikubaruba. ¹⁴ Nindora, kai ndilyo elire limwera, ha lire elyo omuntu aikere, nasusana n’Omwana w’omuntu, ali n’engata y’ekikama y’ezahabu ha mutwe gwe, kai igesyo lihyozire mu mukono gwe. ¹⁵ Aho mumalaika ondi nahuruka mw’eklezia nahamira n’ilaka ihango ayaliga aikere ha lire, nagira ati: Gumya igesyo lyawe, ogese; kuba omwanya gwo kugesa guhikire, obw’igesa ly’ensi lihire. ¹⁶ Mbe ayaliga aikere ha lire nagumya igesyo lye ha nsi, kai ensi nechura egesirwe. ¹⁷ Mumalaika ondi nahuruka mw’eklezia eli mw’igulu, wena ali n’igesyo lihyozire. ¹⁸ Kai mumalaika ondi naruga mw’itambiro, ali n’obuhicha mu muliro; nahamira n’ilaka ihango ayaliga ali n’igesyo lihyozire, nagira ati: Gumya igesyo lyawe lihyozire, osorome amasangasira g’omuzabibu gw’ensi, kuba emizabibu zagwo zihire. ¹⁹ Mbe mumalaika nataho ha nsi igesyo lye lihyozire, natamo emizabibu mw’izungiro ihango ly’ebiniga bya Mungu. ²⁰ Nibazunga mw’izungiro hesazi y’ekikale, kai ensagama neruga mw’izungiro nehika ha macholerog’efarasi mu bugazi bw’esitadikihumbi kimo na magana mukaga.

ABASINGI BAKUKUZA MUNGU.

¹ Nimbona olunyamo lundi mw’igulu, lukuru n’olwo kukumisya: bamalaika musanzu abaliga nibatwara emizibwe musanzu zo kuhereruka, kuba nizo zikumaliza ebiniga bya Mungu. ² Nimbona kuti enanza y’ilore, etobene n’omuliro; abaliga basingire ekikaka, n’ekisusano chacho, n’olubaro lw’ezina lyacho, baliga bali h’enanza egyo y’ilore, bali n’amatungu ga Mungu. Bayembaga olwembo lwa Musa, ³ omuhereza wa Mungu, n’olwembo lw’Akanabalega, bati: Mukama Mungu Omuhicha wa byona, ebikorwa byawe bili bikuru n’ebyo kukumisya; Iwe Mukama w’emyaka, emihanda zawe zihikire, zikomereze. ⁴ Alibura kukutina ni ga, Mukama, akayanga kukuza izina lyawe? Kuba iwe wenka oizwire obufura, kai amahanga gona galiza kukuhabudu, kuba elamu zawe zimanyisibwe.

⁵ Kumara nindora; ngigi eklezia ya tabernakulo y’obwemerezi nekinguka mw’igulu; ⁶ n’abamalaika musanzu abaliga nibatwara emizibwe musanzu nibahuruka mw’eklezia, bazwere elinieyezile na mwera kobo, bebohize ha kifuba emiko z’ezahabu. ⁷ Kai emo y’enamenswa ina neha bamalaika musanzu ebikompe z’ezahabu musanzu, bizwire ebiniga bya Mungu asingire mu myaka z’emyaka. ⁸ Mbe eklezia neizura omwika, kuber’ obukuru n’obuhicha bwa Mungu; hataliho muntu ayahichaga kutahamo mw’eklezia, kuhika emizibwe musanzu z’abamalaika musanzu zihweho.

EBIKOMPE MUSANZU N’EMIZIBWE MUSANZU.

¹ Mbe nimpulira ilaka ly’amani niliruga mw’eklezia niligambira bamalaika musanzu liti: Roko, musesere ensi ebikompe musanzu by’ebiniga bya Mungu. ² Owo kutandika nagenda naserera ensi ekikompe che; aho abantu abaliga bali n’olunyamo lw’ekikaka n’abahabuduga ekisusano chacho nibakwatwa empolera mbi yo kutinisya. ³ Mumalaika wa kabili nasesera ekikompe che mu nanza; neba nk’ensagama y’omufu, n’ebyaliga nibilora mu nanza nibifwa byona. ⁴ Mumalaika wa kasatu nasesera ekikompe che mu migera na mu nindo z’amenzi; kai amenzi nigaba ensagama. ⁵ Nimpulira mumalaika w’amenzi nagira ati: Ohikire, Mukama, Iwe aliho n’ayaliga aliho: oli mutakatifu, Iwe ayalamwire atyo; ⁶ kuba basesire ensagama y’abatakatifu n’ey’abalagi, kai wabahere kunwa ensagama; kibahikire. ⁷ Nimpulira mumalaika ondi ha lubazu lw’itambiro, nagira ati: Nikwo, Mukama Mungu Omuhicha wa byona, elamu zawe zikomereze, zihikire.

⁸ Mumalaika wa kana nasesera izoba ekikompe che, nahabwa kunazya abantu n’omutagato gw’omuliro; ⁹ kai mu mutagato muhango ogwabayochaga abantu baliga nibazuma izina lya Mungu, ali n’emizibwe ezo mu buhicha bwe, nibabula kutamwa bakamukuza. ¹⁰ Mumalaika wa katanu nasesa ekikompe che ha kitega ch’ekikaka; mbe obukama bwacho nibwiragura, kai abantu nibaruma olulimi lwabo, kusaswa kwa muno; ¹¹ nibazuma Mungu w’igulu, kuber’obusasi bwabo n’obuhuta bwabo, nibabula kutamwa ebikorwa byabo. ¹² Mumalaika wo mukaga nasesa ekikompe che ha mugera muhango Eufarati; kai amenzi gagwo nigomera, abakama b’obuturuk’ezoba babone omuhanda. ¹³ Aho nimbona emyoyo zirofuhere isatu, nizisusana n’enkere, niziruga mu kanwa k’enzoka, na mu kanwa k’ekikaka, na mu kanwa k’omulagi w’obubehi. ¹⁴ Kuba niz’emyoyo z’amasitani, ezikola amahano, nizigendera abakama b’ensi yona kubasumbya kurwana ha lunaku lukuru lwa Mungu Omuhicha wa byona. ¹⁵ Lora, nkwiza nk’omusuma; ali n’omugisa, akukesy’obwire, akalinda emyenda ze, atalibata busa, bakabona ensoni ze. ¹⁶ Mbe Mungu alibasumbya aho hakwetwa Alimagedoni mu kiyahudi.

¹⁷ Mumalaika wo musanzu nasera ekikompe che oluguru; ilaka niliruga mw’eklezia, hehi n’ekitega, niligira liti: Byahwereho. ¹⁸ Nihabaho endabyo, n’amalaka, n’embaragazi, na namutikima mpango muno, hatakabereho nk’egyo eti kuruga abantu bali mu nsi. ¹⁹ Mbe hatyo ekikale kihango nikitaganisibwa mu bihinzu bisatu, ebikale by’abasenzi nibigwa, kai Mungu naizuka Babiloni mpango, naginwesya ekikompe ch’evini y’ebiniga bye. ²⁰ Amazinga gona nigeruka, kai amabanga nigabula. ²¹ Amabale mahango g’enzula, gazitohere nk’etalenta, nigaruga mw’igulu nigagwera abantu; kai abantu nibazuma Mungu kuber’omuzibwe gw’amabale g’enzula, kuba gwaliga gubihire muno.

BABILONI EIGUSIIBWE ENSAGAMA Y’ABAFWER’EDINI.

¹ Aho omo w’abamalaika musanzu abaliga bali n’ebikompe musanzu naiza nantengera, nagira ati: Iza, nkwoleche obusingi bw’ikazi ikuru ly’obusihani, elyekere ha menzi gazihire, ² owe abakama b’ensi berofuheze nalyo, kai abatuzi b’ensi nibatamira evini y’obusihani bwalyo. ³ Mbe nansagara mu mwoyo mw’irungu. Nimbona ikazi lyekere ha kikaka kitukwire, kisakankire amazina g’ebizumi bya Mungu, kili n’emitwe musanzu n’amahembe ikumi. ⁴ Ikazi lyaliga lizwere emyenda z’epulupura na zimutuku, n’ebisugulicho by’ezahabu n’otubale tw’obuguzi bwingi n’enkwanzi, mu mukono gwalyo lili n’ekikompe ch’ezahabu kizwire obuyaga n’obulofu bw’obusihani bwalyo. ⁵ Ha busyo bwalyo izina linu lyaliga lyandikirwe kiti: Lufubo, Babiloni nkuru, nina obusihani n’obuyaga bw’ensi. ⁶ Nimbona ikazi elyo, litamire ensagama y’abatakatifu, n’ensagama y’abafwer’edini ba Yezu; ka nalibwene, ninkuma muno. ⁷ Nawe mumalaika nangambira ati: Okukumira ki? Ka nkugambire olufubo lw’ikazi n’olw’ekikaka ekilitegula n’ekili n’emitwe musanzu n’amahembe ikumi.

⁸ Ekikaka echo wabwene chaliga kiliho, nawe hati tikikiliho; kili no kuhanama kuruga mu nombe no kuza kusingarika; kai abatuzi b’ensi, abo amazina gatayandikirwe mu kitabo ch’obulame kurug’obuhangi bw’ensi, balikuma, ka balibona ekikaka echaliga kiliho, nawe ekitakiliho.

⁹ Mbe hanu obwenge bubeho bwizwire obwetegereza. Emitwe musanzu ni mabanga musanzu ago ikazi likereho; hona zili bakama musanzu. ¹⁰ Batanu bagwire; omo aliho, ondi takezire; k’aliza, alibaho mwanya muke. ¹¹ Ekikaka, echaliga kiliho, nawe ekitakiliho hati, kili cho munana, kai kili mu musanzu, nawe kikuza kusingarika. ¹² Kandi amahembe ikumi ago wabwene ni bakama ikumi abatakatwer’engoma; nawe balitwara nk’abakama saha emo, hamo n’ekikaka. ¹³ Bali n’ekihande kimo, kai baliha ekikaka amani gabo n’obuhicha bwabo. ¹⁴ Balirwana Akanabalega, nawe Akanabalega kalibasinga, kuba niwe Omukuru w’abakuru n’Omukama w’abakama; kai abali nage bayetwa abayesirwe, abasozirwe n’abesigwa.

¹⁵ Aho nangambira ati: Amenzi ago wabwene, aho ikazi likere, ni mahanga, n’enganda, n’endimi. ¹⁶ Kai amahembe ikumi ago wabwene ha kikaka galihata ikazi, galilizubya no kulisiga busa, galilya engingo zalyo, lyonene galilyocha mu muliro. ¹⁷ Kuba Mungu akata mu mitima zabo kukola eby’ akwenda, no kuha ekikaka obukama bwabo, kuhika ebigambo bya Mungu bihike. ¹⁸ Mbe ikazi elyo wabwene ni kikale kihango, ekikutwara abakama b’ensi.

KUGWA KWA BABILONI.

¹ Kumara nimbona mumalaika ondi nalengetuka naruga mw’igulu, ali n’obuhicha bwingi; kai ensi nemulikirwa ikuzo lye. ² Nahamuka n’amani nagira ati: Yagwire, yagwire Babiloni mpango; yabere buturo bw’amasitani, n’obwirukiro bwa buli mwoyo gw’obulofu, n’obwirukiro bwa buli noni y’obulofu n’ehikire kuhatwa; ³ kuba amahanga gona ganwere evini y’ebiniga by’obusihani bwayo, kai abakama b’ensi berofuheze nayo, n’abatuzi b’ensi betungisize obuhango bwayo bwo kusagiriza. ⁴ Kandi nimpulira ilaka lingi niliruga mw’igulu, niligira liti: Muhuruke hagati yayo, imwe ihanga lyange, mutakobera ebiheno byayo, mutakobera emizibwe zayo. ⁵ Kuba ebiheno byayo byahikire mw’igulu, kai Omukama yezukire obubi bwayo. ⁶ Mugikolere nk’okwo yabakolere, mugirongore kabili ha bw’ebikorwa byayo; mu kikompe echo yabanwesize, mugisesere endengo ibili. ⁷ Mu lulengo nk’olwo yekulize, ekaba mu masemererwa, mu lulengo olwo mugihe obusasi n’obuzune, kuba yagambire mu mutima gwayo eti: Nkutwara nk’omugole, tinafwerw’ebani, tindyarama. ⁸ Nich’ echo emizibwe zayo zilizira lunaku lumo, n’olufu, n’obwarami, n’enzala, kai elisingarikibwa omuliro, kuba ali n’obuhicha Mungu, aligilamula.

⁹ Abakama b’ensi aberofuheze no kusemererwa nayo baligilirira, balyetera ha kifuba, ka balibona omwika gwo kwokibwa kwayo. ¹⁰ Bemerere haraho, kuber’obutini bw’ebinaranazo byayo, baligira bati: Mabe! mabe! Babiloni, ekikale kikuru, ekikale ch’amani, katungu kamo elamu yawe yakuhikire. ¹¹ Kai abatunzi b’ensi baligilirira no kwelirira, kuba ebintu byabo biliburwa abaguzi: ¹² ebintu by’ezahabu n’efweza, by’otubale tw’obuguzi bwingi n’enkwanzi, emyenda z’elinin’ez’epulupuran’ez’enkobyo n’ezimutuku, amati g’omwaya muzima g’enganda n’enganda, ebintu by’omwino by’enganda n’enganda, n’ebintu by’enganda n’enganda by’otubale tw’obuguzi bwingi, n’eby’isaba limutuku, n’eby’echoma, n’eby’emarmori, ¹³ n’amati g’akarango n’obumosi n’omunami, n’omugazu, n’evini, n’amazuta, n’ensyano n’engano, n’ebitunganwa, n’enabalega, n’efarasi, n’amagari, n’aberu, n’abantu. ¹⁴ Ebirabo eby’omwoyo gwawe gwayegongaga byerire hara n’ewe; ebintu bizima byona n’eby’ekuzo byakubula, kai tibilisuba kubonwa. ¹⁵ Abatunzi b’ebintu ebyo, abetungisize nayo, balikara haraho, kuber’obutini bw’ebinaranazo byayo, balilira no kwelirira, ¹⁶ bati: Mabe! mabe! ekikale kikuru echaliga kizwere elini n’epulupura n’ezimutuku, eyeligirikaga ezahabu n’otubale tw’obuguzi bwingi n’enkwanzi; ¹⁷ saha emo yonka obutunga obwo bwona bwabula. Kai abagobi bona n’abakubuga mu nanza bona, ababugi n’abatunzi bo mu nanza, bakabera hara, ¹⁸ nibahamuka, ka babwene aho chayokibwe, nibagira bati: Ni kikale ki echainganaga n’ekikale kihango kinu? ¹⁹ Bakanaga enkungu ha mitwe zabo, nibahamuka, nibalira nibelirira, nibagira bati: Mabe! mabe! ekikale kihango echatungisyaga obuhango bwacho bakana mato bona b’enanza, chasingarikibwa katungu kamo. ²⁰ Okisemererwe, iwe igulu, n’emwe mwena, entumwa ntakatifu n’abalagi, kuba Mungu akabehora hali chonene.

²¹ Aho mumalaika w’amani nayeleza ibale, nilisusana n’olumengo luhango, nalinaga mu nanza, nagira ati: N’obwangu nk’obwo butyo Babiloni, ekikale kihango, elikubitwa, kai telisuba kubonwa nangu. ²² Kandi ilaka ly’abatezi b’amatungu n’enanga, n’ely’abatezi b’engoza n’ekikuli, tililisuba kuhulirwa owawe; kai omubuya n’omo, wa buli bubuya bwona, talisangwamo; n’olumengo lwona tilulisuba kuhulirwa mul’ iwe; ²³ n’olumuli lw’etala tilulisuba kwaka owawe, n’ilaka ly’omuswezi n’omwenga tililisuba kuhulirwa owawe, kuba abatunzi bawe baliga bali bakama b’ensi, no kuba amahanga gona gakaligwa obuligi bwawe. ²⁴ Muli chonene basangiremo ensagama y’abalagi n’ey’abatakatifu n’ey’abesirwe bona mu nsi.

EKIGAMBO CHA MUNGU.

¹ Kumara nimpulira kuti ilaka ly’embaga ningi mw’igulu, niligira liti: Alleluia; obuchunguzi n’ikuzo n’obuhicha bili hali Mungu wetu, ² kuba elamu ze zikomereze, zihikire, kai hati yalamwire ikazi ikuru ly’obuyaga, elyazundize ensi n’obusihani bwalyo, nayehora ensagama y’abahereza be, eyaseserwe emikono zalyo. ³ Nibasuba kugamba bati: Alleluia; kai omwika gwacho nigunegera mu myaka z’emyaka. ⁴ Aho abagurusi makumi abili na bana n’enamenswa ina nibenama nibahabudu Mungu, aikere ha kitega, nibagira bati: Amina, alleluia. ⁵ Kumara ilaka niliruga mu kitega niligira liti: Nimukuze Mungu wetu, imwe mwena abahereza be, n’emwe abakumutina, abato n’abakuru. ⁶ Nimpulira kuti enombo y’ekipipi kingi, na kuti ezogotano y’amenzi mengi, na kuti embaragazi z’amani, nibagira bati: Alleluia, kuba Omukama Mungu Omuhicha wa byona yatahiremo mu bukama bwe. ⁷ Tusemererwe, nituhirahirwe, nitumukuze, kuba obwenga bw’Akanabalega bwahikire, kai omwenga wako yetegekire. ⁸ Nahabwa kuzwara ez’elini nzima eyezire kobo; kuba elini niby’ ebikorwa bizima by’abatakatifu. ⁹ Aho mumalaika nangambira ati: Yandika oti: Bali n’omugisa abayeterwe amageni g’obwenga bw’Akanabalega. Nangambira ati: Ebigambo ebyo bya Mungu ni bya kimo. ¹⁰ Ningwa mu maguru ge kumuhabudu. Nawe nangambira ati: Leka; ndi muhereza nk’ewe n’abatabani banu abali n’ebigambo bya Yezu. Ohabudu Mungu; kuba ebigambo bya Yezu nibyo bikuzara obulagi.

¹¹ Kumara nimbona igulu likingwire, kai efarasi katale neboneka; ayaliga agihanamire yayetwaga Omwesigwa n’Omukomereza: akulamula narwana kihikire. ¹² Ameso ge galiga gali nk’olubezi lw’omuliro, kai ha mutwe gwe yaliga ali n’engata ningi z’ekikama, kandi yaliga yayandikirwe izina elitakumanywa muntu, atali wenene. ¹³ Yaliga azwere omwenda gusombize ensagama, kai izina lye akwetwa Ekigambo cha Mungu. ¹⁴ Embaga zo mw’igulu zaliga nizimuruba ha farasi zikatale, zizwere elini mwera kobo. ¹⁵ Mu kanwa ke harugamoga embanda namogi abili, ateme amahanga gona; aligatwara n’olusanzu lw’echoma; niwe wenene akuzunga mw’izungiro ly’evini y’ebiniga bya Mungu Omuhicha wa byona. ¹⁶ Ha mwenda gwe na ha kibero che chandikirwe kiti: Omukama w’abakama, n’Omukuru w’abakuru.

¹⁷ Aho nimbona mumalaika aimerere mw’izoba, nahamuka muno nagambira enoni zona ezigurukaga hagati y’igulu, nagira ati: Mwize, nimusumbire amageni makuru ga Mungu, ¹⁸ muhiche kulya engingo z’abakama, engingo z’abakuru b’obulemo, engingo z’abelemi, engingo z’efarasi n’ez’abazihanamire, n’engingo z’abantu bona, abatali beru n’aberu, abato n’abakuru. ¹⁹ Nimbona ekikaka, n’abakama b’ensi, n’embaga zabo, zisumbire hamo kurwana ayaliga ahanamire efarasi, n’embaga ye, ²⁰ Nawe ekikaka nikikwatwa hamo n’omulagi w’obubehi, ayaliga akozire obusyo yacho amahano, agaliga gakongize abaliga banyamirwe olunyamo lw’ekikaka, no kuhabudu ekisusano chacho. Ha bubili bwabo nibanagwa bakilora mw’itunga ly’omuliro n’ekibiriti; ²¹ kai abandi nibesibwa embanda eyarugaga mu kanwa k’ayaliga ahanamire efarasi; mbe enoni zona nizigusibwa engingo zabo.

EMYAKA KIHUMBI KIMO. — KUZOKA.

¹ Nimbona mumalaika nahanantuka naruga mw’igulu, ali n’olukinguzo lw’enombe n’omukufu muhango mu mukono gwe. ² Mbe nakwata enzoka, enzoka ya kara, niyo dyabolina Sitani, nagiboha kuhika emyaka kihumbi kimo zihweho. ³ Naginaga mu nombe, nagikingiramo, nataho olukingizo, eleke kukongya amahanga kuhika emyaka kihumbi kimo zihweho; kumara eli no kusurumurwa mwanya muke. ⁴ Nimbona ebitega, nibabikaliraho, nibahabwa kulamula; nimbona n’emyoyo z’abaliga batemirw’ebicha kuber’ebigambo bya Yezu n’ebya Mungu, n’emyoyo z’abaliga bayangire kuhabudu ekikaka n’ekisusano chacho, n’abaliga batanyamirwe olunyamo lwacho ha busyo bwabo na ha mikono zabo; nibalama, nibatwar’engoma hamo na Kristu emyaka kihumbi kimo. ⁵ Abafu bandi tibasubire kulora kuhika emyaka kihumbi kimo zihweho. Nikwo kuzoka kwo kutandika. ⁶ Ali n’omugisa, kai ali mutakatifu ogwo akugabirwa ebyo kuzoka kwo kutandika; olufu lwa kabilitiluli n’obuhicha hali bonene, nawe baliba basaserdoti ba Mungu na Kristu, kai balitwar’engoma nage mu myaka kihumbi kimo. ⁷ Nawe emyaka kihumbi kimo ka zilihwaho, Isitani lilisurumurwa mw’ibohero lyalyo, lilirugamo, kai lilikongya amahanga agali ha bisago bina by’ensi, niz’ensonga za Gogi na Magogi, mbe lilibasumbya kurwana; bakanire nk’omuseni gwa ha chambu.

⁸ Bakanegera ha luguru lw’ensi, nibazingira enkambi y’abatakatifu n’ekikale ekikwendwa. ⁹ Nawe omuliro, ogwarugaga hali Mungu mw’igulu, niguhanantuka nigubayocha; kandi isitani elyabakongyaga nilinagwa mw’itunga ly’omuliro n’ekibiriti, aho ekikaka ¹⁰ n’omulagi w’obubehi balinaranazibwa musana na mu kiro mu myaka z’emyaka.

¹¹ Aho nimbona ekitega kihango kimwera, n’ayaliga aikereho; obusyo ye igulu n’ensi nibiruka, nibibura kimo. ¹² Nimbona abafu, abakuru n’abato, bemerere obusyo y’ekitega. Mbe ebitabo nibifumbururwa, kai nibafumburura ekitabo kindi, nich’ekitabo ch’obulame; mbe hatyo abafu nibalamurwa ha bw’ebikorwa byabo, nk’okwo byaliga byandikirwe mu bitabo ebyo. ¹³ Enanza yona nesubya abafu abaliga balimo muli yonene; olufu lwona na kuzimu nibisubya abafu babyo, kai buli muntu wena nalamurwa ha bw’ebikorwa bye. ¹⁴ Kumara kuzimu n’olufu nibinagwa mw’itunga ly’omuliro. Nilw’olufu lwa kabili. ¹⁵ Mbe hatyo buli muntu wena, atasangirwe ayandikirwemo mu kitabo ch’obulame, nanagwa mw’itunga ly’omuliro.

YERUZALEMU MPYA. — IGULU.

¹ Aho nimbona igulu ihya n’ensi mpya; kuba igulu lyo kutandika n’ensi yo kutandika byaliga bibuzire, n’enanza yona yaliga etakiliho. ² Mbe ine, Yohana, nimbona ekikale kitakatifu, Yeruzalemu mpya, nikiruga mw’igulu hali Mungu, nikihanantuka, chetegekire nk’omwenga ayechumirire omuswezi we. ³ Nimpulira ilaka ly’amani, niliruga mu kitega, niligira liti: Mbubwo obuturo bwa Mungu hamo n’abantu, kai alitura nabo; baliba ihanga lye, kai Mungu wenene ali nabo, nka Mungu wabo; ⁴ mbe Mungu alikubura amaziga gona mu meso gabo, olufu tilulisuba kubaho, nali bwarami, nali eyombo, nali busasi, kuba ebya kara bibuzire. ⁵ Mbe aho ayaliga aikere ha kitega nagira ati: Lora, nkwenda kugira byona bibe bihya. Nangambira ati: Yandika. Kuba ebigambo ebyo bikomereze koto, bihikire. ⁶ Nangambira ati: Byahwa. Ine ndi alfa na omega, obutandikiro n’omuhero. Ali n’iliho, ndimunwesya busa chonka mw’iziba ly’amenzi g’obulame. ⁷ Omusingi alitunga ebyo, kandi ndiba Mungu we, kai wenene aliba mwana wange. ⁸ Nawe abatini n’abatekiriza, n’ab’obuyaga, n’abesi, n’abasihani, n’abafumu, n’abakuhabudu ebitali Mungu, n’ababehi bona, omugabo gwabo guliba mw’itunga elikuhya ly’omuliro n’ekibiriti: nilw’olufu lwa kabili.

⁹ Aho omo w’abamalaika musanzu abaliga bali n’ebikompe musanzu bizwire emizibwe musanzu zo kuhereruka, nanizaho, nantengera nagira ati: Iza, nkwoleche omwenga, omukazi w’Akanabalega. ¹⁰ Nansagara kuti mu mwoyo h’ebanga ihango lilehire, nanolecha ekikale kitakatifu, Yeruzalemu, nikiruga mw’igulu hali Mungu, nikilengetuka. ¹¹ Chaliga kili n’ikuzo lya Mungu, kai omwanga gwacho nigususana n’akabale k’obuguzi bwingi, akabale ka yasepi, nikengerera nk’elore. ¹² Chaliga kili n’endugu mpango elehire y’emilyango ikumi n’ebili; ha milyango baliga baliho bamalaika ikumi na babili, n’amazina gayandikirweho, nigo amazina g’enganda ikumi n’ebili z’abana ba Israeli. ¹³ Ha buturuka, emilyango isatu; ha buhanga, emilyango isatu; ha malimbe, emilyango isatu; ha bugwa, emilyango isatu. ¹⁴ Kai endugu y’ekikale yaliga eli n’ensimbagiriro ikumi n’ebili, na ha nsimbagiriro ezo ikumi n’ebili galiga galiho amazina g’entumwa ikumi n’ebili z’Akanabalega.

¹⁵ Ayanfumoreraga yaliga ali n’olulengo, olubingo lw’ezahabu, lwo kulengera ekikale n’emilyango zacho n’endugu. ¹⁶ Mbe nawe ekikale chombekirwe kinamafura, kai obulehi bwacho bukwingana n’obugazi bwacho. Akalengera ekikale n’olubingo lw’ezahabu, nasanga kili n’esitadibihumbi ikumi na bibili. Obulehi bwa hansi n’obulehi bw’orugulu n’obugazi bwacho bukwingana bwona. ¹⁷ Ka yalengere endugu yacho, nasanga eli n’ebita makumi ana na bina, mu lulengo lw’omuntu, oluli lw’omumalaika. ¹⁸ Endugu yaliga eyombekirwe n’ibale lya yasepi, kai ekikale chaliga kili ch’ezahabu ya kimo, nesusana n’elore liyezire. ¹⁹ Ensimbagiriro z’endugu zaliga zisugulikibwe otubale tw’obuguzi bwingi tw’enganda n’enganda. Ensimbagiriro yo kutandika yaliga eli ya yasepi; eya kabili, ya safiro; eya kasatu, ya kalikedoni; eya kana, ya meralidi; ²⁰ eya katanu, ya sadonuki; eyo mukaga, ya sardiyo; eyo musanzu, ya krusolito; eyo munana, ya berulo; eyo mwenda, ya topazi; ey’ekumi, ya kruzofaso; ey’ekumi n’emo, ya hyasinto; ey’ekumi n’ebili, y’ametisiti. ²¹ Kai emilyango ikumi n’ebili zaliga zili nkwanzi ikumi n’ebili; buli mulyango gwaliga gukozirwe enkwanzi emo yonka; kandi iguliro ly’ekikale lyaliga lili ly’ezahabu ya kimo, nesusana n’elore elikulorerana.

²² Timbwenemo eklezia; kuba Omukama Mungu Omuhicha wa byona niwe ali eklezia yamo, hamo n’Akanabalega. ²³ Ekikale tikikena izoba n’okwezi, kimulikwe, kuba ikuzo lya Mungu nilyo likukimulicha, kai Akanabalega ni lumuli lwacho. ²⁴ Amahanga galilibata mu mwanga gwacho, kai abakama b’ensi balikileteramo ikuzo lyabo n’ikumucho lyabo. ²⁵ Emilyango zacho tizilikingwa musana, kuba ekiro tikilibaho omwo. ²⁶ Balileteramo ikuzo n’ikumucho ly’amahanga. ²⁷ Ekintu kirofuhere, n’omuntu w’obubi hamo w’obubehi talitahamo, nawe abo bonka abayandikirwe mu kitabo ch’obulame ch’Akanabalega.

OMUGERA N’ETI LY’OBULAME. — YEZU NAFUMORA.

¹ Nanolecha omugera gw’amenzi g’obulame, nigalorerana nk’ilore, niguruga mu kitega cha Mungu n’Akanabalega. ² Hagati y’iguliro ly’ekikale, na ha mbazu ibili z’omugera, lyaliga liliho iti ly’obulame, elikuraba ebirabo ikumi na bibili, niliraba buli kwezi, kai amababi g’eti elyo gakukiza amahanga. ³ Omuzumo tigulisuba kubaho; nawe ekitega cha Mungu n’Akanabalega kiliba aho, kai abahereza be balimuhereza. ⁴ Balibona obusyo bwe, kai izina lye lilyandikwa ha busyo bwabo. ⁵ Ekiro kiliburaho, mbe tibalikena olumuli lw’etala nali omwanga gw’ezoba, kuba Omukama Mungu alibamulicha, kai balitwar’engoma mu myaka z’emyaka.

⁶ Aho nangambira ati: Ebigambo ebyo ni bya kimo koto, bikomereze; Omukama, Mungu w’emyoyo z’abalagi, atumire mumalaika we, ayoleke abahereza be ebili hehi no kuhika. ⁷ Lora, nkwiza bwangu. Akugumya ebigambo by’omulago gw’ekitabo kinu, ali n’omugisa. ⁸ N’ine Yohana, ayahulire no kubona ebyo. Kai ka nabihulire no kubibona, ningwa mu maguru g’omumalaika ayabinolekaga, mmuhabudu. ⁹ Nawe akangambira ati: Otakola otyo; kuba ndi muhereza nk’ewe n’abatabani banu abalagi, n’abakugumya ebigambo by’omulago gw’ekitabo kinu. Ohabudu Mungu. ¹⁰ Kumara nangambira ati: Otafundikira ebigambo by’omulago gw’ekitabo kinu, kuba omwanya guli hehi. ¹¹ Akukola obubi, agume kubukola; arofuhere, agume kwerofuhaza; ahikire, agume kukol’ebihikire; omutakatifu agume kwetakatifuza.

¹² Lora, ndi hehi no kwiza, kai omuhero gwange guli n’ene, ndongore buli muntu wena ha bw’ebikorwa bye. ¹³ Ndi alfa na omega, wo kutandika n’owo kuhereruka, obutandikiro n’omuhero. ¹⁴ Bali n’omugisa abakunabya ebizwaro byabomu nsagama y’Akanabalega, bahiche kuhabwa eby’eti ly’obulame no kutahiramo ekikale mu milyango. ¹⁵ Embwa zisigare hanza, n’abafumu, n’abasihani, n’abesi, n’abakuhabudu ebitali Mungu, na buli muntu wena akwenda obubi nabukola. ¹⁶ Ine Yezu, ntumire mumalaika wange kubamanyisya ebyo mw’eklezia zanu. Ndi mutenga n’obuzare bwa Daudi, enenezi emwekire ya bwanencha. ¹⁷ Omwoyo n’omwengabagamba bati: Iza. Ali n’iliho aize; akwenda, ahabwe busa chonka amenzi g’obulame.

¹⁸ Nkugambira buli muntu wena akuhulira ebigambo by’omulago gw’ekitabo kinu, nti: Alyongeraho kintu, Mungu alimwongeraho emizibwe ezyandikirwe mu kitabo kinu; ¹⁹ kai alihaho kintu ha bigambo by’ekitabo ch’omulago gunu, Mungu alimwihiraho omugabo gwe gw’ekitabo ch’obulame, n’ogw’ekikale kitakatifu, n’ogw’ebyandikirwe mu kitabo kinu. ²⁰ Akumanyisya ebyo natenga, ati: Nikwo, ndi hehi no kwiza. Amina. Noize, Mukama Yezu. ²¹ Enema y’Omukama wetu Yezu Kristu ebe n’emwe mwena. Amina.