Ha BanaFilipi

PAULO NASIMA MUNU.

¹ Paulo na Timote, beru ba Yezu Kristu, ha batakatifu bona ba Filipi muli Yezu Kristu, hamo n’abepiskopi n’abadyakoni. ² Mungu Tata wetu n’Omukama Yezu Kristu babahe enema n’omulebo.

³ Nkusima Mungu wange buli lugendo olwo nkubezuka, ⁴ nimbasabira bucha bucha mu sala zange zona, ninsemererwa ⁵ obwanankuzi bwanu bw’evanjeli ya Kristu n’obweguminsiriza bwanu, kuruga olunaku lwo kutandika kuhika hati. ⁶ Nkutegeza ningira nti: Ayatandikire mul’imwe omulimo muzima ogwo, aligumaliza kuhika ha lunaku lwa Yezu Kristu. ⁷ Kai ebitekateko ebyo hal’imwe mwena bihikire, kuba muli mu mutima gwange, imwe abakukobera obusemererwa bwange, mw’ibohwa lyange nka mu bukingiriza n’obugumya bw’Evanjeli. ⁸ Kuba Mungu akumanya okwo nkubayenda muno mwena mu mutima gwa Yezu Kristu.

⁹ Kai echo nkusaba ni kinu: obwenzi bwanu bugendere nibukane mu bumanyi na mu bwenge bwona, ¹⁰ muhiche kusombokerwa ebizima ebisingire, niho muyere, nzira ntambala, ha lunaku lwa Kristu, ¹¹ nimwizula, ha bwa Yezu Kristu, ebirabo by’obuhikire, kubera ikuzo n’isima lya Mungu.

OBUBOHWA BWE BUGASIRA EVANJELI.

¹² Bana betu, nkwenda mumanye okwo ebyo nagwerwe byagasire Evanjeli, ¹³ kuba enkuma y’obubohwa bwange kubera Kristu esugene mw’ibohero lyona na honahona, ¹⁴ kai abatabani betu bengi mu Mukama bagumisibwe enyoro zange, nibeguminsiriza kwolekerera ekigambo cha Mungu, nzira kutina. ¹⁵ Nenekwo abandi bakwolekerera Kristu bali n’ichubi n’obuhakani, nawe abandi bali no kwenda kuzima: ¹⁶ abandi bakwolekerera kuber’obwenzi, obwo bamanyire okwo Mungu yantereho kukingiriza Evanjeli; ¹⁷ abandi kai bali n’obuzigi n’obuhakani, kwenda kunzubya mw’ibohero lyange. ¹⁸ Nibihirwe! Kihango Kristu ayolekererwe; ata? tibisasire; nahoeli gubande hamo obukomereza, nkusemererwa, kai ndisemererwa. ¹⁹ Kuba nkumanya okwo kilingasira kuchunguka, kuber’obutwerezi bwanu n’obuhwezi bw’Omwoyo gwa Yezu Kristu; ²⁰ nintegeza ninchwa nti: tindikorw’ensoni, nawe, nafumwere n’obwesige bwingi, ndibona, hati na bucha bucha, Kristu nakuzibwa mu ngingo zange, mu bulame bwange nka mu lufu lwange.

KUFWA NI MUGASO.

²¹ Kuba hal’ine kulora ni Kristu, kai kufwa ni mugaso. ²² Nawe raba kulora nikugasira omulimo gwange, tinkumanya echo ndasora. ²³ Nsinirizibwe mbazu ibili: nkwegonga kuruga mu ngingo no kutura na Kristu, kai echo ni kuzima muno; ²⁴ nawe hakili nikare mu ngingo kubera imwe. ²⁵ Hatyo nkutegeza ninchwa nti: ndikara nintura n’emwe mwena, kuber’ obubuz’obusyo bwanu n’obusemererwa bwo kwikiriza kwanu, ²⁶ niho musimire Yezu Kristu kusuba kwange hal’imwe.

²⁷ Ekiliho: nimutungwe kuzima kihikire h’evanjeli ya Kristu, niho mbone ine omwene, raba niniza kubalora, hamo mpulire, nkabula kwiza, okwo mugumize omwoyo gumo, n’okwo murwanire mutima gumo kwikiriza kw’evanjeli, ²⁸ nzira kutinisibwa n’akati abakubarwana: echo kai ni mbaliriro yo busingwa bwabo n’obuchunguki bwanu, kandi kirugire hali Mungu; ²⁹ kuba tiyabahere kwikiriza Kristu chonka, nawe yabahere no kumunaranalira, ³⁰ nimwemera obulemu obwo mwabwene n’obwo mwahulize ninemera.

OBUMO N’OBWEKEHYA N’OBWENDANI BW’ABAKRISTU. — OBWEKEHYA BWA YEZU.

¹ Mbe raba buliho obuhumuzibwa muli Kristu, n’obuhumuliro mu bwenzi, n’obumo bw’omwoyo, n’obwenzi, n’obusasizi, ² mumalize obusemererwa bwange n’ebitekateko bimo, n’obwenzi bumo, n’omwoyo gumo, n’omutima gumo; ³ nimuleke obuhakani n’obwekuza, nawe, mwekehize, mulore abandi nk’abakuru banu; ⁴ mutabaraga ebibasasire byonka pai, nawe n’ebisasire abandi. ⁵ Mwesusanisye na Yezu Kristu mu mitima zanu. ⁶ Wenene yaliga ali Mungu, kai tiyabaraga ati: nasagiriza, ka yelenganisize na Mungu; ⁷ nawe akesingaricha, nayesusanisya omwiru, naingana n’omuntu, kai ha bweru nabonekana nk’omuntu. ⁸ Akekehya omwene, nayegira muhulizi kuhika kufwa, kufwa ha musalaba. ⁹ Nicho Mungu yamukulirize, namuha izina elikukira amazina gona, ¹⁰ niho mw’izina lya Yezu buli kizwi kikubwe mw’igulu, na mu nsi, na mu muliro, ¹¹ kai buli lulimi lwona lwikirize okwo Omukama wetu Yezu Kristu ali mw’ikuzo lya Mungu Tata.

¹² Hatyo, bana betu abo nkwenda, (obwo mwamanyire kuhulira bucha bucha), nimukole omulimo gwo kuchunguka n’obutini n’obuzugumi, nawe mutagiraga mutyo, ka nkuba ndi n’emwe chonka, nawe munomuno nasangwaga ntaliho. ¹³ Kuba niwe Mungu akubaha kwenda no kukola, nk’omwo akwendera. ¹⁴ Mukore byona, nzira kurunduma no kutimatimya, ¹⁵ niho mutaba n’ekiheno, nawe mube bana besigwa ba Mungu abatali na ntambala, hagati y’ihanga lizunzire n’ibi; muli bonene muyake nk’enenezi mu nsi; ¹⁶ nimutegule ekigambo ch’obulame, mube ikuzo lyange ha lunaku lwa Kristu, nsangwe ntairukire no kukola busa chonka. ¹⁷ Nawe naho bakasesera ensagama yange ha muherezo n’ekitambo cho kwikiriza kwanu, nkusemererwa nimbasima mwena. ¹⁸ Imwe mwena musemererwe, munsime.

TIMOTE NA EPAFRODITO.

¹⁹ Nkutegeza mu Mukama Yezu kubatumira Timote, ine nena mpumuzibwe kuhulira ebyanu. ²⁰ Kuba tindi n’ondi owe tuhulirene nage nka wenene, akabayenzyaga obwenzi bwa kimo nka wenene. ²¹ Kuba bona bakwehigira ebibasasire, ebya Yezu Kristu pai. ²² Mukumanya okwo yarozibwe n’okwo akobera n’ene obwolekerezi bw’Evanjeli. ²³ Mbe nkutegeza kumubatumira bwangu, ka ndamanya okwo ebyange bilaba. ²⁴ Nkwesigirira Omukama mpiche ine nena kubazaho bwangu.

²⁵ Nawe kai nkalenganisya nti: hakili mbatumire Epafrodito, omutabani wetu, omuhwezi wange n’owezasu w’oburwani, owe mwatumire wo kumpwera. ²⁶ Kuba yayegongaga muno kubabona imwe mwena, kai yazubaga obwo mwahulire endwara ye. ²⁷ Yee, akarwara endwara y’olufu, nawe Mungu akamusasira, kai wenene wenka pai, nawe ine nena, ntagwerwa obuzune ha buzune bundi. ²⁸ Nicho nayanguhirire kumutuma, imwe musemererwe kumubona, kai ine obuzune bundugeho. ²⁹ Mbe mumwanankule n’omuzaho mwingi mu Mukama, kandi mukuze abantu nk’abo batyo; ³⁰ kuba, kuber’omulimo gwa Kristu, akeririra olufu, nataho omwoyo gwe, ankolere ebyo imwe mutahichaga kunkolera.

KWANGA BYONA KUBERA YEZU KRISTU.

¹ Mbwenu, bana betu, musemererwe mu Mukama. Kusuba kubayandikira ebyo byonene tikungumira, kai kubagasira imwe. ² Mwekenge ha mbwa, mwekenge ha bakozi babi, mwekenge ha basazirwe b’obuzigi. ³ Kuba itwe n’itwe abasazirwe ba kimo, itwe abakolera Mungu mu mwoyo, itwe abakwesima muli Yezu Kristu, itwe abatayesigirira engingo. ⁴ T’obwo ntakuhicha kwesigirira engingo. Raba ondi nahicha kwesigirira engingo, ine kai nkuhicha kukiraho, ⁵ ine ayasazirwe olunaku lwo munana, ine w’ihanga lya Israeli, w’oluganda lwa Benyamini, ine Muyahudi w’Abayahudi; kai ha bw’Ekilagiro ndi Mufarizayo; ⁶ ha bw’obwomereza bwacho, ninnazya Eklezia; ha bw’obuhikire bw’Ekilagiro, naliga ntali na ntambala. ⁷ Nawe ebyo nabaraga nk’omugaso, hati nkubibara kubera Kristu nk’amafwerezi. ⁸ Kai hona nkubara byona nk’amafwerezi, kubilenganisya n’obukuru bw’ obumanyi bwa Yezu Kristu Omukama wange, ayampere kwanga byona no kubilora nk’amasa, mpiche kwebonera Kristu, ⁹ no kusangwa muli wenene ntali n’obuhikire obukuruga mu Kilagiro, nawe obuhikire obukuruga mu kwikiriza Yezu Kristu, ¹⁰ kandi mpiche kumumanya, wenene n’amani go kuzoka kwe, n’obukobe bw’obusasi bwe, mbe mpikire olufu lwe, ¹¹ niho mpike ha kuzoka kw’abafu, raba nimpicha.

ABAKRISTU BALORE OLUGURU.

¹² T’obwo naherwe omuhero na hati, hamo t’obwo mpikire na hati; nawe nkuruba mpike aho Yezu Kristu yayenzire mpikeho, ka yanesire. ¹³ Bana betu, nkuchwa nti: tinkahikireho. Ekiliho, nkuyebwa eby’enuma, nindora eby’obusyo, ¹⁴ niniruka ha muhero, ha mpera y’oluguru eyo Mungu yatwetere muli Yezu Kristu. ¹⁵ Mbe itwe twena abahikire, tutekateke tutyo; kai raba nimutekateka kundi, Mungu alibamulicha muly’ebyo hona. ¹⁶ Ekiliho, aho twahikire, tube n’omutima gumo, turube olulengo lumo.

¹⁷ Bana betu, mube barubirizi bange, kandi mwetegereze abakutungwa nk’endolero eyo mwabwene mul’itwe. ¹⁸ Kuba baliho bengi, abo nabatengere kengi, n’abo nkusuba kubatengera hati n’amaziga, abakutungwa nk’abahate b’omusalaba gwa Kristu. ¹⁹ Abo balitamwa balibura: ekimungu chabo ni nda yabo, nibahiga ikuzo lyabo mu magambo g’ensoni, nibanulirwa eby’ensi. ²⁰ Nawe itwe tukutura kuti mw’igulu, nimwo tukutegezaho Omuchunguzi, Omukama wetu Yezu Kristu; ²¹ niwe alihindura engingo zetu z’obunale, alizisusanisya n’engingo ze z’ikuzo, n’obuhicha obwo ali nabwo bwo kutwara byona.

OBUMO N’OBUSEMERERWA N’OMULEBO.

¹ Mbe, bana betu abo nkwenda ninegonga muno, imwe busemererwa bwange n’empera yange, musimbagirire mu Mukama, bendwa bange. ² Nkusaba Evodia nindembereza Sintike, babe n’ebitekateko ebyo byonene mu Mukama. ³ Kai iwe wena, wezasu mwesigwa, nkukusaba kubahwera, bonene abakozir’emilimo n’ene kubera Evanjeli, hamo na Klementi n’abezasu bandi, abali n’amazina gabo gayandikirwe mu kitabo ch’obulame. ⁴ Musemererwe mu Mukama bucha bucha; nti: musemererwe. ⁵ Obwekehya bwanu bumanyikane mu bantu bona; Omukama ali hehi. ⁶ Mutahahibwa kintu; nawe muli byona mumanyisye Mungu emikurato zanu mu sala zanu n’ilembereza lyanu, hamo n’isima lyanu. ⁷ Kandi omulebo gwa Mungu, ogukizire buli bwenge bwona, gugumye emitima n’emyoyo zanu muli Yezu Kristu.

⁸ Mbe nawe, bana betu, ebikomereze byona, eby’obuyezi byona, eby’oburonge byona, eby’obutakatifu byona, ebikusemereza byona, eby’enkuma nzima byona, eby’entungwa nzima byona, ebihikire kusimwa byona mu ntungwa, ebyo byona bibe bitekateko byanu. ⁹ Ebyo mwayegire n’ebyo mwaherwe n’ebyo mwahulire hal’ine n’ebyo mwabwene mul’ine, mubikolega, kai Mungu w’omulebo aliba n’emwe.

PAULO NASIMIRA EMIHEREZO EZO BAMUTUMIRE.

¹⁰ Nasemererwa muno mu Mukama, obw’obwenzi bwanu hal’ine bwasubire kusebuka; mwaliga muli nabwo, nawe omwanya gwaburaga kubumanyisya. ¹¹ Tinkugamba ebyo, kuba nkenire; mbwenu namanyire kuchulera n’ebyo ndi nabyo. ¹² Nkumanya kuhabihara, nkumanya no kukanirwa, (nkayemera byona), kwiguta no kurumw’enzala, kutunga no kuburwa. ¹³ Nkuhicha byona n’amani g’omugumya wange. ¹⁴ Nawe mwasemezya kukobera obunale bwange.

¹⁵ Mukumanya, imwe Banafilipi, okwo ha butandikiro bw’obwolekerezi bw’Evanjeli, ka narugire Masedoniya, hataliyo Eklezia endi, raba si eyanu, eyampere kintu, nawe nkagabirwa imwe mwenka, ¹⁶ abantumire kabili Tesalonika ebyo kumpwera. ¹⁷ Tinkuhiga emigabo; nawe nkubayendeza omugaso gwazyo. ¹⁸ Byona byampikire, kai hati byakana; naizura, obwo Epafrodito yampere ebyo mwantumire, nk’omuherezo gw’omwaya muzima n’ekitambo echo Mungu akwanankula nasima.

KUKESYA.

¹⁹ Mbe Mungu wange abakenule muli byona, mu lulengo lw’obuhango bwe, kandi abahe ikuzo muli Yezu Kristu. ²⁰ Mungu Tata wetu akuzibwe mu myaza z’emyaka. Amina.

²¹ Mubwache abatakatifu bona muli Yezu Kristu. ²² Abatabani betu abali n’ene bakubabwacha. Abatakatifu bona bakubabwacha, munomuno ab’eka ya Kayizari. ²³ Enema y’Omukama wetu Yezu Kristu ebe n’omwoyo gwanu. Amina.