Marko

YOHANA BATISTA NALAGA. — YEZU NABATIZIBWA. — NAROZIBWA SITANI.

¹ Obutandikiro bw’Evanjeli ya Yezu Kristu, Omwana wa Mungu. ² Nk’okwo chayandikirwe Izaiya omulagi ati: Lora, ine nkutuma mumalaika wange obusyo yawe, niwe alichuma omuhanda gwawe mu meso gawe; ³ ilaka ly’akuhamuka mu mbuga ati: Muchume omuhanda gw’Omukama, mugorore amakubi ge. ⁴ Yohana yaliga ali mu mbuga nabatiza, nayolekerera batisimu yo kutamwa ha bwo kukiz’ebiheno. ⁵ Ab’ensi yona ya Buyahudi n’aba Yeruzalemu bona bakamuzaho, nibabatizibwa wenene mu mugera gwa Yordani, nibegamba ebiheno byabo. ⁶ Yohana yaliga azwere ensense z’entungabulende, mu kibunu che ayebohire olukoba lw’oluhu, yalyaga ensyenene n’obwoki bwo mw’iswa. Yayolekereraga nagira ati: ⁷ Akunkiz’amani akundug’enuma, owe ntahikire kwinamira no kusurumulira olukoba lw’enketo ze. ⁸ Ine sanga nimbabatiza mu menzi, nawe wenene alibabatiza mu Mwoyo Mutakatifu.

⁹ Mbe mu naku ezo Yezu naruga Nazareti ya Galilaya, nabatizibwa Yohana mu Yordani. ¹⁰ Mbe ka yasabukire mu menzi, aho n’aho nabona igulu nilikinguka, Omwoyo, nigususa eliba, niguhanantuka, nigwikara hali wenene. ¹¹ Kai ilaka niliruga mw’igulu, liti: Iwe n’iwe Mwana wange owe nkwenda; nkasemererwa hal’iwe.

¹² Aho n’aho Omwoyo nigumusagara mw’iswa. ¹³ Mbe ka yamazire mw’iswa misana makumi ana n’ebiro makumi ana, narozibwa sitani; yaliga ali n’enamenswa, n’abamalaika nibamukolera.

SIMONI NA ANDREA NA YAKOBO NA YOHANA NIBAYETWA.

¹⁴ Yohana ka yakwasirwe, Yezu naiza Galilaya, nayolekerera Evanjeli y’obukama bwa Mungu, ¹⁵ nagira ati: Kuba enaku zahika, n’obukama bwa Mungu bwerire hehi; mutamw’ ebiheno, mwikirize Evanjeli. ¹⁶ Ka yarabire ha mbarama y’enanza ya Galilaya, nabona Simoni na Andrea, mutabani wabo, nibanaga enero mu nanza, obwo baliga bali bategi. ¹⁷ Yezu nabagira ati: Nimundube, ine ndabagira mube bategi b’abantu. ¹⁸ Mbe aho n’aho nibaleka enero, nibamuruba. ¹⁹ Ka yarugire aho, kwirira obusyo kake, nabona Yakobo, mwende Zebedeyo, na Yohana, mutabani wabo, na bonene basoboraga enero mu bwato; ²⁰ kachwi n’ako nabayeta. Nibasiga Zebedeyo ise mu bwato n’abategi b’empera, nibamuruba.

OWA SITANI NAKIZIBWA. — NINAZARA PETRO N’ABANDI NIBAKIZIBWA.

²¹ Nibataha Kafarnahumi; aho n’aho ha lunaku lwa sabato nataha mw’isomero, nabolekerera. ²² Nibakumisibwa ebyo yayolekereraga, kuba yaliga nabolekerera nk’ali n’obuhicha, atali nk’abandiki. ²³ Mw’isomero lyabo haliga halimo omuntu w’omwoyo gw’obulofu, nahamuka, ²⁴ nagira ati: Tuli na ki n’ewe, Yezu Munazareti? Okeza kutusingaricha si? Nkumanya okw’oli Mutakatifu wa Mungu. ²⁵ Mbe Yezu nalitinisya nagira ati: Nobuze, kai rugayo mu muntu onu. ²⁶ Mbe omwoyo gw’obulofu nigumuhendagura, niguyana n’ilaka ihango, nigumurugamo. ²⁷ Bona nibatangara, nibaba bo kubuzanya bonene bonka nibagira bati: Kinu ni kiha? Ni bwenge ki bunu? kuba akulagira n’obuhicha emyoyo z’obulofu, nizimuhulira. ²⁸ Kachwi n’ako enkuma ze nizigenda mu nsi yona ya Galilaya.

²⁹ Aho n’aho ka barugire mw’isomero, nibeza mu nzu ya Simoni na Andrea, bali na Yakobo na Yohana. ³⁰ Ninazara Petro yaliga anyamire ali n’omuswiza; kachwi n’ako nibamumugambira. ³¹ Nagenda namwimucha, amukwasire ha mukono; kachwi n’ako omuswiza nigumuhwaho, naba wo kubakolera. ³² Ka habere kebazo, izoba lyalagere, nibamuletera abarwere n’abali n’amasitani bona; ³³ abantu bona bo mu charo baliga basumbire ha mulyango. ³⁴ Nakiza bengi abanazibwaga endwara zona, nairuch’amasitani mengi, nawe tiyabalekire kutenga okwo gamumanyaga.

YEZU NAYOLEKERERA. — OW’OMUBILI NAKIZIBWA.

³⁵ Ka yemukire kanencha muno, nahuruka nagenda mw’iswa, niyo naba wo kusomera. ³⁶ Simoni namuruba n’abo yaliga ali nabo. ³⁷ Mbe ka bamubwene, nibamugambira bati: Bona bakukuhiga. ³⁸ Wenene nabagira ati: Tugende mu byaro bya hehi na mu bikale, nolekerereyo, kuba nicho chandeta. ³⁹ Yaliga nayolekerera mu masomero gabo na muli Galilaya yona, nairuch’amasitani.

⁴⁰ Ow’omubili namwizaho, namusaba ateliz’ebizwi, namugira ati: Okayenda, okuhicha kunkiza. ⁴¹ Yezu namwitirw’ ekisa, nagorora omukono gwe, namukwataho, namugira ati: Nkwenda, nokire. ⁴² Mbe ka yafumwere, kachwi n’ako omubili nigumuhwaho, nakira. ⁴³ Namuchahalira, namusindika kachwi n’ako, ⁴⁴ kai namugambira ati: Lora otagambira omuntu n’omo, nawe roko, oyeyoleke omukuru w’abasaserdoti, ohereze ha bwo kukibizwa kwawe ebyo Musa yalagire byo kubamanyisya. ⁴⁵ Nawe wenene ka yagenzire, natandika kukitenga no kuchatulira; nicho Yezu yaliga atakihicha kwizira ha bweru mu charo, nawe yaliga ali mw’iswa elitalimo bantu; mbe nibamwizaho abarugaga hona hona.

KUKIZIBWA KW’OMULEMA. — OBUHICHA BWO KUKIZ’EBIHENO.

¹ Nasuba kugenda Kafarnahumi, enaku ka zarabireho; ² ka bahulire okw’ali mu nzu, nibekobyanya bengi, nibezura na ha mulyango, omwanya nigubura; nabolekerera ebigambo. ³ Mbe nibamwizaho abalesire omulema, ayaliga, abatwirwe bana. ⁴ Nibatamibwa kumusagaraho, obwo yaliga eli nsangano y’embaga ningi, mbe nibasakarura ha luswi omwo Yezu yaliga ali, nibafumuraho, nibahanantura ilaro ely’ omulema yaliga amamireho. ⁵ Yezu ka yabwene kwikiriza kwabo, nagambira omulema ati: Mwana wange, wakizibwa ebiheno byawe. ⁶ Omwo haliga halimo abandi bo mu bandiki bekere, nibatekateka mu mitima zabo bati: ⁷ Onu akufumorera ki atyo? yazuma Mungu. Akuhicha kukiz’ebiheno ni ga, atali Mungu wenka? ⁸ Yezu, obwo yamanyire aho n’aho mu mutima gwe okwo bakutekateka batyo muli bonene, nabagambira ati: Mukutekatekera ki si ebyo mu mitima zanu? ⁹ Echanguhire ni kiha? kugambira omulema nti: Wakizibwa ebiheno byawe; nangu kugira nti: Imuka, twara ilaro lyawe, olibate? ¹⁰ Mbe ka mumanye okw’Omwana w’omuntu ali n’obuhicha mu nsi bwo kukiz’ebiheno, (nagambira omulema ati:) ¹¹ Nkukugambira nti: Imuka, twara ilaro lyawe, ogende mu ka. ¹² Mbe aho n’aho naimuka, natwara ilaro, nagenda, bona basumbire; nibakuma bona, nibakuza Mungu nibagira bati: Kuba titukabonaga tutyo.

KUSORWA KWA LEVI. — EMILIMO HA LUNAKU LWA SABATO.

¹³ Nasuba kugenda ha chambu, kai embaga yona nemuzaho, nabolekerera. ¹⁴ Akirabaho, nabona Levi, mwende Alfe, aikere ha kigobo, namugambira ati: Nondube. Ka yemukire, namuruba. ¹⁵ Mbe ka yalire mu nzu ya Levi, abasoroza bengin’abaheni nibekaranwa nibalya hamo na Yezu n’abahemba be; kuba abamurubire baliga bali bengi. ¹⁶ Mbe abandiki n’Abafarizayo, ka babwene nalya n’abasoroza n’abaheni, nibagambira abahemba be bati: Kubaki si omwolekerezi wanu akulya nanwa n’abasoroza n’abaheni? ¹⁷ Yezu ka yahulire ebyo, nabagambira ati: Abazima tibasasirwe omufumu, nawe abarwere; kuba tinezire kweta abatakatifu, nawe abaheni. ¹⁸ Abahemba ba Yohana n’Abafarizayo baliga nibasiba; nibeza nibamugambira bati: Abahemba ba Yohana n’Abafarizayo bakusibira ki, kai abawe batakusiba? ¹⁹ Nabagambira ati: Si abana b’amenga bakuhicha kusiba ha lunaku olw’omuswezi akuba ali nabo? Mu naku zona ezo bakuba omuswezi ali nabo tibakuhicha kusiba. ²⁰ Nawe haliza enaku ezo balihwaho omuswezi, mbe niho balisiba mu naku ezo. ²¹ Tihaliho muntu akubazira ekisato kihya ha mwenda mukokoro, kuba ekisato kihya kikubanduka ha mwenda mukokoro, mbe obutemuke nibukana muno. ²² Kai hona tihaliho akuta evini mpya mu nzoga nkokoro, kuba evini ekwat’enzoga, kai evini neseseka, n’enzoga nizifwa busa; nawe evini mpya eli no kutebwa mu nzoga mpya.

²³ Mbe kandi Omukama ka yarabire mu misiri z’engano ha lunaku lwa sabato, abahemba be nibatandika kuz’obusyo no kukonora ebyangara. ²⁴ Abafarizayo nibamugambira bati: Lora, bakukolera ki ebizibirwe ha lunaku lwa sabato? ²⁵ Nabagambira ati: Timukasomaga ebyo Daudi yakozire ka yasasirwe narumw’enzala, wenene n’abo yaliga ali nabo? ²⁶ Nk’okwo yatahire mu nzu ya Mungu, mu naku z’Abiyatari omukuru w’abasaserdoti, nalya emikate zo kwolecha, ezaliga zizibirwe kulibwa abatali basaserdoti, kai nahaho n’abo yaliga ali nabo? ²⁷ Kai nabagambira ati: Sabato bakagitereraho omuntu, nawe omuntu tibamuterereho sabato. ²⁸ Nich’Omwana w’omuntu ali kana n’olwa sabato.

OW’OMUKONO GWOMIRE NAKIZIBWA. — KUSORWA KW’ENTUMWA.

¹ Yezu nasuba kutaha mw’isomero, haliga halimo omuntu ali n’omukono gwomire. ² Baliga nibamuhenga okwo alamukiza ha lunaku lwa sabato, baze kumulega. ³ Nagambira omuntu ayaliga ali n’omukono gwomire ati: Imerera hagati. ⁴ Kandi nabagambira ati: Kifuhirwe ha lunaku lwa sabato kukola kuzima, nangu kubi? kukiz’omwoyo, nangu kugwihaho? Bonene nibabuza. ⁵ Nabarabyamo ameso n’ebiniga, abihirirwe obuhume bw’emitima zabo, nagira omuntu ogwo ati: Gorora omukono gwawe. Nagorora, omukono gwe nigusuba kukizibwa. ⁶ Mbe Abafarizayo nibahuruka nibagenda aho n’aho kumwegambanirwa hamo n’Abaherodyani okwo balamwita.

⁷ Nawe Yezu nayegendera n’abahemba be ha chambu, embaga ningi neruga Galilaya na Buyahudi, ⁸ na Yeruzalemu na Idumeya na ha mwambu gwa Yordani, nemuruba; kai mu nsozi za Tiro na Sidoni embaga ningi, ka yahulire ebyo yakozire, nemwizaho. ⁹ Nagambira abahemba be bamutere aho obwato, kuber’abantu, batamuhiganisya. ¹⁰ Mbe, obwo yakizaga bengi, bamwehumirahoga, bahiche kumukwataho, bona abaliga bemirwe kubi. ¹¹ N’emyoyo z’obulofu ka zamubonaga, nizimugwaho, niziyomba, nizigira ziti: ¹² Iwe oli Mwana wa Mungu. Mbe yabazibiraga mani, baleke kumusokora.

¹³ Ka yahanamire mw’ibanga, nayeta abo yayendaga wenene, nibamwizaho. ¹⁴ Nabagira babe nage ikumi na babili, abatume kwolekerera. ¹⁵ Nabaha obuhicha bwo kukiz’abarwere n’obwo kwiruch’amasitani. ¹⁶ Kai Simoni, akamuruka izina lya Petro; ¹⁷ na Yakobo, mwende Zebedeyo, na Yohana, mutabani wabo Yakobo, nabaha izina lya Boanergesi, nikwo kugira ati: bana b’enkuba; ¹⁸ na Andrea, na Filipo, na Bartolomeyo, na Matayo, na Toma, na Yakobo wa Alfe, na Tadeyo, na Simoni Omunakanani, ¹⁹ na Yuda Iskaryota, niwe ayamutunzire.

EBIZUMI BY’ABANDIKI. — ABABO YEZU.

²⁰ Nibeza mu nzu, embaga nesuba kusumba, nibabura no kuhicha kuly’omukate. ²¹ Mbe ababo ka bahulire, nibemuka kuza kumukwata, kuba bagiraga bati: Yasara. ²² Kandi abandi abaliga barugire Yeruzalemu bagambaga bati: Ali na Belizebubu, kai akwiruch’amasitani mu mani g’omukuru w’amasitani. ²³ Ka yabayesire, nabagambira mu ngani ati: Isitani likuhicha lita kwirucha sitani? ²⁴ Obukama ka bukutagana bwonene bwonka, mbe obukama obwo tibukuhicha kuguma. ²⁵ Kandi n’enzu yona k’ekubura kuhulirizanya, enzu egyo tekuhicha kuguma. ²⁶ Mbe raba sitani nilyegomera, likuheneka, kai tilikuguma, nawe obuhicha bwalyo bukuhwaho. ²⁷ Tihaliho muntu akuhicha kutaha mu nzu yo w’amani akanyaga ebintu bye, atatandikire kuboha ow’amani, niho akanyaga enzu ye. ²⁸ Koto nkubagambira nti: Abana b’abantu balikizibwa ebiheno byona, n’ebizumi byona ebyo balizuma Mungu; ²⁹ nawe omuntu alizuma Omwoyo Mutakatifu, ogwo niwe atalibona kukizibwa mu myaka zona, kai hona ali n’entambala etalihwaho. ³⁰ Mbe nibagira bati: Ali n’omwoyo mulofu.

³¹ Mbe nina n’abatabani babo nibeza, nibemerera hanza, nibamutumira owo kuza kumweta. ³² Embaga yaliga emwikereho, nibamugambira bati: Lora, noko n’abatabani banu bali hanza, bakukuhiga. ³³ Nabasubiramo nagira ati: Mawe n’abatabani betu ni baha? ³⁴ Nabarabyamo ameso, abaliga bekere bamuzingire, nagira ati: Ngugu mawe n’abatabani betu. ³⁵ Mbe akukola ebyo Mungu akwenda, niwe mutabani wetu, na muhara wetu, na mawe.

OLUGANI LW’OMUBIBI. — EMBIBO EKUKURA MPORA MPORA.

¹ Nasuba kutandika kwolekerera ha chambu; kai embaga ningi nemusumbirira, naswa nahanama mu bwato, naikaraho ali mu nanza, embaga yona eli ha mbarama y’enanza ha charo. ² Akabolekerera bingi mu ngani, nabagambira mu bwolekerezi bwe ati: ³ Muhulire! Lora, omubibi akahuruka kuza kubiba. ⁴ Mbe ka yabibire, embibo endi negwa ha muhanda, enoni zo mw’igulu niziza nizigilya. ⁵ Endi kai negwa ha lukili, neburwaho itaka lingi, mbe nemera kachwi n’ako, obwo yaliga etali n’itaka lingi; ⁶ izoba ka lyasohwere, nehotoka, kai obwo yalita etali na mizi, neyoma. ⁷ Kandi endi negwa mu mahwa, n’amahwa nigakura nigaginiga, nebura kutunga. ⁸ Kandi endi negwa mw’itaka izima, netunga nekura neyera, netunga endi makumi asatu, endi makumi mukaga endi igana. ⁹ Mbe nagira ati: Ali n’amatwi go kuhulira, ahulire.

¹⁰ Ka yasigere wenka, baliya ikumi na babili abaliga bali nage nibamubuza olugani. ¹¹ Nabagambira ati: Imwe mukahabwa kumanya ebitamize by’obukama bwa Mungu, nawe baliya abali hanza bakugambirwa byona mu ngani, ¹² niho abalozi nibalora batakubona, n’abahulizi nibahulira batakusombokerwa, kandi batahinduka, bakakizibwa ebiheno byabo. ¹³ Nabagambira ati: Timukumanya olugani lunu? kai mukumanya muta engani zona? ¹⁴ Omubibi akubiba ekigambo. ¹⁵ Abali ha muhanda ni banu ababibirwe ekigambo, mbe ka bahulira ekigambo, kachwi n’ako sitani niliza, nilihamo ekigambo ekikuba kibibirwe mu mitima zabo. ¹⁶ Kandi abakususa batyo n’ababibirwe ha lukili; abo ka bahulira ekigambo, kachwi n’ako nibachanankura no kusemererwa; ¹⁷ kandi nibabura emizi muli bonene, kai nibaguma naku nke zonka; kumara obusasi n’enaku nibiletwa ekigambo, aho n’aho nibasitara. ¹⁸ Abandi ababibirwe mu mahwa n’abakuhulira ekigambo, ¹⁹ nawe amagambo go mu nsi n’obuzigi bw’ebintu n’obwegongi bw’amagambo gandi bukutahamo nibunig’ekigambo, nikibura kuraba ebizima. ²⁰ Kandi ababibirwe mw’itaka izima ni banu abakuhulira ekigambo, bakachanankura, bakatunga ondi makumi asatu, ondi makumi mukaga, ondi igana.

²¹ Mbe nabagambira ati: Si olumuli lukwiza kutebwa mu kitukuru hamo mu bitarahansi? si tibakuluta ha mutereko? ²² Kuba tihaliho ekintu ekiserekire ekitalisokorwa, kai tihaliho ekikukorwa bwesereke ekitalisururuka. ²³ Ali n’amatwi go kuhulira, ahulire. ²⁴ Kandi nabagambira ati: Mulore echo mukuhulira. Olulengo olwo mukulengeramo, nilwo mulilengerwamo, no kusagyaho. ²⁵ Kuba ali nabyo niwe akuhabwa, kai atali nabyo alyakwa n’ebyo akuba ali nabyo. ²⁶ Kandi nabagambira ati: Obukama bwa Mungu ni nk’omuntu akubiba embibo mw’itaka, ²⁷ nanagira, nasisimuka, mu kiro na musana, embibo nemera nekura, wenene atakumanya. ²⁸ Kuba itaka likutunga lyonene lyonka, likutandika kumeza inansi, kandi likutaho echangara, kumara nilitunga enzuma zizwire mu changara. ²⁹ Mbe k’ekwera, nataho oluhabyo, kuba igesa lyahikire.

OLUGANI LW’EMBIBO YA HARDARI. — EKIHURE MU NANZA.

³⁰ Nagira ati: Obukama bwa Mungu tukubulenganisya na ki? hamo lugani ki olwo tulabuchweramo? ³¹ Nk’embibo ya hardari eyo babibire mw’itaka, eli noro kukira mbibo zona zo mu nsi; ³² mbe ka bagibibire, nekura neba iti, nilikira amanansi gona, negir’amatabi mahango, n’enoni zo mw’igulu nizihicha kutura mu mbeho zalyo. ³³ Yabagambiraga mu ngani zityo, nk’okwo bahichaga kuhulira; ³⁴ tiyabagambiraga hatali mu ngani, nawe abahemba be yabasomboreraga byona, bali bonka.

³⁵ Olunaku olwo ka habere kebazo, nabagambira ati: Twambuke mwambu gundi. ³⁶ Ka bakesize embaga, nibamuhika, naba mu bwato, kai amato gandi galiga gali nage. ³⁷ Nihabayo ekihure kihango ch’omuyaga, nikises’amakonzo mu bwato, obwato nibwizura. ³⁸ Wenene yaliga ali mu nsezi, anagire; nibamusisimura nibamugambira bati: Mwolekerezi, tokukukwaho itwe tukafwa? ³⁹ Ka yemukire, nachahalira omuyaga, nagambira enanza ati: Nobuze, noyesize. Mbe omuyaga nigufwa, niliba itore koto. ⁴⁰ Nabagambira ati: Muli batini muta? timukagizire kwikiriza si? Nibatina obutini bwingi, nibagambirana bati: Okuchwa oti: onu ni ga? kuba akulagira omuyaga n’enanza, nibimuhulira.

AMASITANI NIGERUKIBWA MU NGURUBE.

¹ Mbe nibeza ha ngego endi y’enanza mu nsi y’Abanagerazi. ² Ka yarugire mu bwato, kachwi n’ako omuntu namwirukiraho naruga mu bituro, ali n’omwoyo gw’obulofu, ³ ayaliga atwire mu bituro. Kai haliga hataliho muntu wo kuhicha kumuboha, naho kuli n’emikufu, ⁴ kuba yaliga abohirwe ngendo ningi n’olunyoro n’amasegi, nachwagura olunyoro, kai nakananura amasegi, hataliho muntu wo kuhicha kumusinga. ⁵ Bucha bucha mu kiro na musana yaliga ali mu bituro na mu mabanga, nayomba nayekorotoz’amabale. ⁶ Mbe ka yalorerere Yezu hara, namwirukiraho, namuhabudu; ⁷ nahamuka n’ilaka ihango nagira ati: Ndi na kiha n’ewe, Yezu Mwana wa Mungu asingire? nkukulahirira Mungu, otannaranaza. ⁸ Kuba Yezu yamugambiraga ati: Iwe mwoyo gw’obulofu, noruge mu muntu onu. ⁹ Kandi namubuza ati: Izina lyawe n’iwe ga? Ati: Izina lyange n’ine Mbaga, kuba tuli bengi. ¹⁰ Namusaba muno aleke kugerucha mu nsi egyo. ¹¹ Hehi n’ibanga haliga haliho ekihyo kihango ch’engurube nizilya. ¹² Emyoyo nizimusaba nizigira ziti: Notusindike mu ngurube, tuzitahemo. ¹³ Aho n’aho Yezu nazisindika; mbe emyoyo milofu nizirugamo, nizitaha mu ngurube; ekihyo chona nikikunuka nikilengetukira mu nanza; zaliga zihikire bihumbi bibili, nizefuma mu nanza. ¹⁴ Abazilisyaga niberuka nibagamba mu charo na mu misiri. Nibarugaho kwiza kulora echagwa. ¹⁵ Nibeza hali Yezu, nibabona ayaliga yanazibwe sitani, aikere, azwere, yagizire obwenge, nibatina. ¹⁶ Abaliga babwene nibabatengera nk’okwo byabere ha muntu ayaliga ali na sitani, n’eby’engurube. ¹⁷ Nibatandika kumusaba aruge mu mbibi zabo. ¹⁸ Mbe ka yahanamire mu bwato, ayaliga anazibwe sitani natandika kumusaba aikare nage. ¹⁹ Tiyamwikirize, nawe akamugambira ati: Nogende mu ka yawe ha bawe, obarobeze ebyo Omukama yakugirira n’okwo yakusasire. ²⁰ Nagenda, natandika kugamba mu Dekapoli ebyo Yezu yamugirire; bona nibakuma.

OMUKAZI W’OMUZWO NAKIZIBWA. — OMUHARA WA YAIRI NASUBA KULORA.

²¹ Mbe Yezu ka yasubire kwambuka mu bwato akaza ha ngego endi, embaga ningi nemusumbirira, yaliga ali ha chambu. ²² Mbe nihezaho omukuru omo w’esomero, izina lye Yairi; ka yamubwene, nagwa mu maguru ge, ²³ namulembereza muno nagira ati: Omuhara wange akwenda kufwa, noize omuteho omukono, akire, alore. ²⁴ Nagenda nage, embaga ningi nemuruba, nemuhiganisya.

²⁵ Mbe omukazi ogwo ayaliga nazw’ensagama kuruga myaka ikumi n’ebili, ²⁶ ayaliga anazibwe muno abafumu bengi, yakwasire byona ebyo yaliga ali nabyo, no kusomboka nangu, nawe niho naguma atamibwe, ²⁷ ka yahulire ebya Yezu, naruga mbaga ha numa, nakwata omwenda gwe. ²⁸ Kuba yagiraga ati: Kuba, naho nkakwata omwenda gwe chonka, hona nkukira. ²⁹ Aho n’aho enindo y’ensagama ye neyomera, nahulira mu ngingo ze okwo yakizibwe mu busasi bwe. ³⁰ Mbe aho honka Yezu namanya muli wenene okw’ amani gamurugamo, nahindukira embaga, nagira ati: Ayakwat’emyenda zange ni ga? ³¹ Abahemba be nibamugambira bati: Okubona okw’embaga ekukuhiganisya, kai oti: Ayankwataho ni ga? ³² Nalora mbazu zona kubona ayakora echo. ³³ Nawe omukazi ogwo, obwo yamanyaga echakozirwe muli wenene, natina nachundw’olumazi, naiza namugwa obusyo ye, namugambira ebikomereze byona. ³⁴ Wenene namugambira ati: Mwana wange, kwikiriza kwawe kwakukiza, nogende n’omulebo, oyehulire mu busasi bwawe.

³⁵ Yaliga akifumora, nibaruga ow’omukuru w’esomero nibabika bati: Omuhara wawe yafwire, ochanaliza ki Omwolekerezi? ³⁶ Nawe Yezu, ka yahulire ekigambo echo bagambire, nagira omukuru w’esomero ati: Noleka kutina, ikiriza chonka. ³⁷ Tiyalekire muntu n’omo kumuruba, raba si Petro na Yakobo na Yohana, mutabani wabo Yakobo. ³⁸ Nibahika mu nzu y’omukuru w’esomero, nahulira eyombo, no kulira, n’empamo ningi. ³⁹ Ka yatahiremo, nabagambira ati: Mukuyombera ki nimulira? Omuharakazi tiyafwire, nawe anagire. ⁴⁰ Nibamusekerera. Nawe wenene nairucha bona, natwara ise na nina muharakazi n’abo yaliga ali nabo, nataha omwo omuharakazi yaliga amamire. ⁴¹ Ka yakwasire omukono gw’omuharakazi, namugambira ati: Talitha kumi, nikwo kugira ati: Muharakazi, (nkukugambira), imuka. ⁴² Kachwi n’ako omuharakazi naimuka nalibata; kuba yaliga ali n’emyaka ikumi n’ebili; nibakwatw’obutini bwingi. ⁴³ Nabazibira n’amani bileke kumanywa muntu n’omo, nagamba kuha omuharakazi ebilyo.

YEZU NAGAYWA MU NSI YABO. — NATUMA ENTUMWA ZE.

¹ Ka yarugire okwo, nagenda mu nsi yabo; abahemba be nibamuruba. ² Ka yabere sabato, natandika kwolekerera mw’isomero; bengi abamuhulire bakakumisibwa ebyo yayolekerere, nibagira bati: Onu akeha hai ebyo byona? Akahabwa bumanyi ki onu? Kai n’amahano gatyo agakukorwa mu mikono ze? ³ Iwe onu ti mubuya w’omusermala, omwana wa Maria, mutabani wabo Yakobo, na Yozefu, na Yuda, na Simoni? Bahara babo tibali n’etwe hanu?Nibasitara kubera wenene. ⁴ Yezu nabagambira ati: Kuba tihaliho omulagi atali n’ikuzo, hatali mu nsi yabo, na mu nzu yabo, na mu babo. ⁵ Tiyahikize kukorayo ihano n’elimo, raba si akata emikono ha barwere bake, nabakiza. ⁶ Akakumisibwa obutekiriza bwabo, nazongazongana mu byaro bya hehi nayolekerera.

⁷ Nayeta ikumi na babili natandika kubatuma babili babili, nabaha obuhicha ha myoyo z’obulofu. ⁸ Nabazibira kutwar’ebintu mu muhanda, niyo nkoni yonka; ensaho pai, n’omukate pai, n’empesa mu nkoba pai, ⁹ nawe bazware nketo, kai batazwar’enkanzu ibili. ¹⁰ Kandi nabagambira ati: Buli nzu eyo mulatahamoga, mwikaremo kuhika kuruga mu charo echo; ¹¹ bona abatalibayanankura n’abatalibahulira, okwo mwarugayo, mwayekubura enkungu mu bigere byanu ha kubamanyisya. ¹² Nibagenda, nibolekerera abantu kutamwa, ¹³ niberuch’amasitani mengi, nibasiga abarwere bengi amazuta, nibabakiza.

KRISTU NI GA? — YOHANA BATISTA NACHWAGURWA OMUTWE.

¹⁴ Omukama Herode nahulira, kuba izina lye lyaliga lyakumukire honahona, nagira ati: Raba Yohana Batista niwe yazokire mu bafu, nicho amahano gakukolerwa muli wenene. ¹⁵ Abandi bagiraga bati: Ni Eliya. Abandi bati: Ni mulagi, nk’omo wo mu balagi. ¹⁶ Herode ka yahulire atyo, nagira ati: Yohana, owe nachwagwile omutwe, niwe yazoka mu bafu. ¹⁷ Kuba Herode yaliga atumire kukwata Yohana amutere mu lunyoro ha bwa Herodyadi, omukazi wa Filipo, mutabani wabo, obwo yaliga amuswere. ¹⁸ Kuba Yohana yaliga agambire Herode ati: Okuzibirwa kuswera muka mutabani wanu. ¹⁹ Mbe Herodyadi yaliga namuteg’emitego nayenda kumwita, nawe tiyahikize. ²⁰ Kuba Herode yatinaga Yohana namanya okw’ali muntu arongire, kai mutakatifu; yamulindaga, nakolaga bingi ha bw’ekigambo che, nasemererwa kumuhulira. ²¹ Olunaku luhikire ka lwezire, ha lunaku lukuru lwo kuzarwa kwe, Herode natekera abakungu n’enfura n’abakuru ba Galilaya amageni. ²² Mbe omuhara wa wenene Herodyadi ka yatahiremo akazina, nasemereza Herode na bona abaliga bekere nibalya nage; mbe omukama nagambira omuharakazi ati: Nonsabe ech’okwenda, nkukuha. ²³ Nataho no kulahira ati: Buli chona chona ech’olasaba, naho kili kihinzu ch’engoma yange, nkukuha. ²⁴ Omuharakazi ka yahurukire, nagambira nina ati: Nsabe ki? Wenene namugira ati: Omutwe gwa Yohana Batista. ²⁵ Kachwi n’ako natahamo bwangu ha mukama, nasaba, nagira ati: Nkwenda hati hati ompe ha lunanga omutwe gwa Yohana Batista. ²⁶ Omukama nazuba; nawe obwo yaliga alahire, kai na ha bw’abaliga bekere nage h’eliro, nayanga kumubihiriza, ²⁷ natuma omuzuma nalagira omutwe gwa Yohana guletwe ha lunanga. Namuchwaguraho omutwe mw’ibohero, ²⁸ naleta omutwe ha lunanga, naguha omuharakazi, kai omuharakazi naha nina. ²⁹ Abahemba be ka bahulire, nibeza nibatwar’omutumbi gwe, nibaguzika mu kituro.

YEZU MW’ISWA. — NAKANISYA EMIKATE. — NALIBATA HA NANZA.

³⁰ Entumwa nizisuba hali Yezu nizimugambira byona ebyo zikozire n’ebyo ziyolekerere. ³¹ Nabagira ati: Mwize mwenka mw’iswa igumba, muhumure kake. Kuba haliga haliho bengi abezaga n’abagendaga, batali na mwanya n’ogwo kulya. ³² Mbe ka bahanamire mu bwato, nibagenda mw’iswa igumba bonka. ³³ Ka babwene nibagenda, bakamanya bengi, nibaruga mu byaro niberukirayo maguru, nibabatanga kuhika.

³⁴ Yezu ka yarugire mu bwato, akabona embaga ningi, nabetirw’ekisa, obwo baliga bali nk’enabalega ezitali na mulisya, natandika kubolekerera bingi. ³⁵ Mbe ka harabireho katungu kahango, abahemba be niberira hehi nibagira bati: Hanu ni mw’iswa lili busa, kai izoba lyagenda; ³⁶ nobasindike bagende mu byaro bya hehi na mu maka, bayegulire ebilyo, balye. ³⁷ Nasubamo nabagira ati: Imwe nimubahe echo kulya. Nibamugira bati: Si tugende kugura emikate z’edenari magana abili, tubahe balye? ³⁸ Nabagira ati: Muli na mikate zingaha? Roko, mulore. Mbe ka bamanyire, nibagira bati: Itanu n’enfwi ibili. ³⁹ Nabalagira babekaze bona, batege engobo ha manansi gatayomire. ⁴⁰ Nibekara, engobo zindi igana igana, ezindi makumi atanu makumi atanu. ⁴¹ Mbe ka yakwasir’emikate itanu n’enfwi ibili, nalalamira mw’igulu, nabarika, nahinzul’emikate, naha abahemba be, bate obusyo yabo, n’enfwi ibili, nabagabira bona. ⁴² Bona nibalya nibeguta. ⁴³ Nibehaho ebihinzu ebyasagire bitukuru ikumi na bibili, n’enfwi. ⁴⁴ Abalire baliga bali baseza bihumbi bitanu.

⁴⁵ Mbe aho nasiniriza abahemba be kuhanama mu bwato, bamwebemberere ha ngego endi kuza Betsaida, wenene akikesy’abantu. ⁴⁶ Ka yabasindikire, nagenda mw’ibanga kulembereza. ⁴⁷ Ka habere bwebazo, obwato bwaliga buli hagati mu nanza, wenene ali wenka ha charo. ⁴⁸ Nabalorera nibanaranara kubuga, (kuba gwaliga guli muyaga gw’obutwe); mu kiro ha bulinzi bwa kananabezaho nalibata ha nanza; yaliga nayenda kubatanga. ⁴⁹ Nawe ka bamubwe nalibata ha nanza, nibachwa bati: n’itunu, nibahamuka. ⁵⁰ Kuba bona nibamubona, nibahaha. Aho n’aho nafumora nabo, nabagambira ati: Muhumure, n’ine, muleke kutina. ⁵¹ Nabazaho mu bwato, omuyaga nigufwa. Muli bonene nibakana kukuma; ⁵² kuba baliga batasombokerwe eby’emikate, obw’omutima gwabo gwaliga guhumire. ⁵³ Mbe ka bayambukire, nibahika mu nsi ya Genezareti, nibagoba. ⁵⁴ Ka barugire mu bwato, kachwi n’ako abantu nibamumanya; ⁵⁵ nibazongana mu nsi egyo yona lwiruko, nibatandika kutwalir’abarwere ha malaro, no kubaleta eyo bahuliraga okw’ali. ⁵⁶ Buli nguyo ezo batahamoga, n’ensozi n’ebyaro, baletaga abarwere ha maguliro, nibamusaba bakwate ha bumalilizo bw’omwenda gwe chonka; mbe bona bona abakwatahoga behuliraga.

YEZU NAHAKANISYA ABAFARIZAYO.

¹ Abafarizayo nibamwesororeza n’abandi bo mu bandiki abarugire Yeruzalemu. ² Mbe nibabona abandi bo mu bahemba be nibalya n’engaro zitayezire, nikwo kugira oti: zitanabire, nibabazuma. ³ Kuba Abafarizayo n’Abayahudi tibalyaga batanabire kuzimazima engaro, bahiche amasigirane g’abagurusi. ⁴ Kai kuruga mw’iguliro hona tibalyaga batanabire; n’ebindi bingi ebyo basigirwe kuhicha: kunaby’ebikompe, n’ensuha z’ibumba n’ez’ebyoma, n’ebitebe bya h’eliro ebyo bakwegamaho nibalya. ⁵ Abafarizayo n’Abandiki nibamubuza bati: Abahemba bawe bakubulira ki kuhich’amasigirane g’abagurusi, bakaly’omukate n’engaro zitanabire? ⁶ Wenene nasubamo nabagambira ati: Omulagi Izaiya akalaga imwe akomereze, bazig’imwe, nk’okwo byandikirwe biti: Abantu banu bakunkuza n’omunwa, nawe omutima gwabo guli hara n’ene; ⁷ mbe bakunkuza busa chonka nibolekerera obwenge n’ebilagiro by’abantu. ⁸ Kuba mukasiga ekilagiro cha Mungu, nimugumya amasigirane g’abantu, obunabya bw’ensuha n’ebikompe, n’ebindi bityo bingi ebyo mukukora. ⁹ Nabagambira ati: Mukwihaho kimo ekilagiro cha Mungu, muhiche kuruba amasigirane ganu. ¹⁰ Kuba Musa akagira ati: Otinega iso na noko, kai ati: Akuzuma ise hamo nina aitwe olufu. ¹¹ Kai imwe mukugira muti: Omuntu akagambira ise hamo nina ati: Korbani, (nikwo kugira oti: engabirano), byona ebyaherezibwe ine bikukugasira; ¹² kai timukusuba kumuleka akolere ise hamo nina ekintu, ¹³ nimwihaho ekigambo cha Mungu ha bw’amasigirane ganu ago mwatereho; n’ebindi bingi nk’ebyo bityo ebyo mukukora. ¹⁴ Nasuba kweta embaga, nagigambira ati: Mumpulirize mwena, kai musombokerwe. ¹⁵ Tihaliho ekili ha bweru y’omuntu kikamutahamo, kikahicha kumurofuhaza; nawe ebikuruga mu muntu, ebyo nibyo bikurofuhaza omuntu. ¹⁶ Ali n’amatwi go kuhulira, ahulire. ¹⁷ Mbe ka yatahire mu nzu akaruga mu mbaga, abahemba nibamubuza ensonga z’olugani olwo. ¹⁸ Nabagambira ati: Nikwo n’emwe mukili basiru muti? Timukusombokerwa okwo buli ekili ha bweru kikataha mu muntu kitakuhicha kumurofuhaza, ¹⁹ kuba tikikutaha mu mutima, nawe nikihika mu nda, kandi nikirugamo h’esazi, nikisemeza ebilyo byona? ²⁰ Nagamba okwo ebikuruga mu muntu, ebyo nibyo bikurofuhaza omuntu. ²¹ Kuba mu nda, mu mutima gw’abantu, hakurugamo ebitekateko bibi, n’obukwate, n’obusihani, n’obwisi, ²² n’obusuma, n’obululu, n’obuyaga, n’obuzigani, n’obulofu, n’olwiso, n’ebizumi bya Mungu, n’obwekuza, n’olusaro. ²³ Amabi ago gona gakuruga mu nda, kai gakurofuhaza omuntu.

OMUHARA W’OMUKAZI MUSENZI NAKIZIBWA. — OMUTITA N’OMUZIBE W’AMATWI NAKIRA.

²⁴ Ka yemukire aho, nagenda mu mbibi za Tiro na Sidoni; nataha mu nzu, atakwenda omuntu amanye, nawe tiyahikize kwesereka. ²⁵ Mbe omukazi ogwo, owe omuhara we yaliga ali n’omwoyo gw’obulofu, ka yamuhulire, natahamo nagwa mu maguru ge. ²⁶ Kandi omukazi ogwo yaliga ali musenzi, oluganda lwe ali Munasirofenikazi. Namulembereza airuche sitani mu muhara we. ²⁷ Wenene namugira ati: Leka abana batandike kwiguta: kuba ti kuzima kwihaho ebilyo by’abana no kubinagira embwa. ²⁸ Omukazi ogwo nasubamo namugira ati: Nikwo, Mukama wange, nawe obusore bwona bukulya mu bitalahansi by’eliro obulagarika bw’abana. ²⁹ Namugira ati: Ha bw’ekigambo echo nogende; isitani lyarugire mu muhara wawe. ³⁰ Mbe ka yagenzire mu nzu ye, nasanga omuharakazi amamire ha kitabo, isitani lyarugiremo.

³¹ Ka yasubire kuruga mu mbibi za Tiro, naraba Sidoni nahika ha nanza ya Galilaya, hagati y’embibi za Dekapoli. ³² Aho nibamuletera omuzibe w’amatwi ali mutita, nibamulembereza amuteho emikono. ³³ Namwiha mu mbaga, nata ebyara bye mu matwi ge, nakwataho olulimi lwe n’amachwanta. ³⁴ Nalalamira oluguru, namulirira, namugambira ati: Effeta, nikwo kugira ati: zibuka. ³⁵ Mbe mu katungu ako amatwi ge nigazibuka, n’olulimi lwe nilusurumuka, nafumora kuzima. ³⁶ Nabazibira kutengera abandi. Nawe nk’okwo yabazibire muno, nikwo bakanire kwatura, ³⁷ kai hona nibakuma muno, nibagira bati: Akakora kuzima byona; akahuliz’abazibe b’amatwi nafumoz’abatita.

YEZU NAKANISY’EMIKATE LWA KABILI. — OLUNYAMO LWO MW’IGULU. — ITUMBYO LY’ABAFARIZAYO.

¹ Mu naku ezo embaga ka yasubire kukana, kai batali n’echo kulya, nayeta abahemba be nabagambira ati: ² Nkusasira embaga enu, kuba bamazire naku isatu bali n’ene, batali n’ebyo kulya; ³ nkabasindika kutaha mu maka gabo batalire, bakuramatira mu muhanda, kuba abandi muli bonene barugire hara. ⁴ Nawe abahemba be nibamusubiramo bati: Kai mw’iswa munu tukwiha hai emikate zo kwigusy’abantu abo bona? ⁵ Nababuza ati: Muli n’emikate zingaha? Nibagira bati: Musanzu. ⁶ Nalagira embaga kwikara ha nsi. Nakwata emikate musanzu, nakampiza, nahinzura, naha abahemba be, bagabe; nibagabira embaga. ⁷ Hona baliga bali n’otufwi tuke; twona natubarika, nalagira kugaba. ⁸ Nibalya nibeguta; nibatwar’ebihinzu ebyasagire amebo musanzu. ⁹ Nawe abalire baliga bali kuti bihumbi bina; nabasindika kugenda.

¹⁰ Mbe aho n’aho nahanama mu bwato n’abahemba be, nagenda mu nsi ya Dalmanuta. ¹¹ Abafarizayo nibarugayo nibatandika kuhakana nage, nibamusaba olunyamo mw’igulu, bamuroze. ¹² Mbe nazuba mu mwoyo, nagira ati: Oluzaro lunu lukusabira ki olunyamo? Koto nkubagambira nti: Oluzaro lunu tilulihabwa olunyamo nangu. ¹³ Mbe ka yabalagire, nasuba kuhanama mu bwato nagenda ha ngego endi. ¹⁴ Nibayebwa kutwar’emikate, mu bwato baliga bali n’omukate gumo gwonka. ¹⁵ Nabalagira nagira ati: Mulore mwekenge h’etumbyo ly’Abafarizayo na h’etumbyo lya Herode. ¹⁶ Bakatekateka nibagambirana bonene bonka bati: N’obwo tutali na mikate. ¹⁷ Yezu namanya nabagira ati: Mukutekatekera ki okwo mutali na mikate? Timukamanyire, kai timukasombokerwe, si muchali n’omutima gwanu guhumire kuhika na hati? ¹⁸ Si muli n’ameso, kai mutakubona? kai muli n’amatwi, mutakuhulira? kai timukwizuka? ¹⁹ Olwo nahinzur’emikate itanu ha bantu bihumbi bitanu, mukehayo ebitukuru bingaha bizwire ebihinzu? Nibamugira bati: Ikumi na bibili. ²⁰ Olw’ emikate musanzu ha bantu bihumbi bina, mukehayo bitukuru bingaha by’ebihinzu? Nibamugambira bati: Musanzu. ²¹ Nabagambira ati: Kubaki kai mutakasombokerwe?

OMUHUME NAKIZIBWA. — KWIKIRIZA KWA PETRO. — KUTEGULA OMUSALABA.

²² Nibahika Betsaida, nibamuletera omuhume, nibamusaba amukwateho. ²³ Nakwata omukono gw’omuhume, namuhurucha mu maka, nat’amachwanta mu meso ge, namutaho emikono ze, namubuza ati: Okubona kintu? ²⁴ Nalora namugambira ati: Nkubona abantu nibalibata nibasusana nk’amati. ²⁵ Kandi nasuba kut’emikono ze ha meso ge; natandika kubona, nasuba kuba muzima, nabona byona kuzima. ²⁶ Namusindika kuza mu ka, nagira ati: Notahe mu ka, k’olahika mu charo, otagambira muntu n’omo.

²⁷ Yezu nagenda n’abahemba be mu byaro bya Kaizariya ya Filipo; mu muhanda nabuza abahemba be nagira ati: Abantu bakundenga oha? ²⁸ Nibamusubiramo nibagira bati: Yohana Batista; abandi Eliya, abandi kuti omo mu balagi. ²⁹ Aho nabagambira ati: Kai imwe mukuneta muti ki? Petro nasubamo namugambira ati: Iwe oli Kristu. ³⁰ Nabazibira mani batamugamba mu bantu.

³¹ Natandika kubolekerera okw’Omwana w’omuntu ali no kusasibwa bingi, no kwangwa abagurusi n’abakuru b’abasaserdoti n’abandiki, no kwitwa, no kuzoka, harabireho naku isatu. ³² Nafumorera ha bweru ebigambo ebyo. Petro namutwara, natandika kumuchahalira. ³³ Wenene nayekebuka, nalora abahemba be, nafuta Petro nagira ati: Nosube enuma yange, sitani we, kuba tokunulirwa ebya Mungu, nawe eby’ abantu. ³⁴ Nasumbya embaga n’abahemba be, nabagambira ati: Omuntu akwenda kunduba, ayeyange omwene, ategule omusalaba gwe, andube. ³⁵ Kuba akwenda kukiz’omwoyo gwe, akugunaga; nawe alinag’omwoyo gwe ha bwange na ha bw’Evanjeli, aliguchungula. ³⁶ Kuba omuntu kutwar’ensi yona kukumuletera ki, akanag’omwoyo gwe? ³⁷ Hamo omuntu alitaho ki cho kuchunguza omwoyo gwe? ³⁸ Kuba omuntu alikolerw’ensoni ine n’ebigambo byange mu luzaro lunu lusihani n’oluheni, Omwana w’omuntu wena alimukolerw’ensoni olw’aliza mw’ikuzo ly’Ese n’abamalaika batakatifu. ³⁹ Mbe nabagambira ati: Koto nkubagambira okwo haliho abandi abali hanu abataliroz’olufubatabwene obukama bwa Mungu nibwiza n’amani.

KUHINDUKA KUNDI KWA KRISTU. — OWA SITANI NAKIZIBWA.

¹ Enaku mukaga ka zarabireho, Yezu natwara Petro na Yakobo na Yohana, nabasagara mw’ibanga lilehire kahero bonka, nahinduka kundi mu meso gabo. ² Ebizwaro bye nibyengerera nibyera nka zeluji, hona n’omunabya mu nsi takuhicha kubyeza atyo. ³ Musa nababonekera na Eliya, nibafumora na Yezu. ⁴ Petro nasubamo nagambira Yezu ati: Mukama wange, ni kuzima itwe twikare hanu; twombeke ebihuna bisatu, iwe kimo, Musa kimo, na Eliya kimo. ⁵ Kuba tiyamanyaga echo yafumoraga, kutina kwa muno. ⁶ Nihabaho elire nilibakingiriza, kai ilaka niliruga mu lire niligira liti: Onu niwe Mwana wange owe nkwenda: mumuhulire. ⁷ Mbe aho nibamagamaga, tibasubire kubona muntu, raba si Yezu wenka ali na bonene. ⁸ Baliga bakihanantuka h’ebanga, nabazibira batatengera muntu n’omo ebyo babona, kuhika Omwana w’omuntu azoke mu bafu. ⁹ Ekigambo echo nibakigumya muli bonene, nibaronda ensonga z’ebigambo: kuhika azoke mu bafu. ¹⁰ Nibamubuza nibagira bati: Kai Abafarizayo n’abandiki bakugambira ki bati: Eliya ali no kutandika kwiza? ¹¹ Wenene nasubamo nabagambira ati: Eliya k’aliza, alisuba kuchuma byona; kai nk’okwo chandikirwe ha Mwana w’omuntu, ali no kusasibwa bingi no kugaywa. ¹² Nawe nkubagambira okwo Eliya yezire, (kai nibamugirira byona ebyo bayendaga), nk’okwo chandikirweho.

¹³ Ka yahikire ha bahemba be, nabona embaga ningi ebekumirireho, abandiki nibahakana nabo. ¹⁴ Kachwi n’ako embaga, ka yabwene Yezu, nekuma netina neiruka kuza kumubwacha. ¹⁵ Nababuza ati: Mukuhakana ki mul’imwe? ¹⁶ Omo mu mbaga nasubamo nagira ati: Mwolekerezi, naleta omwana wange hal’iwe, ali na sitani itita; ¹⁷ buli aho likumukwata, likumuchundagula, yatona ifiro, nanen’ameno nahangarara. Nagambire abahemba bawe kulirucha, babura kuhicha. ¹⁸ Wenene nabasubiramo nagira ati: Imwe luzaro lutali no kwikiriza, ndikara n’emwe kuhika lihi? ndibeguminsiriza kuhika lihi? Nimumundetere. ¹⁹ Nibamuleta. Ka yamulozire, aho n’aho isitali nilimunaranaza, nagwa ha nsi, nasarabagana, nabira ifiro. ²⁰ Nabuza ise ati: Kuruga lihi abere atyo? Nagira ati: Kuruga buto; ²¹ kandi ngendo ningi likamugwisya mu muliro na mu menzi, nilyenda kumwita. Nawe raba nohicha kintu, notuhwere, otusasire. ²² Yezu namugambira ati: Raba nohicha kwikiriza, byona bikuhikibwa ha muntu naikiriza. ²³ Aho n’aho ise omwana nalira n’amaziga, nagira ati: Nkwikiriza, Mukama wange; nohwere obutekiriza bwange. ²⁴ Yezu ka yabwene embaga esumbire nemwirukiraho, nachahalira omwoyo gw’obulofu, nagugambira ati: Iwe mwoyo muzibe w’amatwi na mutita, ine nkukulagira: nomurugemo, kai otalisubira kumuzamo. ²⁵ Nilyana nilimusasya muno, nilimurugaho; nasusa oti henda yafwa, banamwingi nibagira bati: yafwa. ²⁶ Nawe Yezu ka yamukwasire omukono, namwereza, naimuka. ²⁷ Ka yatahire mu nzu, abahemba be nibamubuza bwesereke bati: Kubaki itwe titwahikize kulirucha? ²⁸ Nabagira ati: Elyezabo elyo lityo tilikuhicha kwirukibwa, hatali n’esala no kusiba.

YEZU NALAGA OBUSASI BWE. — KWEKEHYA NO KWEGUMINSIRZA. — EBIKUHENESYA.

²⁹ Ka yarugire aho, nibaraba Galilaya, tiyayendaga omuntu amanye. ³⁰ Mbe nayolekerera abahemba be nabagambira ati: Omwana w’omuntu aliherezibwa mu ngaro z’abantu, balimwita, kai k’aliba yaisirwe, alizoka ha lunaku lwa kasatu. ³¹ Bonene tibamanyire ekigambo echo, nawe bakatina kumubuza.

³² Nibahika Kafarnahumi. Aho baliga bali mu nzu, nababuza ati: Sanga nimuhakanisyanya ki mu muhanda? ³³ Bonene nibabuza; kuba mu muhanda bahakanisyanyaga muli bonene obukuru. ³⁴ Ka yekere, nayeta ikumi na babili nabagambira ati: Akwenda kuba wo kutandika, abe wo kuhereruka kukira bona, kai abe mukozi wa bona. ³⁵ Nakwata omwana namwemereza hagati yabo, namufumbata, nabagambira ati: ³⁶ Buli muntu alayanankura omwana nk’onu mw’izina lyange, alyanankura ine; kai buli akunanankura, takwanankura ine, nawe akwanankura ayantumire. ³⁷ Yohana namusubiramo nagira ati: Ngu, Mwolekerezi, twabona omuntu ogwo nairuch’amasitani mw’izina lyawe, kai ngu takuturuba, itwe twamuzibira. ³⁸ Yezu nagira ati: Muleke kumuzibira; kuba tihaliyo omuntu akukola ihano mw’izina lyange, kai aho honka akangambaho kubi. ³⁹ Omuntu atakubarwana, ogwo ni wanu. ⁴⁰ Kuba buli muntu wena alibanwesyaho mutaho gumo gw’amenzi mw’izina lyange, obwo muli ba Kristu, koto nkubagambira nti: ogwo taliburwa empera ye.

⁴¹ Kai buli muntu alisitazaho omo muli banamuto banu abakunikiriza, ni kuzima hakili bamukoma mu bicha bye olumengo oluhiringisibwa ensikiri, yatubizibwa mu nanza. ⁴² Omukono gwawe gukakuhenesya, ogutemeho; ni kuzima hal’ iwe kutaha mu bulame olemere, kukira kugenda mu muliro ogutalala, oli n’emikono ibili, ⁴³ omwo ihuka lyabo litakufwa, n’omuliro gutakulala. ⁴⁴ Kandi okuguru kwawe kukakwohereza kuhena, okusindureho; hakili wagenda nosuntira mu bulame obutahwaho, kukira kunagwa mu lina ly’omuliro ogutalala, oli n’amaguru abili, ⁴⁵ omwo ihuka lyabo litakufwa, n’omuliro gutakulala. ⁴⁶ Kandi eliso lyawe likakwohereza kuhena, olinonkoremo; hakili wataha mu bukama bwa Mungu n’ensongo, kukira, oli n’ameso abili, kunagwa mu lina ly’omuliro, ⁴⁷ omwo ihuka lyabo litakufwa, n’omuliro gutakulala. ⁴⁸ Kuba buli muntu alirungwa omuliro, kai buli kitambo kirungwa omwonu. ⁴⁹ Omwonu ni muzima; nawe ka guyongoroka, gurungwa hai? Nimugire omwonu mul’imwe, hatyo mugirirane omulebo.

OBUSWEZI TIBUKUHICHA KUSURUMUKA.

¹ Ka yarugire aho, naiza mu mbibi za Buyahudi ha mwambu gwa Yordani; embaga nesuba kumusumbirira, nabolekerera nk’okwo yaliga amanyire. ² Abafarizayo nibeza nibamubuza bati: Si omuseza akuhicha kwanga omukazi? nibamuroza. ³ Wenene nasubamo nabagambira ati: Musa akabalagira kiha? ⁴ Bonene nibagira bati: Musa akafuha kwandika olwandiko lw’obutagani no kumwanga. ⁵ Yezu nabasubiramo nagira ati: Omuku ogwo akagubayandikira obwo emitima zanu zigumire. ⁶ Nawe ha butandikiro bw’obuhangi Mungu akakola omuseza omo n’omukazi omo. ⁷ Nich’ echo omuntu ali no kusigira ise na nina, ayemere omukazi we, ⁸ mbe babili babe ngingo zimo. Batyo tibakili babili, nawe ngingo zimo. ⁹ Mbe echo Mungu yakwatanisize, omuntu takitaganisya. ¹⁰ Mu nzu abahemba be nibasuba kumubuza ebyo. ¹¹ Nabagambira ati: Buli muntu alyanga omukazi we akaswera ondi, akugir’obukwate hali ogwo. ¹² Kandi omukazi akayanga iba akaswerwa ondi, akusihana.

YEZU NABARIKA BANAMUTO. — NAYETA OMUSIGAZI. — NASIMA OBUHABI.

¹³ Nibamuletera banamuto abateho omukono; nawe nibachahalira ababalesire. ¹⁴ Yezu ka yabwene, akabihirirwa, nabagambira ati: Muleke banamuto beze hal’ine, mutabazibira; kuba abakususa batyo nibo bakana obukama bwa Mungu. ¹⁵ Koto nkubagambira nti: Buli muntu wena atayanankwile obukama bwa Mungu nka namuto, talibuhikamo. ¹⁶ Ka yabafumbasire, nabataho emikono, nababarika.

¹⁷ Ka yarugireho akaza mu muhanda, omuntu ogwo naiza nairuka, namugwa mu maguru obusyo ye, namubuza ati: Mwolekerezi muzima, nkore ki, niho mbone obulame obutahwaho? ¹⁸ Yezu namugambira ati: Wanetera ki oti: muzima? Tihaliho omuzima, atali Mungu wenka. ¹⁹ Okumanya ebilagiro: Otasihanga, otaitaga, otaibaga, otabeherezaga, otazigazigaga, otinega iso na noko. ²⁰ Ogwo nasubamo namugira ati: Mwolekerezi, ebyo byona nkabihicha kuruga buto bwange. ²¹ Yezu ka yamwetegereze, namwenda, namugambira ati: Ochasigalireyo kimo: roko, oguze byona eby’oli nabyo, ohe abahabi, olibona ensabo mw’igulu; mbe oize ondube. ²² Wenene akabihirizibwa ekigambo echo, nagenda azubire; kuba yaliga ali n’ebintu bingi.

²³ Yezu ka yalozire mbazu zona, nagambira abahemba be ati: Abali n’empilya ningi baligumirwa muno kutaha mu bukama bwa Mungu! ²⁴ Abahemba nibakumisibwa ebigambo ebyo. Aho Yezu nasubamo lwa kabili nabagambira ati: Bana bange, kutaha mu bukama bwa Mungu kugumire muno mu bantu abater’emitima zabo ha mpilya! ²⁵ Changuhire entungabulende kuraba mw’ihundu ly’ensinga kukira omuhango kutaha mu bukama bwa Mungu. ²⁶ Bonene nibakuma muno kukiraho, nibagambirana bati: Kai akuhicha kuchunguka ni ga? ²⁷ Yezu ka yabetegereze, nagira ati: Tikikuhikibwa abantu, nawe Mungu; kuba hali Mungu bikuhikibwa byona. ²⁸ Aho Petro natandika kumugambira ati: Lora, itwe tukasiga byona nitukuruba. ²⁹ Yezu nasubamo nagira ati: Koto nkubagambira nti: Tihaliho omuntu ayasigire enzu, hamo batabani babo, hamo bahara babo, hamo ise, hamo nina, hamo abana, hamo ensambu, ha bwange n’Evanjeli, ³⁰ na wenene ataherwe ngendo igana hati mu nsi munu, amazu, na batabani babo, na bahara babo, na banina, n’abana, n’ensambu, mu binaranazo, kai mu buzima bundi obulame obutahwaho. ³¹ Nawe bengi abo kutandika baliba bo kuhereruka, kai abo kuhereruka babe bo kutandika.

KUSABA KW’ABENDE ZEBEDEYO. — BARTIMEYO OMUHUME NAKIZIBWA.

³² Baliga bali mu muhanda nibanegera Yeruzalemu; Yezu yaliga nabebembera, nibakuma, nibamuruba no kutina. Naihaho ikumi na babili lwa kabili, natandika kubagambira ebilamugwera: ³³ Kuba lora, tukugenda Yeruzalemu, Omwana w’omuntu aliherezibwa ha bakuru b’abasaserdoti n’abandiki n’abagurusi, balimulamula kufwa, kai balimuha abasenzi; ³⁴ balimusekerera no kumuchwer’amachwanta, bamutez’amasanzu bamwite; nawe olunaku lwa kasatu alizoka.

³⁵ Mbe Yakobo na Yohana, abende Zebedeyo, nibamuzaho nibagira bati: Mwolekerezi, tukwenda otugirire buli chona echo tulakusaba. ³⁶ Wenene nabagambira ati: Mukwenda mbagire nta? ³⁷ Nibagira bati: Notuhe twikare mw’ikuzo lyawe, omo ha bulyo bwawe, ondi ha bumoso bwawe. ³⁸ Nawe Yezu nabagambira ati: Timukumanya echo mukusaba. Mukuhicha kunwa ekikompe echo ine ndanwa? hamo kubatizibwa batisimu eyo ine ndabatizibwa? ³⁹ Bonene nibamugambira bati: Tukuhicha. Nawe Yezu nabagambira ati: Nikwo, ekikompe echo ndanwa mulikinwa, kai mulibatizibwa batisimu eyo ndabatizibwaho; ⁴⁰ nawe kwikara ha bulyo bwange hamo ha bumoso ti mulimo gwange kuha imwe, nawe abategekerwe kukihabwa. ⁴¹ Ikumi ka bahulire, nibatandika kunigahalira Yakobo na Yohana. ⁴² Yezu, ka yabesire, nabagambira ati: Mukumanya okwo abakususa oti henda batwere amahanga, babatwere mani, kai abakuru babo bali n’obuhicha hali bonene. ⁴³ Nawe mul’imwe tibili bityo; mbe akwenda kuba mukuru, abe mukozi wanu; ⁴⁴ kai buli akwenda kuba wo kutandika mul’imwe, abe wo kubakolera mwena. ⁴⁵ Nikwo Omwana w’omuntu tiyezire kukolerwa, nawe wenene kukolera no kuta omwoyo gwe ha buchunguzi bwa banamwingi.

⁴⁶ Nibahika Yeriko; ka barugire Yeriko n’abahemba be n’embaga ningi muno, omwana wa Timeyo, Bartimeyo omuhume, yaliga aikere ha muhanda nasabiriza. ⁴⁷ Ogwo ka yahulire okw’ali Yezu Omunazareti, natandika kusekana no kugira ati: Yezu, mwana wa Daudi, nonsasire. ⁴⁸ Bengi nibamuchahalira ayesize. Wenene naguma kusekana muno ati: Mwana wa Daudi, nonsasire. ⁴⁹ Yezu naimerera nalagira kumweta. Nibayeta omuhume nibagira bati: Guma; imuka, akukweta. ⁵⁰ Wenene, ka yanagire omugutu gwe, nairuka namwizaho. ⁵¹ Yezu nasubamo namugira ati: Okwenda nkukolere ki? Omuhume ati: Mukama wange, nkwenda mbone. ⁵² Mbe Yezu namugambira ati: Genda, kwikiriza kwawe kwakukiza. Kachwi n’ako nabona, namuruba mu muhanda.

YEZU KRISTU NATAHA YERUZALEMU.

¹ Ka yerire hehi na Yeruzalemu na Betaniya h’ebanga lya Zituni, natuma babili bo mu bahemba be, ² nabagambira ati: Mugende mu charo ekili obusyo yanu, ka mulatahamo, kachwi n’ako mukubona omwana gw’ensikiri gusibikire, ogutakahanamwahoga muntu n’akati; mugusibure mulete. ³ Mbe omuntu k’alabagambira ati: Mukukola ki? mumugambire okw’Omukama niwe akugwenda; aho n’aho akugusindika kunu. ⁴ Nibagenda nibasanga omwana gw’ensikiri gusibikire obusyo y’elembo h’esazi, ha ntaganiro y’emihanda, nibagusibura. ⁵ Abandi muli abaliga baliho nibabagambira bati: Mukusibulira ki omwana gw’ensikiri? ⁶ Bonene nibabasubiramo nk’okwo balagirwe Yezu, nibagusindika. ⁷ Nibasagalira Yezu omwana gw’ensikiri, nibagwaraho emyenda zabo, nagwikaraho. ⁸ Bengi nibayara emyenda zabo mu muhanda; abandi bakonoraga amatabi g’amati nibagalira mu muhanda. ⁹ Mbe abaliga bebembere n’abarugaga enuma nibahamuka nibagira bati: Hozana! ¹⁰ Abarikirwe akwiza h’ezina ly’Omukama; bubarikwe obukama bwa tata wetu Daudi obukwiza. Hozana oluguru mw’igulu! ¹¹ Mbe nataha Yeruzalemu mw’eklezia; ka yalozire byona, obwo haliga habere bwebazo, narugayo naza Betaniya n’ekumi na babili.

YEZU NAZUMIRIZA OMUTINI. — NAIRUCH’ABATUNZI MW’EKLEZIA.

¹² Bwire kucha, ka yarugire Betaniya, enzala nemuruma. ¹³ Ka yalorere hara omutini guli n’amababi, naiza kuhigaho ekintu hali gwonene; ka yaguhikireho, nasangaho amababi gonka, ekindi pai; kuba zaliga zitali naku z’amatini. ¹⁴ Nasubamo nagugambira ati: Kuruga hati tihaliho alilya ebirabo hal’iwe nangu ira lyona. Abahemba nibahulira.

¹⁵ Mbe nibahika Yeruzalemu; ka yatahire mw’eklezia, natandika kwiruch’abatunzi n’abaguzi mw’eklezia; nakunura emeza z’abahingya b’empilya n’ebitebe by’abaguzya b’ameba. ¹⁶ Kandi tiyalekire omuntu kuraba mw’eklezia n’omutegulo. ¹⁷ Yaliga nayolekerera, nabagambira ati: Si tichandikirwe kiti: Enzu yange eliyetwa enzu yo kusomeramo mu mahanga gona? Kai imwe mwagigira nanga y’abasuma. ¹⁸ Abakuru b’abasaserdoti n’abandiki, ka bahulire ebyo, nibahiga obwenge bwo kumwita; kuba bamutinaga, obw’embaga yona yakumisibwaga ebyo yayolekereraga. ¹⁹ Mbe ka habere kebazo, naruga mu kikale.

KULEMBEREZA NO KWIKIRIZA. — KUKIZ’ABATUHENERA. — OBURUGO BW’OBUHICHA BWE.

²⁰ Ka barabireho bwanencha, nibasanga omutini gwayomire kuruga ha mizi. ²¹ Petro ka yezukire, namugambira ati: Rugaba, lora omutini ogw’ozumirize, gwayomire. ²² Yezu ka yasubiremo, nabagambira ati: Mwesigirire Mungu. ²³ Koto nkubagambira nti: Buli muntu aligambira ibanga linu ati: Rugayo, ogende mu nanza, atakutimatimya mu mutima gwe, nawe naikiriza okwo buli echo akugamba kikuhika, kilihika hali wenene. ²⁴ Nicho nkubagambirira nti: Buli chona echo mulisaba nimulembereza, mwikirize nimutegeze okwo mulikihabwa, kai kilibezira.

²⁵ Mwayemereraga kulembereza, musasirega, mwabaga muli n’ekigambo ha muntu, niho Iso wanu ali mw’igulu abasasire ebiheno byanu. ²⁶ Kuba mukabura kusasira, nikwo na So wanu ali mw’igulu talibasasira ebiheno byanu.

²⁷ Nibasuba kwiza Yeruzalemu. Yaliga akilibata mw’eklezia, abakuru b’abasaserdoti n’abandiki n’abagurusi nibamwizaho, ²⁸ nibamugambira bati: Binu okubikoza buhicha ki? ²⁹ Yezu nasubamo nabagira ati: Nkubabuza n’ene kigambo kimo, munsubiremo, nimbagambira obuhicha obwo nkukoza binu. ³⁰ Si batisimu ya Yohana yaliga erugire mw’igulu nangu mu bantu? Munsubiremo. ³¹ Bonene nibatekateka bonka, nibagira bati: Ka tulagira tuti: Ekaruga mw’igulu, aligira ati: Kai mukazibirwa ki kugikiriza? ³² Kai tukagira tuti: Mu bantu, tukutina embaga; kuba bona balengaga Yohana nk’omulagi wa kimo. ³³ Mbe nibasubamo nibagambira Yezu bati: Titukumanya. Yezu nasubamo nabagira ati: Hatyo n’ene tinkubagambira buhicha obwo nkukoza binu.

ABALIMI B’OBUYAGA. — EBYA MUNGU N’EBYA KAIZARI. — KUZOKA KW’ABAFU.

¹ Natandika kubafumorera mu ngani ati: Omuntu akalima omuzabibu, nagwitir’olugo, nasimba ikamuliro, nayombeka omunara, natamo abalimi, kandi nagira olugendo. ² Enaku ka zahikire, natumira abalimi omwiru, abalimi bamuhe ebirabo by’omuzabibu. ³ Bonene nibamukwata nibamutera, nibamusubyaho busa. ⁴ Nabatumira lwa kabili omwiru ondi; ogwo nibamuter’olubale mu mutwe, nibamuzuma kubi. ⁵ Nasuba kutuma ondi, ogwo nibamwita; n’abandi bengi, abandi nibabatera, abandi nibabeta. ⁶ Mbe nasaga n’omutabani omo owe yayendaga muno, ogwo niwe nahereruka kutuma hali bonene, nagira ati: Omwana wange balimutina. ⁷ Nawe abalimi abo nibagambirana bati: Onu niwe omuhunguzi; nimwize tumwite, omuhunguro gwe gube gwetu. ⁸ Nibamukwata, nibamwita, nibamwiha mu muzabibu, nibamunaga. ⁹ Mbe kana muzabibu akugira ata? Akwiza kwita abalimi, omuzabibu naguha abandi. ¹⁰ Si timukasomaga olwandiko olukugira luti: Ibale elyo abombeki bayangire, likaba lya ha kisago; ¹¹ ekigambo echo kikakorwa Omukama, kai kitamize mu meso getu? ¹² Nibahiga kumukwata, nibatina embaga; kuba bakamanya okwo yagambiriraga bonene mu lugani olwo. Mbe nibamuleka, nibagenda.

¹³ Nibamutumaho abandi bo mu Bafarizayo n’Abaherodyani, bamutege mu bigambo bye. ¹⁴ Bonene ka bezire, nibamutengera bati: Mwolekerezi, tukumanya okw’okomereze n’okw’otasasirwe muntu; kuba tokulor’ensuso y’abantu, nawe okwolekerera emihanda za Mungu mu bikomereze. Si halagirwe kuha Kaizari omusoro, nangu tuleke kusora? ¹⁵ Wenene, obwo yamanyaga obuzigi bwabo, nabagambira ati: Mukundoreza ki? Mundetere efweza, ndore. ¹⁶ Bonene nibamuletera. Nabagambira ati: Olususo lunu n’olwandiko ni by’oha? Nibamugambira bati: Bya Kaizari. ¹⁷ Mbe Yezu nasubamo nabagambira ati: Mbe nimuhe Kaizari ebya Kaizari, kai Mungu ebya Mungu. Nibatamibwa.

¹⁸ Abasadusayo, abagiraga bati: Kuzoka tikuliyo, nibamwizaho, nibamubuza bati: ¹⁹ Mwolekerezi, Musa akatwandikira ati: Mutabani wabo muntu akafwa, akasiga omukazi atali n’abana, mutabani wabo ali no kuswera mukazi we, atereho mutabani wabo embibo. ²⁰ Mbe haliga haliho ab’end’ emo musanzu; ow’obuzigezo naswer’omukazi, nafwa atasigireho mwana. ²¹ Kai owa kabili namuswera, nafwa, ogwo wena kusigaho omwana pai. N’owa kasatu wena nikwo. ²² Mbe nibamuswera batyo musanzu, tibasigireho omwana. Bona ka bahwere, omukazi wena nafwa. ²³ Mbe ha kuzoka, ka balizoka, aliba mukazi w’oha muli bonene, kuba bakamuswera ha musanzu gwabo? ²⁴ Yezu nasubamo nabagambira ati: Si timukuhabibwa obwo mutakumanya Enandiko n’amani ga Mungu? ²⁵ Kuba ka balizoka mu bafu, tibaliswera, kai hona tibaliswerwa, nawe bali nk’abamalaika mw’igulu. ²⁶ Eby’abafu, okwo balizoka, timukasomaga mu kitabo cha Musa, mu kisaka, okwo Mungu yamutengere nagira ati: N’ine Mungu wa Ibrahimu, Mungu wa Izaki na Mungu wa Yakobo? ²⁷ Ti Mungu w’abafu, nawe w’abazima. Mbe imwe mwahaba muno.

EKILAGIRO KIKURU MU BILAGIRO. — OMWANA WA DAUDI.

²⁸ Naiza omo wo mu bandiki, ayahulire nibahakana, nabona okwo yabasubire kuzima, namubuza ekilagiro cho kutandika mu bilagiro byona. ²⁹ Mbe Yezu namusubiramo ati: Ekilagiro ekikwebembera mu bilagiro byona ni kinu: Hulira, Israeli, Omukama Mungu wawe ni Mungu omo; ³⁰ mbe noyendega Omukama Mungu wawe n’omutima gwawe gwona, n’omwoyo gwawe gwona, n’obwenge bwawe bwona, n’amani gawe gona. Echo nich’ekilagiro cho kutandika. ³¹ Kandi echa kabili kikususana n’echo: Oyendega owezanu nk’ewe omwene. Ekindi mu bilagiro ekikukira ebyo tikiliyo. ³² Omwandiki namugambira ati: Ni kuzima, Mwolekerezi, wagamba ebikomereze, okwo Mungu ali omo, kai tihaliyo ondi atali ogwo; ³³ mbe ayendwe n’omutima gwona, n’obwenge bwona, n’omwoyo gwona, n’amani gona; kandi kwenda owezanu nk’okw’okweyenda omwene kukukira ebitambo byona n’emiherezo. ³⁴ Yezu ka yabwene nk’okwo yamusubire kibuya, namugira ati: Iwe toli hara n’obukama bwa Mungu. Kurug’ aho tihaliho ayahigahere kumubuza.

³⁵ Yezu ka yasubiremo, akagamba nayolekerera mw’eklezia ati: Abandiki bakugamba bata okwo Kristu ali mwana wa Daudi? ³⁶ Kuba Daudi wenene akagamba na Mwoyo Mutakatifu ati: Omukama akagambira Omukama wange ati: Ikara ha bulyo bwange, kuhika ngire abahate bawe babe buhumuzo bw’amaguru gawe. ³⁷ Mbe Daudi omwene akumweta ati: Mukama, kai ni mwana we ata? Ebipipi bingi byasemererwaga kumuhulira. ³⁸ Yabagambiraga mu bwolekerezi bwe ati: Mwekenge ha bandiki, abakwenda kutura nibarandaza emyenda no kubwakibwa abantu mw’iguliro, ³⁹ no kwikara ha bitebe by’obusyo mu masomero na mu myanya z’obusyo mw’ilya; ⁴⁰ abakulya amazu g’abafwerwe beba, nibesusanisya kusoma esala zilehire: bonene balibona elamu mpango muno.

OMUHEREZO GWA KIFWERWA IBA.

⁴¹ Yezu yaliga aikere obusyo y’isandikwa ly’emiherezo, nalora okwo embaga yanagaga efweza mw’isandikwa ly’emiherezo; abahango banamwingi banagamoga bingi. ⁴² Nawe kifwerwa iba omo, ali muhabi, ka yezire, nanagamo chapa ibili, niyo hel’emo. ⁴³ Nayeta abahemba be nabagira ati: Koto nkubagambira nti: Kifwerwa iba onu muhabi yatamo kukira bona abateremo mw’isandikwa ly’emiherezo. ⁴⁴ Kuba bona baha mu bingi ebyo bali nabyo, nawe onu mu buhabi bwe yaha byona ebyo ali nabyo, ebimutungire byona.

KUSINGARIKA KWA YERUZALEMU NO KUHWAHO KW’ENSI.

¹ Ka yarugire mw’eklezia, omo wo mu bahemba be namugambira ati: Mwolekerezi, lora okw’ amabale gali, n’emyombekere okw’eli. ² Yezu nasubamo namugira ati: Okubona amazu mahango ago gona? Tihalisigaraho ibale ha luguru lw’elindi elitalikambuka. ³ Ka yekere h’ebanga lya Zituni, obusyo y’eklezia, Petro na Yakobo na Yohana na Andrea nibamubuza, bali bonka, bati: ⁴ Tugambire, ebyo bilihika lihi? kai halibaho lunyamo ki olwo ebyo byona bilyenda kuhika? ⁵ Yezu nasubamo natandika kubagambira ati: Mwetegereze, omuntu atalibaziga. ⁶ Kuba bengi baliza mw’izina lyange, baligira bati: N’ine; bengi balizigwa. ⁷ Nawe ka mulihulira obulemo n’ebigambo by’obulemo, mutalitina; kuba ebyo bili no kuhika, nawe kuhereruka kukili. ⁸ Kuba ihanga lilimukira ihanga lindi, n’obukama butabalire obukama bundi, halibaho ensi kutengeta ahandi, n’enzala. Ebyo niby’obutandikiro bw’obusasi. ⁹ Mbe imwe nimwekenge abene; kuba balibasagara mu ntongana, balibatera mu masomero, mulimerera obusyo y’abalamuzi n’abakama ha bwange, ha kumanyisya bonene. ¹⁰ Kandi Evanjeli eli no kutandika kwolekererwa mu mahanga gona. ¹¹ Kai ka balibakwata bakabasagara, muleke kutandika kutekateka ebyo mulagamba, nawe ebyo mulihabwa mu katungu ako, nibyo mugambe; kuba t’imwe abafumozi, nawe niwe Mwoyo Mutakatifu. ¹² Mbe omuntu alisagara mutabani wabo mu lufu, kai omuzere, omwana we; kai abana balimukiramo bese, babaite. ¹³ Mulihatwa bona ha bw’ezina lyange. Nawe alyeguminsiriza kuhika ha muhero, ogwo niwe alichunguka.

¹⁴ Mbe ka mulibona ihano lyo kutinisya, lili aho litahikire kuba, akusoma asombokerwe, aho abaliba mu Buyahudi berukire mu mabanga; ¹⁵ aliba ali ha luswi atahanantukaho kuza mu nzu, kai atalitahamo kwihamo ekintu mu nzu ye: ¹⁶ aliba ali ha musiri atalisuba enuma kutwar’omwenda gwe. ¹⁷ Abali n’enda n’abakwoncha mu naku ezo baligabona! ¹⁸ Mbe musabe ebyo bitalizira mu naku z’ekitiko. ¹⁹ Kuba mu naku ezo halibaho obubi nk’obwo butakabahoga kuruga ha butandikiro bw’ensi eyo Mungu yahangire, kuhika hati, kai tibulibaho nangu. ²⁰ Kai Omukama akiba atakehesize enaku ezo, tihaliho muntu ayakuchungukire; nawe enaku ezo zikakehesibwa ha bw’abasozirwe abo yasozire. ²¹ Mbe aho omuntu k’alibagambira ati: Ngugu Kristu ali hanu, ngugwo kuliya, mutalikiriza. ²² Kuba balimuka abakwetwa ba Kristu b’obubehi n’abalagi b’obuzigi, abalikora amahano n’enyamo bahiche kuziga n’abasozirwe, bakaba nibahicha kuzigwa. ²³ Mbe imwe mwekenge; lora, nabalaga byona.

²⁴ Nawe mu naku ezo, kunaranara okwo kwahwereho, izoba lililala, okwezi tikulileta olumuli lwakwo, ²⁵ n’enenezi zo mw’igulu ziliba nizigwa, n’amani agali mw’igulu galitengesibwa. ²⁶ Niho balibona Omwana w’omuntu naiza mu mere n’amani mengi n’ikuzo. ²⁷ Niho alituma bamalaika be, nasumbya abasozirwe be mu mbazu ina z’emiyaga, kuruga ha muhero gw’ensi kuhika ha muhero gw’igulu. ²⁸ Mweyege olugani ha mutini. Amatabi gagwo ka gamera, gakasebuka amababi, mwamanya okw’olwanda luli hehi; ²⁹ nikwo n’emwe ka mulibona ebyo bikagwa, mumanye okw’ali hehi ha mulyango. ³⁰ Koto nkubagambira nti: Oluzaro lunu tilulihwaho, ebyo byona bitakahikire. ³¹ Igulu n’ensi bilihwaho, nawe ebigambo byange tibilihwaho. ³² Eby’olunaku olwo n’akatungu tihaliho akubimanya, n’abamalaika bo mw’igulu bona pai, n’Omwana wena pai, niwe Tata wenka. ³³ Mwekenge, mukesye nimulembereze; kuba timukumanya olwo olunaku olwo lulihika. ³⁴ Bili nk’omuntu ayagenzire mu lugendo, nasig’enzu ye, naha aberu be obuhicha bwo kukol’emilimo, buli muntu emilimo ze, nalagira omulinzi w’omulyango kuleka kunagira. ³⁵ Mbe mutanagira; kuba timukumanya olwo kanaka aliza: hamo ni kebazo, hamo mw’itumbi, hamo mu nkoko, hamo ni kanencha; ³⁶ atechura naiza akabasanga munagire. ³⁷ Mbe echo nkubagambira, nkubagambira mwena nti: Mutanagira.

OMUKAZI OGWO NASIGA YEZU AMAZUTA. — YUDA NAMUTUNDA.

¹ Enaku ibili ka zarabireho, niluba lunaku lukuru lwa Paska n’Azima; abakuru b’abasaserdoti n’abandiki nibahiga okwo balakwatira Yezu mu bwenge, bamwite. ² Nawe nibagira bati: Ha lunaku lukuru pai, leka kataba kanamutoke mu bantu.

³ Mbe olwo yaliga ali Betaniya mu nzu ya Simoni ow’omubili, aikere nalya, nihezaho omukazi ogwo, ali n’akabya k’amazuta ga nardi y’echangara g’obuguzi bwingi, nayata akabya, nasesa ha mutwe gwe. ⁴ Haliga haliho abandi babihirirwe mu mitima zabo, nibagira bati: Amazuta ganu baganaliza ki bati? ⁵ Kuba amazuta ago gakuhikize kugurwa denari kuhika magana asatu no kuziha abahabi. Nibamunigahalira. ⁶ Nawe Yezu nagira ati: Nimumuleke; mukumunaranaliza ki? Yankolera kikorwa kizima. ⁷ Kuba abahabi muli nabo bucha bucha, kai mukayenda, mukuhicha kubakolera kuzima; nawe ine timuliba n’ene naku zona. ⁸ Onu yakora ebyo akuhicha; yatandika kwoter’engingo zange nka mu buziki bwazo. ⁹ Koto nkubagambira nti: Honahona eyo Evanjeli enu elyolekererwa mu nsi zona, n’eby’omukazi onu bilitengwa kumwizukiraho.

¹⁰ Kandi Yuda Iskaryota, omo mul’ikumi na babili, nagenda ha basaserdoti bakuru, ahiche kumubaha. ¹¹ Ka bahulire, nibasemererwa muno, nibamulaganisya kumuha empilya. Yahigaga omwanya guhikire gwo kumubaha.

YEZU NAGIRA UKARISTIA. ―NALAGA OKWO PETRO ALAMWEYOGA.

¹² Olunaku lwo kutandika lw’Azima, olwo babaga Paska, abahemba bakamugira bati: Okwenda tuze kukuchumira hai, olye Paska? ¹³ Natumaho babili mu bahemba be, nabagambira ati: Mugende mu kikale, omuntu omo akubabugangana atwer’ensuha y’amenzi; mumurube, ¹⁴ omwo alataha, mugambire kanaka muti: Omwolekerezi yagira ati: Enzu yange eli hai, omwo nkulira Paska n’abahemba bange? ¹⁵ Wenene alaboleka enzu mpango, eyalire; okwo niyo mutuchumire. ¹⁶ Abahemba be nibagenda nibahika mu kikale; nibasanga nk’okwo yaliga abagambire, mbe nibasemeza Paska.

¹⁷ Mbe ka habere kebazo, naiza n’ekumi na babili. ¹⁸ Baliga bekere h’eliro nibalya, Yezu nabagambira ati: Koto nkubagambira nti: Omo mul’imwe akuntunda, akulya n’ene. ¹⁹ Bonene nibatandika kuzuba no kumugambira omo omo bati: Si n’ine? ²⁰ Wenene nabagambira ati: Omo mw’ikumi na babili akukoza n’ene omukono ha lunanga. ²¹ Nikwo, Omwana w’omuntu yagenda nk’okwo chamwandikirweho; nawe omuntu ogwo aligabona, owe Omwana w’omuntu akutundirwaho! Kwakubere kuzima ha muntu ogwo akiba atazerwe!

²² Baliga bakilya, Yezu nakwat’omukate, nagubarika, naguhinzura, nabaha, nagira ati: Mwanankure, kinu nizo ngingo zange. ²³ Ka yakwasire n’ekikompe, akasima, nabaha, nibanwa bona. ²⁴ Nabagambira ati: Enu ni nsagama yange y’omulago muhya, elisesekera bengi. ²⁵ Koto nkubagambira okwo ntakisuba kunwa ha birabo by’omuzabibu, kuhika ha lunaku luliya olwo ndibinwa lundi buhya mu bukama bwa Mungu.

²⁶ Olwembo ka lwahwere, nibahuruka kuza mw’ibanga lya Zituni. ²⁷ Yezu nabagambira ati: Mwena mukusitara hal’ine mu kiro kinu, kuba chandikirwe kiti: Nditera omulisya, enabalega zinyarambuke. ²⁸ Nawe ka ndiba nazokire, ndibebemberera Galilaya. ²⁹ Petro namugira ati: Naho bona balasitara hal’iwe hona, ine pai. ³⁰ Yezu namugira ati: Koto nkukugambira okwo iwe lero, mu kiro kinu, enkokoromi etakakokoromire kabili, okuneyoga kasatu. ³¹ Wenene nayongera kufumora ati: Naho nkaba no kufwa n’ewe hona, tinkukweyoga. Mbe nikwo bona nibagira batyo.

YEZU NAYOYERA ENSAGAMA. — NIBAMUKWATA.

³² Nibeza mu nsambu eyo bakweta bati: Getsemani. Nagambira abahemba be ati: Mwikare hanu, ine nindembereza. ³³ Natwara Petro na Yakobo na Yohana; natandika kuchundw’olumazi no kutina. ³⁴ Nabagambira ati: Omwoyo gwange guli n’obuzune bwingi nk’akwenda kufwa; nimwikare hanu, muleke kunagira. ³⁵ Ka yerireho obusyo kake, nagwa ha nsi, nasaba esaha egyo emurabeho, raba nibihicha kuba bityo. ³⁶ Nagira ati: Abba, Tata, byona bikuhikibwa hal’iwe, nondabyeho ekikompe kinu; nawe t’okwo ine nkwenda, nawe okw’iwe okwenda. ³⁷ Naiza, nasanga banagire. Nagambira Petro ati: Simoni, onagire? tokuhicha kuloraho saha emo? ³⁸ Muleke kunagira, mulembereze, niho mutarozibwa. Kuba omwoyo gwanguhire, nawe engingo zinogire. ³⁹ Nasuba kugenda, nalembereza, nagamba ekigambo echo chonene. ⁴⁰ Nasuba kwiza, nabasanga banagire; kuba ameso gabo galiga gazitohire, batakimanya n’echo balamusubiramo. ⁴¹ Naiza lwa kasatu nabagambira ati: Hati nimunagire, muhumure. Byahika, esaha yahika; lora, Omwana w’omuntu akuherezibwa mu ngaro z’abaheni. ⁴² Mwimuke, tugende; ngugwo akuntunda ali hehi.

⁴³ Yaliga akifumora, Yuda Iskaryota, omo mul’ikumi na babili, naiza, n’embaga ningi eli na wenene, bali n’embanda n’amakoni, barugire ha bakuru b’abasaserdoti n’abandiki n’abagurusi. ⁴⁴ Omutunzi we yaliga abahere olunyamo, agizire ati: Owe ndanwegera, niwe wenene; mumukwate, mumusagare bwenge bwenge. ⁴⁵ Mbe ka yezire, kachwi n’ako namwiriraho, nagira ati: Kasinge, Rugaba. Namunwegera. ⁴⁶ Bonene nibamutaho engaro, nibamukwata. ⁴⁷ Nawe omo wo mu baliga baliho nasoromorayo embanda, nater’omwiru w’omusaserdoti mukuru, namuchwaho okutwi. ⁴⁸ Yezu nasubamo nabagambira ati: Mweza kunkwata n’embanda n’amakoni nk’omusuma. ⁴⁹ Naku zona naliga ndi hagati yanu ninolekerera mw’eklezia, mutakunkwata; nawe ka bihike ebyayandikirwe. ⁵⁰ Aho abahemba be nibamusiga bona niberuka. ⁵¹ Omusigazi ogwo niwe namuruba azwere ensembe obusyo; nibamukwata. ⁵² Wenene nanaga ensembe, naberukaho ali busa.

YEZU OBUSYO YA KAIFA. — PETRO NAYEYOGA YEZU KASATU.

⁵³ Nibasagara Yezu ha musaserdoti mukuru; abasaserdoti bona n’abandiki n’abagurusi nibasumba. ⁵⁴ Nawe Petro namurubira hara kuhika mu ka mu kibuga ch’omusaserdoti mukuru; yaliga aikere ha muliro n’aberu, nayota. ⁵⁵ Nawe abasaserdoti bakuru n’abalamuzi bona nibahig’entambala hali Yezu, bahiche kumwita, tibagibwene. ⁵⁶ Kuba bengi bamubeherezaga, kandi ebyo bagambaga byaliga bitesyenye. ⁵⁷ Abandi nibemuka nibamubehereza nibagira bati: ⁵⁸ Kuba itwe tukamuhulira nagira ati: Ine ndikambula eklezia enu eyayombekirwe emikono z’abantu, kai mu naku isatu ninombeka endi etakozirwe emikono z’abantu. ⁵⁹ Kai hona ebyo bagambaga bitali bimo. ⁶⁰ Aho omukuru w’abasaserdoti naimuka hagati, nabuza Yezu ati: Tokusubamo kigambo muli ebyo, ebyo bakukugambaho? ⁶¹ Nawe wenene nabuza chonka, tiyasubiremo kintu. Omusaserdoti mukuru nasuba kumubuza namugambira ati: N’iwe Kristu, Omwana wa Mungu asingire? ⁶² Yezu namugira ati: N’ine; kai mulibona Omwana w’omuntu aikere ha bulyo bw’amani ga Mungu, naiza mu mere g’igulu. ⁶³ Aho omukuru w’abasaserdoti natemur’ebizwaro bye, nagira ati: Tuchahigira ki embona? ⁶⁴ Mwahulira ekizumi cha Mungu; mukutekateka ki? Bona nibamulamula nk’ahikire kwitwa. ⁶⁵ Aho abandi nibatandika kumuchwera, nibamusweka ha busyo, nibamuter’enfune, nibamugira bati: Laga. Aberu nibamuter’empi.

⁶⁶ Petro aho yaliga ali mu kibuga ifwo, naiza omo wo mu bazana b’omukuru w’abasaserdoti; ⁶⁷ ka yabwene Petro nayot’omuliro, namwetegereza nagira ati: N’ewe wena sanga oli na Yezu Omunazareti. ⁶⁸ Wenene nayanga nagira ati: Tinkumanya, hona tinkuhulira eby’okugamba. Nahuruka hanza obusyo y’olukare, enkokoromi nekokoroma. ⁶⁹ Omuzana ka yasubire kumubona, natandika kugambira abaliga baliho ati: Onu ni wo mu baliya. ⁷⁰ Wenene nasuba kwanga. Niharabaho katungu, abaliga baliho nibasuba kugambira Petro bati: Koto oli wo mu baliya, kuba oli Munagalilaya. ⁷¹ Nawe wenene natandika kuzumiriza no kulahira ati: Ine tinkumanya omuntu ogwo, owe mukugamba. ⁷² Aho n’aho enkokoromi nesuba kukokoroma. Petro naizuk’ekigambo echo Yezu yaliga amugambire ati: Enkokoromi etakakokoromire kabili, iwe okuneyoga kasatu. Natandika kulira.

YEZU OBUSYO YA PILATO.— NIBAMUZWEKA ENGATA Y’AMAHWA.

¹ Kanencha aho honka, abasaserdoti bakuru nibategekerana n’abagurusi n’abandiki n’olukale lwona, nibaboha Yezu, nibamutwara nibamusagalira Pilato. ² Pilato namubuza ati: N’iwe omukama w’Abayahudi? Wenene nasubamo namugambira ati: Wakigamba. ³ Abakuru b’abasaserdoti nibamuchulira bingi. ⁴ Pilato nasuba kumubuza nagira ati: Si tokusubamo kigambo? Lora okwo bakukulega bingi. ⁵ Yezu nabura kusubamo ekigambo n’ekimo, Pilato nakuma. ⁶ Nawe buli lunaku lukuru yaliga amanyire kubasurumulira omo wo mu mbohe, owe bayendaga wena. ⁷ Haliga haliho owe bayetaga bati: Baraba, abohirwe n’engome ha bwo kwit’omuntu mu bugome. ⁸ Embaga ka yanegere, netandika kusaba nk’omwo yabagiriraga naku zona. ⁹ Pilato nasubamo nagira ati: Mukwenda mbasurumulire omukama w’Abayahudi? ¹⁰ Kuba yamanyaga okw’abakuru b’abasaserdoti baliga bamuletere ichubi. ¹¹ Nawe abasaserdoti bakuru nibayohereza embaga, hakili abasurumulire Baraba. ¹² Pilato nasubamo lwa kabili, nabagira ati: Mbe mukwenda ngire nta omukama w’Abayahudi? ¹³ Bonene nibasuba kuyomba bati: Nomulege ha musalaba. ¹⁴ Kandi Pilato nabagambira ati: Akakola mabi ki? Bonene nibaguma kuyomba bati: Nomulege ha musalaba. ¹⁵ Mbe Pilato, obwo yayendaga kusemerez’embaga, nabasurumulira Baraba, nabaha Yezu bamutez’amasanzu, niho bamulege ha musalaba.

¹⁶ Mbe abasirikale nibamusagara mu kibuga ch’olukale, nibasumbya kohoriti yona. ¹⁷ Nibamuzwek’omwenda gumutuku, nibazing’engata y’amahwa, nibagimutaho ha mutwe. ¹⁸ Nibatandika kumubwacha bati: Kasinge, mukama w’Abayahudi. ¹⁹ Nibater’omutwe gwe n’ibingo, nibamuchwera, nibatez’ebizwi, nibamulamucha.

OMUHANDA GWA KALVARIYO.— YEZU NALEGWA HA MUSALABA.— NAFWA.— NAZIKWA.

²⁰ Mbe ka bamazire kumusekerera, nibamuzur’omwenda gumutuku, nibamuzwek’ebizwaro bye; nibamuhurucha, baze kumulega ha musalaba. ²¹ Nibasiniriza omuntu omo ayarabahoga, naruga ha musiri, niwe Simoni Omunasirene, ise Alekisandri na Rufi, ategule omusalaba gwe. ²² Nibamusagara Golgota, ensonga zacho nikwo kugira oti: Kalvariyo.

²³ Nibamuha kunwa evini etobiremo emira; nabura kwanankula. ²⁴ Nibamulega ha musalaba, nibagabana ebizwaro bye, nibabyesera olweso, kulora echo buli muntu alatwara.

²⁵ Yaliga eli saha ya kasatu aho bamulegire ha musalaba. ²⁶ Enzuno y’elamu ye ekayandikwa eti: Omukama w’Abayahudi. ²⁷ Kandi nibalega abasuma babili hamo nage, omo ha bulyo, ondi ha bumoso bwe. ²⁸ Olwandiko niluhika, olwandikire luti: Alibalirwa mu baheni. ²⁹ Abarabahoga baliga nibamuzuma, nibasingisy’emitwe zabo nibagira bati: Iwe akukambula eklezia ya Mungu, kai mu naku isatu okasuba kugyombeka, ³⁰ noyechungule omwene, ohanantuke ha musalaba. ³¹ Nikwo batyo n’abakuru b’abasaserdoti bamusekereraga bonene bonka n’abandiki, nibagira bati: Yakiz’abandi, kai takuhicha kwekiza omwene. ³² Kristu, omukama wa Israeli, nahanantuke hati ha musalaba, niho tubone nitwikiriza. N’abaliga balegirwe ha musalaba nage, bona bamuzumaga.

³³ Ka zabere saha mukaga, nigubayo omwirima mu nsi yona kuhika saha mwenda. ³⁴ Saha mwenda Yezu nahamuka n’ilaka ihango, nagira ati: Eloi, Eloi, lamma sabakthani? Nikwo kugira ati: Mungu wange, Mungu wange, wannagiranira ki? ³⁵ Abandi abaliga baliho, ka bahulire, nibagira bati: Lora, akweta Eliya. ³⁶ Niharugaho omo nairuka naizuz’esala mw’ikobyo, nata h’esahunga, namuha kunwa, nagira ati: Leka tulore, raba Eliya naiza kumuhananturaho.

³⁷ Nawe Yezu nahamuka n’ilaka ihango, omwoyo niguhwamo. ³⁸ Aho omwenda gwo mw’eklezia nigutemukamo, kuruga oluguru kuhika ifwo, bihinzu bibili. ³⁹ Omukuru w’abasirikale ayaliga amwimerereho, ka yabwene nahamuka n’ilaka ihango liti, omwoyo gukahwamo, nagira ati: Waza! omuntu onu sanga ali Mwana wa Mungu koto. ⁴⁰ Haliga haliho n’abakazi nibalorera hara, muli bonene haliho Maria Madalena, na Maria nina Yakobo muto na Yozefu, na Salome; ⁴¹ abamurubaga aho yaliga ali Galilaya nibamukolera; n’abandi bengi abaliga banegere nage Yeruzalemu.

⁴² Ka habere kebazo, obwo lwaliga luli lulaliriro lw’olunaku olukwebembera sabato, ⁴³ naiza Yozefu w’Arimateya, omulamuzi mukumuke, ayaliga nalindirir’obukama bwa Mungu, nahigahara kugenda hali Pilato, namusaba omutumbi gwa Yezu. ⁴⁴ Aho Pilato nakumisibwa Yezu kwanguha kufwa; nayeta omukuru w’abasirikale igana namubuza okwo yafwire. ⁴⁵ Omukuru w’abasirikale igana ka yamumanyisize, naha Yozefu omutumbi. ⁴⁶ Yozefu nagur’omwenda, namuhanantura, namusemba mu mwenda, namuzika mu kituro echaliga kisimbirwe mw’ibale, ha mulyango gw’ekituro nahiringisizaho ibale. ⁴⁷ Nawe Maria Madalena na Maria, nina Yozefu, baliga nibalora aho yazikirwe.

MUMALAIKA NAGAMBIRA ABAKAZI KUZOKA KWA YEZU.

¹ Sabato ka yahwereho, Maria Madalena na Maria, nina Yakobo, na Salome, bakagula ebikununka kuzima, baze kusiga Yezu. ² Mbe kanencha chulichuli, olunaku olukuruba sabato, nibagenda ha kituro, izoba lyasohwere. ³ Baliga nibagambirana bati: Akutuhiringisizaho ibale ha mulyango gw’ekituro ni ga? ⁴ Aho ka betegereze, nibasanga ibale lihiringisize; nawe lyaliga lihanguhire muno. ⁵ Nibataha mu kituro, nibabona omusigazi aikere ha bulyo, azwere enkanzu mwera, nibaharamuka. ⁶ Wenene nabagambira ati: Muleke kutina; Yezu wa Nazareti, ayalegirwe ha musalaba, niwe mukuhiga; yazokire, tali hanu: mulore aho sanga bamumamize. ⁷ Nawe mugende, mugambire abahemba be na Petro okwo yabebemberera Galilaya; okwo niyo mulimubonera, nka nikwo yabagambire. ⁸ Bonene nibahuruka niberuka mu kituro, kuba bakakwatw’obutini n’olumazi; tibagambireho muntu ekigambo, kutina kwa muno.

YEZU NABONEKERA MARIA MADALENA.

⁹ Ka yazokire kanencha, olwo kutandika lwa sabato, akatandika kubonekera Maria Madalena, owe yehiremo amasitani musanzu. ¹⁰ Wenene nagenda nagambira abo yaliga ali nabo, nibalira, nibater’empamo. ¹¹ Abo ka bahulire okw’ akulora n’okwo yabwenwe omukazi ogwo, tibekirize.

YEZU NABONEKERA ABAHEMBA BABILI N’ENTUMWA.

¹² Ebyo ka byahwereho, nabonekera babili muli abo, abaliga nibatura nibagenda mu ngongo, nibamubona nasusa kundi. ¹³ Mbe aho nibagenda nibagambira abandi; na bonene tibabekirize.

¹⁴ Kumara nabonekera ikumi n’omo bekere h’eliro; nabahanira obutekiriza bwabo n’obugume bw’emitima zabo, obwo bayangire kwikiriza abamubwene yazokire. ¹⁵ Nabagambira ati: Mugende mu nsi, mwolekerere Evanjeli ebihangwa byona. ¹⁶ Alikiriza akabatizibwa, alichunguka; nawe atalikiriza, alisingwa. ¹⁷ Abalikiriza balirubw’amahano ganu: baliruch’amasitani mw’izina lyange, balifumor’endimi zindi, ¹⁸ balikwat’enzoka, kandi ka balinwa obusungu, tibulibarwaza, balita emikono ha barwere, nibakira.

YEZU NAHANAMA MW’IGULU, ENTUMWA NIZIZA KWOLEKERERA.

¹⁹ Mbe hatyo Omukama Yezu, ka yamazire kubafumorera atyo, nasagarwa mw’igulu, niyo aikere ha bulyo bwa Mungu. ²⁰ Nawe bonene nibagenda nibolekerera hona hona, Omukama nabahwera, kai nagumizy’amagambo gabo n’amahano ago bakukola.