Yakobo

OMUGASO GW’ENAKU. — KULEMBEREZA N’OBWESIGE.

¹ Ine Yakobo, omwiru wa Mungu n’Omukama wetu Yezu Kristu, nkubwacha enganda ikumi n’ebili ezisambere. ² Bana betu, mubare nk’obusemererwa buhango enaku ezo mukubona, ³ mumanyire okwo kurozibwa kwo kwikiriza kwanu kukuzara obweguminsiriza. ⁴ Nawe obweguminsiriza bulagirwe kuba buhikire mu bikorwa byabwo, niho mube bahikire na bakobire, mutalebire kintu.

⁵ Omo mul’imwe akaba alebirwe obwetegereza, abusabe hali Mungu, akugabira bona na bingi, nzira kurunduma; kai alibuhabwa. ⁶ Nawe asabe n’obwesige, atakutimatimya. Kuba omutimatimya ali nk’amakonzo g’enanza agakuchundegwa nigayugurwa omuyaga. ⁷ Omuntu ogwo atachwa ati: nkuhabwa kintu ha Mukama. ⁸ Ni muntu w’emitima ibili, muhindahinduki mu mihanda ze zona.

⁹ Omutabani wetu muhabi ayesimire obukuru bwe; ¹⁰ kai omuhango ayesimire obuke bwe, kuba alirabaho nk’obwasyo bw’obunansi. ¹¹ Kuba izoba ka likusohora omusana gukayaka, obunansi bukuyoma, kai obwasyo bwabwo bukulagara, nibunyankabara; nikwo n’omuhango alinyankabara mu mihanda ze. ¹² Omuntu mweguminsiriza mu kurozibwa ali n’omugisa, kuba, k’alimara kurozibwa, alihabwa engata y’obulame, eyo Mungu yalaganisize abakumwenda.

OBURUGO BW’OBUZIMA N’OBUBI.

¹³ Mbe omuntu akarozibwa, yalekaga kugamba ati: Niwe Mungu akundoza; kuba Mungu ti muroza w’amabi, kai hona kandi wenene takuroza muntu. ¹⁴ Nawe buli muntu wena akurozibwa obwoyi bubi bwe, obumusindika nibumukongya. ¹⁵ Kumara, obwoyi bubi bwagizir’enda, bukuzara ekiheno; kai ekiheno, bakikozire, kikuzara olufu. ¹⁶ Mbe, bana betu bendwa, mutahaba. ¹⁷ Enema nzima zona n’emigabo zihikire zona zikuruga oluguru hali Tata w’olumuli, atali na buhinduki nali kiminimini nali buhinduzi. ¹⁸ Kuba mu kwenda kwe akatuzara n’ekigambo kikomereze, tube bakatanga b’ebihangwa bye.

¹⁹ Mukikumanya, bana betu bendwa. Buli muntu wena ayanguhe kuhuliriza, nawe alangeze kufumora, kai atapampuka kunigahara; ²⁰ kuba ebiniga by’omuntu tibikuhicha obuhikire bwa Mungu. ²¹ Hatyo nimwange obulofu n’obwingi bw’obubi bwona, nimwanankule kifura ebigambo ebyayongirwe mul’imwe, ebikuhicha kuchungula emyoyo zanu. ²² Ekiliho, nimuhich’ebigambo ebyo; mutabihulira chonka, mukeziga imwe abene. ²³ Kuba omuntu akahulira ebigambo, akabura kubihicha, ali nk’omuntu akulora mw’ilore obusyo bw’obuzarwa bwe, ²⁴ kandi, yamazire kwelora atyo, nayegendera nayebwa ahw’aho okw’ali. ²⁵ Nawe omwetegereza wa kimo w’ekilagiro kihikire ch’obweyagazi, akaguma kukola atyo, atali muhulizi wo kuyebwa bwangu bwangu, nawe akahicha ebyo yahulire, ogwo atyo niwe alibona omugisa mu bikorwa bye.

²⁶ Omuntu akachwa ati: ndi n’edini, kunu atakuzibira olulimi lwe, nawe akahabisya omutima gwe, edini y’omuntu ogwo ni ya busa chonka. ²⁷ Edini eyezire, nzira ntambala ha meso ga Mungu Tata wetu, eli mu kusura enfuzi n’abafwerwe beba mu bunale bwabo, na mu kubula kutulirwa obulofu bw’enaku za hati.

KULEKA KUSORORA ABANTU.

¹ Bana betu, mutakwatanisya obusorozi bw’abantu no kwikiriza Omukama wetu Yezu Kristu ayakuzibwe. ² Kuba omuntu, azwere epete y’ezahabu n’emyenda zyorobire, akezamo mu bukobe bwanu, kai omuhabi wena, azwere omwenda gutemukire, akezamo, ³ mukalora omuzwazi w’emyenda zyorobire nimumugambira muti: Iwe, ikara hanu kuzima; kandi mukagambira omuhabi muti: Iwe, imerera aho ifwo y’ekihumuzo ch’amaguru gange; ⁴ si timwasorora mul’ imwe, mukaba balamuzi b’ebitekateko bitahikire? ⁵ Muhulirize, bana betu bendwa: si Mungu tasozile abahabi bo mu nsi munu, babe bahango mu kwikiriza n’abahunguzi b’obukama obwo Mungu yalagirire abakumwenda? ⁶ Kai imwe, mukugora omuhabi. Si tibo abahango abakubatwara manimani n’obuhicha bwabo, bakabasagara mu malamuliro? ⁷ Tibo bonene abakunyamula izina izima elyo babarukire? ⁸ Mbe mukahicha ekilagiro ch’ekikama, nk’okwo chandikirwe mu Nandiko, kiti: Oyendega owezanu nk’ewe omwene, mukukola kuzima. ⁹ Nawe mukasorora abantu, mukukola ekiheno, kai musingirwe ekilagiro, nk’abatambuki bacho. ¹⁰ Kuba omuntu, naho akahicha ebilagiro byona, nawe akahena mu kigambo kimo chonka, nasana kuti henda yabitambuka byona. ¹¹ Kuba ayagambire ati: Otagiraga obukwate, niwe wenene agambire ati: Otaitaga. Mbe, naho otagizire obukwate, okait’omuntu, okutambuka ekilagiro. ¹² Nimufumore nimukole nk’abalilamurwa ekilagiro ch’obweyagazi. ¹³ Kuba atali na kisa, talilamurwa n’ekisa; nawe ekisa tikikutina obulamuzi.

KWIKIRIZA TIKUKUGASA KINTU, EBIKORWA BIZIMA BITALIHO.

¹⁴ Bana betu, kikugasira ki omuntu akagamba ati: ndi no kwikiriza, kunu atali n’ebikorwa? Si kwikiriza kukuhicha kumuchungula? ¹⁵ Omutabani wanu hamo omuhara wanu akazuka, kai akaba muzala mu bilyo bya buli lunaku, ¹⁶ kandi omo mul’imwe akabagambira ati: Mugende n’omulebo, muyeyote, mweigusye, kai mukabula kubaha ebyo engingo zikenire, bakugasirwa ki? ¹⁷ Nikwo no kwikiriza: kutali n’ebikorwa, kufwire muli kwonene. ¹⁸ Nawe hamo ondi agambe ati: Oli no kwikiriza, kai ine ndi n’ebikorwa. Onoleke kwikiriza kwawe, ebikorwa bitaliho, kai ine ndikwoleka kwikiriza kwange mu bikorwa. ¹⁹ Okwikiriza okwo Mungu aliho omo wena: ni kuzima; amasitani gona gakwikiriza ebyo, kai gakuzuguma.

²⁰ Nawe okwenda kumanya, iwe muntu musiru, okwo kwikiriza, ebikorwa bitaliho, kufwire? ²¹ Si Ibrahimu, tata wetu, tatakatifuzibwe ebikorwa bye, ka yahereze omwana we Izaki h’etambiro? ²² Okubona okwo kwikiriza kwe kwaliga kukobere n’ebikorwa bye, n’okwo kwikiriza kwamalizibwe mu bikorwa. ²³ Hatyo nikihika ekigambo kinu ch’Enandiko, kiti: Ibrahimu naikiriza Mungu, kai echo kikamubalirwa nk’ibanza, nayetwa munwani wa Mungu. ²⁴ Si timukubona okw’omuntu atakatifuzibwa ebikorwa, nawe kwikiriza kwonka pai? ²⁵ Nikwo na Rahabi, omukazi w’obuyaga, si tiyatakatifuzibwe ebikorwa, ka yayanankwile entumwa, nabasubya mu muhanda gundi? ²⁶ Mbe nk’okwo engingo ezitali n’omwoyo, zifwire, nikwo no kwikiriza okutali n’ebikorwa, kufwire.

AMABI G’OLULIMI.

¹ Bana betu, mutakana kwegira bolekerezi, mumanyire okw’ab’omulimo ogwo bakulamurwa elamu egumire. ² Twena tukuhena mu magambo mengi. Atakuhena mu kafumorere ke, ogwo ni muntu ahikire, kai akuhicha kusagaza engingo ze zona. ³ Tukutaho ekisagazo mu kanwa k’efarasi, zituhulire, kai tuhiche kuchora engingo zazo zona. ⁴ Nimwetegereze n’engaraba: naho zili mpango zita nizichundegwa emiyaga z’amani, engobesyo noro ekuzichora, nk’omwo omuchozi akwendera. ⁵ Nikwo n’olulimi: ni kihinzu kike mu ngingo, nawe lukwekuhya amagambo mahango. Nimulore ekituntu kihango echayokibwe omuliro munoro! ⁶ Olulimi lwona ni muliro, ni nsi y’obubi. Olulimi lukutebwamo mu ngingo zetu, nilurofuhaza engingo zona, nilwacha obulame bwetu bwona, na lwonene lusirizibwe omuliro ogutahwaho. ⁷ Enganda zona z’ebikaka n’ez’enoni n’ez’elya ha nsi n’ebindi ebikwetengesya zikuhicha kugondezibwa, kai zikagondezibwa amani g’abantu; ⁸ nawe olulimi, taliho omuntu akuhicha kulugondeza: luli bubi obutasingwa, kai lwizwire obusungu bwo kwita. ⁹ Nalwo tukukuza Mungu, Tata wetu, kandi hona nalwo tukuzumiriza abantu, abahangirwe nibasusana na Mungu. ¹⁰ Mu kanwa kamo konka bikukura isima n’omuzumo. Bana betu, ebyo tibingene. ¹¹ Si amenzi mazima n’agasalire gakuzwa mw’iziba limo? ¹² Si, bana betu, omutini gukuhicha kuraba emizabibu, hamo omuzabibu, amatini? Nikwo mw’iziba lisalire tigatahwamo amenzi mazima.

OBWETEGEREZA BWA KIMO.

¹³ Ni ga mul’imwe omwetegereza n’omumanyi? Ayoleke ebikorwa bye mu ntungwa nzima, mu bwetegereza bwizwire obufura. ¹⁴ Nawe mukaba muli n’ichubi lisalire mu mutima, n’omwoyo gw’obuhakani, mutayekuhya no kubeha. ¹⁵ Kuba obwetegereza nk’obwo butyo tiburuga oluguru, nawe buli bw’ensi, bw’ekinangingo, bw’ekinamasitani. ¹⁶ Kuba aho ichubi n’obuhakani biliho, aho niho amazongoko n’obubi bwona biliho. ¹⁷ Nawe obwetegereza obukuruga oluguru, echo kutandika bukwera, kandi bukwenda omulebo, buli n’obutekani n’obuhulizi, bukuhicha kukola buli kizima chona, bwizwire ekisa n’ebirabo bizima, tibulamula chonka, kai tibuli na buzigi. ¹⁸ Mbe ebirabo by’obuhikire bikubibwa mu mulebo abakukola ebikorwa by’omulebo.

KURWANA ENTUNGWA MBI NA SITANI.

¹ Enkungana n’entongana zikuruga hai mul’imwe? Si tizikuruga mu bwoyi bubi bwanu, obukurwana mu ngingo zanu? ² Mukuligira, nimuburwa; mukwita, mukuchuba, nimuburwa; mukutongana nimurwanana, nawe timukuhabwa, kuba timusaba. ³ Mukusaba nimubura kuhabwa, kuba mukusaba kubi, mwegongire kwigusya obwoyi bubi bwanu. ⁴ Basihani mwe, si timukumanya okwo kwenda eby’ensi enu ni kuhata Mungu? Mbe hatyo buli muntu wena k’akwenda kunwana n’ensi enu, yegira muhate wa Mungu. ⁵ Mukuchwa muti: Enandiko zikugamba busa chonka ziti: Omwoyo ogutura mul’imwe gukusindika kuchuba si? ⁶ Nangu; gukukanisya enema. Nicho gukugambirira guti: Mungu akurwana abakwekuza, nagabira abakwekehya enema ye.

⁷ Mbe muhulire Mungu; nawe murwane sitani, kai lilirukira hara. ⁸ Ni mwirire hehi na Mungu, kai wenene wena alirira hehi n’emwe. Munabye emikono zanu, imwe baheni; kai imwe abali n’emitima ibili, muyeze emitima zanu. ⁹ Mwelirire, mubihirirwe, mulire; enseko zanu zihinduke, zibe malira, kai omuzaho gwanu gube buzube. ¹⁰ Mwekehye obusyo y’Omukama, kai alibakuza.

KULAMULA CHONKA.

¹¹ Mutageyanaga, bana betu. Akugeya mutabani wabo, hamo akulamula chonka mutabani wabo, ogwo atyo akugeya ekilagiro, nalamula ekilagiro. Mbe okalamula ekilagiro, toli muhicha wacho, nawe okwegira omulamuzi wacho. ¹² Omukozi n’omulamuzi w’ekilagiro n’omo wenka: niwe ali n’obuhicha bwo kunaga no kuchungula. ¹³ Nawe iwe oli kiha, iwe akulamula owezanu? Kai hati imwe abakugamba muti: Lero hamo nencha tukugenda mu charo cha nankegi, tukimaremo omwaka, tutundemo, tubonemo omugaso, ¹⁴ kai mutakumanya ebilagwa nencha. ¹⁵ Nawe si imwe, obulame bwanu buli buta? Ni luho olubonekana mwanya munoro, kumara nilubura. Ni kuzima muno mugambe muti: Omukama k’alaba nayenda, hamo muti: Ka tulaba nitulora, tukukola kinu hamo kiliya. ¹⁶ Nawe hati mukwekuhya mu bwekuza bwanu. Obwekuhya bwona nk’obwo butyo ni bubi. ¹⁷ Mbe akumanya kukola kuzima, akabura kukola, akuhena.

ABAHANGO BABI. — OBWEGUMINSIRIZA. — KUSIGWA KW’ABARWERE.

¹ Imwe bahango, mulire nimulusereze kuber’enaku ezilabagwera. ² Obutunga bwanu buzunzire, kai emyenda zanu zihugusire. ³ Ezahabu n’efweza yanu zigizire obutale, kai obutale bwazyo bulibatonganisya, bulilya engingo zanu nk’omuliro. Mwekanisize ensabo y’ebiniga byo mu naku ezilihereruka. ⁴ Lora, omuhero ogwo mwaimire abakozi abagesire mu misiri zanu gukuyomba, kai eyombo yabo etahiremo mu matwi g’Omukama w’embaga. ⁵ Mukatula mu nsi mu malya na mu masemererwa; mukegusiza emitima zanu ha lunaku lw’ibaga. ⁶ Mukalamula nimusinga, nimwita omuzima, kai tiyayangire.

⁷ Mbe, bana betu, mweguminsirize kuhika ha kwiza kw’Omukama. Lora, omulimi akutegeza ebirabo by’obuguzi bwingi by’ensi, nayeguminsiriza kuhika abone enzula yo kutandika n’eya kabili. ⁸ Mbe imwe mwena, mweguminsirize nimugumye emitima zanu, kuba kwiza kw’Omukama kuli hehi. ⁹ Mutageyanganana, bana betu, niho muleke kweleterera. Ngugu omulamuzi, ali ha mulyango. ¹⁰ Bana betu, nimurubire ha ndolero y’obusasi n’obweguminsiriza mu kurozibwa y’abalagi, abagambire mw’izina ly’Omukama. ¹¹ Lora, tukweta ab’omugisa, abeguminsirize. Mukahulira nibagamba obweguminsiriza bwa Yubu, nimubona obuhererukiro bwe, obw’Omukama yamubonere, kuba Omukama ali n’ekisa, kai ni musasizi.

¹² Nawe kukira byona, bana betu, mutalahiriraga igulu n’ensi, n’ekilahiro kindi chona pai. Nimugambe chonka muti: Yee, yee; pai, pai, niho mutalilamurwa kubi. ¹³ Omo mul’ imwe azubire? Alembereze. Asemererwe? Ayembe.

¹⁴ Omuntu yarwaraga mul’imwe, yayeta abasaserdoti b’Eklezia, beze kumusabira no kumusig’amazuta h’ezina ly’Omukama. ¹⁵ Kai esala ezo zo kwikiriza zikuchungula omurwere, Omukama wena akumuhumuza; kandi akaba ali n’ebiheno, akukizibwa.

KULEMBEREZA.

¹⁶ Nimwegambirane ebiheno byanu, nimusabirane, niho muchunguke; kuba ilembereza ly’omuzima nayomerera lili n’obuhicha bwingi. ¹⁷ Eliya yaliga ali muntu muheni nk’etwe, nawe, ka yayomerere kusaba, enzula eleke kugwa mu nsi, tiyasubire kugwa mu myaka isatu n’ihinzu. ¹⁸ Kandi ka yasubire kusaba, igulu niligwisy’enzula, kai ensi neraba. ¹⁹ Bana betu, omo mul’imwe akabulira hara n’obukomereza, kai ondi akamusubya, ²⁰ ogwo amanye kinu: akwiha omuheni mu muhanda ogwo yabuliremo, akuchungula omwoyo gwe mu lufu, nakizibwa ebiheno bingi.