Ha Bahebrei

YEZU KRISTU AKUKIRA BAMALAIKA.

¹ Mungu, ka yamazire kufumorera batatenkuru n’omunwa gw’abalagi, engendo ningi n’obwenge bwingi, ² mu naku zinu zo kuhereruka natufumorera n’Omwana, owe yagizire muhunguzi wa byona, yamazire kuhanga ensi zona muli wenene; ³ kai obw’ali bukuru bw’ikuzo lye n’olunyamo lw’obubaho bwe, n’obw’agumya byona n’ekigambo ch’obuhicha bwe, ka yamazire kutukiza mu biheno byetu, naikara mw’igulu ha bulyo bw’obukuru; ⁴ yakizire bamalaika mu lulengo olwo izina elyo yaherwe likizire elyabo.

⁵ Kuba ni mumalaika ki ayagambirwe Mungu ati: Oli Mwana wange, nakuzara lero? Kai ati: Ndiba Ise, kandi wenene aliba Mwana wange? ⁶ Kandi, ka yatahize omuzigezo we mu nsi, nagira ati: Bamalaika bona ba Mungu bamuhabudu. ⁷ Nikwo, eby’abamalaika akutenga ati: Akugira bamalaika be emiyaga, kai abakuratizi be nabagira olubezi lw’omuliro; ⁸ nawe eby’Omwana nagira ati: Ekitega chawe, iwe Mungu, kili mu myaka z’emyaka; ekilezu ch’obukama bwawe ni kilezu ch’oburonge. ⁹ Okayenda obuhikire, nohata obutahikire; hatyo, iwe Mungu, Mungu wawe akakusigya amazuta g’omuzaho, kukiraho abezanu. ¹⁰ Kandi ati: N’iwe, Mukama, ayahangire ensi ha butandikiro, kai igulu ni mulimo gw’emikono zawe. ¹¹ Balisingarika, nawe iwe oliberaho; kai bona balikokora nk’omwenda, ¹² kandi olibahindula nk’omugutu, nibahinduka; nawe iwe, okwikara nk’okw’oli, kai emyaka zawe tizilihwaho.

¹³ Akagambira mumalaika ki ati: Ikara ha bulyo bwange, kuhika ngire abahate bawe kihumuzo ch’amaguru gawe? ¹⁴ Si tibali bona emyoyo ezitumirwe kukolera abali no kuhungula obuchunguki?

¹ Nicho tuli no kukana kuhicha kuzima ebyo twahulire, tutayeywa. ² Kuba, raba ebigamboebyamanyisibwe bamalaika nibisimbagirira, kai obutambuki n’obugome bwabyo nibunaranazibwa kihikire, ³ tulikira tuta, tukagaya ebigambo ebituletera obuchunguki bwa kimo, ebyatandikire kumanyisibwa Omukama, nibigumisibwa ababihulire, ⁴ kai bonene nibagumisibwa Mungu n’enyamo n’amahano n’eby’ amani by’enganda ningi, n’obugabi bw’Omwoyo Mutakatifu, nk’okwo yayendaga?

⁵ Kuba Mungu tiyahere bamalaika kutwal’ensi y’enaku z’obusyo, eyo tukugamba. ⁶ Omo akatenga mu Nandiko ati: Omuntu ni kiha, ohiche kumwizuka, hamo omwana w’omuntu, ohiche kumusura? ⁷ Wamuhere kukirwa bamalaika mwanya munoro, nawe kumara wamwizwize ikuzo n’isima, kai wamuhere kugerera emilimo z’emikono zawe; ⁸ watereho byona ifwo y’ebigere bye. Mbe obwo yamuhere kugerera byona, tiyasigire kintu n’ekimo ekitagererwa wenene, naho tutakabwene kuhika hati okwo byona bigererwa wenene.

⁹ Nawe tukubona okwo Yezu, ayaliga akizirwe bamalaika mwanya munoro, yezuzibwe ikuzo n’isima kuber’olufu olwo yemere, Mungu mu bufura bwe yayenzire afwerere bona. ¹⁰ Kuba chaliga kihikire Mungu, ayahangire byona kubera wenene omwene, obwo yayendaga kusagara abana bengi mw’ikuzo, atakatifuze mu busasi kana buchunguzi bwabo. ¹¹ Kuba omutakatifuza n’abatakatifuzibwa bakuruga bona hali omo. Nicho atakorw’ensoni kubayeta batabani babo, nagira ati: ¹² Ndimanyisya izina lyawe mu batabani betu; ndikukuza mu bukobe bw’abantu. ¹³ Kai ati: Ndimwesigirira. Kandi ati: Nkwiza n’abana bange, abo Mungu yampere. ¹⁴ Mbe obw’abana bali n’engingo n’ensagama, wenene yazikobere nabo, asingariche no kufwa kwe ayaliga ali mukuru w’olufu, nilyo Isitani, ¹⁵ kandi achungule abaliga bali mu bwiru mu bulame bwabo bwona, kuber’obutini bw’olufu.

¹⁶ Kuba takuchungula bamalaika, nawe oluganda lwa Ibrahimu. ¹⁷ Nicho yaliga ali no kwingana n’abatabani babo muli byona, abe ha meso ga Mungu musaserdoti mukuru w’ekisa na mwesigwa wo kuhicha kwenaranaliza ebiheno by’ihanga. ¹⁸ Kuba obusasi n’oburozibwa obwo yayemere, nibwo bukumuha kuzuna abakurozibwa.

YEZU KRISTU AKUKIRA MUSA.

¹ Mbe hatyo, bana betu batakatifu, abakobere obwesi bwo mw’igulu, mwetegereze Yezu, entumwa n’omusaserdoti mukuru y’edini eyo tukuruba, ² ayesigirwa ayamutereho, nk’okwo Musa yaliga ali mu nzu ye yona. ³ Kuba yalengerwe kuhabwa ikuzo lingi kukira elya Musa, obw’omwombeki w’enzu akukuzibwa kukira enzu yonene. ⁴ Kuba buli nzu yona eli n’omwombeki wayo; nawe Mungu niwe yahangire byona.

⁵ Nikwo, Musa akaba mwesigwa mu nzu yona ya Mungu, nk’entumwa ekumanyisya ebyo yatumirwe kugamba; ⁶ nawe Kristu ali nk’omwana mu nzu yabo: kai enzu egyo n’itwe, tukaba nitugumya kuhika ha muhero obwesige n’ikuzo elyo tukutegeza.

ABAYAHUDI BEKENGE, BATAFWERWA BUSA.

⁷ Nicho Omwoyo Mutakatifu natugambirira ati: Lero mukahulira ilaka lye, ⁸ mutagumya emitima zanu, nk’olunaku lw’ebiniga n’olunaku lwo kurozibwa mw’irungu, ⁹ aho beswenkuru bandolize, bayenzire kumanya obuhicha bwange, nibabona ebikorwa byange ¹⁰ mu myaka makumi ana; nicho nanigahalire oluzaro lunu, ningira nti: Emitima zabo zikuhaba bucha bucha, kai tibamanyire emihanda zange; ¹¹ hatyo nindahira mu biniga byange nti: Tibalitahira mu buhumuliro bwange.

¹² Bana betu, mwemanye, atabaho n’omo mul’imwe w’omutima mubi gwo kumusiha kuleka kwikiriza, akatagana na Mungu akulora; ¹³ nawe muhanane naku zona, omwanya gukiliho oguyetwa Lero, hatabaho n’omo wo kukongibwa ebiheno no kwegumya. ¹⁴ Kuba tukobere na Kristu, tukaba nitugumya kuhika ha muhero kwikiriza okwo twaliga tuli nakwo muli wenene ha butandikiro, ¹⁵ ka kikugambwa kiti: Lero mukahulira ilaka lye, mutagumya emitima zanu, nka mu biniga ebyo. ¹⁶ Kuba abandi, ka balihulire, nibanigahaza Omukama; nawe ti bona abo Musa yahurukize mu Misri. ¹⁷ Nawe Mungu akanigahalira ga mu myaka makumi ana? T’abo abahenire, abasigire emitumbi zabo zinyamire mw’irungu? ¹⁸ Kai Mungu akalahirira ga ati: Timulitahira mu buhumuliro bwange, batali abatekirize? ¹⁹ Mbe hatyo tukubona okw’obutekiriza bwabo nibwo bwabazibire kubutahamo.

OBUHUMULIRO BWA MUNGU.

¹ Mbe tutine kugaya omulago gwo kutaha mu buhumuliro bwe, omo n’omo mul’imwe akabula kubutahamo. ² Kuba gukamanyisibwa itwe nka bonene; nawe ekigambo echo bahulire tichabagasire kintu, obwo chaliga kitakwatene no kwikiriza mu bantu abakihulire. ³ Nawe itwe abekirize, tulitahira mu buhumuliro, nk’okwo chandikirwe kiti: Nk’okwo nalahire mu biniga byange, tibalitahira mu buhumuliro bwange; nibw’obuhumuliro obwo yatahiremo, ka yamazire emilimo ze mu buhangi bw’ensi. ⁴ Kuba akatenga handi eby’ olunaku lwa musanzu, nagira ati: Kai Mungu nahumura olunaku lwa musanzu lw’emilimo ze zona. ⁵ Kai hanu ati: Tibalitahira mu buhumuliro bwange.

⁶ Mbe obw’abandi bonka nibo balibutahamo, n’obwo abatandikire kuhabwa omulago batabutahiremo kuber’obutekiriza bwabo, ⁷ Mungu nasuba kutaho olunaku, nagira ati: Lero, engambo ya Daudi, naku ningi zarabireho, nk’okwo nagambire oluguru nti: Lero mukahulira ilaka lye, mutagumya emitima zanu. ⁸ Kuba Yoswe akiba ababonere obuhumuliro, Mungu tiyakusubire kugamba olunaku lundi. ⁹ Mbe ihanga lya Mungu lili no kuhabwa obuhumuliro bundi. ¹⁰ Kuba ayatahire mu buhumuliro bwa Mungu akuhumura mu milimo ze, nka Mungu mu ze. ¹¹ Mbe twanguhe kutahamo mu buhumuliro bwa Mungu, hatabaho n’omo wo kugwa, akaruba endolero eyo y’obutekiriza.

¹² Ekigambo cha Mungu kikulora, kili n’amani, kai kikutaha mu nda nk’embanda namogi abili; kikuhika ha ntaganiro y’omwoyo n’obwenge, y’enonga n’isokoro, kai kikusobora ebitekateko n’obwetegeki bw’omutima. ¹³ Tihaliho ekihangwa ekitakubonwa ebusyo ye; nawe byona ni busa na ha bweru mu meso g’alitutonganisya.

YEZU KRISTU, OMUSASERDOTI MUKURU.

¹⁴ Mbe, obwo tuli n’omusaserdoti mukuru, Yezu, Omwana wa Mungu, ayatahire mw’igulu, mbe tugume mu kwikiriza. ¹⁵ Kuba tituli n’omusaserdoti mukuru atakuhicha kusasira obunoge bwetu; nawe akarozibwa nk’etwe muli byona, nzira ekiheno. ¹⁶ Mbe tugende n’obwesige ha kitega ch’enema, niho tusasirwe, nitubona obuhwezi bw’enema mu bukene bwetu.

¹ Kuba buli musaserdoti mukuru wena akuruga mu bantu natebwaho kuber’abantu mu magambo ga Mungu, ahereze emiherezo n’ebitambo byo kuliha ebiheno; ² akuhicha kusasira abatakumanya n’abakuhaba, obwo wenene wena azingirwe obunoge; ³ kai nicho ali no kuhereza ebitambo byo kuliha ebiheno ha mwanya gwe na ha mwanya gw’ihanga.

⁴ Kandi taliho akweha omwene ikuzo elyo; nawe ali no kwetwa Mungu, nk’Aroni. ⁵ Mbe nikwo na Kristu, tiyegabire omwene obukuru bw’omusaserdoti mukuru, nawe akabuhabwa ayamugambire ati: Oli Mwana wange, nakuzara lero. ⁶ Nk’okwo akugamba na handi ati: Oli musaserdoti kuhika ha butahwa n’obutahwa, nka Melkisedeki. ⁷ Mu naku z’engingo ze, ka yahereze esala n’obukurasi bwe, hamo n’obuhamuki buhango n’amaziga, hali onu ayayendaga kumuchungula mu lufu, akahulirwa kuber’obukuza bwe. ⁸ Kandi, naho yaliga ali Mwana wa Mungu, akayega kuhulira, mu busasi bwona obwo yasasibwe; ⁹ kai ka yahikire mw’ikuzo lye, akaba kana buchunguzi bw’abakumuhulira bona, ¹⁰ Mungu yamugizire musaserdoti mukuru, nka Melkisedeki.

¹¹ Muly’ebyo tuli n’ebigambo bingi byo kugamba, kai kubisombora kugumire, kuba mwagumirwa kubihulira. ¹² Kuba omwanya ogwo gwona mwakubere bolekerezi, kai muchali no kwolekererwa ebyo kutandika by’ebigambo bya Mungu; mwabere nk’ali no kunwesibwa amata, ebilyo bigumire pai. ¹³ Mbe akunwesibwa amata gonka, takuhicha kuhulira ebigambo by’obuhikire, kuba achali namuto. ¹⁴ Nawe ebilyo bigumire ni by’abahikire, abamanyire kutaganisya ebizima n’ebibi.

ABAZEMI. — KUTEGEZA.

¹ Mbe tuleke ebya Kristu ebyo batandika kwolekererwa, nitugambe ebihikire koto, tutasuba kutaho ebili oluhazu lw’edini: kwenaraliza ebikorwa by’olufu, no kwikiriza Mungu, ² n’ebya Batisimu, no kutaho emikono, no kuzoka kw’abafu, n’elamu etahwaho. ³ Tulakola tutyo, Mungu akatufuha. ⁴ Kuba tikikuhikibwa abamulikirwe lugendo lumo, abalolize mugabo gw’igulu, abakobere eby’Omwoyo Mutakatifu, ⁵ kandi abalolize n’ebigambo bizima bya Mungu n’entungwa z’emyaka ezilaiza, ⁶ nibagwa, bakasuba kuhimboka mu kwenaranaza, bonene abakusuba kulega ha musalaba Omwana wa Mungu muli bonene, nibamukoz’ensoni. ⁷ Kuba itaka, ka ligwerwa kengi enzula niliraba emikubi ezikugasira abalimi balyo, likuhabwa omugisa gwa Mungu. ⁸ Nawe ka liraba amahwa n’olumbugu, likwangwa, kai lili hehi no kuzumirizibwa; litamwe liyokibwe.

⁹ Nawe, bendwa bange, tukubayendeza ebizima n’ebili hehi n’obuchunguki kukiraho, naho twafumora tutyo. ¹⁰ Kuba Mungu tabura kuba muronge, akayebwa ebikorwa byanu n’obwendani obwo mwamanyisize, nimukolera abatakatifu nk’okwo mwakozire kara. ¹¹ Nawe tukwegonga buli muntu wena mul’ imwe ayesinirize kuguma mu butegeza bwe bwona kuhika ha muhero, ¹² niho mutalengahara, nawe mube barubirizi b’abalihungula emirago, no kwikiriza kwabo n’obweguminsiriza bwabo.

¹³ Mungu ka yalaganisize Ibrahimu, obw’aliga atali n’ondi amukizire, ahiche kumulahirira, akelahirira omwene, ¹⁴ nagira ati: Nikwo, ndikuha omugisa mwingi, kai ndikanisya obuzare bwawe. ¹⁵ Hatyo Ibrahimu, ka yalindirire n’obweguminsiriza, akabona omulago niguhika. ¹⁶ Kuba abantu bakulahirira ababakirize, kai ekilahiro, ekili kuti mukwatirizo, kikumar’empaka zabo. ¹⁷ Nicho Mungu, ka yayenzire kumanyisya kotokoto abahunguzi b’omulago obusimbagirizi bw’obwetegeki bwe, nataho ekilahiro, ¹⁸ tuhiche kuhumuzibwa muno ebigambo bibili ebitakuhicha kuhinduka, obwo Mungu tahicha kubeha, itwe abakwirukira ebizima ebyo batugambire kutegeza. ¹⁹ Obutegeza obwo tukubugumya nk’isika ligumire, lisimbagirire ly’omwoyo gwetu; bukutahamo kuhika mu nda y’ikingirizo, ²⁰ aho Yezu, nk’omwebembezi, yatahiremo ha mwanya gwetu, obwo yagizirwe musaserdoti mukuru w’emyaka ezitahwaho, nka Melkisedeki.

OBUSASERDOTI BWA MELKISEDEKI.

¹ Kuba Melkisedeki ogwo, omukama wa Salemi, omusaserdoti wa Mungu mukuru koto, ayagenzire kwesungana Ibrahimu, akiruga kusinga abakama, namuha omugisa, ² naherezibwa Ibrahimu ekihinzu ch’ekumi cha byona; ali munomuno, nk’omwo izina lye ligambira, mukama w’obuhikire, kandi mukama wa Salemi, nikwo kugira oti: mukama w’omulebo; ³ atali n’ese na nina, n’oluganda lwona pai; atali na butandikiro bw’enaku ze nali muhero gwazo, akususana atyo n’Omwana wa Mungu, niwe akwikara ali musaserdoti mu myaka ezitahwaho. ⁴ Lora, omuntu ogwo akuherezibwa Ibrahimu ekihinzu ch’ekumi ch’omunyago gwe, ali mukuru ata si!

⁵ Abakuhabwa obusaserdoti mu bana ba Levi, Ekilagiro kikubalagira kutwala ekihinzu ch’ekumi mw’ihanga, nibo batabani babo, naho bonene bona barugire hal’Ibrahimu. ⁶ Nawe atali w’oluganda lwabo akasoroza Ibrahimu ekihinzu ch’ekumi, naha kana milago omugisa. ⁷ Mbe koto omukuru niwe akuha omuto omugisa. ⁸ Kai hanu, nibo abantu abakufwa abahabwa ekihinzu ch’ekumi; nawe haliya, omuhabwa akugambwa okw’ akulora bucha bucha. ⁹ Kandi nkugamba nti: Levi, akusoroza abandi ekihinzu ch’ekumi, akakiliha wenene mul’Ibrahimu; ¹⁰ kuba yaliga akili mu nsigo za Ibrahimu, Melkisedeki ka yezire kumwesungana.

OBUSASERDOTI BWA KARA TIBUKILIHO.

¹¹ Mbe obuhikire bukiba nibuhicha kuruga mu busaserdoti bwa Levi, (kuba abantu bakahabwa Ekilagiro ha bwa bwonene), hatyo kubaki haimukibwa omusaserdoti ondi nka Melkisedeki, nk’Aroni pai? ¹² Kuba obusaserdoti obwo bwahindukire, Ekilagiro chona kili no kuhinduka. ¹³ Kuba ayagambwaho ebyo ali w’oluganda lundi; muli lwonene tihaliho ayahereze ha lutare. ¹⁴ Kuba kinu kili ha bweru: Omukama wetu akaruga muli Yuda, oluganda olwo Musa atagambire kintu eby’abasaserdoti, ¹⁵ kai munomuno akemuka omusaserdoti ondi nasusana nka Melkisedeki, ¹⁶ ataterweho ha bw’omuku gw’ekinangingo, nawe ha bw’obuhicha bw’obulame bwe obutahwaho. ¹⁷ Kuba Enandiko zikumanyisya ziti: Oli musaserdoti mu myaka ezitahwaho, nka Melkisedeki. ¹⁸ Mbe hatyo omuku gwa mbele gwalazibwe, kuber’obunoge n’obutagasa bwagwo. ¹⁹ Kuba Ekilagiro tichalesire kintu ha buhikire; nawe chatulesire ha butegeza buzima muno, obutwiriza hehi na Mungu.

OBUKURU BW’OBUSASERDOTI BWA KRISTU.

²⁰ Kai obusaserdoti obwo bukatebwaho n’ekilahiro, (abandi tibagizirwe basaserdoti n’ekilahiro, ²¹ nawe onu ali n’ekilahiro, obwo Mungu yamugambire ati: Omukama akalahira, kai talyefuza, nagira ati: Oli musaserdoti mu myaka ezitahwaho); ²² hatyo Yezu ali mutwerezi w’omulago muzima muno kukiraho.

²³ Kandi muli bonene abasaserdoti bakaba bengi, kuba olufu lwabazibiraga kuberaho; ²⁴ nawe onu, obw’akwikara obutahwa, ali n’obusaserdoti obutahwaho. ²⁵ Nicho ali n’obuhicha bwo kuchungula obutahwa abakwirira hehi na Mungu muli wenene, obw’akulora bucha bucha atutwezere.

²⁶ Mbe chaliga kingene tube n’omusaserdoti mukuru nk’ogwo atyo, mutakatifu, mbula kabi, nzira ntambala, atagene n’abaheni, ali oluguru lw’igulu; ²⁷ atali no kuhereza ebitambo buli lunaku, nk’abasaserdoti baliya, kutandika kuber’ebiheno bye bya wenene, kumara kuber’eby’abandi; kuba echo akakikola lugendo lumo namara, olwo yayehereze omwene. ²⁸ Ekilagiro kikataho abasaserdoti bezwire obunoge; nawe ekigambo ch’ekilahiro, ekihererukira Ekilagiro, kikutaho Omwana, ahikire obutahwa n’obutahwa.

OMULAGO MUHYA.

¹ Ekiliho ni kinu: tuli n’omusaserdoti mukuru akuhicha kwikara ha bulyo bw’ekitega ch’obukuru bwa Mungu mw’igulu, ² ali musaserdoti w’ahantu hatakatifu na tabernakulo ya kimo, eyo Omukama yayombekire, omuntu pai. ³ Kuba buli musaserdoti mukuru wena akutebwaho kuhereza emiherezo n’ebitambo; nicho na wenene alagirirwe kuba n’echo kuhereza. ⁴ Mbe akiba ali mu nsi, tiyakubere musaserdoti, obwo baliho abakuhereza emiherezo ha bw’Ekilagiro, ⁵ nibakolera edini eli kisusano n’ekiminimini ch’ebyo mw’igulu, nk’okwo chagambirwe Musa, ka yayenzire kwombeka tabernakulo, kiti: Lora, engambo ya Mungu, nokole byona nk’endolero eyo wayolekibwe mw’ibanga.

⁶ Nawe owetu akahabwa obusaserdoti buzima muno, bwinganisya n’obutwerezi bwe bw’omulago muzima muno, oguli n’endagano nzima muno kukira ogwa kara. ⁷ Kuba omulago gwo kutandika gukiba gutalebire, ogwa kabili tigwakubereho. ⁸ Kuba Mungu nabachahalira nagira ati: Lora, enaku zilaiza, engambo y’Omukama, aho ndagira omulago muhya n’enzu ya Israeli n’enzu ya Yuda; ⁹ tiguliba nk’omulago ogwo nagizire na besenkuru, olwo nabakwatire omukono nimbahurucha mu nsi ya Misri, kuba tibagumize omulago gwange, kai ine nimbanagirana, engambo y’Omukama. ¹⁰ Nawe ngugwo omulago ogwo ndagira n’enzu ya Israeli, enaku ezo ka zilahwaho, engambo y’Omukama: ndinyama ebilagiro byange mu bwenge bwabo, kai ndibyandika mu mutima gwabo; ndiba Mungu wabo, kai bonene baliba ihanga lyange; ¹¹ kandi taliho alisuba kwolekerera owezabo na mutabani wabo ati: Omanyega Omukama; kuba bona balimmanya, kutandikira ha muto kuhika ha mukuru muli bonene; ¹² kuba ndibakiza entambala zabo, kai tindisuba kwizuka ebiheno byabo. ¹³ Obwo yagambire ati: Omulago muhya, yamanyisize okwo ogwa kara gwakokwere. Mbe echa kara n’ekikokoro kili hehi no kuhwaho.

OMULAGO GWA KARA GWAHWEREHO.

¹ Omulago gw’era gwona gwaliga guli n’emiku zo kukolera Mungu, na hantu hatakatifu mu nsi. ² Kuba tabernakulo yaliga eyombekirwe, halimo mu kihinzu cho kutandika omutereko, n’oluguzo, n’emikate z’omuherezo; ekihinzu echo chayetwaga kiti: Hatakatifu. ³ Kandi enuma y’ekingirizo cha kabili haliga haliho ekihinzu cha kabili cha tabernakulo, echayetwaga kiti: Hatakatifu h’Abatakatifu, ⁴ omwo haliga halimo ekituntumuzyo ch’ezahabu, n’isandikwa ly’Omulago liswekirwe ezahabu lyona, halimo mu nda yalyo ekitwaro ch’ezahabu elimo manu n’enkoni y’Aroni eyaliga esebukire, n’embaho z’Omulago. ⁵ Oluguru lw’isandikwa haliga haliho bakerubimib’ikuzo, abaliga nibasweka ahantu h’obutwerezi n’ekiminimini chabo. Nawe ti mwanya hati gwo kutonda ebyo byona.

⁶ Mbe ebintu ebyo bitonzire bityo, abasaserdoti batahamoga naku zona mu kihinzu cho kutandika cha tabernakulo, ka bakolaga omulimo gwabo; ⁷ nawe mu kihinzu cha kabili omusaserdoti mukuru wenka yatahamoga lugendo lumo lwonka buli mwaka, ategwire echamba echo yaherezaga kuber’obutamanya bwe n’obw’abantu. ⁸ Omwoyo Mutakatifu akwoleka muly’ebyo okw’omuhanda gw’ahantu hatakatifu gwaliga gutakazibukire, tabernakulo yo kutandika ekiliho. ⁹ Ni kisusano ch’ebyaliga bili mu naku ezo, aho baherezaga emiherezo n’ebitambo ebitahichaga kuyeza omutima, obwo bili biliyo n’omunwo chonka, ¹⁰ n’obunabya bw’enganda ningi, n’emitorotongo z’ekinangingo, ezaliga zilagirwe chonka kuhika ha mwanya gwo kuzihindula.

YEZU KRISTU AKATUCHUNGUZA ENSAGAMA YE.

¹¹ Nawe Yezu Kristu omusaserdoti mukuru w’ebizima ebilaiza, ka yezire, akaraba mu tabernakulo mpango na nzima muno kukiraho, etakozirwe emikono z’abantu, nikwo kugamba oti: etahangirwe nk’ebindi, ¹² natahamo lugendo lumo mu hatakatifu, n’echamba ch’empaya hamo ch’enana pai, nawe n’ensagama ye, natubonera obuchunguki obutahwaho. ¹³ Kuba, raba echamba ch’empaya n’ech’enumi n’isamula ly’izu ly’enananibitakatifuza abarofuhere, babone obuyezi bw’ekinangingo, ¹⁴ kai ensagama ya Kristu, ayehereze omwene atali na ntambala hali Mungu ha bw’Omwoyo Mutakatifu, elyeza eta si omutima gwetu mu bikorwa by’olufu, niho tukolere Mungu akulora!

¹⁵ Hatyo ali mutwerezi w’omulago muhya, niho abayesirwe bahabwe omulago gw’omuhungulo ogutahwaho, kuber’ olufu olwo yayemere, alihe entambala ezikorzirwe mu mulago gwo kutandika. ¹⁶ Mbe omulagoguliho, omulagi ali no kufwa. ¹⁷ Kuba omulago gukugumisibwa olufu lwonka, obwo gutali na mugaso, omulagi akili mwoyo. ¹⁸ Nicho omulago gwo kutandika gwonene tigwatebwaho, echamba kitaliho. ¹⁹ Mbwenu Musa, ka yamazire kusoma ha meso g’abantu bona emiku zona z’Ekilagiro, natwara echamba ch’enana n’empaya, hamo n’amenzi n’obwoya bw’enabalega butukwire, na hysopo, nasamulira ekitabo chonene n’abantu bona, ²⁰ nagira ati: Nich’echamba ch’omulago ogwo Mungu yabalagirire. ²¹ Kandi nasamulira n’echamba tabernakulo n’ebitwaro byamo byona. ²² Mbwenu ha bw’Ekilagiro, kihwa byona bikuyezibwa echamba, kai nzira buseseki bw’echamba, kukizibwa tikuliho.

²³ Mbe, obw’ebisusano by’ebintu byo mw’igulu bikuyezibwa bityo, ebintu byonene byo mw’igulu byaliga bili no kuyezibwa ebitambo bizima muno kukiraho ebyo. ²⁴ Kuba Yezu tiyatahiremo mu hatakatifu ahakozirwe emikono z’abantu, hali kisusano ch’ahatakatifu ha kimo, nawe mw’igulu honene, atwemerere hati ebusyo ya Mungu. ²⁵ Kai tiyayehereze engendo ningi, nk’okw’omusaserdoti mukuru atahiramo buli mwaka n’echamba kigeni, ²⁶ kuba hatyo yakulagirwe kusaswa engendo ningi kuruga ha butandikiro bw’ensi; nawe kasi! akabonekera lugendo lumo lwonka ha muhero gw’emyaka, asingariche ekiheno n’ekitambo che. ²⁷ Kandi nka nikwo kilagirwe abantu kufwa lugendo lumo, kumara balamurwe, ²⁸ nikwo na Kristu yayehereze lugendo lumo, akize ebiheno bya bengi; olwa kabili alibonekera atali na ntambala, achungule abamulindirira.

EBITAMBO BYA KARA BYALIGA BILEBIRE.

¹ Kuba Ekilagiro, ekili n’ekiminimini chonka ch’ebilaiza, nawe ekisusano chonene chabyo pai, tikikuhicha nangu kutakatifuza abakwirira hehi na lutare, n’ebitambo ebikuherezibwa obutalekera buli mwaka. ² Bikaba bili bityo, bakulekire kubihereza, kuba abakukola batyo tibakusubire kuzitoherwa ebiheno byabo mu mitima zabo, obwo bakukizibwe lumo. ³ Nawe kasi! ebitambo ebyo bikwizukiza ebiheno buli mwaka. ⁴ Waza! echamba ch’enumi n’empaya tikikuhicha na kanoro kwihamo ebiheno.

EKITAMBO CHA YEZU KRISTU.

⁵ Nicho Yezu, ka yezire mu nsi, yagambirire ati: Tiwayenzire ebitambo n’emiherezo, nawe wambumbire engingo; ⁶ ebitambo byo kuliha ebiheno tibyakusemerere. ⁷ Hatyo nkagamba nti: Ka nize, nk’okwo chandikirwe hal’ine mu Kitabo, nkole, iwe Mungu, eby’okwenda. ⁸ Ka yagambire ati: Tiwayenzire ebitambo n’emiherezo, nali ebitambo byo kuliha ebiheno, kai tiwasemererwe ebikuherezibwa ha bw’Ekilagiro, ⁹ nasuba nagira ati: Ka nize, nkole eby’okwenda, iwe Mungu. Hatyo akwihaho ekitambo cho kutandika, ateho echa kabili. ¹⁰ Nikwo kwenda kwa Mungu okwatutakatifwize n’engingo za Yezu Kristu, ezaherezibwe lugendo lumo.

¹¹ Abasaserdoti baliya bayemereraga buli lunaku nibatamba nibahereza ebitambo ebyo byonene, ebitakuhicha nangu kwihamo ebiheno, ¹² nawe onu, ka yahereze ekitambo kimo chonka cho kuliha ebiheno, naikara kimo ha bulyo bwa Mungu, ¹³ nalindirira kuruga hati abahate be babe kihumuzo ch’amaguru ge. ¹⁴ Kuba n’obuhereza bumo akaleta ha buhikire abo yatakatifwize, mu butahwa n’obutahwa. ¹⁵ Nich’ech’Omwoyo Mutakatifu wenene akutumanyisya. Kuba ka yamazire kugamba ati: ¹⁶ Ngugw’omulago ogwo ndagira nabo, naku ezo zahikire, engambo y’Omukama; ndinyama ebilagiro byange mu mitima zabo, kai ndibyandika mu bwenge bwabo, ¹⁷ nasuba nagira ati: Kandi tindisuba kwizuka ebiheno byabo n’entambala zabo. ¹⁸ Mbe aho kukizibwa kw’ebiheno kuli, ekitambo cho kuliha ebiheno tikikili na mulimo.

KUGUMA HALI YEZU KRISTU. — ABAZEMI.

¹⁹ Mbe hatyo, bana betu, obwo tukumanya kimo okwo tulitaha mu hatakatifu kuber’ensagama ya Kristu, ²⁰ mu muhanda muhya nigulora, ogwo yatwolekize mw’ikingirizo, nizo engingo ze, ²¹ n’okwo tuli n’omusaserdoti mukuru, akugerera enzu ya Mungu, ²² twirire hehi, tuli n’omutima ogutakuziga no kwikiriza kwingi, omutima guyezire mu biheno, n’engingo zinabire mu menzi gayezire; ²³ tugume, tusimbagirire mu butegeza bwetu, kuba ayatulaganisize ali mwesigwa; ²⁴ kandi tulorane, niho tugumyanye mu bwenzi na mu bikorwa bizima; ²⁵ tutaleka kusumba hamo, nk’okwo abandi bamanyire kukola, nawe tuhanane, munomuno obwo mwabona olunaku nilwirira hehi. ²⁶ Nawe tukekiriza kuhena, twamazire tuhabwa obumanyi bw’obukomereza, tihakiliho ekitambo cho kuliha ebiheno, ²⁷ nawe hasaga kulindirira kutamize kw’obulamuzi n’obutagate bw’omuliro ogulyocha abahate.

²⁸ Ayatambukire ekilagiro cha Musa, akufwa atabwen’ ekisa na kanoro, embona ibili hamo isatu ziliho: ²⁹ kai mukuchwa muti: alilamurwa ebinaranazo bihango bita, alalibatire Omwana wa Mungu, alagayire ensagama y’omulago eyamutakatifwize, n’alazumire Omwoyo gw’enema? ³⁰ Kuba tukumanya ayagambire ati: Hal’ine enzigu, hal’ine obulihi. Kandi ati: Omukama alilamula ihanga lye. ³¹ Kitamize kugwa mu ngaro za Mungu akulora.

³² Mbe mwizuke enaku zo kutandika ezo, mwamazire kumulikirwa, aho mwayemere obulemo n’obusasi buhango: ³³ ha lubazu nimubonesibwa mu buzumwa na mu bunale, ha lubazu nimuba bezabo abayemeraga ebyo. ³⁴ Kuba mwasasinyire okwo muli n’obutunga buzima muno kukiraho n’obutasuka. ³⁵ Mbe mutanaga obwesige bwanu, kuba bulihabwa omuhero muhango. ³⁶ Kuba obweguminsiriza bubalagirwe, mubone ebyo mwalaganisibwe, mukaba nimukola ebyo Mungu akwenda. ³⁷ Hasagaho mwanya muke, kai ali no kwiza akwiza, takwirirwa. ³⁸ Mbe omuzima wange akutungwa kwikiriza; nawe akarugaho, talisemerera omwoyo gwange. ³⁹ Itwe tituli nk’abakurugaho babule, nawe tuli nk’abakugumya kwikiriza, bachungule omwoyo gwabo.

ENDOLERO ZO KWIKIRIZA.

¹ Mbe kwikiriza ni nsimbagiriro y’ebyo tuli no kutegeza n’obumanyisya bw’ebyo tutakubona. ² Ab’era bakasimwa kubera kwonene. ³ Kubera kwikiriza tukumanya okw’ensi yakozirwe ekigambo cha Mungu, niho ebyaliga bitakubonwa bibonwe. ⁴ Kubera kwikiriza Abeli nahereza Mungu omuherezo ogukizile ogwa Kaini, nayetwa muzima, obwo Mungu nayanankula emiherezo ze; kai kubera kwonene achatenga, naho afwire. ⁵ Kubera kwikiriza Henoki nasagarwa, atafwa; kai yaliga atakibonwa, obwo Mungu yaliga amusagere; kuba atakasagerwe, yaliga amanyisibwe okwo yasemerezaga Mungu.

⁶ Mbe kwikiriza kutaliho, titukuhicha kusemereza Mungu; kuba akwirira hehi na Mungu alagirwe kwikiriza okw’ aliho n’okw’akuhera abakumuhiga. ⁷ Kubera kwikiriza Noe, ka yamanyisibwe ebyo yaliga atakabwene, nakanguka nakola obwato, achungule ababo; hatyo nasinga ensi naba muhunguzi w’obuhikire, obukuruga mu kwikiriza. ⁸ Kubera kwikiriza Ibrahimu, ka yayesirwe, nahulira nagenda mu nsi eyo yaliga ali no kuhungula, nagenda atakumanya aho yazaga. ⁹ Kubera kwikiriza natura mu nsi y’endagano, nka mu buyezi, ali mu mahema, nka Izaki na Yakobo, abakobere nage endagano ezo. ¹⁰ Kuba yalindiriraga ekikale ch’oluhazu lusimbagirire, echo Mungu ali mukozi n’omwombeki wacho.

¹¹ Kubera kwikiriza Sara wena, naho yaliga ali mugumba, nahabwa obuhicha bwo kutwal’enda, yabere mukokoro, kuba yesigiriraga ayaliga amulaganisize. ¹² Hatyo ha muntu omo wenka (ayaliga akokwere) nibarugaho abezukuru bengi, nk’enenezi zo mu lutumba n’omuseni gwa ha chambu ogutabarwa. ¹³ Bakafwa bona mu kwikiriza, bataherwe eby’endagano; nawe bakabibona nibabitigisya kuruga hara, bamanyire okwo baliga bali bageni na balibasi mu nsi. ¹⁴ Kuba abakufumora batyo bakwolecha okwo bakuhiga obusi. ¹⁵ Kai bakiba nibatekateka obwo barugiremo, bakubwene omwanya gwo kubusubamo; ¹⁶ nawe bayegongaga obundi buzima muno kukiraho, nibw’obwo mw’igulu. Nicho Mungu takorw’ensoni kweyeta Mungu wabo, kuba yabachumire ekikale.

¹⁷ Kubera kwikiriza Ibrahimu nahereza Izaki, ka yarozibwe; kai yaherezaga omwana we nagumo, ayaliga aherwe endagano, ¹⁸ naho yaliga agambirwe kinu kiti: Mul’Izaki olibona obuzare bw’izina lyawe. ¹⁹ Yachwaga ati: Mungu akuhicha no kuzor’abafu; hatyo nasuba kumubona kuti mu kisusano. ²⁰ Kubera kwikiriza Izaki naha Yakobo na Ezahu omugisa gw’eby’obusyo. ²¹ Kubera kwikiriza Yakobo, mu gafwa, naha buli mwana wa Yozefu omugisa, nainamira muno enkoni ye. ²² Kubera kwikiriza Yozefu, mu gafwa, nagamba eby’ abana ba Israeli kurugamo, nalagira eby’amagufwa ge.

²³ Kubera kwikiriza Musa, ka yazerwe, naserekwa abazere be mezi asatu, obwo babonaga okw’omwana ogwo yaliga asemere, nibabura kutina omuku gw’omukama. ²⁴ Kubera kwikiriza Musa, ka yakuzire, nayanga izina ly’omwana w’omuhara wa Faraoni, ²⁵ nasora kunazibwa hamo n’ihanga lya Mungu, echo kwihamo mu biheno amasemererwa g’enaku noro, ²⁶ nabara obugaywa bwa Kristu nk’obutunga buhango kukira ensabo za Misri: kuba yaloraga omuhero. ²⁷ Kubera kwikiriza naruga mu Misri, atakutina obuzaza bw’omukama; kuba akekara agumire, kuti henda yabonaga atakubonwa. ²⁸ Kubera kwikiriza nagira Paska n’obusamuzi bw’echamba, omusingaricha w’abana b’obuzigezo atakwataho Abanaisraeli. ²⁹ Kubera kwikiriza nibayambuka enanza Mutuku maguru gomire; kai Abanamisri ka balolize kukola batyo, nibatubizibwa. ³⁰ Kubera kwikiriza endugu za Yeriko nizigwa, ka bazizongwere enaku musanzu. ³¹ Kubera kwikiriza Rahabi, omukazi w’obuyaga, nabula kufwa n’abatekiriza, kuba yaliga yayanankwile kifura abakengezi.

³² Kai ngambe ki kandi? Omwanya gukumbula gwo kutenga ebya Gedeoni, na Baraki, na Samsoni, na Yefeti, na Daudi, na Samueli, n’abalagi; ³³ bonene kubera kwikiriza bakasinga amakama, nibagira oburonge, nibahabwa emirago, nibakinga omunwa gw’entale, ³⁴ nibalazya omuliro gw’amani, nibakira mu bwogi bw’embanda, nibakizibwa endwara zabo, nibahigahara mu bulemo, niberucha embaga z’abahate; ³⁵ abakazi nibasubibwa abana babo bazokire. Abandi bakanazibwa mani, bayangire kukira, babone obuzoki buzima muno kukiraho. ³⁶ Abandi nibasekererwa nibasanzulwa, nibabohwa, nibakingirwa; ³⁷ nibalasibw’amabale, nibakekwa, nibarozibwa, nibesibw’embanda; nibayengera, bazwere amahu g’enabalega n’ag’embuzi, nibaburwa byona, nibanazibwa, nibazubibwa, ³⁸ bonene aho ensi yaliga etabahikire, nibayengera mu marungu na mu mabanga na mu nanga na mu makorongo g’ensi.

³⁹ Kai abo bona abasimirwe kubera kwikiriza kwabo tibabwene omurago niguhikirizibwa, ⁴⁰ obwo Mungu atayenzire, mu kisa che hal’itwe, bahabwe obusemererwa, itwe tutaliho.

OBWEGUMINSIRIZA. — MUNGU AKUNARANAZA ABO AKWENDA.

¹ Mbe itwe, obwo tuzingirwe elire lingi liti ly’embona, tunage omugugu gwona n’ebiheno ebituzingire, nitweguminsirize kwiruka mu muhanda oguli obusyo yetu, ² ameso getu gahangire hali Yezu, kana kwikiriza n’omuhabuzi wakwo, ayayemere omusalaba ha mwanya gw’obusemererwa obwaliga bumutegere, ka yagayire ensoni; mbe naikara ha bulyo bw’ekitega cha Mungu. ³ Mwetegereze ayayemere kuhakanwa abaheni ata si, muleke kulemwa no kufw’omutima. ⁴ Kuba timukarwene kuhika ha nsagama mu bulemo bw’ebiheno. ⁵ Kandi mwayebirwe ihane elyo mwahanirwe, nk’ese nahana omwana we, ati: Mwana wange, otagayaga ekinaranazo ch’Omukama, kai otafwaga omutima, yakuhanaga, ⁶ kuba Omukama akunaranaza owe akwenda, kai akusanzula buli mwana wena owe akwanankula nk’owe. ⁷ Mutafw’omutima mu kinaranazo. Mungu akubakolera nk’abana be; kuba ni mwana ki atanaranazibwa ise? ⁸ Mukabura kunaranazibwa nk’abandi bona, muli bizarwa, abana ba kimo pai. ⁹ Kandi, raba batata b’engingo nibatunaranazaga, nitubatinaga, kubaki si tutalagirwe kukiraho kuhulira Is’emyoyo, niho tubone obulame? ¹⁰ Kuba baliya baliga nibatunaranaza mu mwanya gw’enaku nke, nk’okwo baliga nibayenda; nawe onu atunaranaliza obuzima bwetu, tukobere obutakatifu bwe. ¹¹ Ekinaranazo chona, ha katungu ko kukihabwa, tikikuleta omuzaho, nawe kikuzubya; nawe kumara kikuletera abakiherwe obuhikire.

¹² Mbe mweleze emikono zanu ezikusinya kulemwa, mugorore ebizwi zanu ebikwenda kukuba. ¹³ Mulibate mu mihanda zigororokire, niho omusuntizi wena mul’imwe aleke kuhaba, nawe akire. ¹⁴ Murozye kugir’omulebo n’abantu bona, mugume mu butakatifu obulagirwe ha kubona Mungu; ¹⁵ mwetegereze, hatabaho n’omo wo kwanga enema ya Mungu, omuzi gumo na gumo ogusalire gutasebuka oluguru, gukazibira embibo nzima, nigurofuhaza bengi. ¹⁶ Hatabaho omulofu hamo omuyaga nka Ezahu, ayagulize ebilyo obuzigezo bwe. ¹⁷ Kuba mumanye kinu: kumara, ka yayenzire kuhabwa omugisa, akayangwa; kuba tiyahikize kumuchora, naho yagusabire n’amaziga.

¹⁸ Mbe timwerire hehi n’ibanga elitakwatwa, nali omuliro ogukuyaka, nali obwire bwiragwire, nali omwirima, nali ekihule, ¹⁹ nali akarundumo k’ekikuli, nali ezogotano y’ilaka elyagambaga mani lita si, abalihuliraga basabaga lileke kubafumorera. ²⁰ Kuba baliga batakuhicha kwemera omuku gunu guti: Naho kili kitunganwa, kikakwata ibanga, kilaswe amabale. ²¹ Kai ebyabonwaga byaliga bili n’ikangisyo lita si! Musa nagira ati: Nakanguka ninzuguma. ²² Nawe imwe mwezire hehi n’ibanga lya Sioni, ekikale cha Mungu akulora, Yeruzalemu yo mw’igulu, n’embaga y’ebihumbi bingi by’abamalaika, ²³ n’eklezia y’abazigezo abayandikirwe mw’igulu, na Mungu omulamuzi wa bona, n’emyoyo z’abatakatifu abali mw’ikuzo, ²⁴ n’omutwerezi w’omulago muhya, Yezu, n’ensagama eyo basamula, nefumora kuzima muno kukira ey’Abeli.

MUNGU AKUNARANAZA ABAKUMWANGA.

²⁵ Mwetegereze, mutagaya omufumozi; kuba, raba abagayire omufumozi wo mu nsi nibabura kukira, kai kuta tukagaya omufumozi wo mw’igulu! ²⁶ wenene owe ilaka lyatengesyaga ensi mu naku aho, kai hati akulaga nagira ati: Ndisuba n’olundi kutengesya ensi, kai yonene yonka pai, nawe n’igulu. ²⁷ Mbe k’akutenga ati: N’olundi, akumanyisya okw’ alihaho ebikutengeta, obwo bili no kubaho mwanya muke, ebitatengeta bisageho. ²⁸ Mbe hatyo, obwo twaherwe obukama obutakuhinduka, tugumye enema, ekutuha kukolera Mungu no kumusemerera, n’obutini n’obukuza Mungu. ²⁹ Kuba Mungu wetu ali nk’omuliro ogusingaricha.

ENTUNGWA Z’OBUKRISTU.

¹ Mugume kwendana. ² Mutayebwaga obwira, kuba abandi bakumire abamalaika mu ka yabo, batakumanya. ³ Mwizukega embohe, nk’okwo mwakukozire muli nazo, n’abanale, obwo imwe mwena muli n’engingo. ⁴ Obuswezi bukuzibwe bona, kai ekitabo ch’obuswezi kitaba n’entambala; kuba Mungu alilamula abasihani n’ab’obukwate. ⁵ Mutatungwaga kinunu, muchulere n’ebyo muli nabyo; kuba Mungu wenene akatenga ati: Tindikurugaho, tindikunagirana. ⁶ Hatyo tukuhicha kugamba n’obwesige tuti: Obw’Omukama ali muhwezi wange, tinkutina eby’omuntu akuhicha kunkolera. ⁷ Mwizukega abahabuzi banu, ababolekerere ekigambo cha Mungu; mwetegereze nk’okwo barugire mu nsi, nimurubire ha kwikiriza kwabo.

⁸ Yezu Kristu sanga aliho negoro, aliho lero, kai alibaho mu myaka zona. ⁹ Mutakunda kukongibwa buli dini yona y’ekigeni. Kuba ni kuzima kugumya omutima n’enema, n’ebilyo pai, kuba tibigasire kintu ababihichaga. ¹⁰ Tuli n’ekitambo ekitali ch’abachakolera mu tabernakulo. ¹¹ Kuba ebitunganwa bikwokibwa hesazi, omusaserdoti yamazire kusagara mu hatakatifu echamba chabyo cho kuliha ebiheno. ¹² Nicho na Yezu wena, atakatifuze ihanga n’ensagama ye, yasasibwe hesazi. ¹³ Mbe tuhuruke hesazi kumuruba no kutegula ensoni ye. ¹⁴ Kuba hanu tituli na kikale cho kutulamo kimo, nawe tukuhiga ech’enaku z’obusyo. ¹⁵ Mbe tuhereze muli wenene obutalekera ekitambo cho kusima, niby’ebirabo by’omunwa ogukuza izina lye.

¹⁶ Mutayebwa obwendani n’obugabi, kuba ebitambo nk’ebyo bityo nibyo bikusemerera Mungu. ¹⁷ Muhulirega abahabuzi banu, mukolega ebyo babagambira kuba bonene bakukesy’obwire, obwo balibatonga emyoyo zanu: hakili bakole omulimo ogwo, omutima gusasire, nzira kugenera; echo tichakubagasire.

¹⁸ Mutusabire; kuba tukuchwa tuti: tuli n’omutima muzima: twetegekire kutungwa kuzima muli byona. ¹⁹ Nkusuba kubalembereza mukole mutyo, mpiche kwanguha kusubibwa hal’imwe.

OMULAGO MUHYA

²⁰ Mungu w’omulebo ayazozile mu bafu Omukama wetu Yezu Kristu, ayabere, mu nsagama y’omulago ogutahwaho, omulisya mukuru w’enabalega, ²¹ abahe obuhicha bwo kukola buli kikorwa kizima chona, niho mukole eby’akwenda, wenene nagira mul’imwe ebikumusemerera, ha bwa Yezu Kristu; hali wenene ikuzo libe mu myaka z’emyaka. Amina.

²² Bana betu, nkubasaba kwemera ekigambo echo cho kubahumuza, naho nabayandikira ebigambo bike byonka. ²³ Mumanye okw’omutabani wetu Timote yasurumwirwe; akeza bwangu, nkugenda kubasura nage. ²⁴ Mubwachega abahabuzi banu bona, n’abatakatifu bona. Abatabani betu ba Italiya bakubabwacha. ²⁵ Enema ebe n’emwe mwena. Amina.