Ha Banagalata

EKIBWACHO.

¹ Paulo, ayagizirwe entumwa, abantu pai, na ha bw’omuntu hona pai, nawe ha bwa Yezu Kristu na Mungu Tata, ayamuzozire mu bafu; ² n’abatabani betu bona abali n’ene, hali eklezia za Galatiya. ³ Enema n’omulebo zibagabirwe Mungu Tata n’Omukama wetu Yezu Kristu, ⁴ ayehereze omwene kuber’ebiheno byetu, atwihemo mu nsi enu ebihire, ha bwo kwenda kwa Mungu Tata wetu; ⁵ ikuzo libe hali wenene mu myaka z’emyaka. Amina.

ABANAGALATA BARUGIREHO MW’EVANJELI EKOMEREZE.

⁶ Nkukuma, kuba mwayangire bwangu bwangu mutyo onu ayabetere enema ya Kristu, mukaruba evanjeli endi; ⁷ t’obwo endi eliho, nawe baliha abantu abakubahahya, nibayenda kugwisya evanjeli ya Kristu. ⁸ Nawe, naho tukabolekerera itwe abene, hamo mumalaika wo mw’igulu, evanjeli endi, hatali eyo twabolekerere, azumirizibwe. ⁹ Nagamba, kai nkusuba kugamba hati nti: Naho omuntu akabolekerera evanjeli endi, hatali eyo mwaherwe, azumirizibwe. ¹⁰ Kuba si hati nkuhiga isima ly’abantu, angu lya Mungu? Si nkuhiga kusemereza abantu? Nkiba ninsemereza abantu hati, tinakubere mukozi wa Kristu.

OBURUGO BW’OBUTUMWA BWA PAULO.

¹¹ Mbe, bana betu, nkubagambira nti: evanjeli eyo nabolekerere ti y’abantu; ¹² kuba tinagiherwe omuntu, tinagiyegire ha muntu, nawe Yezu Kristu niwe yaginsurulire. ¹³ Kuba mwamanyire entungwa zange za kara mu buyahudi, n’okwo nanazyaga mani eklezia ya Mungu, no kuginyamula. ¹⁴ Mu buyahudi nakizaga bengi b’ikura n’ihanga lyange, nindwanira n’amani mengi amasigirane ga batata. ¹⁵ Nawe ayansozire kuruga mu nda ya mawe naneta n’enema ye, ka yayenzire ¹⁶ kunsurulira Omwana we, mmwolekerere mu mahanga, aho n’aho tinasubire kutegekerwa engingo n’ensagama; ¹⁷ hona tinezire Yerusalemu ha ntumwa, abebembezi bange; nawe nkagenda Arabiya, ninsuba kwiza Damasko. ¹⁸ Kumara, emyaka isatu zarabireho, ningenda Yeruzalemu kubona Petro, ninikara nage enaku ikumi n’etanu; ¹⁹ nawe tinabwene entumwa zindi, raba si Yakobo, mutabani wabo Omukama.

²⁰ Ebyo nkubayandikira, ha meso ga Mungu, ti byo kubeha. ²¹ Kumara ningenda mu nsi za Siriya na Silisiya. ²² Mbe naliga ntakabonwaga eklezia za Yudeya, ezaliga zili za Kristu; ²³ nawe baliga bahulire bati: Ayatunazyaga kara, hati akwolekerera kwikiriza, okwo yayendaga kusingaricha. ²⁴ Mbe bakuzaga Mungu kubera ine.

OBWOLEKERERI BWA PAULO BUKWINGANA N’OBW’ENTUMWA.

¹ Kumara, emyaka ikumi n’ena zarabireho, ninsuba kunegera Yeruzalemu na Barnaba, nintwara na Tito. ² Mbe ningenda kuber’ekigambo ch’obusuruzi, nimbamanyisya evanjeli eyo nkwolekerera amahanga, nimmanyisya munomuno abaliga nibabonekana nk’abakumukire, ntanaranara busa chonka, hamo ntasangwa nnaranere busa chonka. ³ Kai Tito wenene, owezasu, naho yaliga ali w’ihanga ly’abasenzi, tibamusinirize kusarwa; ⁴ nawe abatabani betu b’obuzigi, abaliga batutahiremo chenge kukengera obweyagazi bwetu muli Yezu Kristu, bahiche kutubwiruhaza, ⁵ tibahikize kutusiniriza kwikiriza katungu na kamo agabo, niho obukomereza bw’evanjeli bwikare mul’imwe.

⁶ Abaliga nibabonekana nk’abakumukire, (echo baliga bali kara, tikinsasire: Mungu tasorora muntu), nti: abaliga nibabonekana nk’abakumukire, abo tibammanyisize kintu. ⁷ Nawe ka babwene okwo naherwe obwolekerezi bw’evanjeli mu batasazirwe, nka Petro mu basazirwe, ⁸ (kuba ayagizire Petro entumwa y’obusarwa, niwe yangizire entumwa y’abanamahanga), ⁹ Yakobo na Kefa na Yohana, abaliga bali nk’enomyo z’eklezia, ka bamanyire enema eyo naherwe, nibatuha omukono ine na Barnaba, nk’embaliriro y’obukobe, itwe tugende mu mahanga, bonene bagende mu basazirwe; ¹⁰ kihango twizuke abahabi; echo kai nkachomerera.

EMITOROTONGO Z’EKIYAHUDI TIZIKILAGIRWE.

¹¹ Nawe Kefa ka yezire Antokiya, nkahakana nage ha bweru, kuba yaliga ali no kuhanwa. ¹² Kuba, abantu abo Yakobo yaliga atumire batakezire, yalyaga n’abasenzi; nawe ka bezire, nabarugamo natagana nabo, natina ab’obusarwa. ¹³ Kai Abayahudi bandi nibatebatebya batyo, na Barnaba wena nayoherezibwa obutebatebya obwo. ¹⁴ Nawe ka nabwene okwo batalibata kigororoki mu bukomereza bw’evanjeli, ningambira Kefa, ha meso g’abantu bona, nti: Raba iwe, naho oli Muyahudi, notungwa kinamahanga, nk’Abayahudi pai, kai okusiniriza ki abanamahanga kuyahudihara? ¹⁵ Itwe tuli Bayahudi b’obuzarwa, titubarwa mu basenzi baheni.

KRISTU AKULORA M BAKRISTU BAZIMA.

¹⁶ Mbe obwo tumanyire ok’omuntu tatakatifuzibwa ebikorwa by’Ekilagiro, nawe kwikiriza muli Yezu Kristu, tukekiriza muli Yezu Kristu, niho tutakatifuzibwe kwikiriza muli Yezu Kristu, ebikorwa by’Ekilagiro pai, kuba taliho n’omo alitakatifuzibwa ebikorwa by’Ekilagiro. ¹⁷ Nawe ka tuhiga kutakatifuzibwa muli Kristu, hamo tusangwe tuli baheni, hatyo si Kristu akuba mukozi w’ekiheno? Kikabule! ¹⁸ Kuba nkasuba kwombeka ebyo nkambwile, nkwegira muheni. ¹⁹ Kuba nefwerere ha Kilagiro ha bw’Ekilagiro chonene, niho ndamire Mungu; ndegirwe ha musalaba hamo na Kristu. ²⁰ Kai nkulora, nawe t’ine, niwe Kristu akulora mul’ine. Kandi raba nindora hati mu ngingo, nkulora mu kwikiriza Omwana wa Mungu, ayanenzire nayehereza kubera ine. ²¹ Tinkwanga enema ya Mungu. Kuba obuhikire bukaba niburuga mu Kilagiro, mbe Kristu afwire busa chonka.

OBUCHUNGUKI BUKURUGA MU KWIKIRIZA.

¹ Imwe Banagalata basazi! ayabaziga, mugomere obukomereza, ni ga? imwe abayolekibwe Yezu Kristu kuti nalegwa ha musalaba hagati yanu. ² Nkwenda kumanya ekigambo kinu chonka: mwaherwe Omwoyo niguruga mu bikorwa by’Ekilagiro, angu mu kwikiriza okwo mwayolekererwe? ³ Mwasara muta si, mukamaliza mu ngingo ebyo mwatandikire mu Mwoyo? ⁴ Si mwanaranara muno muti busa chonka? ⁵ Akubaha Omwoyo nakola amahano mul’imwe, akukola atyo si ha bw’ebikorwa by’Ekilagiro, angu ha bw’obwolekerezi bwo kwikiriza? ⁶ Nk’okwo chandikirwe kiti: Ibrahimu akekiriza Mungu, kai echo nikimubalirwa nk’obuhikire. ⁷ Mbe mumanye okw’abali bo kwikiriza, abo nibo abana ba Ibrahimu. ⁸ Hatyo Mungu mu Nandiko, obwo yamanyaga okw’amahanga galitakatifuzibwa kwikiriza, nalagira Ibrahimu, nagira ati: Amahanga gona galibona omugisa hal’iwe. ⁹ Mbe abali bo kwikiriza balibona omugisa hamo n’omwikiriza Ibrahimu.

¹⁰ Kuba abakwesigirira ebikorwa by’Ekilagiro bali mu muzumo. Kuba chandikirwe kiti: Buli muntu wena atakuhicha byona ebyandikirwe mu kitabo ch’Ekilagiro azumirizibwe. ¹¹ Kai echo kili ha bweru, taliho akutakatifuzibwa Ekilagiro, obwo kili kiti: Omuzima akutungwa kwikiriza. ¹² Mbe Ekilagiro tikisimbagirira mu mwikiriza, nawe bati: Alihich’ebilagiro, alilama kubera byonene. ¹³ Kristu akatuchungula mu muzumo gw’Ekilagiro, obwo yazumirizibwe kubera itwe, kuba chandikirwe kiti: Buli muntu asungire h’eti azumirizibwa; ¹⁴ niho omugisa gwa Ibrahimu gugabirwe amahanga muli Yezu Kristu, kai tuhabwe mu kwikiriza Omwoyo gw’omulago.

¹⁵ Bana betu, (nkufumora kinamuntu), omuntu k’agira emilagi zingene, tibakuhicha kuzigaya hamo kuzitamo ebindi. ¹⁶ Mbe emilago zikalagirwa Ibrahimu n’obuzare bwe. Mungu tagamba ati: N’ab’obuzare bwe, kuti bali bengi, nawe kuti aliho omo wenka, ati: N’obuzare bwawe, niwe Kristu. ¹⁷ Nti: Obwo Mungu yagizire omulago gwingene, Ekilagiro, echaterweho zarabireho emyaka magana ana na makumi asatu, tichahikize kugusingaricha no kugumaraho. ¹⁸ Kuba omuhungulo gukaruga mu Kilagiro, tigukiruga mu mulago. Nawe Mungu akaguha Ibrahimu nk’omulago.

OMUGASO GW’EKILAGIRO.

¹⁹ Mbe hatyo Ekilagiro kikugasa ki? Kikaterwaho ha kumanyisya entambala, kuhika bwize obuzare bw’omulago, kai kikaletwa bamalaika n’omutwerezi. ²⁰ Mbe omutwerezi ti mutwerezi w’omo wenka, kai Mungu n’omo wenka. ²¹ Si hatyo Ekilagiro kikurwana emirago za Mungu? Kikabule! Kuba kwenda kiliho ekilagiro cho kuloza, obuhikire bwakurugire koto mu Kilagiro. ²² Nawe Enandiko zikakingira byona mu kiheno, niho omulago guhikibwe, ha bekiriza, mu kwikiriza muli Yezu Kristu. ²³ Mbe, kwikiriza kutakezire, twaliga tukingirwe mw’ibohero ly’Ekilagiro, nitutegeza kwikiriza okwaliga kuli no kusururwa. ²⁴ Hatyo Ekilagiro kikaba muhabuzi wetu muli Kristu, tutakatifuzibwe kwikiriza. ²⁵ Nawe obwo kwikiriza kwezire, titukili mu buhicha bw’omuhabuzi: ²⁶ kuba mwena muli bana ba Mungu ha bwo kwikiriza muli Yezu Kristu. ²⁷ Mbe imwe mwena ababatizibwe muli Kristu, muzwekirwe Kristu. ²⁸ Tihakiliho mul’imwe Omuyahudi nali Omugereki, nali omwiru nali enfura, nali omuseza nali omukazi: kuba mwena muli omo muli Yezu Kristu. ²⁹ Mbe raba muli ba Kristu, hatyo muli buzare bwa Ibrahimu, bahunguzi b’omulago.

YEZU KRISTU AKATUCHUNGULA MU BWIRU BW’EKILAGIRO.

¹ Nkugamba nti: omuhunguzi akili namuto takirana n’omwiru, naho ali kana byona; ² nawe ali mu buhicha bw’abagerezi n’abasigire, kuhika ha mwanya ogwagambirwe ise. ³ Nikwo n’etwe, tukili banamuto, twaliga tuli no kuhicha ebyaliga bigambirwe ha butandikiro bw’ensi. ⁴ Nawe enaku ka zahikire, Mungu natuma Omwana we, ayakozirwe omukazi, kai ali mu buhicha bw’Ekilagiro, ⁵ achungule abaliga bali mu buhicha bw’Ekilagiro, niho tugirwe bana. ⁶ Kai obwo muli bana, Mungu yatumire mu mitima zanu Omwoyo gw’Omwana we, nahama ati: Abba, Tata! ⁷ Hatyo takiliho mwiru, nawe mwana. Raba ali mwana, hona ali muhunguzi ha bwa Mungu.

⁸ Nawe aho, obwo mwaliga mutakumanya Mungu, mwakoleraga ebirugire hansi bitali Mungu. ⁹ Mbe kai hati, mumanyire Mungu, hona mumanyirwe Mungu, mulisuba muta ha mitorotongo zinogire ezo, ezikwenda kusuba kubabwiruhaza? ¹⁰ Mukuhicha enaku, n’amezi, n’emyanya, n’emyaka. ¹¹ Nkutina nti: hamo nkakola busa chonka mul’imwe.

PAULO NAIZUKIZA ABANAGALATA OKW’ABAYENDA MUNO.

¹² Nkubalembereza, mube nk’ene, kuba ine nena ndi nk’emwe; bana betu, timwampenere n’akati. ¹³ Mukumanya okwo kara nkabolekerera evanjeli mu bunoge bw’engingo, ¹⁴ n’okwo kurozibwa mu ngingo zange tikwabahere kugaya nali kusesemukwa; nawe mukananankula nk’omumalaika wa Mungu, nka Yezu Kristu. ¹⁵ Mbe obusemererwa bwanu bw’enaku ezo buli hai? Kuba nkuhicha kuba mbona nk’okwo mwakunnonkolere ameso ganu, bikiba nibihikibwa, mugampe. ¹⁶ Si nabere muhate wanu, ka nabagambire ebikomereze? ¹⁷ Tibabayenzya obwenzi buzima; nawe bakwenda kubataganisya n’ene, mubarube. ¹⁸ Hakili mukole kuzima bucha bucha, kai ndi hagati yanu chonka pai. ¹⁹ Banamuto bange, abakusuba kundumya obusungu, kuhika Kristu abumbirwe mul’imwe! ²⁰ Nakwenzire kuba n’emwe hati no kutenga agandi, kuba nkubahahira.

IZAKI NA ISMAELI: EMILAGO IBILI.

²¹ Mungambire, imwe abakwenda kuba mu buhicha bw’Ekilagiro, si timukasomaga Ekilagiro? ²² Kuba chandikirwe kiti: Ibrahimu akaba n’abatabani babili, omo w’omuzana, ondi w’enfura. ²³ Nawe omwana w’omuzana nazarwa ha bw’engingo, kai ow’enfura ha bw’omulago. ²⁴ Ebyo bikagambwa mu lugani, kuba abakazi abo nizo emilago ibili: gumo h’ebanga lya Sina, akuzalira obwiru, niwe Agari; ²⁵ kuba Sina n’ibanga ly’Arabiya, elisusana na Yeruzalemu ya hati, eli mu bwiru n’abana bayo. ²⁶ Nawe Yeruzalemu y’oluguru teli mu bwiru, kai niwe mawe. ²⁷ Kuba chandikirwe kiti: Nosemererwe, iwe mugumba, atakuzara; nohyagane, nohirahirwe, iwe atali muzere, kuba omwangwa ali n’abana kukira ali n’omuseza. ²⁸ Mbe itwe, bana betu, tuli bana b’omulago, nka Izaki. ²⁹ Kai nk’okwo aho ayaliga azerwe ha bw’engingo yanazyaga ayaliga azerwe ha bw’omwoyo, nikwo bili na hati. ³⁰ Nawe Enandiko zikugamba ki? Ziti: Irucha omuzana n’omwana we, kuba omwana w’omuzana taliba muhunguzi n’omwana w’enfura. ³¹ Mbe, bana betu, tituli bana b’omuzana, nawe b’enfura, kai Kristu yatuchungwize obweyagazi obwo.

KUSARWA TIKUGASA, KWIKIRIZA NIKWO KUKUGASA.

¹ Mugume, mutasuba kwikiriza enkomyo y’obwiru. ² Lora, ine Paulo nkubagambira nti: Mukasarwa, Kristu talibagasira kintu. ³ Kai nkumanyisya buli muntu wena akusarwa ningira nti: Alagirwe kuhich’Ekilagiro chona. ⁴ Mukutagana kimo na Kristu, imwe abahiga obuhikire mu Kilagiro; mukuruga mu nema. ⁵ Itwe tukutegeza obuhikire mu kwikiriza, ha bw’Omwoyo. ⁶ Kuba muli Kristu kusarwa no kutasarwa tikugasa kintu, nawe kwikiriza okukola n’obwenzi nikwo kukugasa.

⁷ Sanga nimwiruka kuzima; ayabazibire muleke kuhulira obukomereza, ni ga? ⁸ Ebitekateko ebyo tibiruga hali onu ayabesire. ⁹ Itumbyo linoro ligagya ensyano yona. ¹⁰ Ine nkutegeza mu Mukama okwo mutalisuba kutekateka ebindi; nawe omuhahya wanu aligabona, abe owe akwenda. ¹¹ Ine, bana betu, obwo nchayolekerera kusarwa, kubaki si nchanazibwa? Hatyo si obusitaza bw’omusalaba tibukiliho. ¹² Hakili ababahahya abo babarugemo!

ENGINGO ZIKUSINGASINGANA N’OMWOYO.

¹³ Imwe, bana betu, mwayeterwe obweyagazi; nawe obweyagazi obwo butabasindika kutungwa kinangingo; mukolerane n’obwenzi bw’ekinamwoyo. ¹⁴ Kuba ekilagiro chona kikuhikibwa mu kigambo kimo, ni kinu: Oyendega owezanu nk’ewe omwene. ¹⁵ Nawe raba nimurumana nimulyana, mukutamwa mumaraneho. ¹⁶ Mbe nkugamba nti: Nimulibatire emihanda z’omwoyo, kai hatyo timulihicha obwegongi bw’engingo. ¹⁷ Kuba engingo zikwenda eby’omwoyo gutakwenda, kai omwoyo gukwegonga eby’engingo zitakwenda, obwo bikuzongorana, niho mutakora byona ebyo mukwenda. ¹⁸ Raba nimuhaburwa omwoyo, timukisumikwa Ekilagiro.

¹⁹ Nawe ebikorwa by’engingo bili ha bweru, ni binu: obusihani, n’obulofu, n’obululuhe, n’olukuto, ²⁰ n’ihabudu ly’ebimungu, n’obulogo, n’olwango, n’enkungana, n’ichubi, n’obuhate, n’enombo, n’obutahulirana, n’obuzemi, ²¹ n’olwiso, n’obwisi, n’obutamizi, n’obuyaga, n’ebindi bityo, ebyo nagambire olundi, ningira nti: Abakutungwa batyo tibalihungula obukama bwa Mungu. ²² Nawe ebirabo by’omwoyo ni binu: obwenzi, n’obusemererwa, n’omulebo, n’obweguminsiriza, n’obufura, n’obuzima, n’obwesagazi, ²³ n’obusase, n’obwikiriza, n’obwekehya, n’obwezibizi, n’obuyezi. Ekilagiro tikiliho cho kusinga ebyo. ²⁴ Nawe abali ba Kristu balegire ha musalaba engingo zabo n’entungwa n’obwoyi bwazo. ²⁵ Raba nitulora kinamwoyo, hona tutungwe kinamwoyo. ²⁶ Tutayegongaga ikuzo lya busa, tukarwanana nituchubirana.

PAULO NAHANIRA ABAKRISTU OBWENDANI N’OBWEKEHYA N’OBWELINZI.

¹ Bana betu, omuntu akechura yagwire mu kiheno, imwe abakuhaburwa omwoyo, mumwimuche n’obufura, noyetegereza iwe wena otarozibwa. ² Mutegulirane emigugu, niho muhich’ekilagiro cha Kristu. ³ Kuba omuntu k’akwesima, kunu atali kintu, akweziga. ⁴ Nawe buli muntu wena alore entungwa ze, aho alyesima ha bwe, ha bw’abandi pai. ⁵ Kuba buli muntu wena alitegura omugugu gwe.

⁶ Omwolekererwa w’ekigambo cha Mungu ahwere omwolekerezi we n’ebintu bye byona. ⁷ Mutezigazigaga: Mungu tasekererwa. ⁸ Kuba omuntu agesa ebyo yabibire. Abibira engingo, agesa obuzunde bw’engingo; nawe abibira omwoyo, agesa obulame obutahwaho bw’omwoyo. ⁹ Mugume kukola kuzima; kuba ha katungu kahikire tuligesa, tukaba tutafwire omutima. ¹⁰ Mbe obwo tukili n’omwanya, tukolere kuzima bona, nawe munomuno abali mu luganda lwo kwikiriza.

¹¹ Mulore enuguta mpango ezo nabayandikira n’omukono gwange. ¹² Bona abakwenda kusemereza ha bw’engingo babasiniriza kusarwa, kihango batanazibwa kuber’omusalaba gwa Kristu. ¹³ Kuba bonene abasazirwe tibahicha Ekilagiro; nawe bakwenda musarwe, niho bahiche kwekuliza engingo zanu. ¹⁴ Nawe ine hakili mbure kwekuliza, raba si omusalaba gw’Omukama wetu Yezu Kristu, ayahere ensi kulegirwa ine ha musalaba, kai ine kulegirwa ensi ha musalaba. ¹⁵ Kuba muli Yezu Kristu ekikugasa ti kusarwa hamo kutasarwa, nawe ekihangwa kihya.

¹⁶ Bona abalitungwa batyo, babe n’omulebo n’ekisa, hamo na Israeli wa Mungu. ¹⁷ Mbe nawe hatabaho n’omo wo kusuba kumbihiriza; kuba nkutegula mu ngingo zange enyamo z’Omukama Yezu. ¹⁸ Enema y’Omukama wetu Yezu Kristu ebe n’omwoyo gwanu, bana betu. Amina.