2 Hali Timote

TIMOTE AKANE KUKOLERA MUNGU KUZIMA.

¹ Paulo, entumwa ya Yezu Kristu kubera kwenda kwa Mungu, ha bw’omulago gw’obulame obuli muli Yezu Kristu, ² hali Timote, omwana wange mwendwa. Mungu Tata na Kristu Yezu Omukama wetu bakuhe enema n’ekisa n’omulebo. ³ Nkusima Mungu, owe nkukolera nka batatenkuru n’omutima guyezire, ka nkukwizuka bucha bucha mu sala zange, musana na mu kiro; ⁴ ka nkwizuka amaziga gawe, nkwegonga kukubona, nizule obusemererwa, ⁵ nkizuka kwikiriza kwa kimo okuli mul’iwe, n’okwo nokwenkuru Loisi na noko Eunise baliga bali nakwo, okutula mul’iwe, nkumanya koto.

⁶ Nicho nkukugambirira kusuba kwacha enema ya Mungu, eyo waherwe ka nakutereho emikono. ⁷ Kuba Mungu tiyatuhere omwoyo gw’obutini, nawe omwoyo gw’amani n’ogw’obwenzi n’ogw’obwetegereza. ⁸ Mbe otakorw’ensoni obwemerezi bw’Omukama wetu, hamo ine, embohe ye; nawe nonaranalire evanjeli hamo n’ene, mu lulengo lw’amani ga Mungu, ⁹ ayatuchungwile natweta n’obwesi bwe butakatifu, kuber’ebikorwa byetu pai, nawe kuber’obwetegeki bwe n’enema eyo twaherwe muli Yezu Kristu kuruga ira lyona. ¹⁰ Kai hati yamanyisibwe obuboneki bw’Omuchunguzi wetu Yezu Kristu, ayasingarikize olufu, nabonesya obulame n’obutafwa mw’evanjeli: ¹¹ nicho naterweho mwolekerezi, entumwa, musomesya w’amahanga. ¹² Nich’echo nkunaranara ntyo, nawe tinkugoka; kuba nkumanya owe nekirize, kai nkumanya koto okw’ali n’obuhicha bwo kungumya mu mulimo gwange kuhika ha lunaku olwo.

¹³ Orubirire ebigambo bitakatifu ebyo wayolekererwe ine, mu kwikiriza no kwenda okuli muli Yezu Kristu. ¹⁴ Ogumye ha bw’Omwoyo Mutakatifu akutura mul’iwe, omulimo ogwo waherwe.

¹⁵ Wamanyire okw’abali mw’Aziya bona bandugireyo: Figeli na Hermogeni bali muli bonene. ¹⁶ Omukama asasire ab’owa Onesifori, kuba yampumwize kengi, kai tiyakozibw’ensoni emiguha zange; ¹⁷ nawe, ka yahikire Roma, akampiga muno, nansanga. ¹⁸ Omukama amuhe kusasirwa ha meso g’Omukama ha lunaku olwo; yampwezire ata si Efwezi okwo, iwe okumanya kukiraho.

OMURWANI MUZIMA WA KRISTU.

¹ Mbe iwe, mwana wange, noyeguminsirize mu nema eli muli Yezu Kristu, ² kai ebyo wayolekererwe ine obusyo y’embona ningi, obisigire abantu besigwa, abakuhicha kubyolekerera n’abandi. ³ Nokol’emilimo nk’omurwani muzima wa Kristu Yezu. ⁴ Buli muntu wena akurwanira Mungu tanaranalira amagambo go mu nsi, raba nayenda kusemereza owe akolera. ⁵ Nikwo n’akusingasingana mw’isingasinganiro tahabwa omuhero gw’obusingi, atasinganire nk’okwo kilagirwe. ⁶ Omulimi ayeyomereze emilimo ahikire kutandika kuganura mu byo yalimire.

⁷ Osombokerwe echo nkugamba; kuba Omukama alikuha obwenge muli byona. ⁸ Noizuke okw’Omukama Yezu Kristu, w’oluganda lwa Daudi, yazokire mu bafu, ha bw’evanjeli yange, ⁹ eyo nkunaranalira kuhika kubohwa nk’omuntu mubi; nawe ekigambo cha Mungu tikisumikire. ¹⁰ Nicho nkwemerera byona kuber’abasozirwe, babone abene obuchunguki, obuli muli Yezu Kristu hamo n’ikuzo ly’igulu. ¹¹ Ekigambo echo ni cha kimo; kuba, raba twafwire nage, hona tulilora nage; ¹² raba nitusaswa nage, tulitwal’engoma nage hona; raba nitumweyoga, wenene wena alitweyoga; ¹³ raba nituziga, wenene taziga; takuhicha kweyeyoga omwene.

KWIRUK’EMPAKA. — KURWANA AMAGAMBO G’OBUBEHI.

¹⁴ Mbe ohane ebyo, Omukama ali embona yawe. Noiruke obuhakani bw’ebigambo; kuba tibugasa kintu, raba si kusingaricha abakuhulira. ¹⁵ Noyetegeke kubonekera Omukama nk’entumwa ehikire kusimwa, nk’omukozi atali no kugoka, nawe namanya kugabira ebigambo bikomereze. ¹⁶ Noiruke ebigambo bya busa n’eby’obuyaga; kuba bakwohereza muno kuleka kusoma, ¹⁷ kai ebigambo byabo bikusugana nk’obukumpuki. Muli bonene haliho Hymene na Fileti, ¹⁸ abarugireyo mu bukomereza, ka bagambire bati: Kuzoka kwabereho na hati, nibagwisya kwikiriza kw’abanamwingi.

¹⁹ Nawe oluhazu lwa Mungu lusimbagirire koto mu kigambo kinu kiti: Omukama akumanya abe; na kinu kiti: Buli muntu wena natenga izina ly’Omukama akwirira hara n’obubi. ²⁰ Mu nzu mpango tihaliho ebitwaro by’ezahabu n’eby’ efweza byonka, nawe halimo n’eby’amati n’eby’ibumba; ebindi bigasira emilimo mizima, kai ebindi emilimo z’obuyaga. ²¹ Mbe omuntu akaba naikara ayezire nayekenga ha bantu abo, aliba kitwaro ch’ikuzo, kitakatifuzibwe, nikigasira Omukama, kai chetegekire buli mulimo muzima gwona.

²² Noiruke entungwa z’ekisigazi; nawe nohige obuhikire, no kwikiriza, no kutegeza, no kwenda, n’omulebo, hamo n’abakulembereza Omukama n’omutima guyezire. ²³ Noyange amagambo g’olusaro n’agatali n’ensonga, omanyire okwo gakuzara enkungana. ²⁴ Omuhereza w’Omukama taingene kukungana; nawe ali no kufurahalira bona no kuhicha kwolekerera no kweguminsiriza, ²⁵ nahana n’obutekani abakurwana obukomereza, nategeza Mungu abahe kutamwa, niho bamanye obukomereza, ²⁶ kai, basubire kugir’obwenge, baruge mu mitego za Sitani, elikubaboha lihiche kukora ebyo likwenda nabo.

OBUBI OBULAIZA.

¹ Mbe omanye kinu: mu naku zo kuhereruka omwanya gutamize gulibaho. ² Abantu baliba beyenzi, banunu, b’echemo, bekuza, bageyi, bagome b’abazere, banantasima, nzira dini, ³ nzira bwenzi, bahate b’omulebo, babehereza, basagiriza, bagume, nzira bufura, ⁴ b’engobya, b’olubwa, bazimbire obwekuza, bayenzire amasemererwa kukira Mungu, ⁵ nibesusanisya nk’abali n’edini, kunu bagyangire. Noiruke abantu abo: ⁶ kuba muli bonene balimo abakuchweremuka mu mazu, nibasagara nk’embohe abakazi bezwire ebiheno, abakusihwa obwoyi bubi bwingi, ⁷ nibayega bucha bucha, nawe kuhika ha bukomereza nangu.

⁸ Nk’okwo Yanesi na Mambre bagomere Musa, nikwo na bonene bagomera obukomereza: ni bantu bazunzire mu mwoyo, abayangire kwikiriza. ⁹ Nawe tibaligenda obusyo, kuba olusaro lwabo lulibonekana ha meso g’abantu bona, nk’olw’ abantu baliya.

ENANDIKO NTAKATIFU.

¹⁰ Nawe iwe okumanya obwolekerezi bwange, n’entungwa zange, n’obwetegeki bwange, no kwikiriza kwange, n’obufura bwange, n’obwenzi bwange, n’obweguminsiriza bwange, ¹¹ no kunaranazibwa kwange n’obunale bwange, obwangwerere Antyokiya na Ikoni na Lystri, n’okwo nanaranere muno, kai Omukama nankiza muli byona. ¹² Kuba bona abakwenda kutura kuzima na Yezu Kristu balinaranazibwa. ¹³ Nawe abantu babi n’abazigi balikana kubiha, bahabire nibahabisya abandi.

¹⁴ Nawe iwe ogume mu magambo ago wayegire n’ago bakusigire, omanyire ayagakuyegesize, ¹⁵ n’okwo kuruga obuto bwawe okumanya Enandiko Ntakatifu, ezikuhicha kukwolekerera kuchunguka, kubera kwikiriza okuli muli Yezu Kristu. ¹⁶ Enandiko zona ezisoherezibwe Mungu zikugasa kwolekerera no kuhabula no kuhana no kuyegesya, mu buhikire; ¹⁷ niho omuntu wa Mungu abe ahikire, ayetegekire kukola buli mulimo muzima gwona.

KURWANA ABOLEKEREZI B’OBUBEHI.

¹ Nkukulembereza obusyo ya Mungu n’eya Yezu Kristu, alilamula abazima n’abalafwire mu kwiza kwe na mu bukama bwe, ² noyolekerere ekigambo; nosinirize mu mwanya gwingene n’ogutaingene; nohane, nolembereze, notinisye, mu bweguminsiriza na mu bwolekerezi bwona. ³ Kuba enaku zilaiza aho abantu batalisuba kwemera obwolekerezi buzima; nawe, amatwi gabo ganulirire, baliruba abolekerezi bengi nk’abo bakwenda, ⁴ bamazire kuziby’amatwi gabo ha bukomereza, bagazibule ha magambo g’engani. ⁵ Nawe iwe, oyekenge, oyemere byona, okolega emilimo z’omwevanjelista, omare kimo omulimo gwawe; oleke kusagiriza.

AMAKURU GA PAULO.

⁶ Kai ine ndi hehi no kutambwa, omwanya gwo bunyarambuki bwangeguli hehi. ⁷ Nkarwana oburwani buzima, nahikize olwiruko lwange, nkagumya kwikiriza. ⁸ Hasaga omuhero gw’obuhikire ogwabikirwe ine, ogw’Omukama, omulamuzi muronge, alimpa ha lunaku olwo; kai ine nenka pai, nawe n’abakwenda kwiza kwe. Iza bwangu hal’ine. ⁹ Kuba Demasi akaniruka kuber’obwenzi bw’ensi enu, nagenda Tesalonika; ¹⁰ Kresenti mu Galasya; Tito mu Dalmasya. ¹¹ Luka ali wenka n’ene. Twala Marko, oize nage, kuba akungasira emilimo. ¹² Ntumire Tikiko Efwezi. ¹³ K’olaiza, olete omugutu gwange, ogwo nasigire Troadi owa Karpo, n’ebitabo byange, na munomuno amapapula gange.

¹⁴ Alekisandri, omubuya w’olulinga, akannazya muno; Omukama alimurongora ha bw’ebikorwa bye. ¹⁵ Omwekenge n’ewe, kuba akwanga mani ebigambo byetu. ¹⁶ Ka nekingirize lwo kutandika, tinazunirwe muntu n’omo, nawe bona nibaniruka. Batabalirwa echo nk’entambala. ¹⁷ Nawe Omukama yanzunire nangumya, mpiche kumaliza obwolekerezi, abasenzi bona babuhulire; kai nachungwirwe mu kanwa k’entale. ¹⁸ Omukama yanchungwile mu kikorwa kibi chona, kai alinanankura, nchulere mu bukama bwe bwo mw’igulu: ikuzo libe hali wenene mu myaka z’emyaka. Amina.

¹⁹ Obwache Priska n’Akwila n’abo mu ka ya Onesifori. ²⁰ Erasto akasigara Korinti. Nkasiga Trofimi arwere Mileto. ²¹ Yanguha kwiza, ekitiko kitakezire. Eubuli na Pudensi na Lini na Klodia n’abatabani betu bona bakukubwacha. ²² Omukama Yezu Kristu abe n’omwoyo gwawe. Enema ebe n’emwe. Amina.