KUSIMA. — MUNGU AKUHERA ABAZIMA NANARANAZA ABABI.
1 Paulo, na Silvani, na Timote, hali eklezia ya Tesalonika, eli muli Mungu Tata wetu, n’Omukama Yezu Kristu. 2 Mungu Tata wetu n’Omukama Yezu Kristu babahe enema n’omulebo. 3 Bana betu, hakili tusime Mungu bucha bucha kubera imwe, nk’okwo kihikire, obwo kwikiriza kwanu kukugenda nikukana, kimo n’obwendani bwanu. 4 Hatyo itwe abene tukwesimira imwe mw’eklezia za Mungu, kuber’obweguminsiriza bwanu no kwikiriza kwanu mu bunaranazibwa bwona n’amazongoko gona, ago mukwemera. 5 Ebyo bikumanyisya elamu erongire ya Mungu, kai bikubagira bahikire obukama bwa Mungu, obwo mukunaranalira.
6 Kuba kihikire Mungu kunaranaza abakubanaranaza, 7 no kubaha, imwe abanaranazibwaga, obuhoro hamo n’etwe ha lunaku lwo kuboneka kw’Omukama Yezu, k’aliruga mw’igulu n’abamalaika b’obuhicha bwe, 8 hagati y’olubezi lw’omuliro, naiza kwehora abatakumanya Mungu n’abatakuhulira Evanjeli y’Omukama wetu Yezu Kristu. 9 Balinaranazibwa mw’isingarika elitahwaho, hara n’obusyo y’Omukama n’ikuzo ly’obuhicha bwe, 10 k’aliza ha lunaku lwo kukuzibwa mu batakatifu be n’olwo kukumisya abalamwikirize bona, obwo mwekirize ebyo twabagambire.
11 Nicho tukubasabira bucha bucha, Mungu wetu abagire bahikire obwesi bwe, kai ahiche mu mani ge obwetegeki bw’obufura bwe, n’omulimo gwo kwikiriza; 12 niho izina ly’Omukama wetu Yezu Kristu likuzibwe mul’imwe, kai imwe muli wenene, ha bw’enema ya Mungu wetu n’Omukama Yezu Kristu.
2OLUNAKU OLULIHERERUKA. — KIRWANAKRISTU. — AMASIGIRANE.
1 Mbe, bana betu, tukubasaba ha bwo kwiza kw’Omukama wetu Yezu Kristu n’obukobe bwetu nage, 2 mutakukwa bwangubwangu no kutinisibwa obulagi bumo na bumo, hamo ekigambo hamo ebaruwa, ebyo bakugamba bati: yarugire hal’itwe, kuti henda olunaku lw’Omukama luli hehi. 3 Mutazigwaga na kanoro omuntu n’omo; kuba obumanga buli no kutandika kwiza, no kubonekerwa omuntu w’ekiheno, omwana w’obusingariki: 4 alirwana no kusingasingana na byona ebyetwa Mungu n’ebyo bahabudu, kuhika kwekalira mw’eklezia ya Mungu no kwegira Mungu omwene. 5 Si timukwizuka okwo nabagambire ebyo, nkili mul’imwe?
6 Mbe mukumanya hati ekimuzibira, aize mu mwanya gwingene chonka. 7 Kuba olufubo lw’obubilukukola na hati; chonka, akumuzibira hati ali no kutandika kubula. 8 Mbe aho niho aliboneka omubi ogwo, owe Omukama Yezu alisya ekihaho ch’akanwa ke, kai alimusingaricha n’amani go kwiza kwe. 9 Omubi ogwo aliza ha bw’obuhicha bwa Sitani, n’amahano g’enganda ningi, n’enyamo, n’ebikumyo by’obuzigi, 10 n’ebikongyo byona by’obubi byo kugwisya abakubula, kuba tibaherwe obwenzi bw’obukomereza, bachunguke. Nicho Mungu alibatumira obuhicha bw’obuhabi, bekirize amagambo g’endimi, 11 niho basingwe bona, abatekirize obukomereza, nawe nibekiriza obubi. 12 Nawe itwe, bana betu abakwendwa Mungu, tuli no kusima Mungu bucha bucha kubera imwe, obwo Mungu yabasozire kuruga ha butandikiro, abachungwize obutakatifuza bw’Omwoyo no kwikiriza obukomereza. 13 Nicho yabetere ha bw’evanjeli yetu, ababonere ikuzo ly’Omukama wetu Yezu Kristu.
14 Mbe hatyo, bana betu, mugume, musimbagirire mu masigirane ago mwayolekererwe hamo n’ebigambo byetu hamo n’ebaruwa yetu. 15 Omukama wetu Yezu Kristu wenene na Mungu Tata wetu, ayatwenzire, natuha n’enema ye kuhumuzibwa okutahwaho no kutegeza kuzima, 16 bahumuze emitima zanu, kandi babagumye mu bikorwa bizima byona na mu bigambo bizima.
3EKILAGIRO CHO KUKOL’EMILIMO.
1 Mbwenu, bana betu, mutusabire, ekigambo cha Mungu kisugane nikikuzibwe, nka mul’imwe, 2 kandi tukire mu bantu basazi n’ababi: kuba tibasugene kwikiriza bona. 3 Nawe Mungu ni mwesigwa, kai alibagumya nabachungula mu mabi. 4 Imwe tukubesigirira mu Mukama nitugira tuti: muliguma kukola ebyo tukubalagira. 5 Omukama ahabule emitima zanu mu bwenzi bwa Mungu na mu bweguminsiriza bwa Kristu.
6 Bana betu, tukubalagira, mw’izina ly’Omukama wetu Yezu Kristu, kwiruka buli mutabani wanu wena akutungwa buyagayaga, atakuruba amasigirane agarugire hal’itwe. 7 Kuba mukumanya imwe abene okwo tuli no kurubirirwa, obwo tutatungirwe buyagayaga mul’imwe; 8 kai titwalire busa chonka omukate gw’omuntu n’omo, nawe tukakol’emilimo musana na mu kiro nitunaranara, tutazitohera omuntu n’omo mul’imwe. 9 T’omwanyakubura, nawe tukayenda kuba endolero yanu yo kurubirira.
10 Kuba, tukili owanu, twaliga nitubagambira tuti: Atakwenda kukol’ emilimo, aleke no kulya. 11 Nawe hati tukuhulira okw’abandi mul’imwe batungwa kubi, nibabura kukol’emilimo, kandi nibemera obuyeyi chonka. 12 Mbe tukulagira abantu abo, nitubalembereza ha bw’Omukama Yezu Kristu, balyega omukate gwabo, nigurugaga mu milimo ezo balakoraga bachulere. 13 Nawe imwe, bana betu, mutalekaga kukola kuzima.
14 Mbe, raba haliho atakuhulira ebyo tukulagira mu baruwa enu, mumumanye, kai mutakoba nage, akorw’ensoni. 15 Nawe mutamulorera nk’omuhate, nawe mumuhanega nk’omutabani wanu. 16 Omukama kana mulebo abahe omwene omulebo naku zona na honahona. Omukama abe n’emwe mwena.
17 Nkubabwakiza omukono gwange, ine Paulo. Nilw’olunyamo lwange mu baruwa zange zona. Nkwandika ntyo. 18 Enema y’Omukama wetu Yezu Kristu ebe n’emwe mwena. Amina.