2 Yohana

YOHANA AKUGUMYA OMUKAZI OMO MU KWIKIRIZA.

¹ Omugurusiha mukazi ayasozirwen’abana be, abo nkwenda kimo, kai ine nenka pai, nawe bona abakumanya obukomereza, ² kuber’obukomereza obutura mul’itwe, n’obulikara mul’itwe obutalekera. ³ Mungu Tata na Yezu Kristu, Omwana wa Tata, babahe enema n’ekisa n’omulebo, mu bukomereza na mu bwenzi. ⁴ Nkasemererwa muno kusanga abana bawe bandi nibalibata mu bukomereza, ha bw’ekilagiro echo twaherwe Tata.

⁵ Mbe hati nkukusaba, mukazi we, kuti henda ninkwandikira ekilagiro kihya pai, nawe ni kilagiro echo twaherwe kuruga ha butandikiro, nti: twendane. ⁶ Obwenzi buli muli kinu: kuhich’ebilagiro. Kuba nich’echo ekilagiro, nk’okwo mwakihulire kuruga ha butandikiro; mukihiche. ⁷ Kuba ensi yona esugene abazigi, abatakwikiriza Yezu Kristu ayegizire muntu. Omuntu nk’ogwo atyo ni muzigi, niwe kirwanakristu.

⁸ Mwekenge, emilimo zanu zitabafwera busa, nawe muhabwe omuhero guhikire. ⁹ Buli muntu akaturugamo, akaleka kuruba ebigambo bya Kristu, tali na Mungu; nawe akwikaramo mu bigambo ebyo, ali na Tata na Mwana. ¹⁰ Omuntu akabezira, atalesire ebigambo ebyo, mutamwanankula, mutamubwacha. ¹¹ Kuba akumubwacha, yakobera ebikorwa bye bibi.

¹² Naho ndi n’ebigambo bindi bingi byo kukwandikira, tinkwenda kubyandika mw’ipapula n’obwino, kuba nkutegeza kubezaho no kubafumorera n’omunwa, niho musemererwe koto. ¹³ Abana b’omuhara wanu ayasozirwe bakukubwacha.