2 Ha Banakorinti

EKIBWACHO.

¹ Paulo, entumwa ya Yezu Kristu ha bwo kwenda kwa Mungu, na Timote mutabani wabo, hali Eklezia ya Mungu eli Korinti, na ha batakatifu bona abali Akaya yona. ² Enema n’omulebo za Mungu Tata wetu zibe mul’imwe ha bw’Omukama wetu Yezu Kristu. ³ Omugisa gube hali Mungu, Ise Mukama wetu Yezu Kristu, Tata w’ekisa na Mungu w’obuhumuza bwona, ⁴ akutuhumuza mu naku zetu zona, tuhiche n’etwe kuhumuza abandi abali mu buli kinaranazo, n’obugumisibwa obwo tukugumisibwa Mungu; ⁵ kuba, nk’okwo obusasi bwa Kristu bukanire mul’itwe, nikwo n’obuhumuzibwa bwetu bukanire ha bwa Kristu.

⁶ Mbe tukunazibwa kuber’obugumisibwa n’obuchunguki bwanu; tukuhumuzibwa kuber’obuhumuzibwa bwanu; tukuhigahazibwa kuber’obuhigahazibwa n’obuchunguki bwanu, obugirwa obwemezi bw’obusasi bwonene obwo tukusasibwa itwe abene; ⁷ echo nicho kituha obutegeza bwingi hal’imwe, obwo tukumanya okwo mulikobera obuhumuzibwa, ka muliba mwakobere obusasi.

EBINARANAZO BYA PAULO.

⁸ Bana betu, titukwenda mubule kumanya ekinaranazo echatugwere Aziya, kuba tukagwerwa amasika agakiraga amani getu, kihwa nitulemwa kulama mu nsi. ⁹ Nawe tukahulira mul’itwe abene elamu yo kufwa, niho tuleke kwesigirira itwe abene, nawe twesigirire Mungu, akuzora abafu. ¹⁰ Niwe wenene ayatuchungwile mu bitegezi bihango biti, kai niwe alituchungula muli byonene mu naku z’obusyo, nk’okwo tukutegeza; ¹¹ kandi esala zanu zilatuhwera, niho enema eyo twaherwe kubera bengi esimwe bengi kubera itwe.

¹² Kuba ikuzo lyetu nilyo ilaka ly’omutima gwetu, elitumanyisya okwo twatungwa mu nsi munu, kai munomuno hal’ imwe, mu butasoba bw’omutima na mu butaziga bwa Mungu, mu bwetegereza bw’ekinangingo pai, nawe mu nema ya Mungu. ¹³ Nkubayandikira ebigambo byonka ebyo mwasomire n’ebyo mwamanyire; kai nkutegeza okwo mulimanya kuhika ha muhero, ¹⁴ nk’okwo mwamanyire kake, okwo tuli ikuzo lyanu n’okwo muliba ikuzo lyetu ha lunaku lw’Omukama wetu Yezu Kristu.

OLUGENDO LWE LWAFWA. — OBWOLEKEREZI BWE TIBUHINDUKA.

¹⁵ Nkitegeza ntyo, naliga ninenda kutandika kuza owanu, mubone omugisa gwa kabili, ¹⁶ no kurabiraho kugenda Masedoniya, kandi kuruga Masedoniya kusuba owanu, no kusagarwa imwe Buyahudi.

¹⁷ Mbe hatyo obwo nayenzile ebyo, naba muhindahinduki si? Hamo si ebyo nkwetegeka nkubyetegeka ha bw’engingo, yee na pai bikaba mul’ine? ¹⁸ Nawe Mungu mwesigwa akumanya okwo mu bigambo ebyo nabolekerere hataliho yee na pai. ¹⁹ Kuba Omwana wa Mungu, Yezu Kristu, owe twabolekerere, ine na Silvani na Timote, tiyabaga yee na pai, nawe niyo yee elimo muli wenene. ²⁰ Kuba emirago zona za Mungu zikuhikibwa muli wenene; kai nich’echo akugambirira Mungu, kubera ikuzo lyetu, ati: Amina. ²¹ Mbe akutugumya muli Kristu hamo n’emwe, natugumisya, niwe Mungu, ²² ayatunyamire, natamo mu mitima zetu omukwatirizo gw’Omwoyo.

²³ Mbe ine, Mungu anake omwoyo gwange nkaba mubehi, echanzibire kuza Korinti kuhika hati nikwo kubasasira; t’obwo tutwere mani kwikiriza kwanu, nawe tukwongera obusemererwa bwanu, kuba musimbagirire mu kwikiriza.

OBWENZI BWA PAULO.

¹ Mbe nketegeka mu kalezi kange kuleka kusuba hal’imwe, ntabazubya. ² Kuba, nkabazubya, akunsemerezya ni ga, atali ayazubibwe ine omwene? ³ Niby’ ebyo naliga nabayandikire, niho, namazire kubahikaho, ntazubibwa no kuzubibwa abaliga bali no kunsemerera; kuba nkutegeza hal’imwe mwena okw’obusemererwa bwange ni bwanu mwena. ⁴ Nkabayandikira nzubire muno no kubihirirwa mu mutima gwange, nindira amaziga mengi, mbazubye pai, nawe musombokerwe obwingi bw’obwenzi bwange hal’imwe.

OBUSASIZI BW’OMUSIHANI ATAMIRWE.

⁵ Raba omo azubize, tazubize ine nenka, nawe kihwa imwe mwena, ntasagiriza. ⁶ Omuntu nk’ogwo atyo, ekinaranazo echo bengi bamuchwere kimuhikire, ⁷ mbe hakili mumukize nimumuhumuze, atazitoherwa obuzube busagirire. ⁸ Nicho nkubalemberereza mukane kumwenda. ⁹ Kai nicho nabayandikirire, mbarozye, mmanye obuhulizi bwanu muli byona. ¹⁰ Mbe hatyo ine nena nkukiza owe mwakilize; kuba ine kukiza nkakiza kubera imwe muli Kristu, ¹¹ niho tutazingirwa Sitani, obwo tutakubula kumanya obwetegeki bwalyo.

OMUGASO GW’OBWOLEKEREZI BWA PAULO

¹² Mbe, ka nahikire Troadi, nolekerere Evanjeli ya Kristu, naho Omukama yankingulire omulyango, ¹³ omwoyo gwange tigwachuleraga, kuba tinasangireyo Tito, mutabani wetu; nawe nimbakesya ningenda Masedoniya.

¹⁴ Nkusima Mungu, ayampere kusinga bucha bucha muli Kristu Yezu, natuha kusuganisya honahona omwaya muzima gw’obumanyi bwe; ¹⁵ kuba tuli mwaya muzima gwa Kristu obusyo ya Mungu, h’abachunguka na h’abakubula: ¹⁶ h’abandi, omwaya gw’olufu ogubeta; kai h’abandi omwaya gw’obulame ogubaloza. Kai akuhich’omulimo ogwo ni ga? ¹⁷ Kuba tituli nk’abanamwingi, abahindulaga ekigambo cha Mungu; nawe tukufumora n’obutaziga, kuti ha mwanya gwa Mungu, obusyo ya Mungu, muli Kristu.

EKLEZIA YA KORINTI NIYO EKUMANYISYA PAULO.

¹ Si tukusuba kutandika kwemanyisya itwe abene? hamo si tuli no kubaha ebaruwa yo kummanyisya, nk’abandi, hamo kugihabwa imwe? ² Imwe n’imwe muli baruwa yetu, eyandikirwe mu mitima zetu, emanyikene, kai esomirwe abantu bona; ³ koto muli baruwa ya Kristu eyandikirwe itwe, n’obwino pai, nawe n’Omwoyo gwa Mungu akulora, ha mabaho g’amabale pai, nawe ha mabaho g’engingo, nizo emitima zetu. ⁴ Tuli n’obwesige obwo hali Mungu ha bwa Kristu; ⁵ ha bwetu tituhicha kutekateka kintu, kuti nikiruga mul’itwe, nawe obuhicha bwetu bukuruga hali Mungu, ⁶ ayatuhere n’obuhicha bwo kuba entumwa z’omulago muhya, ha bw’enuguta pai, nawe ha bw’omwoyo; kuba enuguta ekwita, kai omwoyo gukuloza.

OMULAGO MUHYA GUKIZILE OMULAGO GWA KARA.

⁷ Raba obutumwa bw’olufu, obwaliga bunyamirwe enuguta ha mabale, bwaletaga ikuzo lingi lyo kutinisya abana ba Israeli kwetegereza obusyo bwa Musa, kuber’obwengerezi bwabwo, kai ikuzo elyo lyaliga lili no kubula, ⁸ kuta si ikuzo ly’obutumwa bw’omwoyo? ⁹ Kuba ikuzo ly’obutumwa bw’obuhikire likukira hara ikuzo ly’obutumwa bw’obusingwa. ¹⁰ Kandi ikuzo ly’obutumwa bwo kutandika tilikuhicha kulenganisibwa n’ikuzo ly’obutumwa bwa kabili. ¹¹ Raba echaliga kili no kuhwaho nikiba n’ikuzo, kai kuta ekitura!

¹² Mbe obwo tukutegeza tutyo, tuli n’obweyagazi bwingi; ¹³ kai tituli nka Musa, ayeswekaga obusyo, abana ba Israeli batabonera mu busyo bwe echaliga kili no kubula. ¹⁴ Nawe emyoyo zabo zikagumibwa, kuba kuhika lero, ka basoma Omulago gwa kara, echesweko echo chonene kikwikara kiliho, (kuba Kristu niwe akukihaho). ¹⁵ Hatyo kuhika lero, ka basoma ebyo Musa, echesweko kili ha mutima gwabo; ¹⁶ nawe ka baliba bahindukire ha Mukama, echesweko kilirugaho.

¹⁷ Mbe Omukama ni Mwoyo, kai aho Omwoyo gw’Omukama guli, niho aho obweyagazi buli. ¹⁸ Nawe itwe twena, abayetegereza ikuzo ly’Omukama ha bweru, tukuhinduka nitususana nka wenene, nitwengerera muno, kuti ha bw’Omwoyo gw’Omukama.

ENTUMWA TIZIKUZIGA.

¹ Nicho tutatogorokera, twaherwe obutumwa butyo ha bw’ekisa echo twagirirwe; ² nawe tukwanga eby’ensoni ebikuserekwa, titugira obukeruke, tituhindula ekigambo cha Mungu, nawe tukwolecha obukomereza ha meso ga Mungu, nitwemanyisya itwe abene ha mitima z’abantu bona. ³ Raba evanjeli yetu echaswekirwe, eswekirirwe abakubula, ⁴ abatakwikiriza, abahumibwe Mungu w’ensi enu mu myoyo zabo, niho batayakirwa olumuli lw’evanjeli y’ikuzo ya Kristu, ekisusano cha Mungu. ⁵ Kuba titweyolekerera itwe abene, nawe tukwolekerera Yezu Kristu Omukama wetu, kai itwe tuli bakozi banu muli Yezu; ⁶ kuba Mungu, ayagambire omwanga kwakira mu mwirima, akamulicha emitima zetu, tuhiche kumulicha abandi no kubamanyisya ikuzo lya Mungu muli Yezu Kristu.

OBWEGUMINSIRIZA N’OBUTEGEZA BW’ENTUMWA.

⁷ Nawe tukutegula ensabo enu mu bitwaro by’ibumba, ikuzo libe ly’obuhicha bwa Mungu, lyetu pai. ⁸ Tukugwerwa enaku ningi, nawe titusikamirizibwa; tukuhaha, nawe titufw’ omutima; ⁹ tukunazibwa, nawe titunagwa; tukunoga, nawe titubura; ¹⁰ tukutegula bucha bucha mu ngingo zetu olufu lwa Yezu, niho obulora bwona bwa Yezu bubonekane mu ngingo zetu. ¹¹ Kuba itwe abakulora, tukuherezibwa olufu naku zona kubera Yezu, niho obulora bwa Yezu bubonekane mu ngingo zetu z’amafwerezi. ¹² Mbe hatyo olufu lukukora mul’itwe, n’obulora mul’imwe.

¹³ Kai obwo tuli n’omwoyo gwonene gwo kwikiriza, nk’okwo chandikirwe kiti: Nkekiriza, nicho nafumorere, itwe twena tukekiriza, nicho twafumorere, ¹⁴ nitumanya okw’omuzozi wa Yezu alituzora itwe twena hamo na Yezu, natutaho n’emwe. ¹⁵ Kuba byona bili ha bwanu, niho enema k’ekukana, ekanisye obusimi bwa bengi, kubera ikuzo lya Mungu, ¹⁶ Nicho tutafwererw’omutima; nawe naho omuntu wetu wa hanza nayesingaricha, omuntu wetu wo mu nda naba muhya buli lunaku. ¹⁷ Kuba obunale bwetu bunoro bwa hati bukutuzalira obuzito obutahwaho bw’ikuzo elitagambwa n’elitalengwa, ¹⁸ itwe abatabara ebikubonwa, nawe ebitakubonwa, kuba ebikubonwa ni bya hati chonka, nawe ebitakubonwa tibilihwaho.

OBWEGONGI BW’IGULU.

¹ Tukumanya okwo, naho enzu yetu y’etakaeyo tutwiremo ekakambuka, Mungu alituha mw’igulu enzu endi nantayombekwa mikono z’abantu, etalihwaho. ² Hatyo tukunaranalira mu ngingo zinu nitwegonga kuzwekwa obuturo bwetu bwo mw’igulu, ³ ka tulisangwa tuzwere, tutazukire. ⁴ Kuba, tukili mu ngingo zinu ezituswekire nk’ihema, tukulizibwa obuzito bwazo, obwo tutakwenda ziturugeho, nawe zizwekwe obutafwa, niho ebikufwa bizikwe mu bulame. ⁵ Mbe niwe Mungu yatukozile tutyo, kandi niwe yatuhere Omwoyo nk’omukwatirizo.

⁶ Nicho twizulirire obwesige bucha bucha, nitumanya okwo, tukili mu ngingo zetu, tuli nk’abayezi abali hara n’Omukama, ⁷ (kuba nikwo kwikiriza okutulibasya, tutakabwene Mungu); ⁸ mbe tukutegeza nitwegonga muno kurugamo mu ngingo no kugenda kutura n’Omukama. ⁹ Nicho tuteraho omutima tumusemereze, tukili mu ngingo hamo twazirugiremo. ¹⁰ Kuba twena tuli no kwimerera mw’ilamuliro lya Kristu, niho buli muntu wena ahabwe ebihikire ha ngingo ze, kwinganisya ha bizima hamo ebibi ebyo akuba akozire.

ENTUMWA NI BAKURATIZI BA YEZU KRISTU.

¹¹ Mbe obwo tukumanya okw’Omukama ali no kutinisibwa, tukurozya kusomborera abantu; nawe Mungu akutumanya, kai nkutegeza nti: imwe mwena mukutumanya mu mitima zanu. ¹² Titusuba kwemanyisya itwe abene hal’imwe, nawe tukubaha omwanya gwo kwesima ha bwetu, niho muhiche kusubiramo abakwekuliza ebikubonwa, kai eby’omutima pai ¹³ Kuba tukaba nitususana kuti tusazire, tukusalira Mungu; tukaba tuli n’obwenge, ni kubera imwe.

¹⁴ Kuba obwenzi bwa Kristu butusindika, nituchwa tuti: raba omo wenka akafwera bona, mbe bona befwerere; ¹⁵ kai Kristu akafwera bona, niho abakulora baleke kulora kubera bonene abene, nawe kubera ogwo ayafwerere no kuzokera bonene. ¹⁶ Nicho kuruga hati tutakimanyira omuntu n’omo ha bw’engingo; kai raba nitumanyaga Kristu ha bw’engingo, hati titukimumanya tutyo. ¹⁷ Mbe omuntu akaba ali muli Kristu, ali kihangwa kihya; ebikokwere byahwereho; lora, byona byabere bihya. ¹⁸ Kai byona bikuruga hali Mungu, ayatugorozanisize na wenene ha bwa Kristu, natuha omulimo gwo kugorozanisya. ¹⁹ Kuba Mungu akagorozanya n’ensi muli Kristu, naleka kubabalira ebiheno byabo, kai yatereho mul’itwe ekigambo ch’obugorozanisya.

²⁰ Mbe hatyo tuli bakuratizi ba Kristu, kuti nitubahana ha mwanya gwa Mungu. Tukubalembereza mw’izina lya Kristu, mugorozanye na Mungu. ²¹ Ayaliga atakumanyaga ekiheno, Mungu akamugira kiheno kubera itwe, niho tube buhikire bwa Mungu muli wenene.

ENTUNGWA Z’ENTUMWA.

¹ Mbe obwo tuli bakuratizi ba Mungu, tukubalembereza mutahabwa busa chonka enema ya Mungu. ² Kuba akugira ati: Nkakuhulira mu mwanya gwingene, kai nkakuhwera ha lunaku lwo kuchunguka. Ngugwo hati omwanya gwingene, ndulwo hati olunaku lwo kuchunguka.

³ Tutasitaza omuntu n’omo, omulimo gwetu gutagaywa; ⁴ nawe muli byona tweyoleche nk’abakuratizi ba Mungu, n’obweguminsiriza bwingi mu naku, mu bukene na mu bunale, ⁵ mu buterwa, mw’ibohero, mu bumanga, mu milimo, mu bukesy’obwire na mu kisibo, ⁶ mu buyezi bw’omwoyo, mu bumanyi, mu busasizi, mu bufura, mu Mwoyo Mutakatifu, mu bwenzi bwa kimo, ⁷ mu bigambo bikomereze, mu mani ga Mungu, mu bikwato by’obuhikire ha bulyo na ha bumoso, ⁸ mw’ikuzo na mu nsoni, mu nkuma mbi na nzima; nk’abakongya, nawe abatakuziga; nk’abatamanywa, nawe abakumukire; ⁹ kuti tuli mu gafwa, kai kunu tuli bazima; nk’abakunaranazibwa, kai kwitwa pai; ¹⁰ nk’abazubire, nawe abasemererwe bucha bucha; nk’abahabi, nawe abakutunga bengi; nk’abatali na kintu, nawe abatunga byona.

ABAKRISTU TIBENGENE KUKOBERA ENTUNGWA N’ABASENZI.

¹¹ Imwe Banakorinti, omunwa gwetu gubayasamire; omutima gwetu gubagaziherere. ¹² Timufunzire mul’itwe, nawe emitima zanu zifunzire. ¹³ Mbe mwinganisye n’ene, nkubafumorera nk’abana bange, imwe mwena mugazihye emitima zanu.

¹⁴ Mutakobera enkomyo n’abasenzi; kuba obuzima bukukoba buta n’obubi? kai omwanga gukutulanwa guta n’omwirima? ¹⁵ hamo Kristu akuhulirana ata na Sitani? hamo ni bukobe buta bw’omukristu n’omusenzi? ¹⁶ eklezia ya Mungu ekwingana eta n’ebigabiro? Kuba imwe muli eklezia ya Mungu muzima, nk’okwo Mungu akugamba, ati: Nditura hagati yabo, nindibata muli bonene; kai ndiba Mungu wabo, na bonene baliba ihanga lyange. ¹⁷ Hatyo murugemo muli bonene, mutagane nabo, engambo y’Omukama, kandi mutakwata ebirofuhazibwe; ¹⁸ kai ine ndibayanankula, ndiba iso wanu, kandi imwe muliba batabani bange na bahara bange, engambo y’Omukama Omuhicha wa byona.

OBUSEMERERWA MU BUSASI.

¹ Mbe bana betu bendwa, obwo tuli n’emirago nk’ezo zityo, tweyeze ha bulofu bwona bw’engingo n’obw’omwoyo, nitumaliza obutakatifu bwetu mu butini bwa Mungu.

² Mutwanankule. Titwahenere omuntu n’omo, titwahabisize omuntu n’omo, titwazigire omuntu n’omo. ³ Tinkubagambira ebyo mbasinge, kuba nkabagambira olundi nti: muli mu mitima zetu mu lufu na mu bulame. ⁴ Nkubesigirira muno, nkwesimira muno imwe; nkwizura obuhumuzibwa, nkusemererwa no kusemererwa mu naku zange. ⁵ Kuba, ka twahikire Masedoniya, engingo zetu tizahumwire n’akati, nawe tukagwerwa obunale bwingi: hanza obulemo, mu nda obutini. ⁶ Nawe Mungu, omuhumuza w’abekehya, natuhumuza no kwiza kwa Tito; ⁷ kai no kwiza kwe kwonka pai, nawe hona n’obuhumuzibwa obwo yaherwe imwe, kuba yangambire obwegongi bwanu n’amalira ganu n’obwenzi bwanu hal’ine, hatyo obusemererwa bwange nibukana muno.

EBY’EBARUWA YA PAULO YO KUTANDIKA.

⁸ Mbe naho nabazubize n’ebaruwa yange, tinkwefuza; kai naho nefulize, ka mbwene okwo ebaruwa enu yabazubize mwanya munoro, ⁹ hati nasemererwa, t’obwo mwazubire, nawe obwo obuzube bwanu bwabahere kutamwa. Mwazubibwe ha bwa Mungu, mbe hatyo timwanazibwe itwe. ¹⁰ Kuba obuzube obuli ha bwa Mungu buzara kutamwa kusimbagirire; nawe obuzube bw’ensi buzara olufu. ¹¹ Mbe lora, obuzube bwanu ha bwa Mungu bwazere obwekengi buta si, n’obweyogi buta, n’obubihirirwa buta, n’obutini buta, n’obwegongi buta, n’obwenzi buta, n’obwehozi buta si! Nimwemanyisya okwo mutali na ntambala mu magambo ago.

¹² Mbe tinabayandikire kuber’omuntu ogwo ayagizire ekizumi, nali kubera ayachemere, nawe nayenzire kubolecha obwenzi bwange hal’imwe ¹³ ha meso ga Mungu. Nicho chatuherere kuhumuzibwa. Nawe mu buhumuzibwa bwetu tukasemerezibwa muno obusemererwa bwa Tito, kuba omwoyo gwe gukagumisibwa imwe mwena. ¹⁴ Kai raba ninesimira imwe ha meso ge, tinkukorw’ensoni, kuba ebyo twesimire ha meso ga Tito bikomereze, nk’okwo bikomereze byona ebyo twabagambire. ¹⁵ Hatyo akukana kubayenda muno, k’akwizuka obuhulizi bwanu imwe mwena, n’obwira obwo mwamukumire n’obutini n’obuzugumi bwanu. ¹⁶ Nkusemererwa obwo nkuhicha kubesigirira muli byona.

KUHWERA ABAHABI.

¹ Bana betu, tukubamanyisya enema ya Mungu egabirwe eklezia za Masedoniya: ² naho bagwerwe enaku ningi, basemererwe muno, kai obuhabi bwabo bwingi bukakanisya obuhango bw’obwenzi bwabo bwa kimo. ³ Kuba nkumanyisya okwo behinzile kugabira abene bonka, nk’okwo bahichaga no kukiraho, ⁴ nibatusaba muno omugisa gwo kukobera obuhwezi bw’abatakatifu. ⁵ Kai tibagabire kukiraho okwo twategezaga chonka, nawe nibatandika kwehereza abene ha Mukama, na hal’itwe, ha bwo kwenda kwa Mungu; ⁶ hatyo nitusaba Tito amalize hagati yanu omulimo muzima gunu, nk’okwo yagutandikire.

⁷ Mbe, nk’okwo musingire muli byona: mu kwikiriza, mu bigambo, mu bumanyi, mu bwesiniriza bwona, munomuno mu bwenzi hal’itwe, hona musinge mu mulimo muzima gunu. ⁸ Tinkugamba ebyo kuti ni kilagiro, nawe nkwenda kubasindika kwolecha obwenzi bwanu bwa kimo, nimubona obwomereza bw’abandi. ⁹ Kuba mukumanya obufura bw’Omukama wetu Yezu Kristu, ayegizire muhabi kubera imwe, naho yaliga ali muhango, niho mube bahango ha bw’obuhabi bwe. ¹⁰ Nkubategeka muli ebyo, kuba bikubagasira, obwo mutatandikire chonka kukola hati, nawe mwaliga mwayenzire kukola omwaka gurugireho. ¹¹ Mbe hati mumalize omulimo gunu; obwo mwayenzire bwangu, mukole bwangu, nk’okwo mukuhicha. ¹² Kuba omuntu k’akuha omutima guliho, Mungu akwikiriza ebyo ali nabyo, ebitaliho pai.

¹³ Tinkwenda musasire abandi, mukazitoherwa, nkwenda obwinganisya. ¹⁴ Hati obukane bwanu buhwere obukene bwabo, niho obukane bwabo buzune obuhabi bwanu, obwinganisya bubeho, nk’okwo chandikirwe kiti: ¹⁵ Ayakobyaga bingi, tiyakiraga abandi; kai ayakobyaga bike, tiyakirwaga abandi.

ABATUMIRWE PAULO.

¹⁶ Nkusima Mungu obwo yateremo mu mutima gwa Tito obwenzi hal’imwe obukwingana n’obwange; ¹⁷ kuba tiyekirize chonka ekigambo change, nawe hona akehinda omwene kuza hal’imwe. ¹⁸ Tutumire nage omutabani wetu ondi, akusimwa eklezia zona kuber’evanjeli; ¹⁹ kai echo chonka pai, nawe yasozirwe eklezia abe wezasu mu lugendo lwetu, mu mulimo gunu gw’obwenzi ogwo tukolera ikuzo ly’Omukama, tumanyisye kwenda kwetu kuzima. ²⁰ Tukurozya tutyo kuzibira abandi, batatugirira ntambala kuber’emiherezo mingi ezo tugabira. ²¹ Kuba tukwesiniriza kukola kuzima, ha meso ga Mungu chonka pai, nawe na ha meso g’abantu. ²² Kandi tutumire nabo omutabani wetu, owe twabona kengi obwomereza bwe, kai hati bukanire muno kuber’obwesige bwe bwingi hal’imwe, ²³ na hali Tito, owezasu n’omuhwezi wange hal’imwe, na ha batabani betu, entumwa z’eklezia n’ikuzo lya Kristu. ²⁴ Mbe muboleche, ebusyo y’eklezia, obwenzi bwanu, tumanye okwo tuli n’ensonga zo kwesimira imwe.

OMUGASO GWO KUHWERA ABAHABI.

¹ Eby’obuhwezi bw’abatakatifu obwategekirwe, ni busa chonka kubabyandikira. ² Kuba nkumanya okwo mubuteremo omutima; echo nicho kikumpa kubesimira ha meso g’Abamasedoniya, nti: Akaya yetegekire kuruga omwaka gurugireho; obwomereza bwabo bwemukize obw’abandi bengi.

³ Mbe ntumire abatabani betu, musangwe mwetegekire (nk’okwo nagambire), tutechura twabasimire ebyo busa chonka; ⁴ Abamasedoniya bakaba nibeza n’ene, bakabasanga mutetegekire, tutakorw’ensoni (ntagamba imwe). ⁵ Mbe nkalenganisya nti: hakili ndembereze batabani betu batwebembere hal’imwe, bachume omuherezo ogwo mwalagire, gusangwe gwetegekire, nk’omugabo gwingene, nawe nk’obwimi pai.

⁶ Nkugamba nti: Abiba bike, agesa bike; abiba bingi, agesa bingi. ⁷ Mbe buli muntu wena akwate ebyo yetegekire mu mutima gwe, azubire hamo kuti asinirizibwe pai; kuba Mungu akwenda omugabi musase. ⁸ Kai Mungu ali n’obuhicha bwo kubakanisiza enema zona, mube bucha bucha n’ebisasire, niho muhiche kukanisya ebikorwa bizima, ⁹ nk’okwo chandikirwe kiti: Akasesera no kugabira abahabi; obuhikire bwe bwikara emyaka z’emyaka. ¹⁰ Kandi akugabira omubibi embibo, alimuhera n’omukate alye, kai alikanisya embibo yanu; nayongerera bucha bucha ebirabo by’obuhikire bwanu, ¹¹ niho mube bahango muli byona, muhiche kugabira n’obutasoba byona ebikusindika kusima Mungu ha bwetu.

¹² Kuba omuherezo ogwo ogugabirwa itwe tigukenura chonka abatakatifu, nawe gukusimya muno Omukama; ¹³ ka bakubona omuherezo ogwo, bakusimira Mungu obuhulizi bwanu bw’Evanjeli ya Kristu, n’obufura obubasindika kugabira bonene na bona ebyanu; ¹⁴ kandi balibasabira, babayenzire muno kuber’enema mpango eyo Mungu yabahere. ¹⁵ Mungu asimirwe engabirano ye etagambwa.

PAULO ALI N’OBUHICHA BWO KUNARANAZA ABATAHULIRA.

¹ Ine Paulo, nkubalembereza ha bw’obufura n’obwekehya bwa Kristu, ine akusana kuti ndi mwekehya, ka nkuba ndi hagati yanu, nawe akubahigalira, ntaliho. ² Nkubalembereza, mutansiniriza, ka ndiba hagati yanu, kugirira mani n’obuhigi, obwo bakundamula, abakutekateka okwo tukutungwa ha bw’engingo. ³ Kuba, naho tuli mu ngingo, titurwana ha bw’engingo. ⁴ Ebikwato byetu by’obulemo tibili by’engingo, nawe bikuhicha muli Mungu kugwisya enkingo no kusinga obuhakani, ⁵ n’obukuru bwona obusingasingana n’obumanyi bwa Mungu, no kubwiruhaza obwenge bwona mu buhulizi bwa Kristu; ⁶ kai twetegekire kunaranaza obutahulira bwona, obuhulizi bwanu bukaba buhikire.

⁷ Mulamule amagambo nk’okwo gasusana. Omuntu akaba nayegira wa Kristu, aizuke okwo itwe twena tuli ba Kristu nka wenene. ⁸ Kuba, naho nakwekulirize kukiraho kake obuhicha obw’Omukama yatuhere, mbagumye, nawe mbasingariche pai, tinakugizil’ensoni. ⁹ Nawe, batekiriza okwo nkwenda kubatinisya n’ebaruwa zange, ¹⁰ kuba abandi bati: ebaruwa ze zili n’ensonga n’amani, nawe k’akuba aliho, nasana kuti henda engingo ze zinogire, kai ebigambo bye bihikire kugaywa, ¹¹ mbe akutekateka atyo aizuke okwo tuli mu bigambo by’ebaruwa, tutaliho, nk’okwo tuli mu bikorwa, ka tuba tuliho.

KWESIMA MU MUKAMA.

¹² Tituhicha kwesusanisya hamo kwelenganisya n’abandi abakwemanyisya abene; nawe tukwelenganisya nk’okwo tuli, kai tukwesusanisya n’etwe abene. ¹³ Hatyo titwesima n’akasagirizo, nawe mu lulengo lw’omugabo ogwo Mungu yatugabire: nikwo kuhika hal’imwe. ¹⁴ Titusagiriza, kuti henda tutahikire hal’imwe, obwo twahikire hal’imwe, nitwolekerera Evanjeli ya Kristu. ¹⁵ Titwekuliza n’akasagirizo emilimo z’abandi; nawe tukutegeza okwo, kwikiriza kwanu kukagenda nikukana, omugabo gwetu gwona guligenda nigukana kukiraho, ¹⁶ n’okwo tulitambuka ensi yanu tuze kwolekerera Evanjeli, nzira kwesimira ebyakozirwe mu mugabo gw’abandi. ¹⁷ Ayesima, ayesime mu Mukama. ¹⁸ Kuba akusimwa t’ogwo akwemanyisya omwene, nawe n’owe Mungu akumanyisya.

PAULO NAKOLA BUSA CHONKA

¹ Hakili mukahicha kwemera kake olusaro lwange! Mbe mulwemere. ² Kuba nkubabubirira ibuba lya Mungu, obwo nabahigire omuseza nagumo, niwe Kristu, mbahe hali wenene, nk’omuzule ayezire. ³ Nawe nkutina nti: nk’okwo enzoka yakongize Eva n’obukeruke bwayo, nikwo emyoyo zanu zikuzunda, ziruge mu butasoba obuli muli Kristu. ⁴ Kuba omuntu akaba naiza kubolekerera Kristu ondi, atali owe twayolekerere, hamo mukaba nimuhabwa omwoyo gundi, gutali ogwo mwaherwe, hamo evanjeli endi, mwakwikirize kuzimazima.

⁵ Nawe nkuchwa nti: tinkukirwa na kanoro entumwa nkuru. ⁶ Naho ndi musema mu buromi, tindi musema mu bumanyi; nawe tukemanyisiza imwe muli byona. ⁷ Si nagizir’entambala, ka nekehize ine omwene, imwe mwerezibwe, ninolekerera busa chonka evanjeli ya Mungu? ⁸ Nkanyaga eklezia zindi, nimpabwa omuhero, mbahwere. ⁹ Kandi ka nabere hagati yanu, naho naliga nkenire, tinazitoheze omuntu n’omo, kuba abatabani betu ba Masedoniya bakampa ebyaliga binkenire; muli byona tinababerere mugugu, kai ndiguma ndi ntyo. ¹⁰ Obukomereza bwa Kristu buli mul’ine: tibalinaka ikuzo elyo mu nsi z’Akaya. ¹¹ Kubaki? Si n’obwo ntabayenda? Mungu akumanya. ¹² Nawe echo nkukola hati, ndiguma kukikola, niho abakuhiga omwanya, gubabule, basangwe bali nk’etwe muli ebyo bayekuliza. ¹³ Kuba abantu nk’abo batyo ni ntumwa z’obuzigi, abakozi bazigi, abakwehindula babe ntumwa za Kristu. ¹⁴ Kai muleke kukuma, kai Isitani lyonene likwegira mumalaika w’omusana. ¹⁵ Mbe t’ihano abakozi balyo bakegira bakozi b’obuhikire; nawe omuhero gwabo gulisusana n’ebikorwa byabo.

EMILIMO N’ENAKU ZA PAULO.

¹⁶ Ka nsube kugamba nti: (mutachwa muti: ndi musazi, hamo munikirize mbe musazi, ine nena mpiche kwekuza kake); ¹⁷ ka nkugamba eby’ikuzo lyange, tinkugamba ha bwa Mungu, nawe nkutenga nk’omusazi. ¹⁸ Obwo bengi bayekuza ha bw’engingo, ine nena ka nekuze. ¹⁹ Kuba mukwikiriza kwemera abasazi, obwo imwe muli n’obwenge. ²⁰ Lora, mukwemera kubwiruhazibwa, no kulibwa no kunyagwa, no kukolerwa chemo, no kuterwa mu busyo. ²¹ Nkutenga ninkorw’ensoni, kuti twabuzirwe amani mu kigambo echo. Nawe eby’ondi akuhicha, (kuli kutenga kisazi), ine nena nkuhicha.

²² Bali Bayahudi? ine nena. Bali Banaisraeli? ine nena. Bali b’oluganda lwa Ibrahimu? ine nena. ²³ Bali bakuratizi ba Kristu? (ka ngume kutenga kisazi), ine nena kukiraho: nabakiriza emilimo, n’amabohero, n’obuterwa obutalengwa, n’ebitegezi by’olufu. ²⁴ Abayahudi bantezire enaku itanu ngendo makumi ana, kuleka lumo; ²⁵ nkasanzurwa ngendo isatu, nkalasw’amabale lugendo lumo, nkefuma kasatu, nkamara omusana gumo n’ekiro chaho kuzimu kw’enanza, ²⁶ kengi nimba mu lugendo, na mu bitegezi by’emigera, mu bitegezi by’abasuma, mu bitegezi by’ebyaro, mu bitegezi byo mw’iswa, mu bitegezi by’enanza, mu bitegezi hagati y’abatabani betu b’obuzigi; ²⁷ mu milimo na mu bulemwa, mu bukesy’obwire bwingi, mu nzala na mw’iliho, mu bisibo bingi, mu mbeho na mu buzuka. ²⁸ Kuleka ebyo, ebili ha bweru, amazongoko ga buli lunaku g’eklezia zona.

²⁹ Ni ga anogire, ine ntanogire? ni ga asitazibwe, ine ntasene kuti nahyire? ³⁰ Kuli kwekuza, nkwekuliza obunoge bwange. ³¹ Mungu, Ise Mukama wetu Yezu Kristu, ali n’omugisa mu myaka z’emyaka, akumanya okwo ntabeha. ³² Damasko, omugerezi w’ensi ha mwanya gw’omukama Aretasi yalinzyaga ekikale ch’Abadamasko, bankwate; ³³ nibandengetula mw’itukuru mw’idirisya kunambucha olugo, hatyo ninduga mu mikono ze.

ENEMA ZA PAULO NO KUROZIBWA KWE.

¹ Kuli kwesima, (nawe tikwingene), ka mpike ha buboneki n’obusuruzi bw’Omukama. ² Nkumanya omuntu wa Kristu, emyaka ikumi n’ena zarabireho, ayasagerwe (hamo mu ngingo hamo mu mwoyo, tinkumanya, Mungu niwe akumanya) kuhika h’egulu lya kasatu. ³ Kai nkumanya okw’omuntu ogwo, (hamo mu ngingo ze hamo mu mwoyo gwe, tinkumanya, Mungu niwe akumanya), ⁴ yasagerwe mw’igulu, nahulira ebigambo ebitagambwa, eby’omuntu atakuhicha kutenga. ⁵ Nakuhikize kwesimira omuntu nk’ogwo atyo; nawe ha bwange tinkwesimira kintu, hatali obunoge bwange. ⁶ Nkiba ninenda kwesima, tinakubere musazi, kuba nakutengire ebikomereze; nawe pai, batandenganisya kukira nk’ebyo bakubona mul’ine, hamo nk’ebyo bahuliza hal’ine.

⁷ Ntayekuliza obuhango bw’obusuruzi obwo, nkahabwa mu ngingo zange olubuli, mumalaika wa Sitani, anter’empi. ⁸ Nkasaba Omukama kasatu andugeho; ⁹ kai nagira ati: Enema yange ekuhikire, kuba amani gange gakanire mu bunoge. Mbe nkwikiriza kwesimira obunoge bwange, niho amani ga Kristu gature mul’ine. ¹⁰ Nicho nkusemerererwa mu bunoge bwange, mu bizumi, mu bukene, mu bunazibwa, mu bunale, kubera Kristu; kuba ka nkuba ndi munoge, aho niho ndi n’amani.

OBWEGABI BWE.

¹¹ Nkaba musazi, imwe n’imwe mwansinirize. Kuba gwaliga guli mulimo gwanu gwo kummanyisya, obwo ntakizirwe n’akati entumwa ezo ezitalenganisibwa, naho ntali kintu. ¹² Enyamo z’obutumwa bwange nizibonekana mul’imwe mu bweguminsiriza bwona, mu mahano, mu bikumyo na mu bikorwa by’amani. ¹³ Kuba mukakirwa muta eklezia zindi, raba si obwo ntababerere mugugu? Mulankiza ekizumi echo.

¹⁴ Lora, lwa kasatu nkwetegeka kuza owanu, kai tindiba mugugu hal’imwe. Kuba tinkuhiga ebintu byanu, nawe nkuhiga imwe, obwo gutali mulimo gw’abana kubikira abazere, nawe abazere kubikira abana babo. ¹⁵ Kai ine nkwikiriza muno kwegabira no kwegabira ine omwene kuber’emyoyo zanu, naho mukanenda kake, ine nabayenzire muno.

¹⁶ Mbe nikwo tinabere mugugu hal’imwe, nawe obwo ndi mukeruke, nkabakerukira, bati. ¹⁷ Si nkabakongiza abo nabatumire? ¹⁸ Nkalembereza Tito, nintuma nage mutabani wetu ondi. Si Tito yabakongize? titwalibasire mwoyo gumo, mu bigere bimo? ¹⁹ Si muchatekateka okwo tukweyoga hal’imwe? Tukutenga obusyo ya Mungu muli Kristu; kai ebyo byona, bendwa bange, bili byo kubagumya. ²⁰ Nkutina nti: ka ndaiza, tinkubasanga nk’okwo nakwenzire, kai ine nsangwe nk’okwo mutakwenda; nkutina kusanga mul’imwe obuhakani, ichubi, olwango, enkungana, obugeyi, obuchwererezi, obwekuza, amazongoko; ²¹ kai nasubire kwiza, Mungu ankoz’ensoni, mbe no kulirira abaheni bengi, abatatamirwe obulofu bwabo n’obusihani bwabo n’entungwa zabo z’obuyaga.

PAULO NATINISYA ABAHENI.

¹ Lora, nkwiza hal’imwe lwa kasatu; byona bililamurwa ekigambo ch’embona ibili hamo isatu. ² Nkabagambira olundi, kai nkubagambira na hati, kuti ndiho, naho ntaliho hati, abahenire mbere n’abandi bona, nti: Ka ndisuba kwiza, tindigir’ekisa. ³ Si mukwenda kurozya Kristu akufumora mul’ine, atali munoge hal’imwe, nawe ali n’obuhicha mul’imwe? ⁴ Kuba, naho yalegirwe ha musalaba mu bunoge bwe, akulama mu buhicha bwa Mungu. Kai itwe twena, tunogire muli wenene, nawe tulilama nage ha bw’obuhicha bwa Mungu mul’imwe.

⁵ Mwetegereze imwe abene okwo muli mu kwikiriza; mwelolize imwe abene. Timukumanya imwe abene okwo Yezu Kristu ali mul’imwe? mukaba mutasubir’enuma. ⁶ Nawe nkutegeza okwo mukwikiriza okw’itwe tutasubir’enuma. ⁷ Mbe tukusaba Mungu mutakola kubi: tubonekane kusimwa pai, nawe imwe mukole kuzima, naho tukasuba enuma. ⁸ Nawe tituhicha kurwana n’obukomereza, nawe kubugumya. ⁹ Hatyo tusemererwe obunoge bwetu n’amani ganu; kai tukusaba obuhikire bwanu. ¹⁰ Nicho nkwandikira ebyo, ntaliho, niho, nezire, ntaba wo kubagirira mani, ha bw’obuhicha obw’Omukama yampere bwo kubagumya, kubasingaricha pai.

OBUKESYA.

¹¹ Mbe, bana betu, musemererwe, mube bahikire, muhanane, mube n’omutima gumo, mwikare n’omulebo, kai Mungu w’omulebo n’obwenzi akuba n’emwe. ¹² Mubwachanye n’omunwegero mutakatifu. Abatakatifu bona bakubabwacha. ¹³ Enema y’Omukama wetu Yezu Kristu, n’obwenzi bwa Mungu n’omugabo gw’Omwoyo Mutakatifuzibe n’emwe mwena. Amina.