1 Hali Timote

OBURWANI BUZIMA.

¹ Paulo, entumwa ya Yezu Kristu ha bw’ekilagiro cha Mungu omuchunguzi wetu, na Yezu Kristu obutegeza bwetu, ² hali Timote, mwana wange mwendwa mu kwikiriza. Mungu Tata na Kristu Yezu Omukama wetu bakuhe enema n’ekisa n’omulebo.

³ Ka nagenzire Masedoniya, nkakusaba kusigara Efwezi, ozibire banamwingi kwolekerera ebindi, bitali byetu, ⁴ no kutah’olutwi mu ngani na mu butonzi obutalengwa bw’enganda: amagambo ago galeta kuhakana kukira kwombeka ebya Mungu, ebili mu kwikiriza. ⁵ Kuba obusubiro bw’ebilagiro buli mu bwenzi na mu mwoyo guyezire na mu mutima muzima na mu kwikiriza okutaziga. ⁶ Abandi bayangire ebyo, nibahaba nibaruba amagambo ga busa chonka, ⁷ bayenzire kuba bolekerezi b’Ekilagiro, kunu batakusombokerwa ebyo bagamba n’ebyo bakomereza.

⁸ Tukumanya okw’Ekilagiro ni kizima, bakakikoza nk’okwo kili koto, ⁹ nibamanya okw’ekilagiro tichaterweho abazima, nawe ababi n’abagome, abazuma Mungu n’abaheni, ab’entambala n’abatali na dini, abesi ba bese na banina n’abesi bandi, ¹⁰ abasihani n’ab’obuyaga, n’abasuma b’aberu, ababehi n’abakulahira nibabeha, na bona abakuhenera obwolekerezi buzima, ¹¹ obuli mu muhanda gw’Evanjeli y’ikuzo lya Mungu w’omugisa, ayampere kugyolekerera.

¹² Nkusima ayangumize, niwe Yezu Kristu Omukama wetu, kuba yekirize kunesigirira no kumpa obutumwa bwe, ¹³ ine ayaliga ali kara muzuma Mungu ninnaranaza ninzuma Eklezia; nawe nkabona ekisa cha Mungu, kuba nkakola mu butekiriza, ntakumanya. ¹⁴ Kai enema y’Omukama wetu ekakana muno, nenizuza obwikiriza n’obwenzi, obutura muli Yezu Kristu.

¹⁵ Ni kigambo cha kimo, kai kihikire kwikirizibwa, kinu: Yezu Kristu yezire mu nsi munu kuchungula abaheni, muly’abo ine ndi wo kutandika. ¹⁶ Nawe nich’echo champere kusasirwa, Yezu Kristu atandike mul’ine kubonesya obweguminsiriza bwe bwona, mbe ndolero y’abalamwikiriza, babone obulame obutahwaho.

¹⁷ Isima n’ikuzo libe ha Mukama w’emyaka, atafwa, atabonwa, Mungu nagumo, mu myaka z’emyaka. Amina.

¹⁸ Nich’ekilagiro echo nkukuha, mwana wange Timote, nk’okwo obulagi bwa kara bugamba hal’iwe, orwane oburwani buzima, ¹⁹ ogumire mu kwikiriza na mu mutima muzima. Abandi ka bayangire ebyo, nibefuma mu butekiriza. ²⁰ Muli bonene haliho Hymene n’Alekisandri, abo nanagirire Sitani, bamanye kuleka kuzuma Mungu.

KUSABIRA ABAKURU. — MUNGU OMO N’OMUTWEREZI OMO.

¹ Mbe nkubasaba kukiraho byona kusabira abantu bona mu sala zanu n’ilembereza lyanu n’obukurasi bwanu n’obusimi bwanu; ² musabire abakama n’abali n’obukuru bona, niho twikare tuchulere mu dini na mu ntungwa nzima. ³ Kuba echo ni kizima, kai kikusemereza Mungu omuchunguzi wetu, ⁴ akwendeza abantu bona obuchunguki n’obumanyi bw’obukomereza.

⁵ Kuba Mungu n’omo wenka, kai omutwerezi hagati ya Mungu n’abantu n’omo wenka, niwe omuntu Yezu Kristu, ⁶ ayeherereze omwene obuchunguzi bwa bona, nk’okwo chamanyisibwe mu mwanya gwacho, ⁷ nintebwaho mwolekerezi we n’entumwa ye, (nkutenga agaliho, tinkubeha), mwolekerezi w’Abanamahanga mu kwikiriza na mu bukomereza.

AKASOMERE K’ABASEZA N’AK’ABAKAZI.

⁸ Mbe nkwenda abaseza basome honahona, bayelelize emikono ziyezire, nzira biniga n’empaka. ⁹ Nikwo n’abakazi basome bazwere kuzima, bechumire n’obutekani n’obwesagazi, nibaleka isoke lisyongire n’ezahabu n’enkwanzi z’obuguzi bwingi n’emyenda zyorobire, ¹⁰ nawe babe n’ebikorwa bizima, nk’okwo kihikire ha bakazi abali n’edini. ¹¹ Omukazi ayolekererwe abulize, aikirize koto. ¹² Tinkufuha omukazi kwolekerera hamo kugerera omuseza, nawe ali no kwikara abulize. ¹³ Kuba Adamu niwe yatandikire kubumbwa, Eva nahereruka. ¹⁴ Kai Adamu tiyazigirwe, nawe omukazi, ka yazigirwe, nagwa mu ntambala. ¹⁵ Mbe nawe alichunguzibwa obuzere, akaba naguma mu kwikiriza na mu bwenzi n’obutakatifu hamo n’obutekani.

ABEPISKOPI N’ABADYAKONI N’ABADYAKONIKAZI.

¹ Ekigambo kinu ni cha kimo: akwegonga obwepiskopi, akwegonga omulimo muzima. ² Mbe omwepiskopi ataba na ntambala, abe muntu ayaswere omukazi omo wenka, abe mwesagazi, mwetegereza, muchulere, w’entungwa nzima, w’obwira, mwolekerezi, ³ atasegaga evini, atapampuka kutera, nawe abe mutekani, nzira mpaka n’obununu; ⁴ agerere kuzima eka ye, agumye abatabani be mu buhulizi na mu ntungwa nzima. ⁵ Kuba atakumanya kugerera eka ye, alimanya ata kurabirira Eklezia ya Mungu? ⁶ Ataba neofiti, aleke kwekuza akasingwa nka Sitani. ⁷ Kandi aba hanzabamusime, atagwerwa igayo akabasibwa mu mitego za Sitani.

⁸ Nikwo n’abadyakoni, babe n’entungwa nzima, bataba n’endimi ibili, batasagiriza kunwa evini, batahigaga empilya z’ensoni; ⁹ bagumye olufubo lwo kwikiriza mu mutima muzima. ¹⁰ Na bonene bona batandike kurozibwa, niho bahabwe omulimo ogwo, raba nibasangwa batali na ntambala. ¹¹ Nikwo n’abakazi, babe b’entungwa nzima, nzira bugeyi, besagazi, besigwa muli byona. ¹² Abadyakoni basangwe balaswere omukazi omo wenka, bagerere kuzima abana babo n’amaka gabo. ¹³ Kuba abalasangwa bakozire kuzima omulimo ogwo, balyebonera isima n’obwesige bwingi mu kwikiriza okuli muli Yezu Kristu.

¹⁴ Nkukwandikira ebyo, naho nkutegeza kukuzayo bwangu, ¹⁵ niho, nkerirwa, omanye nk’okwo oli no kutungwa mu nzu ya Mungu, eli Eklezia ya Mungu akulora, n’enomyo n’oluhazu lw’obukomereza. ¹⁶ Kai koto ni lukuru olufubo lw’edini, olwabonekere mu ngingo, olwamanyisibwe Omwoyo, olwabwenwe bamalaika, olwayolekererwe amahanga, olwekirizibwe mu nsi, olwayanankwirwe mw’ikuzo.

OBWOLEKEREZI BW’OBUBEHI.

¹ Nawe Omwoyo gukugamba koto okwo mu naku z’obusyo abandi balileka kwikiriza, barube emyoyo z’obubehi n’obwolekerezi bw’amasitani, ² bazigirwe abantu bazigi, abali n’olunyamo lw’obubi mu mutima, ³ abakuzibira kuswera no kulya ebyo Mungu yahangirire abekiriza n’abakumanya obukomereza, babilye nibasima Mungu. ⁴ Kuba ebihangwa byona bya Mungu ni bizima, kai chona ekikulibwa no kusima tikili no kunagwa, ⁵ kuba kikutakatifuzibwa ekigambo cha Mungu n’esala.

PAULO NAHABULA TIMOTE.

⁶ Okayolekerera abatabani banu ebigambo ebyo, okuba entumwa nzima ya Yezu Kristu, ayelisize ebigambo byo kwikiriza n’eby’obwolekerezi buzima, obwo warubire kimo.

⁷ Noiruke engani z’ekisirusiru, kai oteho olutwi mu magambo g’edini. ⁸ Kuba kugiya kw’engingo kukugasa kake chonka; nawe edini ekugasira byona, obwo eli n’omulago gw’obulame bwa hati n’obulaiza. ⁹ Echo ni kigambo cha kimo, kai kihikire koto kwikirizibwa. ¹⁰ Kuba nich’echo ekikutuha kwemera obunale n’ebizumi, obwo tukutegeza Mungu akulora, omuchunguzi w’abantu bona, kai munomuno w’abekiriza. ¹¹ Olagire ebyo, obyolekerere.

¹² Hatabaho n’omo wo kugaya obuto bwawe; nawe obe ndolero y’abekiriza, mu bigambo na mu ntungwa na mu bwenzi na mu buyezi bw’obwoyo. ¹³ Kuhika nize, osome ebitabo, ohane, oyolekerere. ¹⁴ Otagayaga enema eli mul’iwe, eyo waherwe, abasaserdoti ka bakutereho emikono, nk’okwo omulago ogwo gugamba. ¹⁵ Henza ebigambo ebyo mu kalezi kawe, obiter’omutima, niho obubuz’obusyo bwawe bumanyikane mu bantu bona. ¹⁶ Oyetegereze iwe omwene n’obwolekerezi; guma muly’ebyo, kuba, okakola otyo, olyechungula iwe omwene n’abakukuhulira.

ABAFWERWE BEBA.

¹ Otahanaga manimani abagurusi, nawe obahabule nka baso; abasigazi nk’abatabani banu; ² abakazi abakuzire, nka banoko; abakili, nk’abahara banu, mu buyezi bwona.

³ Okuzega abafwerwe beba, abakutungwa kifwerw’eba. ⁴ Omufwerw’eba akaba ali n’abatabani hamo abezukuru, batandike kumanya ababo no kurongora abazere babo ebyo babakolere; kuba echo kikusemereza Mungu. ⁵ Nawe ayafwerw’ eba kimo, kai atali n’ababo, ogwo ayesigire Mungu, agume musana na mu kiro mw’ilembereza na mu sala. ⁶ Kuba akaba natura mu masemererwa, ogwo afwire, naho akulora. ⁷ Obezukize n’ebyo, baikare batali na ntambala. ⁸ Atakurabirira ababo, munomuno abo mu ka yabo, akayanga kwikiriza, kai akukirwa omusenzi. ⁹ Omufwerw’eba, ahiche kusorwa, abe ahikize emyaka makumi mukaga n’obusago, kai ayaswerwe omuseza omo wenka, ¹⁰ kandi entungwa ze nzima zibe zimanyikene: nko kulera kuzima abana, no kugira obwira, no kunaby’amaguru g’abatakatifu, n’entungwa zindi nzima nk’ezo zityo.

¹¹ Nawe abafwerwe beba bakili, otabasoraga, kuba entungwa zabo zinogire ka zikubehaho hali Kristu, bakwenda kusuba kuswerwa, ¹² nibagwa mu ntambala nibasingwa, kuba batambukire endagano zabo. ¹³ Kandi, babere balenga, bakumanyira kuturatura mu maka; kai tibalengahara chonka, nawe bakuromaroma n’akahirohiro, nibatenga ebitengene kutengwa. ¹⁴ Mbe hatyo nkwenda abafwerwe beba bakili basube kuswerwa, bazare abana, barabilire enzu yabo, batabonera abahate betu ensonga zo kutugambaho obubi. ¹⁵ Kuba abandi na hati babuzire, barube Sitani. ¹⁶ Raba omwikiriza ali n’abafwerwe beba mu babo, abahwere, batazitohera Eklezia, ehiche kusugana kuhwera abafwerwe beba kimo.

ABASASERDOTI.

¹⁷ Abasaserdoti abagerera kuzima bakuzibwe kabili, munomuno abakunaranara kusomesya no kwolekerera. ¹⁸ Kuba Enandiko zikugamba ziti: Otabohaga omunwa gw’ente ekuhura oburo; kandi ziti: Omukozi ahikire omuhero gwe. ¹⁹ Ka bakulega omusaserdoti, otabahulira, batali n’embona ibili hamo isatu. ²⁰ Abakuhena, obahane obusyo ya bona, abandi bona batine. ²¹ Nkukulembereza, obusyo ya Mungu na Yezu Kristu n’abamalaika abasozirwe, kuhicha ebyo, kai otakolaga kintu ha bw’emisihire z’omutima chonka hamo oli n’agandi mu mutima. ²² Otayehutaga kutereho emikono omuntu n’omo, kai otakoberaga ebiheno by’abandi. Iwe omwene, oyelindega mu buyezi.

²³ Oleke kunwa amenzi gonka, nawe onwega evini y’oluhungi, kuber’olufwo lwawe n’endwara zawe ningi.

²⁴ Baliho abantu abo ebiheno byabo bili ha bweru nibitanga elamu; kai abandi bakuhereruka kusokoka. ²⁵ Nikwo n’abandi, ebikorwa byabo bizima bili ha bweru; kai ebitali ha bweru tibikuhicha kwikara biserekire.

BESEBUGENI N’ABERU. — OBUNUNU. — ABAHANGO.

¹ Aberu bona abali mu nkomyo y’obwiru balenganisye besebugeni nk’abahikire ikuzo lyona, izina ly’Omukama n’ebigambo bya Mungu bitazumwa. ² Kai abali na besebugeni nibekiriza, batabagaya obwo bali batabani babo; nawe bakane kubakolera kuzima, kuba abakubagabira bali bekiriza, kai bendwa ba Mungu. Obolekerere ebyo, obahane.

³ Raba ondi nayolekerera ebindi, nayanga ebigambo bikomereze by’Omukama wetu Yezu Kristu n’obwolekerezi bw’edini, ⁴ ali mwekuza, tamanya syo, nawe ali n’endwara y’obuhakani, obukuzara ichubi n’enkungana n’obugeyi no kulamula chonka, ⁵ n’empaka z’abantu abali n’omwoyo guzunzire, nibaburwa ebikomereze nibalenganisya edini kuti henda eli no kubaletera ebintu. ⁶ Nawe hona edini ekugasa muno, okachulera n’ebyo oli nabyo.

⁷ Kuba titwalesire kintu mu nsi munu, kai kotokoto tituhicha kwihamo kintu tukagenda nacho. ⁸ Mbe raba tuli n’ebyo kulya n’ebyo kuzwara, tuchulere. ⁹ Kuba abakwegonga obuhango bakugwa mu kurozibwa, na mu mitego za Sitani, na mu bwegongi bwingi bwa busa n’obubihire, obutubiza abantu mu kusingarika no kubula. ¹⁰ Kuba obwenzi bw’empilya ni muzi gw’amabi gona; kai abandi ababusirirweyo bakanagisibwa kwikiriza, nibazongorwa obunale bwingi.

¹¹ Nawe iwe, muntu wa Mungu, noiruke ebyo, higaga obuhikire n’eby’edini no kwikiriza n’obwenzi n’obweguminsiriza n’obufura. ¹² Rwanaga oburwani buzima bwo kwikiriza; rwanira obulame obutahwaho, obwo wayeterweho n’obwo wamanyisize ha meso g’embona ningi. ¹³ Nkukulagira obusyo ya Mungu ekuloza byona n’eya Yezu Kristu, ayamanyisize obukomereza ata si obusyo ya Ponsiyo Pilato, ¹⁴ kugumya ebilagiro, nzira kabi na ntambala, kuhika kwiza kw’Omukama wetu Yezu Kristu, ¹⁵ alimanyisibwa mu mwanya gwingene Omuhicha nagumo w’omugisa, Omukama w’abakama n’Omukuru w’abakuru, ¹⁶ omutunga nagumo w’obutafwa, omutuzi wo mu mwanga ogutahikwa, atakabonwaga muntu n’atahicha kubonwa, kan’ekuzo n’obutware obutahwaho. Amina.

¹⁷ Lagiraga abahango bo mu nsi munu baleke kwekuza no kutaho kutegeza kwabo mu butunga bwo kutimatimya, nawe hali Mungu akulora, akutukanisiza byona tubisemererwe; ¹⁸ bakole kuzima, batunge ebikorwa bizima, bayanguhe kugabaho, bagabane n’abandi ebintu byabo, ¹⁹ basimbagirize ensabo yabo ha luhazu lugumire lwa nabucha, niho babone obulame bwa kimo.

²⁰ Iwe Timote, gumya ebyabikirwe hal’iwe, noiruke ebigambo bihya bya busa n’eby’obumanyi bw’obuzigi oburwana obukomereza; ²¹ abandi baburubire, kai nibaruga mu kwikiriza. Enema ebe n’ewe. Amina.