1 Ha BanaTesalonika

OMUGASO GW’OBWOLEKERERWA BWABO.

¹ Paulo na Silvani na Timote hali eklezia y’Abanatesalonika, eli muli Mungu Tata n’Omukama Yezu Kristu. ² Enema n’omulebo zibe mul’imwe. Tukusima Mungu bucha bucha kubera imwe mwena, nitubezuka naku zona mu sala zetu; ³ nitwizuka ha meso ga Mungu, Tata wetu, ebikorwa byo kwikiriza kwanu, n’emilimo z’obwenzi bwanu, n’obweguminsiriza bwo kutegeza kwanu mu Mukama wetu Yezu Kristu. ⁴ Tukumanya, bana betu abakwendwa Mungu, obusorwa bwanu, ⁵ kuba evanjeli yetu tiyabolekererwe n’ebigambo byonka, nawe n’amani, n’Omwoyo Mutakatifu, n’obukomereza bwona, kuba mukumanya nk’okwo twaliga tuli mul’imwe kubera imwe.

⁶ Kai imwe mwabere barubirizi betu n’ab’Omukama, nimuhabwa ekigambomu bunale bwingi n’amasemererwa g’Omwoyo Mutakatifu; ⁷ hatyo nimuba ndolero y’abekiriza bona ba Masedoniya n’Akaya. ⁸ Kuba ekigambo ch’Omukama kikaruga mul’imwe nikisugana mu Masedoniya n’Akaya, kandi kwikiriza kwanu muli Mungu nikumanyisibwa honahona, kai tituli no kugamba kintu, ⁹ kuba bonene nibo bakutugamba, nibamanyisya nk’okwo mwatwanankwile kuzima, n’okwo mwahindukire hali Mungu, nimwanga ebimungu, nimukolera Mungu wa kimo akulora, ¹⁰ nimulindirira Omwana we aruge mw’igulu, owe yazozile mu bafu, Yezu, ayatukirize mu biniga ebiliza.

EMITUNGIRWE ZA PAULO TESALONIKA.

¹ Kuba, bana betu, mukumanya imwe abene okwo tutezire busa chonka mul’imwe, ² nawe, ka twamazire kunaranara no kuzumwa Filipi, nk’okwo mukumanya, tukesigirira Mungu wetu nitubolekerera evanjeli ya Mungu mu mazongoko mengi. ³ Kuba obwolekerezi bwetu tibuli na buhabi, nali bulofu, nali buzigi; ⁴ nawe, obwo Mungu yatusozire kutusigira evanjeli, titutenga kusemereza abantu, nawe Mungu, akwetegereza emitima zetu. ⁵ Kuba titukafumoraga ebigambo byo kukongya, mukukimanya, kai akahendelero k’obununu tituli nako, Mungu akumanya; ⁶ kandi titwahigire ikuzo eliruga mu bantu, mul’imwe nali mu bandi.

⁷ Naho twakuhikize, obwo tuli ntumwa za Kristu, kulerwa imwe, twabere mul’imwe nk’abanamuto, nk’omwoncha nalera abana be. ⁸ Hatyo mu bwenzi bwetu twayendaga muno kubaha, evanjeli ya Mungu yonka pai, nawe n’omwoyo gwetu, kubayenda kwa muno. ⁹ Kuba, bana betu, mukwizuka emilimo zetu n’amahendeka getu; twakolaga musana na mu kiro, nitwolekerera evanjeli ya Mungu, tutazitohera n’omo mul’imwe. ¹⁰ Muli mbona, kai Mungu wena ni mbona y’emitungirwe zetu mul’imwe abekirize: tukatungwa kitakatifu, kihikire, nzira ntambala; ¹¹ kai mukumanya okwo twabakolere nk’ese akolera abana be, ¹² nitubahana, nitubahumuza, nitubalembereza kutungwa kihikire Mungu, ayabayetere obukama bwe n’ikuzo lye.

KWIKIRIZA KW’ABANATESTLONIKA.

¹³ Nicho n’etwe tutalekera kusimira Mungu obwanankuzi bwanu bw’ekigambo cha Mungu echo twabolekerere, obwo mutachanankwile nk’ekigambo ch’abantu, nawe, nk’okwo kili koto, nk’ekigambo cha Mungu, akukola mul’imwe abekirize. ¹⁴ Kuba, bana betu, mwabere barubirizi b’eklezia za Mungu ezili za Yezu Kristu mu Buyudeya, obwo imwe mwena mwanaranazibwe abakoberabusi banu, nk’okwo bonene banaranazibwe Abayahudi, ¹⁵ abesire Omukama Yezu n’abalagi, nibanaranaza n’etwe, nibabula kusemereza Mungu, nibaba bahate b’abantu bona; ¹⁶ nibatuzibira kugambira abasenzi ebigambo byo kubachungula, baizuze batyo naku zona olulengo lw’ebiheno byabo; kuba ebiniga bya Mungu byabahikire nibibaberaho koto.

¹⁷ Itwe, bana betu, obw’akanya karabireho kuruga tutagene engingo, emitima pai, tukarozya muno n’obwegongi bwingi kusuba kubabona. ¹⁸ Koto, tukayenda kwiza hal’imwe, munomuno ine Paulo kukiraho lugendo lumo; nawe Isitani lyatuzibire. ¹⁹ Kuba obutegeza bwetu, hamo obusemererwa bwetu, hamo ekilezu chetu ch’ikuzo kili kita? Si t’imwe obusyo y’Omukama wetu Yezu Kristu ha lunaku lwo kwiza kwe? ²⁰ Nikwo, n’imwe ikuzo lyetu n’obusemererwa bwetu.

PAULO NABATUMIRA TIMOTE.

¹ Nicho, kutamibwa kwa muno, ninikalira Ateni nenka, ² nintuma Timote, mutabani wetu n’omukuratizi wa Mungu mw’Evanjeli ya Kristu, kubagumya no kubahana ebyo kwikiriza kwanu, ³ mutakukwa obunale bunu: kuba mukumanya okwo nigw’omulimo gwetu. ⁴ Mbwenu, tukili owanu, twabalagiraga ebinaranazo ebyo ebyatugwere hati, nk’okwo mukumanya. ⁵ Mbe nikwo, kutamibwa kwa muno, namutumire kumanyirira kwikiriza kwanu, nintina ningira nti: hamo omurozya yabalorize, kai omulimo gwetu gukwiza kufwerwa busa.

⁶ Nawe Timote, ka yarugire owanu akeza kunu, natumanyisya kwikiriza kwanu n’obwenzi bwanu, n’okwo mukwikara kutwizuka no kwegonga kutubona, nk’okwo itwe tukwegonga kubabona; ⁷ hatyo, bana betu, twahumuzibwe kwikiriza kwanu, naho tuhahire nitunarananazibwa; ⁸ kuba hati twahimboka, obwo mukweguminsiriza mu Mukama. ⁹ Waza! tukusimira Mungu tuta obusemererwa obwo mwatubonere obusyo ya Mungu wetu? ¹⁰ Musana na mu kiro tukumusaba mani atuhe kubabona, tuhiche kumaliza ebilebire ha kwikiriza kwanu.

¹¹ Mungu omwene, Tata wetu, n’Omukama wetu Yezu Kristu batusagare hal’imwe. ¹² Kai imwe, Omukama abayongerere no kubakanisiza obwendani hal’imwe na ha bantu bona, nk’okwo obwetu buli hal’imwe; ¹³ agumye emitima zanu, azigire mbulakabi mu butakatifu, obusyo ya Mungu Tata wetu, ha lunaku olw’Omukama wetu Yezu Kristu aliza n’abatakatifu be bona. Amina.

EKILAGIRO CHO MUKAGA. — OBWENDANI. — KUZOKA.

¹ Mbwenu, bana betu, tukubasaba nitubalembereza mu Mukama Yezu kutungwa nk’okwo twabolekerere kutungwa no kusemereza Mungu, niho muhiche kukana kuz’obusyo. ² Kuba mukumanya ebilagiro ebyo nabahere ha bw’Omukama Yezu. ³ Mbe Mungu akwenda mube batakatifu nimuleke obusihani; ⁴ buli muntu mul’imwe amanye kulinda engingo zemu butakatifu na nw’ikuzo, ⁵ nawe mu bwegongi bwo kwoya kubi pai, nk’abasenzi abatakumanya Mungu; ⁶ kandi omuntu n’omo ataziga owezabo, akamuhenera, kuba Omukama akwehora ebyo byona, nk’okwo nabagambire olundi, nimbakomereza. ⁷ Kuba Mungu tiyatwetere obusihani, nawe obutakatifu. ⁸ Mbe akugaya ebilagiro ebyo, tagaya omuntu, nawe Mungu, ayateremo Omwoyo gwe Mutakatifu mul’itwe.

⁹ Ebyo kwendana, timuli no kubyandikirwa, obwo Mungu wenene yabolekerere ekilagiro echo. ¹⁰ Echo kai, mukukihicha ha batabani betu bona mu Masedoniya yona. Nawe, bana betu, nkubalembereza, hakili mukane kukola mutyo, ¹¹ nimwesinirize kuchulera kuzima no kwetegereza amagambo ganu no kukol’emilimo, nk’okwo twabalagire, muhiche kukolera kuzima abali hanza, mutaba no kusaba kintu mu bandi.

¹² Nawe, bana betu, titukwenda mubure kumanya eby’ abanagire, muleke kuzuba nk’abandi abatali na butegeza. ¹³ Kuba, raba nitwikiriza okwo Yezu akafwa nazoka, hona tuli no kwikiriza okwo Mungu alisagara na Yezu abanagire muli wenene. ¹⁴ Kuba mbibi ebyo tukubagambira ha bw’ekigambo ch’Omukama, nti: itwe abakulora, abasigirwe kwiza kw’Omukama, titulitanga abanagire. ¹⁵ Kuba Omukama wenene, ekabaho embaliriro y’ilaka ly’omumalaika mukuru n’ekikuli cha Mungu, alihanantukira mw’igulu, kai abalisangwa bafwire muli Kristu balitandika kuzoka. ¹⁶ Kumara itwe abakulora, abasigireho, tulisagarwa hamo nabo mu mere, tuze kubugangana na Kristu mu lutumba; kai hatyo tulikara bucha bucha n’Omukama. ¹⁷ Mbe muhumuzanye n’ebigambo ebyo.

TITUMANYA OLUNAKU LWO KULAMURWA.

¹ Bana betu, timuli no kwandikirwa eby’omwanya n’akatungu, ² kuba mukumanya kuzimazima okw’olunaku lw’Omukama luliza nk’omusuma mu kiro. ³ Kuba olwo baligamba bati: Omulebo n’obuhoro, kachwi n’ako balipampukizibwa isingarika, nk’obusungu bw’omukazi ali n’enda, kai tibalikira. ⁴ Nawe imwe, bana betu, timuli mu mwirima, olunaku olwo lukabapampukiza nk’omusuma; ⁵ kuba mwena muli bana b’omwanga n’abana b’omusana: tituli bana b’ekiro nali b’omwirima. ⁶ Mbe tutanagira nk’abandi, nawe tukesy’ obwire, tuleke kusagiriza. ⁷ Kuba abakunagira, banagira mu kiro; n’abakutamira, batamira mu kiro. ⁸ Nawe itwe abali b’omusana, tuleke kutamira, tuzware ebizwaro byo kwikiriza no kwenda, n’engofwira yo kutegeza obuchunguki; ⁹ Kuba Mungu tiyatwetere ebiniga, nawe obuchunguki ha bw’Omukama wetu Yezu Kristu, ¹⁰ ayatufwerere, niho, naho tukilora naho tunagire, tuture hamo nage. ¹¹ Mbe hatyo mugume kuhumuzanya no kugumyanya, nk’okwo mukukola na hati.

KUKOLERA KUZIMA ABAKURU B’EDINI. — KUHANANA NO KUKIZANYA.

¹² Bana betu, tukubasaba kukuza no kutina abakukol’ emilimo za Mungu mul’imwe, nibabagerera ha bw’Omukama, nibabahana; ¹³ nimubayende muno kuber’omulimo gwabo; nimuture mu mulebo nabo.

¹⁴ Bana betu, tukubasaba kuhana abakutungwa kubi, no kuhumuza abafwir’omutima, no kugumya abanogire, no kweguminsiriza na bona. ¹⁵ Mulore hatabaho n’omo wo kukolera kubi abamukolera kubi; nawe mukolerane kuzima bucha bucha, kai bona. ¹⁶ Musemererwe bucha bucha. ¹⁷ Mulembereze obutalekera. ¹⁸ Musime muli byona; echo nicho Mungu abayendera mwena muli Yezu Kristu. ¹⁹ Mutalazya Omwoyo. ²⁰ Mutagaya obulagi; ²¹ nawe mwetegereze byona, kai mugumye ekili kizima. ²² Muleke buli kibi chona.

²³ Mungu wenene kana mulebo abatakatifuze muli byona, niho obwenge bwanu bwona, omwoyo gwanu n’engingo zanu zihike ha kwiza kw’Omukama wetu Yezu Kristu zitali na ntambala. ²⁴ Ayabesire ali mwesigwa: niwe wenene alikola ebyo.

²⁵ Bana betu, mutusabire. ²⁶ Mubwache abatabani betu bona n’omunwegero mutakatifu. ²⁷ Nkubalembereza ha bw’Omukama, mugire ebaruwa enu esomerwe abatabani betu batakatifu bona. ²⁸ Enema y’Omukama wetu Yezu Kristu ebe n’emwe. Amina.