1 Petro

KUSIMIRA ENGABIRANO YO KWIKIRIZA.

¹ Petro, entumwa ya Yezu Kristu, ha basozirwe bageni n’abasambere mu Ponti, na mu Galasya, na mu Kapadosya, na mw’Azya, na mu Bitinya, ² abasozirwe ha bw’obumanyi bw’era lyona bwa Mungu Tata, batakatifuzibwe Omwoyo, bahulire kwikiriza, kai banabibwe ensagama ya Yezu Kristu. Enema n’omulebo zibakanire.

³ Akuzibwe Mungu n’Ise Omukama wetu Yezu Kristu, ayatuzere lwa kabili kuber’ekisa che kingi, mu buzozi mu bafu bwa Yezu Kristu, atuhe obutegeza bwingi, ⁴ n’omuhungulo ogutakuhicha kuzunda no kurofuhara no kunyankabara, ogubikirwe itwe mw’igulu, ⁵ imwe abalinzirwe obuhicha bwa Mungu mu kwikiriza, mubone obuchunguki, obuliboneka ha lunaku olulihereruka. ⁶ Echo kili no kubaha kuhirahirwa, naho hati muli no kuzubibwa oburozibwa bw’enganda n’enganda mu mwanya muke, ⁷ niho kwikiriza kwanu, okwamanyisibwe kutyo, kukire ezahabu, (ekurozibwa mu muliro), kai kubaletere isima n’ikuzo n’ikumucho, Yezu Kristu k’aliboneka, ⁸ owe mukwenda, naho mutamubwene, n’owe mukwikiriza hati mutamubwene; echo kikubaletera obusemererwa bw’ikuzo obutagambwa, ⁹ n’omuhero gwo kwikiriza kwanu, nibw’obuchunguki bw’emyoyo zanu. ¹⁰ Obuchunguki obwo bukahigwa no kwetegerezibwa abalagi, abalagire enema eyaliga eli no kuba yanu; ¹¹ baliga nibahiga kumanya emyanya n’enaku ezamanyisibwaga Omwoyo gwa Kristu, ogwalagaga obusasi bwa Yezu Kristu n’ikuzo elyaliga lili no kuburuba. ¹² Bakasururirwa okwo baliga bali bagabi, kubera bonene pai, nawe kubera imwe, b’amagambo g’evanjeli ago mwayolekererwe hati ha bw’Omwoyo Mutakatifu, ayarugire mw’igulu, n’ago bamalaika bakwegonga kusombokerwa.

ABAKRISTU BATUNGWE KUZIMA.

¹³ Mbe hatyo musumike ebitekateko byanu, mulengerere, mute obutegeza bwanu bwona mu nema egyo mulihabwa, Yezu Kristu k’aliboneka; ¹⁴ nk’abana bahulizi, mutaruba obwoyi bubi bwanu bwa kara, mukisiruhere, ¹⁵ nawe mube batakatifu, nk’okw’omwesi wanu ali mutakatifu; ¹⁶ kuba chandikirwe kiti: Muliba batakatifu, kuba ine ndi mutakatifu. ¹⁷ Kandi, obwo mukulembereza nk’Eso wanu, omulamuzi atasorora muntu, nawe nalamula buli muntu wena ha bw’ebikorwa bye, mutungwe kitini mu naku z’obulibasi bwanu, ¹⁸ mumanyire okwo mutakuchunguzibwa ebikuzunda, nk’ezahabu hamo efweza, mu mitungirwe ezarugire mu masigirane ga beswenkuru, ¹⁹ nawe ensagama y’obuguzi obutalengwa ya Kristu, ali nk’akanabalega kayezire, nzira ntambala, ²⁰ ayasozirwe, ensi etakahangirwe, n’ayamanyisibwe mu naku zo kuhereruka kubera imwe, ²¹ abakwikiriza Mungu muli wenene, owe Mungu yazozile mu bafu, namuha ikuzo, niho mute hali Mungu kwikiriza no kutegeza kwanu.

²² Muyeze emyoyo zanu mu buhulizi bw’obwenzi na mu bwendani; mugume kwendana bucha bucha mu mitima zanu; ²³ kuba timwazerwe lwa kabili, nk’embibo ekuzunda, nawe nk’embibo etakuzunda: nich’ekigambo cha Mungu, asingire natura obutahwa n’obutahwa. ²⁴ Kuba engingo zona zili nk’inansi, kai ikuzo lyazo lili nk’obwasyo bw’inansi: inansi ka likuyoma, obwasyo bwalyo bwahunguruka, ²⁵ nawe ekigambo ch’Omukama kikwikaraho obutahwa n’obutahwa.

IHANGA LISOZIRWE.

¹ Mbe, mwamazire kuzula buli bubi bwona, buli bukeruke bwona, buli butebatebya bwona, bul’ ichubi lyona, buli bugeyi bwona, ² nk’abana abakumara kuzarwa, mwegonge muno amata g’ekinamwoyo agayezire, gabakulize obuchunguki, ³ kunu mukaba mwarolize okw’Omukama ali mufura. ⁴ Mwirire hehi na wenene, ibale elikulora, elyangirwe abantu, nawe elisozirwe n’elikuzibwe Mungu. ⁵ Kai imwe, nk’amabale agakulora, mutebweho oluguru ya wenene, mube enzu y’ekinamwoyo n’obusaserdoti butakatifu, obukuhereza ebitambo by’ekinamwoyo ebikusemereza Mungu ha bwa Yezu Kristu.

⁶ Nicho kigambirirwe mu Nandiko kiti: Lora natamo muli Sioni ibale ly’ekisago lisozirwe n’ely’obuguzi bwingi; kai akulyesigirira, talikorw’ensoni. ⁷ Mbe hatyo likubaletera ikuzo, imwe abakwikiriza; nawe abatakwikiriza, ibale elyangirwe abombeki lyababere omutwe gw’ekisago, ⁸ n’ibale lyo kusitaza, n’ibale lyo kugwisya, bonene abasitasibwa ekigambon’abatakwikiriza: nigw’omugabo gwabo.

⁹ Nawe imwe, muli luganda lusozirwe, obusaserdoti bw’ekikama, ihanga itakatifu elinyagirwe, lyo kumanyisya obukuru bw’ayabehiremo mu mwirima, nabaleta ha musana gwe gwo kukumisya, ¹⁰ imwe abaliga mutali ihanga kara, nawe abali hati ihanga lya Mungu; imwe abaliga mutabwene ekisa, nawe abakibwene hati.

ENTUNGWA Z’IHANGA ELYO. — KUHULIRA ABAKURU.

¹¹ Bendwa bange, nkubalembereza, obwo muli bageni na balibasi, mwiruke obwegongi bw’engingo obukurwana omwoyo. ¹² Nimutungwe kuzima ha meso g’abasenzi, baleke kubabehereza, kuti henda muli babi, nawe babone entungwa zanu nzima, niho bakuze Mungu, olwo alibasuriramo.

¹³ Mbe muhulirega buli muntu kubera Mungu: naho ali mukama, naho ali mukuru, ¹⁴ naho ali mugerezi w’ensi, kuti henda batumirwe wenene kunaranaza abakukola kubi no kusima abazima. ¹⁵ Kuba Mungu akwenda mukole kuzima, kai mutyo musiche abantu basiru abatakumanya; ¹⁶ obwo muli n’olubuga, mutasereka obubi bwanu nk’efwo y’ekiswecho, nawe mukolere Mungu kuzima. ¹⁷ Nimuhe abantu bona isima lyabo, nimwende abatabani banu, nimutime Mungu, nimukuze omukama. ¹⁸ Imwe abakozi b’emilimo, muhulire nimutine besobugeni, abafura n’abasasizi bonka pai, nawe n’abasazi.

YEZU KRISTU, ENDOLERO Y’OBWEGUMINSIRIZA.

¹⁹ Kuba kwemera enaku no kusaswa ebitahikire kubera Mungu ni mugisa. ²⁰ Mbwenu mukwekuliza ki kwemera kuterwa, mwagizire entambala? Nawe, mwakozire kuzima, mukasaswa n’obweguminsiriza, hatyo nigw’omugisa ha meso ga Mungu. ²¹ Kuba echo nicho mwayeterwe, obwo Kristu wena yatunaranalire, natusigira endolero, niho tumurubireho. ²² Wenene tiyakozire ekiheno, kai tiyabwenwe n’obuzigi mu kanwa ke; ²³ ka yazumirwe, tiyazumire; ka bamunalize, tiyafumwere ebigambo byo kutinisya, nawe akehereza h’ayamulamwire kubi; ²⁴ akategula ebiheno byetu mu ngingo ze h’eti, niho, twamazire kwefwera mu kiheno, tutungirwe obuhikire; tukakizibwa ebibwa bye. ²⁵ Kuba mwaliga muli nk’enabalega ezikuyengera; nawe hati mwasubire ha mulisya na ha mwepiskopiw’emyoyo zanu.

ABAKAZI NA BEBA. — KWENDANA NO KUKOLERANA KUZIMA.

¹ Imwe mwena abakazi, muhulirega abaseza banu, bakechura abandi batekirize ekigambo, bahindurwe entungwa z’abakazi babo, nzira bigambo, ² ka balibona entungwa zanu z’obuyezi n’obutini. ³ Ebisugulicho byanu bitaha bya ha bweru, mu busyongi bw’isoke na mu bizwaro by’ezahabu, hamo mu myenda zyorobire, ⁴ nawe bibe byo mu mutima, mu buyezi obutazunda bw’omwoyo mufura n’omutekani, oguli gw’obuguzi bwingi ha meso ga Mungu. ⁵ Kuba kara abakazi batakatifu, abategezaga Mungu, baliga nibeligirika batyo, bali bahulizi ba beba: ⁶ nka Sara, ayahuliraga Ibrahimu namwetaga ati: mukama wange; mwabere bahara be, ka mukukola kuzima, nzira kuhahibwa obutini bwona.

⁷ Imwe mwena baseza, muture n’abakazi banu mwetegereze, mubakolerega kuzima nimubaha isima lyabo, obwo bali b’olumesero lunogire, n’obwo bona bali nk’emwe, bahunguzi b’enema y’obulame, niho esala zanu zitagira ekizibiro. ⁸ Kuhereruka, mube b’omutima gumo nk’ab’end’emo, basasizi, b’ekisa, bafura, bekehya. ⁹ Mutakoleraga kubi abakubakolera kubi, mutazumaga abakubazuma; nawe muhe omugisa, kuba nicho mwayeterwe, niho muhabwe omugisa nk’omuhungulo. ¹⁰ Kuba omuntu raba nayenda kusemererwa obulame no kubona enaku zo kusemererwa, azibire olulimi lwe kutenga amabi, n’omunwa gwe kubeha; ¹¹ airuke obubi, akole kuzima; ahige omulebo, agurube; ¹² kuba ameso g’Omukama gali ha bazima, kai amatwi ge gahulira esala zabo; nawe obusyo bw’Omukama bukaniza abakukola kubi.

ABAKUNARANARA BALI N’OMUGISA. — BATISIMU.

¹³ Kai ni ga akuhicha kubanazya, mukatah’olutwi lwanu mu ntungwa nzima? ¹⁴ Nawe muli n’omugisa, naho mukanaranalira obuhikire. Mutabatina, nimuleke kuhaha. ¹⁵ Mukuze Omukama Yezu Kristu mu mitima zanu, mwetegekire bucha bucha chekingiriza kusubiramo buli muntu wena alibabuzya eby’obutegeza bwanu, ¹⁶ nawe n’obufura n’obukuza, omutima guli muzima, niho abababeherera entungwa zanu nzima muli Kristu bakozibw’ensoni obubehereza bwabo. ¹⁷ Kuba ni kuzima muno kunaranalira entungwa nzima, Mungu akayenda, kukira kunaranalira entungwa mbi. ¹⁸ Kuba Kristu akafwera ebiheno byetu lugendo lumo: wenene omuzima nafwera ababi, ahiche kutuhereza hali Mungu, twefwerere mu ngingo, nawe tuhimbokire mu mwoyo. ¹⁹ Kandi omwoyo gwe nigugenda kwolekerera mw’iboheroemyoyo, ²⁰ ezaliga zayangire kwikiriza kara mu naku za Noe, nizitegezaga obweguminsiriza bwa Mungu, ka bachumaga obwato, obwatahirwemo abantu bake, munana bonka, abakizibwe mu menzi.

²¹ Echo chaliga kili kimanyisyo cha Batisimu, ekuchungula hati, n’obuyeza bw’obulofu bw’engingo pai, nawe n’endagano hali Mungu zo kwikara n’omutima muzima, ha bwo kuzoka kwa Yezu Kristu. ²² Wenene, ka yasingarikize olufu, atugire bahunguzi b’obulame obutahwaho, nagenda mw’igulu, naikara ha bulyo bwa Mungu, aho bamalaika n’ab’obukuru n’ab’obuhicha batwarwa wenene.

ABAKRISTU BANUGE EBIHENO BYA KARA.

¹ Mbe hatyo, obwo Kristu yasasibwe mu ngingo ze, imwe mwena, mugumye ekitekateko kinu: ayasasibwe mu ngingo ze, yanugire ebiheno, ² niho atatungirwa obwegongi bw’abantu, nawe kwenda kwa Mungu, mu mwanya gwona ogwamusagire kutura mu ngingo ze. ³ Nkuchwa nti: mwahicha, obwo kara mwatungwaga nk’abasenzi, nimurubaga eby’obusihani, n’eby’obwoyi bubi, n’eby’obutamizi, nimusagiriza mw’ilya na mw’inwa, nimukolera buyagayaga ebimungu. ⁴ Mbe hati bakukuma obwo mutakiruba eby’obuyaga ebyo, kai bakubazuma. ⁵ Balibitonda hali onu ali hehi no kulamura abazima n’abalafwire. ⁶ Kuba nicho evanjeli yayolekerererwe n’abalafwire, batungwe ha bwa Mungu mu mwoyo, bamazire kulamurwa ha bw’abantu mu ngingo. ⁷ Omuhero gwa byona guli hehi. Mbe mwekenge nimukesy’obwire mw’ilembereza.

⁸ Nawe munomuno mugume kwendana, kuba obwendani bukusweka ebiheno bingi. ⁹ Mugirane obwira, nzira kurunduma. ¹⁰ Buli muntu wena ahwere abandi, mu lulengo lw’omugabo ogwo yaherwe, nk’abagabi bazima b’enema y’enganda ningi. ¹¹ Omufumozi afumorega kuti ebigambo bya Mungu; omukozi w’emilimo za Mungu azikolega kuti henda nahabwa amani hali Mungu, niho akuzibwe muli byona, ha bwa Yezu Kristu, kana ikuzo n’obukuru mu myaka z’emyaka. Amina.

ABAKRISTU BALI NO KUNARANALIRA OBUKRISTU BWABO.

¹² Bendwa bange, mutakumisibwa omuliro gwo kurozibwa, kuti henda mwagwerwa ekintu kihya; ¹³ nawe musemererwe kukobera obusasi bwa Kristu, muhiche kubona obusemererwa n’omuzaho, ikuzo lye ka lilaboneka. ¹⁴ Raba nimuzumwa kuber’ezina lya Kristu, muli n’omugisa, kuba isima n’ikuzo n’obuhicha bwa Mungu, hamo n’Omwoyo gwa Mungu, bitura mul’imwe. ¹⁵ Nawe omuntu mul’imwe atanalira obwisi, hamo obusuma, hamo obubi bundi, hamo ichubi ly’ebintu by’abandi. ¹⁶ Nawe omukristu akunaranalira obukristu bwe, aleke kukorw’ensoni, nawe akuze Mungu kuber’ezina elyo. ¹⁷ Kuba akatungu kahikire ako Mungu akutandikiraho kulamula enzu ye. Kai akatandikira itwe, omuhero gw’abatakwikiriza Evanjeli ya Mungu gukuba guta? ¹⁸ Hatyo omuzima akanaranara kuchunguka, kai omubi n’omuheni bakuba bata? ¹⁹ Mbe abakunaranalira kwenda kwa Mungu bahereze emyoyo zabo ha Muhangi mwesigwa, nibagume kukola kuzima.

OMULIMO GW’ABAKURU B’EDINI. — KWEKEHYA.

¹ Mbe nkulembereza abagurusi mul’ imwe, ine ali mugurusi nka bonene n’embona y’obusasi bwa Kristu, ine aligabirwa ikuzo elyo elibonekera mu naku z’obusyo, nti: ² Mulisye ekihyo cha Mungu echabasigirwe, nimukilinde, manimani pai, nawe omutima guliho, ha bwa Mungu; kuber’ omugaso gw’ensoni pai, nawe kuber’obwegabi; ³ mutatwaza mani omuhungulo gw’Omukama, nawe mube endolero y’ekihyo mu mutima. ⁴ Kai omukuru w’abalisya k’aliboneka, mulibona engata y’ikuzo etakuzunda.

⁵ Kai imwe mwena basigazi, muhulire abagurusi. Mwena musindikane kwekehya, kuba Mungu akurwana abakwekuza, nagabira abakwekehya enema. ⁶ Mbe mwekehye ifwo y’omukono gw’amani gwa Mungu, niho abakuze mu mwanya gwo kusura kwe; ⁷ nimuleke wenene kuhahibwa ebyo mukenire, kuba niwe wenene akubabalirira.

⁸ Nimulengerere, nimwekenge, kuba omuhate wanu, isitani, ali nk’entale nezumira, nebezonga, nehiga owe elakaya. ⁹ Nimumurwane, mugume mu kwikiriza, mumanyire okw’abatabani banu bo mu nsi bakunaranara batyo. ¹⁰ Mungu w’enema zona, ayabetere ikuzo elitahwaho muli Yezu Kristu, alibatakatifuza, alibagumya, alibahigahaza, ka mulamara kunaranara mwanya muke. ¹¹ Ikuzo n’engoma bibe hali wenene mu myaka z’emyaka. Amina.

¹² Nkuchwa nti: nkabayandikira ebigambo bike na Silvani, mutabani wetu mwesigwa, nimbahana nimbakomereza, nti: enema egyo ya Mungu, eyo murubire, ni ya kimo. ¹³ Eklezia esozirwe nk’emwe, eli Babiloni, ekubabwacha, hamo n’omwana wange Marko. ¹⁴ Mubwachanye n’omunwegero mutakatifu. Enema ebe n’emwe mwena, abali muli Yezu Kristu. Amina.