1 Yohana

YOHANA AKUGAMBA EBYO YABWENE. — MUNGU NI MWANGA.

¹ Tukubamanyisya ekigambo ch’obulame, echaliga kili ha butandikiro, echo twahulire, echo twabwene n’ameso getu, echo twetegereze n’echo twakwasize emikono zetu, ² kuba obulame bukaboneka, kai tukabubona: tuli mbona nitubamanyisya obulame obutahwaho obwaliga buli hali Tata, nibutubonekera; ³ echo twabwene n’echo twahulire tukukibamanyisya, niho imwe mwena mukobere n’etwe, n’obukobe bwetu bube na Tata n’Omwana we Yezu Kristu. ⁴ Kandi tukubayandikira ebyo, musemererwe, kai obusemererwa bwanu bube buhikire.

⁵ Mbe ebyo twahulire hali wenene n’ebyo tukubamanyisya ni binu: Mungu ni mwanga, kai omwirima tigulimo muli wenene. ⁶ Tukagamba tuti: Tukobere nage, kai kunu tukalibata mu mwirima, tukubeha, kai titukuhicha obukomereza. ⁷ Nawe tukaba nitulibata ha musana, nk’okwo wenene ali ha musana, tukukoberana, kai ensagama ya Yezu Kristu Omwana we ekutuyeliza ebiheno byona. ⁸ Tukagamba tuti: Tituli n’ekiheno, tukweziga itwe abene, kai obukomereza tibuli mul’ itwe. ⁹ Raba nitwegamba ebiheno byetu, obwo Mungu ali mwesigwa, kai muhikire, alibitukiza, natuyeza obubi bwona. ¹⁰ Raba nitugamba tuti: Tituli n’ekiheno, tukumugira mubehi, kai ekigambo che tikili mul’itwe.

YEZU OMUTWEREZI WETU. — EKILAGIRO KIHYA: KWENDANA.

¹ Twana twange, nkubayandikira ebyo, muleke kuhena; nawe, omuntu yahenire, tuli n’omutwerezi hali Tata, niwe Yezu Kristu omuhikire. ² Niwe wenene omulihi w’ebiheno byetu, kai ebyetu byonka pai, nawe n’eby’ensi yona. ³ Lora, ekikumanyisya okwo tumumanyire ni kinu: kuhich’ebilagiro bye. ⁴ Akugamba ati: Nkumumanya, kai kunu atakuhich’ebilagiro bye, ogwo ni mubehi, kai obukomereza tibuli muli wenene. ⁵ Nawe omuntu akahicha ekigambo che, obwenzi bwa Mungu buhikire koto muli wenene; kandi echo nicho kikutumanyisya okwo tuli muli wenene. ⁶ Akugamba ati: Ntwire muli wenene, alagirwe kulibata nka wenene.

⁷ Bendwa bange, tinkubayandikira ekilagiro kihya, nawe ekilagiro cha kara, echo muli nacho kuruga ha butandikiro; ekilagiro echo cha kara nich’ekigambo echo mwahulire. ⁸ Nawe ha lubazu ni kilagiro kihya echo nkubayandikira; echo kikuhika muli wenene na mul’imwe, kuba omwirima gwahwereho, kai omusana gwa kimo gukwaka na hati. ⁹ Akugamba ati: Ndi ha musana, kunu nahata mutabani wabo, ogwo ali mu mwirima kuhika hati. ¹⁰ Akwenda mutabani wabo, atura ha musana, kai tali n’ensonga zo kugwa. ¹¹ Nawe omuhasi wa mutabani wabo ali mu mwirima, nalibatira mu mwirima, kai takumanya aho akuza, kuba omwirima gukahumya ameso ge.

¹² Nkubayandikira, twana twange, kuba ebiheno byanu byakizibwa mw’izina lye. ¹³ Nkubayandikira, batata, kuba mwamanyire ayaliga ali kuruga ha butandikiro. Nkubayandikira, basigazi, kuba mwasingire omubi. ¹⁴ Nkubayandikira, banamuto, kuba mwamanyire Tata. Nkubayandikira, basigazi, kuba muli n’amani, no kuba ekigambo cha Mungu kitura mul’ imwe, no kuba mwasingire omubi.

EBY’ENSI. — BAKIRWANAKRISTU.

¹⁵ Mutayendaga ensin’ebili mu nsi. Omwenzi w’ensi tali n’obwenzi bwa Tata, ¹⁶ kuba byona ebili mu nsi ni bwoyi bw’engingo, n’obwegongi bw’ameso, n’obwekuza bw’ebintu; kai ebyo tibiruga hali Tata, nawe mu nsi. ¹⁷ Mbe ensi ekurabaho hamo n’obwoyi bubi bwayo; nawe akukola ebyo Mungu akwenda akutulaho obutalekera.

¹⁸ Twana twange, ni katungu ko kuhereruka; kai obwo mwahulira nibagira bati: Kirwanakristu ali no kwiza, na hati bakirwanakristu bali bengi; nich’echo kikutumanyisya akatungu ko kuhereruka. ¹⁹ Barugire mul’itwe, nawe baliga batali betu; kuba, bakiba bali betu, bakubere mul’itwe; nawe barugireho, abantu bamanye okwo batali betu bona.

²⁰ Nawe imwe, mukasigwa Omwoyo, kai mukumanya byona. ²¹ Tinabayandikire kuti henda mutakumanya ebikomereze, nawe nk’abakubimanya n’abakusomkokerwa okwo hataliho obubehi obukuruga mu bukomereza. ²² Omubehi ni ga, atali onu akwanga ati: Yezu ti Kristu? Ogwo niwe kirwanakristu, akwanga Tata n’Omwana. ²³ Akwanga Omwana, takumanya na Tata; akwikiriza Omwana, akumanya na Tata. ²⁴ Nawe imwe, mugire ebyo mwahulire kuruga ha butandikiro biture mul’imwe. Ebyo mwahulire kuruga ha butandikiro bikatura mul’imwe, imwe mwena mulitura mu Mwana na Tata. ²⁵ Ngugwo omulago ogwo yatulagirire: obulame obutahwaho. ²⁶ Nabayandikire ebyo, ningamba abakubakongya.

²⁷ Imwe obusigwa obwo mwaherwe wenene butura mul’ imwe; kai timuli no kwolekererwa omuntu n’omo; nawe, obw’ obusigi bwebukubolekerera byona, n’obwo buli bwa kimo, butali bw’obubehi, muture muli wenene, nk’okwo bwabolekerere. ²⁸ Mbe hati, twana twange, muture muli wenene, tuhiche kuba n’obwesige, k’aliboneka, tutakorw’ensoni hara nage, k’aliza. ²⁹ Raba nimumanya okw’ahikire, nimumanye na kinu: buli muntu wena akutungirwa obuhikire, azerwe wenene.

ABANA BA MUNGU N’ABANA BA SITANI.

¹ Mulore okwo Tata yatwenzire, tuhiche kwetwa bana ba Mungu, no kuba bana be kimo. Ensi tekutumanya, kuba tiyamumanyire. ² Bendwa bange, tuli na hati bana ba Mungu, kai echo tuliba tikikasokokire. Tukumanya okwo, ka kilisokoka, tulisusana nage, kuba tulimubona nk’okw’ ali. ³ Kai buli muntu akumutegeza atyo, akwetakatifuza, nk’okwo wenene ali mutakatifu. ⁴ Buli muheni akuhenera ekilagiro: kuhena nikwo kuhenera ekilagiro. ⁵ Mukumanya okwo Yezu yabonekere atali n’ekiheno, niho aiheho ebiheno byetu. ⁶ Buli muntu wena akutura muli wenene, tahena; kai buli muheni wena tamubwene, tamumanyire.

⁷ Twana twange, mutazigwa muntu. Akutungwa ebihikire, ahikire nka wenene. ⁸ Akukola ekiheno ali mwana wa Sitani, kuba Sitani likuhena kuruga ha butandikiro. Omwana wa Mungu akabonekerera kinu: asingariche ebikorwa bya Sitani. ⁹ Buli muntu azerwe Mungu, takukola ekiheno, kuba embibo ya Mungu etwire muli wenene; kai takuhicha kuhena, kuba akazarwa Mungu. ¹⁰ Tukusoramo abana ba Mungu n’abana ba Sitani hali kinu: atahikire taruga hali Mungu, n’atakwenda mutabani wabo wena pai. ¹¹ Kuba ebyo mwagambirwe nimubihulira kuruga ha butandikiro ni binu: nimwendane. ¹² Mutakola nka Kaini, ayaliga ali wa Sitani, naita mutabani wabo. Kai akamwitira ki? Kuba ebikorwa bye byaliga bibihire, nawe ebya mutabani wabo bisemere. ¹³ Mutakumaga, bana betu, ka mukuhatwa ensi.

OBWENDANI.

¹⁴ Itwe tukumanya okwo twarugire mu lufu, nituhika mu bulame, kuba tukwenda batabani betu. Atali n’obwenzi akwikara mu lufu. ¹⁵ Buli muntu wena akuhata mutabani wabo, ni mwisi; kai mukumanya okw’omwisi takwikara n’obulame obutahwaho muli wenene. ¹⁶ Tukumanyira obwenzi bwa Mungu hali kinu: akahereza omwoyo gwe kubera itwe; kai itwe twena tulagirwe kuhereza omwoyo gwetu kubera batabani betu. ¹⁷ Omuntu ali n’ebintu byo mu nsi, akabona mutabani wabo akenire, akabura kumusasira, obwenzi bwa Mungu bukutura buta muli wenene? ¹⁸ Twana twange, tutayendana n’ebigambo n’olulimi byonka, nawe n’ebikorwa na mu bukomereza. ¹⁹ Muly’ebyo tulimanyira okwo tuli bana b’obukomereza, nituhumuzya emitima zetu obusyo ya Mungu; ²⁰ kuba omutima gwetu gukatusinga, Mungu akukira omutima gwetu, kai akumanya byona. ²¹ Bendwa bange, omutima gwetu gukabura kutusinga, tuli n’obwesige obusyo ya Mungu; ²² kai byona ebyo tulisaba, alibituha, kuba tukuhich’ebilagiro bye, nitukola ebikumusemereza.

²³ Nkiki ekilagiro che: twikirize mw’izina ly’Omwana we Yezu Kristu, nitwendane, nk’okwo yatulagire. ²⁴ Akuhich’ ebilagiro, akutura muli wenene, kai Mungu wena akutura muli wenene; kandi Omwoyo ogwo yatuhere niwe akutumanyisya okw’atura mul’itwe.

KUMANYA EMYOYO. — OBWENZI BWA MUNGU.

¹ Bendwa bange, mutekiriza buli mwoyo gwona, nawe murozye emyoyo, muhiche kumanya okwo ziruga hali Mungu; kuba abalagi b’obubehi bengi bezire mu nsi. ² Ngigi embaliriro yo kumanya omwoyo ogukuruga hali Mungu: buli mwoyo gwona ogukwikiriza okwo Yezu Kristu yezire mu ngingo, ogwo gukuruga hali Mungu; ³ kai buli mwoyo gwona ogutakwikiriza Yezu, ogwo tiguruga hali Mungu; kai niwe kirwanakristu, owe bagambaga bati: Akwiza; kai na hati ali mu nsi.

⁴ Imwe, twana twange, abarugire hali Mungu, mwamusingire, kuba Mungu, akutula mul’imwe, akizire akutura mu nsi. ⁵ Bonene bali b’ensi; nicho bafumorera ha bw’ensi, kai ensi ekubahulira. ⁶ Itwe tuli ba Mungu. Akumanya Mungu, yatuhulira; atali wa Mungu, tatuhulira. Muly’ebyo tukumanyira omwoyo gw’obukomereza n’omwoyo gw’obuhabi.

⁷ Bendwa bange, twendane, kuba obwendani bukuruga hali Mungu; kai buli mwenzi wena azerwe Mungu, namumanya. ⁸ Atali n’obwenzi, takumanya Mungu, kuba Mungu ni bwenzi. ⁹ Obwenzi bwa Mungu bukabonekera mul’itwe hali kinu: Mungu akatuma Omwana we nagumo mu nsi, niho tulame muli wenene. ¹⁰ Obwenzi buli muli kinu: t’itwe abayenzire Mungu, nawe ayatandikire kutwenda ni wenene, obwo yatumire Omwana we, abe kitambo ch’obutwerezi bw’ebiheno byetu. ¹¹ Bendwa bange, obwo Mungu yatwenzire atyo, itwe twena tulagirwe kwendana.

¹² Taliho ayabwene Mungu. Tukaba nitwendana, Mungu akutura mul’itwe, kai obwenzi bwe buhikire mul’itwe. ¹³ Tukumanyira okwo tukutura muli wenene, na wenene mul’ itwe, hali kinu: akatuha kukobera Omwoyo gwe. ¹⁴ Kai itwe tukabona, kandi tukumanyisya okwo Tata yatumire Omwana we, abe Muchunguzi w’ensi. ¹⁵ Buli muntu wena alikiriza okwo Yezu ali Mwana wa Mungu, Mungu yatura muli wenene, na wenene muli Mungu. ¹⁶ Kai itwe tukamanya nitwikiriza obwenzi obwo Mungu ali nabwo hal’itwe. Mungu ni bwenzi, kai omuntu akutura mu bwenzi, akutura muli Mungu, kai Mungu muli wenene. ¹⁷ Obuhikire bw’obwenzi bwetu bwa Mungu buli muli kinu: kuba mu nsi nk’okwo Yezu yaliga ali, niho tube n’obwesige ha lunaku lwo kulamurwa. ¹⁸ Obutini tibuli mu bwenzi, nawe obwenzi buhikire bukwirucha obutini, kuba obutini bukugendanwa n’obusasi, kai omutini tali n’obwenzi buhikire.

¹⁹ Mbe itwe, twende Mungu, obwo Mungu yatandikire kutwenda. ²⁰ Omuntu akagamba ati: Nkwenda Mungu, kunu nahata mutabani wabo, ni mubehi. Kuba atakwenda mutabani wabo owe akubona, akuhicha ata kwenda Mungu owe atabona? ²¹ Yee, ekilagiro echo twaherwe Mungu ni kinu: Akwenda Mungu, alagirwe no kwenda mutabani wabo.

KWENDA MUNGU KOTO NI KUHICH’EBILAGIRO BYE. — EMBONA ISATU.

¹ Buli muntu wena akwikiriza okwo Yezu ali Kristu, azerwe Mungu; kai k’akwenda omuzazi, akwenda n’omuzarwa. ² Tukumanyira okwo tukwenda abana ba Mungu hali kinu: kwenda Mungu no kuhich’ebilagiro bye. ³ Kuba kwenda Mungu ni kuhich’ebilagiro bye; kai ebilagiro bye tibigumire. ⁴ Kuba byona ebizerwe Mungu bikusinga ensi; kai ekikusinga ensi ni kwikiriza kwetu. ⁵ Omusingi w’ensi ni ga, atali akwikiriza okwo Yezu ali Mwana wa Mungu? ⁶ Niwe wenene Yezu Kristu ayezire n’amenzi n’ensagama; n’amenzi gonka pai, nawe n’amenzi n’ensagama. Kandi Omwoyo niwe akumanyisya okwo Kristu ali bukomereza.

⁷ Kuba embona n’isatu mw’igulu: Tata, Ekigambo n’Omwoyo Mutakatifu; kai abasatu abo bali omo. ⁸ Kandi embona n’isatu mu nsi: omwoyo, amenzi n’ensagama; kai ebisatu ebyo ni kimo. ⁹ Raba nitwanankula obwemerezi bw’abantu, obwemerezi bwa Mungu ni bukuru muno; mbe obwemerezi bukuru obwo bwa Mungu akabuterera Omwana we. ¹⁰ Omuntu akwikiriza Omwana wa Mungu ali n’obwemerezi bwa Mungu muli wenene. Atakwikiriza Omwana, akugira Mungu mubehi, kuba takwikiriza obwemerezi obwo Mungu yaterere Omwana we. ¹¹ Mbe mbubu obwemerezi obwo: Mungu yatuhere obulame obutahwaho, kai obulame obwo buli mu Mwana we. ¹² Ali n’Omwana, ogwo ali n’obulame; atali n’Omwana, tali n’obulame. ¹³ Nkubayandikira ebyo, niho mumanye okwo muli n’obulame obutahwaho, imwe abekiriza mw’izina ly’Omwana wa Mungu.

MUNGU AKUHULIRA ESALA ZETU. — EKIHENO CH’OLUFU.

¹⁴ Ekituha kwesigirira Mungu ni kinu: buli echo tukusaba ha bwo kwenda kwa Mungu, akituha. ¹⁵ Kandi tukumanya okw’atuha buli kintu echo tukusaba; tukumanya, kuba tuli nabyo ebyo twasabire.

¹⁶ Omuntu akabona mutabani wabonakola ekiheno ekitali ch’olufu, amusabire, kai alihabwa obuzima bw’omwoyo, obw’ekiheno echo kitali ch’olufu. Haliho ekiheno ch’olufu: tinkugamba kusabira ekiheno echo. ¹⁷ Buli kibi chona ni kiheno, kai haliho ekiheno ch’olufu. ¹⁸ Tukumanya okwo buli muntu wena azerwe Mungu, tahena; nawe obuzarwa bwa Mungu bumugumya, kai omubi tamukwata. ¹⁹ Tukumanya okwo twarugire hali Mungu, n’okw’ensi yona etwerwe omubi. ²⁰ Hona tukumanya okw’Omwana wa Mungu yezire natuha obwenge bwo kumanya Mungu wa kimo, n’obwo kutura mu Mwana we wa kimo. Niwe wenene Mungu wa kimo n’obulame obutahwaho. ²¹ Twana twange, mwelinde ha bimungu. Amina.