1 Ha Banakorinti

PAULO NABABWACHA NASIMA MUNGU.

¹ Paulo, ayayesirwe entumwa ya Yezu Kristu ha bwo kwenda kwa Mungu, na Sositeni, mutabani wetu, ² hali Eklezia ya Mungu eli Korinti na ha batakatifuzibwe muli Kristu Yezu, abakwetwa batakatifu, na hali bona abakulembereza izina ly’Omukama wetu Yezu Kristu, honahona aho tuli twena. ³ Enema n’omulebo eziruga hali Mungu Tata wetu na ha Mukama Yezu Kristu zibe mul’imwe.

⁴ Nkusima bucha bucha Mungu wange ha mwanya gwanu, kuber’enema ya Mungu eyabagabirirwe muli Kristu Yezu, ⁵ kuba muli wenene mwabere bahango muli byona, mu bigambo byona na mu bumanyi bwona, ⁶ obwo Kristu yamanyisibwe atyo mul’imwe; ⁷ hatyo timukenire enema n’emo, imwe abakutegeza obuboneki bw’Omukama wetu Yezu Kristu, ⁸ aliguma kubagumisya kuhika ha muhero, musangwe mutali na ntambala ha lunaku lwo kwiza kw’Omukama wetu Yezu Kristu. ⁹ Ni mwesigwa Mungu, owe mwayesirwemo mu bukobe bw’Omwana we, Yezu Kristu Mukama wetu.

OBUHAKANI MW’EKLEZIA YA KORINTI.

¹⁰ Mbe bana betu, nkubalembereza mw’izina ly’Omukama wetu Yezu Kristu, mube n’ebigambo bimo, nzira buhakani, nawe mube n’ebitekateko bimo n’ebigambo bimo. ¹¹ Kuba, bana betu, nkagambirwa abo mu ka ya Kloe okw’obuhakani bulimo mul’imwe. ¹² Nkugamba nti: buli muntu mul’ imwe akutenga ati: Ine ndi wa Paulo; ine ndi wa Apolo; ine ndi wa Kefa; ine ndi wa Kristu. ¹³ Si Kristu yahinzuka? Si Paulo yabalegirirwe ha musalaba? hamo si mwabatizibwe mw’izina lya Paulo? ¹⁴ Nkusima Mungu obwo ntabatize n’omo mul’imwe, raba si Krispi na Kayo, ¹⁵ niho mutahicha kugamba okwo mwabatizibwe mw’izina lyange. ¹⁶ Nenekwo, hona nkabatiza abo mu ka ya Stefanasi; nawe tinkumanya okwo nabatize ondi. ¹⁷ Kuba Kristu tiyantumire kubatiza, nawe kwolekerera Evanjeli, nzira bwetegereza bw’ebigambo, omusalaba gwa Kristu gutaburwa omugaso.

EVANJELI TEKUBARA OBWENGE BW’OBUZIGI BW’ENSI.

¹⁸ Koto ekigambo ch’omusalaba ni lusaro ha meso g’abakubula; nawe ha meso g’abakuchunguka, itwe hatyo, ni buhicha bwa Mungu. ¹⁹ Nicho chandikirirwe kiti: Ndisingaricha obwenge bw’ab’obwenge, kai ndyanga obwetegereza bw’abetegereza. ²⁰ Omwetegereza ali hai? omwandiki ali hai? omuhakani wo mu nsi munu ali hai? Si Mungu tiyahindwire obwetegereza bw’ensi enu, lukaba lusaro? ²¹ Kuba, obw’abantu, n’obwetegereza bwabo, batamanyire obwetegereza bwa Mungu, Mungu akasemererwa kuchunguza abekiriza olusaro lw’obwolekerezi. ²² Mbe Abayahudi bakusaba amahano, kai Abagereki bakuhiga obwetegereza; ²³ nawe itwe tukwolekerera Kristu ayalegirwe ha musalaba: echo kikusitaza Abayahudi, kai abasenzi bacheta olusaro, ²⁴ nawe ha meso g’abayesirwe, naho bali Bayahudi, naho bali Bagereki, Kristu ni buhicha bwa Mungu n’obwetegereza bwa Mungu. ²⁵ Kuba ekikususana kuti henda ni lusaro hali Mungu, ni bwetegereza obukukira obw’ abantu, kai ekikususana kuti henda ni bunoge hali Mungu ni mani agakukira ag’abantu.

MUTAYEKUZA MU MESO GA MUNGU.

²⁶ Mulore, bana betu, abasozirwe mul’imwe: abetegereza ha bw’engingo tibakanire, abakuru bona pai, ab’oluganda lw’ekikuru bona pai. ²⁷ Nawe Mungu akasora ebisazire by’ensi, akoz’ensoni ab’obwenge; kai Mungu akasora ebinogire by’ensi, akoz’ensoni ab’amani; ²⁸ kandi Mungu akasora eby’obuyaga by’ensi n’ebikugaywa n’ebitali kintu, asingariche ebiliho, ²⁹ atabaho muntu n’omo wo kwekuza obusyo ye. ³⁰ Niwe wenene yabahere kuba muli Kristu Yezu, ayatuberere, ha bwa Mungu, bwetegereza na buhikire na butakatifuza na buchunguzi, ³¹ niho bihike ebyandikirwe biti: Akwekuza, ayekulize mu Mukama.

OBWOLEKEREZI BWA PAULO KORINTI.

¹ Kai ine, bana betu, ka nezire hal’ imwe, tinezire kubamanyisya Kristu n’ebigambo byo kukumisya hamo by’obwetegereza. ² Kuba tinayenzire kumanya mul’imwe ekintu kindi, atali Yezu Kristu, kai Yezu Kristu alegirwe ha musalaba. ³ Kandi nkaba mul’imwe nnogire, ntinire, nzugumire; ⁴ mbe ebigambo byange n’obwolekerezi bwange tibili mu bigambo byo kukongya by’obwetegereza bw’ekimuntu, nawe mu bwoleki bw’Omwoyo n’amani, ⁵ kwikiriza kwanu kutaba mu bwetegereza bw’abantu, nawe mu buhicha bwa Mungu. ⁶ Mbe tukwolekerera obwetegereza mu bahikire, obwetegereza bw’ensi enu hamo bw’abakuru bw’ensi enu abalisingarika pai; ⁷ nawe tukwolekerera obwetegereza bwa Mungu, obuli lufubo, obuserekire, obwo Mungu yaliga abikire ikuzo lyetu kuruga ira lyona, ⁸ obwo omukuru w’ensi enu atamanyire n’omo; kuba bakiba babumanyire, tibakulegire ha musalaba Omukama w’ikuzo.

OBWOLEKEREZI BWA PAULO BUKURUGA HA MWOYO MUTAKATIFU.

⁹ Nawe, nk’okwo chandikirwe kiti: Echo eliso litabwene, ech’okutwi kutahulire, ech’omutima gutatekatekire, echo Mungu yategekere abakumwenda, ¹⁰ hal’itwe Mungu yakisururwire mu Mwoyo gwe. Kuba Omwoyo gukusombokerwa byona, n’ebiserekire bya Mungu. ¹¹ Kuba ni ga mu bantu akumanya ebili mu nda y’omuntu, gutali omwoyo gw’omuntu, oguli mu nda ye? Nikwo bityo n’ebili muli Mungu, taliho akubimanya, gutali Omwoyo gwa Mungu. ¹² Mbe itwe titwaherwe omwoyo gw’ensi, nawe Omwoyo ogukuruga hali Mungu, niho tumanye ebyo Mungu yatuhere kumanya; ¹³ kai titubitenga n’ebigambo by’obwetegereza bw’abantu, nawe n’ebigambo by’omwoyo, nitumanyisya eby’omwoyo abakunulirwa eby’omwoyo. ¹⁴ Nawe omuntu nasusana kuti henda ali namenswa takusombokerwa eby’Omwoyo gwa Mungu; akubyeta ati: Eby’olusaro, kai takuhicha kubisombokerwa, kuba byetegerezibwa omwoyo. ¹⁵ Nawe omuntu munamwoyo akulamula kuzima byona, kai wenene takulamurwa muntu. ¹⁶ Kuba ali n’obwenge bw’Omukama, akumwolekerera ni ga? Nawe itwe tuli n’obwenge bwa Kristu.

OMWOLEKEREZI TAKUGASA, MUNGU ATATEREHO AMANI GE.

¹ Mbe hatyo, bana betu, tinahikize kubatengera nk’abantu banamwoyo, nawe nk’abantu banangingo; nk’abanamuto muli Kristu, ² nkabanwesy’amata, ebilyo bigumire pai, kuba sanga mutakahikize kubilya; na hati hona timukuhicha, kuba muchali banangingo. ³ Mbe obwo mul’ imwe haliho ichubi n’enkungana, si timuli banangingo, nimutungwa kimuntu? ⁴ Lora, obw’omo akutenga ati: Ine ndi wa Paulo; kai ondi ati: Ine wa Apolo, si timuli bantu? Mbe Apolo ni kiha? kai Paulo ni kiha? ⁵ Abakozi b’emilimo b’owe mwekirize, kai buli muntu ha bw’omugabo ogwo yaherwe Omukama. ⁶ Ine nkabyara, Apolo aketirira; nawe Mungu niwe yakulize. ⁷ Hatyo akubyara tali kintu, n’akwitirira wena pai, nawe Mungu akukuza. ⁸ Omubyazi n’omwitiriza bali kuti kintu kimo; nawe buli muntu alihabwa empera ye ha bw’omulimo gwe. ⁹ Kuba tukober’emilimo na Mungu; muli nsambu ya Mungu, muli nzu eyo akwombeka. ¹⁰ Ha bw’enema ya Mungu eyo naherwe, nk’omwombeki w’obwenge, nkataho oluhazu; kai ondi akayombeka oluguru. Nawe buli muntu ayetegereze okw’akwombeka oluguru. ¹¹ Kuba taliho akuhicha kutaho oluhazu lundi, lutali olwaterweho, niwe Kristu Yezu. ¹² Alayombeka ha luhazu olwo n’ezahabu, n’efweza, n’amabale g’obuguzi bwingi, n’amati, n’amanansi gayomire n’amasagate, ¹³ omulimo gwa buli muntu guliboneka; kuba olunaku lw’Omukama luligumanyisya, obwo gulimanyikana mu muliro, kai omuliro gulibonesya okwo guli. ¹⁴ Omulimo gw’ayayombekire oluguru ka gulasimbagirira, alihabwa omuhero. ¹⁵ Gukayokibwa, alifwerwa busa; nawe wenene alichunguka, nawe kuti naraba mu muliro.

ABAKRISTU BALI EKLEZIA YA MUNGU.

¹⁶ Si timukumanya okwo muli eklezia ya Mungu n’okw’ Omwoyo gwa Mungu gutura mul’imwe? ¹⁷ Mbe omuntu alinyamura eklezia ya Mungu, Mungu alimukambula. Kuba eklezia ya Mungu ni ntakatifu, kai muli eklezia egyo. ¹⁸ Hataba omuntu n’omo wo kweziga: mul’imwe akwegira mwetegereza ha bw’ensi enu, abe musazi, aho niho aliba mwetegereza; ¹⁹ kuba obwetegereza bw’ensi enu ni lusaro ha meso ga Mungu. Nicho chandikirirwe kiti: Ndibasya ab’obwenge mu bukeruke bwabo. ²⁰ Kai kiti: Omukama akumanya ebitekateko by’abetegereza, n’okwo bili busa chonka. ²¹ Mbe hataba omuntu n’omo wo kwekuliza mu bantu. ²² Kuba byona ni byanu, naho ali Paulo, naho ali Apolo, naho ali Kefa, naho eli nsi, naho buli bulame, naho luli lufu, naho bili ebiliho hamo ebiliza. Byona ni byanu; ²³ nawe imwe muli ba Kristu, kai Kristu ni wa Mungu.

MUNGU NIWE AKULAMULA ENTUMWA ZE.

¹ Abantu batulore nk’abakuratizi ba Kristu n’abagabi b’enfubo za Mungu. ² Mbe bakwenda omugabi abe mwesigwa. ³ Ine ha bwange tibinsasire mukandamula imwe hamo omulamuzi; nawe ine nena tinkwelamula ine omwene. ⁴ Naho ilaka ly’omutima gwange litampanira kintu, echo chonka tikikumpa kuba muhikire; akundamula niwe Omukama. ⁵ Mbe hatyo mutalamulaga omwanya gutakahikire, kuhika Omukama aize kwatula ebiserekire mu mwirima no kusokora ebitekateko by’emitima; aho niho Mungu alihera buli muntu wena ikuzo elimuhikire. ⁶ Nawe, bana betu, ebyo nabigamba hal’ine na Apolo kubera imwe, niho mumanye hal’itwe kusubira mu byandikirwe, kandi mutayekuhyaga muli omo kukira muli ondi. ⁷ Iwe si okukira ota abandi? Iwe oli na ki nk’echo otaherwe? kai wakiherwe, okwekuliza ki nacho, kuti henda tiwakiherwe? ⁸ Mwigusire na hati, muli bahango na hati; mukutwal’engoma tutaliho, kai hakili mukiba nimutwala kimo, niho n’etwe twakutwere n’emwe!

OMULIMO GW’ENTUMWA GUGUMIRE.

⁹ Kuba nkuchwa nti: Mungu akutukolera, itwe entumwa, nk’abakukirwa abandi bona, nk’abalamwirwe kufwa, obwo yatugizire ndolero y’ensi n’abamalaika n’abantu. ¹⁰ Itwe tusazire ha bwa Kristu, nawe imwe muli betegereza muli Kristu; itwe tunogire, nawe imwe muli n’amani; imwe bakubakuza, nawe itwe bakutugaya. ¹¹ Kuhika hati tukurumw’enzala, tukwitw’ eliho, tukuzuka, tukuterwa mu busyo, tituli n’aho kutura kimo; ¹² tukunaranara kukol’emilimo n’emikono zetu; tukuzumwa, kai tukubarika; bakutunaranaza, kai tukwemera; ¹³ bakutuzumiriza, kai tukulembereza; twabere nk’amasingo g’ensi n’omukukumbo gwa bona kuhika hati. ¹⁴ Tinkubayandikira ebyo kubakoz’ensoni, nawe nkubahana nk’abana bange abo nkwenda muno. ¹⁵ Kuba, naho mwakubere n’abolekerezi bihumbi ikumi muli Kristu, timuli na baso bengi, obwo n’ine nabazere muli Yezu Kristu ha bw’Evanjeli.

TULI NO KURUBIRIRA KRISTU.

¹⁶ Mbe nkubalembereza, mundubirire nk’okwo ine nkurubirira Kristu. ¹⁷ Nich’echo nabatumirire Timote, omwana wange mwendwa muno n’omwesigwa mu Mukama; alibezukiza emihanda zange muli Kristu Yezu, nk’okwo nkwolekerera honahona mw’eklezia zona. ¹⁸ Abandi bakekuhya, kuti henda ntakisuba owanu. ¹⁹ Nawe ndigenda bwangu owanu, Omukama k’alayenda, kai ndimanya, ebigambo by’abakwekuhya pai, nawe obuhicha bwabo. ²⁰ Kuba obukama bwa Mungu tibuli mu bigambo, nawe mu buhicha. ²¹ Mukwenda ki? Mbazeho n’enkoni, angu n’obwenzi n’obufura?

OMUSIHANI WA KORINTI.

¹ Honahona bati: Halimo obusihani mul’imwe, kai obusihani nk’obutakabonwaga na mu basenzi, bati: omo aswere muk’ese. ² Kai kunu mukwekuhya, echo kulira no kumwihamo mul’imwe, ayakozire entambala egyo! ³ Ha bwange, naho ntaliho mu ngingo, nawe ndiho mu mwoyo, namazire kulamula kuti ndiho kana ntambala egyo. ⁴ Mw’izina ly’Omukama wetu Yezu Kristu, imwe musumbire hamo n’omwoyo gwange, n’amani g’Omukama wetu Yezu, ⁵ omuntu nk’ogwo atyo aherezibwe Sitani, anaranazibwe mu ngingo ze, niho omwoyo gwe guchunguke ha lunaku lw’Omukama wetu Yezu Kristu. ⁶ Mbe mukuhaba ka mukwekuza. Si timukumanya okwo itumbyo linoro likugagya ensyano yona? ⁷ Mweyeze h’itumbyo likokoro, niho mube ensyano mpya, nk’okwo muli mikate ezitali n’itumbyo. Kuba Kristu, Paska yetu, akatambwa. ⁸ Mbe tugire amageni, n’itumbyo likokoro hamo itumbyo ly’obuyaga n’ely’obubi pai, nawe n’emikate ezitali n’itumbyo z’obwesigwa n’obukomereza.

KWIRUKA AB’ENTUNGWA MBI.

⁹ Nkabayandikira mu baruwa yange nti: Mutahoya n’abasihani; ¹⁰ tinkugamba abasihani b’ensi enu, hamo abanunu, hamo abasuma, hamo abakuhabudu ebimungu; aho mwakubere bo kurugamo mu nsi munu. ¹¹ Nawe nkabayandikira kuleka kuhoya n’omuntu akwetwa mutabani wanu, kunu ali musihani, hamo mununu, hamo muhabudu w’ebimungu, hamo mugeyi, hamo mutamizi, hamo musuma; muleke no kulya n’omuntu nk’ogwo atyo. ¹² Kuba ndamule nta abali hanza? Si timukulamula abali mul’imwe? ¹³ Abali hanza abo Mungu niwe alibalamula. Mwiheho omubi mul’imwe.

ABAKRISTU BENGENE KULAMURWA ABAKRISTU BEZABO MU NTONGANA.

¹ Omo mul’imwe ali n’entongana n’owezabo, akuhicha ata kumuchulira, alamurwe ababi, kai abatakatifu pai? ² Si timukumanya okwo abatakatifu balilamula ensi enu? Kai raba ensi elilamurwa imwe, si timuhikire kulamula amagambo manoro? ³ Si timukumanya okwo tulilamula abamalaika?Kai kuta amagambo go mu nsi! ⁴ Mbe, raba muli n’entongana mu magambo go mu nsi, muze kulamurwa abatakumukire mw’eklezia. ⁵ Nkubagambira ebyo, mbakoz’ensoni. Hatyo tihaliho mul’imwe omuntu mwetegereza n’omo, akahicha kuba mulamuzi w’abatabani babo? ⁶ Nawe omukristu akutonganisya mutabani wabo, kai ebyo bityo obusyo y’abasenzi? ⁷ Kutongana n’abezanu ni ntambara mpango. Mwayangira ki kwikiriza kuhenerwa? hakili nimwikirize kuzigwa! ⁸ Nawe imwe n’imwe nimuhener’abandi nimubaziga, kai batabani banu! ⁹ Si timukumanya okw’abasuma batalibona obukama bwa Mungu? Mutahaba: abasihani, n’abakuhabudu ebimungu, n’abakugir’obukwate, ¹⁰ n’ab’obuyaga, n’abaluluhe, n’abasuma, n’abanunu, n’abatamizi, n’abageyi, n’abanyagi, tibalibona obukama bwa Mungu. ¹¹ Abandi mul’imwe baliga bali batyo; nawe mukanabibwa nimutakatifuzibwa, hatyo nimuba bahikire mw’izina ly’Omukama wetu Yezu Kristu na mu Mwoyo gwa Mungu wetu.

MWIRUKE OBUSIHANI.

¹² Nkuhicha kukola byona, nawe tibingasira byona. Nkuhicha kukola byona, nawe tinkukunda kuba mwiru w’ekintu n’ekimo. ¹³ Ebilyo ni by’enda, kai enda ni y’ebilyo; nawe Mungu alisingaricha byona ha bubili bwabyo. Nawe engingo tizahangirirwe obusihani, nawe Omukama, kai Omukama ni w’engingo. ¹⁴ Mungu akazora Omukama, kai itwe twena alituzora mu buhicha bwe.

¹⁵ Si timukumanya okw’engingo zanu bili bihinzu by’engingo za Kristu? Si ntwar’engingo za Kristu, nzigire engingo z’ikazi ly’obuyaga! Kikabure! ¹⁶ Si timukumanya okw’omuntu akwekwatanisya n’ikazi ly’obuyaga, akuba ngingo zimo nalyo! Kuba kikagambwa kiti: Ha bubili bwabo ziliba ngingo zimo. ¹⁷ Nawe akwekwatanisya n’Omukama akugirwa mwoyo gumo nage. ¹⁸ Nimwiruke obusihani. Buli kiheno chona ech’ omuntu akola, kili hanza y’engingo; nawe omusihani akuhenera engingo ze zonene. ¹⁹ Si timukumanya okw’engingo zanu zili eklezia y’Omwoyo Mutakatifu, ali mu nda yanu, owe mwaherwe Mungu, n’okwo mutakili bakana imwe abene? ²⁰ Kuba mukagurwa obuguzi bwingi. Mbe nimukuze nimutegure Mungu mu ngingo zanu.

OBUSWEZI.

¹ Ebyo mwanandikire, nkubagambira nti: ni kuzima omuntu ataba n’amagambo n’omukazi; ² nawe muhiche kuleka obusihani, buli museza abe n’omukazi we, kai buli mukazi abe n’omuseza we. ³ Omuseza ahe omukazi we ebyo alagirwe kumuha, kandi nikwo n’omukazi ahe omuseza we ebyo alagirwe kumuha. ⁴ Omukazi tali n’obuhicha ha ngingo ze, nawe omuseza niwe ali nabwo; nikwo n’omuseza tali n’obuhicha ha ngingo ze, nawe omukazi niwe ali nabwo. ⁵ Mutayeyangirana, raba si nimwikiriza mwena lunaku nka lumo lumo, muhiche kulembereza; kumara musube kwikirizanya, isitani litabarozya kubera kwoya kubi kwanu.

⁶ Nkubagambira ebyo nk’obufuhi, nk’ekilagiro pai. ⁷ Kuba nakwenzire mube mwena nk’ene; nawe buli muntu akugabirwa Mungu omugabo gwe, ondi gunu, ondi guliya. ⁸ Nawe nkugambira abatumba n’abatumbakazi nti: ni kuzima kwanu kwikara mutyo, nk’ene. ⁹ Raba batakuhicha kwezibira, baswere hamo baswere, kuba ni kuzima muno kuswera hamo kuswerwa kukira kuhya.

¹⁰ Abali mu buswezi bwabo nkubalagira, t’ine, nawe Omukama, nti: omukazi atatagana n’omuseza we; ¹¹ akaba atagene nage, aikare ataswerwe, hamo agorozanye n’eba. Kandi omuseza atayanga mukazi we.

¹² Abandi nkubagambira, t’ine, nawe Omukama, nti: omukristu ali n’omukazi musenzi, kandi ogwo naikiriza kutura nage, takuhicha kumwanga. ¹³ Hona omukazi mukristu ali n’omuseza musenzi, kandi ogwo naikiriza kutura nage, takuhicha kwanga iba. ¹⁴ Kuba omuseza musenzi akutakatifuzibwa omukazi mukristu, n’omukazi musenzi akutakatifuzibwa omuseza mukristu; bikiba bitabere bityo, abana banu bakurofuhere, nawe hati ni batakatifu. ¹⁵ Nawe omuseza hamo omukazi musenzi akayanga owezabo, amwange; kuba aho omukristu takisumikwa, obwo Mungu akatwetera omulebo. ¹⁶ Kuba okumanya ota, mukazi we, okw’olichungula baro? Kai iwe museza, okumanya ota okw’olichungula omukazi wawe?

MWIKARE MU MWANYA OGWO MWALIGA MULI MUTAKABATIZIBWE.

¹⁷ Mbe buli muntu atungwe ha bw’omugabo gwa Mungu, mu mwanya ogwo yaliga alimo, Mungu ka yamwesire; nich’echo nkwolekerera mw’eklezia zona. ¹⁸ Ayayesirwe asazirwe, aleke kusereka kusarwa kwe. Ayayesirwe atasazirwe, aleke kusarwa. ¹⁹ Kusarwa ti kintu, kai kutasarwa ti kintu; nawe ekisasire ni kuhich’ebilagiro bya Mungu. ²⁰ Buli muntu wena aikare nk’okwo yaliga ali, ka yayesirwe. ²¹ Wayesirwe oli mwiru? otakukwa; nawe okahicha kuchunguka, ni kuzima kwawe. ²² Kuba ayayesirwe ali mwiru akuba muchunguki w’Omukama; kandi n’ayayesirwe atali mwiru, akuba mwiru w’Omukama. ²³ Mukagurwa obuguzi bwingi, mutaba beru b’abantu. ²⁴ Buli muntu wena, bana betu, aikare nk’okwo yaliga ali, ka yayesirwe.

OBUBIKIRA N’OBUFWERW’EBA.

²⁵ Eby’ababikira, tindi n’ekilagiro ch’Omukama; nawe nkubaha ihane, obw’Omukama yanitirw’ekisa, mbe mwesigwa. ²⁶ Mbe nkuchwa nti: Ni kuzima, kuber’amazongoko go mu nsi, omuntu aikare nk’okw’ali. ²⁷ Oli n’omukazi? otahiga kusurumurwa. Toli na mukazi? otahiga kuswera. ²⁸ Nawe okaswera, toli na ntambala; kai omuhara k’aswerwa, tali na ntambala. Nawe abantu abo balibona amazongoko g’engingo; kai ine nkwenda kubasasira. ²⁹ Mbe lora, bana betu, nkubagambira nti: enaku zikehire; ekiliho ni kinu: abali n’abakazi babe nk’abatali nabo; ³⁰ abakulira babe nk’abatakulira; abakusemererwa babe nk’abatakusemererwa; abakugula babe nk’abatakutunga; ³¹ abakukoz’ebyo mu nsi babe nk’abatakubikoza: kuba ebyo mu nsi bikuhwaho.

³² Nkwenda muleke kuhaha. Ataswere akutekateka eby’ Omukama n’ebyo alakola asemereze Mungu. ³³ Nawe aswere akuhahibwa ebyo mu nsi n’ebyo alakola asemereze omukazi we; hatyo ali n’emitima ibili. ³⁴ Nikwo n’omukazi ataswerwe n’omuharakazi, bakutekateka eby’Omukama, babe batakatifu mu ngingo na mu mwoyo; nawe omukazi aswerwe akutekateka ebyo mu nsi n’ebyo alakola asemereze iba. ³⁵ Mbe nkubagambira ebyo mbazune, mbabasye mu mutego pai, nawe mbasindike kukola kuzima, muhiche kulembereza Mungu, nzira kizibiro.

³⁶ Nawe omuntu akaba nachwa ati: Omuhara wange akaguna ataswerwe, nkugoka, raba ali no kugabula, akole eby’ alayenda; takuhena, omuhara akaswerwa. ³⁷ Mbe nawe omuntu aketegeka kimo mu mutima gwe, atasinirizibwe kintu, nawe ali n’obuhicha bwo kukola eby’akwenda, akachwa mu mutima gwe ati: omuhara wange alikara ataswerwe, ogwo atyo akukola kuzima. ³⁸ Mbe hatyo akugabula omuhara we akukola kuzima; kai atakumugabula akukola kuzima muno kukiraho.

³⁹ Omukazi asumikirwe ekilagiro, iba akiliho; nawe iba k’akufwa, akusurumuka. Aswerwe owe alayenda, kihango ha bw’Omukama. ⁴⁰ Nawe alibona omugisa kukiraho, akekara atyo, ha bw’ihane lyange; kai nkuchwa nti: ine nena ndi n’Omwoyo gwa Mungu.

ENYAMA Y’EKITAMBO.

¹ Eby’enyama y’ekitambo, tukumanya okwo tukusombokerwa twena. Obumanyi bukuzimbya, nawe obwenzi bukugumya. ² Omuntu k’akutekateka kumanya ekintu, takamanyire obumanyire. ³ Nawe omuntu k’akwenda Mungu, ogwo atyo akumanywa wenene. ⁴ Mbe eby’enyama etambirwe ebimungu, tukumanya okwo ebimungu ti kintu mu nsi, n’okwo ataliho Mungu ondi, raba si Mungu omo wenka. ⁵ Kuba, naho biliho bingi, hamo oluguru hamo mu nsi, ebikwetwa bimungu, (bikaba bimungu bingi n’abakama bingi), ⁶ itwe tukumanya Mungu omo wenka, Tata, ayahangire byona, n’etwe, kubera Wenene; n’Omukama omo wenka, Yezu Kristu, ha bw’owe ebintu byona bili, n’etwe twena.

⁷ Nawe tibakumanya bona; kuba abandi kuhika hati, obwo bakwikiriza okwo echo bahabudu ni kintu, bakulya enyama y’ekitambo; kai omutima gwabo, ogutali n’amani, gukurofuhara. ⁸ Nawe ebilyo tibikuha Mungu kutulora n’ameso mazima: kuba tukalya, titukwongererwaho kintu, kandi tukabura kulya, titukukehibwa kintu. ⁹ Nawe mwetegereze mutasitaza n’emikolere zanu abatali n’amani. ¹⁰ Kuba omo akabona ondi ayasombokerwe, aikere h’eliro ly’ekitambo, si takwoherezibwa, obwo atali n’amani, kulya enyama etambirwe? ¹¹ Mbe hatyo obumanyi bwawe bukusingaricha omutabani wanu munoge, owe Kristu yafwerere? ¹² Mukahenera mutyo abatabani banu nimuhenesya omutima gwabo ogunogire, mukuhenera Kristu. ¹³ Mbe nikwo, raba ebilyo byange nibihenesya mutabani wetu, ka ndeke kimo kuly’enyama, ntahenesya mutabani wetu.

OMWOLEKEREZI W’EDINI AKULISIBWA ABOLEKERERWA BE.

¹ Si tindi n’olubuga? Tindi ntumwa? Tinabwene Kristu Yezu Omukama wetu? Si timuli mulimo gwange mu Mukama? ² Naho nkabura kuba ntumwa ha meso g’abandi, ha meso ganu ndi ntumwa; kuba muli mbaliriro y’obutumwa bwange mu Mukama. ³ Nibwo obukingiriza bwange obusyo y’abakumbuzya. ⁴ Si tituli n’obuhicha bwo kulya no kunwa? ⁵ Si tituli n’omwanya gwo kugenda honahona n’omukazi, ali muhara wetu, nk’okwo entumwa zindi n’abatabani babo Omukama, na Kefa, bakola? ⁶ Hamo si ine nenka na Barnaba tutakuhicha kukola tutyo?

⁷ Akugenda mu bulemo n’ebintu bye byonka ni ga? Ni ga akubyara omuzabibu nabura kulya ebirabo byagwo? Ni ga akulisy’ente nabura kunw’amata? ⁸ Si nkugamba ebyo mu nfumora y’abantu? Ekilagiro tikikubigamba hona? ⁹ Kuba chandikirwe mu kilagiro cha Musa kiti: Otabohaga omunwa gw’ente ekuhura oburo. Si Mungu akubara n’ente? ¹⁰ Si takugamba ebyo kubera itwe? Nikwo, byandikirwe kubera itwe: kuba omulimi ali no kulima no kutegeza, n’omuhuzi ali no kutegeza ebilaruga mu buhuzi. ¹¹ Obwo twabibire mul’ imwe ebizima by’omwoyo, si ni kintu kihango tukagesa ekihinzu ch’ebizima byanu by’ensi?

¹² Raba abandi bakakola batyo mul’imwe, kai kubaki itwe pai? Nawe titwabikozire; tukwemera byona, tutazibira n’akati Evanjeli ya Kristu. ¹³ Si timukumanya okw’abakukol’ emilimo mw’eklezia bakulya eby’emiherezo, n’okw’abakuhereza ha lutale bakugabirwa ebya ha lutale? ¹⁴ Mbe nikwo Omukama akalagira abolekerezi b’Evanjeli kulya eby’Evanjeli.

PAULO AKUKOLA BUSA CHONKA.

¹⁵ Nawe ine tinakozire ntyo. Kai tinkwandika ebyo, bankolere batyo; kuba hakili nfwe kukira kunagisibwa ikuzo lyange elyo. ¹⁶ Kuba ka nkwolekerera Evanjeli, t’ikuzo hal’ine, nawe ni kilagiro; nkabula kwolekerera Evanjeli, ndigabona! ¹⁷ Nkaba ninkola, omutima guliho, nkubona omuhero; nawe nkaba ninkola ntakwenda, nkumara omulimo gwange chonka. ¹⁸ Mbe hatyo omuhero gwange ni guta? Ni gunu: nkwolekerera Evanjeli busa chonka, ntasagiriza mu buhicha obwo ndi nabwo kuber’obwolekerezi. ¹⁹ Kuba, naho ntali n’ibanza ly’omuntu n’omo, nkegira mukozi wa bona, mpindule bengi. ²⁰ Nkegira kuti Muyahudi n’Abayahudi, mpindule Abayahudi; ²¹ n’abakugererwa Ekilagiro nkesusanisya kuti nkugererwa Ekilagiro, (naho ntakigererwa Ekilagiro), mpindule abakugererwa Ekilagiro; n’abatali n’Ekilagiro, nkesusanisya kuti ntali n’Ekilagiro, (naho ntali nzira ekilagiro cha Mungu, obwo ndi n’ekilagiro cha Kristu), mpindule abaliga batali n’Ekilagiro. ²² Nkegira munoge n’abanoge, mpindule abanoge; nkegira byona hali bona mbachungule bona. ²³ Nkukola byona kuber’Evanjeli, ngabirwe ebyayo.

KUCHUNGUKA KUGUMIRE.

²⁴ Si timukumanya okw’abakusingasingana kwiruka bakwiruka bona, nawe omo wenka niwe akuhabwa omuhero? Mwiruke mutyo, niho mugubone. ²⁵ Lora, bona abakulikana mw’ilikaniro bakuzira byona; bakukola batyo, babone omuhero ogukuhwaho, kai ogwetu tigukuhwaho. ²⁶ Mbe ine nkwiruka ntyo, kai buyagayaga pai; nkurwana ntyo, kuti nkutera oluguru pai; ²⁷ nawe nkunaranazy’engingo zange, kai nkuzita mu bwiru, ntaza kubura ine omwene, namazire kwolekerer’ abandi.

EBYA KARA BILI NO KUTWOLEKERERA.

¹ Bana betu, tinkwenda mubure kumanya okwo batata bona bakaba ifwo y’obwire, n’okwo barabire bona hagati y’enanza, ² n’obwo bona kuti babatizibwe ha bwa Musa, mu bwire na mu nanza, ³ n’okwo balire bona ekilyo kimo ch’ekinamwoyo, ⁴ n’okwo banwere bona omunwo gumo gw’ekinamwoyo (kuba banwaga ha lukili lw’ekinamwoyo olwabarubaga; olukili olwo lwaliga luli Kristu). ⁵ Nawe banamwingi muli bonene tibasemereze Mungu, kuba bakagwa mw’iswa. ⁶ Mbe ebyo ni kuti kisusano ch’ebili hal’itwe tuleke kwegonga ebibi nk’okwo bonene babyegongire. ⁷ Mutahabudu ebimungu, nk’abandi muli bonene, nk’okwo chandikirwe kiti: Embaga neikara, nelya nenwa, kai neimuka kuzana. ⁸ Tutasihanaga nk’abandi muli bonene, kai nibafwa bihumbi makumi abili na bisatu lunaku lumo. ⁹ Tutarozyaga Kristu, nk’abandi muli bonene, nibetw’enzoka. ¹⁰ Mutarundumaga, nk’abandi muli bonene, nibetwa omunaranaza. ¹¹ Mbe ebyo byona bikabagwera, nk’endolero; kai byandikirwe byo kutwolekerera itwe abali mu myaka zo kuhereruka.

KUROZIBWA TIKUKUKIRA AMANI GETU. — ENYAMA Y’EKITAMBO.

¹² Akuchwa ati: nimerere, ayetegereze atagwa. ¹³ Kurozibwa kwanu ni kw’ekimuntu chonka. Mungu ni mwesigwa, kai takwikiriza murozibwe kukir’amani ganu; mu kurozibwa alibaha ago kukwemera, niho muhiche kusinga.

¹⁴ Nicho, imwe abo nkwenda, mutahabudu ebimungu. ¹⁵ Nkubafumorera nk’abantu abali n’obwenge; mulamule imwe abene ebyo nkugamba. ¹⁶ Ekikompe ch’omugisa, echo tukubarika, ti bwanankuzi bw’ensagama ya Kristu si? kai omukate, ogwo tukuhinzula, ti bwanankuzi bw’engingo z’Omukama? ¹⁷ Kuba, naho tuli bengi, tuli mukate gumo n’engingo zimo, itwe twena abakukobera omukate gumo. ¹⁸ Mulore Abanaisraeli b’obuzarwa: si abakulya ebitambo tibakugabana eby’olutare? ¹⁹ Ni kiha? tinkugamba okwo ebitambirwe hamo ebimungu bili kintu. ²⁰ Nawe ebyo abasenzi bakutamba, bakubitambira amasitani, Mungu pai. Mbe tinkwenda mukobe n’amasitani. Timukuhicha kunwa ekikompe ch’Omukama n’ekikompe ch’amasitani. ²¹ Timukuhicha kwikara h’eliro ly’Omukama na h’eliro ly’amasitani. ²² Si tukwenda kuchuby’Omukama? Si tumukizire amani? Nkuhicha kukola byona, nawe tibikungasa byona. ²³ Nkuhicha kukola byona, nawe byona tibikugasir’abandi. ²⁴ Hatabaga omuntu n’omo wo kwehigira ebikumugasira, nawe ebikugasir’abandi.

²⁵ Mulye muli byona ebigurwa h’eguliro, nimuleke kubuza nimutimatimya mu mutima. ²⁶ Ensi ni y’Omukama, n’ebilimo byona. ²⁷ Raba omusenzi nabalalika kulya, mukagenda, mulye muli byona ebyo bakubakumira, nzira kubuza nimutimatimya mu mutima. ²⁸ Nawe omuntu omo akechura nagamba ati: Kinu kikatambirwa ebimungu, mbe hatyo mutakilya, kubera ogwo ayagamba atyo, no kuber’omutima gwe; ²⁹ nkugamba omutima, ogwawe pai, nawe ogw’abandi. Kuba obweyagazi bwange bukulamulirwa ki omutima gw’ondi? ³⁰ Nkalya ninsima, bakungamba ki echo nkusima? ³¹ Mbe mwabaga muli mw’ilya hamo mw’inwa, na mu buli echo mukukola, mukorega byona kubonera Mungu ikuzo lye. ³² Mutasitaza Abayahudi hamo abasenzi hamo Eklezia ya Mungu; ³³ nk’ene nkuhiga kusemereza bona muli byona, ntakuhiga ebikungasira, nawe ebikugasira bengi, niho bachunguke.

EMITUNGIRWE Z’ABASEZA N’ABAKAZI MW’EKLEZIA.

¹ Mube barubirizi bange, nk’okwo ine ndi murubirizi wa Kristu. ² Bana betu, nkubasima, obwo mukunizuka muli byona n’obwo mukuhich’ebilagiro byange nk’okwo nabibahere. ³ Nawe nkwenda mumanye okwo Kristu ni mukuru wa buli muntu wena, n’okw’omuseza ni mukuru w’omukazi, n’okwo Mungu ni mukuru wa Kristu.

⁴ Buli museza nasoma hamo nalaga, omutwe guswekire, akugora omutwe gwe. ⁵ Nawe buli mukazi nasoma hamo nalaga, omutwe gutaswekire, akugora omutwe gwe; kuba akusana kuti henda omutwe gwe gumwere. ⁶ Kuba omukazi akabura kwesweka omutwe, hatyo amwebwe isoke. Mbe obwo ni nsoni omukazi kusinzuka hamo kumwebwa, ayesweke omutwe. ⁷ Omuseza wenene tali no kwesweka omutwe, obw’ali kisusano n’ikuzo lya Mungu; nawe omukazi n’ikuzo ly’omuseza. ⁸ Kuba omuseza tiyehirwemo ha mukazi, nawe omukazi ha museza; ⁹ kandi omuseza tiyahangirirwe omukazi, nawe omukazi akahangirirwa omuseza. ¹⁰ Nich’omukazi, kuber’abamalaika, alagirirwe kuba ha mutwe gwe n’olunyamo lw’obuhicha bw’omuseza. ¹¹ Nawe omuseza taliho, nzira mukazi, kai omukazi wena taliho, nzira museza, mu Mukama. ¹² Kuba nk’okwo omukazi yarugire ha museza, nikwo n’omuseza aliho kuber’ omukazi; kai byona bikuruga hali Mungu. ¹³ Mulamule imwe abene: si ni kuzima omukazi kulembereza Mungu, atayeswekire omutwe? ¹⁴ oburugahansi bwonene butumanyisya okwo ni nsoni omuseza kuleka isoke lye kukura muno, ¹⁵ n’okwo omukazi, k’akukuza isoke lye, n’ikuzo hali wenene, kuba akahabwa isoke nk’echesweko. ¹⁶ Raba omuntu nasemererwa kuhakana, ti ntungwa zetu, n’ez’Eklezia ya Mungu hona pai.

UKARISTIA. — ABAKWANANKULA KUBI.

¹⁷ Mbe hati ndi n’ekigambo cho kubagambira, echo ntabasimira, ni kinu: obusumbi bwanu tibukubagasira, nawe bukubahenera. ¹⁸ Echo kutandika, bati: ka mukusumba hamo, obuhakani bwabaho, kai nkusinya kwikiriza; ¹⁹ kuba obuhakani buli no kubaho, niho abagumire mul’imwe bamanywe.

²⁰ Mbe ka mukusumba hamo, timukilya ilya ly’Omukama, ²¹ kuba buli muntu natandika kulya ebilyo bye; hatyo omo narumw’enzala, kai ondi nalya nasagiriza. ²² Si timuli n’enzu zo kulyiramo no kunwamo? hamo si mukugaya eklezia ya Mungu, nimukoz’ensoni abatali na kintu? Nkubagambira ki? Mbasimire ebyo? tinkubasimira ebyo. ²³ Kuba Omukama niwe yangambire ebyo nabolekerere, binu: Omukama Yezu, mu kiro echo yaherezibwe, akakwat’omukate, ²⁴ nasima, naguhinzula, nagira ati: Mwanankule, mulye; kinu nizo ngingo zange, ezikuherezibwa kubera imwe; kinu mukikolega ha kunizukiraho. ²⁵ Nikwo n’ekikompe, ka yamazire kulagira, nagira ati: Ekikompe kinu nigw’omulago muhya mu nsagama yange; kinu mukikolega ha kunizukiraho, buli lugendo olwo mulakinwaga. ²⁶ Kuba buli lugendo olwo mulalyaga omukate gunu, nimunwa ekikompe kinu, mulimanyisya kufwa kw’Omukama, kuhika aize.

²⁷ Hatyo buli muntu akuly’omukate gunu, hamo akunwa ekikompe ch’Omukama atahikire, akuba n’entambala ha ngingo na ha nsagama y’Omukama. ²⁸ Mbe omuntu ayetegereze omwene, niho alye omukate gunu, anwe ekikompe kinu. ²⁹ Kuba akulya nanwa atahikire, akulya nanwa obusingwa bwe, kuba takusomkokerwa engingo z’Omukama. ³⁰ Nich’echo bengi mul’imwe barwere, banogire, kai bengi bafwire.

³¹ Tukiba nitwelamula itwe abene, titwakulamwirwe. ³² Nawe ka tukulamurwa, Omukama akutunaranaza, tutasingwa hamo n’ensi enu. ³³ Mbe hatyo, bana betu, ka mukusumba hamo kulya, mulindanega. ³⁴ Ondi akaba narumw’enzala, alye mu ka, niho mutasumba hamo kusingwa. Ebindi ndibategeka ka ndaiza.

ENGABIRANO Z’OMWYOYO MUTAKATIFU.

¹ Bana betu, tinkwenda mubure kumanya eby’engabirano z’omwoyo. ² Mukumanya okwo, mukili basenzi, mwasagarwaga ha bimungu binantafukuma, nk’okwo bayendaga. ³ Mbe nkubagambira nti: taliho akuhicha kuzumiriza Yezu, k’akufumora ha bw’Omwoyo gwa Mungu; kai taliho akuhicha kutenga ati: Omukama Yezu, hatali ha bw’Omwoyo Mutakatifu. ⁴ Nikwo, enema zitagene, nawe Omwoyo ni gumo gwonka. ⁵ Emilimo zitagene, nawe Omukama n’omo. ⁶ Ebikorwa bitagene, nawe Mungu n’omo, niwe akukola byona muli bona. ⁷ Mbe obwatuzi bw’Omwoyo bukwizira buli muntu, bugasire bona.

⁸ Kuba omo akugabirwa Omwoyo efumoro y’obwetegereza; kai ondi, efumoro y’obumanyi, ha bw’Omwoyo ogwo gwonene; ⁹ ondi, kwikiriza, ha bw’Omwoyo ogwo gwonene; ondi, enema y’obukiza, ha bw’Omwoyo ogwo gwonene; ¹⁰ ondi, engabirano y’amahano; ondi, obulagi; ondi, obutaganisya bw’emyoyo; ondi, obumanyi bw’endimi; ondi, obusombozi bw’endimi. ¹¹ Mbe ebyo byona bikukorwa Omwoyo gwonene, gumo gwonka, nigugabira buli muntu, nk’okwo gukwenda.

OBUMO BW’EKLEZIA.

¹² Kuba, nk’okwo engingo ni zimo, kai zili n’ebihinzu bingi, n’okwo ebibinzu byona by’engingo, naho bili bingi, ziba ngingo zimo zonka, nikwo na Kristu. ¹³ Kuba tukabatizibwa twena mu Mwoyo gumo, tube ngingo zimo: Abayahudi, n’abanamahanga, n’aberu, n’enfura; kai twena tukanwesibwa Omwoyo gumo. ¹⁴ Nikwo n’engingo, ti kihinzu kimo, nawe ebihinzu bingi. ¹⁵ Okuguru kukaba nikugira kuti: Obwo ntali mukono, tindi mu ngingo, si tikwabuzire kuba mu ngingo? ¹⁶ Kai okutwi kukaba nikugira kuti: Obwo ntali liso, tindi mu ngingo, si tikwabuzire kuba mu ngingo? ¹⁷ Engingo zona zikaba eliso, obuhulizi bwakubere hai? zikaba zona buhulizi, obununcha bwakubere hai? ¹⁸ Nawe Mungu akatamo ebihinzu mu ngingo, buli kihinzu nk’okwo yayenzire. ¹⁹ Ebihinzu byona bikiba bili kihinzu kimo chonka, engingo zakubere hai? ²⁰ Nawe hati ebihinzu ni bingi, kai engingo ni zimo.

²¹ Eliso tilikuhicha kugambira omukono liti: Ebikorwa byawe tibinsasire; nali omutwe kugambira amaguru guti: Timunsasire. ²² Nawe ebihinzu by’engingo ebikususana kuti binogire kukiraho, nibyo bisasire muno; ²³ n’ebyo tukulora nk’eby’obuyaga, tukubikuza kukiraho; kai eby’ensoni tukubitina kukira ebindi. ²⁴ Ebitali by’ensoni tibisasire; nawe Mungu akasemeza engingo, niho ekilebire ikuzo kilihabwe kukiraho, ²⁵ obutagani butabaho mu ngingo, nawe ebihinzu byona bihwerane. ²⁶ Kandi ekihinzu kimo kikasaswa, engingo zona zikusaswa nacho; hamo ekihinzu kimo kikakuzibwa, engingo zona zikusemererwa nacho.

²⁷ Mbe imwe muli ngingo za Kristu, kai ebihinzu by’ekihinzu. ²⁸ Mungu akatandika kutaho mw’Eklezia Entumwa, echa kabili, abalagi, echa kasatu, abolekerezi; kumara ab’amahano, n’abakiza b’endwara, n’abahwezi, n’abagerezi, n’ab’endimi ningi, n’abasombozi b’endimi. ²⁹ Si bona bali Ntumwa? bona bali balagi? bona bolekerezi? ³⁰ bona bakol’amahano? bona bali n’engabirano yo kukiza? bona bafumor’endimi ningi? bona bazisombora? ³¹ Nimwegonge engabirano ezisingire. Nawe nkwenda kubolecha omuhanda muzima muno kukiraho.

ENTUNGWA YO KWENDA.

¹ Naho nakufumwere endimi zona z’abantu n’ez’abamalaika, nkaba ntali n’obwenzi, ndi nk’isaba elikulira, hamo enkube ezikugamba. ² Kandi naho nakubere n’obulagi, naho nakumanyire enfubo zona n’obumanyi bwona, naho nakubere no kwikiriza kwingi mpiche kufurur’amabanga, nkaba ntali n’obwenzi, tindi kintu. ³ Kandi naho nakugabire ebintu byange byona ndisye abahabi, naho nakuhereze engingo zange bazyoche, nkaba ntali n’obwenzi, ebyo byona tibyakungasire kintu.

⁴ Obwenzi ni bweguminsiriza, bwizwire obufura. Obwenzi tibuli n’ichubi, tibukwekuhya, tibukwekuza; ⁵ tibukwegonga ikuzo, tibuhiga ebikugasa, tibuchahara, tibulamula chonka amabi; ⁶ tibusemererwa obubi, nawe bukusemererwa obukomereza; ⁷ bukwemera byona, bukwikiriza byona, bukutegeza byona, bukweguminsiriza muli byona. ⁸ Obwenzi tibulisuka, naho obulagi bukahwaho hamo endimi, naho obumanyi bukasingarika. ⁹ Kuba tukumanya ekihinzu, kai tukulaga ekihinzu; ¹⁰ nawe ebihikire ka biliza, eby’ebihinzu byona bilihwaho.

¹¹ Nkili namuto, naliga ninfumora nka namuto, nindamula nka namuto, nintekateka nka namuto; nawe ka nakuzire, nkaleka ebyaliga bili bya namuto. ¹² Hati tukubona nka mw’ilore, mw’ikoyesyo; aho tulibona kigi na kigi. Hati nkumanya ekihinzu chonka; aho ndimanya nk’okwo nkumanywa. ¹³ Hati ziliho entungwa isatu zinu: kwikiriza, kutegeza no kwenda; nawe kwenda kukizire ezindi.

ENGABIRANO Y’ENDIMI N’EY’OBULAGI.

¹ Muhigega obwenzi, mwegongega engabirano z’omwoyo, munomuno obulagi. ² Kuba omufumozi w’olulimi olutamanywa tafumorera abantu, nawe Mungu, kuba taliho akumuhulira, kai akutenga eby’enfubo mu mwoyo. ³ Nawe omulagi akufumorera abantu, abagumye, abahane, abahumuze. ⁴ Omufumozi w’olulimi akwegumya omwene; nawe omulagi akugumya Eklezia ya Mungu. ⁵ Mbe nkwenda mufumor’endimi zona, nawe munomuno mulage; kuba omulagi akukira omufumozi w’endimi, raba si nasombora endimi, niho Eklezia egumisibwe.

⁶ Mbe hati, bana betu, nkiba niniza hal’imwe ninfumora endimi ezitamanywa, nkubagasira ki, nkaba ntabagambire, hamo mu busuruzi, hamo mu bumanyi, hamo mu bulagi, hamo mu bwolekerezi? ⁷ Ebintu ebitali na mwoyo ebikulira, nk’olugoza n’itungu, bikabura kutaganisya amalaka, tukumanya tuta ebyo bakuzana ha lugoza hamo h’itungu? ⁸ Kuba ekikuli kikalira buyagayaga, ni ga alyetegeka kurwana? ⁹ Imwe mwena nikwo, olulimi lwanu lutasombokire, balimanya bata ebyo mukufumora? ¹⁰ Kuba endimi ni kingaha mu nsi munu, kai tiluliho na lumo olutali n’ensonga zalwo. ¹¹ Mbe nkaba ntakumanya ensonga z’ebigambo, ndiba mubisi ha meso g’omuntu owe nkufumorera, kai akunfumorera aliba mubisi ha meso gange. ¹² Mbe n’emwe mwena, obwo mukwegonga mani engabirano z’omwoyo, muhige kuzikanisya, niho mugumye Eklezia.

¹³ Mbe hatyo omufumozi w’olulimi lumo asabe, ahiche kulusombora. ¹⁴ Kuba nkasoma mu lulimi olwo ntakumanya, omwoyo gwange gukusoma, nawe obwenge bwange tibugasirwa kintu. ¹⁵ Mbe ngire nta? Ndisoma n’omwoyo, nawe hona ndisoma n’obwenge; ndiyemba n’omwoyo, nawe hona ndiyemba n’obwenge. ¹⁶ Okasima n’omwoyo gwonka, abali ha mwanya gw’embaga balisubiramo bati ki: Amina, ha busimi bwawe, obwo batakumanya eby’okugamba? ¹⁷ Okusima kuzima nikwo, nawe abandi tibagumisibwa. ¹⁸ Nkusima Mungu, obwo nkufumora endimi zanu zona; ¹⁹ nawe hakili nfumore mw’eklezia ebigambo bitanu byonka ebyo nkusombokerwa, mpiche kwolekerera abandi, kukira ebigambo bihumbi ikumi mu lulimi olutamanywa.

ENGABIRANO Y’OBULAGI EKUGASA KUKIRA ENGABIRANO Y’ENDIMI.

²⁰ Bana betu, mutaba banamuto ha bw’obwetegereza, nawe mube banamuto ha bw’obubi; mube n’obwenge nk’abantu bahikire. ²¹ Chandikirwe mu Kilagiro kiti: Ndifumorera embaga enu mu ndimi zindi n’eminwa z’ekigeni; kai hona tibalimpulira, engambo y’Omukama. ²² Mbe hatyo endimi ni mbaliriro, ha bekiriza pai, nawe ha batekiriza; kai obulagi tibuli ha batekiriza, nawe ha bekiriza. ²³ Mbe hatyo eklezia yona ekasumba hamo, bakasugana kufumora endimi zindi, kai bakatahamo abantu b’embaga hamo abasenzi, si tibaligamba bati: mukusara? ²⁴ Nawe bona bakalaga, kai akazamo omusenzi hamo omuntu w’embaga, akusingwa bona, akulamurwa bona, ²⁵ ebiserekire by’omutima gwe bikusokoka: hatyo nagwa buzumi, nahabudu Mungu, naikiriza ati: Koto Mungu ali mul’imwe.

²⁶ Mbe tugire tuta, bana betu? Ka mukusumba hamo, raba omo ali n’olwembo, ondi obwolekerezi, ondi obusuruzi, ondi olulimi, ondi obusombozi bwalwo, mbe byona bibe byo kugumya abandi. ²⁷ Bakabaho abali n’engabiro y’endimi, babili hamo basatu, kukir’aho pai, nibo bafumore nibarubarubana, kai ondi azisombore. ²⁸ Omusombozi ataliho, babuze mw’eklezia, bayefumorere abene na Mungu.

²⁹ Kandi abalagi, babili hamo basatu bafumore, kai abandi balamule. ³⁰ Raba omo w’abekere nasururwa, owo kutandika ayesize. ³¹ Kuba mukuhicha kulaga mwena nimurubarubana, niho bona bayege, bona bahanwe. ³² Emyoyo z’abalagi zikuhulira abalagi. ³³ Kuba Mungu tali w’etobangu, nawe w’omulebo, nk’okwo nkwolekerera mw’eklezia zona z’abatakatifu.

³⁴ Abakazi bayesize mw’eklezia, kuba tibali n’omwanya gwo kufumoramo, nawe bahulire, nk’okwo Ekilagiro kikugamba. ³⁵ Raba nibayenda kuyegesibwa ekintu, babuze beba mu ka; kuba ni nsoni omukazi kufumora mw’eklezia. ³⁶ Si ekigambo cha Mungu kirugire hal’imwe? hamo si kikahika hal’imwe mwenka? ³⁷ Raba omuntu nachwa ati: ndi mulagi, hamo ati: nkumanya eby’omwoyo, aikirize okwo binu ebyo nkubayandikira bili bilagiro by’Omukama. ³⁸ Atakwenda kumanya, alibura kumanywa. ³⁹ Mbe hatyo, bana betu, mwegonge kulaga, kai mutazibiraga kutenga endimi zindi; ⁴⁰ nawe byona bikorwe kuzima, nzira tobangu.

KUZOKA KWA YEZU.

¹ Bana betu, hati nkubezukiza evanjeli eyo nabolekerere, eyo mwayanankwile, eyo mugumiremo, ² elibachungula, ka muliba mugigumize, nk’okwo nagibolekerere, kwikiriza kwanu kutaba kwa busa. ³ Kuba nkatandika kubaha ebyo naherwe ine omwene, nka binu: Kristu akafwer’ebiheno byetu, ha bw’Enandiko; ⁴ akazikwa, akazoka olunaku lwa kasatu, ha bw’Enandiko; ⁵ akabonwa Kefa, kumara ikumi n’omo; ⁶ kandi akabonwa batabani betu magana atanu hamo n’obusago, abakiliho abandi na hati, kai abandi bafwire; ⁷ nabonwa Yakobo n’Entumwa zona; ⁸ kai kuhereruka bona, akabonwa ine, kuti ntahikire. ⁹ Kuba nkukirwa Entumwa zona, kai timpikire kwetwa ntumwa, kuba nkanazya Eklezia ya Mungu. ¹⁰ Nawe enema ya Mungu yangizire echo ndi, kai enema ye tiyakozire busa chonka mul’ine; nawe nkakol’emilimo kukira abo bona: ine pai, nawe enema ya Mungu mul’ine. ¹¹ Mbe, naho ine, naho bonene, niby’ebyo tukwolekerera, kai niby’ebyo mwekirize.

KUZOKA KW’ABAFU.

¹² Mbe nawe raba nitwolekerera okwo Kristu yazokire mu bafu, kai hati si abandi mul’imwe bakuhicha bata kugamba bati: Kuzoka kw’abafu tikuliho? ¹³ Raba kuzoka kw’abafu kutaliho, Kristu wena tiyazokire. ¹⁴ Kandi raba Kristu atazokire, obwolekerezi bwetu ni bwa busa chonka, kai kwikiriza kwanu kwona ni kwa busa. ¹⁵ Mbe hatyo tuli mbona z’obuzigi za Mungu, obwo tugambire hali Mungu okwo yazozire Kristu, kai kunu tiyamuzozire, raba abafu batazoka. ¹⁶ Kuba, raba abafu batazoka, Kristu wena tazokire. ¹⁷ Kristu atazokire, kwikiriza kwanu ni kwa busa; kuba muchali mu biheno byanu. ¹⁸ Mbe abanagiremuli Kristu babuzire. ¹⁹ Raba nitutegeza muli Kristu kuber’obulame bunu bwonka, tuli banaku kukir’ abantu bona. ²⁰ Nawe hati Kristu yazokire mu bafu, nka katanga k’abanagire.

²¹ Kuba omuntu omo alesire olufu, kai omuntu ondi alesire kuzoka kw’abafu. ²² Kandi nk’okwo muli Adamu bona bakufwa, nikwo na muli Kristu bona balihimboka; ²³ kai buli muntu mu mwanya gwe: Kristu nka katanga, kumara abali ba Kristu, abekirize kwiza kwe. ²⁴ Mbe aho omuhero gulibaho, k’alisubiza engoma hali Mungu na Tata, yamazire kusingaricha buli bukuru na buli buhicha na buli mani. ²⁵ Nawe ali no kutwara kuhika alibatirize ebigere bye abahate bona. ²⁶ Omuhate wo kuhereruka wo kusingarika luliba olufu: kuba Mungu akataho buli kintu chona ifwo y’ebigere bye. Kandi Enandiko ka zikugamba ziti: ²⁷ Byona bikamugwana, bili ha bweru okwo bakwihamo ayamugomorweze byona. ²⁸ Mbe byona ka bilagwana ha Mwana, wenene Omwana aligwana hali onu ayaliba amugomorweze byona, niho Mungu abe byona muli bona. ²⁹ Bikabura kuba bityo, abakubatizibwa kuber’abafubaligira bata, raba abafu batazoka n’akati? kubaki bakubatizibwa kubera bonene? ³⁰ Kai itwe abene kubaki tuli mu bitegezi buli katungu? ³¹ Buli lunaku nkufwa, bana betu, ha bw’ikuzo elyo nkuhabwa muli Kristu Omukama wetu. ³² (Ka ntenge kimuntu), naho narwene n’ebikaka Efwezi, nkugasirwa ki, abafu bakabura kuzoka? Tulye, tunwe, kuba nencha tukufwa.

EMIZOKIRE Z’ABAFU.

³³ Mutekiriza kuzigwa: Enfumora mbi ekuzunzy’entungwa nzima. ³⁴ Mwekenge, imwe bazima, mutakundaga kuhena, kuba abandi tibakumanya Mungu: nkubagambira ebyo, mukorw’ensoni. ³⁵ Nawe ondi ati: Abafu balizoka bata? baliza n’engingo zita? ³⁶ Musiru we, ech’okubiba tikikumera, kitatandikire kufwa. ³⁷ Kai k’okubiba, tokubiba ekintu ekilizarwa, nawe embibo yonka, hamo y’engano hamo y’ekintu kindi. ³⁸ Nawe Mungu akugiha engingo nk’okwo akwenda; naha buli mbibo engingo zayo. ³⁹ Engingo zona tizikwingana: engingo z’abantu ni zindi, ez’ebitunganwa ni zindi, ez’enoni ni zindi, ez’enfwi ni zindi. ⁴⁰ Hona ziliho engingo z’oluguru n’ezo mu nsi; nawe obwengerezi bw’ez’oluguru ni bundi, n’obw’ezo mu nsi ni bundi. ⁴¹ Obwaki bw’ezoba ni bundi, kai obwaki bw’okwezi ni bundi, n’obwaki bw’enenezi ni bundi; kuba enenezi endi tekwaka nk’enenezi endi. ⁴² Nikwo no kuzoka kw’abafu. Engingo zikubibwa mu buzunde, nawe zilizoka mu butazunda. ⁴³ Zikubibwa mu nsoni, kai zilizoka mw’ikuzo. Zikubibwa zinogire, kandi zilizoka zili n’amani. ⁴⁴ Zikubibwa zili ngingo z’ekinangingo, zilizoka zili ngingo z’ekinamwoyo. Raba ziliho engingo z’ekinangingo, hona ziliho engingo z’ekinamwoyo, nk’okwo chandikirwe kiti: ⁴⁵ Omuntu wo kutandika, Adamu, akagirwa mwoyo ogukulora, kai Adamu wo kuhereruka akagirwa mwoyo ogukuloza.

⁴⁶ Nawe ekinamwoyo ti cho kutandika; ekinangingo nicho kikutandika, ekinamwoyo kikuhereruka. ⁴⁷ Omuntu wo kutandika ayarugire mw’itaka, ni w’ekinansi; omuntu wa kabili, ayarugire mw’igulu, ni w’ekinegulu. ⁴⁸ Nk’okwo ow’ekinansi ali, nikwo bali ab’ekinansi; kai nk’okwo ow’ekinegulu ali, nikwo bali ab’ekinegulu. ⁴⁹ Mbe nk’okwo twategwile ekisusano ch’ow’ ekinansi, nikwo tutyo tutegule ekisusano ch’ow’ekinegulu. ⁵⁰ Bana betu, nkugamba nti: engingo n’ensagama tizikuhicha kutunga obukama bwa Mungu, kai obuzunde tibulitunga obutazunda.

⁵¹ Lora, nkubagambira olufubo lunu: tulizoka twena, nawe titulisanga twahindukire twena. ⁵² Mu katungu kamo, mu kakebulire k’eliso, ha kalilire k’ekikuli cho kuhereruka, kuba ekikuli kililira, abafu balizoka batakizunda, kai itwe tulisanga twahindukire. ⁵³ Kuba engingo zinu ezikuzunda zili no kuzwar’obutazunda, n’engingo z’amafwerezi zinu zili no kuzwar’ obutafwa. ⁵⁴ Engingo zinu ezikufwa ka zilizwar’obutafwa, aho kilihika ekigambo kinu echandikirwe kiti: Olufu lukamirwa obusingi. ⁵⁵ Iwe lufu, obusingi bwawe buli hai? iwe lufu, olubuli lwawe luli hai? ⁵⁶ Mbe olubuli lw’olufu nicho ekiheno, kai amani g’ekiheno nicho ekilagiro. ⁵⁷ Nawe akuzibwe Mungu, ayatuhere kusinga ha bw’Omukama wetu Yezu Kristu. ⁵⁸ Mbe, bana betu abo nkwenda, mugume, musimbagirire, mukane kukola buchabucha n’amani omulimo gw’Omukama, nimumanya okwo mutakukola busa mu Mukama.

EMIHEREZO. — OLUGENDO LWA PAULO LWA KORINTI.

¹ Eby’ebintu ebyo bakobya byo kuhwera abatakatifu, imwe mwena mukole nk’okwo nalagire eklezia za Galasiya. ² Olunaku lwo kutandika lw’obwoyo buli muntu mul’imwe abike mu ka, nakume mpolampola ebyo alayenda, mutalinda nize niho mubikobye. ³ Ka ndasanga nezile, ndituma n’ebaruwa abo mulasora, basagare Yeruzalemu emiherezo zanu. ⁴ Ka ndabona okwo kihikire, ngende ine omwene, baleza nene.

⁵ Mbe ndibazaho, namazire kuraba Masedoniya, kuba ndiraba Masedoniya; ⁶ kamba ndikara owanu, kamba ndimarayo enaku z’enzula, niho munsagare honahona aho ndigenda. ⁷ Kuba lero linu tinkwenda kurabaho chonka, nawe nkutegeza kwikara kanya n’emwe, raba Omukama naikiriza. ⁸ Mbe nawe nkwikara Efwezi kuhika Pentekoste. ⁹ Kuba omulyango gugazihire gunkingukire, kai abahate bali bengi.

TIMOTE, APOLO, STEFANASI N’ABANDI.

¹⁰ Raba Timote naiza, mulore abe mul’imwe, nzira kutina; kuba akukol’omulimo gw’Omukama nk’ene. ¹¹ Mbe hatabaho omuntu n’omo wo kumugaya; nawe mumusagare n’omulebo, aize hal’ine, kuba nkumulindirira n’abatabani betu. ¹² Ebya mutabani wetu Apolo, nkubagambira nti: nkamulembereza muno aze hal’imwe n’abatabani betu, nawe sanga atakwenda n’akati kugenda hati: aligenda k’alibona omwanya.

¹³ Mwekenge, musimbagirire mu kwikiriza, mugire kiseza ch’amani, kandi mweguminsirize; ¹⁴ ebikorwa byanu byona bikorwe n’obwenzi.

¹⁵ Bana betu, nchabasaba ekigambo kimo, ni kinu: mukumanya okw’amaka ga Stefanasi na Fortunati n’Akayiki gali go kutandika g’Akaya, n’okwo bayetereho abene kukolera abatakatifu; ¹⁶ muhe isima abantu nk’abo batyo, n’abandi abakukola nabo. ¹⁷ Nkusemererwa obwo Stefanasi na Fortunati n’Akayiki bali kunu, kuba bakozire ebyo sanga mutakuhicha kukola imwe abene, ¹⁸ kuba bahumwize omwoyo gwange n’ogwanu. Mbe mumanye kusima abantu nk’abo batyo.

KUKESYA KWA PAULO.

¹⁹ Eklezia z’Azia zikubabwacha. Akwila na Prisila, aho ntwire, bakubabwacha muno mu Mukama, hamo n’eklezia elimo mu ka yabo. ²⁰ Abatabani betu bona bakubabwacha. Mubwachanye n’omunwegero mutakatifu. ²¹ Nkubabwacha n’omukono gwange, ine omwene Paulo.

²² Omuntu akabura kwenda Omukama wetu Yezu Kristu, azumirizibwe; Maran Atha. ²³ Enema y’Omukama wetu Yezu Kristu ebe n’emwe. ²⁴ Obwenzi bwange buli hal’imwe mwena muli Kristu Yezu. Amina.