Лука эԓты уԓты Евангелие

Лука эԓты уԓты Евангелие

Лука эԓты уԓты Евангелие

¹Хун ар хŏйат, мўӈ тŏрԓы уйтәм верԓув эԓты, хӑшты питәс,

²хун мўӈева мет оԓәӈ вантәм хŏйатәтән щит айкеԓа туса пӑ щи йўпийән ԓыв йасәӈ туты хŏйатәта питсәт,

³ма пӑ щи вер эԓты нумәссәм, йӑмәс ԓэрапман, оԓӈәԓ эԓты ԓŏватәԓән йўпеԓ тўвман, нӑӈ урӈена йэшәк Феофил, щит нэпека хӑшты нŏмәс ўсәм,

⁴йӑна уԓәм утәԓтәпса, хŏты утәԓтәсайән ԓуԓән нӑӈ йӑма ат мŏштәсэн.

Захария Турәм хотән йэмәӈ верәт верәԓ

⁵Иудея мўвән Ирод ики хона уԓәм пŏрайән, Захария нэмпи Авия пеләк эԓты Турма йир верты хŏйат ус; ԓўв итэԓән Елизавета ийимеԓ пӑ Аарон рут эԓты ус.

⁶Ԓын кинәӈтак Турәм йэԓпийән тўӈа–щира усӈән, Турәм Куща1:6 Турәм Куща – Турәм нэмтәм щир партәпса йасӈәт пӑ мŏрт щира верәт сыстама версәӈән.

⁷Туп ԋаврэм ӑт тӑйсәӈән: Елизавета ӑт ԓавәртәмәԓа пӑ щиты щи ԓын пирщамәсайӈән.

⁸И пўш, Захария хŏйатԓаԓ пиԓән ԓыв пŏрайэԓән, Турма йэмәӈ верәт верман, уԓмаԓән,

⁹ԓўвеԓа питәм пос xўват, xŏты уԓтыйән Турма йир верты xŏйатәт xŏща уԓԓыйәс, Турәм Куща Хот йэмәӈ йӑтәԓа ԓŏӈты пӑ щита йоԓ кўшмәԓтты вера йис.

¹⁰Мир, щи йоԓ кўшмәԓтты пŏрайән, Турма ким пеләк сӑхат пойәкщәсәт.

Ангел Иоанн йиӈка ԓŏӈәԓтыты хŏйат сэма питты вер аԉәԓ

¹¹Щи сыс Турәм Куща ангел Захария сэма этәс, йоԓ кўшмәԓтты йирасты нŏрәм ԉэпән йӑм пеләк сӑхат ԓойәс.

¹²Захария, Ԓўвеԓ кащаԓәмаԓ кемән, нŏпсәԓ ԓыԓэмәс, пӑ пӑԓщәмән йŏхәтса.

¹³Ангел щиты йастәс ԓўвеԓа: "Аԓ пӑԓа, Захария: нӑӈ пойкен хуԓса! Елизавета ийименән пŏхән туԓайән, пӑ нӑӈ ԓўвеԓ Иоанн нэмән пŏнԓэн;

¹⁴нӑӈена амәт пӑ каш питәԓ, ар хŏйат, ԓўв сэма питмаԓ урәӈән, амтәтԓыты питәԓ.

¹⁵Турәм Куща хŏща ԓўв ԓӑтәӈа питәԓ, ўна пӑ па кўтрәӈ ŏт йищты ӑт питәԓ, пӑ хŏԓна аԋԏеԓ хŏща пӑтлам хотән уԓман Йэмәӈ Ԓыԓән тэкәнԓа,

¹⁶пӑ ар хŏйат Израиль йох эԓты Турәм Куща пеԓа керәтԓәԓы;

¹⁷Ԓўв Турәм Куща йэԓпийән, Илияйа мийԓыйәм хŏрпи ԓыԓ пӑ йур пиԓән мӑнты питәԓ, ащет сӑм ԋаврэмԓаԓа йŏхԓы мӑты урәӈән, ӑт хуԓәтты хŏйатәта тўӈа–щира уԓты нŏмәс мӑты урәӈән. Щиты Турәм Куща урәӈән хŏйатәт ԓэщатәԓ”.

¹⁸Захария ангела йастәс: "Xŏты сӑхат ма щи вер уйәтԓэм? Ма пирщамәсайәм, имем пӑ тӑԓԓаԓ арамәсәт".

Захария пŏтәртты ӑт верәтәԓ

¹⁹Ангел йŏхԓы йастәс: "Ма – Гавриил, Турәм пўӈәԓән ԓойты ангел, нӑӈ пиԓэнән пŏтәртты пӑ нӑӈена тӑм йӑм айкеԓ туты китсайәм.

²⁰Мўйа нӑӈ ма йасәӈԓама ӑт эвәԓсән, ин нӑӈ мӑшйайән уԓты питԓән, пӑ хŏԓна щи унты пŏтәртты щир ӑт тӑйты питԓән, хун аԉәм верэм йŏхәтәԓ, мŏрт пŏрайән ԓыв тӑԓаӈа йиԓәт”.

²¹Щи сыс мир камән Захария ԓавәԓсәт пӑ нумәсты питсәт, мўйа ԓўв щиты Турәм Хотән рŏнащәԓ.

²²Ԓўв ким этмаԓән, нэмәԓты хŏйат пеԓа пŏтәртты ӑт веритәс. Хŏйатәтән ŏша пӑйәтса, ԓўв, иԓампа, Турәм Хотән мŏԓты йэм вантәс; щиӈәԋща ԓўв хŏйатәт пеԓа ԓўйән-паӈән аԉисыман пŏтәртәс, ўӈәԓԓы щиты щи ус.

²³Туп хун ԓўв йэмәӈ верәт верты хӑтәԓԓаԓ йэтшәсәт, йŏхи йŏхтәс.

^24-25Щи йўпийән Елизавета имеԓ ԓавәрта йис, пӑ вет тыԓәщ хŏйатәт эԓты хӑԋатыйәс пӑ пŏтәртыйәс: "Турәм Куща тӑм хӑтԓәтән ма урӈема щи йӑм верәс, ма эԓтайэм хŏйатәт ԋухматты вер нŏх ўты урәӈән, ма пеԓайэм аԋкәрмәс".

Гавриил Христос сэма питты вер аԉәԓ

^26-27Хун Елизавета xутмет тыԓәщ ўшән уԓмаԓән, Турәм Гавриил нэмпи ангел Галилея мўвән уԓты Назарет воша эви xŏща китсәԓы. Щи эви Иосиф xŏща уртыса, Иосиф Давид рут эԓты уԓ. Эви нэмәԓ: Мария.

²⁸Ангел ԓўв хŏщайәԓ ԓŏӈмаԓән, йастәс: "Амтәтԓыйа, йӑм мŏщатәм нэ! Турәм Куща Нӑӈ пиԓэнән уԓ; имет кўтән йӑмән мийәм нэ!"

²⁹Мария ԓўвеԓ кащаԓәмаԓ кемән, щи йасәӈԓаԓ эԓты нŏпсәԓ ԓыԓэмәс пӑ нумәсәс: мўй тӑмәщ ўща верты щир.

³⁰Ангел пӑ ԓўвеԓа йастәс: "Аԓ пӑԓа, Мария! Турәм нӑӈ пеԓайэн йӑм щирән ӑӈкәрмәс;

³¹ԓавәрта йиԓән пӑ Пŏх сэма пайәтԓән, Иисус нэмән Ԓўвеԓ пŏнԓэн.

³²Ԓўв ԓӑтәӈ питәԓ, пӑ Нўм Турәм Пŏха айәԓты питԓа; Турәм Куща Ԓўвеԓа Давид ащеԓ хон омәсты тӑха мӑԓ.

³³Щӑԓта Ԓўв Иаков хот тэԓ хŏща веккеша хона уԓты питәԓ, пӑ Хон Уԓәпсайәԓ нэмәԓты пŏрайән ӑт йэтшәԓ".

Ӑнтом хŏйат щирән тыйты вер

³⁴Мария ангела йастәс: "Xŏты сӑхат щиты питәԓ, ма xу сайән уԓты вер хŏԓна ӑт уйәтԓэм?"

³⁵Ангел йŏхԓы йастәс: "Йэмәӈ Ԓыԓ Нӑӈ хŏщайэн эсԓәщәԓ пӑ Нўм Турәм йурән йŏхәтԓайән, щишән сэма пайәтты йэмәӈ Ԋаврэмийэн Турәм Пŏха айәԓтты питԓа.

³⁶Ин Елизавета, xŏйатәтән таԓа айәԓтәм Нӑӈ рут нэӈен, кўш пирщамәса, ищи пŏх ԓавәԓәԓ: ин ԓўв хутмет тыԓщәԓ.

³⁷Турәм и йасӈәԓ йурԓы ӑт уԓԓыйәԓ".

³⁸Мария йастәс: "Щишән, ма Турәм Куща митнэ; нӑӈ йасӈен щира ма xŏщайэм щи вер ат тыйәԓ". Щи йўпийән ангел ԓўвеԓ утща хӑйсәԓы.

Мария Елизавета хŏща йӑӈхәԓ

³⁹Йэша ус, щи йўпийән Мария ԓэщатэмийәс пӑ сора Иуда кевәтән уԓты воша мӑнәс.

⁴⁰Захария хота ԓŏӈәс пӑ Елизавета пиԓән ўща верәс.

⁴¹Хун Елизавета Мария эԓты ўща йасәӈ хуԓмәс, сӑмәԓ иԓпийән тӑйты ԋаврэмәԓ ԋŏхԓыйәс. Щи кемән Елизавета Йэмәӈ Ԓыԓән тэкәтса,

⁴²пӑ ԓўв такан йастәс: "Нӑӈ имет кўтән йӑмән мийәм нэ, сӑм иԓпенән тӑйты ŏтыйэн ищи йӑмән мийәм!

⁴³Мўй щирән щит тыйәс? Ма хŏщайэма Турәм Кущайэм аԋԏи йŏхтәс!

⁴⁴Ванта-са: хун ма нӑӈ ўща верты сыйэн хуԓмәсәм, щи пŏрайән ԋаврэмем сӑмем иԓпийән амәтман ԋŏхԓыйәс.

⁴⁵Ин эвԓәм нэ щўԋԓән, Турәм Куща эԓты йастәм йасӈәт тӑԓаӈа йиԓәт, щишән".

⁴⁶Щӑԓта Мария йастәс: "Ма сӑмем Турәм Куща ԓӑтәӈа айәԓԓәԓы,

⁴⁷Ма сӑмемән шек амтәтԓыԓәм Турмем урәӈән, ма ԓыԓэм Этәԓтәты Ŏтэм урәӈән,

⁴⁸Ԓўв митнэ лэӈкеԓ пеԓа сэмәԓ пайәтсәԓы, тӑԓта йэԓԓы ин омәсты мир, йӑԓпа йиты мŏхет мӑнэм щўԋән мийәм нэӈа айәԓты питԓэԓ;

⁴⁹Йурәӈ Ŏт мӑнэм вŏԓаӈ верәт вермаԓ урәӈән, пӑ Ԓўв Нэмәԓ йэмәӈ,

⁵⁰Турәм сӑмәӈ верәԓ кашәӈ Ԓўв эԓтайәԓ пӑԓты хŏйата, ин уԓты пӑ йӑԓпа йиты мŏхета, уԓты питәԓ;

⁵¹Ԓўв йурәӈ йошәԓ этәԓтәсԓы; сӑмԓаԓән йŏрәӈ нŏмәс тӑйты хŏйатәт лакки йовәԓсәԓы;

⁵²ун кущайәт кущайа омәсты тӑхайԓаԓ эԓты иԓ пайәтсәԓы, лэӈкийа уԓты хŏйатәт нŏх эԓәтсәԓы;

⁵³ԓэԓԓы уԓты хŏйатәт йӑм эԓты ԓапәтсәԓы, тащәӈа уԓты хŏйатәт таԓты китсәԓы.

⁵⁴Ԓўв Израиль митхуйәԓа ԋотыԓыйәс, аԉәм сӑмәӈ щирәԓ нумман,

⁵⁵хŏты мўӈ опращԓува йастыԓыйәс, Авраама пӑ йиты ԋаврэмԓаԓа веккеша".

⁵⁶Мария Елизавета хŏща хуԓәм тыԓәщ кем мойԓәман ус, щӑԓта йŏхи мӑнәс.

Елизавета Иоанн сэма пайәтәԓ

⁵⁷Елизавета пŏрайәԓ йŏхтәс пӑ пŏх сэма пайтәс.

⁵⁸Ванән уԓты хŏйатәтән пӑ рутԓаԓән хуԓса, хŏты ԓўв урӈәԓән Турәм Куща ԓӑтәӈ сӑмәӈ вер аԉәс пӑ ԓўв пиԓәԓән амтәтԓысәт.

⁵⁹Нийәԓмет хӑтәԓән ԓыв ԋаврэм хŏща эвәтты вер1:59 Эвәтты вер - еврейәт хŏща сэма питәм ху ԋаврэм ԋийәԓмет хӑтәԓән ху пŏрмасәԓ хŏща лыпащ поԋам шўкәԓ хŏԓт эвәтмәԓа. урәӈән йŏхәтсәт пӑ ащеԓ иты Захария нэма пŏнты ўтщисэԓ.

⁶⁰Туп Елизавета йастәс: "Ӑнта, Иоанн нэмән пŏнԓэв".

⁶¹Ăктәщәм хŏйатәт йастәсәт: "Нӑӈ рутэн кўтән тӑмәщ нэм тӑйты и хŏйат нэш ӑнтом!"

⁶²Ащеԓ эԓты ԓўйән-паӈән аԉиԓыман иԋщәсты питса, мўйсыр нэм ԓўв ԋаврэмәԓа мӑты ԓӑӈхас.

⁶³Хӑшты сохәԓ вохәс пӑ хӑншәс: "Ԓўв нэмәԓ Иоанн". Ăктәщәм хŏйатәт йасәӈ ӑт шитԓәт, ӑԓ щи ватԓәт.

⁶⁴Щи пўԉаӈ ԓўв ўӈԓәԓ-ԋаԓмәԓ пел пўншаԋщәс, пӑ Турәм ишәкман пŏтәртты питәс.

⁶⁵Щиӈәԋща ԓывиԓаԓ керәтман уԓәм хŏйатәт пӑԓщәмән йŏхәтсайәт, пӑ ин щи вер эԓты кев пеләк Иудея мўв ԓŏватән пŏтәртты питса.

⁶⁶Хŏйән айкеԓ хуԓса, хŏԓыйэ ԓыв сӑма пŏтсэԓ пӑ пŏтәртсәт: "Xŏйа тӑм ԋаврэм йиԓ?" Турәм Куща йош ԓўв пиԓәԓән ус.

Захария Иоанн йэмәӈ верәт верты эԓты пŏтәртәԓ

⁶⁷Щӑԓта Захария, Иоанн ащи, Йэмәӈ Ԓыԓән тэкәтса, Турәм эԓты хуԓәм йасәӈԓаԓ пŏтәртты питәс:

⁶⁸"Турәм Куща - Израиль Турәм ат ишәкԓа, Ԓўв Израиль мирәԓ хŏща йŏхтәс пӑ хŏԓт пайтәсты щир мӑс,

⁶⁹пӑ мўӈева ԓыԓ этәԓтәты йурәӈ Ŏт Давид, митхуйәԓ, рут сӑхат мӑс,

⁷⁰хŏты йис тэԓән Турәм йасәӈ туты йэмәӈ xŏйатԓаԓ ўӈәԓән пŏтәртәс,

⁷¹щит мўӈев веԓты ŏтԓув эԓты пӑ мўӈиԓув нўрыты ŏтԓув эԓты мўӈев нŏх пайәтԓәԓы,

⁷²мўӈ ащиԓув пиԓән сӑмәӈ верәԓ ватәԓтәԓ пӑ Ԓўв йэмәӈ йастантәм щирәԓ нумԓәԓы,

⁷³Ԓўв Авраама, ащева, мийԓыйәм йасӈәԓ нумԓәԓы, мўӈева,

⁷⁴мўӈ нўрәӈ ŏтԓув эԓты нŏх пайәттаԓ йўпийән, хурԓыйа Ԓўвеԓа

⁷⁵йэмәӈ пӑ вещкат щирән кашәӈ хӑтәԓ уԓәпсайэвән митйоxа уԓты вер мӑԓ.

⁷⁶Нӑӈ ищи, ԋаврэмийэ, Нўм Турәм йасәӈ туты хŏйата нэмәтԓайән, Турәм Куща йэԓпийән мӑнты питԓән:

Ԓўв кешайәԓа йуш ԓэщатты урәӈән,

⁷⁷Ԓўв мирәԓа щит ŏша пайәтты мӑты урәӈән: кӑрэкԓаԓ1:77 кӑрэк - словарь ванта; йŏрэмәты щир хŏща ԓыԓ этәԓтәты вер уԓ,

⁷⁸Турмев йӑм сӑм хўватән, Ԓўв йӑԓпа этты хӑтәԓ иты, нумәԓта мўӈ хŏщайэва йŏхтәс,

⁷⁹пӑтламән пӑ хӑԓа хŏрән уԓты xŏйатәт нŏх хутԓәптәты урәӈән, мўӈ кўрԓув пайԓы уԓәпса йуш хўват мӑнәԓтты урәӈән."

⁸⁰Ԋаврэмийэ щи сыс энмәԓтыйәс пӑ ԓыԓәԓ-нŏпсәԓ такамтыйәс, таԓ шитам тӑхайәтән Израильәԓ хŏща эттаԓ унты ус.

Иисус сэма пайәтса

¹Щи хӑтԓәтән Август нэмпи кесарь ики йасәӈ китәс, Ԓўв мўвәԓ ԓŏватән уԓты хŏйатәт нэпека ат хӑшсайәт.

²Щит мет оԓәӈ хŏйат ԓӑт щирән хӑншәпса ус. Щи пŏрайән Сирия мўвән Квириний нэмпи куща ус.

³Нэпека пайтәсты кеша кашәӈ хŏйат ԓўв йŏра вошәԓа мӑнәс.

⁴Щи урәӈән Иосиф па Галилея мўвән омәсты Назарет вош эԓты, Иудея мўва Давид ики воша, Вифлеема, мӑнәс. Ԓўв Давид хот пӑ рут эԓты ус,

⁵ԓўв, нэпека питты урәӈән, Мария пиԓән мӑнәс. Мария ԓўвеԓа уртыса пӑ щи пŏрайән ԓавәртан ус.

⁶Щита уԓман сыс, ԋаврэмәԓ сэма питты пŏра йŏхтәс.

⁷Пŏхән, оԓәӈ Ԋаврэмәԓән, йŏхәтса, сŏха Ԓўвеԓ йŏвәртсәԓы пӑ вой ԓапәтты хŏшапа пŏтсәԓы, хŏйат хоԓты хотән ŏԓты тӑха ӑт мŏщатсәӈән.

Ангеләт вой шавиты хŏйатәта Иисус эԓты амәт айкеԓ тусәт

⁸Щи ԉэпән, мўв хӑрән вой тащ шавиты икет ат ԓавәԓман усәт.

⁹Турәм Куща ангел ԓыв йэщаԓтэԓ этмәс пӑ Турәм Куща йэмәӈ нŏвийән ԓыв нŏх xутԓәптысайәт; ԓыв шек пӑԓтамәсәт.

¹⁰Туп ангел ԓывиԓаԓа йастәс: "Аԓ пӑԓаты! Ма нынана амтәтԓыты ун айкеԓ туԓәм, щи амәт иса тӑм мўв хŏйатәта уԓты питәԓ:

¹¹тӑм ат Давид вошән нынан Ԓыԓ Этәԓтәты Ŏт – Христос, Турәм Куща сэма питәс;

¹²тӑта щи нынана пос: вой ԓапәтты хŏшапән йŏвәртәм Ԋаврэмийэ уйәтԓәты".

¹³И щишән ангел пиԓән аратәԓ турәм ԉаԉ йоx йŏхәтсәт, Турәм ишәкԓәт пӑ такан йастәԓәт:

¹⁴"Турма нумән ишәк йасәӈ! Пӑ мўвән пайԓы уԓәпса, хŏйатәт xŏща йӑм!"

Вой шавиты йох Иисус хŏща йŏхтыԓыԓәт

¹⁵Ангеләт турма нŏх мӑнмеԓ йўпийән, вой шавиты йох кўтԓаԓән пŏтәртты питсәт: "Вифлеем воша мӑнԓув пӑ ватԓэв, мўй щита тыйәс, мўй эԓты Турәм Куща мўӈев йастәс".

¹⁶Ԓыв мŏхты йуша йэтшәптәсәт, йŏхәтсәт, Мария пӑ Иосиф, пӑ вой ԓапәтты хŏшапән йŏвәртәм Ай Ԋаврэмийэ уйәтсәт.

¹⁷Ԓывиԓаԓ кащаԓәмеԓ кемән, вой шавиты йох Тӑм Ԋаврэмийэ эԓты мўй хуԓсәт, щит иса пŏтәртсэԓ.

¹⁸Хуԓәнтәм мŏхет хŏԓыйэ тащ шавиты йох йасәӈ эԓты пакнысыԓәт.

¹⁹Мария щи йасӈәт хŏԓыйэ сӑмәԓән шависԓы пӑ нумәссәԓы.

²⁰Тащ шавиты икет йŏхԓы йŏхәтсәт, Турәм вŏԓаӈа айәԓтман пӑ ишәкман, мўй хуԓсәт пӑ ватсәт, щит иса ԓывиԓаԓа йастәман ус, щи урәӈән.

Иисус хŏща эвәтты вер

²¹Нийәԓмет хӑтәԓән Ԋаврэма эвәтты вер верты пŏра йŏхтәс, пӑ щита Иисус нэмән пŏтса – щи нэмән, Ԓўв, аԋԏеԓ хŏща пӑтлам хота питтаԓ йэԓпийән, ангелән нэмәтса.

²²Хун Моисей Закон хўват сыстамтыты хӑтәԓ йŏхтәс, ԓын Ԋаврэмән Иерусалим воша тусԓән, Турәм Кущайа ватәԓтәты урәӈән,

²³Турәм Куща законән хӑшман уԓԓа: "Кашәӈ оԓәӈ сэма питәм ху ԋаврэм Турәм Кущайа аԉты мосәԓ".

²⁴Пӑ ищи пўԉаӈ Турәм Куща закон хўват йир туты мосәԓ: кӑт горлица нэмпи тŏхԓәӈ войӈән, мўй пӑ голубь нэмпи тŏхԓәӈ кӑт пŏшәхӈән.

Симеон Иисус эԓты пŏтәртәԓ

²⁵Щи пŏрайән Иерусалим вошән Симеон нэмпи хŏйат ус, ԓўв вещкат па тўӈа–щира xŏйат ус, Израиль мир нŏх пойәкты щир ԓавԓәс; Йэмәӈ Ԓыԓ ԓўв пиԓәԓән ус.

²⁶Йэмәӈ Ԓыԓән ԓўв аԉса, Турәм Куща китәм Христос шийаԓәтаԓ унты, ԓўв ӑт пӑрәԓ.

²⁷Йэмәӈ Ԓыԓән тўвман, Симеон Турәм Хота йŏхтәс, хун Иисус Ԋаврэмийэ аԋԏеԓән-ащеԓән, закон хўват мосты верәт верты урәӈән, тŏхи туса,

²⁸Симеон Ԓўвеԓ йоша ўсԓы, Турәм ишәксәԓы пӑ пŏтәртты питәс:

²⁹"Вос Xу! Нӑӈ йасӈен хўватән, ин Нӑӈ митхуйэн йӑм нŏмәсән эсәԓԓэн,

³⁰Нӑӈ мойԓәм ԓыԓ этәԓтәты верэн сэмԓамән шийаԓәсэм,

³¹щит Нӑӈ иса уԓты омәсты мир кеша,

³²пўншантәм нŏви Турәм ӑт уйәтты па рут мира2:32 Турәм ӑт уйәтты па рут мир – Турәм ӑт уйәт хŏйатәт, еврейәт пӑ па рут мирәт щиты айәԓтԓәт. пӑ ишәк йасәӈ Израиль мирэна ԓэщатсэн!"

³³Иосиф пӑ Иисус аԋԏеԓ Ԓўв эԓтэԓ йасәӈ хуԓтанән туп ӑԓ пакнысыстән.

³⁴Симеон ԓыв урәӈԓаԓа йӑм воxәс, щӑԓта Мария, Иисус аԋԏи пеԓа, йастәс: "Тӑм ŏԓәԓ, Щит, Хŏй тӑxрэпа китса: Израильән хŏйтат иԓ питԓәт, хŏйтат пӑ нŏх ԓойԓәт, Турәм эԓты китәм поса уԓ, йасәӈԓаԓ урәӈән хŏйатәтән нўрыԓа, –

³⁵Нӑӈ па щитән, аԓтты кеши иты, сӑмен мŏхты мӑнԓайән, – ар хŏйат сӑм хŏща уԓты хӑԋа нŏмәсԓаԓ эԓпа ат этәԓтәԓайәт".

Анна вантәм верәт

³⁶Хŏԓна щита Турәм йасәӈ туты ими, Анна, ус. Ԓўв Фануил эви, пирща йўвәм ими, Асир рут эԓты ус, икеԓ пиԓән ԓапәт тӑԓ уԓмаԓ,

³⁷икиԓы хӑщәс, пӑ нийәԉйаӈ ԋӑԓ тӑԓа йис. Анна Турәм Хот эԓты пўӈԓа ӑт йӑӈхиԓыйәԓ, Турма ата-хӑтԓа пойәкщәман пӑ вўщԓәман ус.

³⁸Щи пўԉаӈ ԓыв хŏщайэԓа ԓўв, вана шушман, Турәм Куща ишәкԓәԓы пӑ кашәӈ хŏйата щи Ԋаврэмийэ эԓты пŏтәртыйәс, хŏй Иерусалимән xŏԓт пайтәсты щир ԓавԓәс.

Иисус Назарета йŏхԓы йиԓ

³⁹Хун Иосиф пӑ Мария верәт иса версәԓән, Турәм Куща закон xўват, ԓыв Галилея мўва, Назарет вошеԓа йŏхԓы йŏхәтсәт.

⁴⁰Ԋаврэмийэ пӑ энмәԓтыйәс, ԓыԓәԓ-нŏпсәԓ такамтыйәс, мўтрайән тэкнәптыман, Турәм йӑм Ԓўв эԓтэԓ ус.

Иисус - ԋаврэм Турәм Хотән

⁴¹Кашәӈ тӑԓ Иисус аԋԏеԓ-ащеԓ Пасха йэмәӈ хӑтԓәт урәӈән Иерусалим воша йӑӈхиԓыстән.

⁴²Хун Ԓўв кӑтхŏщйаӈ тӑԓа йис, ищиты, xŏты уԓԓытыйән, ԓыв Иерусалима йэмәӈ хӑтԓа мӑтсәт.

⁴³Хун йэмәӈ хӑтԓәт мӑнәм йўпийән йŏхи мӑтсәӈән, Иисус Пŏхийэ Иерусалим вошән хӑщәс; щит Иосиф пӑ Иисус аԋԏеԓ, ӑт мŏштәсԓән,

⁴⁴ԓын нумәссәӈән, Ԓўв па мŏхет пиԓән йиԓ. Оԓәӈ хӑтәԓ йуш xўват шушманән, хӑтәԓ xўват рутԓаԓ пӑ уйәтты йŏхԓаԓ кўтән Ԓўвеԓ кӑшсәԓән.

⁴⁵Иисус ӑт уйәтсәԓән, Ԓўвеԓ кӑшман, Иерусалима йŏхԓы йŏхәтсәӈән.

⁴⁶Хуԓәм хӑтәԓ xӑщәм йўпийән Ԓўвеԓ Турәм Хотән уйәтсәԓән, утәԓтәты йохәт кўтән ԓывиԓаԓ хуԓәтман пӑ ԓыв эԓтыԓаԓ иԋщәсман опсәс;

⁴⁷хŏԓыйэ Ԓўвеԓ хуԓәнтәм хŏйатәт йасәӈ ӑт шитԓәт, Ԓўв пеԓайәԓ ӑԓ ватԓәт пӑ хуԓәтԓәт, xŏты Ԓўв йŏxԓы ŏшәӈа–нŏпсәӈа йастәԓ.

⁴⁸Аԋԏеԓ-ащеԓ Ԓўвеԓ шийаԓәман кемән, йасәӈ йастәты ӑт верәтсәӈән, туп аԋԏеԓ Ԓўвеԓа йастәс: "Пŏхийэ, минэмән хŏты Нӑӈ версэн? Тӑм мўй, ащен пӑ ма, сӑм мӑнман, Нӑӈен кӑшԓэмән."

⁴⁹Иисус йастәс: "Мўйа нын Мӑнэм кӑшԓәԓән? Нын мўй ӑт уйәтсәԓән, Мӑнэм щита уԓты мосәԓ, хŏта Ма Ащэм Xот уԓ?"

⁵⁰Туп Ԓўв йастәм йасәӈԓаԓ ԓын ӑт мŏштәсԓән.

Иисус энәмты пŏра

⁵¹Щиты Ԓўв аԋԏеԓ-ащеԓ пиԓән Назарет воша йŏхԓы йŏхтәс; пӑ ԓынана хуԓәтман ус. Щи йастәм йасәӈԓаԓ xŏԓыйэ аԋтеԓән сӑмән шависайәт.

⁵²Иисус пӑ нуптәԓ хўвашәк йис, ŏшәӈа-щащәӈа йис. Ԓўв Турәмән пӑ хŏйатәтән сӑма мосман тӑйса.

Иоанн йиӈка ԓŏӈәԓтыты хŏйат верәт верты щир

¹Тиверий кесарьа уԓәм ветхŏщйаӈмет тӑԓән, хун Понтий Пилат Иудея мўв ԓŏватән кущайа уԓмаԓән, Ирод ики пӑ Галилея мўвән, ԓўв Филипп йайәԓ Итурея, Трахонитида мўвән, Лисаний ики Авилиней мўвән, ԋӑԓмет мўв щуӈ кущайәта уԓмеԓән,

²Турма йир верты хŏйатәт ŏх икеӈән Анна пӑ Каиаф уԓәм пŏрайән Иоанна, Захария пŏха, хӑр пӑ таԓ мўвән Турәм айкеԓ йŏхтәс.

³Щи йўпийән ԓўв Иордан йŏxан ԉэпән уԓты мўв ԓŏватән йӑӈхәс пӑ щи вер эԓты сыйәӈа пŏтәртәс: йиӈка ԓŏӈәԓтыты вер верты урәӈән, кӑрэк эԓты шӑшән керԓәты мосәԓ, щиты Турәмән кӑрэк йŏрэмәԓа.

⁴Xŏты Турәм йасәӈ туты ики Исаия йасӈәӈ нэпекән хӑшман уԓԓа:

"Таԓ мўвән такан ўвты xу тўр сый:

Турәм Кущайа йуш ԓэщататы,

йуш хурийэт Ԓўв урӈәԓа тўӈа вераԓән!

⁵Кашәӈ мўв лот тэԓәӈа ат йиԓ, кашәӈ кев пай, кашәӈ сӑӈхәм ԓэԓа ат йиԓәт.

Мўвеӈ йушәт тўӈа ат йиԓәт, хŏмалэӈ йушәт пайԓы ат йиԓәт;

⁶пӑ кашәӈ хŏйат Турәм ԓыԓ этәԓтәты щир шийаԓәԓ".

⁷Иоанн, ԓўв эԓтайәԓ йиӈка ԓŏӈәԓтыты урәӈән йŏхтыԓыйәм ар хŏйата щиты пŏтәртәс: ”Ŏхты вой эԓты тыйәм ŏтәт! Хŏйән нын нŏмәсән мӑсайты, йиты ԉик эԓты хŏнтаты?

⁸Кӑрэк эԓты шӑшән керԓәм щирән йӑм верԓәнән аԉаԓән, xŏты йўx йӑм ԓэвпәс энмәԓтԓәԓ. Аԓ тӑйаты тӑмәщ нŏмәс, йастыман: "Мўӈ ащев – Авраам!" Нынана йастәԓәм, Турәм тӑм кев шўкәт эԓты Авраама ԋаврэмәт верты верәтәԓ.

⁹Тӑм мўй, йўх ԓэрәт пўӈәԓән ԓайәм пŏнман уԓ, йӑм ԓэвпәс ӑт энмәԓтты йўх иԓ сэвәрԓа пӑ тўта вŏщкәԓа".

¹⁰Мир иԋщәсәс: "Мўй щиӈәԋща мўӈева верты?"

¹¹Ԓўв щиты йŏхԓы йастәс: "Xŏй кӑт йэрнас тӑйәԓ ки, и йэрнасәԓ ӑт тӑйты хŏйата ат мӑԓԓы, хŏй ԓэтәт тӑйәԓ ки, ищиты ат верәԓ".

¹²Налог ӑкәтты йохәт ԓўв хŏщайәԓа йиӈка ԓŏӈәԓтыты урәӈән йŏхәтсәт, ԓўв эԓтэԓ иԋщәссәт: "Утәԓтәты ху, мўӈева мўй верты?"

¹³Иоанн ԓывиԓаԓа йастәс: "Xŏйатәт эԓты мŏрт тўмпи ар аԓ вохаты".

¹⁴Соԓтан йох ищи иԋщәссәт: "Мўӈева пӑ мўй верты?" Пӑ ԓывиԓаԓа йастәс: "Нэмәԓты хŏйат ŏх урәӈән аԓ шукататы, ԋаԓәм аԓ вераты, пӑ тыԓәщ ŏхԓәнән тӑрматыйаты".

¹⁵Хун хŏйатәт ԓавԓәсман усәт, пӑ хŏԓыйэ Иоанн эԓты нумәссәт, ԓўв а мўй Христос, -

¹⁶Иоанн ԓывиԓаԓа йастәс: "Ма нынан йиӈка ԓŏӈәԓтыԓԓам, туп ма киԋщайэм Йурәӈ Ŏт йŏxәтәԓ. Мӑнэм хŏԓна Ԓўв кўр ԓумтәм пушәх кеԓәԓ нŏх эхты йэм, ӑт рӑхәԓ; Ԓўв нынан Йэмәӈ Ԓыԓа пӑ тўта ԓŏнәԓтты питԓәԓы.

¹⁷Ԓўв сӑрәԓ йошәԓән уԓ, ԓат сэм ӑктәм тӑxайәԓ сыстапԓәԓы, ԓат сэмәт ампарәԓа ӑкәтԓәԓы, сорәм тŏрнәт пӑ ӑт xурԓәты тўтән нŏх ўщәтԓәԓы".

¹⁸Иоанн Йӑм айкеԓ эԓты пŏтәртмаԓән, ар па хŏрпи щирән хŏйатәт утәԓтәсԓы.

¹⁹Ԓўв Ирод, ԋӑԓмет мўв щуӈ куща ики, йайәԓ ими, Иродиада, нэӈа тўвмаԓ урәӈән пӑ па атәм верәт вермаԓ урәӈән, нўрыты питсәԓы,

²⁰Ирод ики щиӈәԋща, верәм атәмԓаԓ хŏща и вер па пŏнәс, Иоанн касна хота омәссәԓы.

Христос йиӈка ԓŏӈәԓтыты вер

²¹Хун хŏйатәт иса Иоаннән йиӈка ԓŏӈәԓтысайәт, Иисус ищи йиӈка ԓŏӈәԓтыса, йиӈка ԓŏӈәԓтыйәм йўпийән пойәкщәман ус: турәм хӑр пелки лоӈхиԓәс,

²²Йэмәӈ Ԓыԓ, голубь вой хŏрпийән, Ԓўв хŏщайәԓ иԓ эсԓәщәс, пӑ турәм эԓты тўр сый щащәс: "Нӑӈ – Ма Сӑмема Мосты Пŏхем, Ма йӑм кашэм Нӑӈ хŏщайэнән уԓ!"

Мария сӑхат уԓты Христос рут йохԓаԓ

²³Иисус верәт верты питмаԓән хŏԉмаӈ тӑԓ кема йўвман ус; хŏйатәт нумәссәт Ԓўв Иосиф пŏх, щишән опращԓаԓ - Илий,

²⁴Матфат, Левий, Мелхий, Ианнай, Иосиф,

²⁵Маттафий, Амос, Наум, Еслим, Наггей,

²⁶Мааф, Маттафий, Семеи, Иосиф, Иуда,

²⁷Иоаннан, Рисай, Зоровавель, Салафиил, Нирий,

²⁸Мелхий, Аддий, Косам, Елмодам, Ир,

²⁹Иосий, Елиезер, Иорим, Матфат, Левий,

³⁰Симеон, Иуда, Иосиф, Ионан, Елиаким,

³¹Мелеай, Маинан, Маттафай, Нафан, Давид,

³²Иессей, Овид, Вооз, Салмон, Наассон,

³³Аминадав, Арам, Есром, Фарес, Иуда,

³⁴Иаков, Исаак, Авраам, Фара, Нахор,

³⁵Серух, Рагав, Фалек, Евер, Сала,

³⁶Каинан, Арфаксад, Сим, Ной, Ламех,

³⁷Мафусал, Енох, Иаред, Малелеил, Каинан,

³⁸Енос, Сиф, Адам, Турәм.

Христос йŏвра хўщты щир

¹Иисус, Йэмәӈ Ԓыԓән тэкәнман, Иордан йŏхан эԓты йŏхԓы мӑнәс, пӑ щи Ԓыԓән хӑр пӑ таԓ мўва тўвман уса.

²Щита Ԓўв ԋӑԓйаӈ хӑтәԓ хиԋән4:2 дьяволән хўщман уса пӑ щи хӑтԓәтән Иисус нэмәԓты ӑт ԓэс, щи хӑтԓәт мӑнәм йўпийән, мет йўхәт Ԓўв ԓэты ԓӑӈхаты питса.

³Хиԋ Ԓўвеԓа йастәс: "Нӑӈ – Турәм Пŏх ки, тӑм кев шуп, ԋаԋа йитыйа парты".

⁴Иисус йŏхԓы йастәс: "Йэмәӈ Нэпекән xӑшман уԓԓа: ”Ӑнта туп ԋаԋ йурән хŏйат уԓты питәԓ, пӑ кашәӈ Турәм йасәӈ йурән”".

⁵Щӑԓта Ԓўв хиԋән пӑԓ кев ԓŏӈԓа нŏх туса пӑ щиԓта ищи кумат хŏԓыйэ мўв ԓŏватән уԓты хон мўвәт аԉиԓысԓы,

⁶хиԋ ики пӑ йастәс: "Нӑӈен тӑм хон мўвәт хŏща кущайа уԓты пŏнԓэм, пӑ ԓыв вŏсԓәты–вŏрԓәты щирэԓ Нӑӈен мӑԓэм, щит иса мӑнэма мӑса, пӑ ма, хŏйа ԓӑӈхаԓәм, щита мӑԓэм.

⁷Нӑӈ ма йэԓпемән шаншен иԓ эсәԓԓэн ки, тӑм иса Нӑӈен мӑԓэм".

⁸Туп Иисус йŏхԓы йастәс: "Сатана4:8 сатана, дьйавол, ‘хиԋ’, Ма эԓтайэм пўӈԓа мӑна; Йэмәӈ Нэпекән xӑшман уԓԓа: ”Турәм Кущайэн йэԓпийән туп шаншен иԓ эсԓы, Ԓўвеԓа туп митхуйа уԓа”".

⁹Щӑԓта Иисус сатанайән Иерусалим воша туса, Турәм Хот ԓоӈәԓ йира ԓощәԓтәса, пӑ йастәса: "Нӑӈ Турәм Пŏх ки, тӑԓта иԓ керәптыйа,

¹⁰хӑшман ӑт уԓ: “Ԓўв ангелԓаԓа Нӑӈен шавиты партԓәԓы”,

¹¹пӑ “Нӑӈен нŏх аԓәмман туԓэԓ, Нӑӈ кўрэн кева аԓт вакләпәԓ”".

¹²Иисус йŏхԓы йастәс: "Йастәман уԓ: ”Турәм Кущайэн, Турмен аԓ хўщи”".

¹³Хун хиԋ ики хўщәпсайԓаԓ вŏԓәтсәԓԓы, Ԓўв эԓтайәԓ мӑтты пŏра унты шӑшән мӑнәс.

Галилея мўв ԓŏватән вана ўты щир

¹⁴Иисус, Йэмәӈ Ԓыԓ йурән тэкәнман, Галилея мўва йŏхԓы йŏхтәс. Ԓўв айкеԓәԓ Галилея мўв керәтман лакки ԓӑрпиԓәс.

¹⁵Ԓўв Турәм йасӈа утәԓтәты хотԓаԓән4:15 Турәм йасӈа утәԓтәты хот ’синагога’; Словарь ванта. ԓывиԓаԓ утәԓтәс, пӑ хŏԓыйэ Ԓўвеԓ ишәксэԓ.

Назаретән вана ӑт ўты щир

¹⁶Иисус Назарета, энмәм вошәԓа, йŏхтәс, пӑ шаббат хӑтәԓән4:16 шаббат хӑтәԓ ’суббота’ - эврейәт ԓапәтмет хӑтәԓ, ԓўв йэмәӈ хӑтԓа ԓўӈәтԓа, щи хӑтәԓән щўтщәԓа;, Ԓўв уԓтаԓ иты, Турәм йасӈа утәԓтәты хота ԓŏӈәс, пӑ щита Йэмәӈ Нэпек эԓты сыйәӈа ԓуӈәтты ԓойәс.

¹⁷Ԓўвеԓа Исаия, Турәм йасәӈ туты ху, нэпек мӑса: Ԓўв нэпек нŏх ԓӑрпитмаԓ йўпийән, щи тӑха уйәтсәԓы, хŏта хӑшман уса:

¹⁸"Турәм Куща Ԓыԓ Ма хŏщайэм уԓ; Ԓўв Мӑнэм, куԋарәта Йӑм айкеԓ йастәты урәӈән, ԋŏсәтсәԓы4:18 словарь Христос ванта;, пӑ Мӑнэм, сӑмԓаԓ рӑкнәм хŏйатәт тўмтака верты урәӈән, китсәԓы, ԋӑрэмәм хŏйатәта хŏԓт сŏхәнты вер пӑ сэмԓы хŏйатәта – сэмәӈа йиты вер аԉты китсәԓы, шукатты хŏйатәт хŏԓт эсәԓты китсәԓы,

¹⁹Турәм Куща йӑм ŏт тӑԓ-ԓўӈ йŏхтәм такан айәԓтты китсәԓы".

²⁰Иисус, нэпек лӑп йŏвәртман, ԋотты хŏйата мӑсԓы пӑ иԓ опсәс. Турәм йасӈа утәԓтәты хот тэԓ хŏйат хŏԓ Ԓўв пеԓайәԓ тŏрԓы ватԓәт.

²¹Щӑԓта Ԓўв ԓыв пеԓайэԓ пŏтәртты питәс: "Тӑмхӑтәԓ, нын хуԓәм тӑм Йэмәӈ Нэпек йасӈәт, йӑнәпсәт".

²²Хŏԓыйэ ԓыв кўтэԓән Ԓўвеԓ ишәксэԓ, пӑ Ԓўв эԓтэԓ этты сӑма рӑхты йасәӈԓаԓ эԓты ощатыԓәт, пӑ пŏтәрԓәт: "Тӑм мўй ӑнта Иосиф пŏх?"

²³Иисус ԓывиԓаԓа йастәс: "Нын, уйәтман, Мӑнэма щимәщ йасәӈ йастәԓты: ”Ԉэккар, Нӑӈен Нӑӈ йӑмәԓты!”, хŏԓна: ”Тӑта Нӑӈ вошенән па щит вера, мўй, мўӈ хуԓмевән, Капернаум вошән версән”".

²⁴Щӑԓта йастәс: "Йӑна нынана йастәԓәм: Турәм йасәӈ туты и ху нэш энмәм мўвәԓән вана ӑт уԓа.

²⁵Вещката нынана пŏтәртԓәм: Илия Турәм йасәӈ туты ху уԓмаԓән, Израиль мўвән ар икиԓы хӑщәм ими ус, щи пŏрайән хуԓәм тӑԓ пӑ хут тыԓәщ турәм хӑр щиты лӑп йэртман уса, пӑ иса мўв ԓŏвата ун ԓэԓԓы пŏра йŏхтәс,

²⁶ԓыв кўтэԓа ий ими хŏща нэш Илия ӑт китса, туп Сидон вош пўӈәԓән уԓты Сарепта курта икиԓы ий ими хŏща китса.

²⁷Елисей Турәм йасәӈ туты ху уԓәм пŏрайән, йэмәӈ ԓайӈәӈ ԋўлмәт тӑйты ар хŏйат Израиль мўвән ус, Нееман нэмпи Сирия мўвәӈ ики тўмпийән, нэмәԓты хŏйат ӑт сыстапса".

²⁸Щит хуԓмеԓ кемән, Турәм йасӈа утәԓтәты хотән уԓты хŏйатәт хŏԓыйэ ԉикән йŏхәтсайәт.

²⁹Ԓыв нŏх ԓойәпсәт, Иисус вош эԓты ким воштәсэԓ; вошеԓ кев пай эԓты омәсман уԓ, пӑ пӑԓ кев пай венша тусэԓ, иԓ вŏщкәты урәӈән.

³⁰Туп Ԓўв, хŏйатәт кўтән шушман, пўӈԓа йирԓәс.

Кўԉәт воштәсайәт

³¹Иисус Галилея мўвән уԓты Капернаум воша йŏхтәс, пӑ шаббат хӑтәԓән ԓывиԓаԓ утәԓтәс.

³²Мŏхет Ԓўв утәԓтәпсайәԓ эԓты ӑԓ пакнысыԓәт, Ԓўв йасӈәԓ партатты щир тӑйәс.

³³Турәм йасӈа утәԓтәты хотән кўԉ сŏх тӑйәм хŏйат ус, пӑ ԓўв сыйәӈ тўрән ўваԓтәс:

³⁴"А-а-а: Назарет эԓты уԓты Иисус, мўӈ эԓтэв мўй Нӑӈен мосәԓ? Нӑӈ мўӈев пӑратты йŏхәтсән; уйәтԓэм, Хŏй Нӑӈ! Нӑӈ – Турәм Йэмәӈ Ŏт!"

³⁵Иисус ԓўвеԓ такан партсәԓы: "Мӑшйайа йўвәмта па ԓўв эԓтэԓ ким эта!" Кўԉ сŏх Турәм йасӈа утәԓтәты хот кўтәпән хŏйат иԓ вŏщкәсԓы, щӑԓта ԓўв эԓтэԓ ким этәс, нэмәԓты атәм ин хŏйата ӑт верәс.

³⁶Мŏхет хŏԓыйэ хŏрщәмән йŏхәтсайәт, пӑ кўтԓаԓән пŏтәртсәт: "Мўй щит? Ԓўв щиты партатты щирән пӑ йуртат кўԉ сŏхәта пӑртәԓ пӑ ԓыв ким этԓәт?"

³⁷Пӑ Ԓўв эԓтэԓ айкеԓ керәтман куртәт хўват лакки мӑнәс.

Петра унтәп тўмтака верса

³⁸Турәм йасӈа утәԓтәты хот эԓты ким этмаԓ йўпийән, Иисус Симон хота ԓŏӈәс. Симон утпәԓ ими шек кӑшаӈ ус; пӑ Иисус щи ими урәӈән вохса.

³⁹Ԓўв щи ими хŏща ԋўрман, муш нŏх вŏԓыты партсәԓы; ин ими мушән хӑйса. Ԓўв ищи мŏхты нŏх ԓойәс, пӑ мŏхета пӑсан омәсты питәс.

Иисус Галилея мўв ԓŏватән Турәм верәт верәԓ

⁴⁰Хӑтәԓ иԓ опсәм сыс хŏԓыйэ, хŏй мушән йŏхтәм хŏйат тӑйәс, щи ар сыр мушпи хŏйатԓаԓ Ԓўв хŏщайәԓа тусԓаԓ. Ԓўв пӑ, кашәӈ мушәӈ хŏйат эԓты йошԓаԓ пŏныԓыман, ԓывиԓаԓ тўмтака версәԓы.

⁴¹Ар хŏйат эԓты ищиты кўԉ сŏхәт, ўвман, ким этсәт пӑ пŏтәртсәт: "Нӑӈ – Христос, Турәм Пŏх!" Ԓыв уйәтԓәт - Ԓўв – Христос, туп Иисус щит ԓывиԓаԓа йастыты ӑт эсәԓсәԓы.

⁴²Хун хӑтԓа йис, Ԓўв хот эԓты ким этмаԓ йўпийән, таԓ шитам тӑхайа мӑнәс. Ар хŏйатән кӑшса, пӑ Ԓўв хŏщайәԓ йŏхәтмеԓән, Ԓўвеԓ иԓ рŏнатԓэԓ, ԓыв эԓтайэԓ ӑт ат мӑнәс.

⁴³Ԓўв пӑ ԓывиԓаԓа йастәс: "Мӑнэм па вошәтән ищи Турәм Хон Уԓәпса эԓты Йӑм айкеԓ йастәты мосәԓ. Щи урәӈән Ма китсайәм".

⁴⁴Щиты Ԓўв Галилея Турәм йасӈа утәԓтәты хотәтән сыйәӈа пŏтәртәс.

Оԓәӈ утәԓтәты йŏх вохсайәт

¹И пўш, хун Иисус Геннисарет нэмпи ԓор питарән ԓоймаԓән, хŏйатәт керәтман Ԓўв хŏщайәԓ нӑптәщсәт, Турәм йасәӈ хуԓәтты урәӈән,

²Ԓўв кӑт ўты кӑтԓәм хоп шийаԓәс; хўԓ веԓты хŏйатәт пӑ, хоп эԓты иԓ ŏхәԓман, хоԓәпԓаԓ ԉŏхәтсәт.

³Иисус и хопәԓа ԓэԓәс, Симон хопа. Ԓўв ԓор питар эԓты Симон йэша йэԓшәк мӑнты пӑртсәԓы, Ԓўв пӑ, хопән омәсман, хŏйатәт утәԓтәс.

⁴Хун Ԓўв хŏйатәт утәԓтәты йэтшәс, Симон пеԓа йастәс: "Мӑԓ тӑхайа мӑна, пӑ хоԓпән хўԓ хойты щира йовәԓмаԓән".

⁵Симон Ԓўвеԓа йастәс: "Утәԓтәты ху, мўӈ тӑԓаӈ ат рупәтсув, нэмәԓты ӑт мŏщатсув, туп Нӑӈ йасӈен хўватән ма хоԓпем йовәԓмәԓэм".

⁶Щиты вермеԓ йўпийән, ԓыв щи арат ар хўԓ мŏщатсәт, пӑ хŏԓна хоԓпеԓ тŏхты питәс.

⁷Щиӈәԋща ԓыв кимет хопән уԓәм пиԓԓаԓа йош йовәԓты питсәт, ԓывиԓаԓа ԋотты ат йŏхәтсәт; щӑԓта йŏхәтсәт пӑ хопӈәԓаԓ кинәӈтак хўԓән тэкәптәсԓаԓ, хопӈәԓаԓ вŏԓԓы иԓ шуйԓәты питсәӈән.

⁸Щит шийаԓәмаԓ кемән, Иисусән Петрайа айәԓтәм Симон Иисус шашӈән хŏща рӑкнәс пӑ йастәс: "Турәм Куща, ма эԓтэм йэԓ мӑна, ма кӑрэкәӈ хŏйат".

⁹Петрайа айәԓтәм Симон пӑ хŏԓ, ԓўв пиԓәԓән уԓәм йохԓаԓ, тӑм веԓәм хўԓԓаԓ пӑтыйән, пӑԓщәмән йŏхәтсайәт;

¹⁰Симон пиԓӈәԓаԓ Иаков пӑ Иоанн, Зеведей пŏхӈән ищиты пӑԓтәмәсӈән. Щӑԓта Иисус Симон пеԓа йастәс: "Аԓ пӑԓа, тӑԓта йэԓԓы нӑӈ хŏйатәт кӑтәԓты питԓән".

¹¹Щиӈәԋща, хопӈән ўты тӑԓмеԓ йўпийән, пŏрмасԓаԓ иса хӑйсәԓаԓ пӑ Иисус йўпийән мӑтсәт.

Ԓайӈәӈ ԋўлмәӈ хŏйат сыстапты щир

¹²Хун Иисус и мŏԓты вошән уԓмаԓән, ԓŏватәԓән ԓайӈәӈ ԋўләмән этәм хŏйат йŏхтәс. Щӑԓта, Иисус шийаԓәмаԓ кемән, Ԓўв йэԓпеԓән хŏмта шаншантәс пӑ, пойәкман пŏтәртәс: "Йэшәк Турәм Куща! Кашен уԓ ки, верәтԓэн мӑнэм Нӑӈ нŏх сыстапты".

¹³Иисус йошәԓ йэԓ шӑшсәԓы, ԓўв хŏщайәԓа хӑнәмтыйәс пӑ йастәс: "Ԓӑӈхаԓайәм, сыстама йўва!" Ищи мŏхты ԓайӈәӈ ԋўләмԓаԓ йӑма йисәт.

¹⁴Иисус ԓўвеԓа нэмәԓты хŏйата щи вер эԓты пŏтәртты ӑт эсәԓсәԓы. Туп Турма йир верты хŏйата этәԓтыты пӑртсәԓы, пӑ сыстапты верәԓ пеԓа йир туты пӑртсәԓы, хŏты Моисей партәс, ԓывиԓаԓ эвԓәптәты урәӈән.

¹⁵Туп Иисус айкеԓәԓ мет йэԓ ԓӑрпиԓәс, пӑ тэԓыйэ хŏйат Ԓўв хŏщайәԓа йŏхтыԓыйәс, Ԓўв йасәӈԓаԓ хуԓәтты пӑ мушԓаԓ эԓты йӑмәԓтыты.

¹⁶Туп Иисус таԓ шитам тӑхайата мӑныԓыйәс пӑ щита пойәкщәс.

Щащԓы питәм хŏйат тўмтака йиты щир

¹⁷И хӑтәԓән, хун Иисус хŏйатәт утәԓтәс, щита Галилея пӑ Иудея куртәт эԓты, Иерусалим вош эԓты па йŏхтәм фарисейәт5:17 Фарисейәт – словарь ванта пӑ Закона утәԓтәты икет5:17 Закона утәԓтәты икет – ԓыв мирэԓ йаӈ Турәм партәпса йасӈәт пӑ Турәмән Моисея мийәм па законәт пӑ ащиԓаԓ хӑйәм ԓӑтәӈ йасӈәт нумты па щи йасӈәт хўват уԓты утәԓтәсԓаԓ. омәссәт; Турәм Куща йур мушәӈ хŏйатәт тўмтака верты верән этԓыйәс.

¹⁸Щӑԓта ин, кӑмәтса хŏйат щащԓы питәм ху ŏԓты сŏxԓаԓән тусәт. Ԓыв хота ԓўвеԓ ԓŏӈәԓтты ўтщисэԓ, Иисус йэԓпийа ԓуԓән пŏнты,

¹⁹туп и ԓӑӈкәрән ԓойты хŏйатәт кўт эԓты ӑт верәтсэԓ туты. Щиӈәԋща ԓыв хот ԓоӈԓа нŏх ўратсәт, хот ԓоӈәԓ, нŏх лосәтман, усән версэԓ пӑ мушәӈ ŏтэԓ ŏԓты сŏxԓаԓән кўтԓәпа Иисус йэԓпийа иԓ эсәԓсэԓ.

²⁰Иисус ԓыв эвәԓты щирэԓ шийаԓәмаԓ кемән, мушәӈ хŏйата йастәс: "Ԓухсэм, кӑрэкԓан йŏрэмәсайәт!"

²¹Фарисейәт пӑ Закона утәԓтәты икет щит хуԓмеԓ кемән нумәсты питсәт, пŏтәртԓәт: "Хŏй щит, Хŏй Турма ӑт рӑхты йасӈәт йастыйәԓ? Турәм тўмпийән хŏй верәтәԓ хŏйата кӑрэкәт йŏрэмәты?"

²²Иисус, ԓыв нŏмәсԓаԓ ŏша пайәтмаԓ кемән, йŏхԓы ԓывиԓаԓа йастәс: "Мўйа щиты нумәсԓәты?

²³Мўй кеншәк йастәты: ”Нӑӈ кӑрэкԓан йŏрэмәсайәт!”, мўй пӑ йастәты: ”Нŏх ԓойа пӑ шушиԓыйа”?

²⁴Уйтаты, Хŏйат Пŏх тӑта, мўвән, кӑрэкәт йŏрэмәты щир тӑйәԓ, - Иисус щащԓы питәм хŏйат пеԓа йастәс, - Нӑӈена пŏтәртԓәм: нŏх ԓойа, ŏԓты сŏхԓан ўйаԓән пӑ йŏхи мӑна".

²⁵Ищи мŏхты ԓыв йэщаԓтэԓ ԓўв нŏх ԓойәс, ŏԓәм сŏxԓаԓ усԓы, Турәм вŏԓаӈа айәԓтман, йŏхи мӑнәс.

²⁶Щиӈәԋща вантәм хŏйатәт пӑԓщәмән йŏхәтсайәт, ԓыв Турәм вŏԓаӈа айәԓтсәт пӑ, пӑԓман, пŏтәртсәт: "Тӑмхӑтәԓ унты ӑт вантыԓыйәм верәт мўӈ ин щи ватсув!"

Матфей вохәпса

²⁷Щи йўпийән, Иисус ким этәс, пӑ Левий нэмпи налог ӑкәтты хŏйат шийаԓәс, налог ӑкәтты тӑхайәԓән опсәс. Иисус ԓўвеԓа йастәс: "Ма йўпемән йўва".

²⁸Щиӈәԋща, мŏԓтыԓаԓ иса хӑйсәԓы, нŏх ԓойәс пӑ Иисус йўпийән мӑнәс.

Иисус кӑрэкәӈ хŏйатәт пиԓән ԓэԓ

²⁹Левий ԓўв хотәԓән Иисус урәӈән ун поры пӑсан ԓэщатәс, ԓыв пиԓԓаԓән пӑсан сурыйән налог ӑкәтты ар хŏйат пӑ па мŏхет усәт.

³⁰Фарисейәт пӑ Закона утәԓтәты икет Иисус утәԓтәты йохԓаԓ пеԓа ўшмащсәт пӑ пŏтәртсәт: "Мўйа нын налог ӑкәтты хŏйатәт пӑ кӑрэкәӈ хŏйатәт пиԓән и йӑха ԓэԓты, йищԓәты?"

³¹Иисус ԓывиԓаԓа йŏхԓы йастәс: "Тўмтак хŏйатәта хун ԉеккар мосәԓ, мушәӈ хŏйатәта мосәԓ.

³²Ма ӑнта тўӈа–щира уԓты хŏйатәт, Ма кӑрэкәӈ хŏйатәт кӑрэкԓаԓ эԓты шӑшән керԓәптәты урәӈән йŏхәтсәм".

Иисус вўщԓәты вер эԓты утәԓтәԓ

³³Щӑԓта ԓыв Иисуса йастәсәт: "Иоанн утәԓтәты йохԓаԓ ван кўтән вўщԓәты хӑтԓәт5:33 вўщԓәты хӑтԓәт – ԓэтŏт ӑт ԓэты пӑ, пойәкщәман, уԓты хӑтԓәт; верыԓыԓәт пӑ пойәкщәты верәт верԓәт, фарисейәт утәԓтәты йŏх ищиты уԓԓәт, Нӑӈиԓан пӑ ԓэԓәт-йищԓәт".

³⁴Иисус ԓывиԓаԓа йŏхԓы йастәс: "Нын мўй поры пӑсан хŏща, Нэ Туты Ху омәсман, мŏйәӈ йох вўщԓәты партты верәтԓәты?

³⁵Хӑтԓәт йŏхәтԓәт, хун Нэ Туты Ху ԓыв эԓтэԓ нŏх ўԓа, щи пŏрайән ԓыв вўщԓәты хӑтԓәт верты питԓәт".

Ԓумтәм эԓты пӑ ўна пŏнты хир эԓты утәԓтәты пŏтәр

³⁶Иисус ԓывиԓаԓа хŏԓна тӑмәщ утәԓтәты пŏтәр пŏтәртәс: "Нэмәԓты хŏйат, йӑԓәп ԓумтәмәԓ эԓты менэмәм йŏԓәптайәԓ, катра сŏхәԓа ӑт рӑхәԓԓәԓы; па щирән ки йӑԓәп ԓумтәмәԓ мӑшԓәԓы, пӑ йӑԓәп йŏԓәптайәԓ катра сŏхәԓа па ӑт рӑхәԓ.

³⁷Пӑ нэмәԓты хŏйат йӑԓәп ўна катра ԋўки хира5:37 хир – ԋўки эԓты верәм хир (мосәӈ пӑ щуш хир эԓты верәм хир) ӑт пŏнԓәԓы, па щирән ки, веԉщи кавәрты ўнайән хир мӑшԓа, ўнайәԓ иԓ мӑнәԓ пӑ хирәԓ ӑт мосты питәԓ.

³⁸Ӑнта, йӑԓәп ўна йӑԓәп хира пŏнты мосәԓ. Ши пŏрайән тўмеԓ тӑԓаӈа хӑщәԓ, пӑ тӑмеԓ па.

³⁹Нэмәԓт хŏйат, катра ўна йиԋщемәман, ищи мŏхты йӑԓәп ўна йиԋщемәты ӑт ԓӑӈхамәԓа. Ԓўв йастәԓ: "Катра ўна йӑмшәк".

Иисус шаббат хӑтәԓән рупитәԓ

¹И пўш, шаббат хӑтәԓән Иисус ԓатән опсәм мўв хӑр хўват шушәс. Ԓўв утәԓтәты йохԓаԓ ԋаԋ тŏрән тӑйәт мӑшсәт, йошән сыстапсыԓаԓ пӑ ԓат сэмԓаԓ йŏхи ԓэсԓаԓ.

²Тухәԓ фарисейәт иԋщәссәт: "Мўйа нын шаббат хӑтәԓән, мўй ӑт эсәԓман уԓԓа верты, щит верԓәты?"

³Иисус йŏхԓы йастәс: "Нын мўй ӑт ԓўӈәтсәԓән, хун Давид мŏхиԓаԓ пиԓән сӑмԓаԓ вохәмән, мўй ԓўв верәс?

⁴Хŏты ԓўв Турәм Хота ԓŏӈәс пӑ Турәм кеша пŏнәм йэмәӈ ԋаԋәт усԓы, ԓэс пӑ хŏԓна ԓўв пиԓәԓән уԓәм мŏхиԓаԓа мӑсԓы, Турма йир верты хŏйатәт тўмпийа щи ԋаԋәт нэмәԓт хŏйата ԓэты ӑт эсәԓман уса?"

⁵Щӑԓта Иисус ԓывиԓаԓа йастәс: "Хŏйат Пŏх шаббат хӑтәԓ хŏща па куща".

Иисус шаббат хӑтәԓән кӑшаӈ хŏйат тўмтака верәԓ

⁶Па шаббат хӑтәԓән пӑ Иисус Турәм йасӈа утәԓтәты хота ԓŏӈәс пӑ утәԓтәс. Щита и хŏйат ус, ԓўв йӑм пеләк йошәԓ нŏх сорман ус.

⁷Закона утәԓтәты икет пӑ фарисейәт Иисус ватман тӑйԓэԓ, шаббат хӑтәԓән хŏйат тўмтака верԓәԓы мўй ӑнтом, Ԓўв хŏщайәԓ нўр этәԓтәты урәӈән.

⁸Иисус, ԓыв нŏмәсԓаԓ уйәтман, сорәм йошпи хŏйата йастәс: "Нŏх ԓойа пӑ хот кўтпа йўва". Щитэн нŏх ԓойәс пӑ хот кўтпа этәс.

⁹Иисус лывиԓаԓа йастәс: "Ма нынан иԋщәсԓәм: шаббат хӑтәԓән мўй верты эсәԓман уԓԓа? Йӑм вер мўй атәм вер? Ԓыԓ этәԓтәты мўй пӑратты?" Ԓывәт иса мӑшйайәт.

¹⁰Ԓыв пеԓайԓаԓа ӑӈкәртмаԓ йўпийән, Иисус щи хŏйата йастәс: "Йошэн йэԓ ԋиншәмты". Щитэн щиты версәԓы; ин йошәԓ кимет йошәԓ хŏрпийа пӑ йӑма йис.

¹¹Ԓыв пӑ пӑԓщәм ԉикән йŏхәтсайәт, кўтԓаԓән пŏтәртсәт, а мўй хŏты Иисус верты.

Кӑтхŏщйаӈ апостол пирыйты вер

¹²Щи хӑтԓәтән Иисус кев пай ԓоӈԓа нŏх хуӈхәс пойәкщәты урәӈән, щита ат хўват Турәм пеԓа пойәкщәман ус.

¹³Хун хӑтԓа йис, Ԓўв утәԓтәты йохԓаԓ вохсәԓы пӑ ԓыв эԓтыԓаԓ кӑтхŏщйаӈ хŏйат пирыйәс, ԓывиԓаԓ апостоләта айәԓты щи питсәԓы:

¹⁴Симон, ԓўвеԓ Петрайа пӑ айәԓты питсәԓы, ԓўв Андрей апщеԓ па, Иаков пӑ Иоанн, Филипп пӑ Варфоломей,

¹⁵Матфей пӑ Фома, Иаков - Алфей пŏх пӑ Зилота нэмтәм Симон,

¹⁶Иуда - Иаков пŏх пӑ Иуда Искариот – щит щӑха Иисус пӑратты йохәт йоша мӑты ху.

¹⁷Ԓыв пиԓԓаԓән кев пай эԓты иԓ ŏхәԓмаԓ йўпийән, Иисус пайԓы тӑхайән иԓ ԓойәс, хŏта мŏԓты кем Ԓўв утәԓтәты йохԓаԓ пӑ ар хŏйат Иудея мўв ԓŏват эԓты, Иерусалим вош эԓты, па щарәс питар мўвӈән Тир па Сидон эԓты ус,

¹⁸Ԓыв Иисус хуԓәтты па мушԓаԓ эԓты тўмтака пайтәсты урәӈән йŏхәтсәт, щӑԓта пӑ кўԉ сŏхән шукатты ŏтәт ищи йӑма йисәт;

¹⁹Мир xŏԓыйэ Ԓўв хŏщайәԓа хӑнәмтыты ўратԓәт, Ԓўв эԓтайәԓ йур йис пӑ хŏԓыйэ тўмтака версайәт.

Йӑм щирәт

²⁰Щӑԓта Ԓўв, утәԓтәты йохԓаԓ пеԓа ӑӈкәртман, йастәс: "Куԋар сӑмпи ŏтәт щўԋԓәԓты! Турәм Хон Уԓәпса нынана уԓ.

²¹Ин ԓэԓԓы уԓты ŏтәт ŏй тӑйԓәты, щӑха тӑрәмԓайты! Ин хоԓԓәты ŏтәт ŏй тӑйԓәты, ԋӑхты питԓәты!

²²Нын щўԋԓәԓты, хун хŏйатәтән ԉикән этты питԓайты, хун нŏмәс кимпийән тӑйты питԓайты, пӑ ԋэрты питԓайты, нэмԓән нўрәӈа айәԓты питԓайәт, Хŏйат Пŏха эвәԓман урәӈән.

²³Щи хӑтәԓән амтәтԓыйаты пӑ ԋӑхман-йŏтман уԓаты: турәмән нын мойԓапсайԓән вŏԓаӈәт! Ԓыв ащиԓаԓ Турәм йасәӈ туты хŏйатәт6:23 Турәм йасәӈ туты хŏйатәт (словарь ванта) пиԓән ищи щиты уԓԓысәт.

²⁴Туп, тащәӈ хŏйатәт, нынана шук – нын тŏрамтыты щир тӑԓаӈ тэԓән мŏщатсәԓән!

²⁵Ин тарәмтыйа ԓэты ŏтәт, нынана шук! Сӑмԓән вохты питԓайәт! Ин ԋӑхман уԓты ŏтәт, нынана шук – хоԓԓәты пӑ йирӈәԓтыты питԓәты!

²⁶Шук нынана, хун хŏйатәт иса нын эԓтан йӑма пŏтәртты питԓәт! Ԓыв ащиԓаԓ ӑнта йӑна Турәм йасәӈ туты хŏйатәт6:26 ӑнта йӑна Турәм йасәӈ туты хŏйатәт - лжепророки пиԓән ищи щиты уԓԓысәт!"

Турәм Хон Уԓәпсайән уԓты щирәт

²⁷"Нынана, Мӑнэм хуԓәтты ŏтәта, пŏтәртԓәм: нынан нўрмәԓтты хŏйатԓән мосман тӑйаԓән, йӑм вер вераты щи хŏйатәта, хŏйән нын ԉикән этԓайты,

²⁸нынан эӈкәрты ŏтԓәна Турәм эԓты йӑмән вохаԓән6:28 Турәм эԓты йӑмән вохаԓән ’благословляйте’, пӑ нынана атәм верты хŏйатәт урәӈән, пойәкщаты.

²⁹Веш пўӈԓэн эԓты рэскийәм ŏтэна, кимет веш пўӈԓэн па шӑши, эԓты ԓумтәмен эхты ŏтэна, ԓыпи йэрнасэн ўты па аԓ йэрты.

³⁰Кашәӈ нӑӈ эԓтэн вохты хŏйата, мўй вохәԓ, мийи, пӑ нӑӈ ŏтэн ўйәм xŏйат эԓты ŏтэн йŏхԓы аԓ вохи.

³¹Хŏты ԓӑӈхаԓайты, нын пиԓәнән хŏйатәт ат усәт, щиты ԓыв пиԓԓаԓән нын уԓаты.

³²Нынан мосман тӑйты хŏйатәт мосман тӑйԓәԓән ки, нынан мўй йӑм? Кӑрэкәӈ хŏйатәт ԓывиԓаԓа мосты хŏйатԓаԓән ищи мосман тӑйԓайәт.

³³Пӑ щи хŏйатәта йӑм вер верԓәты ки, хŏй нынан йӑм вер верәԓ, нынана мўй йӑм? Кӑрэкәӈ хŏйатәт ищи щиты верԓәт.

³⁴Пӑ, хŏйатәта артнайа мийԓыԓты ки, щи хŏйатәт эԓты артнайән йŏхԓы хоӈәтԓәԓән ки, нынан мўй йӑм? Кӑрэкәӈ хŏйатәт ищи кўтэԓән артнайа мийантыԓәт, йŏхԓы ищи щи арат ўты нумәсԓәт.

³⁵Туп нынан нўрмәԓтты хŏйатԓән мосман тӑйаԓән, йӑм вер вераты пӑ, нэмәԓты йŏхԓы ӑт хоӈәтман, артнайа мийаты; щишән нынан мойԓәпса вŏԓаӈ питәԓ, пӑ Нўм Турәм ԋаврэма уԓты питԓәты; Ԓўв кўш йӑм ӑт нумты хŏйатәт пеԓа, кўш ԉикәӈ хŏйатәт пеԓа и хŏрпийа сӑмәӈ.

³⁶Щиӈәԋща хŏйатәт пеԓа сӑмәӈа уԓаты, хŏты Турәм Ащан сӑмәӈ.

³⁷Аԓ сўтытаты пӑ нынан нэмәԓты хŏйат сўтәтты ӑт питәԓ. Аԓ ԋухмантаты, пӑ нын эԓтан нэмәԓты хŏйат ԋухматты ӑт питәԓ. Нўр аԓ нуматы, пӑ нын нўрԓән ищи йŏрэмәԓайәт.

³⁸Мийаты, пӑ нын па мӑԓайты: йӑм мŏртән, йовԓәм, иԓ тыԋхәм, щурщаӈа пŏнәм тэԓәӈ мŏртән хŏхәнԓәна шŏшәмԓайты; мўй сыр мерайән пŏнԓәты, щимәщ мерайән нынана пŏнты питԓа".

Сэмԓы хŏйат сэмԓы хŏйатән ватәԓтәты эԓты утәԓтәты пŏтәр

³⁹Утәԓтәты пŏтәр ԓывиԓаԓа па пŏтәртәс: "Сэмԓы хŏйат мўй верәтәԓ сэмԓы хŏйат ватәԓтәты? Мўв ўса мўй ӑнта кинәӈтак иԓ питԓәтән?

⁴⁰Утәԓтыты хŏйат утәԓтәты икеԓ эԓты унашәк ӑт уԓԓыйәԓ, туп утәԓтыты вер йэтшәман, кашәӈ хŏйат утәԓтәты икеԓ иты йиты верәтәԓ.

⁴¹Мўйа нӑӈ ԓухсэн сэма питәм нўв шўк пеԓа ватԓән, нӑӈ сэменән ŏԓты павәрт шуп ӑт мŏштәԓэн?

⁴²Мўй щирән нӑӈ веритԓән щи ԓухсэна йастәты: "Ԓухсэм, мийи ма нӑӈ сэмен эԓты нўв шўк нŏх ўԓэм, - щи пўԉаӈ нӑӈ сэменән павәрт ӑт шийаԓәԓэн? Кӑт вешпи хŏйат! Оԓәӈән павәрт нӑӈ сэмен эԓты нŏх ўйи, щӑԓта ныты питԓа, хŏты нўв шўк ԓухсэн сэм эԓты нŏх ўԓэн".

⁴³И йӑм йўх атәм ԓэвпәс ӑт энмәԓԓәԓ; пӑ и вевтам йўх йӑм ԓэвпәс ӑт энмәԓԓәԓ,

⁴⁴кашәӈ йўх ԓўв энмәԓтәм ԓэвпәсԓаԓ эԓты уйәтԓа. Пеԓантыты варәс эԓты смоква вощтŏт ӑт ӑкәтԓа пӑ варәс пŏхәл эԓты – виноград ӑт ӑкәтԓа.

⁴⁵Сӑмәԓ йӑм хŏйат сӑмәԓән шавиты йӑмәԓ этәԓтәԓ, ԉикәӈ хŏйат сӑмәԓән тӑйты ԉикәԓ этәԓтәԓ, хŏйат тэԓәӈ сӑмәԓ эԓты ԓўв ўӈԓәԓ пŏтәртәԓ".

Кӑт хотӈән пӑты эԓты утәԓтәты пŏтәр

⁴⁶"Мўйа нын Мӑнэм вохԓәԓән: "Турәм Куща, Турәм Куща!" пӑ хŏты Ма йастәԓәм, щиты ӑт верԓәты?

⁴⁷Кашәӈ Ма хŏщайэма йŏхтыԓыты хŏйат пӑ Ма йасәӈԓам хуԓәтты хŏйат пӑ йасәӈԓам щирән верты хŏйат, нынана йастәԓәм ԓўв хŏй хŏрпи.

⁴⁸Ԓўв щимәщ хŏйат хŏрпи, хŏй хот омәсәԓ, хот лотәԓ мӑԓа хирсәԓы пӑ хот пӑтэԓ кев эԓты ўсԓы. Мўйа, хун йик эпәтмаԓән пӑ щи хот йикән ԋорәтман, йэша нэш пўӈԓа ԋŏхтәты ӑт верәтса, хот кев эԓты омәсман уса, щишән.

⁴⁹Ма йасӈем хуԓәтты хŏйат пӑ йасәӈ щирән ӑт верәԓ, щит хотәԓ мўв эԓты опсәм хŏйат хŏрпи, хотәԓ так пӑты ӑт тӑйәԓ; хун ун йикән ԋорәтса, и щишән иԓ ӑркәмтәс; щи хот пŏԉха шўкаԓәс".

Ԉаԉ ху митхуйәԓ тўмтака верты вер

¹Хун Иисус хуԓәнтәм мир пеԓа йасәӈԓаԓ хŏԓасәт, Капернаум воша мӑнәс.

²Щита и сот ԉаԉ йох ŏх ху7:2 сот ԉаԉ йох ŏх ху – сотник, центурион, римский офицер; митхуйәԓ ԓавәртат кӑшаӈ ус, сŏрмәԓ вŏԓԓы ванамәс. Щи митху ԓўв шек мостыйа тӑйсәԓы.

³Иисус эԓты хуԓмаԓ кемән, ԓўв иудейәт хŏща уна уԓты икет эԓты тухәԓԓаԓ Иисус хŏща китсәԓԓы, йастәты, ԓўв митхуйәԓ тўмтака верты урәӈән, ат йŏхтәс.

⁴Ԓыв Иисус хŏща йŏхәтмеԓән, эвԓа-йŏԓа Ԓўвеԓ пойәксэԓ, щиты пŏтәртԓәт: "Нӑӈен ԓўвеԓа щит верты рӑхәԓ, ԓўв йӑм хŏйат,

⁵ԓўв мирэв мостыйа тӑйԓәԓы, хŏԓна Турәм йасӈа утәԓтәты хот мўӈева верәс".

⁶Иисус ԓыв пиԓԓаԓән мӑнәс. Туп хун Ԓўв ԉаԉ йох ŏх ху хот ԉэпа йŏхтәс, ԉаԉ йох ŏх ху ԓухәсԓаԓ йэщаԓт китсәԓы, йастәты: "Йэшәк Турәм Куща, йэԓԓы аԓ мӑна, ма мўй вŏԓаӈ хŏйат, ма хотэма Нӑӈ ат ԓŏксән,

⁷щишән, мӑнэм ма йӑм хŏйата ӑт ԓуӈәтсэм, Нӑӈ хŏщайэн ванамәты урәӈән; туп и йасәӈ йаста, митхуйэм тўмтака йиԓ.

⁸Ма ищи хуԓәтты хŏйат, туп ма иԓпемән ищи ԉаԉ йохәт уԓԓәт, ита йастәԓәм: "Мӑна", па мӑнәԓ, пӑ кимета йастәԓәм: "Ты йўва!", пӑ йиԓ, митхуйэма йастәԓәм: "Щит вера", пӑ верәԓ".

⁹Щит хуԓмаԓ кемән, Иисус ԓўв пелайәԓ ӑԓ ватәԓ пӑ, йŏхԓы каремәман, Ԓўв йўпеԓән шушәм хŏйатәта йастәс: "Нынана пŏтәртԓәм, тӑмәщ эвәԓты щир Ма Израиль мир хŏща хŏԓна ӑт уйәтсәм".

¹⁰Китыԓыйәм мŏхет, йŏхԓы йŏхәтмеԓән, кӑшаӈ митхуйэԓ, уйәтмеԓән, тўмтака йўвмаԓ.

Икиԓы хӑщәм нэ пŏх нŏх ԓыԓӈатты вер

¹¹Щи йўпийән Иисус Наин нэмпи воша мӑнәс; ар пеләк утәԓтәты йŏхԓаԓ пӑ тэԓыйэ хŏйат Ԓўв пиԓәԓән шушсәт.

¹²Хун Ԓўв вош пушас ова вана йŏхтәс, вош эԓты пӑрәм хŏйат ким этәԓтәса, икиԓы хӑщәм ими туп тӑйәм и пŏхәԓ ус. Ши ими пиԓән вош эԓты ар хŏйат шушәс.

¹³Ими шийаԓәмаԓ кемән, Турәм Куща сӑмәԓ хощты питәс, щаԉа ўсԓы пӑ ԓўвеԓа йастәс: "Аԓ хоԓԓа!"

¹⁴Вана шушман, Иисус ԓэԓтŏта йошәԓән хӑнәмтыйәс; ӑпа тўвәм мŏхет иԓ ԓойсәт. Щӑԓта Иисус йастәс: "Энәмты пŏх, нӑӈена йастәԓәм, нŏх ԓойа!"

¹⁵Пӑрәм пŏх нŏх опсәс пӑ пŏтәртты питәс; Иисусән ԓўв аԋԏеԓ йоша катԓәптәса.

¹⁶Хŏйатәт пӑԓщәмән йŏхәтсайәт, пӑ ԓыв Турәм вŏԓаӈа айәԓтты питсәт, пŏтәртԓәт: "Вŏԓаӈ, ун Турәм йасәӈ туты хŏйат этәс, мўӈ кўтэвән уԓ! Турәм мирәԓ хŏща ԋотты йŏхтәс!"

Иоанн иԋщәсты пеԓа йŏхԓы йастәты йасӈәт

¹⁷Тӑмәщ айкеԓ Ԓўв эԓтэԓ Иудея мўв ԓŏвата пӑ керәтман иса лакки ԓӑрпиԓәс.

¹⁸Иоанн тӑм верәт утәԓтәты йохԓаԓ эԓты хуԓсәԓы.

¹⁹Кӑт хŏйатӈәԓаԓ вана вохман, Иисус хŏща китсәԓы, иԋщәсты: "Нӑӈ мўй Щит, Хŏй йŏхәтты верәԓ уԓ, мўй пӑ па Ŏт ԓавәԓты мосәԓ?"

²⁰Ԓын Иисус хŏща йŏхәтсәӈән, йастәсӈән: "Иоанн йиӈка ԓŏӈәԓтыты хŏйат минэмән Нӑӈ хŏщайэна иԋщәсты китсәԓы: "Нӑӈ мўй Щит, Хŏй йŏхәтты верәԓ уԓ, мўй пӑ па Ŏт ԓавәԓты мосәԓ?"

²¹Щи пŏрайән Иисус ар сыр муш пӑ кӑши эԓты, кўԉ сŏх эԓты йӑмәԓтәс, пӑ мŏԓты кем сэмԓы хŏйатәта ватты щир мойԓәс.

²²Щӑԓта Ԓўв щиты йŏхԓы йастәс: "Мӑнаты пӑ Иоанна пŏтәртаты, мўй ватсәты, хуԓсәты: сэмԓы хŏйатәт сэмәӈа йиԓәт, нохты хŏйатәт йӑма шушиԓыԓәт; ԓайӈәӈ ԋўлмәӈ хŏйатәт сыстама йиԓәт, пӑԓԓы хŏйатәт хуԓԓәт, пӑрәм хŏйатәт нŏх ԓыԓӈатԓайәт, пӑ нўша хŏйатәта Йӑм айкеԓ эԓты сыйәӈа пŏтәртԓа;

²³Щит ŏйәӈ, хŏй мӑнэма эвәԓты нŏх ӑт вŏԓыйәԓ".

Иисус Иоанн ишәкԓәԓы

²⁴Иоанн китәм йохӈән мӑнәм йўпийән, Иисус мирәԓа Иоанн эԓты пŏтәртты питәс: "Хӑр пӑ таԓ мўва мўй ватты йӑхсәты? Вотән йовәԓты тŏрән ватты?

²⁵Мўй пӑ ватты нын йӑхсәты? Ԓэпәт сŏхәта ԓумәтԓыйәм хŏйат ватты? Йӑма ԓумәтԓыйәм пӑ тащәӈа уԓты хŏйатәт хон хотәтән уԓԓәт.

²⁶Мўй пӑ ватты нын йӑхсәты? Турәм йасәӈ туты хŏйат? Йӑна, пŏтәртԓәм нынана, Турәм йасәӈ туты хŏйат эԓты вŏԓаӈшәк хŏйат ватты йӑхсәты.

²⁷Тӑм щит, хŏй эԓты хӑшман уԓԓа: "Тӑм, Ма айкеԓ туты хŏйатэм Нӑӈ йэԓпенән китԓэм, xойән Нӑӈ йушен Нӑӈ йэԓпенән ԓэщатԓа".

²⁸Щишән нынана пŏтәртԓәм: иметән сэма пайтәм хŏйатәт кўтән, Иоанн йиӈка ԓŏӈәԓтыты хŏйат эԓты ԓӑтәӈшәк Турәм йасәӈ туты хŏйат ӑнтом; туп мет ай ŏт Турәм Хон Уԓәпсайән ԓўв эԓтайәԓ ԓӑтәӈшәк".

²⁹Хŏԓ Ԓўвеԓ хуԓәнтәм мир, пӑ налог ӑкәтты мŏхет, Турәм вещкат вер вана ўйман, Иоанн йиӈка ԓŏӈәԓтыты щирән йиӈка ԓŏӈәԓтысайәт;

³⁰фарисейәт пӑ Закона утәԓтәты икет йиӈка ԓŏӈәԓтыты ӑт кашащсәт, Турәм ԓӑӈхаты щир вана ӑт усэԓ.

Иисус Ԓўв ишәԓән уԓәм хŏйатәт нўрмәԓтәԓ

³¹Щӑԓта Турәм Куща йастәс: "Ин тӑм хŏйат рут артаԓәты мосәԓ, хŏй хŏрпет? Ԓыв хŏй хŏрпет?

³²Ԓыв вош хӑры хŏща омәсты ԋаврэмәт хŏрпет, кўтԓаԓән ўвәтԓәт пӑ пŏтәртԓәт: ”Мўӈ нарәс йўхән нын урӈәнән йŏтсув, нын пӑ ӑт йаксәты, мўӈ хоԓԓәты арәт арисув, нын ӑт хоԓԓәсты”.

³³Иоанн йиӈка ԓŏӈәԓтыты хŏйат йŏхтәс: ԋаԋ ӑт ԓэԓ, ўна ӑт йищәԓ, пӑ пŏтәртԓәты: ”Ԓўв ԓыпеԓән кўԉ уԓ”.

³⁴Хŏйат Пŏх йŏхтәс: ԓэԓ пӑ йищәԓ; пӑ йастәԓты: ’’Тӑта щи хŏйат, хŏй ԓэԓ пӑ ўна йищәԓ, налог ӑкәтты хŏйатәт пиԓән, кӑрэкәӈ хŏйатәт пиԓән ԓухса уԓ’’.

³⁵Ŏшәӈ–щащәӈ нŏмәс хŏԓыйэ ԓўв ԋаврэмԓаԓән вещката пӑйәтса".

Нэ Иисус кўрӈән ԋŏсәтәԓ

³⁶И фарисейән Иисус ԓэты вохса; Ԓўв хота ԓŏӈәс, пӑсан сурыйа иԓ опсәс.

³⁷Щи вошән и уԉԋайа уԓты нэ ус, Иисус фарисей хотән ԓэты вер хуԓмаԓ кемән, нŏви кев эԓты верәм, эпԓәӈ миро вŏйән пŏнәм, ващ турпи пўт тус.

³⁸Щӑԓта, ԓўв шӑш пеләк сӑхат Иисус кўрнат шŏма шаншәха омәсман пӑ хоԓԓәман, Ԓўв кўрԓаԓ сэмйикән ŏвӈәԓтты пӑ ŏхсŏхԓаԓән нŏх мухты питсәԓы. Ԓўв кўрԓаԓ мосәԓтәсԓы пӑ эпԓәӈ миро вŏйән ԋŏсәтсәԓы.

³⁹Хун Иисус вохәм фарисей щит шийаԓәс, нумәсэмәс: "Тӑм йӑна Турәм йасәӈ туты хŏйат ки ус, Ԓўв ԓуԓән уйәтсәԓы, хŏй, мўй хŏрпи нэ Ԓўв хŏщайәԓ хӑныԓыйәԓ, щит кӑрэкәӈ нэ".

Кӑт артнайәӈ хŏйатӈән эԓты утәԓтәты пŏтәр

⁴⁰Ԓўв пеԓайәԓ Иисус йастәс: "Симон! Ма нӑӈена мŏԓты йастәты верэм уԓ". Ԓўв йастәс: "Пŏтәрта, Утәԓтәты Ху".

⁴¹Иисус йастәс: "И ŏхәӈ ху кӑт артнайәӈ хŏйатӈән тӑйәс: итәԓ – ветсот динарий7:41 динарий - словарь ванта, киметәԓ – ветйаӈ.

⁴²Ԓын артнайԓын сŏхәптәты ŏх ӑт тӑйсәӈән, щишән ŏхәӈ ху кӑтӈән артнайԓын йŏрэмәсԓы. Йаста, мӑты ŏтәԓән ŏхәӈ ху мет мостыйа тӑйԓа?"

⁴³Симон йастәс: "Аԓт щитэн, хŏйа ԓўв аршәк ŏх йŏрэмәс". Иисус ԓўвеԓа йастәс: "Йӑна щиты пŏтәртԓән".

⁴⁴Ин нэ пеԓа керԓәман, Симона йастәс: "Тӑм нэ нӑӈена ныԓа? Ма нӑӈ хотэна йŏхәтсәм, нӑӈ кўр ԉŏхәтты йик Мӑнэм ӑт мӑсән, ԓўв пӑ Ма кўрԓам сэм йикԓаԓән ŏвӈәԓтсәԓы, ŏхсŏхԓаԓән нŏх мўхсәԓы;

⁴⁵уйтатмемәнән нӑӈ Мӑнэм хŏԓна ӑт мосәԓтәсэн, ԓўв пӑ, Ма йŏхәтмем ўш эԓты, Ма кўрԓам мосәԓтәты ӑт вŏԓыйәԓ.

⁴⁶Нӑӈ Ма ŏхем оливка вŏйән ӑт ԋŏсәтсэн, ԓўв пӑ эпԓәӈ миро вŏйән кўрԓам ԋŏсәтсәԓы.

⁴⁷Щишән, Ма нӑӈена йастәԓәм: Ма пеԓайэм артан сӑмәӈа уԓты верәԓ аԉәԓ, мўй арат ԓўв ар кӑрэкԓаԓ йŏрэмәсайәт; хŏйа шимәԓ нўр йŏрэмәԓа, щит шимәԓ сӑмәӈа уԓ".

⁴⁸Иисус щи нэ пеԓа йастәс: "Нӑӈ кӑрэкԓан йŏрэмәсайәт".

⁴⁹Ԓўв пиԓәԓән пӑсан сурыйән опсәм мŏхет нумәсты питсәт: "Хŏй тӑм, кӑрэкәт пӑ йŏрэмәԓ?"

⁵⁰Иисус пӑ нэӈа йастәс: "Нӑӈ эвәԓты верэнән нӑӈ нŏх пайәтсайән, йӑм нŏмәсән мӑна!"

Тухәԓ нэӈәт Иисуса ԋотсәт

¹Щи йўпийән Иисус вошәт куртәт хўват, Турәм эԓты сыйәӈа пŏтәртман, Йӑм айкеԓ Турәм Хон Уԓәпса эԓты тўвман, йӑӈхәс. Ԓўв пиԓәԓән кӑтхŏщйаӈ утәԓтәты йохԓаԓ усәт,

²пӑ тухәԓ нэӈәт, хŏйтат Ԓўв кўԉ сŏх пӑ арсыр мушәт эԓты йӑмәԓтәс: Магдалинайа айәԓты Мария, ԓўв эԓтэԓ ԓапәт кўԉ сŏх ким этәс;

³Иоанна па, Ирод хŏща хот рупата ŏх ху Хуза ийими; Сусанна, хŏԓна пӑ па имет. Тӑм нэӈәт Иисуса тӑйәм ŏхԓаԓән ԋотсәт.

Сŏхәӈ ŏтәт эԓты уԓты утәԓтәты пŏтәр

⁴Хун щи арат ар мир ӑктәщәс пӑ арсыр вошәтән уԓты мŏхет Ԓўв хŏщайәԓ йŏхәтсәт, Ԓўв утәԓтәты пŏтәрән пŏтәртты питәс:

⁵"Ики мўв хӑрәԓа ԓат сэм йовәԓты этәс, хун ԓўв ԓат сэмԓаԓ йŏвәԓмаԓән, тухәԓԓаԓ йуш пўӈԓа рӑкәтсәт пӑ иԓ пурәтсайәт, щищкетән ԓэсайәт;

⁶тухәԓԓаԓ па кев эԓты рӑкәтсәт, тŏрән тӑйԓаԓ йэша нŏх этмисәт, йик ӑт тӑймаԓ пӑтыйән, нŏх сорсәт.

⁷Тухәԓ ԓат сэмԓаԓ пуԓән кўта рӑкәтсәт, пуԓән пӑ энмәс, щӑԓта пуԓәнән лӑп аԓэмәсайәт;

⁸тухәԓ ԓат сэмԓаԓ йӑм мўва рӑкәтсәт пӑ энәммеԓ йўпийән, йӑм арат ӑкәтса, иԓ йовԓәм ԓат сэм эԓты сот пўш ар". Щи пŏтәр пŏтәртмаԓ йўпийән, Ԓўв такан йастәс: "Хŏй хуԓты пӑԓ тӑйәԓ ки, ат хуԓәԓ!"

⁹Утәԓтәты йохԓаԓән Ԓўв иԋщәсса: "Мўй эԓты тӑм утәԓтәты пŏтәр".

¹⁰Иисус йŏхԓы йастәс: "Нынан Турәм Хон Уԓәпса хӑԋа щирәт уйәтты мӑса, па хŏйатәта утәԓтәты пŏтәр хŏща, щиты ԓыв, ватман, ӑт шийаԓәԓәт, хуԓман, ӑт мŏштәԓәт.8:10 Турәм йасәӈ туты ики Исаия нэпек эԓты уԓты йасӈәт ’цитата от пророка Исаии’ (6:9)

¹¹Утәԓтәты пŏтәр щит айәԓԓәԓ: ԓат сэм – щит Турәм йасәӈ.

¹²Йуш пўӈԓа рӑкнәм ԓат сэмәт хŏрпет тухәԓ йасәӈ хуԓты хŏйатәт, хŏйтат хŏща йухәт хиԋ йŏхәтәԓ пӑ щи йасәӈ сӑмԓаԓ эԓты нŏх уԓԓы, ԓыв ӑт ат эвәԓсәт пӑ нŏх ӑт ат пайтәссәт.

¹³Кев эԓты питәм ԓат сэмәт хŏрпет тухәԓ хŏйатәт, амәтман йасәӈ вана ўԓәт. Туп ԓыв ԓэр ӑт тӑйԓәт, оԓәӈән эвәԓԓәт, хун хўщәпса этмәԓ, йŏхԓы ԓэԓәпԓәт.

¹⁴Пуԓән кўта рӑкнәм ԓат сэмәт хŏрпет тухәԓ йасәӈ хуԓты хŏйатәт, туп ԓыв айән-айән кашәӈ хӑтәԓ верԓаԓән, тащәӈ пӑ каш хŏрпи уԓәпсайән йŏхи пайәтԓайәт, пӑ щи йасәӈ нэмәԓтыйа ӑт йиԓ.

¹⁵Йӑм мўва питәм ԓат сэмәт хŏрпет тухәԓ хŏйатәт, хŏй йасәӈ хуԓмеԓ йўпийән йӑм пӑ вещкат сӑмԓаԓән шавиԓэԓ, пӑ щи йасӈеԓ ун йӑм вер верәԓ"; Щит йастәмаԓ йўпийән, Ԓўв такан йастәс: "Хŏй хуԓты пӑԓ тӑйәԓ ки, ат хуԓәԓ!"

Тўт сун эԓты уԓты утәԓтәты пŏтәр

¹⁶Нэмәԓты хŏйат тўт сун ўщәтмаԓ йўпийән, хŏшамән лӑп ӑт пŏнԓәԓы, мўй пӑ иԓ ӑт хӑԋатԓәԓы, хŏԓна пӑ тўт акԓа нŏх опсәԓԓәԓы, ԓŏӈты хŏйатәта нŏви ат ныса.

¹⁷Нэмәԓты хӑԋа ӑнтом, мўй эԓпа ӑт ат этәс, пӑ нэмәԓты хӑԋатәм ӑнтом, мўй эԓпа ӑт ат аԉса пӑ эԓпа ат питәс.

¹⁸Щӑԓта, вантаты, хŏты нын хуԓәтԓәты: хŏй тӑйәԓ, щита па мӑты питԓа, хŏй ӑт тӑйәԓ, щит эԓты, мўй тӑйты нумәсәԓ, щитәԓ па нŏх ўԓа.

Христос Ԓўв апщиԓаԓ

¹⁹Ԓўв хŏщайәԓ аԋԏеԓ пӑ ху апщиԓаԓ йŏхәтсәт, хŏйатәт кўт эԓты вана мӑнты ӑт верәтсәт.

²⁰Иисуса йастәса: "Аԋԏен пӑ ху апщиԓан камән ԓойԓәт, Нӑӈен ватты ԓӑӈхәԓайәт".

²¹Ԓўв щиты йŏхԓы йастәс: "Турәм йасәӈ хуԓәтты пӑ йасәӈ хўват уԓты ŏтәт – щитәт Ма аԋԏем пӑ Ма ху апщиԓам".

Так вот роммәԓты вер

²²И хӑтәԓән Иисус утәԓтәты йохԓаԓ пиԓән хопа ԓэԓәс пӑ йастәс ԓывиԓаԓа: "Ԓор тўм пелка ўшԓув". Щӑԓта мӑтсәт.

²³Мӑнмеԓ сыс Ԓўв иԓ вŏйәпса. Ԓорән ун вота йис, хўмпәтән эԓт хӑщ мӑнԓайәт, пӑ ԓыв туп сŏртэԓа йŏхәтсәт.

²⁴Иисус хŏща вана ԋўрман, Ԓўвеԓ нŏх кўрәтсэԓ пӑ йастәсәт: "Утәԓтәты Ху! Утәԓтәты Ху! Щи пӑрԓув". Нŏх киԓмаԓән, Ԓўв вот пӑ хўмпәт иԓ вŏԓәтсәԓы; щӑԓта ромәпсәт, пӑ шитама йис.

²⁵Щиӈәԋща Ԓўв утәԓтәты йохԓаԓ пеԓа йастәс: "Хŏта нын эвԓәпсайән?" Ԓыв, пӑԓман пӑ пакәнман, кўтэԓән пŏтәртсәт: "Хŏй щит щимәщ, вотәта па йиӈка партәԓ, Ԓўвеԓа ԓыв хуԓәтԓәт?"

Кўԉәт пурщәта воштәты вер

²⁶Галилея шŏма уԓты Гадара мўва йŏхәтсәт.

²⁷Хун Иисус ўты ŏхԓәс, Ԓўв йэщаԓтәԓ вошән уԓәм и хŏйат этәс. Ԓўв хўв тэԓән кўԉәтән ԓŏӈман уса па ԓумәтты сŏха ӑт ԓумәтԓыйәс, ӑнтом хот ԓыпийән, ӑпайәт пŏнәм кев хŏшапәт ԓыпийән ус.

²⁸Иисус шийаԓәмаԓ кемән, ԓўв ўваԓтәс, Иисус йэԓпийа иԓ рӑкнәс пӑ сыйәӈ тўрән йастәс: "Нӑӈен ма хŏщайэм мўй вер, Иисус, Нўм Турәм Пŏх? Нӑӈен пойәкԓэм, мӑнэм аԓ шукаты!"

²⁹Иисусән кўԉ тӑм хŏйат эԓты ким этты партса, ԓўв щишән ўвәс. Ин унты кўԉән ар пўш мŏщатыса пӑ шукатыса, карты кеԓән йошԓаԓ кўрԓаԓ хŏԓна иԓ йӑрыԓысайәт, щиты шависа, туп ищипа карты кеԓәт ԓўв лакки мӑшԓәԓы, пӑ кўԉән атэԓт тӑхайа воштәԓа.

³⁰Иисус ԓўвеԓ иԋщәссәԓы: "Нӑӈ нэмен мўй?" Щитэн йастәс: "Легион"8:30 легион – хут щŏрәс ԉаԉ йох похәл, ԓўв хŏщайәԓа шек ар кўԉ ԓŏӈман ус.

³¹Ԓыв Иисус пойәксэԓ, пӑтыԓы ўса8:31 пӑтыԓы ўс ’бездна’ ԓыв ӑт ат китсайәт.

³²Щита, кев ԓŏӈәԓән пурәщ тащ ԓӑрпиԓәмаԓ; кўԉәт Иисус пойәксэԓ, ԓуԓән ԓывиԓаԓ пурщәт ԓыпийа ԓŏӈты ат эсәԓсәԓы. Ԓўв эсәԓсәԓы.

³³Кўԉәт хŏйат эԓты ким этмеԓ йўпийән, пурщәт ԓыпийа ԓŏксәт, пӑ пурәщ тащ кев веш эԓты ԓора иԓ керәптыйәс пӑ щита щи иԓ шуйԓәс.

³⁴Тащ шавийәм хŏйатәт, щит шийаԓәмеԓ кемән, сӑм мӑнман хухәԓмәсәт пӑ вошән, куртәтән уԓты хŏйатәта пŏтәртсэԓ.

³⁵Тыйәм вер ватты ким этсәт; Иисус хŏща йŏхәтмеԓән, ԓыв кўԉәтән хӑйәм хŏйат шийаԓәсәт, Иисус пўӈәԓән опсәс, ԓумәтԓыман, ŏшәԓән ус; щиӈәԋща, пӑԓтамәсәт.

³⁶Вантәм мŏхет пӑ ԓывиԓаԓа пŏтәртсэԓ, хŏты кўԉәӈ ху тўмтака йис.

³⁷Гадара вош ԉэп мўвән уԓты хŏйатәт хŏԓ Иисус пўӈԓа мӑнты партсэԓ, шек ун пӑԓщәмән йŏхәтсайәт, щишән. Ԓўв хопа ԓэԓәс пӑ йŏхԓы мӑнты питәс.

³⁸Кўԉәтән хӑйәм хŏйат Ԓўв пўӈԓәԓән уԓты пӑтән ўратәс. Туп Ԓўв ин ху щиты йастәман китсәԓы:

³⁹"Йŏхи хотэна мӑна, пӑ пŏтәрты, мўй нӑӈена Турәм верәс". Ԓўв мӑнәс пӑ вош хўватән сыйәӈа пŏтәртәс, мўй ԓўвеԓа Иисус верәс.

⁴⁰Хун Иисус йŏхԓы йŏхтәс, ар хŏйатән ўщайән верса, хŏԓыйэ Ԓўвеԓ ԓавәԓсәт, щишән.

Мушәӈ нэ тўмтака йиты вер

⁴¹Щӑԓта, Ԓўв хŏщайәԓа Иаир нэмпи ики, Турәм йасӈа утәԓтәты хот куща, йŏхтәс; Иисус кўрӈән хŏща хŏмта иԓ шаншатман, Ԓўвеԓ ԓўв хотәԓа ԓŏӈты вохсәԓы;

⁴²ԓўв кӑтхŏщйаӈ тӑԓ ԓŏват кем эви, туп и ԋаврэм, тӑйәс пӑ щитәԓ пӑрты кема йис, щишән вохсәԓы. Хун Ԓўв Иаир пиԓән шушәс, Иисус ар хŏйатән лӑп нӑпәтса.

⁴³Ԓыв кўтэԓән и нэ ус, кӑтхŏщйаӈ тӑԓ кӑԓыйән этәԓтәса; ԓўв ԉэккарәта, мўйкем ŏх, пŏрмас тӑйәс, хŏԓ мӑсԓы, нэмәԓты ŏтԓаԓән йӑмәԓтты ӑт верәтса;

⁴⁴Иисус хŏща шӑш пеләк сӑхат ԓўв вана хӑтәс, Ԓўв сŏхәԓ кимԓа йошән хӑнәмтыйәс, и мŏхты кӑԓэԓ мӑнты нŏх вŏԓыйәс.

⁴⁵Щиӈәԋща Иисус ищмәс: "Хŏй Ма хŏщайэма хӑнәмтыйәс?" Хун хŏйатәт иса йастәсәт: "Ӑнтом ма, ӑнтом ма", Петра пӑ Иисус пиԓән уԓәм па мŏхет йастәсәт: "Утәԓтәты Ху, Нӑӈ ар хŏйатән керәтман ԓойԓайән, пӑ тӑӈәртԓайән, Нӑӈ хŏԓна иԋщәсԓән: "Хŏй Ма хŏщайэма хӑнәмтыйәс?"

⁴⁶Иисус пӑ йастәс: "Ӑнта, Ма хŏщайэма а хŏй хӑнәмтыйәс, Ма эԓтэм йур шўкем этмаԓ щащәԓ".

⁴⁷Ин нэ ватԓәԓы, хӑнәмтыйәм верәԓ ӑт пентәс, сӑмәԓ мӑнман, вана мӑнәс пӑ Иисус йэԓпийән хŏмта иԓ шаншантәс. Ԓўвеԓа, хŏйатәт хуԓәтман, йастәсԓы, мўй урәӈән Ԓўв хŏщайәԓ хӑнәмтыйәс, пӑ ищи кўрәмән тўмтака йис.

⁴⁸Иисус щиты йастәс ԓўвеԓа: "Эвийэм, аԓ пӑԓа, нӑӈ эвԓәпсайэнән нӑӈ нŏх пайәтсайән8:48 мўй пӑ: тўмтака версайән;; йӑм нŏмәсән мӑна".

Иаир эви нŏх ԓыԓәӈԓәты вер

⁴⁹Хун Ԓўв хŏԓна щит пŏтәрмаԓән, Турәм йасӈа утәԓтәты хот куща, ԓўв хотәԓ эԓты и хŏйат йŏхтәс пӑ ԓўвеԓа йастәс: "Нӑӈ эвен пӑрәс, Утәԓтәты Ху хŏща аԓ тŏрастыйа".

⁵⁰Иисус щи йасӈәт хуԓмаԓ кемән, ԓўвеԓа йастәс: "Аԓ пӑԓа. Туп эвԓа, пӑ эвен сŏрәм эԓты нŏх пайәтԓа".

⁵¹Ԓўв хотәԓа йŏхәтмаԓән, Иисус нэмәԓты хŏйата йŏхи ԓŏӈты ӑт эсԓәс, туп Петрайа, Иоанна па Иакова, пӑ эви ащийа, аԋԏийа.

⁵²Хŏԓыйэ эви урәӈән хоԓԓәсәт, ирӈәԓтысәт. Туп Иисус йастәс: "Аԓ хоԓԓаты; ԓўв ӑнта пӑрәс – ԓўв ŏԓәԓ".

⁵³Ԓыв уйәтԓэԓ - эви йӑна пӑрәс, щишән Ԓўв эԓтэԓ ԋӑхты питсәт.

⁵⁴Иисус ԓывиԓаԓ хŏԓ ким воштәсԓы пӑ эви йошәԓ эԓты катәԓсәԓы, такан йастәс: "Ԋаврэмийэ! Нŏх ԓойа".

⁵⁵Щӑԓта эви ԓыԓән йŏхәтса; ԓўв мŏхты нŏх ԓойәс, Иисус ԓўвеԓ ԓапәтты партсәԓы.

⁵⁶Ащеԓ-аԋԏеԓ ӑԓ пакнысыстән. Иисус пӑ нэмәԓты хŏйата щи вер эԓты пŏтәртты ӑт эсәԓсәԓы.

Кӑтхŏщйаӈ хŏйатәт утәԓтәты китсайәт

¹Кӑтхŏщйаӈәԓ вохмаԓ йўпийән, ԓывиԓаԓа кўԉәт воштәты, мушәт йӑмәԓты йур пӑ партатты щир мӑс,

²пӑ ԓывиԓаԓ Турәм Хон Уԓәпса эԓты сыйәӈа пŏтәртты, мушәӈ хŏйатәт тўмтака верты китсәԓы.

³Щӑԓта ԓывиԓаԓа йастәс: "Пӑтән нэмәԓты аԓ ўйаты, - ӑнта шушты сўв, ӑнта хир, ӑнта ԋаԋ, ӑнта ŏх, ӑнта кимет ԓумәтты сŏх;

⁴мўйсыр хота ԓŏӈԓәты, щита хӑщаты, щиԓта йэԓԓы мӑнаты.

⁵Хŏта вана ӑт ки ўԓайты, щи вош эԓты эттанән, кўрԓән эԓты хиш иԓ пӑркатаԓән. Щит ԓывиԓаԓа нўра ат питәԓ".

⁶Ԓыв мӑтсәт, пӑ куртәт сӑхат кашәӈ тӑхайән Йӑм айкеԓ тутԓыман пӑ мушәӈ хŏйатәт йӑмәԓтман йӑхсәт.

⁷Ԋӑԓмет мўв щуӈ кущайа уԓты Ирод ики, Иисус верәм верәт эԓты хуԓмаԓ кемән, нŏпсәԓ ԓыԓԓәс: хŏй йастәԓ, мӑтты щит Иоанн пӑрмаԓ эԓты нŏх ԓыԓәӈԓәс,

⁸тухԓәт пӑ – Илия сэма этәс, па хŏйатәт пӑ – катра уԓәм Турәм йасәӈ туты икет эԓты мӑтты ŏт нŏх ԓыԓәӈԓәс.

⁹Ирод йастәс: "Ма Иоанн ŏхәԓ хŏԓт пайәтсэм; а хŏй Тӑм Хŏйат, Хŏй эԓты ма тӑмәщ айкеԓ хуԓԓәм?" Пӑ Ԓўвеԓ ватты урәӈән, мŏԓты щир кӑшты питәс.

¹⁰Апостоләт йŏхԓы йŏхәтмеԓән, мўй версәт, Иисуса иса пŏтәртсэԓ; щӑԓта Ԓўв, щитԓаԓ пӑтән ўйман, Вифсаида вош ԉэпән уԓты атэԓ тӑхайа мӑнәс.

¹¹Хŏйатәтән щи вер мŏштәм кемән, Ԓўв хŏщайәԓ мӑтсәт. Ԓўв, щи мŏхет вана усԓы, ԓывиԓаԓа Турәм Хон Уԓәпса эԓты пŏтәртәс пӑ хŏй тўмтака верты мосәс, щит тўмтака версәԓ.

Вет щŏрәс арат ху ԓэтәтән тӑрматты вер

¹²Хӑтәԓ йэтна пелка йиты питәс. Кӑтхŏщйаӈ утәԓтәты йохԓаԓ Ԓўв ԉэпәԓа вана хӑтман, йастәсәт: "Мŏхет эсԓаԓән, ванән уԓты куртәта хоԓты пӑ ԓэтәт кӑшты ат мӑнԓәт; мўӈ тӑта таԓ тӑхайән уԓԓув".

¹³Ԓўв пӑ йастәс: "Нын ԓывиԓаԓ ԓэтәтән мийаԓән!" Ԓыв йастәсәт: "Мўӈ вет ԋаԋ, кӑт хўԓ тўмпийән па ӑт тӑйԓув; мосәӈ мўӈева тӑм хŏйатәт урәӈән ԓэтәт ԓутты йӑхты?".

¹⁴Щита вет щŏрәс кем йох хŏйат ус. Иисус утәԓтәты йохԓаԓа йастәс: "Ԓывиԓаԓ и пўӈԓа ветйаӈ хŏйат аратән опсәԓтаԓән".

¹⁵Щӑԓта ԓыв щиты версэԓ, иса хŏԓ опсәԓтсәԓаԓ.

¹⁶Ԓўв, вет ԋаԋ, кӑт хўԓ ўйман, турәм пеԓа нŏхԓы ӑӈкәртман, пойәкщәман, Турма пумащипа йасӈәт йастәс, морәтсәԓы пӑ утәԓтәты йохԓаԓа мӑсԓы, мира ортты урәӈән.

¹⁷Щӑԓта ԓэсәт пӑ хŏԓ тӑрәпсайәт; пӑ хӑщәм ԋаԋ пўләт кӑтхŏщйаӈ кураԋэк арат ӑкәтсәт.

Петра эвәԓты щирәԓ аԉты вер

¹⁸И пўш, хун Ԓўв атэԓт тӑхайән пойәкщәман ус, пӑ утәԓтәты йохԓаԓ Ԓўв пиԓәԓән усәт, йухәт Ԓўв ԓывиԓаԓ ищмәсԓы: "Хŏйатәтән Ма хŏй йўкана тӑйԓайәм?"

¹⁹Ԓыв йŏхԓы йастәсәт: "Иоанн йиӈка ԓŏӈәԓтыты хŏйат йўкана, тухԓәтән пӑ – Илия йўкана; па хŏйатәт пӑ йастәԓәт, катра пŏрайән уԓәм Турәм Йасәӈ туты икет эԓты и мӑтты ŏт нŏх ԓыԓәӈԓәс".

²⁰Ԓўв ԓывиԓаԓ ищмәсԓы: "Нын пӑ хŏй йўкана Мӑнэм тӑйԓәԓән". Петра йŏхԓы йастәс: "Турәмән китәм Христоса".

²¹Туп Иисус ԓывиԓаԓа щит эԓты нэмәԓты хŏйата пŏтәртты шек такан ӑт эсәԓсәԓы,

²²йастәс: "Хŏйат Пŏха мосәԓ ар шук туты, уна уԓты икетән, Турма йир верты хŏйатәт ŏх икетән, Закона утәԓтәты икетән вана ӑт ўты вер уԓ, пӑ пӑратты вер уԓ, щӑԓта хуԓмет хӑтәԓән нŏх ԓыԓәӈԓәты верәԓ уԓ".

Утәԓтыты хŏйата уԓты вер йӑна тынәԓ

²³Ԓўв хŏԓ хŏйатәт пеԓа йастәс: "Хŏй Ма йўпемән йиты ԓӑӈхаԓ ки, ԓўв эԓтайәԓ ат йŏрэмәԓ, пернайәԓ ат ўԓ9:23 пернайәԓ ат ўԓ – Ма урӈемән шук туты пӑ пӑрты ԓэщатыман ат уԓ;, пӑ Ма йўпемән йиԓ.

²⁴Хŏй уԓәпсайәԓ шавиты ки ԓӑӈхаԓ, щит ԓўвеԓ уштәԓԓы; хŏй уԓәпсайәԓ Ма урӈема уштәԓԓы ки, щит ԓўвеԓ шавиԓԓы.

²⁵Мўй ŏнтас хŏйата, уԓты омәсты мир иса йоша пайәтԓәԓы ки, ԓўвеԓ пӑ ԓўв пӑратԓәԓы, мўй пӑ ԓўвеԓ ԓўв атәм верәԓ?

²⁶Хŏй Ма эԓтэм пӑ Ма йасәӈԓам эԓты йэԓамтыты питәԓ, щи хŏйат эԓты Хŏйат Пŏх ищи йэԓамтыты питәԓ, хун Ԓўв хутԓәты–вŏрԓәты щирәԓән, щӑԓта Ащэԓ пӑ йэмәӈ ангеләт хутԓәты–вŏрԓәты щирән йŏхәтәԓ.

Па хŏрпийа йиты вер

²⁷Йӑна нынана йастәԓәм: тӑта ԓойты хŏйатәт эԓты тухԓәт, Турәм Хон Уԓәпса шийаԓәтэԓ унты, сŏрма ӑт питԓәт.

²⁸Щи йасәӈԓаԓ йўпийән, ԋийәԓ кем хӑтәԓ хӑщәм йўпийән, Иисус Петра, Иоанн пӑ Иаков пӑтән ўйман, кев ԓŏӈԓа нŏх хуӈхәс, пойәкщәты урәӈән.

²⁹Хун Ԓўв пойәкщәс, веш хŏрасәԓ па хŏрпийа йис, ԓумтәмԓаԓ нŏвийа йисәт, вŏрԓәты питсәт.

³⁰Щӑԓта, кӑт ики Ԓўв пиԓәԓән пŏтрэмәсӈән. Щит Моисей пӑ Илия усӈән;

³¹ԓын хутԓыман–вŏрԓыман этсәӈән, Иисус тӑм уԓәпса эԓты мӑнты верәԓ эԓты пŏтәртсәӈән, мўй Ԓўвеԓ Иерусалим вошән верты мосәԓ.

³²Петра пӑ ԓўв пиԓәԓән уԓәм йохӈиԓаԓ оԓәмән ԓавәртамәсайәт; туп нŏх верԓәмеԓән, Иисус хутԓәты–вŏрԓәты щирәԓ пӑ Ԓўв пиԓәԓән ԓойәм щи кӑт икеӈән, шийаԓәсәт.

³³Хун ԓын Ԓўв эԓтайәԓ йэԓ мӑнты питсәӈән, Петра Иисуса йастәс: "Утәԓтәты Ху! Тӑта мўӈева йӑм уԓты; хуԓәм ԓэпәс хот верԓув: ит – Нӑӈена, ит – Моисейа, ит – Илияйа", - мўй пŏтәртәс ӑт уйәтәԓ.

³⁴Хун ԓўв щит пŏтәртмаԓән, пӑԓәӈ этәс пӑ ԓыв эԓтэԓа иԓ эсԓәщәс; хун пӑԓӈа ԓŏксәт, ԓыв шек пӑԓтамәсәт.

³⁵Пӑԓәӈ эԓты тўр сый ус, щащыԓыйәс: "Тӑм – Ма сӑмема мосты Пŏхем, Ԓўвеԓа хуԓәнтаты".

³⁶Хун щи тўр сый щащәс, Иисус утща хӑщәс. Ԓыв мӑшйайа йисәт, пӑ мўй ватсәт, нэмәԓты хŏйата щи пŏрайән ӑт пŏтәртысэԓ.

Кўԉ тӑйты пŏх тўмтака йиты вер

³⁷Кимет хӑтәԓ, хун ԓыв кев эԓты иԓ ŏхәԓсәт, Ԓўв ар хŏйатән йэщаԓ этса.

³⁸Шӑмкапан, а хŏй ху мир кўт эԓты ўваԓтәс: "Утәԓтәты Ху! Щи ԓŏват йӑм вера, Нӑӈ пŏхем пеԓа ӑӈкәрмийа, ԓўв ма туп тӑйты и ԋаврэмем:

³⁹ԓўв кўԉән ԓŏӈтыԓа, щӑԓта ԓўв роман ўваԓтәԓ, пӑ ԓўвеԓ шукатԓәԓы, пӑ ўӈԓәԓ эԓты ԋавәр мӑнәԓ; пӑ йӑма шукаттаԓ йўпийән ўрайән ԓўв эԓтэԓ йэԓ мӑнәԓ.

⁴⁰Ма Нӑӈ утәԓтәты йохԓан, щи кўԉ воштәты урәӈән, вохсәԓам, пӑ ԓыв ӑт верәтсәт".

⁴¹Иисус пӑ йŏхԓы йастәс: "Ӑт эвәԓты пӑ вевтама нумәсты хŏйат рут! Мўй унты Ма нын пиԓанән уԓты пӑ нынан верәтты питԓәм! Пŏхен ты тўви".

⁴²Хун щи пŏх шушәс, кўԉ ԓўвеԓ мўва иԓ вŏщкәсԓы пӑ кӑмән щирән тӑрӈәԓтты питсәԓы; туп Иисус ԋаврэм кетәмты кўԉа ӑт эсәԓсәԓы, пŏх тўмтака версәԓы пӑ ԓўв ащеԓа ԓўвеԓ мӑсԓы.

Христос Ԓўв сŏрмәԓ эԓты йэԓпи пŏтәртәԓ

⁴³Иса хŏԓ Турәм ун йурәԓ эԓты туп ӑԓ пакнысысәт. Хун пӑ хŏԓыйэ Иисус верты верәт эԓты ӑԓ пакнысысәт, Ԓўв утәԓтәты йохԓаԓа йастәс:

⁴⁴"Тӑм йасӈәт нын нŏпсәна пŏнаԓән: Хŏйат Пŏх хŏйатәт йоша мӑԓа".

⁴⁵Ԓыв щи йасәӈ ŏша ӑт пŏтсэԓ, пӑ ԓыв эԓтэԓ щит лӑп уса, щишән ԓыв ӑт мŏштәсэԓ, Ԓўвеԓ щит эԓты ищмәты пӑ ԓыв пӑԓсәт.

Йӑна вŏԓаӈ щир

⁴⁶Ԓывиԓаԓа и нŏмәс йŏхтәс: хŏй ԓыв кўтэԓән вŏԓаӈшәк?

⁴⁷Иисус ԓыв сӑмԓаԓән тӑйты нŏмәсԓаԓ ватман, ԋаврэм ўсԓы пӑ Ԓўв йэԓпәԓа ԓощәԓтәсԓы

⁴⁸пӑ ԓывиԓаԓа йастәс: "Хŏй тӑм ԋаврэмийэ Ма нэмем урәӈән вана уԓԓы, щит Мӑнэм вана уԓԓы; хŏй Мӑнэм вана уԓԓы, щит Мӑнэм Китәм Ŏт вана уԓ; хŏй нын эԓтан мет айшәк, щит вŏԓаӈ питәԓ".

⁴⁹Щи пўԉаӈ Иоанн йастәс: "Утәԓтәты Ху! Мўӈ и хŏйат ватсув, ԓўв Нӑӈ нэменән кўԉәт воштәԓ, пӑ ԓўвеԓ нŏх вŏԓәтсэв, ԓўв мўӈ пиԓэвән Нӑӈ йўпенән ӑт йӑӈхәԓ, щишән.

⁵⁰Иисус Иоанна йастәс: "Аԓ вŏԓытаԓән, хŏй ӑнта нын йэщаԓтән уԓ9:50 нын йэщаԓтән уԓ – нын пеԓайән ԉик туԓ, щит нын пеԓайән уԓ".

Самария мўв Христос вана ат ўсԓы

⁵¹Хун Ԓўвеԓ мир уԓәпса эԓты нŏх ўты пŏра ванамәс, Ԓўв Иерусалим воша мӑнты нŏмәс верәс;

⁵²щишән айкеԓ туты йохԓаԓ Ԓўв йэԓпеԓән китсәԓы; щиӈәԋща ԓыв мӑтсәт пӑ Самария9:52 Самария – словарь Самария ванта; мŏхет курта йŏхәтсәт, Ԓўв урӈәԓән мўй иса ԓэщатты.

⁵³Туп щита Ԓўв вана ӑт эсәԓса, Ԓўв Иерусалим воша шушәс, щишән.

⁵⁴Щит шийаԓәмаԓән, Ԓўв утәԓтәты кӑтӈиԓаԓ, Иаков пӑ Иоанн, йастәсӈән: "Турәм Куща, Нӑӈ ԓӑӈхаԓән ки, мўӈ йастәԓув, турәм эԓты тўт иԓ ат ŏхәԓәԓ, ԓывиԓаԓ ат пӑратԓәԓы, хŏты Илия верәс?"

⁵⁵Туп Ԓўв, ԓын пеԓайԓәна карэмәман, ԓынан нўрысԓы пӑ йастәс: "Ӑт уйәтԓәԓән, мӑты ԓыԓ эԓты нын уԓԓәтән?"

⁵⁶Хŏйат Пŏх ӑнта хŏйатәт уԓәпса пӑратты йŏхтәс, нŏх пайәтты". Щишән ԓыв па курта мӑтсәт.

Утәԓтыты хŏйата уԓты тын эԓты

⁵⁷Щиты тыйәс, хун ԓыв мӑнмеԓән, и мӑтты ŏт Ԓўвеԓа йастәс: "Турәм Куща! Ма Нӑӈ йўпенән мӑнԓәм, хŏԓта кепа Нӑӈ ат мӑтсән".

⁵⁸Иисус ԓўвеԓа йастәс: "Ŏхсарәт ух тӑйԓәт, щищкет - тыхәԓ, Хŏйат Пŏх пӑ ŏхәԓ пŏнты тӑха ӑт тӑйәԓ".

⁵⁹Кимет хŏйата Ԓўв йастәс: "Ма йўпемән йўва". Щитэн йастәс: "Турәм Куща, мӑнэм оԓәӈән йŏхи йӑхты эсԓы, пӑрәм ащем иԓ ԓэщатты".

⁶⁰Туп Иисус ԓўвеԓа щиты йастәс: "Пӑрәм хŏйатәта хӑԓайԓаԓ ԓывиԓаԓа иԓ ԓэщатты хӑйи, нӑӈ пӑ мӑна, Турәм Хон Уԓәпса эԓты такан пŏтәрта.

⁶¹Хŏԓна хуԓмет хŏйат па йастәс: "Турәм Куща, ма Нӑӈ йўпенән мӑнԓәм, туп йэԓпи мӑнэм йŏԓән уԓты мŏхиԓам пиԓән пайәмуԓәм верты эсԓы".

⁶²Иисус ԓўвеԓа йастәс: "Нэмәԓты хŏйат, хŏй йошәԓ мўв шўкатты ŏта пŏнмаԓ йўпийән пӑ йŏхԓы ӑӈкәртыйәԓ, Турәм Хон Уԓәпсайа ӑт рӑхәԓ".

Ԓапәтйаӈ рупитты вер

¹Тӑм йўпийән, Турәм Куща па ԓапәтйаӈ утәԓтәты хŏйат пирыйәс, пӑ ԓывиԓаԓ кӑтәнән Ԓўв йэԓпеԓән кашәӈ воша пӑ кашәӈ тӑхайа китсәԓы, хŏԓта Ԓўв йӑхты ўтщийәс,

²щӑԓта ԓывиԓаԓа йастәс: "Ӑкәтты вер ун, туп рупәтты хŏйат шимәԓ; щишән, ӑкәтты вер пеԓа уԓты Куща10:2 ӑкәтты вер пеԓа уԓты Куща – щит Турәм пойкаԓән, ԓуԓән Ԓўв рупәтты хŏйат, ӑкәтты вер урәӈән, ат китәс.

³Мӑнаты! Ма нынан ош пŏшхәт иты атәԓән йӑхты ŏтәт кўта китԓәԓам.

⁴Нэмәԓты пӑтән аԓ ўйаты: ӑнта тўтхот, ӑнта хир, ӑнта кўра ԓумәтты ŏт, пӑ йушән нэмәԓты хŏйат хŏща, ўщайән верты урәӈән, иԓ аԓ ԓойаты.

⁵Мӑтты хота ԓŏӈтанән, оԓәӈән йастаты: "Тӑм хота йӑм уԓәпса!"

⁶Щита йӑм нŏмәс нŏх катԓәпты хŏйат ки уԓ, нын йӑм нŏпсән ԓўвеԓа питәԓ, ӑнта ки – нынана йŏхлы йŏхәтәԓ.

⁷Щи хотән хӑщаты, щит ԓэваты па йиԋщаты, мўйән мӑԓайты, рупәтты хŏйат рупәттаԓ урәӈән мŏԓтыйән сŏхәптәԓа. И хот эԓты кимет хота аԓ йӑӈхаты.

⁸Мӑтты воша йŏхәтԓәты ки пӑ щита вана ўԓайты ки, мўйән мӑԓайты, щит ԓэваты,

⁹пӑ щита уԓты мушәӈ хŏйатәт йӑмәԓтаԓән пӑ ԓывиԓаԓа пŏтәртаты: "Турәм Хон Уԓәпса нын хŏщайәна ванамәс!"

¹⁰Мӑтты воша йŏхәтԓәты ки пӑ щита вана ӑт ўԓайты, ким эттан йўпийән йастаты:

¹¹"Мўӈ хŏщайэв хӑнәм нын вошәӈ хишԓән нынана пӑркатԓыԓув; туп уйтаты, Турәм Хон Уԓәпса нын хŏщайәна ванамәс".

¹²Пŏтәртԓәм нынана, Содом воша тӑм вош эԓты сўт верты хӑтәԓән кеншәк питәԓ.

¹³Шук нӑӈена, Хоразин! Шук нӑӈена, Вифсаида! Нын хŏщайән тыйәԓтыйәм йурәӈ верәт, Тир па Сидон вошӈән хŏща тыйәԓтысайәт ки, хўвән ԓуԓән, вевтам сŏхән пӑ рат хиш кўтән омәсман, ԓыв кӑрэкԓаԓ эԓты шӑшән керԓәсәт.

¹⁴Тира пӑ Сидона сўт верты хӑтәԓән нын эԓтан кеншәк питәԓ.

¹⁵Нӑӈ пӑ, нўм турма нŏх пайтәсәм Капернаум, иԓта турма иԓ вŏщкиԓайән!

¹⁶Нынан хуԓәтты ŏт, Мӑнэм хуԓәтәԓ, хŏйән нын вана ӑт ўԓайты, щитән Ма вана ӑт ўԓайәм; Мӑнэм вана ӑт ўты хŏйат, щит Мӑнэм Китәм Ŏт вана ӑт ўԓ".

Ԓапәтйаӈ утәԓтыты хŏйат йŏхԓы йŏхәтты щир

¹⁷Ԓапәтйаӈ утәԓтәты хŏйат амтәтԓыман йŏхԓы йŏхәтсәт пӑ пŏтәртсәт: "Турәм Куща! Кўԉәт хŏԓна мўӈева хуԓәтԓәт, хун мўӈ Нӑӈ нэмен айәԓԓув!"

¹⁸Иисус ԓывиԓаԓа йастәс: "Ма ватсәм, хŏты сатана10:18 сатана – хиԋ, дьявол похәл тўт иты турәм эԓты иԓ рӑкнәс!

¹⁹Ин щи ма нынана, ŏхты войәт эԓты, скорпион войәт эԓты па хŏԓ хиԋ йурәт эԓты пурәтты щир мӑсәм пӑ нэмәԓты хŏтащ ӑт йиԓты.

²⁰Туп, ӑнта щи кўԉәт нынана хуԓәтты урәӈән амтәтԓыйаты, нэмԓән турәмән хӑшман уԓԓайәт, щи урәӈән амтәтԓыйаты".

²¹Ищишән Йэмәӈ Ԓыԓ Иисус амәтән тэкнәптәсԓы, пӑ Иисус йастәс: "Ащийэ, турәм пӑ мўв Куща, Нӑӈ вŏԓаӈ щирэн щи урәӈән айәԓԓэм, мўй Нӑӈ мўтрайәӈ пӑ ŏшәӈ хŏйатәт эԓты тӑм иԓ хӑԋатсэн пӑ щит ай ԋаврэмәта эԓпа этәԓтәсэн. Йӑна, Ащийэ! Шиты Нӑӈена мосәс!"

²²Утәԓтәты йохԓаԓ пеԓа, каремәман, йастәс: "Ащемән хŏԓ Мӑнэма мӑса; Пŏх –Ԓўв хŏй, Ащэԓ тўмпийән нэмәԓты ŏтән ӑт уйәтԓа, Ащи – Ԓўв хŏй, Пŏхәԓ тўмпийән нэмәԓты ŏтән ӑт уйәтԓа, пӑ хŏйа Пŏх Ащеԓ этәԓтәты ԓӑӈхаԓԓы.

²³Щӑԓта, утәԓтәты йохԓаԓ пеԓа карэмәман, ԓывиԓаԓа утща щира йастәс: "Щи сэмәт щўԋәӈәт, хŏй нын ватты ŏтԓән ватԓәт.

²⁴Йӑна нынана пŏтәртԓәм , ар Турәм йасәӈ туты хŏйат пӑ хонәт, мўй нынанән ныԓа, щит ватты ԓӑӈхасәт пӑ ӑт ватсәт, мўй нын хуԓԓәты, щит хуԓты ԓӑӈхасәт, пӑ ӑт хуԓсәт".

Мўй щирән и пўша уԓты уԓәпса мŏщатты: йӑм сӑмпи Самария ху эԓты

²⁵И пўш, Закона утәԓтәты и ики нŏх ԓойәс пӑ, Иисус артаԓәты урәӈән, ищмәсԓы: "Утәԓтәты Ху! И пўша уԓты уԓәпса мŏщатты урәӈән, мӑнэма мўй верты мосәԓ?"

²⁶Иисусән пӑ ищмәса: "Закон хŏща мўй хӑшман уԓԓа? Мўй ԓўӈәтԓән?"

²⁷Щитэн йŏхԓы йастәс: "Турәм Кущайэн нӑӈ Турмен арат сӑменән, арат ԓыԓэнән, арат йурэнән, арат ŏшенән сӑмәӈа тӑйи, пӑ ванән уԓты хŏйатэн ищи сӑмәӈа тӑйи, хŏты нӑӈен нӑӈ сӑмәӈа тӑйԓэн".

²⁸Иисус ԓўвеԓа йастәс: "Нӑӈ йӑна йастәсән; щиты вера, пӑ уԓты питԓән".

²⁹Щитэн, ԓўвеԓ йӑма пайәтты ԓӑӈхаман, Иисус ищмәсԓы: "Ма ванән уԓты хŏйатэм – хŏй?"

³⁰Ши йасәӈ пеԓа Иисус йастәс: "И хŏйат Иерусалим эԓты Иерихон воша шушәс пӑ хорахщетән мŏщатса. Щитәтән ԓумтәмԓаԓ хŏԓ нŏх эхсайәт, напрыйэ сэкса пӑ туп ай ԓыԓыйэԓ хӑйса, ин ŏтәт мӑтсәт.

³¹Щи пŏрайән йуш хўват и Турма йир верты хŏйат шушәс пӑ ԓўвеԓ шийаԓәмаԓ кемән, ԓўв пўӈԓәԓ эԓты мŏхты мӑнәс.

³²Левит ики10:32 левит ики - Турәм хотән верәт верты йох, левит йох рут; ищи, хун щи шома йŏхтәс, вана шушиԓыйәс, ватсәԓԓы па ԓўв пўӈԓәԓ эԓты йэԓԓы мӑнәс.

³³Самария мўвәӈ и ху, щи йуш хўват мӑнман, ԓўв хŏщайәԓ уйтантәс пӑ, ԓўвеԓ шийаԓәмаԓ кемән, ԓўвеԓ щаԉәтсәԓы

³⁴пӑ, вана шушәс, ԋўләмԓаԓ оливка вŏйән, ўнайән ԉŏхәтмаԓ йўпийән лӑп йӑрсәԓы; щӑԓта ԓўв осёләԓ шӑнша нŏх омәсман, хоԓты хота ԓўвеԓ тусԓы пӑ щита хŏԓна ԓўвеԓ пӑйкәԓтман тӑйсәԓы.

³⁵Кимет хӑтәԓән пӑ, мӑнтаԓ йэԓпийән, кӑт динарий лакәптәс, хоԓты хотәӈ икийа мӑсԓы пӑ йастәс: ”Тӑм хŏйат ԋоты. Тӑԓта аршәк ки посатԓән, йŏхәттэмән, нӑӈена йŏхԓы мӑԓэм”.

³⁶Нӑӈ хŏты нумәсԓән, тӑм хуԓәм хŏйат эԓты, хорахщет йоша питыԓыйәм ху хŏща, хŏй вана уԓ?"

³⁷Закона утәԓтәты ики йастәс: "Хŏй ԓўвеԓа сӑмәӈ вер верәс, щит". Щишән Иисус ԓўвеԓа йастәс: "Мӑна, нӑӈ па ищиты вера".

Мария пӑ Марфа

³⁸Иисус утәԓтәты йохԓаԓ пиԓән йэԓԓы мӑнты йушеԓ хŏща и курта йŏхтәс. Щита Марфа нэмпи нэ йŏԓән Ԓўвеԓ мойԓәты иԓ опсәԓтсәԓы.

³⁹Щи нэ Мария нэмпи хӑнамнэ тӑйәс; Мария Иисус кўрнатән опсәс пӑ Ԓўв йасәӈԓаԓ хуԓәнтәс.

⁴⁰Марфа пӑ Иисус кеша ун ԓэтŏтәӈ пӑсан ԓэщатәԓ, пӑ вана йŏхәтмаԓ кемән йастәс: "Турәм Куща, Нӑӈена мўй вер ӑнтом, хŏты хӑнамнэӈэм, хот ԓыпи верәт верты, мӑнэм утща хӑйсәԓы? Йасты ԓўвеԓа, мӑнэма ат ԋотәԓ!"

⁴¹Иисус пӑ йŏхԓы йастәс: "Марфа, Марфа! Нӑӈ ар ŏт эԓты нумәсԓән пӑ, сӑм мӑнман, ар вер эԓты нумәсԓән,

⁴²туп ит мосәԓ; Мария мет йӑм вер пирыйәс, щит ԓўв эԓтэԓ нŏх ӑт ўԓа".

Христос утәԓтәты йохԓаԓ пойәкщәты утәԓтәԓԓы

¹Имŏԓты ишән, хун Иисус и тӑхайән пойәкщәс, пӑ нŏх вŏԓымаԓ йўпийән, и утәԓтәты хуйәԓ Ԓўвеԓа йастәс: "Турәм Куща! Мўӈев пойәкщәты утәԓты, хŏты Иоанн утәԓтәты йŏхԓаԓ утәԓтәс".

²Ԓўв щиты ԓывиԓаԓа йастәс: "Хун пойәкщәԓты, щиты пŏтәрттаты: "Турәм Ащев! Турәмән Нӑӈ уԓԓән! Нӑӈ нэмен ат йэмԓәԓ! Нӑӈ Хон Уԓәпсайэн ат йŏхәтәԓ! Нӑӈ партәпсайэн хŏты турәмән уԓ, щиты мўвән ат питәԓ;

³Ԓэты ԋаԋэв мўӈева кашәӈ хӑтԓа мийи;

⁴Мўӈ кӑрэкԓув мўӈева йŏрэмаԓән, хŏты мўӈ хŏйатԓува ԓўв артнайԓаԓ йŏрэмәԓув; атәм хўщәпсайа питты мўӈев аԓ эсԓы, ԉикәӈ ŏт эԓты хŏԓт пайты!"

⁵Щӑԓта ԓывиԓаԓа йастәс: "Мӑттыки нын мӑтŏтән ԓухәс тӑйәԓ, ат кўтәпән ԓўв хŏщайәԓ йŏхәтәԓ пӑ йастәԓ: "Ԓухсыйэ, мӑнэм хуԓәм ԋаԋ, артнайа мийԓыйа,

⁶пиԓхуйэм мӑнтаԓ сӑхат ма хŏщайэм хойәс, ма нэмәԓты ԓўвеԓ ԓапәтты ӑт тӑйԓәм".

⁷Щитэн ов мŏхты ԓўвеԓа йастәԓ: "Мӑнема аԓ тŏрастыйа, овем йӑканән лӑп пŏтсэм, ԋаврэмԓам па ма пиԓэмән ŏԓтӑхайән уԓԓәт. Ма ӑт верәтԓәм нŏх киԓты пӑ нӑӈена ԋаԋ мӑты".

⁸Нынана пŏтәртԓәм, ԓўв ԓухсәԓ урәӈән нŏх ӑт ԓойәԓ ки, пӑ ԋаԋ ԓўвеԓа, пиԓа уԓтаԓ хўватән, ӑт мӑԓ ки, щитәԓ такан вохтаԓ урәӈән, ищи пӑ нŏх киԓты вера йиԓ, мўй арат вохәԓ, щи арат ԓўвеԓа мӑԓ.

⁹Ма нынана щи йастәԓәм: вохаты, пӑ мӑԓайты, кӑншаты, пӑ уйәтԓәты; ов сэӈкаԓән, пӑ пўшԓа,

¹⁰кашәӈ ŏт, хŏй вохәԓ, мŏщатәԓ, хŏй кӑшәԓ, уйәтәԓ, ов сэкты ŏта, ов пўшԓа.

¹¹Мўй щимәщ ащи, хун пŏхәԓ ԓўв эԓтайәԓ ԋаԋ вохәԓ, щи йўкана кев шупән мӑԓԓы? Хун хўԓ вохәԓ, хўԓ йўкана ŏхты вой мӑԓ?

¹²Мўй пӑ, карәӈ пŏшәх вохтаԓән, скорпион11:12 Щит нўм мўв карәӈ хŏмләх ԓыйәԓән ԓощтаԓ йўпийән хŏйат, вой пӑрты верәтәԓ. нэмпи карәӈ хŏмләхән мӑԓԓы?

¹³Щӑԓта, хун нын ԉик тӑйман, ԋаврэмԓәна йӑм ŏт мӑты хошԓәты, Турәм Ащи мет щи Ԓўв эԓтэԓ вохты хŏйатәта Йэмәӈ Ԓыԓ мӑԓ".

Христос йур ӑнта сатана эԓты уԓ

¹⁴И пўш Иисус уӈәԓԓы пайәтты кўԉ хŏйат эԓты ким воштәсԓы. Хун кўԉ ким этәс, уӈәԓԓы хŏйат пŏтәртты питәс. Хŏйатәт туп ӑԓ пакнысысәт.

¹⁵Тухәԓаԓ пӑ пŏтәртсәт: "Ԓўв кўԉәт веельзевул11:15 сатана, дьявол, хиԋ; йурән воштәԓ. Щит кўԉәт ŏх".

¹⁶Па хŏйатәт пӑ Иисус артаԓәман, Ԓўвеԓа мŏԓты пос турәм эԓты этәԓтәты партсәт.

¹⁷Туп Ԓўв ԓыв нŏмәсԓаԓ уйәтман, йастәс: "Кашәӈ, кӑт йэшащты пелка ортәсәм хон мўв, таԓа йиԓ, пӑ хот, хŏта йэшащԓа, иԓ ӑркәпәԓ.

¹⁸Сатана ԓыпи нŏпсәԓән кӑт щира ки уԓ, мўй щирән ԓўв хон пелкәԓ уԓты верәтәԓ? Нын пŏтәртԓәты, мӑтты Ма веельзевул йурән кўԉәт воштәԓәм;

¹⁹Ма веельзевул йурән кўԉәт ки воштәԓәм, нын йўпанән йиты йохԓән пӑ хŏй йурән ԓывиԓаԓ воштәԓԓаԓ? Щишән ԓыв нынана сўт верты хŏйатәта питԓәт.

²⁰Ма Турәм йурән кўԉәт воштәԓәм ки, уйәтман Турәм Хон Уԓәпса нын хŏщайән йŏхтәс.

²¹Хун йурәӈ ŏт ԉаԉәсты пŏрмасы тэԓән хотәԓ шавиԓԓы, ԓўв тащәԓ-вещәԓ нэмәԓты хŏтащ ӑт йиԓ.

²²Хун пӑ ԓўв эԓтэԓ йурәӈшәк ŏт ԉаԉәсты йŏхәтәԓ пӑ ԓўвеԓ иԓ пайәтԓәԓы, щи пŏрайән хотәӈ ху нŏмәс пŏныԓыйәм ԉаԉәсты пŏрмасԓаԓ, ԓўв эԓтэԓ нŏх уԓԓы, пӑ ԋӑрэмәм мŏԓтыԓаԓ лакки ортԓәԓы.

²³Хŏй ӑнтом Ма пиԓэмән уԓ, щит Ма йэщаԓтэм уԓ11:23 Ма пеԓайэм ԉик туԓ.; хŏй Ма пиԓэмән ӑт ӑкәтәԓ, щит лакки йовәԓәԓ.

²⁴Хун кўԉ, хŏйат эԓты ким этәԓ, йикԓы тӑхайәтән йӑӈхәԓ, щўтщәты тӑха кӑшман, пӑ ӑт уйәтман, пŏтәртәԓ: "Ма хотэма керԓәԓәм-са, хŏԉща этсәм!".

²⁵Йŏхԓы йŏхәттаԓән, хотәԓ нŏх йовәԓман пӑ нŏх ԓэщатман уйәтԓәԓы;

²⁶щӑԓта ԓўв мӑнәԓ пӑ па ԓапәт кўԉ туԓ, ԓўв эԓтэԓ мет ԉикәӈәт; ԓыв, ԓыпийа ԓŏӈман, щита уԓты питԓәт. Щиӈәԋща хŏйата оԓәӈ уԓәм эԓты мет атма йиԓ".

²⁷Хун Иисус щи йасӈәт йастәс, ий ими хŏйат кўт эԓты такан ўваԓтәс: "Щўԋәӈ щи аԋԏи, хŏйән Нӑӈ сэма пайәтсайән пӑ эсәмән ԓапәтсайән!".

²⁸Туп Ԓўв йŏхԓы йастәс: "Щўԋәӈ щит, хŏй Турәм йасәӈ хуԓәԓ пӑ щиты верәԓ!"

Христос туп и пос – щит Иона пос

²⁹Хун хŏйатәт арән йŏхәтты питсәт, Иисус пŏтәртты питәс: "Ин тӑм уԓты мир ԉикәӈ. Ԓыв Турәм пос кӑшԓәт, туп Иона Турәм йасәӈ туты ики этәԓтыйәм пос тўмпийа, нэмәԓты Турәм пос ԓывиԓаԓа ӑт питәԓ.

³⁰Хŏты Иона, Нинэвия вошәӈ хŏйатәта, поса ус, щиты Хŏйат Пŏх тӑм уԓты мира поса питәԓ.

³¹Нўм мўв нэ хон, сўт вертыйән, ин тӑм хŏйат рут пиԓән нŏх ԓойәԓ пӑ ԓывиԓаԓ сўтытԓәԓы, ԓўв Соломон мўтра йасӈәт хуԓәтты урәӈән, мўв кимәԓ эԓты йŏхтыԓыйәс. Ин тӑта пӑ нын пиԓәнән Щит, Хŏй Соломон эԓты вŏԓаӈшәк.

³²Нинэвия вошәӈ хŏйатәт ищи, сўт вертыйән, ин тӑм уԓты мир пиԓән нŏх ԓойԓәт, пӑ ԓывиԓаԓ сўтытԓыԓаԓ. Ԓыв Иона йастәм Турәм йасӈәт хуԓәтман, кӑрэкԓаԓ эԓты шӑшән керԓәсәт. Ин тӑта пӑ нын пиԓәнән Щит, Хŏй Иона эԓты вŏԓаӈшәк.

Ўщитәм тўт сун эԓты утәԓтәты пŏтәртәԓ

³³Нэмәԓты хŏйат тўт сун ўщитман, ԓўвеԓ хӑԋа тӑхайа мўй пӑ хŏшам иԓпийа ӑт омәсԓәԓы, нŏхшәк, тўт акԓа, омәсԓәԓы, ԓуԓән хота ԓŏӈты хŏйатәта нŏви ат ныса.

³⁴Ԓыпийән уԓты тўт сун – щит сэм; сэмԓан сыстамәт ки, эԓэн иса нŏвийән тэкәнман уԓԓа, атмәт ки – эԓэн ԓыпийән иса пӑтԓам.

³⁵Щишән ванта: нӑӈ ԓыпийән тӑйты нŏвен мосәӈ пӑтԓам.

³⁶Эԓэн нŏвийән ки тэкәнман уԓԓа пӑ нэмәԓты питы лот ӑт тӑйәԓ ки, щишән иса нŏви питәԓ, хŏты тўт сунән нӑӈ хутԓәптыԓайән".

Фарисейәта шук

³⁷Хун Ԓўв щит пŏтәртәс, и фарисей Ԓўвеԓ хотәԓа йŏхи ԓэты вохсәԓы. Иисус йŏхтәс пӑ пӑсан сурыйа опсәс.

³⁸Иисус ԓэты йэԓпийән йошԓаԓ ӑт ԉŏхәтсәԓы, Фарисей щит шийаԓәмаԓ кемән, пӑ ӑԓ щи пакнәс.

³⁹Туп Турәм Куща ԓўвеԓа йастәс: "Нын, фарисейәт, анԓән-сунԓән эԓтыԓаԓ сыстапԓәԓән, нын ԓыпиԓән аратэԓән тармәт пӑ ԉикәӈәт.

⁴⁰Ŏтшамәт! Ăнта мўй Щит, Хŏй эԓпат уԓты ŏт тыйәԓтәс, ԓыпийән уԓты ŏт ищи тыйәԓтәс?

⁴¹Щикем ушән нўша хŏйатәта анԓәнән мўй тӑйԓәты, щит мийԓыйаты, щи пŏрайән нынана иса сыстам питәԓ.

⁴²Шук нынана, фарисейәт! Мята, рута пӑ арсыр эпԓәӈ тŏрән эԓты йаӈмет шупәԓ мӑԓты, вещкат пӑ Турма сӑма мосты вер эԓты пӑ пўӈԓа ўратԓәты: тӑми верты мосәс, пӑ тўми хӑйты ӑт мосәс.

⁴³Шук нынана, фарисейәт! Нын Турәм йасӈа утәԓтәты хотән ԓӑтәӈ тӑхайәтән омәсты сӑмәӈәт, пӑ хŏйатәт ӑктәщиты тӑхайән нын иса ат ватԓайты, ўщайән иса ат верԓайты.

⁴⁴Шук нынана, Закона утәԓтәты икет пӑ фарисейәт, нын нэмәԓты щирән ӑт постәм хӑԓа лотәт хŏрпет, хŏйатәтән, ӑт мŏштыман, эԓты шушиԓыԓайәт11:44 Закон щирән хŏйат туп хӑԓайа, мўй пӑ хӑԓа лота, хӑнәмтыйәԓ ки, ӑнта сыстама йиԓ.".

Закона утәԓтәты икета шук

⁴⁵Закона утәԓтәты ий ики Ԓўвеԓа йастәс: "Утәԓтәты Ху! Щиты пŏтәртман, Нӑӈ мўӈев па ԉикән этԓэн!"

⁴⁶Ԓўв йастәс: "Нынана, Закона утәԓтәты икета, па шук! Хŏйатәта ԓавәрт вер пŏнԓәты, нын пӑ и ԓуйән нэш ԓўв хŏщайэԓа ӑт хӑнәмтыԓты.

⁴⁷Шук нынана! Ащиԓәнән пӑратәм Турәм йасәӈ туты хŏйатәт урәӈән, ԓыв ӑпа лотԓаԓ хŏрән верԓәԓән.

⁴⁸Щитән нын ащиԓән верәм верәт аԉԓәты пӑ ԓыв пиԓԓаԓән кашащԓәты, ԓыв Турәм йасәӈ туты хŏйатәт пӑратсәт, нын пӑ ӑпа лотԓаԓ хŏрән верԓәԓән.

⁴⁹Щишән Турәм ŏшәӈ нŏпсәԓ йастәс: "Турәм йасәӈ туты хŏйатәт пӑ апостоләт ԓыв хŏщайэԓа китԓәм, щитәт эԓты тухәԓаԓ пӑратԓайәт, тухәԓаԓ пӑ воштыԓайәт,

⁵⁰мўйа Турәм йасәӈ туты хŏйатәт кӑԓы мӑнәԓтса, уԓты турәм тыйәԓтәм уш эԓты, щишән ин уԓты хŏйатәт эԓты щи нўр иԋщәсты питԓа,

⁵¹Авель кӑԓы эԓты Захария кӑԓы унты, хŏй йирасты нŏрәм пӑ Турәм Хот кӑт кўтән пӑратса. Йӑна пŏтәртԓәм нынана: ин уԓты хŏйатәт эԓты мўй ус иса кӑшԓа.

⁵²Шук нынана, Закона утәԓтәты хŏйатәта! Нын уйәтты вер щирәԓ усԓән: нын ӑт ԓŏксәты, хŏй ԓŏӈты утщийәс, щит ӑт эсәԓԓәԓән".

⁵³Хун Ԓўв щит пŏтәртәс, Закона утәԓтәты хŏйатәт пӑ фарисейәт мет такан ўшмащты питсәт, Ԓўвеԓ ар вер эԓты апрәӈа иԋщәсты питсэԓ.

⁵⁴Ԓыв щиты ŏщмарәӈа каншатсәт пӑ верәтты кемеԓән мŏԓты Ԓўв эԓтэԓ мӑтты йасәӈ нŏх кӑтәԓты ўтщисәт, Ԓўвеԓ ўнавота павәттыйа.

Иисус ропхәӈ вер сўтытәԓ

¹Щи кўтән, щŏрәс мир щиты ӑктәщәс, пӑ хŏйатәт йэрмат кўтән ўратысәт, Иисус, оԓәӈән утәԓтәты йохԓаԓ пеԓа ватман, пŏтәртты питәс: "Фарисей сŏхәм щир, ԋаԋ шўм хŏрпи, ропхәӈ вер эԓты шаващаты, кӑт вешпийа аԓ уԓаты.

²Нэмәԓты сайԓәм вер ӑнтом, ищипа эԓпа этәԓ, пӑ хӑԋа вер ӑнтом, ищипа уйәтԓа.

³Щишән, мўй эԓты нын пӑтламән йастәсты, нŏвийән хуԓԓа, пӑ мўй хот ԓыпийән пӑԓ ўса йастыԓысты, щит хот ԓоӈәԓ эԓты такан йастәԓа.

⁴Ма нынана, пиԓйохԓама, пŏтәртԓәм: щитәт эԓты аԓ пӑԓаты, хŏй хŏйат эԓ пӑратәԓ, пӑ нэмәԓты па верты ӑт верәтәԓ.

⁵Туп йастәԓәм нынана, хŏй эԓты пӑԓты мосәԓ: Щит эԓты пӑԓаты, хŏй, пӑратмаԓ йўпийән, шук туты тӑхайа пайәтты веритԓәԓы. Йӑна пŏтәртԓәм нынана, Щит эԓты пӑԓаты.

⁶Вет щищки кӑт пӑтәр ŏх карты сӑхат ӑт тыныԓа? Турәмән ит нэш ӑт йŏрэмәм.

⁷Нын ŏхԓәнән ŏхсŏхԓән хŏԓна хŏԓ ԓўӈәтман уԓԓайәт. Аԓ пӑԓаты: нын ар ай щищкет эԓты тыныӈшәкәт, сӑмәӈашәк тӑйԓайты.

⁸Нынана пŏтәртԓәм: кашәӈ хŏйат, хŏй эԓпат Мӑнэм хŏйатәт хŏща, вана уԓԓы, щит Хŏйат Пŏхән ищи Турәм ангеләт хŏща вана ўԓа.

⁹Хŏй хŏйатәт хŏща Ма эԓтэм йŏвра керԓәԓ, щит эԓты па Турәм ангеләт хŏща йŏвра керԓәԓа.

¹⁰Кўш хŏйа, хŏй йŏвра йасәӈ Хŏйат Пŏха йастәԓ, щи нўрәԓ йŏрэмәԓа; хŏй Йэмәӈ Ԓыԓ эԓты ӑт рӑхты йасәӈ йастәԓ, щит нўрәԓ ӑт йŏрэмәԓа.

¹¹Хун нын Турәм йасӈа утәԓтәты хотәта, кущайәт пӑ ŏха уԓты кущайәт хŏща туԓайты, аԓ нумәсаты, хŏты мўй пӑ йŏхԓы йастәԓты, мўй пӑ пŏтәртты верән уԓ,

¹²Йэмәӈ Ԓыԓ нынан щи пўԉаӈ утәԓтәԓԓы, мўй йастәты".

Тащәӈ ики эԓты утәԓтәты пŏтәр

¹³Мŏԓты хŏйат мŏхет кўт эԓты Ԓўвеԓа йастәс: "Утәԓтәты Ху! Йайәма йаста, ащемән-анԏэмән хӑйәм хот тэԓ ма пиԓэмән ат ортԓәԓы!"

¹⁴Иисус ԓўвеԓа йастәс: "Нын сўтән верты хŏйән Ма ԓощәԓтәсайәм мўй пӑ нынан ортԓыты?"

¹⁵Щӑԓта пӑ ԓывиԓаԓа йастәс: "Ватман уԓаты, щӑр кўш щир эԓты шаващаты. Хŏты кепа хŏйат тащәӈ ат ус, ԓўв уԓәпсайәԓ ӑнта щиԓта уԓ".

¹⁶Щӑԓта Ԓўв утәԓтәты пŏтәр пŏтәртәс: "И тащәӈ ху хŏща мўв хӑрәԓән энмәԓты ԓэвпәс йӑма энмәс;

¹⁷пӑ ԓўв щирәԓән нумәсәԓ: "А мўй мӑнэм верты? Энмәм ԓэтәтԓам хŏԓта пŏнты?"

¹⁸Нŏмәс верәс: "Тӑмиты верԓәм: ампарԓам нŏх лосытԓыԓам пӑ ԓӑщкамшәк ампарәт верԓәм, щита энмәм ԓат сэмԓам пӑ па пŏрмасԓам урәӈән тэԓыйэ пŏнты тӑха питәԓ.

¹⁹Щӑԓта ма мӑнэма йастәты верәтԓэм: тэԓыйэ йӑм тӑйԓән, ар тӑԓа тӑрмәԓ. Ин щутща, ԓэва, йиԋща, каш вера!"

²⁰Турәм ԓўвеԓа туп щиты йастәс: "Ŏшԓы ŏт! Тӑм ат уԓәпсайэн нŏх уԓа; тащтәм ŏтԓан хŏйа питԓәт?"

²¹Щиты, щимәщ хŏйат пиԓән уԓԓыйәԓ, хŏй тащ ԓўв урӈәԓа ӑкәтәԓ, Турәм хŏща тащәӈа ӑт уԓ".

Турәм Хон Уԓәпса кӑншаты

²²Щӑԓта Иисус утәԓтәты йохԓаԓа йастәс: "Щишән Ма нынана пŏтәртԓәм: уԓәпсайән эԓты аԓ нумәсаты, мўй нынан ԓэты, эԓԓәна мўй ԓумәтты.

²³Уԓәпса ԓэтәт эԓты ԓӑтәӈшәк, пӑ хŏйат эԓ - ԓумтәм эԓты ԓӑтәӈшәк.

²⁴Хулхәт пеԓа вантаты: мўва ԓат ӑт омәсԓәт, ԓат тŏрән ӑт ӑкәтԓәт, ԓыв ун ампарәт, ԓат сэм шавиты тӑхайәт, ӑт тӑйԓәт – Турәмән ԓыв ԓапәтԓайәт; Мўй арата нын щи тŏхԓәӈ войәт эԓты ԓӑтәӈшәкәт!

²⁵Пӑ хŏй нын эԓтан, ԓўвеԓ ԓэщатман, ԓўв пӑԓатәԓ кўш кепа и кўш оԓәӈ арата эԓәтты веритԓәԓы?12:25 Грек йасәӈән хӑншәм пŏтәр тӑмиты па рӑхәԓ йастәты: Пӑ хŏй нын эԓтан, нумәсман, уԓәпсайәԓ и щос кема хўвашәк верты верәтԓәԓы?

²⁶Нын ай верыйэ верты ӑт веритԓәты ки, мўй пўӈәԓ верәт эԓты нумәсԓәты?

²⁷Ӑԋа лыптәт пеԓа вантаты, хŏты ԓыв энәмԓәт: ӑт рупитԓәт, сŏхәм ӑт верԓәт. Туп нынана пŏтәртԓәм: Соломон ики хŏԓна ԓўв вŏсԓәты–вŏрԓәты щирәԓән щиты ӑт ԓумәтԓыйәс, хŏты кашәӈ ŏтԓаԓ ԓумәтԓыԓәт.

²⁸Хӑр мўвән энәмты хŏрамәӈ лыптәт, тӑм хӑтәԓ уԓԓәт, хӑԓэвәт кура вŏщкиԓайәт, Турәмән щиты ки ԓумәтыԓайәт, пӑр мŏԓты Ԓўв нынан ӑт ԓумәттәԓԓы, шимәԓ эвәԓты ŏтәт!

²⁹Щӑԓта, аԓ кӑншаты, нынан мўй ԓэты пӑ мўй йищты, аԓ пӑ нумәсаты.

³⁰Щит тӑм мир уԓәпсайән уԓты хŏйатәт кӑшԓәт; Ащан уйәтәԓ, мўй нынан мосәԓ.

³¹Метшопәӈ Турәм Хон Уԓәпса кӑншаты, пӑ иса щитән ищи мӑԓайты.

³²Аԓ пӑԓа, ай тащийэ! Турәм Ащан Хон Уԓәпса нынана мойԓәты йӑм кашәԓ ус.

³³Пŏрмасԓән тыныйаԓән пӑ нўша хŏйатәта мийԓыйаты. Ӑт ԓыйты тўтхотәт, турәмән ӑт хŏԓаты сорԋэт нынана ԓэщататы, хŏԓта ԓŏԓмах ӑт ванамәԓ пӑ хŏта хӑхәт ӑт ԓэԓ.

³⁴Хŏта нын сорԋиԓән уԓԓәт, щита сӑмԓән уԓты питԓәт.

Ԓавԓәсты митху эԓты утәԓтәты пŏтәр

³⁵Ӑнтәпԓән йӑрман ат ԓойԓәт, пӑ тўт сунԓән ат ԓэԓәт.

³⁶Нын пӑ щи митйохәт иты уԓаты, кущайэԓ поры эԓты йŏхи йŏхәтты ԓавәԓԓәт, ԓуԓән, хун ԓўв йŏхәтәԓ пӑ ов хӑтщәԓԓы, ов мŏхты пелки ԓўвеԓа пўшмәты ат верәтԓэԓ.

³⁷Щи митйохәт щўԋԓәт, хŏйтат, куща ху йŏхәттаԓән, эԓәпән уԓман уйәтԓәԓы. Йӑна нынана пŏтәртԓәм, ԓўв ӑтпәԓ йӑрԓәԓы, митйохԓаԓ пӑсан сурыйа опсәԓтԓәԓы, вана рӑхиԓыман, ԓывиԓаԓ ԓапәтты питԓәԓы.

³⁸Ат кўтәпән ки йŏхәтәԓ, мўй пӑ хутԓәты йэԓпийән йŏхәтәԓ, пӑ ԓывиԓаԓ щиты уйәтԓәԓы ки, щи митйохәт ŏй тӑйԓәт.

³⁹Нын уйәтԓәԓән: хотәӈ куща уйәтсәԓы ки, хун ԓоԓмах йŏхәтәԓ, ԓўв ԓуԓән ӑт ŏԓәс пӑ хот питарәԓ ԓуԓән пел хирты ӑт эсәԓсәԓы.

⁴⁰Нын пӑ ԓэщатыман уԓаты, ӑт ԓавԓәсԓәты пўԉаӈ Хŏйат Пŏх йŏхәтәԓ".

Вещкат хот шавиты хŏйат эԓты утәԓтәты пŏтәр

⁴¹Щӑԓта Петра Ԓўвеԓа йастәс: "Турәм Куща! Мўӈева мўй тӑм утәԓтәты пŏтәр пŏтәрԓэн, мўй пӑ хŏԓ хŏйатәта?"

⁴²Турәм Куща пӑ йастәс: "Хŏй вещкат пӑ ŏшәӈ хот шавиты пӑ ԓэщатты хŏйат, кущайән митйохԓаԓ нўмпийа пŏнԓа, мŏрт пŏрайән мŏрт арат ԋаԋ ортты урәӈән?

⁴³Щўԋәӈ щи митху, хŏй йŏхтәм кущайән щиты верман уйәтԓа.

⁴⁴Йӑна нынана йастәԓәм, ԓўв уԓпәсәԓ ватты ԓўвеԓ пŏнԓәԓы.

⁴⁵Щи митху пӑ сӑмәԓән ки йастәԓ: "Ма кущайэм сора ӑт йŏхәтәԓ, митйохԓаԓ пӑ митнэԓаԓ сэкты питԓәԓы, ԓэты пӑ ищты, пӑ кўтщәты унты ищты питәԓ,

⁴⁶щиӈәԋща щи митхуйэн кущайәԓ ӑт ԓавәԓты хӑтԓәԓән, нумԓы сысән йŏхәтәԓ, пӑ ԓўвеԓ кӑтна сэвәрмәԓԓы, пӑ ӑт эвәԓты хŏйатәт иты верԓәԓы.

⁴⁷Щи митху, хŏй кущайәԓ партәпса уйәтсәԓԓы пӑ йэтшәптыман ӑт ус, пӑ ԓўв ԓӑӈхатаԓ щира ӑт верәс, артан сэкты питԓа;

⁴⁸хŏй пӑ нэмәԓты ӑт уйтәс, пӑ сэкты хŏрпийа верәс, шимәԓшәк сэкты питԓа. Кашәӈ хŏйата, хŏйа ар мийман уса, ԓўв эԓтэԓ арәԓ кӑншәмәԓа, хŏйа ар аԉиԓыса, щит эԓты аршәк иԋщәсԓа.

Христос утәԓтәты хŏйата уԓты щир тын аԉәԓ

⁴⁹Ма мўва тўт туты йŏхәтсәм, пӑ Ма щикем ԓӑӈхаԓәм, ԓуԓән ԓўв ат ўщиԓәмаԓ!

⁵⁰Йиӈка ԓŏӈәԓтыты верән Мӑнэм мосәԓ йиӈка ԓŏӈәԓтыты; хŏты Ма шукащԓәм, хун щит йэтшәԓ!

⁵¹Нын нумәсԓәты, Ма мўва пайԓы уԓәпса туты йŏхәтсәм? Ӑнта, нынана йастәԓәм, ортәсты вер Ма тусәм;

⁵²тӑԓта йэԓԓы и хотән уԓты вет хŏйат кӑтна ортәсԓәт: хуԓәм хŏйат кӑт хŏйат йэщаԓт, пӑ кӑт хŏйат хуԓәм хŏйат йэщаԓт эԓԓәԓәт.

⁵³Ащи пŏхәԓ йэщаԓт эԓԓәԓ, пӑ пŏх ащеԓ йэщаԓт, аԋԏи эвеԓ йэщаԓт эԓԓәԓ, пӑ эви аԋԏеԓ йэщаԓт, унтәп меԋәԓ йэщаԓт эԓԓәԓ, пӑ меԋ утпәԓ йэщаԓт эԓԓәԓ".

Христос пŏра моштәты ӑт хошты щир эԓты пŏтәртәԓ

⁵⁴Мир пеԓа йастәс: "Хун нын кев пеләк эԓты нŏх этты пӑԓәӈ шийаԓәԓты, нын мŏхты йастәԓты: "Йэрта йиԓ", пӑ щиты щи уԓԓыйәԓ;

⁵⁵пӑ хун нўм вот пŏԓәԓ, пŏтәрԓәты: "Рўва йиԓ", пӑ щиты щи уԓԓыйәԓ.

⁵⁶Ар вешпи хŏйатәт! Турәм пӑ мўв хŏрас мŏштәты хошԓәты, мўй щирән тӑм пŏра ӑт мŏштәԓԓән?

⁵⁷Мўйа пӑ нын нын щирәнән ӑт ԓэрапԓәԓән, мўй уԓты верәԓ уԓ?

⁵⁸Хун нӑӈ пеԓайэн нўр туты хŏйатэн пиԓән сўт хŏща мӑнԓән, йушән ԓўв эԓтайәԓ хŏԓт пайтәса. Ԓўв нӑӈен сўт ху хŏща аԓт йŏхтәптәсԓы, сўт ху пӑ нӑӈен касна хот шавиты ŏта аԓт мӑсԓы, щит пӑ нӑӈен касна хота аԓт вŏщкәсԓы.

⁵⁹Пŏтәртԓәм нӑӈена: хӑщәм ŏх шўкен ӑт мӑтән унты, щиԓта нӑӈ ӑт этԓән".

Христос кӑрэк эԓты шӑшән керԓәты вер эԓты утәԓтәԓ

¹Щи пŏрайән тухәԓ мŏхет Иисуса Галилея хŏйатәт эԓты пŏтәртсәт, хŏй кӑԓыԓаԓ Пилатән йирԓаԓ кӑԓы пиԓән ԓыԓәтса.

²Иисус ԓывиԓаԓа щиты йастәс: "Нын нумәстанән, мўй щи Галилея мŏхет па Галилея хŏйатәт киԋща кӑрэкәӈәт усәт, мўйа щиты пӑратсайәт?

³Ӑнта, нынана пŏтәртԓәм, туп кӑрэкԓән эԓты шӑшән ӑт керԓәԓты ки, ищи хŏԓыйэ пӑрԓәты.

⁴Мўй пӑ, а мўй нумәсԓәты, щи, Силоам йухтас пӑԓ хотән эԓт ӑркәмтәм пӑ пӑратәм, нийәԓхус хŏйат, ԓыв Иерусалим па хŏйатәт эԓты мўй мет атмәт усәт?

⁵Ӑнта, нынана йастәԓәм! Кӑрэкԓән эԓты ӑт керԓәԓты ки, ищиты хŏԓ пӑрԓәты!".

⁶Щӑԓта щимәщ утәԓтәты пŏтәр пŏтәртәс: "И хŏйат виноград йўхәӈ тӑхайәԓән смоква нэмпи йўх омәсман тӑйәс, щӑԓта ий пўш йўхән энмәм ԓэвпәсәԓ кӑшты йŏхтәс, пӑ ӑт уйәтсәԓы.

⁷Виноград энмәԓтты митхуйәԓа йастәс: "Хуԓмет тӑԓа йис, ты йŏхтыԓыты питмем, смоква йўхән энмәм ԓэвпәс кӑштыйа, пӑ ӑт уйәтԓәм; иԓ сэвры ԓўвеԓ: мўйа ԓўв мўв рўв таԓәԓ?"

⁸Туп митху ԓўвеԓа йŏхԓы йастәс: "Куща! Тӑм тӑԓа па хӑйиԓыйэ, керәтман мўвәԓ шўкатԓэм пӑ ԋащамән пŏнԓэм, -

⁹мосәӈ ԓэвпәс мӑԓ; туп ӑнтом ки, папуш иԓ сэвәрԓэн".

Христос хŏмта таԓәм нэ тўмтака верәԓ

¹⁰И Турәм йасӈа утәԓтәты хотән13:10 Щит синагога. Ԓўв шаббат хӑтәԓән хŏйатәт утәԓтәс.

¹¹Щита ԋийәԓхус тӑԓ муш верты кўԉ тӑйәм нэ ус: ԓўв хŏмта таԓман уса пӑ тўӈа верәсты ӑт веритәс.

¹²Иисус ԓўвеԓ шийаԓәмаԓ кемән, вана вохсәԓы пӑ ԓўвеԓа йастәс: "Ими, нӑӈ мушен эԓты ин щи нŏх питԓән".

¹³Пӑ йошӈиԓаԓ ԓўв эԓтэԓ пŏтсәԓы, пӑ ими ищи мŏхты тўӈа йис, пӑ Турәм вŏԓаӈа айәԓтты питсәԓы.

¹⁴Щи пўԉаӈ Иисус пеԓа йэмәӈ йасӈа утәԓтәты хот куща, Иисус шаббат хӑтәԓән хŏйат йӑмәԓмаԓ урәӈән, ўшмащман мир пеԓа йастәс: "Рупәтты кеша хут хӑтәԓ уԓ; щи пŏрайән йӑмәԓтыты йŏхтыԓыйаты, ӑнта шаббат хӑтәԓән".

¹⁵Турәм Куща ԓўвеԓа йŏхԓы йастәс: "Кӑт вешпи ŏт! Нын эԓтайән кашәӈ ŏт шаббат хӑтәԓән ԓўв мисәԓ, мўй пӑ оселәԓ ԓойты тӑхайәԓ хŏща мўй хŏԓт ӑт эӈхиԓыԓԓы пӑ йищәԓтәты мўй ӑт тутԓиԓԓы?

¹⁶Тӑм Авраам рут эԓты уԓты эви пӑ сатанайән ԋийәԓхус тӑԓ йӑрман тӑйса, шаббат хӑтәԓән щи ԓыс эԓты хŏԓт эсәԓты мўй ӑт мосәԓ?"

¹⁷Хун Ԓўв щит пŏтәртмаԓән, хŏԓыйэ, Ԓўв пиԓәԓән ӑт кашащәм мŏхет, йэԓәпсайәт; пӑ мир иса Ԓўв хŏԓ вŏԓаӈ верԓаԓ эԓты амтәтԓыйәс.

Горчица ԓат сэм эԓты утәԓтәты пŏтәр

¹⁸Иисус пӑ йастәс: "Турәм Хон Уԓәпса мўй хŏрпи? Пӑ мўй хŏрпийа ԓўвеԓ ԓэщатԓэм?

¹⁹Ԓўв горчица ԓат сэм хŏрпи, хŏйат ўсԓы пӑ ԓэвпәс энмәԓты йўхԓаԓ хŏща омәссәԓы; энмәс пӑ ун йўх хŏрпийа йис, тŏхԓәӈ войәт ԓўв нўвԓаԓ кўтән тыхәԓ верыԓысәт".

Ԋаԋ шўм эԓты утәԓтәты пŏтәр

²⁰Хŏԓна пӑ йастәс: "Турәм Хон Уԓәпса мўй хŏрпи?

²¹Ԓўв имийән ўйәм ԋаԋ шўм хŏрпи, хуԓәм мŏрт арата ԓэщатәм ԓанта пŏтса пӑ рўвәтса, ԓатәԓ иса ԓыйтаԓ унты хӑйса".

Турәм Хон Уԓәпсайа мӑнты йуш

²²Щӑԓта Иисус Иерусалим пеԓа йуш тўвман, вошәт, куртәт сӑхат йӑӈхәс, хŏйатәт утәԓтыман.

²³И мӑтты ŏт Ԓўвеԓ ищмәсԓы: "Турәм Куща! Пӑр мŏԓты нŏх пайтәсты хŏйат шимәԓ?" Ԓўв йŏхԓы йастәс:

²⁴"Пушас ващ овийэйа ԓŏӈты ўрататы, нынана пŏтәртԓәм, ар мŏхет ԓŏӈты ўратԓәт пӑ ӑт верәтԓәт".

²⁵Хун хотәӈ ху нŏх ԓойәԓ пӑ овәԓ лӑп петԓәԓы, щи пŏрайән нын, камән ԓойман, ов сэкты питԓәты пӑ пŏтәртты: Турәм Куща! Турәм Куща! Ов мўӈева пелки пўнши"; туп Ԓўв нынана йŏхԓы йастәԓ: "Нынан ӑт уйәтԓыԓам, хŏԉща нын уԓԓәты".

²⁶Щи пŏрайән пŏтәртты питԓәты: "Мўӈ Нӑӈ пиԓэнән ԓэсув пӑ йищсув, пӑ мўӈ вош хўлыԓувән Нӑӈ утәԓтәсән".

²⁷Ԓўв пӑ йастәԓ: "Нынана пŏтәртԓәм: нынан ӑт уйәтԓыԓам, хŏԉща нын уԓԓәты; Ма эԓтэм хŏԓыйэ ԉик верты ŏтәт пўӈԓа мӑнаты".

²⁸Щита хŏԓԓәп пӑ пек шихрәпса питәԓ, хун нын Турәм Хон Уԓәпса хŏща Авраам, Исаак, Иаков пӑ хŏԓ Турәм йасәӈ туты хŏйатәт шийаԓәԓты, нынәԓән пӑ щиԓта ким воштәты щирән шийаԓәԓԓән.

²⁹Щӑԓта хӑԓэвәт пеләкән пӑ кев пеләкән уԓты мўвәт эԓты, ным пӑ нўм мўвәт эԓты хŏйатәт йŏхәтԓәт, Турәм Хон Уԓәпса хŏща поры пӑсан сурыйән ӑктәщԓәт.

³⁰Йӑ ин, тухәԓ йŏԓта уԓты хŏйатәт оԓӈа уԓты питԓәт, пӑ тухәԓ оԓӈа уԓты хŏйатәт – йŏԓта уԓты питԓәт".

Иисус Иерусалим эԓты хощәԓ

³¹Щи хӑтәԓән Иисус хŏща фарисейәт эԓты тухәԓ мŏхет йŏхәтсәт пӑ Ԓўвеԓа пŏтәртсәт: "Ким эта пӑ мӑна тӑԓта, Ирод Нӑӈен пӑратты утщиԓԓы".

³²Щӑԓта ԓывиԓаԓа йастәс: "Мӑнаты пӑ йастаты щи ŏхсар икийа: ’Ма кўԉәт воштәԓәм пӑ хŏйатәт йӑмәԓтԓәм тӑмхӑтәԓ пӑ хӑԓэвәт, пӑ хуԓмет хӑтәԓән йэтшәԓәм’;

³³туп тӑмхӑтәԓ, хӑԓэвәт пӑ па йиты хӑтәԓән Мӑнэм йэԓԓы шушты мосәԓ, щиты ӑт уԓԓыйәԓ, Турәм йасәӈ туты ики Иерусалим вош кимпийән ат пӑрәс.

³⁴Иерусалим! Иерусалим! Турәм йасәӈ туты икет веԓты пӑ Турәмән нӑӈ хŏщайэн китәм ŏтәт кевән щӑх сэкты вош! Мўй арат пўш Ма нӑӈ ԋаврэмԓан йӑха ӑкәтты утщисԓам, хŏты тŏхԓәӈ вой пŏшәхԓаԓ тŏхәԓԓаԓ иԓпийа ӑкәтԓәԓы, туп нын ӑт ԓӑӈхасты!

³⁵Тӑм, нын хотән нынана таԓа хӑщәԓ! Нынана пŏтәртԓәм, Мӑнэм нын щи унты ӑт шийаԓәԓԓән, хун пŏра йŏхәтәԓ, пӑ йастәԓты: ’Щит йӑмән мийәм Ŏт, Хŏй Турәм Куща нэмән йŏхәтәԓ!’"

Шаббат хӑтәԓ эԓты уԓты утәԓтәпса

¹Имŏԓты шаббат хӑтәԓән Ԓўв фарисейәт эԓты уԓты и куща хота ԓэтыйа йŏхтәс, ԓывәт пӑ Ԓўвеԓ эԓты ватман тӑйсэԓ.

²Ин щӑԓта, Ԓўв йэщаԓтәԓ йикән пўвԓәптәм муш тӑйты хŏйат этәс.

³Тӑм вер эԓты Иисус Закона утәԓтәты икет пӑ фарисейәт иԋщәсәс: "Шаббат хӑтәԓән йӑмәԓты рӑхәԓ мўй ӑнта?"

⁴Ԓыв мӑшйайән усәт. Ԓўв мушәӈ хŏйат хŏща хӑнәмтыман йӑмәԓтсәԓы пӑ эсәԓсәԓы.

⁵Щи пўԉаӈ ԓывиԓаԓа йастәс: "Нын мӑтты ŏтԓән хŏща осёлән мўй хор мисән йик ўйԓыты ўс ԓыпийа ки иԓ рӑкәнәԓ, шаббат хӑтәԓ кепа, ищи кўрәмән мўй ԓўвеԓ нŏх ӑт таԓԓәԓән?"

⁶Пӑ ԓыв щит пеԓа Ԓўвеԓа йŏхԓы йастәты ӑт верәтсәт.

Йŏрәӈ мойәӈ ху эԓты утәԓтәты пŏтәр

⁷Иисус, вохәм мŏхет ԓӑтәӈшәк омәсты тӑхайәт пирыты щир, шийаԓәмаԓ кемән, утәԓтәты пŏтәр ԓывиԓаԓа йастәс:

⁸"Хун нӑӈ порыйа вохԓайән, ԓӑтәӈ омәсты тӑхайа аԓ опса, щиты питты верәтәԓ, мӑтты вохәм мойәӈ хŏйат нӑӈ эԓтэн вŏԓаӈшәк питәԓ,

⁹нӑӈен пӑ ԓўвеԓ вохәм хŏйатэн, вана шушман, нӑӈена йастәты верәтәԓ: "Тӑм омәсты лотен ԓўвеԓа мийи"; щи пŏрайән йэԓәмман мет йŏхи хӑщәм лота нӑӈен омәсты вера йиԓ.

¹⁰Хун нӑӈ порыйа вохԓайән ки, йŏхәттэнән, мет йухәт омәсты тӑхайа опса, нӑӈен вохәм ŏтэн нӑӈ хŏщайэн вана шушман ат йастәԓ: "Пиԓху! Ўтԓышәк опса", щи пŏрайән омәсты хŏйатәт йэԓпийән нӑӈ ԓӑтәӈа питԓән,

¹¹кашәӈ ԓўвеԓ ԓўв ԓӑтәӈа тӑйты хŏйат ԓӑтԓыйа пӑйәтԓа, пӑ ԓўвеԓ ԓӑтԓыйа тӑйты хŏйат, ԓӑтәӈа пайәтԓа".

¹²Ԓўвеԓ вохәм фарисей пеԓа йастәс: "Хун ԓэты пӑсан верԓән, пиԓйохԓан, йайԓан, рут йохԓан, нӑӈ ԉэпенән уԓты тащәӈ хŏйатԓан аԓ вохаԓән, ԓыв ищи нӑӈен ӑт ат вохԓэԓ пӑ ищиты нӑӈен йŏхԓы ӑт аԓт сŏхәптәсԓаԓ.

¹³Хун ун ԓэты пӑсан вәрԓән, нўша хŏйатәт, мушмәм хŏйатәт, нŏхты хŏйатәт, сэмԓы хŏйатәт воха,

¹⁴щи пŏрайән ŏйәӈа йиԓән, щит ԓыв нӑӈена йŏхԓы сŏхәптәты ӑт верәтԓәт, нӑӈена Турәм щирән уԓты хŏйатәт нŏх ԓыԓәӈԓәты хӑтәԓән сŏхәптәԓа".

Ун поры эԓты утәԓтәты пŏтәр

¹⁵Щит хуԓмаԓ кемән, Ԓўв пиԓәԓән пӑсан сурыйән опсәм и ŏт Ԓўвеԓа йастәс: "Щит ŏйәӈ питәԓ, хŏй Турәм Хон Уԓәпса хŏща поры пӑсан сурыйән ԓэԓ-йищәԓ!"

¹⁶Иисус ԓўвеԓа йастәс: "И хŏйат ун ԓэты пӑсан ԓэщатәс пӑ ар хŏйат вохәс.

¹⁷Хун ԓэты пŏра йŏхтәс, митхуйәԓ вохәм мŏхиԓаԓ хŏща китсәԓы йастәтыйа: "Йўваты, мўй иса ԓэщатса!"

¹⁸Пӑ иса хŏԓ и йӑха йастантәм ŏтәт иты йŏхԓы рŏвемәты питсәт. Ит йастәс: "Ма мўв хӑр ԓутсәм пӑ мӑнэм ԓўвеԓ ватты йӑхты мосәԓ; щи ԓŏват йӑм вера, ԉик аԓ тӑйа".

¹⁹Киметәԓ йастәс: "Ма йаӈ хор мис ԓутсәм пӑ рупатайән ԓывиԓаԓ ватты мӑнԓәм; щи ԓŏват йӑм вера, нўрэм аԓ нуми".

²⁰Хуԓметәԓ йастәс: "Ма нэ тусәм, щишән йиты ӑт веритԓәм".

²¹Щӑԓта митху йŏхи йŏхәтмаԓән, щит иса кущайәԓа йастәсԓы. Щиӈәԋща хотәӈ куща ԓыкащәс пӑ митхуйәԓа йастәс: "Кашәӈ вош хўлы хўват йӑӈха пӑ нўша хŏйатәт, мушмәм хŏйатәт, нŏхты пӑ сэмԓы хŏйатәт тый тўваԓән".

²²Щӑԓта митхуйәԓ йастәс: "Куща! Версэм, хŏты нӑӈ партсэн, хŏԓна па омәсты лот уԓ".

²³Щиӈәԋща куща митхуйәԓа йастәс: "Йушәт хўват мӑна пӑ пушасәт пўӈәԓән йӑӈха пӑ хŏйатәт йŏхәтты эвԓәптаԓән, хотэм хŏйатән ат тэкәтса.

²⁴Нынана йастыԓыԓәм, тўм вохәм хŏйатәт эԓты, нэмәԓты хŏйат ма ԓэтŏтэм хŏща ўӈԓәԓ ӑт хойԓыйәԓ, вохәм хŏйат ар, туп пирыйәм хŏйат шимәԓ!"

Иисус щит эԓты пŏтәртәԓ, Ԓўв утәԓтәты хŏйатәԓа уԓты - мўй щит

²⁵Ԓўв пиԓәԓән тэԓыйэ хŏйат шушәс; Ԓўв, йŏхԓы керԓәман, ԓывиԓаԓа йастәс:

²⁶"Хŏй Ма хŏщайэма йŏхәтәԓ ки, щӑԓта ащеԓ пӑ аԋԏеԓ, имеԓ пӑ ԋаврэмԓаԓ, йайԓаԓ пӑ ŏпиԓаԓ, пӑ апщиԓаԓ, пӑ хŏԓна ԓўв уԓәпсайәԓ нŏпсәԓ эԓты хŏԓт ӑт вŏщкәԓԓы ки, щит Ма утәԓтәты хŏйатэма уԓты ӑт верәтәԓ.

²⁷Щӑԓта хŏй ԓўв пернайәԓ ӑт туԓԓы пӑ Ма йўпемән ӑт шушәԓ, Ма утәԓтәты хŏйатэма уԓты ӑт верәтәԓ.

²⁸Хŏй нын эԓтан йухтас пӑԓ хот омәсты ўтщийәԓ ки, оԓӈа иԓ ӑт омәсәԓ пӑ тынәԓ ӑт ԓўӈәтԓәԓы мўй, йухтас пӑԓ хотәԓ ԓўв йэтшәптәты веритԓәԓы мўй ӑнтом?

²⁹Хот пӑтэԓ ўԓԓы ки пӑ йэтшәптәты щир ӑт тӑйты ки питәԓ, хŏԓыйэ ватты ŏтәт ԓўв эԓтэԓ ԋӑхты питԓәт:

³⁰"Тӑм хŏйат хот омәсты питщәс пӑ ӑт йэтшәптәсԓы".

³¹Мўй пӑ мӑты хон ики па хон хŏща ԉаԉа мӑнтаԓ йэԓпийән иԓ ӑт омәсәԓ пӑ оԓәӈән мŏхиԓаԓ пиԓән ӑт ŏшйащәԓ, ԓўв йаӈ щŏрәс ԉаԉәсты йохԓаԓ пиԓән а мўй йурәӈ, щи, ԓўв пеԓайәԓ йиты, па хон ики хус щŏрәс ԉаԉәсты йŏх йэщаԓт ԓойты а мўй верәтәԓ?

³²Ӑнта ки, щит йэԓән уԓтаԓ сыс, ԓўв щитәԓ хŏща хŏйатәт китәԓ, ԉаԉԓы уԓәпса вохты урәӈән.

³³Щиты нын эԓтан кашәӈ хŏйат, хŏй мўйәԓ-кашӈәԓ эԓты ӑт ки верәтәԓ йирԓәты, Ма утәԓтәты хŏйатэма уԓты ӑт верәтәԓ.

³⁴Сŏԓ - щит йӑм ŏт; туп сŏԓ эпԓәԓ уштәԓԓы ки, хŏты ԓўвеԓ йӑԓпа сŏԓаӈа верты?

³⁵Ӑнта мўва, ӑнта ԋащама ӑт рӑхәԓ; ким ԓўв вŏщкәԓа. Хŏй хуԓты кеша пӑԓ тӑйәԓ, ат хуԓәԓ!"

Ушәм ош эԓты утәԓтәты пŏтәр

¹Налог ӑкәтты йох пӑ кӑрэкәӈ хŏйатәт хŏԓыйэ Ԓўв хŏщайәԓа рӑхәԓтысәт, Ԓўвеԓ хуԓәтты урәӈән.

²Фарисейәт пӑ щӑԓта Закона утәԓтәты хŏйатәт ўшмащсәт, пŏтәрԓәт: "Тӑм Хойат кӑрэкәӈ мŏхәт вана ўԓԓы пӑ ԓыв пиԓԓаԓән ԓэԓ!"

³Туп Ԓўв щимәщ утәԓтәты пŏтәр ԓывиԓаԓа пŏтәртәс:

⁴"Хŏй нын эԓтан, сот ош тӑйман ки, пӑ щиԓта итәԓ уштәԓԓы, йӑрсот йӑрәԏйаӈәԓ щӑхәрән мўй ӑт хӑйԓәԓы пӑ уштәм ошәԓ йўпийән мўй ӑт мӑнәԓ, уйәттаԓ унты?

⁵Пӑ уйәттаԓән, ўԓԓы пӑ, амәтман, порхәԓа пŏнԓәԓы;

⁶пӑ, йŏхи йŏхәттаԓән, пиԓйохԓаԓ пӑ ԓўв ԉэпәԓән уԓты хŏйатԓаԓ вохԓәԓы пӑ ԓывиԓаԓа йастәԓ: "Ма пиԓэмән йэша амтәтԓыйаты: ма уштәм ошем уйәтсэм".

⁷Нынана пŏтәртԓәм, щиты турәмән кӑрэкԓаԓ эԓты шӑшән керԓәты и кӑрэкәӈ хŏйат урәӈән амәт аршәк питәԓ, хун йӑрсот йӑрәԏйаӈ тўӈа–щира уԓты хŏйатәт урәӈән, хŏйа кӑрэкԓаԓ эԓты шӑшән керԓәты ӑт мосәԓ.

Уштәм сорԋеӈ ŏх карты эԓты утәԓтәты пŏтәр

⁸Мўй пӑ, ий ими йаӈ сорԋеӈ ŏх карты тӑйман, и ŏх картэԓ уштәԓԓы ки, тўт сунәԓ мўй нŏх ӑт ўщитԓәԓы, пӑ хот хӑрәԓ нŏх йовәԓты ӑт питԓәԓы, уйәтты унты йӑма кӑшты ӑт питԓәԓы?

⁹Щӑԓта уйәттаԓән, пиԓнэԓаԓ пӑ ԓўв ԉэпәԓән уԓты нэԓаԓ вохԓәԓы пӑ йастәԓ: "Ма пиԓэмән амтәтԓыйаты: ма уштыԓыйәм сорԋеӈ ŏх картэм уйәтсэм!"

¹⁰Нынана пŏтәртԓәм: щиты Турәм ангеләт, кӑрэкԓаԓ эԓты шӑшән керԓәты кӑрэкәӈ и хŏйат урәӈән, амтәтԓыԓәт".

Ушиԓыйәм пŏх эԓты утәԓтәты пŏтәр

¹¹Иисус йэԓԓы пŏтәртәс: "И хŏйат кӑт пŏх тӑйәс;

¹²айшәк пŏхәԓ ащеԓ пеԓа йастәс: "Ащи! Ма йўкан хот уԓпәсэм мӑнэма мийи". Щӑԓта ащанән хот уԓпәсэԓ ԓынана ортса.

¹³Кӑмәтса хӑтәԓ хӑщәм йўпийән, ай пŏхәԓ мŏԓтыԓаԓ иса ӑкәтмаԓ йўпийән, хўв мўва мӑнәс пӑ щита ԓўв йўканәԓ, уԉԋайа уԓман, посатсәԓԓы.

¹⁴Хун ԓўв йўканәԓ хŏԓ ԓэсԓы-тӑйсәԓы, щи мўвән ун ԓэԓԓы пŏрайа йис, пӑ ԓўв нўшайа питәс;

¹⁵щӑԓта мӑнәс пӑ щи мўвәӈ и ху хŏща ԓŏӈәԓтыйәс, щитән пӑ ԓўв мўв хӑрԓаԓа пурәщԓаԓ шавиты китса;

¹⁶ԓўвеԓән пурәщ ԓэтŏтән сӑмәԓ вŏԓԓәтты ԓуԓән амәт ус, туп нэмәԓты хŏйатән щитән хŏԓна ӑт мийԓыса.

¹⁷Нŏпсәԓ нумәԓмимаԓән, йастәс: ’Мўй арат митйох ащем хŏща мŏԓтас ԓэтәт тӑйԓәт, ма пӑ ԓэԓԓы тӑта щи хӑԓԓәм;

¹⁸нŏх ԓойԓәм пӑ ащем хŏща мӑнԓәм, ԓўвеԓа йастәԓәм: Ащийэ! Ма турма пӑ нӑӈена кӑрэк версәм

¹⁹пӑ нӑӈ пŏхена ԓўӈтәсты щирэм ӑнтом; мӑнэм митйохԓан кўта ўйи".

²⁰Нŏх ԓойәс пӑ ащеԓ хŏща мӑнәс. Хун ԓўв хŏԓна йэԓән йўвмаԓән, ащеԓән шийаԓәса пӑ щаԉәтса; щӑԓта, ащеԓ йэщаԓт хухәԓмәман, сапԓәԓа ӑпәԓмәс пӑ ԓўвеԓ мосәԓтәсԓы.

²¹Пŏхәԓ пӑ ԓўвеԓа йастәс: "Ащи! Ма турма пӑ нӑӈена кӑрэк версәм пӑ нӑӈ пŏхена ԓўӈтәсты ўш щирэм ӑнтом".

²²Ащеԓ пӑ митйохԓаԓ пеԓа йастәс: "Мет йӑм ԓумәтты сŏх тўваты пӑ ԓумәттаԓән, пӑ йошәԓа веншәӈ ԓуйәт, кўрԓаԓа пӑ ԓумтәм мийаты;

²³щӑԓта, веԓмәӈ мис пŏшәх тўваты пӑ нŏх хŏраԓән; ԓэты пӑ каш верты питԓув!

²⁴Пӑ хŏты, тӑм пŏхем пӑрман ус пӑ нŏх ԓыԓәӈԓәс, ушман ус пӑ уйәтса". Щӑԓта ԓыв каш верты питсәт.

²⁵Ун пŏхәԓ пӑ мўв хӑрән ус; йŏхи йитаԓән, хун йŏхи ванамәс, арыты пӑ йакты сый хуԓмәс;

²⁶и митху вана вохман, ищмәсԓы: "Щит пӑ мўй?"

²⁷Митху пӑ ԓўвеԓа йастәс: "Апщен йŏхтәс, пӑ ащен веԓмәӈ мис пŏшәх хŏрәс, ԓўв пŏхәԓ тўмтака йоша пайәтмаԓ урәӈән".

²⁸Ԓўв ԉикащәс пӑ йŏхи ԓŏӈты ӑт ԓӑӈхас. Ащеԓ пӑ, ким этәс пӑ ԓўвеԓ йŏхи пойәкты питсәԓы.

²⁹Туп ԓўв ащеԓ пеԓа йŏхԓы йастәс: "Ма мўй арат тӑԓ нӑӈена ԋотԓәм пӑ нэмәԓты пŏрайән нӑӈ йасӈен шŏппи ӑт ўншиԓысэм, нӑӈ пӑ нэмәԓты пŏрайән мӑнэм пиԓйохԓам пиԓән каш верты урәӈән, хŏԓна ош пŏшәх ӑт мийԓысән;

³⁰хун пӑ тӑм пŏхен, нӑӈ хот уԓпәсэн уԉԋа нэӈәт пиԓән лакки йовәԓмаԓ йўпийән, йŏхтәс, нӑӈ пӑ ԓўв урӈәԓән веԓмәӈ мис пŏшәх хŏрсән".

³¹Ащеԓ пӑ ԓўвеԓа йастәс: "Пŏхийэ! Нӑӈ иса ма пиԓэмән уԓԓән, хŏԓ ма ŏтэм нӑӈен,

³²мўӈев щит эԓты амтәтԓыты пӑ каш верты мосәс, апщен пӑрман ус пӑ нŏх ԓыԓәӈԓәс, тӑпиԓыйәс пӑ уйтантәс".

Ӑнтом вещкат хот шавиты пӑ ԓэщатты хŏйат эԓты утәԓтәты пŏтәр

¹Ԓўв пӑ утәԓтәты йохԓаԓа йастәс: "И тащәӈ хŏйат хотәԓ-вещәԓ шавиты пӑ ԓэщатты хŏйат тӑйәс. Щитэн эԓты ԓўвеԓа айкеԓ туса, мӑтты ԓўв пŏрмасԓаԓ посатәԓ;

²щӑԓта, ԓўвеԓ вана вохсәԓы пӑ йастәс: "Мўй ма нӑӈ эԓтэн хуԓԓәм? Йаста, хŏты хот шавиты пӑ ԓэщатты верәт версән, щиӈәԋща ма хŏщайэма рупитты ӑт питԓән".

³Щишән щи хŏйат ԓўв турмәԓән нумәсыйәԓ: "Хŏты нэриты? Ма кущайэм хот шавиты пӑ ԓэщатты верэм нŏх ўԓԓы; мўв хирты йур ӑт тӑйԓәм, ԓэтŏт вохты йэԓәмԓайәм;

⁴ԓыв хотԓаԓа ма ат ўсайәм, уйәтԓэм, мўй верты, хун хот шавиты пӑ ԓэщатты вер эԓты пўӈԓа пайәтԓайәм".

⁵Пӑ кущайәԓ хŏща артнайәӈа уԓты хŏйатәт ԓӑтәԓ щирән вохсәԓы, пӑ оԓәӈ хŏйат ищмәсԓы: "Мўй арат артна нӑӈ кущайэм хŏща тӑйԓән?"

⁶Щитәԓ йастәс: "Сот мера16:6 и мера (бат) - еврейәт щирән 37 (хŏԉмаӈ ԓапәт) литра; оливка вŏй". Щӑԓта щитәԓа йастәс: "Артна нэпекен ўйи, пӑ сорашәк иԓ опса, хӑнши: ветйаӈ".

⁷Щӑԓта кимет артнайәӈ хŏйата йастәс: "Нӑӈ пӑ мўй арат артна тӑйԓән?" Ԓўв йŏхԓы йастәс: "Сот мера16:7 и мера (кор) – еврейәт щирән 370 (хуԓәмсот ԓапәтйаӈ) литра; нŏви ԓат сэм". Щӑԓта ԓўвеԓа йастәс: "Артна нэпекен ўйи пӑ хӑнши: ԋийәԓйаӈ".

⁸Хотәӈ куща хот шавиты пӑ ԓэщатты ӑнта вещкат хŏйатәԓ ишәксәԓы, нŏпсәӈа вермаԓ урәӈән; тӑм йисән уԓты пŏхәт ԓыв хŏрпи ŏтԓаԓ кўтән нŏви турәм пŏхәт16:8 нŏви турәм пŏхәт – щит ин, тӑм пŏрайән, Турәм Хон Уԓәпсайа эвәԓты хŏйатәт, щишән ԓыв Турәм Хон Уԓәпса пеԓа уԓԓәт. Турәм Хон Уԓәпса пос – щит нŏви; эԓты нŏпсәӈшәкәт.

⁹Ма пӑ нынана пŏтәртԓәм: нын пиԓйохәт ԓэщататы нӑрәӈ тащ-вещ ŏнтасән, ԓуԓән, хун нўшайа йиԓты, ԓыв нынан и пўша уԓты тӑхайа ат ўсэԓ.

¹⁰Ай верән вещкат ŏт, щит ун верән па вещкат, ай верән ӑнта вещкат ŏт, щит ун верән ищи ӑнта вещкат.

¹¹Щишән, нын нӑрәӈ тащ-вещ тӑйман вещката ӑт усты ки, хŏй нынана вещката уԓты тащ-вещ эвԓәптәԓ?

¹²Пӑ па ŏт тащ-вещ хŏща вещката ӑт усты ки, хŏйән нынана нын кешайән уԓты ŏт мӑԓа?

¹³Нэмәԓты митху кӑт куща пеԓа уԓты ӑт верәтәԓ: мўй пӑ итәԓ ԉикән этты питԓәԓы, киметәԓ пӑ сӑмәӈа тӑйты питԓәԓы, мўй пӑ итәԓа сӑмәӈа рупитты питәԓ, киметәԓ эԓты пӑ йŏвра ватты питәԓ. И пўԉаӈ Турәм пеԓа пӑ тащ-вещ пеԓа уԓты ӑт верәтԓәты".

Христос фарисейәта йэԓпи йастәты вер

¹⁴Щит иса ŏх сӑмәӈа тӑйты фарисейәтән па хуԓса, пӑ ԓыв Ԓўвэԓ ԋӑха ԋӑхсэԓ.

¹⁵Ԓўв ԓывиԓаԓа йастәс: "Нын хŏйатәт йэԓпийән нынан тўӈа-щира уԓты ŏтәта айәԓԓәԓән, туп Турәмән нын сӑмԓән уйәтԓайәт, хŏйатәт хŏща мўй ԓӑтәӈ, Турәм йэԓпийән щит ԋим".

¹⁶Закон пŏра пӑ Турәм йасәӈ туты хŏйатәт пŏра Иоанн унты ус; ин ўш эԓты Турәм Хон Уԓәпса Йӑм айкеԓ эԓты сыйәӈа пŏтәртԓа, пӑ кашәӈ хŏйат йур вевән ԓыпийа ўратәԓ.

¹⁷Туп сорашәк турәм пӑ мўв хŏԓты пеԓа ушԓәтән, Закон йасӈәт эԓты и хӑнши нўвийэ хŏԓты хун ушәԓ.

Христос имеӈән–икеӈән кӑтна мӑнты вер эԓты утәԓтәԓ

¹⁸Щит, хŏй имеԓ пиԓән кӑтна мӑнәԓ пӑ па ими туԓ, пакрасԓәԓ, пӑ щит, хŏй икеԓ пиԓән кӑтна мӑнәм ими вана ўԓԓы, пакрасԓәԓ.

Тащәӈ хŏйат пӑ Лазарь эԓты утәԓтәты пŏтәр

¹⁹И тащәӈ хŏйат ус, ԓўв тынәӈ питы ўрты ԓумтәма пӑ пирыйәм ухәԓ щӑшкана ԓумәтԓыйәс пӑ кашәӈ хӑтәԓ поры пӑсан верыԓыйәс.

²⁰Щӑԓта пӑ Лазарь нэмпи и куԋар хŏйат ус, ԓўв пушас овәԓ иԓпийән керәтԓыйәс, эԓәԓ ԓайӈәӈ ԋўләмән лӑп каритәм

²¹пӑ тащәӈ ики пӑсан эԓты иԓ рыйты пўләта ԓуԓән хŏԓна амәтман ус, сӑмәԓ вŏԓәттыйа, ампәт вана йŏхтыԓысәт пӑ ԓўв карԓаԓ ԋŏԓыԓысԓаԓ.

²²Куԋар ху пӑрәс пӑ ԓўв ангеләтән Авраам хŏща туса. Тащәӈ ики па пӑрәс, пӑ мўва иԓ лоттәса.

²³Иԓта турәмән шукащман ус, ԓўв сэмԓаԓ нŏх аԓәпсәԓы пӑ йэԓән Авраам, ԓўв пўӈԓәԓән пӑ Лазарь ики шийаԓәс.

²⁴Такан ўвман йастәс: "Авраам ащи! Ма урӈемән сӑмен ат ԋŏхԓәԓ пӑ Лазарен киты, ԓўй тӑйәԓ йиӈка ат метшиԓыԓԓы пӑ ԋаԓмем ат йолхәԓԓәԓы, тӑм тўт хŏща щикем шукащԓәм!"

²⁵Авраам йастәс: "Пŏхийэ, нумәԓми, нӑӈ йӑмен уԓмен сыс мŏщатсэн; Лазарь пӑ – туп атәм тӑйәс. Ин пӑ ԓўв тӑта тŏрамтыйәԓ, нӑӈ пӑ шукащԓән;

²⁶щи тўмпийән мўӈ пӑ нын кўтәнән ун ус шики верман уԓ, тӑԓта нын хŏщайән мӑнты ԓӑӈхаты ŏтәт ӑт веритԓәт щи мӑнты, ищиты щиԓта мўӈ хŏщайэв ӑт ўншиԓыԓәт".

²⁷Щиӈәԋща тащәӈ ху йастәс: "Щи ԓŏват йӑм вера, ун ащи, ма ащем хота ԓўвеԓ киты,

²⁸ма вет ху апщи тӑйԓәм, ԓўв ԓывиԓаԓа ат йастәԓ, ԓуԓән ԓыв пӑ тӑм шукәӈ тӑхайа ӑт аԓ йŏхәтсәт".

²⁹Авраам ԓўвеԓа йастәс: "Ԓыв Моисей пӑ Турәм йасәӈ туты икет тӑйԓәт; ԓывиԓаԓ ат хуԓәтԓәт".

³⁰Ԓўв пӑ йастәс: "Ӑнта, Авраам ун ащи, туп хун пӑрәм хŏйатәт эԓты ԓыв хŏщайэԓ мӑтты ŏт йŏхәтәԓ ки, щи пŏрайән ԓыв кӑрэкԓаԓ эԓты керԓәԓәт".

³¹Щӑԓта Авраам ԓўвеԓа йастәс: "Моисейа пӑ Турәм йасәӈ туты икета ӑт хуԓәтԓәт ки, пӑ пӑрәм хŏйатәт эԓты мӑтты ŏт нŏх ԓыԓәӈԓәс ки, хун эвәԓԓәт".

Христос хўщәпсайәт эԓты утәԓтәԓ

¹Иисус утәԓтәты йохԓаԓа па йастәс: "Хўщәпсайәт ӑт йŏхәтты щир ӑнтом, туп щи хŏйата шук, хŏй мŏхты хўщәпсайәт йŏхәтԓәт;

²ԓўвеԓа, тӑм ай ŏтәт эԓты ит нэш хўщты эԓты, йӑмшәк ус ԓуԓән, сапԓәԓа ун кев шуп ки тӑхәртса пӑ щарса вŏщкәса.

³Ныныԓән ватман тӑйаԓән. Нӑӈ пеԓайэна йайән мўй апщен нўр туԓ ки, ԓўвеԓа йŏхԓы йасты; ԓўв нўрәԓ эԓты шӑшән керԓәԓ ки, щи нўрәԓ йŏрэми;

⁴хӑтәԓ хўват ԓапәт пўш кепа нӑӈена нўр верәԓ, пӑ ԓапәт пўш хӑтәԓ хўват нӑӈ хŏщайэна йŏхәтәԓ пӑ йастәԓ: "Ма нўрэм эԓты шӑшән керԓәԓәм", - нўрәԓ эсԓы, йŏрэми".

⁵Щӑԓта апостоләт Турәм Кущайа йастәсәт: "Мўӈ эвәԓты верэв арамты!"

⁶Турәм Куща йастәс: "Нын горчица ԓат сэм ԓŏват эвәԓты вер тӑйсәты ки, пӑ тӑм смоква йўха йастәсты: мўв эԓты нŏх лакәптыйа пӑ щарса опсанта", ԓўв ԓуԓән нынана хуԓәнтәс.

⁷Хŏй нын эԓтан, мўв хӑрән рупитты мўй пӑ тащ шавиты митху тӑйман, ԓўв мўв хӑр эԓты йŏхәттаԓән, ԓўвеԓа йастәԓ: "Сорашәк мӑна, пӑсан сурыйа опса"?

⁸Аԓт пӑ ԓўвеԓа йастәԓ: "Йэтән ԓэтәт мӑнэм кавәрта пӑ, ӑнтпен нŏх йӑрман, мӑнэм ԓавәԓман, ма ԓэтэм, йищтэм эԓты ванән ԓойа, пӑ щӑԓта веԉщи нӑӈ ԓэва, йиԋща"?

⁹Хотәӈ куща щи митхуйәԓ, ԓўв партәм щирәԓа вермаԓ урәӈән, пумащипа йасӈәтән йастәԓԓы а мўй? Щиты ӑт нумәсԓәм.

¹⁰Нын ищиты, хун партыԓыйәм щирән иса верԓәты, пŏтәртаты: "Мўӈ туп митху лэӈкет, мўй верты мосәс, щит версув".

Христос йаӈ ԓайӈәӈ ԋўлмәӈ хŏйат сыстамтәс

¹¹Иерусалим вош пеԓа мӑнман, Иисус Самария пӑ Галилея мўвӈән кўтән шушәс.

¹²Пӑ хун Ԓўв и кўрта йŏхәтмаԓән, йаӈ йэмәӈ ԓайӈәӈ ԋўлмәт тӑйты хŏйатәтән йэщаԓт этса. Ԓыв йэԓән иԓ ԓойсәт

¹³пӑ сыйәӈ тўрән пŏтәртсәт: "Иисус Утәԓтәты Ху! Мўӈев щаԉиты!"

¹⁴Ԓывиԓаԓ шийаԓәмаԓ кемән, Ԓўв йастәс: "Мӑнаты, Турма йир верты хŏйатәта аԉисыйаты". Хун ԓыв шушсәт, сыстама йисәт.

¹⁵Ԓыв эԓтэԓ и хŏйат, тўмтака йўвәм шийаԓәмаԓ кемән, сыйәӈ тўрән Турәм вŏԓаӈа айәԓтман, йŏхԓы керԓәс,

¹⁶пӑ Иисус кўр ԋŏԓаԓ шŏма, пумащипа йастыман, хŏмта иԓ керәптыйәс; щит Самария ики ус.

¹⁷Иисус йŏхԓы йастәс: "Ӑнта мўй йаӈ хŏйат сыстапман усайәт? Йӑрәԏйаӈ пӑ хŏта?

¹⁸Мўй щирән, тӑм па мўв хŏйат тўмпийән, ԓыв йŏхԓы ӑт керԓсәт, Турма ишәк йасәӈ йастәты урәӈән?"

¹⁹Пӑ Иисус ԓўвеԓа йастәс: "Нŏх ԓойа пӑ мӑна; эвәԓты верэнән нӑӈ нŏх пайәтсайән".

Христос Ԓўв Кимет йŏхәтты верәԓ эԓты утәԓтәԓ

²⁰Фарисейәтән иԋщәсса, хун Турәм Хон Уԓәпса йŏхәтәԓ? Ԓўв йŏхԓы йастәс: "Турәм Хон Уԓәпса сэмән ватман ӑт йŏхәтәԓ",

²¹пӑ ӑт йастәԓәт: "Тӑм, Ԓўв тӑта", мўй пӑ "Ԓўв тўта". Пӑ тӑм, Турәм Хон Уԓәпса нын ԓыпанән уԓ".

²²Утәԓтәты йохԓаԓа па йастәс: "Хӑтԓәт йŏхәтԓәт, хун нын Хŏйат Пŏх хӑтәԓԓаԓ эԓты ит ватты ԓӑӈхаԓԓән, пӑ ӑт шийаԓәԓԓән.

²³Пӑ нынана йастәԓа: "Тӑм, тӑта щи", мўй пӑ: "Тўм, тўта щи" - аԓ мӑнаты пӑ аԓ ԋухԓысыйаты,

²⁴пӑ хутԓыйәм пŏхәл ԋоԓ иты турәм и кимԓәԓ эԓты, кимет кимԓәԓ унты вŏрԓыйәԓ, Хŏйат Пŏх Ԓўв хӑтԓәԓән щиты питәԓ.

²⁵Туп оԓәӈән Ԓўвеԓ ар шук туты мосәԓ пӑ ин уԓты хŏйатәтән вана ӑт ўты вер уԓ.

²⁶Пӑ хŏты Ной хӑтԓәтән ус, щиты Хŏйат Пŏх хӑтԓәтән питәԓ:

²⁷хŏйатәт ԓэсәт, йищсәт, нэ тутԓысәт, ху сайа мӑныԓысәт щи хӑтәԓ унты, хун Ной ики ковчег17:27 ковчег - ун хоп шики ԓыпийа ԓŏӈәс, пӑ ун йик йŏхтәс, пӑ хŏԓ пӑратсайәт.

²⁸И щиты, Лот нэмпи ики хӑтԓәтән ус: ԓэсәт, йищсәт, ԓутәссәт, тынассәт, мўв хӑр ԓэвпәс омассәт, хот омәссәт;

²⁹туп щи хӑтәԓән, хун Лот ики Содом вош эԓты ким этәс, турәм эԓты тўтәӈ пӑ уӈхәӈ йэрт шошмәс, пӑ хŏԓ пӑратсайәт;

³⁰пӑ щи хӑтәԓән щиты питәԓ, хун Хŏйат Пŏх сэма этәԓ,

³¹Щи хӑтәԓән, хŏй хот ԓоӈәԓән ки уԓты питәԓ, пŏрмасԓаԓ пӑ хот ԓыпийән, щит ԓывиԓаԓ ўты иԓ аԓ ŏхԓа; хŏй пӑ мўв хӑрән ки уԓты питәԓ, ищиты йŏхԓы аԓ керԓа.

³²Лот ики ийими нуммәԓмийаԓән.

³³Хŏй уԓәпсайәԓ шавиты утщийәԓ ки, щит ԓўвеԓ пӑратԓәԓы, хŏй пӑ уԓәпсайәԓ пӑратԓәԓы, щит ԓўвеԓ ԓыԓӈатԓәԓы.

³⁴Нынана пŏтәртыԓәм: "Щи ат кӑт хŏйат и ŏԓттӑхайән: итәԓ нŏх ўԓа, киметәԓ хӑйԓа;

³⁵кӑт нэӈӈән и йӑха ԓат сэм шўкатты питԓәӈән: итәԓ нŏх ўԓа, киметәԓ хӑйԓа;

³⁶кӑтән мўв хӑрән рупитԓәӈән: итәԓ нŏх ўԓа, киметәԓ хӑйԓа".

³⁷Щи урәӈән Ԓўвеԓа йŏхԓы йастәса: "Хŏта, Турәм Куща?" Ԓўв пӑ ԓывиԓаԓа йастәс: "Хŏта хӑԓа, щита пӑ кўркәт ӑктәщԓәт".

Нэ эԓты пӑ сўт ики эԓты уԓты пŏтәр

¹Иисус ԓывиԓаԓа щит эԓты утәԓтәты пŏтәр пŏтәртәс, мӑтты иса пойәкщәты мосәԓ пӑ равԓы-хушԓы уԓты ӑт мосәԓ,

²йастәман: "И вошән сўт ики ус, ԓўв Турәм эԓты ӑт пӑԓәс пӑ хŏйатәт эԓты ӑт йэԓамтыйәс.

³Щи вошән и икиԓы хӑщәм нэ ус, пӑ ԓўв, сўт ики хŏща йŏхтыԓыман, пŏтәртәс: "Мӑнэм нўр верты хŏйат эԓты эԓт питы".

⁴Туп ԓўв хўв ӑт кашащәс. Йухәт иԓта нŏпсәԓән йастәс: "Турәм эԓты ма кўш ӑт пӑԓԓәм пӑ хŏйатәт эԓты ӑт йэԓәмԓайәм,

⁵туп тӑм икиԓы хӑщәм имийән рома ӑт хӑйԓайәм, ԓўвеԓ эԓт питԓэм, ԓўв мӑнэма тŏрастәтыйа ԓуԓән па ӑт aт йŏхтыԓыйәс".

⁶Турәм Куща йастәс: "Хуԓԓәԓән, ӑнтом вещкат сўт ики мўй пŏтәртәԓ?

⁷Турәм мўй Ԓўв пирыйәм хŏйатԓаԓ, атәԓ-хӑтәԓ Ԓўвеԓ вохты ŏтԓаԓ, эԓт ӑт питԓәԓы? Пӑр мŏԓты Ԓўв ԓывиԓаԓа ԋотәп верты рŏнәԓ?

⁸Нынана пŏтәртԓәм, ԓывиԓаԓа сорайән эԓт питты щир мӑԓ. Туп Хŏйат Пŏх йŏхәттаԓән, эвәԓты вер мўвән а мўй уйәтәԓ?"

Фарисей эԓты пӑ налогәт ӑкәтты хŏйат эԓты утәԓтәты пŏтәр

⁹Тухԓәт пеԓа па, хŏй ԓыв нумәссәт ԓыв тўӈа–щира уԓты хŏйатәт, пӑ па хŏйатәт ԋэрсәт, Иисус щимәщ утәԓтәты пŏтәр пŏтәртәс:

¹⁰"Кӑт хŏйатӈән Турәм хота пойәкщәты ԓŏксәӈән: итәԓ - фарисей, киметәԓ - налог ӑкәтты ики.

¹¹Фарисей, утща щира ԓойман, ԓўв турмәԓән шитаман пойәкщәс: "Йэшәк Турәм! Пумащипа Нӑӈена йастәԓәм, ма ӑнта щимәщ, ӑнта па хŏйатәт хŏрпи - ԓоԓмахәт, хорахщет, пакрасԓәты ŏтәт, мўй пӑ тӑм налог ӑкәтты ики иты:

¹²ԓапәт кӑт пўш вўщԓыԓәм,18:12 вўщԓыты, щит: мŏԓты арат сыс ԓэԓԓы пӑ пойәкщәман уԓты щир; кашәӈ шитты ŏтэм эԓты, йаӈмет шупәԓ мӑԓэм".

¹³Налог ӑкәтты ики пӑ, йэԓәншәк ԓойман, сэмԓаԓ турма хŏԓна нŏх аԓәмты пӑԓәс; туп мевԓәԓ хӑтщиман, пŏтәртәс: "Йэшәк Турәм, ма, кӑрэкәӈ ху, ма пелайэм йӑмен этәԓты!"

¹⁴Нынана йастәԓәм, щит, фарисейа пŏнман, Турәмән вещката пайәтман, йŏхи мӑнәс: кашәӈ ԓўвеԓ ԓўв ԓӑтәӈа тӑйты хŏйат ԓӑтԓыйа пӑйәтԓа, пӑ ԓўвеԓ ԓӑтԓыйа тӑйты хŏйат ԓӑтәӈа пайәтԓа.

Христос ԋаврэмәт вана ўԓ

¹⁵Иисус хŏща ай ԋаврэмәт тўтԓысайәт, Ԓўв ԋаврэмәт хŏща ԓуԓән ат хӑнәмтыйәс; утәԓтәты йохԓаԓ щит шийаԓәмеԓ кемән, ԓывиԓаԓ ӑт эсәԓты питсәԓаԓ.

¹⁶Туп Иисус, ԋаврэмәт вана вохман, йастәс: "Ԋаврэмәт Ма хŏщайэм йŏхтыԓыты эсԓаԓән, ԓывиԓаԓ аԓ йэртԓыйаԓән, щимәщ ŏтәт урәӈән Турәм Хон Уԓәпса уԓ.

¹⁷Йӑна нынана йастәԓәм: Турәм Хон Уԓәпсайа щит ӑт ԓŏӈәԓ, хŏй ԋаврэм иты, вана ԓўвеԓ ӑт ўԓԓы".

Тащәӈ куща

¹⁸Щӑԓта и мӑтты кущайа уԓты ŏтән Ԓўв ищмәса: "Сӑмәӈ Утәԓтәты Ху! Мўй мӑнэм верты мосәԓ, ԓуԓән и пўша уԓты уԓәпса ат мŏщатсәм?"

¹⁹Иисус ԓўвеԓа йастәс: "Мўйа нӑӈ Мӑнэм сӑмәӈа айәԓԓэн? Нэмәԓты ŏт ӑнта сӑмәӈ, туп Турәм утща;

²⁰Турәм партәпса йасӈәт уйәтԓәԓан: "Па хŏйат ими пиԓән, па хŏйат ики пиԓән аԓ пакрасԓа", "Хŏйат аԓ пӑрата", "Аԓ ԓоԓма", "Аԓ ԋаԓмийа", "Аԋԏен-ащен нумман тӑйи".

²¹Ԓўв пӑ йастәс: "Тӑм иса ма ай эԓты шависэм".

²²Щит хуԓмаԓ кемән, Иисус ԓўвеԓа йастәс: "Нӑӈена па ит ӑт тӑрмәԓ: иса мўй тӑйԓән, тыныйаԓән пӑ нўша хŏйатәта ортаԓән, пӑ турәмән тащ, сорԋэт тӑйты питԓән, щӑԓта йŏхта пӑ Ма йўпемән шуша".

²³Ԓўв пӑ, щит хуԓмаԓ кемән, рўтаԉа йис, шек тащәӈ ус.

²⁴Иисус, ԓўв рутаԉа йўвмаԓ, шийаԓәмаԓ кемән, йастәс: "Мўй хŏрпи ԓавәрт тащәӈ хŏйата Турәм Хон Уԓәпсайа ԓŏӈты!

²⁵Верблюд нэмпи войа йинтуп пўв мŏхты мӑнты хŏԓна туԓшәк, тащәӈ хŏйата Турәм Хон Уԓәпсайа ԓŏӈты эԓты".

²⁶Щит хуԓәм мŏхет йастәсәт: "Хŏй пӑ нŏх пайтәсты верәтәԓ?"

²⁷Туп Ԓўв йастәс: "Хŏйатәтән ӑт верәтты щир, Турәмән верәтԓа".

Христос Турма посатты ŏт мойԓәԓԓы

²⁸Петра пӑ йастәс: "Тӑм, мўӈ мўй тӑйсув, иса хŏԓ хӑйсәԓув пӑ Нӑӈ йўпенән мӑтсув".

²⁹Ԓўв ԓывиԓаԓа йастәс: "Йӑна нынана пŏтәртԓәм: нэмәԓты хŏйат ӑнтом, хŏй хотәԓ, мўй ащеԓ-аԋԏеԓ, мўй пӑ йайԓаԓ-опиԓаԓ-апщиԓаԓ, имеԓ мўй пӑ ԋаврэмԓаԓ Турәм Хон Уԓәпса урәӈән ԓуԓән хӑйсәԓы,

³⁰пӑ тӑм пŏрайән мет хŏԓна аршәк ԓуԓән мŏщатәԓ, йиты пŏрайән пӑ - и пўша уԓты уԓәпса".

Христос хуԓмет пўш Ԓўв сŏрмәԓ пӑ нŏх ԓыԓәӈԓәты верәԓ эԓты йэԓпи йастәԓԓы

³¹Кӑтхŏщйаӈ утәԓтәты йохԓаԓ пўӈԓа вохман, ԓывиԓаԓа йастәс: "Тӑм мўй, мўӈ Иерусалим воша мӑнԓув, пӑ щиты иса тыйәԓ, хŏты Турәм йасәӈ туты хŏйатәт сӑхат Хŏй ат Пŏх эԓты хӑшса,

³²Ԓўв Турәм ӑт уйәтты па рут мира мӑԓа, пӑ Ԓўв щӑԓта кӑмән щирән ԋэрԓа, шукатԓа пӑ пŏлщәӈән ԉакԓа,

³³пӑ хомщийән сэкты питԓа, пӑ Ԓўв пӑратԓа: хуԓмет хӑтәԓән пӑ нŏх ԓыԓәӈԓәԓ".

³⁴Туп утәԓтәты йохԓаԓ щит эԓты нэмәԓты ŏша ӑт пайәтсәт; щи йасӈәт ԓывиԓаԓа хӑԋа щир тӑйсәт, пӑ йастәм ŏт ԓыв ŏша ӑт пайәтсэԓ.

Христос Вартимей тўмтака верәԓ

³⁵Хун Ԓўв Иерихон воша ванамәс, и сэмԓы ики йуш пўӈәԓән, меԓащ18:35 меԓащ ’милостыня’ вохман, опсәс,

³⁶щӑԓта, ԓўв пўӈԓәԓ эԓты хŏйатәт шушты хуԓмаԓ кемән, ԓўв ищмәсԓы: "Мўй щит?"

³⁷Ԓўвеԓа йастәса, щит Иисус Назарет эԓты йиԓ.

³⁸Щи йўпийән ԓўв такан ўваԓтәс: "Иисус, Давид Пŏх! Мӑнэм щаԉиты!"

³⁹Оԓӈа мӑнты хŏйатәт ԓўвеԓ мӑшйайа уԓты партԓэԓ; туп ԓўв па таканшәк ўваԓтәс: "Давид Пŏх! Мӑнэм щаԉиты!"

⁴⁰Иисус иԓ ԓойәс пӑ щит Ԓўв хŏщайәԓ вана туты партсәԓы: пӑ хун щит Ԓўв хŏщайәԓ вана йŏхтәс, ԓўвеԓ ищмәсԓы :

⁴¹"Мўй нӑӈ Ма эԓтэм ԓӑӈхаԓән? Сэмԓы ики йастәс: "Турәм Куща! Ԓуԓән сэмәӈа ат йисәм".

⁴²Иисус ԓўвеԓа йастәс: "Сэмәӈа ат йиԓән! Нӑӈ эвәԓты верэнән нӑӈ йӑмәԓтсайән".

⁴³Щӑԓта ԓўв ищи мŏхты сэмәӈа йис пӑ Ԓўв йўпеԓән мӑнәс, Турәм вŏԓаӈа айәԓтман; пӑ мир хŏԓ щит ватман, Турма ишәк йасӈәт йастәты питсәт.

Закхей нŏх пайтәсты щир мŏщатәԓ

¹Щи йўпийән Иисус Иерихон воша йŏхтәс пӑ вош хўват шушәс.

²Щита, Закхей нэмпи ий ики, ԓўв налог ӑкәтты хŏйатәт ŏх ху пӑ хŏԓна тащәӈ ху ус.

³Иисус – Щит хŏй Ԓўв, ватты кӑшсәԓы, туп мир сайән шийаԓәты ӑт веритсәԓы, пӑԓатәԓ ԓэԓ ус, щишән,

⁴пӑ, оԓӈашәк хухәԓмәман, смоква йўха нŏх хуӈхәс, Иисус кащаԓәты урәӈән, Ԓўвеԓ щи пўӈәԓта мӑнты мосәс.

⁵Хун Иисус щи тӑхайа йŏхтәс, нŏхԓы аӈкәрмәмаԓ кемән, ԓўвеԓ шийаԓәсԓы пӑ йастәс: "Закхей! Сорашәк иԓ ŏхԓа, тӑм хӑтәԓән Мӑнэм нӑӈ хотэнән уԓты мосәԓ".

⁶Щитәԓән ԓўв тэрматыман иԓ ŏхԓәс пӑ амәтман Ԓўвеԓ хотәԓа тусԓы.

⁷Пӑ хŏԓыйэ, щит ватман, ўшмащты питсәт: "Ԓўв кӑрэкәӈ хŏйат хŏща мойԓәты ԓŏӈәс!"

⁸Закхей пӑ, ԓойман, Турәм Кущайа йастәс: "Турәм Куща! Тӑйты хот тэԓэм и шупәԓ нўша хŏйатәта мӑԓэм, пӑ хŏй эԓты мŏԓтас усәм ки, щита ԋӑԓ пўш аратән йŏхԓы мӑԓэм".

⁹Иисус ԓўвеԓа йастәс: "Тӑм хӑтәԓ тӑм хота нŏх пайтәсты щир йŏхтәс, ԓўв па Авраам пŏх, щишән.

¹⁰Хŏйат Пŏх кӑншатты йŏхтәс пӑ ушәм ŏтәт нŏх пайәтты".

Христос йаӈ ŏх эԓты утәԓтәты пŏтәр пŏтәртәԓ

¹¹Хун ԓыв щит хуԓәтсәт, и утәԓтәты пŏтәр па пŏтәртәс: Ԓўв Иерусалим вош ԉэпән ус пӑ ԓыв нумассәт, йэшавуԓ Турәм Хон Уԓәпса щи йŏхәтәԓ.

¹²Иисус щиты йастәс: "Йӑм рут эԓты уԓты и хŏйат хўв мўва мӑнәс, ԓуԓән щита хон кущайа павтәсты урәӈән, пӑ щӑԓта йŏхԓы йŏхәтты;

¹³йаӈ митйохԓаԓ вана вохман, йаӈ сорԋеӈ ŏхән19:13 сорԋеӈ ŏх – еврей хŏйатәт щирән щит мина, хуԓәм тыԓәщ рупитәм арат ŏх; ԓывиԓаԓ мӑсԓы пӑ йастәс: "Тӑм ŏхԓән ма йŏхәттэм унты вер пеԓа мийаԓән".

¹⁴Щи мўвәӈ хŏйатԓаԓән ԓўв шек ԉикән этса пӑ ԓўв йўпеԓ хўват хŏйатәт китсайәт, йастәтыйа: "Мўӈ нўмпева щи хŏйат хŏна уԓты, мўӈ ӑт ԓӑӈхаԓув!"

¹⁵Хун, хон кущайа питмаԓ йўпийән, йŏхԓы йŏхтәс, щи митйохԓаԓ, хŏйа сорԋэӈ ŏх мийлыйәс, ԓўв хŏщайәԓ вохты партсәԓы, щи ŏхԓаԓән хŏй мўй шитәс, щит уйәтты урәӈән.

¹⁶Оԓәӈ митхуйәԓ йŏхтәс пӑ йастәс: "Куща, нӑӈ и cорԋеӈ ŏхен йаӈ сорԋеӈ ŏх тус".

¹⁷Ԓўвеԓа пӑ йастәс: "Йӑм щи, вещкат митху! Ай вер хŏща вещката уԓмен урәӈән, кущайа уԓты, йаӈ вош ўйа!"

¹⁸Кимет митхуйәԓ йŏхтәс пӑ йастәс: "Куща, нӑӈ и сорԋеӈ ŏхен вет сорԋеӈ ŏх тус".

¹⁹Щитәԓа па йастәс: "Нӑӈ па вет вош хŏща кущайа уԓа".

²⁰Хуԓмет митхуйәԓ йŏхтәс пӑ йастәс: "Куща, тӑм мўй нӑӈ мера сорԋеӈ ŏхен, ма ԓўвеԓ, ŏхшама йŏвәртман, шависэм,

²¹ма нӑӈ эԓтэн пӑԓсәм, нӑӈ тарәм хŏйат: мўй ӑт пŏныԓысән, щит ўԓән, пӑ мўй мўва ӑт опсыԓысән, щит ӑкәтԓән".

²²Куща ԓўвеԓа йастәс: "Вевтам митху, нӑӈ ўӈԓэнән нӑӈен сўтәтты питԓэм! Нӑӈ уйәтсэн, мўй хŏрпи ма тарәм хŏйат, мўй ӑт пŏныԓысәм, щит ўԓәм, мўй мўва ӑт опсыԓысәм, щит ӑкәтԓәм?

²³Мўй урәӈән пӑ нӑӈ ма сорԋэӈ ŏхем вер пеԓа ӑт мӑсэн, ма, йŏхәттэмән ԓуԓән, йŏхԓы мŏԓтаса ўсэм!"

²⁴Ванән ԓойты йохԓаԓ пеԓа йастәс: "Щел ŏх ԓўв эԓтэԓ ўйаԓән пӑ йаӈ сорԋеӈ ŏх тӑйты митхуйа мийаԓән".

²⁵Ԓўвеԓа мŏхет йастәсәт: "Куща, тўмен йаӈ сорԋеӈ ŏх щи тӑйәԓ".

²⁶"Нынана пŏтәртԓәм, кашәӈ тӑйтаӈ хŏйата мӑты питԓа, ӑт тӑйты ŏт эԓты, мўй тӑйәԓ, щитәԓ нŏх ўԓа;

²⁷Щи мӑнэм веԓты ŏтԓам пӑ, хŏй, мӑнэма хона уԓтыйа ӑт ԓӑӈхас, тый тўваԓән пӑ, ма ватман, щӑх сэӈкаԓән".

Иисус Иерусалим воша ԓŏӈәԓ

²⁸Щит йастәмаԓ йўпийән, Иисус йэԓԓы Иерусалим воша нŏх мӑнәс.

²⁹Хун Ԓўв Виффагия пӑ Вифания кўртӈән ԉэпа, Элеон нэмпи кев пай ԉэпа ванамәс, кӑт утәԓтәты хуйӈәԓаԓ тŏхи китсәԓы,

³⁰йастәман: "Нын йэԓпанән уԓты кўрта мӑнатән; щи йŏхәттанән, иԓ йӑрәм айкам осёл уйәтԓәтән, ԓўв шӑншәԓа нэмәԓты пŏрайән нэмәԓты хŏйат ӑт опсыԓыйәс; хŏԓт эӈхаԓән пӑ тый ватәԓтаԓән;

³¹мӑтты хŏйатән ищмиԓайтән ки: "Мўйа нŏх эхԓәԓән?", ԓўвеԓа щиты йастатән: "Ԓўв Турәм Кущайа мосәԓ".

³²Китәм кӑтӈән мӑтсәӈән пӑ хŏты Ԓўв ԓынана йастәс, щиты уйәтсәԓән.

³³Хун пӑ ԓын айкам осёл хŏԓт эӈхәссәԓән, войәӈ хŏйатԓаԓән ԓын иԋщәссайӈән: "Мўйа осёл пŏшәх нŏх эхсәԓән?"

³⁴Ԓын йŏхԓы йастәсӈән: "Ԓўв Турәм Кущайа мосәԓ".

³⁵Щӑԓта ԓўвеԓ Иисус хŏща тусԓән, пӑ, ԓумәтты сŏхԓаԓ вой шӑнша пŏнман, Иисус нŏх ԓэԓтсэԓ.

³⁶Щӑԓта, хун Ԓўв вой шӑшән мӑнмаԓән, хŏйатәт ԓумтәмԓаԓ йуша ԓэрәпсәԓаԓ.

³⁷Хун Ԓўв Элеон кев пай эԓты иԓ ŏхәԓты тӑхайа ванамәс, хŏԓ аратәԓ утәԓтәты йохԓаԓ, ԓыв вантәм ар йӑм йурәӈ верԓаԓ урәӈән, амәтман, сыйәӈ тўрән Турәм ишәкты питсэԓ,

³⁸пŏтәртман: "Йӑмән мийәм Хон, Турәм Куща нэм урәӈән йиты Ŏт! Турәмән пайԓы уԓәпса, пӑ нумән ишәк йасәӈ!"

³⁹Тухәԓ фарисейәт мир кўт эԓты Ԓўвеԓа йастәсәт: "Утәԓтәты ху! Утәԓтәты йохԓан аԓ эсԓаԓән пŏтәртты!"

⁴⁰Туп Ԓўв ԓывиԓаԓа йŏхԓы йастәс: "Нынана пŏтәртԓәм, ԓыв ки нŏх вŏԓыԓәт, кев шупәт ўвты питԓәт".

⁴¹Щӑԓта, хун Иисус Иерусалим ԉэпа ванамәс, вош пеԓа ватман, ԓўв урӈәԓән хоԓԓәты питәс

⁴²пӑ йастәс: "Йэшәк, тӑм нӑӈ хӑтԓэнән ԓуԓән нӑӈ мŏштәсэн ки, нӑӈ пайԓы уԓәпсайэн шавиты мўй верәтәԓ! Туп щит ин нӑӈ сэмӈиԓан эԓты хӑԋатман уԓԓа,

⁴³хӑтԓәт йŏхәтԓәт, хун нўрмәԓтты ŏтԓанән нӑӈ, керәтман ԉаԉәсты урәӈән, мўв пайәтән хирԓайән пӑ лӑп ԓӑрәтԓайән, пӑ ар тӑха эԓты йэрмата тӑӈәртԓайән,

⁴⁴нӑӈ пӑтэн унты шўкатԓайән, ԋаврэмԓан па нӑӈ ԓыпенән пӑратԓайәт, пӑ нӑӈ ԓыпенән омәсты и хот ӑт хӑщәԓ, мўйа нӑӈ хŏщайэн Турәм йŏхтыԓыйәм пŏра ӑт мŏштәсэн, щи урәӈән!"

Турәм Хот сыстапты вер

⁴⁵Турәм хот ԓыпийа ԓŏӈмаԓ кемән, тынасты пӑ ԓутәсты хŏйатәт ким воштәты питсәԓы,

⁴⁶ԓывиԓаԓа пŏтәртман: "Хӑшман уԓԓа: "Ма Хотэм – пойәкщәты хот, нын пӑ ԓўвеԓ хорахщет хота версәԓән!"

⁴⁷Пӑ кашәӈ хӑтәԓ Ԓўв Турәм Хотән хŏйатәт утәԓтәс. Турма йир верты хŏйатәт ŏх икет пӑ Закона утәԓтәты хŏйатәт пӑ мир хŏща уна уԓты икет Ԓўвеԓ пӑратты урәӈән, пŏра кӑшсәт,

⁴⁸пӑ ӑт уйәтсәт, а хŏты Ԓўвеԓ верты; мир, Ԓўвеԓ керәтман, лӑп ԓойман, хуԓәнтәс.

Ŏха уԓты ун икет Иисус йур ӑт мŏштәԓәт

¹Щи хӑтԓәтән и пўш, хун Ԓўв хŏйатәт Турәм Хотән утәԓтәс пӑ Йӑм айкеԓ эԓты сыйәӈа пŏтәртәс, Турма йир верты хŏйатәт ŏх икет пӑ Закона утәԓтәты икет, уна уԓты икет пиԓән Ԓўв хŏщайәԓа вана хӑтсәт

²пӑ Ԓўвеԓа йастәсәт: "Йаста мўӈева, хŏй партатты щирән Нӑӈ тӑм вер верԓән, ӑнты ки пӑ хŏйән Нӑӈ щи йурән мӑсайән?"

³Ԓўв ԓывиԓаԓа йŏхԓы йастәс: "Ма па нын эԓтан и вер эԓты ищмәԓәм, Мӑнэма йастаты:

⁴Иоанн йиӈка ԓŏӈәԓтыйәпса турәм эԓты ус мўй пӑ хŏйатәт эԓты?"

⁵Ԓыв пӑ ԓыв кўтԓаԓән ŏшйащман, пŏтәртсәт: "Йастәԓув ки: ’Турәм эԓты’, Ԓўв пӑ йастәԓ: ’Мўйа пӑ ԓўвеԓа ӑт эвәԓсәты?’

⁶Йастәԓув ки: ’Хŏйатәт эԓты’, хŏйатәтән кевән щӑх сэкԓайув, ԓыв эвәԓԓәт, Иоанн щит Турәм йасәӈ туты хŏйат".

⁷Щиты йŏхԓы йастәсәт: "Ӑт уйәтԓэв хŏԓща ус".

⁸Иисус йŏхԓы йастәс: "Ма па нынана ӑт йастәԓәм, хŏй партатты щирән щит верԓәм".

Виноград энмәԓтты тӑхайәӈ ху эԓты утәԓтәты пŏтәр

⁹Щӑԓта Иисус мир пеԓа тӑмәщ утәԓтәты пŏтәр пŏтәртты питәс: "И хŏйат мўв хӑрән виноград йўхәт опсәс пӑ артнайа виноград ԓэвпәс энмәԓтты хŏйатәта мӑсԓы, щӑԓта йӑм хўв кеша хŏԓт мӑнәс.

¹⁰Хун пŏра йŏхтәс, ԓўв митхуйәԓ виноград энмәԓтәм хŏйатәт хŏща китсәԓы, ԓуԓән ԓыв митхуйәԓа виноград йўхәӈ тӑхайәԓ эԓты ԓэвпәс ат мӑсәт; туп виноград энмәԓтты хŏйатәт митху сэксэԓ пӑ таԓты йŏхи китсэԓ.

¹¹Щӑԓта па митху китәс; туп щи митху па, сэкман, ԋэрман, йŏхԓы таԓты китсэԓ.

¹²Хŏԓна па хуԓметәԓ китсәԓы; туп ԓыв щит па, мушмәԓтман, воштәсэԓ.

¹³Щиӈәԋща виноград йўхәӈ тӑха куща йастәс: "А мўй мӑнэм верты?" Сӑма мосты ма пŏхем китԓэм; мосәӈ пӑ ԓўвеԓ шийаԓәтэԓ кемән, йэԓәмԓайәт".

¹⁴Туп виноград энмәԓтты хŏйатәт ԓўвеԓ шийаԓәмеԓ кемән, ԓыв кўтэԓән ŏшйащԓәт, пŏтәртԓәт: "Тӑми ащеԓ ŏх вŏԓ; мӑнԓув, веԓԓэв ԓўвеԓ, пӑ ащеԓән хӑйты тащәԓ-вещәԓ мўӈева питәԓ".

¹⁵Щӑԓта, виноград йўхәӈ тӑха эԓты ԓўвеԓ ким тўвман, пӑратсэԓ. Хŏты пӑ ԓывиԓаԓ виноград йўхәӈ тӑха куща верԓәԓы?

¹⁶Ԓўв йŏхәтәԓ пӑ пӑратԓәԓы щи йохԓаԓ, виноград йўхәӈ тӑхайәԓ пӑ па хŏйатәта мӑԓԓы". Щит хуԓәм мŏхет пӑ йастәсәт: "Ӑт ат питәԓ!"

¹⁷Туп Иисус, ԓыв пеԓайэԓ ӑӈкәртман, йастәс: "Тӑм хӑншәм йасәӈ мўй щит: "Кев хот омәсты хŏйатәтән мŏԓтсатәм кев шуп, щит щуӈ хŏща мет мосты кева йис"?

¹⁸Кашәӈ ŏт, хŏй щи кев эԓты рӑкәнәԓ, ай наприйэ шўкаԓәԓ, хŏй эԓты щи кев рӑкәнәԓ, щит пŏԉха йиԓ".

Кесарь ŏтәт кесарьа мийаԓән, Турәм ŏтәт па Турма мийаԓән

¹⁹Щи пўԉаӈ Турма йир верты хŏйатәт ŏх икет пӑ Закона утәԓтәты икет Ԓўвеԓ кӑтәԓтты ўтщисэԓ, туп хŏйатәт эԓты пӑԓԓысәт, ԓыв ŏша пайәтсэԓ, щи утәԓтәты пŏтәр ԓыв эԓтэԓ пŏтәртәс.

²⁰Щӑԓта ԓыв, Иисус эԓт ватман тӑйман, ŏщмарәӈ хŏйатәтән китса, йӑм хŏрпийа ԓэщатыман, мӑтты йасәӈ хŏща ԓуԓән Ԓўвеԓ ат мŏщатсэԓ, рим йохәтән пŏнәм сўт верты кущайа мӑты урәӈән.

²¹Щӑԓта ԓыв Иисус иԋщәссэԓ: "Утәԓтәты Ху! Мўӈ уйәтԓэв, Нӑӈ вещката пŏтәртԓән пӑ утәԓтәԓән, хŏйат веш пеԓа ӑт ватԓән, туп йӑна Турәм йуш хўват мӑнты щира утәԓтәԓән;

²²мўӈева кесарьа налог мӑты рӑхәԓ мўй ӑнта?"

²³Ԓўв пӑ, ԓыв ŏщмарэԓ мŏштәман, ԓывиԓаԓа йастәс: "Мўйа Мӑнэм хўщԓәԓән?

²⁴Мӑнэм динарий ŏх этәԓтаты: хŏй хŏр пӑ нэм щита?" Ԓыв йастәсәт: "Кесарь ŏтәт".

²⁵Иисус ԓывиԓаԓа йастәс: "Кесарь ŏтәт кесарьа мийаԓән, Турәм ŏтәт па Турма мийаԓән".

²⁶Ԓыв мир йэԓпийән Ԓўвеԓ йŏвра йасәӈ урәӈән мŏщатты ӑт верәтсэԓ, пӑ, Ԓўв йŏхԓы йастәм йасәӈԓаԓ эԓты пакнысыман, шитама йисәт.

Саддукейәт нŏх ԓыԓәӈԓәты вера ӑт эвәԓԓәт

²⁷Щиӈәԋща кӑмәтса Саддукей йŏхтәс, нŏх ԓыԓәӈԓәты вер хŏԓт хуләтты ŏтәт эԓты, пӑ Ԓўвеԓ иԋщәссәԓ:

²⁸"Утәԓтәты Ху! Моисей мўӈева тӑмәщ йасәӈ хӑншәс: мӑтты, хŏй ими тӑйәм йайәԓ пӑрәԓ ки, пӑ пӑртаԓән ԋаврем ӑт тӑйәԓ, апщеԓа ԓўв имеԓ ўты мосәԓ пӑ йайәԓ ŏх вŏԓ йэԓԓы туты мосәԓ.

²⁹Ԓапәт йай усәт, оԓәӈ йай, ими тўвман, ԋаврэмԓы пӑрәс;

³⁰щи нэ оԓәӈ апщеԓән ўса, щӑԓта щитэн ԋаврэмԓы пӑрәс;

³¹кимет апщеԓән ўса, и щиты хŏԓ ԓапәт ху, пӑ, ԋаврэм ӑт хӑйман, пӑрсәт;

³²мŏхиԓаԓ йўпийән щи нэ па пӑрәс;

³³йа щӑԓта, нŏх ԓыԓәӈԓәтыйән мӑты ŏтәԓ имийа ԓўв питәԓ, ԓапәт йай хŏԓ ԓўвеԓ нэӈа ўйԓысэԓ?"

³⁴Иисус ԓывиԓаԓа йŏхԓы йастәс: "Тӑм йис хŏйатәт ими туԓәт па ху сайа мӑнԓәт;

³⁵Щитәт пӑ, хŏй йиты турәмән уԓты щира пайәтса пӑ пӑрәм эԓты нŏх ԓыԓӈатԓа, нэ туты ӑт питԓәт, ху сайа мӑнты ӑт питԓәт,

³⁶пӑрты пӑ ӑт верәтԓәт, ԓыв ангеләт хŏрпийа йиԓәт пӑ ԓыв Турәм ԋаврэмәт, Турәмән ԓыв нŏх ԓыԓӈатсайәт.

³⁷Щи пӑрәм ŏтәт нŏх ԓыԓәӈԓәты вер, Моисейән хŏԓна пеԓантыты варәс пŏхәлән тыйиԓыйәм пищ пŏрайән этәԓтәса, хун Турәм Куща Авраам Турма, Исаак Турма пӑ Иаков Турма нэмәтса.

³⁸Турәм хŏты ӑнта пӑрәм ŏтәт Турәм, ԓыԓәӈ ŏтәт Турәм, Ԓўвеԓән хŏԓыйэ ԓыԓӈәт".

Христос нэпекәӈ мŏхет иԋщәсәԓ

³⁹Щи йастәм ŏтәԓ пеԓа тухәԓ Закона утәԓтәты икет йастәсәт: "Утәԓтәты Ху! Нӑӈ йӑма йастәсән".

⁴⁰Па мŏԓты оԓәӈ эԓты Ԓўвеԓ иԋщәсты ԓыв ӑт пӑ верәтсәт.

⁴¹Ԓўв пӑ ԓывиԓаԓ эԓты иԋщәсәс: "Хŏты йастәԓәт, Христос щит Давид Пŏх?

⁴²Давид пӑ Псалмәт20:42 Псалмәт - Библияйән уԓты Йэмәӈ араӈ нэпек; нэмпи нэпекән пŏтәртәԓ: "Турәм Куща ма Турәм Кущайэма йастәс: Ма пўӈԓэма йӑм пеләк сӑхат опса,

⁴³щи унты, хун Ма Нӑӈена нўр верты ŏтԓан кўрԓан иԓпийа иԓ ат пŏнԓәԓам".

⁴⁴Йӑ ин, Давид Ԓўвеԓ Турәм Кущайа айәԓԓәԓы; Хŏты сӑхат Христос ԓўвеԓа Пŏха уԓты верәтәԓ?"

⁴⁵Щи пŏрайән, хун мир аратәԓән Ԓўвеԓ хуԓәтмаԓән, Ԓўв утәԓтәты йохԓаԓа йастәс:

⁴⁶"Закона утәԓтәты йох эԓты хурыйаты, ԓыв хўв сŏхән йӑхты сӑмәӈәт пӑ хŏйатәт ӑктәщиты тӑхайәтән ԓывиԓаԓ мосәԓ иса ўщайән верты, щит пеԓа ԓыв сӑмәӈәт, Турәм йасӈа утәԓтәты хотәтән пӑ поры пӑсан сурыйән ԓыв мет ԓӑтәӈ тӑхайән омәсты сӑмәӈәт,

⁴⁷Ԓыв икиԓы хӑщәм имет хот тэԓ вŏԋщала пайәтԓәт пӑ хŏйата вантәԓтәман хўв пойәкщәԓәт; ԓыв мет тарәм сўт ватԓәт!"

Христос икиԓы хӑщәм ими ŏх картэӈән щирән утәԓтәԓ

¹Иисус, ӑӈкәрмәмаԓән, тащәӈ хŏйатәт мойԓәпсайәт тащ ӑкәтты ԓараща пŏнты вер шийаԓәс;

²хŏԓна Ԓўв и нўша, икиԓы хӑщәм, ими шийаԓәс, щи ими тŏхи кӑт ԉэпта нэмпи мет ай ŏх картэӈән пŏнәс.

³Иисус йастәс: "Йӑна нынана пŏтәртԓәм, тӑм нўша ими па хŏйатәт эԓты аршәк пŏнәс.

⁴Ԓыв хŏԓ мŏԓтасԓаԓ эԓты Турма мойԓәпса пŏтсәт, ԓўв па нўшайәԓ эԓты, мўй арат тӑйәс, хŏԓ пŏтсәԓы".

Утәԓтәты йох кӑт пўш иԋщәсты вер

⁵Щӑԓта, хун тухԓәт Турәм Хот хŏрамәӈ тынәӈ кев пŏталэтән пӑ мойԓәпсайәтән хŏрамтәм эԓты пŏтәртсәт, Ԓўв йастәс:

⁶"Хӑтԓәт йŏхәтԓәт, хун, мўй ин тӑта ватԓәты, и кев шўк ӑт хӑщәԓ; иса хŏԓ шўкатԓайәт".

⁷Ԓўвеԓ пӑ ищмәсэԓ: "Утәԓтәты Ху! Хун пӑ щит питәԓ? Пӑ мўй сыр пос хўват мŏштәԓэв, хун щит питты верәԓ уԓ?"

Христос йŏхәтты посәт

⁸Ԓўв йастәс: "Хурийаты, аԓт ԓэпәԓԓайты; ар ŏтәт Ма нэмемән йŏхәтԓәт, йастыман: "Щит Ма", пӑ "Щи пŏра ванән": ԓыв йўпиԓаԓән аԓ мӑнаты.

⁹Хун ԉаԉәт пӑ ўшмащты верәт эԓты хуԓԓәты, пӑԉщәма аԓ ўйаԓән, тӑм вера оԓәӈән уԓты мосәԓ, туп ӑнта щи пўԉаӈ хŏԓаԓа".

¹⁰Щи пŏрайән ԓывиԓаԓа йастәс: "И сыр мир па сыр мир пеԓа ԉаԉәсты питщәԓ, и хон пеләк кимет хон пеләк пеԓа ԉаԉәсты питщәԓ;

¹¹ар тӑхайән мўв такан тӑрийты щирәт питԓәт, ԓэԓԓы пŏрайәт, пӑ атәм мушәт питԓәт, пӑ пӑԓщәмәт, пӑ турәм эԓты вŏԓаӈ посәт питԓәт.

¹²Щитәт йэԓпийән, нын иԓ катәԓтты питԓайты пӑ ԋўхәтԓыты питԓайты, Турәм йасӈа утәԓтәты хотәта, касна хотәта мӑты питԓайты, хонәта пӑ рим йохәтән пŏнәм кущайәта Ма нэмем урәӈән туты питԓайты;

¹³щит нынана Ма эԓтэм вещкат йасәӈ туты вер питәԓ.

¹⁴Щиӈәԋща, сӑмԓәна пŏнаԓән: оԓӈа ӑт мосәԓ нумәсты, мўй щирән йŏхԓы йастәты,

¹⁵Ма нынана щимәщ йасӈәт пӑ ŏш мӑԓәм, нын йэщаԓтән эԓԓәты ŏтԓән йŏхԓы йастәты пӑ йэщаԓт ԓойты ӑт верәтԓәт.

¹⁶Нын хŏԓна ащиԓәнән-аԋԏиԓәнән , йайԓәнән-апщиԓәнән, пӑ па рутԓәнән, пиԓйохԓәнән эԓпа аԉԓайты, пӑ нын эԓтан тухәԓԓән пӑратԓайәт;

¹⁷пӑ Ма нэмем урәӈән хŏйатәтән хŏԓ нын ԉикән этты питԓайты,

¹⁸туп и ŏхсŏхийэ хŏԓна ŏхԓән эԓты ӑт ушәԓ, -

¹⁹верәтты щирԓәнән нын ԓыԓԓән этәԓтаԓән.

Иерусалим шўкатты вер

²⁰Хун пӑ Иерусалим вош ԉаԉ йохәтән лӑп кертәм шийаԓәԓты, щи пŏрайән уйтаты, ԓўв таԓа йиты пŏрайәԓ вана йŏхтәс:

²¹щи пŏрайән Иудея мўвән уԓты хŏйатәт кев ԓоӈԓа ат хухәԓԓәт; хŏй вошән уԓ, ким ат этәԓ, хŏй вош ԉэпән уԓ, ԓыпийа ӑт ат ԓŏӈәԓ,

²²щит йŏхԓы сŏхәптәты хӑтԓәт, хӑншәм ŏтәт хŏԓ йӑнәмԓәт.

²³Щи имета шук питәԓ, хŏй щи хӑтԓәтән ԋаврэм щирән уԓ пӑ ԋаврэм эсәмән ԓапәтәԓ; вŏԓаӈ шук мўва йŏхәтәԓ, пӑ ун ԉик тӑм мира нумәԓта питәԓ:

²⁴щӑԓта аԓты кеши йэтәԓ эԓты рыйты питԓәт, мўв ԓŏватән уԓты мирәта ԋӑрэмәман туԓайәт; Иерусалим вош пӑ Турәм ӑт уйәтты па рут мирәтән пурәтты питԓа, пŏрайэԓ хŏԓаты унты.

Кимет Йŏхтәпса

²⁵Хӑтәԓ, тыԓәщ пӑ хусәт хŏща Турәм посәт этԓыты питԓәт, мўв хŏща пӑ ар сыр мир туп ӑԓ пакнысыԓәт щарәс сыйащты эԓты пӑ овитаԓ-хўплытаԓ эԓты;

²⁶пӑԓщәм эԓты пӑ уԓты–омәсты мўва йиты шукәӈ верәт эԓты хŏйатәт рэԋԓы керыԓәт, турәм хусәт, тыԓщәт ԋŏхԓәԓәт.

²⁷Щӑԓта щи пŏрайән ԓыв Хŏйат Пŏх шийаԓәԓәт, пӑԓәӈән йурәԓ пиԓән пӑ вŏԓаӈ хутԓәты–вŏрԓәты щирәԓән йŏхәтәԓ.

²⁸Хун пӑ щи верәт йӑнәмты питԓәт, щи пŏрайән нŏх ԓойаты пӑ ŏхԓән нŏх аԓмаԓән, нын хŏԓт пайтәсты верән вана йŏхтәс".

Смоква йўх эԓты утәԓтәты пŏтәр

²⁹Щӑԓта Иисус ԓывиԓаԓа утәԓтәты пŏтәр пŏтәртәс: "Смоква йўх пеԓа пӑ па йўхәт пеԓа ӑӈкәрматы:

³⁰хун ԓыв шўвԓаԓ пел пўншащтэԓ пŏрайән, щит пеԓа ватман, нын уйәтԓәԓән, йэшавуԓ ԓўӈ пŏра йŏхәтәԓ.

³¹И щиты нын па, хун щи питты верәт шийаԓәԓты, уйтаты, Турәм Хон Уԓәпса ванән уԓ.

³²Йӑна нынана пŏтәртԓәм: ин тӑм хŏйат рут хŏԓна ӑт хŏԓаԓ, тӑм иса уԓты питтаԓән;

³³турәм пӑ мўв хŏԓт пеԓа хŏԓаԓәт, Ма йасәӈԓам йурԓаԓ ӑт хŏԓаԓәт.

³⁴Нынәԓән нын вантаԓән, сӑмԓән, охла-щохла ԓэвман-йищман пӑ тӑйтаӈ уԓәпса эԓты нумәсман, ӑт аԓ ԓавәртамәсайәт пӑ щи хӑтәԓән шӑӈкап ӑт аԓ йŏхәтԓайты,

³⁵щи хӑтәԓ, мўвән уԓты кашәӈ ŏта, хоԓәп иты, лӑп лопкәԓ.

³⁶Щиӈәԋща кашәӈ сыс эԓәпән уԓаты пӑ пойәкщаты, ԓуԓән нын щи питты верәт эԓты шаващты пӑ Хŏйат Пŏх йэщаԓт ԓойты ат верәтсәты".

³⁷Хӑтԓәԓән Ԓўв Турәм Хотән хŏйатәт утәԓтәс, атәтән па, вош ким пелка этман, Элеон нэмпи кев пай ԓоӈәԓән ус.

³⁸Хŏйатәт хŏԓ аԓәӈсӑхат эԓты Ԓўв хŏщайәԓ Турәм Хота йŏхтыԓысәт, Ԓўвеԓ хуԓәтты.

Иуда Иисус эԓпа аԉты кашащәԓ

¹Пасхайа айәԓты, тўтәӈ ԋаԋ22:1 Ӑт ԓыйәԓтәм ԓат эԓты верәм ԋаԋ. Ԋар ԓанта ԓат ԓыйәԓты ŏт (дрожи, сода) ӑт эсԓыԓа. Щӑԓта рўвтәм ԓат лавмәӈ рата пŏнԓа пӑ каврәм рат хишән, лавәмән лӑп хӑтәԓтәԓа пӑ щита йэтшәптыйәԓ. йэмәӈ хӑтәԓ ванамәты питәс,

²щиӈәԋща, Турма йир верты хŏйатәт ŏх икет пӑ Закона утәԓтәты икет ар сыр пищ кӑшсәт, хŏты Иисус пӑратты ԓуԓән, ԓыв мир эԓты пӑԓсәт, щишән.

³Сатана Иуда ԓыпийа ԓŏӈәс. Ԓўв Искариота нэмәтман уса, Кӑтхŏщйаӈ эԓты ит,

⁴Ԓўв щи мӑнәс, пӑ Турма йир верты хŏйатәт ŏх икет пиԓән па Турәм Хот шавиты кущайәт пиԓән пŏтәртәс, хŏты Иисус ԓыв йошԓаԓа мӑты.

⁵Ԓыв нŏх амәтсәт пӑ ŏх ԓўвеԓа сŏхәптәты кашащсәт;

⁶щӑԓта Иуда аԉты йастантәс пӑ кум кӑшты питәс, хун, хŏйатԓы уԓман, Иисус ԓыв йошԓаԓа мӑты питԓәԓы.

Пӑты хот йӑт ԓэщатты вер

⁷Тўтәӈ ԋаԋ22:7 Тўтәӈ ԋаԋ йэмәӈ хӑтәԓ – щит Пасха йэмәӈ хӑтԓәт эԓты оԓәӈ хӑтәԓ. йэмәӈ хӑтәԓ йŏхтәс. Щи хӑтәԓән Пасха ош пŏшәх мосәс хŏрты,

⁸Иисус Петра па Иоанн китсәԓы, йастәман: "Мӑнатән пӑ Пасха ԓэтŏты пӑсан ԓэщататән, мўӈев ԓэты урәӈән".22:8 Пасха - йэврейәт йэмәӈ хӑтәԓ. Египет мŏхет оԓәӈ ԋаврэмԓаԓ пӑратәмән, йэврей ԋаврэмәт пӑ сŏрәм эԓты ош ўр ŏнтасән нŏх пайәтсайәт. Щи ат нумман, кашәӈ тӑԓ щит постәԓа. Исход 12. Тӑта Пасха йэтән ԓэвәпса эԓты хӑшман уԓԓа. Пасха ԓапәт йэмәӈ хӑтәԓ кўтән оԓәӈ хӑтәԓ.

⁹Ԓын пӑ Ԓўвеԓа йŏхԓы йастәсӈән: "Хŏта минэмәна ԓэщатты партԓән?"

¹⁰Ԓўв пӑ ԓынана йастәс: "Щи, нын воша йŏхәттан пŏрайән, нын хŏщайән йиӈки пўт аԓты хŏйат уйтатәԓ; ԓўв йўпеԓән щи хота мӑнатән, хŏԓта ԓўв ԓŏӈәԓ,

¹¹щӑԓта хотәӈ кущайа йастәԓтән: "Утәԓтәты Ху нӑӈен иԋщәсәԓ: мойәӈ хŏйат урәӈән уԓты хот йӑтэн хŏта уԓ, хŏта Ма утәԓтәты йохԓам пиԓән Пасха ԓэты ԓуԓән верәтсәм?"

¹²Щӑԓта ԓўв нынан ԓӑрпа ԓэрәмтәм нўм хот йӑт аԉәԓ; щита ԓэщататән".

¹³Ԓын мӑтсәӈән, щӑԓта хŏты Ԓўв йастәс, щиты уйәтсәԓән, пӑ Пасха лэтŏт ԓэщатсәтән.

Пасха йэмәӈ хӑтәԓ верты щир

¹⁴Щӑԓта, хун пŏра йŏхтәс, Ԓўв пӑ кӑтхŏщйаӈ апостоләт Ԓўв пиԓәԓән пӑсан сурыйа омәссәт,

¹⁵щӑԓта Ԓўв ԓывиԓаԓа йастәс: "Ма, шука питтэм йэԓпийән, тӑм Пасха нын пиԓанән йӑха ԓэты шек ԓӑӈхасайәм,

¹⁶нынана пŏтәртԓәм, па йэԓԓы ԓўвеԓ ԓэты ӑт питԓэм, щи унты, хун ԓўв Турәм Хон Уԓәпсайән ӑт пўншатәԓ".

¹⁷Ан ўйман, Турма пумащипа йасӈәт ԋухәмман, йастәс: "Тӑм ан ўйаԓән пӑ нын кўтәнән ортаԓән,

¹⁸нынана пŏтәрԓәм, тӑм ўш эԓты, Турәм Хон Уԓәпса йŏхәтты унты, ўна йищты ӑт питԓәм".

Турәм куща Йэтән ԓэвәпса парты вер

¹⁹Щӑԓта Ԓўв, ԋаԋ ўйман пӑ Турма пумащипа йасӈәт ԋухәмман, ԋаԋ ара морәтман, утәԓтәты йохԓаԓа мӑсԓы, щиты йастәман: "Тӑм Ма Эԓэм, нын урӈәна пӑратты мӑԓа; тӑмиты, Мӑнэм нумәԓмәты урәӈән, вераты".

²⁰И щиты анәԓ йэтән ԓэтәт йўпийән ўсԓы, йастәман: "Тӑм ан - йӑԓәп йастантәм щир Ма кӑԓэмән, нын урӈәнән шошәмԓа.

Христос йэԓԓы питты вер аԉәԓ

²¹Щи хŏйат, хŏй Мӑнэм ӑԉԓәԓы, йошәԓ Ма йошэм пиԓән и пӑсанән ŏԓәԓ;

²²Хŏйат Пŏх пиԓән иса щиты питәԓ, хŏты номәс верман уԓԓа, туп щи хŏйата шук, хŏйән Ԓўв аԉԓа".

²³Щӑԓта ԓыв кўтԓаԓән иԋщәсты питсәт, хŏй ԓыв эԓтэԓ ԓуԓән щиты верты веритәс.

Утәԓтәты йох ўра вортԓәт, ԓыв эԓтыԓаԓ хŏй ԓӑтәӈшәк

²⁴Ԓыв кўтэԓән ўрайа хŏйсәт, хŏй ԓыв эԓтэԓ мет ԓӑтәӈа ԓўӈтәсты верәԓ уԓ.

²⁵Иисус пӑ ԓывиԓаԓа йастәс: "Хонәт мирәт нўмпийән кущайа уԓԓәт, мир кущайәт йӑм мӑты ŏтәта айәԓԓайәт,

²⁶нын пӑ па щирән уԓаты: хŏй нын эԓтайән уншәк, щит айашәк aт уԓ, пӑ хŏй кущайа уԓ – щит митху иты ат уԓ.

²⁷Хŏй уншәк: хŏй пӑсан сурыйән омәсәԓ, мўй пӑ хŏй пӑсан ԓэщатәԓ? Ӑнта мўй пӑсан сурыйән омәсты ŏт? Ма пӑ нын кўтәнән пӑсан ԓэщаттыйа уԓԓәм.

²⁸Туп нын Ма пиԓэмән Мӑнэм артаԓәты верәт хŏща усты.

²⁹Щишән Ма нынана Хон Уԓәпса мӑԓэм, хŏты Ащем Мӑнэма мӑсԓы,

³⁰нын Ма пӑсанэм сурыйән Ма Хон Уԓәпсайэм хŏща па ат ԓэсты па ат йищсәты, хон омәсты тӑхайәтән омәсты пӑ Израиль кӑтхŏщйаӈ рут сўтәтты питԓәты".

Иисус Петра йŏхԓы ԓэԓәпты вер аԉәԓ

³¹Турәм Куща йастәс: "Симон, Симон! Сатана партәс, мӑтты ки нын ԋаԋ ԓат сэм иты ат пӑркатсайты,

³²туп Ма нӑӈ урӈенән пойәкщәсәм, ԓуԓән нӑӈ эвәԓты верэн ӑт aт уштәсэн; щӑԓта хун нӑӈ Ма пеԓайэм керԓәԓән, йайԓан эвәԓты вер такамты".

³³Петра Ԓўвеԓа йŏхԓы йастәс: "Турәм Куща! Нӑӈ пиԓэнән ма кўш касна хота, кўш сŏрма питты тӑхайа мӑнты верәтԓәм!"

³⁴Туп Ԓўв йастәс: "Нӑӈена, Петра, пŏтәртԓәм, тӑм ат щищкурэк ўваԓтаԓ унты хŏԓна, нӑӈ Мӑнэм уйәтты верэн хуԓәм пўш лӑп ўратԓэн".

Христос утәԓтәты йохԓаԓа йӑԓәп партәпса мӑԓ

³⁵Щӑԓта ԓывиԓаԓа йастәс: "Хун Ма нынан тўтхотԓы, хирԓы, кўр ԓумтәм такԓы китыԓысԓам, нын мўй нўшайа питыԓысты?" Ԓыв йŏхԓы йастәсәт: "Нэмәԓты хŏща".

³⁶Щи йўпийән Иисус ԓывиԓаԓа йастәс: "Ин па, хŏй тўтхот тӑйәԓ ки, пӑтән ўйи, хир ищиты; хŏй ӑт тӑйәԓ ки, ԓумтәмен тыныйи пӑ аԓты кеши ԓута;

³⁷нынана пŏтәртԓәм: пӑ тӑм хӑншәм ŏт Ма хŏщайэм йэтшәптәты мосәԓ: "Хŏрахщэт пеԓа Ԓўв ԓўӈәтман ус"; Ма йушем щи йэтшәԓ".

³⁸Утәԓтәты йохԓаԓ йастәсәт: "Турәм Куща! Тӑм, тӑта кӑт аԓты кеши". Ԓўв утәԓтәты йохԓаԓа йастәс: "Мета".

Христос Гефсимания тӑйхайән пойәкщәԓ

³⁹Вŏш эԓты ким этмаԓ кемән, Ԓўв, уԓԓытаԓ иты, Элеон нэмпи кев пай ԓоӈԓа хухты мӑнәс; утәԓтәты йохԓаԓ Ԓўв йўпеԓән мӑтсәт.

⁴⁰Тŏхи йŏхәтмеԓ кемән, Иисус ԓывиԓаԓа йастәс: "Пойәкщаты, атәм хўщәпсайа ԓуԓән ӑт aт питсәты".

⁴¹Щӑԓта Ԓўв ԓыв эԓтыԓаԓ йэԓшәк, кев шук йўвәтты хўват кема, мӑнәс пӑ шанша ԓойман, пойәкщәс,

⁴²пŏтәртман: "Турәм Ащи! Нӑӈ щи анэн Ма эԓтэм пўӈәԓта туты ԓӑӈхасән ки! Туп ӑнта Ма ԓӑӈхаты верэм щирән, Нӑӈ ԓӑӈхаты верэн щирән ат питәԓ".

⁴³Щиӈәԋща Ангел турәм эԓты Ԓўв хŏщайәԓа сэма этәс пӑ Ԓўвеԓ такмәԓтсәԓы.

⁴⁴Нŏпсәԓ ԓыпийән шукащман уԓман, таканшәк пойәкщәс, пӑ Ԓўв мўва посыты шӑкйиӈкәԓ ўр сэм хŏрпи ус.

⁴⁵Пойәкщәты йэтшәмаԓ кемән, Ԓўв нŏх ԓойәс пӑ утәԓтәты йохԓаԓ хŏща йŏхтәс. Пӑ ԓывиԓаԓ шук эԓты иԓ вŏйәмтәма уйәтсәԓы,

⁴⁶пӑ ԓывиԓаԓа йастәс: "Мўйа нын ŏԓԓәты? Нŏх киԓаты пӑ пойәкщаты, ԓуԓән атәм хўщәпсайа ӑт aт питсәты!"

Иуда Христос эԓпа аԉәԓ

⁴⁷Хун Ԓўв хŏԓна щит пŏтәртәс, ар хŏйат йэщаԓт этәс, мир йэԓпийән кӑтхŏщйаӈ утәԓтәты ху кўт эԓты уԓты Иуда нэмпи ху, шушәс. Ԓўв Иисус хŏща вана йŏхтәс, Ԓўвеԓ мосәԓтәты урәӈән. Иуда ԓывиԓаԓа щимәщ пос аԉәс: "Хŏй ма мосәԓтәԓэм, Щит щи уԓ".

⁴⁸Иисус пӑ ԓўвеԓа йастәс: "Иуда, мосәԓтәман мўй, Хŏйат Пŏх эԓпа аԉԓән?"

⁴⁹Иисус пиԓән уԓәм ŏтәт, йэԓԓы тыйты вер мŏштәман, Ԓўвеԓа йастәсәт: "Турәм Куща, аԓты кешийән кўтәртԓув?"

⁵⁰Щӑԓта ԓыв эԓтайэԓ ит Турма йир верты хŏйатәт ŏх ики митху аԓты кешийән рэскәсԓы пӑ ԓўв йӑм пеләк пӑԓәԓ хŏԓт тўвемәсԓы.

⁵¹Щи пўԉаӈ Иисус йастәс: "Хӑйаԓән, мета". Пӑ митху пӑԓа хӑнәмтыман, ԓўвеԓ йӑмәԓтэмәсԓы.

⁵²Иисус Ԓўвеԓ ԋӑрэмәты ӑктәщәм Турма йир верты хŏйатәт ŏх икета пӑ Турәм Хот шавиты кущайәта пӑ уна уԓты икета, йастәс: "Ищи мӑтты нын хорахщи йэщаԓт аԓты кешэӈ пӑ йущәӈ йўхи тэԓән этсәты, Мӑнэм ўты урәӈән.

⁵³Кашәӈ хӑтәԓ Ма нын пиԓәнән Турәм Хотән уԓԓысәм, нын Ма пеԓайэм йош нŏх ӑт аԓмиԓысты, ин пӑ нын пŏрайән пӑ хиԋ йура уԓ".

Петра Христос эԓты йŏвра керԓәԓ

⁵⁴Щи кемән ԓыв Иисус кӑтԓәпсэԓ пӑ Турма йир верты хŏйатәт ŏх ху хота тусэԓ. Петра пӑ йэԓташәк шушәс.

⁵⁵Хун ԓыв ов йэԓпи хӑр кўтәпән рат версәт пӑ йӑха омәссәт, Петра па ԓыв кўтэԓа опсәс.

⁵⁶И митнэ, ԓўвеԓ тўт пўӈәԓән омәстаԓ шийаԓәс пӑ тŏрԓы ԓўв пеԓайәԓ ватман, йастәс: "Тӑми па Ԓўв пиԓәԓән ус!"

⁵⁷Туп Петра Ԓўв эԓтэԓ пўӈԓа уратәс, митнэӈа щиты йастәман: "Ма Ԓўвеԓ ӑт уйәтԓэм".

⁵⁸Йухәт йэшавәԓ кимет хŏйат, ԓўвеԓ шийаԓәмаԓ кемән, па йастәс: "Нӑӈ па ԓыв эԓтэԓ". Петра щи хŏйата йастәс: "Ӑнта!"

⁵⁹Щос кем сыс мӑнмаԓ йўпийән, хŏԓна па ху па хӑрщийа пŏтәртәс: "Йӑна щи, тӑмен ищи Ԓўв пиԓәԓән ус, ԓўв Галилея мўв эԓты".

⁶⁰Петра па щи хŏйата йастәс: "Ӑт уйәтԓэм, мўй эԓты нӑӈ пŏтәртԓән!" Щи кумат, хун ԓўв хŏԓна пŏтәртәс, щищкурэк щи ўваԓтәс.

⁶¹Щи пŏрайән Турәм Куща, йŏхԓы карэмәман, Петра пеԓа ӑӈкәрмәс. Петра щиӈәԋща Турәм Куща йасӈәт нумәԓмәсԓы, хŏты Ԓўв ԓўвеԓа йастәс: "Щищкурэк ўваԓтты йэԓпийән, нӑӈ Мӑнэм уйәтты верен хуԓәм пўш лӑп ўратысэн".

⁶²Щӑԓта, ким этмаԓ кемән, шук щирән хŏԓԓаԓтәс.

Христос сэкԓа

⁶³Иисус, Ԓўвеԓ кӑтәԓты хŏйатәтән, кӑмән щирән Ԓўв нухсәса пӑ сэкса;

⁶⁴щӑԓта, ԓыв Ԓўв сэмӈиԓаԓ лӑп йӑрыԓысԓаԓ, вешәԓ эԓты Ԓўвеԓ рэскиԓысэԓ пӑ иԋщәсысэԓ: "Нӑӈ Турәм йасәӈ туты хŏйат, йаста, хŏйән рэскәсайән?"

⁶⁵Па ар сыр атәм йасәӈ Ԓўв пеԓайәԓ йастәсәт.

Христос Синедрион йэԓпийән

⁶⁶Туп аԓәӈ сӑхата йис, уна уԓты икет, Турма йир верты хŏйатәт ŏх икет пӑ Закона утәԓтәты йох йӑха ӑктәщсәт, пӑ ԓыв синедрионэԓа22:66 Синедрион - Иудейәт мет вŏԓаӈ сўт верты щир пӑ сўт верты тӑха. Ԓўвеԓ ԓŏӈәԓтсэԓ

⁶⁷пӑ йастәсәт: "Нӑӈ мўй Христос22:67 Турәмән аԉәм мир нŏх пайәтты Хон (Мессия)? Мўӈева йасты". Иисус ԓывиԓаԓа йастәс: "Нынана йастәԓэм ки, нын ӑт эвәԓԓәты;

⁶⁸нынан ищмәԓәм кепа, Мӑнэма йŏхԓы ӑт йастәԓты пӑ Мӑнэм хŏԓт ӑт эсәԓԓәԓән.

⁶⁹Тӑԓта йэԓԓы Хŏйат Пŏх иса йурәӈ Турәм йӑм пеләк сӑхат омәсәԓ".

⁷⁰Щӑԓта хŏԓ йастәсәт: "Щишән Нӑӈ Турәм Пŏх?" Ԓўв йŏхԓы ԓывиԓаԓа йастәс: "Нын пŏтәрԓәты, Ма уԓԓәм".

⁷¹Ԓыв пӑ йастәсәт: "Мўй сыр аԉәпса мўӈева хŏԓна мосәԓ? Мўӈ Ԓўв ўӈԓәԓ эԓты щи щит хуԓсув".

Христос Пилат йэщаԓт

¹Щи арат хŏйат хŏԓыйэ нŏх ԓойсәт пӑ Ԓўвеԓ Пилат хŏща тусэԓ,

²щӑԓта Ԓўвеԓ нўрмәԓтты питсэԓ, пŏтәртԓәт: "Мўӈ мŏштәсэв, тӑм Ху мирэв йŏвра хўщԓәԓы пӑ, кесарьа налог мӑты ӑт эсәԓԓәԓы, Ԓўвеԓ Христос Хона айәԓԓәԓы!"

³Пилатән Ԓўв иԋщәсса: "Нӑӈ Иудейәт Хон?" Иисус ԓўвеԓа йŏхԓы йастәс: "Нӑӈ щиты йастәԓән".

⁴Пилат Турма йир верты хŏйатәт ŏх икета пӑ мир пеԓа йастәс: "Ма нэмәԓты нўр тӑм хŏйат хŏща ӑт уйәтԓәм".

⁵Туп ԓыв ўрайԓаԓ нŏх пайәтԓыԓаԓ, пŏтәртман, мӑтты ки Ԓўв Иудея ԓŏватән, Галилея эԓты ўйман тӑм вош унты, мир утәԓтыман, йэшащты хўщԓәԓы.

⁶Пилат Галилея эԓты хуԓмаԓ кемән, ищмәс: "Ԓўв мўй Галилея мўв ху?"

⁷Щӑԓта, Ԓўв Ирод хон мўв эԓты уԓтаԓ ŏша пайәтмаԓ кемән, Ԓўвеԓ Ирод хŏща китсәԓы. Ирод щи хӑтԓәтән ищи Иерусалим вошән ус.

Ирод Христос такан иԋщәсәԓ

⁸Ирод Иисус шийаԓәмаԓ кемән, нŏх амтәс, ԓўв Иисус хўвән ватты ԓӑӈхаса, Ԓўв эԓтайәԓ ар хуԓԓыйәс, щишән. Щӑԓта пӑ мӑтты пищ Ԓўв эԓтэԓ шийаԓәты нумәсыйәс,

⁹пӑ Ԓўвеԓ арсыр вер эԓты иԋщәссәԓы, туп Иисус ԓўвеԓа нэмәԓты ӑт йастәс.

¹⁰Турма йир верты хŏйатәт ŏх икет пӑ щӑԓта Закона утәԓтәты йох ванән ԓойсәт пӑ Ԓўвеԓ шек нўрисэԓ.

¹¹Ирод соԓтанԓаԓ пиԓән Ԓўвеԓ иԓ ԋэрмаԓ пӑ ԋӑха ԋӑхмаԓ йўпийән, хон сŏха Ԓўвеԓ ԓумәттәсԓы пӑ йŏхԓы Пилат хŏща китсәԓы.

¹²Щӑԓта, Ирод пӑ Пилат йэԓпи ԓын кўтәнән кўтәӈа усӈән, щи хӑтәԓән пӑ ԓухса верәссәӈән.

Пилат Христос йӑԓпа такан иԋщәсԓәԓы

¹³Пилат пӑ, Турма йир верты хŏйатәт ŏх икет, кущайәт пӑ мир ӑкәтмаԓ,

¹⁴ԓывиԓаԓа йастәс: "Нын ма хŏщайэма тӑм хŏйат, мир йŏвра хўщты ŏт йўкана, тусԓән; тӑта щи, ма нын уԓман ԓэрапсэм пӑ тӑм хŏйат, нын Ԓўвеԓ нўрмәԓтан щирән, нэмәԓты хŏща нўрәӈа уԓтаԓ ӑт уйәтсэм.

¹⁵Ирод ики ищи, ма Иисус ԓўв хŏщайәԓ китыԓысэм; сŏрәм кеша, нэмәԓты верәм вер Ԓўв хŏщайәԓ ӑт уйәтса;

¹⁶щишән, хомщийән сэкты йўпийән, ма Ԓўвеԓ эсәԓԓэм".

¹⁷Пилата, йэмәӈ хӑтәԓ урәӈән, ԓывиԓаԓа касна хот эԓты и хŏйат эсәԓты мосәс.

¹⁸Туп ԓыв аратэԓән хŏԓыйэ и тўрән ўвты питсәт: "Щитэн ўйи, мўӈева Варавва эсԓы!"

¹⁹Варавва, хŏйатәт пиԓән вошәӈ мир пеԓа йэшащман уԓмаԓ урәӈән пӑ веԓтатмаԓ урәӈән, касна хота омәсман уса.

²⁰Туп Пилат, Иисус хŏԓт эсәԓты ўтщисԓы, пӑ ипуш па ԓывиԓаԓа такан йастәс.

²¹Ԓыв туп ўвсәт: "Пернайа сэӈки! Пернайа Ԓўвеԓ сэӈки!"

²²Пилат хуԓмет пўш ԓывиԓаԓа йастәс: "Мўйсыр атәм вер Ԓўв верәс? Сŏрәм кеша, ма нэмәԓты атәм вер Ԓўв хŏщайәԓ ӑт уйәтсәм; щишән, хомщийән сэкты йўпийән, Ԓўвеԓ эсәԓԓэм".

²³Туп ԓыв, такан ўвман сурман, партсәт, Иисус пернайа ат сэкса; ԓыв пӑ Турма йир верты хŏйатәт ŏх икет ўв сыйэԓ нŏх питәс.

²⁴Щӑԓта Пилат, хŏты ԓыв ԓӑӈхасәт, щиты кашащәс;

²⁵ԓўв щит ким эсԓәс, хŏй ԓыв вохсәт, щит, хŏй, йэшащәм пӑ веԓтантәм вер урәӈән, касна хотән ус, Иисус пӑ ԓыв ԓӑӈхатэԓ щира мӑсԓы.

Христос пернайа сэкты щир

²⁶Хун Ԓўвеԓ туты питсэԓ, мўв хӑрәԓ эԓты шушәм Симон, Киринея мўвәӈ ики, пӑтән хŏрэмәса; ԓўв порхәԓа перна шуп пŏтса, Иисус йўпийән ат тусԓы.

²⁷Ԓўв йўпеԓән щи арат ар мир шушәс пӑ щи кўтән нэӈәт Ԓўв урӈәԓән такан хоԓԓәсәт пӑ йирӈәԓтысәт.

²⁸Ԓыв пеԓайэԓ керԓәман, Иисус йастәс: "Иерусалим эвет, Ма урӈемән аԓ хŏԓԓаты, нын урӈәнән пӑ нын ԋавремԓән урәӈән хоԓԓаты,

²⁹хӑтԓәт щи йŏхәтԓәт, хун йастәԓа: "Ԋаврэмән ӑт партәм нэӈәт, пӑ ԋаврем хŏԓна ӑт тайәм нэӈәт, пӑ эсәмән ӑт ԓаптыԓыйәм нэӈәт ŏй тӑйԓәт!"

³⁰Щи пŏрайән кев пайәта йастәты питԓа: "Мўӈ эԓтэв ӑркәмтаты!" пӑ сӑхмәта: "Мўӈев эԓт лаӈкаԓән!"

³¹Вŏсты лыптәӈ йўх щиты ки верԓа, сорәм йўх пӑ мўй тӑйәԓ?"

³²Ԓўв пиԓәԓән пӑрты тӑхайа хŏԓна кӑт хорахщи туса.

³³Пӑ хун "Ŏх ԓŏв" нэмпи тӑхайа йŏхәтсәт, щита Ԓўвеԓ пернайа сэксэԓ, хŏрахщэӈән па, итәԓ йӑм пеләк сӑхат, киметәԓ пӑрта пеләк сӑхат.

³⁴Иисус пӑ пŏтәртәс: "Ащи, ԓывиԓаԓ нўра аԓ ўйи, мўй верԓәт, ӑт уйәтԓәт". Пос вŏщкиман, Ԓўв сŏхԓаԓ ортԓысԓаԓ.

³⁵Хŏйатәт ԓойсәт пӑ ватсәт. Ԓыв пиԓԓаԓән кущайәт па хўләщсәт, пŏтәртман: "Па хŏйатәт нŏх пайтыԓыйәс; Ԓўв Христос, Турәм пирыйәм Ŏт ки, Ԓўвеԓ Ԓўв нŏх aт пайәтԓәԓы".

³⁶Ԉаԉ йох ищиты Ԓўв эԓтайәԓ, вана хӑтыԓыман, вŏщрем ўна ўӈԓәԓа тутԓыман, хўләщсәт

³⁷пӑ пŏтәртсәт: "Нӑӈ - Иудейәт Хон ки, Нӑӈен Нӑӈ нŏх пайты!"

³⁸Ԓўв нўмпеԓән грек, рим пӑ еврей йасӈәтән хӑшман уса: "Тӑми - Иудейәт Хон".

³⁹Пернайа сэӈкәм и хорахщи, ԉикащман, Ԓўв пеԓайәԓ пŏтәртәс: "Нӑӈ Христос ки, Нӑӈен нŏх пайты, пӑ мўӈев па!"

⁴⁰Киметәԓ пӑ, ԓўвеԓ нŏх вŏԓәтԓәԓы, йастыйәԓ: "Турәм эԓты мўй нӑӈ ӑт пӑԓԓән, хун нӑӈ па щиты сўтәтман ӑт уԓԓайән?

⁴¹Мин хŏты вещката сутәтсаймән, мин верԓәмән хўват мŏщатсәмән. Ԓўв пӑ нэмәԓты атәм ӑт верәс".

⁴²Щӑԓта Иисуса йастәс: "Мӑнэм нумәԓмийэ, Турәм Куща, хун Нӑӈ Хон Уԓәпсайэна йŏхәтԓән!"

⁴³Иисус ԓўвеԓа йастәс: "Йӑна нӑӈена йастәԓәм, тӑмхӑтәԓ щи Ма пиԓэмән ŏйәӈ-щўԋәӈ тӑхайән23:43 в раю уԓты питԓән".

⁴⁴Хӑтәԓ хутмет щос23:44 еврейәт щирән - щит 12 щос, хӑтәԓ кўтәп кем; ԉэп ус, мўв ԓŏватән йӑрәԏйаӈ щос23:44 еврейәт щирән - щит 15 щос, йэтна пеләк; унты пӑтлама йис:

⁴⁵щиӈәԋща най хурԓәс, пӑ Турәм Хот ԓыпийән йэртэп сŏх кўтԓәпәԓ эԓты кӑтна тŏхнәмтәс.

⁴⁶Иисус, сыйәӈ тўрән ўваԓман, йастәс: "Ащи! Нӑӈ йошӈиԓана Ма ԓыԓэм мӑԓэм". Щиӈәԋща, щит йастәман, ԓыԓәԓ эсәԓсәԓы.

⁴⁷Сот ԉаԉ йох ŏх ху пӑ, щи тыйәм вер пеԓа ватмаԓ эԓты, Турәм ишәксәԓы пӑ йастәс: "Йӑна пӑ тӑм хŏйат тўӈа–щира хŏйат уԓмаԓ".

⁴⁸Щит ватты йŏхтәм мир хŏԓыйэ, тыйәм вер пеԓа ватман, мевәԓаԓ эԓты ԓывиԓаԓ ԓыв сэкман, йŏхԓы мӑтсәт.

⁴⁹Хŏԓыйэ, Иисус уйтәм мŏхет, пӑ Галилея эԓты Ԓўв йўпеԓән йўвәм нэӈәт йэԓәншәк ԓойсәт пӑ щийэԓ ватсәт.

Христос ԓэщатты вер

⁵⁰Ӑктәщиты хŏйатәт23:50 ӑктәщиты хŏйатәт – синедрионән сўт верты мŏхет; кўтән Иосиф нэмпи ики ус. Ԓўв сӑмәӈ пӑ вещкат ус.

⁵¹Ӑктәщиты тӑхайән хŏйатәт пиԓән ӑт кашащәс, ԓыв верэԓ хŏща ӑт ус; Ԓўв Иудеяйән уԓты Аримафея вошәӈ ху, Турәм Хон Уԓәпса ищи ԓавәԓман ус.

⁵²Пилат хŏща йŏхтәс пӑ Иисус мотавтәԓ вохсәԓы;

⁵³щӑԓта перна эԓты ԓўвеԓ иԓ ўйман, щи кеша уԓты пуԓән щӑшканән йŏвәрмәсԓы пӑ кев пай ԓыпийән хот йӑт ԓŏват сэврәм тӑхайа пŏтсәԓы. Щи тӑхайа хŏԓна нэмәԓт хŏйат пŏнман ӑт уса.

⁵⁴Щит шаббат23:54 Еврейәт щутщәты хӑтәԓ хӑтԓа ԓэщатыты пŏра ус, пӑ щи хӑтԓа йиты щи питәс.

⁵⁵Иисус пиԓән Галилея эԓты йŏхтәм нэӈәт па Иосиф йўпийән шушсәт пӑ ӑпа пŏнты кев хот ватсэԓ пӑ хŏты Ԓўв мотавтәԓ пŏнман уса ищи;

ԓэԓтŏт ԓыпийән

⁵⁶воша йŏхәтмеԓән йӑм эпԓәӈ йик пӑ миро вŏй ԓэщатсәт. Шаббат хӑтәԓән Турәм партәпса йасәӈ щирән ԓыв щутщәман усәт.

Иисус нŏх ԓыԓәӈԓәты вер

¹Ԓапәт ŏх хӑтәԓән24:1 Еврейәт щирән щит шаббат йўпи хӑтәԓ, хӑнтэт щирән – щўтщәты хӑтәԓ., шек аԓәӈ, нэӈәт ԓэщатәм йӑм эпԓәӈ йикԓаԓ тўвман, Иисус пŏнәм тӑхайа мӑтсәт; ԓыв пиԓэԓән йӑха тухәԓ мŏхет па мӑтсәт;

²туп ов кев шупәԓ, пўӈԓа хӑтәԓтәма уйәтсэԓ.

³Щӑԓта, ԓыпийа ԓŏӈмеԓән, ԓыв Иисус, Турәм Куща, мотавтәԓ щита ӑт уйәтсэԓ.

⁴Хун ԓыв щит эԓты шоптамәман ԓойтэԓ сӑхат, и мŏԓтыйән, имет йэԓпийән вŏԉиты сŏхәӈ кӑт хуйӈән этсәӈән.

⁵Щӑԓта, хун ԓыв пӑԓтамәсәт пӑ шанша хŏмта керәптысәт, ԓывиԓаԓа йастәсӈән: "Мўйа нын ԓыԓәӈ Ŏт пӑрәм ŏтәт кўтән кӑшԓәԓән?

⁶Ԓўв тӑта ӑнтом: Ԓўв нŏх ԓыԓәӈԓәс; нумәԓмаԓән, хун Ԓўв хŏԓна Галилея мўвән уԓмаԓән, нынана йастыԓыйәс:

⁷"Хŏйат Пŏх кӑрэкәӈ хŏйатәт йоша мӑты вер уԓ, щӑԓта пернайа сэкты вер уԓ, пӑ хуԓмет хӑтәԓән нŏх ԓыԓәӈԓәты верәԓ уԓ".

⁸Щӑԓта Ԓўв йастәм йасәӈԓаԓ ԓыв нумәԓмәсԓаԓ.

⁹Пŏнәм тӑхайэԓ эԓты йŏхԓы йŏхәтмеԓән, ихŏщйаӈ утәԓтәты йохԓаԓа пӑ па хŏйатәта вантәм вер эԓты пŏтәртсәт.

¹⁰Щит Магдалинайа айәԓтты Мария, Иоанна, пӑ Иаков аԋԏи - Мария, пӑ ԓыв пиԓэԓән па имет усәт, хŏйтат апостолԓаԓа щи оԓәӈ эԓты йастәсәт.

¹¹Щӑԓта утәԓтәты йŏхәта ԓыв йасәӈԓаԓ ӑԓ мŏԓтыйа усәт, пӑ ԓыв нэӈәта ӑт эвәԓсәт.

¹²Туп Петра, нŏх ԓойәс пӑ пŏнәм тӑхайа хухәԓмәс. Тŏхи йŏхәтмаԓән, ԓыпийа ӑӈкәрмәс пӑ щита туп пуԓән щӑщканәт ŏԓтаԓ шийаԓәс. Ԓўв нŏпсәԓән пакнысыман, йŏхԓы керԓәс.

Христос Эммаус пеԓа мӑнты йушән этԓыйәс

¹³И щи хӑтәԓән ԓыв эԓтайэԓ кӑт утәԓтәты ху Эммаус курта шушсәӈән. Щи курта Иерусалим вош эԓты кӑт щос кем кўрән шушты хўват ус;

¹⁴пӑ ԓын кўтәнән иса щи верәт эԓты пŏтәртсәӈән.

¹⁵Пӑ хун ԓын кўтәнән пŏтәртсәӈән пӑ ŏшйащсәӈән, пӑ Иисус Ԓўв ԓынан эԓт йŏхәтман, ԓын пиԓәнән йэԓԓы мӑнәс.

¹⁶Туп ԓын сэмӈиԓән катәԓман усайтән, пӑ ԓын Ԓўвеԓ ӑт уйәтсәԓән.

¹⁷Ԓўв пӑ ԓынан ищмәсԓы: "Мўй эԓты нын кўтәнән шушман пŏтәрԓәтән, мўй урәӈән нын рўтаԉӈән?"

¹⁸Итәԓ, Клеопа нэмпи хŏйатәԓ, Ԓўвеԓа йастәс: "Пӑрмŏԓтты Нӑӈ туп утща, Иерусалим воша йŏхтәм хŏйатәт эԓты, ӑт уйәтԓән тӑм хӑтԓәтән щита тыйәм вер эԓты?"

¹⁹Щӑԓта Ԓўв ԓынан ищмәсԓы: "Мўй эԓты?" Ԓын Ԓўвеԓа пŏтәртсәԓән: "Назарет эԓты уԓты Иисус пиԓән мўй ус, Турәм йасәӈ туты хŏйата ус, верән пӑ йасәӈән Турәм хŏща, аратәԓ мир хŏща йурәӈ ус.

²⁰Турма йир верты хŏйатәт ŏх икԓувән пӑ кущайԓувән Ԓўв сŏрма пайәтты мӑсэԓ пӑ пернайа Ԓўвеԓ сэксэԓ.

²¹Мўӈ пӑ нŏмәс пŏныԓысув, Ԓўв Щит, Хŏй Израиль хŏԓт пайәтты верәԓ уԓ; туп щи ар вер тыймаԓ, ин хуԓмет хӑтԓәԓ.

²²Мўӈ нэԓув эԓты тухәԓаԓ па мўӈев пакнәптысэԓ: ԓыв пŏнәм лотәԓән аԓәӈ сӑхат аԓәӈ усәт

²³пӑ Ԓўв мотавтәԓ щита ӑт уйәтсэԓ, йŏхԓы йŏхәтсәт пӑ пŏтәртсәт, мӑтты ԓыв ангелӈән этԓыйәм вер па ватмеԓ пӑ щитӈән пŏтәртан, мӑтты Ԓўв ԓыԓәӈ.

²⁴Щӑԓта мўӈ эԓтэв тухԓәт ищи пŏнәм лотәԓа мӑтсәт пӑ щиты уйәтсэԓ, хŏты нэӈәт йастыԓысәт, туп Ԓўвеԓ ӑт ватсэԓ".

²⁵Щиӈәԋща Иисус ԓынана йастәс: "Нын ŏшԓы пӑ ром сӑмпи ŏтәт, нынана щи ԓавәрт Турәм йасәӈ туты икет аԉәм верәта эвәԓты!

²⁶Христоса мўй ӑнта щиты шук туты мосәс пӑ Ԓўв хутԓәты–вŏрԓәты щирәԓа ԓŏӈты?"

²⁷Щӑԓта, Моисей пӑ хŏԓ Турәм йасәӈ туты икет эԓты питщәман, ԓынана, мўй Ԓўв эԓтэԓ иса Йэмәӈ Нэпекән хӑшман уԓԓа, Ԓўв ԓэра верԓәԓы.

²⁸Щиты ԓыв щи куртэԓа ванамәсәт, хŏԓта шушсәт; щӑԓта Иисус йэԓԓы мӑнты ԓӑӈхаты щир верәс.

²⁹Туп ԓын Ԓўвеԓ иԓ вŏԓәтԓәԓән, пŏтәртман: "Мин пиԓэмән хӑща, хӑтәԓ йэтән пеԓа мӑнты питәс". Щӑԓта Ԓўв хота ԓŏӈәс пӑ ԓын пиԓәнән хӑщәс.

³⁰Пӑ хун Ԓўв ԓын пиԓәнән пӑсан сурыйән омәсмаԓән, ԋаԋ ўйман, Турма пумащипа йасӈәт йастәс, ԋаԋ морәтсәԓы пӑ ԓынана мӑсԓы.

³¹Щи пŏрайән веԉщи ԓын сэмӈиԓән пелки пуншащсәӈән, пӑ ԓын Ԓўвеԓ мŏштәсԓән. Туп Ԓўв ԓынана ӑт ныты питса.

³²Ԓын кўтәнән йастәсӈән: "Мин сӑмԓәмән мўй ӑт щарисӈән, хун Ԓўв йушән минэмәна пŏтәртәс пӑ хун Йэмәӈ Нэпек йасӈәт минэмәна ԓэра верәс?"

Ԓўв Нŏх Ԓыԓԓәӈԓәм верәԓ посәт

³³Ищи мŏхты ԓын нŏх ԓойсәӈән пӑ Иерусалим воша йŏхԓы керԓәсӈән, щита ԓын ихŏщйаӈ йӑха ӑктәщәм апостол уйәтсәԓән пӑ ԓыв пиԓԓаԓән уԓәм мŏхет па.

³⁴Ԓыв пŏтәртсәт, мӑтты Турәм Куща йӑна нŏх ԓыԓәӈԓәс пӑ Симон хŏща этәс.

³⁵Щӑԓта ԓын йушән тыйәм вер эԓты пŏтәртсәӈән, пӑ хŏты ԓын Ԓўвеԓ ԋаԋ морәтмаԓ хўват мŏштәсԓән.

³⁶Хун ԓын щи оԓәӈ эԓты пŏтәртсәт, Иисус Ԓўв ԓыв кўтэԓән этәс пӑ ԓывиԓаԓа йастәс: "Йӑм уԓәпса нынана".

³⁷Ԓыв, ԓыԓэмәман пӑ пӑԓтамәман, нумәссәт, иԓампа сэмсай ŏт ватԓәт.

³⁸Туп Ԓўв ԓывиԓаԓа йастәс: "Мўйа нын щиты ԓыԓэмәсты? Пӑ мўй урәӈән нын сӑмԓәна щимәщ нŏпсәт ԓŏӈԓәт?

³⁹Йошԓам–кўрԓам пеԓа ӑӈкәрматы; тӑм иса Ма. Ма хŏщайэма хӑнәмтыйаты пӑ вантыйаԓән; сэмсай ŏт эԓ–ԋŏхи пӑ ԓŏв ӑт тӑйәԓ, хŏты нын Ма хŏщайэм ваттанән".

⁴⁰Щит йастәман, Ԓўв йошӈәԓаԓ пӑ кўрӈәԓаԓ ԓывиԓаԓа этәԓтәсԓы.

⁴¹Хун ԓыв амәтмеԓ рўвән хŏԓна ӑт эвәԓсәт пӑ ӑԓ пакнысысәт, Ԓўв ԓывиԓаԓ ищмәсԓы: "Мŏԓты ԓэтәт нын тӑта ӑт тӑйԓәты?"

⁴²Ԓыв Ԓўвеԓа сӑӈхәртәм хўԓ шуп пӑ мав мӑсәт.

⁴³Щӑԓта ўсԓы пӑ, ԓыв ватман, ԓэсԓы.

Вŏԓаӈ партәпса

⁴⁴Пӑ ԓывиԓаԓа йастәс: "Тӑм щит, мўй эԓты Ма нынана пŏтәртысәм, хун нын пиԓәнән уԓмемән, иса щит питты верәԓ уԓ, мўй Ма эԓтэм Моисей Закон йасӈәт хŏща, Турәм йасәӈ туты хŏйатәт хŏща пӑ Псалмәт хŏща хӑшман уԓԓа".

⁴⁵Щиӈәԋща Ԓўв, Йэмәӈ Нэпек йасӈәт мŏштәты урәӈән, ԓыв ŏшԓаԓ пел пайәтсәԓы.

⁴⁶Щӑԓта ԓывиԓаԓа йастәс: "Щиты хӑшман уԓԓа, пӑ щиты Христоса шук туты мосәс, пӑ пӑрәм эԓты хуԓмет хӑтәԓән нŏх ԓыԓәӈԓәты мосәс,

⁴⁷Ԓўв нэмәԓән мирәта хŏԓ, Иерусалим вош эԓты питщәман, кӑрэк эԓты шӑшән керԓәты пӑ йŏрэмәты щир сыйәӈа пŏтәртты мосәԓ.

⁴⁸Нын пӑ иса щи верәт вантәм хŏйатәта уԓты питԓәты.

Христос нŏх пайтәсты вер

⁴⁹Щӑԓта Ма Ащем аԉәм ŏт нынана китԓәм; нын пӑ нумәԓта йурән йохәттан унты, Иерусалим вошән хӑщаты.

⁵⁰Иисус утәԓтәты йохԓаԓ вош эԓты ким, Вифания унты тусԓы, щӑлта йошԓаԓ нŏх аԓәмман, ԓывиԓаԓ йӑмән мӑсԓы,

⁵¹пӑ, хун ԓывиԓаԓ йӑмән миймаԓ сыс щи кемән ԓыв эԓтэԓ йэԓ мӑнты пӑ турма нŏх пайтәсты питәс.

⁵²Ԓыв, Ԓўв йэԓпеԓән шашԓаԓ иԓ эсәԓсәԓаԓ пӑ Иерусалима, ун амәтән амәтман, йŏхԓы керԓәсәт.

⁵³Пӑ иса Турәм Хотән уԓԓысәт, Турәм ишәкман пӑ Ԓўвеԓа йӑм йасәӈ йастәман. Амиԋ.