Турәм айкеԓ туты ху Иона нэпек

Турәм айкеԓ туты ху Иона нэпек

Иона Турәм Куща эԓты хŏнтаԓ

¹Иона, Амафий пŏх, пеԓа Турәм Куща йасәӈ ус:

²«Нŏх ԓойа, Ниневияйа, ун воша, мӑна пӑ щита хŏйатәта такан пŏтәрта, ԓыв шек атәм верԓаԓ Ма уйәтты питсәԓам».

³Туп Иона нŏх ԓойәс пӑ Фарсис вош пеԓа Турәм Куща эԓты хӑԋемәты урәӈән, хŏнтас. Иоппия воша йŏхтәс, Фарсис пеԓа мӑнты паршәӈ ун хоп уйтәс, ŏх сŏхәптәс пӑ хопа ԓэԓәс, ԓыв пиԓэԓән Фарсис унты мӑнты, Турәм Куща эԓты шӑшән хŏнтаты урәӈән.

⁴Туп Турәм Куща щарәсән так вот этәԓтәс, вот шек тарма йис, паршәӈ хоп шўкаԓәты кема йис.

⁵Хопәӈ хŏйатәт пӑԓтамәсәт, пӑ кашәӈ хŏйат ԓўв турмәԓ пеԓа пойәкщәс, пӑ пŏрмасԓаԓ йиӈка йовәԓты питсәԓаԓ, хоп йэша кенашәк верты урәӈән; Иона пӑ хоп ԓыпийа, ŏхәԓмаԓ йўпийән, иԓ ŏԓәс пӑ такан вŏйәпса.

⁶Ԓўв хŏщайәԓ хоп куща йŏхтәс пӑ ԓўв пеԓайәԓ йастәс: «Мўй нӑӈ ŏԓԓән? Нŏх ԓойа, турмен пеԓа пойәкща; мосәӈ пӑ ԓўв мўӈ эԓтэв нумәԓмәԓԓы пӑ мўӈ ӑт пӑрԓув».

⁷Хŏйатәт кўтԓаԓән йастәсәт: «Пос йўвәтԓув, ватԓэв, хŏй урәӈән мўӈ тӑмәщ шук туԓув». Пӑ пос йўвәтсәт, ин пос Иона пеԓа аԉәс.

⁸Щиӈәԋща ԓўвеԓа йастәсәт: «Мўӈева йаста, хŏй урәӈән мўӈ тӑмәщ шук туԓув? Мўй вер тӑйԓән пӑ хŏԓща нӑӈ йиԓән? Нӑӈ мўвен хŏта уԓ пӑ мӑты рут эԓты уԓԓән?»

⁹Ԓўв йастәс: «Ма еврей, щарәс пӑ мўв опсәԓтәм Турәм Куща йэԓпийән шаншэм иԓ эсәԓԓэм».

¹⁰Щӑԓта хŏйатәт шек такан пӑԓтамәсәт пӑ ԓўвеԓа йастәсәт: «Мўй урәӈән нӑӈ щиты версэн?» Хŏйатәт ŏша пайәтсэԓ, Турәм Куща эԓты ԓўв хŏнтаԓ, хŏты ԓўв ԓывиԓаԓа йастәс.

¹¹Щарәс йэшащты щирәԓ и тарма, и тарма йис, ԓыв йастәсәт: «А хŏты мўӈэва нӑӈен верты, щарәсән тэвна йиты урәӈәӈ».

¹²Щи йўпийән ԓўв щиты йŏхԓы йастәс: «Мӑнэм ўйаԓән пӑ щарса йўвтаԓән, щӑԓта щарәсән нын урӈәнән тэвна йиԓ, ма уйәтԓэм, ма ўрӈемән нын тӑм так вот шук ватԓәты».

¹³Туп щи хŏйатәт йуртат ԓовәԓты питсәт, мўв сыԓа хойты урәӈән пӑ ӑт верәтсәт, щарәс йэшащты щирәԓ мет тарма йис, щишән.

¹⁴Щиӈәԋща Турәм Куща пеԓа ўвман пойәкщәты питсәт пӑ йастәсәт: «Турәм Куща, тӑм хŏйат ԓыԓ урәӈән ӑт ат пӑрԓув, пӑ нӑрԓы ўр мўӈева аԓ пŏны; Нӑӈ, Турәм Куща, Нӑӈена хŏты рӑхәԓ, щиты версэн!»

¹⁵Иона ўсэԓ пӑ йиӈка йўвәтсэԓ, щӑԓта щарәсән тэвна йис.

¹⁶Щиӈәԋща щи хŏйатәт Турәм Куща эԓты шек пӑԓтамәсәт, пӑ Турәм Кущайа йир тусәт пӑ йастәпса мӑсәт.

Иона пойәк

¹Турәм Куща ун веса2:1 вес - щарәс вой-хўԓ (кит, морское чудовище); Иона йŏхи ԓавемәты партсәԓы; Иона щи вес хŏн ԓыпийән хуԓәм хӑтәԓ пӑ хуԓәм ат ус.

²Иона Турәм Куща ԓўв Турмәԓ пеԓа вес хŏн ԓыпи эԓты пойәкщәс.

³Пӑ йастәс:

«Шука ма питмем урәӈән Турам Куща пеԓа пойәкщәсәм,

пӑ Ԓўв мӑнэм хуԓсәԓы;

ма иԓта турәм эԓты уваԓсәм,

пӑ Нӑӈ ма тўр сыйэм хуԓсэн.

⁴Нӑӈ мӑнэм мӑԓ йиӈка, щарәс сӑма, шуйԓәптәсэн,

ма йикән лӑп ўсайәм,

иса Нӑӈ йикԓан, Нӑӈ хўпԓан

ма нўмпемән йӑӈхиԓысәт.

⁵Ма йастәсәм:

Нӑӈ мӑнэм куш сэм сайа йэԓ воштәсэн,

ма ищи пӑ Нӑӈ йэмәӈ хотэн шийаԓәԓэм.

⁶Ԓыԓэм сŏхәнты унты ма йиӈкәтән ӑпәԓтсайәм,

пӑтыԓы тӑхайа ма щи тухәрсайәм;

щарәс лывәщән ŏхем лӑп йŏвәртса.

⁷Кев вŏш унты ма иԓ шуйԓәсәм,

мўв ԓўв йэртэпԓаԓән мӑнэм веккеша лӑп петсәԓы;

Нӑӈ пӑ, Турәм Куща, ма Турмем,

ма ԓыԓэм иԓта турәм эԓты нŏх туԓэн.

⁸Хун ма ԓыԓэм сŏхәнты питәс,

ма Турәм Куща эԓты нумәԓмәсәм,

пӑ ма пойкем Нӑӈ хуԓсэн,

Нӑӈ йэмәӈ хотэна пойкем йŏхтәс.

⁹Хŏй йурԓы пӑ нэмәԓтыйа ӑт рӑхты ŏтԓаԓ пеԓа пойәкщәԓәт,

Йӑм Сӑмәӈ Ŏтэԓ хӑйԓәт.

¹⁰Ма пӑ ишкаԋщәп арән Нӑӈен йирән туԓәм;

мўй йастыԓысәм, верԓэм:

Турәм Куща хŏща нŏх пайтәсты щир уԓ!»

¹¹Турәм Куща ун веса партәс, пӑ ԓўв сорәм мўва Иона ким охтаԓсәԓы.

Иона Ниневияйа мӑнәԓ

¹Щӑԓта Турәм Куща кимет пўш Иона пеԓа йастәс:

²«Нŏх ԓойа, Ниневия ун воша мӑна, щита хŏйатәта йасәӈ такан пŏтәрта, мўй Ма нӑӈен партсәм».

³Иона нŏх ԓойәс пӑ Турәм Куща йасәӈ хўват Ниневия воша мӑнәс; Ниневия хŏты Турәм ԓӑтәӈ ун вош, вош хўватәԓ хуԓәм хӑтәԓ шушты мосәԓ.

⁴Щӑԓта Иона вош хўват шушты питәс, ий хӑтәԓ мўй арат верәтәԓ мӑнты, ԓўв сыйәӈа пŏтәртәс, йастыман: «Хŏԓна ԋӑԓйаӈ хӑтәԓ - пӑ Ниневия вош шўкатԓа!»

⁵Ниневия вошәӈ хŏйатәт Турма эвәԓсәт, вўщԓәты йасәӈ версәт, ԓӑтәӈ ŏтԓаԓ эԓты ԓӑтԓы ŏтԓаԓ унты уԓттӑхты хир хŏрпи сŏха ԓумәтԓысәт.

⁶Щи айкеԓ Ниневия хон унты йŏхтәс, ԓўв хон омәсты тӑхайәԓ эԓты нŏх ԓойәс, пӑ хон сŏхԓәԓ нŏх эхсәԓы, пӑ уԓттӑхты хир хŏрпи сŏх ԓумтәс, пӑ рат хыша опсәс.

⁷Хон Ниневия вошән йастәты партсәԓы: «Хон пӑ ԓўв ԓӑӈкәр йŏхԓаԓ партԓәт: хŏйатәт пӑ войәт – мисәт пӑ ошәт нэмәԓты ӑт ат ԓэԓәт, тŏрән энәмты тӑхайа ӑт ат йӑхԓәт, йик ӑт ат йищԓәт.

⁸Пӑ хŏйатәт пӑ войәт уԓттӑхты хир хŏрпи сŏхән пŏнман ат усәт, пӑ Турәм пеԓа такан ат пойәкщәсәт, кашәӈ хŏйат йŏвра йўшԓаԓ, атәм верԓаԓ эԓты шӑшән ат керԓәс.

⁹Хŏй уйәтәԓ, мосәӈ, Турәм мўӈев щаԉәтԓәԓы, Ԓўв тарәм ԉикәԓ мўӈ эԓтэв нŏх ўԓԓы, пӑ мўӈ ӑт пӑрԓув».

¹⁰Турәм ԓыв верԓаԓ шийаԓәсԓы, хŏты ԓыв атәм верԓаԓ эԓты шӑшән керԓәсәт. Турәм ԓывиԓаԓ щаԉитсәԓы, йэԓпи йастыԓыйәм шука пайәтты йасәӈԓаԓ йŏхԓы ўсԓы. Йастыԓыйәс ԓывиԓаԓа атәм верты, пӑ ӑт верәс.

Иона ԉик

¹Иона щи вер урәӈән нŏпсәԓ шӑкәс пӑ ԉикащәс.

²Щӑԓта Турәм Куща пеԓа ԓўв пойәкщәс пӑ йастәс: «Турәм Куща! Щит эԓты щи ма пӑԓсәм, хун ма ма мўвемән хŏԓна усәм? Щи урәӈән Фарсис пеԓа ма хŏнтасәм, ма уйәтсэм, Нӑӈ, Турәм, йӑм сӑмәӈ, щаԉаӈ, арпуш умщәӈ, хўв ԓавԓәсты верәтԓән, шука пайәтты йасӈен китты ӑт кашащԓән.

³Ин хŏты, Турәм Куща, ма ԓыԓэм ма эԓтэм ўйи, уԓтэм эԓты, хӑԓԓәм–ки йӑмшәк».

⁴Щӑԓта Турәм Куща йастәс: «Щит эԓты нӑӈ шек нŏпсэн шӑкәс?»

⁵Иона вош эԓты ким этәс, пӑ хутԓыты пеләк сӑхат вош пўӈәԓән пӑԓ нŏрәм хŏрпи ŏт верәс, ԓоӈԓа варәс нўвәт пŏнәс, щи иԓпийа сай тӑхайа опсәс, ваттыйа, вош хŏты йиԓ.

⁶Турәм Куща щиты верәс, ун лыптәӈ пухращ энмәԓтәс, Иона нўмпийән пӑԓа энмәс, ԓўв охәԓ сайән ат ус, Иона ԉикәԓ ат мӑнәс ԓуԓән; Иона щи ун лыптәӈ пухращ урәӈән нŏх амтәс.

⁷Турәм щиты верәс, кимет хӑтәԓән хутԓәты пŏрайән, ин ун лыптәӈ пухращ сŏв шупән шŏппи пŏрса пӑ ԓўв нŏх сорәс.

⁸Хун най этәс, Турәм рўвәӈ вот китәс, Иона ŏх найән щиты кўтәрԓыса пӑ ԓўв рэԋԓы питәс. Сŏрәм ԓўвеԓа вохәс пӑ йастәс: «Уԓтэм ушән, хӑԓԓәм–ки йӑмшәк».

⁹Турәм Иона пеԓа йастәс: «Нӑӈ мўй йӑна щи лыптәӈ пухращ урәӈән нŏпсэн шӑкәс?» Ԓўв йастәс: «Шек нŏпсэм шӑкәс, хӑԓты унты!»

¹⁰Щиӈәԋща Турәм Куща йастәс: «Нӑӈ лыптәӈ пухращ щаԉәтԓән, ԓўвеԓ ӑт энмәԓтысэн пӑ щи кеша ӑт рупитысән. Ԓўв и ат сыс энмиԓыйәс пӑ кимет ат сыс нŏх сорәс.

¹¹Ниневия мўй Мӑнэм щаԉәтты ӑт рӑхәԓ? Щит Вŏԓаӈ вош, хŏта сот хус щŏрәс мŏԓтас хŏйат йӑм пеләк йош пӑрта пеләк йош эԓты артаԓәтты ӑт верәтԓәт, пӑ ар вой уԓ.»