Апостоләт Верәм Верәт

Апостоләт Верәм Верәт

Йэмәӈ Ԓыԓ йо̆хәтты вер эԓты аԉәм вер

¹Оԓәӈ нэпекем ма нӑӈена, Феофил, иса щит эԓты хӑшсэм, мўй Иисус верәс пӑ мўйа утәԓтәсԓы оԓӈәԓ эԓты

²щи хӑтәԓ унты, хун Йэмәӈ Ԓыԓ сӑхат Ԓўв пирыйәм апостолԓаԓа партәпсайәт1:2 Ԓўв партәпсайԓаԓ - ванта Лука 24:47-49 мийман, Ԓўв турма нŏх ўйман уса.

³Ԓўв шукәԓ йўпийән, ар тŏрԓы уԓты посԓаԓ пиԓән, щитԓаԓа щи Ԓўвеԓ ԓыԓӈат этәԓтәсԓы, ԋӑԓйаӈ хӑтәԓ хўват ԓыв хŏщайэԓ этыԓыйәс пӑ Турәм Хон Уԓәпса эԓты пŏтәртәс.

⁴Щӑԓта, ԓывиԓаԓ йӑха ӑкәтман, Ԓўв ԓывиԓаԓа партсәԓԓы: «Иерусалим эԓты аԓ мӑнаты, Ащэм аԉәм ŏт ԓавԓаты, хŏты Ма эԓтэм хуԓԓысты,

⁵Иоанн йиӈка ԓŏӈәԓтыйәс, нын пӑ, тӑми йўпийән кӑмәтса хӑтәԓ кемән Йэмәӈ Ԓыԓа ԓŏӈәԓтты питԓайты».

Иисус турма нŏх ўты вер

⁶Хун ԓыв йӑха ӑктәщсәт, Ԓўвеԓ иԋщәссэԓ, пŏтәртман: «Турәм Куща, Израиль хон пеләк ӑнта мўй ин Нӑӈ нŏх йӑԓпитԓэн?»

⁷Иисус пӑ ԓывиԓаԓа йастәс: «Ащем Ԓўв йурәԓән пŏнәм пŏрайәт мўй сысәт уйәтты, ӑнтом нын верән,

⁸нын йур вана ўԓты, хун нын хŏщайән Йэмәӈ Ԓыԓ ŏхәԓәԓ; пӑ Иерусалимән пӑ иса Иудея пӑ Самария ԓŏватән хŏԓна пӑ мўв кимәԓ унты Мӑнэм вантәм хŏйатәта уԓты питԓәты».

⁹Щит йастәмаԓ кемән, ԓыв ватман, Ԓўв нŏх эԓәтса, пӑ пӑԓәӈән ԓыв сэмԓаԓ эԓты лӑп ўса.

¹⁰Щиӈәԋща, хун ԓыв турәм хӑр пеԓа ватмеԓән, Ԓўв нŏх эԓԓәмаԓ пŏрайән, шӑмкапан ԓыв йэԓпиԓаԓән нŏви ԓумтәмәӈ кӑт ху этсәӈән

¹¹пӑ йастәсӈән: «Галилея йох! Мўй нын ԓойԓәты пӑ турәм хӑр пеԓа ватԓәты? Тӑм Иисус, нын эԓтан турма нŏх ўйәм Ŏт, тӑм иты щи йŏхәтәԓ, хŏты нын Ԓўвеԓ турма эԓԓәтаԓ ватсәԓән».

Йӑԓәп апостол Иуда йўкана пирыты вер

¹²Щиӈәԋща ԓыв Иерусалим воша, Элеона айәԓты кев пай эԓты, йŏхԓы йŏхәтсәт, ԓўв Иерусалим ԉэпән шаббат хӑтәԓ шушты хўватән1:12 шаббат хӑтәԓ шушты хўват - словарьән ванты; уԓ.

¹³Щӑԓта, йŏхԓы йŏхәтмеԓ йўпийән, нўм хот йӑта, хŏта уԓԓысәт, нŏх мӑтсәт: Петр пӑ Иаков, Иоанн пӑ Андрей, Филипп пӑ Фома, Варфоломей пӑ Матфей, Иаков Алфей пŏх пӑ Симон Зилот, пӑ Иуда, Иаков пŏх усәт.

¹⁴Хŏԓыйэ ԓыв и йӑха пойәкщәман усәт нэӈәт пӑ Мария, Иисус аԋԏи пиԓән, пӑ Ԓўв ху апщиԓаԓ пиԓән.

¹⁵Пӑ щи хӑтԓәтән Петр, утәԓтәты йŏх кўтән нŏх ԓойман, йастәс, –

¹⁶сот хус кем хŏйат йӑха ӑктәщиты щир ус: «Хӑнам йох! Щита тыйты мосәс, мўй Йэмәӈ Нэпекән Йэмәӈ Ԓыԓ Давид ўӈәԓән Иуда эԓты йастәс. Иисус ԋӑрэмәм ŏтәт хŏща ԓўв ŏха ус;

¹⁷Ԓўв мўӈ хŏщайэв ԓўӈәтман ус пӑ тӑм Турәм урәӈән верты верәт пеԓа пирыса»;

¹⁸Туп атәм вермаԓ сӑхат ўйәм ŏхԓаԓән, мўв хӑрән ԓутса, пӑ хун оԓӈат ŏхән рӑкәнмаԓән, ԓўв пўтайәԓ пелки похәс, пӑ сӑмԓаԓ-мŏхәԓԓаԓ ким ӑркәпсәт.

¹⁹Щиӈәԋща щи вер Иерусалим хŏйатәтән хŏԓ уйәтты питса, щишән щи мўв ԓыв йасӈеԓән Акелдама нэма пŏтсэԓ, щит «ўр мӑнәм мўв».

²⁰«Псалмәт нэпекән1:20 Псалмәт нэпекән - словарьән ванты; хӑшман уԓԓа: ’Ԓўв хотәԓ таԓ ат уԓ, пӑ нэмәԓты уԓты ŏт щита ӑт ат питәԓ’; пӑ: ’Ԓўв тӑйәм верәԓ па хŏйатән ат ўԓа’.

²¹Щишән мўӈев щи хŏйатәт эԓты ит пирыты мосәԓ, хŏй мўӈ пиԓэвән иса йӑӈхәс, хун Иисус Турәм Куща мўӈ кўтэвән ус,

²²Иоанн йиӈка ԓŏӈәԓтыты вер уш эԓты пӑ щи хӑтәԓ унты, хун Ԓўв мўӈ эԓтэв нŏх ўса. Ԓўв и щиты Иисус нŏх ԓыԓәӈԓәм вер хŏща мўӈ пиԓэвән ватты ŏта ат ус».

²³Пӑ кӑт хŏйат аԉса: Варсавайа айәԓты Иосиф, Иуста нэмтәм ŏт, пӑ Матфий;

²⁴Щӑԓта пойәкщәсәт пӑ йастәсәт: «Нӑӈ, Турәм Куща, кашәӈ хŏйат сӑм уйәтԓән, тӑм кӑтӈән эԓты итәԓ, Нӑӈ пирыйәм ŏтэн, аԉи,

²⁵тӑм Турәм урәӈән верты верәт пӑ апостола уԓты щир вана ўты кеша, хŏԓща Иуда пўӈԓа мӑнәс, ԓўв тӑхайәԓа мӑнтаԓ урәӈән».

²⁶Щӑԓта ԓын эԓтан пос вŏщкәсәт, пӑ Матфия пос питәс, пӑ ԓўв ихŏщйаӈ апостоләт пеԓа ԓўӈәтты питса.

Йэмәӈ Ԓыԓ йо̆хәтты вер

¹Ветйаӈ хӑтԓәп хӑтәԓ2:1 Ветйаӈ хӑтԓәп хӑтәԓ - словарьән ванты; питмаԓән ԓыв хŏԓыйэ и нŏмәсән йӑха усәт.

²Щӑԓта шӑмкапан турәм эԓты сый тыйәс, ищи мӑтты такан пŏԓты вот иты, пӑ хот, хŏта ԓыв усәт, лӑп ўса.

³Пӑ ԓыв хŏщайэԓ лакки ортәсты тўт ԋаԓмәт хŏрпи ŏтәт этсәт, пӑ ԓыв нўмпиԓаԓа ԓӑтәԓ щирән итән, итән вŏԓыԓысәт.

⁴Пӑ хŏԓыйэ Йэмәӈ Ԓыԓән тэкәтсайәт, щӑԓта па йасӈәтән пŏтәртты питсәт, хŏты Ԓыԓ ԓывиԓаԓа пŏтәртты щир мӑс.

⁵Иерусалимән пӑ иудейәт усәт, Турма эвәԓты хŏйатәт, ар сыр мир кўт эԓты турәм иԓпийән уԓты ŏтәт.

⁶Хун щи сый тыйәс, мир ӑктәщәс пӑ нŏмәсԓаԓ ԓыԓԓәсәт, кашәӈ хŏйат ԓывиԓаԓ хуԓәс, хŏты щитәт ԓыв ўӈәԓ пўншәм йасәӈԓаԓән пŏтәртсәт, щишән.

⁷«Пӑ хŏԓыйэ ӑԓ пакнысысәт, ԓыв кўтэԓән пŏтәртман: ’Тӑм пŏтәртты ŏтәт мўй ӑнта хŏԓ Галилея мŏхет?’

⁸Мўй щирән мўӈ, кашәӈ хŏйат ԓўв ўӈәԓ пўншәм йасӈәԓ, хуԓԓув.

⁹Парфия пӑ Мидия хŏйатәт, пӑ Элам хŏйатәт, Месопотамияйән, Иудеяйән пӑ Каппадокияйән, Понтән пӑ Асияйән уԓты хŏйатәт,

¹⁰Фригияйән пӑ Памфилияйән, Египетән пӑ Киринея пўӈәԓән ŏԓты Ливия мўв йирәтән уԓты хŏйатәт, пӑ Рим эԓты йŏхтәм ŏтәт, иудейәт пӑ прозелитәт2:10 прозелитәт - словарьән ванты,

¹¹Крит пӑ Аравия хŏйатәт, ԓывиԓаԓ мўӈ йасәӈԓувән Турәм вŏԓаӈ верәт эԓты пŏтәрттэԓ хуԓԓув»?

¹²Пӑ хŏԓ ӑԓ пакнысысәт пӑ, ощатыман, кўтԓаԓән иԋщәссәт: «А мўй щит»?

¹³Тухԓәт пӑ, ԋӑха ԋӑхман, пŏтәрсәт: «Ԓыв эпԓәӈ ўна йищсәт».

Петра по̆тәр

¹⁴Петра пӑ, ихŏщйаӈәԓ пиԓән ԓойман, сыйәӈ тўрән ԓывиԓаԓа йастәс: «Иудей йох, пӑ хŏԓ Иерусалимән уԓты ŏтәт! Тӑм вер нын ат уйәтԓәԓән, пӑ ма йасәӈԓама хуԓәнтаты:

¹⁵Ԓыв ӑнта кўтщәмәт, хŏты нын нумәсԓәты, ин хӑтәԓ хуԓмет щос ӑт уԓ;2:15 хӑтәԓ хуԓмет щос - щит еврей йох щирән йӑртйаӈ щос; аԓәӈсӑхат ўна ӑт йищԓәт;

¹⁶туп тӑми Турәм айкеԓ туты хŏйатән, Иоиԉән, йастәм айкеԓ:

¹⁷’Пӑ йухәт хӑтԓәтән питәԓ, Турәм пŏтәртәԓ, Ма Ԓыԓэм эԓты хŏԓ хŏйатәта шошәмԓәм, щӑԓта нын пŏхԓән нын эвиԓән Турәм айкеԓ туты питԓәт; пӑ нын энәмты йохԓән вантәпса ватты питԓәт, пӑ нын ун икиԓән уԓмәт ватты питԓәт.

¹⁸Щӑԓта Мӑнэма рупитты йохԓама, пӑ Мӑнэма рупитты нэԓама щи хӑтԓәтән Ма Ԓыԓэм эԓты шошәмԓәм, пӑ Турәм айкеԓ туты питԓәт.

¹⁹Щӑԓта вантыԓԓаӈәԓ верәт нумән турәм хӑрийән пӑ йэмәӈ посәт иԓән мўвән, ўр пӑ тўт пӑ пусәӈ пŏлыйәпса этәԓтәԓәм.

²⁰Най пӑтлама йиԓ, пӑ тыԓәщ ўр иты йиԓ, йэԓпи хун Турәм Куща вŏԓаӈ пӑ вŏрԓәты хӑтәԓ йŏхәтәԓ.

²¹Щӑԓта питәԓ: кашәӈ хŏй Турәм Куща нэм вохԓәԓԓы, нŏх пайәтԓа’.

²²Израиль йох! Тӑм йасӈәт хуԓәнтаԓән: Иисус, Назарет вош хŏйат, Турәм эԓты нынана йурәӈ пӑ вантыԓԓаӈәԓ верәт пӑ йэмәӈ посәт сӑхат ватәԓтәм Ху, щитәт Турәм Ԓўв мŏхтэԓ нын кўтәнән верәс, хŏты нын щи уйәтԓәԓән,

²³Тӑми, Турәм нŏмәс пӑ йэԓпи вантәм вер хўват мийәм Ŏт, нын ўсԓән пӑ, Турма ӑт эвәԓты хŏйатәт йошән картԓўкән пернайа сэкман, веԓсәԓән;

²⁴Туп Турәм , сŏрәм мухләт лакки мӑшман, Ԓўвеԓ нŏх ԓыԓӈатсәԓы, сŏрәм Ԓўвеԓ иԓ катәԓты ӑт верәтсәԓы, щишән.

²⁵Давид Ԓўв эԓтэԓ пŏтәртәԓ: ’Ма Турәм Куща ма йэԓпемән иса ватсәм, Ԓўв ма эԓтэм йӑм пеләк сӑхат уԓ, ма ӑт ат нŏмәнԓысәм2:25 нŏмәнԓысәм - кӑт нŏмәс кўтән уԓты;.

²⁶Щит эԓты ма сӑмем амтәс пӑ ԋаԓмем кашәӈа йис; хŏԓна пӑ эԓ ԋŏхем, щи пеԓа нŏмәс пŏнман, уԓты питәԓ:

²⁷Нӑӈ ма ԓыԓэм хӑԓайәт кўтән ӑт хӑйԓэн пӑ Нӑӈ йэмәӈ ŏтэна шимты вер шийаԓәты ӑт мӑԓэн.

²⁸Нӑӈ мӑнэм уԓәпса йуш аԉсән, ма сӑмем амәтэн тэкәнәԓ, хун Нӑӈ веншен шийаԓәԓәм’.

²⁹Хӑнам йох! Нынана Давид опращев эԓты тŏрԓы йастәты эсәԓты ат питԓа, ԓўв пӑрәс пӑ иԓ ԓэщатса, пӑ ԓўв ԓэԓтŏтәԓ мўӈ хŏщайэв тӑм хӑтәԓ унты уԓ.

³⁰Турәм айкеԓ туты хŏйата уԓмаԓән пӑ уйәтман, Турәм так йасәӈ мийман, ԓўвеԓа йастәс, ԓўв ўрәԓ-ԓантәԓ эԓты Христос хŏйата тыйәԓтԓәԓы пӑ ԓўв хон омәсты тӑхайәԓа опсәԓтԓәԓы,

³¹ԓўв Христос нŏх ԓыԓәӈԓәты вер эԓты йэԓпи йастәс, мўй Ԓўв ԓыԓәԓ хӑԓайәт кўтән ӑт хӑйԓа, пӑ Ԓўв мотавтәԓ шимты щир ӑт ватәԓ.

³²Турәм Тӑм Иисус нŏх ԓыԓӈатсәԓы, щит хŏща мўӈ хŏԓ вантәм хŏйатәта усув.

³³Щиӈәԋща, Ԓўв, Турәм йурәӈ йошән турма нŏх пайәтман уса пӑ Ащеԓ эԓты аԉәм Йэмәӈ Ԓыԓ вана ўйман, щит шошемәс, мўй нын ин ватԓәты пӑ хуԓԓәты.

³⁴Давид опԉа нŏх ӑт мӑнәс; туп ԓўв пŏтәртәԓ: "Турәм Куща ма Турәм Кущайэма йастәс: Ма йӑм пелкема опса,

³⁵щи унты, хун Нӑӈ кўрнатэна нӑӈен нўрмәԓтты ŏтԓан иԓ ӑт пŏнԓәԓам".

³⁶Щишән Израиль хот тэԓ такан ат уйәтԓәԓы, Тӑм Иисус, Хŏй нын пернайа сэксәԓән, Турәм Ԓўвеԓ Турәм Кущайа пӑ Христоса пŏтсәԓы!»

³⁷Щит хўԓмеԓ кемән, ԓыв сӑмԓаԓән ԋŏхԓәсәт пӑ Петрайа пӑ па апостоләта йастәсәт: «Хӑнам йох, мўй мўӈева верты»?

³⁸Петра пӑ ԓывиԓаԓа йастәс: «Кӑрэкԓән эԓты шӑнша керԓаты, пӑ нын эԓтан кашәӈ ŏт Иисус Христос нэм хўватән йиӈка ат ԓŏӈәԓтыса кӑрэкәт йŏрэмәты урәӈән; пӑ Йэмәӈ Ԓыԓ мойԓәпсайа ўйаԓән.

³⁹Аԉәм вер нын йўканәна пӑ нын ԋаврэмԓән пӑ хŏԓ йэԓта мŏхет урәӈән уԓ, хŏй Турәм Кущайән мўӈ Турмевән вохԓа».

⁴⁰Пӑ ар па хŏрпи йасӈәтән ԓўв пŏтәртәс пӑ пойкәс, йастәман: «Тӑм атәм хŏйат рут эԓты хŏԓт пайтәсаты».

⁴¹Щиӈәԋща, ԓўв йасӈәԓ вана ўйәм ŏтәт йиӈка ԓŏӈәԓтысайәт, пӑ щи хӑтәԓ эвәԓты хŏйатәт хŏща хуԓәм щŏрәс кем хŏйата арамәс.

⁴²Щӑԓта ԓыв ван кўтԓы апостоләт утәԓтәты вер хŏща хуԓәтман, ԋаԋ морәтман2:42 ԋаԋ морәтман - Словарьән ванты;, пŏтремәман пӑ пойәкщәман йӑха уԓԓысәт.

⁴³Кашәӈ сӑмән пӑԉщәм ус; щӑԓта ар вантыԓԓаӈәԓ верәт пӑ йэмәӈ посәт Иерусалимән апостоләт мŏхты тыйсәт.

⁴⁴Хŏԓ пӑ эвәԓты мŏхет йӑха усәт пӑ мўй иса и сура тӑйсэԓ.

⁴⁵Пӑ хотԓаԓ пӑ тащԓаԓ–вещԓаԓ тыныԓԓаԓ, пӑ хŏйатәта хŏԓ ортԓыԓԓаԓ, ватман, хŏйа мўй арат мосәԓ.

⁴⁶Щӑԓта кашәӈ хӑтәԓ, и нŏмәсән уԓман, Турәм Хотән уԓԓысәт пӑ, хотәтән ԋаԋ морәтман, амтәтԓыман пӑ вещкат сӑмән уԓман, ԓэсәт,

⁴⁷Турәм ишәкман пӑ мирән сӑмәӈа тӑйман. Турәм Куща пӑ кашәӈ хӑтәԓ нŏх пайтәм мŏхет эвәԓты хŏйатәт хŏща йŏхтәптысԓы.

Петра нохты хŏйат тўмтака верԓәԓы

¹Петра пӑ Иоанн Турәм Хота йӑрәтйаӈмет3:1 йӑртйаӈмет щос - щит мўӈ щирэвән хӑтәԓ хуԓмет щос; пойәкщәты щосән йӑха шушсәӈән.

²Сэма питәм тэԓән уԓты нохты хŏйат ӑԓ аԓтԓыса пӑ кашәӈ хӑтәԓ Турәм Хот, Хŏрамәӈа айәԓтты, ов ԉэпа опсыԓыса. Турәм Хота ԓŏӈты хŏйатәт эԓты меԓащ вохты урәӈән.

³Ԓўв, Петра пӑ Иоанн Турәм Хот ов йэԓпийән кащаԓәмаԓ кемән, ԓын эԓтайән меԓащ вохәс.

⁴Петра Иоанн пиԓән, ԓўв пеԓайәԓ тŏрԓы ватман, йастәс: «Мин пеԓайэмән ӑӈкәрма».

⁵Щӑԓта ԓўв ԓын пеԓайән хŏрат ӑӈкәрмәс, ԓын эԓтайән мŏԓты йоша пайәтты нумәсәс.

⁶Туп Петра йастәс: «Щел ŏх пӑ сорԋи ма ӑт тӑйԓәм; мўй тӑйԓәм, щит нӑӈен мӑԓәм: Назарет эԓты уԓты Иисус Христос нэм хўватән ԓойа пӑ шушиԓыйа».

⁷Щӑԓта, ԓўвеԓ йӑм пеләк йошәԓ эԓты катәԓман, нŏх ԓощәԓтәсԓы; пӑ ищи мŏхты ԓўв кўр пушәхԓаԓ пӑ шаншŏхԓаԓ такамәсәт,

⁸Пӑ, нŏх ԓойәпман, ԓойәс пӑ шушиԓыты питәс, пӑ ԓын пиԓанән Турәм Хота ԓŏӈәс, шушиԓыман пӑ наврәтԓыман пӑ Турәм ишәкман.

⁹Щӑԓта аратәԓ мир ԓўвеԓ шушиԓыман пӑ Турәм ишәкман ватсәԓы;

¹⁰Пӑ ԓўвеԓ уйәтсэԓ, тӑм щит ус, хŏй Турәм Хот Хŏрамәӈ ов ԉэпән меԓащ вохты урәӈән опсәс; щӑԓта ԓўв тўмтака йўвмаԓ пӑтыйән, хŏйатәт шек пӑԓтәмәсәт пӑ пакнысысәт.

Петра Турәм Хотән по̆тәртты вер

¹¹Пӑ тўмтака йўвәм нохәм ху Петра пӑ Иоанн эԓты пўӈԓа ӑт мӑныԓыйәԓ, щишән мир хŏԓ, шек пакәнман, ԓын хŏщайән Соломон хот йата хухәԓсәт.

¹²Петра щит шийаԓәмаԓ кемән мир пеԓа йастәс: «Израиль йох! Мўй тӑми эԓты пакәнԓәты, мўй мўӈ пеԓайэв ватԓәты, ищи мӑтты ки мин йурԓәмәнән мўй пӑ йӑмԓәмәнән щиты версэмән, ԓўв шушиԓыйәԓ?

¹³Авраам пӑ Исаак пӑ Иаков Турәм, мўӈ ащиԓув Турәм, Ԓўв Иисус Пŏхәԓ вŏԓаӈ щирәԓ этәԓтәсԓы, Хŏй нын веԓты мӑсԓән пӑ Хŏй эԓты, Пилат хуԓәтман, пўӈԓа ўратсәты, хун щитэн Ԓўвеԓ хŏԓт эсәԓты ўтщисԓы.

¹⁴Туп нын Йэмәӈ пӑ Вещкат Ŏт эԓты пўӈԓа ўратсәты пӑ хŏйат веԓты хорахщи нынана хŏԓт эсәԓты ўратсәты,

¹⁵Уԓәпса Куща пӑ веԓсәԓән. Тӑми, Турәмән пӑрмаԓ эԓты нŏх ԓыԓӈатса, мўй хŏща мўӈ вантәм ŏтәта уԓԓув.

¹⁶Пӑ Иисус нэм хўватән эвәԓты урәӈән, Ԓўв нэмәԓән тӑмен такапса, хŏй пеԓа нын ватԓәты пӑ ԓўвеԓ уйәтԓәԓән. Пӑ Иисус эԓты уԓты эвәԓты щир, хŏԓ нын ватман, тўмтака йиты вер верәс.

¹⁷Пӑ хŏты, ма уйәтԓэм, хӑнам йохәт, нын пӑ куща йохԓән иты, ӑт уйәтман, тӑм версәԓән;

¹⁸Турәм пӑ хŏты Ԓўв хŏԓыйэ Турәм айкеԓ туты хŏйатԓаԓ уӈәԓән Христос шукащты вер йастәс, щиты пӑ щи версәԓы.

¹⁹Щиӈәԋща, кӑрэкԓән эԓты шӑнша керԓаты пӑ Турәм пеԓа ӑӈкәрматы, нын кӑрэкԓән нŏх ат ушисайәт,

²⁰йӑԓпиԓәты пŏрайәт Турәм Куща эԓты ат йŏхәтԓәт, пӑ нынана йўкантәм Иисус Христос Ԓўв ат китәԓ.

²¹Туп Иисуса опәԉән хӑщты мосәԓ, щи пŏра унты хун Турәм иса хŏԓ йӑԓпитԓәԓы, щи пŏра эԓты Турәм хŏԓ Ԓўв йэмәӈ Турәм айкеԓ туты хŏйатԓаԓ уӈәԓән хўвән йастыԓыйәс.

²²Моисей ащиԓува ӑт йастыԓыйәс: ’Нын хӑнам йохԓән кўт эԓты Турәм Куща нын Турмән, ма итэма, Турәм айкеԓ туты хŏйат нŏх этәԓтәԓ; Ԓўвеԓа мўй хŏща иса хуԓәнтаты, мўй Ԓўв нынана пŏтәртты питәԓ;

²³Щӑԓта кашәӈ ŏт, хŏй Турәм айкеԓ туты хŏйата ӑт хуԓтмәԓ, щит мир кўт эԓты пӑратԓа’.

²⁴Щит эԓты пӑ хŏԓ Турәм айкеԓ туты хŏйатәт пŏтәртысәт, Самуил эԓты ўйман пӑ щитәт, хŏй ԓўв йўпеԓән ус, ищиты тӑм хӑтԓәт аԉсәт.

²⁵Нын – Турәм айкеԓ туты хŏйатәт пӑ йастантәм вер пŏхәт, Турәм нын ащиԓәна йастантәм вер хӑйиԓыйәс, Авраама пŏтәртман: ’Пӑ нӑӈ ԋаврэмен сӑхат мўв ԓŏватән уԓты мир йӑмән мӑԓа’.

²⁶Турәм, Ԓўв Иисус Пŏхәԓ ԓыԓӈатмаԓ кемән, оԓӈа нын хŏщайәна Ԓўвеԓ китсәԓы, нынана йӑм мӑты урәӈән пӑ кашәӈ ŏтән нын ԉикәӈ верԓән эԓты шӑшән керәтты урәӈән».

Петра пӑ Иоанн синедрион йэщаԓт ԓойты вер

¹Хун ԓын мир пеԓа пŏтәртсәтән, Турма йир верты йох пӑ Турәм Хот шавиты куща пӑ саддукейәт ԓын хŏщайән вана йисәт,

²щит пеԓа ԉикихурыйа уԓман, мўйа ԓын мир утәԓтәԓԓән пӑ пӑрәм эԓты Иисус иты нŏх ԓыԓәӈԓәты вер айәԓәтән;

³Щӑԓта ԓын ԋӑрэмәсайтән пӑ аԓәӈсӑхат унты касна хот шавиты йоха мӑсайӈән; йэтән ус, щишән.

⁴Йасәӈ хуԓәнтәм мŏхет эԓты пӑ ар пеләк эвԓәс; пӑ эвԓәм хŏйат аратәԓ вет щŏрәс кем ус.

⁵Кимет хӑтәԓән Иерусалимән ԓыв куща йохԓаԓ, пӑ уна уԓты икет, пӑ Закона утәԓтәты икет ӑктәщсәт,

⁶Пӑ Анна - Турма йир верты ŏх ики, пӑ Каиафа, пӑ Иоанн, пӑ Александр, пӑ па мŏхет ԓўв рутәԓ эԓты;

⁷Щӑԓта, ԓынан кўтԓәпа ԓощәԓтәман, иԋщәссэԓ: «Мўй йурән пӑ мўй нэмән нын тӑми версәтән?»

⁸Щиӈәԋща Петра, Йэмәӈ Ԓыԓән тэкәнман, ԓывиԓаԓа йастәс: «Мир кущайәт пӑ Израиль ун икет!

⁹Тӑм хӑтәԓ мин эԓтэмән кӑшаӈ хŏйат йӑма вермемән урәӈән такан иԋщәсԓаймән ки, хŏты ԓўв тўмтака верса,

¹⁰нын хŏԓ пӑ хŏԓ Израиль мир уйтаԓән: тӑм хŏйат ин нын йэԓпанән тўмтака ԓойәԓ Назарет эԓты уԓты Иисус Христос нэм хўват, Хŏй нын пернайа сэксәԓән пӑ Хŏй пӑрәм эԓты Турәмән нŏх ԓыԓӈатса!

¹¹Ԓўв уԓ кев шуп, нынанән, кев хот омәсты хŏйатәтән, эртәм ŏт, туп щуӈ тӑйән мет мосты кева йис. Пӑ нэмәԓтты па ŏт хŏща нŏх пайтәсты щир ӑнтом;

¹²Турәм иԓпийән хŏйатәта мийәм па нэм ӑнтом, мўй щирән мўӈ нŏх пайтәсты верәтсув ԓуԓән».

¹³Петра пӑ Иоанн ӑт пӑԓты вер кащаԓәмеԓ пӑ ԓын ӑнта утәԓтыйәм пӑ аԓ хŏйата уԓты вер мŏштәмеԓ кемән, ԓыв ӑԓ щи пакнысысәт. Щи кўтән ԓын ŏша пайтыԓысайтән, ԓын Иисус пиԓән уԓԓыстән;

¹⁴Тўмтака йўвәм пӑ ԓын пиԓәнән ԓойәм хŏйат пеԓа ватман, нэмәԓты шŏппи йастәты ӑт верәтсәт.

¹⁵Щӑԓта, синедрион4:15 синедрион - Словарьән ванты; эԓты ԓывиԓаԓ ким этты партман йўпийән, ԓыв кўтэԓән нумәссәт,

¹⁶пŏтәртман: «Мўӈев тӑм хŏйатӈән пиԓән а мўй верты? Иерусалимән уԓты хŏйатәтән хŏԓ уйәтԓа, ԓын йӑна вантыԓԓаӈәԓ вер версәӈән, пӑ мўӈ тӑми хŏԓт хуләтты ӑт верәтԓэв;

¹⁷туп, тӑми мир ԓŏвата лакки ӑт ат ԓӑрпиԓәс, пӑԓтаптәман, ԓывиԓаԓа тӑм нэм эԓты пŏтәртты нэмәԓты хŏйата ӑт эсәԓԓэв».

¹⁸Щӑԓта, ԓынан вана вохман, ԓынана нэмәԓты щирән ӑт пŏтәртты пӑ Иисус нэм эԓты утәԓтәты такан ӑт эсәԓсэԓ.

¹⁹Туп Петра пӑ Иоанн ԓывиԓаԓа йŏхԓы йастәсӈән: «Нумәсаты, Турәм йэԓпийән мўй вещкат - Турәм эԓты нынан аршәк хуԓәтты?

²⁰Мин, мўй ватсәмән пӑ мўй хуԓсәмән, щит эԓты мин ӑт пŏтәртты ӑт верәтԓәмән».

²¹Ԓыв пӑ, ԓынан пӑԓтаптәман эсәԓсэԓ, ар хŏйат уԓәм пӑтыйән, ԓынан йŏвәртты щир ӑт уйәтсәт; тыйәм вер урәӈән хŏԓыйэ Турәм ишәксәт, щишән.

²²Щи хŏйата ԋӑԓйаӈ мŏԓтас тӑԓ ус, хŏй хŏща щи тўмтака йиты вантыԓԓаӈәԓ вер тыйәс.

Эвәԓты йох пойәкщәты вер

²³Эсәԓман йўпийән, ԓын пиԓԓән хŏща йŏхәтсәтән пӑ пŏтәртсәԓән, мўй Турма йир верты ŏх икет пӑ уна уԓты икет ԓынана йастәсәт.

²⁴Ԓыв пӑ, хуԓәтмеԓ йўпийән, и нŏмәсән Турәм пеԓа тўрԓаԓ сыйәӈа версәԓаԓ пӑ йастәсәт: «Тӑйтаӈ Турәм! Нӑӈ турәм хӑр пӑ мўв пӑ щарәс пӑ мўй щита уԓ иса хŏԓ тыйәԓтсэн.

²⁵Нӑӈ мўӈ Давид ащев, Нӑӈ митхуйэн, ўӈәԓән Йэмәӈ Ԓыԓэнән йастәсән: ’Мўй урәӈән па мирәт рома уԓты ӑт верәтԓәт, пӑ ԓыв таԓ нŏмәс туты ўтщиԓәт?

²⁶Мўвәӈ хонәт нŏх эԓԓәсәт, пӑ вŏс йохәт йӑха Турәм Куща йэщаԓт пӑ Ԓўв Христосәԓ4:26 Христос - Словарьән ванты; йэщаԓт ӑктәщсәт’.

²⁷Йӑна тӑм вошән Нӑӈ Йэмәӈ Пŏхен Иисус, Нӑӈ ԋŏсытәм Ŏтэн, йэщаԓт, Ирод пӑ Понтий Пилат па мир йох пӑ Израиль йох пиԓән ӑктәщсәт,

²⁸ԓыв щит версәт, мўй Нӑӈ йурэнән пӑ Нӑӈ партты щирэнән уԓты верәԓ ус.

²⁹Пӑ ин, йэшәк Турәм Куща, ԓыв пӑԓтапԓаԓ пеԓа ӑӈкәрма, пӑ Нӑӈена рупитты йохԓана иса ӑт пӑԓман, Нӑӈ йасӈен пŏтәртты мийи,

³⁰Нӑӈ йошен йэԓ ԋинши пӑ кӑшаӈ хŏйатәт тўмтака вераԓән, Нӑӈ Иисус Йэмәӈ Пŏхен нэмән йэмәӈ посәт пӑ вантыԓԓаӈәԓ верәт вера».

³¹Щӑԓта, ԓыв пойәкщәмеԓ йўпийән, хŏта ԓыв ӑкәтман усайәт, щи тӑхайэԓ ԋŏхԓыйәс, пӑ хŏԓыйэ Йэмәӈ Ԓыԓән тэкәтсайәт, пӑ Турәм йасәӈ хурԓы пŏтәртсэԓ.

Эвәԓты йох хо̆ща иса и сура тӑйты ŏтәта уԓты щир

³²Ар эвԓәм хŏйатәт хŏща пӑ и сӑм и ԓыԓ ус; пӑ нэмәԓты хŏйат тӑйәм ŏтԓаԓ эԓты ԓывиԓаԓа ӑт айәԓԓәԓаԓ, туп иса и сура тӑйты ŏтԓаԓа усәт.

³³Апостоләт пӑ ун йурән Турәм Куща Иисус Христос нŏх ԓыԓәӈԓәм эԓты пŏтәртсәт; пӑ вŏԓаӈ йӑм хŏԓыйэ ԓыв пиԓԓаԓән ус.

³⁴Ԓыв кўтэԓән и нўша хŏйат ӑнтом ус; хŏԓ хŏй мўвәт мўй хотәт тӑйәс, щитԓаԓ тынымеԓ кемән, тынасәм тынԓаԓ тутԓысәт,

³⁵пӑ апостоләт кўр шŏма пŏныԓысәт; пӑ кашәӈ хŏйата, хŏй мўй хŏща мосты вер тӑйәԓ, мийԓыса.

³⁶Щиты Иосий, апостоләтән Варнавайа айәԓтәм (щит: «торамтыты пŏх»), левит, рутәԓ Кипр мўв эԓты уԓ,

³⁷хŏй ԓўв йŏра мўв тӑйәс, щитәԓ тынымаԓ йўпийән, ŏхԓаԓ тусԓы пӑ апостоләт кўрәт шŏма пŏтсәԓы.

Анания пӑ Сапфира

¹И ху пӑ, нэмәԓ Анания, ԓўв Сапфира имеԓ пиԓән мўвәԓ тынымаԓ йўпийән,

²тынәԓ эԓты и шўкәԓ, ԓўв имеԓ уйәтман, хŏԓт хӑԋатсәԓы, пӑ хӑщәм шўкәԓ тусԓы пӑ апостоләт кўр шома пŏтсәԓы.

³Туп Петра йастәс: «Анания! Мўй урәӈән нӑӈ сӑмен хиԋа ўты эсәԓсэн. Мўйа нӑӈ Йэмәӈ Ԓыԓа олмащисән пӑ мўв тынэн эԓты и шупәԓ хӑԋатсэн?

⁴Мўй нӑӈ тӑйсән, ӑнтом мўй нӑӈен ус, пӑ тыныйәм сӑхат мŏщатәм ŏтэн ӑнта мўй нӑӈ йурэнән ус? Мўй урәӈән тӑми нӑӈ сӑмена пŏтсэн? Нӑӈ ӑнта хŏйатәт, Турәм ԓэпәԓсән».

⁵Щи йасӈәт хуԓмаԓ кемән, Анания щӑх рӑкнәс; пӑ щит хуԓәнтәм ŏтәт хŏԓ ун пӑԉщәмән йŏхәтсайәт.

⁶Щиӈәԋща, энәмты йох ԓўвеԓ лоттәты урәӈән ԓэщатсэԓ ким этәԓтәсэԓ пӑ иԓ лоттәсэԓ.

⁷Тӑм йўпийән хуԓәмԓэм щос хӑщәс, тыйәм вер эԓты нэмәԓты ӑт уйәтман, пӑ ԓўв имеԓ йŏхтәс.

⁸Петра пӑ ԓўвеԓ иԋщәссәԓы: «Мӑнэм йасты, тӑм арат сӑхат нын мўвән тынысԓән?» Ԓўв йастәс: «Па хŏты, тӑм арат сӑхат».

⁹Туп Петра ԓўвеԓа йастәс: «Мўйа нын Турәм Куща Ԓыԓ артаԓыты кашащсәтән? Тӑта щи, нӑӈ икен лоттыйәм йох ова ԓŏӈԓәт. Нӑӈ па ким туԓайән».

¹⁰Ищи мŏхты ԓўв Петра кўрӈән шŏма иԓ рӑкнәс пӑ ԓыԓәԓ мӑнәс. Пӑ энәмты йох, йŏхи ԓŏӈман, ԓўвеԓ пӑрәма уйәтсэԓ пӑ, ким этәԓтәмеԓ йўпийән, ԓўв икеԓ пўӈԓа лоттәсэԓ.

¹¹Щиӈәԋща хŏԓ пойәкщәты мŏхет пӑ хŏԓ, хŏй тӑм хуԓәс, ун пӑԉщәмән йŏхәтсайәт.

Апостоләт ар хо̆йат тўмтака верты верәт

¹²Апостоләт йошән мир хŏща тэԓыйэ йэмәӈ посәт пӑ вантыԓԓаӈәԓ верәт тыйәԓтысайәт; пӑ хŏԓыйэ и нŏмәсән Соломон хот йӑтән уԓԓысәт.

¹³Пўӈәԓ хŏйатәт эԓты пӑ нэмәԓты ŏт ӑт веритәԓ ԓыв хŏщайэԓ пиԓтәщты, мир пӑ ԓывиԓаԓ ишәкәԓ.

¹⁴Турәм Кущайа эвәԓты хŏйат пӑ ара па ара йиты питәс, тэԓыйэ йох пӑ нэӈәт,

¹⁵щиты кӑшаӈ хŏйатԓаԓ вош хўлыйа ким тутԓысԓаԓ пӑ ŏԓты сŏхԓаԓа пӑ ŏԓтӑхайԓаԓа пŏныԓысԓаԓ, кўш кепа мŏхты шушты Петра исхŏрән ԓыв эԓтыԓаԓ мӑтты ŏт ат хойԓыса ԓуԓән.

¹⁶Иерусалима ищиты ванән уԓты вошәт эԓты ар хŏйат, кӑшаӈ ŏтԓаԓ пӑ кўԉ сŏх тӑйты ŏтԓаԓ тўвман, ӑктәщисәт пӑ хŏԓ щитәт тўмтака йўвәнтысәт.

Апостоләт ԋӑрэмәты щирәт

¹⁷Турма йир верты ŏх ики пӑ ԓўв пиԓәԓән хŏԓ, саддукейәт пеԓа уԓты мŏхет, ԓоԓәмты нŏмәсән тэкәтсайәт,

¹⁸щӑԓта ԓыв апостоләт ԋӑрэмәсԓаԓ, пӑ ԓывиԓаԓ вошәӈ касна хота лӑп петсәԓаԓ.

¹⁹Туп Турәм Куща ангел атәԓән касна хот овәт пелки пўшсәԓы пӑ, ԓывиԓаԓ ким тўвман, йастәс:

²⁰«Мӑнаты пӑ, Турәм Хотән, мир пеԓа хŏԓ тӑм йӑԓәп уԓәпса йасӈәт пŏтәртаԓән».

²¹Ԓыв хуԓтмәсәт пӑ аԓәӈсӑхат Турәм Хота ԓŏксәт пӑ хŏйатәт утәԓтәсәт. Щи кўтән Турма йир верты ŏх ики пӑ ԓўв пиԓәԓән уԓәм ŏтәт йŏхәтмеԓән, синедрион пӑ Израиль пŏхәт эԓты уԓты ун икет хŏԓ вохсәԓаԓ пӑ касна хота апостоләт туты хŏйат китсәт.

²²Туп китыԓыйәм ŏтәт, йŏхәтмеԓән, ԓывиԓаԓ касна хотән ӑт уйәтсәԓәԓ пӑ, йŏхԓы йŏхәтмеԓән, йастәсәт,

²³пŏтәртман: «Касна хот мўӈ лӑп такан тухәрман уйәтсэв пӑ ов йэԓпийән ԓойты касна хот шавиты йохԓаԓ пиԓән; туп, пел пўшмевән, ԓыпийән нэмәԓты хŏйат ӑт уйәтсув».

²⁴Хун тӑм йасӈәт хуԓсәт Турма йир верты ŏх ики, Турәм Хот шавиты йох куща пӑ па Турма йир верты ŏх икет, ӑԓ щи нумәссәт: «А мўй тӑм».

²⁵А хŏй йŏхтәс пӑ ԓывиԓаԓа йастәс: «Щита щи, нын касна хота тухрыԓыйәм йохԓән, Турәм Хотән уԓԓәт пӑ мир утәԓтәԓәт».

²⁶Щиӈәԋща Турәм Хот шавиты йох куща ԓӑӈкәр йохԓаԓ пиԓән ԓынан ӑнта йур-вевән тусэԓ, мир эԓты пӑԓсәт, кевән ӑт ат сэксайәт, щишән.

²⁷Ԓывиԓаԓ тўвмеԓ йўпийән, синедрион хŏща ԓощәԓтәсԓаԓ; пӑ Турма йир верты ŏх ики ԓывиԓаԓ иԋщәссәԓы, пŏтәртман:

²⁸«Нынан мўӈ такан тӑм нэм эԓты утәԓтәты ӑт ат эсԓыԓысԓув? Тӑта щи, нын Иерусалим нын утәԓтәты щирԓәнән лӑп тэкәптәман пӑ Щи Хŏйат кӑԓы мўӈева нўра пŏнты ԓӑӈхаԓты».

²⁹Петра пӑ па апостоләт йŏхԓы йастәсәт: «Хŏйатәта пŏнман, мўӈев Турма аршәк хуԓәтты мосәԓ.

³⁰Мўӈ ащиԓув Турәм Иисус нŏх ԓыԓӈатәс, Хŏй нын, акԓа нŏх сэкман, пӑратсәԓән.

³¹Ԓўвеԓ Турәм Ԓўв йошәԓән Кущайа пӑ Нŏх пайәтты Ŏта пŏтсәԓы Израильа кӑрэк эԓты шӑнша керԓәты щир пӑ кӑрэк йŏрэмәты щир мӑты урәӈән.

³²Ԓўв хŏщайәԓ иса тӑм вантәм ŏтәт мўӈ пӑ Йэмәӈ Ԓыԓ, Хŏйтаԓ Турәм щитәта мӑс, хŏй Ԓўвеԓа хуԓәтәԓ».

³³Тӑм хуԓман, ԓыв ԉик эԓты пелки тохты уратԓәт пӑ ԓывиԓаԓ пӑратты нумисысәт.

³⁴Мӑтты Гамалиил нэмпи фарисей, Закона утәԓтәты ху, мирән хŏԓ сӑмәӈа тӑйԓа, синедрионән нŏх ԓойман, апостоләт сора кеша ким тутԓыты партсәԓы,

³⁵ԓывиԓаԓа пӑ йастәс: «Израиль йох! Нын щирәнән тӑм хŏйатәт эԓты нумәсаты, мўй нынан ԓыв пиԓԓаԓән верты.

³⁶Тӑм йэԓпийәншәк Февда, ԓўвеԓ ԓўв а хŏй ԓӑтәӈ хŏйата, айәԓтман, ус, пӑ ԓўв хŏщайәԓ ԋӑԓсот кем хŏйат пиԓтәщәс; туп ԓўв пӑратса, пӑ хŏԓ, хŏй ԓўвеԓ хуԓәнтәс, лакки мӑтсәт пӑ сэм ўш эԓты петсәт.

³⁷Ԓўв йўпеԓән хŏйат ԓат щирән хӑншәм пŏрайән Галилея эԓты уԓты Иуда этәс пӑ йӑм арат мир ԓўв йўпеԓа хўщәс; туп ԓўв пӑрәс, пӑ хŏԓ, хŏй ԓўвеԓ хуԓәнтәс, лакки питсәт.

³⁸Ин па, нынана пŏтәртԓәм, пўӈԓа мӑнаты тӑм хŏйатәт эԓты пӑ ԓывиԓаԓ хӑйаԓән; тӑм вер – хŏйатәт эԓты ки, ԓўв лакки шўкаԓәԓ,

³⁹Турәм эԓты ки, нын ԓўвеԓ шўкатты ӑт верәтԓәԓән; шаващаты, нын Турәм йэщаԓт уԓты аԓт питԓәты».

⁴⁰Ԓыв ԓўвеԓа хуԓмәсәт; пӑ, апостоләт йŏхԓы вохмеԓ йўпийән, ԓывиԓаԓ сэкты партсәԓаԓ пӑ, Иисус нэм эԓты пŏтәртты ӑт эсәԓмеԓ йўпийән, ԓывиԓаԓ эсәԓсәԓаԓ.

⁴¹Ԓыв пӑ синедрион эԓты мӑтсәт, амәтман, Турәм Куща Иисус нэм урәӈән нўр туты ўша питсәт.

⁴²Щӑԓта кашәӈ хӑтәԓ Турәм Хотән пӑ хотәтән Иисус Христос эԓты утәԓтәты пӑ Йӑм Айкеԓ туты ӑт вŏԓыԓысәт.

Ԓапәт ԋотәп ху пирыты вер

¹Тӑм хӑтԓәтән, хун утәԓтыты хŏйат арамәс, грек йасәӈән пŏтәртты иудейәт йэврей йасәӈән пŏтәртты иудейәт пеԓа айәԓта ўшмащты питсәт, щи урәӈән, мўйа ԓыв шукаԓ имиԓаԓ кашәӈ хӑтәԓ ԓэтŏт орттыйән мŏхты хӑйԓайәт.

²Щиӈәԋща кӑтхŏщйаӈ апостол, хŏԓ утәԓтәты йох йӑха ӑкәтман, йастәсәт: «Мўӈева йӑм хун, Турәм йасәӈ хӑйман, пӑсанәт пеԓа нумәсты.

³Пӑ щӑԓта, хӑнам йох, нын кўтән эԓты ԓэрамтәм йӑм, Йэмәӈ Ԓыԓән пӑ ŏшән–щащән тэкнәм, ԓапәт хŏйат пирыйаты: ԓывиԓаԓ тӑм вер верты ԓощәԓтәԓув.

⁴Мўӈ пӑ ивевән пойәк вер пӑ йасәӈ туты вер хŏща уԓты питԓув».

⁵Пӑ тӑм йастәм щир хŏԓ ӑктәщәм мŏхета рӑхи ус; пӑ Стефан, эвәԓты щирән пӑ Йэмәӈ Ԓыԓән тэкнәм ху, пӑ Филипп, пӑ Прохор, пӑ Никанор, пӑ Тимон, пӑ Пармен, пӑ Антиохия вош эԓты уԓты Николай, прозелита6:5 прозелит - словарьән ванты; уԓәм ху, пирысайәт;

⁶Ԓыв апостоләт йэщаԓт ԓощәԓтәсайәт, пӑ апостоләт пойәкщәсәт пӑ ԓыв нўмпиԓаԓа йошԓаԓ катәԓсәԓаԓ.

⁷Пӑ Турәм йасәӈ лакки ԓӑрпиԓәс, пӑ утәԓтәты хŏйатәт Иерусалимән йӑма арамәсәт; пӑ Турма йир верты икет эԓты ар пеләк ŏтәт эвәԓты вер пеԓа пайтәссәт.

Стефан ԋӑрэмәты вер

⁸Стефан пӑ, эвәԓты верән пӑ йурән тэкәнман, вŏԓаӈ вантыԓԓаӈәԓ верәт пӑ йэмәӈ посәт мир хŏща верәс.

⁹Тухәԓ, щиты айәԓты Либертинәт, пӑ Киринейәт, пӑ Александрийәт иудейәт пойәкщәты хот эԓты уԓты мŏхет, пӑ тухәԓ Киликия пӑ Асия эԓты уԓты мŏхет, Стефан пиԓән ўра вортты питсәт;

¹⁰туп ԓыв, Стефан Йэмәӈ Ԓыԓ йурән ŏшәӈа–щащәӈа пŏтәртәм щир йэщаԓт, нэмәԓты ԓощәԓтәты ӑт верәтсәт.

¹¹Щиӈәԋща ԓыв тухԓәт хӑԋайән йастәты утәԓтәсԓаԓ: «Мўӈ хуԓԓысэв, хŏты ԓўв нўрмәԓтты йасӈәт Моисей эԓты пӑ Турәм эԓты йастыԓыйәс».

¹²Щӑԓта мир пӑ уна уԓты икет, пӑ Закона утәԓтәты икет хўщсайәт пӑ, ӑратман, ԓўвеԓ ԋӑрэмәсэԓ пӑ синедриона тусэԓ.

¹³Щӑԓта ԋаԓмиты хŏйатәт этәԓтәсәт, хŏйтат пŏтәртсәт: «Тӑм хŏйат нўрасты йасӈәт Турәм Хот пӑ Закон пеԓа йастәты ӑт вŏԓыйәԓ.

¹⁴Мўӈ хуԓԓысэв, хŏты ԓўв пŏтәртәс, мӑтты Назарет эԓты уԓты Иисус тӑм Турәм хот шўкатԓәԓы пӑ мўӈева Моисейән мийәм уԓәпса щирәт па щира верԓәԓы».

¹⁵Пӑ хŏԓ, синедрионән опсәм ŏтәт, ԓўв пеԓайәԓ ватман, ԓўв вешәԓ ангел веш хŏрасән ватсэԓ.

Стефан по̆тәр

¹Щиӈәԋща Турма йир верты ŏх ики Стефан иԋщәссәԓы: «Тӑми щиты а мўй?»

²Туп ԓўв йастәс: «Хӑнам йох пӑ ащет! Хуԓәнтыйаты. Йэмәӈ нŏви Турәм мўӈ Авраам ащев хŏща Месопотамия мўвән этәс, Харран воша касәԓмаԓ йэԓпийән,

³пӑ ԓўвеԓа йастәс: ’Нӑӈ мўвен эԓты пӑ нӑӈ рутэн эԓты пӑ нӑӈ ащен хот эԓты эта пӑ мӑты мўв нӑӈена аԉԓәм, щи мўва мӑна’.

⁴Щиӈәԋща ԓўв Халдей мўв эԓты этәс пӑ Харран вошән уԓты хӑр ԓэщатәс; щиԓта пӑ, ԓўв ащеԓ пӑрмаԓ йўпийән, Турәм ԓўвеԓ тӑм мўва касԓәптәсԓы, хŏта ин нын уԓԓәты.

⁵Пӑ ԓўвеԓа и кўр лоп арат йўкан тӑм мўвән ӑт мӑс. Туп Турәм ԓўвеԓа пӑ ԓўв ԋавремԓаԓа тӑм мўв тӑйты урәӈән мӑты йастәсԓы, щи пŏрайән хŏԓна Авраам и ԋавремийэ ӑт тӑйәс.

⁶Щӑԓта Турәм ԓўвеԓ йастәс, ԓўв ԋавремԓаԓ па мўвән касԓәм хŏйатәта питԓәт пӑ па мўв хŏйатәта тынԓы-пелԓы рупата ԋўрты7:6 рупата ԋўрты - шек такан пӑ ԓавәртан рупитты; питԓәт, щӑԓта йэрмәԓтты уԓәпсайән ԋӑԓсот кем тӑԓ уԓты питԓәт.

⁷’Туп Ма’, - Турәм йастәс, - ’щи мир хŏща сўт верԓәм, хŏй хŏща ԓыв тынԓы-пелԓы рупата ԋўрԓәт; пӑ щи йўпийән ԓыв щиԓта этԓәт пӑ тӑм уԓты тӑхайән Мӑнэма йир туты питԓәт’.

⁸Пӑ Турәм Авраама эвәтты щир йастантәпса7:8 эвәтты щир йастантәпса - словарьән ванты; мӑс. Авраам Исаак сэма пайтәс пӑ ԋийәԓмет хӑтәԓән эвәтты верән версәԓы; Исаак Иаков сэма пайтәс, Иаков пӑ – кӑтхŏщйаӈ опращ икет.

⁹Ун ԓӑтәӈ опращ икет, сӑмԓаԓ щариты пӑтыйән, Иосиф Египта тынысэԓ; туп Турәм ԓўв пиԓәԓән ус,

¹⁰пӑ ԓўвеԓ иса кӑмән хŏрпи шук эԓты хŏԓт павәтсәԓы, пӑ ŏш–щащ пӑ фараон, Египет хон йӑм сӑм ԓўвеԓа мойԓәсԓы, щи хонән ԓўв Египет хŏща пӑ ԓўв хон хотәԓ хŏща иса кущайа пŏтса.

¹¹Щӑԓта ԓэԓԓы пŏра пӑ ун шук Египет пӑ Ханаан мўвӈән ԓŏвата иса йŏхтәс, пӑ мўӈ ащиԓув ԓэтŏт ӑт уйтыԓысәт.

¹²Иаков пӑ, Египетән ԋаԋ ԓат сэм уԓты хуԓмаԓ кемән, мўӈ ащиԓув оԓәӈмет пўш щи китсәԓы.

¹³Хун кимет пўш [ԓыв тŏхи йŏхәтсәт], Иосиф ԓўв йайԓаԓа аԉәсәс, пӑ Иосиф рут фараон хонән уйәтты питса.

¹⁴Щи йўпийән Иосиф ԓўв Иаков ащеԓ пӑ хŏԓ ԓўв рутԓаԓ вохты партсәԓы, ԋийәԓйаӈ пеԓа вет арат хŏйат ус.

¹⁵Иаков Египта ўншәс, пӑ щита пӑрәс пӑ мўӈ ащиԓув па;

¹⁶Пӑ Сихем воша тўвман пӑ хŏшапәӈ кев ԓыпийа7:16 хŏшапәӈ кев ԓыпийа - щит ԓэԓтŏт, хŏԓта пӑрәм хŏйат пŏнԓа; пŏнман усайәт, щи тӑха Авраам щелŏхән Сихемән уԓты Еммор пŏхәт эԓты ԓутсәԓы.

¹⁷Щи мŏртән, хун аԉәм вер тӑԓаӈа йиты пŏра ванамәты питәс, мўй эԓты Турәм Авраама так йасәӈ мийԓыйәс, мирәԓ Египетән энмәԓтыйәс пӑ арамийәс,

¹⁸щи унты, хун па хон питәс, хŏй Иосиф ӑт уйәтсәԓы.

¹⁹Ԓўв, мўӈ рутэв йэщаԓт ŏщмарԓыман, мўӈ ащиԓув йэрмәԓтысԓы, ԓывиԓаԓа ай ԋавремԓаԓ йовәԓты партсәԓы, ԓыԓӈа ӑт ат хӑщсәт.

²⁰Тӑм пŏрайән Моисей сэма питәс, Турәм йэԓпийән хŏрасәӈ ус. Хуԓәм тыԓәщ ԓўв ащеԓ хотән эсәмән ԓапәтман ус.

²¹Хун вŏщкәса, фараон эвийән ўса пӑ ԓўв хŏщайәԓ, ԓўв пŏхәԓ иты, энмәԓтсәԓы.

²²Пӑ Моисей аратәԓ иса Египет ŏша–щаща утәԓтәма ус, йасәӈԓаԓән пӑ верԓаԓән йўрәӈ ус.

²³Хун пӑ ԓўв ԋӑԓйаӈ тӑԓа йис, ԓўв хӑнам йохԓаԓ, Израиль пŏхәт, хŏща йӑхты нŏмәсән йŏхәтса.

²⁴Пӑ, ԓыв эԓтыԓаԓ ит, атмащ йэшаԓәты кащаԓәмаԓ кемән, эԓт питсәԓы. Пӑ кетмәм ŏт урәӈән Египет ху пӑратсәԓы.

²⁵Моисей нумәсәс, ԓўв хӑнам йохԓаԓ ŏша пайәтԓәԓаԓ, ԓўв йошәԓ сӑхат ԓывиԓаԓа Турәм нŏх пайтәсты щир мӑԓ; тўп ԓыв ŏша ӑт пайәтсэԓ.

²⁶Кимет хӑтәԓ, хун ԓыв эԓтыԓаԓ кӑтән кўтәрмәстән, ԓўв йŏхтәс пӑ ԓынан йӑм щира уԓты пеԓа хўщиԓысԓы, пŏтәртман: «Нын – хӑнам йохӈән; мўйа кўтԓәнән йэшащԓәтән?»

²⁷Туп рутәԓ йэшаԓәты ŏт ԓўвеԓ йэԓ пŏткәсԓы, йастәман: ’Хŏйән нӑӈ мўӈ нўмпева кущайа пӑ сўт икийа пŏтсайән?

²⁸Нӑӈ мосәӈ мӑнэм па веԓты ԓӑӈхаԓән, хŏты мŏԓхатәԓ Египет ху веԓсэн?’

²⁹Тӑм йасӈәт эԓты Моисей хŏнтас пӑ Мадиам мўв хŏща йŏхтәм хŏйата йис, щита ԓўв эԓтэԓ кӑт пŏх сэма питәс.

³⁰Ԋӑԓйаӈ тӑԓәԓ тэкнәм йўпийән Синай кев таԓ хишәӈ мўвән тўтән ԓэты пеԓантыты варәс похәл кўтән Моисей йэщаԓт Турәм Куща ангел этәс.

³¹Моисей, щит шийаԓәмаԓ кемән, щи ныты ŏт эԓты пакнысыйәс; хун йӑма вантыты урәӈән, вана шушәс, ԓўв Турәм Куща тўр сый хуԓмәс:

³²’Ма нӑӈ ащиԓан Турәм, Авраам Турәм пӑ Исаак Турәм пӑ Иаков Турәм’. Моисей, хŏрщәм эԓты тӑрыман, йэщаԓт ватты ӑт веритәс.

³³Щӑԓта Турәм Куща ԓўвеԓа йастәс: ’Нӑӈ кўрԓан эԓты ԓумтәмен хŏԓт эӈхи, щи тӑха, хŏта нӑӈ ԓойԓән - щит йэмәӈ мўв.

³⁴Ма Египетән Ма мирэм шукатты вер ватԓәм, пӑ ԓўв эӈәԓты сыйәԓ хуԓԓәм, пӑ ԓўвеԓ хŏԓт пайәтты иԓ эсԓәщсәм: Щиӈәԋща, мӑна, Ма нӑӈен Египта китԓэм’.

³⁵Тӑм Моисей, хŏй ԓыв вана ӑт ўсэԓ, йастәман: ’Хŏйән нӑӈ мўӈ нўмпева кущайа пӑ сўт икийа пŏтсайән?’ Турәм кущайа пӑ хŏԓт пайәтты ŏта китсәԓы ангеләԓ сӑхат, хŏй ԓўвеԓа пеԓантыты варәс кўтән этԓыйәс.

³⁶Тӑм Моисей Египет мўвән, пӑ Ўрты щарәсән, пӑ таԓ мўвән вантыԓԓаӈәԓ верәт пӑ йэмәӈ посәт ԋӑԓйаӈ тӑԓ хўват верман, ԓывиԓаԓ Египет эԓты йэԓ тусԓы.

³⁷Тӑми щи Моисей, хŏй Израиль пŏхәта йастәс: ’Турәм айкеԓ туты хŏйат нынана Турәм Куща нын Турмән нын хӑнам йохԓән кўт эԓты ма итэмән мӑԓ; Ԓўвеԓ хуԓәнтаты’.

³⁸Тӑми щит, хŏй таԓ мўвән ӑктәщәм Израиль мир хŏща ангел пиԓән пӑ мўӈ ащиԓув пиԓән ус, ангел Синай кев ԓоӈәԓән ԓўв пеԓайәԓ пŏтәртәс, пӑ ԓўв ԓыԓәӈ йасӈәт вана ўсԓы, мўӈева мӑты урәӈән,

³⁹хŏй пеԓа мўӈ ащиԓув хуԓәтты ŏтәта уԓты ӑт ԓӑӈхасәт, ԓўвеԓ пўӈԓа хирәтсэԓ пӑ ԓўв сӑмԓаԓән Египет пеԓа керԓәсәт,

⁴⁰Аарона йастәман: ’Мўӈева ԓуӈхәт вера, хŏйтат мўӈ йэԓпевән ԓуԓән ат мӑтсәт ; Моисей, мўӈев Египет мўв эԓты йэԓ тувәм ŏтэв, ӑт уйәтԓэв, хŏты йис’.

⁴¹Пӑ щи хӑтԓәтән мис хŏр версәт, пӑ щи ԓуӈха йир тусәт, пӑ ԓыв йошԓаԓән верәм вер йэԓпийән каш версәт.

⁴²Турәм пӑ шӑшән керԓәс пӑ ԓывиԓаԓ турәм хӑр пŏрмасәт пеԓа пойәкщәты хӑйсәԓы, хŏты Турәм айкеԓ туты хŏйатәт нэпекән хӑшман уԓԓа: ’Израиль хот! Нын мўй войәт пӑ йирәт ԋӑԓйаӈ тӑԓ сыс таԓ мўв хŏща Мӑнэма тутԓысты?

⁴³Нын Молох ԓух хӑшап пӑ Ремфан нэмпи хус ԓуӈхән7:43 Ремфан нэмпи хус ԓух - ԓўв иԓампа Сатурн нэмпи хус хŏр тӑйәс;, нын верәм хŏрԓән, пӑтән ўсԓән, ԓывиԓаԓа пойәкщәты урәӈән: пӑ Ма нынан Вавилон эԓты йэԓшәк касԓәптәԓԓам’.

⁴⁴Вантәм ŏт Йэмәӈ Хӑшап7:44 Вантәм ŏт Йэмәӈ Хӑшап - словарьән ванты; мўӈ ащиԓув хŏща таԓ мўвән ус, хŏты Пŏтәртәм Ŏт Моисейа ԓўвеԓ верты партсәԓы, щи ԓўв вантәм ŏтәԓ хŏрпийа.

⁴⁵Щи Йэмәӈ Хӑшап, йоша пайәтмеԓ йўпийән, мўӈ ащиԓув, Иисус Навин ԓыв хŏщайэԓ ŏха уԓман, мирәт тӑйты мўва ԓŏӈәԓсэԓ, Турәм, ԓыв йэԓпеԓән, мўвәӈ хŏйатәт воштәсԓы. Тӑмиты Давид хӑтԓәт унты ус.

⁴⁶Тӑми Турәм хŏща йӑм мŏщатәс пӑ пойәкщәс, Иаков Турма уԓты тӑха ԓэщатты урәӈән.

⁴⁷Соломон пӑ Ԓўвеԓа хот опсәс.

⁴⁸Туп Нўм Ащи ӑнтом йошән опсәм хотәтән уԓ, хŏты Турәм айкеԓ туты хŏйат пŏтәртәԓ:

⁴⁹’Турәм хӑр – ма хон омәсты тӑхайэм, пӑ мўв – Ма кўр иԓпем. Мўй хŏрпи хот Мӑнэма верԓәты, Турәм Куща пŏтәртәԓ, мўй хŏрпи тӑхайән Ма щўтщәты верем уԓ?

⁵⁰Ӑнта мўй Ма йошем тӑм иса тыйәԓтәс?’

⁵¹Нын - ўрайәӈ ŏтәт! Ӑт эвтәм сӑмпи пӑ ӑт эвтәм пӑԓпи хŏйатәт7:51 Ӑт эвтәм сӑмпи пӑ ӑт эвтәм пӑԓпи хŏйатәт - Турма ӑт хуԓәтты, ӑт эвәԓты хŏйатәт;! Нын иса Йэмәӈ Ԓыԓ йэщаԓт уԓԓәты, хŏты нын ащиԓән, щиты нын па.

⁵²Турәм айкеԓ туты хŏйатәт эԓты нын ащиԓәнән хŏй ӑт воштәса? Ԓыв Вещкат Ŏт йŏхәтты айкеԓ йэԓпи йастәм ŏтәт веԓсәԓаԓ, Хŏй хŏща хŏйат аԉты пӑ веԓты ŏтәта ин нын верәссәты, –

⁵³нынана ангеләт сӑхат мийәм Закон вана ўйман йўпийән, нын ӑт шависԓын».

Стефан пӑратты вер

⁵⁴Тӑм хуԓәтман, ԓыв ԉикән кавәрмәсайәт пӑ ԓўв пеԓайәԓ пекԓаԓән йухрәԓсәт.

⁵⁵Стефан пӑ, Йэмәӈ Ԓыԓән тэкәнман уԓман, турәм хӑр пеԓа ӑӈкәрмәс, Турәм хутԓәты–вŏрԓәты щир пӑ Иисус, Турәм йӑм пеләк сӑхат ԓойтаԓ шийаԓәс,

⁵⁶пӑ йастәс: «Тӑм, лоӈхемәм опәԉ пӑ Хŏйат Пŏх, Турәм йӑм пеләк сӑхат ԓойтаԓ ма ватԓәм».

⁵⁷Туп ԓыв, сыйәӈ тўрән уваԓтман, пӑԓаԓ лӑп катәԓсәԓаԓ, пӑ и сӑмән ԓўв хŏщайәԓ ӑратсәт,

⁵⁸пӑ, вош ким пелка тувман, кевән ԓўвеԓ йовәԓты питсэԓ. Вантәм хŏйатәт пӑ ԓыв ԓумәтты сŏхԓаԓ Савл нэмпи, айкам ху кўрнат шŏма пŏтсәԓаԓ,

⁵⁹пӑ Стефан кевән йовәԓсэԓ, ԓўв пойәкщәс пӑ пŏтәртәс: «Турәм Куща Иисус! Ма ԓыԓэм ўйи».

⁶⁰Пӑ, шашӈәԓаԓ иԓ морәтман, сыйәӈ тўрән ўваԓтәс: «Турәм Куща! Ԓывиԓаԓа тӑми кӑрека аԓ нуми». Щӑԓта, щит йастәмаԓ кемән, пӑрәс.

Савл пойәкщәты хŏйатәт ԋухәтԓыԓԓы

¹Савл пӑ Стефан пӑратты вер пеԓа такан ус. Щи хӑтԓәтән Иерусалимән пойәкщәты хŏйатәт ӑктәщиты вер пеԓа вŏԓаӈ ун ԋухәтԓыты щир тыйәс; пӑ хŏԓ, апостоләт тўмпийән, Иудея пӑ Самария ԓŏвата лакки мӑтсәт.

²Стефан пӑ Турма эвәԓты хŏйатәтән иԓ лоттәса пӑ ԓўв урӈәԓән вŏԓаӈ ун хоԓԓәп хоԓԓәса.

³Савл пӑ пойәкщәты хŏйатәт йэшаԓәс, хотәта ԓŏӈтыман, йох пӑ нэӈәт ԋӑрэмәман, касна хота мийԓысԓы.

Йӑм Айкеԓ Самарияйа туты вер

⁴Щи кўтән лакки мӑнәм ŏтәт йӑӈхиԓысәт пӑ Йӑм Айкеԓ тутԓысәт.

⁵Щиты, Филипп Самария мўв воша йŏхтәс пӑ Христос эԓты пŏтәртәс.

⁶Мир и сӑмән хуԓәтсәт щит пеԓа, мўй Филипп пŏтәртәс, хуԓман пӑ ватман, мўй хŏрпи вантыԓԓаӈәԓ верәт ԓўв верәс.

⁷Катәԓман уԓәм ар хŏйат эԓты кўԉ сŏхәт такан щӑлыман, ким этыԓысәт, ар пеләк щащԓы питәм ŏтәт пӑ нохты хŏйатәт тўмтака йўвиԓысәт.

⁸Щӑԓта щи вошән вŏԓаӈ ун амәт ус.

⁹Щи вошән ий ики ус, нэмәԓән Симон, хŏй щи йэԓпийән щӑртыԓыйәс, ԓўвеԓ ԓўв ԓӑтәӈ хŏйата айәԓман, Самария мир пакнәптыйәс.

¹⁰Ԓўвеԓа айэԓ-унэԓән хŏԓ хуԓәтсәт, йастәман: «Тӑм – Турәм вŏԓаӈ йур».

¹¹Ԓўвеԓа щи пӑтыйән хуԓәтсәт, ԓўв ԓывиԓаԓ щӑртԓаԓән мŏԓты хўват пакнәптысԓы.

¹²Туп хун Филиппа, Турәм Хон Уԓәпса пӑ Иисус Христос нэм эԓты Йӑм Айкеԓ пŏтәртты ŏта, эвәԓсәт, йох пӑ нэӈәт кашащсәт, йиӈка ат ԓŏӈәԓтысайәт.

¹³Симон ԓўв па эвԓәс пӑ, йиӈка ԓŏӈәԓтыйәм йўпийән, Филипп эԓты пўӈԓа ӑт мӑныԓыйәс; пӑ, ԓӑтәӈ вантыԓԓаӈәԓ йурәт пӑ йэмәӈ посәт ватман, ӑԓ пакнысыйәс.

¹⁴Иерусалимән уԓты апостоләт, Самария хŏйатәт Турәм йасәӈ вана ўйәм айкеԓ хуԓмеԓ кемән, Петра пӑ Иоанн ԓыв хощайэԓ китсәт,

¹⁵ԓын, йŏхәтман кемән, ԓыв урәӈԓаԓән пойәкщәсӈән, ԓыв Йэмәӈ Ԓыԓ ԓуԓән вана ат ўсәт.

¹⁶Йэмәӈ Ԓыԓ хŏԓна ԓыв эԓтыԓаԓ ита нэш ӑт эсԓыщийәс, туп ԓыв Турәм Куща Иисус нэм хўватән йиӈка ԓŏӈәԓтыман усайәт.

¹⁷Щишән ԓыв эԓтыԓаԓа йошԓән пŏтсәԓән, пӑ ԓыв Йэмәӈ Ԓыԓ вана ўсэԓ.

¹⁸Симон пӑ, Йэмәӈ Ԓыԓ апостоләт йош пŏнты сӑхат мӑты щир шийаԓәмаԓ кемән, ԓынана ŏх тус,

¹⁹щиты пŏтәртман: «Мӑнэма па тӑм йур мийатән, щи хŏйат, хŏй эԓты ма йошԓам пŏнԓәԓам, Йэмәӈ Ԓыԓ ат ўс».

²⁰Туп Петра ԓўвеԓа йастәс: «Нӑӈ щелŏхен нӑӈ пиԓэнән сŏрма ат йиԓ, нӑӈ Турәм мŏйԓәпса ŏх сӑхат мŏщатты нумәссән, щишән.

²¹Нӑӈена тӑми хŏща нэмәԓт шўк пӑ пирыйәм вер ӑнтом, нӑӈ сӑмен Турәм пеԓа ӑнта вещкат.

²²Щиӈәԋща, тӑм кӑрэкен эԓты шӑнша керԓа пӑ Турма пойәкща: мосәӈ нӑӈ атәм нŏпсэн нӑӈена хŏԓт йŏрэмәԓа;

²³Нӑӈен вŏщрэм сыпән тэкәнман иты пӑ ӑнта вещкат щирәтән йӑрман иты ватԓэм».

²⁴Симон пӑ йŏхԓы йастәс: «Ма урӈема Турәм Кущайа пойәкщаты, ма, нын йастәм ŏтԓән щира, нэмәԓтыйән ӑт ат хойсайәм».

²⁵Ԓын пӑ, вантәм ŏтәта уԓман пӑ Турәм Куща йасӈа утәԓтәман, йŏхԓы, Иерусалима, мӑтсәтән пӑ ар Самария вошәтән–куртәтән Йӑм Айкеԓ эԓты пŏтәртсәтән.

Ефиопия нэ хон куща йиӈка ԓŏӈәԓтыты вер

²⁶Турәм Куща ангел пӑ Филипп пеԓа йастәс: «Ԓойа пӑ мӑна хӑтәԓ кутәп пŏра шŏма8:26 хӑтәԓ кутәп пŏра шŏма - нўм вот пеләк пеԓа, Иерусалим эԓты Газайа мӑнты таԓ йуш хŏща».

²⁷Ԓўв ԓойәс пӑ мӑнәс. Щӑԓта ин, Ефиоп мўвәӈ евнух8:27 евнух - Египетән пӑ Ефиопияйән тухәԓ йох хŏйатәт хŏща хоптыйәм ху ики, Ефиопия нэ хон Кандакия8:27 "Кандакия" - щи нэмән Эфиопия хон нэӈәт айәԓтсайәт, хŏты "фараон" нэмән хŏԓ Египет хонәт айәԓтсайәт. куща, ԓўв сорԋиԓаԓ шавиты куща ху, Иерусалима пойәкщәты урәӈән йŏхтыԓыйәс,

²⁸йŏхԓы мӑнмаԓән пӑ, ԓўв ухԓәԓән омәсман, Турәм айкеԓ туты хŏйат Исаия хӑншәм нэпек ԓўӈтәс.

²⁹Ԓыԓ Филиппа йастәс: «Тӑм ухәԓ ԉэпа вана мӑна пӑ ԓўв пўӈԓәԓән шуша».

³⁰Филипп вана йŏхтәс пӑ, тўмеԓ Турәм айкеԓ туты хŏйат Исаия хӑншәм нэпек ԓўӈәтмаԓ, хуԓмаԓ кемән, йастәс: «Нӑӈ мўй уйәтԓэн, мўй ԓўӈәтԓән?»

³¹Ԓўв йастәс: «Мўй щирән уйәтԓэм, мӑтты ŏтән ӑт аԉԓайәм ки?» Пӑ Филипп нŏх хухты пӑ ԓўв пўӈԓәԓа омәсты партсәԓы.

³²Хӑншәм Ŏт хŏща ԓўӈтәм тӑхайәԓ щит ус: «Ош иты Ԓўв хŏртыйа тўвман ус, пӑ, ош пŏшәх иты ԓўвеԓ ԓŏртты ŏтәԓ йэԓпийән тўр сыйԓы уԓ, щиты щи Ԓўв ўӈԓәԓ пелки ӑт пўшԓәԓы.

³³Ԓўв иԓ ԋэрәм щирән Ԓўв сўтәԓ йэтшәс. Туп Ԓўв рутәԓ хŏйән эԓпа аԉԓа? Ԓўв уԓәпсайәԓ мўв эԓты нŏх лакәптәԓа».

³⁴Евнух пӑ Филипп пеԓа йастәс: «Нӑӈ щи ԓŏват йӑм вера, йаста: хŏй эԓты Турәм айкеԓ туты хŏйат тӑми пŏтәртәԓ? Ԓўв эԓтэԓ мўй пӑ па хŏйат эԓты?»

³⁵Филипп ўӈԓәԓ пел пўшсәԓы пӑ, тӑм Хӑншәм Ŏт эԓты ўйман, ԓўвеԓа Иисус эԓты Йӑм Айкеԓ тус.

³⁶Щи кўтән, йэԓԓы мӑнтан эԓты, ԓын йик ԉэпа йŏхәтсәтән; пӑ евнух ики йастәс: «Тӑта щи йик; мӑнэма нӑӈ эԓтэн йиӈка ԓŏӈәԓтыты мўй тŏрас верәԓ?»

³⁷Филипп пӑ ԓўвеԓа йастәс: «Сӑмен ԓоватән эвәԓԓән ки, рӑхәԓ». Ԓўв йŏхԓы йастәс: «Эвәԓԓәм, Иисус Христос – щит Турәм Пŏх».

³⁸Щӑԓта ухәԓ иԓ вŏԓыты партсәԓы, пӑ , Филипп пӑ евнух ики кинәӈтак йиӈка ŏхәԓсәтән; пӑ ԓўвеԓ йиӈка ԓŏӈәԓтысԓы.

³⁹Хун пӑ ԓын йик эԓты ким этсәтән, Йэмәӈ Ԓыԓ евнух ики эԓты эсԓәщәс, Филипп пӑ Турәм Куща ангелән аԓэмәса, пӑ евнух ики ԓўвеԓ ўш ӑт ватсәԓы, пӑ, амәтман, йушәԓ йэԓԓы мӑтсәԓы.

⁴⁰Филипп пӑ Азотән ԉикмантәс пӑ, мŏхты шушман, вошәтән иса Йӑм Айкеԓ эԓты пŏтәртәс, Кесарияйа йŏхәтмаԓ унты.

Савл Иисуса эвәԓты питты щир

¹Савл пӑ, Турәм Куща утәԓтәты хŏйатәт пеԓа ԉикән кавәрман пӑ веԓтатты номәсән тэкәнман, Турма йир верты ŏх ху хŏща йŏхтәс

²пӑ ԓўв эԓтэԓ айкеԓ нэпек Дамаск вош иудейәт пойәкщәты хотәт урәӈән вохәс. Ԓўв хŏй, тӑм утәԓтәты вер йўпи туты хŏйат, уйәтәԓ, йохәт мўй пӑ нэӈәт мŏщатты пӑ Иерусалима йŏхтәптәты ат верәтсәԓԓы.

³Хун йушән ԓўв Дамаск воша ванамәты питмаԓән, шӑмкапан турәм хӑр эԓты ԓўв нŏвийән похәтса.

⁴Ԓўв мўва иԓ рӑкнәс пӑ тўр сый хуԓтмәс, ԓўв пеԓайәԓ пŏтәртты сый: «Савл, Савл! Мўйа Мӑнэм ԋухәԓԓэн?»

⁵Ԓўв йастәс: «Хŏй Нӑӈ, Турәм Куща?» Турәм Куща пӑ йастәс: «Ма Иисус, Хŏйтэн нӑӈ ԋухәԓԓән. Нӑӈен карты йущәӈ йўх йэщаԓт мӑнты ԓавәрт».

⁶Ԓўв, тӑрыман пӑ пӑԉщәмән иԉапман, йастәс: «Турәм Куща! Мўй верты мӑнэм партԓэн?» Щӑԓта Турәм Куща ԓўвеԓа йастәс: «Нŏх ԓойа пӑ воша мӑна; пӑ нӑӈена йастәԓа, мўй нӑӈен верты мосәԓ».

⁷Ԓўв пиԓәԓән шушәм хŏйатәт пӑ сӑм мӑнман ԓойсәт, тўр сый хуԓман, пӑ нэмәԓты хŏйат ӑт шийаԓәман.

⁸Савл мўв эԓты нŏх ԓойәс пӑ пелки сэмән ԓўвеԓа нэмәԓты ӑт ныса. Щӑԓта йош пелкәԓ эԓты катәԓман туты питса, пӑ Дамаск воша йŏхтәптәса.

⁹Щӑԓта хуԓәм хӑтәԓ ԓўвеԓа нэмәԓт ӑт ныса, пӑ ӑт ԓэс, пӑ ӑт йиԋщәс.

¹⁰Дамаскән и утәԓтәты хŏйат ус, нэмәԓән Анания; пӑ Анания вантәм верәԓ хŏща Турәм Куща ԓўвеԓа йастәс: «Анания!» Ԓўв йастәс: «Тӑм Ма, Турәм Куща».

¹¹Турәм Куща пӑ ԓўвеԓа йастәс: «Ԓойа пӑ, щиты айәԓтты Тўӈ вош хўлыйа, мӑна, пӑ Иуда хот хŏща Тарс вошәӈ ху иԋщәсы, нэмәԓән Савл; ԓўв ин пойәкщәԓ.

¹²Пӑ вантәм верәԓ хŏща Анания нэмпи ху вантәс, ԓўв хŏйщайәԓ йŏхәтәԓ пӑ ԓўв эԓтэԓ йошәԓ пŏнԓәԓы, ԓўв сэмәӈа ат йис».

¹³Анания йŏхԓы йастәс: «Турәм Куща! Ма ар хŏйат эԓты тӑм хŏйат эԓты хуԓԓысэм, мўй арат атәм ԓўв Нӑӈ хŏйатԓана Иерусалимән верәс;

¹⁴Тӑта па Турма йир верты ŏх икет эԓты хŏԓ, Нӑӈ нэмен вохты хŏйатәт йӑрты, йур тайәԓ».

¹⁵Туп Турәм Куща ԓўвеԓа йастәс: «Мӑна, ԓўв Ма пирыйәм пўтэм, Ма нэмем мир пӑ хонәт пӑ Израиль пŏхәт йэщаԓт такан йастәты урәӈән.

¹⁶Пӑ Ма ԓўвеԓа этәԓтәԓэм, мўй арат Ма нэмем урәӈән ԓўвеԓа шукащты мосәԓ».

¹⁷Анания мӑнәс пӑ хота ԓŏӈәс, йошӈиԓаԓ ԓўв эԓтэԓ пŏнман, йастәс: «Савл хӑнам ху! Йушән, хŏԓща нӑӈ шушсән, нӑӈ хŏщайэн этԓыйәм Турәм Куща Иисус, мӑнэм китсәԓы, нӑӈ сэмәӈа ат йисән пӑ Йэмәӈ Ԓыԓән ат тэкәтсайән».

¹⁸Пӑ щи пўԉаӈ сэмӈиԓаԓ эԓты ищи мӑтты сом хŏԓт рӑкнәс, пӑ ԓўв шамкапан сэмәӈа йис; нŏх ԓойәс пӑ йиӈка ԓоӈәԓтыса,

¹⁹щӑԓта, ԓэтŏт ԓэвмаԓ йўпийән, такамәс.

Савл Дамаск вошән Иисус эԓты Йӑм Айкеԓ туты вер

Пӑ Савл кӑмәтса хӑтәԓ утәԓтәты йох пиԓән Дамаскән ус.

²⁰Пӑ щи пўԉаӈ иудейәт пойәкщәты хотәтән Иисус эԓты айкеԓ туты питәс, «Ԓўв – Турәм Пŏх».

²¹Щӑԓта хŏԓ хуԓәнтәм хŏйатәт аԓ пакнысысәт пӑ пŏтәртсәт: «Тӑм ӑнта мўй щит, хŏй Иерусалимән тӑм нэм вохты ŏтәт воштыԓыйәс? Йӑна щи пӑ щи урәӈән ты йŏхтәс, ԓывиԓаԓ мŏщатты пӑ Турма йир верты ŏх икет хŏща туты».

²²Савл пӑ щи киԋща па такамтыйәс пӑ Дамаскән уԓты иудей йох ԓыԓԓәты унты йŏхтәптәсԓы, такан аԉман, Тӑми – Христос9:22 Христос -словарьән ванты;.

²³Хун пӑ йӑм арат хӑтәԓ хӑщәм йўпийән, иудей йох ԓўвеԓ пӑратты нŏмәс версәт.

²⁴Туп Савл ԓыв тӑм нŏпсэԓ мŏштәсԓы. Ԓыв пӑ атаӈ хӑтәԓ вош пушас ов хŏща ԓавԓәссәт, ԓўвеԓ веԓты урәӈән.

²⁵Утәԓтыты йох пӑ атәԓән, ԓўвеԓ ўсэԓ пӑ вош кертәм пӑԓ пушас эԓты кураԋэк ԓыпийән иԓ эсәԓсэԓ.

Савл Иерусалимән

²⁶Савл Иерусалима йŏхтәс пӑ утәԓтыты хŏйатәт хŏща ԓŏӈты ўратәс; туп хŏԓ ԓўв эԓтайәԓ пӑԓсәт, ԓўв утәԓтыты хŏйата уԓтыйа, ӑт эвәԓԓа.

²⁷Варнава пӑ ԓўвеԓ ўсԓы пӑ апостоләт хŏща тусԓы пӑ ԓывиԓаԓа пŏтәртсәԓы, хŏты йуш хŏща ԓўв Турәм Куща ватсәԓы, пӑ мўй ԓўвеԓа Турәм Куща пŏтәртәс, пӑ хŏты ԓўв Дамаскән, ӑт пӑԓман, Иисус нэм урәӈән айкеԓ тус.

²⁸Щӑԓта ԓўв ԓыв пиԓԓаԓән ус, лыпаща Иерусалим ԓŏватән йӑӈхиԓыйәс пӑ Турәм Куща Иисус нэм урәӈән ӑт пӑԓман айкеԓ тус.

²⁹Ищиты грек йаcәӈән пŏтәрты иудейәт пиԓән пŏтәртәс пӑ ўра вортәс; ԓыв пӑ ԓўвеԓ веԓты ўтщисэԓ.

³⁰Хӑнам йохԓаԓ, тӑми мŏштәмеԓ кемән, Кесарияйа ԓўвеԓ тусэԓ пӑ Тарс воша китсэԓ.

³¹Пŏйәкщәты мŏхет пӑ Иудея мўв ԓŏватән, Галилея пӑ Самария ԓŏватән рома усәт, утәԓтыман пӑ Турәм Куща эԓты пӑԓман усәт; щӑԓта Йэмәӈ Ԓыԓән такапман, арамисәт.

Петра Лиддайән пӑ Иоппияйән

³²Щиты тыйәс, Петра, хŏԓ мŏхет лӑп йӑхман, Лидда вошән уԓты эвәԓты мŏхет хŏща йŏхтәс.

³³Щита ԓўв Энея нэмпи и хŏйат уйтәс, хŏй ԋийәԓ тӑԓ ŏԓттӑхайәԓән, щащԓы питман, ŏԓәс.

³⁴Петра ԓўвеԓ йастәс: «Эней! Нӑӈ Иисус Христосән тўмтака верԓайән; ŏԓттӑхайэн эԓты нŏх ԓойа». Пӑ ԓўв ищи мŏхты нŏх ԓойәс.

³⁵Пӑ ԓўв Лиддайән пӑ Саронән уԓты хŏйатәтән хŏԓ ватса, пӑ Турәм Куща пеԓа ӑӈкәртсәт пӑ эвәԓсәт.

³⁶Иоппия вошән и утәԓтәты нэ ус, нэмәԓ Тавифа - щит «газель9:36 газель - щит хошәм мўвән уԓты ўԓы;»; ԓўв сӑмәӈ верәтән тэкәнман уса пӑ ар йӑм вер верәс.

³⁷Щи хӑтԓәтән вер тыйәс, ԓўв кӑшаӈа йис пӑ пӑрәс. Ԓўв ԉŏхәтса пӑ нўм хот йӑта пŏтса.

³⁸Лидда пӑ Иоппия вош ԉэпән ванән ус, утәԓтәты йох Петра щита уԓты хуԓмеԓ кемән, ԓўв хŏщайәԓ кӑт хŏйат китсайтән, ԓўвеԓ вохты, ԓыв хŏщайэԓ йŏхәтты ԓўв ӑт ат рŏнәс.

³⁹Петра ԓойәс пӑ ԓын пиԓанән мӑнәс; пӑ хун ԓўв йŏхтәс, нўм хот йӑта ԓўвеԓ тусэԓ, пӑ хŏԓ шукаԓт нэӈәт, хоԓԓәман, ԓўв йэԓпәԓа ԓойсәт, йэрнасәт аԉиԓыман, Тавифа ԓыв пиԓԓаԓән уԓмаԓән верыԓыйәм ŏтԓаԓ.

⁴⁰Петра мŏхет хŏԓ ким партсәԓы пӑ, шанша иԓ эсԓәщман, пойәкщәс, пӑ, мотавтәԓ пеԓа ватман, йастәс: «Тавифа! Нŏх ԓойа». Щӑԓта ԓўв сэмӈиԓаԓ пел пўшсәԓы пӑ, Петра шийаԓәмаԓ кемән, нŏх опсәс.

⁴¹Ԓўв, йошәԓ ԓўвеԓа мийман, нŏх ԓощәԓтәсԓы пӑ, эвәԓты мŏхет пӑ шукаԓт нэӈәт, вана вохман, ԓыв йэщаԓтэԓ ԓўвеԓ ԓыԓӈат ԓощәԓтәсԓы.

⁴²Тӑм вер Иоппия ԓŏватән иса уйәтты питса, пӑ ар хŏйат Турәм Кущайа эвԓәс.

⁴³Пӑ йӑм арат хӑтәԓ ԓўв Иоппия вошән и мŏԓты Симон ԋўки верты ики хŏща ус.

Петра пӑ Корнилий

¹Кесария вошән и ху ус, нэмәԓ Корнилий, Италийский когорта10:1 когорта (италийский) - щит хутсот арат ԉаԉ йох; кўт эԓты уԓты сот ԉаԉ йох куща,

²хот тэԓәԓ пиԓән Турма эвәԓты хŏйат пӑ Турәм эԓты пӑԓты хŏйат, мира ар йӑм верыԓыйәс пӑ иса Турәм пеԓа пойәкщәс.

³Ԓўв вантәм щирәԓән хӑтԓәԓән йӑрәтйаӈ щос кемән Турәм ангел тŏрԓы ватсәԓԓы, ԓўв хŏщайәԓ ԓŏӈәс пӑ ԓўвеԓа йастәс: «Корнилий!»

⁴Корнилий пӑ, ԓўв пеԓайәԓ аӈкәрмәмаԓ пӑ хŏԓт пӑԓтамәмаԓ кемән, йастәс: «Мўй, куща?» Ангел ԓўвеԓа йŏхԓы йастәс: «Нӑӈ пойәкԓан пӑ нӑӈ меԓащԓан Турәм хŏща нŏпса питсәт.

⁵Щӑԓта, хŏйатәт Иоппия воша кита пӑ, Петрайа айәԓты, Симон вохи.

⁶Ԓўв Симон ԋўки ԓэщатты ху хŏща мойԓәԓ, ԓўв хотәԓ щарәс питарән уԓ; ԓўв нӑӈен щи йасӈәт йастәԓ, мўй йурән нӑӈ нŏх пайәтԓайән пӑ нӑӈ хот тэԓэн па».

⁷Хун, Корнилий пиԓән пŏтәртәм, ангел йэԓ мӑнәс, ԓўв митйохԓаԓ эԓты кӑтән пӑ ԓўв пўӈԓәԓән уԓәм Турма эвәԓты ԉаԉ ху вохсәԓы

⁸пӑ ԓывиԓаԓа иса хŏԓ пŏтәрмаԓ йўпийән, ԓывиԓаԓ Иоппияйа китсәԓы.

⁹Кимет хӑтәԓ, хун ԓыв шушсәт пӑ воша ванамәты питсәт, Петра хут щос кемән хот ԓоӈԓа нŏх хуӈхәс, пойәкщәты урәӈән.

¹⁰Щӑԓта ԓўв сӑмәԓ вохты питса, пӑ ԓэты ԓӑӈхаса. Щи кўтән, ԓэтот ԓэщатты эԓты, ԓўвеԓа ватты щир ус

¹¹пӑ ваттаԓән пел пўншаԋщәм турәм хӑр пӑ ԓўв хŏщайәԓ иԓ эсԓәщты мŏԓты пўт, ищи мӑтты ун сŏх, ԋӑԓ щуӈәԓ сӑхат йӑрман уԓԓа пӑ мўва иԓ эсәԓԓа;

¹²щи ԓыпийән кӑмән хŏрпи ԋӑԓ йоши–кўрпи войәт, иԓән мўв пӑԓатән ущиԓыты войәт пӑ турәм хӑрән йӑхты тŏхԓәӈ войәт.

¹³Пӑ ԓўвеԓа тўр сый ус: «Петра ԓойа, веԓа пӑ ԓэва».

¹⁴Петра пӑ йастәс: «Ӑнтом, Турәм Куща, ма нэмәԓты пŏрайән нэмәԓты атәм мўй пӑ ӑнта сыстам ŏт ӑт ԓавәнтысәм».

¹⁵Щиӈәԋща кимет пўш ԓўвеԓа тўр сый ус: «Мўй Турәм сыстапсәԓы, щит атма мўй пӑ ӑнта сыстама нӑӈ аԓ ԓўӈты».

¹⁶Щит хуԓәм пўш ус, – щӑԓта пўт турма па нŏх эԓәтса.

¹⁷Хун пӑ Петра ԓўв турмәԓән ощатымаԓән, ԓўв вантәм щирәԓ, щит а мўй, – Корнилийән китәм йохәт, Симон хŏт эԓты иԋщәсман, вана йŏхәтсәт пӑ пушас овән иԓ ԓойсәт.

¹⁸Ўваԓман, ищмәсэԓ: «Петрайа айәԓтты Симон мўй тӑта?»

¹⁹Петра вантәм ŏтәԓ эԓты нумисытаԓ кўтән, Йэмәӈ Ԓыԓ ԓўвеԓа йастәс: «Тӑм, хуԓәм хŏйат нӑӈен кӑшԓәт;

²⁰ԓойа, иԓ ŏхԓа пӑ ԓўв пиԓԓаԓән, йэша нэш ӑт нŏмәнԓыман, мӑна; ԓывиԓаԓ Ма китсәԓам».

²¹Петра, Корнилия эԓты ԓўв хŏщайәԓ китәм хŏйатәт хŏща иԓ ŏхԓәс пӑ йастәс: «Mа щит, хŏй нын кӑшԓәты; мўй вер урәӈән нын йŏхәтсәты?»

²²Ԓыв пӑ йастәсәт: «Корнилий сот ԉаԉ йох куща, йӑм сӑмпи пӑ Турәм эԓты пӑԓты ху, иудея мирән хŏԓ йӑма нумман тӑйԓа, йэмәӈ ангел эԓты ԓўв хотәԓа нӑӈен вохты партәпса йŏхтәс пӑ нӑӈ пŏтәрԓан хуԓәтты».

²³Щиӈәԋща Петра, ԓывиԓаԓ йŏхи вохмаԓ йўпийән, ԓапәтсәԓы. Кимет хӑтәԓ пӑ нŏх киԓмаԓ кемән, ԓыв пиԓԓаԓән мӑнәс, тухәԓ Иоппия хӑнам йох па ԓўв пиԓәԓән мӑтсәт.

²⁴Йухәт хӑтәԓ ԓыв Кесарияйа йŏхәтсәт. Корнилий пӑ, ԓўв рутԓаԓ пӑ ван пиԓ йохԓаԓ и йӑха вохман, ԓывиԓаԓ ԓавәԓсәԓы.

²⁵Хун Петра йŏхи ԓŏӈты ўтщийәс, Корнилий ԓўв хŏщайәԓ йэщаԓт этәс пӑ ԓўв кўрԓаԓ шŏма шанша керәптыман, иԓ ԋўрәс.

²⁶Петра пӑ ԓўвеԓ нŏх ԓощәԓтәсԓы, пŏтәрман: «Нŏх ԓойа; ма ищи хŏйат».

²⁷Пӑ, ԓўв пиԓәԓән пŏтрэмәман, хота йŏхи ԓŏӈәс пӑ ар ӑктәщәм хŏйат уйтәс.

²⁸Щӑԓта ԓывиԓаԓа йастәс: «Нын уйәтԓәԓән, иудея хŏйата па сыр хŏйат пиԓән пŏтрэмәты пӑ вана рӑхиԓыты ӑт рӑхәԓ; туп мӑнэма Турәм аԉәс, ма и хŏйат нэш атма мўй пӑ ӑнта сыстама ӑт ат ԓўӈәтсәм.

²⁹Щишән ма, хун вохсайәм, пӑ йŏхи ӑт ԋŏсәрщәман йŏхәтсәм. Щӑԓта, иԋщәсԓәм: Мўй вер урәӈән нын мӑнэм вохсәԓән?»

³⁰Корнилий йастәс: «Ԋӑԓмет хӑтәԓән ма тӑм щос унты вўщԓәсәм пӑ йӑрәԏйаӈ щос пеԓа мӑнәмән йŏԓән хотэмән пойәкщәсәм; щӑԓта щи, ма йэԓпемән нŏвийән ворԓәты ԓумтәӈәӈ ики этәс

³¹пӑ пŏтәртәԓ: ’Корнилий! Нӑӈ пойкен хуԓса пӑ меԓащԓан Турәм хŏща нумәԓмәсайәт’.

³²Щиӈәԋща, Иоппияйа кита пӑ Петрайа айәԓты Симон вохи: ԓўв ԋўки верты ху Симон хотән щарәс питарән мойԓәԓ; ԓўв йŏхәтәԓ пӑ нӑӈена йастәԓ’.

³³Ищи кумат ма нӑӈ хŏщайэн китсәм, пӑ нӑӈ йӑма версэн, йŏхәтсән. Ин мўӈ хŏԓ Турәм йэԓпийән ԓойԓув, мўй нӑӈена Турәм эԓты партман уԓ, иса хŏԓ хуԓәтты урәӈән».

Петра Корнилий хотән пŏтәртты вер

³⁴Петра ўӈԓәԓ пўшсәԓы пӑ йастәс: «Йӑна мŏштәԓэм, Турәм веш пеԓа ӑт ватәԓ,

³⁵туп кашәӈ мир хŏща Ԓўв эԓтэԓ пӑԓты ŏт пӑ тўӈа–щира уԓты ŏт Ԓўвеԓа рӑхи.

³⁶Ԓўв Израиль пŏхәта йасәӈ китәс, пайԓы уԓәпса Иисус Христос сӑхат аԉәс; Тӑм хŏԓ хŏйатәта уԓты Турәм Куща.

³⁷Нын Иудея ԓŏватән, Галилея эԓты ўйман, Иоаннән утәԓтыйәм йиӈка ԓŏӈәԓтыты вер йўпийән, уԓәм верәт уйәтԓәԓән:

³⁸Хŏты Турәм Назарет эԓты уԓты Иисус Йэмәӈ Ԓыԓән пӑ йурән ԋŏсәтсәԓы. Пӑ Ԓўв йӑм верман пӑ хŏԓ хŏйатәт, хŏй хиԋән катәԓман усайәт, тўмтака верман, йӑӈхәс, Турәм Ԓўв пиԓәԓән ус, щишән.

³⁹Мўӈ пӑ щит хŏща иса вантәм ŏтәт, мўй Ԓўв Иудея мўвән пӑ Иерусалимән верәс, пӑ мет йухәт Ԓўв, акԓа нŏх сэкман, пӑратса.

⁴⁰Турәм хуԓмет хӑтәԓән Тӑмен нŏх ԓыԓӈатсәԓы, пӑ Ԓўвеԓа этԓыты щир мӑс

⁴¹ӑнта хŏԓ мира, туп вантәм ŏтәта, Турәм эԓты пирыйәм хŏйатәта, мўӈева, пӑ мўӈ Ԓўв пиԓәԓән ԓэсув пӑ йищсув, щи йўпийән, хун Ԓўв пӑрмаԓ эԓты нŏх ԓыԓәӈԓәс.

⁴²Щӑԓта Ԓўв мўӈева мира пŏтәртты пӑ вантәм ŏтәта уԓты партсәԓы, Ԓўв Турәм эԓты ԓыԓәӈ пӑ пӑрәм хŏйатәта Сўта уԓты пŏнәм Ŏт.

⁴³Ԓўв эԓтэԓ хŏԓ Турәм айкеԓ туты хŏйатәт аԉԓәт, кашәӈ Ԓўвеԓа эвәԓты ŏт Ԓўв нэмәԓән кӑрэк йŏрэмәты щир мŏщатәԓ».

⁴⁴Хун Петра хŏԓна щи пŏтрәԓ йэԓԓы тусԓы, Йэмәӈ Ԓыԓ кашәӈ йасәӈ хуԓәнтәм хŏйата эсԓәщәс.

⁴⁵Пӑ Петра пиԓән йŏхтәм, иудейәт эԓты эвәԓты ŏтәт ӑԓ пакнысысәт, Йэмәӈ Ԓыԓ мойԓәпса па рут йоха па эсәԓман уса;

⁴⁶ԓыв хуԓсәт, хŏты щитәт па йасӈәтән пŏтәртсәт пӑ Турәм вŏԓаӈа айәԓтсәт, щишән. Щиӈәԋща Петра йастәс:

⁴⁷«Хŏй щитәта йиӈка ԓŏӈәԓтыты ӑт эсәԓты верәтәԓ, хŏйтат, мўӈ итэвән Йэмәӈ Ԓыԓән мойԓысайәт?»

⁴⁸Щӑԓта ԓывиԓаԓ Иисус Христос нэм хўватән йиӈка ԓŏӈәԓтыты партсәԓы. Щи йўпийән ԓыв ԓўвеԓа кӑмәтса хӑтәԓ ԓыв хŏщайэԓ уԓты вохсэԓ.

Петра йӑӈхәпсайәԓ эԓты Иерусалим пойәкщәты хо̆йатәта по̆тәртты вер

¹Иудеяйән уԓәм апостоләт пӑ хӑнам йох хуԓсэԓ, мӑтты па рут йох ищи Турәм йасәӈ вана ўсэԓ.

²Щӑԓта хун Петра Иерусалима йŏхтәс, иудейәт эԓты уԓты хӑнам йохԓаԓән ԓўв йэщаԓт нўрыса,

³пŏтәртман: «Нӑӈ ӑт эвтәм мŏхет хŏща йӑхсән пӑ ԓыв пиԓԓаԓән ԓэсән».

⁴Петра пӑ хŏты вер ус, щиты ԓывиԓаԓа пŏтәртты питсәԓԓы, йастыйәԓ:

⁵«Иоппия вошән ма пойәкщәсәм пӑ щи пўԉаӈ вантәпса ватсәм: и мŏԓтты пўт иԓ эсԓәщәс, ищи мӑтты ун сŏх лопәс, ԋӑԓ щуӈәԓ сӑхат турәм хӑр эԓты иԓ эсәԓты ŏт, пӑ ма хŏщайэм иԓ эсԓәщәс.

⁶Ма пўт ԓыпеԓа ӑӈкәрмәсәм пӑ, вантыман, ԋӑԓ йоши–кўрпи войәт, иԓән мўв пӑԓатән ущиԓыты войәт пӑ турәм хӑрән йӑхты тŏхԓәӈ войәт шийаԓәсәм.

⁷Щӑԓта ма тўр сый хуԓтмәсәм, ма пеԓайэм пŏтәртәԓ: ’Петра, нŏх ԓойа, веԓа пӑ ԓэва’.

⁸Ма пӑ йастәсәм: ’Ӑнта, Турәм Куща, нэмәԓты атәм мўй пӑ ӑнта сыстам ŏт нэмәԓт пŏрайән ма ўӈԓэма ӑт питыԓыйәс’.

⁹Пӑ турәм хӑр эԓты кимет пўш тўр сый мӑнэма йŏхԓы йастәс: ’Турәм мўй сыстапсәԓы, щит ӑнта сыстама нӑӈ аԓ ԓўӈты’.

¹⁰Щит хуԓәм пўш ус, пӑ па хŏԓ иса турәм хӑра нŏх эԓәтса.

¹¹Щӑԓта ин, щи пўԉаӈ Кесария эԓты, ма хŏщайэм китәм хуԓәм хŏйат, хотэм ԉэпа, хŏта ма усәм, ԓойсәт.

¹²Йэмәӈ Ԓыԓ мӑнэма йастәс, ма ԓыв пиԓԓаԓән, йэша нэш ӑт нŏмәнԓыман, ат мӑтсәм. Ма пиԓэмән щи хут хӑнам йох па мӑтсәт, пӑ мўӈ тўм хŏйатэн хота йŏхәтсув.

¹³Ԓўв мўӈева пŏтәртсәԓы, хŏты ԓўв йŏԓән хотәԓән [йэмәӈ] ангел ватсәԓы, пӑ ангел ԓўвеԓа йастәс: ’Хŏйатәт Иоппияйа кита пӑ Петрайа айәԓты Симон вохи;

¹⁴Ԓўв нӑӈена йасӈәт йастәԓ, щи йасӈәт йурән нӑӈ нŏх пайәтԓайән пӑ нӑӈ хот тэԓэн па’.

¹⁵Хун пӑ ма пŏтәртты питсәм, ԓыв эԓтыԓаԓа Йэмәӈ Ԓыԓ иԓ эсԓәщәс, оԓәӈән хŏты мўӈ эԓтэва эсԓәщәс.

¹⁶Щи пŏрайән ма Турәм Куща йасәӈ нумәԓмәсәм, хŏты Ԓўв пŏтәртәс: ’Иоанн йиӈка ԓŏӈәԓтыйәс, нын пӑ Йэмәӈ Ԓыԓа ԓŏӈәԓтты питԓайты’.

¹⁷Щиӈәԋща, Турәм ԓывиԓаԓа ищимәщ мойԓәпса мӑс ки, мўй хŏрпи мўӈева, Турәм Куща Иисус Христоса эвԓәм ŏтәта мӑс, ма пӑ хŏй, Турма йэртԓыты ат верәтсәм?»

¹⁸Щит хуԓәтмеԓ йўпийән, ԓыв иԓ ромәпсәт пӑ Турәм ишәксэԓ, пŏтәртман: «Таӈха, па рут хŏйатәта па Турәм кӑрэк эԓты уԓәпса пеԓа керԓәты щир мӑс».

Пойәкщәты хŏйатәт ӑктәщиты щир Антиохия вошән

¹⁹Щи кўтән Стефан йўпийән уԓәм ԋўхәтԓыты вер эԓты лакки мӑнәм ŏтәт, туп иудейәта йасәӈ тўвман, Финикия унты пӑ Кипр пӑ Антиохия унты мӑтсәт.

²⁰Ԓыв эԓтыԓаԓ тухԓәт Кипр хŏйатәт, тухԓәт пӑ Киринея хŏйатәт усәт, хŏй Антиохияйа йŏхәтман, Турәм Куща Иисус эԓты Йӑм Айкеԓ грек йохәта пŏтәртсәт.

²¹Пӑ Турәм Куща йош ԓыв пиԓԓаԓән ус, пӑ йӑм арат ар хŏйат, эвәԓман, Турәм Куща пеԓа керԓәсәт.

²²Щит эԓты Иерусалимән ӑктәщиты хŏйатәт унты сый йŏхтәс, пӑ Варнава Антиохияйа мӑнты партса.

²³Ԓўв йŏхәтмаԓ пӑ Турәм йӑм кащаԓәмаԓ кемән, нŏх амтәс пӑ хŏԓ мŏхет Турәм Куща хŏща вещкат сӑмән катԓәсты партсәԓы;

²⁴Ԓўв йӑм сӑмпи ху ус пӑ Йэмәӈ Ԓыԓән пӑ эвәԓты щирән тэкәнман уса, щишән. Щиӈәԋща йӑм арат мир Турәм Куща пеԓа керԓәс.

²⁵Йухәт Варнава Савл кӑшты урәӈән Тарса мӑнәс пӑ, ԓўвеԓ уйәтмаԓ кемән, Антиохияйа тусԓы.

²⁶Тӑԓаӈ тӑԓ–ԓўӈ ԓын пойәкщәты хŏйатәт ӑктәщиты тӑхайән йӑм арат хŏйат утәԓтәсӈән, пӑ утәԓтыты йох Антиохияйән веԓщи щи христианәта айәԓты питсайәт.

²⁷Щи хӑтԓәтән Иерусалим эԓты Антиохияйа Турәм айкеԓ туты хŏйатәт йŏхәтсәт.

²⁸Пӑ ԓыв эԓтыԓаԓ и ху, нэмәԓән Агав, нŏх ԓоймаԓ кемән, Йэмәӈ Ԓыԓән аԉман, йастәс, мӑтты иса мўв ԓŏватән ун ԓэԓԓы щир питәԓ, Клавдия кесарь пŏрайән щи уԓәм щир.

²⁹Щиӈәԋща утәԓтәты йох, кашәӈ ԓўв тӑйтŏтәԓ эԓты Иудейән уԓты хӑнам йохԓаԓа, ԋотәпса китты пŏтсәт,

³⁰щиты щи версэԓ, ӑктәм ŏхԓаԓ Варнава па Савл мŏхты эвәԓты хŏйатәт ун икета китсәԓаԓ.

Иаков аԓтты кешийән пӑратты пӑ Петра касна хота омәсты верӈән

¹Щи пŏрайән Ирод хон щи ӑктәщиты хŏйатәт эԓты тухәԓ хŏйатԓаԓ пеԓа йошԓаԓ нŏх аԓәпсәԓы, ԓывиԓаԓа атәм верты урәӈән,

²пӑ Иаков, Иоанн йай, аԓтты кешийән пӑратты партсәԓы.

³Ваттаԓән, щит иудейәта йӑм, щи йўпийән Петра па ўсԓы, – щи пŏрайән тўтәӈ ԋаԋ йэмәӈ хӑтԓәт усәт, –

⁴пӑ, ԓўвеԓ иԓ катәԓмаԓ йўпийән, пӑтлам хота омәссәԓы, пӑ ԋӑԓ ԉаԉ йохпи ԋӑԓ похла ԓўвеԓ шавиты партсәԓы, Пасха йўпийән мир хŏща ԓўвеԓ этәԓтәты нумәсыйәс.

⁵Петра пӑтлам хотән эԓт ԓавәԓтса, щи кўтән ӑктәщиты хŏйатәт ԓўв урӈәԓән тўӈа–щира Турма пойәкщәсәт.

Ангел Петра касна хот эԓты ким этәԓтәты щир

⁶Хун пӑ Ирод ԓўвеԓ ким этәԓтәты утщисԓы, щи ат Петра кӑт ԉаԉ йŏхӈән кўтән ŏԓәс, кӑт карты кеԓән пŏнман уса, пӑ ԉаԉ йохән ов пўӈәԓән пӑтлам хот шависа.

⁷Щӑԓта ин, Турәм Куща ангел ԓўв йэщаԓтәԓ ԓойәс, пӑ нŏвийән пӑтлам хот нŏх хутԓәптәса. Ангел, Петра пўӈԓәԓ эԓты пŏткәман, ԓўвеԓ нŏх кўрәтсәԓы пӑ йастәс: «Сора ԓойа». Щӑԓта карты кеԓԓаԓ ԓўв йошԓаԓ эԓты иԓ рӑкәтсәт.

⁸Пӑ ангел ԓўвеԓа йастәс: «Ӑтпен йӑры пӑ кўр ԓумтәмԓан ԓумтаԓән». Ԓўв щиты версәԓы. Щӑԓта ԓўвеԓа йастәԓ: «Нӑӈ эԓты ԓумтәмен ԓумты пӑ ма йўпемән йўва».

⁹Петра ким этәс пӑ ԓўв йўпеԓән шушәс, ӑт уйәтман, ангелән верты вер йӑна щиты ус, нумәсман, ԓўв вантәпса ватәԓ.

¹⁰Оԓәӈ ԓавәԓты ԉаԉ йох пӑ кимет ԓавәԓты ԉаԉ йох мŏхты мӑнман, ԓын вош пеԓа мӑнты карты пушас ова йŏхәтсәтән. Щи ов ԓын урӈәнән ԓўв сӑхатәԓ пелки пўншантәс; ԓын ким этсәӈән пӑ и вош хулы мӑтсәԓән, щӑԓта шамкап ангел ԓўв пўӈԓәԓ эԓты хŏԓт пентәс.

¹¹Щиӈәԋща Петра, сэмәԓ этмаԓән, йастәс: «Ин манэма йӑна щи ныԓа, Турәм Куща Ԓўв ангеләԓ китмаԓ пӑ мӑнэм хŏԓт пайәтсәԓы Ирод йош эԓты пӑ иса щит эԓты, мўй иудей мир ԓавԓәс».

¹²Щӑԓта, тыйэԓ–тохэԓ вантымаԓ йўпийән, Мария, Марка айәԓтты Иоанн аԋԏи, хот ԉэпа йохтәс, хŏта ар хŏйат ӑктәщсәт пӑ пойәкщәсәт.

¹³Хун пӑ Петра пушас овән хŏплэмәс, Рода нэмпи митнэ хуԓәтты ким этәс.

¹⁴Щӑԓта, Петра тўр сый мŏштымаԓ кемән, амәтмаԓ рўвән пушас ов ӑт пўшсәԓы, йŏхи хухәԓмәман, такан йастәс, мӑтты Петра пушас овән ԓойәԓ.

¹⁵Тўмет пӑ ԓўвеԓа йастәсәт: «Нӑӈ мўй ŏшенән уԓԓән?» Туп ԓўв и йэԓԓы ўра верәԓ. Ԓыв пӑ пŏтәртсәт: «Щит Ԓўв ангеләԓ».

¹⁶Щи кўтән Петра пушас ов сэкты йэԓԓы питәс. Хун пӑ ов пўшсэԓ, ԓўвеԓ кащаԓәсәт пӑ ӑԓ пакәтсәт.

¹⁷Ԓўв пӑ, йошәԓән пос верман, мӑшйайән ат усәт, ԓывиԓаԓа пŏтәртсәԓы, хŏты Турәм Куща ԓўвеԓ пӑтлам хот эԓты ким этәԓтәсԓы, пӑ йастәс: «Тӑм вер эԓты Иаков пӑ хӑнам йохәт айкеԓән вераԓән». Йухәт, ким этмаԓән, па тӑха пеԓа мӑнәс.

¹⁸Хӑтԓа йўвмаԓ йўпийән, ԉаԉ йох кўтән ун хурэп тыйәс, хŏты Петра йис.

¹⁹Ирод пӑ, ԓўвеԓ кӑшмаԓ пӑ ӑт уйәтмаԓ йўпийән, ԓавԓәм ԉаԉ йох сўтәтсәԓы пӑ ԓывиԓаԓ пӑратты партсәԓы. Йухәт ԓўв Иудея эԓты Кесарияйа мӑнәс пӑ щита хӑщиԓыйәс.

Ирод хон пӑрты вер

²⁰Ирод Тир пӑ Сидон хŏйатәт пеԓа лики хуры ус; ԓыв пӑ, ԓыв кўтэԓән йастатман, ԓўв хŏщайәԓ йŏхәтсәт пӑ хон хот куща, Власт, ԓыв пеԓайэԓ керәтман, пайԓы уԓәпса вохсәт, ԓыв мўвеԓ хон мўв эԓты ԓэс, щишән.

²¹Йастәм хӑтәԓән Ирод, хон ԓумтәма ԓумәтԓыман, пӑԓ тӑхайа опсәс пӑ ԓыв пеԓайэԓ пŏтәртәс.

²²Мир такан ԋухмийәԓ: «Щит ӑнта хŏйат, Турәм тўр сый».

²³Туп шӑмкапан Турәм Куща ангел ԓўвеԓ мушәӈа версәԓы, щи урәӈән, мўйа ԓўв Турма ишәк йасәӈ ӑт йастәс; щӑԓта Ирод ики, суԓ войәтән шӑпиман, пӑрәс.

²⁴Турәм йасәӈ пӑ арамәс пӑ лакки ԓӑрпиԓәс.

²⁵Варнава пӑ Савл, партәм верән тӑԓаӈа верман йўпийән, Марк нэма пŏнәм, Иоанн пӑтән ўйман, Иерусалим эԓты [Антиохияйа] йŏхԓы йŏхәтсәтән.

Варнава пӑ Савл Йӑм Айкеԓ туты урәӈән китты вер

¹Антиохия вошән, щита уԓты пойәкщәты хойатәт ӑктәщиты вер хŏща тухәԓ Турәм айкеԓ туты хŏйатәт пӑ утәԓтәты йох усәт: Варнава, пӑ Нигера айәԓтты Симеон, пӑ Луций, Киринея ху, пӑ Манаил, Ирод ԋӑԓмет мўв щуӈ куща пиԓән энмәм ху, пӑ Савл.

²Хун ԓыв Турәм Кущайа верәт версәт пӑ вўщԓәсәт, Йэмәӈ Ԓыԓ йастәс: «Варнава пӑ Савл Мӑнэма щи вер пеԓа мийаԓән, мўй урәӈән Ма ԓынан вохсәԓам».

³Щиӈәԋща ԓыв, ўщԓәмеԓ пӑ пойәкщәмеԓ йўпийән пӑ йошԓаԓ ԓын эԓтыԓән поныԓымеԓ йўпийән, ԓынан эсәԓсэԓ.

Варнава пӑ Савл Кипр пухәрән

⁴Щитӈән, Йэмәӈ Ԓыԓән китман уԓман, Селевкияйа йŏхәтсәтән, щиԓта пӑ Кипр пухра хŏпән мӑтсәӈән;

⁵Щӑԓта Саламинән уԓман, иудейәт пойәкщәты хотәтән Турәм йасәӈ пŏтәртсәтән; ԓын ԉэпәнән Иоанн па ус, ԓынана ԋотты урәӈән.

⁶Пухәр мўв ԓŏватәԓән Паф унты мӑнман, ԓыв и мŏԓты иудей ху, нэмәԓән Вариисус, уйәтсәтән. Ԓўв щӑртәӈ пӑ ԋаԓмәӈ ики ус, Турәм айкеԓ туты икийа верәсәс.

⁷Ԓўв проконсул Сергий Павел, ŏшәӈ ху, пиԓән ус. Проконсул Турәм йасәӈ хуԓты ԓӑӈхас, щишән Варнава пӑ Савл вана вохсәԓы.

⁸Елима, щӑртәӈ ики, пӑ (ԓўв кимет нэмәԓ щит айәԓԓәԓ) ԓыв пиԓԓаԓән ӑт кашащәԓ, эвәԓты вер эԓты проконсул пўӈԓа ԓавәԓԓәԓы.

⁹Туп Савл, ԓўв хŏԓна Павел, Йэмәӈ Ԓыԓән тэкәнман пӑ сэмӈиԓаԓ ԓўв пеԓайәԓ пайәтман,

¹⁰йастәс: «Йээй, кӑмән ŏщмарән пӑ кӑмән атәмән тэкнәм ŏт, хиԋ пŏх, кашәӈ вещкат вер пеԓа ԉик туты ŏт! Нӑӈ Турәм Куща тўӈ йушәт эԓты йŏвра хўщты а мўй вŏԓыԓән пеԓа?

¹¹Ин тӑм, Турәм Куща йош нӑӈ пеԓайэн нŏх аԓԓәмман уԓ: нӑӈ сэмԓы питԓән пӑ пŏра унты хӑтәԓ ӑт ватԓэн». Щӑԓта шӑмкап ԓўв эԓтэԓ тўрма пӑ пӑтлам лаӈкантәс, пӑ ԓўв, сӑм мӑнман, тыйэԓ–тохэԓ шушиԓыйәс, ватәԓтәты хŏйат кӑншәс.

¹²Щиӈәԋща проконсул тыйәм вер кащаԓәмаԓ кемән, Турәм Куща утәԓтәпса эԓты, ощатыман, эвԓәс.

Павел пӑ Варнава Писидия ԉэпән уԓты Антиохия вошән

¹³Паф эԓты нык хўвԓәмеԓ кемән, Павел пӑ ԓўв пўӈԓәԓән уԓәм ŏтӈән Памфилия мўвән уԓты Пергияйа йŏхәтсәт. Туп Иоанн, ԓын эԓтыԓән пўӈԓа йирԓәман, Иерусалима йŏхԓы мӑнәс.

¹⁴Ԓын пӑ, Пергия эԓты мӑнман, Писидия ԉэпән уԓты Антиохияйа йŏхәтсәтән пӑ, иудейәт пойәкщәты хота шаббат хӑтәԓән ԓŏӈман итән, иԓ омәссәтән.

¹⁵Закон пӑ Турәм айкеԓ туты хŏйатәт нэпекәт ԓўӈтәм йўпийән иудейәт пойәкщәты хот кущайәт ԓынана йастәты китсәт: «Хӑнам йохӈән! Нын мир пеԓа нŏмәс такапты йасәӈ тӑйԓәтән ки, пŏтәртатән».

¹⁶Павел, нŏх ԓойман пӑ йошәԓән пос верман, йастәс: «Израиль йох пӑ Турәм эԓты пӑԓты мŏхет! Хуԓәнтаты.

¹⁷Тӑм мир Турәм мўӈ ащиԓув пирысԓы пӑ тӑм рут мир Египет мўв хŏща уԓмаԓ пŏрайән ԓӑтәӈа версәԓы, пӑ йурәӈ йошәԓән щиԓта йэԓ тусԓы,

¹⁸пӑ ԋӑԓйаӈ тӑԓ кем ԓывиԓаԓ таԓ мўв хŏща ԓапәтсәԓы.

¹⁹Щӑԓта, ԓапәт сыр мир Ханаан мўвән пӑратмаԓ йўпийән, щитԓаԓ мўв ԓывиԓаԓа йэԓԓы тӑйты ортсәԓы.

²⁰Пӑ щи йўпийән, ԋӑԓсот ветйаӈ кем тӑԓ ԓывиԓаԓа сўт йохәт мийԓыйәс Турәм айкеԓ туты хŏйат Самуил унты».

²¹Йухәт ԓыв хон вохсәт, пӑ Турәм ԓывиԓаԓа Саул мӑс. Кис пŏх, Вениамин рут эԓты уԓты ху. Щиты ԋӑԓйаӈ тӑԓ хӑщәс.

²²Ԓўвеԓ пўӈԓа пайәтмаԓ йўпийән, ԓывиԓаԓа хона Давид пŏтсәԓы. Турәм ԓўв эԓтэԓ йастәс: ’Давид, Иессей пŏх, Ма сӑмема рӑхты ху, Ма уйәтсәм щит, хŏй Ма ԓӑӈхаты ŏтԓам хŏԓ тӑԓаӈа верԓәԓы’.

²³Ԓўв ԋаврэмԓаԓ эԓты Турәм аԉиԓыйәм верәԓ хўват Израиль мира Нŏх пайәтты Ŏт мӑс - Иисус.

²⁴Ԓўв йӑмәс эттаԓ йэԓпийән Иоанн хŏԓ Израиль мира щит эԓты пŏтәртәс: йиӈка ԓŏӈәԓтыты вер верты урәӈән, кӑрэк эԓты шӑшән керԓәты мосәԓ.

²⁵Иоанн, ԓўв верәԓ йэтшәты питмаԓән, пŏтәртәс: ’Хŏй йўкана мӑнэм нын тӑйԓәԓән? Ма ӑнта щит; туп ин, ма йўпемән йиԓ щит, Хŏй хŏща кўр ԓумтәмәԓ эхты ма ӑт рӑхԓәм’.

²⁶Хӑнам йох, Авраам рут ԋаврэмәт, пӑ нын кўтәнән Турәм эԓты пӑԓты ŏтәт! Нынана тӑм нŏх пайтәсты йасәӈ китман уԓ.

²⁷Иерусалимән уԓты мŏхет пӑ ԓыв кущайԓаԓ, Иисус ӑт мŏштәсэԓ пӑ сўтәтсэԓ, пӑ щишән Турәм айкеԓ туты хŏйатәт йасӈәт тӑԓаӈа версәԓаԓ, щи йасӈәт кашәӈ шаббат хӑтәԓән ԓўӈәтԓайәт.

²⁸Ԓыв Ԓўв хŏщайәԓ нэмәԓты нўр ӑт уйәтсәт, мўй урәӈән Ԓўв сŏрма ат пайәтса, пӑ ищипа Пилат эԓты Ԓўвеԓ паратты щир вохсәт.

²⁹Хун пӑ хŏԓ Ԓўв эԓтэԓ хӑншәм ŏт тӑԓаӈа версэԓ, йўх эԓты иԓ ўймеԓ йўпийән, хŏшапәӈ кев ԓыпийа Ԓўвеԓ пŏтсэԓ.

³⁰Туп Турәм пӑрәм эԓты Ԓўвеԓ нŏх ԓыԓӈатсәԓы.

³¹Ԓўв ар хӑтәԓ хўват щитәта этԓыйәс, хŏй Ԓўв пиԓәԓән Галилей эԓты Иерусалима этәс пӑ хŏй ин мир йэԓпийән Ԓўвеԓ вантәм ŏтәта уԓԓәт.

³²Пӑ мўӈ нынана Йӑм Айкеԓ йастәԓув: ащиԓува аԉәм вер, Турәм мўӈева тӑԓаӈа версәԓы, ԓыв ԋаврэмԓаԓа, Иисус нŏх ԓыԓӈатман,

³³хŏты пӑ кимет псаломән13:33 псалом - йэмәӈ ар Библияйән; хӑшман уԓԓа: ’Нӑӈ Ма Пŏхем: Ма ин Нӑӈен сэма пайәтсэм’.

³⁴Ԓўвеԓ пӑрәм эԓты нŏх ԓыԓӈатмаԓ йўпийән, щишән Ԓўв шимты ӑт питәԓ, тӑм эԓты щиты йастәс: ’Ма нынана, Давида аԉәм йӑмԓам мӑԓәм, йӑна’.

³⁵Щишән па тӑхайән па пŏтәртәԓ: ’Йэмәӈ Нӑӈ Ŏтэна шимты щир шийаԓәты ӑт мӑԓэн’.

³⁶Давид, ԓўв пŏрайәԓән Турәм ԓӑӈхаты щир хўват вермаԓ йўпийән, пӑрәс, пӑ ԓўв ащиԓаԓ хŏща пŏтса, пӑ шимты вер шийаԓәс;

³⁷Тўми, Хŏй Турәмән нŏх ԓыԓӈатса, шимты вер ӑт шийаԓәс.

³⁸Щишән, хӑнам йох, ма ԓӑӈхаԓәм, нын ат уйәтсәԓән, Ԓўв урӈәԓән нынана кӑрэк йŏрэмәты щир такан аԉԓа;

³⁹пӑ мўй хŏща иса, нын Моисей законән вещкат щира пайтәсты ӑт верәтсәты, щит хŏща кашәӈ эвәԓты ŏт Ԓўв хўватәԓән вещката пайтәсәԓ.

⁴⁰Шаващаты малы, Турәм айкеԓ туты хŏйатәт хŏща йастәм ŏт нынана аԓт хойәԓ:

⁴¹’Вантаты, укщәпԓәты ŏтәт, ощатыйаты пӑ хŏԓт пеԓа ушаты; Ма нын хӑтәԓԓәнын щимәщ вер верԓәм, щит мӑтты хŏйатән нынана пŏтәртса ки, нын ӑт эвәԓсәты ԓуԓән’».

⁴²Ԓын иудейәт пойәкщәты хот эԓты ким этман пŏрайән па рут йохәтән па шаббат хӑтәԓән щит эԓты пŏтәртты партсайӈән.

⁴³Хун пӑ ӑктәщийәм хŏйатәт лакки эсәԓсайәт, ар пеләк иудей йох пӑ па рут эԓты иудейәт щира эвԓәптәм Турәм пеԓа сӑмәӈ ŏтәт Павел пӑ Варнава йўпи туԓәт. Ԓын, ԓыв пиԓԓаԓән пŏтрэмәман, ԓывиԓаԓ Турәм йӑм хŏща уԓты нŏмәс такапсәтән.

⁴⁴Па шаббат хӑтәԓән вош тэԓ мир Турәм йасәӈ хуԓәтты хŏԓ ӑктәщәс.

⁴⁵Туп иудейәт, мир шийаԓәмеԓ кемән, ԓоԓәмты нŏмәсән тэкәтсайәт пӑ, кӑткўтән уԓман пӑ ўӈращтыман, Павел пŏтәртты верәт пеԓа ўра вортты питсәт.

⁴⁶Щиӈәԋща Павел пӑ Варнава такан йастәсӈән: «Нынана оԓәӈән Турәм йасәӈ пŏтәртты мосәс, туп хŏты нын Турәм йасәӈ пўӈԓа ушиԓԓән пӑ нынан нын и пўша уԓәпсайа ӑт рӑхтыйа верԓәԓән, щишән, мўӈ па рут йох пеԓа йастәԓув».

⁴⁷Тӑмиты Турәм Куща мўӈева йасәӈ хӑйәс, щишән: ’Ма Нӑӈен па рут йоха нŏви кеша пŏтсэм, Нӑӈ, нŏх пайтәсты щир урәӈән, мўв сŏхәнты унты ат усән’.

⁴⁸Па рут мир, щит хуԓман, амтәтԓысәт пӑ Турәм Куща йасәӈ ишәксэԓ, пӑ хŏԓыйэ, хŏй и пўша уԓты уԓәпсайа пирысайәт, эвәԓсәт.

⁴⁹Щӑԓта Турәм Куща йасәӈ щи мўв ԓŏватән лакки ԓӑрпиԓәс.

⁵⁰Туп иудейәт, Турәм пеԓа сӑмәӈ, ԓӑтәӈ нэӈәт пӑ вошән ŏха уԓты хŏйатәт хўщмәмеԓ йўпийән, Павел пӑ Варнава пеԓа воштәты нŏмәс версәт пӑ уԓты тӑхайән эԓты ԓынан воштәсэԓ.

⁵¹Ԓын пӑ, кўрԓын эԓты хиш ԓывиԓаԓа пӑркатман,13:51 кўрԓын эԓты хиш ԓывиԓаԓа пӑркатман - щит ԓывиԓаԓ атма айәԓты пос; Икония воша мӑтсәӈән.

⁵²Утәԓтәты йох пӑ амәтән пӑ Йэмәӈ Ԓыԓән тэкәнман усайәт.

Павел пӑ Варнава Икония вошән

¹Иконияйән ԓын и йӑха иудейәт пойәкщәты хота ԓŏксәӈән пӑ щиты пŏтәртсәӈән пӑ щи арат ар иудейәт пӑ грекәт эвәԓсәт.

²Ԓын айкеԓәна ӑт эвәԓты иудейәт пӑ хӑнам йохәт йэщаԓт па рут йох сӑмԓаԓ йŏвра хўщсэԓ пӑ ԉикмәԓтсэԓ.

³Пӑ хŏты, ԓын щита йӑм хўват усӈән. Ԓын Турәм Куща эԓты хӑрщийа пŏтәртсәӈән, Хŏй Ԓўв йӑмәԓ йасәӈ ныты урәӈән, ԓын йошԓәнән йэмәӈ посәт пӑ вантыԓԓаӈәԓ верәт верәс.

⁴Щи кўтән вошән мир кӑтна ортәсәс: итԓаԓ иудейәт пеԓа усәт, киметԓаԓ пӑ – апостоләт пеԓа.

⁵Хун пӑ па рут йох пӑ иудейәт ԓыв кущайԓаԓ пиԓән ԓын пеԓайән ӑратсәт, ԓынан йэԓапты пӑ кевән йовәԓты урәӈән,

⁶ԓын, щит эԓты хуԓман, Ликаония мўв вошӈәна, Листрайа пӑ Дервияйа, пӑ щи ԉэпән уԓты куртәта мӑтсәӈән,

⁷пӑ щита Йӑм Айкеԓ тутԓысӈән.

Павел пӑ Варнава Листра вошән

⁸Листрайән и мŏԓты, вевтам кўрпи ху опсәс, пӑтлам хот уш эԓты кўрԓы питман ус, пӑ нэмәԓты пŏрайән ӑт шушиԓыйәс.

⁹Ԓўв Павел пŏтрәпса хуԓәнтәс. Павел ԓўв пеԓайәԓ ӑӈкәрмаԓ йўпийән, кащаԓәсԓы, ԓўв тўмтака йиты кеша эвәԓты щир тӑйәԓ,

¹⁰сыйәӈ тўрән йастәс: «Нӑӈена йастәԓәм Турәм Куща Иисус Христос нэм урәӈән: нӑӈ кўрӈиԓана тўӈа нŏх ԓойа». Щӑԓта ԓўв и щишән нŏх ԓойәмтәс пӑ шушиԓыты питәс.

¹¹Мир пӑ, щит шийаԓәмаԓ кемән, мўй Павел верәс, ԓўв тўр сыйәԓ сыйәӈа версәԓы, Ликаония йасәӈән пŏтәрман: «Ԓуӈхәт хŏйат хŏрасән мўӈ хŏщайэв иԓ эсԓәщсәт».

¹²Щӑԓта Варнава Зевса айәԓтса, Павел пӑ Ермийа14:12 Ермий - ԓўв Гермес па, йис грек мир хŏща мет ун Зевс нэмпи ԓух айкеԓ туты ŏт; айәԓтса, ԓўв йасәӈ хŏща кущайа ус.

¹³Вошеԓ йэԓпийән Зевс ԓух хот ус, пӑ ԓўвеԓа йир верты ху, пушас ова хор мисәт пӑ сэвәм хŏрамәӈ лыптәт тўвман, мир пиԓән йирасты ўтщийәс.

¹⁴Туп апостолӈән Варнава пӑ Павел, щит хуԓман кемән, ԓын сŏхԓән лакки мӑншисԓән пӑ, мир хŏща ӑратман, такан сыйәӈ тўрән пŏтәртсәӈән:

¹⁵«Йох! Мўй нын верԓәты? Мин па – нын хŏрпан хŏйатӈән, пӑ нынана Йӑм Айкеԓ пŏтәртԓәмән, нын тӑм йурԓы ԓуӈхәт эԓты Ԓыԓәӈ Турәм пеԓа ат керԓәсты, Хŏй турәм хӑр пӑ мўв, пӑ щарәс, пӑ хŏԓ щит, мўй ԓыпиԓаԓән уԓ тыйәԓтәс,

¹⁶Хŏй хӑщәм ишән мирәта иса ԓыв йушԓаԓән йӑхты эсԓыйәс,

¹⁷Ԓўв эԓтайәԓ йӑм верәтән айкеԓ мӑты щикуш ӑт вŏԓыԓыйәс, турәм хӑр эԓты мўӈева йэрт пӑ ԓэвмаӈ пŏра мийԓыман, щӑԓта ԓэтŏтән пӑ кашән мўӈ сӑмԓув вŏԓәтман, ус».

¹⁸Щиӈәԋща, щит пŏтәртман, ԓын ўрайән мир хŏща щимәщ нŏмәс такапсәтән: ԓынана йир ӑт ат версәт пӑ кашәӈ хŏйат йŏхи ат мӑнәс. Щи кўтән ԓын щита уԓман, хŏйатәт утәԓтәсӈән,

¹⁹Антиохия пӑ Икония эԓты тухәԓ иудейәт йŏхәтсәт пӑ, хун апостолӈән хӑрщийа пŏтәртсәӈән, ԓыв мира ԓын эԓтан пўӈԓа мӑнты номәс такапсәт, пŏтәртман: «Ԓын нэмәԓтты тўӈа–щира йасәӈ ӑт пŏтәртԓәӈән, туп иса олмащиԓӈән». Щӑԓта, мир хущмеԓ йўпийән, Павел кевән щӑх йовәԓтса пӑ вош ким пелка таԓса, ԓўвеԓ пӑрәма нумәссэԓ, щишән.

²⁰Хун пӑ утәԓтәты йохәт ԓўв пўӈԓәԓән ӑктәщсәт, ԓўв нŏх ԓойәс пӑ воша мӑнәс, кимет хӑтәԓән пӑ Варнава пиԓән Дервияйа мӑнәс.

Павел пӑ Варнава Сирияйән уԓты Антиохияйа йŏхԓы керԓәты вер

²¹Йӑм Айкеԓ тӑм вошән пŏтәртман пӑ йӑм арат утәԓтәты хŏйат Турәм Куща урәӈән мŏщатман йўпийән, ԓын йŏхԓы Листра, Икония пӑ Антиохия вошәт мŏхты мӑтсәӈән,

²²утәԓтәты йох сӑм такапман, эвәԓты щирән уԓты таӈман пӑ утәԓтәман, ар шук тўвман, мўӈева Турәм Хон Уԓәпсайа ԓŏӈты мосәԓ.

²³Павел пӑ Варнава кашәӈ пойәкщәты хŏйатәт ӑктәщиты щир кеша уна уԓты йох пŏтсәӈән пӑ, вўщԓыман пойәкщәсӈән пӑ Турәм Кущайа мӑсԓән, Хойа ԓыв эвәԓсәт.

²⁴Йухәт, Писидия мŏхты мӑнман, Памфилияйа йŏхәтсәтән,

²⁵пӑ, Турәм Куща йасәӈ Пергияйән пŏтәртман йўпийән, Атталияйа охәԓсәӈән;

²⁶Щиԓта пӑ Антиохияйа хопән мӑтсәӈән, хŏта Турәм йӑма щи вер пеԓа эвләптыман усайӈән, мўй тӑԓаӈа версәӈән.

²⁷Щи йŏхәтман пӑ пойәкщәты мŏхет йӑха ӑкәтман йўпийән, ԓын хŏԓ иса пŏтәртсәԓән, мўй ԓын пиԓәнән Турәм верәс пӑ мўй щирән Ԓўв эвәԓты вер ов па рут мира пел пўшсәԓы.

²⁸Пӑ щита утәԓтәты йохәт пиԓән йам арат сыс усӈән.

Апостоләт Иерусалимән ӑктәщты вер

¹Тухԓәт, Иудея эԓты йŏхтәм ŏтәт, хӑнам йох утәԓтәсәт: «Моисей щирән ӑт эвтәсԓәты ки, нŏх пайтәсты ӑт верәтԓәты».

²Хун пӑ нŏмәс ар щира пӑ мŏԓты кем ўра ворты вер ԓыв пиԓԓаԓән Павел пӑ Варнава хŏща тыйәс, Павела пӑ Варнавайа пӑ ԓыв кўтэԓ эԓты па тухәԓ йохәта Иерусалима мӑнты пŏтсайәт пӑ апостоләт пӑ уна уԓты икет пиԓән тӑм вер эԓты пŏтрэмәты.

³Щиӈәԋща, пойәкщәты мŏхэтән мӑнты ԋотәм йўпийән, ԓыв Финикия пӑ Самария мŏхты мӑтсәт, па рут мир Турәм пеԓа керԓәты вер эԓты пŏтәртман, пӑ хŏԓ хӑнам йох хŏща ун амәт версәт.

⁴Иерусалима йŏхәтмеԓ кемән, ԓыв пойәкщәты мŏхетән, апостоләтән пӑ ун икетән вана ўсайәт, пӑ Павел пӑ Варнава такан иса хŏԓыйэ йастәсԓән, Турәм мўй ԓын пиԓанән верәс пӑ хŏты па рут йоха эвәԓты вер ов пел пўншәс.

⁵Щиӈәԋща тухәԓ фарисейәт эԓты эвԓәм мŏхет ўшмащты питсәт пӑ пŏтәртсәт, па рут йох эвтәптәты пӑ Моисей закон нŏх катәԓты партты мосәԓ.

⁶Апостоләт пӑ ун икет щи вер ватты урәӈән ӑктәщсәт.

⁷Хув нумәсмеԓ йўпийән Петра, нŏх ԓойман, ԓывиԓаԓа йастәс: «Хӑнам йох! Нын уйәтԓәты, Турәм оԓәӈ хӑтԓәт эԓты мўӈ эԓтэв мӑнэм пирысԓы, ма ўӈԓэм эԓты па рут мир Йӑм Айкеԓ йасәӈ ат хуԓсәт пӑ ат эвәԓсәт;

⁸пӑ Сӑм Уйәтты Турәм ԓывиԓаԓа ныты пос мӑс, ԓывиԓаԓа Йэмәӈ Ԓыԓ мўӈ итэва мойԓәс.

⁹Щӑԓта мўӈ пӑ ԓыв кўтэԓа нэмәԓтты кӑт сыра вантәсты щир ӑт пŏнәс, эвәԓты верән ԓыв сӑмԓаԓ сыстапсәԓы.

¹⁰Мўйа пӑ нын ин Турәм хўщԓәԓән, утәԓтәты хŏйатәт сапԓа ԓавәрт пŏнман, мўй ӑнта мўӈ ащиԓув, ӑнта мўӈ туты ӑт верәтсэв?

¹¹Туп мўӈ эвәԓԓув, Турәм Куща Иисус Христос мӑты йӑмән, ԓыв итэԓән, нŏх пайәтԓайув».

¹²Щи йўпийән ӑктәщәм мŏхет хŏԓ мӑшйайа йисәт пӑ Варнава пӑ Павел хуԓәтсәт. Ԓын пŏтәртсәтән, мўй хŏрпи йэмәӈ посәт пӑ вантыԓԓаӈәԓ верәт Турәм ԓын мŏхтан па рут мир кўтән верәс.

¹³Щи йўпийән, хун ԓын мӑшйайа йистән, Иаков пŏтәр ўс пӑ йастәс: «Хӑнам йох! Мӑнэм хуԓәнтаты.

¹⁴Симон аԉиԓысԓы, хŏты Турәм оԓәӈән па рут мир пеԓа ӑӈкәрмәс, щитԓаԓ эԓты Ԓўв нэмәԓ урәӈән мир ӑкәтты.

¹⁵Тӑм эԓты Турәм айкеԓ туты хŏйатәт ищи пŏтәртысәт, хŏты хӑшман уԓԓа:

¹⁶’Йухәт йŏхәтԓәм пӑ Давид иԓ питәм хот нŏх верԓэм, пӑ щита мўй шўкатман уԓԓа, нŏх верԓэм пӑ ԓўвеԓ па йӑԓпа ԓэщатԓэм,

¹⁷па хŏйатәт пӑ хŏԓ мирәт Турәм Куща ат кӑшсәт, хŏйтат кўтән Ма нэмем йастәԓа. Щиты Турәм Куща, тӑм мўй иса верты Ŏт, пŏтәртәԓ’.

¹⁸Турма хŏԓ Ԓўв верԓаԓ йис эԓты ԓэрәт.

¹⁹Щишән ма нумәстэмән па рут мир эԓты Турәм пеԓа керԓәты ŏтәт уԓәпсайэԓ ԓавәрта верты ӑт мосәԓ,

²⁰ԓывиԓаԓа хӑшты мосәԓ, ԓыв ԓуӈхәтән шӑкатәм ԓэтŏт эԓты, пакрасԓәты вер эԓты, шакәптәм вой ԋŏхи пӑ ўр эԓты йŏхи ат ԓавԓәссәт, пӑ па хŏйатәта щит ӑт ат версәт, мўй ԓывиԓаԓа ӑт ԓӑӈхасәт.

²¹Моисей закон йис тэԓән вошәтән иса пŏтәртԓа пӑ кашәӈ шаббат хӑтәԓән иудейәт пойәкщәты хотәтән ԓўӈәтԓа».

Апостоләт хӑншәм айкеԓ па рут мир эԓты уԓты эвԓәм йохәта китԓәт

²²Щиӈәԋща апостоләт пӑ ун икет аратәԓ пойәкщәты хŏйатԓаԓ пиԓән, ԓыв кўтԓаԓ эԓты йох пирыман, Антиохияйа Павел пӑ Варнава пиԓән китты нŏмәс версәт, щи мŏхет: Варсавайа айәԓтты Иуда, пӑ Сила, хӑнам йох кўтән кущайа уԓты кӑтӈән.

²³Ԓыв пиԓԓаԓән щимәщ хӑншәм айкеԓ мӑсәт: «Апостоләт пӑ ун икет пӑ хӑнам йохәт Антиохияйән, Сирияйән пӑ Киликияйән уԓты па рут мир эԓты уԓты хӑнам йохәта: ўща уԓаты.

²⁴Мўӈ хуԓтмәсэв, мӑтты тухәԓ, мўӈ эԓтэв ким этәм ŏтәт, ԓыв пŏтәрԓаԓән нынан ԓыԓәтсәԓаԓ пӑ нын сӑмԓән йэша мӑнәԓтсәԓаԓ, пŏтәртман, мӑтты эвтәсты мосәԓ пӑ закон хўват уԓты мосәԓ. Щит мўӈ ԓывиԓаԓа ӑт партыԓысув,

²⁵мўӈ, йӑха актәщман, йох пирыман, сӑмԓува мосты мўӈ Варнавайэв пӑ Павелэв пиԓән нын хŏщайән китты и нŏмәсән артаԓәсэв,

²⁶ԓын мўӈ Турәм Кущайэв Иисус Христос нэм урәӈән сӑмԓән мийәм хŏйатӈән.

²⁷Щиӈәԋща, мўӈ Иуда пӑ Сила китсув, нынана ԓын йасәӈән щит па ԓэра верԓәԓән.

²⁸Йэмәӈ Ԓыԓ пӑ мўӈ тӑм мосты вер тўмпийән нынан нэмәԓтты па вер верты ӑт мӑԓув:

²⁹ԓух йир, пӑ ўр, пӑ шакәптәм ԋŏхи, пӑ пакрасԓәты эԓты йŏхи ԓавԓәсты, пӑ па хŏйатәта щит ӑт верты, мўй нынана ӑт ԓӑӈхаԓты. Тӑм эԓт тӑйман, йӑма верԓәты. Тўмтака уԓаты».

³⁰Щӑԓта, китәм ŏтәт Антиохияйа йŏхәтсәт пӑ, хŏйатәт ӑкәтмеԓ кемән, хӑншәм нэпек мӑсэԓ.

³¹Ԓыв пӑ, ԓўӈәтмеԓ кемән, щи утәԓтәпса эԓты нŏх амәтсәт.

³²Иуда пӑ Сила, Турәм айкеԓ туты хŏйатӈәна уԓман, хӑнам йоха йӑм арат йасәӈ утәԓтәты щира йастәсӈән пӑ ԓывиԓаԓ такапсәԓән.

³³Мŏԓкем щита уԓман йўпийән, ԓын хӑнам йохән апостоләт хŏща йӑм нŏмәсән эсәԓсайӈән.

³⁴Туп Сила щита хӑщты нŏмәсән йŏхәтса. [Иуда пӑ Иерусалима йŏхԓы йŏхтәс.]

³⁵Павел пӑ щӑԓта Варнава Антиохияйән усӈән. Щита ԓын утәԓтәсӈән пӑ Турәм Куща йасәӈ Йӑм Айкеԓа па мŏхет пиԓән тутԓысӈән.

Павел Йӑм Айкеԓ туты кимет пўш мӑнәԓ

³⁶Мŏԓты кем пŏра хӑщмаԓ йўпийән Павел Варнавайа йастәс: «Па мӑнԓәмән, мин хӑнам йохԓәмән хŏща йӑхԓәмән, кашәӈ вошән, хŏта мин Турәм Куща йасәӈ тутԓысмән, ватԓэмән, хŏты ԓыв уԓԓәт».

³⁷Варнава, Марка айәԓты, Иоанн пӑтән ўты ўтщисԓы.

³⁸Туп Павел щит пӑтән ўты ӑт ԓӑӈхас, хŏй Памфилияйән ԓынан хӑйсәԓы пӑ ԓынана мийәм вер тӑԓаӈа верты ӑт ԋотәс.

³⁹Тӑм эԓты нŏпса ӑт ԓэщаԓәты вер тыйәс, щишән ԓын кўтанән кӑтна мӑтсәӈән; щӑԓта Варнава, Марк ўйман, Кипр пеԓа нык хўвԓәс;

⁴⁰Павел пӑ, ԓўвеԓа Сила пирымаԓ йўпийән, хӑнам йохәтән Турәм йӑма эвԓәптыман, мӑнәс,

⁴¹пӑ Сирия пӑ Киликия сӑхат, пойәкщәты мир такапман, йӑӈхәс.

Тимофей Павел хŏща пиԓтәщты вер

¹Ԓўв Дервия пӑ Листра вошӈән унты йŏхтәс. Пӑ щита и мŏԓты утәԓтыты ху ус, нэмәԓән Тимофей. Ԓўв аԋԏэԓ эвԓәм иудей нэ, ащеԓ пӑ – грек ху,

²пӑ ԓўв эԓтэԓ Листрайән пӑ Иконияйән уԓәм хӑнам йох йӑма йастыԓысәт.

³Павел ԓўвеԓ пӑтән ўты нŏмәс верәс; пӑ, ўймаԓ кемән, щи тӑхайәтән уԓәм иудейәт урәӈән, эвәтты верән версәԓы; ԓўв ащеԓ грека уԓты вер хŏԓыйэ хŏйатәтән уйәтса, щишән.

⁴Вошәт сӑхат мӑнман, ԓыв эвәԓты мŏхет апостоләтән пӑ ун икетән Иерусалимән ԓэщатәм мŏрт щирәт хўват уԓты партсәт.

⁵Пӑ пойәкщәты актәщәм мŏхет кашәӈ тӑхайән эвәԓты верән такамтыԓәт пӑ кашәӈ хӑтәԓ арамәԓәт.

Павел атәԓән ватты щирәԓ хŏща Македония мўвәӈ ху этәԓ

⁶Фригия пӑ Галатия мўв сӑхат мӑнман, Йэмәӈ Ԓыԓән Асия мўвән ԓыв Йӑм айкеԓ туты ӑт эсәԓсайәт.

⁷Мисия мўв унты йŏхәтмеԓ йўпийән, Вифиния мўва мӑнты ўтщиԓысәт; туп Йэмәӈ Ԓыԓ ԓывиԓаԓ тŏхи ӑт эсәԓсәԓы.

⁸Мисия хӑйман, пӑ ԓыв Троада воша охәԓсәт.

⁹Щӑԓта атәԓән Павела ватты щир ус: и мŏԓтты ху, Македония мўвәӈ ху, этәс. Ԓўв ԓойәс пӑ ԓўвеԓ вохԓәԓы: «Македонияйа йŏхта пӑ мўӈева ԋоты».

¹⁰Щи вантәпса йўпийән ищи пўԉаӈ мўӈ Македонияйа мӑнты нŏмәс версув, нумәсман, Турәм Куща мўӈев щита Йӑм Айкеԓ тутԓыты вохсәԓы.

Павел Филиппы воша йохәтты вер

¹¹Щиӈәԋща, Троада вош эԓты нык хўвԓәмеԓ йўпийән, мўӈ тŏрԓы Самофракия пухәр мўва йŏхәтсув, кимет хӑтәԓ пӑ Неаполь воша,

¹²щиԓта пӑ Филлиппы воша йŏхәтсув: Македония мўв щуӈән мет оԓәӈ вош, Рим пеԓа питәм вош. Тӑм вошән мўӈ кӑмәтса хӑтәԓ усув.

¹³Шаббат хӑтәԓән пӑ мўӈ вош шӑнша йŏхан пеԓа этсув, хŏта, уԓтыйән, пойәкщәты тӑха ус, пӑ, иԓ омәсман, щита ӑктәщәм имет пиԓән пŏтәртсув.

¹⁴Ԓыв кўтэԓән Фиатир вош эԓты Лидия нэмпи и нэ ус, ԓўв тынәӈ питы ўрты щӑшканәт тыныйәс. Лидия Турәм пеԓа сӑмәӈа ус, пӑ Павел мўй пŏтәртәс, Турәм Кущайән ԓўв сӑмәԓ щи пеԓа пел пўшса.

¹⁵Хун пӑ ԓўв йиӈка ԓŏӈәԓтыса пӑ ԓўв йŏԓән уԓты мŏхиԓаԓ па, мўӈев ԓўв хŏщайәԓ вохсәԓы, пŏтәртман: «Нын мӑнэм Турәм Куща пеԓа тŏрԓы уԓты верэм йӑнайа ԓўӈәтсәԓԓән ки, ма хотэма ԓŏӈаты пӑ ма хŏщайэм уԓаты». Пӑ мўӈев эвԓәптәсԓы.

Павел пӑ Сила касна хота во̆щкиты вер

¹⁶Щиты ус, хун мўӈ пойәкщәты тӑхайа мӑнмевән, и митнэ пиԓән уйтатсув, ԓўв кўԉ сŏхән катәԓман уса, аԉисыты щирәԓ хўват ԓўв кущайԓаԓа ар ŏх йŏхтәптыйәс.

¹⁷Павел йўпийән пӑ мўӈ йўпевән шушман, ԓўв ўвәс, пŏтәртман: «Тӑм хŏйатәт – Нўм Турма рупитты йохәт, мўӈева нŏх пайтәсты йуш аԉԓәт».

¹⁸Щиты ԓўв ар хӑтәԓ верыԓыйәс. Павел, ԉикащман, кўԉ сŏх пеԓа карэмәс пӑ йастәс: «Иисус Христос нэмән нӑӈен ԓўв ԓыпеԓ эԓты ким этты партԓэм». Пӑ атәм ԓыԓ ищи кумат ким этәс.

¹⁹Щиӈәԋща ԓўв кущайԓаԓ, ваттэԓән, ԓыв ŏх йиты тӑхайэԓ хŏԓас, Павел пӑ Сила ԋӑрэмәсайӈән пӑ мир кущайәт хŏща вош хӑрыйа хŏрӈәԓтсайӈән.

²⁰Щӑԓта, ԓынан рим кущайӈән хŏща тўвман, йастәсәт: «Тӑм хŏйатӈән, иудейәта уԓман, мўӈ вошев уԓәпса ԓыԓԓәты щир этәԓтәԓтән

²¹пӑ щимәщ щирәт эԓты пŏтәртԓәтән, мўй мўӈева, Рим хŏйатәта, вана ўты пӑ верты ӑт мосәԓ».

²²Мир ищиты ԓын пеԓайән эԓԓәс, рим кущайӈән пӑ ԓын эԓтайән сŏхԓән хŏԓт мӑшман йўпийән, ԓынан йўхән сэкты партсәԓән

²³пӑ ԓын, артан йўхән кўтәртыйәмӈән йўпийән, касна хота вŏщкисайӈән, касна хот шавиты хŏйата такан шавиты партсайӈән.

²⁴Щимәщ партәпса йоша павәтмаԓ йўпийән, ԓўв ԓынан ԓыпи касна хот йӑта вŏщкәсԓы пӑ ԓын кўрԓән йўх сэсыйа сэксәԓы.

²⁵Ат кўтәп кемән Павел пӑ Сила, пойәкщәман, Турәм, арыман, ишәксәԓән; касна хота питәм ŏтәт пӑ ԓынан хуԓәтсәт.

²⁶Шӑмкап мўв такан тӑриты питәс, щиӈәԋща касна хот пӑты ԋŏхԓәс; и щишән овәт хŏԓыйэ пелки пўншатсәт, пӑ хŏԓыйэ хŏйатәт хŏща сэсэт лыԋа йисәт.

²⁷Касна хот шавиты хŏйат пӑ, нŏх верԓәмаԓән, касна хот овәт пелки пуншәм шийаԓәмаԓ кемән, аԓты кешеԓ ким лакемәсԓы пӑ ԓўвеԓ ԓўв пӑратты ўтщисԓы, ԓўв нумәсәԓ, опсәм хŏйатәт хŏнтасәт.

²⁸Туп Павел сыйәӈ тўрән такан йастәс, пŏтәртман: «Нӑӈена нэмәԓтты атәм аԓ вера, мўӈ хŏԓ тӑта уԓԓув».

²⁹Ԓўв тўт такан вохәс, касна хот ԓыпийа хухәԓмәс пӑ тӑриман Павел пӑ Сила хŏща керәптыйәс,

³⁰пӑ, ԓынан ким этәԓтәман, йастәс: «Ма кущайӈәԓам! Мўй мӑнэм верты мосәԓ, нŏх пайтәсты урәӈән?»

³¹Ԓын пӑ йастәсӈән: «Турәм Куща Иисус Христоса эвԓа, пӑ нӑӈ нŏх пайәтԓайән, нӑӈ хот тэԓэн па».

³²Щӑԓта Турәм Куща йасәӈ ԓўвеԓа пӑ хŏԓ, ԓўв хотәԓән уԓәм ŏтәта, пŏтәртса.

³³Пӑ ԓўв, ԓынан атәԓән ўймаԓ кемән, ԓын ԋўләмԓән нŏх ԉŏхәтсәԓы пӑ ищи мŏхты ԓўв йиӈка ԓŏӈәԓтыса пӑ ԓўв хотәӈ мŏхиԓаԓ па.

³⁴Щӑԓта, ԓынан йŏхи хотәԓа тўвмаԓ йўпийән, ԓэты пӑсана вохсәԓы пӑ хŏт тэԓәԓ пиԓән амтәс, Турма эвәԓмаԓ урәӈән.

³⁵Хун пӑ хӑтԓа йис, рим кущайӈән вошәӈ мит йохӈән йастәты китсәтән: «Щи хŏйатӈән эсԓаԓән».

³⁶Касна хот шавиты хŏйат щит эԓты Павела такан йастәс: «Рим кущайӈән нынан эсәԓты партсәтән; щиӈәԋща, ин ким этатән пӑ йӑм нŏмәсән мӑнатән».

³⁷Туп Павел ԓын пеԓайәна йастәс: «Минэмән, Рим хŏйатӈән, сўт такԓы хŏԓ мир сурән сэксәԓән пӑ касна хота вŏщкәсԓән, ин пӑ хӑԋайән эсәԓԓаймән? Ӑнта, ты ат йŏхәтԓәтән пӑ минэмән ԓын ким ат этәԓтәԓԓән».

³⁸Вошәӈ мит йохӈән щи йасӈәт рим кущайӈәна йастәсԓән, пӑ щитӈән, Рим йŏха уԓты вер хуԓман кемән, хŏԓт пӑԓтәмәсӈән.

³⁹Щӑԓта, щи йŏхәтсәтән, ԓын пеԓайән пойкащсәтән пӑ, ким этәԓтәман йўпийән, вош эԓты ким мӑнты партсәԓән.

⁴⁰Ԓын пӑ, касна хот эԓты ким этман йўпийән, Лидия хŏща йŏхәтсәӈән пӑ, хӑнам йохԓән шийаԓәман кемән, ԓывиԓаԓ утәԓтәсԓән, пӑ йэԓԓы мӑтсәӈән.

Павел пӑ Сила Фессалоника вошән

¹Амфиполь пӑ Аполлония мŏхты мӑнман, ԓын Фессалоника воша йŏхәтсәтән, хŏта иудейәт пойәкщәты хот ус.

²Павел, ԓўв уԓԓытаԓ щирәԓән, ԓыв хŏщайэԓа ԓŏӈәс пӑ хуԓәм шаббат хӑтәԓ и йўпийән Йэмәӈ Нэпек эԓты ԓыв пиԓԓаԓән пŏтәртәс,

³ԓывиԓаԓа аԉиԓыман пӑ тŏрԓы йастәман, Христоса сŏрма питты пӑ нŏх ԓыԓәӈԓәты мосәс, пӑ йастәс: «Тӑм Христос - щит Иисус, Хŏй эԓты ма нынана пŏтәртԓәм».

⁴Щӑԓта ԓыв эԓтыԓаԓ тухәԓԓаԓ эвәԓсәт пӑ Павел пӑ Сила пеԓа пайтәссәт, хŏты грекәт эԓты, Турәм пеԓа сӑмәӈ хŏйат щи арат ар, и щиты пӑ ԓӑтәӈа уԓты нэӈәт эԓты йӑм арат.

⁵Туп ӑт эвԓәм иудейәт, шек нŏмәсән ԉикащман пӑ вош хӑри эԓты тухәԓ ӑт рӑхты хŏйатәт ўйман, похла ӑктәщсәт пӑ вош нŏх ԋŏхаԓтты питсэԓ пӑ, Иасон хот ԉэпа ӑратмеԓ кемән, ԓынан, мир хŏща ким туты урәӈән, кӑшсэԓ.

⁶Ԓынан ӑт уйәтмеԓ йўпийән, ԓыв Иасон пӑ па эвәԓты хӑнам йох вош кущайәт хŏща хипԉәԓтсәԓаԓ, ўвман: «Тӑм мўв ԓŏватән уԓәпса шўкатты ŏтәт ты па йŏхәтсәт,

⁷Иасон пӑ ԓывиԓаԓ вана ўсԓы, пӑ хŏԓыйэ ԓыв, па Ŏт, Иисус, хона тӑйман, кесарь партты щира ӑт уԓԓәт».

⁸Щиӈәԋща щит хуԓәм мир пӑ вошәӈ кущайәт хурэпа пайәтсәԓаԓ.

⁹Туп тӑмет, Иасон пӑ па ŏтәт эԓты тын ўйман, ԓывиԓаԓ эсәԓсәԓаԓ.

Павел пӑ Сила Верия вошән

¹⁰Хӑнам йохәт пӑ ищи мŏхты атәԓән Павел пӑ Сила Верия воша китсэԓ, хŏԓта ԓын йŏхәтман кемән, иудейәт пойәкщәты хота мӑтсәӈән.

¹¹Тӑта уԓты ŏтәт Фессалоника мŏхет эԓты йӑм нŏпсәӈшәкәт: ԓыв йасәӈ хŏԓ сӑмәӈа вана ўсэԓ, кашәӈ хӑтәԓ Йэмәӈ Нэпек ԓэрапман, тӑми а мўй тŏрԓы щиты.

¹²Щӑԓта ԓыв эԓтыԓаԓ ар хŏйат эвԓәс, пӑ грек ԓӑтәӈ нэӈәт эԓты пӑ йох эԓты йӑм арат.

¹³Туп хун Фессалоника иудейәт мŏштәсэԓ, Верия хŏща па Павелән Турәм йасәӈ туса, ԓыв щи па йŏхәтсәт пӑ мир нŏх кўрәтты пӑ нŏх ԋŏхаԓты питсэԓ.

¹⁴Щишән хӑнам йох ищи мŏхты Павел китсэԓ, щарәс пеԓа шушты щира; Сила пӑ Тимофей щи вошән хӑщсәтән.

¹⁵Павела мӑнты ԋотәм ŏтәт ԓўвеԓ Афины вош унты ԋŏтсэԓ. Ԓыв, Силайа пӑ Тимофейа мийәм партәпса йоша павәтмеԓ кемән, мӑтты ԓын сорашәк ԓўв хŏщайәԓ ат йŏхәтсәӈән, йŏхԓы мӑтсәт.

Павел Афины вошән

¹⁶Павел мӑнты пиԓӈәԓаԓ ԓавәԓтаԓ эԓты Афины вош хуват шушиԓыйәс пӑ, тӑм вош тэԓыйэ ԓух тӑйтаԓ урәӈән, ԓўв нŏпсәԓ ўшмащәс.

¹⁷Щиӈәԋща, ԓўв иудейәт пойәкщәты хотән иудейәт пиԓән пӑ Турәм сӑмәӈа тӑйты грек йох пиԓән, пӑ кашәӈ хӑтәԓ вош хӑрийән уйтантыԓыты хŏйатәт пиԓән нумәссәс.

¹⁸Ԓўв пиԓәԓән тухәԓ эпикур пӑ стоик ашкуԓайәт эԓты уԓты нŏпсәӈ йох пŏтрэмәты питыԓысәт. Итԓаԓ иԋщәссәт: «Мўй пӑ щи авашты ŏт йастәты ԓӑӈхаԓ?», па ŏтәт пӑ: «Иԓампа, ԓўв па мўв хŏйатәт ԓуӈхәт эԓты утәԓтәԓ», ԓўв ԓывиԓаԓа Иисус пӑ нŏх ԓыԓәӈԓәты вер эԓты Йӑм Айкеԓ тус, щишән.

¹⁹Щӑԓта, ԓўвеԓ пӑтән ўйман, Ареопаг нэмпи тӑхайа17:19 Ареопаг нэмпи тӑха - словарьән ванты; тусэԓ пӑ йастәԓәт: «Мўӈ а мўй верәтԓэв уйәтты, мўй щит щимәщ йӑԓәп утәԓтәпса, мўй эԓты нӑӈ пŏтәртсән?

²⁰Нӑӈ мŏԓты ŏшԓы-уйтԓы ŏт мўӈ паԓԓува хуԓмәԓтԓән. Щишән мўӈ уйәтты ԓӑӈхаԓув, мўй щит?»

²¹Афины мŏхет пӑ хŏԓ пӑ ԓўв хŏщайэԓ уԓты па мўв хŏйатәт нэмәԓты щирән пŏрайэԓ ӑт хӑщәптыԓысәт, туп щиты, мŏԓты йӑԓәп вер эԓты ат хуԓәтса пӑ ат пŏтәртса.

²²Щӑԓта, Павел Ареопаг кўтпа ԓойман, йастәс: «Афины хŏйатәт! Ма иса ваттэмән, нын ԓўӈхәт эԓты нумәсты вер шек такан тӑйԓәԓән.

²³Нын йэмәӈ лотԓән вантыман йӑхман, ма и йирасты лот уйәтсәм, хŏта хӑшман уса: ’Ӑт уйәтты Турма’. Тӑман-щи, Хŏйтан нын, ӑт уйәтман, такан нумԓәԓән, ма нынана такан айәԓԓэм.

²⁴Турәм, уԓты-омәсты мир тыйәԓтәм Ŏт, Ԓўв, опәԉән пӑ мўвән Турәм Кущайа уԓман, ӑнта йошән верәм хотәтән уԓ

²⁵пӑ хŏйат йошән верты верәт ӑт вохәԓ, ищи мӑтты Ԓўвеԓ мŏԓты мосәԓ, Ԓўв кашәӈ ŏта уԓәпса пӑ ԓыԓ, пӑ мўй иса мӑԓ.

²⁶И кӑԓы эԓты Ԓўв аратәԓ хŏйат рут тыйәԓтәс, иса мўв ԓŏватән уԓты урәӈән, хŏта Ԓўв хŏԓ хŏйат рутәта мŏрт пŏра пӑ мŏрт уԓты тӑха ԓэщатәс.

²⁷Ԓыв Турәм ат кӑшсәт, Ԓўв уԓты щащәԓ ат мŏштәсәт пӑ Ԓўвеԓ ат уйәтсэԓ - щи кўш Ԓўв кашәӈ ŏтԓув пўӈәԓән ванән уԓ,

²⁸щиты ӑт уԓ, мўӈ Ԓўвеԓән уԓԓув пӑ ԋŏхаԓув, хŏты тухәԓ нын арәт верты мŏхиԓән пŏтәртысәт: ’Мўӈ Ԓўв пиԓәԓән и рут’.

²⁹Щиӈәԋща, Турәм рута уԓман, мўӈев щиты нумәсты ӑт мосәԓ, мӑтты Турәм сорԋи, мўй пӑ щелŏх, мўй пӑ хŏйат нŏмәс хўват хŏрасән верәм кев хŏрпи.

³⁰Щиӈәԋща, Турәм йӑна вер ӑт уйтәм пŏра хӑйман, Турәм ин хŏйатәта хŏԓ кашәӈ тӑхайән кӑрэк эԓты шӑнша керԓәты партәԓ,

³¹Ԓўв хӑтәԓ ԓэщатәс, щишән, хун уԓты-омәсты турәм вещката сўтәтты питԓәԓы, Ԓўв щи кеша пŏнәм Хŏйатәԓ сӑхат, пӑрәм эԓты Ԓўвеԓ нŏх ԓыԓӈатман, мира иса, уйәтты урәӈән, ваттәԓтәсԓы».

³²Пӑрәм эԓты нŏх ԓыԓӈатәм вер хуԓмеԓ кемән, итԓаԓ ӑԓ хўләщсәт, киметԓаԓ пӑ йастәсәт: «Тӑм эԓты нӑӈен па ишән хуԓәтԓэв».

³³Щиӈәԋща, Павел ԓыв эԓтыԓаԓ мӑнәс.

³⁴Тухәԓ йох пӑ, ԓўв хŏщайәԓа рӑхәԓтысәт пӑ эвәԓсәт; ԓыв кўтэԓән Дионисий Ареопаг ху17:34 Ареопаг ху - сут йохәт эԓты ит; , Дамарь нэмпи нэ пӑ ԓыв пиԓԓаԓән па мŏхет усәт.

Павел Коринф вошән

¹Тӑм йўпийән Павел, Афины вош хӑймаԓ йупийән, Коринф воша йŏхтәс;

²Щита ԓўв и иудей ху уйтәс, нэмәԓән Акила, Понт мўв эԓты уԓты ху. Акила тӑм ванән Италия эԓты Прискилла имеԓ пиԓән йŏхтәс, - Клавдий нэмпи кесарь иудейәта хŏԓ Рим эԓты мӑнты партсәԓы, - пӑ Павел ԓын хŏщайән йŏхтәс;

³Ԓын и хŏрпи верты ŏт тӑйсәӈән: ԓын пирщин хотәт ԓэщатсәӈән, пӑ щишән Павел ԓын пиԓанән рупитты хӑщәс.

⁴Кашәӈ шаббат хӑтәԓән ԓўв иудейәт пойәкщәты хотән иудейәт пӑ грекәт пиԓән пŏтәртәс пӑ ԓывиԓаԓ таӈиԓысԓы18:4 таӈиԓыты - ар пуш такан мŏԓты эԓты йастәты, нŏпса йӑма ат питәс;.

⁵Хун пӑ Македония эԓты Сила пӑ Тимофей йŏхәтсәӈән, Павел иудейәта пŏтәртты ԓыԓәԓән иԉапса, мӑтты Иисус - щит Христос.

⁶Хун пӑ ԓыв ԓўвеԓ йэртԓыты пӑ ԓўвеԓа атма йастәты питсәт, ԓўв ԓумтәмԓаԓ иԓ пӑркатмаԓ кемән, ԓывиԓаԓа йастәс: «Нын кӑԓыԓән нын ŏх пӑтԓәнән;18:6 Нын кӑԓыԓән нын ŏхпӑтԓәнән - тӑм йасӈәт щит аԉԓәт: нынәԓән нын Турәм йэԓпийән накԓата пайәтсәԓән; ма сыстам; тӑԓта йэԓԓы па рут мир хŏща мӑнԓәм».

⁷Павел иудейәт пойәкщәты хот эԓты ким этәс пӑ ванән уԓты хота ԓŏӈәс, хŏта Иуст нэмпи ху, Турәм пеԓа сӑмәӈ ŏт, ус.

⁸иудейәт пойәкщәты хот куща Крисп пӑ хŏԓ ԓўв йŏԓән тӑйты мŏхиԓаԓ пиԓән Турәм Кущайа эвԓәс, пӑ Коринф мŏхәт эԓты ар хŏйат, хуԓәтман, эвәԓсәт пӑ йиӈка ԓŏӈәԓтыԓысайәт.

⁹Турәм Куща пӑ атәԓән Павел вантәпсайәԓ хŏща йастәс: «Аԓ пӑԓа, туп пŏтәрта пӑ шитама аԓ йўва,

¹⁰Ма нӑӈ пиԓэнән уԓԓәм, пӑ нэмәԓты ŏт нӑӈена атәм ӑт верәԓ, Ма тӑм вошән ар хŏйат тӑйԓәм, щишән».

¹¹Пӑ ԓўв щита, ԓывиԓаԓ Турәм йасӈа утәԓтыман, тӑԓ-ԓўӈ пӑ хут тыԓәщ арата хӑщиԓыйәс.

¹²Щи кўтән, Ахаия мўвән Галлион проконсул уԓәм пŏрайән, иудейәт и нŏмәсән Павел йэщаԓт эԓԓәсәт пӑ сўт верты тӑхайа тусэԓ,

¹³пŏтәрман, мӑтты ԓўв хŏйатәт, Турәм пеԓа сӑмәӈа уԓты, ӑнтом Закон щирән утәԓтәԓԓы.

¹⁴Хун пӑ Павел уӈԓәԓ пел пўшты ўтщисԓы, Галлион иудейәта йастәс: «Иудейәт! Мŏԓты атәм вер мўй пӑ ԓоԓмасты, веԓтатты вер верәс ки, ма ԓуԓән нынан хуԓәтты щир тӑйсәм,

¹⁵туп хун утәԓтәты вер эԓты, пӑ нэмәт эԓты, пӑ нын законән эԓты ўра вортԓа, нын щирәнән артаԓыйаԓән; ма щита сўта уԓты ӑт ԓӑӈхаԓәм».

¹⁶Щӑԓта сўт верты тӑха эԓты ԓывиԓаԓ воштәсԓы.

¹⁷Грекәт хŏԓыйэ иудейәт пойәкщәты хот куща Сосфен ԋӑрэмәсэԓ пӑ ԓўвеԓ сўт верты хот йэԓпийән сэксэԓ; туп Галлион щит эԓты йэша нэш ӑт нумисыйәс.

Павел Антиохияйа йŏхԓы керԓәты вер

¹⁸Павел йам арат хӑтәԓ Коринф вошән ус. Щи йўпийән ԓўв хӑнам йох пиԓән пайәм уԓәм верәс пӑ Акила пӑ Прискилла пиԓән Сирия мўва хŏпән мӑнәс. Мӑнтаԓ йэԓпийән Павел Кенхрей вошән ŏхәԓ ԓŏртсәԓы, Турма аԉәм вер тӑйәс, щишән.

¹⁹Ефеса йŏхәтмеԓ йўпийән ԓынан щита хӑйсәԓы, ԓўв пӑ иудейәт пойәкщәты хота ԓŏӈәс пӑ иудейәт пиԓән нумәсман пŏтрэмәс.

²⁰Хун пӑ ԓыв ўратсәт, ԓўв хўвшәк ԓыв хŏщайэԓ ат ус, ԓўв ӑт кашащәс,

²¹туп ԓыв пиԓԓаԓән пайәмуԓәм верәс, йастәман: «Мӑнэм йиты йэмәӈ хӑтәԓән мет шопәӈ Иерусалимән уԓты мосәԓ; нын хŏщайән пӑ, Турма рӑхты ки питәԓ, па йŏхԓы йŏхәтԓәм». Щӑԓта Ефес вош эԓты хопән мӑнәс. [Акила пӑ Прискилла Ефесән хӑщсәтән.]

²²Хоп эԓты Кесария воша ŏхәԓмаԓ йўпийән, ԓўв Иерусалима нŏх йŏхтәс, щита пойәкщәты ӑктәщиты мŏхет йӑм йасәӈән йастәсԓы пӑ Антиохия воша мӑнәс.

²³Щӑԓта щита мŏԓты кем сыс хӑйман, этәс, пӑ и оԓтман Галатия пӑ Фригия мўвӈән мŏхты мӑнәс, утәԓтәты йŏх такапман.

Аполлос Ефесән пӑ Коринфән

²⁴И мӑтты иудей, нэмәԓән Аполлос, Александрия18:24 Александрия - Египет вош; вошәӈ ху, туса пŏтәртты пӑ Йэмеӈ Нэпек уйәтты ху, Ефеса йŏхтәс.

²⁵Ԓўв Турәм Куща Йуш пеԓа утәԓтәман ус пӑ шек такан пӑ эвәԓты щира пŏтәртәс, тўӈа-щира Турәм Куща эԓты утәԓтәс, кўш туп ԓўв Иоанн йиӈка ԓŏӈәԓтыйәпса уйтәс.

²⁶Ԓўв, ӑт пӑԓман, иудейәт пойәкщәты хотән пŏтәртты питәс. Ԓўвеԓ хуԓмаԓ кемән Акила пӑ Прискилла ԓўвеԓ вана ўсԓән пӑ тўӈашәк Турәм Куща Йуш ԓўвеԓа таӈсәԓән.

²⁷Хун пӑ ԓўв Ахаия мўва мӑнты утщийәс, хӑнам йох щита уԓты утәԓтәты йохәта нэпек хӑшсәт, ԓыв ԓўвеԓ вана ўты партсэԓ; ԓўв тŏхи йŏхәтмаԓ йўпийән, ар ԋотәп щи хŏйатәта верәс, хŏй Турәм йӑм хўватән эвәԓман ус.

²⁸Ԓўв мир йэԓпийән иудейәт ԓомтәтԓыты вер шек эԓпа аԉиԓысԓы, Йэмәӈ Нэпек хўват этәԓтыман, мӑтты Иисус уԓ Христос.

Павел Ефесән

¹Аполлос Коринфән уԓмаԓ сыс, Павел нŏхԓы уԓты мўвәт мŏхты мӑнман, Ефеса йŏхтәс пӑ щита тухәԓ утәԓтәты йох уйәтмаԓ кемән,

²ԓывиԓаԓа йастәс: «Йэмәӈ Ԓыԓ нын, эвәԓман йўпийән, вана ўсԓән амўй?» Ԓыв пӑ ԓўвеԓа йастәсәт: «Мўӈ хŏԓна пӑ ӑт хуԓԓысэв, Йэмәӈ Ԓыԓ амўй щит».

³Ԓўв ԓывиԓаԓа йастәс: «Мўй пеԓа нын йиӈка ԓŏӈәԓтысайты?» Ԓыв йŏхԓы йастәсәт: «Иоанн йиӈка ԓŏӈәԓтыйәпса пеԓа».

⁴Павел йастәс: «Иоанн йиӈка ԓŏӈәԓтыйәпса ус кӑрэк эԓты шӑшән керԓәты йиӈка ԓŏӈәԓтыйәпса, хŏйатәта пŏтәртман, ԓўв йўпеԓән Йиты Ŏта, Христоса Иисуса19:4 Христос Иисус - щит Мессия Иисус;, ат эвәԓсәт».

⁵Щит хуԓмеԓ кемән, ԓыв Турәм Куща Иисус нэм урәӈән йиӈка ԓŏӈәԓтысайәт,

⁶пӑ, хун Павел ԓыв ŏхпӑтԓаԓ эԓты йошӈиԓаԓ пŏтсәԓы, ԓыв эԓтыԓаԓа Йэмәӈ Ԓыԓ иԓ ŏхԓәс, пӑ ԓыв па йасӈәтән пŏтәрты пӑ Турәм эԓты айкеԓ туты питсәт.

⁷Ԓыв аратэԓән кӑтхŏщйаӈ кем хŏйат ус.

⁸Иудейәт пойәкщәты хота йŏхәтмаԓән, ԓўв, ӑт хурыман, хуԓәм тыԓәщ утәԓтәс, Турәм Хон Уԓәпса эԓты пŏтрэмәман пӑ эвԓәптәман.

⁹Туп ԓыв эԓтыԓаԓ тухԓәт сӑмԓаԓ така версәԓаԓ пӑ эвәԓты ӑт ԓӑӈхасәт, Турәм Куща Йуш мир йэԓпийән ԉикәӈ йасәӈән йастәман. Щиӈәԋща Павел ԓывиԓаԓ хӑймаԓ кемән, утәԓтәты йŏх утща щира ӑкәтсәԓы пӑ и мŏԓты Тиранн ху утәԓтәты хотән кашәӈ хӑтәԓ хŏйатәт утәԓтәсԓы.

¹⁰Кӑт тӑԓ-ԓўӈ кем хўват щиты ус, Асия мўвән уԓты хŏйатәт, иудейәт мўй пӑ грекәт, Турәм Куща Иисус эԓты уԓты утәԓтәпса хŏԓыйэ хуԓсэԓ.

¹¹Турәм пӑ Павел йош мŏхты мŏԓты арат вантыԓԓаӈәԓ вер верәс,

¹²кӑшаӈ хŏйатәт ԓоӈԓа ԓўв тӑйты ŏхшамԓаԓ пӑ ӑнтәп сŏхԓаԓ пŏныԓысайәт пӑ ԓыв мушԓаԓ нŏх вŏԓысәт, пӑ ԓыв эԓтыԓаԓ кўԉ сŏхәт ким этсәт.

¹³Хŏԓна пӑ уԉԋайа йӑхты, йасәӈән кўԉ сŏх воштәты иудей йох эԓты, тухԓәт кўԉ сŏхәӈ хŏйатәт хŏща Турәм Куща Иисус нэм йастәты питсәт, пŏтәртман: «Нынан Иисус нэмән воштәԓэв, Хŏй эԓты Павел такан йастәԓ».

¹⁴Щит мӑтты мŏԓты Скева нэмпи, иудей Турма йир верты ŏх ики, ԓапәт пŏх версәт.

¹⁵Туп кўԉ сŏх йŏхԓы йастәс: «Иисус уйәтԓэм, пӑ Павел ищи мӑнэма ԓэр, нын пӑ хŏйтат?»

¹⁶Щӑԓта ԓыв хŏщайэԓа щи кўԉ сŏхәӈ хŏйат щи ԓŏват ун йурән ӑратәс пӑ ԓывиԓаԓ иԓ пайәтсәԓы, ԓыв ԋара питман пӑ ԋўлмәӈа йўвман, щи хŏт эԓты ким хŏнтасәт.

¹⁷Щит хŏԓ Ефесән уԓты иудейәта пӑ грекәта уйәтты щира питәс, пӑ хŏԓ ԓыв пӑԉщәмән йŏхәтсайәт, пӑ Турәм Куща Иисус нэм ԓӑтәӈа айәԓтты питсэԓ.

¹⁸Эвԓәм ŏтәт эԓты ар хŏйат йŏхтыԓыйәс, вещкат щирән верԓаԓ эԓпа аԉсәԓаԓ.

¹⁹Мўтра верыԓыйәм мŏхет эԓты йӑм ар хŏйат, мўтра верты нэпекԓаԓ йӑха ӑкәтман, хŏйатәт йэԓпийән нŏх ўщәтсәԓаԓ, пӑ тынԓаԓ йӑха пŏтсәԓаԓ пӑ ветйаӈ щŏрәс щел ŏх арата хойәс.

²⁰Щиты такан Турәм Куща йасәӈ лакки ԓӑрпиԓәс пӑ йурамәс.

²¹Хун пӑ щит йэтшәс, Павел, Ԓыԓән тўвман, Македония пӑ Ахаия мўв сӑхат Иерусалима мӑнты нŏмәс верәс, йастәс: «Щи йŏхтыԓытэм йўпийән, мӑ Рим ватты верэм уԓ».

²²Щӑԓта, кӑт ԓўвеԓ ԋотты хŏйатӈәԓаԓ, Тимофей пӑ Ераст, Македония мўва китмаԓ йўпийән, ԓўв Асия мўвән мŏԓты сыс кема хӑщиԓыйәс.

Йэшащты вер Ефесән

²³Щи пўԉаӈ Турәм Куща Йуш урәӈән ун йэшащты вер тыйәс,

²⁴и хŏйат, нэмәԓән Димитрий, щелŏх верән тус ху, щелŏх эԓты Артемида ԓух ими хŏрамәӈ хот хŏр верыԓыйәс пӑ вератты тус йохәта ŏх шитты щир мийиԓыйәс.

²⁵Ԓывиԓаԓ пӑ па вератты йохәт йӑха ӑкәтман, йастәс: «Мŏхет! Нын уйәтԓәты, тӑм вератты вер эԓты мўӈ тӑйтаӈ щирэв уԓ;

²⁶щи кўтән нын ватԓәты пӑ хуԓԓәты, ӑнта туп Ефесән, иса хӑщ Асия ԓŏватән щи Павел ар хŏйат ԓўв эвԓәптәты верәԓән йŏвра хўщәс, пŏтәртман, мӑтты хŏйат йошән верты ŏт - щит ӑнта ԓуӈхәт.

²⁷Щит пӑ мўӈева атәм верәԓ ӑнта туп вератты верэв атма айәԓтты щирән, Артемида ԓух ими йэмәӈ хот па нэмәԓтты йўкана ӑт тӑйты питԓа. Ԓух ими хŏԓна ԓўв Асия мўв ԓŏватән пӑ мирән иса ԓӑтәӈа тӑйԓа, ԓух ԓатәӈ верәԓ хŏԓт павәтԓа!»

²⁸Щит хуԓәтмеԓ кемән, ԓыв ԉикән йŏхәтсайәт пӑ ўвты питсәт, пŏтәртман: «Ефес вош Артемида ԓӑтәӈ!»

²⁹Щӑԓта вош ԓŏватәԓән нŏх ԋŏхԓәс. Ԓыв Павел пиԓән йӑӈхәм Македония кӑтӈән, Гаий пӑ Аристарх, ԋӑрэмәман, и йӑха каш ватты тӑхайа ԋŏхтәсэԓ.

³⁰Хун пӑ Павел мир хŏща этты ўтщийәс, утәԓтәты йохәтән ԓўв ӑт эсәԓса.

³¹И щиты тухәԓ Асия кущайәт эԓты па, ԓўвеԓа ԓухса уԓман, ԓўв хŏщайәԓ айкеԓ китсәт, каш ватты тӑхайа ӑт ат йис.

³²Щи кўтән итԓаԓ ит ўвԓәт, киметԓаԓ пӑ кимет ŏт ўвԓәт, пŏтәртты ӑктәщәм щир и нулама ус, пӑ ар пеләк йӑха ӑктәщәм ŏтәт ӑт уйәтԓәт, мўй урәӈән ӑктәщсәт.

³³Иудейәт йастәм щирән, мир кўт эԓты Александр ким вохса. Йошән пос верман, Александр мир пеԓа пŏтәртты ўтщийәс.

³⁴Хун ŏша пайәтсэԓ, ԓўв иудей ху, хŏԓ и турән ўваԓтсәт пӑ кӑт щос кем увсәт: «Ефес вош Артемида ԓӑтәӈ!»

³⁵Вошәӈ хӑншатты куща пӑ, хŏйатәт иԓ роммәԓтмаԓ кемән, йастәс: «Ефес йох! Мӑты хŏйат ӑт уйәтәԓ, Ефес - щит ԓӑтәӈ ԓух ими Артемида пӑ турәм эԓты иԓ рӑкнәм хŏрәԓ шавиты вош?

³⁶Щит хŏща ўра ворты вер ӑнтом ки, нынан рома уԓты мосәԓ пӑ, ӑт нумәсман, вер верты ӑт мосәԓ.

³⁷Нын тӑм икеӈән ты тусԓән, ԓын ӑнта Артемида йэмәӈ хот ԓыпи ԓоԓәпсәтән, ӑнта нын ԓух имана атәм версәтән.

³⁸Димитрий пӑ па вератты йох ԓўв пиԓәԓән мӑтты хŏйат пеԓа пŏләщ тӑйԓәт ки, щи кеша сўт верты урәӈән ӑктәщиты щир уԓ пӑ сўт кущайәт уԓԓәт: кўтԓаԓән поләщ ат тутԓыԓәт.

³⁹Нын мŏԓтты па ŏт кӑшԓәты ки, щит закон щирән ӑктәщиты тӑхайән ватты питԓа.

⁴⁰Мўӈ вевтам щира питсув - ин тӑм тыйәм вер урәӈән, йэшащты щира пŏнԓайув, щи урәӈән нэмәԓты сŏнтәӈ ӑнтом, мўӈ ӑктәщәм верэв ԓуԓән нŏх пайәтты». Щит йастәмаԓ йўпийән, ԓўв ӑктәщәм мŏхет лакки эсәԓсәԓы.

Павел Македонияйа пӑ Грецияйа мӑнты вер

¹Йэшащты вер вŏԓыйәм йўпийән, Павел утәԓтәты йох вана вохмаԓ пӑ ԓыв номәсԓаԓ такапмаԓ йўпийән, ԓыв пиԓԓаԓән пайәмуԓәм верәс, ким этәс пӑ Македония мўва мӑнәс.

²Щи тӑхайәт сӑхат мӑнман пӑ эвәԓты хŏйатәт йӑм артан утәԓтәсԓы. Еллада20:2 Еллада - щит Греция; мўва йŏхәтмаԓән,

³щита ԓўв хуԓәм тыԓәщ ус. Хун ԓўв Сирия мўва хопән мӑнты ӑктәщәс, иудейәт ԓўвеԓ пӑратты вер ԓэщатәм хуԓмаԓ кемән, Македония сӑхат йŏхԓы мӑнты нŏмәс верәс.

⁴Ԓўв пиԓәԓән Асия унты Сосипатр, Верия вошәӈ ху, Пирр пŏх, Фессалоника эԓты уԓты Аристарх пӑ Секунд, щӑԓта Гаий - Дервия вошәӈ ху пӑ Тимофей, щӑԓта пӑ Асия эԓты уԓты Тихик пӑ Трофим йӑхсәт.

⁵Ԓыв, йэԓԓы мӑнман, мўӈев Троада вошән ԓавәԓсэԓ.

⁶Мўӈ пӑ, тўтәӈ ԋаԋ хӑтԓәт йўпийән, Филиппы эԓты хопән мӑтсув пӑ ветмет хӑтәԓән Троадайән ԓыв хŏщайэԓ йŏхәтсув, щита ԓапәт хӑтәԓ усув.

Пӑрәм Евтих но̆х ԓыԓӈатәм вер

⁷Ԓапәт оԓәӈ хӑтәԓән20:7 Ԓапәт оԓәӈ хӑтәԓ - еврейәт щирән щит шаббат йўпи хӑтәԓ, хӑнтэт щирән - щўтщәты хӑтәԓ;, хун утәԓтәты йох ԋаԋ морәтты урәӈән йӑха ӑктәщсәт, Павел ԓыв пиԓԓаԓән пŏтрэмәс пӑ, кимет хӑтәԓ мӑнты нумәсмаԓ хўват, ԓўв пŏтрәԓ ат кўтәп унты тусԓы.

⁸Нўм хот йӑтән, хŏта мўӈ ӑктәщсув, йӑм ар тўт хŏшам ус.

⁹Павел хув пŏтрэмәмаԓ эԓты, и энәмты пŏх, нэмәԓән Евтих, ишԋи хопән опсәс, такан иԓ вŏйәпса пӑ ԋŏхԓәмаԓ сӑхат, хуԓмет хот пӑԓат эԓты иԓ рӑкнәс, пӑ нŏх аԓэмәмән, пӑрмаԓ.

¹⁰Павел, иԓ эсԓәщәс, энәмты пŏх эԓт ŏԓсәԓы пӑ ԓўвеԓ ӑпәԓтман, йастәс: «Аԓ хурыйаты, ԓўв ԓыԓәӈ».

¹¹Павел нўм хŏт йӑта ԓŏӈмаԓ кемән пӑ ԋаԋ морәтмаԓ пӑ ԓэвмаԓ йўпийән, йӑм хўват, хŏԓна пӑ хутԓәты унты, пŏтрэмәс, пӑ йухәт ким этәс.

¹²Щи кўтән энәмты ԋаврэм ԓыԓӈат йŏхи туса пӑ щит эԓты хŏԓ шек амәтсәт.

Троада эԓты Милита мӑнты вер

¹³Мўӈ паршәӈ ун хопа ԓэԓсув пӑ йэԓԓы Асс вош пеԓа мӑтсув, щиԓта Павел ўты урәӈән; ԓўв мўӈева щиты партсәԓы, ԓўв кўрән шушты ўтщийәԓ.

¹⁴Хун пӑ ԓўв мўӈ пиԓэвән Асс вошән уйтантәс, ԓўвеԓ пӑтән паршәӈ ун хопа ўймев кемән, мўӈ Митилина воша мӑтсув.

¹⁵Щӑԓта, щи мӑнман, кимет хӑтәԓ мўӈ Хиос пухәр шŏма иԓ ԓойсув, хӑтәԓ хӑйман пӑ Самос пухра хойсув пӑ, Трогиллия воша йŏхтыԓымев йўпийән, кимет хӑтәԓ Милит воша йŏхәтсув,

¹⁶Павел Ефес хӑйман мӑнты нŏмәс верәс, Асияйән ӑт ат рŏнты, щишән, ԓўв тэрматыйәс, Ветйаӈ хӑтԓәп йэмәӈ хӑтәԓ кеша Иерусалимән уԓты ԓӑӈхас.

Павел Ефес пŏйәкщәты хŏйатәт ун икет пиԓән пŏтәртты вер

¹⁷Милит эԓты Ефеса китәсәс, Турма пŏйәкщәты хŏйатәт ун икет ԓўв хŏщайәԓа вохсәԓы,

¹⁸пӑ, хун ԓыв ԓўв хŏщайәԓа йŏхәтсәт, ԓывиԓаԓа йастәс: «Нын уйәтԓәԓән, хŏты ма мет оԓәӈ хӑтәԓ эԓты, хун Асияйа йŏхәтсәм, ивевән нын пиԓанән усәм,

¹⁹ма Турәм Куща пеԓа рома уԓман пӑ ар сэмйик мӑнәԓтман верәт версәм, иудейәт верәм ԉикәӈ нŏпсәт пӑтыйән кӑмән кем шук мӑнэм тўты вера йис;

²⁰Ма нэмәԓтты щит эԓты ӑт хӑйсәм, мўй эԓты нынан пŏтәртты мосәс ԓуԓән, мўйа нынан утәԓтәты мосәс ԓуԓән, мир ватман пӑ хотԓән ԓыпийән.

²¹Ма иудейәта па, грекәта па такан йастыԓысәм, ԓыв кӑрэк эԓты шӑшән керԓәман, Турәм пеԓа ат керԓәсәт пӑ мўӈ Турәм Кущайэва Иисуса Христоса ат эвәԓсәт.

²²Пӑ тата щи, ин ма, Ԓыԓән хўщман, Иерусалима мӑнԓәм, ӑт уйәтԓэм, мӑнэма щита мўй питәԓ;

²³Туп Йэмәӈ Ԓыԓ кашәӈ вошән аԉәԓ, пŏтәртман, касна хот пӑ шукәӈ щирәт мӑнэм ԓавәԓԓәт.

²⁴Туп ма нэмәԓты пеԓа ӑт ӑӈкәртыԓәм пӑ ма ԓыԓэм ӑт шавиԓэм, туп, амәтман, ԓўԓән мӑ йушем мӑнты пӑ Турәм Кущайән Иисусән мийәм ма верэм йэтшәптәты ат верәтсэм, Йӑм Айкеԓ Турәм йӑм эԓты пŏтәртты.

²⁵Пӑ ин, тӑм, ма уйәтԓэм, хŏԓ нын, хŏй кўтән, Турәм Хон Уԓәпса эԓты пŏтәртман, ма йӑхсәм, мӑнэм па ӑт ватԓәԓән.

²⁶Щишән нынана тӑм хӑтәԓ ма такан йастәԓәм: «Нэмәԓты пӑрәм хŏйат хŏща ўнавот ӑт тӑйԓәм,

²⁷ма Турәм ԓӑӈхаты вер аратәԓ нынана такан йастәты ӑт хӑԋатысэм.

²⁸Щиӈәԋща, нынан ватман тӑйаԓән пӑ хŏйат тащ аратәԓән па, хŏта Йэмәӈ Ԓыԓ нынан ŏха пŏтсәԓы, Турәм Куща пӑ Турәм ӑктәщиты мŏхиԓаԓ нын такан ат шависԓән, Ԓўв кӑԓэԓ сӑхат мŏщатәм пойәкщәты мŏхиԓаԓ.

²⁹Ма уйәтԓэм, хун ма мӑнԓәм, нын хŏщайән ԉикәӈ йэврәт ԓŏӈԓәт, ԓыв пӑ тащ ӑт щаԉәтԓэԓ.

³⁰Щӑԓта нын эԓтыԓән хŏԓна хŏйатәт нŏх ԓойԓәт, хŏй пŏтәртаԓән вещкат вер йŏвра таԓты питԓәԓы, утәԓтәты йох ԓыв йўпиԓаԓән туты урәӈән.

³¹Щишән нумәсман уԓаты! Нумаԓән, ма нынан тӑԓаӈ хуԓәм тӑԓ-ԓуӈ атәԓ-хӑтәԓ ивевән сэмйик сурән нын эԓтайән кашәӈ ŏт утәԓтысэм.

³²Пӑ ин нынан, хӑнам йох, Турма пӑ Ԓўв йӑмәԓ эԓты уԓты йасӈа эвԓәптәԓԓам, хŏй нынан утәԓтәты пӑ нынана Ԓўв йэмәӈ мирәԓ кўтән ŏх вŏԓ мӑты верәтәԓ.

³³Ӑнта щелŏх, ӑнта сорԋи, ӑнта ԓумтәм нэмәԓты хŏйат эԓты ма ӑт ԓӑӈхасәм:

³⁴нын уйәтԓәԓән, мӑнэм мосты ŏт пӑ ма пўӈԓэмән уԓәм хŏйатԓама мосты ŏт тӑм ма йошӈиԓамән шитәптәсәм.

³⁵Кашәӈ верән ма нынана этәԓтысԓам, щиты рупитман, вевԓы хŏйатәта ԋŏтты мосәԓ пӑ Турәм Куща Иисус йасӈәт нумты мосәԓ, Ԓўв йастәс: ’Ўты эԓты, мӑты йӑмшәк’».

³⁶Щит йастәмаԓ кемән, ԓўв шашӈиԓаԓ иԓ эсәԓсәԓы пӑ хŏԓ ԓыв пиԓԓаԓән пойәкщәс.

³⁷Щи пŏрайән хŏԓыйэ хоԓԓәсәт пӑ, Павел ӑпәԓтыман, ԓўвеԓ мосәԓтәсэԓ.

³⁸Мет шопәӈ ԓўв йастәм йасәӈԓаԓ эԓты хощсәт, мӑтты ԓыв па нэмәԓты пŏрайән ԓўв вешәԓ ӑт ватԓэԓ. Щӑԓта ԓўв пиԓәԓән паршәӈ хоп унты мӑтсәт.

Иерусалима мӑнты вер

¹Хун пӑ мўӈ ԓыв пиԓԓаԓән кӑтна мӑнмев йўпийән, нык хўвԓәсув, тŏрԓы Кос воша йŏхәтсув, кимет хӑтәԓ Родос пухра, щиԓта пӑ Патара воша,

²щӑԓта Финикия пеԓа мӑнты паршәӈ ун хоп уйәтмев кемән, нŏх хухсув пӑ нык хўвԓәсув.

³Мўӈ Кипр пухәр мўв ныты ўшән усув пӑ ԓўвеԓ веш пеләк сӑхат хӑйман, Сирия мўва мӑтсув пӑ Тир вош хŏща ўты катәԓсув, тӑта хоп эԓты пŏрмасәт хӑйты моссәт.

⁴Щӑԓта, утәԓтәты хŏйатәт мŏщатмев кемән, щита ԓапәт хӑтәԓ усув. Ԓыв, Йэмәӈ Ԓыԓән аԉман, Павел пеԓа пŏтәртԓәт, ԓўв Иерусалима ӑт ат мӑнәԓ.

⁵Щи хӑтԓәт хӑйман, мўӈ этсув пӑ мӑтсув, пӑ ԓыв хŏԓыйэ имиԓаԓ пӑ ԋаврэмԓаԓ пиԓән мўӈев вош кимпи унты хŏԓна тусэԓ; намән питарән па, шаш иԓ эсәԓман, пойәкщәсув.

⁶Пӑ, кўтԓувән пайәмуԓәм вермев йўпийән, мўӈ паршәӈ ун хопа ԓэԓсув, ԓыв пӑ йŏхи мӑтсәт.

⁷Мўӈ пӑ, мӑнты верев йэԓԓы тўвман, Тир эԓты Птолемаида воша йŏхәтсув, хŏта хӑнам йохԓув ўщайән версәԓув пӑ ԓыв хŏщайэԓ и хӑтәԓ усув.

⁸Кимет хӑтәԓ Павел пӑ мўӈ, ԓўв пиԓәԓән уԓәм ŏтәт, йэԓԓы мӑтсув пӑ Кесарияйа йŏхәтсув пӑ, Филлипп хота ԓŏӈман, ԓўв Йӑм Айкеԓ тутԓыты ху, ԓапәт ԋотәп ху21:8 ԓапәт ԋотәп ху - щит ԓэты пасанәт ԓэщатты йох; эԓты ит, ԓўв хŏщайәԓ хӑщсув.

⁹Ԓўв ԋӑԓ икиԓы эви тӑйәс, Турәм айкеԓ туты нэӈәт.

¹⁰Щи кўтән хŏты мўӈ ԓыв хŏщайэԓ ар хӑтәԓ усув, Иудея эԓты Агав нэмпи Турәм айкеԓ туты ики йŏхтәс.

¹¹Щӑԓта, мўӈ хŏщайэв ԓŏӈман, Павел ӑнтәп кеԓ ўсԓы пӑ ԓўв йошԓаԓ-курԓаԓ йӑха йӑрман, йастәс: «Щиты Йэмәӈ Ԓыԓ пŏтәртәԓ: ’Тӑм ӑнтәп кеԓәӈ ики тӑмиты Иерусалимән иудейәтән йӑрԓа пӑ па рут мир йоша мӑԓа’».

¹²Хун пӑ мўӈ щит хуԓтмәсув, мўӈ па, щита уԓты ŏтәт па пойкащсәт, ԓўв Иерусалима ӑт ат мӑнәс.

¹³Туп Павел йŏхԓы йастәс: «Мўй нын верԓәты? Мўйа хоԓԓәԓты пӑ ма сӑмем мӑшԓәԓән? Ма ӑнта туп йӑрәм ŏта уԓты ԓӑӈхаԓәм, Иерусалимән Турәм Куща Иисус нэм урәӈән пӑрты таща уԓԓәм».

¹⁴Хун пӑ мўӈ ԓўвеԓ вŏԓәтты ӑт верәтсэв, ромәпсув, йастәман: «Турәм Куща партәпса щирән ат питәԓ!»

Павел Иерусалима йŏхәтты вер

¹⁵Тӑм хӑтԓәт йўпийән, ԓэщатыман, Иерусалима мўӈ мӑтсув.

¹⁶Мўӈ пиԓэвән тухәԓ утәԓтәты йох Кесария эԓты па шушсәт. Ԓыв мўӈев Мнасон Кипр ху, хўв тэԓән утәԓтәты ху, хота тусэԓ, хŏй хŏща мўӈев ԓуԓән уԓты рӑхәс.

¹⁷Хун мўӈ Иерусалима йŏхәтсув, хӑнам йохән, амәтман, мўӈ вана ўсайув.

¹⁸Кимет хатәԓ Павел мўӈ пиԓэвән Иаков хŏща йŏхтәс; ун икет па хŏԓ йŏхәтсәт.

¹⁹Ԓывиԓаԓ ўщайән верман, Павел ԓӑтйан-карйан пŏтәртсәԓы, ԓўв верәм верԓаԓ мŏхты ӑт эвәԓты па рут мир кўтән Турәм мўй верәс.

²⁰Ԓыв па, хуԓәтмеԓ йўпийән, Турәм ԓӑтәӈа айәԓтсэԓ пӑ ԓўвеԓа йастәсәт: «Хӑнам ху, ватԓэн мўй арат щŏрәс эвԓәм иудей йох, пӑ ԓыв хŏԓ Закон такан тӑйты ŏтәт.

²¹Нӑӈ эԓтэн пӑ йӑма хуԓԓысәт, мӑтты нӑӈ хŏԓ па рут мир кўтән уԓты иудейәт Моисей эԓты пўӈԓа хӑтты утәԓтәԓԓан, пŏтәртман, мӑтты ԓыв йох ԋаврэмԓаԓ хŏща эвәтты вер ӑт ат версәт пӑ ԓыв щирԓаԓ щирән ӑт ат усәт.

²²Щиӈәԋща, мўй пӑ? Йӑна, мир ӑктәщәԓ; хуԓԓэԓ, нӑӈ йŏхәтсән, щишән.

²³Вера са, мўй мўӈ нӑӈен йастәԓув: мўӈ ԋӑԓ хŏйат, йастантәм вер тӑйты ŏтәт, тӑйԓув.

²⁴Ԓывиԓаԓ ўйман, ԓыв пиԓԓаԓән сыстамтыйа пӑ ԓыв йўкан йирԓаԓ тын нӑӈ сŏхәпты, ԓыв ŏхԓаԓ ԓŏртты ат верәтсәт. Пӑ хŏԓ кащаԓәԓәт, нӑӈ эԓтайэн хуԓԓыйәм пŏԓщәт ӑнтом вещкатәт, наӈ па Закон хуват уԓԓән.

²⁵Эвԓәм па рут йоха мўӈ верәм нŏпсэв эԓты хӑшсэв: ԓыв нэмәԓты щимәщ ӑт ат версәт, туп ԓуӈха порыԓыйәм ԓэтŏт эԓты, вой ўр пӑ шакәптәм вой ԋŏхи эԓты, пӑ пакрасԓәты вер эԓты ԓывиԓаԓ ат шависԓаԓ».

²⁶Щишән Павел, щи йох ўйман пӑ ԓыв пиԓԓаԓән сыстамтыман, йухәт хӑтәԓ Турәм Хота ԓŏӈәс пӑ сыстамтыйәм хӑтԓәт хŏԓам вер такан йастәс, хун кашәӈ ху урәӈән йир туты вер уԓ.

Павел ԋӑрэмәты вер

²⁷Хун пӑ ԓапәт хӑтәԓ хŏԓаты ванамәс, щи пŏрайән Асия эԓты уԓты иудейәт ԓўвеԓ Турәм Хотән шийаԓәмеԓ кемән, мир хŏԓ йэшащты хўщсэԓ пӑ ԓўвеԓ катәԓсэԓ,

²⁸ўвман: «Израиль йох, ԋотаты! Тӑм хŏйат арат тӑхайән мŏхет мирэва пӑ Закона пӑ тӑм тӑхайа ӑт рӑхты щирән утәԓтәԓ; Щи тўмпийән грекәт Турәм Хота тус пӑ тӑм йэмәӈ тӑха щопитсәԓы».

²⁹Щи йэԓпийән вошән ԓыв Трофим, Ефес ху, ԓўв пиԓәԓән ватсәт пӑ нумәссәт, Павел ԓўвеԓ Турәм Хота ԓŏӈәԓтсәԓы.

³⁰Вош ԓŏватәԓән нŏх ԋŏхԓәс, пӑ мир тŏхи хухәԓмәс. Павел, ԋӑрэмәм йўпийән, Турәм Хот эԓты ким хипԉәԓтса, пӑ овәт ищи кўрәмән лӑп петсайәт.

³¹Хун пӑ ԓыв ԓўвеԓ пӑратты ўтщисэԓ, щŏрәс ԉаԉ йох куща унты айкеԓ йŏхтәс, Иерусалим ԓоватәԓән ўшмащты питәс.

³²Ԓўв ищи кўрәмән ԉаԉ йох пӑ сот ԉаԉ йох кущайәт ўйман, ԓыв хŏщайэԓ ӑратсәт. Ԓыв пӑ, щŏрәс ԉаԉ йох куща пӑ ԉаԉ йохәт кащаԓәмеԓ кемән, Павел сэкты вŏԓәтсэԓ.

³³Щиӈәԋща щŏрәс ԉаԉ йох куща, вана йŏхәтмаԓ кемән, ԓўвеԓ ўсԓы пӑ кӑт карты кеԓән иԓ йӑрты партсәԓы, пӑ иԋщәсәс: «Хŏй ԓўв пӑ мўй верәс».

³⁴Мир хŏща итәт ит ўвсәт, па ŏтәт па ŏт ўвсәт. Щишән щимәщ сый кўтән ԓўв нэмәԓты ԓэр вер ŏша пайәтты ӑт веритмаԓ урәӈән, Павел ԉаԉ йох уԓты тӑхайа туты партсәԓы.

³⁵Хун пӑ ԓўв ов нухләт хŏща уԓмаԓән, мир похәл щиты хӑтәԓ пӑ, ԉаԉ йохәта, нŏх аԓәмман, ԓўвеԓ туты вера йис,

³⁶мир аратәԓән ԓыв йўпеԓән шушәс пӑ ўвәс: «Ԓўвеԓа сŏрәм ат уԓ!»

Павел, ԓўвеԓ ӑратыман, мир пеԓа по̆тәртәԓ

³⁷Ԉаԉ йŏхәт хота ԓŏӈты тӑхайән Павел щŏрәс ԉаԉ йох кущайа йастәс: «Мӑнэма наӈен мŏԓты йастәты рӑхәԓ амўй?» Щит пӑ йщмәс: «Нӑӈ грек йасәӈ уйәтԓән?

³⁸Щишән ки, наӈ ӑнта щи Египет хŏйат, хŏй мŏԓхашәк йэшащты щир верыԓыйәс пӑ таԓ тӑхайа ԋӑԓ щŏрәс веԓтатты хŏйат тус?»

³⁹Павел пӑ йастәс: «Ма Киликия мўвән уԓты Тарс ун вошәӈ иудей ху. Нӑӈен пойәкԓәм, мӑнэм мир пеԓа йастәты эсԓы».

⁴⁰Хун пӑ щитән эсәԓса, Павел, ов нухәлән ԓойман, йошәԓән мира пос мӑс. Щӑԓта, хун шек шитама йис, еврей йасәӈән щиты пŏтәртты питәс:

¹«Хӑнам йохәт пӑ ащет! Манэм нын йэԓпанән ӑратыты урәӈән, мӑнэм пŏтәрты эсԓаԓән».

²Ԓўв пӑ ԓыв пиԓԓаԓән еврей йасәӈән пŏтәртты хуԓмеԓ кемән, мет шитама йисәт. Ԓўв йастәс:

³«Ма иудей ху, Киликияйән уԓты Тарс вошән сэма питәм ŏт, тӑм вошән Гамалиил утәԓтәты ху хŏща энмәԓтәм ŏт, ащиԓув Закон щирән шек йӑма утәԓтәм ŏт, Турәм вер пеԓа такан уԓты ŏт, хŏты нын хŏԓ ин уԓԓәты.

⁴Ма хŏԓна сŏрәм унты тӑм утәԓтәпса йўпи тўвәм хŏйатәт ԋухәтԓысԓам, иԓ йӑрман йохәт пӑ нэӈәт касна хота мийԓысԓам.

⁵Щит вантәм ŏтәт - Турма йир верты ŏх ху пӑ йӑха актәщиты ун икет аратэԓән. Ма хŏԓна ԓыв эԓтыԓаԓ Дамаск вошәӈ хӑнам йохәта хӑншәм айкеԓ нэпекәт ўсәм пӑ щи мӑтсәм, христианәт эԓты хŏй щита ус пӑ щитәт катәԓты, пӑ ԓывиԓаԓ Иерусалима сэкты урәӈән туты.

⁶Хун пӑ ма йушән уԓмемән пӑ Дамаск воша ванамәсәм, хӑтәԓ кўтәп кемән шӑмкап турәм хӑр эԓты щи хŏрпи нŏвийән похәтсайәм, пӑ сэм хŏԓна нŏх ӑт эԓԓәԓ.

⁷Ма мўва иԓ рӑкәтсәм пӑ мӑ пеԓайэм пŏтәртәм тур сый хуԓмәсәм: "Савл, Савл! Мўйа нӑӈ Мӑнэм ԋухәԓԓэн?"

⁸Ма йŏхԓы йастәԓәм: "Хŏй Нӑӈ, Турәм Куща?" Ԓўв мӑнэма йастәс: "Ма Назарет эԓты уԓты Иисус, Хŏй нӑӈ ԋухәԓԓэн".

⁹Ма пиԓэмән уԓәм ŏтәт нŏви ватсэԓ пӑ пӑԉщәмән йŏхәтсайәт; туп ма пеԓайэма Пŏтәртәм Ŏт тўр сый ӑт хуԓсэԓ.

¹⁰Щиӈәԋща ма йастәсәм: "Турәм Куща! Мӑнэм мўй верты?" Турәм Куща пӑ мӑнэма йастәс: "Нŏх ԓойа пӑ Дамаска мӑна, пӑ щита нӑӈена иса йастәԓа, мўй наӈена верты постәса".

¹¹Хŏты ма вŏԉиты нŏви эԓты сэмԓы питсәм, ма пиԓэмән йўвәм мŏхет йош пелкем эԓты Дамаска ватәԓтәсайәм.

¹²А-хой Анания, Закон хўват уԓты Турма эвәԓты хŏйат, Дамаскән уԓты иудейәтән хŏԓ йӑма айәԓтса,

¹³ма хŏщайэм йŏхтәс пӑ, вана шушман, мӑнэма йастәс: "Савл хӑнам ху, сэмәӈа йўва!" Пӑ ма ищи кумат ԓўвеԓ шийаԓәсэм.

¹⁴Ԓўв пӑ мӑнэм йастәс: "Мўӈ ащиԓув Турәм нӑӈен пирыйәс, наӈ Ԓўв ԓӑӈхаты щирәԓ ŏша ат пайәтсэн, Вещкат Ŏт ат шийаԓәсән пӑ тўр сый Ԓўв ўӈԓәԓ эԓты ат хуԓсән.

¹⁵Нӑӈ Ԓўвеԓа хŏԓ хŏйатәт йэԓпийән вантәм ŏта питԓән, щит эԓты, мўй ватсән пӑ хуԓсән.

¹⁶Щиӈәԋща, мўй нӑӈ айәԓта уԓԓән? Нŏх ԓойа, Турәм Куща Иисус пеԓа пойәкща, йиӈка ат ԓŏӈәԓтыԓайән пӑ, кӑрэкԓан хŏԓт ат ԉŏхәтԓайәт".

¹⁷Хун пӑ ма Иерусалима йŏхԓы йŏхәтсәм пӑ Турәм Хотән пойәкщәсәм, мӑ вантәпса ватсәм

¹⁸пӑ Ԓўвеԓ шийаԓәсәм, пӑ Ԓўв мӑнэма йастәс: "Тэрматыйа пӑ Иерусалим эԓты ким эта, тӑта нӑӈ Ма эԓтайэм пŏтәртты щирэн вана ӑт ўԓа".

¹⁹Ма йастәсәм: "Турәм Куща! Ԓыв уйәтԓэԓ, ма Нӑӈена эвәԓты хŏйатәт касна хота тухрыԓысԓам пӑ иудейәт пойәкщәты хотәтән сэӈкиԓысԓам,

²⁰пӑ хун Стефан, Наӈен вантәм ŏтэн, кӑԓэԓ щŏрӈәԓтәм пŏрайән, ма щита ԓойсәм, ԓўв паратты верәԓ эԓт тӑйсэм, ԓўвеԓ паратты ŏтәт ԓумтәмәт ма шависәм".

²¹Щӑԓта ԓўв мӑнэма йастәс: "Мӑна, Ма нӑӈен хўва Турма ӑт эвәԓты па рут мир хŏща китԓэм"».

²²Тӑм йасәӈ унты ԓўв хуԓәтса; щи йўпийән ўвты питсәт, пŏтәртман: «Мўв сŏх эԓты ԓўвеԓ нŏх ушийи! Ԓўвеԓа уԓты ӑт рӑхәԓ».

²³Щи ԓыв ўвмеԓ кўтән, ԓумтәмԓаԓ йовәԓсәт пӑ кўрпӑт хиш нŏх йовәԓсәт,

²⁴щŏрәс ԉаԉ йох куща ԓўвеԓ ԉаԉ йŏх уԓты тӑхайа туты партсәԓы. Ԓўвеԓ хомщийән сэкты пӑ такан иԋщәсты партсәԓы, мўй урәӈән ԓўв пеԓайәԓ мир щиты ўвәс.

²⁵Туп хун ԓўв лаккеԓәтән йӑртсәԓәса, Павел ԓойәм сот ԉаԉ йох кущайа йастәс: «Нынан мўй Рим ху сэкты рӑхәԓ, хŏԓна пӑ сўт такԓы?»

²⁶Щит хуԓмаԓ кемән, сот ԉаԉ йох куща мӑнәс пӑ щŏрәс ԉаԉ йох кущайа щит тусԓы, пŏтәртман: «Ванта, мўй нӑӈ верты ўтщиԓән? Тӑм хŏйат - Рим ху».

²⁷Щиӈәԋща щŏрәс ԉаԉ йох куща, ԓўв хŏщайәԓ вана шушман, иԋщәсәԓ: «Йаста мӑнэма, нӑӈ Рим ху?» Ԓўв йастәс: «Па хŏты».

²⁸Щŏрәс ԉаԉ йох куща йŏхԓы йастәс: «Ма ун ŏх сӑхат щи Рим хŏйата уԓты вер ԓутсэм». Павел пӑ йастәс: «Ма пӑ щита сэма питсәм».

²⁹Щиӈәԋща ищи кумат ԓўвеԓ шукатты утщийәм ŏтәт ԓўв эԓтайәԓ пўӈԓа хӑтәмәсәт. Щŏрәс ԉаԉ йох куща пӑ, ԓўв Рим хŏйата уԓты верәԓ мŏштәмаԓ кемән, хŏԓт пӑԓтамәс, ԓўвеԓ йӑрсәԓамаԓ урәӈән.

Павел синедрион йэщаԓт ԓойты вер

³⁰Кимет хӑтәԓ, тŏрԓы уйәтты ԓӑӈхаман, мўй хŏща ԓўв иудейәтән ўнавота пайәтса, ԓўвеԓ кеԓԓаԓ эԓты хŏԓт пайәтсәԓы пӑ Турма йир верты ŏх икета пӑ синедриона хŏԓ ӑктәщты партсәԓы пӑ, Павел ким этәԓтәсԓы пӑ ԓыв йэԓпиԓаԓа ԓощәԓтәсԓы.

¹Павел синедрион пеԓа ӑӈкәрмәс пӑ йастәс: «Хӑнам йох! Ма вещкат сӑмән иса тӑм хӑтәԓ унты Турәм йэщаԓт усәм».

²Турма йир верты ŏх ху Ананий пӑ Павел ԉэпән ԓойты ŏтәта ԓўвеԓ тŏрәп эԓты сэкты партсәԓы.

³Щишән Павел ԓўвеԓа йастәс: «Турәм нӑӈен секты питԓәԓы, нŏвийа нэрәм хот питар! Нӑӈ, Закон щирән сўтәтты урәӈән омәсԓән, пӑ Закон шŏппи ўшман, мӑнэм сэкты партԓэн».

⁴Ванән ԓойәм ŏтәт пӑ йастәсәт: «Хŏты сӑхат нӑӈ Турма йир верты ŏх ху накәлты верәтԓэн?»

⁵Павел йастәс: «Хӑнам йох, ма ӑт уйәтсэм, ԓўв Турма йир верты ŏх икийа уԓты верәԓ; хӑшман ӑт уԓԓа: ’Нӑӈ мирэн хŏща кущайа уԓты хŏйат эԓты атма аԓ йаста’».

⁶Павел уйәтсәԓԓы, итәт саддукейа усәт, киметәт пӑ - фарисейа, щишән ԓўв синедрион йох пеԓа такан йастәс: «Хӑнам йох, ма фарисей, фарисей пŏх, пӑ ма пӑрәм ŏтәт нŏх ԓыԓәӈԓәты щир пеԓа нŏмәс пŏнмем урәӈән сўтәтԓайәм».

⁷Хун пӑ ԓўв щит йастәс, фарисейәт пӑ саддукейәт кўтԓаԓән ўра ворты питсәт, пӑ ӑктәщәм мŏхет кӑтна ортәссәт.

⁸Саддукейәт пŏтәртԓәт: ӑнта нŏх ԓыԓәӈԓәты щир, ӑнта ангел, ӑнта ԓыԓ ӑнтом; фарисейәт пӑ тўмеԓ па, тӑмеԓ па ванән тӑйԓыԓаԓ.

⁹Щи ԓŏват ун ўв сый тыйәс; щӑԓта тухәԓ фарисейәт эԓты уԓты Закона утәԓтәты икет, нŏх ԓойман, ўра ворԓәт, йастәман: «Нэмәԓты атәм ŏт мўӈ тӑм хŏйат хŏща ӑт уйәтԓув; ԓыԓ мўй пӑ ангел ԓўв пеԓайәԓ пŏтәртыйәс ки, Турәм йэщаԓт уԓты мўӈ ӑт питԓув».

¹⁰Туп ўра ворты верэԓ уна йис, щŏрәс ԉаԉ йох куща пӑԓман, Павел ԓыв лакки аԓ мӑшԓэԓ, ԉаԉ йохәта иԓ ŏхәԓты пӑ ԓыв кўтэԓ эԓты Павел ўты партсәԓы пӑ ԉаԉ йŏх уԓты хота туты партсәԓы.

¹¹Кимет ат Турәм Куща, ԓўв хŏщайәԓ этман, йастәс: «Павел, аԓ пӑԓа; хŏты нӑӈ Иерусалимән Ма эԓтэм пŏтәртсән, щиты Рим хŏща пŏтәртты па мосәԓ».

Иудейәт Павел пӑратты нŏмәс верԓәт

¹²Аԓәӈсӑхата йўвмаԓ кемән тухәԓ иудейәт нŏмәс версәт пӑ, Павел пӑраттэԓ унты, ӑт ԓэты, ӑт йищты йастатсәт.

¹³Йастантәм хŏйат ԋӑԓйаӈ мŏԓтас ус.

¹⁴Ԓыв Турма йир верты ŏх икет пӑ уна уԓты икет хŏща йŏхәтсәт пӑ йастәсәт: «Мўӈ, Павел пӑраттэв унты, нэмәԓты ӑт ԓэты йастатсув.

¹⁵Щиӈәԋща, ин щи нын синедрион пиԓән щŏрәс ԉаԉ йох кущайа хӑԓэвәт Павел нын хŏщайән туты партаԓән, ищи мӑтты нын ԓўв верәԓ йӑмашәк ватты верән уԓ. Мўӈ пӑ, ԓэщатыман уԓԓув пӑ ԓўвеԓ хŏԓна щи тӑхайа йŏхәттаԓ унты, пӑраттԓэв».

¹⁶Щи йастантәм вер эԓты Павел ԓэхуйәԓ, опеԓ пŏх, хуԓәс. Ԓўв ԉаԉ йох уԓты хота йŏхтәс пӑ Павела йастәсԓы.

¹⁷Павел пӑ, сот ԉаԉ йох куща эԓты ит вана вохсәԓы пӑ йастәс: «Тӑм пŏх щŏрәс ԉаԉ йох куща хŏща тўви, ԓўв щи кущайа мŏԓтты йастәты ŏт тӑйәԓ».

¹⁸Щитэн ԓўвеԓ щŏрәс ԉаԉ йох куща хŏща тусԓы пӑ йастәс: «Касна хота опсәм Павел, мӑнэм вана вохман, тӑм пŏх нӑӈ хŏщайэн туты партсәԓы, ԓўв нӑӈена мŏԓтты йастәты ŏт тӑйәԓ».

¹⁹Щŏрәс ԉаԉ йох куща, ԓўвеԓ йошәԓ эԓты катәԓман пӑ ԓўв пиԓәԓән пўӈԓа йирԓәман, иԋщәссәԓы: «Мӑнэм йастәты нӑӈ мўй тӑйԓән?»

²⁰Ԓўв йŏхԓы йастәс: «Иудейәт нӑӈен партты нŏмәс версәт, нӑӈ хӑԓэвәт Павел синедрион хŏща ким ат этәԓтәсэн, ищи мӑтты ԓыв йӑмашәк ԓўв эԓтэԓ ԓэрапты верэԓ уԓ.

²¹Туп нӑӈ ԓывиԓаԓ аԓ хуԓәнта; ԓўвеԓ ԋӑԓйаӈ мŏԓтас хŏйат ԓыв эԓтыԓаԓ ԓомиԓәт, хŏй ӑт ԓэты пӑ ӑт йищты йастатсәт, ԓўвеԓ ӑт веԓтэԓ унты; пӑ ԓыв, нӑӈ йасӈен ԓавәԓман, ин ԓэщатыман уԓԓәт».

²²Щиӈәԋща щŏрәс ԉаԉ йох куща энмәм пŏх эсәԓсәԓы, йастәман: «Нэмәԓты хŏйата аԓ йасты, мӑнэм мўй йастәсән».

Павел Кесарияйа китәм вер

²³Щӑԓта, кӑт сот ԉаԉ йох кущайӈән вана вохман, йастәс: «Кӑт сот кўрән шушты, ԓапәтйаӈ ԓовәӈ ԉаԉ йох пӑ кӑтсот ԋоԓәӈ-йухԓәӈ ԉаԉ ху ԓэщататы, атәԓән хуԓәм щос кемән23:23 атәԓән хуԓәм щос кемән - щит мўӈ щирэвән 9 щос йэтән; Кесария воша ат мӑтсәт.

²⁴Ԓовәт и щиты ԓэщатаԓән, Павел щи опсәԓман, Феликс нэмпи куща хŏща ԓўвеԓ йӑма туты урәӈән».

²⁵Нэпека па щимәщ айкеԓ хӑншәс:

²⁶«Клавдий Лисий эԓты ԓӑтәӈ куща Феликс икийа. Ўща уԓа.

²⁷Иудейәт тӑм хŏйат ԋӑрэмәсэԓ пӑ веԓты ўтщисэԓ; ма ԉаԉ йохԓам пиԓән йŏхәтсәм пӑ ԓўвеԓ нŏх ӑратысэм, ԓўв Рим хŏйата уԓты верәԓ мŏштәмэм пӑтыйән.

²⁸Йухәт, ԓэрапты ԓӑӈхатэм урәӈән, мўй хŏща ԓўв нўрәӈа айәԓса, ԓўвеԓ ԓыв синедрионэԓа тусэм.

²⁹Ма ŏша пайәтсэм, ԓыв законэԓ хŏща ўрайа хойәм нŏпсәт урәӈән ԓўв нўрәӈа айәԓԓа, туп нэмәԓтты нўр сŏрәм пӑ касна хот кеша ԓўв хŏщайәԓ ӑт уйәтсәм.

³⁰Туп ма хŏщайэм иудейәт тӑм хŏйат пеԓа атәм нŏмәс верты айкеԓэԓ йŏхтәс, ма ԓўвеԓ мŏхты нӑӈ хŏщайэн китсэм, нўр туты ŏтәта па ԓўв пеԓайәԓа нӑӈ хŏщайэн пŏтәртты партсәԓам. Тўмтака уԓа».

³¹Щиӈәԋща, ԉаԉ йохәт, тӑм ԓўв партәм щирәԓ хўватән, Павел ўйман, атәԓән Антипатрида воша тусэԓ.

³²Кимет хӑтәԓ пӑ, ԓовәӈ ԉаԉ йохәта ԓўв пиԓәԓән мӑнты миймеԓ кемән, ԉӑԉ йох уԓты хотэԓа йŏхԓы керԓәсәт.

³³Ԉаԉ йох пӑ, Кесария воша йŏхәтмеԓ пӑ айкеԓәӈ нэпек куща икийа миймеԓ кемән, Павел па ԓўвеԓа мӑсэԓ.

³⁴Куща ики, айкеԓәӈ нэпек ԓуӈәтмаԓ йўпийән, иԋщәссәԓы, мӑты мўв щуӈ эԓты ԓўв уԓ. Павел Киликия эԓты уԓты мŏштәмаԓ кемән, йастәс:

³⁵«Ма нӑӈен щи пŏрайән хуԓәтԓэм, хун нўр туты ŏтԓан йŏхәтԓәт». Пӑ ԓўвеԓ Ирод хŏт шикийән, ԉаԉ йохән эԓт тӑйман, уԓты партсәԓы.

Павел Феликс куща хŏща ԓўвеԓ ԓўв ӑратыԓԓы

¹Вет хӑтәԓ хӑщәм йўпийән, Турма йир верты ŏх ху Анания ун икет пиԓән пӑ Тертулл, законәт уйәтты ху24:1 законәт уйәтты ху - щит Рим хŏйатәт хŏща уԓәпса мŏрт (закон) уйәтты хŏйат, сўт вертыйән вер ӑратыты мўй пӑ вер кӑшты, туса пŏтәртты ху;, пиԓән Кесарияйа йŏхтәс. Ԓыв куща икийа йастәсәт, мўй урәӈән Павел нўрмәԓтты питԓэԓ.

²Хун пӑ Павел тŏхи ԓŏӈәԓтса, Тертулл ԓўв нўрәԓ аԉты питсәԓы, пŏтәртман:

³«Иса пӑ кашәӈ тӑхайән кӑмән хŏрпи йӑм щирән мўӈ вана ўԓэв, мўӈ пайԓы уԓәпсайэв урәӈән нӑӈена, ԓӑтәӈ куща Феликс, пумащипа йастәты мўӈ верэв уԓ, пӑ тӑм мир йӑм, так уԓәпса нӑӈ ŏшәӈа парттэн хўватән уԓ.

⁴Туп, нӑӈен шек ӑт ат тŏрастәты урәӈән, ма нӑӈен сӑмәӈ вер хўватэнән мўӈев йэша тӑхты хуԓәтты пŏйәкԓэм.

⁵Мўӈ тӑм хŏйат рома уԓты щир ԓыԓәтты ŏта ԓўӈәтԓэв, ԓўв - иудейәт кўтән керәтман мўв ԓŏватән йэшащты вер пеԓа ŏх ху. Ԓўв Назарет эԓты уԓты Иисус ӑт рӑхты утәԓтәпса пеԓа уԓты ŏх ху,

⁶хŏй хŏԓна Турәм Хот щопитты ўтщисԓы, мўӈ ԓўвеԓ катәԓсэв пӑ мўӈ Законэв хўватән сўтәтты ўтщисэв.

⁷Туп щŏрәс ԉаԉ йох куща Лисий, йŏхтәс пӑ йур вевән ԓўвеԓ мўӈ йошев эԓты ўсԓы пӑ нӑӈ хŏщайэн китсәԓы,

⁸мўӈева, ԓўвеԓ нўрәӈа айәԓтты ŏтәта, па нӑӈ хŏщайэн мӑнты партсәԓы. Хун нӑӈ ԓўвеԓ иԋщәсԓэн, наӈ щи мўй эԓты иса уйәтԓэн, мўй хŏща мўӈ ԓўвеԓ нўрәӈа тӑйԓэв».

⁹Щӑԓта иудейәт па йастәсәт, мӑтты щит щиты.

¹⁰Павел пӑ, хун куща ики ԓўвеԓа пŏтәртты щира пос аԉәс, йŏхԓы йастәс: «Уйәтԓэм, нӑӈ ар тӑԓ-ԓўӈ вещкат щирән тӑм мир сўтәтԓән, ма ԓӑрпайа ма верэм ӑратыты питԓэм.

¹¹Нӑӈ ԓэрапты верәтԓэн, ма Иерусалима Турәм ишәкты урәӈән йŏхәтмем, кӑтхŏщйаӈ кем хӑтԓа йис.

¹²Ӑнта Турәм Хотән, ӑнта иудейәт пойәкщәты хотән, ӑнта вош ԓŏватән ԓыв мӑнэм ўра ворман мўй пӑ мир йэшащты пеԓа хущман, ӑт уйтыԓысэԓ,

¹³пӑ щит аԉты ӑт верәтԓәт, мўй хŏща мӑнэм ин нўрмәԓԓәт.

¹⁴Туп щи хŏща нӑӈен эԓпа йастәԓэм, утәԓтәпса хўват, мўй ԓыв ӑт рӑхты щира айәԓԓэԓ, йӑна ма ащиԓам Турма верәт верԓәм, иса щитәта эвәԓман, мўй Законән пӑ Турәм айкеԓ туты хŏйатәт нэпекәт хŏща хӑшман уԓԓа,

¹⁵Турма нŏмәс пŏнман тӑйԓәм, пӑрәм ŏтәт, вещкат пӑ ӑнта вещкат ŏтәт нŏх ԓыԓәӈԓәты вер питәԓ, мўй ԓыв па ԓавәԓԓәт.

¹⁶Щишән ма па ўратԓәм, Турәм пӑ хŏйатәт хŏща ма ԓыпем иса сыстам ат ус.

¹⁷Ар тӑԓ хӑщәм йўпийән, ма мирэма меԓащ мӑты пӑ Турма йир туты урәӈән, ма Иерусалима йŏхәтсәм.

¹⁸Ма Турәм Хотән уйәтсайәм, хун ма сыстамтыты верәт версәм, пӑ щита нэмәԓты мир пӑ йэшащты сый уԓмаԓ ӑнтом.

¹⁹Щит тухәԓ Асия мўвәӈ иудейәт усәт, хŏйтата наӈ йэщаԓтэн ԓойты пӑ мӑнэм нўрмәԓтты мосәс, ма пеԓайэм мŏԓты тӑйԓәт ки.

²⁰Мўй пӑ щитәт ат йастәԓәт, хун ма синедрион йэщаԓт ԓоймемән, мўй хŏрпи нўр ԓыв ма хŏщайэм уйәтсәт,

²¹мосәӈ, ма туп щита нўр тӑйԓәм, синедрион хŏща ўваԓтсәм: ’Ма тӑм хӑтәԓ нын йэщаԓтән, пӑрәм ŏтәт нŏх ԓыԓәӈԓәты вер пеԓа нŏмәс пŏнтэм урәӈән, сўтәтԓайәм?’»

²²Щит хуԓәтмаԓ йўпийән, Феликс, щи Йуш эԓты тŏрԓы уйәтман, ԓыв верэԓ йэԓшәк хӑтәԓтәсԓы, йастәс: «Нын верән ватԓэм, хун щŏрәс ԉаԉ йох куща Лисий йŏхәтәԓ».

²³Ԓўв сот ԉаԉ йох кущайа Павел эԓт тӑйты партсәԓы, туп ԓўвеԓа йэрмат щир верты пӑ ԓухәсԓаԓа ԓўвеԓа мосты верәт верты мўй пӑ йŏхтыԓыты, йэртԓыты ӑт эсәԓсәԓы.

Павел касна хотән

²⁴Кӑмәтса хӑтәԓ йўпийән Феликс, Друзилла ийимеԓ, иудей нэ, пиԓән йŏхәтмаԓ кемән, Павел вохсәԓы, пӑ Иисуса Христоса эвәԓты вер эԓты хуԓәнтәс.

²⁵Пӑ хун ԓўв вещкат вер эԓты, йŏхи шаващты вер эԓты пӑ йиты Турәм сўт эԓты пŏтәртәс, Феликс пӑԉщәмән йŏхәтса пӑ йастәс: «Ин мӑна, хун пӑ кум шитԓәм, нӑӈен вохԓэм».

²⁶Ԓўв ищи кўт нумәсәс, эсәԓты урәӈән, Павел ԓўвеԓа ŏх мӑԓ: щишән ван кўтԓы ԓўвеԓ вана туты партыԓысԓы пӑ ԓўв пиԓәԓән пŏтрэмәс.

²⁷Туп кӑт тӑԓ хӑщәм кемән, Феликс рупитәм тӑхайа Порций Фест йŏхтәс, иудейәта йӑм верты урәӈән, Феликс Павел касна хотән хӑйсәԓы.

Павел кесарь сўт вохәԓ

¹Фест, щи мўв щуӈа йŏхәтмаԓ кемән, ԋӑԓмет хӑтәԓән Кесария эԓты Иерусалима мӑнәс.

²Щӑԓта Турма йир верты ŏх ху пӑ иудейәт эԓты ԓӑтәӈа уԓты йох ԓўв хŏщайәԓ Павел эԓты нўр кӑшты йŏхәтсәт пӑ ԓўв пеԓайәԓ эвԓа-йŏԓа пŏтәртсәт,

³щит вохман, Фест ԓывиԓаԓа йӑм ат верәс, Павел Иерусалима ат вохсәԓы; пӑ йуш хŏща ԓўвеԓ веԓты нŏмәс версәт.

⁴Туп Фест йŏхԓы йастәс, мӑтты Павел Кесарияйән ԉаԉ йŏхән эԓт тӑйԓа пӑ йэшавәԓ ԓўв тŏхи мӑнәԓ.

⁵«Щиӈәԋща,» ԓўв йастәс, «нын кущайԓән, ма пиԓэмән ат мӑнԓәт, пӑ мŏԓты вер тӑм хŏйат хŏща уԓ ки, ԓўвеԓ ат нўрмәԓтԓэԓ».

⁶Ԓыв хŏщайэԓ ԋийәԓ мўй йаӈ хӑтәԓ кем уԓмаԓ йўпийән, Кесарияйа йŏхԓы йŏхтәс, пӑ кимет хӑтәԓ, сўт ху омәсты тӑхайа омасмаԓ кемән, Павел туты партсәԓы.

⁷Хун ԓўв этәс, Иерусалим эԓты йŏхтәм иудейәт керәтман ԓойсәт, Павел артан пӑ ԓавәртан нўрмәԓтты питсэԓ, туп ԓыв щи нўрәт тŏрԓы аԉты ӑт верәтсәԓаԓ.

⁸Ԓўв пӑ, ԓўвеԓ ӑратыман, йастәс: «Ма нэмәԓты атәм ӑнта иудейәт Закона, ӑнта Турәм Хота, ӑнта кесарьа ӑт версәм».

⁹Фест, иудейәта йӑм верты ԓӑӈхаман, Павел пеԓа йŏхԓы йастәс: «Иерусалима мўй мӑнты ԓӑӈхаԓән, тӑм верәт урәӈән, щита ма уԓман, нӑӈ ат сўтәтсайән?»

¹⁰Павел йастәс: «Ма кесарь сўт йэщаԓт ԓойԓәм, хŏта мӑ сўтәтты верэм уԓ. Иудейәта ма нэмәԓтты атәм ӑт версәм, хŏты нӑӈ па йӑма уйәтԓэн.

¹¹Ма закон шŏппи ўшсэм ки пӑ сŏрәм ԓӑта мŏԓтты версәм ки, пӑрты эԓты шӑшән ӑт ўратԓәм; нэмәԓты ки щит ӑнтом, мўй урәӈән тӑметән мӑ нўрмәԓтԓайәм, нэмәԓты хŏйат мӑнэм ԓывиԓаԓа мӑты ӑт верәтәԓ. Кесарь сўт такан вохԓәм».

¹²Щишән Фест, нŏмәс мӑты хŏйатәт пиԓән пŏтремәмаԓ йўпийән, йастәс: «Нӑӈ кесарь сўт вŏхсән, кесарь хŏща щи мӑнԓән».

Павел Агриппа хон пӑ Вереника хŏща туԓа

¹³Кӑмәтса хӑтәԓ хӑщәм йўпийән, Агриппа хон Вереника пиԓән Кесария воша Фест кущайа мойԓәпса йасәӈ йастәты йŏхтәс.

¹⁴Ԓын ар хӑтәԓ щита хӑйсәтән, пӑ Фест хон пиԓән Павел вер эԓты пŏтәртәс: «Тӑта, касна хотән, Феликсән хӑйәм хŏйат уԓ.

¹⁵Хун ма Иерусалимән уԓмемән, иудейәт Турма йир верты ŏх икет пӑ уна уԓты икет ԓўвеԓ нўра павәтты йŏхәтсәт. Ԓыв ԓўвеԓ сўтәтты партсэԓ.

¹⁶Ма ԓывиԓаԓа йастәсәм, Рим хŏйатәт ӑԓ ишән мӑтты хŏйат сŏрма павәтты вер ӑт тӑйԓәт, щи унты хун ԓўвеԓа нўрмәԓтты ŏтԓаԓ пиԓән уйтантыты пӑ ԓўвеԓ ӑратыты щирән мӑԓа.

¹⁷Хун пӑ ԓыв ты йŏхәтсәт, кимет хӑтәԓ мŏхты ма сўт ху омәсты тӑхай омәсәм пӑ щи хŏйат ты туты партсэм.

¹⁸Ԓўвеԓ лӑп нӑпәтман, нўрмәԓтты ŏтәт и нўр ӑт аԉсәт, мўй хŏрпи нўрәт уԓты ма нумәссәм;

¹⁹Туп ԓыв ԓўв пиԓәԓән иудейәт Турма эвәԓты верэԓ эԓты пӑ а хŏй пӑрәм Иисус эԓты ўра вортсәт, Хŏй эԓты Павел такан пŏтәртәс, мӑтты Ԓўв ԓыԓәӈ.

²⁰Ма ӑт уйәтсэм, хŏты мӑнэм щи вер ԓэрапты, пӑ ԓўвеԓ иԋщәссэм, ԓўв ԓӑӈхаԓ мўй ӑнтом Иерусалима мӑнты пӑ щита сўт йэщаԓт ԓойты.

²¹Туп Павел такан партсәԓы, ԓўв кесарьән ватты кеша ат хӑйса, ма пӑ ԓўвеԓ кесарь киттэм унты ԉаԉ йохәта эԓт тӑйты партсэм».

²²Агриппа пӑ Фест пеԓа йастәс: «Ма па щи хŏйат хуԓәтты кашем ус». «Хӑԓэвәт щи хуԓԓэн» - Фест йŏхԓы йастәс.

²³Кимет хӑтәԓ, хун Агриппа пӑ Вереника ун ԓӑтәӈ щирән йŏхәтсәтән пӑ сўт верты тӑхайа щŏрәс ԉаԉ йŏх кущайәт пӑ ԓӑтәӈа уԓты вошәӈ хŏйатәт пиԓән ԓŏксәтән, Фест партәм хўватән Павел туса.

²⁴Щӑԓта Фест йастәс: «Агриппа хон пӑ хŏԓ тӑта уԓты йох! Нынан тўм хŏйат ныԓа, хŏй эԓты аратәԓ хŏԓ иудейәт мӑ хŏщайэм Иерусалимән пӑ тӑта, поләщ тўвман пӑ нўр кӑшман, йŏхтыԓысәт пӑ ўвсәт, ԓўвеԓа йэԓԓы уԓты ӑт мосәԓ.

²⁵Туп ма уйәтсэм, сŏрәм ԓӑта ԓўв немәԓты ӑт верәс; пӑ хŏты ԓўв Август эԓты сўт вер такан вохәс, ма ԓўв хŏщайәԓа ԓўвеԓ китты нŏмәс версәм.

²⁶Ма ԓўв эԓтэԓ нэмәԓты тŏрԓы вер кущайэма хӑшты ӑт тӑйԓәм; щишән ԓўвеԓ нын хŏщайән, мет шопәӈ Агриппа хон, нӑӈ хŏщайэна тусэм, ватты йўпийән, мӑнэм мŏԓтты хӑшты урәӈән.

²⁷Ма нумәстэмән, ŏшԓы щир щит, касна хота опсәм ŏт, ԓўв нўрәԓ ӑт аԉман, хон хŏща китты».

Павел Агриппа хон хŏща ԓўвеԓ ԓўв ӑратыԓԓы

¹Агриппа Павела йастәс: «Нӑӈена нӑӈ эԓтайэн пŏтәртты рӑхәԓ». Щиӈәԋща Павел, йошәԓ йэԓ ԋиштәман, ԓўвеԓ ӑратыты щира пŏтәртты питәс:

²«Агриппа хон! Мӑнэм ма ŏй тӑйтыйа айәԓԓэм, тӑм хӑтәԓ нӑӈ йэщаԓтэн кашәӈ вер эԓты мӑнэм ма ӑратыты верәтԓэм, мўй хŏща ма иудейәтән нўрмәԓԓайәм,

³хŏԓна мет, нӑӈ иудейәт уԓәпса щирәт пӑ ўрайа питты нŏпсәт уйәтԓәԓан. Щишән нӑӈен тўӈа-щира мӑнэм хуԓәтты пойәкԓэм.

⁴Мет оԓәӈән ма мирэм кўтән уԓәм верэм, Иерусалимән энәмты пŏх ԓŏватән уԓәм уԓәпсайэм иудейәта иса ԓэр.

⁵Ԓыв хўв тэԓән ма эԓтэм уйәтԓәт, туп уйәтты вер аԉты ԓӑӈхамәԓәт ки, ма фарисейа усәм. Щит мўӈ эвәԓты верэв хŏща мет так утәԓтәпса.

⁶Ин ма сўт йэщаԓт ԓойԓәм Турәм аԉәм вер пеԓа пŏнәм нŏмәс урәӈән, мўй мўӈ ащиԓува мӑса,

⁷щи аԉәм вер тӑԓаӈа йиты вер кӑтхŏщйаӈ сыр рут мўӈ мирэв шийаԓәты нумәсԓәт, атәԓ пӑ хӑтәԓ сӑмәӈа Турма верәт верман. Щи пŏнәм нŏмәс урәӈән, Агриппа хон, ма иудейәтән нўрмәԓԓайәм.

⁸Мўйа пӑ нын ӑт рӑхты щира ԓўӈәтԓәԓән щит, мўй Турәм пӑрәм ŏтәт нŏх ԓыԓӈатәԓ?

⁹Йӑна, ма ищи нумәссәм, мӑнэм Назарет эԓты уԓты Иисус нэм йэщаԓт йэшащты ар мосәԓ.

¹⁰Щит ма щи Иерусалимән версәм: Турма йир верты ŏх икет эԓты йур ўйман, ма ар Турәм хŏйатәт касна хотәта тухрыԓысәм, пӑ, хун ԓыв пӑратысайәт, ма щийэԓ кашащисәм;

¹¹Пӑ хŏԓ иудейәт пойәкщәты хотәтән ма ар пўш ԓывиԓаԓ шукатысԓам пӑ Иисус атма айәԓты иԉамтысԓам пӑ, ԓыв пеԓайэԓ шек ԉикащман, хŏԓна пӑ па мўв вошәтән ԋухәтԓысԓам.

¹²Тӑм урәӈән, йур пӑ Турма йир верты ŏх икет эԓты партәм вер тӑйман, Дамаска мӑнты питсәм,

¹³хӑтәԓ кўтәпән йушән, йэшәк хон, ма турәм хӑр эԓты щимәщ нŏви шийаԓәсәм, хӑтәԓ эԓты артан нŏвийа пŏӈхәртәс. Ԓўв мӑнэм пӑ ма пиԓэмән йўвәм мŏхет нŏх хутԓәптәсԓы.

¹⁴Мўӈ хŏԓ мўва иԓ рӑкәтсув, пӑ ма тўр сый хуԓмәсәм, мӑнэма еврейәт йасәӈән пŏтәртәм тўр сый: ’Савл, Савл! Мўйа нӑӈ Мӑнэм ԋўхәԓԓэн? Нӑӈен карты йўщәӈ йўх пеԓа мӑнты ԓавәрт’.

¹⁵Ма йастәсәм: ’Хŏй Нӑӈ, Турәм Куща?’ Ԓўв йастәс: ’Ма - Иисус, Хŏйтэн нӑӈ ԋўхәԓԓән.

¹⁶Щӑԓта нӑӈ кўрԓана нŏх ԓойа; Ма щи урәӈән нӑӈ хŏщайэна этсәм, нӑӈен Ма верԓам верты хŏйата пӑ щит вантәм ŏта пŏнты, мўй нӑӈ ватсән пӑ мўй Ма нӑӈена ватәԓтәԓәм.

¹⁷Ма нӑӈен иудей мирэн эԓты хŏԓт пайәтԓэм пӑ па рут мир эԓты, хŏйтат хŏща Ма нӑӈен ин китԓэм,

¹⁸ԓывиԓаԓа сэмԓаԓ пел пўшты, ԓыв пӑтлам эԓты нŏви пеԓа ат ӑӈкәрмәсәт пӑ хиԋ йур эԓты Турәм пеԓа, пӑ Мӑнэма эвәԓты верән кӑрэк йŏрэмәты щир пӑ йэмәӈа пайтәм мŏхет кўтән уԓты щир ат мŏщатсәт’.

¹⁹Щишән, Агриппа хон, ма турәм хӑр вантәпса эԓты йŏвра ӑт керԓәсәм,

²⁰туп оԓәӈән Дамаск пӑ Иерусалимән уԓты мŏхета, йухәт Иудея ԓŏватән уԓты мŏхета пӑ па рут мира пŏтәртсәм, ԓыв кӑрэк эԓты шӑшән ат керԓәсәт пӑ Турәм пеԓа ат керԓәсәт, кӑрэк эԓты шӑшән керԓәты арат ԓӑт тӑйты верәт верман.

²¹Щи урәӈән иудейәт мӑнэм Турәм Хотән ԋӑрэмәсэԓ пӑ лакки мӑншиты ўтщисэԓ.

²²Туп, Турәмән ԋотәпән миймем кемән, ма тӑм хӑтәԓ унты ԓойԓәм, айәта пӑ унәта вантәм ŏта уԓман, нэмәԓты ӑт пŏтәртман, щи тўмпийән мўй эԓты Турәм айкеԓ туты хŏйатәт пӑ Моисей пŏтәртысәт, мӑтты щит питәԓ,

²³тŏрԓы ки, мӑтты Христоса шук туты мосәс пӑ, мет оԓӈа парәм эԓты нŏх ԓыԓәӈԓәмаԓ йўпийән, мўӈ мирэва пӑ па рут мира нŏви такан айәԓтты мосәс».

²⁴Хун ԓўв щиты ԓўвеԓ ӑратысԓы, Фест сыйәӈ тўрән йастәс: «Павел, нӑӈ ŏхен атма йис! Ун утәԓтәпса нӑӈен ŏх атма йиты унты йŏхтәптәсԓы».

²⁵«Ӑнтом, йэшәк ԓӑтәӈ Фест», - ԓўв йастәс, - «Ма ŏхем атәм ӑнтом, туп тŏрԓы пӑ ошәӈ йасӈәт пŏтәрԓәм.

²⁶Хон щи верәт эԓты уйәтԓәԓы, хŏй йэщаԓт ма тŏрԓы пŏтәртԓәм. Ма йэша нэш ӑт эвәԓԓәм, ԓўв эԓтэԓ мŏԓты иса тӑм эԓты сайԓәман ат уса, тӑм ӑнта щуӈән ус.

²⁷Агриппа хон, Турәм айкеԓ туты хŏйатәта эвәԓԓән амўй? Уйәтԓэм, эвәԓԓән».

²⁸Агриппа Павела йастәс: «Нӑӈ мӑнэм йэша нэш ӑт эвԓәптәԓэн, Христиана йиты урәӈән».

²⁹Павел йастәс: «Ма Турәм пойәксэм ԓўԓән, шимәԓ мўй, ар мўй, ӑнтом туп нӑӈ, пӑ хŏԓ тӑм хӑтәԓ мӑнэм хуԓәтты ŏтәт, тӑмиты ат йисәт мўй хŏрпи ма, туп йӑрәм карты кеԓ такԓы».

³⁰Хун ԓўв щит йастәс, хон пӑ куща ики, Вереника пӑ ԓыв пиԓԓаԓән опсәм ŏтәт нŏх ԓойсәт;

³¹пӑ пўӈԓа йирԓәман, ԓыв кўтэԓән пŏтәртсәт: «Тӑм хŏйат сŏрәм кеша пӑ касна хот кеша нэмәԓты атәм ӑт верәԓ».

³²Пӑ Агриппа Фест пеԓа йастәс: «Тӑм хŏйат эсәԓты кўш рӑхәс, кесарь эԓты сўт ӑт вохәс ки». Щишән куща ԓўвеԓ кесарь хŏща китты нŏмәс верәс.

Павел Рим воша мӑнәԓ

¹Хун мўӈева Италия мўва хопән мӑнты нŏмәс верса, Павел пӑ тухәԓ па опсәм ŏтәт Август когорта эԓты Юлий нэмпи сот ԉаԉ йох кущайа мӑсайәт.

²Мўӈ, Асия вошәт сӑхат мӑнты, Адрамит вош паршәӈ ун хопа ԓэԓтсув пӑ мӑтсув. Мўӈ пиԓэвән Аристарх, Македония ху, Фессалоника вош эԓты ус.

³Кимет хӑтәԓ Сидон хŏща хойсув. Юлий, Павел пиԓән йӑм щира ус, ԓухәсԓаԓ хŏща ԓўвеԓ йӑхты эсәԓсәԓы пӑ ԓыв ԓўв верԓаԓ эԓты ат нумәссәт.

⁴Щиԓта этман, йэщаԓт вот эԓты хŏнтаман, мўӈ Кипр пухәр вот сай пелкеԓ сӑхат мӑтсэв,

⁵пӑ, Киликия пӑ Памфилия шŏма щарәс шŏппи ўшмев йўпийән, Ликия мўвән Миры воша йŏхәтсув.

⁶Щита сот ԉаԉ йŏх куща Александрия вош эԓты уԓты, Италия мўва мӑнты, паршәӈ ун хоп уйтәс пӑ мўӈев щи ԓэԓтсәԓы.

⁷Ар хӑтәԓ сыс мўӈ айәԓта йэԓԓы мӑтсув пӑ мет йухәт, ўрайән Книд вош шŏма йŏхәтсув. Пӑ вот мўӈев мосты тӑха пеԓа мӑнты кумән ӑт мийԓысԓы, мўӈ Крит пухәр сайа Салмона нэмпи ԋŏԓ пеләк сӑхат ванамәсув.

⁸Ԓўв мŏхтэԓ ўрайән ўратмев йўпийән, и тӑхайа йŏхәтсув, Йӑм Каԓтнаӈәта айәԓтԓа, щи ԉэпән Ласея вош ус.

⁹Мўӈ щи арат ар сыс уштәмев урәӈән пӑ мӑнты вер пӑԉщәма йиты питәс, иудейәт сўс вўщԓәты пŏра ўш хӑщәс, Павел ԓывиԓаԓа йастәс:

¹⁰«Ма ваттэмән, мўӈ мӑнәпсайэв шек ԓавәрт питәԓ пӑ ун атәм тӑйты питәԓ ӑнта туп пŏрмасәта пӑ хопа, мўӈ уԓәпсайэва па».

¹¹Туп сот ԉаԉ йох куща Павел йасәӈ эԓты сэвәс тӑйты хŏйата пӑ хопәӈ кущайа аршәк эвԓәс.

¹²Щи лух тӑԓ уԓты щирән атәм ус, пӑ ар хŏйат щиԓта йэԓ мӑнты нŏмәс мийԓысәт, верәтты кемән Финик вош унты мӑнты пӑ щита тӑԓ хӑщәптәты мосәԓ. Финик - щит Крит лух, нўм кев оԓәӈ пӑ ным кев оԓәӈ вот йэщаԓт ус.

Щарәсән так вот

¹³Нўм вот пŏԓты питәс, пӑ ԓыв нумәссәт мосты щир мŏщатсәт, хопән рупитты мŏхет йакарэԓ нŏх аԓәпсәт пӑ Крит ԉэп эԓты мӑтсәт.

¹⁴Туп йэшавуԓ пухәр эԓты ŏвәс пеԓа уԓты хӑԓэвәт пеләк так вотшики пŏԓты питәс, эвроклидона айәԓтты вот.

¹⁵Паршәӈ ун хоп щиты аԓэмәса пӑ ԓўв вот йэщаԓт мӑнты ӑт веритәс, пӑ мўӈ, хумпәта мийәсман, тыйэԓ-тŏхэԓ тутԓысайув.

¹⁶Мўӈ айшәк Клавда нэмпи пухәр вот сай пелкәԓа питсув. Щита мўӈ ўрайән ай хопев катәԓты верәтсэв.

¹⁷Ай хопев нŏх аԓԓәммев йўпийән, паршәӈ хопән рупитты хŏйатәт щевма кеԓәт паршәӈ хоп иԓта таԓсәԓаԓ пӑ ԓўвеԓ лӑп йӑрсәԓәсэԓ. Сэй хишәӈ пана ӑт опсатты урәӈән, парәш иԓ эсәԓсэԓ пӑ щиты щи вотән тутԓысайув.

¹⁸Кимет хӑтәԓән, вотән паршәӈ хоп щиты йовәԓты питса пӑ ԓэԓтәм пормасәт ԓыв йиӈка иԓ йовәԓты питсәԓаԓ.

¹⁹Хуԓмет хӑтәԓән пӑ мўӈ йоша-кўра хоп кеԓәт-ԋўрәт иԓ йовәԓты питсув.

²⁰Ар хӑтәԓ ӑнта най, ӑнта хусәт ӑт нысайәт пӑ так вот щиты пŏԓәс, мет йухәт хŏԓна мўӈ нŏх питты щира уԓты нŏпсэв лўттәсэв.

²¹Хŏйатәт хув нэмәԓтты ӑт ԓэсәт. Павел, ԓыв кўтэԓа ԓоймаԓ кемән, йастәс: «Йох! Мӑнэм хуԓәтты мосәс пӑ Крит эԓты пўӈԓа мӑнты ӑт мосәс, тӑмәщ шук пӑ накԓат нын ԓуԓән ӑт ватсәты.

²²Ин пӑ нынан такан йастәԓәм, нŏх тўӈмәԓтыйаты, нын эԓтан нэмәԓты хŏйат ӑт посаԓәԓ, туп паршәӈ хопев шўкаԓәԓ.

²³Хӑщәм атән мӑнэма Турәм ангел этәс, Хŏй пеԓа ма уԓԓәм пӑ Хŏйа ма пойәкщәԓәм

²⁴пӑ йастәс: ’Павел, аԓ пӑԓа! Нӑӈена кесарь йэщаԓт ԓойты мосәԓ, пӑ Турәм Ԓўв Йӑмәԓән нӑӈен щи ԓŏват йӑм верәс, хŏԓ нӑӈ пиԓэнән уԓәм ŏтәта уԓәпса мойԓәс’.

²⁵Щишән йох, нŏх тўӈмәԓтыйаты, ма Турма эвәԓԓәм, щиты питәԓ, хŏты мӑнэма йастаман ус:

²⁶Мўӈ мӑтты пўхра ўты йўвәтты верэв уԓ».

Паршәӈ ун хоп хумпәтән шўкатты вер

²⁷Ԋӑԓхŏщйаӈмет атән, хŏты мўӈ Адриа щарәс хўват тутԓысайув, ат кўтәп кемән хопән рупитты йох мўв ший мŏштәты питсәт, иԓампа мӑтты мўва ванамәты питсув,

²⁸пӑ, ԓыв йик мӑԓат артаԓәсэԓ, пӑ хус ԓӑԓ ус, щӑԓта йэша ус мӑԓатәԓ па артаԓәсэԓ, пӑ ветхŏщйаӈ ԓӑԓ арат ус.

²⁹Кевәӈ тӑхайа питты эԓты пӑԓман, ԋӑԓ йакар сэвәс эԓты иԓ вŏщкәсәт пӑ хӑтԓа йиты ԓавәԓсәт.

³⁰Хун пӑ хопәӈ мŏхет хопеԓ эԓты хŏнтаты ўтщисәт пӑ щарса ай хоп иԓ эсәԓсәт, щимәщ хŏрас верман, мӑтты хоп ԋŏԓ эԓты йакарәт иԓ эсәԓԓәт,

³¹Павел сот ԉаԉ йох кущайа пӑ ԉаԉ йохәта йастәс: «Ԓыв паршәӈ хопән ӑт хӑщԓәт ки, нын ԓыԓԓән этәԓтәты ӑт верәтԓәты».

³²Щиӈәԋща ԉаԉ йохәт ай хоп кеԓәт шŏппи сэвәртсәԓаԓ, пӑ хоп иԓ рӑкнәс.

³³Хӑтԓа йиты йэԓпийән Павел мŏхет хŏԓ ԓэты пойәксәԓы, йастәман: «Тӑм хӑтәԓ ԋӑԓхŏщйаӈмет хатәԓ, хŏты нын, ԓавԓәсман, нэмәԓты ӑт ԓэвман, ԓэтŏтԓы уԓԓәты.

³⁴Щишән нынан ԓэтыйа пойәкԓыԓам: щиты нын уԓәпсайԓын шавиты туԓт; нэмәԓты ŏтԓән хŏща и ŏхсŏх нын ŏхԓән эԓты иԓ ӑт рӑкәнәԓ».

³⁵Щит йастәмаԓ кемән пӑ ԋаԋ ўймаԓ йўпийән, ԓўв, хŏйатәт ватман, Турма пўмащипа йастәс пӑ, кӑтна мŏртмаԓ кемән, ԓэты питәс.

³⁶Щиӈәԋща хŏԓыйэ каркама йисәт пӑ хŏԓыйэ ԓэты питсәт.

³⁷Паршәӈ хопән мўӈ аратэвән кӑтсот ԓапәтйаӈ хут хŏйат усув.

³⁸Хун хŏйатәт тӑрәмтыйа ԓэсәт, ԋаԋ ԓат сэми хирәт щарса йŏвәԓман, хоп кенапты питсэԓ.

³⁹Хун хӑтԓа йис, ԓыв этәм мўв ӑт мŏштәсэԓ, туп мŏԓтты пан тӑйты йик лух шийаԓәсәт, щи хойты нŏмәс версәт, хойты верәтԓа ки.

⁴⁰Щӑԓта, йакарәт нŏх ўйәм йўпийән, щарәс хўват мӑтсәт пӑ, сэвәс ԓупԓаԓ хŏԓт эхмеԓ кемән пӑ ай паршэԓ вот хўват нŏх аԓәммеԓ йўпийән, мўв питар пеԓа ԋŏхтәсэԓ.

⁴¹Пан ŏха хойсәт, пӑ хопеԓ сорәм тӑхайа опсәс. Ԋŏԓәԓ иԓ ԓŏӈәс пӑ ӑт ԋŏхԓыйәԓ, сэвсәԓ пӑ хўмпәтән пелки сэкԓа.

⁴²Ԉаԉ йохәт касна хота омәсты ŏтәт веԓты кашащсәт, мӑтты ŏт ўты ущман ӑт ат хŏнтас.

⁴³Туп сот ԉаԉ йох куща, Павел ӑратыман, ԓывиԓаԓ щи верэԓ эԓты иԓ вŏԓәтсәԓы пӑ ущты хошты ŏтәта оԓӈа иԓ навәрмәты пӑ мўва ўты ущты партсәԓы,

⁴⁴па ŏтәта пӑ хŏйа сохәԓ сурән, хŏйа пӑ мŏԓтты паршәӈ хоп пелкәт сурән ўты йŏхтәптәты партсәԓы; щиты хŏԓыйэ йӑма питара ўшсәт.

Павел Мальта пухәрән

¹Ўты пайтәсмеԓ йўпийән, Павел пиԓән уԓәм ŏтәт ŏша пайәтсэԓ, пухәр нэмәԓ Мальта.

²Пухәрән шŏшийа уԓәм па сыр хŏйатәт мўӈева йӑм арат ԋотәп версәт. Йэрт пӑ ищки уԓәм пӑтыйән, ԓыв тўт пŏтсәт пӑ хŏԓыйэ мўӈев вана вохсәԓаԓ.

³Хун пӑ Павел варәс аԓтэԓ ӑктәс пӑ тўта пŏныԓыйәс, ŏхты вой, тўт рўв эԓты хŏнтаман, ԓўв йошәԓа, пŏрэмәман, иԓԓы лўԋиты питәс.

⁴Хун пухрәӈ хŏйатәт, Павел йош эԓты ŏхты вой иԓԓы лўԋиты шийаԓәсәт, ԓыв кўтԓаԓән пŏтәртты питсәт: «Уйәтман, тӑм хŏйат веԓтатты ŏт: ԓўв щарәс эԓты нŏх питәс, туп вещкат ԓух сўт ԓўвеԓ ԓыԓӈа уԓты ӑт хӑйԓәԓы».

⁵Туп ԓўв, ŏхты вой тўта рӑԋкәмаԓ йўпийән, нэмәԓты атма ӑт хойәс.

⁶Ԓыв ԓўвеԓ нŏх пўвԓәты мўй пӑ, шӑмкапан пӑрман, иԓ рӑкәнты ԓавәԓсэԓ; туп, хўв ԓавԓәсман пӑ ваттэԓән, нэмәԓт атәм сŏрта ӑт питәс, па щира нумәсты питсәт пӑ йастәԓәт, ԓўв иԓампа ԓух.

⁷Щи тӑха ԉэпән Публий нэмпи пухәр куща хотәт усәт. Ԓўв мўӈев вана ўсԓы пӑ хуԓәм хӑтәԓ мойԓәптысув.

⁸Публий ики ащи каврәма пӑ хŏнәԓ кӑшийа йўвман ŏԓтӑхайәԓән ŏԓәс. Павел ԓўв хŏщайәԓа ԓŏӈәс, пойәкщәс пӑ, ԓўв эԓтэԓ йошԓаԓ пŏнмаԓ кемән, ԓўвеԓ тўмтака версәԓы.

⁹Тӑм вер йўпийән пухәрән уԓты, муш тӑйты па мŏхет йŏхтыԓысәт пӑ тўмтака верыԓысайәт,

¹⁰ԓыв мўӈева ар йӑм вер версәт пӑ мӑнты питмевән мŏсты ŏтәтән мӑсайув.

Павел Рим воша йохәтты вер

¹¹Хуԓәм тыԓәщ хӑщәм йўпийән мўӈ Александрия эԓты уԓты, Диоскуры нэмпи паршәӈ хопән мӑтсув, щи пухәр хŏща тӑԓ хӑщәптәс,

¹²щӑԓта Сиракузы воша йŏхәтмев йўпийән, щита хуԓәм хӑтәԓ усув.

¹³Щиԓта мӑнмев йўпийән, Ригия воша йŏхәтсув. Йухәт хӑтәԓ нўм вот пŏԓты питәс пӑ кимет хӑтәԓән мўӈ Путеол воша йŏхәтсув,

¹⁴хŏта хӑнам йохԓув уйәтсув, пӑ ԓыв хŏщайэԓ ԓапәт кем хӑтәԓ уԓты вохсайув, йухәт Рим воша мӑтсув.

¹⁵Щита уԓәм хӑнам йох, мўӈ эԓтэв хуԓмеԓ кемән, мўӈ йэщаԓтэв Аппий вош хӑр лот пӑ Хуԓәм Хоԓты Хот унты этсәт. Павел ԓывиԓаԓ шийаԓәмаԓ кемән, Турма пумащипа йасӈәт йастәс пӑ нŏпсәԓ такамәс.

¹⁶Хун пӑ мўӈ Рим воша йŏхәтсув, сот ԉаԉ йох куща йӑрәм ŏтәт ԉаԉ йох ун кущайа мӑсԓы, Павел пӑ атэԓ щира ԓўвеԓ ԓавәԓты и ԉаԉ ху пиԓән уԓты эсәԓса.

Павел Рим вошән

¹⁷Хуԓәм хӑтәԓ хащәм кемән, Павел иудейәт эԓты ԓӑтәӈ йŏх йӑха вохсәԓы пӑ, хун ԓыв йӑха йŏхәтсәт, ԓывиԓаԓа пŏтәртәс: «Хӑнам йох! Мирэма мўй пӑ ащиԓув щирәта нэмәԓты атәм ӑт кўш версәм, ма йӑрман Иерусалим эԓты Рим мŏхета мӑсайәм.

¹⁸Ԓыв, мӑнэм сўт вермеԓ йўпийән, эсәԓты ўтщисэԓ, ма хŏщайэм сŏрәм ԓӑта нэмәԓты нўр ӑнтом;

¹⁹туп иудейәт йасәӈԓаԓ кӑтна мӑнман уԓԓәт, мӑнэм кесарь эԓты сўт вохты вера йис, туп ӑнтом ма мирэм мŏԓты хŏща нўрәӈа верты урәӈән.

²⁰Щи пӑтыйән ма нынан вохсәԓам, уйтантыты пӑ нын пиԓәнән пŏтрэмәты урәӈән, Израиль нŏмәс йэԓ пŏнты урәӈән, ма тӑмиты йӑрсайәм».

²¹Ԓыв пӑ ԓўвеԓа йастәсәт: «Мўӈ нӑӈ эԓтэн ӑнта нэпек Иудея мўв эԓты йоша ўйԓысув, ӑнта йŏхтыԓыты хӑнам йохәт эԓты нэмәԓты хŏйат нӑӈ эԓтэн айкеԓ ӑт китыԓыйәс пӑ мŏԓты атәм йасәӈ ӑт йастыԓыйәс.

²²Туп мўӈева нӑӈ эԓтэн хуԓты мосәԓ, хŏты нӑӈ нумәсԓән. Мўӈ уйәтԓэв, тӑм утәԓтәты вер эԓты кашәӈ тӑхайән ўра ворԓәт».

²³Щӑԓта, ԓўвеԓа аԉәм хӑтәԓән, йӑм ар хŏйат ԓўв хŏщайәԓ хоԓты хотәԓа йŏхтәс; пӑ ԓўв аԓәӈсӑхат эԓты йэтән унты ԓывиԓаԓа Турәм Хон Уԓәпса эԓты пŏтәртәс. Вантәм верәт этәԓтыйәс пӑ ԓывиԓаԓ эвԓәптәман, Моисей Закон пӑ Турәм айкеԓ туты хŏйатәт нэпекәт эԓты ўйман, Иисус эԓты пŏтәртәс.

²⁴Тухԓәт ԓўв эвԓәптәсԓы, па ŏтәт пӑ ӑт эвәԓсәт.

²⁵Кўтԓаԓән ўра ворты питсәт, пӑ хун ԓыв мӑнты питсәт, Павел щимәщ йасӈәт йастәс: «Йэмәӈ Ԓыԓ Турәм айкеԓ туты хŏйат Исаия сӑхат мўӈ ащиԓува йӑма йастәс:

²⁶’Тӑм мир хŏща мӑна пӑ йасты: пӑԓԓәнән хуԓԓәԓән пӑ ӑт мŏштәԓԓән, пӑ сэмԓәнән ватты питԓәты пӑ ӑт шийаԓәԓԓән.

²⁷Тӑм мŏхет сӑм вŏйән лӑп таԓса, пӑ пӑԓԓаԓән ўрайән хуԓԓәт, пӑ сэмԓаԓ лап хӑтщәсԓаԓ, сэмән ӑт шийаԓәты щира, пӑ пӑԓԓаԓән ӑт хуԓты щира, пӑ сӑмԓаԓән ӑт мŏштәты щира, пӑ Ма пеԓайэм ӑт керԓәты щира, Ма ԓывиԓаԓ тўмтака ӑт ат версәԓам’.

²⁸Щиӈәԋща, нынана ԓэр ат питәԓ, Турәм нŏх пайәтты щир па рут мира китса: ԓыв щи хуԓԓэԓ».

²⁹Хун ԓўв тӑм йастәс, иудей йох, ԓыв кўтэԓән такан ўра ворман, мӑтсәт.

³⁰Щӑԓта Павел тӑԓаӈ кӑт тӑԓ сŏхәптәм хотәԓән ус пӑ хŏй ԓўв хŏщайәԓ йŏхтыԓыйәс, хŏԓ вана ўйԓысԓы,

³¹ԓўв, ӑт пӑԓман пӑ ӑт йэртԓыман, Турәм Хон Уԓәпса эԓты пŏтәртәс пӑ Турәм Куща Иисус Христос эԓты утәԓтәс.