TITE
11 Nte Poli le xa ɲin safe in ke, nte men mu Ala la jonŋo anin Isa Kirisita la kiladinŋo ti. Ala xa ń ki x’a la sugandininŋolu ladun lannaya xono, xa tonɲa yita i la, men nin Alaɲasilanɲa be taxala i ɲoxo fe. 2 Wo kunŋo mu le walasa i xa nilamaya banbalo soto gigo ti. Ala, ate men nte a foxanŋo soosola xa wo nilamaya lahido ta n ɲen, jannin duniya xa da. 3 A la waxato sininma, a xa wo yita a la xumo la. N Kisibaxa Ala xa wo xumo xarifa nte ma, xo ń x’a waaju. 4 Tite, ite men mu ń dinxe soobe ti lannaya silo la, lannaya men nin alan mu kilin ti a to, nte Poli le be ɲin safe in kila í ma. Fa Ala anin n Kisibaxa Isa Kirisita xa neemo nin heero ke í ɲen. 5 Nte x’é tu Kereti, walasa kuwo mennu ɲabobalo tuta je, í xa wolu ɲabo. Í xa Ala la jama moxobalu sigi gallolu bee to, í xo ń x’a fo í ɲen ɲa men. 6 Moxoba xa xan xa ke jalagibalo ti, anin musukilintigo. A dinŋolu xa ke lannayabaxolu ti, i xana ke moxo tiɲaninnu ti walla wulubaxa bunɲabalolu. 7 Ala la jama lakorosibaxo xa xan xa ke jalagibalo ti, bawo Ala la moxolu kunnasigibaxo le mu. A xana ke wasubaxante ti, walla jusu tarinŋo, walla dolominnaba. A xana ke moxo fatinba ti, a xana xaaliso ŋinin nanbaro la. 8 A xa ke luntannajigila ti, anin ku ɲuma xanubaxo. A xa ke hakilima nin moxo tilinninŋo ti, anin moxo senunŋo nin fanmutala ti. 9 A xa xan xa ke moxo ti, men be notonin Ala la xumo la, í xo a xaranta a la ɲa men. Wo ɲa ma, a si sin xa moxolu tonben xaran soobe la, xa soosolilalu da xati. 10 Moxo murutininŋo kiika be kenin mennu be moxolu lafilila i la xuma kuntanŋolu la. Wolu kiika bota Yahudiya lelu to. 11 I xa xan xa lade, bawo i be luwo dolu muume lafilila, xa moxolu xaran ku kabaninŋo la, xaaliso nofe. 12 I to do, i fannu la kila do xo: «Keretingolu mu faniyafola lelu ti tuma bee; wara jaxu nuxumalu.» 13 Wo xumo mu tonɲa le ti. Wo le x’a tu, í xa xan xa xumaxolen wolu ɲen, walasa i xa lannaya soobe soto, 14 anin, nin i me i noto Yahudiyalu la taliyolu nin hadamadinŋolu la folu la, wo mennu x’e xodi tonɲa la. 15 Fenŋo bee xa senu moxo senumanŋolu ɲen; bari fusi man senu moxo noxonin lannabalolu ɲen. Wolu hakilolu nin i jusukunŋolu noxoninŋo le mu. 16 I b’a fola xo i xa Ala lon, bari i b’a yitala i la kebaarolu la xo i man a lon. Moxo haramunin, murutininŋo lelu mu. I me kebaara bete si ke no.
21 Ite Tite ken, moxolu xaran xaran soobe la. 2 A fo xexotobalu ɲen xo i xana danmatanbi ku to, i xa bunɲa tu i fannu xan, xa ke hakilimalu ti. I sinsinninŋo xa tu lannaya nin xanuya to, i xa muɲa. 3 A fo musuxotoba dulu ɲen xo i bosilo xa senuya. I xana toxo jaxu la moxolu la, i xana i fannu ladi dolo ma. I xa ke tonbennikela betolu ti. 4 Musuxotobalu xa musu dindinŋolu xaran i xelu nin i dinŋolu xanula, anin 5 xo i xa ke hakilimalu ti, x’e fannu muta, x’e la lumabaarolu ke a ɲa ma, anin xa beteya, xa xulu i xelu ɲen, walasa moxo si xana soto xa xumajaxo fo Ala la xumo ma. 6 Wo ɲa ma, a fo xamarindinŋolu dulu ɲen i xa hakili beto ta kuwo bee to. 7 Ite fan xa ke kuɲumakela ti, xa ke ɲayito ti moxolu ɲen. Moxolu laxaran xoyiya nin soobe to. 8 Ite fan na xumolu xa ke tonɲa nin soosolibalo ti, walasa í jaxolu xa malu, i xana xuma jaxu soto x’a fo n ma. 9 Jonŋolu xa xulu i marigilu ɲen kuwo bee to, x’e diyanɲekuwolu ke. I xana i sooso. 10 I xana i marigilu bulufen si ta. I xa ɲumaya nin xantigiya dafaninŋo yita tuma bee, walasa i xa bunɲa la n Kisibaxa Ala la xaranŋo xan kuwo bee to. 11 Bawo Ala x’a la neemo yita, walasa moxolu bee si kisi ɲa men. 12 Wo neemo be n xaranna xo n xa i xodi Alaɲasilanɲabaliya nin duniya nege jaxolu la; xo bi, n xa i taxama hakilimaya nin tilinninɲa nin Alaɲasilanɲa xono, 13 jannin heero xa na, n gigo be men xan, anin jannin n na Alaba nin n Kisibaxa Isa Kirisita la nooro xa yita. 14 Isa x’a fan di ntelu nofe walasa xa n kunbo tilinbaliya bee ma, xa n senuya, xa n ke a ta ti, xa n ke moxolu ti, mennu jijaninŋo be ɲumako la. 15 Í xa xan xa moxolu laxaran, x’e jusudun, anin x’e jalagolu yita i la, í barako bee la ɲin ɲa in ne ma. Moxo si xana í doxoya.
31 Í xa lannayabaxolu hakilo lajigi a la, xo i xa xulu kuntigolu nin fango ɲen. I xa wolu lame, anin i x’e toben ku ɲuma bee ko xanma. 2 I xana xumajaxu fo moxo si ma, i xana ke kelelalu ti, bari i xa ke moxo sabarininŋolu ti, x’e juso faxa moxo bee xoto. 3 Bawo n du tunnu mu hakilintanŋo lelu ti folofolo, anin Ala foxanmutabalolu, nin moxo filininŋolu. N tunnu be nege sifa bee nin nidiyanɲe sifa bee la jonɲa la. N tunnu b’e taxamala jaxuya nin kiiliya xono. Moxo tunnu be n jaxuyala, n du tunnu b’e ɲoxo jaxuyala. 4 N Kisibaxa Ala x’a la ɲumaya nin a la xanuya yita hadamadinŋolu la tumo men, 5 a xa n kisi wo tumo. A man n kisi bawo n xa kewale tilinnin ke; a x’a ke a la hinnayeba le xanma. Ni Senunŋo xa n na towulu xa n tokutaya batiselijiyo la. Wo le xa n kisi. 6 N Kisibaxa Isa Kirisita barako to, a xa wo Ni Senunŋo kiika lajigi n xan, 7 walasa Ala la tilinninɲa soto tanbo xo, a la neemo xanma, n xa nilamaya banbalo soto ke ti, n gigo be wo men xan. 8 Wo xumo mu tonɲa le ti. Nte b’a fe í xa wo fo x’a xoleya, walasa mennu lata Ala la, wolu x’e jija kuɲumako la. Wo kuwolu xa ɲin; nafa b’e la moxolu ɲen. 9 Í fan tanga ŋininxali kuntanŋolu nin buruju kuwolu nin kele kuwolu nin sariya xan soosololu ma; bawo nafa nte wolu la, i me fusi ɲiɲa. 10 Moxo men be nala talalo tila Ala la jama xono, nin í xa wo lasobi, sinɲa kilin nte, fula nte, í tosoobo wo tigi la. 11 A lon xo wo moxo sifa filita, a xa silo bula. A si tu junubo kela, fo x’a fan jalagi. 12 Nin ń xa Aratemasi walla Tisike ki í ma tumo men, í x’é balan xa na ń tara Nikopolise, bawo ń x’a latege xa sankunŋo ke non. 13 Í x’é balan xa sariya karanmoxo Senasi nin Apolosi deema í la dugutotaxo la, walasa fen xana dasa i la. 14 N na moxo dulu xa xan xa kewaleɲumako digi; walasa i xa dolu haajolu ɲiɲa. I xana ke moxo nafantanŋolu ti. 15 Mennu be nte bata jan, wolu bee be í xontonna. Mennu be n xanula lannaya silo la, í xa wolu bee xonton. Ala la neemo xa ke alu bee fe.