YITALOLU

YITALOLU

¹ Ɲinnu mu Isa Kirisita la ku yitaninŋo lelu ti, Ala xa mennu di a ma, walasa kuwo men be nala kela dondin, a xa wo yita a la jonŋolu la. Kirisita x’a la melekiyo ki a la jonxe Yaya ma, walasa a xa wo kuwo yita a la. ² Wo xa fen wo fen je: Ala la xumo anin Isa Kirisita la seedeya, a xa wo fo. ³ Moxo men be ɲin kilaya xuma innu xaranna, moxo mennu b’a lamela anin x’a xono xumolu labatu, heero be wolu ɲen bawo waxato sutiyata. ⁴ Yaya le be ɲin safe in kila Ala la jama woorowulo ma, mennu be Asi maro xono: Neemo nin heero xa ke alu fe xa bo Ala dula, men be je, men tun be je, anin men be nala; anin xa bo Ala Ni woorowulo dula, mennu be a la mansasigilanŋo ɲafe, ⁵ xa bo Isa Kirisita dula, ate men mu seede xantigo ti, ate men mu folo ti xa bo furelu to, anin duguxulo xan mansaxelu la Mansaxe. Kirisita be n xanula, a xa n kunbo n na junubolu ma a jelo bonno fe. ⁶ A xa n ke mansaya nin sadaxalasibaxolu ti a Fa Ala ɲen. Tanto nin sintigiya be a ɲen fo abada! Amiini. ⁷ A fele, a nato be xabolu temo to, moxo bee ɲa si a je, haali mennu x’a soxo. Duguxulo siyalu bee si xasi a la kuwo xanma. Iyo! Amiini! ⁸ «Nte mu Alifa nin Omega le ti», Marigi Ala, Sinŋobeetigo xo ten, men be je, men tun be je, anin men be nala. ⁹ Nte mu Yaya le ti, alu badinxe nin alu kafuɲoxo, tooro nin Mansaya nin timinadiya to, Isa kafuɲoxoya xono. Ń tun be Patimosi xooxoji sutto to, bawo ń xa Ala la xumo fo anin xa Isa seedeya. ¹⁰ Marigi la lunŋo, Ni Senunŋo jigita nte to. Ń xa xumaxanba do me ń xofe men tun be í xo buutuwo. ¹¹ Wo xo: «Í ɲa be men na, wo safe bukko do to, x’a ki Ala la jama woorowulo ma: Efesi, Simirine, Peregame, Tiyatire, Sarade, Filadelifi anin Lawodise.» ¹² Ń xa ń xofele xo ń be ń xumanɲenbaxo mafelela. Wo to, ń xa sanu lanpa woorowula je. ¹³ Do tun be wo lanpolu temo to, a be í xo hadamadinŋo. Dorokeba do tun b’a xanna, men be jigila fo a sinŋolu ma, sanu tetositilanŋo tun be baratunin a xaro to. ¹⁴ A kunŋo tun be xoyinin a be í xo saaxati xoyimanŋo walla í xo kotondibuna. A ɲalu tunnu be í xo tamano. ¹⁵ A sinŋo tunnu be ŋelenxula í xo silo men xolenta takenbuba to, x’a janxo b’a to. A xumaxanŋo be í xo jiba sonxoxanŋo. ¹⁶ Loolo woorowula tun be a kininbulo to, fan dafula dimanŋo do tun be bola a da xono. A ɲada tun be manala í xo tilo, nin a be kun. ¹⁷ Ń x’a je tumo men, ń boyita a sinŋolu xoto xa ke í xo fure. A x’a kininbulo la ń xan x’a fo xo: «Í xana sila! Nte mu folo nin labanŋo le ti. ¹⁸ Nte le mu nilama ti. Ń tun sata, a fele ń be ń nila fo abada. Saya nin lahara xundinŋolu be ń bulu. ¹⁹ Wo to, i safe, í xa fenŋo mennu je, mennu be je, anin mennu xa xan xa ke wo xo. ²⁰ Í ɲa be loolo woorowulo mennu la ń kininbulo to, anin sanu lanpa woorowulo, wolu gullo fele: Loolo woorowulo mu Ala la jama woorowulo la melekiyo lelu ti, lanpa woorowulo mu Ala la jama woorowulo ti.»

¹ «A safe Efesi Ala la jama melekiyo ɲen xo: «Loolo woorowulo be men kininbulo to, nin a be í taxamala sanu lanpa woorowulo temo to, wo be men fola wo fele: ² Nte xa í la kewalolu lon, í la sege anin í la timinadiya. Ń x’a lon xo í me moxo jaxolu la kuwolu muɲa no. Mennu b’a fola x’e mu kiladinŋolu ti x’a tara i nte a ti, í xa wolu xotobo, í xa wolu tara fanolu ti. ³ Í xa timinadi, í toorota nte toxo nofe, bari í man sege. ⁴ Bari ń be fen kilin fola í ma, xanuya folo men tun be í la, í man wo tu í la. ⁵ Í hakilo lajigi í boyidula kun, nimisi xa í la kewale fololu ke, nin wo nte, ń si na í ma. Nin í man nimisi, ń si í la lanpo bo a no to. ⁶ Bari í la ɲin xa bete: Nikolayi diino moxolu la kebaarolu man di í ɲen, í xo i man di nte du ɲen ɲa men. ⁷ «Tulu be men ma, wo x’a lame, Ni Senunŋo be men fola Ala la jamalu ɲen. «Men je sinŋo soto, ń si nilamaya yiro dinŋolu di wo ma domolo ti, men be Ala la arajanna xono.» ⁸ «A safe Simirine Ala la jama melekiyo ɲen xo: «Men mu folo nin labanŋo ti, nin a tun sata xa nilamaya tugun, wo be men fola wo fele: ⁹ Nte x’é la tooro nin í la segebaxantunɲa lon. Bari tonɲa la, í mu fentigo le ti! Mennu be i fannu kenin Yahudiya ti, x’a tara i nte a ti, wolu be toxotiɲaxumo mennu fola, ń xa wolu lon. Wolu mu Sentane la batusuwo le ti. ¹⁰ Ɲaaga men be nala í sotola, í xana sila wo ɲa. A fele, Sentane si alu dolu bula kaso la walasa x’alu xotobo, alu si tooro tili tan xono. Ke xantigo ti fo saya. Nin wo keta, ń si nilamaya di í ma kunnawulijala ti. ¹¹ «Tulu be men ma, wo x’a lame, Ni Senunŋo be men fola Ala la jamalu ɲen! «Men je sinŋo soto, wo si kisi saya fulananŋo ma.» ¹² «A safe Peregame Ala la jama melekiyo ɲen xo: «Fan dafula dimanŋo be men bulu, wo be men fola wo fele: ¹³ Nte xa í sigidula lon: Sentane la mansasigilanŋo be dula men ne mu. Í be notoninbete nte la, anin í man í la lannaya bo nte xan, haali ń seede xantigo, Antipasi faxata alu bata waxato men, Sentane sigidula. ¹⁴ Bari haali wo, fen dantalu be ń bulu x’e fo í ma: Moxo dolu be í bata mennu b’a lonin Balamu la xaranŋo xo. Balamu xa Balaki bula kalanŋo lola Banisirayila dinŋolu ɲa x’e bula bolisosubo domola anin xa jadoya ke. ¹⁵ Ite du bata, moxo dolu be je, mennu be a lonin Nikolayi diino moxolu la xaranŋo xo. ¹⁶ Wo le x’a tu, nimisi. Nin wo nte, dondin ń si na í ma, ń si wo moxolu kele fanŋo la, men be ń da la. ¹⁷ «Tulu be men ma, wo x’a lame, Ni Senunŋo be men fola Ala la jamalu ɲen! «Men je sinŋo soto, ń si manne duguninŋo di wo ma. Ń si kuru xoyo du kilin di a ma, toxo kuto be safenin men xan, moxo man men lon fo a dita men kilin ma.» ¹⁸ «A safe Tiyatire Ala la jama melekiyo ɲen xo: «Ala Dinxe, ate men ɲalu be manala í xo ta, a sinŋolu be ŋelenxula í xo silo, wo be men fola wo fele: ¹⁹ Ń x’é la kewalolu lon, anin í la xanuya, nin í la xantigiya, nin í la baaro, nin í la timinadiya. Ń x’a lon x’é la kewale ɲuma labanŋolu xa sa folofolo talu ti. ²⁰ Bari fen be ń bulu x’a fo í ma: Í be Jesabeli tunin je, wo muso men b’a fan kilila xo kila, a be ń na jonŋolu lafilila. A b’e laxaranna x’e xa jadoya ke anin x’e xa bolisosubolu domo. ²¹ Ń xa waxati di a ma walasa a xa nimisi, bari a nte a fe xa nimisi a la jadoya la. ²² Wo le x’a tu, nte be nala a lalala jangaru laranŋo xan. Mennu xa jadoya ke a fe, ń si tooroba lana wolu dulu ma, nin i man nimisi wo kewalolu la. ²³ Nte be nala a dinŋolu faxala. Wo to, Ala la jamalu bee si a lon xo nte le mu hadamadinŋolu miiriyalu nin i xonoto kuwolu bee segesegebaxo ti. Nte si alu bee kilin kilin sara x’a ben alu la kewalolu ma. ²⁴ «Bari atelu tolu mennu be Tiyatire, nin alu man son wo xaranŋo ma, anin alu man a lon wo moxolu xa men kili xo “Sentane la gullebalu”, ń b’a fola alu ɲen xo, nte nte doni xote lala alu kun. ²⁵ Bari men be alu bulu, alu wo tomuta bete fo ń xa na. ²⁶ «Men je sinŋo soto, anin xa ń na kewalolu mara fo labanŋo lunŋo, ń si fango di wo ma, nte fan xa men soto ń Fa la: Ń si fango di wo ma siyalu xan. A si i mara negeguma la, x’e tote í xo banxudaxolu. Ń si saxuyelendala loolo du di wo ma. ²⁹ «Tulu be men ma, wo x’a lame, Ni Senunŋo be men fola Ala la jamalu ɲen!»

¹ «A safe Sarade Ala la jama melekiyo ɲen xo: «Ala Ni woorowulo, anin loolo woorowulo be men bulu, wo be men fola wo fele: Nte x’é la kewalolu lon. Toxo b’é la xo í be í nila, bari í saninŋo le mu. ² Kuni! Barako dun í totuninŋo to, men be ŋinin xa sa, bawo ń man í la kewalolu tara dafanin ń na Ala ɲa xoto. ³ Wo to, í laxaranta men na, anin í xa men me, í hakilo lajigi wo kun. Wo mara, xa nimisi! Nin í man kuni, ń si na í xo sunŋo, x’a tara í man a lon ń be nala waxato men, x’é ju. ⁴ Bari haali wo, moxo dolu be í bata Sarade, mennu man i la faanolu noxo. Wolu nin nte si i taxama i ɲoxo fe, xa faanu xoyo tu i la, bawo i nin wo xa xan. ⁵ «Wo ɲa ma, men je sinŋo soto, faanu xoyimanŋo si dun wo xanna. Nte me a toxo bo nilamaya bukko xono. Nte si a fo ń Fa anin a la melekiyolu ɲala xo wo tigo mu nte ta le ti. ⁶ «Tulu be men ma, wo x’a lame, Ni Senunŋo be men fola Ala la jamalu ɲen!» ⁷ «A safe Filadelifi Ala la jama melekiyo ɲen xo: «Men mu Senumanŋo nin Tonɲatigo ti, mansaxe Dawuda la xundinŋo be men bulu, men si da yele moxo si me men taxun no, anin men si da taxun moxo si me men yele no, wo be men fola wo fele: ⁸ Nte x’é la kewalolu lon. Ń xa da do yele x’a bula í ɲa xoto, moxo me men taxun no, bawo barakendin doron ne be í la, anin bawo í xa ń na xumo mara, anin du í man í xaro nte toxo la. ⁹ A fele, ń be nala Sentane batusuwo moxo dolu dila í ma, wo fanolu mennu b’e fannu kenin Yahudiyalu ti, x’a tara i nte a ti: Ń si i diyakuwa i xa na ɲongi í xoto. I si a lon xo nte be í xanula. ¹⁰ X’a la a xan í xa nte la xumo mara timinadiya to, nte du si í mara tooro waxato, men be nala sila duniya moxolu bee ma, xa duguxulo xan moxolu xotobo. ¹¹ Dondin ń si na. Men be í bulu wo tomuta bete, walasa moxo si xana í la kunnawulijala muta í la. ¹² «Men je sinŋo soto, nte si wo tigo ke losinŋo ti ń na Ala la batusuba xono. A me bo je wo xo tugun. Nte si ń na Ala toxo safe wo tigo xan, xa ń na Ala la galluba toxo safe a xan, nin wo mu Yerusaleme kuto ti, men be bola sanŋo to, ń na Ala bata. Nte si ń toxo kuto du safe a xan. ¹³ «Tulu be men ma, wo x’a lame, Ni Senunŋo be men fola Ala la jamalu ɲen.» ¹⁴ «A safe Lawodise Ala la jama melekiyo ɲen xo: «Men toxo xo Amiini, Seede xantigo, anin Tonɲatigo, men mu Ala la dalo bee sabaabubaxo ti, wo be men fola wo fele: ¹⁵ Nte x’é la kewalolu lon: Í man suma, í man xandi. Nin í tun xa suma le, walla í xa xandi le, wo le tun xa fisa! ¹⁶ X’a la a xan í man xandi, í man suma, í be namarinin ne, ń be nala í foonola. ¹⁷ Í b’a fola xo: “Ń mu fentigo le ti, ń fentigiyata, fusi lafi nte ń na”. Í man a lon xo í mu bulutoxulunŋo nin ɲaanibaxato nin segebaxantunŋo nin fiyonto anin balamaxulunŋo le ti. ¹⁸ Wo le x’a tu, nte be í tonbenna xo í xa sano san nte ma, ta xa men janxo b’a to, walasa í xa fentigiya. Faanu xoyolu san nte ma x’e ke í ma, walasa í la balamaxulunɲa xana lon x’é maluya. Ɲadimin tulo san nte ma x’a ke í ɲalu to, walasa í ɲalu xa yele. ¹⁹ Nte be mennu xanula, nte si xuma wolu ɲen, x’e laxosi. Wo to, í balan í xa nimisi. ²⁰ A fele, ń be lonin da la x’a konkon; nin moxo do xa ń xumaxanŋo me xa da yele, ń si dun wo tigo bata, ń nin a si domolo ke, ate nin nte si domolo ke. ²¹ «Men je sinŋo soto, ń si wo tigi nin nte lasigi i ɲoxo fe, ń na mansasigilanŋo xan, í xo nte fan xa sinŋo soto ɲa men, ń nin ń Fa Ala xa sigi i ɲoxo fe, a la mansasigilanŋo xan. ²² «Tulu be men ma, wo x’a lame, Ni Senunŋo be men fola Ala la jamalu ɲen!»

¹ Wo tanbo xo, ń xa jeli xote ke: Ń xa da do yeleninŋo je sanxulo to. Ń tun xa xumaxan folo men me xumala ń ɲen, nin a be í xo buutu xanŋo, wo xo ń ɲen xo: «Yele jan, men be nala kela wo xofe, ń si wo yita í la.» ² Wo no bee to, Ni Senunŋo jigita nte to. A fele, mansasigilanŋo do tun be sanxulo to. Do tun be siginin wo mansasigilanŋo xan. ³ Men tun be siginin wo xan, wo tun keɲa be í xo kuru daxolenŋo dolu: Jasipekuro anin saraduwanekuro. Mansasigilanŋo tun be lamininnin Ala la fanŋo la, men tun be ŋelenxula í xo emerodekuro. ⁴ Mansasigilan muxan nin naani tun be wo mansasigilanŋo lamininnin. Moxoba muxan nin naani tunnu be siginin wo mansasigilanŋolu xan. Faanu xoyimanŋolu b’e ma. Mansakufune sanuma be i kunna. ⁵ Sanjimeɲenxolu nin xumaxanŋolu nin sanjifetenŋolu tunnu be bola mansasigilanŋo xan. Mooɲo mananin woorowula tunnu be mansasigilanŋo ɲafe: Wolu mu Ala Ni woorowulo lelu ti. ⁶ Mansasigilanŋo ɲafe tun be í xo xooxoji weerema, a be í xo kuro men be ŋelenxula. Fen nilama naani tunnu be mansasigilanŋo temo to anin a lamininŋo to. Wolu ɲafela nin i xofela bee faninŋo be ɲakesolu la. ⁷ Fen nilama folo be í xo waraba, fulananŋo be í xo tuurandinŋo, sabananŋo ɲada be í xo hadamadinŋo, naaninanŋo be í xo bonŋo baninŋo. ⁸ Danfatan wooro tun be wo fen nilama naano kilin wo kilin ma, mennu boxo bee nin i xoto be fanin ɲakesolu la. Suwo nin tilo, i nte fatala a fola xo: «Senumanŋo, senumanŋo, senumanŋo, Marigi Ala, Sinŋobeetigo, men tun be je, men be je, anin men be nala.» ⁹ Tuma wo tuma, nin fen nilama naano be donkilo lala xa mansasigilanŋo tosigibaxo tantu, x’a bunɲa anin xa barako la a ɲen, ate men be í nila fo abada, ¹⁰ wo tuma, moxoba muxan nin naano si i ɲongi mansasigilanŋo tosigibaxo xoto x’a batu, wo men be í nila fo abada. I si i la mansakufunolu fili mansasigilanŋo xoto x’a fo xo: ¹¹ «N Marigi nin n na Ala, í nin nooro nin bunɲa nin sintigiya xa xan; bawo ite le xa fenŋo bee da. A diyata í ɲen i xa ke je, wo to i data.»

¹ Ń xa bukke mininninŋo je mansasigilanŋo xan sigibaxo kininbulo to, a xo nin a ɲa be safenin. A be dataxunnin. Buluno woorowula be a xan. ² Ń xa meleke barakema do je, men tun be fetenxan x’a fo xo: «Jon nin a xa xan xa bulunolu bo je, xa bukke in dayele?» ³ Bari moxo si tun nte sanxulo to, anin duguxulo xan, anin duguxulo xoto, a sinŋo tun be men ɲen xa bukke in dayele, walla x’a mafele. ⁴ Nte tun be xasila bete, bawo moxo si man tara je men tun nin bukke in dayelelo xa xan walla x’a mafele. ⁵ Wo to, moxoba do xo ń ɲen xo: «Xana xasi. A mafele: Yuda xabiilo waraba, mansaxe Dawuda tobo xa sinŋo soto. A si buluno woorowulo bo je, xa bukko dayele.» ⁶ Ń xa Saaxandinŋo do je lonin mansasigilanŋo nin fen nilama naano nin moxobalu temo to. A tun be í xo a faxata. Biɲa woorowula tun b’a ma anin ɲakese woorowula, nin wolu mu Ala Ni woorowulo ti, mennu kita xa taxa duguxulo bee xan. ⁷ Saaxandinŋo x’é sodun xa bukko muta mansasigilanŋo tosigibaxo kininbulo to. ⁸ A xa bukko muta tumo men, fen nilama naano nin moxoba muxan nin naano x’e ɲongi Saaxandinŋo xoto. Kontinŋo be i bee bulu, anin sanu felinŋolu, mennu be fanin digico la, wo digico mu moxo senumanŋolu la Alamatara lelu ti. ⁹ I tunnu be donkili kuto laxan xo: «Í nin a xa xan xa bukko muta, x’a bulunolu bo je; bawo í faxata, í x’é jelo ke xa moxolu kunbo Ala ɲen, xa bo xabiilolu nin xanŋolu nin jamanolu nin siyalu bee to. ¹⁰ Í x’e ke mansaya, nin sadaxalasibaxolu ti, n na Ala ɲen. I si sigi mansaya la duguxulo kunna.» ¹¹ Wo xofe, ń xa meleke kiika xanme i be mansasigilanŋo nin fen nilama naano nin moxobalu lamininnin. Wolu jaate tun mu wulu tan wulu tanŋo lelu ti anin wulu wulolu. ¹² I tunnu b’a fola barako to xo: «Saaxandinŋo men faxata, wo nin sintigiya nin fentigiya nin hakilitigiya anin barako nin bunɲa nin nooro nin tantulo xa xan!» ¹³ Dafenŋo fen wo fen be sanxulo to, anin duguxulo xan, anin duguxulo xoto, anin xooxojiyo to, dafenŋolu bee, nte xa wolu me a fola xo: «Men be siginin mansasigilanŋo xan anin Saaxandinŋo, tantulo nin bunɲa nin nooro anin sintigiya be wolu ɲen fo abada!» ¹⁴ Fen nilama naano tunnu b’a fola xo: Amiini! Moxobalu x’e ɲongi xa batulo ke.

¹ Wo xo, ń xa Saaxandinŋo je, a xa bukko buluno woorowulolu to folo bo je. Ń xa fen nilama naanolu to kilin xanme í xo sanjifetenŋo, a xo: «Na!» ² Nte xa felelo ke, ń xa su xoyo do je. Xalo tun be a xan sigibaxo bulu. Mansakufuno do dita a ma. A sintigima le taxata walasa xa sinŋo soto tugun. ³ Saaxandinŋo xa buluno fulananŋo bo je tumo men, ń xa fen nilama fulananŋo xanme a fola xo: «Na!» ⁴ Wo to, suwo do xote bota, wulemanŋo le mu. Men tun b’a xan, sinŋo dita wo ma xa heero bee bo duguxulo xan, walasa moxolu x’e ɲoxo faxa. Fan janjamanŋo dita a ma. ⁵ Saaxandinŋo xa bukko buluno sabananŋo bo je tumo men, ń xa fen nilama sabananŋo xanme a fola xo: «Na!» Nte xa felelo ke, ń xa su finmanŋo do je. Men tun be siginin a xan, sumannikelanŋo le tun be wo bulu. ⁶ Ń xa xanŋo do me í xo xumaxanŋo, fen nilama naano temo to, a tun b’a foxan xo: «Alixaamo kilo kilin mu tili kilin baaro sara le ti. Ɲo kilo saba mu tili kilin baaro sara le ti. Bari í xana maxa tulo nin dolo la.» ⁷ Saaxandinŋo xa bukko buluno naaninanŋo bo je tumo men, ń xa fen nilama naaninanŋo xanme a fola xo: «Na!» ⁸ Ń xa felelo ke, ń xa su ɲugujilama do je. Men tun be a xan, wo toxo le xo Saya, lahara tun be a nofe. Duguxulo talaninŋo naani ti sinŋo dita i ma tala kilinŋo xan, walasa i xa moxolu faxa fanŋo nin xonxo nin foɲojangaro anin duguxulo xan wara jaxolu la. ⁹ Saaxandinŋo xa bukko buluno luulunanŋo bo je tumo men, nte xa moxolu niyolu je sadaxajanilanŋo xoto, mennu faxata Ala la xumo nofe, anin i xa seedeyalo men ke nofe. ¹⁰ I tunnu be kulela barako to xo: «Marigi senumanŋo, anin tonɲatigo, fo tuma joman í be tula í man kiito tege duguxulo moxolu xan, xa n jelo bonno julo sara?» ¹¹ Dorokeba xoyimanŋo dita i bee ma, anin a fota i ɲen xo i xa i ɲoɲo dondin haalisa, fo i baaradin toɲoxolu nin i badinŋolu moxo xa dafa tumo men, mennu xa xan xa faxa, í xo itelu fannu faxata ɲa men. ¹² Saaxandinŋo xa bukko buluno wooronanŋo bo je tumo men, ń x’a je xo duguxulu jarajaraba keta. Tilo finta í xo furuja faano, xaro muume wuleta í xo jelo. ¹³ Loololu butunta dugo ma xa bo sanŋo to, í xo foɲoba be turojuwo lamaxala ɲa men x’a din kerenŋolu labon. ¹⁴ Sanxulo sankota í xo bukke mininta be mininna ɲa men. Kurolu nin jisuttolu bee bota i nolu to. ¹⁵ Duguxulo mansaxelu nin fangatigolu nin sorodasi kuntigolu, nin naafulutigolu, nin baraketigolu anin moxo tolu bee, jonŋolu nin hoorolu, i bee x’e dugu kuruwuwolu xono anin kurolu to. ¹⁶ I x’a fo kurolu nin gojelu ɲen xo: «Alu boyi n to, xa n dugu mansasigilanŋo tosigibaxo ɲada ma anin Saaxandinŋo la diminŋo ma; ¹⁷ bawo i la diminŋo lunba sita. Jon si bo no a xono?»

¹ Wo xofe, ń xa meleke naani je, i be lonin duguxulo tonxon naano to. I tunnu be duguxulo foɲo naano mutanin, walasa foɲo si xana tege duguxulo nin xooxojiyo xan anin yiriju si xan. ² Nte xa meleke xote je, a be bola koton mafanŋo, Ala nilama la bulunokelanŋo b’a bulu. A fetenta meleke naano la, sinŋo tun dita mennu ma xa ku jaxo ke duguxulo nin xooxojiyo la, a xo: ³ «Alu xana kujaxu ke duguxulo nin xooxojiyo nin yirijuwolu la, jannin n be taagumanseedo kela n na Ala la jonŋolu foda la.» ⁴ Taagumanseedo keta moxo mennu foda la Banisirayila dinŋolu xabiilolu bee to, ń xa wolu jaate me xo: Wulu keme nin tan naani wulu nin wulu naani. ⁵ Yuda xabiilo la, taagumanseedo keta wulu tan nin fula la; Ruben xabiilo la, wulu tan nin fula; Gadi xabiilo la, wulu tan nin fula; ⁶ Asere xabiilo la, wulu tan nin fula; Nefutali xabiilo la, wulu tan nin fula; Manase xabiilo la, wulu tan nin fula; ⁷ Simeyon xabiilo la, wulu tan nin fula; Lewi xabiilo la, wulu tan nin fula; Isakari xabiilo la, wulu tan nin fula; ⁸ Sabulon xabiilo la, wulu tan nin fula; Yusufu xabiilo la, wulu tan nin fula; Bensamen xabiilo la, wulu tan nin fula, taagumanseedo keta mennu la. ⁹ Wo xofe, nte xa felelo ke xa jamaba je, moxo si tun me men jaate no. Wo moxolu mu siyalu bee nin xabiilolu bee nin jamanolu bee nin xanŋolu bee do moxo lelu ti. I tunnu be lonin mansasigilanŋo nin Saaxandinŋo ɲafe, dorokeba xoyolu b’e xanna, tamarabulolu b’e bulu. ¹⁰ I tunnu be fetenna barako to xo: «Kisilo mu n na Ala le ta ti, men be siginin mansasigilanŋo xan, anin Saaxandinŋo!» ¹¹ Melekiyolu bee tunnu be lonin xa mansasigilanŋo nin moxobalu anin fen nilama naano laminin. I x’e boyi i ɲadalu xan dugo ma, mansasigilanŋo ɲafe, xa Ala batu. ¹² I tunnu b’a fola xo: «Amiini! Tantulo nin nooro nin hakilitigiya nin barakebulo nin bunɲa nin sintigiya anin barako mu n na Ala le ta ti, fo abada! Amiini!» ¹³ Wo to, moxobalu do xa xumo ta x’a fo ń ɲen xo: «Dorokeba xoyo be mennu xanna, wolu mu jonnu ti, anin i be bola minto?» ¹⁴ Ń x’a jaabi xo: «Ń Marigi, ite le xa wo lon.» A xo ń ɲen xo: «Mennu bota tooroba xono, wo lelu mu. I x’e la dorokebalu ku x’e laxoyiya Saaxandinŋo jelo la. ¹⁵ Wo le x’a tu, i be lonin Ala la mansasigilanŋo ɲafe x’a batu su nin tili, a la batusuba xono. Mansasigilanŋo tosigibaxo si i lasawu a la tilliso xono. ¹⁶ Xonxo me i muta tugun, mindoxo me i muta tugun, tilo nin a funtano me i jani tugun, ¹⁷ bawo Saaxandinŋo men be mansasigilanŋo temo to, wo si ke i negaanibaxo ti, a si taxa i ti nilamaya jiyo bodulalu. Ala si ɲajiyo bee fita x’a bo i ɲalu la.»

¹ Saaxandinŋo xa buluno woorowulananŋo bo je tumo men, de keta sanxulo to xa leere tala ɲoxon ke. ² Wo xo, ń xa meleke woorowulo je, i be lonin Ala ɲa xoto. Buutu woorowula dita i ma. ³ Melekiyo do xote nata í lo sadaxajanilanŋo senbo to, siisilitegenen sanuma tun b’a bulu. Digico kiika dita a ma, walasa a xa wo nin moxo senumanŋolu bee la Alamataralu lasi i ɲoxo fe, sadaxajanilan sanuma xan, men be mansasigilanŋo ɲafe. ⁴ Digice siisiyo nin moxo senumanŋolu la Alamataralu yeleta i ɲoxo fe Ala ɲa xoto, xa bo melekiyo bulu. ⁵ Wo to, melekiyo xa siisilitegenenŋo ta x’a fa sadaxajanilanŋo ta la, x’a bon duguxulo xan. Wo no bee to, sanjifetenŋo nin xumaxanŋolu nin sanjimeɲenxolu nin duguxulu jarajaro keta. ⁶ Buutu woorowulo tunnu be meleke woorowulo mennu bulu, wolu x’e toben buutufo xanma. ⁷ Meleke folo x’a la buutuwo fo. Maramallekeso nin ta nin jelo ɲaxamininŋo bonta duguxulo xan. Duguxulo talaninŋo saba ti, tala kilinŋo janita, yirijuwolu dulu talaninŋo saba ti, tala kilinŋo janita anin bin kerenŋo bee. ⁸ Meleke fulananŋo x’a la buutuwo fo. A keta í xo nin í xa kuru belebeleba nin ta fili xooxojiyo to. Xooxojiyo talaninŋo saba ti, tala kilinŋo yelemata xa ke jelo ti. ⁹ Xooxojiyo dafen nilamalu talaninŋo saba ti, tala kilinŋo sata, batonŋolu talaninŋo saba ti, tala kilinŋo bee tiɲata. ¹⁰ Meleke sabananŋo x’a la buutuwo fo. Loolo belebeleba do butunta xa bo sanŋo to, a be manala í xo mooɲo. Bajiyolu talaninŋo saba ti, a butunta tala kilinŋo to anin jibodulalu to. ¹¹ Wo loolo toxo le xo: «Xuniya». Jiyolu talaninŋo saba ti, tala kilinŋo xuniyata, moxo kiika sata jiyolu la xuniya bulu. ¹² Meleke naaninanŋo x’a la buutuwo fo. Tilo nin xaro nin loololu talaninŋo saba ti, tala kilinŋo yellata. I talaninŋo saba ti, tala kilinŋo dibita. Tilo keneya talaninŋo saba ti, tala kilinŋo bota a la, suwo du keta ten. ¹³ Wo to, nte xa felelo ke, ń xa bonŋo do me a fola barako to, x’a tu banin sanjanba to xo: «Bone! Bone! Bone be duguxulo xan moxolu ɲen, nin meleke to sabo x’e la buutuwolu fo tumo men!»

¹ Meleke luulunanŋo x’a la buutuwo fo. Nte xa loolo do je, men butunta duguxulo xan xa bo sanŋo to. Dinxajironba danjebalo xolonŋo xundinŋo dita a ma. ² A xa dinxajironba danjebalo xolonŋo dayele. Siisiyo do bota non xono, men be í xo wureba siisiyo. Tilo nin foɲo finta wo siisiyo bulu. ³ Tonŋolu bota wo siisiyo to xa jenjen duguxulo xan. Sinŋo dita wolu ma, men nin duguxulo xan dondonkoɲelu ta bee xa xan. ⁴ A fota i ɲen x’e xana fusi ke duguxulo binŋo la, i xana fusi ke fen kerenŋolu la, i xana fen ke yiriju si la, fo moxolu doronnu, Ala la taagumanseedo nte mennu foda la. ⁵ I man yanmaru xa moxolu faxa, bari i yanmaruta le x’e ɲaaga xaru luulu xono. I la bunnida diminŋo be le í xo dondonkoɲe bunnida diminŋo. ⁶ Wo lunŋolu, moxolu si saya laŋinin, bari i me a soto. I si a ŋanne xa sa, bari saya si í bori i ma. ⁷ Wo tonŋolu tunnu be bonin suwolu fe, mennu be tobennin kelo xanma. Fen dolu be i kunna a be í xo mansakufune sanumalu. I ɲadalu be í xo hadamadinŋo ɲada. ⁸ I kunsinolu be í xo musu kunsinolu, i ɲinŋolu be í xo waraba ɲinŋolu. ⁹ I xaradalu be í xo negedoroko b’e ma, i danfatanŋolu mankanŋo be í xo su wuturu kiika taxato be keledula. ¹⁰ Xu sulenninŋolu b’e ma í xo dondonkoɲelu. Sinŋo tun be i xuwo lelu to xa diminŋo lasi moxolu ma xaru luulu xono. ¹¹ I la mansaxe mu dinxajironba danjebalo melekiyo le ti, men toxo heburuxanŋo to xo «Abadon», gerekixanŋo to xo «Apoliyon». Wo xoto xo «Halagilila». ¹² Bone folo tanbita, wo tanbo xo, bone fula xote fele nanin tugun. ¹³ Meleke wooronanŋo x’a la buutuwo fo. Ń xa xumaxanŋo do me, xa bo sadaxajanilan sanuma tulukunŋolu la, men be Ala ɲafe. ¹⁴ A tun b’a foxan meleke wooronanŋo ɲen, buutuwo tun be men bulu xo: «Meleke naano bula, mennu be sitinin joloxo la, ba belebeleba da la, xo Efarati.» ¹⁵ Wo meleke naano men tunnu be tobennin ɲin san in, nin ɲin xaru in, nin ɲin lun in, nin ɲin leere in xanma, wolu firinta, walasa moxolu talaninŋo saba ti, i xa tala kilinŋo faxa. ¹⁶ Keledinŋolu men tunnu be suwo xan, ń xa wolu jaate me xo: Miliyon keme fula. ¹⁷ Suwolu nin i yelenxanbaxolu nata nte ma ɲa men, ń na jelo xono, wo fele: Negedorokolu tunnu be i xarada ma, mennu be wulenin í xo ta, i be buloyanin í xo safirekuro, i be netemunguyanin í xo tinbiritiyo. Suwolu kunŋolu tunnu be le í xo waraba kunxulo, ta nin siisiyo nin tinbiritiyo tun be bola i da xono. ¹⁸ Duniya moxolu talaninŋo saba ti, tala kilinŋo faxata wo kasaare sabo fe, nin wolu mu ta nin siisiyo nin tinbiritiyo ti, men tunnu be bola suwolu da xono. ¹⁹ Suwolu barako be i da nin i xuwo lelu to. I xuwolu be í xo salu. Kunxulo be wo xuwolu ma, i si ku jaxo ke no mennu la. ²⁰ Men ken mu duniya moxo tolu ti, kasaaro man mennu faxa, wolu man nimisi i bulo la fen daraninŋolu la. I taxata ɲa xa jinnolu nin boli sanumalu, nin a xaalisixoyimalu, nin a silamalu, nin a kurumalu, nin a yirimalu batu, mennu me jeli ke no, i me meli ke no, i me i taxama no. ²¹ I man nimisi i la moxofaxolu nin i la suuya nin i la jadoya nin i la suuɲalolu la.

¹ Wo xo, ń xa meleke barakema do xote je, men tun be jigixan xa bo sanŋo to. Xabo tun be buurinin a ma, Ala la fanŋo b’a kunŋo la. A ɲada be í xo tilo, a sinŋolu be í xo losin tamalu. ² Bukke doxomandinŋo do dayeleninŋo tun be a bulu. A x’a kininbulu sinŋo lo xooxojiyo xan, x’a numanbulu sinŋo lo duguxulo xan. ³ A fetenta barako to í xo waraba be guutumela ɲa men. A fetenta tumo men, sanjifeten woorowulo xumaxanŋo meta. ⁴ Sanjifeten woorowulo xumata tumo men, nte tun b’a fe xa wo safe, bari ń xa xumaxanŋo do me xa bo sanŋo to xo: «Sanjifeten woorowulo xa men fo, wo gullo mara í xono, í xana a safe.» ⁵ Ń tun xa melekiyo men loninŋo je xooxojiyo nin duguxulo xan, wo x’a kininbulo xotota sanŋo la. ⁶ Men be í nila fo abada, a x’é xali wo toxo la, ate men xa sanxulo nin duguxulo nin xooxojiyo da, i nin i xan fenŋolu bee. Melekiyo xo: «Laxonoli nte kela bitugun! ⁷ Bari meleke woorowulananŋo je a la buutuwo fo damuta lunŋo mennu, wo to, Ala la gullo si dafa, í xo a tun x’a fo a la kilalu ɲen ɲa men, nin wolu mu a la jonŋolu ti.» ⁸ Wo xo, ń tun xa xumaxanŋo men me xa bo sanŋo to, wo xumata ń ɲen tugun ten xo: «Taxa bukke dayeleninŋo muta melekiyo la, men be lonin xooxojiyo nin duguxulo xan.» ⁹ Ń xa ń sodun melekiyo la x’a ŋinin a fe, xo a xa bukke doxomandinŋo di ń ma. A xo ń ɲen xo: «A muta í x’a domo. A si xuniya í xono, bari a si diya í da í xo liyo.» ¹⁰ Ń xa bukke doxomandinŋo muta melekiyo la x’a domo. A diyata ń da í xo liyo; bari ń x’a domo tumo men, a xuniyata ń xono. ¹¹ A fota ń ɲen xo: «Í xa xan xa kilaya ke tugun jamanolu nin siyalu nin xanŋolu nin mansaxe kiika la kuwo to.»

¹ Boguma dita nte ma a be í xo sumannikeguma. A fota ń ɲen xo: «Taxa Alabatusuba nin sadaxajanilanŋo suman anin mennu be batulo kela je. ² Bari í xa Alabatusuba lukeno tu je, í xana wo suman, bawo wo dita siya tolu ma, mennu si gallu senumanŋo toɲonxo, tan naani xaru anin xaru fula xono. ³ Ń si sinŋo di ń na seede fulo ma, i xa kilaya ke wulu nin keme fula nin tan wooro tili xono, xa caake faano tu i xanna.» ⁴ Seede fulo mu oliweju fulo nin lanpa fulo lelu ti, mennu be lonin duguxulotigi Marigi ɲafe. ⁵ Nin moxo do b’a fe xa ku jaxo ke i la, ta si bo i da xono x’e jaxolu jani. Nin moxo wo moxo b’a fe xa ku jaxo ke i la, waajibo le mu wo tigo xa sa ten. ⁶ Sinŋo be i ɲen xa sanxulo dataxun walasa sanji xana na i la kilaya lunŋolu. Sinŋo be i ɲen xa jiyolu yelema jelo ti, anin xa kasaaro kiika laboyi duguxulo xan, sinɲa jaate men je diya i ɲen. ⁷ Nin i la seedeyalo banta tumo men, wara jaxo men be yelela xa bo dinxajironba danjebalo xono, wo si i kele, x’e no, anin x’e faxa. ⁸ I furelu si tu wo galluba dakeno la. Xumaxotoma la, wo gallo si kili xo Sodome nin Misira, i Marigi gengenta yiro ma dula men. ⁹ Jamanolu nin xabiilolu nin xanŋolu nin siyalu bee moxo si na i furelu mafele tili saba nin tala xono. I me son moxolu x’e lasi. ¹⁰ Duguxulo xan moxolu si ɲaɲa i la kuwo la, x’e tulun, xa nilifenŋolu ki i ɲoxo ma, bawo wo kila fulo tunnu xa tooro kiika lasi hadamadinŋolu ma. ¹¹ Bari wo tili saba nin tala tanbo xo, nilamaya foɲo do bota Ala la, xa dun i to. I wulita x’e lo. Wo to, silanɲaba xa i mafelebaxolu muta. ¹² Kila fulo xa xumaxanba do me xa bo sanŋo to, wo x’a fo i ɲen xo: «Alu yele jan.» I yeleta sanŋo to, xabo to, x’e jaxolu ɲalu loninŋo tu i to. ¹³ Wo waxato fan, duguxulu jarajaraba keta, gallo talaninŋo tan ti, tala kilinŋo boyita, wulu woorowula moxo tuta wo kasaaro to. Moxo mennu kisita, silanɲaba xa wolu muta, i xa sanxulotigi Ala bunɲa. ¹⁴ Bone fulananŋo tanbita. Bone sabananŋo nato fele dondin. ¹⁵ Meleke woorowulananŋo x’a la buutuwo fo. Xumaxanbalu bota sanŋo to x’a fo xo: «Kabirin saasa, duniya mansaya mu n Marigi nin a la Kirisita ta le ti, a si tu mansaya la fo abada!» ¹⁶ Moxoba muxan nin naano mennu be siginin i la mansasigilanŋolu xan Ala ɲa xoto, wolu x’e boyi i ɲadalu xan dugo ma, xa Ala batu, ¹⁷ x’a fo xo: «Marigi Ala, Sinŋobeetigo, n be barako bulala í ɲen, ite men be je, anin ite men tun be je, í x’é la sintigiyaba ke, x’é la mansaya sigi. ¹⁸ Siyalu tunnu diminta, bari saasa ite la diminŋo nata. Furelu la kiito tege waxato sita. Waxato sita xa í la jonŋolu sara, nin wolu mu kilalu ti, anin i la moxo senumanŋolu nin í ɲasilanɲabaxolu, moxondin nin moxoba. Duguxulo tiɲabaxolu halagi tumo sita.» ¹⁹ Alabatusuba men be sanŋo to, wo dayeleta, Kafuxanŋo waxande jeta Alabatusuba xono. Sanjimeɲenxolu nin xumaxanŋolu nin sanjifetenŋolu nin duguxulu jarajaro keta. Maramallekese kunba du nata.

¹ Wo xo, taagumanseedeba do bota sanŋo to: Muso do fele tilo be buurinin a ma, xaro be a sinŋolu xoto, loolo tan nin fula mansakufunema b’a kunna. ² A xonoma le tun mu, tinŋo diminŋo tun b’a bulaxan kulela. ³ Wo xo, taagumanseede xote bota sanŋo to: Samaane wulenŋo do fele, kunxulu woorowula b’a ma anin biɲa tan. Mansakufuno tun be wo kunŋolu kilin wo kilin na. ⁴ Sanxulo loololu talaninŋo saba ti, a xuwo tun be i tala kilinŋo fitaxan x’e labutun duguxulo xan. Samaano x’é lo muso ɲa xoto, men tun je na wulu, walasa x’a dinŋo domo a wuluwo xo. ⁵ A xa dinxe wulu, men si siyalu bee mara negeguma la. A dinŋo tata xa taxa a ti Ala nin a la mansasigilanŋo senbo to. ⁶ Wo to, muso x’é bori xa taxa wulafuxo xono, Ala tun xa dula do toben a ɲen jan men, walasa a xa labalu je tili wulu nin keme fula nin tan wooro xono. ⁷ Wo to, kelo keta sanŋo to. Minkayilo nin a la melekiyolu xa samaano kele. Samaano du nin a la melekiyolu xa kelo ke. ⁸ Bari samaano manota, i man dula soto sanŋo to tugun. ⁹ Samaano filita keno ma. Ate le mu sa xoto ti, men be kilila xo jinnolu la kuntigo nin Sentane anin duniya bee lafilibaxo. A filita duguxulo xan, a nin a la melekiyolu. ¹⁰ Wo xo, ń xa xumaxanba do me xa bo sanŋo to, men tun b’a fola xo: «Kisilo waxato fele! N na Ala la sintigiya nin a la Mansaya sita saasa, anin a la Kirisita la fangatigiya. Bawo n badinŋolu jalagibaxo filita keno ma, ate men tun be i jalagila n na Ala ɲen suwo nin tilo. ¹¹ N badinŋolu x’a mano Saaxandinŋo jelo barako to, anin i xa xumo men seedeya wo barako to. I bota i niyo la fo i tunnu nte silala saya ɲa. ¹² Wo le x’a tu, sanxulo nin a xono sigibaxolu, alu ɲaxali! Bari duguxulo nin xooxojiyo, bone be alu ɲen, bawo Sentane jigita taxanin alu ma, a diminninba, bawo a x’a lon xo waxatindin ne tuta a ɲen xo.» ¹³ Samaano x’a je tumo men xo a filita duguxulo xan, a x’a lo muso nofe, men tun xa dinxe wulu. ¹⁴ Bari bonba danfatan fula dita muso ma, walasa a x’é ba fo wula fuxo xono, a la dula, dula men bulaninŋo be a labalulo xanma, x’a tu tejanɲanin sa la, sanji saba nin tala xono. ¹⁵ Wo to, sa xa jiba sari xa bo a da xono, men be í xo bajiyo, taxanin muso ma, walasa a xa taxa jiwoyo fe. ¹⁶ Bari duguxulo xa muso deema: Duguxulo x’a da yele xa bajiyo min, samaano xa men sari xa bo a da xono. ¹⁷ Xa samaano diminninba tu muso xanma, a taxata wo bonsonŋo to kele, mennu be Ala la sariyalu labatula, anin mennu be Isa la seedeya marala. ¹⁸ Wo xo, a x’é lo xooxojida la keɲo xan.

¹ Wo xo, ń xa wara jaxo do je bola xooxojiyo to. Biɲa tan tun b’a ma, anin kunxulu woorowula. Mansakufuno tun be wo biɲolu do wo do la, Ala toxotiɲatoxolu be safenin wo kunxulolu bee xan. ² Nte xa waro men je, wo be le í xo maanoxo, a sinŋolu be í xo urusi waro sinŋolu, a da be í xo waraba da. Samaano x’a la sintigiya nin a la mansasigilanŋo nin fangaba di a ma. ³ Wara jaxu in kunxulu kilin tun be jooginin x’a ke í xo a je sa le. Bari wo joogida men tun be a faxala, wo kendeyata. Duguxulo moxolu bee kawakuyata x’a lo wo waro nofe. ⁴ Moxolu bee keta a ma xa samaano batu, bawo a tun xa fango di wara jaxu in ma. Bee xa wara jaxu in du batu x’a fo xo: «Waro ɲoxon be min? Jon s’a kele no?» ⁵ Da dita wara jaxo ma a xa wasubaxanteya xumolu nin toxotiɲaxumolu fo Ala ma. Fango dita a ma xa kuwolu ke tan naani xaru anin xaru fula xono. ⁶ A keta a ma xa xuma jaxo fo Ala ma, x’a toxo tiɲa, x’a la bun senumanŋo toxo tiɲa, anin mennu be siginin sanxulo to. ⁷ Yanmaruya dita a ma a xa moxo senumanŋolu kele, x’e no. Fango dita a ma xabiilolu nin jamanolu nin xanŋolu nin siyalu bee xan. ⁸ Duguxulo xan moxolu bee si a batu. Fen wo fen toxo man safe kabirin duniya da tumo, Saaxandinŋo men faxata wo la nilamaya bukko xono, wo lelu bee be wara jaxu in batula. ⁹ «Tulu be men ma, wo xa lamelo ke! ¹⁰ Nin do xa xan xa bula kaso la, wo tigo si taxa kaso la, nin do xa xan xa faxa fanŋo la, wo tigo si faxa fanŋo la. Wo le x’a tu, moxo senumanŋolu xa xan x’e timinadiya xa tu lannaya to.» ¹¹ Wo xo, ń xa wara jaxu xote je, men tun be bola duguxulo xoto. Biɲa fula tun b’a ma, mennu be í xo saaxandinŋo do biɲolu. A tun be xumala í xo samaano. ¹² A tun be wara folo la fango bee labaaraxan a ɲa xoto. A xa duguxulo nin a moxolu diyakuwa i xa wara folo batu, wo men na joogilida tun b’a faxala, bari a kendeyata. ¹³ Ɲin wara fulanan in tun be kawakubalu kela, fo a tun be ta lajigixan duguxulo xan xa bo sanŋo to moxo bee ɲala. ¹⁴ A xa duguxulo xan moxolu lafili kawakuwolu la, fango dita a ma xa mennu ke wara in ɲa xoto. Waro men tun joogita fanŋo la, nin a kendeyata, wara fulananŋo tun be i bulala wo waro ɲoxonŋo darala. ¹⁵ Wara fulanan in xa fango soto xa niyo ke wara folo ɲoxonŋo daraninŋo to, walasa a xa sin xa xuma, anin xa moxo bee bula faxala, moxo fen wo fen je í ban x’a batu. ¹⁶ Wara fulanan in tun be hadamadinŋolu bee diyakuwala, moxondin nin moxoba, fentigi nin segebaxantun, jon nin hooro, taagumanseedo do xa ke i kininbulo to, walla i foda la. ¹⁷ Moxo si me sanni ke no, walla fiiri ke no nin wo taagumanseedo nte a la, nin wo mu waro toxo ti, walla a toxo jaate la. ¹⁸ Hakilitigiya be ŋininna jan. Moxo men mu hakilitigo ti, wo tigo xa waro toxo xoto fo jaate la, bawo wo jaate be bennin moxo jaate do le ma. Wo jaate mu keme wooro nin tan wooro nin wooro le ti.

¹ Wo xo, nte xa felelo ke: Ń xa Saaxandinŋo loninŋo je Siyon kuro xan, a nin wulu keme nin tan naani wulu nin wulu naani moxo. Ate toxo nin a Fa toxo tun be safenin wo moxolu bee foda la. ² Ń xa xumaxanŋo do me bola sanŋo to. A be í xo jiba sonxoxanŋo, a be í xo sanjifetenxanba. Ń tun xa xumaxanŋo men me, wo be le í xo kontinfolalu la kontinfoxanŋo. ³ Wo moxolu be donkili kuto do ma x’a la mansasigilanŋo ɲafe, anin fen nilama naano nin moxobalu ɲafe. Moxo si xote tun me wo donkilo digi no, nin wo wulu keme nin tan naani wulo nin wulu naano moxolu doronnu nte, mennu kunbota duguxulo xan. ⁴ Wolu man i fannu noxo musulu fe, bawo musulonbalo lelu mu. Saaxandinŋo je taxa dula wo dula, i si a lo a nofe. I kunbota moxolu to. I mu Ala nin Saaxandinŋo la fensotota folo lelu ti. ⁵ Faniya man soto i da. Jalagibalo lelu mu. ⁶ Wo xo, ń xa meleke xote je men tun be í baxan fo sanjanba to. Badabanŋo xibaru Dimanŋo tun b’a bulu x’a fo duguxulo xan moxolu ɲen, siyalu nin xabiilolu nin xanŋolu, anin jamanolu bee ɲen. ⁷ A tun b’a fola xanba to xo: «Alu sila Ala ɲa, x’a bunɲa, bawo a la kiito tege waxato sita moxolu xan. Alu sanxulo nin duguxulo nin xooxojiyo nin jibodulalu dabaxo batu.» ⁸ Meleke fulananŋo do x’a lo folo nofe, x’a fo xo: «Galluba Babilone boyita, a boyita! A xa siyalu bee lamin a la jadoya jaxo dolo la.» ⁹ Meleke sabananŋo x’a lo fula folo nofe, x’a fo xanba to xo: «Moxo wo moxo be wara jaxo nin a ɲoxonŋo daraninŋo batula, anin x’a taagumanseedo soto í foda la, walla í bulo to, ¹⁰ wo tigo du si Ala la diminba doloma min, men ɲaxamibalo yelemata a la diminŋo felinŋo xono. A si ɲaaga ta anin tinbiritiyo to, meleke senumanŋolu nin Saaxandinŋo ɲa xoto. ¹¹ I la ɲaaga siisiyo si wuli fo abada. Mennu be wara jaxu in nin a ɲoxonŋo daraninŋo batula, anin a toxo taagumanseedo be moxo mennu xan, wolu me lafiya soto su fara tili xan.» ¹² Wo le x’a tu, moxo senumanŋolu xa xan x’e timinadiya, mennu be Ala la sariyalu labatula anin mennu be lannaya marala Isa la. ¹³ Wo xo, ń xa xumaxanŋo do me xa bo sanŋo to xo: «Ɲin safe: “Moxo mennu be sala x’e tu Marigi la kafuɲoxoya xono kabirin saasa, heero be wolu ɲen!” Ni Senunŋo xo: “Iyo, tonɲa le mu, i s’i tofoɲo i la baarolu la bawo i la kuɲumalu be i nofe!” » ¹⁴ Ń xa felelo ke tugun, ń xa xaba xoyimanŋo do je, do be siginin wo xabo xan a be í xo hadamadinŋo. Mansakufune sanuma b’a kunna, woroto da dimanŋo b’a bulu. ¹⁵ Wo xo, meleke xote bota Alabatusuba xono, xa feten barako to xabo xan sigibaxo la xo: «Í la woroto lajigi xa tegelo ke. Senefennadara waxato sita, bawo duguxulo senefenŋolu mota!» ¹⁶ Wo to, men tun be siginin xabo xan, wo x’a la woroto lataxa duguxulo xan, duguxulo senefenŋolu ladarata. ¹⁷ Meleke xote bota sanxulo Alabatusuba xono, woroto da dimanŋo be a du bulu. ¹⁸ Wo xo, melekiyo do xote bota sadaxajanilanŋo dula. Fango tun be wo bulu ta xan. A fetenta barako to fan dadimantigo la xo: «Í la woroto da dimanŋo lajigi xa duguxulo resenjuwo sunjiyolu tege, bawo a resendinŋolu mota.» ¹⁹ Melekiyo x’a la woroto lataxa duguxulo xan, a xa duguxulo resenjuwo sunjiyolu tege, x’e fili Ala la diminŋo dinxaba xono, men be í xo resenjibodinxaba. ²⁰ I xa resendinŋolu toɲonxo resenjibodinxo xono, gallo xofe. Jelo bota resenjibodinxo xono xa yele fo xa si suwolu xarabe haxxo ma, xa woyo kilometere keme saba ɲoxon xan.

¹ Wo xo, ń xa taagumanseede xote je sanŋo to, a xa bun, dabariban kuwo le du mu: Tooroku woorowula tunnu be meleke woorowula bulu. Wo tunnu mu labanŋo lelu ti, bawo wo lelu be Ala la diminŋo dafala. ² Wo xo, ń xa men je, wo be í xo xooxoji weerema nin ta ɲaxamininŋo. Moxo mennu xa sinŋo soto wara jaxo nin a ɲoxonŋo daraninŋo anin a toxo jaatema xan, wolu tunnu loninŋo be xooxoji weerema xan. Ala tun xa kontinŋo mennu di i ma, wolu tunnu be i bulu. ³ I tunnu be Ala la jonxe Musa la tantuli donkilo lala anin Saaxandinŋo la donkilo xo: «Marigi Ala, Sinŋobeetigo, í la ku keninŋolu bee xa bun, kawakuwo lelu mu! Siyalu la Mansaxe, í la silolu bee be tilinnin anin wolu mu tonɲa le ti! ⁴ Marigi, jon si ke nin a man sila í ɲa? Jon si í ban í toxo bunɲala? Bawo ite kilinpe le xa senu. Siyalu bee si na í batu, katugala í la ku tilinninŋolu yitata keno xan i bee la.» ⁵ Wo xofe, ń xa Alabatusuba dayeleto je sanŋo to, nin wo mu seedeya Alabatusuba tillisima ti. ⁶ Tooroku woorowulo tunnu be meleke woorowulo mennu bulu, wolu bota Alabatusuba xono. Lenfaanu ɲuma ŋelenxuninŋolu tunnu b’e xanna, sanu tetositilanŋo be baratunin i xaro to. ⁷ Fen nilama naanolu to kilin xa sanu felin woorowula di meleke woorowulo ma. Wo felinŋolu tunnu be fanin Ala la diminŋo la, ate men be í nila fo abada. ⁸ Alabatusuba fata siisiyo la, Ala la nooro anin a la sintigiya xanma. Moxo si tun me dun no Alabatusuba xono fo meleke woorowulo la tooro woorowulo xa ke xa dafa tumo men.

¹ Wo xo, ń xa xumaxanba do me, men bota Alabatusuba xono. Wo tun b’a fola meleke woorowulo ɲen xo: «Alu taxa Ala la diminŋo felinfa woorowulo bon duguxulo xan!» ² Meleke folo taxata x’a la felinŋo xono fenŋo bon duguxulo xan. Wo to, wara jaxo taagumanseedo tun be moxo wo moxo xan anin men tunnu b’a ɲoxonŋo daraninŋo batula, da jaxolu bota wolu bee ma x’e tooro bete. ³ Meleke fulananŋo x’a la felinŋo xono fenŋo bon xooxojiyo to. Xooxojiyo bee keta jelo ti, í xo moxo faxaninŋo jelo. Nilamafenŋo fen wo fen be xooxojiyo to, a bee sata. ⁴ Meleke sabananŋo x’a la felinŋo xono fenŋo bon bajiyolu nin jibodulalu xan, wolu bee keta jelo ti. ⁵ Melekiyo men be jiyolu kunna, ń xa wo xanme a fola xo: «Í be tilinnin, ite men be je, anin ite men tun be je, ite men mu Senumanŋo ti, katugala í xa í la tilinninɲa yita xa kiito tege ten. ⁶ Moxolu xa í la moxo senumanŋolu nin kilalu jelo bon, saasa í xa jelo di i ma i x’a min. I nin wo le xa xan!» ⁷ Wo xo, ń xa xumaxanŋo do me, xa bo sadaxajanilanŋo dula xo: «Iyo, Marigi Ala, Sinŋobeetigo, í la kiitolu mu tonɲa lelu ti, anin i be tilinnin!» ⁸ Meleke naaninanŋo x’a la felinŋo xono fenŋo bon tilo xan. Fango dita wo ma a xa moxolu jani a la ta la. ⁹ Funtaniba xa moxolu jani. I xa Ala toxo tiɲa, sinŋo be wo men bulu wo toorokuwolu xan. Bari i man nimisi xa Ala bunɲa. ¹⁰ Meleke luulunanŋo x’a la felinŋo xono fenŋo bon wara jaxo la mansasigilanŋo xan. A la mansaya dula bee bulata dibo to. Diminŋo men tun be moxolu xan, wo x’e bula i nenŋolu kinna. ¹¹ I xa sanxulo Ala toxo tiɲa, i la diminŋolu nin i la da jaxolu la kuwo xanma. Bari i man nimisi i la kewalolu la. ¹² Meleke wooronanŋo x’a la felinŋo xono fenŋo bon bajiba Efarati xan. Wo bajiyo jata, walasa mansaxe mennu be bola koton, silo xa toben wolu ɲen. ¹³ Wo xo, ń xa ni jaxu saba je, mennu be í xo serantotolu, men tunnu be bola samaano nin wara jaxo nin kila fano da xono. ¹⁴ Wo niyolu mu jinnolu niyo lelu ti. I be kawakuwolu kela anin i be taxala duniya mansaxelu bee bata, walasa x’e kamari kelo xanma, men be nala kela Sinŋobeetigi Ala la lunba lunŋo. ¹⁵ Marigi xo: «A fele, ń be nala í xo sunŋo! Moxo men je tu í ɲala, x’a la faanolu mara, walasa a balamaxulunŋo xana í taxama, x’a maluya yita, heero be wo tigo ɲen.» ¹⁶ Jinnolu xa mansaxelu kamari dula do, men be kilila heburuxanŋo to xo «Haramagedon.» ¹⁷ Meleke woorowulananŋo x’a la felinŋo xono fenŋo bon foɲo fe. Xumaxanba do meta Alabatusuba xono, wo bota mansasigilanŋo xan x’a fo xo: «A keta xa ban.» ¹⁸ Wo to, sanjimeɲenxolu nin xumaxanŋolu nin sanjifetenŋolu keta, anin duguxulu jarajaraba, men ɲoxon bada man ke kabirin hadamadinŋo sigita duguxulo xan. ¹⁹ Galluba teta xa tala saba ti. Siyalu bee la gallubalu boyita. Ala man ŋina galluba Babilone kun. A x’a lamin a la felinŋo xono dolo la, nin wo mu a la diminba ti. ²⁰ Jisuttolu bee sankota, kurolu man je tugun. ²¹ Maramallekese xulinbalu, mennu kilin wo kilin si kilo tan naani ɲoxon bo, wolu jigita moxolu xan xa bo sanŋo to. Moxolu xa Ala toxo tiɲa maramallo toorokuwo bulu, bawo wo toorokuwo tun xa jaxu fo xa danmatanbi.

¹ Wo to, felin woorowulo tunnu be meleke woorowulo mennu bulu, wolu to kilin x’é sodun x’a fo ń ɲen xo: «Na, jadomusuba men be siginin xooxojiyolu senbo to, ń si wo la kiito kuwo yita í la. ² Duguxulo mansaxelu nin a xa jadoya ke. Duguxulo xan moxolu nin a xa jadoya ke x’e su a to, a be í xo moxo x’é su dolo la.» ³ Melekiyo taxata ń nima ti fuxo do la. Ń xa muso do je non, a be siginin wara jaxu wulemanŋo do xan. Ala toxotiɲatoxolu be safenin wo waro dula bee xan. Kunxulu woorowula anin biɲa tan ne be wo waro ma. ⁴ Faanu wulen daxolenŋolu tunnu be muso ma, anin sanu maɲarolu nin kuru daxolenŋolu anin xononŋolu. Sanufelinŋo do tun b’a bulo to, men be fanin ku haramuninŋolu nin a la jadoya ku noxoninŋolu la. ⁵ Toxo do be safenin a foda la, men mu gullo ti: «Babiloneba, jadolu nin duguxulo ku haramuninŋolu wuluna.» ⁶ Nte xa wo muso suninŋo je moxo senumanŋolu jelo la, anin Isa seedolu jelo la. Nte x’a je tumo men, ń dabaro bee le banta. ⁷ Wo to, melekiyo xo ń ɲen xo: «Mun x’é dabaro ban? Ń si gullo fo í ɲen, muso mu men ti, anin a be wara jaxu kunxulu woorowulatigo nin biɲa tantigo men xan. ⁸ Í xa wara jaxo men je, a tun be je, bari a nte je tugun. A si yele xa bo dinxajironba danjebalo xono, xa taxa halagi. Duguxulo xan moxo mennu toxo man safe nilamaya bukko xono kabirin duniya da tumo, wolu dabaro si ban nin i xa wara in je, bawo a tun be je, a nte je tugun, bari a si na tugun. ⁹ «Lonŋo nin hakilitigiya le be ŋininnin jan. Kunxulu woorowulo mu kuru woorowula lelu ti, muso be siginin mennu xan. Mansaxe woorowula le dulu mu. ¹⁰ Luulu boyita i to, wooronanŋo be mansaya la saasa, woorowulananŋo man na folo. Nin a nata, a be waxatindin doron ne kela. ¹¹ Wara jaxo men tun be je, nin a nte je tugun, wo fan mu mansaxe saginanŋo le ti. Ate mu wo woorowulolu to kilin ne ti, a be taxala halagilo dula. ¹² «Í xa biɲa tanŋo mennu je, wolu mu mansaxe tan ne ti, mennu man sigi mansaya la folo. Bari i si fango soto i nin waro, xa mansaya ke i ɲoxo fe leere kilin xono. ¹³ Miiriya kilin ne be wo mansaxe tanŋo la, nin wo mu ɲin ti: X’e la sintigiya nin i la fango di waro ma. ¹⁴ I si Saaxandinŋo kele. Bari Saaxandinŋo le be sinŋo sotola i xan, bawo ate mu marigolu Marigi le ti, anin mansaxelu la Mansaxe. Ate nin a la moxo kilininŋolu nin sugandininŋolu nin a la xantigolu si sinŋo soto i xan.» ¹⁵ Melekiyo xo ń ɲen tugun xo: «Í xa jiyo mennu je, nin jadomuso be siginin i xan, wolu mu jamanolu nin jamalu nin siyalu anin xanŋolu do lelu ti. ¹⁶ Í xa biɲa tanŋo mennu je, wolu nin wara jaxo si jadomuso jaxuya. I s’a bulufenŋolu bee muta a la, x’a balamaxulunŋo bula. I si a subo domo x’a to jani ta la. ¹⁷ Katugala Ala x’a sago kelo dun i jusukunŋo la. I bee si ben a to x’e la mansaya fango bula waro la baaro la, fo Ala la xuma foninŋolu xa dafa. ¹⁸ «Í xa muso men je, wo mu galluba le ti, men be siginin duguxulo xan mansaxelu kunna.»

¹ Wo xofe, ń xa meleke xote jigito je xa bo sanŋo to. Fangaba tun b’a bulu. Duguxulo keneyata a nooro bulu. ² A fetenta barako to xo: «Galluba Babilone boyita, a boyita! A keta jinnolu sigidula ti, a keta jinne noxoninŋolu bee dugudula ti, a keta xono noxoninŋolu nin xono ɲaxunninŋolu bee dugudula ti. ³ Duguxulo siyalu bee x’e min a la jadoya jaxo dolo la. Duguxulo mansaxelu xa jadoya ke a fe. Duguxulo fiirikelalu fentigiyata a la fen ɲumalu siya xanma.» ⁴ Wo xo, ń xa xumaxanŋo do xote me xa bo sanŋo to xo: «Nte la moxolu, alu bo Babilone, walasa alu nin a xana kafu a la junubolu to, anin xa do soto a la toorokuwolu to. ⁵ Bawo a la junubolu siyata fo xa si sanxulo ma, anin Ala hakilo jigita a la tilinbaliyakuwolu kun. ⁶ A xa men ke tolu la, alu wo ɲoxon ke a du la. Alu a sara a la ku keninŋolu ɲoxon fula la. A xa moxolu lamin minfenŋo men na, alu a la minnilanŋo lafa minfen na, men xa fati wo ti í xo fula. ⁷ A xa fanbunɲa nin fen ɲuma kiika mennu di a fan ma, alu wo ɲoxon tooro nin bone lasi a ma. Bawo a b’a fola a xonoto xo: “Ń be siginin jan í xo mansamuso, ń nte musu ti men xe sata, saya jusuxaso me nte soto abada.” ⁸ Wo le x’a tu, toorokuwo mennu lategeta a ɲen, wolu bee si boyi a xan tili kilin xono: Foɲojangaro, saya jusuxaso, xonxo, ta si a jani xeru. Bawo Marigi Ala men x’a la kiito tege, wo mu baraketigo le ti.» ⁹ Wo to, duguxulo mansaxelu mennu nin a kafuta a la jadoya nin a la fen ɲuma kiika la, wolu si xasi xa xuure, nin i x’a janisiisiyo je wulila. ¹⁰ I s’i tu dulajan a la tooro ɲasilanɲa xanma x’a fo xo: «Bone! Bone! E galluba, Babilone, galluba barakema! Leere kilin doron x’a bo xa í la kiito tege!» ¹¹ Duniya jaagukelalu be xunbola, anin x’a saya xasi, bawo moxo si nte i la fiirifenŋolu sanxan bitugun: ¹² Sano, xaalisixoyo, kuru daxolenŋolu, xononkese daxolenŋolu nin lenfaanu ɲumalu nin faanu wuleman daxolenŋolu, nin suwafaanolu, a nin yiri xasa dimanŋolu, anin fenŋo mennu darata samaɲinŋo la, anin yiri daxolenŋolu, nin silo nin nego anin kuru beto men be kilila xo maraburu. ¹³ Nafen mungu sumadimanŋo do, men be kilila xo kaneli, anin wo ɲoxon sifa xotelu bee, latikolonŋolu, mire sumadiyalanŋolu, digicolu, dolo nin tulo nin farinmungo, nin ɲo, nin ɲinsolu, nin saaxolu, suwolu, nin suwuturolu, jonŋolu, nin moxo santalu. ¹⁴ A si fo xo: «Í niyo tun be fenŋo mennu xan, wolu taxata x’e soobo í la. Fen wo fen mu naafulo nin fen beto ti, wo bee sankota í ma. Í me wolu soto tugun.» ¹⁵ Jaagukela mennu fentigiyata x’e tu jaago la wo galluba xono, wolu s’i lo dulajan a la tooro ɲasilanɲa xanma. I si xunbo, x’é saya xasi; ¹⁶ i s’a fo xo: «Bone! Bone! Galluba men, nin lenfaano nin faanu wuleman daxolenŋolu b’a ma, men be maɲaranin sano nin kuru daxolenŋolu anin xononkese daxolenŋolu la, ¹⁷ leere kilin doron ne x’a bo xa wo naafuluba bee tiɲa!» Batonnaborilalu nin batonxonomoxolu, xooxojixan baarakelalu anin mennu be i baluwo sotola xa bo xooxojiyo to, wolu bee tunnu be lonin dulajan. ¹⁸ I xa wo galluba janisiisiyo je tumo men, i kuleta xo: «Gallu joman si ɲin galluba in bo?» ¹⁹ I tunnu b’a ma xa buruxallo sari i fannu kunŋo to, i be xunbola, anin x’é fure xasi xo: «Bone! Bone! Galluba men na naafulo xa xooxojixan batontigolu bee fentigiya, leere kilin doron ne x’a bo xa wo galluba tiɲa.» ²⁰ Sanxulo, ɲaɲa a tiɲa la! Alu dulu, moxo senumanŋolu nin kiladinŋolu nin kilalu, alu ɲaɲa, bawo Ala xa kiito tege a xan, x’alu ta sara. ²¹ Wo to, meleke barakema do xa kuro do ta, men be í xo silikuru xulimanba, x’a fili xooxojiyo to, x’a fo xo: «Galluba Babilone du be nala tala x’a fili barako la ten ne. A me je tugun. ²² Kontinfoxan nin donkililaxan nin fulefoxan anin buutufoxanŋo me me í bata tugun. Bululabaarakela si me tara í bata tugun. Silixan si me me í bata tugun. ²³ Lanpo keneya me bo í bata tugun. Maaɲoxe nin maaɲo xanŋo me me í bata tugun, bawo í la jaagukelalu tun nelu ɲoxonnu nte duguxulo xan. Í la suuyakuwolu xa siyalu bee lafili.» ²⁴ Kilalu nin moxo senumanŋolu faxali jelo jeta Babilone le, anin moxo mennu bee faxata duguxulo xan.

¹ Wo xo, ń xa men me xa bo sanŋo to, wo be le í xo jamaba mankanŋo. A tun b’a foxan xo: «Aleluya! Kisilo nin nooro nin sintigiya mu n na Ala le ta ti. ² Bawo tonɲa nin tilinninɲa b’a la kiitolu xono. A xa kiito tege jadomusuba xan, men tun be duguxulo noxola a la jadoya la. A x’a la jonŋolu faxalo julo sara a ma.» ³ I xo tugun xo: «Aleluya! A janisiisiyo be wulila fo abada.» ⁴ Moxoba muxan nin naano anin fen nilama naano x’e ɲongi xa Ala batu, men be siginin mansasigilanŋo xan, i xo: «Amiini! Aleluya!» ⁵ Wo to, xumaxanŋo do bota mansasigilanŋo xan xo: «Alu n na Ala tantu, ate mennu bee mu a la jonŋolu ti, ate mennu be silala a ɲa, moxondin nin moxoba!» ⁶ Wo xo, ń xa men me, wo be le í xo jamaba mankanŋo, a be í xo jiba sonxoxanŋo, a be í xo sanjifetenxanbalu. I tunnu b’a foxan xo: «Aleluya! Bawo Marigi, n na Ala, Sinŋobeetigo x’a la Mansaya sigi. ⁷ Alan xa ɲaɲa, xa ɲaxali anin x’a bunɲa, bawo Saaxandinŋo la maaɲoya sininŋo fele. A musu x’é toben. ⁸ Lenfaanu ɲuma ŋelenxuninŋo dita a ma a x’a dun.» Wo lenfaano mu moxo senumanŋolu la kewale tilinninŋo lelu ti. ⁹ Melekiyo xo ń ɲen xo: «A safe! Mennu kilita Saaxandinŋo la maaɲoya domolo ma, heero be wolu ɲen!» A xo du xo: «Ala la xumo fan ne mu ɲinnu ti.» ¹⁰ Nte xa ń boyi a sinŋolu xoto xo ń b’a batula, bari a xo ń ɲen xo: «Í xana wo ke! Nte mu baarakedinŋo le ti í xo ite nin í badin tolu, mennu be Isa la seedeya marala. Í xa xan xa Ala le batu!» Isa xa tonɲa men yita, wo le be barako dila kilalu ma xa kilaya ke. ¹¹ Wo xo, ń xa sanxulo dayeleninŋo je. Su xoyo do bota. A xan sigibaxo toxo xo Xankilintigo anin Tonɲatigo. A be kiito nin kelo kela tilinninɲa la. ¹² A ɲa tunnu be manala í xo tamano, mansakufuno kiika tun be a kunna. Toxo do tun be safenin a xan, moxo man men lon nin a kilin nte. ¹³ Doroko do tun be a xanna, men bulata jelo to. A toxo xo: «Ala la Xumo». ¹⁴ Sanxulo kelebulolu tunnu b’a nofe, x’e tu su xoyolu xan, lenfaanu xoyiman ɲumalu be i xanna. ¹⁵ Fan da dimanŋo be bola a da xono, wo be kela xa siyalu busa. A si i mara negeguma la, xa resendolodaradinxo toɲonxo, wo resendolo mu Ala, Sinŋobeetigo la diminba le ti. ¹⁶ Toxo do tun be safenin a la doroko nin a wuto xan xo: «Mansaxelu la Mansaxe anin marigolu Marigi». ¹⁷ Wo xo, ń xa melekiyo do je lonin tilo xono to. A fetenbeteta xono balalu bee la, sanjanba to xo: «Alu na, alu kamari Ala la domoliba xanma! ¹⁸ Alu na mansaxelu subo domo, anin sorodasi kuntigolu subo, anin kelekemansolu nin suwolu subo, anin suxanyelebaxolu nin moxo bee subo, hooro nin jon, moxondin nin moxoba.» ¹⁹ Wo xo, ń xa wara jaxo je, anin duguxulo mansaxelu nin i la kelebulolu, i be kamarinin suwo xansigibaxo nin a la kelebulo kelo xanma. ²⁰ Waro mutata, anin kila fano, wo men tun xa kawakuwolu ke a ɲala xa moxolu lafili, waro taagumanseedo keta mennu la, anin men tunnu b’a ɲoxonŋo daraninŋo batula. Waro nin kila fano kendo filita ta nin tinbiritiyo dalaba xono. ²¹ Tolu faxata fanŋo la, men tun be boxan suwo xansigibaxo da xono. Xonolu bee x’e fa i subo la.

¹ Wo xo, ń xa melekiyo do jigito je xa bo sanŋo to. Dinxajironba danjebalo xundinŋo b’a bulu anin negejoloxoba do. ² A xa samaano muta, sa xoto, nin wo mu jinnolu la kuntigo nin Sentane ti, x’a siti negejoloxo la san wulu xono. ³ Melekiyo x’a fili dinxajironba danjebalo xono x’a da soxo a ma, xa taagumanseedo ke a la, walasa a xana siyalu lafili tugun fo san wulu kilinŋo xa dafa. Wo xo, a xa xan xa bula waxatindin xono. ⁴ Wo xo, ń xa mansasigilanŋo dolu je, sinŋo dita i tosigibaxolu ma xa kiito tege. Men du tunnu kunŋo tegeta Isa seedeya nin Ala la xumo nofe, ń xa wolu niyolu je. Wolu tunnu man wara jaxo batu walla a ɲoxonɲo daraninŋo, a taagumanseedo man ke i fodalu la walla i bulolu to. Wolu kunita xa bo furelu to, xa sigi mansaya la Kirisita fe, san wulu kilin xono. ⁵ Fure tolu man kuni xa bo furelu to, jannin san wulu kilinŋo xa dafa. Wo le mu furekuni folo ti. ⁶ Moxo mennu xa nidula soto furekuni folo to, heero be wolu ɲen, wolu keta senumanŋolu ti. I mu Ala talu ti, saya fulananŋo la julu nte i la. I si ke Ala nin Kirisita la sadaxalasibaxolu ti. I nin Kirisita si sigi mansaya la san wulu kilin xono. ⁷ Nin san wulu kilinŋo dafata tumo men, Sentane si bula xa bo a la kaso la. ⁸ A si taxa siyalu lafili, mennu be duguxulo tonxon naano to, Gogu nin Magogu. A si wolu lakamari kelo xanma. Wolu xa sa í xo xooxojida la keɲo. ⁹ I nata xa duguxulo dula bee fa, xa moxo senumanŋolu la dula laminin, nin wo mu Ala la gallu xanuninŋo ti. Bari ta jigita xa bo sanŋo to x’e jani. ¹⁰ Sentane men tun b’e lafilixan, wo filita ta nin tinbiritiyo dalaba xono, wara jaxo nin kila fano bata. I si ɲaaga suwo nin tilo fo abada. ¹¹ Wo xo, ń xa mansasigilanba xoyimanŋo do je, anin a xan sigibaxo. Duguxulo nin sanxulo x’e bori xa bo a ɲa xoto, i man je tugun. ¹² Ń xa furelu je, moxoba nin moxondin, i be lonin mansasigilanŋo ɲafe. Bukko dolu dayeleta. Bukke xote dayeleta, nin wo mu nilamaya bukko ti. Furelu la kiito tegeta x’a la i la kewalolu xan, x’a ben wo bukkolu xono safeninŋo ma. ¹³ Xooxojiyo x’a la furelu di. Saya nin lahara x’e la furelu di. Kiito tegeta furelu bee kilin kilin xan, x’a ben i la kewalolu ma. ¹⁴ Saya nin lahara filita ta dalaba xono. Wo ta dalaba le mu saya fulananŋo ti. ¹⁵ Moxo wo moxo toxo safeninŋo man tara nilamaya bukko xono, wo filita ta dalaba xono.

¹ Wo to, ń xa sanxulu kuto nin duguxulu kuto je, bawo sanxulu folo nin duguxulu folo tunnu sankota. Xooxojiyo nte je tugun. ² Ń xa gallu senumanŋo je, Yerusaleme kuto, a tun be jigixan xa bo sanŋo to, Ala bata. A x’é toben í xo maaɲo men x’é masiti a xe ɲen. ³ Ń xa xumaxanba do me xa bo mansasigilanŋo dula xo: «Saasa Ala sigidula fele moxolu temo to! A si sigi i bata, i si ke a la moxolu ti. Ala fan si ke i bata, a si ke i la Ala ti. ⁴ A si ɲajiyo bee fita x’a bo i ɲalu la. Saya me ke tugun, walla furexaso, walla xuure, walla tooro, bawo fen fololu sankota.» ⁵ Men be siginin mansasigilanŋo xan xo: «A fele ń be fenŋo bee kela kuto ti.» Wo xo, a xo ń ɲen xo: «A safe, bawo ɲin xuma innu mu wulibalo nin tonɲa le ti.» ⁶ A xo ń ɲen du xo: «A keta xa ban! Nte mu Alifa nin Omega le ti, damuto nin labanŋo. Mindoxo be men na, nte si nilamaya jiyo bodula jiyo di a ma a x’é min a la fu. ⁷ Men je sinŋo soto, wo tigo si ɲin fen innu soto ke ti; nte si ke a la Ala ti, a si ke nte dinŋo ti. ⁸ Men ken mu jiitolu nin lannayabalolu, nin ku haramuninkelalu, nin moxofaxalalu, nin jadolu, nin subaxolu, nin bolibatulalu, anin fanolu bee ti, wolu nidula be ta nin tinbiritiyo dalaba mananinŋo le to. Wo le mu saya fulananŋo ti.» ⁹ Wo to, meleke woorowulo mennu nin tooroku felinfa woorowula labanŋolu be i bulu, wolu to kilin xumata ń ɲen x’a fo xo: «Na, ń si maaɲo yita í la, nin wo mu Saaxandinŋo musu ti.» ¹⁰ Melekiyo taxata ń nima ti kuruba janjamanŋo do xan. A xa gallu senumanŋo yita nte la, Yerusaleme gallo, a tun be jigixan xa bo sanŋo to, Ala bata. ¹¹ A tun be manaxan Ala nooro fe. A keɲa tun be í xo kuru daxolenŋo do, a be í xo jasipekuro men be ŋelenxula. ¹² Tataba janjamanŋo tun b’a lamininnin. Dunda tan nin fula b’a la. Meleke tan nin fula be wo dundalu la. Banisirayila dinŋolu xabiile tan nin fulo toxolu tunnu be safenin wo dalu xan. ¹³ Da saba be kotonŋo to, saba be sahelo, saba be banbugo, saba be tiliboyo. ¹⁴ Gallo tato tun be siginin kuru tan nin fula xan, Saaxandinŋo la kiladin tan nin fulo toxolu be safenin mennu xan. ¹⁵ Melekiyo men xumata nte ɲen, sumannilanŋo do tun be wo bulu, sanuguma le mu, walasa xa gallo nin a dalu nin a tato suman. ¹⁶ Gallo boxo naano bee xa xan, a lo nin a xono bee kilin janɲa to. Melekiyo xa gallo suman a la guma la. A benta kilometere wulu fula nin keme naani le ma. A lo nin a xono nin a janɲa bee xa xan. ¹⁷ A xa tato du suman. A janɲa benta nonxon ɲa keme nin tan naani nin naani le ma, hadamadinŋolu la sumannikelanŋo, melekiyo xa men ta. ¹⁸ Tato tun be kenin jasipekuro la, gallo tun be kenin sanu yerewuluwo le la, men be í xo weere ɲuma. ¹⁹ Gallo tato jusigilanŋolu tunnu be jangunin kuru daxolen sifa bee la. Jusigilan folo tun mu jasipekuro le ti, fulananŋo safirekuro, sabananŋo agatekuro, naaninanŋo emerodekuro, ²⁰ luulunanŋo onikisekuro, wooronanŋo saraduwanekuro, woorowulananŋo kirisolitekuro, saginanŋo berilikuro, xonontonanŋo topasekuro, tannanŋo kirisoparasekuro, tan nin kilinnanŋo yasentikuro, tan nin fulananŋo ametisitekuro. ²¹ Dunda tan nin fulo tunnu mu xononkese daxolen tan nin fula le ti. Dunda wo dunda tun mu xononkese daxolen kilin ti. Gallo dakeno tun be kenin sanu yerewuluwo la, men be ŋelenxula í xo weero. ²² Nte man Alabatusuba je wo gallo to, bawo Marigi Ala Sinŋobeetigo fan ne mu wo gallo Alabatusuba ti, ate nin Saaxandinŋo. ²³ Gallo maakuwo nte tilo la, walla xaro la, walasa x’a keneya, bawo Ala nooro b’a keneyanin, Saaxandinŋo le mu a lanpo ti. ²⁴ Siyalu si i taxama a keneya la, duguxulo mansaxelu nin i la naafulo si na a ma. ²⁵ A dundalu me taxun tilo to, bawo su nte nala kela non tugun. ²⁶ Siyalu nooro nin i bunɲa si taxa ti je. ²⁷ Fen noxonin si me dun je. Moxo wo moxo be ku haramuninŋo kela anin xa faniya fo, wo me dun je, fo men doronnu toxo be safenin Saaxandinŋo la nilamaya bukko xono.

¹ Wo xo, melekiyo xa nilamaya bajiyo yita nte la, a be í xo kuro men be ŋelenxula. Wo jiyo tun be bola Ala nin Saaxandinŋo la mansasigilanŋo dula, ² xa woyo gallo dakeno temo to. Nilamaya yiro tun be wo ba boxo fulo. A be dinŋo kela sinɲa tan nin fula sanŋo xono. Xaru wo xaru a si dinŋo ke. A fitolu be siyalu jaarala. ³ Ala la dango me fen si soto non tugun. Ala nin Saaxandinŋo la mansasigilanŋo si ke gallo xono, Ala la jonŋolu s’a batu. ⁴ I si a ɲada je. A toxo si safe i fodalu la. ⁵ Su me ke tugun. Moxo si maaku me ke lanpamana la tugun, walla tilo keneya la, bawo Marigi Ala si a keneya bo i ɲen. I si ke mansolu ti fo abada. ⁶ Wo xo, melekiyo xo ń ɲen xo: «Ɲin xuma innu mu wulibalo nin tonɲa le ti. Marigi Ala, men be a Niyo dunna kilalu to, ate le x’a la melekiyo ki, walasa kuwo men be nala kela dondin, a xa wo yita a la jonŋolu la.» ⁷ Isa xo: «A fele, dondin ń si na! Moxo men je ɲin bukke in kilaya xumolu mara, heero be wo ɲen!» ⁸ Nte Yaya xa ɲin ku innu me, x’e je. Ń x’e me anin x’e je tumo men, ń xa ń boyi melekiyo sinŋolu xoto, wo men x’é yita ń na. Ń xo, xo ń b’a batula. ⁹ Bari a xo ń ɲen xo: «Í xana wo ke! Nte mu baarakedinŋo le ti í xo ite, anin í badin kilalu, anin mennu bee be ɲin bukke in xumolu marala. Í xa xan xa Ala le batu.» ¹⁰ Wo xo, a xo ń ɲen xo: «Í xana ɲin bukke in kilaya xumolu tu duguwo to, bawo waxato sutiyata. ¹¹ Tilinbalo xa taxa ɲa xa tilinbaliya ke, anin noxoninŋo xa taxa ɲa noxoninɲa to. Bari tilinninŋo xa tilinninɲa ke xa taxa ɲa, anin senumanŋo x’é senuya xa taxa ɲa.» ¹² Isa xo: «A fele, dondin ń si na! Ń nin bee la sara si na x’a di í ma, x’a la bee kilin kilin na kewalolu xan. ¹³ Nte mu Alifa nin Omega le ti, folo anin labanŋo, damuto anin dafaxo.» ¹⁴ Mennu be i la faanolu kula, walasa i xa sin xa nilamaya yiro dinŋo do soto, anin xa dun gallo to, a dundalu fe, heero be wolu ɲen. ¹⁵ Bari wulukukelalu nin subaxolu nin jadolu, nin moxofaxalalu, nin bolibatulalu, anin moxo wo moxo be faniya fe, anin mennu b’a fola, wolu bee be banto to! ¹⁶ «Nte Isa xa ń na melekiyo ki xa ɲin seedeya in nasi alu ma, Ala la jamalu la kuwo to. Nte mu Dawuda tobo nin a bonsonŋo le ti, anin saxuyelenda la loolo, men be manala.» ¹⁷ Ni Senunŋo nin maaɲo xo: «Na!» Men je a me wo x’a fo xo: «Na!» Mindoxo be men na, wo xa na; men be nilamaya jiyo fe, wo x’a min fu. ¹⁸ Moxo wo moxo be ɲin bukke in kilaya xumolu lamela, nte b’a fola wolu bee ɲen xo: Nin do xa do kafu i ma, toorokuwo mennu fota ɲin bukke in xono, Ala si wolu kafu a tigo ta ma. ¹⁹ Nin men xa do bo ɲin bukke in kilaya xumolu la, Ala si wo tigo nidula bo nilamaya yiro nin gallu senumanŋo to, wo mennu la kuwo be safenin ɲin bukke in xono. ²⁰ Men be ɲin ku innu seedeyala, wo xo: «Iyo, dondin ń si na!» Amiini! Marigi Isa, na! ²¹ Marigi Isa la neemo xa ke alu bee fe.