FILIPENGOLU

FILIPENGOLU

¹ Nte Poli nin Timote le be ɲin safe in kila, ntelu mennu keta Isa Kirisita la jonŋolu ti. N b’a kila Ala la moxo senumanŋolu bee ma Filipe gallo to, mennu nin Isa Kirisita kafuta, anin Ala la jama lakorosibaxolu nin a baaralalu. ² N Fa Ala anin Marigi Isa Kirisita xa neemo nin heero di alu ma. ³ Nte xa ń miiri alu ma tuma wo tuma, ń si barako bula ń na Ala ɲen. ⁴ Nin nte be Ala matarala alu bee ɲen tuma wo tuma, nte nitodiyaninŋo le be wo kela, ⁵ bawo alu keta nte kafuɲoxolu ti xibaru Dimanŋo fo to, kabirin folofolo fo saasa. ⁶ Ń be lanin a la xo Ala men xa ɲin baara ɲuma in damuta alu to, a si taxa ɲa fo a dafalunŋo, Isa Kirisita nalunŋo. ⁷ A xa bete ɲin ɲoxon miiriya xa ke ń na alu bee la kuwo to, bawo alu la kuwo xa xole nte ma bete. Ala x’a la neemo di nte ma x’a la baaro men ke, alu bee xa do soto wo to, saasa xa nte tu kaso la, anin xa ń tu Xibaru Dimanŋo lafaasala, x’a sinsin. ⁸ Ala mu ń seedo ti xo nte be alu bee xanunin bete, í xo Isa Kirisita be ń xanunin ɲa men. ⁹ Ń be Ala matarala alu ɲen men na, wo fele: Ń b’a matarala, alu la xanuya xa bunɲa xa taxa a fe, lonniya soobe nin faamuyali dafaninŋo xono, ¹⁰ walasa alu xa sin xa ɲuma lon. Nin wo keta, alu si senuya, xa ke jalagibalolu ti Kirisita la lunŋo. ¹¹ Alu si ke ku tilinnin kiika kebaxolu ti, Isa Kirisita barako to, mennu si nooro nin bunɲa la Ala xan. ¹² Ń badinŋolu, ń b’a fe alu x’a lon xo kuwo men xa nte soto, tonɲa la, wo keta sabaabu ti xibaru Dimanŋo xa taxa ɲa. ¹³ Wo ɲa ma, goferenere la xube xono moxolu, anin a xoxanmoxolu bee x’a lon xo nte be kaso la Kirisita le la kuwo to. ¹⁴ Badin lannayabaxolu tala bee x’e gigo senbe Marigi la, nte la kasolabulo koso. I xa jaxoleya soto bete, xa Ala la xumo fo x’a tara i man sila. ¹⁵ Dolu kennu be Kirisita la kuwo waajula kiiliya le xanma, xa soosolo ke. Bari do dulu b’a kela ŋanneya ɲuma le la. ¹⁶ Wolu be i la baaro kela xanuya la, bawo i x’a lon xo nte be jan Xibaru Dimanŋo lafaasalo le xanma. ¹⁷ Bari tolu kennu be Kirisita la kuwo waajula fadinɲa le la. I ŋanneya man ɲin; i miiro mu le xa do kafu nte la tooro ma xa ń tu kaso la. ¹⁸ Bari wo si nte fen ti. Ŋanneya jaxu tarata i la wo, ŋanneya bete tarata i la wo, a keta ɲa wo ɲa, Kirisita la kuwo be waajuxan moxolu ɲen, wo nitodiya be nte la. Ń be tula wo nitodiya xono, ¹⁹ bawo ń x’a lon xo alu la Alamataralu barako to, anin Isa Kirisita Niyo la deemalo fe, wo kuwolu bee si falin nte la kisilo la. ²⁰ Nte keɲeninŋo be wo le ma, anin nte gigo be wo le xan, nte me malu abada. Bari xa nte hakilo lasigininŋo tu, saasa, anin tuma bee, Kirisita si bunɲa nte balo to, ń na nilamaya fe, walla ń na saya fe. ²¹ Katugala nte bulu, xa nilamaya, Kirisita le mu. Nin ń sata, wo mu ń bulu tono le ti. ²² Bari xa tu ń nila jan, nin wo si a tu ń xa baara nafama ke tugun, wo to, ń man a lon ń si men sugandi. ²³ Ń xono be talanin: A xa di ń ɲen xa duniya tu, xa ke Kirisita bata; wo le ken ɲoxon nte. ²⁴ Bari atelu la kuwo la, ń xa tu ń nila, wo le xa fisa. ²⁵ Nte be lanin wo la. Wo xanma, ń x’a lon xo nte si tu ń nila, xa ke alu bee senbo to, walasa alu xa taxa ɲa, xa ɲaxali lannaya to. ²⁶ Wo ɲa ma, nin nte saagita nanin alu bata, nte la kuwo si ke alu jangunnaku ti xa tanbi folo xan, Isa Kirisita la kafuɲoxoya la. ²⁷ Bari alu bosilo xa ben Kirisita la Xibaru Dimanŋo la fota ma; walasa nte taxata bo alu ma wo, ń man taxa wo, nte x’alu xibaro me xo alu balanninŋo be miiriya kilin na, x’alu tu kelo la jusukun kilin na, lannaya nofe, Xibaru Dimanŋo be men dila. ²⁸ Alu xana a tu alu jaxolu x’alu lasila fen si to. Wo si ke wolu la halagilo taagumanseedo ti i ɲen, anin xa ke taagumanseedo ti xo atelu be kisilo silo xan. Wo kuwo bota Ala le to. ²⁹ Ala xa ɲin don neemo ke alu ɲen alu xa la Kirisita la; wo doron nte, anin alu xa tooro ate ɲen du. ³⁰ Alu xa nte je kelo men na, nin alu x’a lon xo nte be wo la haalibi, alu dulu xa wo kelo ɲoxon ke.

¹ Awa, nin jusu suma si soto Kirisita la kafuɲoxoya xono, nin ɲoxo jusudunŋo be xanuya to, nin kafuɲoxoya be sotola Ni Senunŋo fe, nin ɲumaya nin hinno be je, ² al’alu miirolu ke kilin ti, xa nte la ɲaɲo dafa, xa i taxama benŋo xono. Alu la xanuya xa ke kilin ti, alu xonolu xa ke kilin ti, alu kilinɲa ŋinin. ³ Alu xana fusi ke fadinɲa la walla fanbunɲa xanma. Bari alu i majigi, xa tolu jaate xo i xa bun alu ti. ⁴ Alu si xana í miiri alu fannu kilinnu la nafa ma, alu bee kilin kilin xa í miiri to dulu la nafa ma. ⁵ Miiriya men tun be Isa Kirisita la, wo ɲoxon xa ke alu dulu la: ⁶ Ate men tun keɲa nin Ala keɲa mu kilin ti, a man a nin Ala la xaaɲanŋo ke fen ti, a me bo notonin men na. ⁷ Bari a buruta wo bee to, xa jonŋo keɲa ta, xa ke moxolu ɲoxonŋo ti. A x’é yita moxo ti tumo men, ⁸ a x’a fan majigi, xa xulu fo saya, gengenyiro xan saya fan. ⁹ Wo le x’a tu, Ala x’a xotota bete, xa toxo di a ma, toxo men xa bun toxo bee ti, ¹⁰ walasa fen wo fen be sanŋo to, anin duguxulo xan, anin duguxulo xoto, wolu ɲongi Isa toxo la; ¹¹ anin xo nenŋo bee x’a fo xo Isa Kirisita mu Marigi ti, walasa bunɲa xa la n Fa Ala xan. ¹² Wo ɲa ma, ń badin xanuninŋolu, alu xa nte lame tuma bee, xa nte tu alu bata. Alu wo ke tugun xa tanbi folo xan, x’a tara nte nte alu bata. Alu xa kisilo men soto, alu baaro ke wo hukumo xono, silanɲa nin jarajaro to. ¹³ Bawo Ala le be baaro kexan alu xono, a si sinŋo di alu ma, alu xa ke a la ku lategeninŋo xanubaxolu nin a kebaxolu ti. ¹⁴ Alu kuwo bee ke x’a tara alu man daxotoxuma nin soosoli ke, ¹⁵ walasa alu xa ke jalagibalolu nin senumanŋolu ti, alu xa ke Ala dinŋolu ti, fe nte mennu la ɲin duniya in moxo tilinbalolu nin moxo jaxu innu to. Alu xa xan xa mana i to í xo sanxulo ma loololu, ¹⁶ xa xumo di i ma men be nilamaya dila. Wo banna kela, nte kunŋo si xotota Isa Kirisita nalunŋo alu la kuwo koso, bawo ń na baaro nin ń na sege me na ke fuwo ti. ¹⁷ Haali nin nte jelo bonta xa ke í xo sadaxo, xa kafu alu la lannaya la baaro ma, nte si ɲaɲa le wo la, xa ɲaɲa alu bee fe. ¹⁸ Alu dulu xa xan xa ɲaɲa wo kuwo la, xa kafu nte ma xa ɲaɲa. ¹⁹ Nte yilo b’a ma, nin a keta Marigi Isa sago ti, xo dondin nte si Timote ki alu ma; walasa nte du xa jusudun alu xibaruya soto xanma. ²⁰ Bawo nin ate kilin nte, moxo xote nte je, ń nin men be xono ma. Alu la kuwo hanmo be ate kilin ne la soobe la. ²¹ Tolu bee be hanmela i fannu la kuwo lelu la, i nte hanmela Isa Kirisita la kuwo la. ²² Bari alu fannu x’a lon Timote x’a la xantigiya yita ɲa men: A nin nte xa xibaru Dimanŋo baaro ke, í xo dinŋo nin a fa. ²³ Ń hakilo b’a ma x’ate le ki alu ma, nin ń xa ń na ɲa lon tumo men. ²⁴ Nte be lanin a la Marigi barako to, xo a me me, nte fan si taxa alu je. ²⁵ Nte x’a mafele xo a xa xan nte xa Epaforodite lakoppa alu ma, nin wo mu nte badinxe nin nte baarakeɲoxo nin nte kafuɲoxo ti kelo to. Alu tunnu x’a ki xa na nte maakuɲanfenŋolu ti. ²⁶ Alu bee jo loxoba tun b’a la. A tun jusukunŋo be tooronin bawo alu x’a la jangaro xibaro me. ²⁷ Tonɲa le mu a jangaruta, fo a tun be ŋinin xa sa. Bari Ala hinnata a la, ate kilin nte, a hinnata nte du la, walasa jusuxasi xote xana kafu nte la jusuxaso ma. ²⁸ Wo le x’a tu, nte xa ń tariya x’a ki alu ma, walasa nin alu x’a je, do xa kafu alu la ɲaɲo ma. Wo to, do si bo nte la jusuxaso la. ²⁹ Nin a sita je, alu x’a kunben ɲaɲaba to, Marigi toxo la. Alu xa xan xa wo ɲoxon moxo lelu bunɲa, ³⁰ bawo a tun be ŋinin xa sa Kirisita la baaro le nofe. A bota a fan na nte deemalo le xanma, alu tunnu fannu me men no nte ɲen.

¹ Awa saasa, ń badinŋolu, alu ɲaɲa Marigi la kafuɲoxoya la. Nte tun xa xumo mennu safe xa ban, a man xole nte ma xa saagi wo fen kilinŋolu safenin alu ɲen. Alu la nafa le be wo to. ² Alu i korosi wulumoxolu ma, alu i korosi baarajaxukelalu ma, alu i korosi ɲaxa fuwo lafaasabaxolu ma. ³ Nte lelu mu ɲaxanin soobelu ti, ntelu mennu be Ala batula a Ni Senunŋo barako la, xa n fanbunɲa kunŋo ke Isa Kirisita la kafuɲoxoya ti. N nte n gigo lala n fannu xan. ⁴ Awa, nte du tun s’a no xa ń gigo la ń fan xan. Nin a be moxo men ɲen xo a s’í gigo la no a fan xan, nte tun si wo ke xa tanbi wo tigo xan. ⁵ Nte ɲaxata ń wuluwo tili sago. Ń mu Banisirayila siya do le ti, Bensamen bonsonŋo do. Ń mu Heburo yerewuluwo le ti. Musa la sariya to, nte keta Farisiya soobe le ti. ⁶ Nte tun be balannin ɲa men, fo ń keta Ala la jama toorobaxo ti. Ń keta jalagibalo ti sariya xa tilinninɲa men fo wo silo la. ⁷ Bari nte tun be wo kuwo mennu jaatenin tono ti, saasa ń xa wolu jaate bono ti, Kirisita koso. ⁸ Nte be fenŋo bee fan ne jaatela bono ti ɲin fen nafamaba in koso, nin wo mu ń Marigi Isa Kirisita lonŋo ti. Ate la kuwo xanma, ń xa ń xodi fenŋo bee la, x’a bee mafele fen filita ti, walasa ń xa Kirisita soto tono ti, ⁹ anin ń xa tu a la kafuɲoxoya xono. Nte nte a jaatela tugun xo nte xa tilinninɲa soto sariya labatulo fe. Nte xa tilinninɲa soto Kirisita lannaya le fe, wo tilinninɲa men bota Ala la, anin a be men dila lannaya fe. ¹⁰ Nte b’a ŋininna le, xa Kirisita lon, sinŋo men be a la kuniyo to, xa wo lon, xa do soto a la toorolu to, anin ń nin a xa ke kilin ti a la saya to, ¹¹ xa don gigo tu ń na xo nte du si kuni xa bo furelu to. ¹² A nte xo nte xa ń na fen bunta soto xa ban, walla xo nte keta moxo dafaninŋo ti xa ban. Bari ń be taxala ɲa haalibi, xa ń balan xa wo soto; bawo Isa Kirisita xa nte muta xa ń ke a ta ti xa ban. ¹³ Ń badinŋolu, nte nt’a jaatela xo nte xa wo bandeero ta xa ban de! Bari nte be ku kilin ne kela: Men be ń xo, nte be ń hakilo bola wo kun, men be ń ɲa, xa ń balan wo nofe. ¹⁴ Nte be ń borila taxanin ń borikunŋo ma, walasa xa bandeero ta, Ala be n kilinin men ma sanŋo to, Isa Kirisita barako to. ¹⁵ Awa, alan mennu bee xoxota lannaya to, wo le xa xan xa ke n bee miiriya ti. Bari nin miiriya xote be alu la wo kuwo to, Ala fan si tonɲa yita alu la. ¹⁶ Ɲa wo ɲa b’a to, alan xa silo men taxama fo saasa, alan xa taxa ɲa wo xan. ¹⁷ Ń badinŋolu, alu bee xa ke nte ladigibaxo ti. N keta ɲayitolu ti, wo to, mennu b’e taxamala xa ben wo ɲayito ma, alu wolu ladigi. ¹⁸ Ń dalita a fola alu ɲen, ń xasito be saagila a ma alu ɲen saasa tugun xo: Moxo kiika b’a yitanin i bosilolu la xo Kirisita gengenno yiro ma, xo i mu wo kuwo jaxolu ti. ¹⁹ Wo moxolu labanŋo mu halagilo le ti, bawo i la ala mu i xonodaxo le ti. Kuwo mennu xa xan xa i malu, i jangunnakuwo mu wo lelu ti. Hanme xote nte i la nin duniya kuwo lelu nte. ²⁰ Ntelu kennu fasuwo be sanŋo to le. N be n Kisibaxo, Marigi Isa Kirisita laxononin xa bo non. ²¹ A si n bala barakentan sata yelema, x’a ke a fan bala nooroma ɲoxonŋo ti. A si wo ke a la sintigiya la, men be fen bee xulula a ɲen.

¹ Nte badin xanuninŋolu, a loxoba be nte la x’alu je. Ate lelu mu nte la ɲaɲo kunŋo ti. Ate le dulu mu nte kunxotota sabaabo ti. Alu i balan xa tu Marigi la kafuɲoxoya xono. ² Nte be n badinmusu Efodi nin Sentise tarala, xo i x’e xono ke kilin ti Marigi la kafuɲoxoya xono. ³ Ite du, ń baarakeɲoxo xankilintigo, ń b’é tarala xo í xa wo musolu deema. Wolu tunnu nin nte kafuta xa kelo ke, nin wo mu xibaru Dimanŋo fo ti, wolu nin Kileman anin nte baarakeɲoxo tolu. I bee toxo be safenin nilamaya bukko xono. ⁴ Alu ɲaɲa tuma bee Marigi la kafuɲoxoya la. Ń be saagila a ma, alu ɲaɲa. ⁵ Alu sabaro yita moxolu bee la. Dondin Marigi si na. ⁶ Alu xana hanme fusi la, bari ku wo ku je na alu ma, alu Ala matara wo la, x’a xoleya, x’a nin barakebulo kafu. ⁷ Nin wo keta, Ala la heero men xa bun hadamadinŋolu la miiriyalu bee ti, wo si alu jusukunŋolu nin alu miirolu mara Isa Kirisita la kafuɲoxoya xono. ⁸ Awa saasa, ń badinŋolu, ń na xuma labanŋo mu men ti wo fele: Nte b’a fe xo kuwo fen wo fen mu tonɲa ti, bunɲa si soto fen wo fen to, ku wo ku be tilinnin, kuwo mennu xa senu, kuwo mennu xa di Ala ɲen, kuwo mennu fo be bennin, jigo mennu xa ɲin, moxo si tantu kuwo mennu to, alu la jaate xanta xa la wo lelu bee xan. ⁹ Alu laxaranta men na, alu xa men soto, alu xa men me nte la, alu xa men je nte la, alu wolu bee ke. Nin wo keta, Ala men mu heero tigo ti, wo si ke alu fe. ¹⁰ Nte be ɲaxalibetela Marigi la kafuɲoxoya la, bawo alu x’a yita tugun xo nte la kuwo be alu xono. Wo miiriya tun be alu la kabirin xotonin, bari alu tunnu man a keɲa le soto folo. ¹¹ Nte nte xumala ten bawo nte maakuwo be fen do la. Men be ń bulu, nte dalita xa muta ke wo ti. ¹² Nte xa ń keɲa lon bulutoxulunɲa xono, xa ń keɲa lon fentigiya xono. Ku wo ku to, ɲa wo ɲa, xa fa wo, xa tu xonxo la wo, xa fentigiya wo, xa bulutoxulunɲa wo, nte dalita a bee la. ¹³ Nte si sin xa wo bee ke Kirisita le barako la; ate le be nte barako bunɲala. ¹⁴ Wo bee nin a ta, alu xa men ke, xa nte deema ń na toorolu waxato, wo keta ku beto le ti. ¹⁵ Ń badin Filipengolu, alu fannu x’a lon xo kabirin nte xa xibaru Dimanŋo waajulo damuta waxato men, nin nte bota Maseduwane jamano la, nin alu la jama kilin nte, Ala la jama xote man ke nte kafuɲoxo ti, nilo nin soto la. ¹⁶ Haali nte be Tesalonike tumo men, alu xa nilifenŋo ki nte ma í xo sinɲa fula, xa ń maakuwo ɲiɲa. ¹⁷ A nte xo nte be nilifenŋo lelu ŋininxan. Nte b’a fe alu la kebaara ɲuma le xa siya, xa jaate alu ɲen. ¹⁸ Alu xa fen fen ki ń ma, ń xa i bee soto. Epaforodite nata wolu di nte ma tumo men, ń maakuwolu ɲiɲata. Wo keta í xo sadaxa sumadimanŋo; Ala be wo ɲoxon sadaxa le fe, x’a muta. ¹⁹ Nte la Ala si alu maakuɲanfenŋolu bee di alu ma, x’a la a la fentigiyaba maɲoxonjebalo xan, Isa Kirisita la kafuɲoxoya barako to. ²⁰ Tanto be n Fa Ala ɲen fo abada. Amiini! ²¹ Alu Ala la moxo senumanŋolu kilin wo kilin xonton, mennu be Isa Kirisita la kafuɲoxoya xono. Nte nin badinŋo mennu be jan, wolu bee be alu xontonna. ²² Ala la moxo senumanŋolu bee be alu xontonna; sakuta mennu be baaro kela mansaxe la luwo xono, wolu be alu xontonna. ²³ Marigi Isa Kirisita la neemo xa ke alu bee fe.