HEBUROLU

HEBUROLU

¹ Folofolo, Ala x’a la xumo dun a la kilalu da x’a fo n mamaxelu ɲen. A xa wo ke sinɲa kiika ti, anin ɲa kiika ma. ² Bari bi duniya laban in na, a x’a la xumo dun a Dinxe da x’a fo n ɲen. Ala xa duniya da ate le fe. A x’a ke dafenŋo bee ketabaxo ti. ³ Wo Dinxe be Ala nooro maɲoxonjebalo yitala. A keɲa nin Ala keɲa bee kilin. A be duniya tomutanin a la xumo barako le la. A xa hadamadinŋolu senuya i la junubolu ma tumo men, a taxata í sigi fo sanjanba to, Sinŋobeetigi Ala kininŋo xoto. ⁴ A bunɲata melekiyolu bee ti, fo Ala xa toxo di a ma, toxo men xa bun wolu ta ti. ⁵ Ala bada man a fo a la meleke si ɲen xo: «Ite le mu ń Dinxe ti; kabirin bi nte keta í Fa ti.» A man a fo meleke du ma xo: «Nte si ke a ɲen fa ti; ate si ke nte ɲen dinxe ti.» ⁶ Bari Ala be a Dinxe folo wuluninŋo kila xa na duniya to tumo men, a xo: «Ala la melekiyolu bee xa ke a batubaxo ti.» ⁷ A xo melekiyolu la kuwo to xo: «Ala b’a la melekiyolu kela foɲo ti, x’a la baaradinŋolu ke tamanolu ti.» ⁸ Bari Ala x’a fo a Dinxe ma xo: «Ite Ala, í be tula mansasigilanŋo xan fo abada. Í b’é la maro kela tilinninɲa le xan. ⁹ Í be ku tilinninŋo le fe, Jaxumanŋo mu í tano le ti. Wo le x’a tu Ala, í la Ala x’é sugandi xa ɲaxaliba tulu daxolenŋo yelema í kunŋo xan, xa lodula di í ma, men xa bun í kafuɲoxolu bee ta ti.» ¹⁰ Ala xo du a Dinxe ɲen xo: «Marigi, folofolo ite le xa duguxulo da; sanxulo du mu í buluno le ti. ¹¹ Wolu bee si sanko, bari ite si tu. Sanxulo nin duguxulo si xoto, í xo faano be xotola ɲa men. ¹² Í s’i soola, í xo moxo be dorokeba soolala ɲa men; i si mayelema, í xo moxo be a la faanu dunta mayelemala ɲa men. Bari ite ken si tu í ɲa ma, í la nilamaya me ban muume.» ¹³ Awa, Ala x’a fo a la meleke joman ne ɲen xo: «Í sigi ń kininŋo xoto, fo nte xa í jaxolu ke í sinxotofenŋo ti»? ¹⁴ Melekiyolu mu munnu ti? I bee mu niyo lelu ti, kiladinŋo lelu mu. I be baaro kela Ala ɲen. Moxo mennu xa xan xa kisilo soto ke ti, Ala be melekiyolu kila xa taxa wolu deema.

¹ Wo le x’a tu, n xa kuwo mennu me, n xa xan xa i hakilo tu wolu la bete, walasa n xana sanko. ² N x’a lon xo melekiyolu xa xumo men fo, wo keta tonɲa ti. Mennu xa wo xumolu sooso, x’e fili i xo, Ala xa wolu bee sara i la kebaarolu la, i nin sara men xa xan. ³ Marigi xumata kisiliba men xan, nin n man wo muta barako to, n si kisi no ɲa di Ala la ɲangilo ma? Marigi fan folo xumata n ɲen wo kisilo xan. Wo xo, mennu xa Marigi lame, wolu x’a laxoyiya n ma xo tonɲa le mu. ⁴ Ala du xa i la seedeyalolu sinsin taagumanseedolu nin kubalu nin kawaku sifa bee do kelo la. A xa Ni Senunŋo la solifenŋo dulu di i ma, x’a la a fan sago xan. ⁵ Awa, n be xumala sinin duniya men na kuwo la, Ala man wo kuntigiya di melekiyolu ma. ⁶ Bari moxo do xumata wo xan Kitaabo dula do la xo: «Ala, moxo mu mun ti, nin í be í miirila a la kuwo la? Hadamadinŋo mu mun ti, nin í be í hakilo tula a kun? ⁷ Í x’a doxoya melekiyolu ti waxatindin xono, wo xo, í x’a xotota xa nooro nin bunɲa di a ma, ⁸ x’a lasigi fenŋo bee kunna.» Nin a fota xo Ala x’a lasigi fenŋo bee kunna, wo xoto le, xo fen nte je, a nte men kunna. Wo bee nin a ta, n ɲa nte a la saasa xo sinŋo bee dita a ma xa sigi fenŋo bee kunna. ⁹ Bari n x’a je xo: Isa doxoyata melekiyolu ti waxatindin xono, walasa a xa sa moxolu bee ɲen, Ala la neemo barako to. Bari saasa n x’a je xo Ala xa nooro nin bunɲa la Isa xan, a la tooro nin a la saya xanma. ¹⁰ Tonɲa la, Ala le xa fenŋo bee da, anin ate le be fenŋo bee tomutanin. A tun xa xan Ala xa Isa la bunɲa dafa wo toorokuwolu la. Wo keta walasa moxo kiika xa ke Ala dinŋolu ti, xa dun a la nooro xono. Wo ɲa ma, Isa le mu i la kisilo sabaabo ti. ¹¹ Isa men be moxolu senuyala i la junubolu ma, anin mennu be senuyala, ate nin wolu bee be Fa kilin ma, nin wo mu Ala ti. Wo le x’a tu, Isa man maluya xa wolu kili xo a badinŋolu. ¹² Wo le x’a tu, a xo: «Ala, nte si í yita ń badinŋolu la, nte s’í tantu donkilolu la, í la jama bee ɲala.» ¹³ A xo du xo: «Nte si ń gigo la Ala xan.» Anin du a xo: «Ala xa dinŋo mennu di nte ma, nte nin wolu fele.» ¹⁴ Awa, Isa xa dinŋo mennu kisi, wolu mu jelo nin balasubo ti ɲa men, wo ɲa ma, Isa du keta i ɲoxon ti, a keta jelo nin balasubo ti. A keta i ɲoxon ti, walasa saya barako be men bulu, nin wo mu Sentane ti, a xa wo joroxi a fan na saya fe. ¹⁵ Wo keta walasa mennu be Sentane la jonɲa la, i siyo bee xono, saya ɲasilanɲa bulu, a xa wolu kunbo. ¹⁶ Tonɲa, Isa man na xa melekiyolu deema de; a nata Burehima bonsonŋo le deema. ¹⁷ Wo le x’a tu, a tun xa xan xa ke a badinŋolu ɲoxonŋo ti, walasa a xa ke sadaxalasibaxa kuntigiba hinnantunŋo nin xantigo ti Ala la baaro to; walasa x’a la moxolu la junubolu bo je. ¹⁸ Wo ɲa ma, mennu be xotobolo xono, Isa si sin xa wolu deema, bawo a fan toorota xa xotobo.

¹ Wo ɲa ma, ń badin lannayabaxolu, Ala xa atelu mennu kili xa ke a talu ti, alu i miiri Isa ma. Ate le mu Ala la kiladinŋo nin n na sadaxalasibaxa kuntigiba ti n na lannaya silo la. ² Ala le tun x’a sugandi wo baaro xanma. A keta xantigo ti Ala la baaro bee to, í xo Musa keta xantigo ti ɲa men Ala la luwo muume xono, nin wo mu Ala la moxolu to ti. ³ Bari Isa nin bunɲa xa xan xa tanbi Musa xan, bawo bunlobaxo xa fisa bunŋo fan ti. ⁴ Bun wo bun, moxo do le x’a lo; bari fenŋo bee lobaxo mu Ala le ti. ⁵ Kila Musa ken tun mu baaradinŋo le ti. A x’a la baaro bee ke xantigiya to, Ala la luwo xono. Ala tun be nala xumo mennu fola, Musa la baaro tun mu le xa wolu seedeya. ⁶ Bari Kirisita keta xantigo ti x’a tu ate mu Ala Dinxe ti, xa sigi Ala la luwo bee kunna. Nte lelu mu Ala la luwo ti, nin n gigi xoyimanŋo tuta n na, anin xa tu ɲaxalinin a la. ⁷ Wo le xanma, í xo Ni Senunŋo x’a fo ɲa men xo: «Nin alu xa Ala xumaxanŋo me bi, ⁸ alu xana alu sondonmolu xoleya, í xo alu mamaxelu murutita ɲa men, xotobolo lunŋo, fuxo la. ⁹ Alu mamaxelu xa nte xotobo xa ń mafele, haali a x’a tara i xa ń na kebaarolu je, tan naani sanji xono. ¹⁰ Wo le x’a tu, ń diminta wo moxolu xoto x’a fo xo: “I sondonmo be taxala filo le ma tuma bee. I man nte la silolu je.” ¹¹ Nte diminta xa ń xali xo: Nte xa jamano men toben i la tofoɲo xanma, i me dun non abada.» ¹² Ń badinŋolu, alu i korosi jusukun jaxo nin lannayabaliya xana ke moxo la alu to, fo wo x’a bula i xodila Ala nilama la. ¹³ Kitaabo be «bi» men fola, alu i ɲoxo jusudun lun wo lun wo «biwo» waxato xono. Alu wo ke walasa junubo xana alu do lafili x’a bula a jusukunŋo xoleyala. ¹⁴ Alan keta Kirisita kafuɲoxolu ti, nin n na lannaya folo tuta n na fo xa labanŋo si. ¹⁵ Kitaabo xo: «Nin alu xa Ala xumaxanŋo me bi, alu xana alu sondonmolu xoleya, í xo n mamaxelu murutita ɲa men.» ¹⁶ Jon nelu xa Ala xumaxanŋo me xa muruti? Kila Musa nin mennu bee bota Misira jamano to, wo lelu nte ba? ¹⁷ Ala diminta jon nelu xoto tan naani sanji xono? Mennu xa junubo ke nin i sata fuxo la, wo lelu nte ba? ¹⁸ Ala x’é xali xo jontigi lelu me dun a la jamano xono x’e tofoɲo? Mennu murutita a ma, wo lelu nte ba? ¹⁹ Wo ɲa ma, n x’a je xo i man sin xa dun wo tofoɲodula, i la lannayabaliya koso.

¹ Ala la lahido be je haalisa xo a si n nadun a la dula, n na tofoɲo xanma. Wo to, alan xa sila moxo si dunbalo xana tu alu to. ² xibaru Dimanŋo waajulo keta n ɲen ɲa men, a keta n mamaxe dulu ɲen wo ɲa in. Bari a man fusi ɲiɲa wolu ɲen, bawo i x’a me tumo men, i man a muta lannaya to. ³ Ntelu mennu xa lannaya ke, ntelu si dun wo tofoɲodula. Ala xo n mamaxelu ɲen wo tofoɲodula la kuwo to xo: «Nte diminta xa ń xali xo, Nte xa jamano men toben i la tofoɲo xanma, i me dun non abada.» Ala xa wo xumolu fo, x’a tara a tun xa wo tofoɲodula nin fenŋo bee da xa ban kabirin duniya da tumo. ⁴ A fota Kitaabo dula do, tili woorowulananŋo la kuwo to xo: «Ala x’a la baaro bee ke x’é soto tumo men, tili woorowulananŋo a x’é tofoɲo.» ⁵ Wo dula kilinŋo Ala xo tugun xo: «Nte xa jamano men toben i la tofoɲodula xanma, i me dun non abada!» ⁶ Awa, mennu fololu xa Xibaru Dimanŋo me, wolu man dun Ala la tofoɲodula bawo i man a lame. Bari wo bee nin a ta, moxo xotelu si dun no wo dula. ⁷ Wo le x’a tu, Ala xa lun xote sigi, nin wo mu «bi» ti. Waxati jan tanbita, wo xo, a xa wo xumo dun mansaxe Dawuda da, xumo men nin n birin a fola xo: «Nin alu xa Ala xumaxanŋo me bi, alu xana alu sondonmo xoleya.» ⁸ Awa, Ala xa tofoɲodula men lahido ta, nin Yosuwe tun sinta xa Banisirayila dinŋolu ladun non, Ala tun me lun xote la xumo fo tugun. ⁹ Wo ɲa ma, Ala x’é tofoɲo tili woorowulananŋo ɲa men, wo ɲoxon tofoɲo be Ala la jama du ɲen. ¹⁰ Bawo moxo men je dun Ala la tofoɲodula, wo s’í tofoɲo a la baarolu la, í xo Ala x’é tofoɲo a talu la ɲa men. ¹¹ Alan x’e balan xa dun wo tofoɲodula, walasa moxo si dunbalo xana tu í xo Ala foxanmutabalolu dunbalo tuta ɲa men xotonin. ¹² Ala la xumo mu fen nilama le ti. Barako b’a to, a da xa di xa tanbi fan dafulo xan. A si dun fo xa si moxo subo nin a niyo te ma, fo xa si xulukunŋolu nin senbo te naaniyo ma. A be moxo sagolakuwolu nin a miirilakuwolu segesegela x’e lon. ¹³ Dafen si nte dugunin Ala ma. Fenŋo bee balamaxulunŋo nin i feeneninŋo le be a ɲa xoto. N bee be nala i ɲafola ate le ɲen. ¹⁴ Sadaxalasibaxa kuntigiba be n kun. Wo mu Isa le ti: Ala Dinxe, men yeleta fo sanŋo to. Wo xanma, alan xa tu sinsinnin n na lannaya xan, lannaya men, nin n b’a foxan. ¹⁵ Sadaxalasibaxa kuntigiba men be n kun, wo nte moxo ti men me hinna n na, xa n deema n na barakentanɲa to. N na sadaxalasibaxa kuntigiba fan xotobota ɲa bee do ma í xo ntelu, bari a man junube ke. ¹⁶ Wo xanma, alan x’e sodun neematigi Ala la, siginin a la mansasigilanŋo xan, lannaya jonjonŋo to, walasa n x’a la hinno nin a la neemo soto, walasa n xa deemalo soto a tumo to.

¹ Awa, sadaxalasibaxa kuntigiba fen wo fen be sugandila hadamadinŋolu to, Ala be wo lasigila x’a bula a la baaro la, walasa a xa moxo tolu deema. Moxolu be fenŋo mennu dila Ala ma, anin i la sadaxolu, a si wolu lasi Ala ma i la junubolu koso. ² Moxo mennu man Ala la sariya lon, anin mennu be filila xa Alasilo bula, sadaxalasibaxa kuntigiba si hinna wolu la, bawo ate du fan mu wolu ɲoxon barakentan ne ti. ³ Wo xanma, a xa xan xa sadaxo do bo a fan na junubolu xanma, í xo a b’a bola jama ta xanma ɲa men. ⁴ Moxo si me don bunɲa di no í fan ma xa ke sadaxalasibaxa kuntigiba ti. Ala le be í kilila a xanma, í xo a xa Haruna kili a xanma ɲa men. ⁵ Wo be ɲa men, Kirisita du man a fan bunɲa, xo ate be kela sadaxalasibaxa kuntigiba ti a fan ma. Ala le x’a ke a ti. A x’a fo Kirisita ma xo: «Ite le mu ń Dinxe ti, kabirin bi nte keta í Fa ti.» ⁶ Ala x’a fo Kirisita ɲen Kitaabo dula xote xo: «Í mu sadaxalasibaxo ti fo abada, a be í xo Melikisedeki ta keɲa.» ⁷ Isa tun be duguxulo xan waxato men, a tun x’a lon xo sinŋo be Ala ɲen x’a kisi saya ma. A xa Ala matara, x’a matara barako to, fo xa xasixanba nin ɲajiyo labo. Ala x’a la taralo jaabi a la Alaɲasilanɲa xanma. ⁸ Haali x’a tara a mu Ala Dinxe le ti, wo bee nin a ta, a x’a digi xa Ala sago ke tooro xono. ⁹ Wo ɲa ma, a xa bunɲa dafaninŋo soto tumo men, mennu bee be a sago kela, a keta wolu ɲen kisili banbalo sabaabubaxo ti. ¹⁰ Ala x’a fo xo a mu sadaxalasibaxa kuntigiba ti, í xo Melikisedeki ta keɲa. ¹¹ Awa, n badinŋolu, fen kiika be n ma x’a fo alu ɲen wo xan, bari a xa xole x’alu lafaamu a kuwo la, bawo alu lafaamu man di. ¹² Saasandin in tun xa xan x’a tara xo alu keta karanmoxolu ti, bari haalibi alu maakuwo b’a la x’alu laxaran Ala la xumo ku fololu ma. Alu be le í xo deenano, alu me domoli xulin domo no fo nono doron. ¹³ Moxo men me fen xote domo no fo nono, wo mu deenano le ti, a man ku tilinnin lon. ¹⁴ Bari domoli xulinŋo mu moxoba lelu ta ti. Wolu x’a digi dalinno fe, xa ɲuma nin jaxumanŋo faranfansi, x’e bo i ɲoxo to.

¹ Wo ɲa ma, xaranŋo mennu be kela lannaya damuto, alan xa tanbi wolu xan, xa taxa ɲa xaranŋo la, men mu lannayabaxa moninŋolu ta ti. N man xan xa alu xaran fenŋo mennu la tugun wolu fele: X’é xodi kewale jaxolu la, xa la Ala la, ² batiselolu nin bululanxanŋo, xa Ala matara moxolu ɲen, nin furekuniyo kuwo, anin kiiti labanŋo kuwo. ³ Alan xa taxa ɲa! N be nala wo le kela nin Ala sonta. ⁴ Moxo mennu be i koppala i jigo xotolu ma, wo be di? I xa Ala la keneya soto xa ban. I xa Ala la nilifenŋo nene, xa Ni Senunŋo soto. I x’a je xo Ala la xumo xa ɲin, i xa sinin duniya sintigiya nene. Bari wo bee xan, i saagita i jigo xotolu ma. A me no x’e lana lannaya ma tugun, bawo a be le í xo i xa Ala Dinxe layele gengenyiro xan tugun, x’a lamalu moxolu bee ɲala. ⁷ Sanjiyo be nala duguxulo men xan xa siya, nin a xa senefenŋolu lafalin a senebaxolu ɲen, wo duguxulo si Ala la neemo soto. ⁸ Bari nin wo duguxulo xa ŋanin tuwolu nin bin ŋaninma lelu labo, a me fusi ɲiɲa, a nin Ala la dango soto te man jan. A labanŋo la, ta si a jani. ⁹ Ń badin xanuninŋolu, haali nin n be xumala ten, n be lanin a la xo alu be sila beto xan, nin wo mu kisilo silo ti. ¹⁰ Ala nte kuɲumalonbali ti, a me ŋina alu la kebaaro kun, bawo alu x’alu la xanuya yita a la, alu badin lannayabaxa tolu maakuwo ɲiɲalo fe. Haalibi du, alu be wo kela. ¹¹ Bari men xa di n ɲen, wo mu le alu bee balanninŋo xa tu fo labanŋo lunŋo, walasa alu gigo be men xan, alu xa wo xoyimanŋo soto. ¹² Alu xana ke salabaxantunnu ti, bari moxo mennu be lannaya kela x’e timinadiya, xa Ala la lahidufenŋo soto ke ti, alu ke wolu ladigibaxolu ti. ¹³ Ala xa lahido ta Burehima ɲen tumo men, a x’é xali a fan toxo la, bawo fen nte je men xa bun ate fan ti, a tun si í xali men na. ¹⁴ A xo: «Ń si duwabete í ɲen, xa bonson kiika di í ma.» ¹⁵ Burehima muɲata, xa Ala laxono. Ala xa men lahido ta a ɲen, a xa wo soto. ¹⁶ Nin moxolu b’e xalila, i si wo ke fen na, men xa bun i ti. Xalilo mu soosolo bee dafaxalanŋo le ti. ¹⁷ Men tunnu xa xan xa Ala la lahidufenŋolu soto ke ti, a xa xalilo la a la lahido xan, walasa x’a laxoyiyabete wolu ma, xo a xa lahido men ta, wo me bo a ma. ¹⁸ Ku fula be je, mennu me bo no a ma, nin wo mu Ala la xalilo nin a la lahido ti. Wo lelu b’a yitala xo Ala me faniya fo. Wo ɲa ma, ntelu mennu x’e xarifa a ma, wolu si n jusudun bete, xa n bulo xutu wo gigi foninŋo ma. ¹⁹ Wo gigo mu ntelu la nilamaya tonte le ti, í xo negeba men be batonŋo tomutala jiyo xan. A be barakenin, a be lonin bete. Wo gigo tanbita Alabatusuba totegefaano la, xa dun fo xono to. ²⁰ Isa dunta non ntelu ɲa, anin ntelu ɲen. Ate keta sadaxalasibaxa kuntigiba ti fo abada, í xo Melikisedeki ta keɲa.

¹ Wo Melikisedeki tun mu Salemu mansaxe nin Ala Xototaninba la sadaxalasibaxo le ti. Burehima tun taxata mansaxe dolu kele x’e no. X’a boto tu non, Melikisedeki x’a kunben xa duwa a ɲen. ² Burehima xa fen wo fen soto wo kelo to, a xa wolu bee jakko di a ma. Melikisedeki xoto le xo «tilinninɲa mansaxe». Anin du, Salemu mansaxe le tun mu. Wo xoto xo «heero mansaxe». ³ Moxo man fa nin na nin buruju lon a ma. A bangexuma nin a sayaxuma man fo dula si. A be le í xo Ala Dinxe: A mu sadaxalasibaxo ti fo abada. ⁴ Alu a mafele Melikisedeki xa bun ɲa men. N mamaxe Burehima xa fenŋo mennu soto kelo to, a xa wolu to fen ɲalamalu jakko di a ma. ⁵ Lewi bonsonŋo moxo mennu mu sadaxalasibaxolu ti, yanmaro be wolu bulu, sariya la, xa jakko muta Banisirayila dinŋolu la, nin wolu mu i fannu badinŋolu ti, haali x’a tara wolu dulu mu Burehima bonsonŋo lelu ti. ⁶ Melikisedeki tun nte Lewi bonson ti, bari a xa jakko muta Burehima la. Ala tun xa lahido ta moxo men ɲen, nin wo mu Burehima ti, Melikisedeki duwata wo ɲen. ⁷ Awa, duwawo kebaxo le xa bun duwawo be kela men ɲen ti. ⁸ Lewi bonsonŋo moxo men tunnu be jakko mutala, wolu tunnu mu moxolu ti, mennu be sala. Bari Melikisedeki men xa jakko muta Burehima la, a fota ate la kuwo to xo a be í nila. ⁹ N si a fo xo Lewi bonsonŋo mennu xa jakko muta, wo dulu xa jakko bo x’a di Melikisedeki ma, i mamaxe Burehima la dinmalo to. ¹⁰ I xa jakko di Melikisedeki ma, bawo haali nin Lewi tun man wulu wo tuma, a tun be a mamaxe Burehima tiyo to, Melikisedeki xa wo kunben tumo men, xa jakko muta a la. ¹¹ Sariya men dita Banisirayila dinŋolu ma, Lewi bonsonŋo la sadaxalasiyo le tun mu wo sigixulo ti. Nin wo sadaxalasiyo baaro tun keta baara dafanin ti, kun tun me ke a la, sadaxalasibaxa xote xa na, a be í xo Melikisedeki keta ti ɲa men. Sadaxalasibaxolu tunnu si tu xa bo Lewi xabiilo la doron, í xo Haruna. ¹² Awa, nin sadaxalasibaxaya yelemata, sariya du xa xan xa yelema. ¹³ Wo kuwolu fota n Marigi men na kuwo to, wo bota bonson xote to, mennu bada man sadaxalasibaxaya ke. ¹⁴ Sikka nte a to xo Marigi mu Yuda bonsonŋo do le ti. Kila Musa xumata sadaxalasibaxolu xan tumo men, a man fen fo Yuda bonsonŋo la kuwo to. ¹⁵ Isa keta sadaxalasibaxa xote ti í xo Melikisedeki. Wo keta sabaabu ti x’a toxoyiya xo Isa la sadaxalasibaxaya nin Lewi xabiilo ta nte sila la. ¹⁶ Wo xoto, xo wo sadaxalasibaxo man sigi x’a la hadamadinŋolu la sariya sigininŋo xan; bari a la nilamaya men nte banna, a keta a ti wo le barako to. ¹⁷ Bawo Ala la xumo b’a fola xo: «Í si tu sadaxalasibaxaya la fo abada, a be í xo Melikisedeki ta keɲa.» ¹⁸ Wo ɲa ma, sariya xoto bulata, bawo barake tun nte a la xa moxolu kisi, nafa du nt’a la. ¹⁹ Kila Musa la sariya man sin xa fen si ke fen dafaninŋo ti. Bari saasa, n xa gigi ɲalama soto, men si a tu n s’i sutiya no Ala la. ²⁰ X’a kafu wo bee ma, Ala x’é xali. Tolu keta sadaxalasibaxolu ti, x’a tara Ala man í xali. ²¹ Bari Isa be kela sadaxalasibaxo ti tumo men, Ala x’é xali ten xo: «Nte Marigi Ala xa ń xali, nte me ń xumaxanŋo bo a ma: “Í si tu sadaxalasibaxaya la fo abada.” » ²² Wo le x’a tu, Isa keta telabenbaxo ti Kafuxanŋo men to, wo xa fisa folo ti. ²³ Fen xote be je men x’e tala: Sadaxalasibaxa tolu siyata, bawo saya tun b’a tula i me taxa no ɲa i la baaro la. ²⁴ Bari Isa be í nila fo abada, a be tula sadaxalasibaxaya la kadawu. ²⁵ Wo le x’a tu, mennu je i sodun Ala la, ate la kafuɲoxoya fe, a sinŋo b’a ɲen xa kisili banbalo di wolu ma, bawo a b’é nila kadawu, xa Ala matara i ɲen. ²⁶ N maakuwo tun be sadaxalasibaxa kuntigiba men na tigi tigi, Isa le mu. A xa senu, fe nte a la, junube nte a la. Ala x’a tala junubekelalu ma, x’a xotota bete fo sanxulo to. ²⁷ A maaku nte a la xa sadaxa bo lun wo lun, a fan na junubolu xanma folo, wo xo xa sadaxolu bo moxo tolu la junubolu xanma, í xo sadaxalasibaxa kuntigiba tolu tunnu b’a kela ɲa men. A x’a fan di xa ke sadaxo ti tumo men, a xa wo ke sinɲa kilinpe le. A waseta ten fo abada. ²⁸ Musa la sariya tun xa moxo mennu lasigi sadaxalasibaxa kuntigibaya la, wolu tunnu mu moxo dafabalo lelu ti. Bari Ala x’é xali xa xumo men fo sariya xofe, wo keta a Dinxe lasigilo ti sadaxalasibaxa kuntigibaya la, wo men xa bunɲa dafaninŋo soto fo abada.

¹ N be xumo men fola, wo xulo fele xo, ɲin ɲoxon sadaxalasibaxa kuntigiba be n kun, a be siginin sanŋo to, mansasigilanŋo xan, noorotigi Ala kininŋo xoto. ² A be baaro la bun senumanŋo men xono, wo mu Alabatusuba tillisima soobe le ti, moxo man men lo. Marigi le mu wo lobaxo ti. ³ Sadaxalasibaxa kuntigibalu bee be lasigila le walasa xa nilifen sadaxolu nin sadaxa tolu lasi Ala ma. Wo xanma, waajibo le tun mu Kirisita du xa do bo. ⁴ Nin a tun be duguxulo xan, a tun me haali ke sadaxalasibaxa ti, bawo sadaxalasibaxa xotelu be je, mennu be nilifen sadaxolu lasila x’a la sariya xan. ⁵ Wolu la sadaxalasibaxaya baaro mu sanxulo ta ladigibaaro nin i taagumanseedo le ti. Kila Musa be Alabatusuba tillisima lola tumo men, Ala x’a fo a ɲen xo: «Nte xa men yita í la kuro xan, a ke wo ɲoxonŋo ti.» ⁶ Bari saasa, Kirisita la baaro xa bun sadaxalasibaxa tolu ta ti bete bete; bawo Kafuxanŋo men xa fisa folo ti, Isa keta telabenbaxo ti Ala nin moxolu te wo to. Wo Kafuxanŋo be siginin lahidolu xan, mennu xa fisa. ⁷ Nin fe tun man je Kafuxan folo la, kun tun me ke a la xa fulanan bula a no to. ⁸ Bari Ala xa jalago le soto a la moxolu ma, men x’a bula a fola xo: «Lunŋo be nanin, nte si kafuxan kuto do sigi nte nin Banisirayila moxolu nin Yuda moxolu te. ⁹ Wo me ke í xo ń tun xa men ke ń nin i mamaxelu te, ń x’e muta i bulolu ma lun men, x’e labo Misira. I man wo kafuxanŋo labatu. Wo xanma, ń man ń hakilo tu i kun tugun. Marigi xo ten. ¹⁰ Wo lunŋolu tanbo xo, nte be nala kafuxanŋo men sigila ń nin Banisirayila moxolu te, wo fele: Nte si ń na sariyalu sigi i hakilo la, x’e safe i sondonmekunŋo la. Nte si ke i la Ala ti, i si ke nte la moxolu ti. ¹¹ Moxo si me a jamanadinɲoxo walla a badinŋo laxaran xo: “Marigi lon”. Bawo i bee si nte lon, moxoba fara moxondin xan. ¹² Nte s’i la tilinbaliyakuwolu yaafa, ń me ń hakilo tu i la junubolu la bitugun.» ¹³ Ala xa Kafuxan Kuto xumo fo tumo men, wo xa Kafuxan folo ke xotomanŋo ti. Awa, Kafuxan folo men xotota, nin a waxato tanbita, wo xa xan xa lasanko.

¹ Kafuxan folo waxato, sariya do tunnu be je, mennu be batulo keɲa xan. Bun senumanŋo do du tun lota duguxulo xan. ² Alabatusuba tillisima do tun lota, men be talanin dula fula ti. A dula folo kilita xo dula Senumanŋo. Lanpa sifa dolu, nin tabalo, nin buuro mennu be dila Ala ma sadaxo ti, wolu tunnu be non. ³ Totegefaano tun be wo dula fulo te. Faano boxo do kilita xo dula Senumanba. ⁴ Sadaxajanilan sanuma tun be non, digico be janila men xan, anin Kafuxanŋo waxande; sano be a dula bee ma. Sanudaxo do be wo waxande xono, manne b’a to, anin Haruna la guma men nerunta, anin kuru walafolu, Kafuxanŋo xumolu safeta mennu xan. ⁵ I xa meleke danfatanma fula dara, x’e lalo wo waxande xan. Wolu mu taagumanseedo le ti x’a yita xo Ala be non. I danfatanŋolu tunnu be tosabanin junube yaafa sadaxo bodula kunna. Bari wo kuwolu bee ɲafowaxato nte saasa ti. ⁶ Alabatusuba tillisima nin a xonofenŋolu bee tobenninŋo xo, sadaxalasibaxolu si dun dula folo xono lun wo lun, xa i la baaro ke. ⁷ Bari sadaxalasibaxa kuntigiba kilin doron si dun dula fulananŋo xono sinɲa kilinpe doron san wo san. A me dun je marafen jelo xo. A si wo lasi Ala ma, a fan nin moxolu la filolu nin i la junubolu yaafo xanma. ⁸ Wo ɲa ma, Ni Senunŋo b’a yitala n na, xo dula Senumanba silo man dayele folo, fo Alabatusuba tillisima folo xa bo je tumo men. ⁹ Ɲin bun folo in mu bi waxati in kuwolu taagumanseedo le ti. A b’a yitala n na xo nilifen sadaxolu nin marafen sadaxolu tunnu me i bobaxolu jusukunŋo senuya no. ¹⁰ Wolu nte fen xotelu ti fo domolifenŋolu nin minfenŋolu, anin jilasenuyalo ɲasifa kiika. Wolu bee tunnu mu hadamadin laado lelu ti, mennu sigita i kunna fo waxato men, Ala nata fenŋo bee yelema. ¹¹ Bari Kirisita nata xa ke sadaxalasibaxa kuntigiba ti, walasa ntelu xa Ala la fen ɲumalu soto. Kirisita dunta Alabatusuba tillisima men xono, wo be folo ɲa, a be dafanin a ti. Moxo man wo lo, ɲin duniya in ta du nte. ¹² Kirisita dunta dula Senumanba sinɲa kilinpe le. A waseta ten fo abada. A nin bakoton jelu nin ɲinsirin jelu man dun je. A x’a fan jelo le di xa n kunbo, xa n bo n na junubolu xono. Wo kunbolo barako nte banna fo abada. ¹³ Awa, moxo mennu be noxonin Ala ɲa xoto, bakotonŋolu nin tuuralu jelo anin ɲinsi janininŋo buguto tunnu be kela wolu xan x’e banto to senuya. ¹⁴ Bari Kirisita jelo ken, wo si senuyalo ke xa tanbi wo xan bete bete. A x’a fan di Ala ma, xa ke sadaxo ti, fe nte men na, Ni Senunŋo barako to, wo men be je fo abada. A jelo si n jusukunŋo senuya xa bo ku nafantanŋolu xono, walasa n xa baaro ke Ala nilama ɲen. ¹⁵ Awa, wo le x’a tu, Kirisita keta Ala nin moxolu te Kafuxan Kuta telabenbaxo ti. A sata xa ke junubolu sara ti, mennu keta Kafuxan folo xoto. Wo keta, walasa Ala xa mennu kili, wolu si Ala la neemafen banbalolu soto ke ti, a tun xa mennu lahido ta wolu ɲen. ¹⁶ Nin moxo do xa safe ke jannin a xa sa, safe men b’a yitala a ke xa xan xa tala ɲa men, waajibo le mu a tigo xa sa folo. ¹⁷ Wo safe me labaara no x’a safebaxo nilama tu. Nin a sata le mu a si labaara. ¹⁸ Awa, wo le x’a tu, haali Kafuxan folo du man sigi x’a tara jelo man bon. ¹⁹ Musa xa sariya xumolu bee fo jama ɲen tumo men, a xa ɲinsirinŋolu nin bakotonŋolu jelo ta, xa jiyo ta, xa do sari sariya Kitaabo nin jama bee xan, hisope yiribulo nin saaxati wulenŋo la. ²⁰ Wo xo, a xo: «Ɲin jelu in mu alu nin Ala te Kafuxanŋo taagumanseedo le ti, Ala xa men nabatulo waajibiya alu ma.» ²¹ Wo ɲa kilinŋo ma, Musa xa jelo sari sari Alabatusuba tillisima nin Ala batulimiranŋolu bee ma. ²² Sariya la, jelo le be fenŋolu tala bee senuyala. Nin jelo man bon, junubeyaafo me soto. ²³ Alabatusuba tillisima xonofenŋolu tunnu mu sanxulo xono fenŋolu taagumanseedo le ti. Awa, nin sanxulo to fenŋolu taagumanseedolu tunnu xa xan xa senuya ten, sanxulo fenŋolu fannu maakuwo be senuya xote la, men be wolu ta ɲa. ²⁴ Kirisita dunta bun senumanŋo men xono, moxo bulu man wo lo. A dunta bun senuman soobe le xono, men nte taagumanseede gansan ti. A dunta sanxulo fan ne xono, walasa x’é lo Ala ɲa xoto saasa, ntelu ɲen. ²⁵ A man dun je walasa x’a fan ke sadaxo ti sinɲa kiika ti, í xo sadaxa­lasibaxa­ kuntigiba be dunna dula Senumanba xono ɲa men san wo san, a nin jelo, men nte a fan jelu ti. ²⁶ Nin wo nte, Kirisita tun xa xan xa tooro sinɲa kiika, kabirin duniya data. Bari saasa, duniya laban in na, a nata ke sadaxo ti sinɲa kilin doron, walasa xa junubo ban a fan sadaxalo la. ²⁷ A lategeta xo moxolu xa sa sinɲa kilin doron, wo xo, Ala si kiito tege i xan. ²⁸ Wo be ɲa men, Kirisita du keta sadaxo ti sinɲa kilinpe, walasa xa moxo kiika la junubolu bo je. A si na tugun; wo nte junubeyaafo xanma ti tugun, bari a be nala a laxonobaxolu kisilo le xanma.

¹ Ala xa fenŋo mennu lahido ta n ɲen, wolu taagumanseedo doron ne be Musa la sariya xono. Sariya nte wo fenŋolu keɲa jonjonŋo yitala n na. Moxo mennu x’e sodun Ala la, xa wo sadaxa sifa kilin innu lasi a ma san wo san kadawu, sariya man wolu ke no moxo dafaninŋolu ti. ² Nin wo sadaxabobaxolu tunnu senuyata sinɲa kilin doron xa ban, i jusukunŋolu tunnu me i jalagi i la junube si kuwo to tugun. I tunnu si sadaxabo dabula. ³ Bari a man ke ten. Wo sadaxolu kunŋo mu le, xa moxolu hakilo bula i la junubolu kun san wo san. ⁴ Bawo tuura jelolu nin bakoton jelolu me junubolu bo no je abada. ⁵ Wo le x’a tu, Kirisita be nala duniya to tumo men, a xo Ala ɲen xo: «Í xo xo í nte marafen sadaxa nin nilifen sadaxa fe, bari í xa balo dara nte ma. ⁶ Sadaxa janitalu nin junube yaafa sadaxolu si man diya í ɲen. ⁷ Wo tumo la nte xo: “Ala, nte fele, ń be nala í sago kela, í xo a fota ń na kuwo to sariya kitaabo to ɲa men.” » ⁸ Awa, Kirisita x’a fo Ala ɲen folo xo: «Í nte marafen sadaxa, nin nilifen sadaxa, nin sadaxa janita, nin junube yaafa sadaxa fe, wolu man diya í ɲen.» Haali wo, i be sadaxala x’a la sariya la fo le xan. ⁹ Wo xo, a xo du xo: «Ala, nte fele, nte be nala í sago kela.» Wo ɲa ma, a xa batuliɲa folo bo je, xa kuto bula a no to. ¹⁰ Ala sago tun mu men ti, Isa Kirisita xa wo le ke. A x’a fan di Ala ma sadaxo ti sinɲa kilinpe, men barako nte banna fo abada. Wo xanma, n senuyata xa bo junubo xono. ¹¹ Sadaxalasibaxolu bee be i lola lun wo lun xa i la baaro ke. I be sadaxa kilin innu dila sinɲa kiika ti, mennu me junubolu bo no je abada. ¹² Bari Kirisita xa sadaxa kilinpe le lasi junubeyaafo xanma, men barako nte banna fo abada. Wo xo, a x’é sigi Ala kininŋo xoto. ¹³ A be tula non fo Ala x’a jaxolu mano xa na i ti a sinŋo xoto. ¹⁴ Wo ɲa ma, mennu senuyata xa bo junubo xono, a xa wolu ke moxo dafaninŋolu ti fo abada, a la sadaxa kilinŋo barako to. ¹⁵ Ni Senunŋo du be wo kuwo seedeyala n ɲen. A x’a fo xo: ¹⁶ «Marigi xo: Wo lunŋolu tanbo xo, nte be nala Kafuxanŋo men sigila ń nin i te, wo fele: Nte si ń na sariyalu safe i sondonmekunŋo la, x’e sigi i hakilo la.» ¹⁷ Wo xo, a xo du xo: «Ń hakilo me jigi i la filolu nin i la junubolu la tugun.» ¹⁸ Nin junubolu yaafata xa ban, kun nte a la tugun xa sadaxa bo junubeyaafo xanma. ¹⁹ Awa ń badinŋolu, Isa jelo men bonta, wo barako xanma, n hakilo lategeninŋo si dun no saasa dula Senumanba. ²⁰ A xa sila kuto nin nilamaya silo dayele n ɲen totegefaano to la, men tun be dula Senumanŋo nin dula Senumanba te. Wo totegefaano mu a balo le ti, men gengenta yiro ma. ²¹ Sadaxalasibaxa kuntigiba be n kun, men be siginin Ala la luwo kunna. ²² Wo xanma, alan x’e sodun Ala la n jusukunŋo bee la, lannaya jonjonŋo to. Bawo n jusukunŋolu senuyata, xa hakili jaxolu bo n na, anin n balo kuta ji senumanŋo la. ²³ N be gigo men na xumo fola, n x’e balan wo xa tu n na, bawo Ala men xa lahidolu ta n ɲen, ate mu xantigo le ti. ²⁴ Alan xa i hakilo tu i ɲoxo kun, walasa n xa i ɲoxo jusudun, ɲoxoxano nin kuɲumako xanma. ²⁵ Alan xana ɲoxo kamaro dabula, í xo dolu be wo kela ɲa men, bari n x’e ɲoxo so hakili la, bawo alu fannu ɲa b’a la xo Marigi la na sutiyata. ²⁶ Awa nin n xa tonɲa lon xa ban, nin n x’e tawu xa tu junubo kela, sadaxa xote si nte je tugun men si n na junubolu bo no n na. ²⁷ Do xote nte n ɲen xo, fo n silaninba xa sigi xa Ala la kiito nin ta fatimanba laxono, men be nala a jaxolu janila. ²⁸ Nin moxo wo moxo tun xa kila Musa la sariya sooso, hinna tun nte a to, wo si faxa x’a la moxo fula walla saba la seedeyalo xan. ²⁹ Wo be ɲa men, nin moxo men man Ala Dinxe jaate, Ala la Kafuxanŋo jelo men keta x’a senuya, a man wo mafele fen ti, a xa Ala Ni Senunŋo doxoya, men be neemo dila n ma. Wo tigo nin tooroba man xan bete bete ba xa tanbi Musa la sariya soosobaxo xan? ³⁰ N x’a lon xo men x’a fo xo: «Nte le mu tasarabaxo ti; nte si alu ta sara.» Anin du xo: «Marigi si kiito tege a la moxolu xan.» ³¹ Nin n dunta Ala nilama bulo xono kiito xanma, wo xa jaxu de! ³² Alu xa kuwo men je folofolo, alu i hakilo lajigi wo la. Wo waxato, alu xa Ala la keneya soto tumo men, alu xa tooro kiika nin keleba muɲa. ³³ Alu dolu nanita, xa mutakujaxu bee ɲala tumo men, alu tolu x’a yita wolu la xo alu nin i mu kilin ti. ³⁴ Alu nin kasolamoxolu kafuta i la toorolu to. Alu bulufenŋolu mutata alu la tumo men, alu sonta xa bono wolu to ɲaɲo to; bawo alu x’a lon xo naafulo do be alu kun men xa fisa, anin men si tu fo abada. ³⁵ Wo xanma, lannaya xoyo men be alu la, alu xana faaratu wo la. Baraajiba be wo la. ³⁶ Haalibi alu maakuwo be timinadiya la, walasa alu xa Ala sago ke. Nin wo keta, a xa fenŋo men lahido ta alu ɲen, alu si wo soto. ³⁷ A be safenin Kitaabo to xo: «Dondin, men xa xan xa na, wo si na. A me me tugun. ³⁸ Nte la moxo tilinninŋo si nilamaya soto lannaya fe. Bari nin a xa lannaya silo bula, a la kuwo me diya nte ɲen tugun.» ³⁹ Moxo mennu be sila beto bulala, xa taxa i fannu halagi, ntelu nte wolu do ti; bari mennu be tula lannaya la, xa i niyolu lakisi, ntelu mu wo lelu do ti.

¹ Lannaya mu ɲin ne ti xo: Í gigo be fenŋo men xan, wo soto be xoyiyanin í ma; walla í ɲa nte fenŋo men na, í b’a yitanin xo í ɲa be wo la. ² Alan mamaxelu la lannaya le x’a tu, i la kuwo diyata Ala ɲen. ³ N x’a lon lannaya le fe xo Ala xa duniya da a la xumo la. Wo ɲa ma, n ɲa be men na, nin wo mu duniya ti, Ala xa wo da fen jebalo la, nin wo mu a la xumo ti. ⁴ Abila la lannaya le x’a tu, a xa nilifen sadaxo di Ala ma, men xa fisa Kabila ta ti. A la lannaya xanma, Ala x’a jaate moxo tilinninŋo ti, bawo Ala fan x’a seedeya xo a sonta a la nilifenŋolu to. Haali nin Abila sata xa ban, haalibi a be xumala n ɲen a la lannaya koso. ⁵ Enoke la lannaya le x’a tu a sabalo tata xa taxa a ti Ala bata. Moxo si man a je tugun, bawo Ala x’a ta xa taxa a ti a bata. Kitaabo b’a fola xo jannin Enoke xa ta, xa taxa a ti sanŋo to, a la kuwo diyata Ala ɲen. ⁶ Moxo si me diya no Ala ɲen nin lannaya nte í la. Moxo men b’a fe xa í sodun Ala la, a xa xan xa la a la, xo Ala be je, anin xo a si a ŋininbaxolu baraaji. ⁷ Nuhun na lannaya le x’a tu, Ala x’a lasobi tumo men, xo kuwo do be nala kela, a xa Ala lame, x’a tara a ɲa man wo kuwo je folo. A xa xulunba dara walasa a nin a la dinbaya xa kisi. A la lannaya le x’a tu, kiito tegeta duniya xan, anin Ala xa ate jaate moxo tilinninŋo ti. ⁸ Burehima la lannaya le x’a tu, Ala x’a kili tumo men, a sonta xa Ala la xumo muta. Ala tun be nala jamano do dila a ma ke ti. A bota a fan na jamano to, xa silo muta, x’a tara a man a lon a be taxala jan men. ⁹ A la lannaya le x’a tu, Ala xa jamano men lahido ta a ɲen, a sigita non xa ke siginfe ti. A keta tilliso xono, í xo Nsiyaxa nin Yaxuba, lahidu kilin in tun tata wo men dulu ɲen. ¹⁰ Burehima tun yilo be galluba soto ma, men mu gallu wulibalo ti. Wo gallo loɲa lategebaxo nin a lobaxo mu Ala le ti. ¹¹ Saran na lannaya le x’a tu, haali a xotonin banninŋo, a sinta xa dinŋo wulu, bawo Ala men tun xa wo lahido ta a ɲen, a lata a la xo wo mu xantigo le ti. ¹² Wo ɲa ma, a xe Burehima, men tun nte fusi xote laxononin nin saya nte, wo kilin xa bonson kiika soto í xo sanxulo ma loololu, anin xooxojida la keɲo, wo men me dan no. ¹³ Wo moxolu bee sata x’e tu lannaya to. Ala tun xa fenŋo mennu lahido ta i ɲen, i man wolu soto folo. Bari i keta í xo nin i tunnu ɲa be i la dulajan, xa ɲaɲa i la. I fannu x’a fo i da la xo i mu luntanŋo nin siginfe lelu ti ɲin duguxulu in xan. ¹⁴ Mennu la fo keta ɲin ti, wolu b’a yitala xo i be fasuwo do ŋininna. ¹⁵ I bota jamano men to, nin i tunnu x’e miiri xa nimisi non ma, i tunnu si ɲa soto no x’e koppa non ma. ¹⁶ Bari i tunnu be fasuwo do ŋininna men xa fisa, men be sanŋo to. Wo le x’a tu, Ala si son wo moxolu x’a kili xo i la Ala; bawo a xa gallo do toben x’a bula i ɲa. ¹⁷ Burehima la lannaya le x’a tu, Ala x’a xotobo tumo men, a sonta x’a dinxe Nsiyaxa di, a xa ke sadaxo ti. A sonta a dinxe kilinpe xa ke sadaxo ti, x’a tara Ala tun xa lahido ta a ɲen. ¹⁸ Ala tun x’a fo a ɲen xo: «Ń xa bonsonŋo men lahido ta í ɲen, wo be bola Nsiyaxa le to.» ¹⁹ Burehima tun x’a jaate xo a sinŋo be Ala ɲen xa Nsiyaxa lakuni xa bo furelu to. Wo le x’a tu, Ala x’a dinŋo saagi a ma. A keta í xo nin a kunita le xa bo furelu to. ²⁰ Nsiyaxa la lannaya le x’a tu, a xa duwa ke Yaxuba nin Esawu ɲen, i sininŋo si ke men ti kuwo la. ²¹ Yaxuba la lannaya le x’a tu, a sa tumo, a duwata Yusufu dinŋolu ɲen, anin a x’é tintin a la guma la, xa Ala batu. ²² Yusufu la lannaya le x’a tu, a be nala sala tumo men, a xumata Banisirayila dinŋolu labo xan Misira jamano xono, anin a xumata a xulolu xa xan xa ke ɲa men a sa xofe. ²³ Musa bangebaxolu la lannaya le x’a tu, Musa wuluwo xo, i x’a dugu xaru saba xono, bawo i x’a je xo a xa keɲin. I man sila xa Misira mansaxe la ku lategeninŋo sooso. ²⁴ Lannaya le x’a tu, kila Musa bunɲaninma, a x’é ban a xa kili xo Farawuna dinmuso dinŋo. ²⁵ A nin Ala la moxolu xa tooro i ɲoxo fe, a xa wo fisiya don ti xa ɲaxali junubekuwolu la, mennu mu waxatindin ku ti. ²⁶ A x’a jaate xo xa doxoya í xo Kirisita doxoyata ɲa men, nafa be wo la xa tanbi Misira naafulo bee xan. Ate ɲa tun be fen xote le to, nin wo mu Ala la baraajo ti. ²⁷ Musa la lannaya le x’a tu, a bota Misira. Mansaxe tun diminta a xoto, bari a man sila wo ɲa. Ala men nte jela, a ɲa tun be wo le to. Wo xanma, a man yilanyilan. ²⁸ Lannaya le x’a bula Tanbinxansallo sigila, xa jelo sari sari bunda yirolu ma, walasa meleke halagilila xana maxa Banisirayila din fololu la. ²⁹ Lannaya le x’a tu, Banisirayila dinŋolu xa Xooxoji Wulenŋo tege í xo duguxulu jaro. Bari Misirangolu xo x’e be tegela tumo men, jiyo xa i bee domo. ³⁰ Lannaya le x’a tu, Banisirayila dinŋolu xa Yeriko tato laminin tili woorowula tumo men, a boyita tili woorowulananŋo lunŋo. ³¹ Lannaya le x’a tu, jadomuso do keta je xo Arahabu, Ala foxanmutabalolu halagita xa ate tu je, bawo Banisirayila dinŋo mennu wulita xa taxa jamano mafele dibi to, a xa wolu mutakubete. ³² Awa, ń si a fo di tugun? Waxati nte ń bulu xa xuma Jedewon nin Baraki nin Samuson nin Jefite nin mansaxe Dawuda nin Samuyeli nin kilalu xan. ³³ Lannaya le x’a tu, i xa mansayalu no, xa i taxama tilinninɲa silo xan, xa Ala la lahidufenŋolu soto, xa warabalu dalu taxun. ³⁴ I xa i dolu bula ta ɲaɲaninba to, bari ta man fusi ke wolu la. Dolu kisita fanŋo masiibo ma. I dolu tunnu barako xa doxo, bari i xa barako soto. Dolu keta xe fatinŋolu ti keledula, fo jamana xote keledinŋolu x’e bori i ɲa. ³⁵ Muso dolu la lannaya xanma, i la furelu kunita xa di i ma. Lannayabaxo dolu toorota fo xa doxola i faxala; bari wolu man son i xa bo bulo to. Wolu sonta saya ma, walasa i si kuni xa nilamaya soobe soto. ³⁶ Dolu sonta moxolu xa jele i ma, xa i buwo gaɲo la. Joloxo keta dolu la, xa i bula kaso la. ³⁷ I xa dolu bun kurolu la xa i faxa, xa dolu tokutun fula ti yiritege siyo la, walla xa i faxa fanŋo la. Dolu tunnu bulutoxulunŋo be taxala dula nin dula. Saaxagulo walla bagulo le tun mu i la dunfaanolu ti. Moxolu tunnu b’e toorola, xa i mutakujaxu. ³⁸ I jenjenninŋo tun b’e mininmininna fuxolu nin kurolu to, x’e dugu kuruwuwolu nin dinxolu xono; bawo duniya tun nin i man xan. ³⁹ Wo moxolu bee la kuwo diyata Ala ɲen i la lannaya le xanma. Wo bee nin a ta, Ala xa men lahido ta, i man wo soto folo. ⁴⁰ Ala tun xa fen xote le latege n bee ɲen, men xa fisa. Ala tun nte a fe wolu xa dafaninɲa soto ntelu xo.

¹ Ń badinŋolu, ɲin lannayabaxa jamaba in be n namininnin. Wo xanma, fen wo fen si n bali xa taxa ɲa lannaya taxamo to, alan xa wolu bee bula. Alan xa junubo bula, wo men xa tari x’é noto n na. Ala xa n bula boro men na, alan x’e balan wo boro to. ² Alan x’e ɲa tu Isa to, n na lannaya damuto nin a labanŋo be men bulu. A xa gengenyiro xan saya muɲa. Maluya men be gengenyiro xan saya la, a man wo jaate; bawo ɲaxalo men tun b’a ɲen wo xo, a ɲa tun be wo le to. Saasa a be siginin mansasigilanŋo xan, Ala kininŋo fe. ³ Ate men xa ɲin ɲoxon tooro muɲa kujaxukelalu bulu, alu i miiri ate ma, walasa alu xana sege, anin alu juso xana doxoya. ⁴ Alu man junubo kele folo fo wo kelo xa si saya ma. ⁵ Men x’alu tonben í xo fa b’a dinŋo tonbenna ɲa men, wo la xumo bota alu xono ba? A xo: «Ń din, nin Marigi xo x’a be í latilinna, í xana wo bataramuta. Í balo xana faxa í ma, nin a x’é laxosi. ⁶ Bawo Marigi be men xanula, a si wo latilin, dinŋo fen wo fen na kuwo xa di a ɲen, a si wolu bee busa.» ⁷ Alu Ala la latilinni guma muɲa; bawo Ala be alu jaatenin a dinŋo lelu ti. Din joman be je nin a fa nte a latilinna? ⁸ Dinŋolu bee be latilinna le. Nin alu man natilin, alu nte yeerewulu ti, alu nte din soobelu ti. ⁹ Alan x’e miiri n falu ma duguxulu in xan jan. I xa n natilin, n dulu x’e bunɲa. N man xan ba xa xulu bete bete n Fa men be sanŋo to le ɲen, walasa n xa nilamaya soobe soto? ¹⁰ N fa mennu be duguxulo xan xa n natilin waxatindin, i fannu hakiliya la; bari Ala be n natilinna n na nafa le xanma, walasa n xa senuya í xo ate xa senu ɲa men. ¹¹ Moxo si me ɲaɲa a be latilinna tumo men, a be jusula le. Bari wo keta mennu ɲen xaran ti, a si falin heero nin nilamaya tilinninŋo la wolu ɲen. ¹² Wo le x’a tu, alu niyo ke alu fannu to, alu xunbalinkunŋolu xa fata jarajarala. ¹³ Alu i taxama sila tilinninŋolu xan; walasa alu sin yellaninŋolu xana silo bula, bari i xa kendeya. ¹⁴ Alu a ŋinin benŋo xa ke alu nin moxo bee te, anin alu xa senuya; bawo nin alu man senuya, alu si ɲa me la Marigi xan. ¹⁵ Alu i korosi moxo si xana í sinbo Ala la neemo to. Moxo si xana ke í xo yirililli xunimanŋo, baxo be men na. A si falin, xa moxo kiika xono fa a baxo la. ¹⁶ Alu i korosi moxo si xana ke jado ti alu to, xa fen senumanŋolu toxosi í xo Esawu, wo men x’a la xotoniyo fiiri kini miran kilin na. ¹⁷ Alu x’a lon xo a tun b’a fe x’a fa la duwa soto. Bari son man ke wo ma a ɲen. A man ɲa si soto a ma xa wo yelema, haali nin a xasito xa wo ŋinin. ¹⁸ Alu man i sodun fen na, maxo tun si ke no men na. Wo tun mu Turusinna kuro le ti, ta fatinba nin dibo nin sanjifinba nin foɲoba, ¹⁹ nin buutu foxanŋo nin xumaxanŋo tunnu be je. Banisirayila dinŋolu xa wo xumaxanŋo me tumo men, i x’a ŋinin xo xuma xana ke i ɲen tugun x’a kafu wo ma. ²⁰ Kankero men lata i ɲen xo: «Moxo wo moxo maxata wo kuro la, haali nin a keta marafenŋo le ti, wo xa bun kurolu la, x’a faxa», i man fatiya wo xumo ɲa. ²¹ Wo kuwo men keta Turusinna kuro dula, wo tun mu silanɲa kuba men ti, fo kila Musa fan x’a fo xo: «Ń be jarajarala, silanɲa kujaxo bulu.» ²² Bari atelu kennu x’e sutiya Siyon kuro le la, anin Ala nilama la galluba, nin wo mu sanŋo to Yerusaleme ti, anin a meleke wulu kiika. ²³ Ala la moxo bangenin folo mennu toxo safeta sanŋo to, alu x’e sodun wolu la jama la, mennu be ɲaxalo to. Alu x’e sodun Ala la, wo men be nala kiito tegela moxolu bee xan, x’e sodun moxo tilinninŋolu la, mennu sata nin i niyolu taxata Ala bata. ²⁴ Alu x’e sodun Isa la, wo men mu Kafuxan Kuto telabenbaxo ti, x’e sodun a jelo bonninŋo la, wo men jelo barako xa bun xa tanbi Abila jelo xan. ²⁵ Wo to, alu i korosi. Men be xumaxan alu ɲen, alu xana i ban xa wo lame. Mennu x’e ban x’e lasobibaxo lame duguxulu in xan, wolu man kisi Ala la ɲangilo ma. Wolu man kisi jan men, sakuta ken ntelu mennu xumanɲenbaxo be bola sanŋo to. Nin n x’e xodi wo la, n me kisi Ala la ɲangilo ma fewu. ²⁶ Xotonin, a xumaxanŋo xa duguxulo lajarajara; bari saasa, a xa ɲin lahidu in ta n ɲen xo: «Ń si duguxulo lajarajara sinɲa xote tugun; nte danna wo kilin ma, bari ń si sanxulo du lajarajara.» ²⁷ Ɲin xuma in xo: «Sinɲa xote tugun», wo b’a yitala xo dafenŋolu bee si jarajara, xa sanko, walasa fen jarajarabalolu xa tu je. ²⁸ Mansaya men fenŋolu nte jarajarala, n xa wo le soto. Wo le x’a tu, n xa xan xa Ala waleɲumalon, xa baaro ke a ɲen, x’a la a diyanɲo xan, a bunɲa nin a ɲasilanɲa xono; ²⁹ bawo n na Ala be le í xo ta, men si janilo ke.

¹ Haalibi alu taxa ɲa xa i ɲoxo xanu í xo badinmalu. ² Alu xana ŋina luntannajigo kun. Dolu keta luntannajigila ti, fo i xa melekiyolu jigiya x’a tara i man a lon. ³ Alu i hakilo tu kasolamoxolu kun, x’a ke í xo nin alu dulu nin i be kaso la le i ɲoxo fe. Alu i hakilo tu moxo tooroninŋolu kun, x’a ke í xo nin alu fannu balo lelu je tooroxan. ⁴ Bee xa futuwo bunɲa. Futuɲoxomalu xa dan i ɲoxo ma, bawo Ala si kiito tege fuyanŋolu nin jadolu xan. ⁵ Naafulukunteya xana ke alu jigo ti. Men be alu bulu alu muta ke wo ti, bawo Ala fan xo: «Nte me ń xodi í la, ń me ń bulo bo í xoto muume.» ⁶ Wo le x’a tu, n hakilo lategeninŋo si a fo xo: «Marigi le mu ń deemabaxo ti, ń me sila fusi ɲa. Moxolu si mun ke no ń na?» ⁷ Alu i miiri alu la ɲamoxo fololu ma, mennu xa Ala la xumo fo alu ɲen. Alu i miiri i la nilamaya labanɲa ma, x’e la lannaya ɲoxon ke. ⁸ Isa Kirisita mu men ti kunun, a mu wo le ti bi, a nte yelemala fo abada. ⁹ Alu xana son moxo x’alu lafili sila xotelu la. A xa bete Ala la neemo le xa do kafu n juso ma. Sariya mennu be xumala domolifenŋolu doron xan, wolu me fen kafu no n juso ma. Mennu xa wo sariyalu labatu, a man fusi ɲiɲa wolu ɲen. ¹⁰ Sadaxalasibaxo mennu be baaro kela Yahudiyalu la Alabatusuba tillisima xono, a man dage wolu ɲen i xa n na sadaxajanidula fen domo. ¹¹ Anin du, sadaxalasibaxa kuntigiba tun nin marafenŋo mennu jelo be dunna dula Senumanba junubeyaafo xanma, wo marafenŋo tunnu subo be janila le xa ban sigidula xoxan. ¹² Wo le x’a tu, Isa du toorota xa sa gallo xoxan, walasa a xa moxolu senuya a fan jelo la. ¹³ Wo to, alan xa bo xa si a ma gallo xoxan, x’a la doxoyalo ɲoxon muɲa. ¹⁴ Bawo gallu nte n kun duniya in to jan, n si tu men xono tuma bee; gallo men be nanin xa bo Ala bata, n be wo le ŋininna. ¹⁵ Isa Kirisita barako to, alan xa Ala tantu tuma bee, xa wo ke n na sadaxa bota ti; wo xoto xo n x’a toxo bunɲa n da la tuma bee. ¹⁶ Alu xana ŋina kubeteko kun, anin ɲoxo deema, bawo wo ɲoxon sadaxa lelu xa di Ala ɲen. ¹⁷ Al’alu la ɲamoxolu bunɲa, xa xulu i ɲen, bawo i lelu mu alu niyolu korosibaxolu ti. Ala be nala i lelu ŋininxala alu la kuwo la sinin. Alu wo ke, walasa i x’e la baaro ke nitodiya to, i xana a ke jusuxaso to. Nin i x’a ke jusuxaso to, nafa si nte alu ɲen wo la. ¹⁸ Alu Ala matara n ɲen. N be lanin a la xo jusukun beto be n na, bawo n b’a fe n bosilo xa ben kuwo bee to. ¹⁹ Ń b’a xoleyala alu ma xo alu xa Ala matara nte ɲen, walasa nte xa saagi alu bata junna. ²⁰ Heeratigi Ala xa n Marigi Isa Kirisita lakuni xa bo furelu to. A jelo bonta xa ke Kafuxan banbalo sadaxo ti. Wo xanma, a keta Ala la saaxolu korosibaxaba ti. ²¹ Ala mu ku ɲuma bee ko sinŋo dila alu ma, walasa alu x’a sago ke. Ala mu a fan diyanɲekuwolu bulala n sondonmo la, Isa Kirisita barako to. Nooro xa la Isa xan fo abada. Amiini. ²² Ń badinŋolu, ń be alu matarala xo alu xa muɲa xa ɲin tonbennixan innu lame. Ń xa men fan safe, wo man jan. ²³ Ń be alu lalonna a la xo n badinxe Timote bulata. Nin a nata junna, ń nin a si taxa alu je. ²⁴ Al’alu la ɲamoxolu nin Ala la jama moxolu bee xonton. N badinŋo mennu be Itali jamano to, wolu be alu xontonna. ²⁵ Ala la neemo xa ke alu bee fe.