GALASINGOLU

GALASINGOLU

¹ Ɲin safe in bota nte Poli le la, nte men keta kiladinŋo ti. Wo kiladinɲa man bo moxolu to, moxo sabaabu du la nte; bari Isa Kirisita le x’a ke anin Fa Ala, wo men x’a lakuni xa bo furelu to. ² Badin lannayabaxo mennu bee be jan, wolu nin nte be ɲin safe in kila Galasi maro Ala la jamalu ma. ³ N Fa Ala, anin Marigi Isa Kirisita xa neemo nin heero ke alu ɲen. ⁴ Isa Kirisita x’a fan di xa ke sadaxo ti n na junubolu koso, walasa n xa bo ɲin duniya in ku jaxo bee bulu, x’a la n Fa Ala sago xan. ⁵ Nooro xa la n Fa Ala xan fo abada. Amiini! ⁶ Ń badinŋolu, Ala men x’alu kili Kirisita la neemo barako to, alu xa i xodi wo la ɲa men tariya, xa i ɲadi xibaru diman xote la, wo xa nte dabaro ban de. ⁷ A xoto nte xo xibaru diman xote be je; bari moxo do lelu be alu hakilo ɲaxamila, mennu b’a fe xa Kirisita la xibaru Dimanŋo yelema. ⁸ Bari haali nin ntelu fannu, walla sanxulo melekiyo do le nata xibaru diman xote fo alu ɲen, men nin n na folo foninŋo nte kilin ti, a tigo xa danga! ⁹ Ń x’a fo alu ɲen xa ban, ń be saagila a ma alu ɲen tugun xo, nin do xa xibaru diman xote fo alu ɲen, alu sonta men ma, men nte wo ti, a tigo xa danga! ¹⁰ Awa saasa, nte b’a fe xa ń fan kudiya moxolu ɲen ba? Ayi, ń b’a fe xa ń fan kudiya Ala le ɲen. Nte b’a fe xa ń fan maadiya moxolu ma ba? Ayi! Nin ń tun b’a fe xa ń fan maadiya moxolu ma, ń tun me ke Kirisita la jonŋo ti. ¹¹ Ń badinŋolu, ń b’a fola alu ɲen xo, nte xa xibaru Dimanŋo men fo alu ɲen, wo man bo moxolu la. ¹² Ń man a soto moxo la, moxo du man ń xaran a la, bari Isa Kirisita le x’a yita ń na. ¹³ Folofolo, nte tun be ɲa men Yahudiyalu la diino to, alu fannu xa wo lon. Alu x’a lon du ń xa Ala la jama tooro jaxu ɲa men, xa ń balan fo ń s’a tiɲa. ¹⁴ Yahudiyalu to, nte xa ń fulan kiika dan Yahudiyalu la diino to. Nte tun be balannin n na moxobalu la laadolu to xa tanbi wolu xan. ¹⁵ Bari Ala x’é tu a la ɲumaya xono xa ń sugandi jannin haali nte xa wulu, xa ń kili a la baaro xanma. A diyata a ɲen tumo men x’a Dinxe yita nte la, walasa ń xa taxa a la Xibaru Dimanŋo fo siya tolu ɲen, nte man taxa moxo si ŋininxa. ¹⁷ Men dulu keta kiladinŋo ti nte ɲa, ń man taxa Yerusaleme xa taxa wolu ŋininxa. Bari wo no bee to, nte taxata Arabu jamano to, wo xo, ń xa ń koppa xa na Damasi gallo to. ¹⁸ San saba xo le mu, nin ń taxata Yerusaleme walasa ń nin Piyere x’e ɲoxo lon. Ń tuta a bata loxokun fula xono. ¹⁹ Nte ɲa man la kiladin xote xan nin Marigi doxoxe Yaxuba kilin doron nte. ²⁰ Nte be men safela x’a ki alu ma ten, wo mu tonɲa le ti. Ala mu ń seede ti, xo wo nte faniya ti. ²¹ Wo xo, ń taxata Siri nin Silisi jamanolu to. ²² Bari Kirisita la jamalu mennu be Yude maro xono, wolu tunnu man nte je folo xa ń lon. ²³ I tunnu b’a mela doron xo: «Men tun x’a lo n nofe xa n tooro, fo a si lannaya tiɲa, wo be lannaya silo waajula saasa.» ²⁴ I tunnu be barako bulaxan Ala ɲen, nte la kuwo xanma.

¹ San tan nin naani tanbo xo, ń saagita taxanin Yerusaleme, ń nin Baranabasi. Ń nin Tite du taxata. ² Ń taxata, bawo Ala tun x’a yita ń na xo ń xa xan xa taxa. Ń taxaninma je, ń be xibaru Dimanŋo men ma x’a waaju siya tolu ɲen, ń xa wo ɲa fo lannayabaxolu la ɲamoxolu ɲen i danna. Ń tun nte a fe ń xa baaro men ke, anin ń be nala men kela, xo wo xa ke fuwo ti. ³ Awa, nte taxamaɲoxo Tite men tun mu Gereko ti, wo la ɲaxo man ke waajibi ti; ⁴ haali x’a tara badin fanolu mennu x’e soli xa dun n to, wolu tunnu x’a la ɲaxo waajibiya. Wolu x’e soli xa dun n to, xa na n nasaxa, walasa n xa hooroya men soto Isa Kirisita la kafuɲoxoya xanma, i xa wo tiɲa, xa n bula sariya la jonɲa xono tugun. ⁵ Bari haali waxatindin kilin, n man i lame, xa son i ta ma; walasa Xibaru Dimanŋo men mu tonɲa ti, wo yelemabalo xa tu alu bulu. ⁶ Bari moxo mennu jaateta ɲamoxolu ti, i tunnu mu men ti, nte la jaate tun nte wo xan, bawo Ala nte kiito tegela kuwolu jeɲa gansanŋo ma. Nte be Xibaru Dimanŋo men waajuxan, wo moxolu man fusi kafu wo ma. ⁷ Bari i fannu x’a je xo Ala xa don baaro xarifa nte ma, xa Xibaru Dimanŋo fo siya tolu ɲen, í xo a xa wo baara kilinŋo xarifa Piyere ma ɲa men Yahudiyalu to. ⁸ Awa Ala xa Piyere ke Yahudiyalu la kiladinŋo ti ɲa men, a xa nte du ke siya tolu la kiladinŋo ti ten. ⁹ Yaxuba nin Piyere nin Yaya men tunnu be jaatenin Ala la jama tulumalu ti, wolu x’a lon xo Ala xa wo baaro xarifa nte ma. Wo xanma, i x’e bulo dun nte nin Baranabasi bulu, x’a yita wo fe xo i nin n keta kilin ti. Wo to, n bee benta a to xo ntelu xa taxa baaro ke siya tolu to, itelu xa taxa baaro ke Yahudiyalu to. ¹⁰ I xo n ɲen doron xo n x’e hakilo tu i la jama lannayabaxa segebaxantunŋolu la. Nte du xa ń jija xa wo ke. ¹¹ Bari Piyere nata Antiyosi tumo men, ń x’a sooso jama bee ɲala, bawo jalago tun b’a ma. ¹² Moxo dolu tunnu bota Yaxuba bata xa taxa non. Jannin wo moxo tunnu xa na Antiyosi, Piyere nin siya tolu lannayabaxolu tunnu be domolo kela. Bari wo moxolu naninma, a x’é soobo wo siya tolu la, a nin i man kafu domolo ma tugun, bawo Yahudiya lannayabaxo men tunnu b’a fe xo siya tolu xa ɲaxa, a silata wolu ɲa. ¹³ Badin Yahudiya tolu dulu x’a la fulankafuya ɲoxon ke, fo i xa Baranabasi du ladun i la fulankafuya xono. ¹⁴ Ń x’a je tumo men xo i bosilo nte tilinnin, a nte lanin xibaru Dimanŋo la tonɲa foninŋo xan, ń xo Piyere ɲen bee ɲala xo: «Ite men mu Yahudiya ti, í xa siya tolu moxolu bosilo ta, xa Yahudiyalu bosilo bula. Awa, í si siya tolu diyakuwa no ɲa di xo i x’e taxama í xo Yahudiyalu?» ¹⁵ Tonɲa le mu ntelu mu Yahudiya yeerewuluwo lelu ti, n nte siya xote moxolu ti, mennu kilita xo junubekelalu. ¹⁶ Bari wo bee nin a ta, n x’a lon xo moxo si me jaate moxo tilinninŋo ti Ala bulu Musa la sariya silo taxamo xanma, fo í xa lannaya le ke Isa Kirisita la. Wo le x’a tu, n dulu lata Isa Kirisita la, walasa n xa jaate moxo tilinninŋolu ti Ala bulu, n na lannaya xanma. Wo xana ke sariya no ti, bawo moxo si me jaate tilinninŋo ti Ala bulu, sariya silo taxamo xanma. ¹⁷ Awa, xa n tu tilinninɲa ŋininna Ala ɲa xoto, Isa Kirisita barako to, nin a tarata xo n dulu mu junubekelalu ti í xo siya tolu, wo xoto mu don ti ba xo Kirisita mu junubo la baarakela ti? Abada! ¹⁸ Nte fan xa men totiɲa, nin nte fan saagita wo todaranin, wo tumo la, nte fan ne keta sariya tiɲabaxo ti. ¹⁹ Men mu Musa la sariya dappo ti, nte be le í xo moxo saninŋo, ń nin sariya fatata. Sariya fan ne keta wo saya sabaabo ti, walasa nte xa nilamaya Ala ɲen. Nte nin Kirisita gengenta i ɲoxo fe, xa sa. ²⁰ Wo ɲa ma, nte nte ń nila tugun, Kirisita le be í nila nte to. Bawo nte be nilamaya men xono saasa, ń be wo kela lannaya le to, Ala Dinxe la. Ate le xa ń xanu, fo a x’a niyo di xa ke sadaxo ti nte ɲen. ²¹ Nte nte ń banna Ala la neemo to. Nin moxo tun si jaate moxo tilinninŋo ti Ala bulu, Musa la sariya silo taxamo le fe, wo to a be í xo Kirisita sata fu le.

¹ He Galasinga hakilintanŋolu! Jontigi le x’alu kunnafili ten? Isa Kirisita la saya gengenyiro xan, wo dun yitata le alu la de x’a xoyiya! ² Nte b’a fe alu xa ɲin ŋininxali kilin in ne jaabi xo: Alu xa Ni Senunŋo soto sariya silo taxamo le to ba, walla alu x’a soto bawo alu xa xibaru Dimanŋo lame xa la a la? ³ Alu dunnu keta hakilintanŋolu ti ten ɲa di? Alu xa kuwo men damuta Ni Senunŋo barako to, saasa alu b’a fe xa wo laban alu fannu barako la ba? ⁴ Kuba mennu yitata alu la, wolu keta fuwo ti ba? Abada! Wolu me ke no fu ti. ⁵ Nin Ala b’a Ni Senunŋo dila alu ma, xa kawakuwolu yita alu la, a be wo kela ba xo bawo alu be sariya la folu dafala, walla a b’a kela bawo alu be Xibaru Dimanŋo lamela xa la a la? ⁶ Wo ɲa ma, Kitaabo b’a fola Burehima la kuwo to xo: «A lata Ala la, wo xanma Ala x’a jaate moxo tilinninŋo ti.» ⁷ Alu a faamu xo mennu xa lannaya ke, wo lelu mu Burehima bonson soobelu ti. ⁸ Kitaabo folota x’a fo xo Ala be nala siya tolu jaatela moxo tilinninŋolu ti i la lannaya le sabaabo la. Wo le x’a tu, a folota xa ɲin xibaru diman in fo Burehima ɲen xo: «Siyalu bee si Ala la duwawo soto ite le sabaabo la.» ⁹ Burehima xa lannaya ke, a xa Ala la duwawo soto. Wo ɲa ma, moxo wo moxo be lannaya kela, wolu si Ala la duwawo soto í xo ate. ¹⁰ Awa, moxo mennu la jaate to, xo xa kila Musa la sariya silo taxama, wo si a tu xo Ala s’i jaate moxo tilinninŋolu ti, wolu bee be dango xono; bawo Kitaabo x’a fo xo: «Fen wo fen safeta sariya Kitaabo xono, moxo wo moxo nte wo bee kela, wo tigo be danganin.» ¹¹ Awa, a xoyiyaninŋo le fan mu, xo moxo si me jaate moxo tilinninŋo ti Ala bulu sariya barako to; bawo a be safenin Kitaabo to xo: «Moxo men xa tilinninɲa soto lannaya fe, wo si nilamaya.» ¹² Musa la sariya ken nin lannaya nte dennin i ɲoxo la. Bawo a be safenin xo: «Men je sariya la folu latimme, wo si nilamaya wolu fe.» ¹³ Kirisita xa n kunbo sariya la dangalo ma. Ate fan dangata ntelu no to, bawo a be safenin Kitaabo to xo: «Moxo men je den yiro la, x’a faxa, wo dangata.» ¹⁴ A keta ten, walasa Burehima xa duwawo men soto, wo xa di siya to dulu ma, Isa Kirisita barako to. A keta ten du, walasa Ni Senunŋo men lahido tata, n xa wo soto lannaya xanma. ¹⁵ Ń badinŋolu, ń be nala misaalo do dila alu ma, moxolu be men ɲoxon kexan. Nin moxo do xa safe ke jannin a xa sa, safe men b’a yitala a ke xa xan xa tala ɲa men, nin wo keta a ɲa ma, moxo si me a tiɲa no, walla xa do kafu a ma. ¹⁶ Ala x’a la lahidolu ta Burehima nin a bonsonŋo ɲen. Kitaabo man don fo xo: «anin a bonsonŋolu», a be í xo nin bonson kiika le mu. Kitaabo xo le: «anin í bonsonŋo». Wo xoto xo moxo kilin ne mu, nin wo mu Kirisita ti. ¹⁷ Ń b’a fe xa men fo, wo mu ɲin ne ti xo: Ala tun xa Kafuxanŋo do dara folo, men me wuli. Sariya men nata sanji keme naani nin tan saba xofe, wo me wo tiɲa no, xa Ala la lahido bo a ma. ¹⁸ Awa, Ala be fenŋo men dila ke ti, nin wo be dennin sariya le la, wo to a nte dennin lahido la tugun. Bari Ala x’a la ɲumaya ke Burehima ɲen, x’a la lahido le xan. ¹⁹ Sariya dikunŋo dun mu mun ti? A kafuta lahido ma le, walasa kebaaro mennu man di Ala ɲen, xa wolu yita n na, fo Burehima bonsonŋo xa na, lahido tata wo men ɲen. Melekiyo lelu xa wo sariya lasi, xa moxo do ke a lasibaxo ti moxolu ma. ²⁰ Wo lasibaxo ken nte lasibaxo ti moxo kilin ɲen, x’a tara Ala dun mu kilinpe le ti. ²¹ Wo xoto mu ba xo Musa la sariya be Ala la lahidolu soosola? Abada! A nte i soosola. Nin sariya do tun dita, men si nilamaya soobe di no moxolu ma, wo to, moxolu tunnu si jaate no moxo tilinninŋolu ti Ala ɲa xoto, wo sariya sabaabo la. ²² Bari Kitaabo b’a fola xo duniya muume bee be junubo fango xoto, walasa Ala xa nilifenŋo men lahido ta, wo xa di lannayabaxolu ma, i la lannaya xanma, Isa Kirisita la. ²³ Jannin lannaya waxato tun xa na, sariya tun be n maranin, fo xa si lannaya yitalunŋo ma. ²⁴ Wo ɲa ma, sariya keta n korosibaxo ti, jannin Kirisita xa na; walasa n xa jaate moxo tilinninŋolu ti Ala ɲa xoto, lannaya barako to. ²⁵ Awa, lannaya la waxato naninma, wo korosibaxo la la nte n xan tugun. ²⁶ Katugu alu bee keta Ala dinŋolu ti lannaya le xanma, Isa Kirisita la kafuɲoxoya xono. ²⁷ Wo to, atelu mennu bee batiseta Isa Kirisita la kafuɲoxoya xono, alu xa Kirisita jigolu dun alu to í xo alu xannadoroko. ²⁸ Wo le x’a tu saasa, Yahudiya wo, siya tolu wo, jon ne wo, hooro le wo, xe wo, musu wo, faranfansi nte wolu te tugun, bawo alu bee mu kilin ne ti, Isa Kirisita la kafuɲoxoya xono. ²⁹ Nin alu mu Kirisita talu ti, wo to, alu mu Burehima bonsonŋo ti. Awa, Ala xa ke men lahido ta, alu si wo soto.

¹ Ń b’a fe xa men fo, wo mu ɲin ne ti xo: Xa ketabaxo dindinma tu, faranfansi si nte a nin jonŋo te, haali x’a tara a mu a fa la fenŋo bee tigo le ti. ² X’a dindinma tu, a be korosibaxolu nin kuɲabobaxolu bulu, fo xa taxa si a fa la waxati lategeninŋo ma. ³ Wo be ɲa men, n du tunnu be le í xo dindinŋolu. N tunnu be ɲin duniya in fenŋolu la jonɲafango xoto. ⁴ Bari waxato dafaninma, Ala x’a Dinxe ki xa na: Muso x’a bange, a bulata sariya xoto, ⁵ walasa a xa sariya xotomoxolu kunbo, xa n ke Ala dinŋolu ti. ⁶ Alu keta Ala dinŋolu ti, wo xanma, Ala x’a Dinxe Niyo ki, nin wo mu Ni Senunŋo ti, a xa na sigi n jusukunŋolu la. Wo Niyo be fetenna xo: «Aba!» Wo xoto xo: «Baaba!» ⁷ Wo to, í nte jon ti tugun, bari Ala dinŋo. Nin í mu a dinŋo ti, awa í mu a ketabaxo du ti, ate Ala barako to. ⁸ Folofolo, alu tunnu man Ala lon tumo men, alu tunnu mu bolibatuta dolu la jonŋolu ti. Wolu nte bolibatuta soobelu ti. ⁹ Bari saasa alu xa Ala lon. Walla ń s’a fo xo Ala x’atelu lon. Alu s’i koppa no duniya la wo fen gansanŋolu nin wo batarafenŋolu ma ɲa di tugun? Alu si ke a fe xa dun wolu la jonɲa la ɲa di tugun? ¹⁰ Alu be lunŋo dolu nin xaro dolu nin waxato dolu nin sanŋo dolu jaatela xa tanbi dolu xan. ¹¹ Alu la kuwo hanmo be nte la. A fo nte xa baaro fen fen ke alu ɲen, wo bee si ke fuwo ti? ¹² Ń badinŋolu, ń be alu matarala, alu ke í xo nte be ɲa men, bawo nte xa ń fan ke í xo atelu be ɲa men. Alu man jaxuman fusi lasi nte ma. ¹³ Alu hakilo b’a la, ń sinɲa folo xa xibaru Dimanŋo fo alu ɲen, wo keta x’a la kunŋo men xan: Alu x’a lon xo jangaro le xa wo ke. ¹⁴ Haali x’a tara nte la jangaro tun mu atelu xotoboli kuba ti, wo bee xan alu man nte doxoya walla xa ɲaxun ń to; bari alu xa nte tomuta í xo Ala la melekiyo do, walla Isa Kirisita fan. ¹⁵ Alu tunnu sewoninba le mu! Mun dun nata alu ma? Ń si alu seedeya ɲin na xo: Haali nin wo tun si ke no, alu tunnu si son x’alu fannu ɲakesolu bo, x’e di nte ma. ¹⁶ Nte xa tonɲa men fo alu ɲen, wo le x’a tu nte keta alu jaxo ti bi ba? ¹⁷ Alu la kuwo xa di wo moxo dolu ɲen; bari i ŋanneya man ɲin. I be men nofe, wo mu le x’alu kunbo nte la, walasa alu x’e balan itelu la kuwo to. ¹⁸ Balanŋo ken xa ɲin ku ɲuma nofe tuma bee, wo xana ke nin nte be alu bata tumo men doron. ¹⁹ Nte la dindinŋolu, nte be tooroba xono tugun alu la kuwo koso, í xo musu tinto, fo Isa Kirisita xa basigi alu xono. ²⁰ A xa di bete nte ɲen, xa ke alu bata saasa; walasa nte xa ń xumaɲa mayelema. Nte man a lon ń si men ke alu la kuwo to. ²¹ Atelu mennu b’a fe xa sariya labatu, nte xo sariya be men fola, alu man wo me ba? ²² A be safenin Kitaabo to xo Burehima xa din fula soto. Do mu a la jonmuso dinŋo ti, nin wo mu Agare ti. Do mu a la hooromuso dinŋo ti, nin wo mu Saran ti. ²³ Jonmuso dinŋo bangeta x’a la hadamadinŋo sago xan. Bari hooromuso ta bangeta x’a la Ala la lahidu taninŋo xan. ²⁴ Xoto xote be ɲin ku in na. Wo musu fulo mu Kafuxan fula le taagumanseedo ti. Kafuxanŋo men tata Turusinna kuro xan, Agare be wo le yitala. Ate be dinŋolu wulula jonɲa xanma. ²⁵ Agare mu Turusinna kuro le ti, men be Arabu jamano to. Wo si xaaɲan Yerusaleme saasandinma ma, bawo ate nin a dinŋolu be jonɲa xono bi. ²⁶ Bari Yerusaleme kuto, men be sanŋo to, wo be hooroya xono, wo le mu alan ntelu na ti. ²⁷ Bawo Kitaabo b’a fola xo: «Muso, ite men tun man din soto, ɲaxali. Ɲaxalixanŋo labo, ite men man tinŋo tooro lon; bawo muso men kilin tuta a danna, wo dinŋo si siya xa tanbi musu xetigo ta xan.» ²⁸ Ń badinŋolu, atelu kennu mu dinŋolu ti, mennu wuluta x’a la Ala la lahido xan, í xo Nsiyaxa keta Ala la lahido dinŋo ti ɲa men. ²⁹ Xotonin, dinŋo men wuluta x’a la hadamadinŋo sago xan, wo xa dinŋo jaxuya, men wuluta Ala Ni Senunŋo sago la. Wo keta ɲa men, a be kela ten bi du. ³⁰ Bari Kitaabo xo di? A xo: «Ɲin jonmusu in xoyi, a nin a dinxe; bawo jonmuso dinxe nin hooromuso dinxe man xan xa kafu ke la.» ³¹ Wo le x’a tu, ń badinŋolu, alan nte jonmuso dinnu ti, n mu hooromuso dinŋo lelu ti.

¹ Kirisita xa n bo bulo to le, nin n si hooroya. Wo xanma, alu i balan xa tu wo hooroya xono. Alu xana alu fannu bula jonɲa la tugun. ² Alu ń name! Nte Poli b’a fola alu ɲen, xo nin alu sonta xa ɲaxa, Kirisita me fen ɲiɲa alu ɲen tugun. ³ Ń be saagila a ma tugun xo, nin moxo wo moxo je ɲaxa, a waajibiyaninŋo be wo tigo ma xa sariya muume bee latimme. ⁴ Atelu mennu b’a fe xa tilin Ala ɲa xoto sariya silo la, alu x’e fata Kirisita ma; alu x’alu fannu sinbo Ala la neemo to. ⁵ Ntelu kennu gigo be Ala le xan; wo men si ntelu jaate moxo tilinninŋolu ti. N be wo le laxononin, Ni Senunŋo barako to, wo men be baaro la n na lannaya fe. ⁶ Katugu moxo men be Isa Kirisita la kafuɲoxoya xono, ɲaxa wo, ɲaxabaliya wo, nafa nte wo la wo bulu. Nafa be men na, wo mu lannaya le ti, men si je xanuya fe. ⁷ Alu wuliɲa tun benta! Jon x’alu lalo x’alu bali taxala ɲa tonɲa silo xan? ⁸ Men fota alu ɲen x’alu lason, wo man bo alu kilibaxa Ala la de. ⁹ A fota xo: «Farinfuunulanŋo dondin si mungo bee fuunu.» ¹⁰ Bari wo bee xan, Marigi xa gigo di nte ma alu la kuwo to, xo alu me sila xote ta. Bari moxo wo moxo be alu hakilo ɲaxamila, fo Ala xa kiito tege wo tigo xan. ¹¹ Ń badinŋolu, nin nte la waajulo tun be ɲaxalo le waajibiyala, moxo si tun me nte tooro bi. Wo to, ń be waajulo men du la, xo Kirisita gengenta yiro xan, wo kuwo tun me digi moxo si la. ¹² Moxo mennu be alu hakilo ɲaxamila alu la jama xono, a tun xa di nte ɲen, wolu xa taxa ɲa wo kuwo to, fo x’e fannu xotofenŋolu muume tege x’e bo je. ¹³ Ń badinŋolu, Ala ken x’alu kili don ne xanma alu xa hooroya; bari wo xana ke sabaabu ti x’alu bula alu fannu nidiyanɲo kela, bari a xa xan x’alu bula i ɲoxo xanula le, anin x’e ɲoxo maakuwo ɲiɲa. ¹⁴ Bawo sariyalu bee be ɲin sariya kilin in ne xono xo: «Í xa í moxoɲoxo xanu í xo í fan.» ¹⁵ Bari nin alu keta i ɲoxo ma, x’e ɲoxo kin, x’e ɲoxo ɲimi, alu i korosi, nin wo nte alu s’i ɲoxo ban. ¹⁶ Awa, men be ń ma x’a fo alu ɲen, wo fele xo: Alu i taxama Ni Senunŋo barako la. Nin wo keta, alu me alu fannu nidiyanɲekuwolu ke tugun. ¹⁷ Bawo kuwo mennu mu hadamadinŋo nidiyanɲekuwolu ti, wolu man di Ni Senunŋo ɲen. Kuwo mennu mu Ni Senunŋo diyanɲekuwolu ti, hadamadinŋo nidiyanɲeku nte wolu ti. I b’e ɲoxo kelela, walasa alu b’a fe xa kuwo mennu ke, alu xana wolu ke. ¹⁸ Bari nin alu bosilo be bennin Ni Senunŋo diyanɲo ma, wo tumo la, alu nte Musa la sariya xoto tugun. ¹⁹ Bee xa hadamadinŋo nidiyanɲekuwolu lon: Jadoya, kunoxoninko, fuyanɲa, ²⁰ bolibato, doomaya, jaxuya, kelejaliya, kiiliya, jusubaya, faxakilinjaxuya, fatalo, xantala, ²¹ xonneya, dolobaminŋo, domolibajaxo, anin wo ɲoxon kulu. Ń be alu lasobila í xo ń dalita x’a fo alu ɲen ɲa men, xo wo kuwolu kebaxolu me dun Ala la Mansaya xono abada. ²² Bari Ni Senunŋo be fenŋo mennu dila moxo ma, wolu mu ɲin fen in nelu ti: Xanuya, ɲaɲo, heero, muɲo, hinno, ɲumaya, lannamoxoya, ²³ sabaro, fanmuto. Sariya si nte je, men be wo kuwolu kabala. ²⁴ Mennu mu Isa Kirisita la moxolu ti, wolu xa i nidiyanɲekuwolu nin i negolu nin i sagolakuwolu gengen ne yiro ma. ²⁵ Nin Ni Senunŋo xa nilamaya kuto di n ma, wo to, alan dulu xa xan x’e taxama Ni Senunŋo diyanɲo la. ²⁶ Alan xana n fannu bunɲa, n xana i ɲoxo bagatege, anin xa i ɲoxo xonneya.

¹ Ń badinŋolu, nin moxo do mutata kukebaliko la, atelu mennu b’e taxamala Ni Senunŋo sago la, alu a latilin horomo to. Alu si alu hakilo tu alu fannu la, walasa alu dulu xana fili. ² Alu i ɲoxo deema, x’e ɲoxo kundono ta; wo ɲa ma, alu si Kirisita la sariya dafa. ³ Nin moxo do b’a fan mafelenin fen ti, x’a tara a dun nte fusi ti, a b’a fan ne lafilila. ⁴ Moxo bee xa í fan bosilo mafele, xa jaate bo í fan xan; nin a la kebaarolu x’a kunxototakun bo, wo tumo la, a si ɲaɲa. A maakuwo me na ke a la tugun x’é suman moxo xote ma. ⁵ Bawo bee fan kilin s’í la dono ta. ⁶ Moxo men be laxaranna Ala la xumo la, wo xa xan x’a bulufenŋolu bee do di a laxaranbaxo ma. ⁷ Alu xana alu fannu lafili; moxo me jele no Ala ma. Moxo je men lan, í be wo le tegela. ⁸ Moxo men je lanno ke a fan nidiyanɲo ɲen, nidiyanɲo be falinna fenŋo men na, nin wo mu saya ti, a si wo tege. Men je lanno ke Ni Senunŋo ɲen, Ni Senunŋo be falinna fenŋo men na, nin wo mu nilamaya banbalo ti, a si wo tege. ⁹ Alan xana sege kuɲumako la. Nin n man sege wo la, n si tegelo ke a waxato to. ¹⁰ Wo to, xa kuɲumako waxato tu n bulu, alan xa ku ɲuma ke bee ɲen; sakuta alan badin lannayabaxolu ɲen. ¹¹ Alu ɲin safedin kunba innu mafele! Nte fan bulo le x’e safe, x’e ki alu ma. ¹² Mennu b’a fe x’alu diyakuwa x’alu bula ɲaxala, wolu b’a fe x’e fan nelu kudiya moxolu ɲen. I nte a fe le moxolu x’e tooro Kirisita gengenyiro nofe. ¹³ Wo moxo mennu be ɲaxalo labatula, wolu fannu nte sariya latimmela. I b’a fe alu xa ɲaxa, walasa taagumanseedo xa ke alu balasubo la, men si i bula i fannu bunɲala. ¹⁴ Fanbunɲa kun xote si ken nte nte bulu, nin n Marigi Isa Kirisita gengenyiro doron ne nte. Kirisita gengenyiro barako to, duniya fenŋolu be le í xo i gengenninŋo nte ɲen, nte du be le í xo moxo gengenninŋo duniya fenŋolu ɲen. ¹⁵ Ɲaxo nin ɲaxabaliya si nte jaatela; xa ke dafen kuto ti, wo le be jaatela. ¹⁶ Mennu bee be ɲin sila in taxamala, nte b’a fola wolu ɲen xo: Ala la heero nin a la makaro xa ke wolu nin Ala la Banisirayila bee fe. ¹⁷ Moxo si xana nte tooro tugun; bawo joogilidaxoto mennu be ń na, wolu b’a yitala xo ń mu Isa ta le ti. ¹⁸ Ń badinŋolu, n Marigi Isa Kirisita la neemo xa ke alu bee fe. Amiini.