EFESINGOLU

EFESINGOLU

¹ Nte Poli le xa ɲin safe in ke, nte men mu Isa Kirisita la kiladinŋo ti, x’a la Ala sago xan. Ń b’a kila Ala la moxo senunŋolu ma, mennu be siginin Efesi gallo to, wo mennu mu xantigo ti Isa Kirisita la kafuɲoxoya xono. ² N Fa Ala anin Marigi Isa Kirisita xa neemo nin heero ke alu ɲen. ³ Tanto be n Marigi Isa Kirisita Fa Ala ɲen, ate men xa Ni Senunŋo la duwawu sifa bee ke n ɲen sanŋo to. N xa wo duwawolu soto n nin Kirisita la kafuɲoxoya le xono. ⁴ Jannin duniya xa da, Ala xa n sugandi xa ban, Kirisita barako to, walasa n xa senuya xa ke jalagibalolu ti a ɲa xoto. A xa n xanu, ⁵ x’a latege kabirin folofolo, xo n si ke a dinŋolu ti, Isa Kirisita barako to. Wo le diyata a ɲen a la ɲumaya xono. ⁶ A xa wo ke, walasa n x’a tantu a la neema maɲoxonjebalo xanma, a xa men ni n na, a Dinxe baato horomo to. ⁷ Ala xa n kunbo Isa le jelo barako la, men bonta. N na junubolu yaafata n ma, a la neemaba xanma. ⁸ Ala xa wo neemo di n ma, x’a siya, xa hakilitigiya nin lonniya sifa bee di n ma. ⁹ Ala x’a sago yita n na, men tun be gullo to. A xa wo latege kabirin folofolo a la ɲumaya le xanma, Isa Kirisita barako to. ¹⁰ Ala tun xa men natege x’a si a dafa waxati labanŋolu, wo mu le, xa sanxulo to fenŋolu nin duguxulo xan fenŋolu bee kamari xa kuntigi kilin nasigi i kunna, nin wo mu Kirisita ti. ¹¹ Isa Kirisita le du koso, n xa n nidula soto, x’a la ate Ala sago xan, ate men be kuwo bee lategela: N sugandita kabirin folofolo. ¹² A xa wo ke, walasa n xa ke Ala nooro tantubaxolu ti, ntelu mennu xa n gigo ke Kirisita ti xa ban. ¹³ Kirisita barako to, alu dulu xa tonɲa xumo me tumo men, nin wo mu alu kisilo xibaru Dimanŋo ti, alu xa lannaya ke. Wo to, Ala x’a la taagumanseedo ke alu la, Ni Senunŋo dinmalo fe, wo men tun lahido tata. ¹⁴ Ni Senunŋo dita n ma folo, x’a yita n na, xo n si a la fen ɲuma to dulu soto, nin Ala la moxolu kunbolo dafata tumo men. Alan xa barako bula Ala ɲen, a la bunɲa xanma. ¹⁵ Wo le x’a tu, nte x’alu la lannaya xibaro me tumo men Marigi Isa la, anin alu la xanuya Ala la moxo senunŋolu bee ɲen, ¹⁶ ń nte segela xa barako bula Ala ɲen alu la kuwo xanma. Ń hakilo be tula alu kun ń na Alamataralu xono. ¹⁷ Ń b’a ŋininna n Marigi Isa Kirisita la Ala fe, Fa nooroma, xo a xa hakilitigiya Niyo di alu ma, men si ate yita alu la, walasa alu xa ate lon bete. ¹⁸ Ń b’a tarala du, xo a x’alu hakilibunda yele, walasa a x’alu kili gigo men xanma, alu xa wo lon, anin a xa fen ɲuma mennu toben a la moxo senunŋolu ɲen, alu xa wolu nooro lon, anin x’a lon xo dan nte wolu la. ¹⁹ Ń be Ala tarala du, walasa alu x’a la sintigiya danjebalo lon, a xa men nabaara ntelu lannayabaxolu ɲen. Ala xa wo sintigiya le yita barakeba to, ²⁰ a xa Kirisita lakuni tumo men xa bo furelu to, x’a lasigi a kininŋo xoto, sanŋo to. ²¹ A xa Kirisita lasigi kuntigiya bee nin fango bee nin sintigiya bee nin mansaya bee anin toxo bee kunna. Ɲin duniya in toxolu doronnu nte; bari duniya kuto men be nala du toxolu. ²² Ala xa fenŋo bee xulu Kirisita ɲen, x’a di a xa ke Ala la jama bee kuntigo ti fen bee to. ²³ Ala la jama mu Kirisita balo le ti. Ate men be fenŋo bee fanin, Ala la jama mu wo la dafaninɲa le ti.

¹ Folofolo, alu tunnu be le í xo moxo saninŋolu Ala bulu, alu la tilinbaliya nin alu la junubolu xanma. ² Alu la nilamaya keɲa tun be ten ne folo, í xo duniya moxo tolu bee. Alu tunnu be sanxulo nin duguxulo te fen jaxolu kunnasigibaxo le sago kela, wo men niyo be baaro la Ala soosobaxolu to saasa. ³ Alan du tunnu bee be wo silo le xan folofolo. N tunnu b’a lonin n nidiyanɲo lelu nofe. N tunnu be n miiro nin n balasubo diyanɲo le kela. N tunnu nin moxo tolu bee xa xan. N keɲa folo xanma, Ala la diminŋo tun xa xan xa boyi n to í xo tolu. ⁴ Bari Ala la hinno xa bun; a xa n xanu bete ɲa men, ⁵ haali xa n saninŋo tu n na tilinbaliyalu xanma, Ala xa n nin Kirisita nilamaya i ɲoxo fe. Ala la neemo le x’alu kisi. ⁶ N nin Isa Kirisita la kafo xanma, a xa n nin a lakuni xa bo furelu to, xa n nin a lasigi sanxulo to. ⁷ A xa wo ɲumaya ke n ɲen Isa Kirisita barako to, walasa waxati natalu bee, moxolu x’a la neema danjebalo lon. ⁸ Awa, Ala la neemo le x’a tu alu kisita, alu la lannaya sabaabo la. Wo kisilo man bo atelu fannu to; Ala la nilifenŋo le mu. ⁹ Alu fannu la kebaara man wo ke; walasa moxo si xana a fan bunɲa. ¹⁰ Ala buluno le mu n ti. A xa n da n nin Isa Kirisita la kafo xono, walasa ate Ala fan xa ku ɲuma mennu toben n ɲen kabirin folofolo, n xa ke wolu kebaxolu ti. ¹¹ Alu i miiri xo folofolo, alu tunnu mu siya xote moxo lelu ti wuluwo fe. Yahudiyalu tunnu be alu mutanin ɲaxabalolu ti, itelu mennu x’e fannu kili xo ɲaxaninŋolu, ɲaxalo men keta i balasubo dula do tegelo ti. ¹² Wo waxato ken, alu tunnu man Kirisita lon. Nidula tun nte alu kun Banisirayila dinŋolu bata. Alu tunnu man jaate Ala la moxo ti. Alu sin tun nte Ala la Kafuxanŋolu to, mennu be siginin Ala la lahido xan. Alu tunnu gigintanŋo le be duniya to, anin, Ala du tun nte alu kun. ¹³ Bari saasa, atelu men tunnu nin Ala te xa jan, alu nin a te sutiyata Isa Kirisita la kafuɲoxoya xanma; bawo a jelo bonta xa ke sadaxo ti alu koso. ¹⁴ Kirisita le xa heero di n ma, xa Yahudiyalu nin siya tolu ke kilin ti. Jaxuya men tun be i te í xo tato, a xa wo te, x’a bo je a la saya barako to. ¹⁵ Kila Musa la sariya xa kuwo mennu waajibiya, anin a man mennu waajibiya, a xa wolu bee ban; walasa xa wo siya fulo kafu x’e ke siya kuta kilin ti, x’e ladun ate la kafuɲoxoya xono, xa heero dun i te. ¹⁶ Kirisita sata gengenyiro xan xa ke sadaxo ti. Wo barako to, a xa siya fulo kafu, x’e ke moxo kilin ti, xa i nin Ala te laben, xa jaxuya ban i te. ¹⁷ Atelu siya tolu men tunnu nin Ala te xa jan, anin Yahudiyalu men tunnu nin a te xa sutu, Kirisita nata xibaru Dimanŋo fo alu ɲen, men be heero dila. ¹⁸ Ate le barako to, Ni Senun kilinŋo la deemalo fe, nin ntelu bee, Yahudiyalu nin siya tolu, n bee si sin xa dun n Fa Ala la kafuɲoxoya xono. ¹⁹ Wo ɲa ma, alu nte luntan ti tugun walla siginfe; bari alu nin Ala la moxo senumanŋolu bee keta kilin ti, xa ke Ala la luwo moxo dolu ti. ²⁰ Alu keta í xo kurolu, xa lo Ala la bunŋo la. Alu sigita jusigilanŋo men xan, wo le mu kiladinŋolu nin Ala la kilalu ti. Isa Kirisita fan mu wo bunŋo kuro ti, men be kuru tolu bee tomutanin. ²¹ Bunŋo bee be i ɲoxo mutanin ate barako to, xa janɲa, xa ke Alabatusuba senumanŋo ti, Marigi barako to. ²² Awa, x’a la alu nin Isa Kirisita la kafo xan, alu dulu nin tolu jaateta wo bunŋo dula do ti, xa ke Ala sigidula ti, Ni Senunŋo fe.

¹ Wo xanma, nte Poli be Ala matarala alu ɲen. Nte keta kasolamoxo ti Isa Kirisita toxo nofe, bawo ń be xibaru Dimanŋo fola atelu siya tolu ɲen. ² Ala la ɲumaya xono, a xa baaro men xarifa nte ma, xo ń x’a ke alu ɲen, sikka nte a to alu xa wo me. ³ Ala x’a la gallo yita nte la. Ń birin wo le safela xumakese dantalu la. ⁴ Nin alu x’e xaran, alu si a lon ń xa lonŋo soto ɲa men Kirisita la gullo xan. ⁵ Waxato mennu tanbita, wo gullo man yita hadamadinŋolu la; bari saasa, Ala x’a yita a la senumanŋolu la, nin wo mu a la kiladinŋolu nin a la kilalu ti, Ni Senunŋo barako to. ⁶ Wo gullo fele xo: Xibaru Dimanŋo barako to, Ala be heero men kela a la moxolu ɲen, Yahudiyalu nin siya tolu bee xa xan wo to. I bee keta í xo bala kilinŋo dulalu. I bee xa xan du Ala la lahidu taninŋo to, Isa Kirisita kafuɲoxoya xono. ⁷ Nte keta Ala la baaradinŋo ti a la neema dinmaninŋo xanma, xa ń bula Xibaru Dimanŋo fola moxolu ɲen. A xa wo ke ten a la sintigiya to. ⁸ Nte men mu Ala la moxo senumanŋolu bee to doxomandinŋo ti, Ala xa don neemo ke nte ɲen, xa Xibaru Dimanŋo lasi siya tolu ma, nin wo mu Kirisita la naafulu banbalo ti. ⁹ Ń xa xan x’a xoyiya hadamadinŋo bee ɲen, Ala b’a la gullo labaarala ɲa men. Ate Ala men mu fenŋo bee dabaxo ti, a tun xa wo kuwo tu duguwo to kabirin duniya man da. ¹⁰ A xa wo ke walasa Ala la jama fe; kuntigiyalu nin fangolu mennu be sanŋo to, wolu xa Ala la hakilitigiya ɲasifa bee lon. ¹¹ Ala tun xa kuwo men natege kabirin abada, a xa wo ke, n Marigi Isa Kirisita barako to. ¹² N nin Kirisita la kafuɲoxoya xanma, anin n na lannaya koso ate la, n si fatiya no x’e sodun Ala la, n hakilo lasigininŋo. ¹³ Wo xanma, ń b’a ŋininna alu fe xo, nte be tooro mennu xono alu nofe, wo xana alu juso doxoya. Wo mu alu kunxotota kunŋo le ti. ¹⁴ Wo xanma, ń be ɲongila Fa Ala xoto, ¹⁵ dinbayalu bee sabaabubaxo, sanŋo to anin duguxulo xan. ¹⁶ Ń b’a tarala xo a x’a ke a la nooro danjebalo xanma, a xa barako dun alu jusukunŋo to, a Ni Senunŋo la sintigiya fe. ¹⁷ Ń b’a tarala du xo Kirisita xa sigi alu jusukunŋolu la lannaya fe; anin alu xa lillidun, xa sinsin xanuya to; ¹⁸ walasa alu nin Ala la senumanŋolu bee xa sin xa Kirisita la xanuya xono nin a lo nin a janɲa nin a jironɲa lonŋo soto. ¹⁹ Ń b’a tarala xo alu xa Kirisita la xanuya lon, wo men xa bun xa tanbi lonŋo bee xan; walasa alu xa fa Ala la dafaninɲa bee la. ²⁰ Ala men si sin no xa fen bee ke, xa tanbi n na taralolu nin n miirolu xan, a la sintigiya fe, men be baaro la n jusukunŋo la; ²¹ tanto b’a ɲen Ala la jama xono, anin Isa Kirisita kafuɲoxoya xono, tuma bee, fo abada. Amiini.

¹ Nte men be kaso la Marigi la kuwo xanma, ń b’a xoleyala alu ma, xo Ala x’alu kili men xanma, alu i taxama xa ben wo ma. ² Alu i majigi xa sabari xa muɲa. Alu muɲa i ɲoxo xoto xanuya to. ³ Ni Senunŋo x’alu ke kilin ti xa benŋo ke alu te, alu i balan wo benŋo xa tu alu nin i ɲoxo te. ⁴ Bala kilin ne be je; anin Ni Senun kilin, í xo gigi kilin be je ɲa men, alu kilita men xanma. ⁵ Marigi kilin ne be je, anin lannaya kilin, anin batiseli kilin. ⁶ Ala kilin ne be je, n bee Fa, men be n bee kunna, men be baaro la n bee to, anin men be n bee jusukunŋo la. ⁷ Ala x’a la neemo do xarifa n bee ma, x’a la Kirisita la solifen sumanninŋo xan. ⁸ Wo le x’a tu, a safeta Ala la Kitaabo xono xo: «A yeleto sanŋo to, a nin kasolamoxo kiika taxata; a xa fenŋolu di moxolu ma fu.» ⁹ X’a fo xo: «A yeleta», wo xoto mu mun ti? Wo xoto mu le xo a tun jigita folo, fo duguxulo dula jigininŋolu. ¹⁰ Men jigita, wo le du yeleta fo sanxulo dulalu bee sanŋo to, walasa a xa duniya bee fa. ¹¹ Ate le xa solifen mategeninŋolu di moxolu ma. A xa dolu ke kiladinŋolu ti, xa dolu ke kilalu ti, xa dolu ke xibaru Dimanŋo waajubaxolu ti, xa dolu ke lannayabaxolu negaanibaxolu ti, xa dolu ke karanmoxolu ti. ¹² A xa wo bee ke, walasa xa senumanŋolu toben Ala la baaro xanma, nin Kirisita balo, wo xoto Ala la jama, wo si taxa ɲa lannaya to ɲa men. ¹³ Nin wo keta, n bee kafuninŋo si ke kilin ti lannaya to, anin Ala Dinxe lonŋo to. N si ke lannayabaxa moninŋolu nin moxo dafaninŋolu ti, í xo ate Kirisita be dafanin ɲa men. ¹⁴ Wo ɲa ma, n me ke í xo dindin bitugun, xa tu í fillifallala, xa taxa diina silo sifa bee woyo fe, moxolu la lafililo koso. Wo moxolu be kewuya le kela xa moxo tolu lafili. ¹⁵ Bari xa n tu tonɲa fola xanuya to; n si bunɲa lannaya to ɲa bee do ma, fo xa ke í xo Kirisita, ate men mu Ala la jama kunŋo ti. ¹⁶ Ate le barako to, nin balo bee mu kilin ti, men dulalu bee be i ɲoxo mutaninbete a xulukunnafasolu la. Wo to, nin wo balo dulalu bee kilin kilin be a la baaro kela a ɲa ma, balo muume si bunɲa xa taxa ɲa xanuya to. ¹⁷ Awa ń badinŋolu, saasa ń be nala men xoleyala alu ma, Marigi koso, wo mu le xo: Atelu lannayabaxolu kukeɲa man xan xa ke í xo siya tolu mennu man Ala lon; wolu be i taxamala hakilintanɲa xono. ¹⁸ I be i miirila í xo dibitomoxolu. Ala be nilamaya kuto men dila, i luntanŋo le be wo to i la kulonbaliya koso, i la sondonme xoleya xa men sabaabu. ¹⁹ Maluya kese kilin nte i la. I xa i fannu ladi jadoya ma, xa son xa ku noxonin sifa bee do ke, dansigi nte men na. ²⁰ Bari atelu xa men xaran Isa Kirisita la kuwo to, wo nte wo kuwolu ɲoxonnu ti de! ²¹ Sikka nte a to, men be Isa la kuwo to, alu xa wo bee me; anin alu xaranta a la tonɲa ma. ²² Wo to, alu tunnu be i taxamala ɲa men ma folofolo, alu wo dabula. Alu moxo xoto nego lelu be moxo lafilila, xa halagilo lasi a ma. ²³ Wo xanma, alu a tu alu hakilolu nin alu miirolu bee xa yelema xa ke kuto ti. ²⁴ Alu moxo kuto jigolu ta, wo men data Ala mununŋo la. Wo mu le xa í taxama tilinninɲa nin senuya xono, tonɲa xa mennu bange. ²⁵ Wo le x’a tu, alu faniya dabula, xa tonɲa fo i ɲoxo ɲen, bawo n bee kafunin mu bala kilin dula lelu ti. ²⁶ Nin alu diminta, alu i korosi alu xana junube ke. Tilo xana boyi x’alu diminninŋo tara. ²⁷ Alu xana a tu Sentane xa ɲa si soto alu xan. ²⁸ Nin men tun be suuɲalo kela, wo xa suuɲalo dabula, bari a xa baaro ke a bulu fulo la, x’a baluwo soto tilinŋo to, anin xa fen soto xa segebaxantunŋolu deema. ²⁹ Xuma jaxu si xana bo alu da, fo xuma ɲumalu, mennu si moxo do maakuwo ɲiɲa, xa do kafu moxo xotelu barako ma, walasa a xa neemo ke alu lamebaxolu ɲen. ³⁰ Alu xana Ni Senunŋo juso xasi, wo men mu Ala la taagumanseedo ti alu la, xo lunŋo si na, Ala si alu kunbo pewu. ³¹ Alu miiriya jaxo, nin juso, nin diminŋo, nin sonxo, nin nanilo, nin jaxuya sifa bee xoyi x’e soobo alu la. ³² Alu ɲuma ke i ɲoxo ɲen, xa hinna, xa yaafa i ɲoxo ma, í xo Ala yaafata alu ma Kirisita koso ɲa men.

¹ Awa, x’a la a xan alu mu Ala dinŋolu ti, a be mennu xanunin, alu ke a ladigibaxolu ti. ² Alu xanuya yita alu la nilamaya xono, í xo Kirisita xa n xanu ɲa men, fo a x’a niyo di n nofe, xa ke nilifenŋo nin sadaxo ti, men diyata Ala ɲen. ³ Alu keta Ala la moxolu ti; wo xanma a man xan jadoya nin kunoxoninko, anin wasabaliya ɲa wo ɲa xa haali me alu dappo to. ⁴ Malibaliya xumolu nin xuma kuntanŋolu walla xuma noxoninŋo dulu man xan xa me alu da. Alu xa xan xa men ke, wo mu barakelalo le ti Ala ɲen. ⁵ Alu xa xan x’a lon, sikka nte a to xo: Jadolu nin moxo noxoninŋolu, anin wasabalolu, wo mennu mu bolibatulalu ti, wolu si me nidula soto Kirisita nin Ala la Mansaya xono abada. ⁶ Alu xana a tu moxolu x’alu lafili xuma fuwolu la. Wo ɲoxon junube lelu b’a tula nin Ala la diminŋo be boyila a soosobaxolu to. ⁷ Wo to, alu nin wo moxolu xana kafu fusi la. ⁸ Folofolo, alu tunnu mu dibo le ti, bari saasa, alu mu keneya le ti, bawo alu nin Marigi kafuta. Wo to, alu i taxama í xo moxo mennu be keneya la. ⁹ Awa, keneya ken be ɲumaya nin tilinninɲa nin tonɲa le bangela. ¹⁰ Alu i balan xa Marigi diyanɲo mategeninŋo lon. ¹¹ Kuwo mennu be kela dibo to, nin nafa nte i la, alu sin xana dun wolu to. Alu xuma i xan ne fan, x’a yita xo i man ɲin. ¹² Moxo dolu be kuwo mennu kela dibo to, maluya be wolu tofolo fan na. ¹³ Ku wo ku je yita xo a man ɲin, wo bulata keneya la. ¹⁴ Fen fen du bulata keneya la, wo keta keneya ti. Wo le x’a tu, a fota xo: «Ite men be sinnoxola, kuni. Kuni xa bo furelu to, Kirisita si keneya bo í ɲen.» ¹⁵ Wo to, alu i korosi alu bosilolu to. Alu xana i taxama í xo hakilintanŋolu, bari alu i taxama í xo hakilimalu. ¹⁶ Alu waxato tomuta bete, bawo bi lunŋolu xa jaxu. ¹⁷ Wo to, alu xana ke hakilintanŋolu ti, bari alu i balan xa Marigi sago lon. ¹⁸ Alu xana i fa dolo la; wo si alu bula kukuntanko le la. Bari alu a tu Ni Senunŋo x’alu fa. ¹⁹ Alu i ɲoxo jusudun Jaburu donkilolu nin tantuli donkilolu nin Alabunɲa donkilolu la. Alu donkilo la xa Marigi tantu alu jusukunŋo bee la. ²⁰ Alu barako bula n Fa Ala ɲen tuma bee, anin kuwo bee to, n Marigi Isa Kirisita toxo la. ²¹ Alu xulu i ɲoxo ɲen, Kirisita ɲasilanɲa xanma. ²² Musolu, alu xulu alu xelu ɲen í xo alu be xulunin Marigi ɲen ɲa men. ²³ Bawo, xe le mu a musu kuntigo ti, í xo Kirisita mu Ala la jama kuntigo ti ɲa men. Kirisita le mu Ala la jama Kisibaxo ti, nin wo mu a balo ti. ²⁴ Wo xanma, musolu xa xan xa xulu i xelu ɲen kuwo bee to, í xo Ala la jama be xulunin Kirisita ɲen ɲa men. ²⁵ Xelu, alu dulu x’alu musulu xanu í xo Kirisita xa Ala la jama xanu ɲa men, fo a x’a fan niyo di a nofe. ²⁶ A keta a fe wo ɲa ma Ala la jama xa ke Ala ta ti, tumo men a x’a senuya jiyo nin Ala la xumo la. ²⁷ Katugala a diyata a ɲen xa Ala la jama lalo a fan ɲa xoto, a nooroma, a matakkibalo, a moromorobalo, anin a fentanŋo. A diyata a ɲen a xa ke senumanŋo nin jalagibalo ti. ²⁸ Wo ɲa ma, xe xa xan x’a musu xanu í xo a fan balo. Xe men be a musu xanula, wo be a fan ne xanula. ²⁹ Awa moxo bada man í ban a fan balo to; bari a si a balu, x’a topoto, í xo Kirisita be Ala la jama topotola ɲa men, ³⁰ nin wo mu a balo ti, n bee mu men dula do ti. ³¹ Kitaabo x’a fo xo: «Wo le xanma, xeba si a na nin a fa bula x’é noto a musu la; i fulo si ke kilin ti.» ³² Gulleba le mu ɲin ti. Nte b’a fola xo Kirisita nin Ala la jama te kuwo le mu le wo ti. ³³ Wo bee nin a ta, bee kilin kilin x’é musu xanu í xo í fan. Muso du x’a xe bunɲa.

¹ Dinŋolu, al’alu wulubaxolu lame x’a la Marigi sago xan, bawo wo be bennin. ² «Í na nin í fa bunɲa.» Wo le mu Ala la sariya folo ti, lahido kafuta men ma: ³ «walasa í xa heero soto, xa me í nila duguxulo xan.» ⁴ Alu falu, alu dulu xana alu dinŋolu juso tiɲa, bari alu i labunɲa, x’e laxaran anin x’e tonben x’a la Marigi sago xan. ⁵ Jonŋolu, marigo mennu be alu ma ɲin duniya in to, alu xulu wolu ɲen silanɲa nin jarajaro to. Alu baaro ke i ɲen jusukun xoyiya to, x’a ke í xo nin alu b’a kela Kirisita le fan ɲen. ⁶ Alu xana baaro ke nin i be alu lakorosinin tumo men doron, walasa x’alu fannu kudiya i ɲen; bari alu Ala sago ke alu jusukunŋo bee la, í xo Kirisita la jonŋolu. ⁷ Alu baaro ke i ɲen xonotodiya to, í xo nin alu be baaro kela Marigi le fan ɲen. Alu xana a jaate moxolu ɲen ti. ⁸ Alu a lon xo moxolu bee, jon wo, hooro wo, bee kilin kilin s’í la ku ɲuma keninŋolu sara soto Marigi la. ⁹ Marigolu, alu dulu xa wo ɲoxon ke alu la jonŋolu ɲen, alu xana feten feten i la, x’e lasila. Alu x’a lon xo atelu nin itelu bee Marigi be sanŋo to, wo nte moxo fisiyala moxo ti. ¹⁰ Ń na xuma labanŋo fele xo: Alu barako ta alu nin Marigi la kafuɲoxoya xono, xa bo a la sintigiya barakemaba to. ¹¹ Ala be kelekemiranŋo mennu dila, alu wolu bee dun alu ma, walasa alu xa sin xa Sentane la feere jaxolu kele. ¹² Bawo n nin mennu be kelo la, wolu nte hadamadinŋolu ti, bari kuntigiyalu nin fangolu, anin ɲin duniya dibinin in kunnasigibaxolu, anin jinnolu mennu be siginin sanŋo to, ku jaxo xanma. ¹³ Wo le x’a tu, alu Ala la kelekemiranŋolu bee ta, walasa nin lun jaxo nata, alu xa sin xa kelo ke; kelo xofe, alu xa sin xa tu lonin. ¹⁴ Awa, alu i toben! Alu tonɲa ke alu tetositilanŋo ti, xa tilinninɲa ke alu la negedoroko ti. ¹⁵ xibaru Dimanŋo men be heero dila, wo xa ke alu sintosamato ti, alu x’e jija xa wo fo. ¹⁶ Lannaya xa ke alu la tuma bee, a be í xo negekunbennanŋo, wo s’a tu alu si Sentane la beɲe wuleninŋolu bee faxa. ¹⁷ Alu kisita, alu wo kisilo muta x’a ke alu kunna negekufuno ti. Alu Ni Senunŋo la fanŋo ta, nin wo mu Ala la xumo ti. ¹⁸ Alu wo bee ŋinin Ala fe, taralo la. Alu Ala matara tuma bee Ni Senunŋo barako to, xa taralolu nin taraliba sifa bee do ke. Alu tu i ɲala, x’e balan xa tu taralo kela Ala la moxo senumanŋolu bee ɲen. ¹⁹ Alu Ala matara nte du ɲen, walasa nin nte be xumala tumo men, Ala xa xuma sinŋo di nte ma, ń hakilo lasigininŋo xa Xibaru Dimanŋo gullo yita moxolu la. ²⁰ Nte keta wo Xibaru Dimanŋo la lasigidinŋo ti, xa ń tu negejoloxo la, kaso la. Alu Ala matara nte ɲen walasa ń xa Xibaru Dimanŋo fo a foɲa ma, xa ń hakilo lasigininŋo tu. ²¹ Awa, Tisike, nin wo mu n badinxe xanuninŋo, anin nte baarakeɲoxo xantigo ti Marigi ɲen, wo si nte xibaro bee fo alu ɲen, walasa alu xa nte la ɲa lon. ²² Nte b’a kila alu ma ɲin ne xanma, walasa a xa ntelu la xibaruya di alu ma, anin a x’alu hakilo lasigi. ²³ Fa Ala anin Marigi Isa Kirisita xa heero nin xanuya anin lannaya di badinŋolu bee ma. ²⁴ Ala la neemo xa ke n Marigi Isa Kirisita xanubaxa jonjonŋolu bee fe.